డార్క్ మూవీస్ స్క్రీన్ ప్లే సంగతులు -3

   సర్వసాధారణంగా ఒక కంగారు వుంటుంది. తక్కువ పాత్రలతో సీన్ టు సీన్ ఎత్తుకున్న అదే పాయింటుతో సూటిగా సాగుతూంటే కథ సాదాగా వుందని, ఫ్లాటై పోతోందనీ. అందుకని సబ్ ప్లాట్స్ కలపాలని నిర్ణయించుకుంటారు.  కథకి ఉపకథల మణిహారం వేస్తారు. ఇలా కాక ఉన్న కథని ఎలా చెబుతున్నామని కాదు, ఎలా చూపిస్తున్నామని పునరాలోచించుకుని ‘బ్లడ్ సింపుల్’ లాంటి నోయర్ మూవీస్ కుండే పంథాని  అనుసరిస్తే? నిగూఢార్ధాలు చూపిస్తున్నప్పుడు ఇంకా ఉపకథలు అవసరపడతాయా? చిన్న కథే అయినా క్షణం క్షణం ఆలోచింపజేయకుండా, జీవం నింపకుండా వెండితెర మీద తీసికెళ్ళి పడేస్తే,  ఎన్ని ఉపకథలైనా దాన్ని కాపాడుతూ కూర్చుంటాయా?  కథనంలో నాటుతున్న నిగూఢార్ధాలు, బలమైన పాత్ర చిత్రణలు, సైకలాజికల్ ట్రాక్ లు  ‘బ్లడ్ సింపుల్’ ఒక్కోసీనుని ఎంత సార్ధకం చేస్తున్నాయో గమనిస్తూ వస్తున్నాం. సబ్ ప్లాట్స్ లేకపోయినా  ఈ చిన్న కథ కళాత్మక విలువలతో కూడిన ఎలిమెంట్స్ తోనే ఎంత బలంగా, వ్యాపారాత్మకంగా మారిందో  ఇంకా గమనిద్దాం...      

          నిన్నటి నాల్గవ సీనులో డిటెక్టివ్ విస్సర్ తన ఫిలాసఫీని ఎలా వర్కౌట్ చేసుకుని బాగుపడుతున్నాడో గమనించాం. ప్రారంభంలో అతడి స్వగతమే అతడి ఫిలాసఫీ. అవసరం కొద్దీ నిన్ను ఆశ్రయించిన వాళ్ళని నీ అవసరాలకి వాడుకుని విసిరిపారేయ్ -అనే ఫిలాసఫీని  చక్కగా వర్కౌట్ చేసుకుంటూ, చూసి రమ్మంటే కాల్చి వచ్చాడు. ఆ ఫోటోలతో మార్టీని తన అవసరాలకి వాడుకోవాలని ఉద్దేశం. మార్టీ ఇల్లు కాలి ఏడుస్తూంటే దానికి ఫ్రేము కట్టి చూపిస్తున్నాడు విస్సర్. నిజానికి ఆ ఫోటోలకి భయపడకూడదు మార్టీ. భార్య మీద సాక్ష్యాలు సంపాదించి విడాకులకి పోవాలనుకుంటే,  ఈ ఫోటోలు బాగానే  పనికొస్తాయి. కానీ అతను భార్య గురించి మనసు మార్చుకున్నాడు, కనుక ఈ ఎఫైర్ బయటపడకూడదని విస్సర్ కి లొంగి డబ్బిచ్చాడు. మళ్ళీ రావద్దన్నాడు. ఇక్కడ దర్శకులు ఒక పాయింటుని ఉపేక్షించారు. మార్టీ నెగెటివ్ లు అడగలేదు. మళ్ళీ ప్రింట్లు తీసి బ్లాక్ మెయిల్ చేయవచ్చు విస్సర్. 

          కానీ భార్య చేస్తున్న తప్పుకంటే మార్టీ చాలా పెద్ద తప్పే చేశాడు విస్సర్ ని ఆశ్రయించి. విస్సర్ ప్రొఫెషనల్ డిటెక్టివ్ అయితే, ప్రొఫెషనల్ గానే  మార్టీ కి రిపోర్టిచ్చి ఫీజు తీసుకుని వెళ్ళిపోతాడు. అంతేగానీ డబుల్ క్రాస్ చెయ్యడు. కానీ విస్సర్ అసాంఘీక శక్తిగా మారాడు వృత్తిని ఉపయోగించుకుని. డబుల్ క్రాస్ మరిగాడు. అసాంఘీక శక్తుల సాయం కోరడం ఎంత తప్పో, మధ్యలో మనసు మార్చుకుని తప్పుకోవాలనుకోవడం అంతకంటే పెద్ద తప్పే అవుతుంది.  ఏ అసాంఘీక శక్తి వూరుకోదు మధ్యలో తప్పుకుంటానంటే. అయితే ఇప్పుడు భార్య గురించి మనసు మార్చుకుని, తను చేసుకున్న రొష్టు లోంచి బయటపడాలనుకుని మార్టీ ఇలాగే వుంటే విస్సర్ ఏం చేసేవాడో గానీ, వెళ్లి వెళ్లి మళ్ళీ మార్టీ ఇంకో అవసరానికి విస్సర్ నే ఆశ్రయించడం అతి ఘోరమైన తప్పు....ఇదెలా జరుగుతుందో ఇక ముందుముందు చూద్దాం...

5. బార్ లో మార్టీ బార్ టెండర్  ఫ్రెండ్ తో విచిత్రంగా ప్రవర్తించడం. 

      నాల్గవ సీను ఫ్లాష్ బ్యాకుగా చూశాం,  దాని  కొనసాగింపే ఈ ఐదో సీను. నాల్గో సీను చివర్లో మార్టీ అద్దంలోంచి బార్ లోకి చూస్తాడు. ఒకతను బల్లలెక్కి  పోతున్న దృశ్యం కనపడుతుంది. ఇప్పుడు ఐదో సీనుకి కట్ చేస్తే, ఆ బల్లలెక్కిపోతున్న అతను  ఇటు అదే అద్దంలో కన్పిస్తూంటాడు. మార్టీ ఆఫీసులోంచి చూస్తే  ఇది ప్లెయిన్ గ్లాస్,  బార్లోంచి చూస్తే మిర్రర్. నోయర్ మూవీస్ లో మిర్రర్స్ కూడా ఒక ఎలిమేంటే అని తెలుసుకున్నాం. ప్రేక్షకుల్ని కన్ఫ్యూజ్ చేయడానికి, పాత్ర స్ప్లిట్ పర్సనాలిటీ అయితే అది చెప్పడానికీ మిర్రర్స్ ని వాడతారు. 

          ఇక్కడ కన్ఫ్యూజ్ చేయడానికే వాడారు. ఈ సీనులో పెద్దగా ఆశ్చర్యాలు లేవు. కాబట్టి మిర్రర్ తో ఒక ఝలక్ ఇస్తూ సీను ఓపెన్ చేశారు. ప్రేక్షకులు అవులించేట్టు సీన్లు వుండ  కూడదని ఉద్దేశం. ఆ జంప్ చేస్తూ తిరుగుతున్న అతను బార్ టెండర్ మారీస్. అతను ఎవరెవరికి ఏం కావాలో చూసి, హడావిడి చేసి, జ్యూక్ బాక్సులో సాంగ్ వేసి, ఒంటరిగా కూర్చుని బ్రాందీ సిప్ చేస్తున్న ఒకమ్మాయి దగ్గర కొస్తాడు. వచ్చి కూర్చుని, ‘ఎక్కడిదాకా వచ్చాను?’ అంటాడు. 

          రింగ్ ఆఫ్ ఫైర్ గురించి చెప్తున్నావ్ –అంటుంది. అందుకుని చెప్పడం మొదలెడతాడు మారీస్. అంటే ఇంతకి ముందు నుంచే వీళ్ళు మాట్లాడుకుంటూ వున్నారన్నమాట. ఇలాకాక ఇప్పుడే ఆమెని చూసినట్టు పలకరించడం, బొట్టు పెట్టి కబుర్లకి కూర్చోబెట్టడం లాంటి ఇంట్రడక్షన్ అంతా కథనం మీద పట్టులేని తనం కింది కొస్తుంది. ఆల్రెడీ వాళ్ళు కబుర్లలో వున్నారని హాల్ఫ్ వేలో సీను నడిపిస్తే,  ఏ విషయం మాట్లాడుతున్నారో ఆ విషయం మీదికే నేరుగా వెళ్ళిపోయి ఆసక్తి రేపవచ్చు- టైం సేవ్ చేయవచ్చు. 

          రింగ్ ఆఫ్ ఫైర్ గురించి చెప్తున్నావ్ – అని ఆమె అనేసరికి అతను  కొనసాగించడం మొదలెడతాడు. ఇక్కడ వీళ్ళు మాట్లాడుకుంటున్న విషయం కూడా పరోక్షంగా  కథనే తెలియ జేస్తోందని గమనించాలి. ఏదీ కాలక్షేప బఠానీగా లేదు ఈ కథనంలో. మారీస్ చెప్పుకుపోతున్నప్పుడు ఆమె జియాలజిస్టు అని తెలుస్తుంది. కాబట్టి ఒక జియాలజిస్టుగా అగ్నిపర్వతాలు పేలితే ఎంత శక్తిని విడుదల చేస్తాయో చెప్పమంటున్నాడు. ఆ శక్తితో లాస్ వెగాస్ నగరంలో ఎన్నేళ్ళ పాటు విద్యుదీపాలు వెలిగించుకోవచ్చు? 

          గొప్ప ఆశావాది. అప్పుడు వస్తూంటాడు అగ్నిపర్వతం లాంటి మార్టీ. ఇది డైనమిక్స్. డైలాగుతో మ్యాచయ్యే డైనమిక్స్. తెలుగులోనైతే- ఒకడున్నాడు, వస్తాడు, వచ్చేస్తున్నాడు- అని రాస్తారు టెంప్లెట్ ముందు పెట్టుకుని. వచ్చి, రే ఇంకా రాలేదా?- అంటాడు మార్టీ.

          ఇదేమిటి, రే మోటెల్ లో ఎబ్బీతో వున్నాడని తెలుసుగా?  అంటే సంధి చేసుకుంటున్నాడా సమస్యతో... రే గురించి ప్రశ్నోత్తరాలు అయ్యాక, ఆ అమ్మాయికేసి చూస్తాడు. ఆమె తన ఫ్రెండ్ దెబ్రా అని పరిచయం చేస్తాడు మారీస్. కౌంటర్ లో ఎవరో ఎదురు చూస్తున్నారు వెళ్ళమంటాడు మార్టీ. మారీస్ వెళ్ళిపోయాక, దెబ్రాతో మాటలు కలుపుతాడు. మారీస్ ఎప్పట్నించీ తెలుసు?- అంటాడు. పదేళ్లుగా తెలుసంటుంది.

          అప్పుడు మార్టీ ఏటో దిక్కులు చూస్తున్నట్టుగా రాశారు కోయెన్ బ్రదర్స్. దిక్కులు చూసి,  ప్రత్యేకంగా దేని గురించీ అని కాకుండా ఓ రెండు సార్లు తలూపి- ఆమెతో అంటాడని రాశారు- ఈ నైట్ నీ ప్రోగ్రాం ఏమిటి? 

          మారీస్ తో ఔటింగ్  కెళ్తున్నానని అంటుంది. తలనొప్పిగా వుందని చెప్పమంటాడు. సరేనంటుంది. అప్పుడు మొహం దగ్గరగా పెడుతూ, మనం సరీగ్గా కమ్యూనికేట్ అవడం లేదంటాడు. ఆమె రియాక్ట వుతుంది. చీవాట్లు పెట్టి, ఇప్పుడు కమ్యూనికేటయ్యాను పొమ్మంటుంది. మారిస్ రావడంతో, మార్టీ వెళ్ళిపోతూ- రే వస్తే తను లేడని చెప్ప
మంటాడు...

          ఈ ప్రవర్తనకి అర్ధమేమిటి? మనిషి స్థిమితంగా లేడు. క్షణం క్షణం మారిపోతున్నాడు. ఎటూ తేల్చుకోలేక పోతున్నాడు. భార్య పరాయి మగాడితో వుంటే ఏ మగాడైనా స్థిమితంగా వుండలేడు. ప్రేమకొద్దీ ఆమెతో రాజీపడితే చులకనై పోతాడేమో తెలీదు. లోలోపల మార్టీ నలిగిపోతున్నాడు- ఆ  నలుగుడులోంచే ఈ  సైకో లాంటి ప్రవర్తన. అక్కడ బార్ టెండర్ తన భార్యతో సరసాలడుతూంటే, ఇక్కడ ఈ బార్ టెండర్ ఫ్రెండ్ తో తను ఫ్లర్ట్ చేసి కచ్చి తీర్చుకోబోవడం...  ఇలాటి పరిస్థితుల్లో సైకో కిల్లర్స్ అయితే బార్ టెండర్స్ భార్యల్నీ, గర్ల్ ఫ్రెండ్స్ నీ చంపుకుంటూ పోతారు. తానెదుర్కొంటున్న పరిస్థితిలో పాత్ర నిండా సింక్ అయినప్పుడే ఇలాటి బలమైన సన్నివేశాలొస్తాయి.
          ఈ సీను మార్టీ సైకలాజికల్ ట్రాకు ప్రోగ్రెస్ చూపించడానికి రాశారు.

***

6. ఎబ్బీ  రివాల్వర్ తీసుకుని మార్టీ ఇంటినుంచి రే తో వెళ్ళిపోవడం 

         మార్టీ ఇంట్లో సీను వివరం ఇలా రాశారు- 

          జర్మన్ షెపర్డ్ హాల్లో నడుచుకుంటూ హాలు చివర వార్మ్ లైటింగ్ వున్న రూము వైపు వెళ్తూంటుంది. దాని అడుగుల చప్పుడు, లీలగా బిలియర్డ్ బాల్స్ చప్పుడూ వినపడుతూంటాయి.
          బిలియర్డ్ రూం లో ఓపెన్ చేస్తే- ఇది గోడలకి పానెల్స్ తో, కింద కార్పెట్ తో, బ్లాక్ లెదర్ ఫర్నీచర్ తో, ఒక తొమ్మిదడుగుల బిలియర్డ్ టేబుల్ తోనూ  వుంటుంది. రూంలో రకరకాల జంతు కళేబరాల ట్రోఫీలుంటాయి. వాటిలో ఒక దుప్పి కూడా వుంటుంది. రే ఒంటరిగా బిలియర్డ్స్ ఆడుతూంటాడు. ఒక వెలిగించని సిగరెట్ అతడి నోట్లో వుంటుంది. రూం చాలా నిశ్శబ్దంగా వుంటుంది. డోర్లోంచి జర్మన్ షెపర్డ్ రావడాన్ని నిశ్శబ్దంగా చూస్తాడు. 

         పై రెండు పేరాలకి అర్ధం  ఒకసారి చూస్తే, పెంపుడుకుక్క (జర్మన్ షెపర్డ్) హాల్లో నడుచుకుంటూ వెళ్తున్నప్పుడు నోయర్ ఎలిమెంట్ కమ్మేసి వుంటుంది. పక్కన కిటికీలకి అమర్చిన వెనీషియన్ బ్లయిండ్స్ లోంచి వెలుతురు కిరణాలు  ఇటు గోడల నిండా కటకటాల్లాంటి నీడల్ని ఏర్పరుస్తూంటాయి. మోటెల్ లో సీను తర్వాత ఇది మళ్ళీ ఒకసారి బార్స్, డయాగోనల్, ఫ్రేమ్స్ వితిన్ ఫ్రేమ్స్ షాట్స్ ఎలిమెంట్ లోని ‘బార్స్’ భాగం. ఈ వర్ణన స్క్రిప్టులో ఇవ్వలేదు గానీ చిత్రీకరణలో వుంది. కటకటాల నీడల్ని ఏర్పర్చే వెనీషియన్ బ్లయిండ్స్ నోయర్ మూవీస్ లో కామన్. అంటే ఒక విపత్తులో ట్రాప్ అవబోతున్నారనేం సూచన.  

          పెంపుడు కుక్క ఇలా కటకటాల్లాంటి నీడల మధ్య నడుచుకుంటూ పోతోందంటే దానికి  విపత్తా? కథలో ఇది కొత్త సంగతి కదూ? ఎవరి వల్ల విపత్తు? లవర్స్  రే - ఎబ్బీలతోనా?  మరి  ఈ పెంపుడు కుక్క ఈ కటకటాల్లాంటి వాతావరణంలోంచి అటు ‘వార్మ్ లైటింగ్’ వున్న రూము వైపు పోతోందని రాశారే? అంత నులి వెచ్చని గాఢ పరిష్వంగ మాధుర్యాన్ని అనుభవించడానికి అది పోతున్నట్టు రాస్తే, అక్కడ రే ఎబ్బీలే కదా వున్నారు? అంటే వాళ్లతో అది అంత వార్మ్ గా, సేఫ్ గా వుండగలదన్న మాట. మరెవరితో నాట్ సేఫ్? ఆ బద్మాష్ డిటెక్టివ్ గాడితోనేనా?  మొదటి షాట్ లోనే ఇంత కథ, ఇంత సస్పెన్స్  పెట్టి చంపారే! ఒకే ఒక్క షాట్ ఇంత కథని, సస్పెన్స్ నీ సృష్టిస్తుందా? వేకప్ టాలీవుడ్ మేకర్స్, వేకప్! కోటి రూపాయలతో బంగారాన్ని ఇవ్వచ్చు జీఎస్టీ బాధిత ప్రేక్షకులకిక,   గిల్టుతో ఇంకా మోసాలు చేయడం కాదు. 

          ఇక ఇక్కడొకసారి 4 వ సీనుని గుర్తు చేసుకుంటే, బార్ లో మార్టీ టేబుల్ మీద కాళ్ళు జాపుకుని కూర్చున్నప్పుడు, కాళ్ళకి హంటర్ బూట్లు వుంటాయి. ఇప్పుడు ఇక్కడ ఇంట్లో చూస్తే ఇన్ని జంతు ట్రోఫీలున్నాయి- అంటే మాంచి వేటగాడే నన్న మాట- వేటగాడికి ఆడదాని విషయంలో మాత్రం గురి లేని బలహీనత,  ఇదీ క్యారక్టరైజేషన్ అంటే.

          ఆ డాగ్ తోకూపుకుంటూ విశ్వాసం ప్రకటిస్తుంది రేకి. రే దాన్ని సున్నితంగా తాకి, ‘ఓపల్’ అని పిలుస్తాడు. ఐరనీ ఏమిటంటే, తన యజమానికి  ఈ రే అనే పనివాడు విశ్వాస ఘాతకుడిగా మారేడని దానికి తెలీదు. 

        పై గదిలో ఎబ్బీ ఏమిటో వెతుకుతూంటుంది. ఒక డబ్బీని తలకిందులు చేస్తే బుల్లెట్లు పడతాయి అరచేతిలో. రెండవ సీనులో మా ఆయన రివాల్వర్ గిఫ్ట్ ఇచ్చాడని చెప్పిందానికి, ఇక్కడ వస్తు రూప సాక్ష్యం. ఏకంగా రివాల్వర్ చూపించలేదు టాలీవుడ్ స్టయిల్లో. సస్పెన్స్ ని సస్టెయిన్ చేస్తున్నారు ముందు బుల్లెట్లు మాత్రమే బయట పెట్టి. బుల్లెట్లు వుంటే రివాల్వర్ కూడా వుండాలి కదా? అది వుందా లేదా? ఇక ఒకటే వెతకడం మొదలెడుతుంది. ఒకవేళ మార్టీ తీసికెళ్ళి పోయి వుంటే!

          కింద హాల్లో రే గోడకున్న పెద్ద పెద్ద ఫోటోలని చూస్తూంటాడు. పైన ఎడాపెడా హేండ్ బ్యాగులు వెతికేస్తూంటుంది ఎబ్బీ ఒకటే నెర్వస్ గా. కింద హాల్లో గోడకి పైన పెంపుడు కుక్క ఓపల్  ఫోటో ఫ్రేము వుంటుంది. కింద ఎబ్బీ, మార్టీల ఫోటోలుంటాయి. తమ జీవితాల్లో ఓపల్ కిస్తున్న స్థానమేమిటో దీన్ని బట్టి తెలుస్తోంది. కెమెరా పాన్ చేస్తూంటే,  కింది వరసలో  ముందుగా  ఎబ్బీ ఫోటో ఫ్రేములో కొస్తుంది, తర్వాత ఎబ్బీ మార్టీ లు కలిసున్న ఫోటో...చివర్లో ఇంకో పాత  ఫోటో వుంటుంది-  ఇద్దరూ బీచిలో దిగిన ఫోటో...ఈ బ్లాక్ అండ్ వైట్ ఫోటోలో స్విమ్మింగ్ సూటులో వున్న ఎబ్బీని ని సున్నితంగా తాకుతాడు రే. 4 వ సీనులో మార్టీ కూడా బ్లాక్ అండ్ వైట్ ఫోటోలో ఎబ్బీని తాకాడు. ఎబ్బీని మార్టీ కేవలం అలా తాకి వూరుకున్నాడు. ఇక్కడ రే మాత్రం పాదాల దాకా తాకుతూ వెళ్లి- ఈమె నాకే సొంతం అని సిగ్నల్ ఇస్తున్నాడు. ఈ చర్యతో కథలో టెన్షన్ పెరిగింది. ఈ ఆటలో మార్టిన్ ఓడిపోబోతున్నాడా? 

        రే  సిగరెట్టే ముట్టించకుండా నోట్లోనే  పెట్టుకుని  వుంటాడు. సైకలాజికల్ మీనింగ్ : ఏం జరిగినా ఈ  కొంపలో  నిప్పులు పోయదల్చుకోవడం లేదా తను? మరి ఎబ్బీని ఎలా గెల్చుకుంటాడు?  

          చిట్టచివరికి ఒక బ్యాగులో రివాల్వర్ని దొరికించుకుంటుంది ఎబ్బీ. ఆమె గదిలో ఇరవై ముప్ఫై హేండ్ బ్యాగులు పడుంటాయి. ఈ బ్యాగుల హాబీతో ఈమె ఇంటిపట్టున వుండే మనిషి కాదని ఈమె క్యారక్టర్ని ఇప్పుడు స్పష్టం చేస్తున్నారు. 

          ఎబ్బీ వచ్చేసి ఇక పోదామంటుంది. మోటెల్ కి పోదామంటే, లేదు నా యింటికి పోదాం, అక్కడ వుండమంటాడు. తను ఒకచోటికి వెళ్లి వస్తానంటే, బార్ కి మాత్రం వెళ్ళ వద్దంటుంది. మార్టీ ఎలాంటి వాడో నాకు తెలుసు, వెళ్ళ వద్దంటుంది. ఇంకొకర్ని కలవడానికి వెళ్తున్నానంటాడు. దీంతో ఈ సీను ముగుస్తుంది. ఈ రే మార్టీ దగ్గరకి వెళ్తున్నాడన్న సీరియస్ విషయంతో టెన్షన్ పుట్టించే ముగింపు ఇది. ఇలాటి సీన్లు వుంటే ఇంకా సబ్ ప్లాట్స్ అవసరమా?

 (ఇంకా వుంది)
- సికిందర్

డార్క్ మూవీస్ స్క్రీన్ ప్లే సంగతులు -2

     నిన్న ‘బ్లడ్ సింపుల్’ బిగినింగ్ 13 దృశ్యాల కథనం గురించి చెప్పుకోవడం మొదలెట్టాం. ఏ సినిమాకైనా మొత్తం బిగినింగ్ కి సీన్ల కలబోత వుంటుంది. బిగినింగ్ విభాగంలో ఏమేం కలపాల
న్నది బిగినింగ్ చివర్న అంటే ప్లాట్ పాయింట్ – 1  దగ్గర ఏర్పాటు చేసే సమస్యని బట్టి వుంటుంది. కాబట్టి బిగినింగ్ విభాగపు సీన్ల కలబోతని  ప్లాట్ పాయింట్ వన్నే నిర్ణయిస్తుంది. ముందుగా  ప్లాట్ పాయింట్ -1 దగ్గర సమస్యేమిటో నిర్ణయించకుండా బిగినింగ్ విభాగాన్ని రాయడం అసాధ్యం. గమ్యమేమిటో తెలీని ప్రయాణం లాంటిది. విజయవంతమైన సినిమాల సరళిని గమనిస్తే బిగినింగ్ లో పాత్రల్ని పరిచయం చేస్తూ జానర్ నీ, జానర్ సంబంధ నేపధ్య వాతావరణాన్నీ ఏర్పాటు చేశాక,  అప్పుడు ప్లాట్ పాయింట్ –1  అనే బిగినింగ్ ముగిసే గమ్య స్థానాన్ని దృష్టిలో పెట్టుకుని, దానికి దారి తీసే పరిస్థితుల కల్పన చేసుకొస్తారు. 

          ప్లాట్ పాయింట్ -1 దగ్గర ఏర్పాటు చేసే సమస్య –ప్రేమ ఇష్టంలేని ప్రవల్లిక ప్రఫుల్ ని కొండ మీంచి తోసి పారేద్దామని అనుకుందనుకుందాం- అప్పుడా  కొండ మీదికి తీసికెళ్ళే ఉద్దేశంతో సీన్లు పడుతూంటాయి. సమస్యకి దారితీసే పరిస్థితుల కల్పనకి ఇంతకి మించి ఏమీ లేదు- ప్లాట్ పాయింట్ -1 తెలిస్తే. మరొకటేమిటంటే,  ఏ కథయినా  ప్లాట్ పాయింట్ -1 దగ్గరే ప్రారంభమ
వుతుంది. కొండ మీంచి తోసిపారేసి ప్రవల్లిక చేతులు దులుపుకున్నాక, సమస్యలో పడ్డ ప్రఫుల్  ఏం చేశాడన్నదే కథ, అంతకి ముందుది కథకాదు. కేవలం కథకి సన్నాహం. బిగినింగ్ లో జరిగేదంతా కథకి సన్నాహాలే. అలాగే సమస్యంటూ- కథంటూ పుట్టాక - ఆ పుట్టిన చోటైన ప్లాట్ పాయింట్-1  కథని ముందుకి నెడుతూ నడిపిస్తుంది తప్ప, మరొకటి కాదు. కథని నెట్టుకుపోయే ప్లాట్ పాయింట్- 1 డ్యూటీ ప్లాట్ పాయింట్ -2 దగ్గర ముస్తుంది. తలెత్తిన సమస్యకి అక్కడో పరిష్కారం చూపించి క్లయిమాక్స్ కి వదిలేస్తుంది. కాబట్టి మొత్తం స్క్రీన్ ప్లేలో కథంటూ వుంటే అది ఈ రెండు ప్లాట్ పాయింట్ల మధ్యే వుంటుంది. అంటే మిడిల్ లో వుంటుంది.

          ఇంత కీలక పాత్ర వహించే ప్లాట్ పాయింట్ -1 నియో డార్క్ మూవీ  ‘బ్లడ్ సింపుల్’  లో ఎలా ఏర్పాటయ్యిందో తెలుసుకుంటున్నాం. నిన్నటి వ్యాసంలో గమనించిన బిగింగ్ వన్ లైన్ ఆర్డర్లో, చివరి సీను- అంటే పదమూడోది- ప్లాట్ పాయింట్ -1 ని నిర్ణయిస్తోంది.  బార్ ఓనర్ మార్టీ, తన భార్యనీ ఆమె ప్రియుణ్ణీ చంపమని డిటెక్టివ్ విస్సర్ కి ‘సుపారీ’ ఇచ్చే సీను. ఇదీ సమస్య ఏర్పాటు. కాబట్టి ఈ సమస్యకి దారితీసే పరిస్థితుల కల్పన – సీన్ల కలబోత ఇప్పుడు చూడబోతున్నాం. నిన్నటి వ్యాసంలో మొదటి రెండు సీన్లు తెలుసుకున్నాం. జానర్ ఏర్పాటుకీ, పాత్రల  పరిచయానికీ రెండు  సీన్ల సమయమే తీసుకున్నారు కోయెన్ బ్రదర్స్.  ఇది చాలా గ్రేట్. ఆ తర్వాత మూడో సీను నుంచి సమస్యకి దారి తీసే పరిస్థితుల కల్పనేమిటో ఇప్పుడు చూద్దాం...

 3. మోటెల్ లో ఎబ్బీ , రే లు శృంగారంలో పాల్గోవడం.

     ఎబ్బీ, రే లు బెడ్ మీద శృంగారం జరుపుకుంటున్నప్పుడు  వెంటనే ప్రారంభమయ్యే సీనుకి,  పుల్ బ్యాక్ అని రాశారు కోయెన్ బ్రదర్స్. కెమెరాని ఎందుకు పుల్ బ్యాక్ చేయాలి? అంటే అటు వెనకాల వీళ్ళని గమనిస్తున్న నేత్రాలున్నాయా?  ఇలా ఒక మిస్టరీని క్రియేట్ చేశారు పుల్ బ్యాక్ తో. 

          ఇప్పుడు రెండు నిగూఢార్ధాలు రాశారు - స్క్రిప్టులో హైలైట్స్ చూడండి :
          1. బయట హైవే మీద పోతున్న కార్ల హెడ్ లైట్స్ వెలుతురు  మాత్రమే అప్పుడప్పుడూ రూంలో పడుతున్నట్టూ, వెలుతురు  పోగానే చీకటి ఆక్రమిస్తున్నట్టూ రాశారు. ఇది సహజమే హైవే అంటూ వున్నాక. కానీ ఈ చీకటి వెలుగుల సయ్యాటకి ఇంకో అర్ధమేమైనా వుందా?

          2. పుల్ బ్యాక్ వైడ్ షాట్ వరకూ సాగుతుంది. చివరి కారు వెళ్ళగానే చీకటి కమ్ముతుంది. ఏమిటిది? కెమెరా భాషలో చెప్పాలంటే పుల్ బ్యాక్ వైడ్ షాట్ వరకూ సాగిందంటే, బెడ్ మీద వాళ్ళ శృంగారం సువిశాలంగా ప్రపంచానికి రట్టవుతున్నట్టా? 

          అప్పుడు టెలిఫోన్ రింగవుతుంది. ఇదేమిటి? ఇప్పుడెవరు కాల్ చేస్తున్నారు?
          చాలా మిస్టీరియస్ వాతావరణం తెర  వెనుక జరుగుతున్నదాని గురించి...

          ఇదే వైడ్ షాట్ నైట్ సీన్,  మార్నింగ్ ఎఫెక్ట్ కి మారుతుంది. అంటే గుట్టు రట్టవడం సువిశాలంగానే కాక, పట్టపగలు కూడా నన్నమాట.
          మార్నింగ్ ఎఫెక్ట్ లో వాళ్ళిద్దరూ బెడ్ మీదే నిద్రలో వుంటారు. ఫోన్ రింగ్ కంటిన్యూ అవుతుంది...
          రే తీసి మాట్లాడి స్థాణువవుతాడు. ఎవరది?-  అని ఎబ్బీ అంటే, మీ ఆయన- అంటాడు.

          ఇది  డిస్టర్బింగ్ డైలాగు. ఈ ఒక్క డైలాగుతో అనేక  ప్రశ్నలు తలెత్తుతున్నాయి.  దెబ్రా భర్త మార్టీ సరీగ్గా మోటెల్ కి కాల్ చేయడ మేమిటి? అతడికెలా తెలిసింది? ఆ రహస్య నేత్రాలు అతడివేనా?  వర్షంలో కారులో వున్నది అతనేనా? అది మార్టీయే అయితే అతనెందుకు అలాటి స్వగతం వేసుకుంటూ వచ్చాడు? అతను మోటెల్ కే వస్తే ఎందుకు రెడ్ హేండెడ్ గా పట్టుకోలేదు?  తీరిగ్గా వెళ్ళిపోయి తెల్లారి ఫోన్ చేయడమేమిటి? ఏమాశిస్తున్నాడు?

          ఎవరో బ్లాక్ మెయిలర్ కాల్ చేయాల్సింది నిజానికి. మనం మొదట్నించీ అజ్ఞాతంగా వున్నాడని భావిస్తున్న కన్నింగ్ ఫెలో నుంచి ఇలాటిది ఎక్స్ పెక్ట్ చేస్తున్నాం. వాడు కాల్ చేసి బ్లాక్ మెయిల్ చేయాలి నిజానికి. వాడు కాకుండా భర్త మార్టీ కాల్ చేశాడంటే,  అసలేం జరుగుతోంది తెర వెనకాల? ఈ స్క్రీన్ ప్లేలో మనం ఎక్స్ పెక్ట్ చేస్తున్నదాన్ని ఉల్టా పల్టా చేసేస్తూ జరగడమేనా అన్నీ?

          ఇలా మూడో సీనుకల్లా మార్టీని లాగి, పాత్రల సమీకరణలతో సమస్యకి దారి తీసే పరిస్థితుల కల్పన వెంటనే ప్రారంభమయ్యింది.
          ‘మీ ఆయన ’  – అన్నప్పుడు రే కిటికీ దగ్గర నిలబడి వుంటాడు. కిటికీ చువ్వల బ్యాక్ డ్రాప్ లో ట్రాప్ అవుతున్నట్టు వుంటాడు. డార్క్ నోయర్ లో ఇదొక ఎలిమెంట్ : బార్స్ డయాగోనల్, ఫ్రేమ్స్ వితిన్ ఫ్రేమ్స్ షాట్స్ : పాత్రలు పరిస్థితులకి బందీలై నట్టు, కర్మఫలం అనుభవిస్తున్నట్టూ  ఫీల్ కలగడానికి ఇలాటి  షాట్స్ తీస్తారని చెప్పుకున్నాం.  

***

4. డిటెక్టివ్ విస్సర్ ఆ ఫోటోలని మార్టీకి చూపించి డబ్బు తీసుకుని పోవడం.

క్రితం రాత్రి బార్ లో జరిగే ఈ సీను ఫ్లాష్ బ్యాక్ గా ఓపెనవుతుంది. టేబుల్ ముందు కూర్చున్న మనిషిని పాస్ అవుతూ ట్రాకింగ్ షాట్ వేస్తామని రాసుకున్నారు కోయెన్ బ్రదర్స్. అప్పుడొక ఫోటో వచ్చి టేబుల్ మీద ఆ మనిషి ముందు పడుతుందని పేర్కొన్నారు. కానీ చిత్రీకరణలో ఆ మనిషి టేబుల్ మీద కాళ్ళు జాపుకుని కూర్చుని వుంటాడు. అప్పుడు ఫోటో కాకుండా ఫోటో వున్న కవరు వచ్చి కాళ్ళ పక్కన పడుతుంది. దాని పక్కనే ఒక హేటు పెడుతూ ఎదురుగా కుర్చీలో ఒకతను కూర్చుంటాడు. ఇతడి ఫేస్ ఫ్రేములోకి రాదు- గొంతు వరకే కన్పిస్తూంటాడు. ఇది డైనమిక్స్. ఈ క్షణంలో సీను ప్రాధాన్యం ఆ ఫోటోకే. ఈ కూర్చున్నతనెవరో ఫేసు చూపించి దృష్టి మరల్చకూడదు. ఇతన్ని సస్పెన్స్ లో వుంచి ప్రీక్షకుల దృష్టి ఫోటో మీదే కేంద్రీకరింప జేయాలి. 

            కాళ్ళు జాపుకున్న మనిషి నిదానంగా ఆ కవరు అందుకోబోతున్నప్పుడు, బ్యాక్ గ్రౌండ్ లో పాట వస్తూంటుంది :  నీ తియ్యటి పెదాలు ఫోనుకి ఇంకా దగ్గరగా రానీయ్... మనిద్దరం కలిసి వున్నామన్న భావన రానీయ్ ...విడివిడిగా...ముందా  జ్యూక్ బాక్సు సొద తగ్గించమని చెబుదూ...

            కవరు లోంచి ఫోటో లాగి చూస్తాడు. కానీ అతడి ఫేసు రివీలవదు, ఎదురుగా కూర్చున్నతని  ఫేస్ ఇప్పుడు రివీలవుతుంది. ఇది డైనమిక్స్. ఇతను  భారీ మనిషి, ఎల్లో సూటులో వుంటాడు. తమాషాగా చూస్తూంటాడు.  

            ఇతను రివీలైన తర్వాత,  ఇప్పుడు ఫోటో చూస్తున్న మనిషి రివీల్ అవుతాడు. ఇది డైనమిక్స్. ఇతను ఎబ్బీ  భర్త మార్టీ! చాలా మిశ్రమ అనుభూతుల దృశ్యమిది!
            ఎందుకంటే, ఓపెనింగ్ లో టేబుల్ మీద కాళ్ళు జాపి దర్జాగా ఒంటరిగా కూర్చుని వున్నాడు. అంటే పరిస్థితి తన కంట్రోల్లోకి వచ్చిందన్న ధీమా. ఇక  దెబ్రా, రే లతో ఓ ఆటాడు కోవచ్చన్న విశ్వాసం. ఈ అనుభూతికి శృంగారానుభూతితో అదే భార్య ఎబ్బీ ని గుర్తుకు తెచ్చే పాట!  ఏం చెయ్యాలి?  వేటు వెయ్యాలా, చేపట్టాలా? 

            ఆ ఫోటోలో మోటెల్ లో బెడ్ మీద వున్న ఎబ్బీ, రే లని చూస్తాడు.  అప్రయత్నంగా చేతి వేలితో ఫోటోలో రే పక్కన పడుకున్న ఎబ్బీని  స్పృశిస్తాడు. అంటే ప్రేమ వున్నట్టే!
            అప్పుడు ఎదురుగా కూర్చున్నతను మాట్లాడతాడు.
            ఈ గొంతు ప్రారంభంలో స్వగతం పలికిన గొంతే అని, ఇతడి పేరు విస్సర్ అనీ,  ఇప్పుడు తెర పైకి తెస్తూ రాశారు కోయెన్ బ్రదర్స్. 

            ఇప్పుడా అజ్ఞాత కన్నింగ్ ఫెలో పూర్తిగా మన కళ్ళెదుట వున్నాడన్న మాట.  చూస్తే  వీడు కన్నింగ్ గానే వున్నాడు. పైగా  ఈ కథకి ప్రధాన పాత్ర ఇతనే అని తెలుస్తోంది!
            ఇక్కడ ఇద్దరి మధ్య విషయమేమిటంటే,  చూసి రమ్మంటే కాల్చి వచ్చావెందుకని  (ఫోటోలు తీసుకుని)మార్టీ అడగడం. దీనికి వంకరటింకరగా విస్సర్ చెప్పడం.
            ఇప్పుడు వెనక సీనులో మోటెల్ లో ఆ వెలుగు  నీడ సయ్యాటల అర్ధం తెలుస్తోంది!
            అవి పోతున్న కార్ల హెడ్ లైట్స్ వెలుగులే కావచ్చు. దాన్ని అంత హంగామాగా చిత్రీ కరించడ మెందుకు? ఎందుకంటే అది ఫోటోలు తీస్తున్నాడనేందుకు సింబాలిజం!

            ఆ వెలుగు నీడల్ని కెమెరా ఫ్లాషెస్ గా పసిగట్టమని నివేదన. ఆ పుల్ బ్యాక్, వైడ్ షాట్, ఒక పాయింటాఫ్ వ్యూలో దృశ్యం, వెలుగు నీడలు- ఇదంతా ఫోటోలు తీస్తున్న కుట్రకి అర్ధాలే!  ఇంత బ్యూటిఫుల్ రైటింగ్ ఎక్కడైనా వుంటుందా? 

            మనోడు ముందు నుంచీ వాళ్ళని కార్లో వెంటాడి వస్తూనే వున్నాడు, ఫోటోలు తీశాడు, మార్టీ ముందు హాజరై పోయాడిప్పుడు. 

            ఇక మోటెల్ కి మార్టీ ఎందుకు ఎలా ఫోన్ చేశాడో ఇప్పుడు స్పష్టమైపోయింది. అప్పటికే విస్సర్ నుంచి అతడికి సమచార ముందన్నమాట. మీ గుట్టు నాకు తెలిసిపోయిందని చెప్పడానికే కాల్ చేశాడు తప్ప మరొకందుకు కాదు.  

            ఇలా ఈ నాల్గవ సీనులో 2, 3 సీన్లలోని సస్పెన్స్ తో కూడిన అంశాల్ని, సందేహాలనీ ఇంకేం పెండింగులో వుంచకుండా ఓపెన్ చేసేశారు. ఎందుకంటే ఇంకా ఇవి కొనసాగిస్తే, ఇక్కడ్నించీ వేరే టాపిక్ తో నడిచే సీన్లు గజిబిజి అవుతాయి. ఆ వేరే టాపిక్ ఇప్పుడా జంటని మార్టీ ఏం చేస్తాడనేది. 

            మార్టీ తో ఈ మాటల మధ్యలో విస్సర్ సిగరెట్ కేస్ తీసి సిగరెట్ వెల్గించుకుని,  ఆ కేస్ ని టేబుల్ మీద పెడతాడని రాశారు కోహెన్ బ్రదర్స్. అలాగే దాని క్లోజ్ షాట్ లో చూపించారు. ఎందుకు దీన్ని ఇంత ప్రత్యేకంగా ఎస్టాబ్లిష్ చేస్తున్నారు? ఎందుకంటే పైకి కన్పిస్తూ నడిచే పాత్రల కథే గాక, అంతర్గతంగా వాటి సైకలాజికల్ ట్రాక్ ని కూడా ఏర్పాటు చేస్తున్నారు ఈ దర్శకులు.
            ఈ సైకలాజికల్ ట్రాక్ లో భాగం గానే ఈ సిగరెట్ కేస్ ని ఎస్టాబ్లిష్ చేయడం. దీనర్ధమేమిటి? తెలుసుకుందాం. 

            ఇక్కడ మార్టీ అనే ఒక మాట అతిపెద్ద క్యారక్టర్ రివర్సల్ కి దారితీస్తుంది. అలాటి ఫోటోలో కూడా భార్యని స్పృశించి ప్రేమని చాటుకున్న అతడికి,  కీడు తలపెట్టే ఆలోచనే తొలగిపోయిందేమో. అందుకే, ‘ఇలాటి చెడు వార్త మోసుకొచ్చే వాణ్ణి  గ్రీస్ లో తల తీసేస్తారు!’ అనేస్తాడు. 

            చెడు జరుగుతోందని తెలిసినప్పుడు చెడు వార్త కాకుండా ఎలా వుంటుంది?  అంటే ఇప్పుడది  చెడు కాదని నమ్ముతున్నాడా? భార్య గురించి మనసు మార్చుకున్నాడా? మనం ఆశిస్తున్న దానికి భిన్నంగా తిరగబడింది ఇంతలోనే పాత్ర. 

            మార్టీ ఇలా అన్నాక, ఇంకో నిగూఢార్ధం రాశారు- ఆఫ్ స్క్రీన్ లోంచి సిగరెట్ పొగ ఫ్రేములోకి వస్తుందని (స్క్రిప్టు 8 వ పేజీలో హైలైట్ చూడండి)- నువ్వు మారాలనుకున్నా పరిస్థితులు అందుకనుమతించవు -  అనే అర్ధంలో. ఆ సిగరెట్ పొగ మేఘం కమ్మేయడం ఆ డిటెక్టివ్ కంట్రోల్లోకి తను వెళ్ళబోతున్న సంకేతం. నిత్య జీవితంలో మనకిలాటివి జరుగుతూంటాయి- కానీ మనం తెలుసుకోం. బయటికెళ్ళి పొగ వూదురా వెళ్ళు-  అని నెట్టి పారేస్తాం, వాడి బాడీ లాంగ్వేజికి అర్ధం గ్రహించకుండా. మార్టీ ధోరణీ ఇదే. 

            మార్టీ సేఫ్ దగ్గరకి వెళ్తాడు. అప్పుడు గ్రీస్ సంగతి తనకి తెలీదనీ, ఇక్కడ నిర్దుష్టమైన చట్టాలున్నాయనీ అంటూ, తను వార్తలు మోసుకొచ్చే మెసెంజర్ కాదనీ, ప్రైవేట్ డిటెక్టివ్ ననీ చెప్తాడు విస్సర్. ఇలా ఇతను డిటెక్టివ్ అన్న సంగతిని సీను చివరి వరకూ అట్టి పెట్టారు దర్శకులు. దీన్ని గమనించాలి. ఏ విషయం ఎక్కడ ఎప్పుడు చెప్తే థ్రిల్  చేస్తుందో తెలుసుకోవాలి.

            డిటెక్టివ్ అయ్యుండీ బ్లాక్ మెయిల్ ఎందుకు చేస్తున్నాడు క్రిమినల్ లా? చూసి రమ్మంటే ఫోటోలు తెచ్చి? డార్క్ మూవీస్ లో కొన్నిసార్లు నీతి లేని డిటెక్టివ్ పాత్ర లుంటాయి. అలాంటిదే ఇదీ.

            అప్పుడు మార్టీ డబ్బున్న కవరు తెచ్చి విస్సర్ కేసి విసురుతాడు.
            ఇక్కడ మరో నిగూఢార్ధం రాశారు ప్రత్యేకించి...(స్క్రిప్టు 9 వ పేజీలో హైలైట్చూడండి).  ఆ కవరు విస్సర్ కేసి విసిరినప్పుడు,  వెళ్లి ఛాతీకి కొట్టుకుని రివర్స్ లో వచ్చి కింద పడుతుందనీ. 

       విస్సర్ కి కూడా లాక్ పడబోతోంది ఈ ఆటలో!  దుర్నీతితో అతను గుంజుతున్న డ బ్బు, తపిస్తున్న  గుండెలకి తగిలింది గానీ, నేలపాలయ్యింది. ఏ మాత్రం అతడికి దుష్కర్మ ఫలాలు దక్కబోవని హెచ్చరిక. 

            మళ్ళీ రావద్దంటాడు మార్టీ. విస్సర్ పెద్దగా నవ్వేస్తూ కిందపడ్డ కవర్ని తీసుకుని వెళ్ళిపోతూ వెనక్కి వస్తాడు. ఇక్కడ ఇంకో నిగూఢార్ధం (9 వ పేజీ)...వెనక్కి వచ్చి టేబుల్ మీద పెట్టిన సిగరెట్ కేస్ తీసుకుని వెళ్ళిపోతాడని... దీన్ని క్లోజప్ తో రిజిస్టర్ చేస్తారు.

            ఇది విస్సర్ సైకలాజికల్ ట్రాక్ కొనసాగింపు. ముందు టేబుల్ మీద సిగరెట్ కేస్ పెట్టేయడం, వెళ్తూ మర్చిపోయి వెళ్ళబోవడం, వెనక్కి వచ్చి తీసుకోవడం...ఇదంతా అతడి సైకలాజికల్  ట్రాక్. ఈ ప్లేస్ లో సిగరెట్ కేస్ వదిలెయ్యకుండా భద్రంగా తీసికెళ్ళగల్గిన విస్సర్, ఇంకోసారి ఏదైనా మర్చిపోయి వెళ్తాడా? అలా మర్చిపోయి వెళ్ళడం పీకల మీదికి తెస్తుందా? ముందు ముందు సీన్లలో చూద్దాం...ఈ నాల్గవ సీను ముగిసింది. ఈ సీన్ స్ట్రక్చర్ ని స్టడీ చేసి, ఈ ఒక్క సీనులో చిన్న చిన్న మాటల  ద్వారా, చర్యల ద్వారా ఎన్నెన్ని విషయాలు వెల్లడై, వల్లో పడి, కథనం ఎంత లోతుగా,  చిక్కగా రూపొందుతోందో  ఒకటికి పదిసార్లు పరిశీలించుకోవాలి.

-సికిందర్ 

డార్క్ మూవీ స్క్రీన్ ప్లే సంగతులు!

కథ

          టెక్సాస్ లో బార్ యజమాని మార్టీ, భార్య దెబ్రా, వర్కర్ రే, ఓ ప్రైవేట్ డిటెక్టివ్ విస్సర్ లమధ్య జరిగే నేర కథ ఇది. నైతిక విలువలు లేని, స్వార్ధాలూ విశ్వాస ఘతాలు, వెన్ను పోట్లూ పొటమరించిన చీకటి మనుషుల ఎత్తుగడలివి. ఎప్పుడూ మూడీగా వుండే భర్త మార్టీ తో విసిగి,  రే తో శారీరక సంబంధం పెట్టుకుంటుంది దెబ్రా. మార్టీ అనుమానించి ఆధారాలు సేకరించమని విస్సర్ ని కోరతాడు.  విస్సర్ ఒక మోటెల్ లో వాళ్ళ పడగ్గది దృశ్యాలు ఫోటోలు తీసి మార్టీకి చూపించి జోకులేస్తాడు. మార్టీ అహం దెబ్బ తిని, డబ్బు మొహాన కొట్టి మళ్ళీ రావద్దంటాడు.
          అటు దెబ్రాని తీసుకుని  తన ఇంటికెళ్ళి పోతాడు రే. వెళ్ళిపోతూ మ్యారేజ్ డేకి మార్టీ  గిఫ్టుగా ఇచ్చిన రివాల్వర్ని  తీసుకుని వెళ్ళిపోతుంది దెబ్రా.

          ఆతర్వాత జీతం డబ్బుల కోసం మార్టీ దగ్గరికొస్తాడు రే. కుతకుత లాడిపోతున్న మార్టీ,  ఎప్పుడో  డిస్మిస్ చేశాను పొమ్మంటాడు. దెబ్రా తో దెబ్బ తిని ఛస్తావని హెచ్చరిస్తాడు. మళ్ళీ ఈ ఛాయల కొస్తే చంపేస్తానంటాడు.

          దెబ్రా రే ఇంట్లో వుందని ఫోన్ చేసి తెలుసుకున్న మార్టీ, రే ఇంటికి  వెళ్లి   దెబ్రా మీద దాడి  చేసి గాయపడి వెళ్ళిపోతాడు. ఇక లాభం లేదని డిటెక్టివ్ ని విస్సర్ ని ఆశ్రయిస్తాడు. వాళ్ళిద్దర్నీ చంపెయ్యమని కోరతాడు.

            ఇలా ఒప్పుకున్న పని ప్రకారం డిటెక్టివ్ విస్సర్ వాళ్ళిద్దర్నీ చంపాడా లేదా? ఆ మృతదేహాల ఫోటోలు చూసిన మార్టీన్ ఏమయ్యాడు? హంతకుడైన విస్సర్ ఏ శిక్ష అనుభవించాడు? ఇందులో దెబ్రా రివాల్వర్ ఏ పాత్ర వహించింది? దొరికిపోవడానికి విస్సర్ ఏఏ ఆధారాలు వదిలాడు?...ఇవన్నీ ఒక పథకం ప్రకారం సాగే కథనంలో వెల్లడవుతాయి.

          ముందుగా ఈ కథ ఎలా స్క్రీన్ గా రూపొందిందో, స్క్రీన్ ప్లేలో  మూడు విభాగాలుగా వుండే బిగినింగ్ - మిడిల్ - ఎండ్ లు ఎలా నిర్మాణమయ్యాయో చూద్దాం. బిగినింగ్ విభాగాన్ని వన్ లైన్ ఆర్డర్ గా చూస్తే  13 సీన్లున్నాయి. అవి : 

          1. డిటెక్టివ్ విస్సర్ వాయిసోవర్ తో ప్రారంభం. టెక్సాస్ పరిసర ప్రాంతాల నిస్సార భూభాగాలని చూపిస్తూ విస్సర్ స్వగతం.
          2. రాత్రివేళ  వర్షంలో ప్రయాణిస్తూ ఎబ్బీ , రే లు ఒక మోటెల్ కి చేరుకోవడం.
            3. మోటెల్ లో ఎబ్బీ , రే లు శృంగారంలో పాల్గోవడం.
          4. డిటెక్టివ్ విస్సర్ ఆ ఫోటోలని మార్టీకి చూపించి డబ్బు తీసుకుని పోవడం.
          5. బార్ లో మార్టీ బార్ టెండర్ గర్ల్ ఫ్రెండ్ తో విచిత్రంగా ప్రవర్తించడం.          

           6. ఎబ్బీ  రివాల్వర్ తీసుకుని మార్టీ ఇంటినుంచి రే తో వెళ్ళిపోవడం.
          7. రే బార్ కెళ్ళి జీతం డబ్బులు అడిగి మార్టీ ని రెచ్చ గొట్టడం.
          8. మార్టీ ఇంటి కెళ్ళకుండా బార్లోనే వుండిపోవడం, రే ని రానివ్వద్దని బార్ టెండర్ కి చెప్పడం.
          9. రే తో వుంటున్న ఎబ్బీ  అతను మూడీగా వుండడం చూసి వేరే పడుకోవడం.
          10. బార్ లో మార్టీ దీర్ఘాలోచనలో వుండడం.
          11. మధ్యరాత్రి తన దగ్గరికి వచ్చిన దెబ్రాని చూసి రే మెత్త బడడం.
          12. ఉదయం మార్టీ వచ్చి ఎబ్బీ  మీద దాడికి విఫలయత్నం చేయడం.
          13. దెబ్రా-రేలని  చంపెయ్యమని మార్టీ విస్సర్ ని కోరడం.

***

          పై ఆర్డర్ ని ఈ లింక్ ని ఇక్కడ క్లిక్ చేసి ఒరిజినల్ స్క్రీన్ ప్లే కాపీలో సరిచూసుకోవచ్చు. స్క్రీన్ ప్లేలో ఈ బిగినింగ్ విభాగాన్ని డౌన్ లోడ్ చేసుకుని దగ్గర వుంచుకుని, సినిమాకూడా చూసి, అప్పుడు స్టడీ కెళ్తే బావుంటుంది. హాలీవుడ్ స్క్రీన్ ప్లేలని పైపైన చదివెయ్యకుండా, మనసు పెట్టి  స్టడీ చేయాలి. అలా స్టడీ చేసినప్పుడు, ఈ స్క్రీన్ ప్లే కాపీలో హైలైట్ చేసిన అంశాలు కథనంలో నిగూఢ అర్థాలని ఇస్తున్నట్టు అర్ధమవుతుంది. సాధారణంగా తెలుగు స్క్రిప్టుల్లో (డైలాగ్ వెర్షన్స్ లో) పేజీలో ఎడమ వైపు వివరం, వర్ణన, యాక్షన్లు, రియాక్షన్లు, పాత్రల పేర్లు రాసి, కుడి  వైపు ఆ పాత్రల పేర్ల కెదురుగా డైలాగులు రాస్తారు. మద్రాసులో వున్నప్పుడు ఒకానొక దర్శకుడు ఇలా రాసిచ్చిన సీన్ పేపర్ని నిలువునా మధ్యకి చించి, డైలాగులతో కూడిన కుడి భాగం వుంచుకుని;  వివరం, వర్ణన, యాక్షన్లు, రియాక్షన్లు వగైరా వుండే కుడి భాగాన్ని అవతలకి విసిరేవాడట. అంటే రచయిత ఏం రాస్తాడో డైలాగులు రాసుకోవాలేగానీ, ఎడం పక్క డైరెక్షన్ నేర్పుతూ రాస్తే మాత్రం  మర్యాద దక్కదని చెప్పడమన్నమాట. రెగ్యులర్ కమర్షియల్ సినిమాల స్క్రిప్టుల్లో లెఫ్ట్ లో ఏమీ రాయకున్నా డైలాగులు పట్టుకుని తీసేయొచ్చు నిజానికి. ఎందుకంటే లెఫ్ట్ లో రాసే వివరం, వర్ణన, యాక్షన్, రియాక్షన్లు రోటీన్ గానే వుంటాయి :

          నవ్వుతూ-  రాధ :  నన్ను ప్రేమిస్తున్నావేంటీ గోపీ?
          ఏడుస్తూ –  గోపి :  అవును కదా రాధా,  ప్రేమించ కూడదా?
          రాధ ఒక్కటి పీకింది.
          గోపి పరుగెత్తాడు. 

          ...ఇలా రెగ్యులర్ కమర్షియల్ సినిమాలకి మొక్కుబడిగా  లెఫ్ట్ రాస్తే సరిపోతుంది. కానీ నోయర్ జానరైన డార్క్ మూవీస్ కి ఇలా రాస్తే తేలిపోతుంది. డార్క్ మూవీస్ దృశ్యాల్లో నిగూఢార్ధాలుంటాయి. అవికూడా కథ చెపుతూంటాయి, పాత్రల్ని చెపుతూంటాయి.  అందుకే డార్క్ మూవీస్ కళాత్మకమైనవి- నిజమైన వ్యాపారాత్మక కళ. ఈ నిగూఢార్ధాలు ఏఏ ఎలిమెంట్స్ ద్వారా వ్యక్తమవుతాయో గత ‘డార్క్ మూవీ ఎలిమెంట్స్ ఒక ఆర్టు’ అన్న వ్యాసంలో తెలుసుకున్నాం : 

          1. చారుస్కూరో లైటింగ్, 2. హై కాంట్రాస్ట్ , లాంగ్ షాడోస్, 3. డీప్ ఫోకస్, 4. ఎక్స్ ట్రీం హై, ఎక్స్ ట్రీం లో- యాంగిల్స్, 5. టైట్ క్లోజప్స్, 6. కాంప్లెక్స్ షాట్స్, 7. కాంప్లెక్స్ మీసాన్సెన్ షాట్స్, 8. ఎసెమెట్రికల్ కంపోజిషన్, 9. బార్స్, డయాగోనల్, ఫ్రేమ్స్ వితిన్ ఫ్రేమ్స్, 10. లాంగ్ ట్రాక్ షాట్స్, 11. అబ్ స్క్యూర్ సీన్స్, 12. డచ్ యాంగిల్స్, ఇన్వర్టెడ్ ఫ్రేమ్స్, 13. వాటర్ అండ్ రిఫ్లెక్షన్స్, 14. మిర్రర్స్, 15. మోటిఫ్స్ మొదలైనవి.

        కోయెన్ బ్రదర్స్ స్క్రీన్ ప్లే రాస్తున్నప్పుడే పై ఎలిమెంట్స్ లో చాలా వాటితో నిగూఢార్ధాలు సూచిస్తూ-  మన భాషలో చెప్పుకోవాలంటే ‘లెఫ్ట్’ రాశారు.  కొన్ని నిగూఢార్ధాల్ని స్క్రీన్ ప్లేలో  రాయకపోయినా, చిత్రీకరణలో కనబర్చారు. సినిమాలో వీటిని చూడొచ్చు. కాబట్టి డార్క్ మూవీస్ కి లెఫ్ట్ రాయడమంటే వివరం, వర్ణన, యాక్షన్, రియక్షన్లే, కాదు- విధిగా నిగూఢార్ధాలు కూడా రాసుకుని చిత్రీకరించడమన్నమాట. ఈ శతాబ్దం ప్రారంభం నుంచీ తెలుగు సినిమాలకి రచయితల్లేరు. దర్శకులే రచయితలయ్యారు. ఒకవేళ డార్క్ మూవీస్ అంటూ తీస్తే, వాటికి  కథ,  మాటలు అందించే రచయితలే వుంటే, ఆ రచయితా దర్శకుడూ కొట్టుకుని ఎవరి దారిని వాళ్ళు వెళ్ళిపోతారు. ఎందుకంటే రచయిత రాసిన నిగూఢార్ధాలకి బుర్ర తిరిగిపోతుంది దర్శకుడికి. అదృష్టవశాత్తూ డార్క్ మూవీస్ కథ, మాటలు, స్క్రీన్ ప్లే వగైరా వగైరా రాసే రచయితల్లేరు, వుండబోరు కాబట్టి- ఈ పరిస్థితి తలెత్తదు. దర్శకుడే రాసుకుంటున్నప్పుడు నిగూఢార్ధాల భారం తలెత్తుకోక తప్పదు. అప్పుడే దర్శకుడు ఎంత సత్తా గల రచయితో బయటపడతాడు. దర్శకుడు మొదట నిరంతర పాఠకుడు, చేయితిరిగిన రచయితా  అయినప్పుడే సత్తాగల దర్శకుడవగలడు. 

          దర్శకుడు నీలకంఠ తీసిన ‘షో’ డార్క్ మూవీ కాదు. అయినా అందులో చాలా నిగూఢార్ధాలుంటాయి. ఇవి నడుస్తున్న కథనే పరోక్షంగా చెపుతూంటాయి. ఒకసారి ఇదే విషయం ఆయన దృష్టికి తెస్తే నమ్మలేకపోయారు. నిగూఢార్ధాలున్నాయన్న సంగతే ఆయనకి తెలీదు. తెలియని స్పిరిచ్యువల్ ఫోర్స్  ఏదో అలా చేయించి నట్టుంది. జాతీయ స్థాయిలో ఉత్తమ స్క్రీ ప్లే అవార్డునందుకున్నారు. 

      కాబట్టి కోయెన్ బ్రదర్స్ సీనులో - The car behind them waiting, patiently. Rain drifts down past its headlights- అని రాశారంటే దీనికి అర్ధాలున్నాయి. వెనక ఆగిన కారు ఓపిగ్గా ఎదురు చూస్తోందంటే, అది కథని లేదా పాత్రని చెప్పే సింబాలిజం. హెడ్ లైట్ మీదుగా వర్షం నీళ్ళు ధారాపాతంగా పారుతున్నాయంటే అర్ధం- అలా  చూస్తున్న వ్యక్తి  కళ్ళకి భ్రమాజనిత జగత్తు తెరలు కట్టేస్తోందన్నమాట. ఎదర తన భవిష్యత్తు అస్పష్టంగా వున్నప్పటికీ తెలుసుకోకుండా ప్రయాణిస్తున్నాడన్న మాట. కథకి, పాత్రలకి అర్ధాన్నందించకుండా దేన్నీ వృధాగా చూపించరు డార్క్ మూవీస్ దర్శకులు. ఫ్రేముల్లో ఏది కన్పించినా ఉద్దేశపూర్వకంగానే వుంటాయి. ఇందుకే ప్రఖ్యాత విమర్శకుడు రోజర్ ఎబర్ట్,  The genius of "Blood Simple" is that everything that happens seems necessary― అని ప్రస్తుతించాడు.
          ఇప్పుడు ఈ దృష్టితో పై లైన్ ఆర్డర్ లో బిగినింగ్ విభాగపు సీన్లు ఎలా విస్తరించుకున్నాయో (ట్రీట్ మెంట్) ఒక్కొక్కటీ తీసుకుని చూద్దాం...

                                              ***

     బిగినింగ్ విభాగం బిజినెస్ ప్రకారం ఇక్కడి సీన్లలో జానర్ వ్యక్తమయ్యే నేపధ్య వాతావరణాన్ని ఎస్టాబ్లిష్ చేస్తూ, దాని కనుగుణమైన పాత్రల్ని పరిచయం చేస్తూ, సమస్యకి దారి తీసే పరిస్థితుల కల్పన చేసుకొస్తూ,  ఆఖర్న సమస్యని ఏర్పాటు చేయడం (ప్లాట్ పాయింట్ 1) అని తెలిసిందే. ఈ నాల్గు స్క్రిప్టింగ్ టూల్స్ ఎలా వర్కౌట్ అయ్యాయో చూద్దాం...

          1. ఒక వాయిసోవర్ తో ప్రారంభం. టెక్సాస్ పరిసర ప్రాంతాల నిస్సార భూభాగాలని చూపిస్తూ విస్సర్ స్వగతం.

          డార్క్ మూవీస్ ని  వాయిసోవర్ తో ప్రారంభించడం ఒక తప్పనిసరి తంతులా వుంది హాలీవుడ్ కని గతంలో చెప్పుకున్నాం. అంటే డార్క్ మూవీస్ ని  కవితాత్మకంగా కూడా చూపించడమన్నమాట. తెలుగుకి ఇది లేకపోయినా డార్క్ మూవీ జానర్ మర్యాద దెబ్బతినదని చెప్పుకున్నాం.         

          టెక్సాస్ పరిసర ప్రాంతాల నిస్సార భూభాగాలని చూపిస్తూ వేసిన ఈ స్వగతంలో అతను- ఈ ప్రపంచమంతా ఫిర్యాదుదార్లతో నిండి వుందంటున్నాడు. ఏదీ ఒక గ్యారంటీతో రాదని గుర్తించాలంటున్నాడు. పోప్ అయినా, అమెరికా అధ్యక్షుడైనా, ఇంకెవరో మాన్ ఆఫ్ ది ఇయర్ అయినా కూడా వాళ్లకి ఏదో ఒకటి బెడిసి కొడుతుందని అంటున్నాడు. పోనీ పక్కింటి వాడితో నీ గోడేమిటో చెప్పుకో,  వాడు జంప్ అవకపోతే చూడమంటున్నాడు. రష్యాలో పరస్పరం సహకరించుకునేట్టు చట్రంలో బిగించారనీ, అది వాళ్ళ సిద్ధాంతమనీ, కానీ టెక్సాస్ గురించి తనకి తెలిసింది వేరనీ అర్ధోక్తిలో ఆపుతున్నాడు...

          ఈ స్వగతం ఇంకా మనకి వెల్లడి కాని పాత్ర పలుకుతోంది.  సాధారణంగా స్వగతం ప్రధాన పాత్రదే అయివుంటుంది. ఈ ప్రధాన పాత్రని కోయెన్ బ్రదర్స్ అప్పుడే వెల్లడి చేయకుండా దాచిపెట్టి, మొదట స్వగతం ద్వారా కాన్సెప్ట్ ని ఏర్పాటు చేస్తున్నారు. ఈ కాన్సెప్ట్ మీద దృష్టి కేంద్రీకరించేలా, ఆలోచింపజేసేలా చేస్తున్నారు. ఏమిటా కాన్సెప్ట్? నీ దగ్గరికి అవసరం కొద్దీ వచ్చిన వాణ్ణి నీ అవసరాలకి వాడుకుని విసిరేయ్- లాభపడు అని. పోప్ అయినా, అమెరికన్  ప్రెసిడెంట్ అయినా, ఇంకెవరైనా ఇలా నమ్మి దెబ్బతినే వారేననీ. ఎవడూ ఎవడి గోడూ ఆలకించడనీ, ఫిర్యాదులు చేసే వాళ్ళంతా ఒఠ్ఠి ఫూల్స్ అనీ. 

          ప్రధాన పాత్ర ఇలాటి మనస్తత్వంతో వుందంటే ఎంత కన్నింగ్ అయుంటుందో అర్ధమవుతోంది. అంటే ఈ కన్నింగ్ పాత్రతో కథ చూడ బోతున్నామన్నమాట- ఎవరా కన్నినింగ్ పాత్ర?  ఇతడికి గోడు చెప్పుకోవడానికి ఎవరు రాబోతున్నారు? ఆ ఫిర్యాదిని తన అవసరాలకి వాడుకుని ఇతనెలా లాభపడ బోతున్నాడు? టెక్సాస్ గురించి తనకింకేదో  తెలుసనీ పాయింటు కొస్తున్నాడు- ఏమిటది? ఈ ప్రశ్నలన్నిటినీ సంధిస్తూ స్వగతంతోనే  కథలోకి వెళ్ళిపోయారు కోయెన్ బ్రదర్స్. 

          కోర్టులో న్యాయమూర్తి వుంటాడు. ఆయన ఛాంబర్ లోంచి బెంచి మీదికి రాగానే క్షణం ఆలస్యం చేయకుండా, బెంచి క్లర్కు కేసు ఫైలు అందించి కక్షి దార్లని పిలుస్తాడు.న్యాయమూర్తి  వెంటనే విచారణ చేపడతాడు. అంతే గానీ, న్యాయమూర్తి బెంచి మీదికి వచ్చి కూర్చుని, తీరిగ్గా బెంచి క్లర్కుతోనో, టైపిస్టుతోనో కబుర్లాడుతూ వుండడు. ఐదో పదో నిముషాలు అలా రిలాక్సయి అప్పుడు కేసు పిలవమనడు. సరీగ్గా ఇలా కోయెన్ బ్రదర్స్ సినిమా ఓపెన్ కాగానే క్షణం వృధా చేయకుండా కథని చేపట్టారు స్వగతంతో.

***

       2. రాత్రివేళ  వర్షంలో ప్రయాణిస్తూ ఎబ్బీ,  రే లు ఒకమోటెల్ కి చేరుకోవడం..

          స్వగతం చివర్లో టెక్సాస్ ని ప్రస్తావించి లీడ్ ఇచ్చారు. దాని ప్రకారం టెక్సాస్ శివారు రోడ్ల మీద వర్షపు రాత్రి సీను ఓపెనైంది. వర్షపు జల్లు చేస్తున్న సవ్వడి, ఆ నీటిని వాహనాల టైర్లు గిలక్కొడుతున్నట్టు శబ్దం...ఈ ఓపెనింగ్ తో వర్షాన్నీ, వాహనాలనీ ప్రతీకాలంకారాలు (మెటఫర్స్) గా చూపిస్తున్నారు. వర్షం ఇక్కడ అస్పష్టతకి నిదర్శనం. ఎదర ఏముందో కన్పించని ప్రపంచాల్లోకి ఆ అస్పష్టతని గిలక్కొట్టేస్తూ దూసుకుపోవాలని ప్రయత్నిస్తున్నారు. ఎవరు? అదీ చూద్దాం. 

          మొదట పై వాతావరణ పరిస్థితుల నేపధ్యంలో అదే స్వగతం చివరి భాగం పూర్తవుతుంది...ఇక్కడ (టెక్సాస్ లో) నీ బతుకు నువ్వే బతకాలని అంటున్నాడు ఇంకా వెల్లడి కాని కన్నింగ్ ఫెలో. ఇదీ టెక్సాస్ గురించి అతడి డిఫరెంట్ నిర్వచనం.

          ఈ స్వగతం ఈ సీనులోకి పారిందంటే అతనిక్కడే వున్నాడా? కారులో ఇద్దరు పోతూంటారు. వాళ్ళ  వెనుక భాగమే చీకట్లో నీడలా కన్పిస్తూంటుంది. డ్రైవింగ్ సీట్లో పురుషుడు, పక్క సీట్లో స్త్రీ అన్నట్టు వుంటారు. వాళ్ళ మాటలు సాగే విధానాన్ని ఎస్టాబ్లిష్ చేశారు (స్క్రిప్టులో హైలైట్ చూడండి).  వాళ్ళ సంభాషణకి అప్పుడప్పుడు ఎదరొచ్చే వాహనాల హెడ్ లైట్లు, పక్క నుంచి దూసుకెళ్ళే  ఆ వాహనాల చప్పుడూ విఘాతం కల్గిస్తూంటాయి. మంచి  విషయాలు మాట్లాడుకుంటే ఇలా జరగదేమో, చెడు సంగతులు చెప్పుకుంటున్నందుకు ఇలా ప్రకృతి డిస్టర్బ్ చేస్తోంది కాబోలు. దీనికి కాంట్రాస్ట్ గా,  వీండ్ షీల్డ్ మీద వర్షపు జల్లుని పారద్రోలుతున్న వైపర్స్ నుంచి వస్తున్న శబ్దం జోకొట్టి నిద్ర పుచ్చేట్టు వుందట! చెత్త ఆలోచనలు మాని నిద్రపొండని!

          అంత చెత్తగా ఎలా వున్నాయి మాటలు? హాల్ఫ్ వేలో ఆమె మొదలెడుతూ చెప్పే మొటది మాట- మా ఆయన మా ఫస్ట్ మ్యారేజ్ డేకి రివాల్వర్ గిఫ్టిచ్చాడని!

          వెంటనే కట్టి పడేసే సీను ఇది ఈ డైలాగుతో. ప్రేక్షకుల బద్ధకం మీద గురి చూసి కొట్టారు. మా ఆయన రివాల్వర్ గిఫ్టిచ్చాడనే ఓపెనింగ్ డైలాగు చాలా  తీవ్రమైన విషయం  కథకి సంబంధించి. ‘ఏం గోపీ, మాట్లాడవే? నా మీద కోపమా?’ అని  టెంప్లెట్  చొప్పున చాదస్తంగా బద్ధకంగా మొదలెడితే, బాధిత ప్రేక్షకుడు స్మార్ట్ ఫోన్ తీసి షార్ట్ ఫిల్మ్ చూడ్డం  మొదలెడతాడు- అలా లేదిక్కడ.   

          పైగా ఆమె పలికే  ఆ ఒక్క డైలాగుతో వీళ్ళిద్దరూ భార్యా భర్తలు కాదనీ, పెళ్లి కాని జంట కూడా కాదనీ, వీళ్ళది ఎఫైర్ అనీ నస పెట్టకుండా, టైం వెస్ట్ చేయకుండా తేలిపోతోంది.  

          మా ఆయన నా  మీద రివాల్వర్ని వాడక ముందే నేను వెళ్లి పోవాలనుకుం
టున్నాను-  నువ్వెలా భరిస్తున్నావో ఆయన్ని- అంటుంది.

          ఈ మాటల్లో అర్జెన్సీ వుంది. ఇంకాలస్యం చేయకుండా జంప్ అవుదామంటోంది. కథనం ఎక్కడేసిన గొంగళిలా వుండక, చకచకా కథని ముందుకి నడిపిస్తోంది ఇలాటి డైలాగులతో. ఇక – నువ్వెలా భరిస్తున్నావో ఆయన్ని అనడం,  మనం బద్ధకంతో నిద్రపోకుండా తొడపాశం పెడుతోంది. ఆమె భర్తని ఇతనెందుకు భరిస్తున్నాడు?- అన్న ప్రశ్న మనల్ని దిగ్గున లేచి చూసేలా చేస్తోంది.

          అప్పుడతను అంటాడు-  నేను వాడి పెళ్ళాన్ని కాదు, ఉద్యోగిని - అని.
          ఈ మాటతో కథ ఇంకాస్త రివీల్ అయింది. భర్త దగ్గర పని చేస్తున్న ఇతను భార్యతో ఎఫైర్ పెట్టుకున్నాడన్న మాట. ఏ జాతి పాత్రలో తెలిసిపోతోంది. ఇక ఈ నేపధ్యానికి తగిన సమాచారమిచ్చే వాళ్ళ సంభాషణ మరింత సాగుతున్నప్పుడు, ఈ సీనులో మార్పుని తెస్తూ ఒక సందడి మొదలవుతుంది. స్క్రిప్టులో 2, 3 పేజీల్లో హైలైట్స్ చేసిన అంశాల్ని గమనిస్తే, ఒక కారు దూసుకెళ్తుంది, ఇంకోసారి ఇంకో కారు దూసుకెళ్తుంది. మాటల  మధ్యలో ఇంకోకారూ దూసుకెళ్తుంది. ఎందుకో ఆమె కారాపెయ్య మంటుంది. సడెన్ బ్రేకేసి ఆపేస్తాడు. వెనక వస్తున్న ఓ కారు దగ్గరగా వచ్చేసి సడెన్ బ్రేకుతో ఆగిపోతుంది. 

          ఇప్పుడు ఆ ముందు వెళ్ళిన మూడు  కార్ల అంతరార్ధమేమిటి?  వెనుక ఆగిపోయిన నాల్గో  కారు నిగూఢార్ధమేమిటి? 

          ఎవరైనా చెప్పగలరా?  ఇదీ డార్క్ మూవీస్ స్క్రీన్ ప్లేస్ తో వుండే ఎంజాయ్ మెంటు. బుద్ధి వికాసానికి డార్క్ మూవీస్, జంతు విన్యాసాలకి మాస్ మూవీస్. 

          గత సీనులోంచి ఈ సీను మొదట్లోకి స్వగతం చెప్పుకుంటూ ఒకడొచ్చాడు గుర్తుందిగా?  ఈ వర్షంలో ఈ రోడ్ల మీద వాడి వాయిస్ విన్పించి వాడెక్కడికి వెళ్ళాడు కన్నింగ్ ఫెలో? ఎక్కడికీ వెళ్ళకూడదు- వాయిస్ విన్పించిందంటే ఇక్కడికే వస్తూండాలి.  ఆ రాకకి నాందీ ప్రస్తావనగానే  మొదటి మూడు కార్లు దూసుకెళ్లే హడావిడి అన్న మాట. ఈ సింబాలిజంతో  ప్రమాదమేదో ముంచు కొస్తోందని ( ఫోర్ షాడోయింగ్) ఆ సీక్రెట్ లవర్స్ కి సూచించడమన్నమాట. వాళ్లింకా తెలుసుకునే స్థితిలో లేరు. కానీ ప్రేక్షకులకి గుబులు మొదలైంది.

          వెనక నాల్గో కారు అలాగే ఆగివుంది. అప్పుడు ముందు కార్లో వున్నతను వెనక్కి చూస్తాడు. వెనక కారు హెడ్ లైటు అతడి మొహం మీద పడి, ఇప్పుడతను  మొట్ట మొదటి సారిగా మనకి రివీలవుతాడు. ఇంకో విధంగా అతడి ముఖం మనకి కనపడే వీలుందా? లేదు, అంత  సేపూ ముందు నుంచి అప్పుడప్పుడు హెడ్ లైట్లు పడుతున్నా రివీల్ చేసే అవకాశం లేదు దర్శకులకి. ప్రయాణిస్తున్న కారు ఫ్రంట్ షాట్లు తీసి వాళ్ళ మొహలని చూపించేసే చవకబారు తనానికి పాల్పడలేదు. ఇల్లాజికల్ గా షాట్లు తీయలేదు. 

          దర్శకులు  మనల్ని కారు వెనుక సీటులో కూర్చోబెట్టి సీన్లో ఇన్వాల్వ్ చేస్తూ, ఆ పాయింటాఫ్ వ్యూలో చీకట్లో వాళ్ళని వెనకనుంచి చూపిస్తూ వచ్చారు. మనం కారు దిగి పోయి ఫ్రంట్ కెళ్ళి వాళ్ళెవరో చూసేసే అవకాశం లేదు కదా? అతని ఫేస్ ఎలావుందో వెనక నుంచి ఇంకో కారు హెడ్ లైటు పడితేనే, అతను వెనక్కి చూస్తేనే అతడి మొహాన్ని ఆ వెలుగులో మనం స్పష్టంగా చూడగలం - కదూ? ఇదే జరిగిందిక్కడ. ఈ స్క్రీన్ ప్లేలో ఏది జరిగినా అదింకో దాన్ని పుట్టిస్తుంది. దర్శకత్వమంటే ప్రధానంగా రచనే. రచనే దర్శకత్వాన్ని పట్టిస్తుంది. రాయడం రాలేదంటే ఆలోచించడం రానట్టే. ఆలోచించడం రానప్పుడు దర్శకత్వమెలా వస్తుంది? కాబట్టి అంతా రాయడం దగ్గరే దర్శకత్వం చేసేశారు కోయెన్ బ్రదర్స్. ఒక రెండొందల పేజీల తెలుగు సినిమా స్క్రిప్టుని రెండు గంటల్లో చదివేసి అభిప్రాయం చెప్పేయవచ్చు. తొంభై పేజీల కోయెన్ బ్రదర్స్ స్క్రీన్ ప్లే చదవడానికే పది రోజులు పట్టింది. ఓ రెండు పేజీలు  చేదివితే ఆ రెండు పేజీలు  వెంటాడుతూ మూడో పేజీకి వెళ్ళలేకపోతున్నాం.

          కారు డ్రైవ్ చేస్తున్నతను ఇలా మనకి తెలిశాక, అతను పక్క సీట్లో వున్నామెతో ‘ఎబ్బీ?’ అంటాడు. 

          ఇతనెవరో ముఖాన్ని రివీల్ చేశారు, కానీ పేరు చెప్పలేదు; ఆమె పేరు ఇతని చేత చెప్పించారు, కానీ ఆమె ముఖాన్ని రివీల్ చేయలేదు దర్శకులు. ఇంటరెస్టింగ్ ప్లే ప్రేక్షకుల మైండ్ తో. 

          ఇప్పుడు వెనుక కారుని చూస్తే,  అదలాగే ఆగి వుంటుంది హెడ్ లైట్లతో. ఓపిగ్గా వేచివుందనీ,  హెడ్ లైట్ మీదుగా వర్షపు నీళ్ళు పారుతూంటాయనీ రాశారు దర్శకులు. ఈ రెండూ కారులో కనిపించకుండా వున్న వ్యక్తి గురించిన విషయాలే.  దీని నిగూఢార్ధం ఇతను మనం ఎదురుచూస్తున్న కన్నింగ్ ఫెలో అయితే ఇతడికి ఓపిగ్గా వేచి చూసే లక్షణమెందుకు? ఎవరితను? ఇకపోతే, హెడ్ లైట్ మీద వర్షపు నీళ్ళు పారడమన్నది ఎదర ఇతడి భావిజీవితం అస్పష్టంగా వుందని చెప్పడమే. ఆల్రెడీ ముందు కారులో ప్రయాణిస్తున్న వాళ్ళిద్దరి జీవిత ప్రయాణం అస్పష్ట గమ్యంతోనే  వుందని,  ఇంత సేపూ చూపిస్తూ వచ్చిన ఎదురద్దం మీద వర్షపు జల్లు చెప్తూనే వుంది. 

      అప్పుడతను అడుగుతాడు, ఆ కారు నీకు తెలుసాని. తెలీదంటుంది. మరెందుకాపావంటే, తెలీదు- నేను పొరపాటు చేస్తున్నానేమో అన్పిస్తోందని అంటుంది...

          సిక్స్త్ సెన్స్ ఇది. ఆమె మనసు ఈ సంబంధం పట్ల క్షణకాలం కీడు శంకించి వుండొచ్చు. పక్క నుంచి కార్లు ఎడాపెడా పోతూంటే కారాపెయ్యమంది. చూస్తే వెనకాల వస్తున్న కారుని ఆపేసినట్టయ్యింది. ఈ వెనకే దురదృష్టం వెన్నాడుతోందని ఆమెకీ అతడికీ తెలీదు!

          ఈ దురదృష్టాన్ని గమనించకుండా, ఆ వెనక ఏమిటది?-  అంటుంది. అతను చూసి – మోటెల్ అంటాడు. వెనకాలే  వెన్నాడుతున్న దురదృష్టం వేచి వుంది. తనేమో ఆ వెనకాలే వున్న మోటెల్ కి పోదామని సూచిస్తోంది. ఎంత ఐరనీ ఇది. భర్త కన్నుగప్పి ఎఫైర్ నడిపిస్తున్న ఈమె,  సాక్షాత్తూ  వెనకే వున్న దురదృష్టాన్ని చూసుకోకుండా, పడక మీదికి ఆహ్వానిస్తోంతడ్ని!

          ఇప్పుడే మొదటిసారి అతణ్ణి పేరు పెట్టి పిలవడంతో అతడి పేరు ‘రే’  అని తెలుస్తుంది. రే ఫేస్ ని ఇందాక మనకి హెడ్ లైట్లో రివీల్ చేసిన దర్శకులు,  ఇక వెనకనుంచి పడుతున్న అదే  హెడ్ లైట్లో, ఆమె ఫేస్ ని పాక్షికంగా ఎడం వైపే చూపిస్తూంటారు (ఆమె ఎడం వైపు తిరిగి మాట్లాడు తున్నప్పుడు ఎడమ చెంప మీదే ఫోకస్ పడుతుంది). ఇదామె పైకి ప్రియుడితో ఇలా ప్రకాశిస్తోందనీ, లోపల భర్తని అటు చీకట్లో వుంచిందనీ అర్ధంతో వుంది. 

          ఒక్క సీనులో ఈ రెండు పాత్రల పరిచయాన్ని పరిపూర్ణంగా చేసేస్తూ, ఇక యేం జరగబోతోందన్న  సస్పెన్సుని క్రియేట్ చేశారు. డిటెక్టివ్ రచయిత డషెల్ హేమెట్ కంటే జేమ్స్ ఎం కెయిన్ కి దగ్గరగా సినిమా తీశామని చెప్పుకున్నారు కోయెన్ బ్రదర్స్.

(ఇంకా వుంది)

-సికిందర్