1335 : రివ్యూ!

రచన- దర్శకత్వం : ఎం ఎస్ రాజు

నటీనటులు : నరేష్, పవిత్రా లోకేష్, వనితా విజయ్ కుమార్, జయసుధ, శరత్ బాబు, అన్నపూర్ణ, రవివర్మ తదితరులు

సంగీతం : సురేష్ బొబ్బిలి, నేపథ్య సంగీతం : అరుళ్ దేవ్, ఛాయాగ్రహణం : ఎంఎన్ బాల రెడ్డి

నేపథ్య సంగీతం : అరుల్ దేవ్!స్వరాలు : సురేష్ బొబ్బిలి 

నిర్మాత : నరేష్  

విడుదల : మే 26, 2023

***

నటుడు నరేష్, నటి పవిత్రా లోకేష్ ల రిలేషన్ షిప్ వివాదం కొన్ని సంచలనాలు సృష్టించిన విషయం తెలిసిందే. నరేష్, పవిత్రా లోకేష్, నరేష్ మూడో భార్య రమ్యా రఘుపతిల మధ్య వివాదం బెంగుళూరు హోటల్ కి చేరి, రచ్చ జరిగి తాత్కాలికంగా ఓ ముగింపుకొచ్చింది. ఇంకా పరిష్కరించుకోవాల్సిన చట్టపరమైన సమస్యలున్నాయి. దీన్ని నరేష్ సినిమాగా నిర్మించాలనుకుని, ప్రముఖ నిర్మాత - దర్శకుడు ఎంఎస్ రాజుతో కలిసి తెరకెక్కించారు. ఈ మధ్య అడల్ట్ సినిమాలు తీస్తున్న ఎంఎస్ రాజు ఈ మిడిలేజి రిలేషన్ షిప్ కథని నరేష్- పవిత్రల రిలేషన్ షిప్ బయోపిక్ అన్నట్టుగా తన సృజనాత్మక శక్తితో తీర్చి దిద్దారు. ఇలాటి బయోపిక్ తోనే పూర్వం యశ్ చోప్రా హిందీలో ఒక క్లాసిక్ నిచ్చారు. మరి ఎం ఎస్ రాజు ఏమిచ్చారో చూద్దాం...

కథ

ఈ కథ 5 చాప్టర్లుగా వుంటుంది. మొదటి చాప్టర్ The Flirting లో ప్రముఖ సినిమా నటుడుగా వున్న నరేంద్ర (నరేష్) షూటింగులో నటి పార్వతి (పవిత్రా లోకేష్) ని చూసి మనసు పారేసుకుంటాడు. క్రమంగా దగ్గరవడానికి ప్రయత్నిస్తాడు. ఆమె అయిష్టంగా వుంటుంది.

The Mistake అనే రెండో చాప్టర్లో నరేంద్ర కుటుంబ జీవితం వుంటుంది. నరేంద్రకి మూడో భార్య  సౌమ్యా సేతుపతి (వినితా విజయ్ కుమార్) ఓ కొడుకూ వుంటారు. సౌ మ్యని పెళ్ళి చేసుకోవాల్సి వచ్చిన పరిస్థితుల దగ్గర్నుంచి ఆమె అసలు రంగు బయటపడే ఘట్టం వరకూ ఈ చాప్టర్ వుంటుంది. కేవలం డబ్బు కోసం పెళ్ళి చేసుకున్న సౌమ్య తో నరేంద్రకి మనశ్శాంతి వుండదు. కొడుకు విషయంలో గొడవ జరిగే సరికి విడాకుల దాకా పోతుంది. 

My Story అనే మూడో చాప్టర్లో సినిమా రచయిత ఫణీంద్ర (విజయ్ వర్మ) తో సహజీవనం చేస్తున్న పార్వతి, ఆమె ఇద్దరు పిల్లల జీవితం వుంటుంది. ఆస్తి కోసం ఫణీంద్ర ఆమెని వేధిస్తూంటాడు. ఈ వేధింపులు భౌతిక దాడికి దారితీస్తాయి.

Krishna’s Story అనే నాల్గో చాప్టర్లో నరేంద్ర, పార్వతి ఇంటికెళ్ళి ఫణీంద్రకి బుద్ధి చెప్పి, ఇంట్లోంచి వెళ్ళ గొట్టిస్తాడు. పార్వతిని చేపడతాడు.

        
The Conflict అనే ఐదో చాప్టర్లో నరేంద్ర పార్వతితో కలిసి వుండడంతో భార్య సౌమ్య, ఫణీంద్రతో కలిసి ఓ కుట్రకి ప్లాన్ చేస్తుంది. బెంగుళూరు హోటల్లో పోలీసుల సాయంతో నరేంద్ర ఈ కుట్రని తిప్పికొట్టి, విజయగర్వంతో పార్వతిని తీసుకుని వెళ్ళిపోతాడు.

       
ఇలా అయిదు చాప్టర్లుగా చూపించిన ఈ బయోపిక్ లో, ఇది వరకే పబ్లిక్ డొమైన్ లో వున్న నరేష్- పవిత్రల రిలేషన్ షిప్ కథని పబ్లిక్ డొమైన్ లో వున్నట్టుగానే చూపించారు-  పబ్లిక్ డొమైన్ లో లేనిది My Story అనే మూడో చాప్టర్లో ఫణీంద్రతో పవిత్రా లోకేష్ సహజీవన కథే.

ఎలావుంది కథ

1981 లో యశ్ చోప్రా ‘సిల్సిలా’ కథ తయారు చేసుకున్నప్పుడు అది కల్పిత కథ. అయితే అప్పట్లో జయా బచ్చన్‌ ని  వివాహం చేసుకున్న అమితాబ్ బచ్చన్ కి రేఖ తో  సంబంధం గురించి ఊహాగానాలు పత్రికల్లో మోతెక్కేవి. ఇది తన కథ లాగే వుందనుకున్న చోప్రా, వాళ్ళు ముగ్గుర్నీ నటించడానికి ఒప్పించాడు. దీంతో ఈ సినిమా వాళ్ళు ముగ్గిరి కథే అన్నట్టుగా ప్రచారం జరిగి సూపర్ హిట్టయ్యింది.

       
అయితే పత్రికల్లో వస్తూ వున్న చెత్త గాసిప్స్ కి ఇన్స్పైర్ అవకుండా, చోప్రా ఈ ట్రయాంగులర్ రిలేషన్ షిప్ కథని మనో విశ్లేషణతో, సున్నిత కథగా మంచి విలువలతో ఆవిష్కరించాడు. కానీ స్వయంగా పబ్లిక్ డోమైన్లో వున్న నరేష్ కి డీసెన్సీ ని ప్రదర్శించడం సినిమాలో సాధ్యం కాలేదు. మూడో భార్యని వెనుక నుంచి తన్నే సీను దగ్గర్నుంచీ, బెంగుళూరు హోటల్ సంఘటనలో చీప్ టేస్టు ప్రదర్శించడం వరకూ దూకుడుగా చిత్రీకరించుకున్నాడు. మొత్తం ఈ బయోపిక్ ని తన వైపు నుంచే చెప్పాడు తప్పితే అవతలి మూడో భార్య వైపు నుంచి విషయమేమిటో మనకి తెలీదు. కాబట్టి ఇది ఏకపక్షంగా చూపించిన బయోపిక్ అయింది. ఈ బయోపిక్ లో నరేష్ పోషించిన నరేంద్ర పాత్ర దక్షత కలిగిన పరిష్కర్తగా వుండాల్సింది వుండదు.

       
ఈ కథని ఎంఎస్ రాజు తన చెప్పు చేతల్లోకి తెచ్చుకుని, స్టేక్ హోల్డర్స్ ముగ్గుర్నీ సమన్వయం చేసి సమగ్ర కథ చెప్పాల్సింది. ‘సిల్సిలా’ లోనైతే స్టేక్ హోల్డర్స్ ముగ్గురూ ప్రత్యక్ష్యంగా పాల్గొనడంతో ప్రేక్షకులకి సందేహాలు మిగల్లేదు.

నటనలు- సాంకేతికాలు

తమ బయోపిక్ లో తామే నటించిన నరేష్, పవిత్రలకి నటించే అవసరం రాలేదు, నిజజీవితంలో తమ అనుభవాల్ని తాము జీవించ గలరు కాబట్టి. అయితే ఈ పాత్రల్ని మిడిలేజి రిలేషన్ షిప్ మర్యాదలకి దూరం పోకుండా, సినిమాటిక్ రోమాన్సులు చేయకుండా, సంయమనం పాటించడంతో పాత్రలు నీటుగా కన్పిస్తాయి. నరేష్ పాత్ర మాత్రం తప్పంతా మూడో భార్యదే అన్నట్టు సానుభూతిని సృష్టించుకుని, పవిత్రతో రిలేషన్ షిప్ ని జస్టిఫై చేసినట్టు, లైసెన్సు పొందినట్టు వుంది.

పవిత్ర కూడా తానెంతో మంచి మనసుగల మనిషి అన్నట్టు లుక్కిస్తూ పాత్రకి తగ్గట్టు హూందాగా నటించింది. ఇక మూడో భార్యకి పెట్టాల్సిన అవలక్షణాలన్నీ పెట్టేశారు. పూర్తిగా సినిమాటిక్ విలనే. చివరి చాప్టర్లో వనితా విజయ్ కుమార్ ఈ పాత్రలో చాలా హంగామా చేస్తుంది. హీరో కృష్ణగా శరత్ బాబు, విజయనిర్మలగా జయసుధ నటించారు.

సాంకేతికంగా నరేష్ మంచి పెట్టుబడి పెట్టారు. చాలా రిచ్ లుక్ వచ్చింది. సంగీతమే ఈ రిచ్ లుక్ తో అంతగా  పోటీ పడలేదు. దర్శకత్వంలో ఈ సారి ఎం ఎస్ రాజు ఓ మెట్టు పైకెక్కారు- అయితే చాప్టర్ల వారీ కథాకథనాల్లో అంతగా బలం లేదు. న్యూస్ రిపోర్టింగ్ చేస్తున్నట్టు వుంది.
—సికిందర్

       

 

 

1334 : రివ్యూ!

 

రచన - దర్శకత్వం : విజయ్

తారాగణం : విశ్వక్ సేన్, రకుల్ ప్రీత్ సింగ్, నివేదా పేతురాజ్, మేఘా ఆకాష్, మంజీమా మోహన్, రేబా మోనికా జాన్, పృథ్వీ రాజ్ తదితరులు

సంగీతం : జీవీ ప్రకాష్ కుమార్, ఛాయాగ్రహణం : సందీప్ విజయ్

బ్యానర్ : శర్వంత్ రామ్ క్రియేషన్స్, శ్రీ షిర్డీ సాయి బాబా మూవీస్

నిర్మాతలు : రామాంజనేయులు, రాజశేఖర రెడ్డి

విడుదల : మే 27, 2023 (జియో సినిమా)

***

        ఇటీవల విశ్వక్ సేన్ నటించిన ‘దాస్ కా ధమ్కీ’ పరాజయం తర్వాత, ‘బూ’ అనే హార్రర్ మూవీ తమిళ- తెలుగు భాషల్లో ఈ రోజు ఓటీటీలో విడుదలయింది. ఓటీటీ రంగంలోకి కొత్తగా ప్రవేశించిన జియో సినిమా దీన్ని ఉచితంగా అందిస్తోంది. విజయ్ అనే దర్శకుడు ఒక రాత్రి జరిగే ఈ హార్రర్ కథని గంటన్నర సినిమాగా తీశాడు. ఇందులో విశ్వక్ సేన్ తోబాటు ఐదుగురు హీరోయిన్లు కన్పిస్తారు. కనువిందు చేయడానికి అందాల హీరోయిన్ల శ్రేణి వుంది. థ్రిల్ చేయడానికి విశ్వక్ సేన్ వున్నాడు. ఇంకేం కావాలి? తారాగణంతోనే ఇంత ఊరిస్తున్న ఈ హార్రర్ తెరపైన ఎలా  వుందో చూద్దాం...

కథ

తల్లి వూరికెళ్ళిన అవకాశాన్ని తీసుకుని రకుల్ ప్రీత్ సింగ్ ఫ్రెండ్స్ ని ఆహ్వానిస్తుంది ఆ రాత్రి హలోవీన్ పార్టీకి. ఆ రోజు అక్టోబర్ 31 హలోవీన్ నైట్ జరుపుకునే సందర్భం. రకుల్ ఇంట్లో అస్థిపంజరాలు, దెయ్యపు ఆకారాలూ అలంకరించి, దెయ్యాల్ని ఆహ్వానిద్దామని చెప్పి ఒక హార్రర్ పుస్తకం తీసి కథలు చెప్పడం మొదలెడుతుంది.  ఆ ఒక్కో దెయ్యం కథ నిజ జీవితంలో వాళ్ళ ముందుకొచ్చేసి బెదరగొడతాయి. అప్పుడు ఒక దెయ్యాన్ని వదిలించుకోవాలంటే ఇంకో దెయ్యం కథ చదవాలి. ఇలా చదువుకుంటూ పోతూంటే  పారానార్మల్ సైంటిస్టు విశ్వక్ సేన్ కథ వస్తుంది. ఇప్పుడు ఈ కథ కీలకమైనది. ఈ కథ ఏమిటి? దెయ్యాల ఉనికి మీద ప్రయోగాలు చేసే విశ్వక్ సేన్, తను ప్రేమించిన ఒక్కో గర్ల్ ఫ్రెండ్ ని ఎలా కోల్పోతూ వచ్చాడు? చివరికి రకుల్ ప్రీత్ సింగ్ తోనే పెళ్ళి చూపులు జరిగే సరికి, రకుల్ ప్రీత్ సింగ్ ఏం చేసింది? ఈ హార్రర్ ప్రశ్నలకి సమాధానాల కోసం మిగతా సినిమా చూడాలి.

ఎలా వుంది కథ

అమెరికాలో, యూరప్ లో జరుపుకునే హలోవీన్ పండుగ ఇండియాలో అర్ధం లేకుండా కేవలం పిశాచాల మాస్కులేసుకుని భయపెట్టుకునే ఆటగా మార్చేశారు. పాశ్చాత్య దేశాల్లో వేసవి చివర్లో చేతి కందే పంటల్ని దుష్ట శక్తుల బారి నుంచి కాపాడుకునేందుకు అక్టోబర్ 31న హలోవీన్ పండుగ జరుపుకుంటారు. ఆ దుష్ట శక్తుల్ని తరిమి కొట్టేందుకే పిశాచాల మాస్కులేసుకుని నృత్యాలు చేస్తారు. దీన్ని రకుల్ ప్రీత్ సింగ్ ఇంకో అడుగు ముందుకేసి దెయ్యాల్ని ఆహ్వానించే ఆటగా మార్చేసింది.

        

అయితే ఆమె పుస్తకంలో చదివే కథలతో ఎపిసోడ్స్ ఆసక్తికరంగానే వున్నాయి. ఇవి భయపెట్టే విధంగా వుండవుగానీ, ఆసక్తి రేకెత్తిస్తాయి. ఉదాహరణకి నివేదా పేతురాజ్ ఇల్లు అద్దెకి తీసుకున్నప్పుడు, నీకు వెక్కిళ్ళు వస్తాయా అనడుగుతుంది హార్రర్ ఫేసు గల ముసలవ్వ. రావని చెప్తుంది నివేద. తీరా ఇంట్లో దాహం వేసి నీళ్ళు లేక వెక్కిళ్ళు వస్తాయి. దాంతో దెయ్యం లేచి ఆమె పనిబడుతుంది.

        

ఇలాటి నాల్గు కథల తర్వాత విశ్వక్ సేన్ కథ వస్తుంది. ఇతను పారానార్మల్ సైంటిస్టుగా దెయ్యాలున్నాయా లేదా తేల్చడానికి ఒక కళ్ళు జోడు తయారు చేసి దాంతో ప్రయోగాలు చేస్తూంటాడు. ఇతడి ప్రయోగాలకి గర్ల్ ఫ్రెండ్స్ బలౌతూంటారు. ఇక ఇంకో బకరాగా రకుల్ ప్రీత్ సింగ్ తోనే పెళ్ళి చూపులు జరిగే ట్విస్టుతో ముగింపుకొస్తుంది కథ.

        

ఈ మొత్తం కథలో హార్రర్ దృశ్యాలేం భయపెట్టేవిగా వుండవు. కానీ సస్పెన్స్ తో ఆసక్తికరంగా వుంటాయి. విద్యుల్లేఖా రామన్ కామెడీ పాత్ర భయపడే చేష్టలతో ఇది హార్రర్ సినిమా సుమా అని గుర్తు చేస్తూ పోయారు.

నటనలు-సాంకేతికాలు

రకుల్ ప్రీత్ సింగ్ చదివే నాల్గు కథల తర్వాత ఐదో కథలో ఎంట్రీ ఇస్తాడు విశ్వక్ సేన్. అప్పటికి గంట సమయం గడిచిపోతుంది. అతడి ఎంట్రీ తర్వాత అరగంటే సినిమా వుంటుంది. గంటన్నర సినిమా కావడం ఒకటి, విశ్వక్ సేన్ గంటకి కనిపించడం వొకటి- ఇలా థియేటర్లో రిలీజ్ చేస్తే ప్రేక్షకులు హాహాకారాలు చేస్తారని కాబోలు ఓటీటీలో పడేశారు. అయితే విశ్వక్ సేన్ తన మాస్ యాక్షన్ కి దూరంగా సాఫ్ట్ గా, డీసెంట్ గా నటించాడు. కనిపించేది కాసేపే అయినా అర్ధవంతంగా నటించాడు.

        రకుల్ ప్రీత్ సింగ్ ది ఫన్నీ క్యారక్టర్. ఆమె ఫన్ కోసం పాల్పడే చర్యలు ఫ్రెండ్స్ ని భయపెట్టి చంపుతూంటాయి. పుస్తకంలోని ఒక కథతో దెయ్యంతో హార్రర్ లో ఇరుక్కోవడం, దానికి విరుగుడు ఇంకో కథ చదవడమేనని పుస్తకంలో చెప్పడంతో, ఇంకో కథా చదివి మళ్ళీ ఇరుక్కోవడం, అందులోంచి బయటపడేందుకు పుస్తకంలో చెప్పినట్టు ఇంకో కథా చదవడం... ఇలా ఆ పుస్తకం పన్నిన వలలో చిక్కుకుని గిలగిల కొట్టుకోవడం.

       
కానీ దెయ్యం కథల పుస్తకాలు ఎందుకో తెలుగులో వుండవు, ఇంగ్లీషులోనే వుంటాయి ‘ఫీల్’ కోసం. మిగిలిన పాత్రల్లో నివేదా పేతురాజ్, మేఘా ఆకాష్, మంజీమా మోహన్, రేబా మోనికా జాన్ లు కథలకి న్యాయం చేశారు. విద్యుల్లేఖా రామన్ ఇది హర్రర్ సినిమా అని గుర్తు చేస్తూ వుండడానికి ఒకటే భయపడే కామెడీ చేసింది. పోలీస్ ఇన్స్ పక్టర్ గా వచ్చే పృథ్వీరాజ్ కి ముగింపులో చిన్న ట్విస్టు ఇస్తాడు.

       
ఈ గంటన్నర సినిమా ఆద్యంతం విజువల్ అప్పీల్ తో వుంది. వదలకుండా చూసేలా చేస్తుంది. విశ్వక్ సేన్, రకుల్ ప్రీత్ సింగ్ వంటి స్టార్లు వున్నప్పుడు ప్రొడక్షన్ విలువలు రిచ్ గానే వున్నాయి. ముఖ్యంగా కెమెరా వర్క్, ఎడిటింగ్, కళా దర్శకత్వం, మేకప్, కాస్ట్యూమ్స్, సీజీ వర్క్ క్వాలిటీతో వున్నాయి.

       
దర్శకుడు విజయ్ రైటింగ్, మేకింగ్ పాత విలువలు జొరబడకుండా ఆధునిక దృక్పథంతో నిర్వహించడం ఈ హార్రర్ కి ప్లస్ అయింది. 2005 లో ఇదే టైటిల్ తో హాలీవుడ్ నుంచి హలోవీన్ హార్రర్ వచ్చింది. అది అర్ధం పర్ధం లేకుండా చీప్ హార్రర్ గా వుందని రివ్యూలున్నాయి. తెలుగు- తమిళ ‘బూ’ మీద ఈ మచ్చ పడదని కి చెప్పొచ్చు.

—సికిందర్

 

1333 : రివ్యూ!

 

రచన- దర్శకత్వం : జూడ్ ఆంథనీ జోసెఫ్

తారాగణం: టోవినో థామ‌స్, వినీత్ శ్రీనివాస‌న్, కుంచ‌కోబోబ‌న్‌, అప‌ర్ణా బాల‌మురళి,  తన్వీ రామ్, ఆసిఫ్ అలీ, అజూ వర్గీస్ తదితరులు

సంగీతం: నోబిన్ పాల్, ఛాయాగ్రహణం : అఖిల్ జార్జ్

బ్యానర్స్: కావ్య ఫిల్మ్ కంపెనీ, పీకే ప్రైమ్ ప్రొడక్షన్

నిర్మాతలు: వేణు కున్నప్పిల్లి, సీకే పద్మ కుమార్, ఆంటో జోసెఫ్

సమర్పణ : బన్నీ వాస్

విడుదల : మే 26, 2023

***

        మలయాళం మూవీ ‘2018’ కేరళలో మే 5న విడుదలైంది. విడుదలైన పది రోజుల్లో వసూళ్ళు వందకోట్లు దాటేశాయి. నేటికి వసూళ్ళు 140 కోట్లకి చేరుకున్నాయి.  దేశవ్యాప్తంగా వసూళ్ళ సంచలనం సృష్టిస్తున్న ‘2018’ ఇతర భాషల్లో నేడు విడుదలయింది. తెలుగులో దీన్ని ప్రముఖ నిర్మాత బన్నీ వాసు విడుదల చేశారు. మలయాళ దర్శకుడు జూడ్ ఆంథనీ జోసెఫ్ ఈ సినిమాని 2018 లోనే ప్రకటించాడు. అప్పుడు దీని టైటిల్ ‘2403 ఫీట్ : ది స్టోరీ ఆఫ్ అన్ ఎక్స్ పెక్టెడ్ హీరోస్’. నవంబర్ 2022 లో దీని నిర్మాణం పూర్తయింది. 2018 లో కేరళ ని ముంచెత్తిన భీకర వరదల్ని, ఆ వరదల్లో బాధితుల ఆక్రందనల్నీ, ప్రాణాల కోసం వాళ్ళు చేసిన పోరాటాల్నీ ఆధారంగా చేసుకుని ఈ సినిమాని రూపొందించాడు. ఇదెలా వుందో తెలుసుకుందాం...  

కథ

న్యూస్ రిపోర్టింగ్ తప్ప ఇంకేదీ పట్టని నూరా (అపర్ణా బాలమురళి) పాండిచ్చేరిలో నీటి ఎద్దడి పై రిపోర్టింగ్ చేస్తూంటే, ఆమె కారుని తమిళనాడుకి చెందిన  డ్రైవర్ సేతుపతి (కళయరాసన్) ట్రక్కు ఢీ కొట్టడంతో గొడవవుతుంది.

        

ఆర్మీలో పనిచేస్తున్న అనూప్ (టోవినో థామస్) యాక్షన్లో కొందరు సైనికుల మరణాలు చూసి భయపడి పారిపోయి వచ్చేసి ఒక షాపులో పనిచేస్తూంటాడు. ఢిల్లీనుంచి మంజూ (తన్వీ రామ్) అనే టీచర్ కొత్తగా వచ్చి స్కూల్లో చేరడంతో ఆమెని ప్రేమిస్తాడు.

       
అబుధాబీలో  పని చేస్తున్న ఐటీ స్పెషలిస్ట్ రమేష్ (వినీత్ శ్రీనివాసన్) కి భార్యతో సత్సంబంధాల్లేక పనిమీద శ్రద్ధ పెట్టడు. ఇంతలో తల్లి ఆస్పత్రిలో చేరిందని తెలుసుకుని కేరళ వచ్చేస్తాడు.

       
మత్స్యకారుడు మాథచన్ (లాల్) చిన్న కొడుకు నిక్సన్ (ఆసిఫ్ అలీ)  మోడల్ కావాలని కలలు గంటూ చేపలు పట్టే పనిని చులకనగా చూస్తూంటాడు. సంపన్న వ్యాపార

వేత్త కుమార్తెని పట్టి ప్రేమిస్తూంటాడు.

        
టాక్సీ డ్రైవర్ కోషీ (అజూ వర్గీస్) టాక్సీతిప్పుతూ రోజుల తరబడి కుటుంబానికి దూరంగా వుంటాడు. అతను ఓ విదేశీ జంటకి టూరిస్టు కేంద్రాల్ని తిప్పి చూపించే బేరం కుదుర్చుకుంటాడు.

       
డ్యూటీ పట్ల నిబద్ధతతో వుంటూ ప్రజల కోసం పని చేసే ప్రభుత్వాధికారి షాజీ (కుంచాకో బోబన్), పైఅధికారులు తనకు సహకరించకపోయినా పట్టుదలతో విధి నిర్వహణ చేస్తూంటాడు.

       
ఇలా ఎందరో వ్యక్తులు, ఎన్నో కుటుంబాలు. వాళ్ళ వాళ్ళ జీవన పోరాటాలు చేస్తూంటారు. ఇంతలో ఉన్నట్టుండి వరదలు ముంచుకు రావడంతో అందరూ అపాయంలో పడతారు. కొందరి ప్రాణాలూ, చాలా మంది ఆస్తులూ వరద నీట్లో కొట్టుకుపోతాయి. ఇందులోంచి ఎవరెవరు ఎంతమంది బ్రతికి బయటపడ్డారు? వాళ్ళ కలలూ కోరికలూ ఏమయ్యాయి? ఒకరికొకరు తెలియకపోయినా మానవత్వంతో చేయందించి ఈ ఉపద్రవాన్ని ఎలా దాటారు?...ఇదీ మిగతా కథ.

ఎలావుంది కథ

డిజాస్టర్ జానర్ కి చెందిన కథ. పాత్రలకి ఒక విపత్తు సంభవించడం, అందులోంచి బ్రతికి బయటపడం ప్రధానంగా వుండే కథ. ఈ కథని కల్పిత కథగా గాకుండా యదార్ధ గాథ ఆధారంగా తీశారు. దీన్ని 1924 లో కేరళలో సంభవించిన చారిత్రక భారీ వరదల్ని ప్రస్తావిస్తూ ప్రారంభించారు. ఆనాడు వెయ్యి మంది బలయ్యారు. ఒక పర్వతానికి పర్వతమే కొట్టుకుపోయింది.

       
2018 ఆగస్టులో అసాధారణంగా అధిక వర్షపాతం కారణంగా కేరళ లోని 14 జిల్లాల్లో తీవ్ర వరదలు సంభవించాయి . ఇంత పెద్ద వరద 1924 తర్వాత ఇదే. ఈ వరదల్లో 483 మందికి పైగా మరణించారు, 15 మంది తప్పిపోయారు.  వరద పోటుకి రాష్ట్రంలోని 54 డ్యాముల్లో 35 డ్యాములకి చరిత్రలో మొదటిసారిగా గేట్లు ఎత్తేశారు.

       
అయితే సినిమా కథలో ముంచెత్తిన వరదలు, ఆ వరదల్లో మనకి పరిచయం చేసిన పాత్రల పాట్లు, మరణాలు, విజయాలూ ఏకపక్షం చేసి చూపించారు. ఇంత జరుగుతున్నా, ప్రభుత్వమేమైంది, సహాయక చర్యలేమయ్యాయి అన్న ప్రశ్నలు అడ్డు తగిలేలా కథ సాగుతుంది. ప్రభుత్వ సాయాన్ని నామ మాత్రం చేశారు.

       
వాస్తవానికి కేంద్రప్రభుత్వం తన బలగాలతో అతి పెద్ద రెస్క్యూ ఆపరేషనే చేపట్టింది. వాట్సాప్ గ్రూపులు పబ్లిక్ రెస్క్యూ ఆపరేషన్స్ చేపట్టాయి. మత్శ్య కారులూ వాళ్ళ రెస్క్యూ ఆపరేషన్స్ చేపట్టారు. రాష్ట్ర ప్రభుత్వం సరే. మొత్తం కలిపి భారీ యెత్తున హెలీకాప్టర్లు, విమానాలు, బోట్లు, సైన్యం, పోలీసులు, వైద్య బృందాలు, అన్నపానీయాలు అందించే ఎన్జీవోలూ - వీటన్నిటితో చాలా యాక్షన్ స్టోరీ జరిగింది.

       
అయితే యాక్షన్ స్టోరీని కూడా జతచేసి థ్రిల్ చేసే బదులు, పాత్రల మధ్య హ్యూమన్ డ్రామాకే ప్రాధాన్యమిచ్చి ఈ కథ చేసినట్టు కనబడుతోంది. ఈ హ్యూమన్ డ్రామా కోసం సృష్టించిన సన్నివేశాలు భావోద్వేగాలతో బలంగా వుండడం ఈ వరద కథకి కలిసి వచ్చిన అంశం.

నటనలు - సాంకేతికాలు

ప్రధాన పాత్ర పోషించిన టోవినో థామస్ ఫస్టాఫ్ లో ఇతర అనేక పాత్రల కథల మధ్య ప్రధాన పాత్రగా అన్పించడు. సెకండాఫ్ లో పోను పోనూ ప్రాధాన్యం పెరిగి ఒక కదిలించే ముగింపుతో గుర్తుండి పోతాడు. ఈ పాత్ర  ‘కాలా పత్తర్’ లో అమితాబ్ బచ్చన్ పాత్రని గుర్తుకు తెస్తుంది. నేవీ కెప్టెన్ అయిన అమితాబ్ బచ్చన్, షిప్ మునిగిపోతూంటే భయపడి దూకెసి- ప్రయాణీకుల్ని వల్ల ఖార్మానికి వదిలేసిపారిపోతాడు. సైనికుడైన టోవినో థామస్ సైనికుల మరణాలు చూసి పారిపోతాడు. అమితాబ్ బొగ్గు గని కార్మికుడుగా చేరతాడు. టోవినో వూళ్ళో షాపులో పనికి కుదురుతాడు. చివరికి ఇద్దరూ వరద ముప్పు నెదుర్కొంటారు.

       
ఇక ఈ సినిమాలో మొత్తం39 పాత్రలున్నాయి టోవినో  థామస్ పాత్ర కాక. వీటిలో టీచర్ పాత్ర వేసిన తన్వీరామ్, మత్స్య కారుడి కొడుకు పాత్ర వేసిన ఆసిఫ్ అలీ, ప్రభుత్వాధికారి పాత్ర వేసిన కొంచాకో బొబన్ లని గుర్తుపట్టగలం. ఈ నటులు సెకండాఫ్ విపత్తులో భావోద్వేగపూరిత సన్నివేశాలతో కట్టిపడేసినా, పాత్ర చిత్రణలు మాత్రం ఎగుడు దిగుడుగా వుంటాయి. ఫస్టాఫ్ లో ఈ అనేక పాత్రల కథలు ఫాలో కావడం కష్టమైనా, సెకండాఫ్ లో  ఏకత్రాటిపై కొచ్చేసరికి  తమవెంట తీసుకుపోతాయి.

       
సాంకేతికంగా బలంగా వుంది. 15 ఎకరాల్లో గ్రామం సెట్ వేసి సృష్టించిన వరద దృశ్యాలు టెక్నికల్ గా మంచి క్వాలిటీతో వున్నాయి. ప్రకృతి ప్రకోపం, ప్రజల ఆక్రోశం తాలూకు దృశ్యాల చిత్రీకరణ టాప్ రేంజిలో వుంది. కెమెరా వర్క్, ఎడిటింగ్, మ్యూజిక్, యాక్షన్ కొరియోగ్రఫీ బ్యాలెన్సుడుగా పనిచేసి సెకండాఫ్ ని  పకడ్బందీగా నిలబెట్టాయి. సెకండాఫ్ అంతా బలంగా లేనిది ఫస్టాఫే.

చివరికేమిటి

ఇందులో పాత్రల అనుభవాలు చూస్తే పాలగుమ్మి పద్మరాజు రాసిన ‘గాలివాన’ ప్రసిద్ధ కథ గుర్తుకొస్తుంది. ఆపత్కాలంలో పాత్రలతో అలాటి నైతిక, మానవత్వ, సామాజిక, ఆశావాహ అనుభవాల్ని కళ్ళముందుంచాడు దర్శకుడు జూడ్ ఆంథనీ జోసఫ్. గుండెల్ని కెలికే, హృదయవిదారక దృశ్యాలు, అంతలోనే ఊరటనిచ్చే విజయాలూ చూపించుకుపోతూ వెలుగు నీడల ఆట ఆడాడు. ఈ అనుభవాల్లో ఎన్ని నిజమో, ఎన్ని కల్పన చేశాడో గానీ- పూర్తిగా హ్యూమన్
డ్రామాకే ప్రాధాన్యమిచ్చి, వ్యవస్థ సహాయ కార్యక్రమాలతో కూడిన హాలీవుడ్ టైపు యాక్షన్ స్టోరీని దూరంగా వుంచాడు. బాక్సాఫీసుతో ఈ రిస్కు బాగా వర్కౌట్ అయింది.

        

అయితే ఫస్టాఫ్ లో కథ లేకుండా చాలా పాత్రల పరిచయాలూ, వాటి జీవితాలూ, ఆశయాలూ ఎస్టాబ్లిష్ చేయడానికే సమయమంతా తీసుకుని ప్రేక్షకుల్ని ఖాళీగా కూర్చోబెట్టాడు. వరదలు ప్రారంభమయ్యాకే ఇంటర్వెల్ నుంచి ఏకబిగిన సెకండాఫ్ అంతా వూపిరి సలపని ఎమోషనల్ జర్నీకి సమకట్టాడు. ఇది నిజమైన కేరళ స్టోరీ. 2018 కేరళ వరదల్లో ప్రాణాలు కోల్పోయిన వారికి నిజమైన నివాళి. టోవినో థామస్ పాత్రకి శ్రద్ధాంజలి!

—సికిందర్

1332 : స్పెషల్ ఆర్టికల్

 

        (డియర్ రీడర్స్, నేటి నుంచి తిరిగి అన్ని శీర్షికలూ మీ అందుబాటులో కొస్తాయి. రివ్యూలతో బాటు స్క్రీన్ ప్లే సంగతులు, స్క్రీన్ ప్లే టిప్స్, స్ట్రక్చర్ అప్డేట్స్, సందేహాలు- సమాధానాలు, రైటర్స్ కార్నర్, స్పెషల్ ఆర్టికల్స్ మొదలైన శీర్షికలు తిరిగి ఎప్పట్లాగా అందుకోగలరు. కొందరు పాఠకులు (కొత్త రచయితలు, దర్శకులు) పేరు లేకుండా వాట్సాప్ మెసేజీలు చేస్తున్నారు. పేరు, వివరాలు తెలిపితే బావుంటుంది. అయితే వ్యక్తిగతంగా సమాధానాలివ్వడం సాధ్యం కాదు. అర్హమైన వాటికి సందేహాలు -సమాధానాలు శీర్షిక ద్వారా మాత్రమే సమాధానాలివ్వగలమని గమనించగలరు)

        ఇప్పుడు పరిస్థితి ఎక్కడికి దారితీసిందంటే, చూసి చూసి సినిమా ప్రదర్శనా రంగం బాలీవుడ్ నిర్మాణ రంగాన్ని బ్లేమ్ చేయడం మొదలెట్టింది. త్వరలో 50 మల్టీప్లెక్సుల్ని మూసి వేయాలన్న నిర్ణయం తీసుకోవడానికి దోహదం చేసిన కారణం, బాలీవుడ్ సినిమాలు ప్రేక్షకుల్ని ఆకర్షించక పోవడమేనంటూ ప్రకటన కూడా విడుదల చేసింది ఆ సంస్థ. అటు అమెరికాలో కూడా దివాలా తీసిన రీగల్ సంస్థ 500 థియేటర్లని మూసివేస్తున్నట్టు ప్రకటించింది. మనదేశంలో ప్రముఖ పీవీఆర్- ఐనాక్స్ లీజర్ సంస్థ గత మార్చితో ముగిసిన త్రైమాసికంలో రూ. 333 నికర నష్టాన్ని చవిచూడడంతో, 50 మల్టీ ప్లెక్సుల్ని మూసి వేయబోతున్నట్టు ప్రకటించింది.

        గత ఏడాది మార్చిలో, పీవీఆర్ -ఐనాక్స్ లీజర్ సంస్థలు మూడవ, నాల్గవ, ఐదవ శ్రేణి సెంటర్లలో మల్టీప్లెక్సులు ప్రారంభించి,1500 కంటే ఎక్కువ స్క్రీన్‌ల నెట్వర్క్ తో  దేశంలోనే అతిపెద్ద మల్టీప్లెక్స్ చైన్‌ ని  రూపొందించడానికి విలీనాన్ని ప్రకటించాయి. అయితే 2023 జనవరి నుంచి మార్చి వరకు తొలి త్రైమాసికంలో పీవీఆర్ - ఐనాక్స్ గ్రూపుకి దాదాపు రూ. 333 కోట్ల నష్టాలు వాటిల్లాయి. గతేడాది ఇదే సమయంలో రూ. 100 కోట్లకి పైగా నష్టాల్ని చవిచూసింది ఈ గ్రూపు. థియేటర్ల నిర్వహణ ఖర్చులు భారీగా పెరగడం, అందుకు తగ్గట్టు రెవెన్యూ లేకపోవడం మరో కారణంగా చెబుతున్నారు.

        
రెవెన్యూ లేకపోవడానికి బాలీవుడ్ సినిమాలు ఒక దాని తర్వాత మరొకటి బాక్సాఫీసు దగ్గర చతికిల బడడం కారణం. ఈ యేడాది బాలీవుడ్‌లో ఇప్పటి వరకు హిట్ అనిపించుకున్న సినిమాలు రెండే రెండు. ఒకటి షారుఖ్ ‘పఠాన్’. రెండోది అదా శర్మ నటించిన ‘ది కేరళ స్టోరీ’. ఈ మూడు నెలల కాలంలో విడుదలైన 24 సినిమాల్లో ఈ రెండు సినిమాలు తప్పించి ఇంకేదీ ప్రేక్షకుల్ని ఆకర్షించలేకపోయాయి.

       
అసలు ఆకర్షించడానికి స్టార్ సినిమాలు పెద్దగా విడుదల కూడా కాలేదు. విడుదలైన స్టార్ సినిమాల్లో షారూఖ్ ‘పఠాన్’ తప్ప ఇంకేదీ ప్రేక్షకుల్ని థియేటర్లకి రప్పించలేదు. సల్మాన్ ఖాన్ -వెంకటేష్ ‘కిసీకా భాయ్ -కిసీకీ జాన్’, రణబీర్ కపూర్ ‘తూ ఝూటీ -మై మక్కార్’, అజయ్ దేవగణ్ ‘భోలా’, కార్తీక్ ఆర్యన్ ‘షెహజాదా’, అక్షయ్ కుమార్ ‘సెల్ఫీ’ - ఈ ఐదు స్టార్ సినిమాలకి ప్రేక్షక దర్శన భాగ్యం లభించలేదు.

       
ఇక చిన్న తారాగణం, కొత్త తారాగణంతో విడుదలైన 18 లోబడ్జెట్ సినిమాల్లో ‘ది కేరళ స్టోరీ’ తప్ప మిగిలినవి పీవీఆర్- ఐనాక్స్ గ్రూపుకి చుక్కలు చూపించాయి. దీంతో బాలీవుడ్ పనితీరు మీద ధ్వజమెత్తింది. బాలీవుడ్ క్రాష్ అయిందని కొందరు పరిశీలకులు కూడా గొంతు కలుపుతున్నారు.

       
ఇక మిగిలిన త్రైమాసికాల్లో ‘బాహుబలి’ ఫేమ్ ప్రభాస్ నటించిన ‘ఆదిపురుష్’,  రణవీర్ సింగ్ -ఆలియా భట్ నటించిన ‘రాకీ ఔర్ రాణీకీ ప్రేమ్ కహానీ , రణబీర్ కపూర్ నటించిన ‘యానిమల్’, షారుఖ్ ఖాన్ నటించిన ‘జవాన్’, ‘డుంకీ’, సల్మాన్ ఖాన్ నటించిన  ‘టైగర్ 3’ వంటి బిగ్ స్టార్ భారీ సినిమాల మీదే ఆశలు పెట్టుకున్నారు.

       
ఇక సగటు ప్రేక్షకుడు మల్టీప్లెక్స్ టికెట్ రేట్లు రూ. 250, రూ. 350 చూసి పారిపోతున్నాడు. తినుబండారాల ధరలు చూసి సొమ్మసిల్లి పడిపోతున్నాడు. ఈ మల్టీ బాదుడు చూసి కూడా జనం మల్టీప్లెక్సులకి రావడం తగ్గిపోయింది. చిన్న పెద్ద సినిమాలన్నిటికీ ఒకే టికెట్ రేటు పడితే చిన్న సినిమాలకి ప్రేక్షకులు తగ్గి పోతున్నారు. దీంతో దేశ వ్యాప్తంగా నష్టాలు వస్తున్న 50 స్క్రీన్స్ ని వచ్చే ఆరు నెలల కాలంలో మూసివేయాలని పీవీఆర్- ఐనాక్స్ గ్రూపు ప్రకటించింది.

        
తెలంగాణలో టికెట్టు ధర రూ. 295 వుంది. అదే ఆన్‌లైన్ బుకింగ్ అయితే రూ. 329 రూపాయలు. మొన్నటి వరకు రూ. 200 గరిష్టంగా వున్న టికెట్ ధర రూ. 250 కి చేరుకుంది. పెద్ద సినిమాలకి మరో రూ. 50 రూపాయలు పెంచుకునే సదుపాయం కల్పించింది తెలంగాణ ప్రభుత్వం. దాని ఫలితమే ఇప్పుడు పెద్ద సినిమాలకి రూ. 295, ఆన్‌లైన్ లో అయితే రూ. 329. హైదరాబాద్ లో ప్రైవేట్ యాజమాన్యాలు నడుపుతున్న ఒకటి రెండు మల్టీప్లెక్సుల్లో ముందు వరస రెండు లైన్లలో సీట్లకి ధర తగ్గించి రూ. 150 వసూలు చేస్తున్నారు. సగటు ప్రేక్షకుడికి కాస్త ఊరట.

        
అమెరికాలో రీగల్ సంస్థ దివాలా తీయడానికి హాలీవుడ్ సినిమాలు కారణం కాదు. మహమ్మారిలో లాక్ డౌన్ల కాలం నుంచి వాయిదా వేసిన చెల్లింపుల ద్వారా పెరిగిన అద్దె వంటి పాండమిక్ అనంతర ఖర్చులు మూసివేతలకి  ప్రధాన కారణంగా పేర్కొంది సంస్థ. 2019 నుంచి  2022 వరకు ఒక్కో థియేటర్‌కి సగటు నెలవారీ అద్దె 30 శాతం పెరిగిందని పేర్కొంది. మహమ్మారి థియేటర్ వ్యాపారంపై చాలా ప్రభావం చూపింది. ప్రస్తుతం ఈ సంస్థ మీద 4.8 బిలియన్ డాలర్ల ఋణ భారముంది. మహమ్మారి కాలంలో 3 బిలియన్ డాలర్లు నష్టపోయింది. గత సంవత్సరంలో బాక్స్ ఆఫీసు మెరుగుపడింది. మార్వెల్ స్టూడియోస్ ‘స్పైడర్-మ్యాన్: నో వే హోమ్’, ‘షాంగ్-చీ’, ‘టెన్ రింగ్స్’,  ‘సోనీస్ వెనమ్: లెట్ దేర్ బీ కార్నేజ్’ మొదలైన హిట్స్  అనేక ఇతర వాటిలో ప్రేక్షకుల్ని తిరిగి సినిమాల  వైపుకు లాగాయి. అయినా పేరుకుపోయిన చెల్లింపులు దివాలా తీయించాయి.

       
ఇప్పటికే న్యూయార్క్, కాలిఫోర్నియా, లాస్ వెగాస్ మొదలైన నగరాల్లో 29 మల్టీప్లెక్సులు మూతబడ్డాయి.  దివాలా తీసిన సమయంలో రీగల్ దేశవ్యాప్తంగా సుమారు 500 స్క్రీన్స్ ని నిర్వహిస్తోంది. 

        
మనదేశంలో మల్టీప్లెక్సులు మహమ్మారి దెబ్బని తట్టుకున్నాయి. కానీ బాలీవుడ్ దెబ్బని తట్టుకోలేకపోతున్నాయి. అందుకే అన్నారు- ఇండియన్ సినిమా అంటే సౌత్ సినిమాలని. బాలీవుడ్ స్థానభ్రంశం చెంది సౌత్ సినిమాలు దేశాన్ని ఆక్రమిస్తాయని. ఇకనైనా బాలీవుడ్ కళ్ళు తెరవక పోతే అంతర్జాతీయ బ్రాండింగ్ ని కూడా కోల్పోయే పరిస్థితి ఎదురుకావొచ్చు.

—సికిందర్

 

1331 : రివ్యూ!

 

దర్శకత్వం : విజయ్ ఆంటోనీ

తారాగణం : విజయ్ ఆంటోనీ, కావ్యా థాపర్, రాధా రవి, వైజీ మహేంద్రన్, మన్సూర్ అలీ ఖాన్, హరీష్ పేరడి తదితరులు

రచన : విజయ్ ఆంటోనీ, కె పళని, పాల్ ఆంటోనీ; సంగీతం : విజయ్ ఆంటోనీ, ఛాయా

గ్రహణం : ఓం నారాయణ్

బ్యానర్ : విజయ్ ఆంటోనీ  ఫిల్మ్ కార్పొరేషన్

నిర్మాత : ఫాతిమా విజయ్ ఆంటోనీ

విడుదల : మే 19, 2023

***

          2016 లో ‘పిచైక్కారన్’ (బిచ్చగాడు) విజయం తర్వాత , 2020లో తమిళ స్టార్ విజయ్ ఆంటోనీ దీనికి సీక్వెల్ చేయడానికి ప్లాన్ చేసి ‘పిచైక్కారన్’ దర్శకుడు శశిని దర్శకత్వం వహించమని కోరాడు. అయితే శశి ఇతర సినిమాలతో బిజీగా వుండడంతో కుదరలేదు. దీంతో విజయ్ ఆంటోనీ దర్శకురాలు ప్రియాకృష్ణ స్వామిని కోరాడు. ఆమె ఒప్పుకుని తర్వాత తప్పుకుంది. ఇక విజయ్ ఆంటోనీ దర్శకుడు ఆనంద కృష్ణన్ ని కోరాడు. అతను కూడా తిరస్కరించడంతో ఇక తప్పక విజయ్ ఆంటోనీ తానే త్రిపాత్రాభినయం చేయడానికి సిద్ధపడ్డాడు : సినిమాలో నటించడానికి ద్విపాత్రాభినయం- సినిమా తీయడానికి దర్శకత్వ పాత్ర. ఇక షూటింగ్ లో పాట చిత్రీకరిస్తున్నప్పుడు తనూ, హీరోయిన్ కావ్యా థాపర్ తీవ్రంగా గాయపడ్డారు. ఇంతలో ‘పిచైక్కారన్ 2’ కథ తన కథ నుంచి కాపీ కొట్టారని ఒక రచయిత కోర్టు కెక్కాడు. ఇలా మళ్ళీ ఇంకో బిచ్చగాడి కథ చెప్పడానికి ఇన్ని కష్టాలు గట్టెక్కిన విజయ్ ఆంటోనీ సినిమాతో ఏమిచ్చాడో చూద్దాం...

కథ

విజయ్ గురుమూర్తి (విజయ్ ఆంటోని) ఓ పెద్ద వ్యాపార సామ్రాజ్యానికి అధిపతి. అతను హేమ (కావ్య థాపర్) ని ప్రేమిస్తాడు. అతడి అపార సంపద మీద సీఈఓ (దేవ్ గిల్), ఒక డాక్టర్ (హరీష్ పేరడి), ఇంకొక అసోషియేట్ (జాన్ విజయ్) కన్నేస్తారు. దుబాయ్ లో ఒక సైంటిస్టు మెదడు మార్పిడి శస్త్ర చికిత్స గురించి ప్రకటించింది చూసి, అతడ్ని సంప్రదిస్తారు. విజయ్ మెదడుని ఇంకొకడి మెదడుతో మార్పిడి చేసి, విజయ్ ని తమ చెప్పుచేతల్లోకి తెచ్చుకోవాలని సైంటిస్టుతో పథకం రచిస్తారు.

          

సత్య (విజయ్ ఆంటోనీ) అనే ఒక బిచ్చగాడుంటాడు. చిన్నప్పుడు తల్లిదండ్రుల్ని కోల్పోయి బిచ్చమెత్తుకుని చెల్లెల్ని పోషిస్తూంటే, ఒక ముఠా చెల్లెల్ని ఎత్తుకుపోతుంది. ఈ క్రమంలో సత్య ఒకడ్ని చంపి 20 ఏళ్ళు జైలుకి పోతాడు. జైలునుంచి విడుదలై చెల్లెలి అన్వేషణలో వుంటాడు. ఈ సత్య దుష్టత్రయం కంటబడేసరికి- విజయ్ లాగే వున్న సత్య మెదడుని విజయ్ కి మార్పించేసి సత్యని చంపి పారేస్తారు.

          

ఇప్పుడు సత్య మెదడుతో వున్న విజయ్ సత్యలాగా బిహేవ్ చేస్తూ దుష్టత్రయం మాట వినడు. అతడికి సంపద మీద ఆసక్తి వుండదు. చెల్లెలి అన్వేషణే జీవిత లక్ష్యంగా వుంటాడు. ఈ నేపథ్యంలో దుష్టత్రయంతో ఎలాటి సమస్య లొచ్చాయి? తను విజయ్ కాదు సత్య అన్న గుట్టు రట్టయితే ఏం జరిగింది? చెల్లెలు ఎప్పుడు ఎలా దొరికింది? ఈ ప్రశ్నలకి సమాధానాలు మిగతా సినిమాలో.

ఎలావుంది కథ

‘బిచ్చగాడు’ లో కోమాలో వున్న తల్లిని బతికించుకోవాలంటే సంపన్నుడైన కొడుకు నెల రోజులు బిచ్చగాడిగా బతకాలన్న సాధువు మాటతో, ఒక మదర్ సెంటిమెంటు హిట్ సినిమా చూశాం. హైదరాబాద్ లో రోజూ 4 ఆటలతో 50 రోజులకి పైగా హౌస్ ఫుల్స్ ఆడింది. ‘బిచ్చగాడు’ తో బయ్యర్లు రిచ్ అయ్యారు. ఇప్పుడు ‘బిచ్చగాడు 2’ లో చెల్లెలు దొరకాలంటే పేదలకి సాయపడాలన్న సీనియర్ బిచ్చగాడి మాటతో, చెల్లెలి సెంటిమెంటు సి నిమా చూస్తాం. ఇది సెకండాఫ్ లో వచ్చే కథ.

        

ఫస్టాఫ్ లో మెదడు మార్పిడి కథ వుంటుంది. మెదడుని మార్చడమేనేది ఇప్పట్లో సాధ్యమయ్యే ప్రక్రియ కాదని నిపుణులు చెప్తున్నా- సినిమాకి వినోద ఫాంటసీగా ఇది చెల్లిపోతుందనుకో వచ్చు. హాలీవుడ్ లో ఇలాటి సినిమాలు కొన్ని వచ్చాయి. ఒక ఫ్రెంచి సినిమా కూడా వుంది – ‘ది మాన్ విత్ ది ట్రాన్స్ ప్లాంటెడ్ బ్రెయిన్’ లో బ్రెయిన్ స్పెషలిస్టుకి గుండె జబ్బుతో చనిపోయే పరిస్థితి వస్తుంది. దీంతో తన బ్రెయిన్ ని కారు రేసుల్లో బ్రెయిన్ దిబ్బతిన్న 23 ఏళ్ళ రేసర్ కి అమర్చమని కోరతాడు.

       
ఐతే ‘బిచ్చగాడు 2’ తో వచ్చిన సమస్య ఏమిటంటే, విజయ్- సత్య ఒకలాగే వున్నప్పుడు బ్రెయిన్ మార్చాల్సిన పనేముంది? విజయ్ స్థానంలో సత్యని ప్రవేశపెడితే సరిపోయే ఫార్ములా వుండగా? కనుక ఫస్టాఫ్ లో కాసేపటికి ఈ బ్రెయిన్ మార్పిడి కథ అర్ధాన్ని కోల్పోతుంది. అలాగే ఇదంతా కాకుండా, కంపెనీల సర్వర్స్ ని హ్యాకింగ్ చేసి, డేటాని ఇంక్రిప్ట్ చేసి పట్టుకుని బెదిరిస్తే, డబ్బే డబ్బు వచ్చేస్తుంది విలన్స్ కి. ఇలాకాక సంపద దోపిడీకి నాటకీయత కోసం సత్య మెదడుగల విజయ్ ని ఇంట్లోకి ప్రవేశ పెట్టినా, ఆ నాటకీయత కూడా లేకుండా పోయింది. పావుగంటలో ఇంటర్వెల్ కల్లా విలన్స్ ని చంపేసి ఫస్టాఫ్ కథ ముగించేస్తాడు.

       
సెకెండాఫ్ లో చెల్లెలి కోసం కథ మొదలవుతుంది. సత్య లక్ష్యం చెల్లెలే కాబట్టి సంపద మీద ఆసక్తి లేని తను ఇంటర్వెల్లో విలన్స్ ని చంపేశాడనుకో వచ్చు. ‘డబ్బు వద్దు, చెల్లెలే కావాలి’ అని విలన్స్ తో అంటాడు కూడా. అయితే సెకండాఫ్ లో ఆ విజయ్ డబ్బే తీసి వాడేస్తాడు సత్య. నీ చెల్లెలు దొరకాలంటే పేదలకి సాయపడమని సీనియర్ బిచ్చగాడు అనడంతో, ఆ విజయ్ కి చెందిన డబ్బుతో పేదలకి సాయపడతాడు సత్య. నైతికంగా ఇది కరెక్టేనా? ఇక ముగింపులో కోర్టు సీనులో ఎన్నో ప్రశ్నలు మిగిలిపోతాయి. మెదడు మార్పిడి విషయం కోర్టు దృష్టికే రాకుండా సత్యకి శిక్షపడుతుంది- విలన్స్ ని చంపిన కేసులో. 

       
తనని చంపి తన మెదడు విజయ్ కి అమర్చారని చెప్పాల్సింది చెప్పడు సత్య. జరిగినవి మూడు హత్యలే కాదు, సత్య హత్యతో కలుపుకుని నాల్గు హత్యలు. చాలా చిక్కు ముడి కేసు ఇది. విలన్స్ ముగ్గురూ హత్యకి గురయ్యారంటే, వాళ్ళని సత్య మెదడుతో వున్న విజయ్ చంపినట్టా, లేక విజయ్ శరీరంతో వున్న సత్య చంపినట్టా? కోర్టు జుట్టు పీక్కోవాల్సిందే!

       
హిందీ ‘నెయిల్ పాలిష్’  (2021) లో, వీర్ సింగ్ మీద హత్య కేసు రుజువవుతుంది. కానీ అతను వీర్ సింగ్ కాడు. స్ప్లిట్ పర్సనాలిటీతో ఆడతనంతో చారు రైనా గా మారిన అమ్మాయి. ఇప్పుడు వీర్ సింగ్ లో వీర్ సింగ్ లేడు, చారూ రైనా వుంది గనుక, వీర్ సింగ్ చేసిన హత్యకి చారు రైనా కెలా శిక్ష వేస్తారు? జడ్జి పిచ్చెత్తి పోతాడు. ఈ కేసుని చాలా ఇంటలిజెంట్ గా సాల్వ్ చేస్తారు.  ఇదే పరిస్థితి విజయ్ -సత్యలతో కూడా వుంది. కానీ దీన్ని పట్టించుకోకుండా ఏదో వంటా వార్పు తీర్పు చెప్పేశారు.

       
ఇక విలన్స్ ని చంపిన సత్య శవాల్ని మూటగట్టి సముద్రంలో పారేస్తాడు. ఆ శవాల్ని బయట పెట్టడానికి దర్శకుడు సముద్రంలో విమాన ప్రమాదాన్ని కల్పించాడు. ప్రయాణీకుల మృత దేహాల్ని గాలిస్తూంటే ఈ శవాలు దొరుకుతాయి. ఈ శవాలు జాలర్లకి దొరికినట్టుగా చూపిస్తే సరిపోయేది. విమాన ప్రమాదం చేసి ప్రయాణీకుల్ని చంపడం దేనికి?

       
ఇలా కథ మొత్తం అనేక లొసుగులతో వుంటుంది. చెల్లెలి సెంటిమెంటు కథ కాస్తా నేరాలు ఘోరాలు కథగా మారింది. పేదలకి చేసిన మేలుతో చివరికి చెల్లెలు కన్పిస్తే, భావోద్వేగాలు కట్టలు తెంచుకుంటాయి. అయితే చెల్లెలు ఇన్నాళ్ళూ ఎక్కడుందో ఏమిటో వివరం వుండదు.

నటనలు - సాంకేతికాలు

సంపన్నుడుగా, బిచ్చగాడుగా విజయ్ ఆంటోనీ బాగానే నటించాడు. అతను నటనలో ఫెయిల్ కాడు. ఈ సారి పాత్రల్ని కూడా ఫీలైతే ఇంకా బాగా నటించేవాడు. తను సత్య మెదడుతో వున్న విజయ్ అన్న వొక ఎవేర్నెస్ తో పాత్రలు నటించివుంటే- ఆ అంతర్ సంఘర్షణ వేరేగా వుండేది.  ఇవి మాస్ పాత్రలే అయినా ఎంటర్ టైన్ చేయవు. సీరియస్ పాత్ర పోషణలే చేశాడు. ప్రారంభంలో తప్పితే హీరోయిన్ తో రొమాన్స్ కి కూడా అవకాశం లేదు. హీరోయిన్ కావ్యా థాపర్ రూపం శిల్పం బావున్నా పాత్ర అంతంత మాత్రం. పాటలో కాస్త ఎక్స్ పోజింగ్. విలన్లు ఓకే. ముఖ్య మంత్రి పాత్రని రాధారవి నటించాడు.

       
కథ, రచన, సంగీతం, ఎడిటింగ్, ద్విపాత్రాభినయం, దర్శకత్వం,నిర్మాణం ఇవన్నీ విజయ్ ఆంటోనీ ఖాతాలోకి పోతాయి. తొలిసారి అయినా అనుభవమున్న వాడిలా దర్శకత్వం వహించాడు. నిర్మాణ విలువలు బిచ్చగాడికి రిచ్ గా వున్నాయి.

చివరికేమిటి?

‘Money is injurious to the world’ (డబ్బు ప్రపంచానికి హానికరం) అని ఆరంభంలో వేశారు. ఏ ప్రపంచానికి హానికరం? చిన్నప్పట్నుంచీ అడుక్కుతింటున్న సత్య లాంటి వాళ్ళ ప్రపంచానికా? వైభోగాలు అనుభవిస్తున్న విజయ్ లాంటి వాళ్ళ ప్రపంచానికా? కొటేషన్ కీ కథకీ సంబంధం కన్పించదు. ఆర్ధిక మాంద్యంతో ప్రపంచం, ఆర్ధిక విధానాలతో దేశం కల్లోలంగా మారి ప్రజలు అలమటిస్తూంటే, డబ్బు ప్రపంచానికి హానికరమని నెగెటివ్ భావాలు ప్రసారం చేయడం అర్ధం లేనిది. ఏ సెంటిమెంటూ లేకుండా పదేపదే లక్ష్మిని రద్దు చేస్తున్న ప్రభుత్వంతో వంత పాడుతున్నట్టుంది కొటేషన్. ఇండియా అంటే ఇదే అన్నట్టు సినిమా నిండా కడుపాకలితో బిచ్చగాళ్ళ ఆర్తనాదాలూ, మురికి కూపాల్లో నివాసాలూ చూపిస్తూ డబ్బు ప్రపంచానికి హానికరమని చెప్తే, మరి దారిద్ర్యం ఆరోగ్యకరమా? అసలు ‘బిచ్చగాడు 2’ తో ఏం చెప్పాలనుకున్నాడో అర్ధంగాదు.

       
నేటి సినిమాల మార్కెట్ యాస్పెక్ట్ అయితే రోమాంటిక్స్, కాకపోతే ఎకనామిక్స్ తో కూడిన జానర్లయినప్పుడు, ఇలా ఎకనామిక్స్ ని నెగెటివ్ అర్ధంలో చూపించి గ్లామరైజ్ చేయడం ఏ మాత్రం విజ్ఞత అన్పించుకోదు. ఉద్దరించడానికి బయల్దేరిన హీరో ఒక్క బిచ్చగాడికీ గౌరవనీయ జీవితం కల్పించింది లేదు.

—సికిందర్