985 : స్క్రీన్ ప్లే సంగతులు

(కొన్ని ఇతర రాత పనుల వల్ల బ్లాగు రాత పని దాని తల రాతగా మారిపోయింది... మన్నించాలి)

        క్రైమ్ థ్రిల్లర్లు ఫ్లాష్ బ్యాక్స్ తో వుంటే ఒకే ఉద్దేశంతో వుంటాయి : దర్యాప్తు అధికారి గోల్, అంటే హత్యా రహస్యాన్ని కనుక్కునే ఉద్దేశం. దీంతో ఆ ఫ్లాష్ బ్యాక్స్ హత్యా రహస్యం తాలూకు క్లూస్ బయటపడే కథనాలతో వుంటాయి. ఫ్లాష్ బ్యాక్స్ తో ఏ ఇన్వెస్టిగేటివ్ థ్రిల్లర్లు చూసినా ఇదే చట్రంలో వుంటాయి. ఫ్లాష్ బ్యాక్స్ లో బయటపడుతూ పోయే క్లూస్ తీవ్రతలో ఒకదాన్ని మించి ఒకటుంటాయి. పరస్పర విరుద్ధంగానూ వుండొచ్చు. దీంతో దర్యాప్తు క్రమంలో సస్పెన్స్, థ్రిల్ బాగా పెరుగుతాయి. ఇంతేకాదు, గతం (ఫ్లాష్ బ్యాక్స్) జోలికి పోతే దర్యాప్తు అధికారికి చావు తప్పదన్న హెచ్చరిక, దాడులు కూడా వుంటాయి. దీంతో కథకి ప్రధాన పాత్రగా దర్యాప్తు అధికారికి సంఘర్షణ, గోల్, పరిష్కారమనే అర్ధవంతమైన త్రీ యాక్ట్ స్ట్రక్చర్ ఏర్పడుతుంది స్క్రీన్ ప్లేకి. ఇలా ఫ్లాష్ బ్యాక్స్ స్క్రీన్ ప్లేలో ప్రధాన పాత్ర ప్రయాణానికి తోడ్పడాలి. అంటే, స్క్రీన్ ప్లేలో వుండే మిడిల్ విభాగపు సంఘర్షణతో కూడిన బిజినెస్ ఆధారంగా, కథా విస్తరణకి తోడ్పడాలి. ప్రధాన పాత్ర ఈ ముఖ్యావసరాల్ని తీర్చని ఇంకేవో ఉద్దేశాలతో ఫ్లాష్ బ్యాక్స్ వుంటే, ఫ్లాష్ బ్యాక్స్ సహా పూర్తి కథా విఫలమవుంతుంది. ‘నిశ్శబ్దం’ లో ఈ ఘోర తప్పిదమే జరిగింది.   

‘నిశ్శబ్దం’ లో ప్రధాన పాత్ర అంజలి పోషించిన పోలీస్ డిటెక్టివ్ మహాలక్ష్మి పాత్ర. దీనికి అనూష్కా సాక్షి పాత్ర, మహాలక్ష్మి పాత్రకి ప్రతినాయకి పాత్ర. చివరికి రహస్యం విప్పితే ఆమే హత్య చేసి వుంది గనుక. 1981 హిందీ ‘ధువా’ లో రాఖీ లాగా, 1989 ‘ఖోజ్’ లో రిషి కపూర్ లాగా, దీని రీమేక్ తెలుగులో ‘పోలీస్ రిపోర్ట్’ లో మోహన్ లాగా; ఇంకా బెంగాలీ, మలయాళ, తమిళంలలో హీరో పాత్రల్లాగా, తాజాగా 2019 లో మలేషియా ‘మిస్టరీ డిలైలా’ లో హీరో పాత్రలాగా. ఇవన్నీ 1958 ‘బ్రిటిష్ ‘ఛేజ్ ఏ క్రూకెడ్ షాడో’ కి అనుసరణలు. ఎండ్ సస్పెన్స్ కథలతో సినిమాలకి జరుగుతున్న నష్టాలకి ఈ బ్రిటిష్ క్రైమ్ థ్రిల్లర్ ఆనాడు పరిష్కారం చెప్పింది. ఈ కోవలో నిర్మించిన పై సినిమాలు మెప్పుపొందాయి. (మల్లాది వెంకటకృష్ణ మూర్తి మాటలు రాసిన ‘పోలీస్ రిపోర్ట్’ యూట్యూబ్ లో వుంది. ఇది చూసి ప్రేక్షకులు పెట్టిన కామెంట్లు చూడండి). ఎండ్ సస్పెన్స్ తో వచ్చే నష్టాల గురించి సందర్భం వచ్చిన్నప్పుడల్లా బ్లాగులో రాస్తూనే పోయాం. అయినా కూడా ‘నిశ్శబ్దం’ లాంటివి పదేపదే వచ్చి పెద్ద శబ్దంతో ధడేలుమని ఫ్లాపవుతున్నాయి. ఇక కాకులెగిరి పోతున్న రెక్కల చప్పుడు. అభినవ ‘హిచ్ కాకులు’. మచ్చుకి కొన్ని ఉదాహరణలు ఈ లింక్ క్లిక్ చేసి స్క్రోల్ డౌన్ చేస్తూ చూడొచ్చు. 

కథా రూపం 

     ‘నిశ్శబ్దం పూర్తి కథ వీకీపీడీయాలో అప్పుడే ఇచ్చేశారు. దాని ప్రకారమే చూద్దాం. అయితే పూర్వ కథ ఇవ్వలేదు. సినిమాలో ముందుగా చూపించిన పూర్వ కథ చూస్తే, అమెరికాలో ఒక పాడుబడ్డ విల్లాలో ఒక జంట హత్యకి గురవుతారు. ఇలాటి సంఘటనలు జరుగుతూంటాయి. పోలీసులు పరిశోధించి ఈ హత్యల్లో మానవ ప్రమేయం కన్పించక పోవడంతో, విల్లాలో ఆత్మవుందని భావించుకుని కేసులు మూసేస్తారు. ఐతే వచ్చిన వాళ్ళనల్లా చంపుతున్న ఆత్మే వుంటే, అన్నిసార్లు వెళ్తున్న పోలీసుల్ని ఎందుకు చంపడంలేదో స్పష్టత వుండదు. ఆ విల్లాలోకి ఇంకెవరూ వెళ్లకుండా సీలు కూడా చెయ్యరు. ఈ నేపథ్యంలో ఇప్పుడు 47 ఏళ్ల తర్వాత ప్రధాన కథ మొదలవుతుంది. 

ప్రధాన కథ : చెవిటి మూగ అయిన పెయింటర్ సాక్షి (అనూష్కా) మ్యూజిషియన్ ఆంథోనీ గోన్సాల్వెజ్ (మాధవన్) తో ఎంగెజిమెంటు చేసుకుని, ఆ విల్లాలో వున్న పెయింటింగు కోసం అతడితో అక్కడికి వెళ్తుంది. అక్కడ ఆంథోనీ మీద ఆత్మ దాడి చేసి చంపేస్తుంది. సాక్షి పారిపోతుంది. 

ఈ కేసుని పోలీస్ డిటెక్టివ్ మహాలక్ష్మి (అంజలి) ఆమె బాస్ రిచర్డ్ డాకిన్స్ (మైకేల్ మాడ్సెన్) చేపడతారు. అప్పటికే వీళ్ళు కొందరమ్మాయిల మిస్సింగ్ కేసుల మీద వుంటారు. ఆంథోనీ హత్యకి సంబంధించి మహాలక్ష్మి సాక్షిని ప్రశ్నిస్తుంది. ఆమె స్టేట్ మెంట్ లో ఆమె ఫ్రెండ్ సోనాలీ కనిపించడం లేదని చెప్తుంది. తన ఎంగేజిమెంటైన రెండురోజుల తర్వాత నుంచి కనిపించడం లేదు. 

          సాక్షితో ఫ్లాష్ బ్యాక్ -1:  సాక్షి సోనాలీతో బాటు అనాధాశ్రయంలో పెరిగింది. ఒకరోజు ఒక సమాచారం వస్తే సియాటిల్ బయల్దేరుతుంది. సోనాలీ డిస్టర్బ్ అయి సాక్షి సియాటిల్లో స్థిరపడగానే తనని పిలిపించుకోవాలని మాట తీసుకుంటుంది. సియాటిల్లో ఆర్ట్ గ్యాలరీలో చేరుతుంది సాక్షి. అక్కడ వివేక్ (సుబ్బరాజు) అనే అతను పరిచయమవుతాడు. అప్పుడు అక్కడికి ఆర్ట్ ఎగ్జిబిషన్ని ప్రారంభించడానికి మ్యూజిషియన్ ఆంథోనీ వస్తాడు. సాక్షి వేసిన పెయింటింగ్ కి ఫిదా అయిపోయి మిలియన్ డాలర్లు ఆమె అనాథాశ్రయాని కిచ్చేస్తాడు. తన మ్యూజికల్ ప్రోగ్రామ్ కి ఆహ్వానిస్తాడు. ప్రోగ్రామ్ అయ్యాక తనకి పెయింటింగ్ నేర్పమం
టాడు. ఆమెకి మ్యూజిక్ నేర్పుతాడు. ఇంతలో సోనాలీ వచ్చేసి సాక్షితో వుంటుంది. ఇక సాక్షీ ఆంథోనీల మధ్య స్నేహం ప్రేమగా మారి ఎంగేజిమెంటుకి దారితీస్తుంది. తర్వాత ఒక రోజు విల్లాలో వున్న జోసఫైన్ పెయింటింగు తెచ్చుకునేందుకు ఆంథోనీని తీసుకుని వెళ్తుంది సాక్షి. అక్కడ ఆత్మ ఆంథోనీని చంపేసింది.     

 ప్రధాన కథ : డిటెక్టివ్ మహాలక్ష్మి దర్యాప్తు కొనసాగిస్తూ సోనాలీ అదృశ్యం గురించి ఆరా తీయడానికి అనాధాశ్రయం వెళ్తుంది. ఆమె అదృశ్యానికీ ఆంథోనీ హత్యకీ సంబంధముందని అనుమానిస్తుంది. సాక్షి తనకే సొంతమన్నట్టుగా సోనాలీ ప్రవర్తన వుండేదని తెలుసుకుంటుంది. ఈ ప్రవర్తనతో సోనాలీ ఒకడ్ని పొడిచిన కేసులో జైలుకెళ్లింది కూడా. తిరిగివచ్చి మహాలక్ష్మి సాక్షి ఇంటికెళ్తే, అక్కడొక ముసుగువ్యక్తి ఎదురయ్యేసరికి వెంటాడి కాలుస్తుంది. తప్పించుకుంటాడు.

పోలీసులు మళ్ళీ విల్లా కెళ్ళి సోనాలీకి సంబంధించిన సాక్ష్యాధారాలకోసం శోధిస్తారు. అక్కడ టామ్ అనే పోలీసుకి ఒక తాళం చెవి దొరుకుతుంది. అది ఆంథోనీది. అది రిచర్డ్ కివ్వడాని వెళ్తాడు. అది తీసుకుని టామ్ ని చంపేస్తాడు రిచర్డ్. టామ్ శవం దగ్గర రిచర్డ్ బ్లేజర్ బటన్ని చూసి రిచర్డ్ ని అనుమానిస్తుంది మహాలక్ష్మి.

రిచర్డ్ రూమ్ లోకి రహస్యంగా వెళ్ళి అక్కడ తాళం చెవిని గమనిస్తుంది. రిచర్డ్ ని ఫాలో అయి ఆంథోనీ ఫామ్ హౌస్ కెళ్తుంది. రిచర్డ్ అక్కడ సీసీ టీవీ హార్డ్ డిస్క్ కోసం వెతికి అది లేకపోవడంతో కోపంతో వెళ్ళిపోతాడు. 

 వివేక్ తో ఫ్లాష్ బ్యాక్ -2  : వివేక్ దృక్కోణంలోకి కథ మారుతుంది. ఆర్ట్ గ్యాలరీలో సాక్షీ వివేక్ లు స్నేహితులయ్యారు. సోనాలీ వచ్చి సాక్షితో వున్నాక సాక్షిని వివేక్ కి దూరంగా వుంచడానికి ప్రయత్నిస్తుంది. ఇందుకు హర్టయిన వివేక్ కి సోనాలీ డిఫరెంట్ క్యారక్టరని నచ్చజెప్తుంది సాక్షి. ఈ ప్రవర్తనతో గతంలో ఆమె ఒకడిమీద చేసిన హత్యాప్రయత్నం గురించి చెప్తుంది. ఇదెలా జరిగిందో సంఘటన వివరిస్తుంది. వివేక్ సోనాలీని అర్ధం జేసుకుని దగ్గరవుతాడు. ప్రపోజ్ చేస్తాడు. ఇదయ్యాక ఆంథోనీ సాక్షికి ప్రపోజ్ చేస్తే సోనాలీఒప్పుకోదు. ఒక ప్రోగ్రాంలో అభిమానులు ఆంథోనీని చుట్టుముట్టి ముద్దుల్లో ముంచెత్తి ఫోన్ నంబర్లు ఇచ్చేసరికి అతను తిరుగు బోతని చెప్పేస్తుంది సోనాలీ. కావాలంటే రుజువు చేస్తానంటుంది. అతణ్ణి రెచ్చగొడుతూ మెసేజి పెడుతుంది. పట్టించుకోడు. తర్వాత కలుసుకోవడానికి ఒప్పుకుంటాడు. అతడితో ఫామ్ హౌస్ కెళ్తుంది. సాక్షి అనుసరిస్తుంది. వాళ్ళిద్దర్నీ గమనిస్తుంది. వాళ్ళు సన్నిహితంగా వున్నప్పుడు అతను అకస్మాత్తుగా బ్యాట్ తీసుకుని ఆమె తల మీద కొట్టి చంపేస్తాడు. రిచర్డ్ వచ్చేసి ఈ హత్యని గప్ చిప్ చేయడానికి సాయపడతాడు ఆంథోనీకి.

 సాక్షి అక్కడ్నించి పారిపోయి జరిగింది వివేక్ కి చెప్తుంది. ఇద్దరూ ఆంథోనీకి బుద్ధి చెప్పాలని నిర్ణయించుకుంటారు. మిస్సయిన ఇతర అమ్మాయిలు ఆంథోనీ ప్రోగ్రాం జరిగినప్పుడల్లా మిస్సయ్యారని తెలుసుకుంటుంది సాక్షి. ఇక ఆంథోనీని చంపే పథకమేస్తారు సాక్షీ వివేక్ లు. పెయింటింగ్ వంకతో ఆంథోనీని పాడుబడ్డ విల్లాకి తీసికెళ్తుంది సాక్షి. అక్కడ సోనాలీ గురించి ఆంథోనీని అడగడం మొదలెడతారు సాక్షీ వివేక్ లు. 

ఆంథోనీతో ఫ్లాష్ బ్యాక్ -3 : ఆంథోనీ చెప్పడం మొదలెడతాడు. అతడికి రెండేళ్ల క్రితం పెళ్లయింది. ఒకరోజు భార్య పడకమీద అతణ్ణి వేరే పేరుతో పిలిచేస్తుంది. అతను అనుమానిస్తాడు. ఆమె మోసం చేస్తోందని గ్రహిస్తాడు. ఒక హోటల్ కి ఆమెని ఫాలో అయి ఆమె ప్రియుడు సహా పట్టుకుని ఇద్దర్నీచంపేస్తాడు. కెప్టెన్ రిచర్డ్ వచ్చి చూసి ఆంథోనీకి చెప్తాడు. తను కూడా తన భార్యని ఫాలో అయి ఇక్కడికి వచ్చానని, ఆమె ప్రియుడితో వేరే రూంలో వుందనీ అంటాడు. ఆంథోనీ వెళ్ళి రిచర్డ్ భార్యని కూడా చంపేస్తాడు. అప్పట్నుంచీ మోసం చేసే అమ్మాయిల్ని ఆంథోనీ చంపడం మొదలెడితే రిచర్డ్ కవర్ చేస్తూ వచ్చాడు. ఇదంతా విన్న సాక్షి ఆ విల్లాలో ఆంథోనీని చంపేస్తుంది. 

ప్రధాన కథ : సాక్షి వివేక్ లు హార్డ్ డిస్క్ ఆధారంగా రిచర్డ్ నేరాలు ఎఫ్బీఐకి చెప్పాలని ప్రయత్నిస్తూంటే రిచర్డ్ వచ్చేసి దాడి చేస్తాడు. మహాలక్ష్మి వచ్చేసి రిచర్డ్ ని చంపేసి వాళ్ళిద్దర్నీ కాపాడుతుంది. ఆంథోనీ హత్యని అంతుచిక్కని హత్యగా ప్రకటిస్తారు. సాక్షీ వివేక్ లు సోనాలీ సమాధి దగ్గర శ్రద్ధాంజలి ఘటిస్తారు. 

క్యాన్సిలైన కథ 

      పై రూపంలో వున్న కథలో స్థూలంగా కొన్ని ప్రధాన అడ్డంకులు కన్పిస్తాయి. విల్లాలో ఆత్మ చంపుతోందని గత కేసులతో తేలాక, ఆంథోనీ హత్యా దర్యాప్తుకి అవకాశమెక్కడిది? అది కూడా ఆత్మ చంపిన కేసే అవదా? ఇంకెందుకు దర్యాప్తు చేపట్టాలి? సోనాలీ చంపి వుంటుందని ఏ ఆధారాలతో మొదట అనుమానించి దర్యాప్తుకి ప్రారంభోత్సవం చేశారు. అలా దర్యాప్తు చేస్తూ పోలీసులు విల్లాలో కొస్తూంటే ఆత్మ వాళ్ళ మీద ఎందుకు దాడి చేయడం లేదు? ఆంథోనీని చంపడానికి సాక్షి అలాటి విల్లాలోకి తీసికెళ్ళే ధైర్యమెలా చేసింది? చివరికి ఆంథోనీ హత్య మరో మిస్టరీ వీడని మరణమని చెబుతూ కథ ముగించారు. అంటే ఆత్మ వున్నట్టా? ఆత్మ వుంటే, సాక్షి ఆంథోనీని చంపుతోంటే, సాక్షిని కదా ఆత్మ చంపెయ్యాలి ఆమె కుట్ర పసిగట్టి?

సాక్షీ ఆంథోనీల ప్రేమకి సోనాలీ అడ్డు. సోనాలీనలా వుంచుదాం, అసలు ఒక సెలబ్రిటీ మ్యూజీషియన్ తనకి ప్రపోజ్ చేస్తే సాక్షి ఒకసారి అతడి ప్రొఫైల్ చెక్ చేసుకోవాలిగా? అప్పుడతను పెళ్ళయిన వాడనీ, భార్య ‘ఆత్మహత్య’ చేసుకుందనీ తెలుసుకుని జాగ్రత్త పడాలిగా? ఆంథోనీ కూడా భార్య మోసం చేసిందని అలాటి అమ్మాయిల్ని చంపే సైకోగా మారినప్పుడు, సాక్షిని ఎందుకు ప్రేమించి ఎంగేజిమెంట్ చేసుకున్నాడు? అతను మారాడా? మారితే తనని పరీక్షించబోయిన సోనాలీ నెందుకు చంపాడు? సవ్యమైన పాత్ర చిత్రణలు అవసరం లేదా? పైపైన రాసేసి పైపైన తీసేయడానికి మసాలా సినిమాలకి కుదిరినట్టు, ప్రేక్షకుల మేధకి పదునుపెట్టే ఇన్వెస్టిగేటివ్ సినిమాలకి కూడా కుదురుతుందా? పై అడ్డంకుల వల్ల ఎక్కడికక్కడ కథే క్యాన్సిల్ అయిపోతూంటే, ఇంకా సినిమాగా తీసే మాటెక్కడిది?

క్రమం – అపక్రమం

     పై కథ అపక్రమ (నాన్ లీనియర్) పద్ధతిలో వుంది. దీన్ని క్రమ (లీనియర్) పద్ధతి లోకి మార్చి  అసలెక్కడ మొదలై ఎలా సాగి ముగిసిందో చూద్దాం. 

సాక్షితో ఫ్లాష్ బ్యాక్ -1:  సాక్షి సోనాలీతో బాటు అనాధాశ్రయంలో పెరిగింది. ఒకరోజు ఒక సమాచారం వస్తే సియాటిల్ బయల్దేరుతుంది. సోనాలీ డిస్టర్బ్ అయి సాక్షి సియాటిల్లో స్థిరపడగానే తనని పిలిపించుకోవాలని మాట తీసుకుంటుంది. సియాటిల్లో ఆర్ట్ గ్యాలరీలో చేరుతుంది సాక్షి. అక్కడ వివేక్ (సుబ్బరాజు) అనే అతను పరిచయమవుతాడు. అప్పుడు అక్కడికి ఆర్ట్ ఎగ్జిబిషన్ని ప్రారంభించడానికి మ్యూజిషియన్ ఆంథోనీ వస్తాడు. సాక్షి వేసిన పెయింటింగ్ కి ఫిదా అయిపోయి మిలియన్ డాలర్లు ఆమె అనాథాశ్రయాని కిచ్చేస్తాడు. తన మ్యూజికల్ ప్రోగ్రామ్ కి ఆహ్వానిస్తాడు. ప్రోగ్రామ్ అయ్యాక తనకి పెయింటింగ్ నేర్పమంటాడు. ఆమెకి మ్యూజిక్ నేర్పుతాడు. ఇంతలో సోనాలీ వచ్చేసి సాక్షితో వుంటుంది...దీని కొనసాగింపు ఫ్లాష్ బ్యాక్ 2 లో వుంది : 

వివేక్ తో ఫ్లాష్ బ్యాక్ -2  :  ఆర్ట్ గ్యాలరీలో సాక్షీ వివేక్ లు స్నేహితులయ్యారు. సోనాలీ వచ్చి సాక్షితో వున్నాక సాక్షిని వివేక్ కి దూరంగా వుంచడానికి ప్రయత్నిస్తుంది. ఇందుకు హర్టయిన వివేక్ కి సోనాలీ డిఫరెంట్ క్యారక్టరని నచ్చజెప్తుంది సాక్షి. ఈ ప్రవర్తనతో గతంలో ఆమె ఒకడిమీద చేసిన హత్యాప్రయత్నం గురించి చెప్తుంది. ఇదెలా జరిగిందో సంఘటన వివరిస్తుంది. వివేక్ సోనాలీని అర్ధం జేసుకుని దగ్గరవుతాడు. ప్రపోజ్ చేస్తాడు. ఇదయ్యాక ఆంథోనీ సాక్షికి ప్రపోజ్ చేస్తే సోనాలీ ఒప్పుకోదు. ఒక ప్రోగ్రాంలో అభిమానులు ఆంథోనీని చుట్టుముట్టి ముద్దుల్లో ముంచెత్తి ఫోన్ నంబర్లు ఇచ్చేసరికి అతను తిరుగు బోతని చెప్పేస్తుంది సోనాలీ. కావాలంటే రుజువు చేస్తానంటుంది. అతణ్ణి రెచ్చగొడుతూ మెసేజి పెడుతుంది. పట్టించుకోడు. తర్వాత కలుసుకోవడానికి ఒప్పుకుంటాడు. అతడితో ఫామ్ హౌస్ కెళ్తుంది. సాక్షి అనుసరిస్తుంది. వాళ్ళిద్దర్నీ గమనిస్తుంది. వాళ్ళు సన్నిహితంగా వున్నప్పుడు అతను అకస్మాత్తుగా బ్యాట్ తీసుకుని ఆమె తల మీద కొట్టి చంపేస్తాడు. రిచర్డ్ వచ్చేసి ఈ హత్యని గప్ చిప్ చేయడానికి సాయపడతాడు ఆంథోనీకి.

సాక్షి అక్కడ్నించి పారిపోయి జరిగింది వివేక్ కి చెప్తుంది. ఇద్దరూ ఆంథోనీకి బుద్ధి చెప్పాలని నిర్ణయించుకుంటారు. మిస్సయిన ఇతర అమ్మాయిలు ఆంథోనీ ప్రోగ్రాం జరిగినప్పుడల్లా మిస్సయ్యారని తెలుసుకుంటుంది సాక్షి. ఇక ఆంథోనీని చంపే పథకమేస్తారు సాక్షీ వివేక్ లు. పెయింటింగ్ వంకతో ఆంథోనీని పాడుబడ్డ విల్లాకి తీసికెళ్తుంది సాక్షి. అక్కడ సోనాలీ గురించి ఆంథోనీని అడగడం మొదలెడతారు సాక్షీ వివేక్ లు.... దీని కొనసాగింపు ఫ్లాష్ బ్యాక్ 3 లో వుంది :

ఆంథోనీతో ఫ్లాష్ బ్యాక్ -3 : ఆంథోనీ చెప్పడం మొదలెడతాడు. అతడికి రెండేళ్ల క్రితం పెళ్లయింది. ఒకరోజు భార్య పడకమీద అతణ్ణి వేరే పేరుతో పిలిచేస్తుంది. అతను అనుమానిస్తాడు. ఆమె మోసం చేస్తోందని గ్రహిస్తాడు. ఒక హోటల్ కి ఆమెని ఫాలో అయి ఆమె ప్రియుడు సహా పట్టుకుని ఇద్దర్నీచంపేస్తాడు. కెప్టెన్ రిచర్డ్ వచ్చి చూసి ఆంథోనీకి చెప్తాడు. తను కూడా తన భార్యని ఫాలో అయి ఇక్కడికి వచ్చానని, ఆమె ప్రియుడితో వేరే రూంలో వుందనీ అంటాడు. ఆంథోనీ వెళ్ళి రిచర్డ్ భార్యని కూడా చంపేస్తాడు. అప్పట్నుంచీ మోసం చేసే అమ్మాయిల్ని ఆంథోనీ చంపడం మొదలెడితే రిచర్డ్ కవర్ చేస్తూ వచ్చాడు. ఇదంతా విన్న సాక్షి ఆ విల్లాలో ఆంథోనీని చంపేస్తుంది. 

ఇదీ ప్రధాన కథకి ముందు అసలు జరిగింది. ఈ నేపథ్యంలో మొదటి ప్రధాన కథ ఇలా మొదలైంది :

మొదటి ప్రధాన కథ : విల్లాలో ఆంథోనీని చంపి పారిపోయిన సాక్షి పోలీసుల దగ్గరికి వెళ్ళి ఆంథోనీని దెయ్యం చంపిందని చెప్తే - పోలీస్ డిటెక్టివ్ మహాలక్ష్మి (అంజలి) ఆమె బాస్ రిచర్డ్ డాకిన్స్ (మైకేల్ మాడ్సెన్) చేపడతారు. అప్పటికే వీళ్ళు కొందరమ్మాయిల మిస్సింగ్ కేసుల మీద వుంటారు. ఆంథోనీ హత్యకి సంబంధించి మహాలక్ష్మి సాక్షిని ప్రశ్నిస్తుంది. ఆమె స్టేట్ మెంట్ లో ఆమె ఫ్రెండ్ సోనాలీ కనిపించడం లేదని చెప్తుంది. తన ఎంగేజిమెంటైన రెండురోజుల తర్వాత నుంచి కనిపించడం లేదు... దీని కొనసాగింపు రెండో ప్రధాన కథలో వుంది :       

రెండో ప్రధాన కథ : డిటెక్టివ్ మహాలక్ష్మి దర్యాప్తు కొనసాగిస్తూ సోనాలీ అదృశ్యం గురించి ఆరా తీయడానికి అనాధాశ్రయం వెళ్తుంది. ఆమె అదృశ్యానికీ ఆంథోనీ హత్యకీ సంబంధముందని అనుమానిస్తుంది. సాక్షి తనకే సొంతమన్నట్టుగా సోనాలీ ప్రవర్తన వుండేదని తెలుసుకుంటుంది. ఈ ప్రవర్తనతో సోనాలీ ఒకడ్ని పొడిచిన కేసులో జైలుకెళ్లింది కూడా. తిరిగివచ్చి మహాలక్ష్మి సాక్షి ఇంటికెళ్తే, అక్కడొక ముసుగువ్యక్తి ఎదురయ్యేసరికి వెంటాడి కాలుస్తుంది. తప్పించుకుంటాడు

 పోలీసులు మళ్ళీ విల్లా కెళ్ళి సోనాలీకి సంబంధించిన సాక్ష్యాధారాలకోసం శోధిస్తారు. అక్కడ టామ్ అనే పోలీసుకి ఒక తాళం చెవి దొరుకుతుంది. అది ఆంథోనీది. అది రిచర్డ్ కివ్వడాని వెళ్తాడు. అది తీసుకుని టామ్ ని చంపేస్తాడు రిచర్డ్. టామ్ శవం దగ్గర రిచర్డ్ బ్లేజర్ బటన్ని చూసి రిచర్డ్ ని అనుమానిస్తుంది మహాలక్ష్మి. 

        రిచర్డ్ రూంలోకి రహస్యంగా వెళ్ళి అక్కడ తాళం చెవిని గమనిస్తుంది. రిచర్డ్ ని ఫాలో అయి ఆంథోనీ ఫామ్ హౌస్ కెళ్తుంది. రిచర్డ్ అక్కడ సీసీ టీవీ హార్డ్ డిస్క్ కోసం వెతికి అది లేకపోవడంతో కోపంతో వెళ్ళిపోతాడు...దీని కొనసాగింపు మూడో ప్రధాన కథలో వుంది : 

మూడో ప్రధాన కథ : సాక్షి వివేక్ లు హార్డ్ డిస్క్ ఆధారంగా రిచర్డ్ నేరాలు ఎఫ్బీఐకి చెప్పాలని ప్రయత్నిస్తూంటే రిచర్డ్ వచ్చేసి దాడి చేస్తాడు. మహాలక్ష్మి వచ్చేసి రిచర్డ్ ని చంపేసి వాళ్ళిద్దర్నీ కాపాడుతుంది. ఆంథోనీ హత్యని అంతుచిక్కని హత్యగా ప్రకటిస్తారు. సాక్షీ వివేక్ లు సోనాలీ సమాధి దగ్గర శ్రద్ధాంజలి ఘటిస్తారు.

ఇలా వుంది  స్క్రీన్ ప్లే స్ట్రక్చర్

   ప్రధాన కథతోనే  స్క్రీన్ ప్లే స్ట్రక్చర్ వుంటుంది. పై ఫ్లాష్ బ్యాకులన్నీ ప్రధాన కథకి  ఉపోద్ఘాతాలే తప్ప ప్రధాన కథ కాదు. ఫ్లాష్ బ్యాకులు (డ్రీమ్ టైమ్) ఎప్పుడూ ప్రధాన కథ (రియల్ టైమ్) కావు. మూడుగా వున్న ప్రధాన కథని చూస్తే, 
      మొదటి ప్రధాన కథలో : విల్లాలో ఆంథోనీని చంపి పారిపోయిన సాక్షి పోలీసుల దగ్గరికి వెళ్ళి ఆంథోనీని దెయ్యం చంపిందని చెప్తే - పోలీస్ డిటెక్టివ్ మహాలక్ష్మి (అంజలి) ఆమె బాస్ రిచర్డ్ డాకిన్స్ (మైకేల్ మాడ్సెన్) చేపడతారు. అప్పటికే వీళ్ళు కొందరమ్మాయిల మిస్సింగ్ కేసుల మీద వుంటారు. ఆంథోనీ హత్యకి సంబంధించి మహాలక్ష్మి సాక్షిని ప్రశ్నిస్తుంది. ఆమె స్టేట్ మెంట్ లో ఆమె ఫ్రెండ్ సోనాలీ కనిపించడం లేదని చెప్తుంది. తన ఎంగేజిమెంటైన రెండురోజుల తర్వాత నుంచి కనిపించడం లేదు...అనేదంతా బిగినింగ్, అంటే సమస్యా విభాగం. 

రెండో ప్రధాన కథలో : డిటెక్టివ్ మహాలక్ష్మి దర్యాప్తు కొనసాగిస్తూ సోనాలీ అదృశ్యం గురించి ఆరా తీయడానికి అనాధాశ్రయం వెళ్తుంది. ఆమె అదృశ్యానికీ ఆంథోనీ హత్యకీ సంబంధముందని అనుమానిస్తుంది. సాక్షి తనకే సొంతమన్నట్టుగా సోనాలీ ప్రవర్తన వుండేదని తెలుసుకుంటుంది. ఈ ప్రవర్తనతో సోనాలీ ఒకడ్ని పొడిచిన కేసులో జైలుకెళ్లింది కూడా. తిరిగివచ్చి మహాలక్ష్మి సాక్షి ఇంటికెళ్తే, అక్కడొక ముసుగువ్యక్తి ఎదురయ్యేసరికి వెంటాడి కాలుస్తుంది. తప్పించుకుంటాడు. 

పోలీసులు మళ్ళీ విల్లా కెళ్ళి సోనాలీకి సంబంధించిన సాక్ష్యాధారాలకోసం శోధిస్తారు. అక్కడ టామ్ అనే పోలీసుకి ఒక తాళం చెవి దొరుకుతుంది. అది ఆంథోనీది. అది రిచర్డ్ కివ్వడాని వెళ్తాడు. అది తీసుకుని టామ్ ని చంపేస్తాడు రిచర్డ్. టామ్ శవం దగ్గర రిచర్డ్ బ్లేజర్ బటన్ని చూసి రిచర్డ్ ని అనుమానిస్తుంది మహాలక్ష్మి. 

రిచర్డ్ రూంలోకి రహస్యంగా వెళ్ళి అక్కడ తాళం చెవిని గమనిస్తుంది. రిచర్డ్ ని ఫాలో అయి ఆంథోనీ ఫామ్ హౌస్ కెళ్తుంది. రిచర్డ్ అక్కడ సీసీ టీవీ హార్డ్ డిస్క్ కోసం వెతికి అది లేకపోవడంతో కోపంతో వెళ్ళిపోతాడు...అనేదంతా మిడిల్, అంటే సంఘర్షణా విభాగం.

మూడో ప్రధాన కథలో :  సాక్షి వివేక్ లు హార్డ్ డిస్క్ ఆధారంగా రిచర్డ్ నేరాలు ఎఫ్బీఐకి చెప్పాలని ప్రయత్నిస్తూంటే రిచర్డ్ వచ్చేసి దాడి చేస్తాడు. మహాలక్ష్మి వచ్చేసి రిచర్డ్ ని చంపేసి వాళ్ళిద్దర్నీ కాపాడుతుంది. ఆంథోనీ హత్యని అంతుచిక్కని హత్యగా ప్రకటిస్తారు. సాక్షీ వివేక్ లు సోనాలీ సమాధి దగ్గర శ్రద్ధాంజలి ఘటిస్తారు... అనేదంతా ఎండ్, అంటే పరిష్కార విభాగం. 

ఫ్లాష్ బ్యాకుల పాత్ర

    పై మూడు బిగినింగ్-మిడిల్- ఎండ్ విభాగాల్లో ఫ్లాష్ బ్యాకులెలా పాత్ర వహించాయో చూద్దాం. బిగినింగ్ విభాగంలో మహాలక్ష్మి దర్యాప్తు చేపట్టిన ఫలితంగా (కాజ్ అండ్ ఎఫెక్ట్) సాక్షితో ఫ్లాష్ బ్యాక్ -1 లో :  సాక్షి సోనాలీతో బాటు అనాధాశ్రయంలో పెరిగింది. ఒకరోజు ఒక సమాచారం వస్తే సియాటిల్ బయల్దేరుతుంది. సోనాలీ డిస్టర్బ్ అయి సాక్షి సియాటిల్లో స్థిరపడగానే తనని పిలిపించుకోవాలని మాట తీసుకుంటుంది. సియాటిల్లో ఆర్ట్ గ్యాలరీలో చేరుతుంది సాక్షి. అక్కడ వివేక్ (సుబ్బరాజు) అనే అతను పరిచయమవుతాడు. అప్పుడు అక్కడికి ఆర్ట్ ఎగ్జిబిషన్ని ప్రారంభించడానికి మ్యూజిషియన్ ఆంథోనీ వస్తాడు. సాక్షి వేసిన పెయింటింగ్ కి ఫిదా అయిపోయి మిలియన్ డాలర్లు ఆమె అనాథాశ్రయాని కిచ్చేస్తాడు. తన మ్యూజికల్ ప్రోగ్రామ్ కి ఆహ్వానిస్తాడు. ప్రోగ్రామ్ అయ్యాక తనకి పెయింటింగ్ నేర్పమంటాడు. ఆమెకి మ్యూజిక్ నేర్పుతాడు. ఇంతలో సోనాలీ వచ్చేసి సాక్షితో వుంటుంది...అనే  సమాచారం మహా లక్ష్మికి దొరికింది.

ఇప్పుడు ఆమె మిడిల్ విభాగంతో ఏ ఫ్లాష్ బ్యాక్ కనెక్ట్ అయింది? ఏదీ కాలేదు. వివేక్ తో రెండవ ఫ్లాష్ బ్యాక్ ఆమె సంఘర్షణలో భాగంగా (కాజ్ అండ్ ఎఫెక్ట్) ప్రారంభం కాలేదు. స్క్రీన్ ప్లే తెగి, ఆమె పాయింటాఫ్ వ్యూ నుంచి వివేక్ పాయింటాఫ్ వ్యూకి వేరే ముక్కగా ఫ్లాష్ బ్యాక్ 2 ప్రారంభమయ్యింది. దీంతో మిడిల్ విభాగంలో ఆమెకుండాల్సిన సంఘర్షణ కాస్తా గల్లంతై పోయింది. 

మహా లక్ష్మి ఎండ్ విభాగంలో ఆమెకే బయటపడాల్సిన ఆంథోనీతో మూడో ఫ్లాష్ బ్యాక్ కూడా కాజ్ అండ్ ఎఫెక్ట్ తో లేకుండా, ఆమెతో సంబంధం లేకుండా, ఆంథోనీ పాయింటాఫ్ వ్యూలో, సాక్షీ వివేక్ లకి చెప్పే ఫ్లాష్ బ్యాకుగా జొరబడిపోయింది. 

ఈ రెండు ఫ్లాష్ బ్యాకులూ స్ట్రక్చర్ని చెడగొట్టి స్క్రీన్ ప్లేని స్క్రీన్ ప్లే కాకుండా చేశాయి. ఫలితంగా ప్రధాన పాత్రగా, కథానాయికగా, మహాలక్ష్మి కుండాల్సిన కి త్రీయాక్ట్ స్ట్రక్చర్ బలం గుల్లయింది. కేసు తేల్చే దృక్పథంతో వుండాల్సిన ఆమెకి ఒక గోల్ అంటూ లేకుండా పోయింది. 

మరేం చెయ్యాలి?

      ప్రతినాయక పాత్ర లేకపోతే ప్రధాన పాత్రకి గోల్ వుండదు. కథంటేనే నాయక- ప్రతినాయక పాత్రల మధ్య సంఘర్షణ. ఈ కథలో ఆంథోనీని చంపిన సాక్షియే ప్రతినాయిక. కానీ కథలో ప్రతినాయిక పాత్రని గుర్తించక, ఫీలవ్వక, ఏదో తోచినట్టూ రాసుకుంటూ పోయాడు కథకుడు. ఫలితంగా తాడూ బొంగరం లేని కథానాయిక అయింది మహాలక్ష్మి. సిడ్ ఫీల్డ్ మాటల్లో చెప్పాలంటే - ‘the character seems to disappear off  the page’

        ప్రతినాయిక సాక్షి. అంటే అనూష్కా కేంద్ర బిందువుగా వుండాల్సిన నేర కథ. అనూష్కా- వర్సెస్ అంజలి ఇద్దరు హీరోయిన్ల డైనమిక్స్ తో థ్రిల్లర్ వుంటే ఎంత జనరంజకంగా వుంటుంది. మార్కెట్ యాస్పెక్ట్ నిర్ణయించుకుని ఈ కథ ఏమైనా చేశారా?

అనూష్కా పాత్ర ఆటోమేటిగ్గా పైన చెప్పుకున్న ‘ఛేజ్ ఏ క్రూకెడ్ షాడో’ చట్రంలో ఒదిగిపోతుంది. పైనే చెప్పుకున్న ఇతర భాషల్లో వచ్చిన సినిమాలు ‘ఛేజ్ ఏ క్రూకెడ్ షాడో’ కి అదే కథతో రీమేకులు. కానీ ‘నిశ్శబ్దం’ కథ వేరు. ఇందులో అనూష్కా పాత్ర మాత్రమే ‘ఛేజ్ ఏ క్రూకెడ్ షాడో’ లో పాత్రకున్న, షేడ్ తో వుంటుంది. అందులో ఆ పాత్ర చుట్టూ అల్లిన కథ వేరు, ‘నిశ్శబ్దం’ కథ వేరుగా వుంటుంది. ఎక్కడా పోలిక రాదు, కాపీ అని ఎవరూ అనలేరు. 

        హిందీ రీమేక్ ‘ధువా’ లో రాజమాతగా అప్పటి హీరోయిన్ రాఖీ చేసిన హత్య తాలూకు గుట్టు విప్పే ఘట్టం చివర్లో ఒక క్లాసిక్ చిత్రణ. ఒక పాజిటివ్ క్యారెక్టర్ ఉన్నట్టుండి నెగెటివ్ గా బండారం బయటపడుతుంది. మిథున్ చక్రవర్తి, అంజాద్ ఖాన్ తదితర సీబీఐ బృందం అండర్ కవర్ ఆపరేషన్ కి అద్భుత, వెంట్రుకలు నిక్కబొడుచుకునే పరాకాష్ట!

―సికిందర్

984 : రివ్యూ

 

      దెయ్యాలున్నాయా లేవా? వున్నాయి. సస్పెన్స్ థ్రిల్లర్స్ ని అవి స్వాధీనం చేసుకుని స్వాహా చేసేస్తాయి. తమ కథల్ని చెప్పనివ్వవు. మీడియా మేనేజ్ మెంట్. రాజకీయ నాయకుల నుంచి నేర్చుకున్నాయి. సైలెన్స్ ప్లీజ్... అని నోరూ చెవులు కూడా మూసేస్తాయి. నిశ్శబ్దం పాటించాలి. తమిళ తెలుగు సస్పెన్స్ థ్రిల్లర్స్ సృజనాత్మకతా పరంగా నిశ్శబ్దం పాటిస్తున్నాయి. అవి అదే అనాథాశ్రయంలో ఇద్దరు అనాథ బాలికల అవే పాత కథల్నుంచీ పదేపదే పేదగా పుట్టుకొస్తాయి. సమకాలీనంగా ఇంకే సమస్యలూ లేనట్టు. పదే పదే గత కాలంలోనే పేదగా జీవించే సస్పెన్స్ థ్రిల్లర్స్ కి దెయ్యాల దర్బారు నుంచి విముక్తి లేదు. ఆ నిశ్శబ్దం కాస్తా నీరుగారి దెయ్యపు కచేరీలతో నిండిపోతుంది…  
    30 కోట్లు పెట్టి తీయాలనుకున్నప్పుడు మూడుండాలి : ఏం తీస్తున్నాం, ఎందుకు తీస్తున్నాం, ఎలా తీస్తున్నామనే ప్రశ్నలు. కమర్షియల్ లాభ నష్టాలతో ముడిపెట్టి జవాబులు. పరమాద్భుత లొకేషన్స్, కళ్ళు చెదిరే తారాగణం, అదిరిపోయే ప్రొడక్షన్ విలువలు ఇవి కావు జవాబులు. ఇవి పోయే డబ్బులు వచ్చే డబ్బుల లెక్కలు కావు. పేపరు మీద రాస్తున్నప్పుడే వచ్చే డబ్బులా పోయే డబ్బులా తెలిసిపోకపోతే తీయడం మభ్యపెట్టుకోవడమే. మొదటి ప్రయత్నం తోనే మభ్యపెట్టుకున్నామని తెలుసుకోకపోతే ఆ అలసత్వానికి అంతం లేదు. దర్శకుడు హేమంత్ మధుకర్ 2010 లో హిందీలో తీసిన దెయ్యం సినిమా ‘ఏ ఫ్లాట్’ పరాజయం గురించి ఎవరేమన్నారో తెలిసీ అప్రమత్తమవక పోతే  మభ్య పెట్టుకునే నిశ్శబ్దాలు చాలానే వుంటాయి. 

    సస్పెన్స్ థ్రిల్లర్ అత్యంత సంక్లిష్ట జానర్. హిచ్ కాక్ అంతటి వాడికే పట్టుబడలేదు. తీసే ప్రతీ సస్పెన్స్ థ్రిల్లర్ అతడికి యాతనే. మూస ఫార్ములాలు చేస్తూ సరదాగా ఓ సస్పెన్స్ థ్రిల్లర్ లాగిద్దామనుకుంటే సాగే పనికాదు. సస్పెన్స్ థ్రిల్లర్ ఫుల్ టైమ్ జాబ్. సస్పెన్స్ - క్రైమ్ జానర్లో తలపండిన వాడికి ఇతర జానర్లు నల్లేరు నడక. ఎందుకంటే కథలకి కావాల్సిన మనస్తత్వ చిత్రణ, భావోద్వేగాలు, సమయస్ఫూర్తి, కాలీన స్పృహ, లాజిక్, డైనమిక్స్ వంటి కథాంగాలు వొంటబట్టి వుంటాయి క్రైమ్ జానర్లో.

     ‘నిశ్శబ్దం’  తమిళంలో  ‘సైలెన్స్’  మొదట మాటలు లేకుండా మూకీగానే తీయాలనుకున్న ఆలోచన. మనసు మార్చుకుని మాటలు జోడించిన ప్రయత్నం. ఈ మాటలు జోడించడం మామూలుగా లేదు. మూకీ అనే మాటల అనావృష్టి నుంచీ అతి వృష్టి కురిపించే క్రియేటివిటీ. నటులకున్న మాటలు చాలనట్టు వాయిసోవర్ల కుండపోత. ఎవరి వాయిసోవర్ ఎందుకో అర్ధం కాకుండా సాంతం స్వగతాల జడివాన. డాక్యుమెంటరీ చూస్తున్నట్టు డైజెటిక్ సౌండ్. డైజెటిక్ సౌండ్, ఇంట్రా డైజెటిక్ సౌండ్ ఎప్పుడు ఎలా ఎందుకు వాడాలో తెలుసుకోకుండా శబ్ద గందరగోళం. కథలో ఏం జరుగుతోందో వంతులేసుకుని వ్యాఖ్యాతలు వివరిస్తే గానీ అర్ధంగాని పరిస్థితి వుంటే కథని శానిటైజ్ చేయాలి. దాని విజువల్ స్టోరీ టెల్లింగ్ నేచర్ కి వైరస్ సోకి వుంటుంది. సినిమా తీస్తే ఇతరులు నేర్చుకునేట్టు వుండాలి గానీ నేర్చుకున్నది పోయేట్టు వుండకూడదు.

    మరి ‘నిశ్శబ్దం’ కర్ధమేమిటి? ఈ అర్ధమే పట్టుకోగలిగి వుంటే సినిమా ఎక్కడో వుండేది గ్లోబల్ చార్ట్ లో అనూష్కాని తళతళ మెరిపిస్తూ. ఇది జానర్ రీసెర్చి చేసుకుని ‘ఛేజ్ ఏ క్రూకెడ్ షాడో’ (1955) టెక్నిక్ తో తీయాల్సిన 41 మిలియన్ డాలర్ల స్టార్ మూవీ. జానర్ రీసెర్చా? అదేమిటి? అదేమిటో తెలియాలంటే వీధి బడి దశ నుంచీ సినిమా నేర్చుకుంటూ రావాల్సి వుంటుంది.

కథ 

        సాక్షి (అనూష్కా) మూగ చెవిటి పెయింటర్. తల్లిదండ్రులెవరో తెలీదు. యూఎస్ లో అనాథాశ్రయంలో పెరిగింది సోనాలీ (శాలినీ పాండే) తో బాటు. ఆమెకి సియాటిల్లో ఆర్ట్ గ్యాలరీ నుంచి పిలుపు వస్తుంది. అక్కడ పెయింటింగ్ వేసి విజిటింగ్ కి వచ్చిన సెల్లో ప్లేయర్ ఆంథోనీ గోన్సాల్వేస్ (మాధవన్) ని ఇంప్రెస్ చేస్తుంది. తన కన్సర్ట్ కి అతనా హ్వానిస్తే వెళ్తుంది. అలా పరిచయం పెరిగి అతడికి పెయింటింగ్ నేర్పుతుంది, అతను మ్యూజిక్ నేర్పుతాడు. ఇక ప్రేమ పుడుతుంది. ఎంగేజిమెంట్ చేసుకుని అతణ్ణి తీసుకుని ఒక శిథిల విల్లాలో జోసెఫైన్ వుడ్స్ అనే ఆమె పెయింటింగ్ అన్వేషణలో బయల్దేరుతుంది. ఆ విల్లాలో 47 ఏళ్ల నుంచీ దాని ఓనర్ దెయ్యం వుంటుంది. అది వచ్చిన వాళ్ళని వచ్చినట్టు చంపేస్తూంటుంది. ఇప్పుడు ఆంథోనీని కూడా చంపేస్తుంది. సాక్షి పారిపోతుంది. 

    సియాటిల్ పోలీస్ డిపార్ట్ మెంట్ డిటెక్టివ్ మహాలక్ష్మి (అంజలి) కేసు టేకప్ చేస్తుంది. ఆమెకి తోడుగా కెప్టెన్ రిచర్డ్ డాకిన్స్ (మైకేల్ మాడ్సెన్) దిగుతాడు. అయితే విల్లాలో కేసుకి సంబంధించి ఆధారాలేవీ దొరకవు. మరోవైపు చూస్తే కొందరు యువతుల మిస్సింగ్ కేసులు నమోదవుతాయి. సోనాలీ కూడా అదృశ్యమవుతుంది. సోనాలీని ఆంథోనీ హత్య కేసులో అనుమానిస్తుంది మహాలక్ష్మి. సొనాలీని వెతకడం మొదలుపెడుతుంది.

    ఇప్పుడు సోనాలీని ఎందుకనుమానించింది మహాలక్ష్మి? సోనాలీకున్న మానసిక సమస్యేమిటి? ఆంథోనీకి కూడా వున్న మానసిక రుగ్మతేమిటి? ఈ ఇద్దరి మధ్యా సాక్షి స్థానమేమిటి? విల్లాలో ఆమె చూసింది ఎంత వరకు నిజం? ఈ మొత్తం కేసులో కెప్టెన్ రిచర్డ్ పొందాలని చూసిన ప్రయోజనా లేమిటి? ఇదంతా మహాలక్ష్మి ఎలా పరిష్కరించి దోషిని తేల్చింది? ఇదీ మిగతా కథ.  
నటనలు- సాంకేతికాలు

         నటనల గురించి చెప్పుకోవాలంటే పాత్రల గురించి చెప్పుకోవాలి. పాత్ర చిత్రణల్లో లోపాలుంటే ఎంతటి నటనలూ మెప్పించలేవు. అనూష్కా సాక్షి పాత్ర అలాటి లోపాలున్న ఈ సినిమా పాత్రల్లో ప్రధానమైనది. దీంతో ఆమె నటన ఉపరితలంలోనే వుండి పోతోందే తప్ప ఇన్నర్ ఎమోషన్లు పలికే పరిస్థితి లేదు. అసలు ఇన్నర్ ఎమోషన్లు లేనట్టే వుంటాయి పాత్ర చిత్రణ, నటనా. సైన్ లాంగ్వేజీ, అప్పుడప్పుడు ఫోన్లో టైపు చేసి వాయిస్ ఇన్ఫర్మేషన్ వంటి ఉపకరణాల ద్వారా సాధారణ సమాచారాన్ని తెలుపుతుంది తప్ప, డ్రామాకి ముఖ్యమైన తన ఇన్నర్ ఎమోషన్స్ ని అర్ధమయ్యేలా చెప్పడంలో వుండే స్ట్రగుల్ తో కూడిన ఉద్విగ్నభరిత సన్నివేశాలుండవు. పోనీ బొమ్మవేసి చూపే ప్రయత్నం చేసే ఆడియెన్స్ ఫ్రెండ్లీ మెలోడ్రామా వుండదు. ఇన్నర్ ఎమోషన్సే లేనప్పుడు ఇక  అయ్యోపాపం అన్పించే స్ట్రగుల్ ఏ రూపంలోనైనా ఎందుకుంటుంది. అసలొక మూగజీవి అయిన సాక్షి లాంటి పెయింటర్ కి పెయింటింగ్సే తన భాష, మాధ్యమం కాకుండా పోతాయా? తనని కుదిపేస్తున్న భావోద్వేగాల్ని కుంచె ద్వారా ప్రకటించకుండా ఏ చిత్రకారుడుండ గలడు? లేనప్పుడు అలాటి పాత్ర ఎందుకు? సాక్షి మూగజీవి పాత్రకి లాగే ఆమె పెయింటరన్న వృత్తిపరమైన పాత్ర చిత్రణ కూడా లేదు. టెంప్లెట్ సినిమాల్లో టెంప్లెట్ పాత్రలాగే రెండు పెయింటింగు లేయించి గొప్ప పెయింటరని చెప్పి, పది మిలియన్ డాలర్లతో బ్రహ్మాండమైన బిల్డప్పిచ్చి వదిలేశారు. మళ్ళీ ఈ పాత్ర చిత్రణ తాలూకు కొనసాగింపే వుండదు. ఒకసారి ‘బర్ఫీ’ లో రణబీర్ కపూర్ ని చూస్తే తెలుస్తుంది మూగజీవి సమగ్ర పాత్రంటే ఏమిటో.

పాత్రకి కథతోనే సమస్య 

        సమస్య ఎక్కడొచ్చిందంటే, అసలీ సస్పెన్స్ థ్రిల్లర్ కథ అనూష్కా పాత్ర కథ అని తెలుసుకోక పోవడం దగ్గర వచ్చింది. స్టార్ హీరోయిన్ తో హీరోయిన్ ఓరియెంటెడ్ హంగామా తీస్తున్నప్పుడు ఆమె మీదే కథ వుండాలని కలం పుచ్చుకుని రాస్తాడు రచయిత. అంతేగానీ ఆమెని అవతలికి లాగేసి, ఇతర పాత్రలతో కథ గిల్లుకుంటూ కూర్చోడు. ఇలా ఎందుకు జరుగుతుందంటే అసలు కథే౦టో అర్ధం గాకపోతేనే. అందుకే ఇన్ని ఇతర పాత్రలతో ఇన్ని ఫ్లాష్ బ్యాకులు, వాళ్ళ వాయిసోవర్లు. కథతో అయోమయం వుంటేనే అర్ధం లేని ఫ్లాష్ బ్యాకులతో హడావుడి చేస్తారంటాడు సిడ్ ఫీల్డ్. 

    సెంట్రల్ క్యారక్టర్ గా అనూష్కా మీద కథా, పాత్రచిత్రణా ఎలా వుండి వుంటే అమెరికాలో తీసిన ఈ సస్పెన్స్ థ్రిల్లర్ అమెజాన్లో గ్లోబల్ ఎట్రాక్షన్ అయివుండేదో తర్వాత కథా కథనాలు విభాగంలో చూద్దాం.  

డిటో మాధవన్ 

      ఇక మాధవన్ గురించి. భారతీ రాజా దర్శకత్వంలో ‘ఎర్రగులాబీ’ లు (‘సిగప్పు రోజాక్కల్’ -  1980) లో కమలహాసన్ క్లాసిక్ సీరియల్ కిల్లర్ పాత్రని గుంజి ‘నిశబ్దం’ లో గుంజీళ్ళు తీయించాడు. పుంజాలు తెంపుకుని పారిపోయింది పాత్ర. విశేషమేమిటంటే, ఇదే సీరియల్ కిల్లర్ కథని భారతీ రాజాయే రాజేష్ ఖన్నాతో హిందీలో ‘రెడ్ రోజ్’ గా తీస్తే అదీ సూపర్ హిట్టయింది. ఇప్పుడు ఇంత కాలం తర్వాత ఐఎండీబీ లో ఇప్పటి ప్రేక్షకులు ‘రెడ్ రోజ్’ ని చూసి ఆహా ఓహో అంటూ కామెంట్లు పెడుతున్నారు. ఇలాటి థ్రిల్లర్ ని చూడలేదంటున్నారు అప్పటి రాజేష్ ఖన్నాని పొగుడుతూ. 

    ‘నిశ్శబ్దం’ లోనే కెప్టెన్ రిచర్డ్ పోలీసు పాత్ర ఎక్కడిదనుకున్నారు? భారతీ రాజా థ్రిల్లర్ లోనే కమలహాసన్ / రాజేష్ ఖన్నా అమ్మాయిల్ని చంపుతూంటే చూసి ఎంజాయ్ చేసే సైకో పెంపుడు తండ్రి పాత్ర. మాధవన్ అమ్మాయిల్ని చంపుతూంటే రిచర్డ్ సహకరించడం డబ్బు కోసమన్నట్టుగా వుండదు. భారతీ రాజా థ్రిల్లర్లో తండ్రి పాత్రలాగా అతను సైకో అని మనమర్ధం చేసుకోవాలి. భారతీ రాజా థ్రిల్లర్ లోని కమల్ పాత్రని అదే కథతో మాధవన్ కథగా ముక్క అతికించి, అదే గొప్ప ఒరిజినల్ క్రియేషన్ అన్నట్టుగా చివర్లో సస్పెన్స్ రివీల్ చేశారు. 

    ఆంథోనీ పాత్రలో మాధవన్ కూడా డిటో అనూష్కా. కథ కుపయోగపడని అతడి సంగీతం. ఆ సంగీతంలో తనలో దాగున్న సీరియల్ కిల్లర్ భావోద్వేగాలున్నాయా అంటే లేదు. అమీర్ ఖాన్ ‘సర్ఫరోష్’ లో గజల్ గాయకుడి రూపంలో వున్న టెర్రరిస్టుగా నసీరుద్దీ న్ షా, పాడే పాటలో అంతరార్ధం పాత్ర నిజస్వరూపాన్ని తెలిసీ తెలీనట్టు ప్రకటిస్తుంది. ‘ఇది కథ కాదు’ లో వెంట్రిలాక్విజం కళాకారుడైన కమల్ కూడా తన భావోద్వేగాల్ని వెంట్రిలాక్విజం ద్వారా ప్రకటిస్తాడుగా?

    మాధవన్ పాత్రకి ఆంథోనీ గోన్సాల్వెజ్ పేరు యాదృఛ్ఛికంగా పెట్టేశారా లేక ఉద్దేశపూర్వకంగానా? ఆంథోనీ గోన్సాల్వెజ్ గోవాకి చెందిన సుప్రసిద్ధ సంగీత కారుడు. లక్ష్మీ కాంత్ - ప్యారేలాల్ లకి సంగీతం నేర్పిన గురువు. వాళ్ళ ఎన్నో పాటలకి ఆయనే స్ఫూర్తి. ఏకంగా ఆయన పేరే ప్రయోగించి ‘అమర్ అక్బర్ ఆంథోనీ’ లో అమితాబ్ బచ్చన్ మీద ‘మై నేమ్ ఈజ్ ఆంథోనీ గోన్సాల్వెజ్’ అనే ఆల్ టైమ్ హిట్ పాట సృషించేశారు. అలాటి ఆంథోనీ గోన్సాల్వెజ్ పేరు మ్యూజిషియన్ అయిన సీరియల్ సైకో కిల్లర్ కి వాడడం ఏమీ బాగాలేదు. ప్యారేలాల్ శర్మ ఇప్పటికీ ఆంథోనీని స్మరిస్తాడు. 

పొడిపొడి ప్రణయ బాంధవ్యం 

       ఇక మాధవన్ - అనూష్కాలు పరస్పరం తమ కళల్ని నేర్పుకునే  క్రమంలో కూడా రసపోషణ వుండదు. ‘ఆకలిరాజ్యం’ లో కమల్ -శ్రీదేవిల మధ్య వున్నట్టు. శ్రీదేవి తాళం పాడితే కమల్ స్వరాలు కూర్చే పోటాపోటీ - ఆమె సంగీతమైతే అతను సాహిత్యంగా - కన్నెపిల్లవని కన్నులున్నవని ఎన్నెన్ని వగలు పోతున్నావే’ పాట లాగా. మాధవన్ సంగీతానికి అనూష్కా చిత్ర లేఖనం పోటీయో, లేదా అనూష్కా చిత్ర లేఖనానికి మాధవన్ సంగీతం పోటీయో లేకుండా కళాకారుల పాత్రలెందుకు? వీళ్ళు ప్రేమికులైనప్పుడు కళల సమాగం లేని అంటీముట్టని చిత్రణ లెందుకు? ‘ప్రియుడే సంగీతము - ప్రియురాలే నాట్యము’ - అని  ‘ఇది కథ కాదు’ లో కళాకారులైన కమల్, జయసుధ పాడుకున్నారుగా? మాధవన్ సంగీతం అనూష్కాకి వినపడని లోపంలోంచి మాధవన్ పడే వేదనాభరిత డ్రామా ఏది?

    ఇలా అనూష్కా, మాధవన్ - ఇద్దరు స్టార్స్ మీద ప్రణయంలో యూత్ అప్పీల్ ప్రవహించే కనీస ఎమోషనల్ బాండింగ్ కూడా లేకపోవడం కొట్టొచ్చే లోపం. ఇన్ని లోపాలతో తెరమీద ఈ స్టార్స్ ని చూసి ఎందుకు ఎంజాయ్ చేయాలి?

అంజలి పాత్రా గల్లంతు 

      ఇక అంజలి. దర్శకుడు ముందుగా అనుకున్న కథలో అంజలి పాత్ర లేదు. ఆమె స్థానంలో మగ పాత్ర వుంటే, కథ మేల్ డామినేషన్ తో వుందనిపించి మగ పాత్ర తీసేసి,  పోలీస్ డిటెక్టివ్ ని స్త్రీ పాత్రగా మార్చానన్నాడు దర్శకుడు. అయినా అనూష్కాతో బాటు అంజలి పాత్రనీ నీరుగార్చే చిత్రణలు చేశాడు. అంజలి పాత్రకి మహాలక్ష్మి పేరుకి అర్ధం పర్ధం, ప్రయోజనం లేవు. తెలుగు ప్రేమ సినిమాల్లో పెడుతున్న ఇంకో టెంప్లెట్ పేరుగానే మూలన పడింది. ఆంథోనీ పేరుతో అలా చేశారు. మహాలక్ష్మి పేరుతో ఏమీ చేయలేదు అమెరికా బ్యాక్ డ్రాప్ లో. తను పోలీస్ డిపార్ట్ మెంట్ కే గర్వకారణమైన విజయలక్ష్మిలా వుండదు. అమెరికా బ్యాక్ డ్రాప్ లో ఇండియన్ మిథికల్ క్యారక్టర్ ని ప్లేచేసి విశ్వ గురు అంటున్నఇండియా ఖ్యాతిని పెంచాలను కోలేదు. పేరు గొప్ప పని దిబ్బ అన్నట్టు వుంది. 

    తగ్గట్టే స్టయిలిస్ట్ యాక్టింగ్ తో అసహజ ఇన్వెస్టిగేషన్. 47 ఏళ్లుగా దెయ్యం చంపుతూంటే ఆంథోనీని దెయ్యం చంపలేదని మొదటే ఎలా నిర్ధారించింది? సాక్షి ఫ్రెండ్ సోనాలీ కనిపించకపోతే ఆమె చంపినట్టా? ఇది వరకు దెయ్యం చేసిన హత్యలతో ఈ హత్యకున్న తేడా ఏమిటో కేసు పాత రికార్డుల్లో సైంటిఫిక్ ఎవిడెన్సు లతో నిగ్గు తేల్చిందా? దీని జోలికే పోలేదే. కథా సౌలభ్యం కోసం వూరికే సోనాలీని టార్గెట్ చేయడం వల్ల అసలు దెయ్యమనే మూల కథే ప్రశ్నార్ధకమైంది.

    సరే, చివరికి దెయ్యం చంపలేదనే తేలింది. మరి చంపుడు కార్యక్రమం పెట్టుకున్న దెయ్యం ఏమైంది? తన ముందు తను చంపాల్సిన ఆంథోనీని ఇంకెవరో చంపుతూంటే చూస్తూ వుందా? ఆంథోనీతో బాటు చంపడానికొచ్చిన వాణ్ణీ బోనస్ గా చంపుకుని దెయ్యం నెక్స్ట్ శాల్తీ కోసం కూర్చోవాలిగా? అసలు వచ్చిన మహాలక్ష్మితో బాటు పోలీసు టీమునీ సఫా చేసేయాలిగా? మహాలక్ష్మి లో గజలక్ష్మిని చూసి జడుసుకుందా అమెరికన్ దెయ్యం? ఇదే చూపించి వుంటే మోతెక్కి పోయేది అమెరికా!!

    కాబట్టి బిల్డప్ కోసం ఏదో దెయ్యం కలరిచ్చారు తప్ప, అసలు దెయ్యాముందా లేదా స్పష్టత లేదు కథకుడికి. కన్పిస్తున్న దెయ్యాలుగా పాత్రలే వున్నప్పుడు వేరే దెయ్యం అక్కర్లేదేమో. మహాలక్ష్మిగా అంజలి ఈ కేసులో తేల్చిందేమీ లేదు. చివరికి సుబ్బరాజే తన కథ చెప్పుకుని ఆంథోనీ హత్యా రహస్యం విప్పుతాడు ప్రేక్షకులకి. మహాలక్ష్మికి కాదు. కనీసం ఇంకో పనైనా చేయలేదు మహాలక్ష్మి - కెప్టెన్ రిచర్డ్ పోలీసుని చంపి కిందికి తోసేస్తాడు. ఆ శవం దగ్గర రిచర్డ్ వేసుకున్న బ్లేజర్ బటన్ దొరుకుతుంది మహాలక్ష్మికి. దాంతో ఆంథోనీ హత్యతో రిచర్డ్ కి సంబంధముందన్న విషయం తర్వాత, ముందు ఈ పోలీసు హత్యలో రిచర్డ్ రెడ్ హేండెడ్ గా దొరికిపోతే కిమ్మనదు. ధైర్య లక్ష్మి కూడా కాలేదు. రిచర్డ్ చేసిన ఈ పోలీసు హత్యని ప్రమాద వశాత్తూ మరణంగా నమోదు చేసిందేమో చూపించలేదు. అసలు అర్ధం కాని కథలో అనూష్కా లాగే తనూ గల్లంతైన పాత్రే. ఎవరెవరో ఫ్లాష్ బ్యాకులేసుకుని ప్రేక్షకుల నుద్దేశించి వాయిసోవర్లు చెప్తూంటే, వీటితో సంబంధం లేనట్టు హైఫై పోలీస్ డిటెక్టివ్ మాహాలక్ష్మి ఎక్కడుంటుందో తెలీదు. చివరికి ఆంథోనీ మిస్టరీ వెల్లడవడం కూడా తన మూలంగా జరగదు. తనుండదు. పూర్తిగా పాసివ్ క్యారెక్టర్.  
    ^*హాలీవుడ్ ప్రముఖ హీరోయిన్ లక్ష్మీదేవిని పూజిస్తుందట!

        విదేశీయులు, ఇతర మతస్థులు కూడా హిందూ దేవుళ్లను ఆరాధిస్తుంటారు. అలాంటి వాళ్లలో పలు రంగాలకు చెందిన ప్రముఖులు కూడా ఉన్నారు. ఎన్నో హాలీవుడ్ సూపర్‌హిట్ చిత్రాల్లో నటించి ప్రముఖ కథానాయికగా గుర్తింపు పొందిన సల్మా హయెక్ లక్ష్మీదేవిని పూజిస్తుందట. ధ్యానంలో కూర్చున్నప్పుడు లక్ష్మీదేవిపైనే దృష్టి పెడుతుందట. ఈ విషయాన్ని సల్మా ఇన్‌స్టాగ్రామ్ ద్వారా వెల్లడించింది. లక్ష్మీదేవి ఫొటోను కూడా పోస్ట్ చేసింది.  
        `నేను నా అంత:సౌందర్యంతో అనుసంధానం కావాలనుకున్నప్పుడు దేవత లక్ష్మీదేవిపై దృష్టి పెట్టి ధ్యానం చేస్తాను. హిందూ మతస్థులు ఆమెను సంపదకు, అదృష్టానికి, ప్రేమకు, అందానికి ప్రతినిధిగా భావిస్తారు. ఆమె చిత్రం నాకు చాలా సంతోషాన్ని, ప్రశాంతతను కలిగిస్తుంది. సంతోషం, ప్రశాంతత మన అంత:సౌందర్యానికి బాటలు వేస్తాయ`ని సల్మా పేర్కొంది. ఈ పోస్ట్ చూసిన బాలీవుడ్ హీరోయిన్ బిపాసా బసు `అద్భుతం` అంటూ కామెంట్ చేసింది. 
ఆంధ్రజ్యోతి, 9.10.20
అనాధల బ్యాచి 

     సాక్షి ఫ్రెండ్ సోనాలీగా శాలినీ పాండే అనాధాశ్రయంలో పదేపదే ఇలాటి సస్పెన్స్ థ్రిల్లర్స్ లో రిపీటవుతున్న పాత మూస పాత్ర. స్టార్ సినిమాల్లో హీరో ఎప్పుడూ బస్తీలో వుండే అనాథే- పేరు శీను గాడే అన్నట్టు - సస్పెన్స్ థ్రిల్లర్స్ లో హీరోయిన్, ఆమె నేస్తం అనాథాశ్రయంలో పడుండే అనాధలు! తెలుగు రాష్ట్రాల్లో యువతీ యువకులు దిక్కులేని అనాధలన్న మాట. ఇప్పుడు అమెరికా తీసికెళ్ళీ ఇదే పరాభవం. 

    సోనాలీకి సాక్షి మరెవరితో వుండకూడదనీ, తనతోనే వుండాలని పొసెసివ్ నెస్ చిన్నప్పట్నుంచీ. దీంతో పెద్దయ్యాక సాక్షితో క్లోజ్ గా వుంటున్నాడని అనుమానించి ఒకడి మీద  హత్యా యత్నం చేసి  జైలుకి కూడా వెళ్ళి వచ్చిన చరిత్ర. అమెరికన్ ప్రభుత్వం ఆమెకి మానసిక చికిత్స చేయకుండా మళ్ళీ దేశం మీదికి వదిలేసి నట్టుంది. ఈ పాత మూస టెంప్లెట్ పాత్ర నేటి కాలం పోకడలకి లెస్బియన్ అయి వుంటుందని ప్రేక్షకులు భావిస్తారన్న స్పృహలేదు కథకుడికి. పొసెసివ్ నెస్ వికటించి పొటెన్షియల్ కిల్లర్ గా మారిన సోనాలీతో ఇంకా ఫ్రెండ్ షిప్ ఏమిటో సాక్షికి. ఇది మరిన్ని హత్యలకి దారి తీసేందుకు తానే కారణమైందన్న పొరపాటు, సాక్షి పాత్ర సమూలంగా నెగెటివ్ అయిందన్నసంగతీ గ్రహించాడో లేదో కథకుడు. 

సుబ్బరాజు, మాడ్సెన్ సూపర్ స్టార్స్

        వీళ్ళిద్దరూ తమ పాత్రల్ని ఎంజాయ్ చేశారు, ఎలాటి బంధనాలు, సంకెళ్ళు లేవు. కానీ క్యారక్టర్ గ్రోత్ తో, వాళ్ళ సీక్రెట్స్ తో బ్యాంగు లిచ్చుకుంటూ పోయారు. సోనాలీని ప్రేమించిన వివేక్ గా సుబ్బరాజు తన గోడు సరీగ్గానే వెళ్లబోసుకున్నాడు. రివెంజ్ క్యారక్టర్ గా మారి కథ ముగించాడు. నీటు పాత్ర, క్లాస్ నటన. పోలీసు కెప్టెన్ గా మైకేల్ మాడ్సెన్ ది విలక్షణ నటన. ‘రిజర్వాయర్ డాగ్స్’, ‘కిల్ బిల్’, ‘ఒన్స్ అపాన్ ఏ టైమ్ ఇన్ హాలీవుడ్’ వంటి 113 సినిమాల సీనియర్ నటుడు. భారతీరాజా థ్రిల్లర్ లోని పెంపుడు తండ్రి పాసివ్ పాత్రని, కెప్టెన్ గా యాక్టివ్ పాత్రగా పోషించి సైకో విలనిజాన్ని డీసెంట్ గా పోషించాడు. అనూష్కా, అంజలి పాత్రల్లా కాకుండా వీళ్ళిద్దరివీ సస్పెన్సుతో కూడిన పాత్రలు.

సాంకేతిక వైభవం
        కథా వైభవం లేకపోయినా సాంకేతిక వైభవానికి కొదవ లేదు. కెమెరా మాన్ సి. రామ్ ప్రసాద్ మాటల్లో చెప్పాలంటే విత్తం కొద్దీ వైభవం. తెర నిండా డాలర్లు అతికించి నట్టుంది. రెండు డాలర్లు మనకిస్తే మందు బాటిల్ పక్కనుంచుకుని చూసేవాళ్లం. మందే కథని మరిపించ గలదు, స్నాక్స్ పని చెయ్యవు. 

    గోపీ సుందర్ సంగీతం, షానీల్ దేవ్ కెమెరా, ప్రవీణ్ పూడి ఎడిటింగ్, చాడ్ బఫెట్ ఆర్ట్, నీరజా కోన కాస్ట్యూమ్స్, అమెరికన్ యాక్షన్ కొరియోగ్రఫీ అద్భుత క్వాలిటీతో  పోటీపడుతూ వున్నాయి. దర్శకుడి కథా నిర్వహణే సక్సెస్ కి వేటు వేసింది.

―సికిందర్  

(కథా కథనాల సంగతులు రేపు)

983 : రివ్యూ

 దర్శకత్వం : రణదీప్ ఝా 
తారాగణం : బరుణ్ సోబ్తీ, సచిన్ ఖెడేకర్, ఎనాబ్ కిజ్రా, పూర్ణేందు భట్టాచార్య, సాన్యా బన్సల్, తదితరులు 
మూల కథ : సందీప్ గడే, కథ : జీబ్రాన్ నూరానీ, స్క్రీన్ ప్లే : జీషాన్ ఖాద్రీ, సంగీతం : నమన్ అధికారి, సగీష్ భండారీ తదితరులు, ఛాయాగ్రహణం : పీయూష్ పుటీ  
నిర్మాతలు : ప్రియాంకా బస్సీ, శాలినీ చౌదరీ, జీషాన్ ఖాద్రీ
విడుదల : ఇరోస్ నౌ 
***

        కమర్షియల్ సినిమా అంటే గుండుగుత్తగా హీరోల మీద వుండే క్లయిమాక్సులు. హీరో మాత్రమే విలన్ని ఓడించే మార్పు లేని ముగింపులు. అప్పుడెప్పుడో 1955 లో ‘దొంగ రాముడు’ లో సావిత్రి క్లయిమాక్స్ జరిపి అక్కినేని నాగేశ్వరరావుని విడిపిస్తే అదో వెరైటీ. దీన్ని ఇప్పటి కాలానికి సవరిస్తే, హీరో రిమోట్ కంట్రోల్ చేస్తూంటే హీరోయిన్ ముగించే, ఇన్నోవేట్ చేసిన క్లయిమాక్స్ అవచ్చు. కానీ కథనంతో కమర్షియల్ సినిమా వెరైటీని కోరుకోదు. కనీసం ‘ఈక్వలైజర్ 2’  లాగా సెకండాఫ్ పది నిమిషాలే కథ, నలభై నిమిషాలూ సుదీర్ఘ  క్లయిమాక్స్ అనే రివర్స్ ఇంజనీరింగ్ కి కూడా ఒప్పుకోదు. ఎంత మూసలో వుంటే అంత సుఖం, భద్రత  ఫీలవుతుంది. రియలిస్టిక్ సినిమాలు కూడా ఇదే  ధోరణిలో వుంటున్నాయి. కాకపోతే కొన్ని ట్రాజడీలుగా ముగుస్తాయి. ఈ ట్రాజడీలు కూడా వూహకందేలా ఫార్ములాగానే వుంటాయి. వూహకందకుండా ట్రాజడీగా ఒకటి కాదు, రెండు లీడ్ క్యారక్టర్ల పరాజయంగా వుంటే ఎలా వుంటుంది? దీనికి ఏ ఎలిమెంట్ తోడైతే అంత బలంగా వుంటుంది? కమర్షియల్ సినిమా కలల్ని చూపిస్తుంది, రియలిస్టిక్ సినిమా వాస్తవ పరిస్థితి చూపించి కళ్ళు తెరిపిస్తుంది. తమ అదుపులో లేని వాస్తవ పరిస్థితిని గెలవడం సగటు వాస్తవిక పాత్రలకి సాధ్యమవుతుందా? కాదు. అందువల్ల ‘హాలాహల్’ క్లయిమాక్స్ కమర్షియల్ సినిమా కళ్ళు తెరిపించే క్రియేటివ్ క్లయిమాక్స్ అవుతోంది.

    కొత్త దర్శకుడు రణదీప్ ఝా దీన్నోక కొత్త అనుభవాన్నిచ్చే పొలిటికల్ సస్పెన్స్ థ్రిల్లర్ గా తీయలేదు, చిత్రీకరించలేదు, చెక్కాడు. చుట్టడం కూడా చేసే దర్శకులు వుంటున్న కాలంలో, చెక్కుడు దర్శకుడుగా చెక్కడం అంటే ఏమిటో ఈ కింది విధంగా చూపించాడు...

కథ 

     మెడికల్ స్టూడెంట్ అర్చన (ఎనాబ్ కిజ్రా) రాత్రిపూట ఘాజియాబాద్ హైవేమీద బాయ్ ఫ్రెండ్ ఆశీష్ తో గొడవపడుతుంది. ఒక ట్రక్కు వేగంగా దూసుకురావడంతో ఆశీష్ తప్పించుకుని, అర్చన ట్రక్కుకింది కొచ్చేసి చచ్చిపోతుంది. పోలీసులు దీన్ని ఆత్మహత్యగా నమోదు చేసి, రోహతక్ లో వుండే ఆమె తండ్రి డాక్టర్ శివ శంకర్ శర్మ(సచిన్ ఖెడేకర్) కి సమాచారమందిస్తారు. డాక్టర్ శర్మ ఇది ఆత్మహత్య అంటే నమ్మడు. పోస్ట్ మార్టం రిపోర్టు తప్పుగా వుంది. ఇదే నిజమనీ, అనవసరంగా గొడవపడకుండా వెళ్లిపొమ్మనీ ఇన్స్ పెక్టర్ అంటాడు. ఇన్స్ పెక్టర్ ని అనుమానించిన శర్మ, ఎస్సై యూసుఫ్ ఖురేషీ (బరుణ్ సోబ్తీ) ని కలిసి రెండు లక్షలు లంచమిస్తాడు. అడ్డగోలుగా లంచాలు మేసే యూసుఫ్ మెడికల్ కాలేజీ ప్రిన్సిపాల్ ఆచార్య (పూర్ణేందు భట్టాచార్య) దగ్గరి కెళ్ళి బ్లాక్ మెయిల్ చేసి, అయిదులక్షలు తీసుకుంటాడు. యూసుఫ్ ని నమ్మిన శర్మ కూతురు బాయ్ ఫ్రెండ్ ఆశీష్ గురించి ఆరాతీసి యూసుఫ్ కి చెప్తాడు. కేసుతో ఎవరితో సంబంధముంటే వాళ్ళ దగ్గర లంచాలు మేసే ఆలోచనతో వున్న యూసుఫ్, శర్మని వెంటేసుకుని బాయ్ ఫ్రెండ్ ఆశీష్ వేటలో పడతాడు. ఇప్పుడేం జరిగిందనేది మిగతా కథ. 

నటనలు, సాంకేతికాలు

      ఇది శర్మా యూసుఫ్ రెండు ఆసక్తికర పాత్రల కథ. యూసుఫ్ పాత్ర మరింత ఆసక్తి కల్గించే రియలిస్టిక్ పోలీసు పాత్ర. ప్రతీ సీనులో ఈ పాత్ర నటించిన బరుణ్ సోబ్తీ మీదే వుంటుంది మన దృష్టంతా. అవకాశవాది, లంచగొండి. ఒకసారి ఇతడితో విసిగిపోయిన కొందరు దుప్పటి కప్పి కొట్టి పారిపోతారు. ఎవరు కొట్టారో తెలీక ఇక కుంటుకుంటూ నడుస్తాడు. డాక్టర్ శర్మ దగ్గర లంచం తీసుకున్నది గాక, ఆ అవకాశంతో కేసుతో సంబంధం వున్న వాళ్ళ దగ్గరా లంచాలు లాగి వదిలేస్తూంటాడు. ఈ క్రమంలో కేసుని తారుమారు చేస్తున్న ఇన్స్ పెక్టర్ కి తన కౌంటర్ ఇన్వెస్టిగేషన్ తో అడ్డు తగలుతూంటాడు, ఈ కేసు తన డ్యూటీ కాకపోయినా. ఇలా చేస్తూ సస్పెండ్ అవుతాడు. సస్పెండ్ అయ్యేలోపు మనసు మార్చుకుని డాక్టర్ శర్మ కోసం నిజాయితీ గా పని చేస్తూంటాడు. సస్పెండ్ అయ్యాక ఎక్కడపడితే అక్కడ ఇన్స్ పెక్టర్ కి తలనొప్పి తెప్పిస్తాడు. ఎన్ కౌంటర్లు, హత్యలు కూడా చేస్తూ ఇన్స్ పెక్టర్ సిండికేట్ ని కాపాడ్డానికి  ప్రయత్నిస్తూంటే, తను సిండికేట్ ని పట్టివ్వడానికి, తద్వారా దుర్మరణం చెందిన శర్మ కూతురికి న్యాయం చేయాడానికి రిస్కు తీసుకుని కృషి చేస్తూంటాడు. పాత్ర చిత్రణ, నటనా రెండూ బరుణ్ ని హైలైట్ చేశాయి. 

డాక్టర్ శర్మగా సచిన్ ఖెడేకర్ రెండో ప్రధానాకర్షణ. కూతుర్ని పోగొట్టుకున్న అతడి కోపం, పట్టుదలా ఎంత దూరమైనా అతణ్ణి తీసికెళ్లిపోతుంది. సిండికేట్ ని ఎదుర్కోవడానికి తన శక్తి చాలకపోయినా, దుండగులు తనని కొట్టి వెళ్ళినా, వెనకడుగేయని సంకల్ప బలం. ఒక పెన్ డ్రైవ్ తో సిండికేట్ ని తుదముట్టించగలడు. ఆ పెన్ డ్రైవ్ కి యాభై లక్షల కోసం వూళ్ళో క్లినిక్ అమ్మేసి, భార్యనీ, చిన్న కూతుర్నీ ఆందోళనలో పడేస్తాడు. ఇంతా చేసి, ఆ ప్రొఫెసర్ కి డబ్బిచ్చి మోసపోతాడు. పెన్ డ్రైవ్ లేదు ఏమీ లేదు. తననీ యూసుఫ్ నీ టపటపా కొట్టేసి వెళ్లిపోతారు నోయిడా గ్యాంగ్.  

ఇలా సచిన్ ఖెడేకర్, బరుణ్ సోబ్తీ ఇంట్రెస్టింగ్ జంట. డాక్టర్ గా సచిన్ మేధ ఆయితే, ఎస్సైగా బరుణ్ చేత. సచిన్ మేధస్సు నుపయోగించి ఆలోచించి చెప్తే, అతణ్ణి తీసుకుని బరుణ్ యాక్షన్లోకి దిగిపోతాడు. ఇద్దరూ మందు మిత్రులవుతారు. సిండికేట్ చేతిలో ఇద్దరూ సఫరవుతారు. ఒకసారి బాయ్ ఫ్రెండ్ ఆశీష్ తల్లి దగ్గరికి ఇద్దరూ పోతారు. కొడుకు ఎక్కడున్నాడో ఆమె తెలియదంటే బయటి కొచ్చేస్తారు. ఆమె అబద్ధం చెప్తోందని సచిన్ అంటాడు. ‘టేబుల్ మీద ఆల్బెట్రాల్ బాటిల్ వుంది. ఆస్తమా పేషెంట్స్ వాడతారు. అది వాడితే కనుగుడ్లు పెద్దవిగా అవుతాయి. ఆమె కళ్ళు మామూలుగా వున్నాయి. ఆ బాటిల్ ఆమె కొడుకు కోసం తెచ్చి వుంటుంది. అదెప్పుడో తీసికెళ్లి అందిస్తుంది. నీకు కొడుకు హాస్టల్లో ఇన్హేలర్ దొరికింది గా. అంటే కొడుకే ఆస్తమా పేషెంట్ అన్నమాట...ఈమెని కనిపెట్టి ఫాలో అవుదాం’  ఇలా నిశిత దృష్టితో గమనించి క్లూలు ఇస్తూంటాడు సచిన్.         

   

        ఇందులో వివిధ స్థాయుల్లో విలన్ల రూపంలో  అధికారులు, ఓ డాక్టర్, ఓ ప్రిన్సిపాల్, ఓ బడా రాజకీయ నాయకుడూ వుంటారు. ఎవరూ మాస్ విలన్స్ గా వుండరు. నీటుగా, మర్యాదస్తుల్లా వుంటారు. నైస్ గా మాట్లాడతారు. అంతా రియల్ గా వుంటుంది. ఏదీ సినిమాటిక్ గా వుండదు. డైలాగులు కూడా సినిమాటిక్ గా వుండవు. సినిమా చూస్తున్నట్టు వుండదు. కెమెరా మూవ్మెంట్స్ కూడా సినిమా చూపించవు, పరిస్థితిని  చూపిస్తాయి. బ్యాక్ గ్రౌండ్ స్కోర్ కూడా ఇంతే. ఎడిటింగ్ ఇంకో ఎస్సెట్. సీన్ల స్మూత్ ట్రాన్సిషన్స్ పరిస్థితినే ఎలివేట్ చేస్తాయి. ఔట్ డోర్ లొకేషన్స్, మెడికల్ కాలేజీ, హాస్పిటల్స్, హోటల్స్, పోలీస్ స్టేషన్లు మొదలైన రియల్ లొకేషన్లు అత్యంత వాస్తవికంగా కన్పిస్తాయి. 

కథా కథనాలు 

    ‘హాలాహల్’ (గరళం) కథకి -2013 మధ్య ప్రదేశ్ వ్యాపమ్ (వ్యావసాయిక్ పరీక్షా మండల్) స్కామ్ - మెడికల్ సీట్ల భారీ కుంభకోణం ఆధారం. ఎంట్రెన్స్ పరీక్షలు, అడ్మిషన్లు, రిక్రూట్ మెంట్లతో ఓ మహా దోపిడీయే సాగింది. పలుకుబడిగల రాజకీయ నాయకులు,  జ్యూనియర్, సీనియర్ అధికార్లు, వ్యాపారవేత్తలు సిండికేట్ గా ఏర్పడి, ఎంట్రెన్స్ రాయడానికి నకిలీ అభ్యర్ధుల్ని నియమించడం, పరీక్షా హాలు సీటింగ్ ఏర్పాట్లని తారుమారు చేయడం, ఆయా పరీక్షా కేంద్రాల్లో నియమితులైన అధికార్లని కొనేసి, ఫోర్జరీ చేసిన ఆన్సర్ షీట్లని సరఫరా చేయడం వంటివి పథకం ప్రకారం జరిపి, కోట్లాది రూపాయలు దండుకున్నారు. ఈ క్రమంలో ఎన్నో ‘ఆత్మహత్యలు’ జరిగాయి...

ఈ నేపథ్యాన్ని సినిమాకి ఉత్తరప్రదేశ్ లో సృష్టించి ఈ కథని నడిపారు. స్ట్రక్చర్లో వున్న దీని స్క్రీన్ ప్లే -ఇంటలిజెంట్, క్రియేటివ్ వర్క్ చేయాలనుకునే భావి దర్శకులకి ఒక గైడ్. మామూలు క్రియేటివ్ వర్క్ కాదు, నోనాన్సెన్స్ క్రాఫ్ట్. ఈ క్రాఫ్ట్ కి ఒక్క సీను ఉదాహరణగా తీసుకుంటే, క్లయిమాక్స్ లో సచిన్ ఖెడేకర్ కి కొన్సెలింగ్ చేస్తున్న పద్ధతిలో విలన్ వివరిస్తాడు చాలా స్మూత్ గా. సీన్ కట్ అవుతుంది. రోహతక్ లో ఆందోళనలో వున్న సచిన్ భార్యా కూతురు అతణ్ణి వచ్చెయ్యమని అంతకి ముందే కోరతారు. ఇప్పుడు టేబుల్ దగ్గర కూర్చున్న కూతురు, తలుపు వైపు చూస్తుంది. ఆమె మొహం ప్రసన్నమవుతుంది. షాట్ కట్ అయిపోతుంది. ఆమె తలుపు వైపు అలా ఏం చూసి ప్రసన్నమై వుంటుంది? సచిన్ వచ్చేసి వుంటాడు. ఇలా సచిన్ ని చూపించకుండానే ఆ అర్ధంలో షాట్ తీశాడు క్రాఫ్ట్ తెలిసిన దర్శకుడు. ఇది మర్చిపోలేని బ్యూటీఫుల్ షాట్.

విలన్ చేసిన కౌన్సెలింగ్ కి తన మంచి చెడ్డలు అర్ధమైపోయే వుంటాయి సచిన్ కి. పోరాటం విరమించాడు. తప్పదు. ఈ వ్యవస్థలో సామాన్యుడికి గత్యంతరం లేదు. ఇప్పుడున్న కుటుంబాన్ని కాపాడుకోవాలి. మరి న్యాయం? న్యాయం జరగాలని రూలుందా? న్యాయమే జరుగుతుందని సినిమాలు చూపించి మభ్యపెడుతున్నాయి. న్యాయం జరగదు, ఇది వాస్తవం. ఎందుకు జరగదు తెలుసుకోవడం బుద్ధిమంతుల లక్షణం. న్యాయం చెప్పే సిండికేట్లు, కేట్లు, డూప్లికేట్లు పలికే సుభాషితాలు ఆరోగ్యకరమైనవి. 

అగథా క్రిస్టీ ఫేమస్ డిటెక్టివ్ పాత్ర హర్క్యూల్ పైరట్ లా గుబురు మీసాలు పెంచుకుని వీరంగం వేసిన ఎస్సైకి కూడా ఇదే గుణపాఠం. వ్యవస్థలో అతను ఆఫ్టరాల్ ఎస్సై. పెద్ద తలకాయలతో పెట్టుకోకూడదు. లంచాలు తిని ఉద్యోగం చేసుకుంటే చాలు. 

        ఎంత సింపుల్ గా వుంటుందో, అంత బలంగా వుంటుంది సందేశాత్మక ముగింపు. అయితే ఒక తప్పుంది. సిండికేట్ మీద డాక్టర్ ఆధారాలన్నీ సేకరించాక, సిండికేట్ ముందుకెళ్లి మీడియా ముందు రట్టు చేస్తానని సవాలు విసరడం రొటీన్ మూస ఫార్ములా సీను. ఈ రియలిస్టిక్ జానర్ మర్యాదలకి ఇది తగదు. దీనివల్ల ఏమైందంటే సిండికేట్ ఎలర్ట్ అయిపోయి కథకి నష్టం జరిగింది. గుట్టు చప్పుడవకుండా మీడియా ముందుకెళ్ళకుండా అనవసర హీరోయిజం ఏమిటి?

ఇక సీను తర్వాత సీన్ల క్రమం, కూర్పు ఇంకో క్రాఫ్టు. సీన్ల ప్రారంభ ముగింపులు అనూహ్యంగా థ్రిల్లింగ్ గా చేశారు. సెంటి మెంట్లు, మెలోడ్రామాలూ ఎక్కడికక్కడ లేకుండా చూసుకున్నారు. అవన్నీ సన్నివేశాల్ని బట్టి, కథ నడకని బట్టి మనం ఫీలవుతాం. 1970 లలో ఆర్ట్ సినిమాలకి తిరుగుబాటుగా రాబర్ట్ బ్రెసన్ శైలిలో తనదైన బ్రాండ్ ఆర్ట్ సినిమాలతో ఆశర్యపర్చిన మణికౌల్ దృష్టిలో, నటులు నటులు కాదు, మానవ రూపానికి మోడల్స్. నటులు పాత్ర అంతర్ముఖాన్ని బహిర్గతం చేస్తారు, మోడల్స్ బాహిర్ రూపంతో అంతర్ముఖాన్ని ఊహాత్మకం చేస్తాయి. అంటే పాత్ర లోపల ఏం ఫీలవుతోందో అంతరార్థాన్ని మన వూహకి వదిలేస్తాయి. ఇదే జరుగుతుంది ‘హాలాహల్’ లో. తప్పక చూడాల్సిన క్రియేషన్. 

―సికిందర్

 

982 : రివ్యూ

 రచన - దర్శకత్వం : అనుశ్రీ మెహతా 

తారాగణం : హితేన్ తేజ్వానీ, అనుప్రియా గోయెంకా, సెహబాన్ అజీమ్, ఆయుష్మాన్ సక్సేనా, అశ్విన్ మిశ్రా, రవి ఖేమూ, అశోక్ పండిత్
సంగీతం: ఎ. వసంత్, ఛాయాగ్రహణం : క్షితిజ్ తారే
నిర్మాత : ప్రీతీ రాఠీ గుప్తా
బ్యానర్ : ఇరోస్ ఇంటర్నేషనల్
విడుదల : ఇరోస్ నౌ
***

        స్ట్రీమింగ్ ప్లాట్ ఫామ్ ఇరోస్ నౌ నిర్మాణంలో మరో మర్డర్ మిస్టరీ ‘అన్ కహీ’ విడుదలైంది. ఈ నెలలోనే ‘హలాహల్’ అనే మర్డర్ మిస్టరీ కూడా విడుదలైంది. హిందీలో ఓటీటీ కంటెంట్ అంటే యూత్ ని టార్గెట్ చేసే క్రైమ్, అడల్ట్ మూవీస్ గనుక ప్రస్తుత మర్డర్ మిస్టరీ అర్ధంలో మర్డర్ మిస్టరీయే గానీ, కంటెంట్ లో కాదు. జరిగిపోయిన సీరియల్ మర్డర్స్ గురించి చర్చ. సింగిల్ లొకేషన్, టేబుల్  చుట్టూ చర్చ. చర్చించుకుని సీరియల్ కిల్లరెవరో తేల్చే కథ. అ గథా క్రిస్టీ నవలల్లో పడక్కుర్చీ డిటెక్టివ్ పరిశోధన లాగా. అయితే ఈ టైపు కథకి క్రిస్టీ ఫార్ములాతో ఊపిరి బిగబట్టే సస్పెన్సు సృష్టించవచ్చు. ఇదే జరగలేదు. 

    ఆరుగురు అనుమానితుల్ని ఒకచోట బంధించి మీలో సీరియల్ కిల్లరెవరో తేల్చుకు  చెప్పండనే స్టోరీ ఐడియా వరకూ బాగానే వున్నా, నిర్వహణా లోపం వల్ల ముగింపు సహా తేలిపోయింది. పూర్తిగా డైలాగులతో నడిచే ఈ కథ డైనమిక్స్ కొరవడి ఎందుకూ కొరగాకుండా పోయింది ప్రయోగం చేసిన కొత్త దర్శకురాలి చేతిలో.

    అభిమన్యూ మాథుర్ (హితేష్ తేజ్వానీ) ఇన్వెస్ట్ మెంట్ బ్యాంకర్, టియా శర్మ (అనుప్రియా గోయెంకా) రీజనల్ మేనేజర్, లెస్బియన్; సంతోష్ హుడా (సెబాన్ అజీమ్) రిచ్ హర్యానా యూత్, రోషన్ ఖేర్ (అశ్విన్ ముష్రాన్) డివోర్సీ, క్రిష్ మల్హోత్రా (ఆయుష్మాన్ సక్సేనా) డ్రగ్ బానిస, దీపక్ మెహ్రా (రవి ఖేమూ) టెలికాం మేనేజర్ - వీళ్ళందరూ సీరియల్ కిల్లింగ్ లో అనుమానితులు.

    సంవత్సర కాలంగా ఢిల్లీలో పదకొండు మంది అమ్మాయిల హత్యలు జరిగాయి. ఇవన్నీ వివిధ మెట్రో స్టేషన్స్ కేంద్రంగా జరిగాయి. హత్యాస్థలాల్లో ఆధారాలతో పై ఆరుగురిని పట్టుకున్నారు. అందరి మీదా సాక్ష్యాధారాలున్నాయి కానీ అందరూ హంతకులు కాదు. వాళ్ళు చెప్పే సమాధానాలు నమ్మదగ్గవిగా లేవు. అందుకని వివిధ పోలీస్ స్టేషన్లో వున్న వాళ్ళని పట్టుకొచ్చాడు ఐజీ షేర్గిల్ (అశోక్ పండిత్). మాస్ ఎన్ కౌంటర్లు చేయడానికి తీసికెళ్ళాడని వార్తలు గుప్పుమన్నాయి. ఎందుకంటే అతను ఎన్ కౌంటర్ స్పెషలిస్టు.

    ఆరుగుర్నీ ఒక గ్యారేజీలో వేసి, సాక్ష్యాధారాల ఫైళ్ళు వాళ్ళ ముందు పడేసి, మీలో ఎవరు సీరియల్ కిల్లరో తేల్చుకుని చెప్పమన్నాడు. పన్నెండు గంటలు టైము. ఈ లోగా చెప్పకపోతే పన్నెండు గంటల తర్వాత ఎన్ కౌంటర్లయి పోతారు.

    ఇదీ సమస్య. ఇప్పుడు ఒకొక్కరి ఫైలు తీసి విచారణ ప్రారంభిస్తారు ఆరుగురూ. తమ నిర్దోషిత్వాల్ని నిరూపించుకునే ప్రయత్నంలో పరస్పరం నిందించుకుంటారు. రహస్యాలు బయట పెట్టుకుంటారు. కొట్టుకుంటారు. ఇలా టేబుల్ చుట్టూ చర్చ చివరికి వాళ్ళల్లో ఒక సీరియల్ కిల్లర్ ని పట్టిస్తుంది. 

    గ్యారేజి దాటి సీన్లు బయటి కెళ్ళవు. ఫ్లాష్ బ్యాకులుండవు. వాళ్ళు చెప్పుకునే కథనాలకి విజువల్ సపోర్టు వుండదు. కేవలం వెర్బల్ డ్రామా. నటనలు మాత్రం బావున్నాయి. కానీ సింగిల్ లొకేషన్లో వాగ్యుద్ధాలతో కథలో అసలు బిగి లేదు. కథలో ఉత్కంఠ పెంచే మలుపుల్లేవు. అరుచున్నంత మాత్రాన, కొట్టుకున్నంత మాత్రాన కథలో టెన్షన్ పెరగదు. పదకొండు మంది అమ్మాయిల్ని చంపుతూ పోవడానికి సైకో కిల్లర్ కి ఏదో మానసిక కారణం వుంటుంది. ఈ కారణాన్ని పట్టుకోవడానికి సాక్ష్యాధారాలు చూపించుంకుని కొట్టుకోవడం కాకుండా, అందరి మెంటల్ కండిషన్ ని పరిశీలనకి పెడితే, సీరియల్ కిల్లర్ పైకి కన్పించే కామన్ లక్షణాల్ని పట్టుకోగల్గితే, సమస్య ఒక పద్ధతిగా సాల్వ్ అయ్యే అవకాశముండేది. చిట్టచివరికి సీరియల్ కిల్లర్ రివీలయినప్పుడు వాడి మాటలు, నటన, తిరగబడి మిగతా వాళ్ళని చంపేసే ప్రయత్నం- లేదా చంపిపారేసీ ఈజీకి లొంగిపోయే ముగింపు వుండి వుంటే – ఈ షోడౌన్ కనీసం కొన్ని రోజులు వెంటాడేది. కానీ ఒక మాటతో చప్పటి ముగింపు షో ఆఫ్ చేసేసింది.

    ఈ టైపు సినిమాలేమున్నాయా అని సెర్చి చేస్తే, 1986 లో బాసు భట్టాచార్య తీసిన ‘ఏక్ రుక్తాహువా ఫైసలా’ (వాయిదా పడ్డ నిర్ణయం) దొరికింది. 18 ఏళ్ల యువకుడికి పడిన మరణ శిక్షని పన్నెండు మందితో కూడిన జ్యూరీ తిరగదొడే కథ. ఒక గదిలో సాగే చర్చోపచర్చల కోర్టు రూమ్ డ్రామా. ఇది 1957 లో సిడ్నీ లుమెట్ తీసిన క్లాసిక్ ‘12 యాంగ్రీ యంగ్ మెన్’ కి రీమేక్. ‘అన్ కహీ’ (అన్ టోల్డ్) కొత్త దర్శకురాలు అనుశ్రీ మెహతా తోచినట్టు గుడ్డిగా తీయకుండా,ఈ సినినిమాలు చూసి కాస్త జానర్ రీసెర్చి చేసుకుని వుంటే బావుండేది.

―సికిందర్