835 : ఇండీ సంగతులు

    ‘అంగమలై డైరీస్’ ని అంగమలై పట్టణపు కథగా అంగమలైలో ఎందుకు తీయాలి? ఎందుకంటే ఆ దర్శకుడు, ఆ రచయిత ఆ ప్రాంతానికి చెందిన వాళ్ళు కాబట్టి. దర్శకుడు లిజో జోస్ పెలిసరీ అక్కడికి 14 కిలోమీటర్ల దూరంలో చలకుడిలో నివసిస్తే, రచయిత వినోద్ చంబన్ జోస్ అంగమలై లోనే నివసించాడు. అంగమలై వాళ్లకి కొట్టిన పిండి. అక్కడి లోకల్ కల్చర్, జీవితం, మనుషుల తీరుతెన్నులు క్షుణ్ణంగా తెలుసు. క్రైస్తవులు ప్రధానంగా వుండే ఆ పట్టణంలో ఎటు చూసినా క్రైస్తవ సంస్కృతే కన్పిస్తుంది. అయినంత మాత్రానా క్రైస్తవ సంస్కృతితో తమకి తెలిసిన నేటివిటీ దొరికిందని అంగమలై లొకేషన్ గా ముఠా తగాదాల కథ చెప్పాలా? కానేకాదు. క్రైస్తవ సంస్కృతితో బాటు అంగమలై పోర్క్ వ్యాపారానికి పెట్టింది పేరు. అక్కడి ప్రజలు ఇష్టపడి రోజూ తినే ఆహారం పోర్క్ మాంసాహారం. నాలుగున్నర కోట్ల టర్నోవర్ తో అతి పెద్ద వ్యాపారంగా ఎందరికో జీవనోపాధి కల్పిస్తోంది. సీమపందుల పెంపకం, అమ్మకం పెద్ద ఎత్తున జరుగుతాయి. ప్రేక్షకులకి అర్ధ మవడానికి సినిమాలో పోర్క్ డిపో అతని చేత ఇదంతా చెప్పించి, కథకి కేంద్రబిందువుగా  ఎస్టాబ్లిష్ చేశారు. ఇలా ముఠా తగాదాలకి అంగమలై అంతర్భాగమైన పోర్క్ బిజినెస్ ని నేపధ్యంగా తీసుకుని వాస్తవికతని, విశ్వసనీయతని సమకూర్చారు. 

          ఇందులో నటించిన 86 మందీ కొత్త వాళ్ళు స్థానికులే. ఈ వూరు మనుషులెలా వుంటారో  వీళ్ళూ అలా వుంటూ నటించలేదు, ప్రవర్తించారు. వాళ్ళ వేష భాషలు, హాస్యం, స్థానికత అక్కడివే, సినిమా కోసం మార్చుకోలేదు. క్రిస్టియన్ ఫ్లేవర్ తో మ్యూజిక్ అక్కడిదే. గోవా నేపధ్యంలో కొంకణీ సినిమాల క్రిస్టియన్ ఫ్లేవర్ ఎలావుంటుందో, అంగమలైలో అది సరీగ్గా కుదిరింది. ఒక ప్రాంత నేటివిటీని సజీవ ప్రపంచంగా మన కళ్ళ ముందు ప్రతిష్టించాలంటే, మైక్రో లెవెల్లో చూపించాలి. ఓవరాల్ గా కెమెరా పాన్ చేసి ఇది ఫలానా ప్రాంతమంటే సరిపోదు. ప్రేమమ్, ఆర్డినరీ, అనార్కలీ వంటి మలయాళ సినిమాల్లో లొకేషన్స్ స్టూడెంట్స్ బస్సులు కట్టుకుని వెళ్లి విహరించే టూరిస్టు కేంద్రాలయ్యాయంటే, వాటిని మైక్రో లెవెల్లో చూపించడం వల్లే. అంగమలై పట్టణపు మైక్రో లెవెల్ చిత్రీకరణ కూడా చూస్తే, మనకి కూడా అక్కడికి వెళ్లి తిరిగి రావాలన్పిస్తుంది- పోర్క్ తినడానికి కాదు. మోనార్క్ లా ఫోటోలు దిగి రావడానికి... 

    

          హీరో గ్రూపు పోర్క్ ఇరవై రూపాయలు తక్కువకి అమ్ముతున్నారని, డిపో గ్రూపు అభ్యంతరం చెప్పడంతో మొదలయ్యే ఘర్షణలు... డిపో గ్రూపు విసిరిన బాంబు వల్ల హీరో పోర్క్ షాపు ధ్వంసమవడం, హీరో విసిరిన బాంబు వల్ల ఎదుటి గ్రూపులో ఒకడు చనిపోవడం, అది హత్య కేసుగా హీరో మెడకి చుట్టుకోవడం, అందులోంచి బయటపడేందుకు అవసరమైన ముప్ఫై లక్షల కోసం ప్రయత్నించడం...ఇలా అతి సాధారణంగా, బలహీనంగా వుంటుంది కథ. దీన్ని బలమైన కమర్షియల్ కథగా మార్చకుండా, రియలిస్టిక్ ధోరణులతో ఇండీ ఫిలిం (ఇండిపెండెంట్ సినిమా అనే సమాంతర సినిమా) గా తీశారు. సమాంతర సినిమా ఎప్పుడూ కమర్షియల్ ధోరణులతో  వుండదు. సమాంతర సినిమాలుగా మొదటి తరంలో ఆర్ట్ సినిమాలు, కొత్త రూపంగా కమర్షియల్ - ఆర్ట్ కలగలిసిన క్రాసోవర్ సినిమాలు, వీటి  కొనసాగింపుగా వరల్డ్ మూవీస్ అనుకరణలు వచ్చి, చివరిగా ఇండీ ఫిలిం దగ్గరాగింది ప్రస్తుతం సమాంతర సినిమా ప్రస్థానం. 

           ఇండీ ఫీలిం దర్శకుడు ఫీలయ్యి ఇండిపెండెంట్ గా ఇష్టమొచ్చినట్టు తీసుకునే వేదిక. దీన్ని కమర్షియల్ సినిమాల ‘క్యాలిక్యులేటర్’ తో చూసి ఇందులో ఇది లేదు, అది లేదంటే కుదరదు. స్క్రీన్ ప్లే గురించి మాట్లాడడం అసలే కుదరదు. ఎలా చూపించిన కథ అలా చూడాల్సిందే. విమర్శకి తావులేదు. కానీ ఇండీ ఫిలిం జానర్ మర్యాదలు తెలియకుండా, ఏ కొంచెం కమర్షియల్ కథనం చేసినా, ఫార్ములా చిత్రణలు చేసినా, కృత్రిమ పాత్రల్ని చూపించినా, ఆ దర్శకుడే దెబ్బతింటాడు. అప్పుడది ఇండీ ఫిలిం కాక, దేనికీ చెందని అనాధ అవుతుంది.

టెక్నిక్కే వేరు

      టెక్నికల్ గా కూడా కమర్షియల్ పంథా వుండదు. కమర్షియల్ సినిమా షాట్స్, టేకింగ్స్, లైటింగ్, టింట్స్ వగైరా వాడరు. దృశ్యాలు సహజంగా, కూల్ గా వుంటాయి. యాక్షన్ సీన్లు, ఛేజింగులు, ఫైటింగులు కూడా కమర్షియల్ సినిమాల టైపులో వుండవు. నిజ జీవితంలో మన కళ్ళ ముందు ఎలా జరుగుతాయో అలా యాదృచ్ఛికంగా జరిగిపోతాయి. ఇక హింస వుంటే దానికి యాంటీగా నేపధ్యంలో హార్ష్ గా వుండని మృదువైన వాతావరణం కల్పించడంతో ఆ హింస కూడా కళాత్మకమై పోతుంది. ‘అంగమలై డైరీస్’ లో లైట్స్ వాడలేదు. సహజ వెలుతురులోనే షూట్ చేశారు. అవన్నీ రియల్ లొకేషన్సే. మార్కెట్, కాలనీలు, పోర్క్ ప్రాంగణాలు వగైరా. షూటింగ్ లో లైటింగ్ యూనిట్ లేదు. జిబ్, ట్రాక్స్, ట్రాలీలు ఏవీ లేవు. ఎక్కువగా హేండ్ హెల్డ్ కెమెరాలతోనే షూట్ చేశారు. క్లయిమాక్స్ ఫైటింగ్ టేకింగ్ కి అంతర్జాతీయంగా పేరొచ్చింది. వెయ్యి మందితో, అదీ రాత్రిపూట, ఎక్కడా కట్ లేకుండా, కెమెరాని మూవ్ చేస్తూ, సింగిల్ టేక్ లో 12 నిమిషాల యాక్షన్ సీనంతా తీశారు.

          ఇలా మేకింగ్ లో ఈ ఎఫెక్ట్స్ అన్నీ వ్యూహాత్మకంగా ఏర్చికూర్చి – పొందుపర్చడంతో  ఈ ఇండీ ఫిలిం ఇండీ ఫిలిమ్స్ లో మేటిగా తయారయ్యింది. బాక్సాఫీసు సక్సెస్ కూడా చవిచూసింది. రెండున్నర కోట్ల బడ్జెట్ కి 20 కోట్లు వసూలు చేసింది. జాతీయ, అంతర్జాతీయ ప్రశంసలు పొందింది. ఒకటి రెండు అంతర్జాతీయ ఇండీ ఫిలిమ్స్ ఫెస్టివల్స్ కి కూడా వెళ్ళింది. కొంత మంది దీన్ని క్లాసిక్ కల్ట్ అని కూడా అంటున్నారు. 

          ఇక తెలుగుకి వద్దాం. తెలుగులో ఎప్పుడో గానీ ఇండీ ఫిలిం రాదు. వస్తే చీప్ గా  తీసిన కమర్షియల్ సినిమాల్లాగా వుంటాయి. ఇండీ ఫిలిం క్రాఫ్ట్ ఏ మాత్రం వుండదు. మైక్రో లెవెల్ చిత్రీకరణతో, పర్సనల్ గా అనుభవించిన జీవితంలోంచి ఆ దర్శకుడి వాయిస్ లా వుండవు. ఇక జాతీయ, అంతర్జాతీయ ప్రశంసలు పొందడం, అమెరికన్ మీడియాలో కూడా రివ్యూలకి నోచుకోవడం, ఫెస్టివల్స్ కి వెళ్ళడం, కల్ట్ క్లాసిక్ అన్పించుకోవడం లాంటివి అస్సలు వూహించలేం. 

రీమేకా?! 

      అలాటిది ఒక ఇండీ ఫిలింని రిమేక్ చేస్తే? ఈ ప్రశ్న షార్ట్ ఫిలింని రిమేక్ చేస్తే?  అన్నట్టుంటుంది. షార్ట్ ఫిలిమ్స్ లాగే ఇండీ ఫిలిమ్స్ పర్సనల్ డైరీలు. కాకపోతే పొడిగించిన పర్సనల్ డైరీలు. అవి కమర్షియల్ సినిమాలు కావు - కొనుక్కొ చ్చుకుని గబగబా రిమేక్ చేసుకుని, చకచకా కరెన్సీ లెక్కెట్టుకుందా
మనుకోవడానికి. ఆ దర్శకుడి పర్సనల్ డైరీ అతను ఫీలైన సాంస్కృతిక కళాభివ్యక్తి. దాన్ని తెచ్చుకుని ఇంకో దర్శకుడు రిమేక్ చేయడమేమిటి? చేతనైతే దాని స్ఫూర్తితో తాను ఇంకోటి ఫీలై తన డైరీ లాగా ఏదైనా తీసుకోవాలి.

          అస్సాంలో మార్షల్ ఆర్ట్స్ అక్కడి జీవితంలో ఒక భాగం, సంస్కృతి. చిన్నప్పట్నించే ఆడా మగా పిల్లలు నేర్చుకుంటారు. ఈ సంస్కృతి తెలిసిన కుర్రాడు కేన్నీ డియోరీ బాసుమటారీ అనే వాడు, తన ఈ సాంస్కృతిక కళాభివ్యక్తితో సినిమా తీసేద్దామనుకున్నాడు. తన దగ్గరున్న35 వేలతో కెమెరా కొనుక్కుని, వాళ్ళమ్మ దగ్గర బంగారం కుదువ బెట్టి, లక్షరూపాయలతో ‘లోకల్ కుంగ్ ఫూ’ అనే ఇండీ ఫిలిం తీసేశాడు. తెలుగులో లక్షరూపాయలు, ఇంకా వీలయితే ఆ పైన పెట్టుబడితో ఇంకా షార్ట్ ఫిలిమ్స్ ఆలోచించడం దగ్గరే  వుండి పోతునప్పుడు, తను ఏకంగా లక్షతో ఇండీ ఫిలిమే తీసి చూపెట్టాడు. యూట్యూబ్ లో ట్రైలర్ పెడితే పీవీఆర్ సంస్థ చూసి డీల్ కుదుర్చుకుని, దేశంలో  ప్రధాన నగరాల్లో రోజూ ఒక ఆట చొప్పున విడుదల చేసింది. 26 లక్షలు వచ్చాయి. ఆరు లక్షలు ప్రమోషనల్ ఖర్చులు తీసేసి, పది లక్షలు ఈ కొత్త ఇండీ దర్శకుడు కేన్నీ కిచ్చింది. అస్సాం యూత్ లో ఇదొక కల్ట్ ఫిలింగా  నమోదైంది. అస్సాం రాష్ట్ర ప్రభుత్వ అవార్డుతో బాటు, మరికొన్ని అవార్డులు వచ్చాయి. అస్సాం యూత్ లో కెన్నీ సెలెబ్రిటీ అయిపోయాడు. వెంటనే ‘లోకల్ కుంగ్ ఫూ -2’ ని ప్రకటించి, 15 లక్షలు క్రౌడ్ ఫండింగ్ కెళ్తే, 30 లక్షలు వచ్చిపడ్డాయి! నేరుగా కుంభ స్థలాన్ని కొట్టలేరు. తన ఆట స్థలంలో తను ఫ్రెష్ గా ఆడుకుంటే కుబేరులే దిగివస్తారు. తన ఆట స్థలంలో కేన్నీ ఫ్రెష్ గా ఆడుకున్నాడు, పీవీఆర్ వచ్చి ఉద్ధరించింది. 

       సాంస్కృతిక కళాభివ్యక్తియే, ఇంకాస్త ఇన్నోసెన్సే ఇండీ ఫిలిమ్స్ కి  ప్రేక్షకుల హృదయాల్లోకి చొచ్చుకెళ్ళే  ప్రధాన ముడి సరుకులుగా వుంటాయి. అలాంటిది ‘అంగమలై డైరీస్’ సాంస్కృతిక (పోర్క్ బిజినెస్) కళాభివ్యక్తినీ, అందులోని ఇన్నోసెన్స్ నీ, తెలుగులోకి రొడ్ద కొట్టుడు వూర మాస్ ఫలక్ నుమా దాస్ గా మార్చి పారేస్తే సరిపోతుందా? ‘ఫలక్ నుమా దాస్’ అని టైటిల్ పెట్టడంలోనే అర్ధమవుతోంది - ‘అంగమలై డైరీస్’ ని వూర మాస్ గా అర్ధం జేసుకుని రీమేక్ చేశారని. గతంలో తమిళంలో ‘నేరం’ అనే ఇండీ ఫిలింని అది ఇండీ ఫిలిం అని తెలీక, కమర్షియల్ తెలుగులో సందీప్ కిషన్ తో ‘రన్’ గా రీమేక్ చేశారు. కమర్షియల్ ప్రేక్షకులు షాక్ అయ్యారు. ఇందులో విలన్ ఉత్తుత్తిగానే ఒక ఆటో గుద్దుకుని కథ మధ్యలోనే ఠపీమని చచ్చిపోతాడు. ఇది డార్క్ కామెడీ. ఇండీ ఫిలింకి చెల్లుబాటయ్యే డార్క్ కామెడీ. కమర్షియల్ సినిమా కథకి ఓ పద్ధతీ పాడూ వుంటాయి. ఇండీకి వుండనవసరం లేదు. ఇది తెలీక ఇండీ ‘నేరం’ ని కమర్షియల్  ‘నేరం’ అనుకుని, బేరమాడుకుని, ‘రన్’ గా రీమేక్ చేస్తే ప్రేక్షకులు ఒకటే రన్!  ఇదే తమిళ ఇండీ ‘నేరం’ ని అదే దర్శకుడు మలయాళంలో రీమేక్ చేస్తే హిట్టయ్యింది! ఎవడి సొంత కవిత్వం వాడే చెప్పగలడు. ఇప్పుడింకో జోకేమిటంటే, ‘అంగమలై డైరీస్’ ని హిందీలో రీమేక్ చేయడానికి బాలీవుడ్ దొరలు వచ్చారట! ఒక స్థానిక సాంస్కృతిక సన్నివేశాన్ని ఇంకో స్థానిక సన్నివేశంలో పెట్టి ఎలా చూపిస్తారో ఏమిటో. అంగమలై పట్టణపు సంస్కృతితో  ‘అంగమలై డైరీస్’ ని అక్కడి ‘కట్టా లోకల్’ గా, అంటే పక్కా లోకల్ గా ఆ దర్శకుడు ఇండీ ఫిలింగా తీసుకుని సక్సెస్ అయితే, దాన్ని తెలుగులో ‘పక్కా మాస్’ గా తీసి అట్టర్ ఫ్లాపయ్యారు. 

మాస్ మసాలా!

     టేకింగ్ అంతా కమర్షియల్ మాస్ టేకింగే, రియలిస్టిక్ ఫీల్ ఎక్కడా వుండదు. బీజిఎమ్ (బ్యాక్ గ్రౌండ్ మ్యూజిక్) లో థీమ్, లోకల్ కల్చర్ కన్పించవు. రెగ్యులర్ యాక్షన్ మూవీ మ్యూజిక్కే. ముఠాల పాత్రలు,  పాత్రధారుల తీరుతెన్నులు రెగ్యులర్ కమర్షియల్ సినిమాలన్నిట్లో ఒకేలా వుండే రౌడీ గెటప్సే. అవే జుట్లు, గడ్డాలు, మాసిన జీన్స్, టీస్. ఒరిజినల్ లో (అంగమలై డైరీస్ లో) లాగా 86 మంది ఫలక్ నుమా వాసులు ఎవరూ లేరు. ఫలక్ నుమా లోకి దిగుమతైన రెగ్యులర్ తెలుగు సినిమా మాస్ మొహాలే ఇవి. ఒరిజినల్ లో ఒకరిద్దరు తప్ప,  షేవ్ చేసుకునే నీటుగా వుంటారు. రౌడీ లుక్స్ వుండవు. ఇక హీరో ఆంటోనీ వర్ఘీస్ మొహంలో ఇన్నోసెన్సే వుంటుంది. బియ్యే తప్పి కేబుల్ టీవీ బిజినెస్ చేస్తూంటాడు. తల్లి వుంది. చెల్లెలి పెళ్లి చేయాలి. అందుకని పోర్క్ బిజినెస్ కూడా చేద్దామని ఫ్రెండ్స్ తో ఎంటర్ అవుతారు. అతడి లవ్ ట్రాక్ లో ఇద్దరు అమ్మాయిలుంటారు. మొదటి అమ్మాయి పెళ్లి చేసుకుని సింగపూర్ వెళ్ళిపోతుంది. రెండో అమ్మాయి జర్మనీలో నర్సు. ఈమెని పెళ్లి చేసుకుని జర్మనీలో సెటిల్ అవుదామనుకుంటాడు. ఇది కూడా జరక్క ఇంకో అమ్మాయిని పెళ్లి చేసుకుంటాడు.  సింగపూర్, జర్మనీలతో తెలుగులో ఈ ట్రాక్ ఫలక్ నుమా నేటివిటీకి కృత్రిమంగా వుంటుంది. ఇక ముస్లిం అమ్మాయిని పెళ్లి చేసుకోవడం ఇంకా సినిమాటిక్. 

          ‘అంగమలై డైరీస్’ ప్రారంభంలో పోర్క్ స్టాల్స్ ని ఎక్కువగా చూపిస్తూ కథా నే పధ్యాన్ని పరిచయం చేస్తూంటారు. తెలుగులో ఫలక్ నుమా దేనికి ప్రసిద్దో చూపించలేక పోయారు. ఫలక్ నుమా దాటి సీటీ అంతా రౌండేశారు. మదీనా దగ్గర నాయబ్ హోటల్లో పాయా, షాదాబ్ హోటల్లో బిర్యానీ అంటూ, ఇంకా ఇతర చోట్లలో  ఫేమస్ అడ్డాలు చూపించుకుంటూ పోయారు. అసలు ఫలక్ నుమా ప్యాలెస్ ని చూపించడానికి కథ ప్రకారం వీలు పడలేదు. ఈ కథాకాలం 2005. అయినా ఇప్పుడు ఫలక్ నుమా ప్యాలెస్ అప్పటి ఫలక్ నుమా ప్యాలెస్ కాదు. మధ్యలో 2010 లో తాజ్ ఫైవ్ స్టార్ హోటల్ గా మారిపోయింది. కాబట్టి ఇప్పుడు చూపెట్ట లేరు. ఎక్కడో మదీనా దాకా వెళ్ళకుండా, ఫలక్ నుమా లోనే రెండు పెద్ద ఇరానీ రెస్టారెంట్స్ వున్నాయి. ఇంకా చిన్న చమన్, మహంకాళీ గుడిలతో బాటు ఇంజన్ బౌలీ, ఆలియా బాద్ వంటి ఫేమస్ సెంటర్స్, రైల్వే స్టేషన్ వున్నాయి. మదీనా దగ్గర నాయబ్, షాదాబ్ హోటల్స్  అంటూ చూపెట్టారే గానీ,  కథా కాలం ప్రకారం అప్పట్లో మదీనా హోటల్ కూడా వుంది. మదీనా చాయ్ వుంది. ఫలక్ నుమా దాస్ ని ఎలా చూపెట్టారంటే, హైదరాబాద్ మొత్తం ఒకే నేటివిటీ అన్నట్టు చూపెట్టారు. 

          కానీ ఆబిడ్స్ నేటివిటీ జూబిలీ హిల్స్ లో వుండదు. అల్వాల్ నేటివిటీ చిక్కడపల్లిలో వుండదు. ఇలా ఫలక్ నుమా నేటివిటీ అంటూ వుంటే దానికో ఫీల్ తో దాని నేటివిటీయే  వుంది. ఓల్డ్ సిటీ నేపధ్యంగా హైదరాబాదీ కామెడీ - యాక్షన్ సినిమాలు వస్తూంటాయి. ఇవి ఇటు మహారాష్ట్ర, కర్ణాటక సరిహాద్దు జిల్లాల్లో వరకూ పాపులర్. వాటిలో వుండే ఓల్డ్ సిటీ సంస్కృతి, భాష, జోకులు ఏవైతే వుంటాయో అది పక్కా నేటివిటీ. అందుకే క్రేజ్. 

          ఇక హీరో తను ప్రేమిస్తున్న అమ్మాయిని ఒక స్టూడెంట్ టీజ్ చేశాడని కొట్టడానికి వెళ్ళే కాలేజీ ఎక్కడో ఉస్మానియా యూనివర్సిటీ. ఫలక్ నుమాలోనే కాలేజీలున్నాయి. కాకుండా కమర్షియల్ సినిమాల్లో బిల్డప్ లాగా, ఉస్మానియా యూనివర్సిటీ ఆర్ట్స్ కాలేజీ భవనం కావాల్సి వచ్చింది. ఇక ప్రతీవారం ఎక్కడెక్కడి గ్యాంగ్స్ చేరి మాట్లాడుకుంటాయని ఒక బార్ సెట్ చేశారు. ఫలక్ నుమాలో ఇది నిజం కాదు. అప్పట్లో దర్బార్ ఒక్క చోటే జరిగేది. చార్మినార్ పక్క రోడ్డులో ఒక హోటల్లో. అర్ధ రాత్రి దాటాక షట్టర్స్ వేసి లోపల లోన్ మాఫియా దర్బార్ పెట్టి, బాకీదార్లని చావగొడుతోంటే భయంకరమైన అరుపులు రోడ్డంతా విన్పించేవి. పోలీసులు చూసీ చూడనట్టు వెళ్లి పోయేవాళ్ళు. ఆప్పట్లో ఓల్డ్ సిటీలో లోన్ మాఫియానే పెచ్చరిల్లింది. ఇదేం లేకుండా ఓ బార్ సెట్ వేసి ముచ్చట్లు చూపించారు. 

సాంస్కృతిక నేపధ్యం లేదా?

      ఇంతకీ ఫలక్ నుమా సంస్కృతి ఏమిటి? హైదరాబాద్ హిందూ ముస్లిం సంస్కృతి, బిర్యానీ సంస్కృతి.  మలయాళంలో ఆ క్రైస్తవ సంస్కృతి, పోర్క్ ప్రశస్తి ఆ ఇండీ ఫిలింకి ఆత్మలా వుంటాయి. బ్యాక్ డ్రాప్ లో ఈ సోల్ ని బలంగా ఫీలయ్యేట్టు చేశాడు దర్శకుడు. ఇందుకే ఈ బలహీన కథ కూర్చోబెట్ట గల్గింది ప్రేక్షకుల్ని. తెలుగులో ఇలా లేదు. హిందూ ముస్లిం సంస్కృతి, బిర్యానీ ప్రశస్తి ఎక్కడా ఎస్టాబ్లిష్ కాకుండా, గ్యాంగ్ వార్స్ తో ఈ మటన్ కథ కమర్షియల్ పంథాలో పైపైన వుండిపోయింది. 

          ఐతే అంగమలై పోర్క్ వ్యాపారానికి ప్రసిద్ది. దీన్ని మొదటి సారిగా ప్రపంచ దృష్టికి తెస్తూ దీని నేపధ్యంలో కథ నడిపాడు దర్శకుడు. దీంతో కథే కొత్తగా మారిపోయింది. హైదరాబాద్ బిర్యానీతో  ఈ నావెల్టీ లేదు. హైదరాబాద్ బిర్యానీకి ప్రసిద్ధి అని ఎప్పుడో తెలిసిన పాత మాటే. ఇంకా కొత్తగా చెప్పడానికీ, చూపించడానికీ ఏమీ వుండదు. కాబట్టి బిర్యానీ చుట్టూ కథగా మార్చి చూపించినా ఇక వర్కౌట్ కాదు. ఏం చేయాలో అర్ధం గాక మటన్ కొట్టు పెట్టారు. అంగమలై లో పోర్కే ప్రధాన వ్యాపారం కాబట్టి ఆ వ్యాపారంలోకి హీరో వెళ్ళడం సహజ ప్రక్రియ. ఫలక్ నుమా లో ఏ సహజ ప్రక్రియ హీరోని మటన్ వైపు లాగింది? అంగమలై హీరో చిన్నప్పట్నుంచీ సీమ పందుల్నీ, పోర్క్ దుకాణాల్నీ చూస్తూ పెరిగాడు. ఇంట్లో అదే తిన్నాడు. చిన్నప్పుడు హీరో ఇంట్లో మదర్ పోర్క్ వండుతూంటేనే సీను ఓపెనవుతుంది. అదే వడ్డిస్తుంది. ఫలక్ నుమా హీరోకి ఇవన్నీ ఎక్కడున్నాయి మటన్ వ్యాపారమనే సహజ ఐడియా రావడానికి. ఎక్కడో మూసీ దగ్గర జియా గూడలో గొర్రెల కబేళాలో గొర్రెలు కొని తెచ్చుకుని మటన్ కొట్టే అనుభవమెక్కడిది? ఇదంతా కమర్షియల్ సినిమా చిత్రణ కింద మారిపోయింది లాజిక్ లేకుండా.  

          ‘అంగమలై డైరీస్’ ని ఉద్దేశ పూర్వకంగానే తెలుగు ప్రేక్షకులకోసం మాస్ కమర్షియల్ గా మార్చి వుంటే అదీ వర్కౌట్ అవదు. ఇందులో వున్న బలహీన కంటెంట్, ఇండీ ఫిలింకి సూటయ్యేదే గానీ కమర్షియల్ సినిమా స్థాయికి కాదు. దర్శకుడు విశ్వక్సేన్ ఇంకేదో తనకి తెలిసిన నేటివిటీతో తనదైన సెన్సిబుల్ ఇండీ ఫిలిం తీయాల్సింది, లేదంటే ఇంకో కథతో నేటివిటీ లేని మాస్ తీసుకోవాల్సింది. ‘అంగమలై డైరీస్’ తో బ్యాడ్ జడ్జిమెంట్. 

―సికిందర్
telugurajyam.com

834 : స్క్రీన్ ప్లే సంగతులు

     చివరికి మంగళ సూత్రంతో కూడా ట్విస్టులు. ఫస్ట్ ఫ్లాష్ బ్యాక్ తో అమ్మ మంగళ సూత్రమని చెప్పి, సెకండ్ ఫ్లాష్ బ్యాక్ తో మేనత్త మంగళ సూత్రమని ట్విస్ట్ ఇచ్చారు. కథనంలో తర్వాత వచ్చే ఫ్లాష్ బ్యాకుల్ని దృష్టిలో పెట్టుకుని కథనాన్ని వివరించు కుంటున్నప్పుడు, ఆ ఫ్లాష్ బ్యాకుల్లో కొన్ని పాయింట్స్ కథనంతో మ్యచ్ కావడంలేదని గమనించాం. మంగళ సూత్రం మిస్ మ్యాచ్ కూడా వున్న విషయం ముందే తెలిసినప్పటికీ, దీన్ని కూడా కలిపి వివరిస్తూ పోతే హెవీ అవుతుందనీ, విశ్లేషణ కన్ఫ్యూజింగ్ గా  వుంటుందని, ఆపి చివర్లో చెపుదామని అనుకున్నాం. ఇంకోటేమిటంటే ఫ్లాష్ బ్యాకుల్లో మిగతా పాయింటుల్లాగా ఇది కూడా కేవలం ఒక పాయింటు కాదు. ప్లాట్ డివైస్. కథలో ప్రాధాన్యమున్న మంగళ సూత్రం, ప్లాట్ పాయింట్ వన్ నుంచీ ప్లాట్ డివైస్ గా ప్లే అవుతూ పోయింది. సీత దాంతోనే భూటాన్ పోయింది. దాంతోనే పెళ్లి నాటక మాడింది. దాంతోనే ఇంకేదో చేసింది... అమ్మ మంగళ సూత్రానికి మేనత్త మంగళ సూత్రమని ట్విస్టిచ్చాక, అమ్మ మంగళ సూత్రమేమైనట్టు? దీనికి ట్విస్టు కుదర్లేదేమో గానీ, మేనత్త మంగళ సూత్రానికింకో ట్విస్టిచ్చారు. ముగింపులో ఈ లక్షల విలువైన  మంగళ సూత్రం కూడా వుండదు, పసుపు తాడు కడతాడు! శవ్వ! శవ్వ! (కోట శ్రీనివాస రావు).
         గత వ్యాసం ప్లాట్ పాయింట్ టూ వరకూ వచ్చాం. దీని గురించి చూద్దాం. లాయర్ సీతకి రెండో ఫ్లాష్ బ్యాక్ తో వాస్తవాలు చెప్పాక, సీత రియాక్షన్ తో ప్లాట్ పాయింట్ టూ ఏర్పడింది. మేనత్త  ఇచ్చిన వంద గ్రాముల బంగారానికి వడ్డీ కట్టి చెప్తే ఇచ్చి పారేస్తానంది ఇప్పుడు కూడా అదే తల పొగరుతో సీత. కానీ ఇప్పుడు మంగళ సూత్రం మేనత్తదని లాయర్ చెప్పాక, ఆ మంగళ సూత్రాన్ని కూడా వాపసు చేయాలి నిజానికి సీత. అలా చేయదు. ఇక - మా అమ్మదని  చెప్పి ఇప్పుడు మనత్తదని అంటావేంటి? -  అని కూడా లాయర్ని ప్రశ్నించదు.  

        ‘మీ అమ్మగారైన శ్రీమతి స్వరాజ్యం గారు సుమంగళిగా స్వర్గస్థులైన కారణంగా, హిందూ సాంప్రదాయం ప్రకారం, ఆవిడ మంగళ సూత్రం కూతురికి గానీ కోడలికి గానీ చెందుతుంది. నువ్వు వారికి ఒక్కగానొక్క సంతానం గాబట్టి, ఆ మంగళ సూత్రాన్ని నీకు రాశారు’ అని అప్పుడు సీత తండ్రి రాసిన వీలునామా చదివాడు లాయర్ ప్లాట్ పాయింట్ వన్ సీనులో. ఇప్పుడు ప్లాట్ పాయింట్ టూ సీనులో -  మీ అమ్మది కాదు, మేనత్తదని అంటున్నాడు...

        దీన్నెలా అర్ధం జేసుకోవాలి. అమ్మదని వీలునామా చదివిన లాయరే ఇప్పుడు మేనత్తదని ఎలా అంటున్నాడు. మేనత్త మంగళ సూత్రం గురించే తండ్రి అలా రాశాడా? మరి అమ్మ మంగళ సూత్రమేమైంది? మేనత్త మంగళ సూత్రమైతే అమ్మదని ఎలా రాశాడు. మేనత్త మంగళ సూత్రమైతే తన కూతురికి చెందాలని తనెలా రాస్తాడు. తన చెల్లెలు (సీత మేనత్త) వల్ల కలసివచ్చిన సంపదకి మేనల్లుడ్నే వారసుడిగా తను నిర్ణయించాక, ఆ సంపద  పుట్టడానికి మూలమైన చెల్లెలి మంగళ సూత్రాన్ని కూడా మేనల్లుడికే రాయాలి. ఎవరి కిచ్చుకుంటాడో ఇచ్చుకుంటాడు మేనల్లుడు. తనెవరు కూతురికి రాయడానికి? పైగా చెల్లెలు ఇంకా చాలా బంగారం వొలిచి ఇచ్చింది. అదేమైంది? ఇకపోతే, కూతురు మేనల్లుడ్ని చేసుకుంటేనే అతడికి చెందుతున్న 5 వేల కోట్ల ఆస్తికి అర్హురాలవుతుందని తనెలా రాస్తాడు. స్వార్ధం కాదా? చెల్లెలి వల్ల కలిగిన సంపదని ముట్టుకోలేదని అంత నిస్వార్ధంగా చెప్పిన తను, మేనేజర్ గా భావించుకుని బతికిన తను- కూతురికి మేనల్లుడితో పెళ్లి లింకు పెట్టి ఆ సంపదతో స్వార్ధానికి పోవడం లేదా? ఇదేం గొప్ప తండ్రి పాత్ర? అసలు గందరగోళంగా వున్న వీలునామా వ్యవహారం దృష్ట్యా, ఏం గోల్ మాల్ చేశాడో విచారణ జరిపించాలి. అమ్మ మంగళ సూత్రం, మేనత్తిచ్చిన ఇంకా బంగారం ఏమయ్యాయి? చాలా గూడుపుఠానీ వుంది. 

        ఇదే ఫ్లాష్ బ్యాక్ సీనులో, చెల్లెలి సంపద మనం అనుభవించడానికి వీల్లేదని భార్య వొంటి మీది నగలు తీసేసుకుంటాడు ఇదే సీత తండ్రి. ఆ భార్య కోపంతో కూతురి వొంటిమీది నగలు కూడా తీసేయబోతూంటే -  మేనల్లుడ్ని చూపించి, కూతురు మేనల్లుడికి చెందుతుందని, కాబట్టి మేనల్లుడికి చెందింది కూతురికీ చెందుతుందనీ అనేస్తాడు! అంటే అప్పట్నించే చెల్లెలి సంపదతో స్వార్ధానికి పోయాడన్నమాట? నీ కూతురు నా కొడుకుని చేసుకోవాలని చెల్లెలేమీ మాట తీసుకోలేదే? 

      మరొక విషయమేమిటంటే, ఈ ఫ్లాష్ బ్యాక్ సీనంతా సీత వుండగానే, ఆమె సాక్షిగానే జరుగుతుంది. తండ్రి ఏమంటున్నాడో, తల్లి ఏమంటున్నదో అక్కడే వుండి వింటూంటుంది. ఆమే ఆ ఫ్లాష్ బ్యాక్ సీన్లో వున్నాక, ఇక లాయర్ ఈ ఫ్లాష్ చెప్పే అవసరమే లేదు. ‘నీకంతా తెల్సు, ఒకసారి గుర్తు చేసుకోమ్మా’ అంటే ఆమె పాయింటాఫ్ వ్యూలో ఈ ఫ్లాష్ బ్యాక్ రన్ అవడం న్యాయం. గతాన్ని ఆమే గుర్తు చేసుకుంటే -ఎక్కడో కలుక్కు మని, ఆమెలో మార్పు రావడానికి ఈ ఫ్లాష్ బ్యాక్ దోహద పడేది. అప్పుడు ప్లాట్ పాయింట్ టూ కి న్యాయం జరిగేది. లాయర్ పాయింటాఫ్ వ్యూలో కాక, సీత పాయింటాఫ్ వ్యూలో వుండాల్సిన ఫ్లాష్ బ్యాక్ ఇది. 

        ఇంకోటేమిటంటే, ఈ ఫ్లాష్ బ్యాక్ లో వుంటూ అంతా చూస్తూ, వింటూ వున్న సీతకి - పెద్దయాక ప్రదర్శిస్తున్న బుద్ధులు వచ్చే అవకాశమే లేదు. ఇది వీడి పెళ్ళాం, వీడి బంగారం వేసుకునే హక్కు దీనికుంది- అని తండ్రి అంత స్పష్టంగా అనేశాక ఇంకేం కావాలి పిచ్చి పిల్లకి. అసలు పిల్లల ముందు ఈ విషయాలు మాట్లాడడం నాన్సెన్స్. ప్రేక్షకులకి తెలియడం కోసం మాట్లాడుతున్నాడు. ప్రేక్షకులకి తెలియడం కోసం మాట్లడడానికి బెటర్ ఆప్షన్స్ వున్నాయి. 

        సీత నుంచి రామ్ విడిపోయి భూటాన్ వెళ్ళిపోయి ఇరవై ఏళ్లయింది. ఆస్తి అతనిదే నని చిన్నప్పుడే సీతకి తెలుసు. పెళ్లి చేసుకోవడానికి పేచీ ఏమిటో అర్ధంగాదు. ఇక సీత తల్లి, రామ్ ని చిత్రహింసలు పెట్టడం గురించి...ఆస్తికి వీడు వారసుడు, వీడికి మన కూతురు పెళ్ళాం -  అని భర్త చెప్పాక వాణ్ణి కాల్చి వాతలు పెట్టడమేమిటి? అనుభవిస్తున్న ఆస్తి వాడిదని తెలిసినందుకా? రేపు కూతురు అనుభవించ కూడదా? బికారికిచ్చి చేస్తుందా?

        పాత్రతో కథ గాక, కథతో పాత్రని ఆలోచిస్తే ఇలాగే వుంటుంది. కథతో పాత్రని ఆలోచిస్తే ఇతర మాధ్యమాల్లో చెల్ల వచ్చు. కానీ కథతో పాత్రని సినిమాకి ఆలోచిస్తే కోట్లు మునుగుతాయి. సినిమాకి ఎట్టి పరిస్థితిలో పాత్రతో కథని ఆలోచించాల్సిందే. ఈ కథతో పాత్ర విధానమే సీత పాత్రని చాలా డ్యామేజీ చేస్తూ వచ్చింది మొదట్నించీ. ఈ ఫ్లాష్ బ్యాక్ తెలిశాక కూడా సీతలో మార్పు రాదు. చనిపోయిన మేనత్త పట్ల ఏ మాత్రం కనికరం వుండదు. వంద గ్రాముల బంగారమని మాట్లాడుతుంది. పాత్రలో మార్పు తేవడం కోసం గాకపోతే కథలో ఫ్లాష్ బ్యాక్ ఎందుకుంటుంది? అదీ ప్లాట్ పాయింట్ టూ అనే కథకి రెండో మూలస్థంభమయిన మలుపు దగ్గర? ప్లాట్ పాయింట్ టూ అంటేనే పాత్రకి రియలైజేషన్ ఘట్టం కాదా? రియలైజ్ అయి, ఆ రియలైజేషన్ లోంచి తనకి పరిష్కార మార్గం గోచరమై, కథని ముగించడానికి ముందుకి  తీసికెళ్ళడం కాదా? ఇలా వుండవా కథలు? 

        ఇక సీత పాత్ర కథకుడి చేతిలో పూర్తిగా పతనమై సర్వనాశనమవడానికి - శవ్వ! శవ్వ! అన్పించడానికి - ఈ ప్లాట్ పాయింట్ టూ సీను లోంచి ఆమె బయటికి ఒకటే పరుగు తీయడంతో బీజం పడుతుంది...ఆ పరుగు కథకి ఫైనల్ మరణ శాసనం రాసేసింది... 

     ఎండ్ విభాగం కథనం :  వాళ్ళమ్మ ఇచ్చిన వంద గ్రాముల బంగారానికి వడ్డీ కట్టి చెప్పండి, ఇచ్చి పారేస్తాను -  అన్న తర్వాత, రూప వచ్చి చెప్తుంది, అవతల రామ్ నెవరో కొడుతున్నారని. వెంటనే కంగారుగా పరుగు దీస్తుంది సీత. రామ్ ని చంపాలన్న ఎమ్మెల్యే ఆదేశాల మేరకు చంపే కార్యక్రమం మొదలయింది. వాళ్ళని కొట్టి ఎదుర్కోమని అరుస్తుంది. శాంతి వచనాలు పలుకుతాడు. తనే  ఫైటింగ్ కి దిగుతుంది. ఫైటింగ్ లో ప్రమాదంలో పడడంతో రామ్ కాపాడి తను మొదలెడతాడు ఫైటింగ్. ఇది చూస్తున్న ఎమ్మెల్యే రామ్  మీద కాల్పులు జరిపి లాక్కెళ్ళి పోతాడు.

        సీతని రప్పించడానికి గాయపడిన రామ్ ని తన ఇంట్లో పడేసి కూర్చుంటాడు. అనుకున్నట్టుగానే వచ్చేస్తుంది సీత. ట్విస్ట్. రామ్ పరిస్థితికి చలించి వెంటనే హాస్పిటల్ కి తీసికెళ్ళాలని ఒకటే బతిలాడుకుంటుంది. ముందు తనతో పడుకోవాలంటాడు. పడుకుంటుంది. ట్విస్ట్. రామ్ లేచి ఎమ్మెల్యేని తన్ని  సీతతో పారిపోతాడు. ట్విస్ట్. పారిపోతూ సీత రాం కి సరెండర్ అయిపోతుంది. ఏడ్చేస్తూ మనం ఒకటవుదామంటుంది. ట్విస్ట్.   

        కారులో పారిపోతున్న వాళ్ళని వెనక నుంచి వచ్చి డాష్ ఇస్తాడు ఎమ్మెల్యే. ట్విస్ట్. పెద్ద ప్రమాదం జరిగి తలో దిక్కు పడతారు. భూటాన్ సన్యాసులు రామ్ నెత్తుకెళ్ళి పోతారు. ట్విస్ట్. కళ్ళు తెర్చి విషయం తెలుసుకున్న సీత భూటాన్ వెళ్ళిపోతుంది. ట్విస్ట్. అక్కడ రామ్ ఫోటోకి దండ వేసి వుంటుంది. ట్విస్ట్. చనిపోయాడని అంటాడు గురువు. ఏడుస్తూ వెళ్ళిపోతుంది. ట్విస్ట్. బయట వున్న రామ్ వచ్చేస్తూంటే ఫోటోకి దండ తీసేస్తారు సన్యాసులు. ట్విస్ట్. రామ్ మానసిక శక్తులకి సీత వచ్చినట్టు తెలుస్తుంది. ట్విస్ట్. ఆమెని కలవాలని మారాం చేస్తాడు. వదిలేస్తారు. సీత కోసం పరుగెత్తడం మొదలెడతాడు రామ్. కారులో వెళ్ళిపోతున్న సీత మానసిక శక్తులకి రామ్ బతికే వున్నాడని తెలుస్తుంది. ట్విస్ట్. పరుగెత్తుకొస్తున్న రామ్ ని చూసి కారు దిగి వాటేసుకుంటుంది. పసుపు తాడు కట్టేస్తాడు. ట్విస్ట్.

        ఎమ్మెల్యే వచ్చేసి అగ్రిమెంట్ చూపిస్తాడు. ట్విస్ట్. అగ్రిమెంట్ ని పాటించాలి కదాని సీతని ఇచ్చేస్తాడు రామ్. ట్విస్ట్. సీతని ఎమ్మెల్యే కారులో తీసుకుపోతూంటే, రామ్ వచ్చేసి వీల్లేదంటాడు. ట్విస్ట్. ఆమె నా భార్య కదా అంటాడు. ఎమ్మెల్యేని లాగి ఎటాక్ చేస్తాడు. ఎమ్మెల్యేకి గుండు తగుల్తుంది. చూస్తే ఆ గుండు పేల్చింది మండోదరి, అంటే ఎమ్మెల్యే భార్య. ట్విస్ట్. ట్విస్ట్. ట్విస్టుల మీద ట్విస్టులు. ఆరగంట సేపు సాగే ఈ ముగింపులో కూడా  ట్విస్టులాష్టమి.  

        “చిమ్మ చీకటిని తరిమి కొట్టడానికి ఒక చిన్న దీపమైనా కావాలి
        చెడు నిండిన లోకం ప్రక్షాళన కోసం ఒక్క మంచి వాడైనా కావాలి”
        - అన్న కొటేషనుతో సుఖాంతం!

       క్లయిమాక్స్ కుదరడం లేదంటే దాని లోపం ప్లాట్ పాయింట్ వన్ లో వున్నట్టని సామాన్య సూత్రం. ప్లాట్ పాయింట్ వన్ లో ఏం లోపం జరిగిందో దాన్ని మరమ్మత్తు చేస్తే క్లయిమాక్స్ సరిగ్గా కుదురుతుంది. ప్లాట్ పాయింట్ వన్ ఎంత ఫేక్ గా వుందో చూశాం. దాని ఎఫెక్ట్ ఇప్పుడు కథ అనుభవిస్తోంది. కథని ఎలా ముగించాలో అర్ధంగానట్టు ట్విస్టుల మీద ట్విస్టులు. ఈ అరగంట ఎండ్ విభాగంలో ఆరుసార్లు ముగిస్తూ మళ్ళీ ట్విస్టు లిచ్చి పొడిగించుకుంటూ పోయారు. లాజిక్ గీజిక్ మంట గలిసి,  సహనానికి పరీక్ష మొదలై పోయింది ఈ ముగింపుతో. కథ పట్టుకు ప్రయాణిస్తే కుక్క తోకట్టుకుని గోదారీది నట్టే. పాత్రని పట్టుకుని ప్రయాణిస్తే నక్క తోక తొక్కి వచ్చినట్టే. 

        ఇంతకీ సీత ప్లాట్ పాయింట్ టూలో ఫ్లాష్ బ్యాక్ తెలిసింతర్వాత, తనలో ఏ మార్పూ ప్రదర్శించక, రామ్ ని కొడుతున్నారని తెలియగానే ఎందుకు పరుగెత్తుకుని పోయినట్టు? రామ్ ని కొడుతూంటే అది చూసి ఆమెలో మార్పు వచ్చినట్టు చిత్రించారు. ఆమెలో మార్పు తేవడానికి ఈ సంఘటనా? అదీ ప్లాట్ పాయింట్ టూ తర్వాత? ఫ్లాష్ బ్యాక్ కే ఏ మానవత్వమూ మేల్కొనని ఆమె, రామ్ కొడుతూంటే మారిపోతుందా? మారిపోతే, మూలంలో మారాల్సిన విషయంలో- తండ్రితో, మేనత్తతో- ఇన్నర్ గా మారకుండా, ఇలా ఔటర్ గా మారిపోతే చాలా? ఔటర్ గా మారడమంటే ఆస్తి కోసమేనా? రామ్ ని కొట్టి చంపేస్తే, వాడితో పెళ్ళీ, దాంతో ఆస్తీ వుండవని అలా పరిగెట్టిందా? మరెందుకు పరిగెట్టింది?

        ఆమె ఈ పరుగు పాత్ర పతనానికీ, సర్వ నాశనానికీ దారి తీశాయి. ఫ్లాష్ బ్యాక్ తో మార్పు వచ్చి పరుగెత్తి వుంటే వేరే అర్ధాలు వచ్చేవి కావు. ఇందుకే ప్లాట్ పాయింట్ టూలో పాత్ర మారాలానేది. మారకుండా పరుగెత్తితే ఇలాగే ఆస్తి పోతోందన్న ఆదుర్దా కొద్దీ పరుగెట్టిందన్న అర్ధం వస్తుంది! వాడెలా పోతే నాకెందుకని గత సీన్లలో అన్న తనే, ఇప్పుడు వాడికోసం పరుగెడుతోందంటే ఇంకెందుకు? ప్రేమ పెంచుకుందనా? 

        ఇక సీత పాత్ర లేదు. చచ్చిపోయింది. ఇక్కడ్నించీ ఏం చూపించినా చూడనవసరం లేదు. ఇన్నర్ గా మారకుండా ఇప్పుడు ఔటర్ గా రామ్ గురించి మార్పు ప్రదర్శిస్తోందంటే, ఇది కూడా నిజం కాదు. ఆస్తి కోసం నటన! 

        ఇక్కడ ఇంకో గమ్మత్తు వుంది. ఎమ్మెల్యే రామ్ ని గాయపర్చి తీసి కెళ్ళిపోయాక, ఎమ్మెల్యేతో ఆ పూట సహజీవనానికి లొంగిపోయింది!! రామ్ లేచి అది జరక్కుండా చూశాడు, వేరే సంగతి. కానీ లొంగింది ఎమ్మెల్యే బెదిరింపులకి. అప్పుడు రామ్ నెలా పెళ్ళిచేసుకోవాలనుకుంది? ఆస్తి ఎలా వస్తుందనుకుంది? అవన్నీ వదులుకుంటూ బలి పీఠం ఎక్కిందా తన పాపాలకి? లేక జాలి పడి  రామే పెళ్లి చేసుకుంటాడనుకుందా? అంత దిగజారిందా? ఈ సన్నివేశం లో ఆమె ఎమోషనల్ మజిలీ, లేదా మానసిక స్థితి ఏమిటి? మానసిక స్థితిని వివరించని సన్నివేశ మెలా వుంటుంది? సన్నివేశాన్ని పాత్ర మీద రుద్దడమేనా?
        ఈ సీతకి వేరే రావణుడెవరూ లేరు, వున్నది ఒక్కడే కథకుడు!

        “చిమ్మ చీకటిని తరిమి కొట్టడానికి ఒక చిన్న దీపమైనా కావాలి
         చెడు నిండిన లోకం ప్రక్షాళన కోసం ఒక్క మంచి వాడైనా కావాలి”... ఏ చిమ్మ చీకటి? ఎవరా మంచోడు? 

(అయిపోయింది)

―సికిందర్ 

833 : స్క్రీన్ ప్లే సంగతులు

     ఇంటర్వెల్ లో సీతా విజయం చూశాం. గుళ్ళో పెళ్లి చేసుకుంటానని రామ్ ని మాయ చేసి సంతకం పెట్టించుకుని వెళ్ళిపోవడం చూశాం. అయితే ఇది తాత్కాలిక విజయమేనని వూహించగలం. సెకండాఫ్ లో మళ్ళీ ఏవో అడ్డంకులొస్తాయని కూడా వూహించగలం. కానీ సీత ఇది తన పూర్తి విజయమని తనే ఫీలవుతోంది. అందువల్ల ఇది సీత తనకై తాను ఫీలవుతున్న ఇంటర్వెల్ బ్యాంగే తప్ప, ఆమె ప్రేక్షకుల కిచ్చిన ఇంటర్వెల్ బ్యాంగ్ ఏమీ కాదు. ఆమెకి రివర్స్ అయితే అది ప్రేక్షకులు కనెక్ట్ అయ్యే ఇంటర్వెల్ బ్యాంగ్ అయ్యే అవకాశముంది. పాత్రకి రివర్స్ అవడమే సరైన ఇంటర్వెల్ అంటాడు సిడ్ ఫీల్డ్. లేదా పాత్ర దాని ప్రయాణంలో కొత్త విషయమేదో కనుగొనడం మంచి ఇంటర్వెల్ అంటాడు. ఇక ఫస్టాఫ్ ప్లాట్ పాయింట్ వన్ దగ్గర పాత్ర ఏం గోల్ పెట్టుకుందో, సెకండాఫ్ ప్లాట్ పాయింట్ టూలో ఆ గోల్ వల్ల ఏం నేర్చుకుందో తెలిస్తే తప్ప ఇంటర్వెల్ ని వూహించలేమంటాడు స్టోరీ ఎనలిస్టు కరెల్ సెగర్స్ కూడా. ప్లాట్ పాయింట్ వన్, ప్లాట్ పాయింట్ టూ రెండిటినీ కలిపి వుంచే హుక్ లాంటిది ఇంటర్వెల్ అని కూడా అంటాడు సిడ్ ఫీల్డ్...

         సీత ప్లాట్ పాయింట్ వన్ లో ఐదువేల కోట్ల రామ్ ఆస్తికి స్కెచ్ వేసిందని తెలిసిందే. ఇక సెకండాఫ్ లో ప్లాట్ పాయింట్ టూ దగ్గర, రాబోయే రామ్ ఫ్లాష్ బ్యాక్ ద్వారా, ఆమెలో పరివర్తన ఏమీ రాలేదని తెలుసుకోబోతున్నాం. 

       అంటే ఆమె ప్లాట్ పాయింట్ వన్ దగ్గరి తన స్కెచ్ ఎంత తప్పో, ప్లాట్ పాయింట్ టూ లో ఫ్లాష్ బ్యాక్ ద్వారా నిజాలు తెలిసినా తెలుసుకోవడం లేదన్న మాట.  పైగా ఇదే తలపొగరుతో - వాళ్ళమ్మ ఇచ్చిన వంద గ్రాముల బంగారానికి వడ్డీ కట్టి చెప్పండి, ఇచ్చి పారేస్తాను - అంటుంది. 

        ప్లాట్ పాయింట్ వన్ దగ్గర ఆమె నెగెటివ్ వైఖరి, ప్లాట్ పాయింట్ టూ దగ్గర పాజిటివ్ వైఖరిగా మారనప్పుడు కథకీ పాత్రకీ అర్ధం వుంటుందా? అందుకని అర్ధవంతమైన కథకోసం, పాత్రకోసం, ప్లాట్ పాయింట్ టూ దగ్గర ఆమె వైఖరిని పాజిటివ్ గా మారిస్తే-    

       అప్పుడు ప్లాట్ పాయింట్ వన్ దగ్గర నెగెటివ్ వైఖరికీ, ప్లాట్ పాయింట్ టూ దగ్గర  ఆమె పాజిటివ్ వైఖరికీ నడుమ  వచ్చే ఇంటర్వెల్లో, ఆమెని అరెస్ట్ చేయడం ఒక ఆప్షన్. 

        ఇలా ఆమెకి రివర్స్ అవడమే సరైన ఇంటర్వెల్. పోలీసులు వస్తున్నారని బుకాయించి ఏడ్చి, రామ్ చేత సంతకం పెట్టించుకుంటే - ఆ బుకాయింపే నిజమై పోలీసులు వూడి పడడం ఇంటర్వెల్ కి బలం. ఇంటర్వెల్ తర్వాతి సీన్లో బ్యాంకులో జరిగేదిదే. ఇంటర్వెల్లో అన్ని స్క్రిప్టింగ్ అవసరాల్ని తీరుస్తూ జరగాల్సిన అరెస్టుని, ఇంటర్వెల్ తర్వాత బ్యాంకు సీన్లో పెట్టుకున్నారు. బ్యాంకు సీను బాగాలేదు.

     మిడిల్ -2 కథనం : గుడి దగ్గర రౌడీలు మంగళ సూత్రం కోసం రామ్ ని ఇంకా కొడుతూంటారు. ప్లీజ్ నేను పెళ్లి చేసుకోవాలి వదలండని ఏడుస్తూంటాడు. అటు సీత డ్రెస్ మార్చుకుంటూ వాడెలా పోతే నాకెందుకని బ్యాంకు కెళ్తుంది. బ్యాంకు మేనేజర్ - మీ డాక్యుమెంట్స్ అన్నీ క్లియర్ గా వున్నాయి, ఆ డబ్బు ట్రాన్స్ ఫర్ చేసేస్తానంటాడు. పేరడుగుతాడు. ఎన్నిసార్లు చెప్పాలని పేరు చెప్తుంది. ఐడీ కార్డు తీసుకుని చూసి, పి. సీతా మహాలక్ష్మి కాదు, ఎం. సీతామహా లక్ష్మి అని వుంటే ఎమౌంటు ట్రాన్స్ ఫర్ చేయాలని మీ ఫాదర్ వీలునామా రాశారంటాడు. మధురవాడ సీతామహా లక్ష్మి, వైఫాఫ్ మధురవాడ సీతా  మహా లక్ష్మి అని వుండాలంటాడు. దీంతో అతడి మీద అరిచి గొడవ చేస్తూంటే, ఎమ్మెల్యే ఇచ్చిన సమాచారంతో  పోలీసులు వచ్చి అరెస్టు చేస్తారు. 

        పోలీస్ స్టేషన్లో రామ్ వచ్చి పోలీసు చట్టాలు వల్లెవేసి ఫైట్ చేసి సీతని విడిపించుకు వెళ్తాడు. రామ్ కి దెబ్బలు తగిలాయి మందు పూయమని రూప అంటే వాడు నన్ను ఇంప్రెస్ చేసి పెళ్లి చేసుకోవాలనుకుంటున్నాడని కసురుతుంది. సీత కో అసిస్టెంట్ వుంటాడు. రిజిస్టర్డ్ మ్యరేజికి ఏర్పాట్లు చేయమని అతడికి చెప్తుంది. ఆ సర్టి ఫికేట్ బ్యాంకులో చూపించి డబ్బు ట్రాన్స్ ఫర్ చేయించుకుంటానంటుంది. సీఐ పట్టుకోవడానికొస్తే పారిపోతుంది. పరారీలో వుంటూ బెయిల్ కోసం అప్లై చేస్తుంది. ఈ విషయం తెలుసుకున్న ఎమ్మెల్యే ఆమె కోర్టు కెళ్ళకుండా పట్టుకోమంటాడు. అప్పటికే ఆమె కోర్టులో వుంటుంది. ఎమ్మెల్యే తన లాయర్ని పంపించి సీత లాయర్ని బెదిరిస్తే సీత లాయర్ తప్పుకుంటాడు. ఇంకే లాయర్ ఒప్పుకోడు. రామ్ ముందుకొస్తాడు వాదించడానికి. పదిన్నర అవడంతో తీ కావాలని మారాం చేయడంతో అభాసు అవుతుంది. సీత అతణ్ణి బహిరంగంగా బాగా దూషిస్తుంది. వేరే లాయర్ వాదించి జడ్జి వేసిన రెండేళ్ళ శిక్షని ఏడాదికి తగ్గిస్తానంటుంది. ఇంతలో రామ్ వచ్చేసి - నెగోషియబుల్ ఇన్ స్ట్రుమెంట్ యాక్ట్ 1881 సెక్షన్ 130 ని ప్రస్తావించి వాదిస్తాడు. జడ్జి అరెస్టు వారెంట్ చెల్లదని కేసు కొట్టేస్తాడు. 

        ఇక రామ్ ని చంపమని ఆదేశిస్తాడు ఎమ్మెల్యే. ఇది భూటాన్ లో మతగురువు సిక్స్త్ సెన్స్ కి అంది, రామ్ ని కాపాడమని ఇద్దరు శిష్యుల్ని పంపిస్తాడు. రామ్ మీద ఎటాక్ జరుగుతూంటే, కేసు గెలిచిన రామ్ ని చూడాలని సీత దగ్గరికి వస్తాడు ఆమె తండ్రి లాయర్. ఆమె పెడసరంగా మాట్లాడుతూంటే ఫ్లాష్ బ్యాక్ చెప్తాడు - 

        ఫ్లాష్ బ్యాక్ : సీత తండ్రి భాగ్యరాజ్ వ్యాపారంలో పెట్టుబడి తగ్గిందని భార్యని నగలు అడుగుతాడు. ఇవ్వనంటుంది. భాగ్యరాజ్ చెల్లెలు ముందుకొచ్చి మంగళ సూత్రం సహా నగలన్నీ ఇచ్చేస్తుంది. ప్రమాదంలో భర్తతోబాటు చనిపోతుంది. మేనల్లుడు రామ్ ని తెచ్చుకుని పెంచుకుంటాడు భాగ్యరాజ్. వ్యాపారంలో బాగా కలిసి వచ్చి సంపన్నుడవుతాడు. భార్య జల్సాలు చేస్తూంటే వారిస్తాడు. ఈ సంపద ఆనాడు సాయపడ్డ తన చెల్లెలిదనీ, ఆమె వారసుడు రామ్ కే చెందుతుందనీ, తను కేవలం మేనేజర్ననీ, ‘కాబట్టి నువ్వు జీతగాడి భార్యవే’ ననీ చెప్పేస్తాడు. కోపంతో ఆమె సీత ఒంటి మీది నగలు లాగేస్తూంటే, రామ్ కి కాబోయే భార్యగా ఆమె అర్హురాలు అంటాడు. దీంతో రామ్ మీద కక్ష పెంచుకున్న భార్య, చిత్ర హింసలు పెడుతుంది. దీంతో రామ్ ని భూటాన్ మఠంలో చేర్పించేశాడు భాగ్యరాజ్ ...ఫ్లాష్ బ్యాక్ ఓవర్. 

        ఇది విని సీత నిర్లక్ష్యంగా - వాళ్ళమ్మ ఇచ్చిన వంద గ్రాముల బంగారానికి వడ్డీ కట్టి చెప్పండి, ఇచ్చి పారేస్తాను - అంటుంది. ప్లాట్ పాయింట్ టూ.

      ఈ మిడిల్ టూ కథనంలోనూ రోమాంటిక్స్ లేదు. కేవలం ఎకనమిక్స్ తో డ్రైగా సాగుతుంది. ఎకనామిక్స్ కూడా ఎలా వుందో చూస్తున్నదే. ఆమె బ్యాంకు సీను ఎంత లాజిక్ ని వదిలేద్దామనుకున్నా, సినిమాటిక్ లిబర్టీ కింద ఎంత సావధానంగా చూద్దామన్నా కుదరడం లేదు. ఒక వైపు చెక్ బౌన్స్ కేసు వుంటే ఆమెతో ఎలా వ్యవహరించాలి. ముందుగా - మీ డాక్యుమెంట్స్ అన్నీ క్లియర్ గా వున్నాయి, డబ్బు ట్రాన్స్ ఫర్ చేస్తానన్న మేనేజర్, ఐడీ అడిగి పేరు కరెక్ట్ గా లేదనడమేమిటి. వీలునామా తో బ్యాంకుకేం సంబంధం. అసలు రామ్ ఎక్కౌంట్ ఈ బ్రాంచి లోనే వుందా. ఎప్పుడు తెరిచాడు... చాలా శోచనీయంగా వుంది సీను. 

        మళ్ళీ ఎమ్మెల్యే ట్విస్ట్ ఇవ్వడం, సీత అరెస్ట్ అవడం, పోలీస్ స్టేషన్ కి రామ్ వచ్చి, తను ఫస్టాఫ్ లో లాయర్ దగ్గర ఒక్కసారి  ‘చదివేసిన’  లా బుక్ లో చట్టాల్ని వల్లించి, పోలీసుల్ని కొట్టి, సీతని విడిపించుకోవడం...ఇదంతా యాక్షన్ పార్టు. మళ్ళీ రిజిస్టర్ మ్యారేజి ప్లానేస్తూ ఇంకో ట్విస్టు. ఆ సర్టిఫికేట్ చూపిస్తే ఎమౌంట్ ట్రాన్స్ ఫర్ అవుతుందట. ఆమె దగ్గరున్న డాక్యుమెంట్స్ వొళ్ళు మండిన అసిస్టెంట్ కాల్చెయ్య బోతే రాం వచ్చి కాపాడతాడు. కానీరాం కి ఇప్పటికీ సేత కుట్రలు తెలియవు. 

        ఇక సీతని పట్టుకోవడానికి మళ్ళీ సీఐ హడవిడి. నిజానికి చెక్ బౌన్స్ కేసులో వారెంట్ వుండగా, పోలీస్ స్టేషన్ లో పోలీసుల్ని కొట్టి పారిపోయిన కేసు కూడా పెట్టాలి సీఐ. కోర్టులో ఈ అఫిడవిట్ వేస్తే ఆమెకిక డిఫెన్స్ వుండదు. కానీ  ఆమె బెయిల్ కి వేసిందని ఎమ్మెల్యే అంటే, సీఐ బెయిల్ని అడ్డుకోవడానికి కోర్టుకి సీత వస్తే అరెస్ట్ చేద్దామనుకుంటాడు. విచిత్ర మేమిటంటే, ఏ కింది కోర్టులో ఆమె మీద చెక్ బౌన్స్ కేసుందో,  ఆ కోర్టులోనే ముందస్తు బెయిల్ అప్లికేషన్ వేయడం. ఇది చెల్లుతుందా? ముందు కోర్టుకి లొంగిపోవాలి. ఆ తర్వాత బెయిల్ కి పెట్టుకోవాలి. లొంగిపోవడం ఇష్టం లేకపోతే, హైకోర్టు నుంచి యాంటిసిపేటరీ బెయిల్ తెచ్చుకుని సేఫ్ అయిపోవాలి. 

        కానీ అదే కింది కోర్టులో జడ్జిగారు బెయిల్ అప్లికేషన్ స్వీకరించి దాని మీద కథ నడుపుతాడు. సీతకి చెక్ బౌన్స్ కేసులో ఏకంగా రెండేళ్ళు శిక్ష కూడా అప్పుడే వేసేస్తాడు. ఇక భూటాన్ రామ్ గారు వచ్చేసి అప్పుడొకే ఒక్కసారి చదివేసిన బుక్కులోంచి, లా పాయింట్లు పీకి, తన అతీత శక్తులతో ఏకే సరికి - జడ్జిగారు విపరీతంగా బాధపడిపోయి  తీర్పు మార్చుకుంటాడు. ఇక అరెస్టు లేదు గిరెస్టు లేదు పొమ్మంటాడు. మరెందుకు ఇంత  అరెస్ట్ వారెంట్ ఇచ్చి, భూటాన్ నుంచీ నాంపల్లి దాకా ఇంత కథ నడపడానికి కారకుడయ్యాడు? దర్శకుడు ఎలా చూపిస్తే అలా క్యాలిక్యులేటర్ (మెదడు) లేకుండా చూడాలన్నట్టుంది. 

        ఇక మరో ఫ్లాష్ బ్యాక్ తో ప్లాట్ పాయింట్ టూ వస్తుంది. ఈ ఫ్లాష్ బ్యాక్ లో విషయం తెలిశాక కూడా సీతలో మార్పు రాలేదంటే... స్క్రీన్ ప్లే క్షమిస్తుందా? 

―సికిందర్

832 : స్క్రీన్ ప్లే సంగతులు

    “నా పేరు సీత - నే గీసిందే గీత!” అని సీత ఊతపదం. కానీ ఎమ్మెల్యే పెట్టే ట్విస్టులకి తనే పరుగులు తీస్తూ వుంటుంది. ఇదలా వుంచితే, ప్లాట్ పాయింట్ వన్ లో సీత భూటాన్ బయల్దేరడం చూశాం. ఈ ప్లాట్ పాయింట్ వన్ లో కథని ప్రారంభించడానికి సీతకి సమకూరిన కోరిక, పణం, పరిణామాల హెచ్చరిక, ఎమోషన్ అనే నాల్గు గోల్ ఎలిమెంట్స్ ఎలా వున్నాయో చూద్దాం. ఈ దృశ్యంలో సీతకి మంగళ సూత్రం మాత్రమే దక్కి, ఐదు వేల కోట్లూ మంగళ హారతి అయిపోయాయి. తండ్రి ఈ ఆస్తిని భూటాన్ లో రామ్ అనే వాడికి రాసేశాడు. కథలో ఇంతవరకూ భాగ్యరాజ్ రామ్ కేమవుతాడో మనకి రివీల్ చేయలేదు. ఇప్పుడు సీత తల్లి మంగళ సూత్రమని సీతకి చెందేలా వీలునామా రాసి చనిపోవడం చూస్తే, సీతకి తండ్రి అవచ్చని ఒక అనుమానం వేస్తుంది. అప్పుడు రామ్ కేమవుతాడు తెలుగు సినిమా ప్రకారం మేనమామే అవుతాడు. ఇప్పుడు సీతారాములు బావామరదళ్ళే  అవుతారు సినిమా ప్రకారమే.

        ఇది ఆడియెన్స్ కి ఇంకా రివీల్ చేయకపోయినా ఈ సీన్లో సీతకీ, లాయర్ కీ తెల్సు. సీతకి ఇంకా చాలా తెల్సు. ఇంకా మనకి చూపెట్టని ఫ్లాష్ బ్యాక్ ప్రకారం, ఈ ఆస్తి ఆల్రెడీ ఎవరి పరమై వుందో ఆమెకి బాగా తెల్సు. తను ఏం చేస్తే ఆస్తిని అనుభవించగలదో కూడా స్పష్టంగా తెల్సు. బావ అయిన రామ్ ని చేసుకుంటేనే ఆస్తిని అనుభవించ గలదు. ఆ ఫ్లాష్ బ్యాక్ లో ఇదంతా తండ్రి చెప్పేశాడు. సీత సొంతంగా ఎదగడానికి యాభై కోట్లు అడిగినప్పుడు జరిగిన విషయమిది. అప్పుడు ఆస్తి మ్యాటర్ చెప్పేసి, తన సొంత డబ్బు ఏడు కోట్లూ ప్లస్ హైదరాబాద్ లో వుండడానికి ఇల్లూ ఇచ్చేసి పంపించేశాడు మాట వినని సీతని. ఏడాదికల్లా వంద కోట్లు సంపాదించి చూపిస్తానని చెప్పేసింది. 

          ఈ నేపథ్యంలో ఇప్పుడు ప్లాట్ పాయింట్ వన్ సీను చూసినప్పుడు, తండ్రి మరణ వార్త విని ఐదువేల కోట్లూ తనవే నని, దాంతో చందూలాల్ అప్పు ఐదు కోట్లూ తీర్చేస్తాననీ చెప్పి వచ్చింది. అలా ఎలా అనుకుని వస్తుంది - ఆస్తిని ఆమె పెళ్ళితో లింకు పెట్టి తండ్రి చెప్పేశాక? ఆస్తి రామ్ దని తెలిశాక? అసలు తండ్రి ఇచ్చిన ఇల్లే అమ్మేసి చందూలాల్ అప్పు తీర్చేయవచ్చుగా? 

          ఇంకా రివీల్ చేయని ఈ ఫ్లాష్ బ్యాక్ నేపధ్యంలో, విషయాలన్నీ తెలిసిన సీత, తండ్రి అంత్యక్రియలు పూర్తిచేసి, తండ్రి కిచ్చిన మాట గుర్తుచేసుకుని దండం పెట్టుకోవాలి (ఆమెకి  డబ్బే కావాలి, ఇలా చెయ్యదంటే కుదరదు. పాత్రకి అప్ అండ్ డౌన్స్ వుంటాయి నైతిక ప్రతిపాదికన) పెట్టుకుని, లాయర్ వీలునామా చదవబోతే, ‘అదంతా నాకు తెల్సు, మా అమ్మ మంగళ సూత్రమిలా ఇవ్వం’ డని తనే అడిగి తీసుకుని భూటాన్ బయల్దేరాలి. 

          కానీ ఫ్లాష్ బ్యాక్ నేపథ్యంలో ఇలా జరగలేదు. ఇలా చేయకుండా సీత,  ఐదువేల కోట్ల ఆస్తి నీకు రాయలేదని లాయర్ అనగానే షాక్ అవుతుంది. నిజానికి ఇంకా ఫ్లాష్ బ్యాక్ తెలియని ప్రేక్షకులకి ఇలా షాక్ ఇస్తే, ప్లాట్ పాయింట్ వన్ కి బావుంటుందని కవిహృదయం కావొచ్చు. విషయం తెలీని ఆడియెన్స్ కి, విషయమంతా తెల్సిన సీతతో ఇలా నకిలీ షాక్ ఇప్పించడం. అప్పుడామె మనసులో అనుకునే వుంటుంది- నాకు లోగుట్టు తెలుసు. కానీ దర్శకుడి ఆదేశాల మేరకు ఆడియెన్స్ ని డూప్ చేయడానికి, ఆత్మ వంచన చేసుకుని నకిలీ షాక్ నటిస్తున్నానని!  అసలు తండ్రి మాట ప్రకారం రామ్ ని చేసుకుని అంత ఆస్తినీ అనుభవించెయ్యడానికి వచ్చిన అభ్యంతర మేమిటో అర్ధం గాదు. ఏ మనీ మైండెడ్ అమ్మాయైనా ఎగిరి గంతేసి పెళ్లి చేసుకుంటుంది. మనీ మైండెడ్ అమ్మాయనే కాదు, డబ్బు పిచ్చి వున్న ఎవరైనా ఛాయిస్ కోరుకోరు, ఛాన్స్ కొట్టేస్తారు. అసలీ పాత్ర క్యారెక్టర్ బయోగ్రఫీయే సరిగా లేదు. ఎప్పుడెలా తోస్తే అలా నడిపించేసినట్టుంది. 

          కథనం ఇంత గందరగోళంగా వుంటే, ఈ చిక్కులు విదదీసి వివరించడం కష్టమైపోతుంది. చదివే వాళ్ళకీ అర్ధమవడం కష్టమైపోతుంది. ‘మహర్షి’ తో కూడా ఇదే ప్రాబ్లం. 

        ఇప్పుడు సినిమాలో చూపించిన ప్రకారమే, ఈ ప్లాట్ పాయింట్ వన్ కొచ్చేసరికల్లా సీత ఎమోషనల్ మజిలీ ఏమిటి? ఆస్తి పొందుదామని వస్తే ఆస్తి ఇంకెవరికో పోయింది. ఇంతకన్నా ఎమోషనల్ సెట్ బ్యాక్ లేదు. 1. ఆమె కోరికేమిటి? చందూలాల్ అప్పుతీర్చేసి ఎమ్మెల్యేని దెబ్బ కొట్టడం. ఇది జరిగే పనేనా? దీంతో ఎమ్మెల్యే ఆగుతాడా? సమస్యకి మూలాన్ని పెకిలించి వేయక,  దాని సైడ్ ఎఫెక్ట్స్ కి చికిత్స చేయడమేమిటి? తను రాసిచ్చిన అగ్రిమెంట్ పత్రాన్నే చెల్లకుండా చేస్తే, ఎమ్మెల్యే పీడా విరగడై పోతుందిగా? అప్పుడీ చం దూలాల్ ఎవడు?  కాబట్టి ఈ ప్లాట్ పాయింట్ వన్ కథా ప్రారంభంలో,  సీత గోల్ ఎలిమెంట్స్ లో మొదటిదైన ఆమె పెట్టుకున్న కోరిక నిర్వీర్యమై పోయింది. 

          కోరికే నిర్వీర్యమై పోయాక ఇక గోల్ ఏముంటుంది? లేని గోల్ కి 2. పణంగా పెట్టాల్సిం దేముంటుంది? లేని గోల్ కి 3. పరిణామాల హెచ్చరి కేముంటుంది? గోలే లేకపోయాక  ఇక 4. ఎమోషన్ ఏముంటుంది?  కాబట్టి గోల్ ఎలిమెంట్స్ నాల్గూ లేవు, గోలే లేదు. ఇందుకే చందూలాల్ బాకీ గురించి ఈ కథ నడపకూడదని ముందు నుంచీ చెబుతున్నది. అసలీ బాకీ కథ సినిమా స్థాయి కథ కాదని కూడా చెప్తున్నది. 

          ఇప్పుడామె కల్పించుకున్న ఫిరాయింపు  గోల్ ఏమిటి? నేతలు పార్టీ ఫిరాయిస్తారు. ఇలాటి సీతలు గోల్ ఫిరాయిస్తారు. రామ్ కి రాసిన ఆస్తిని తను రాయించుకోవడమే ఇప్పుడు సీత ఫిరాయిస్తున్న గోల్. ఇదామె ఇక్కడ చెప్పదు. పైగా వాణ్ణి పెళ్లి చేసుకునే ప్రసక్తే లేదని అనేస్తుంది. అసలామె వచ్చిందే ఆస్తికోసం. దక్కింది మంగళ సూత్రం. అది తీసుకుని కోపంతో వెళ్ళిపోతుంది. ఇంత అవమానం జరిగాక మంగళ సూత్రం ఎందుకు తీసుకుంటుంది. లాయర్ మీదికే విసిరేసి వెళ్లిపోవాలి. మళ్ళీ వచ్చి తీసుకోవాలి.  అప్పుడు ‘వాణ్ణి పెళ్లి చేసుకోవడానికి అనుకుంటున్నారేమో...నా మదర్ సెంటిమెంటుతో మాత్రమే దీన్ని తీసుకుంటున్నా’ అనేస్తే క్యారెక్టర్ బాగా అర్ధమయ్యే అవకాశముంది. క్లయిమాక్స్ దగ్గర్లో ఇంకో ఫ్లాష్ బ్యాక్ వస్తుంది. దాని ప్రకారం తల్లి బుద్ధులే తన కొచ్చాయి. ఈ జస్టిఫికేషనుతో, ఇంత అవమానం జరిగినా మళ్ళీ వచ్చి మంగళ సూత్రం తీసుకెళ్ళడానికి ఆర్ధముంటుంది. ఇంకా ఫ్లాష్ బ్యాక్ తెలియని ప్రేక్షకుల పాయింటాఫ్ వ్యూలో - ఏదో ప్లానేస్తోంది సీత అన్నట్టు వుంటుంది. 

       ఇప్పుడు సీత కల్పించుకున్న కొత్త గోల్ ప్రకారం ఎలిమెంట్స్ చూద్దాం : 1. కోరిక వచ్చేసి, రామ్ కి రాసిన ఆస్తిని తన పేర బదలాయించుకోవడం, 2. ఈ కోరిక సాధించుకోవడానికి  సీత ‘పణం’ గా పెడుతున్నది ఏమీ లేదు. వస్తే ఆస్తి వస్తుంది, రాకపోతే పోయేదేమీ లేదు పెట్టుబడిగా పెడుతున్న శ్రమవృథా అవడం తప్పితే, 3. పరిణామాల హెచ్చరికలేమిటి? ఈ ప్రయత్నంలో తానెర్కోబోయే అత్యంత తీవ్ర పరిణామాలేవై వుండొచ్చు? చీటర్ గా అరెస్టయి జైలు కెళ్ళవచ్చు. కానీ ఇలా జరగనివ్వడు ఎమ్మెల్యే. తనకింత డబ్బొస్తోందని తెలిస్తే  ఇక సహజీవనం కాదు, ఎత్తుకెళ్ళి ఇదే మంగళ సూత్రం ఇదే తన మెళ్ళో కట్టేయ వచ్చు, 4. ఏ ఎమోషన్ తనని ఈ గోల్ కి పురిగొల్పుతోంది? ఇప్పుడు చందూలాల్ బాకీ ఒక ఎమోషనే కాదు, ఈ నడమంత్రపు సిరితో దిమ్మదిరిగే రిచ్ అయిపోతుంది తను. బాగా రిచ్ అవ్వాలన్న ఏకైక ఎమోషనే కదా తనకున్నది? 

          మరి ఈ గోల్ ఎలిమెంట్స్ ప్రకారమైనా మిడిల్ కథ నడిచిందా అంటే లేనేలేదు. గోల్ ఎలిమెంట్స్ లో కోరిక ఒక్కటి తప్ప మిగతావి కథలో లేవు. పణంగా ఒడ్డిందేమీ లేదు. పరిణామాల హెచ్చరిక ప్రకారం ఆస్తిని కొట్టేసే ప్రయత్నంలో చీటర్ గా అరెస్టయ్యే సూచనలుగానీ, ఇంత ఆస్తి కోసం ప్రయత్నిస్తోందని అసలు ఎమ్మెల్యేకి తెలియడం గానీ లేనే లేవు. ఉన్నదల్లా చందూలాల్ చెక్ బౌన్స్ కేసులోంచి బయట పడే ప్రయత్నాలతోనే కథ! ఇక ఎమోషన్ రిచ్ అవడం గురించి కాక, చెక్ బౌన్స్ కేసులోంచి బయట పడడం గురించే వుంది! 

          ఇలా కూడా ప్లాట్ పాయింట్ వన్ కి బలం లేకుండా పోయింది. అంటే ఇక ఇక్కడ్నించీ ప్రారంభమయ్యే రెండు గంటలా పది నిమిషాల సుదీర్ఘమైన కథకి బలం లేదని ముందే తెలిసిపోతోంది - ప్లాట్ పాయింట్ వన్ ఎనాలిసిస్ ద్వారా.  

         ఇక మిడిల్ - 1 కథనం :  భూటాన్ వెళ్ళిన సీతకి మఠంలో రామ్ (బెల్లంకొండ శ్రీనివాస్)  అమాయక బాలుడిలా ఎదురవుతాడు. పెద్దయాక వచ్చిన సీతని చూసి ఆనందంతో ఒక పాటేసుకుంటాడు. చిన్న పిల్లాడిలా బిహేవ్ చేస్తున్న అతణ్ణి ఛీత్కరించుకుని, మంగళ సూత్రం చూపిస్తూ, ‘అసలు మా నాన్నతో నాకు గొడవేంటో తెల్సా?’ అంటుంది నేస్తం రూపతో (మిన్నారా చోప్రా). 

          ఫ్లాష్ బ్యాక్ : వైజాగ్ లో తండ్రి దగ్గరి కెళ్ళి యాభై కోట్లు అడుగుతుంది. రామ్ ని చేసుకుంటానంటే ఇస్తానంటాడు. ససేమిరా అంటుంది. ఐతే నీ దారి చూసుకోమంటాడు. సంపాదించి చూపిస్తానంటుంది. ఎంత సంపాదించి చూపిస్తావంటాడు. వంద కోట్లు అంటుంది. ఎంత కాలంలో అంటాడు. ఏడాదిలోగా అంటుంది. ఏడుకోట్లు సొంత డబ్బు చెక్కు రాసిచ్చేస్తాడు. వెళ్ళిపోతుంది. ఫ్లాష్ బ్యాక్ ఓవర్. 

          ఇది చెప్పి రామ్ దగ్గరికెళ్ళి, ఆస్తి కోసం నిన్నుచేసుకునేది లేదని మంగళ సూత్రం మీద పడేస్తుంది. మఠం గురువుకి విషయం చెప్పేస్తుంది. అతను బయటి ప్రపంచంలో కుట్రలూ కుతంత్రాలూ తెలీని అమాయకుడమ్మా అంటాడు గురువు. వదిలేసి వెళ్ళిపోతుంది. వెళ్లిపోతుంటే ఎమ్మెల్యే కాల్ చేసి, చందూలాల్ చెక్ బౌన్స్ కేసులో అరెస్టు వారెంట్ వచ్చిందని ట్విస్ట్ ఇస్తాడు. వెనక్కి పరుగెత్తు కొచ్చి, రామ్ ని ‘కిడ్నాప్’ చేసుకు హైదరాబాద్ వచ్చేస్తుంది.

          ఇక్కడ బ్యాంక్ కెళ్ళి పోయి, రామ్ డబ్బు తనకి ట్రాన్స్ ఫర్ చేయమంటుంది. రామ్ ఎక్కౌంట్ లోనే డబ్బు లేదు, వీలునామా ప్రాసెస్ పూర్తి చేసుకుని రమ్మంటాడు మేనేజర్. లాయర్ దగ్గరికి వెళ్తుంది. ఆమెని అరెస్ట్ చేయడనికి సీఐ గాలిస్తూంటాడు. సాయంత్రం ఐదింటికల్లా చందూలాల్ డబ్బు కట్టక పోతే అరెస్ట్. నాల్గింటికే కట్టేస్తానని ఆమె ఛాలెంజ్. ఇక్కడ లాయర్ తో లీగల్ ప్రాసెస్ కుదరదు. ఇంకో లాయర్ దగ్గరికి పరుగు. అక్కడ ఆస్తి బదలాయింపు పత్రాల మీద రామ్ సంతకం పెట్టడు. పెళ్లి ప్లానేస్తుంది. గుళ్ళో పెళ్లి డ్రామా చేస్తూ, రూప చేత కాల్ చేయించుకుంటుంది పోలీసులు అరెస్ట్ చేయడానికి వచ్చేస్తున్నారనీ. ఇప్పుడెలా అని ఏడ్చేస్తూంటే, సంతకం పెట్టేస్తాడు రామ్. ఇప్పుడే వచ్చేస్తానని బ్యాంకుకి జంప్ అవుతుంది. మంగళ సూత్రం పట్టుకుని ఆమెకోసం ఎదురుచూస్తున్న రామ్ మీద రౌడీలు కన్నేస్తారు.

          సీత బ్యాంకులో వుందని తెలుసుకున్న ఎమ్మెల్యే ఈ విషయం సీఐ కి చెప్తాడు. సీఐ వచ్చేస్తున్నాడని తెలుసుకున్న సీత డీలా పడిపోతుంది. అటు గుడి దగ్గర మంగళ సూత్రం కోసం రామ్ ని కొడుతూంటారు రౌడీలు. ఇంకా అటు హేపీగా వుంటాడు ఎమ్మెల్యే. ఇంటర్వెల్.

పద, సరీగ్గా ఎంట్రీ ఇవ్వు!

     సీత భూటాన్ వెళ్తే అక్కడ హీరోగా బెల్లంకొండ శ్రీనివాస్ ఎంట్రీ సీను, పాత్ర పరిచయం వ్యూహాత్మకంగా, యూత్ అప్పీల్ తో వుండవు. ఇరవై ఏళ్ళూ మఠంలో వున్నా, చిన్నప్పటి మానసిక స్థితిలోనే వుండిపోతాడు. చిన్న పిల్లాడిలా మారాం చేస్తాడు. అతడికి ఉదయం పదిన్నర కల్లా టీ, రెండు బటర్ బిస్కెట్లు, ఒక ఎర్ర మాత్ర, ఇంకో పచ్చ మాత్రా కావాలి. లేకపోతే ఫిట్స్ వచ్చిన వాడిలా వణికిపోతాడు. అతను ఏదైనా కోరుకుంటే దానికోసం మారాం చేసి సాధించు కుంటాడు. పదిన్నరకి ‘టీ కావాలీ!  టీ కావాలీ!!  టీ కావాలీ!!!’ అని మారాం చేస్తాడు. హైదరాబాద్ వచ్చాక లాయర్ దగ్గరి కెళ్తే  ‘బుక్ కావాలీ! బుక్ కావాలీ!! బుక్ కావాలీ!!!’ అని మారాం చేస్తాడు. ఇంకో లాయర్ దగ్గరి కెళ్తే  ‘టాయిలెట్ కావాలీ! టాయిలెట్ కావాలీ!! టాయిలెట్ కావాలీ!!!’ అని మారాం చేస్తాడు. కోర్టు కెళ్తే జడ్జి ముందు ‘టీ కావాలీ!  టీ కావాలీ!!  టీ కావాలీ!!!’ అని మారాం చేస్తాడు. 

          ఆధ్యాత్మిక గురువు ఇలా తయారు చేసి వదిలాడు. మఠంలో చేరితే మఠం వస్త్ర ధారణలోకి మార్చెయ్యకుండా జీన్సు - టీస్ లో అలాగే వదిలేశాడు. ఇంగ్లీషు మందులతో నయం చేద్దామనుకున్నాడు. ఇరవై ఏళ్లయినా నయం చేయలేకపోయాడు. వాణ్ణి కుదేసి బౌద్ధుల హఠ యోగానే చేయిస్తే, రోగమంతా వదిలిపోయి, స్కిల్స్ డెవలప్ అవుతాయి. మానసికంగా కత్తిలా, శారీరకంగా శక్తిమాన్ లా వుంటాడు. ఈ స్కిల్స్ ప్రదర్శించలేదని కాదు. సీత ‘కిడ్నాప్’ చేసి తీసి కెళ్తున్నప్పుడు, రోడ్డు మీద అడ్డున్న కంటెయినర్ ని ఏనుగులతో కలిసి నెట్టేస్తాడు. ఎవరైనా తన మీదికొస్తే ఫైట్ చేస్తాడు. పుల్లలు కుప్పగా పడేస్తే అవెన్నున్నాయో చూసి చెప్పేస్తాడు. లా బుక్ ఒక్క లుక్కేసి, కోర్టులో కేసు కూడా వాదించి సీతని గెలిపించేస్తాడు. ఇవేవీ వార్కౌట్ కాలేదు. మరోవైపు ఫిట్స్ తో బతుకు బండి లాగిస్తాడు. మానసికంగా కిండర్ గార్టెన్ క్వాలిటీతో వుంటాడు. 

          ఈ స్కిల్స్ ఎలా డెవలప్ అయ్యాయి? ఇది చూపించలేదు. ఇందుకే హీరో ఎంట్రీ సీను స్కిల్స్ ప్రదర్శనతో పవర్ఫుల్ గా వుండాలనేది. సీత వెళ్లేసరికి కాషాయ వస్త్రధారియై బ్రహ్మాండమైన శారీరక, మానసిక శక్తుల ప్రదర్శన చేస్తూండాలనేది. ఫిట్స్ గిట్సు, కిండర్ గార్టెన్ నాన్సెన్స్ అంతా లేకుండా - సీతకి గట్టి షాకివ్వాలనేది. వీణ్ణి బుట్టలేసుకుని ఆస్తి కొట్టేద్దామని వస్తే, వీడేంటి మనకి మించి వున్నాడని ఆమెకి అన్పించాలనేది. సినిమా ప్రారంభంలో రామ్ ని మఠంలో చేర్పిస్తున్నప్పటి మిస్టీరియస్ వాతావరణం ఇలా పే ఆఫ్ కావాలనేది. ఆ ఓపెనింగ్ ఇమేజి రామ్ పాత్రకి ఇలా బదలాయింపు అయి కలవాలనేది. మఠం అనే ఆధ్యాత్మిక కేంద్రపు ఓపెనింగ్ ఇమేజి, ఇలా భౌతిక వాదపు కథకి కాంట్రాస్ట్ కావాలనేది. సీత భౌతికవాదానికి, ఆమె గోల్ కి -  మఠ వాసియైన రామ్ ఆధ్యాత్మిక వాదం ప్రతిబంధకం కావాలనేది. ఆమె గోల్ కి ఇక్కడే గట్టి బ్రేకు పడాలనేది. ఎంత గట్టి బ్రేకు (పరీక్ష) పడితే పాత్ర అంత ఆసక్తి రేపుతుందనేది. 

          ఎమ్మెల్యేని (విలన్) ని ఎదుర్కోలేక ఇక్కడికొచ్చి, అమాయకుడైన రామ్ ని మాయ చేసి బయటపడదామనుకునే పాత్ర ఓ పాత్రేనా? యాక్షన్ హీరో బెల్లంకొండ శ్రీనివాస్ ని ఇలా హీరోయిన్ వెంట వుండే,  పప్పుసుద్ద పాసివ్ పాత్రలో ఎవరు చూస్తారు? ఈ పాత్ర నటించి మెప్పించడం సాధ్యం కూడా కాలేదు. సరే, ఇప్పుడిక బెల్లంకొండ శ్రీనివాస్ ఈ అమాయక పాత్రతో ఇది హీరోయిన్ ఓరియెంటెడ్ కథ అని స్పష్టమైంది.

        మిడిల్ వన్ అంటే కేవలం గోల్ కోసం సమస్యతో జరిగే సంఘర్షణ. కన్పిస్తున్న కథ ప్రకారం చందూలాల్  అప్పు తీర్చడమే గోల్. దీంతో సంఘర్షణే మిడిల్ వన్ కథాంశం. ఇప్పుడు మఠంలో రామ్ అమాయకుడిలా పరిచయమయ్యాక, సీత ఫ్లాష్ బ్యాక్ అసలు విశ్లేషణ ఒక్క ముక్కలో చూద్దాం : ‘అసలు మా నాన్నతో నాకు గొడవేంటో తెల్సా?’ అని చెప్తుంది. ఇందులో రామ్ తో పెళ్లిని తిరస్కరించడమే వుంటుంది. తనకి  డబ్బిస్తే వంద కోట్లు సంపాదించి చూపిస్తాననే వుంటుంది. మరిప్పుడు ప్రాబ్లం ఏమిటి? ఫాదర్ డబ్బిచ్చాడు. ఆ వంద కోట్లు సంపాదించే పనిమీద వుండక, వద్దనుకున్న రామ్ దగ్గరికే  ఎందుకొచ్చింది? ఇక్కడికి తన రాకనే ప్రశ్నించే ఫ్లాష్ బ్యాక్ చెప్పుకోవడంలో ఏమైనా అర్ధముందా? అర్ధం పర్ధం, సరైన ప్రణాళికా అంటూ లేని క్యారెక్టర్ వంద కోట్లు సంపాదిస్తుందా? 

          ఇక రామ్ ని ఛీకొట్టి వెళ్లిపోతూంటే, ఎమ్మెల్యే ఫోన్ చేసి చందూలాల్ కిచ్చిన చెక్ బౌన్స్ కేసులో అరెస్ట్ వారెంట్ అంటూ ఇంకో ట్విస్టు ఇస్తాడు (ఈ చందూలాల్ ఎవడండీ బాబూ, ఒకప్పటి కాబూలీ వాలాలాగా ఏనాటి పాత్ర!). అప్పుడు గబుక్కున వెనక్కొచ్చి మాయమాటలు చెప్పి రామ్ ని కిడ్నాప్ చేసి తీసి కెళ్ళి పోతుంది. ఈ పనేదో ముందే చేయవచ్చుగా?  తను పెట్టుకున్న ఆస్తి కొట్టేసే గోల్ కి, ఎంతో ప్లానింగ్ గా వచ్చి,  రామ్ అనే బచ్చాని గభాల్న ఎత్తుకెళ్ళి పోవచ్చుగా? చిన్నపిల్లల కిడ్నాపులు ఎన్ని జరగడం లేదు? ఎమ్మెల్యే ట్విస్టు ఇస్తేనే ఏం చేయాలో తెలిసివచ్చిందా? ఎందుకింత వేస్టుగా భూటాన్ దాకా వచ్చినట్టు? 

          హైదరాబాద్ వచ్చేశాక బ్యాంకెళ్ళి రామ్ ని చూపించి, ఎమౌంట్ తన ఎక్కొంట్ కి ట్రాన్స్ ఫర్ చేయమంటుంది. ‘పోవమ్మా వీడికి ఎక్కౌంటే లేదు, ముందు వీలునామా ప్రాసెస్ చేసుకుని వీడి ఎక్కౌంట్ లో డబ్బు పడ్డాక ట్రాన్స్ ఫర్ చేయించుకో ఫో!’ అని ఇంత రఫ్ గా అనకపోయినా, బాగానే అంటాడు మేనేజర్. సీతమ్మ తెలివి తేటలిలా వున్నాయి. ఐదువేల కోట్ల ఆస్తి వ్యవహారం ఇప్పటికిప్పుడు సాయంత్రం ఐదింటికల్లా తేలిపోకపోతే ఐదుకోట్ల చెక్ బౌన్స్ కేసులో అరెస్ట్ అవుతుంది తను! 

          లండన్లో మాల్యా లాగా తను భూటాన్ లోనే వుంటే సరిపోయేది కదా? ‘మిస్టర్ రామ్, నాకు ఐదుకోట్లే కావాలి. వందకోట్లు సంపాదించాక నీ కిచ్చేస్తాను. నీ డాక్యుమెంట్స్  బ్యాంకులో చూపించి నాకు ష్యూరిటీ మాత్రమే ఇవ్వు  చాలు’ అంటే సమస్య చెల్లు కదా? ఆమెకి హైదరాబాద్ లో తండ్రి ఇచ్చిన ఇల్లు వుందన్న సంగతి మర్చిపోదాం విశ్లేషణా సౌలభ్యం కోసం. అలాగే తన దగ్గర డబ్బు లేనప్పుడు చందూలాల్ కి చెక్కు ఎందుకిచ్చిందని కూడా వదిలేద్దాం. అసలు తనేం చేస్తోందో తనకి తెలిస్తేగా?  పదికోట్ల స్థలం తనకుండి  కూడా ఈ పరుగులు. 

          ఎత్తుకున్న ఎకనమిక్స్ కథ కూడా ప్రాక్టికల్ గా, నాలెడ్జబుల్ గా  లేకపోతే ఎలా? అంతా మూస ఫార్ములా రొడ్డకొట్టుడేనా ఇంకా? 

          ఇక ఈమెని అరెస్ట్ చేయడానికి సీఐ తిరగడం, ఎమ్మెల్యే పెట్టిన కామెడీ గ్యాంగ్ సీత ఎక్కడి కెళ్తోందో ఫాలో అయి సమాచారమివ్వడం, ఆ సమాచారాన్ని ఎమ్మెల్యే సీఐకి   అందించడం - ఈ ఇంటలిజెన్స్ నెట్వర్క్ సీక్రెట్ గా ఓ పక్క!

          ఎమ్మెల్యే ఒక లాయర్ దగ్గరి కెళ్ళి, సీత వస్తే ఆపి వుంచమంటాడు సీఐ అరెస్ట్ చేయడానికి. ఈమాట చెప్పడానికి పెద్ద బిల్డప్ సీను, ఒక కాల్ చేస్తే పోయేదానికి. ఐదు వేల కోట్ల ఆస్తికి సీత గీత గీసిందని తెలిసి కూడా, చెక్ బౌన్సు పట్టుకుని కూర్చున్నాడు ఎమ్మెల్యే.  బిగినింగ్ విభాగంలో, డబ్బు తన దగ్గర చాలా మూల్గుతోందనీ, డబ్బు కాదు కావాల్సింది, నీతో సహజీవనమనీ అంటాడు. ఇప్పుడు సీత ఐదువేల కోట్లతో తన కంటే పవర్ఫుల్ అవుతోంటే ఇంకెక్కడి సహజీవనం! 

          ఆ లాయర్ దగ్గరికి సీత రామ్ తో వస్తే, రామ్ టాయిలెట్ కావాలంటూ మారాం చేస్తాడు. లాయర్ ఇద్దర్నీ వెళ్లగొట్టేస్తాడు. ఇంకో లాయర్ దగ్గరి కెళ్తే  బుక్ కావాలీ అంటూ మారాం చేస్తాడు. నిమిషంలో ఆ లా బుక్ లో  చట్టాలు మొత్తం చదివేసి జీర్ణం చేసుకుంటాడు. ఇక్కడ ఆస్తి బదలాయింపు పని పూర్తి చేసుకుంటుంది. ప్రభుత్వంతో పని లేకుండా లాయర్ ముద్ర కొట్టి ఆస్తులిచ్చేస్తాడా!  కానీ రామ్ సంతకం పెట్టడు. దీంతో వొళ్ళు మండిపోయిన సీత ఉత్తుత్తి పెళ్లి ప్లానేస్తుంది. ఈ ఆలోచన రావడానికామె బాత్ టబ్బులో ఐసు గడ్డల మధ్య పవళించాల్సి వచ్చింది.  భూటాన్ మంచుకొండల మధ్య ఎప్పుడో రావాల్సిన ఆలోచన. వచ్చుంటే ఇంతవరకూ రోమాంటిక్ కామెడీ వుండేది. 

          గుళ్ళో పెళ్లి డ్రామా నడిపిస్తూ ఫ్రెండ్ చేత పోలీసు లొచ్చేస్తున్నారని కాల్ చేయించుకుని, రామ్ ని ఎమోషనల్ బ్లాక్ మెయిల్ చేస్తుంది. సంతకం పెట్టేస్తాడు. మంగళ సూత్రం అతడి చేతిలో పెట్టేసి సంతోషంగా బ్యాంకుకి జంప్ అవుతుంది

       ఈ మిడిల్ వన్ ని ఇంకా విశ్లేషిండం అవసరం లేదు. ఒక్క పూటలో ఎన్నెన్ని జరిగి పోతున్నాయి. ఎన్నెన్ని ట్విస్టులు. అప్పుడే బ్యాంకు పనులు, అప్పుడే లాయర్లతో పనులు, అప్పుడే ఆస్తి బదలాయింపులు, అప్పుడే పెళ్లి పనులు... సెకండాఫ్ లో చెక్ బౌన్సు కేసు కూడా కోర్టులో అప్పుడే గెలిచిపోతుంది సాయంత్రం ఐదింటికల్లా. ఈ మిడిల్ వన్ కథనంలో సంఘర్షణంతా సినిమాకి చాలని ఆఫ్టరాల్ చందూలాల్ చెక్ బౌన్సు కేసుతోనే. ఇదంతా తూతూ మంత్రపు కథనమే. ఐదువేల కోట్లు అనే కిల్లర్ పాయింటు మీదికి వెళ్ళకుండా, ఆమెకి అరెస్టు భయం కల్పించి లొంగ దీసుకోవాలని విలన్ ఆచితూచి కోరుకోవడం; పాత్రచిత్రణ లేక సీత, అసలు పాత్రే కాక రామ్, లేని కథలో పరుగులు పెట్టడం గంటన్నర పాటూ సాగుతూ వుండే ఆ ఫస్టాఫ్ ని  వృధా చేశాయి.  

―సికిందర్

831 : స్క్రీన్ ప్లే సంగతులు

     

  “కథ మొదలయ్యాక పూర్తి అవ్వాలి.  పూర్తయ్యే వరకూ వుండేదే కథ.  అది చూడకుండా క్యాలిక్యులేటర్‌ పట్టుకుని అది బావుంది, ఇది బాలేదు అని కూర్చుని లెక్కలు వేస్తే ఎలా? కామన్‌ ఆడియన్‌ మాత్రం సినిమా బావుండాలని ఆలోచనతో మాత్రమే వెళ్తాడు. మనం (రివ్యూ రైటర్స్ నుద్దేశిస్తూ) మాత్రం చెక్‌ చేయడానికి మాత్రమే వెళ్తాం. ఏది బాలేదో చూసి దర్శకుడి కంటే మనం గొప్ప అని నిరూపించుకోవడానికి సినిమా చూస్తాం. సినిమాని ఆస్వాదించాలి. సినిమానే కాదు జీవితాన్ని కూడా. పోలికలు ఆపేయాలి. ఆడు ఇది చేశాడు, ఈడు ఇది చేశాడని పోలికలు పెట్టుకుంటే కష్టం. అందుకే రివ్యూల కంటే ఆడియన్స్‌ ఏం చెబుతారన్నదే ముఖ్యం” ―దర్శకుడు తేజ

            (అంటే కథ రాయడానికి క్యాలిక్యులేటర్ ఉపయోగించడం లేదా? క్యాలిక్యులేటర్ లేకుండానే  ఏదో మొదలెట్టామా ముగించామా అన్నట్టు రాసేస్తున్నారా? కథ మొదలుకీ, ముగింపుకీ మధ్య ప్రేక్షకులకి వుండే యమ చిత్ర హింసని తప్పించడానికే క్యాలిక్యులేటర్ అవసరం. దర్శకుడి కంటే మనం గొప్ప అని నిరూపించే పనిపెట్టుకుని రివ్యూలెవరు రాస్తారు - ప్రేక్షకులే స్పాట్  ట్విట్టర్ రివ్యూలు రాసేసి వైరల్ చేస్తున్నారు. బొమ్మ పడ్డ అరగంటకే లైవ్ అప్డేట్స్ ఇచ్చి తేల్చేస్తున్నారు. క్యాలిక్యులేటర్ ఒకరి చేతిలో కాకుండా అందరి చేతుల్లోకి వెళ్ళిపోయిందిప్పుడు).

          తేజ దర్శకత్వం వహించే సినిమాల స్క్రీన్ ప్లేల్లో మిగతా విషయాలెలా వున్నా, ఇతరులు తీసే సినిమాల్లాగా కాకుండా, చప్పున అరగంటలో బిగినింగ్ ముగిసిపోయి కథేదో ప్రారంభమై పోతుంది. ఇంతవరకూ బాగానే వుంది. అయితే కథంటూ ప్రారంభమయ్యాక ఇక హీరో హీరోయిన్లు పారిపోవడమే జరుగుతుంది చాలా సార్లు. నువ్వు నేను, జయం, నీకూ నాకూ డాష్ డాష్, తర్వాత ఇప్పుడు ‘సీత’... పదేళ్ళ క్రితం ఒక రచయిత రాసుకున్నకథ హీరో హీరోయిన్లు పారిపోవడం గురించి లేదు. కానీ తేజ దగ్గరికి తీసికెళ్తే పారిపోయేలా మార్చేస్తారని భయపడ్డాడు. ఆఫ్ కోర్స్, అప్పట్లో తేజ ఇంకొకరి కథలు తీసుకునే మూడ్ లో లేరన్నది వేరే సంగతి. మళ్ళీ ఇన్నేళ్ళ తర్వాత ‘సీత’ కథని పారిపోయే పురాణంగానే మార్చేశారు. ఈ మార్చడంలో సినిమాటిక్ గా విలువైనవి చాలా కోల్పోయారు. 

          ముందుగా బిగినింగ్ కథనం చూద్దాం : భాగ్యరాజ్ ఒక ఐదేళ్ళ అబ్బాయిని చైల్డ్ స్పెషలిస్టుకి చూపించడంతో ప్రారంభమవుతుంది. టార్చర్ పెట్టడం వల్ల పిల్లాడు మానసికంగా దెబ్బతిన్నాడనీ, మళ్ళీ అలాటి వాతావరణంలో వుంచకూడదనీ, దూరంగా వుంచమనీ స్పెషలిస్టు సలహా ఇస్తాడు. దీంతో భాగ్యరాజ్ పిల్లవాణ్ణి  భూటాన్ దేశం తీసికెళ్ళి బౌద్ధుల మఠంలో చేర్పిస్తాడు. డాక్టర్ రాసిన మందుల లిస్టు ఇచ్చి,  పిల్లవాడికి నయం చేయమంటాడు. పిల్లవాడి పేరు రామ్ అని చెప్తాడు. రామ్ సీత ఏదని అడుగుతాడు. పెద్దయ్యాక సీత వస్తుందనీ, వచ్చి తీసికెళ్తుందనీ నచ్చ జెప్పి, బాధగా వెళ్ళిపోతాడు భాగ్యరాజ్. 

          దీని తర్వాత టైటిల్స్ పూర్తయ్యాక హైదరాబాద్ బంజారా హిల్స్ ప్రాంతంలో ఆక్రమణలు తొలగిస్తూంటారు పోలీసులు. ఆందోళన చేస్తున్న ప్రజల దగ్గరికి సీత (కాజల్ అగర్వాల్) వస్తుంది. బాగా రిచ్ గా, తలపొగరుతో వున్న ఈమె ఆ స్థలం తనదనీ, ఖాళీ చేయాల్సిందేననీ పట్టుబట్టి ఖాళీ చేయించేస్తుంది. ఆ తర్వాత పబ్ కెళ్ళి ఎంజాయ్ చేస్తుంది. అక్కడికి ఎమ్మెల్యే బసవరాజు (సోనూసూద్) వచ్చి అగ్రిమెంట్ విషయం మర్చిపోయావా అని తనతో పదమంటాడు. 

          ఆ అగ్రిమెంట్ ఏమిటనేది వీడియో క్లిప్పింగ్స్ లో చూపిస్తాడు. బంజారా హిల్స్ లో సీత పదికోట్లకి స్థలం కొన్నది. అందులో ఐదు కోట్లు చందూలాల్ దగ్గర అప్పు తెచ్చింది. తీరా ఇప్పుడు చూస్తే ఆ స్థలంలో జనం ఇళ్ళేసుకుని వుంటున్నారు. వాళ్ళని ఎమ్మెల్యే ఖాళీ చేయిస్తే పర్సెంటేజీ ఇస్తుంది. ఇది వింటూ సీతనే అదోలా చూస్తున్న బసవరాజు ఆమెని కామిస్తాడు. తనని పెళ్లి చేసుకుంటే ఇళ్ళు ఖాళీ చేయిస్తానంటాడు. పెళ్లి గిళ్ళీ తనకి పడవని అంటుంది.  అయితే సహజీవనానికి ఒప్పుకోమంటాడు. నెల రోజులకి ఒప్పుకుంటుంది. ఆ మేరకు అగ్రిమెంట్ మీద సంతకం చేస్తుంది. 

          వీడియో క్లిప్పింగ్స్ లో ఇదీ విషయం. ఇప్పుడు సీత అడ్డం తిరుగుతుంది. మేనిఫెస్టోలో ప్రజలకిచ్చిన హామీలనే పట్టించుకోని నువ్వు, నాతో అగ్రిమెంటుని ప్రశ్నించలేవని వెళ్ళిపోతుంది. బసవరాజు రెచ్చిపోయి అధికారులతో సమావేశం పెట్టి, సీతని అన్ని విధాలా ఇబ్బందులు పెట్టి, తనతో శోభనం జరిపించాలని పట్టుబడతాడు. ఆమె ఆర్ధిక లావాదేవీలు కట్ చేయిస్తాడు. సీఐకి చెప్పి తిరిగి ఆ ప్రజలు స్థలాన్ని అక్రమించుకునేలా చేస్తాడు. అప్పిచ్చిన చందూలాల్ ని కూడా ఎగదోస్తాడు. 

        ఇరుకున పడ్డ సీత చందూలాల్ అప్పు ఐదు కోట్లు, ఇంకా ఇతర కమిట్ మెంట్స్ అయిదు కోట్లూ మొత్తం పది కోట్లు ఎక్కడ్నించి తేవాలా అని ఆందోళన పడుతోంటే, వైజాగ్ లో తండ్రి చనిపోయాడని వార్త వస్తుంది. ఐతే తండ్రికున్న ఐదువేల కోట్ల ఆస్తి తనకే వస్తుందని బయల్దేరుతుంది. అంత్యక్రియలు పూర్తయ్యాక, లాయర్ తండ్రి రాసిన వీలునామా చదివి,  సీతకి ఆమె తల్లి ఇచ్చిన మంగళ సూత్రం అందిస్తాడు. సీతకి ఇంతే రాశాడనీ, ఆస్తంతా భూటాన్ లో ఒకడికి  రాశాడనీ అంటాడు. షాక్ తిన్న సీత భూటాన్ బయల్దేరుతుంది. 

     ఇదీ బిగినింగ్ లో వుండే కథనం : 25 నిమిషాల పాటు సాగే ఈ బిగినింగ్ కథనంలో ప్రధాన పాత్రగా సీత పరిచయమవుతుంది. ఆమె ప్రత్యర్ధి పాత్రగా ఎమ్మెల్యే బసవరాజు పరిచయమవుతాడు. ఇక ప్రారంభంలో మఠంలో చేరిన పిల్లాడు రామ్ హీరో పాత్ర అని తెలిసిపోతూ వుంటుంది. ఈ మూడు కీలక పాత్రల పరిచయంతో బాటు, కథకి నేపధ్యం ఏర్పాటయ్యింది. ఈ నేపధ్యం రెండు పొరలుగా వుంది. మొదటి పొర సుమారు ఇరవై ఏళ్ల  క్రిందట మఠంలో చేరిన రామ్ తో వుంది.  రెండో పొర ఇప్పుడు స్థలం కొని ఇరుక్కున్న సీత వ్యవహారాలతో వుంది. చిన్నప్పటి రామ్ తో మొదటి పొర ఒక మిస్టీరియస్ వాతావరణాన్ని సృష్టిస్తూ సినిమాకి ప్రారంభంగా వుంది. ఇది కొన్ని ప్రశ్నల్ని రేకెత్తిస్తోంది. రామ్ కి భాగ్యరాజ్ తండ్రి అన్నట్టు వుంటుంది. మరి రామ్ ని వాతలు పెట్టి కాల్చిందెవరు? సవతి తల్లా? మఠం లో రామ్ ని చేర్పించి వెళ్తూ సీత పెద్దయాక వస్తుందని అంటాడు భాగ్యరాజ్. ఈ సీతెవరు? భాగ్యరాజ్ కేమవుతుంది? ఈ ప్రశ్నలతో మిస్టీరియస్ గా మొదటి పొర వుంటుంది. అసలు మఠంలో చేరడమే ఏదో ఆధ్యాత్మిక, అతీత, విపరీత మానసిక శక్తుల మిస్టీరియస్ కోణం ఈ కథ ఓపెనింగ్ ఇమేజిగా వుంది. మరి ఈ అర్ధంలో ఓపెనింగ్ ఇమేజి రామ్ పాత్రకి బదలాయింపు జరిగిందా? ఇది కూడా చూద్దాం. 

          అయితే పిల్లాణ్ణి ఎక్కడో భూటన్ లో బౌద్ధుల మఠంలో చేర్పించడం లోని ఔచిత్యం అర్ధంగాదు. డాక్టర్ రాసిన ఇంగ్లీషు మందుల చీటీ వాళ్ళెందుకు తీసుకుంటారో తెలియదు. మఠం అంటేనే ఆధ్యాత్మిక కేంద్రం. కొన్ని సినిమాల్లో కేరళలో ఆయుర్వేద చికిత్సా కేంద్రాల్ని చూపిస్తూంటారు. అక్కడ పేషెంట్లు వుంటారు. ఈ మఠంలో  అలాటి పేషంట్ల వాతావరణ మేమీ వుండదు. పిల్లవాడు రామ్ ఒక్కడ్నే మానసికారోగ్యం బాగు చేయడానికి తీసుకోవడం వింతగా వుంటుంది. సన్యాసుల మఠంలో చేరడమంటే సన్యాసిగా మారిపోవడం కాదా? 

       ఇక రెండో పొరలో పరిచయమయ్యే సీత పాత్ర తీరుతెన్నులు ఎస్టాబ్లిష్ అయ్యాయి. మానవత్వం కంటే డబ్బు సంపాదనే ఎక్కువన్న తత్వం ఆమెదనీ, తలపొగరుతో ఎవర్నీ లెక్క చెయ్యదనీ తెలుస్తుంది. ఇప్పటి సినిమాల్లో హీరోయిన్ పాత్రలు నేటి యువ ప్రేక్షకుల్లో  యువతులకి కనెక్ట్ కాని వెనకటి తరం పోకడలతోనే ఇంకా వుంటున్నాయి. సీత కూడా అలాటి వాస్తవ దూరమైన ఫార్ములా పాత్రే. ఆమె అడ్డ మార్గాల్లో ఆర్ధికంగా ఎదిగి పోవాలనుకుంటోంది మంచిదే. సాటి మనుషులతో సెంటిమెంట్లు పక్కన బెట్టి తన ఎదుగుదల మాత్రమే చూసుకోవడం. ఇది చాలామందిలో వుండే పోకడే. అయితే ఈ నెగెటివ్ పోకడతో ఇప్పటి కాలపు అమ్మాయిలా ప్రొఫెషనల్ గా లేక పోవడమే పాత్రని నిర్ణయించడంలో జరిగిన ప్రధాన లోపం. ఒకప్పుడు తేజ టీనేజి లవ్ సినిమాలు తీస్తున్నపుడు, టీనేజర్లతో కనెక్ట్ అయ్యే మనస్తత్వాలతో పాత్రలుండేవి. ఇప్పుడు మారిన కాలంలో సీతని అలా నేటి యూత్ కి కనెక్ట్ చేయలేకపోయారు. 

          సీత పాత్ర ఎంట్రీ మిర్రర్ ఎఫెక్ట్ తో వుండడం ఇక్కడ విశేషం. సీత పెద్దయాక వస్తుందని భాగ్యరాజ్ మఠంలో రామ్ కి చెప్పాక, బస్తీ వాతావరణంతో తర్వాతి సీను ఓపెనవుతుంది. ఈ సీనులో తల్లి పిలుస్తూంటే ఒక పేద బాలిక ఖాళీగా వున్న డ్రైనేజీ గొట్టం లోంచి వస్తూంటుంది. ఆమె గొట్టం దాటిందో లేదో, భళ్ళున అది పగిలిపోతుంది. ఒక్కసారిగా ఈ షాకింగ్ దృశ్యాన్నిపరికిస్తే, ఈ గొట్టాన్ని ఒక క్రేన్ పగుల గొట్టడం కన్పిస్తుంది. ఇక వైడ్ షాట్ లో మొత్తం బస్తీలో ఇళ్ళు కూల్చే కార్యక్రమం మొదలై పోతుంది. అయితే మొదట గొట్టంలోంచి బాలిక బయటికి వస్తున్నప్పుడు - డైనమిక్స్ ప్రశ్నార్థకంగా వుంటాయి. భాగ్యరాజ్ చెప్పిన సీత ఇంత పేద పిల్లగా వుందేమిటి? ఇంత పేద పిల్ల భాగ్యరాజ్ కేమవుతుంది? ఏమీ కాదా? పేద పిల్ల సీతతో, గొప్పింటి రామ్ స్నేహమే అతణ్ణి టార్చర్ పెట్టడానికి కారణమయ్యిందా? లవ్ స్టోరీ ఇలా ఎస్టాబ్లిష్ అవుతోందా?... లాటి ప్రశ్నలతో మిస్టీరియస్ వాతావరణం కొనసాగడం.

          ఇంతలో ఇదంతా రివర్స్ అయిపోతుంది. ఇదే సీన్లో  ఒక ఖరీదైన కారు ఎంటరై,  రిచ్ గా కాజల్ అగర్వాల్ దిగడంతో షాకింగ్ గా పై ప్రశ్నలన్నీ పటాపంచలైపోతాయి. ఐతే ఆ పేద పిల్ల చిన్నప్పటి సీత కాదన్నమాట. రామ్ తో మొదలైన చిన్నప్పటి కథనం ఇంకా కంటిన్యూ కావడం లేదన్న మాట. కథనం వర్తమానంలో కొచ్చి ఏకంగా ఎదిగిన రిచ్ సీతనే  చూస్తున్నామన్నమాట. కాసేపు పజిల్ గా  వుండే ఇలాటి డైనమిక్స్, మిర్రర్ ఎఫెక్ట్ గా అమెరికన్ ఫిలిం నోయర్ లో,  దాని ఆధునిక రూపమైన నియో నోయర్ సినిమాల్లో వుంటాయి. అవసరాన్ని బట్టి ఒక సీను ముగిసి, ఇంకో సీను ప్రారంభమయ్యే సంధికాలంలో ఈ ఎఫెక్ట్ వేసి కాసేపు ప్రేక్షకుల మెదళ్ళని అటూ ఇటూ మెలికలు తిప్పి వదుల్తారు చావండని. నోయర్ సినిమాల్లో విధిగా వుండాల్సిన తొమ్మిది ఎలిమెంట్స్ లో మిర్రర్ ఎఫెక్ట్ ఒకటి. స్పెషలైజుడు జానర్ అయిన నోయర్ ఎలిమెంటు ఇక్కడ ఎందుకొచ్చిందంటే, రెగ్యులర్ కమర్షియల్స్ దేన్నైనా లాగేసుకుని సొంతం చేసుకుంటాయి మరి. రెగ్యులర్ కమర్షియల్స్ కి జానర్ మర్యాదలేముంటాయి. కొన్ని కమర్షియల్స్ కి మానమర్యాదలు కూడా వుండవు. 

          ఐతే ఇలా సీత పాత్ర ఎంట్రీతో ఈ రెండో పొర కథా నేపధ్యంతో,  ఇది హీరోయిన్ ఓరియెంటెడ్ మూవీ అని ఇంకా స్పష్టం కావడం లేదు. ‘సీత’ అని టైటిల్ వున్నంత మాత్రాన అలా భావించుకోలేం. హీరో పాత్ర పెద్ద వాడై కథలోకి వస్తేనే అతణ్ణి బట్టి ఏ విషయం తెలుస్తుంది. హీరో పాత్ర పోషిస్తున్నది కూడా ఎవరో చిన్న హీరో కాదు. ప్రేక్షకులకి బాగా తెలిసి వున్న యాక్షన్ హీరో బెల్లంకొండ శ్రీనివాస్. కాబట్టి అతడిది కూడా మంచి రేంజి వున్న పాత్రే అయి వుంటుందని ఎదురు చూస్తూంటారు ప్రేక్షకులు ఈ 25 నిమిషాల కథనంతో. మరి చిన్నప్పటి రామ్ తో ఆ ఆసక్తికర ‘సెటప్’,  పెద్దయ్యాక ప్రేక్షకులేసుకునే అంచనాల మేరకు ‘పే ఆఫ్’ అయ్యే క్యారెక్టర్ గానే ఎంట్రీ ఇస్తాడా లేదా చూడాలి. 25 నిమిషాలు గడుస్తున్నా హీరో ఎంట్రీ ఇవ్వలేదంటే, ఇచ్చినప్పుడు థ్రిల్ చేస్తూ ఎంట్రీ ఇవ్వాల్సి వుంటుంది. సీత ఒక్కతే మిర్రర్ ఎఫెక్ట్ వేసుకుని ధూంధాం చేస్తే చాలదు. ఆమె మిర్రర్స్ ని బద్దలు కొట్టుకుంటూ హీరో రావాలి. 

          మార్కెట్ యాస్పెక్ట్ - ఎకనమిక్స్ :  బిగినింగ్ విభాగంలో సీత పాత్రతో ఈ రెండో పొర కథా నేపధ్యంతో, ఈ సినిమా మార్కెట్ యాస్పెక్ట్ వచ్చేసి ఎకనమిక్స్ అని తెలుస్తోంది. నేటి ఎంటర్ టైనర్స్ యూత్ అప్పీల్ తో వుండాలంటే రెండే రెండు మార్కెట్ యాస్పెక్ట్స్ వున్నాయి - ఎకనమిక్స్ (మనీ), రోమాంటిక్స్ (లవ్). ఈ రెండూ కథాంశాలుగా నాడిని పట్టుకున్నఎంటర్ టైనర్స్ కి మార్కెట్ వుంటోంది. ఈ మధ్య ఎకనమిక్స్ తో వచ్చిన  ‘హుషారు’ స్లీపర్ హిట్టయిన విషయం తెలిసిందే. ఎకనమిక్స్ లేదా రోమాంటిక్స్  మార్కెట్ యాస్పెక్ట్ ని పట్టుకున్న సినిమాలు -  అవి కూడా నేటి యువతీ యువకులకి సరీగ్గా రీసెర్చి సహిత దర్పణం పట్టేవైతేనే హిట్టవుతున్నాయి. డబ్బుగురించిన ఆరాటంతో ‘సీత’ ఇలా ఎకనమిక్స్ బ్రాకెట్లో చేరింది. అయితే ఈ ఎకనమిక్స్ యాస్పెక్ట్ తో,  క్రియేటివ్ యాస్పెక్ట్ వచ్చేసి యూత్ అప్పీల్ ని తీర్చే విధంగా లేదని, ఈ బిగినింగ్ విభాగంలోనే మూస ఫార్ములా పోకడలతో తెలిసిపోతోంది.    

              
          ఇలా బిగినింగ్ విభాగంలో 1. ముఖ్య పాత్రల పరిచయాలు, 2. కథా నేపథ్యాలనే మొదటి రెండు స్క్రిప్టింగ్ టూల్స్ ఏర్పాటయ్యాక, ఇక మూడో టూల్ అయిన ‘సమస్యకి దారి తీసే పరిస్థితుల కల్పన’ ఎలా వుందో చూద్దాం. 

          సమస్యకి దారితీసే పరిస్థితుల కల్పన సీత ఎంట్రీ తోనే వుంది ఇళ్ళు పడగొట్టిస్తూ. అయితే చూస్తే ఎలా వుంటుందంటే, ఈ ఇళ్ళు పడగొట్టించడం సీత క్యారెక్టర్ ఎలాటిదో ఎస్టాబ్లిష్ చేస్తున్న ఓ శాంపిల్ సీను మాత్రమేననీ, కథకి సంబంధించి ఇంకా బిగినింగ్ కథనం మొదలవ లేదనీ అన్పించేలా వుంటుంది. కానీ కాదు. బిగినింగ్ విభాగాన్నిరొటీన్ గా,  లీనియర్ కథనంతో బలహీనంగా, బారుగా చూపించకుండా, డైనమిక్స్ తో నాన్ లీనియర్ బిగినింగ్ కథనం చేశారని, తర్వాతి సీను పబ్ సాంగ్ లో అర్ధమై ఆసక్తి రేపుతుంది. అంటే ఈ బిగినింగ్ విభాగపు కథనాన్ని, బిగినింగ్ విభాగాన్ని విభజిస్తే అందులో వుండే మిడిల్ తో ప్రారంభించి, బిగినింగ్ కొచ్చి, ఎండ్ తో ముగించారన్నమాట. 

          స్ట్రక్చర్ ఎప్పుడూ ఒక్కటే, అది మారదు. అది మెకానికల్. స్ట్రక్చర్ తో ఇలాటి చలన శీలమైన క్రియేటివిటీలే స్ట్రక్చర్ కి జీవాన్ని పోస్తాయి. స్థలం ఖాళీ చేయించి పబ్ సాంగే సుకుంటున్న సీత దగ్గరికి ఎమ్మెల్యే బసవరాజు వచ్చి, అగ్రిమెంట్ గుర్తుచేయడంతో ముందుకు పోతోందనుకుంటున్న బిగినింగ్ కథనం ఒక్కసారిగా యూ టర్న్ తీసుకుంటుంది. ఈ బిగినింగ్ కథనం ఆఫ్ స్క్రీన్ లో అసలెప్పుడో ప్రారంభమై, ఇప్పుడు మిడిల్ లో వున్నామని ఇప్పుడర్ధ మవుతుంది. మరి ఈ బిగినింగ్ విభాగంలో ఆఫ్ స్క్రీన్ లోవున్న బిగినింగ్ విభాగపు ఆ బిగినింగ్ కథనం ఏమిటి? 

          ఇది వీడియో క్లిప్పింగ్స్ లో తెలుస్తుంది. ఇప్పుడు ఈ క్లిప్పింగ్స్ లో కనపడే బిగినింగ్ సీన్స్  ఫ్లాష్ బ్యాక్ అనుకోవాలి. ఇందులో స్థల సమస్య కోసం ఎమ్మెల్యేతో సీత నెలరోజులపాటు అతడితో సహజీవనం చేసే ఒప్పందం చేసుకున్నట్టు వుంటుంది. ఇప్పుడు తిరిగి మిడిల్ కంటిన్యూ అవుతుంది. ఇప్పడు ఆ ఒప్పందాన్ని తిప్పికొట్టి అడ్డం తిరుగుతుంది. ఇది ఈ నాన్ లీనియర్ కథనానికి ఎండ్ విభాగం. ఇక ఇప్పుడు కథనం ప్రెజెంట్ టైంలో ముందుకు వెళ్తుంది. ఆమెని కామించిన బసవరాజు రెచ్చిపోయి ఆమెకి ఇబ్బందులు సృష్టించడం, ఆ ఇబ్బందుల్లో చందూలాల్ అప్పు తీర్చే ఇబ్బంది ప్రధాన మైనది కావడం వంటి కథనం వుంటుంది. ఇలా సమస్యకి దారి తీసే పరిస్థితుల కల్పనలో ఒక పార్టు  చేసుకొచ్చారు. అయితే ఇది తూతూ మంత్రంగా వుంటే సరిపోతుందా? ఇది ఈ బిగినింగ్ విభాగపు ముగింపులో వచ్చే ప్లాట్ పాయింట్ వన్ దగ్గర్ సీతకి సరైన గోల్ ని ఏర్పాటు చేస్తుందా? చూద్దాం...

       సీతకి ఆ స్థలం ఖాళీ చేయించడం కావాలి : ఎమ్మెల్యేకి బదులుగా ఆమెతో సహజీవనం కావాలి. అప్పుడా ఎమ్మెల్యే ఏమనాలి? ముందు సహజీవనం చెయ్, అప్పుడు ఖాళీ చేయిస్తాననాలి. సింపుల్. అంతేగానీ ఖాళీ చేయించి పడుకోబోతే తంతుంది. ఇప్పుడా పనే చేసింది. ముందు పడుకో, తర్వాత అడుక్కో అనాలి. సింపుల్. అయితే తను రాస్తున్న కథకి కథా సౌలభ్యం కోసం కథకుడు కామన్ సెన్సు నీ, పాత్రల్నీ కిల్ చేస్తున్నాడు. సరే ఎమ్మెల్యే ఏదో అనుకున్నాడు. మళ్ళీ దీనికి రిటెన్ అగ్రిమెంటు ఆమె సంతకంతో సహా దేనికి? తనే ఇరుక్కోవడానికా ఆమె కంప్లెయింట్ చేస్తే? ఆ వీడియో క్లిప్పింగ్స్ ఏమిటి తన వెధవాయి తనానికి సాక్ష్యంగా?  

          ఇక సీత వైపు చూస్తే, ఆ కబ్జా చేసి వున్న స్థలాన్ని ఎలా కొంది పదికోట్లు పెట్టి? ఆ స్థలం ఎప్పుడో పాతికేళ్ళ క్రితం దేశాంతరం వెళ్ళిపోయిన ఎన్నారై దన్నారు. ఇంకెవరో దొంగ పత్రాలతో అమ్మితే కొనేయడమేమిటి? ఇక్కడ షాపింగ్ కాంప్లెక్స్ కట్టాలని ఆలోచన. అందుకు లోను తీసుకోవాలన్నా ఒరిజినల్ పత్రాలుండాలిగా? 

          సీత కథకి ఒక ఫ్లాష్ బ్యాక్ వుంటుంది. ఇది మిడిల్ విభాగంలో వస్తుంది. అందులో సీత ఈ స్థలం ఎలా ఎందుకు కొన్నదో తెలుస్తుంది. ఆమె రిచ్ గా ఎదగడానికి తండ్రిని యాభై కోట్లు అడిగితే, అతను కష్టంగా ఏడు కోట్లు ఇస్తాడు. ఆ డబ్బుతో సంవత్సరంలో వంద కోట్లు సంపాదించి చూపిస్తానని వచ్చేస్తుంది. ఆ ఏడు కోట్లకి ఇంకో ఐదు కోట్లు చందూలాల్ దగ్గర ఆప్పు చేసి,  పది కోట్లతో ఈ స్థలం కొందన్నమాట.

          అసలే ఎన్నారై స్థలం, దాన్ని ఇంకెవరో అమ్మాడు, ఆ స్థలంలో ఇళ్ళేసుకుని జనాలు. ఐనా కొనేయడమేమిటి? కాపాడమని ఎమ్మెల్యేని ఆశ్రయించడ మేమిటి? ఎమ్మెల్యే తో సహజీవన ఒప్పందం చేసుకోవడమేమిటి? సరే, తర్వాత అడ్డం తిరగడం కోసమే ఎమ్మెల్యేని బురిడీ కొట్టించిందనుకుందాం - పాత్ర తత్వం ఇదే కాబట్టి - కానీ అడ్డం తిరిగినప్పుడు, అతను  మేనిఫెస్టోనే పట్టించుకోలేదు, కాబట్టి తనెందుకు అగ్రిమెంట్ ని కేర్ చేస్తానని  సిల్లీగా అనడమేమిటి?  నేనే అగ్రిమెంటు బయట పెడతాను, నిన్ను ‘మీటూ’ బకరాని చేస్తా - అని స్ట్రాంగ్ డోసు ఇవ్వక? 

          సమస్యకి దారితీసే పరిస్థితుల కల్పనని ఇలాటి బలమైన మలుపుకి తీసుకురాకుండా,  ఇద్దరి  వైపు నుంచీ  కూడా పైపై పాత్ర చిత్రణ, కథనం చేశారు. ఇదిలా వుంటే,  ఇక చందూలాల్ అప్పుతీర్చే కీలక పాయింటు. ఈ పాయింటు మీదే మొత్తం సినిమా అంతా నడుస్తుంది. ఇది సినిమా స్థాయికి చాలని పాయింటుగా కన్పించడమే గాక, ఇది కూడా పైపైన తేలిపోయే మలుపు.  

          ఆరు నెలలు గడువు పెట్టి అప్పు తీసుకుంది. ఇప్పుడు ఎమ్మెల్యేతో గొడవల కారణంగా మూడు నెలలకే తీర్చమని బెదిరింపులు వస్తున్నాయి. తీర్చనవసరం లేదు. గడువు తీరినపపుడే తీర్చవచ్చు. ఎక్కడ పంచాయితీ పెట్టినా ఇదే తీర్పు. కోర్టు కెళ్ళినా ఇదే మందలింపు  వస్తుంది - అప్పు పత్రాలుంటే. లేకుండా నోటిమాటగా అనామతు ఖాతా అయితే చందూలాలే శుభ్రంగా మట్టి కొట్టుకు పోతాడు. ఆమె ఇచ్చినప్పుడు తీసుకోవాల్సిందే.  ఇది తెలుసుకోకుండా, అప్పుతీర్చడం కోసం సినిమా అంతా పరుగులు తీస్తూనే వుంటుంది సీత! అయినా క్యాలిక్యులేటర్ అవసరం లేదనుకుంటే ఏమనలేం. 

      ఇక సమస్యకి దారితీసే పరిస్థితుల కల్పనలో  రెండో పార్టు చూస్తే :  చందూలాల్ అప్పు చెల్లించే వర్రీతో వున్న సీతకి తండ్రి పోయాడని తెలిసి ఐడియా వస్తుంది. తండ్రి కున్న ఆస్తి ఐదువేల కోట్లు తనదే అనుకుని బయల్దేరుతుంది. అంటే పాత్రకి తండ్రికి చేసిన చాలెంజి ప్రకారం, తానుగా వందకోట్లు సంపాదించి  చూపాలన్న ధ్యేయం కూడా ఇప్పుడు లేదన్న మాట. చనిపోయిన తండ్రి ఆస్తి కొట్టేయాలని బయల్దేరుతుంది. తను నెగెటివ్ పాత్రే, కానీ అర్ధం పర్ధం లేని నెగెటివ్ పాత్ర. ఇలా ఎందుకు జరిగిందంటే ట్విస్టుల మీద ట్విస్టులతో కథనం నడపడం వల్ల. 2007 లో ఇలాగే ‘క్యాష్’ అనే హిందీ మల్టీ స్టారర్ వచ్చింది. ఇది ట్విస్టుల మీద ట్విస్టులకి పరాకాష్టగా అట్టర్ ఫ్లాపయింది. 

          ఈ పాతిక నిమిషాల కేవలం ఉపోద్ఘాతంగా వుండాల్సిన  బిగినింగ్ విభాగంలోనే సీతకి ఎన్ని ట్విస్టులు. ఇంకా కథే ప్రారంభం కాలేదు, అప్పుడే ఎన్ని ట్విస్టులు, ఎన్నికష్టాలు. బిగినింగ్ బిజినెస్ ధర్మానికే విరుద్ధంగా ఈ కష్టాలు, ట్విస్టులు. ఈ బిగినింగ్ విభాగం చూస్తూంటే ల్యాండ్ కొన్నది, ఇరుక్కుంది. ఎమ్మెల్యేని అడిగింది, అక్కడా ఇరుక్కుంది. ఎమ్మెల్యే అగ్రిమెంటుని తిప్పి కొట్టింది, ఇరుక్కుంది. ఎమ్మెల్యే వెంటాడేడు - ఆమె క్రెడిట్ కార్డులని బ్లాక్ చేయించాడు (ఎలా చేయిస్తాడు), మళ్ళీ ఇరుక్కుంది, ఖాళీ చేయించిన ఆమె స్థలంలో మళ్ళీ జనాల్ని ఎగదోశాడు, ఇరుక్కుంది, చందూలాల్ ని ఎగదోశాడు, ఇరుక్కుంది...ఇన్ని ట్విస్టుల్లోంచి ఫాదర్ చనిపోయాడన్న ట్విస్టు, ఇందులోంచి ఫాదర్ ఆస్తి కొట్టేయాలన్న ట్విస్టూ... 

          సమస్యకి దారి తీసే పరిస్థితుల కల్పనకి ఇన్ని ట్విస్టులా? ఇన్ని కష్టాలా? ల్యాండ్ కొన్నాక, ఎమ్మెల్యేతో అగ్రిమెంట్ తో అలాగే కథ చేయాలనుకుంటే - పూర్తిగా సింప్లీఫై చేసేయ వచ్చు కథనాన్ని. చందూలాల్ లేకుండా సొంత డబ్బుతోనే స్థలం కొనుక్కోవచ్చు. అదీ అడ్వాన్సు మాత్రమే ఇచ్చి వుండొచ్చు. తర్వాత జనాల్ని ఖాళీ చేయించేందుకు అలాగే ఎమ్మెల్యేతో సహజీవన అగ్రిమెంట్ (ఇది కామన్ సెన్సు కాకపోయినా వదిలేద్దాం మాట వరసకి) చేసుకున్నాక, ఎమ్మెల్యే సహజీవనానికి వొత్తిడి చేస్తున్నప్పుడు, ఆమె తండ్రి చనిపోయిన వార్త వస్తే సరిపోవచ్చు. ఇంటికి వెళ్లి వచ్చి అగ్రిమెంట్ పూర్తి చేస్తానని ఆమె అంటే ఎంతటి మదన కామరాజూ ఈ పరిస్థితిలో కాదనక పోవచ్చు. అప్పుడు ఆమెకి తండ్రి ఆస్తి కొట్టేయాలన్న ఐడియాలే వచ్చి వుండకపోవచ్చు. ఎమ్మెల్యేతో  ట్విస్టులూ కష్టాలూ లేవు కాబట్టి - ఒక్క అగ్రిమెంట్ తప్ప. అప్పుడు వంద కోట్లు సంపాదిస్తానని తండ్రికి చేసిన ఛాలెంజి కే కట్టుబడే వుండొచ్చు తను. తను నెగెటివే. ఆ నెగెటివిజం తండ్రితో చాలెంజి చేయడం వరకే. తండ్రి చనిపోయింది చూసి ఆస్తి కొట్టేయడానికి కాదు- నెగెటివిజానికి కూడా ఇగో వుంటుంది. ఆ ఇగోతో చాలెంజిని పూర్తి చేయాలనే ప్రయత్నిస్తుంది తప్ప, సందు దొరికింది కదాని తండ్రి ఆస్తిని కొట్టేసే నీచానికి పాల్పడదు. అన్ని ట్విస్టులూ కష్టాలూ పెట్టారు కాబట్టే పాత్రకి తండ్రి ఆస్తిని  కొట్టేసే అయిడియా తప్పని సరయింది పరమ తప్పుడుగా. 

        సింపుల్ గా స్థలం కొన్నది, ఎమ్మెల్యేతో అగ్రిమెంటు చేసుకుంది, తీరా అగ్రిమెంటు పైకి తీసేసరికి తండ్రి చనిపోయి అగ్రిమెంటు పెండింగులో పడిపోయింది - ఇలా కేవలం మూడే మూడు కీలక సన్నివేశాల ఆధారంగా బిగినింగ్ లో కథని సింపుల్ గా  సెటప్ చేయవచ్చు. తర్వాత మిడిల్లో నడపబోయే కథని మాత్రమే బిగినింగ్ అందుకవసరమైన అంశాలతో సెటప్ చేస్తారు. అంతే గానీ బిగినింగ్ లోనే సెటప్ చేసి,  బిగినింగ్ లోనే కథ నడపరు. క్యాలిక్యులేటర్ పగిలిపోతుంది. 

          మరి కేవలం ఇంతే వుంటే పాతిక నిమిషాల కథనం ఏముంటుంది? ఈ విషయానికే వద్దాం. ఇది ఎకనమిక్స్ మార్కెట్ యాస్పెక్ట్ తో వున్న కథ కాబట్టి,  ఇందులో రోమాంటిక్స్ వుండకూడదా? ఎందుకుండ కూడదు - రోమాంటిక్స్ లో ఎకనమిక్స్ లేకున్నా చెల్లుతుందేమో గానీ, ఎకనమిక్స్ లో రోమాంటిక్స్ లేకపోతే  చెల్లుబాటు కాదు.  ‘సీత’ అనే ఈ స్టార్స్ వున్న కమర్షియల్, బొత్తిగా రోమాంటిక్స్ లేని ఎకనమిక్స్ గా, ఎడారిలా డ్రైగా వుండిపోయింది. విలన్ కోరికలతో హీరోయిన్ తో ఎరోటిక్ ప్లే లేకుండా, హీరో హీరోయిన్ల మధ్య రోమాన్సు కూడా లేకుండా, భూటాన్ సన్యాసుల మఠం లాగే వుంది. ఎకనమిక్స్ గ్రౌండ్స్ మీద ఎరోటిక్ - రోమాంటికల్ థ్రిల్లర్ గా వుండాల్సిన ఈ కమర్షియల్, క్యాలిక్యులేటర్ లేక జ్వరానపడి ధర్మామీటర్ ని డిమాండ్ చేస్తోంది. 

          అందుకని దీనికి వాత్సాయన చికిత్స ఏమిటంటే, ఇంకా హీరో ఎంట్రీ ఇవ్వలేదు, విలన్ కామాకలిని వాడు కూడా మనిషే అని గుర్తించి, ఆ పరమైన ఎరోటిక్ ప్లే హీరోయిన్ తో చేసుకునే అవకాశం కల్పించాలి. ఇది ముందు కథ కవసరమైన సెటప్. ఇది బిగినింగ్ విభాగాన్ని భర్తీ చేస్తూ ఎంటర్ టైన్ కూడా చేస్తుంది. 

          ఇప్పుడిక సీత తండ్రి అంత్యక్రియలకి వెళ్ళడం ప్లాట్ పాయింట్ వన్ ఘట్టం. అంటే సమస్యకి దారితీసే పరిస్థితుల కల్పన చేసుకొచ్చిన ఫలితంగా, ఇక బిగినింగ్ ని ముగిస్తూ సమస్యని - అంటే ప్లాట్ పాయింట్ వన్ ని ఏర్పరచడం. ఈ సమస్య లోంచి పాత్రకి గోల్ ని పుట్టించడం. ఈ గోల్ తో మిడిల్ ని ప్రారంభిస్తూ కథ నడపడం. ఏ క్యాలిక్యులేటర్ దీన్ని కాదంటుంది. పాతకి తాతల్లాంటి తెలుగు సినిమాల్లో చూసినా ఇదే క్యాలిక్యులేటర్ నేతుల వాసనతో వుంటుంది. క్యాలిక్యులేటర్ కి తాతలు తాగిన నేతుల వాసనే వుంటుంది. తాతల దగ్గర పుట్టి ప్రవహించకుండా ఏ సినిమా కథా లేదు. 

          ఇక తండ్రి రాసిన వీలునామాలో తల్లికి చెందిన మంగళ సూత్రం  మాత్రమే తనకి దక్కి,  మిగతా అయిదు వేల కోట్ల ఆస్తీ ఎక్కడో భూటాన్ వాడికి దక్కడం ప్లాట్ పాయింట్ వన్ సీను. షాకయిన సీత,  భూటాన్ బయల్దేరడం మిడిల్ ప్రారంభం. అంటే ఈ సినిమాకి కథా ప్రారంభం.

(మిడిల్ రేపు)

―సికిందర్
telugurajyam.com