1283 : స్పెషల్ న్యూస్!

 

ఆ రోజు జనవరి 12,1968. సూపర్‌స్టార్‌ కృష్ణ నటించిన 11 వ సినిమా ‘అసాధ్యుడు’ విడుదల. వెనక్కి వెళ్తే ఆ రోజు 1965 మార్చి 31. సూపర్ స్టార్ కృష్ణ నటించిన మొదటి సినిమా ‘తేనెమనసులు’ విడుదల. ఇది ఉగాది విడుదలైతే అది సంక్రాంతి విడుదల. రెండూ శతదినోత్సవాలు జరుపుకున్నాయి. అయితే కృష్ణకి సంక్రాంతి సెంటిమెంటు మొదలైంది ‘అసాధ్యుడు’ విజయంతో. ఆ నాటి నుంచి సంక్రాంతికి తన సినిమా ఒకటి విడుదల అవ్వాలని నియమం పెట్టుకున్నారు. దాంతో రికార్డు బ్రేకింగ్ 30 సంక్రాంతి సినిమాలిచ్చారు. ఎన్టీఆర్ 28 సంక్రాంతి సినిమాలిస్తే తను రెండాకులు ఎక్కువే చదివి 30 ఇచ్చారు.

        ఒక సంక్రాంతికి ఎన్టీఆర్ సినిమాతో కూడా తలపడ్డారు- 1977 జనవరి 14 సంక్రాంతి రోజున ఎన్టీఆర్ నటించి, దర్శకత్వం వహించి, నిర్మించిన ‘దానవీర శూర కర్ణ’ పౌరాణికంతో కృష్ణ తన పౌరాణికం ‘కురుక్షేత్రం’ ని ఎదురుపెట్టి ఢీ కొన్నారు. కమలాకర కామేశ్వరరావు దర్శకత్వంలో కృష్ణతో బాటు శోభన్ బాబు, కృష్ణం రాజు, జమునలతో మల్టీస్టారర్ గా తీసిన పౌరణికం, ఎన్టీఆర్ త్రిపాత్రాభినయం ముందు నిలబడలేకపోయింది. కృష్ణుడు, అర్జునుడు, కర్ణుడు పాత్రలు తనే వేసి కృష్ణ కూడా త్రిపాత్రాభినయం చేసి వుంటే ఎన్టీఆర్ తో ఎలా వుండేదో.

          

కృష్ణ మొదటి సంక్రాంతి హిట్ 'అసాధ్యుడు' సంక్రాంతి సినిమా అంటే కుటుంబ కథతో వుండాలన్న అప్పటి నమ్మకాన్ని కూడా కాదని జేమ్స్ బాండ్ టైపు యాక్షన్ థ్రిలర్ గా నిర్మించారు. 1966 లో తను నటించిన ‘గూఢచారి 116’ ఘన విజయంతో దీనికి స్ఫూర్తి. ఇక కృష్ణ తెలుగు సినిమాలకి కొత్త ఒరవడిని సృష్టిస్తూ ఆంధ్రా జేమ్స్ బాండ్ గా మారిపోయారు.

          

సంక్రాంతి సినిమాల బాక్సాఫీసు పరీక్షలో తమ అదృష్టాన్ని పరీక్షించుకున్న స్టార్లు ఇంకా చాలా మందే వున్నారు- అక్కినేని నాగేశ్వరరావు 1971 సంక్రాంతికి విడుదలైన ‘దసరా బుల్లోడు’ కల్ట్ మ్యూజికల్ హిట్ తో అతి పెద్ద సంక్రాంతి హీరో అయ్యారు. ఇంకో పెద్ద హిట్, ఎవర్‌గ్రీన్ క్లాసిక్ ‘సీతారామయ్య గారి మనవరాలు’ 1991 సంక్రాంతికిచ్చి, పెద్ద తరహా పాత్రతో సెకండ్ ఇన్నింగ్స్ ని ప్రారంభించారు.

          

సూపర్ స్టార్ కృష్ణ గరిష్ట విడుదలల విషయానికి వస్తే దాదాపు 350 సినిమాలకి పైగా విస్తరించిన కెరీర్‌లో, 30 సినిమాలు సంక్రాంతి సినిమాలే. 1968 లో మొదటి సంక్రాంతి సినిమా  ‘అసాధ్యుడు’ తర్వాత, 1969 లో శోభన్ బాబుతో కలిసి ‘మంచి మిత్రులు’, 1973 లో కౌబాయ్ ‘మంచి వాళ్ళకు మంచి వాడు’, 1976 లో ‘పాడి పంటలు’, 1977 లో ‘కురుక్షేత్రం’, 1978 లో ‘ఇంద్రధనస్సు’, 1980 లో ‘భలేకృష్ణుడు’, 1981 లో ‘ఊరికి మొనగాడు’, 1983 లో ‘బెజవాడ బెబ్బులి’, 1984 లో ‘ఇద్దరు దొంగలు’, 1985 లో ‘అగ్ని పర్వతం’, 1987 లో ‘తండ్రీ కొడుకుల ఛాలెంజ్’, 1988 లో ‘కలియుగ కర్ణుడు’, 1989 లో ‘రాజకీయ చదరంగం’, 1990 లో ‘ఇన్‌స్పెక్టర్ రుద్ర’, 1992 లో ‘పరమ శివుడు’, 1993 లో ‘పచ్చని సంసారం’, 1994 లో ‘నంబర్ వన్’, 1995 లో ‘అమ్మ దొంగా’ ...ఇలా సంక్రాంతుల సరదా సాగింది.

        

ఇక చిరంజీవి, బాలకృష్ణల విషయం తెలిసిందే. నిన్నటి వ్యాసంలో చూశాం. పోతే  10 సంక్రాంతి సినిమాలతో వెంకటేష్...’ధర్మ చక్రం’, ‘ప్రేమ’, ‘చంటి’, ‘కలిసుందాం రా’, ‘సీతమ్మ వాకిట్లో సిరిమల్లె చెట్టు” వంటి హిట్స్ ఇచ్చారు. మహేష్ బాబు 5 సినిమాలు ...’ఒక్కడు’, ‘టక్కరి దొంగ’, ‘బిజినెస్ మేన్’, ‘సీతమ్మ వాకిట్లో సిరిమల్లె చెట్టు’, ‘1-నేనొక్కడినే’, ‘సరిలేరు నీకెవ్వరు’. జూనియర్ ఎన్టీఆర్ 4 సినిమాలు... ‘నాన్నకు ప్రేమతో’, ‘అదుర్స్’, ‘నా అల్లుడు’, ‘నాగ’. అల్లు అర్జున్ 2 సినిమాలు...’దేశముదురు’, ‘అల వైకుంఠపురంలో’. రామ్ చరణ్ 2 సినిమాలు... ‘నాయక్’, ‘ఎవడు’, ‘వినయ విధేయ రామ’. ప్రభాస్ 2 సినిమాలు...’వర్షం’, ‘యోగి’.

        

విచిత్రమేమిటంటే సంక్రాంతి టైటిల్ తో సంక్రాంతికి విడుదల కాని  సినిమా ఒకటుంది. దాసరి నారాయణరావు దర్శకత్వం వహించారు. అక్కినేని, కృష్ణ, శ్రీదేవి, జయసుధలతో మల్టీస్టారర్. ఇది 1983 ఫిబ్రవరి 12 న సంక్రాంతి వెళ్ళిపోయాక విడుదలైంది ‘ఊరంతా సంక్రాంతి’. ‘సంబరాలా సంకురాత్రి...ఊరంతా పిలిచిందీ... ఏడాదికో పండగా… ఆ… బ్రతుకంత తొలి పండగా’ అనే పాటతో పండగ చేసుకున్నారు.

        

ఇప్పుడు సంక్రాంతి పాటలు సంక్రాంతి సినిమాల్లో కూడా లేవు. మారణాయుధాలతో మరణ మృదంగాలు తప్ప. కృష్ణ ఏ మూహూర్తాన ‘అసాధ్యుడు’ యాక్షన్ సినిమాతో తన సంక్రాంతి సినిమాల పరంపరని ప్రారంభించారో- కొత్త స్టార్ల ట్రెండ్ లో సంక్రాంతి సినిమాలంటే రక్తం కళ్ళ జూసే యాక్షన్ సినిమాలుగానే మారిపోయాయి!

***

 

1282 : స్పెషల్ న్యూస్!

 

తెలుగు సినిమాల క్యాలెండర్ ని సంక్రాంతి నుంచి సంక్రాంతికి మార్చుకోవాలి. తెలుగు సినిమాల కొత్త సంవత్సరం సంక్రాంతి నుంచే ప్రారంభమవుతుంది. జనవరిలో సంక్రాంతిని ప్రతిష్టాత్మకంగా తీసుకుని కొత్త సినిమాల విడుదలలు పోటాపోటీగా వుంటాయి. ఈ పోటీలో ‘ఎవరు సంక్రాంతి హీరో’ అన్న శీర్షికతో ఇంటర్నెట్ కి పూర్వం ప్రింట్ మీడియాలో ఆసక్తిగా ఎదురు చూసేలా కథనాలు వెలువడేవి. సినిమా చరిత్రలో మొదటి సంక్రాంతి హీరో ఎవరంటే పోటీ లేకుండా సోలోగా ఎన్టీఆరే. ఎన్టీఆర్ నటించిన ఎన్నో సినిమాలు సంక్రాంతికి విడుదలై హిట్టయ్యాయి. 28 సంక్రాంతుల్లో 28 సినిమాలు విడుదల చేసిన ఘనత ఎన్టీఆర్ దే.

        1954 లో ‘చంద్రహారం’ తో మొదలు పెడితే 1981 లో ‘ప్రేమ సింహాసనం’ వరకూ -మిస్సమ్మ, తెనాలి రామకృష్ణ, వెంకటేశ్వర మహాత్మ్యం, శ్రీకృష్ణార్జున యుద్ధం, గులేబకావళి కథ, గుడి గంటలు, పాండవ వనవాసం, శ్రీకృష్ణ పాండవీయం, తల్లా పెళ్లామా, శ్రీకృష్ణ విజయం, సతీ సావిత్రి మొదలైన చిరస్మరణీయమైన 28 సినిమాల శ్రేణి కనిపిస్తుంది.     

తర్వాత అక్కినేని నాగేశ్వరరావు అడపా దడపా సంక్రాంతి సినిమాలతో వచ్చినా అవి తక్కువే. ఎప్పుడూ ఎన్టీఆర్, ఏఎన్నార్ లు సంక్రాంతి సినిమాలతో ముఖా ముఖీ అయింది లేదు. తర్వాత ఎక్కువ సంక్రాంతి సినిమాలు చేసింది హీరో కృష్ణ. తనుకూడా సోలోగానే వచ్చేవారు. ఇక చిరంజీవి రంగప్రవేశం చేశాక ఆయన సంక్రాంతికి విడుదలైన సినిమాలు ఢమాల్మన్నాయి. 1983 సంక్రాంతికి విడుదలైన ‘ప్రేమ పిచ్చోళ్లు’ (హిందీ ‘షౌకీన్’ రీమేక్) సంక్రాంతికి విడుదలైన చిరంజీవి మొదటి చలన చిత్రం. ఆ పరాజయం తర్వాత, సంక్రాంతికి విడుదలైన మరో  రెండు సినిమాలు హిట్ కాలేదు. అలాగే 1996లో  బాలకృష్ణ నటించిన మొదటి సంక్రాంతి సినిమా ‘వంశానికొక్కడు’ హిట్ కాలేదు.

        

1997 చరిత్రాత్మక సంవత్సరం. ఇద్దరి మధ్య సంక్రాతి సినిమాల పోటీ ప్రారంభమైన సంవత్సరం. చిరంజీవి ‘హిట్లర్’ తో, బాలకృష్ణ ‘పెద్దన్నయ్య’ తో తలపడి ఇద్దరూ సంక్రాంతి హీరోలయ్యారు. దీని తర్వాత 1999 లో చిరంజీవి ‘స్నేహం కోసం’ తో, బాలకృష్ణ  ‘సమర సింహారెడ్డి’ తో వచ్చి బాలకృష్ణ సంక్రాంతి హీరో అయిపోయారు. ‘సమరసింహా రెడ్డి’ ఆయనకి అతి పెద్ద తొలి బ్లాక్ బస్టర్ అయింది. దీని తర్వాత నుంచే మునుపెన్నడూ వూహించని చిరంజీవి -బాలకృష్ణ ల సంక్రాంతి సినిమాల రేసు అనే కొత్త పోటీ మొదలైంది. ఇద్దరి మధ్య ఎవరు సంక్రాంతి హీరో అన్న టైటిల్ కింద టాప్ చైర్ కోసం క్లాష్ ఆఫ్ ది టైటాన్స్ లాగా పోరాటం మొదలైంది. తర్వాతి రెండు సంక్రాంతి సంగ్రామాల్లో కూడా చిరంజీవే క్షతగాత్రుడిగా మిగిలారు. 2001 లో చిరంజీవి ‘మృగరాజు’ తో, బాలకృష్ణ ‘నరసింహా నాయుడు’ తో బరిలోకి దిగి బాలకృష్ణే సంక్రాంతి హీరోగా నిలిచారు. మళ్ళీ 2004 లో ‘అంజి’ తో చిరంజీవి, ‘లక్ష్మీనరసింహా’ తో బాలకృష్ణ పోటీ పడితే, బాలకృష్ణే సంక్రాంతి హీరోగా టాప్ చైర్ ని అందుకున్నారు.

        

‘మృగరాజు’ లో చిరంజీవి సింహాన్ని మచ్చిక చేసుకోవడం బ్యాక్‌డ్రాప్‌గా వున్న కథ. బాలకృష్ణ ‘నరసింహా నాయుడు’ మునుపటి బ్లాక్‌బస్టర్ హిట్ ‘సమరసింహా రెడ్డి’ తరహాలో ఫ్యాక్షనిస్ట్ నేపథ్య కథ. గ్రాఫిక్స్ తో ‘మృగరాజు’ కంటే ఫ్యాక్షన్ తో ‘నరసింహా నాయుడు’ పండుగ ప్రేక్షకులకి నచ్చింది. ఈ రెండు ఫ్యాక్షన్ సినిమాలతో బాలయ్య ఇమేజియే మారిపోయింది. రౌద్రరసం పండించగల పవర్ఫుల్ స్టార్ గా 2021 లో 61 ఏళ్ళ వయసులోనూ ‘అఖండ’ ని అఖిలాండ బ్రహ్మాండం చేశారు.

        

మళ్ళీ ఇద్దరూ 2004 లో సిగపట్లకి దిగారు. రెండు చిరు వర్సెస్ బాలయ్య సినిమాలు. ‘అంజి’ తో చిరు మరో గ్రాఫిక్స్, ‘లక్ష్మీ నరసింహా’ తో బాలయ్య మాస్ పోలీస్ యాక్షన్. ఈ సారి కూడా పండుగ ప్రేక్షకులకి గ్రాఫిక్స్ నచ్చక, బాలయ్యనే సంక్రాంతి హీరోగా చేశారు. ఇలా వరుసగా మూడు సంక్రాంతులు బాలకృష్ణ వశమయ్యాయి.

        

దీని తర్వాత 2017 లోనే తిరిగి ఇద్దరూ సంక్రాంతి రేసులోకి వచ్చారు. చిరంజీవి ‘ఖైదీ నెం 150’ తో, బాలకృష్ణ ‘గౌతమిపుత్ర శాతకర్ణి’ తో. చిరంజీవి రాజకీయాల్లో ప్రవేశించిన సుదీర్ఘ విరామం తర్వాత ప్రేక్షకుల్ని వెర్రెత్తిస్తూ మాస్ ఎంటర్ టైనర్ తో, బాలకృష్ణ 2014 లో ‘లెజండ్’ అనే సూపర్ హిట్ ఇచ్చాక,  ‘లయన్’, ‘డిక్టేటర్’ అనే రెండు ఫ్లాప్స్ తర్వాత చారిత్రికంతో. ఇద్దరూ సంక్రాంతి హీరోలయ్యారు.

        

ఇప్పుడు ఐదేళ్ళ విరామం తర్వాత 2023 లో నువ్వా నేనా అన్నట్టు దిటవు గుండెలతో నిలబడ్డారు. విశేషమేమిటంటే, ఇద్దరూ ఒకే బ్యానర్ మైత్రీ మూవీ మేకర్స్ నిర్మించిన సినిమాలతో సంక్రాంతిని శోభాయమానం చేయబోతున్నారు-  ‘వాల్తేర్ వీరయ్య’ తో చిరంజీవి, ‘వీర సింహా రెడ్డి’ తో బాలకృష్ణ. రెడ్డి, నాయుడు లేకపోతే బాలకృష్ణకి నడవదు. దీంతో ఇద్దరి అభిమానులు సంక్రాంతికి ఎవరి సినిమా పైచేయి సాధిస్తుందో అంచనాలు, జోస్యాలు మొదలు పెట్టేశారు. రెండు సినిమాల ప్రచారం అభిమానుల్ని ఉర్రూతలూగిస్తూ ప్రారంభమై పోయింది. ఇప్పటికే చిరంజీవి ‘బాస్ పార్టీ’, బాలకృష్ణ ‘జై బాలయ్య’ ప్రమోషనల్ సాంగ్స్ రెండూ యూట్యూబ్‌లో వైరల్ అయి వెర్రెత్తిస్తున్నాయి.

        

తిరిగి ఇద్దరూ 2017 లాగా సంక్రాంతి సక్సెస్ ని సమంగా పంచుకుంటారా అనేదే సస్పెన్స్. పంచుకునే అవకాశాలే ఎక్కువున్నాయి- ఎందుకంటే రెండూ కూడా మాస్ ఎంటర్ టైనర్ ఆకర్షణలతో, హీరోయిజాలతో వున్నవే. రెండూ మైత్రీ మూవీ మేకర్స్ ప్రతిష్టాత్మకంగా తీసుకుని నిర్మించినవే. ఇవి పానిండియా మూవీస్ కాకపోవచ్చు, కానీ సంక్రాంతి కోడి పందాలకే మాత్రం తీసిపోవు.

***

1280 : స్పెషల్ న్యూస్! (total articles published in 2022 : 193)

    

    2022 లో టాలీవుడ్ పని తీరు సంఖ్యా పరంగా14 హిట్స్ తో ఎప్పటిలానే స్టాండర్డ్ ఫలితాన్నిచ్చింది. ఏటా 10- 15 హిట్స్ తో 8-10 శాతం సక్సెస్ రేటుని నమోదు చేస్తూ వచ్చింది. ఈ సక్సెస్ రేటు సినిమాల సంఖ్య 100-120 వున్నప్పుడు. 2022 లో ఈ సంఖ్య బాలీవుడ్ ని కూడా తలదన్నేలా రికార్డు స్థాయిలో 300 కి చేరింది. ఒక సంవత్సరంలో 300 తెలుగు సినిమాలు నిర్మించేసి ఆలిండియా రికార్డు స్థాపించారు. అంటే నెలకు 25 సినిమాలు. అంటే దాదాపు రోజుకొకటి. ప్రేక్షకులు రోజూ ఒక సినిమా చూస్తే తప్ప డిమాండ్ - సప్లయి బ్యాలెన్స్ కాదు. ఇదలా వుంచితే రివ్యూలు రాసేవాళ్ళ పరిస్థితేంటి? ఇన్ని సినిమాలు ఎక్కడికిపోతున్నాయి? ఏమవుతున్నాయి? సంఖ్య పెరిగితే విజయా లేమైనా పెరిగాయా అంటే సగానికి పడిపోయాయి. 300 లో 14 హిట్స్ అంటే 4.67 శాతం విజయాలు. 8-10 శాతం నుంచి సగానికి పడిపోయిన టాలీవుడ్ పని తీరు.

        నష్టమెంతో టాలీవుడ్ లో లెక్క తేలదు బాలీవుడ్ లో తేలినట్టు. అయితే 300 లో 14 హిట్స్ పోగా 286 ఫ్లాప్స్ కి పెట్టుబడి వేల కోట్లలోనే వుండొచ్చు. బాలీవుడ్ 102 సినిమాలు తీసి 3 వేల కోట్లు నష్టపోతే టాలీవుడ్ 3 రెట్లు నష్టపోయి వుండాలి. ఇంత పెట్టుబడి టాలీవుడ్ లోకి వస్తోందంటే టాలీవుడ్ మెగా రిచ్ పరిశ్రమే. ఫ్లాపయిన 286 లో పెద్ద హీరోలవి, చిన్న హీరోలవి కలిపి 43 పోగా, మిగిలిన 243 చిన్నా చితకా సినిమాలే!

        

చిన్నాచితకా సినిమాలు నిర్మాతలకి నష్టాలే మిగిల్చినా ఆ సినిమాలకి పని చేసే వాళ్ళందరికీ ఉపాధి కల్పించే సామాజిక బాధ్యత వహిస్తున్నాయి. ఇది గొప్ప విషయం. కాబట్టి చిన్నా చితకా సినిమాలు తీయాల్సిందే దేశంలో నెలకొన్న నిరుద్యోగ సమస్య దృష్ట్యా. పెద్ద, మధ్యతరహా సినిమాలు ఫ్లాపయినా పెద్దగా నష్టం వుండదు- ఓటీటీలు భర్తీ చేస్తాయి కాబట్టి. ఇప్పటికే ఓటీటీలు ఫ్లాపుల అడ్డాగా పేరుబడ్డాయి. ఉందిగా సెప్టెంబరు మార్చి పైన అని పాట పాడినట్టు, థియేటర్లో ఫెయిలైనా ఓటీటీలో పాస్ అవచ్చు.

        

హిట్టయిన 14 సినిమాలేమిటో చూస్తే- 2022 జనవరిలో ఒక్క హిట్టు కూడా లేదు. ఫిబ్రవరి నుంచి వరుసగా డీజే టిల్లు, భీమ్లా నాయక్, ఆర్ ఆర్ ఆర్, సర్కారు వారి పాట, ఎఫ్ 3, మేజర్, బింబిసార, సీతారామం, కార్తికేయ 2, ఒకే ఒక్క జీవితం, గాడ్ ఫాదర్ మసూదా, హిట్ 2, ధమాకా. ఇవి చిరంజీవి, పవన్ కళ్యాణ్, మహేష్ బాబు, రవితేజ, ఎన్టీఆర్- రామ్ చరణ్, శర్వానంద్, కళ్యాణ్ రామ్, అడివి శేష్, నిఖిల్, దుల్కర్ సల్మాన్, సిద్దు జొన్నలగడ్డ నటించినవి. అడివి శేష్ రెండు నటిస్తే రెండూ హిట్టయ్యాయి.

        

ఫ్లాపయిన 43 లో చిరంజీవి (ఆచార్య), నాగార్జున (బంగార్రాజు, ఘోస్ట్), రవితేజ ఖిలాడీ, రామారావు ఆన్ డ్యూటీ), ప్రభాస్ (రాధేశ్యామ్), విజయ్ దేవరకొండ (లైగర్), నాగచైతన్య (థాంక్యూ), శర్వానంద్ (ఆడవాళ్ళూ మీకు జోహార్లు), నాని (అంటే సుందరానికి), రామ్ (వారియర్), వరుణ్ తేజ్ (గని), గోపీచంద్ (పక్కా కమర్షియల్), నిఖిల్ (18 పేజెస్), విశ్వక్ సేన్ (అశోక వనంలో అర్జున కాళ్యాణం, ఓరి దేవుడా), రానా (1945, విరాట పర్వం), సత్యదేవ్ (గాడ్సే), రాజశేఖర్ (శేఖర్), మోహన్ బాబు (సన్ ఆఫ్ ఇండియా), మంచు విష్ణు (జిన్నా), శ్రీవిష్ణు (భళా తందనాన, అల్లూరి), నాగశౌర్య (కృష్ణ వ్రింద విహారి), అల్లరి నరేష్ (ఇట్లు మారేడుమిల్లి ప్రజానీకం), అల్లు శిరీష్ (ఊర్వశివో రాక్షసివో), ఆనంద్ దేవరకొండ (హైవే), సుధీర్ బాబు (ఆ అమ్మాయి గురించి చెప్పాలి), సమంత( యశోద), తాప్సీ (మిషాన్ ఇంపాసిబుల్), కీర్తీ సురేష్ (గుడ్ లక్ సఖీ), ఆకాష్ పూరీ (చోర్ బజార్), రాజ్ తరుణ్  (స్టాండప్ రాహుల్), కల్యాణ్ దేవ్ (సూపర్ మచ్చీ), అశోక్ గల్లా (హీరో), కిరణ్ అబ్బవరం 3 సినిమాలు, ఆది సాయికుమార్ 5 సినిమాలు వున్నాయి.

        

చిన్నా చితకా విషయానికొస్తే 243 లో 50 శాతమైనా సస్పెన్స్ థ్రిల్లర్లు వుంటాయి. ప్రేమ సినిమాలు తక్కువే. ఈసారి వీటి బెడద తప్పింది. మాస్ మసాలా యాక్షన్లు, ఒకటీ అరా హార్రర్ కామెడీలు మిగిలిన సంఖ్యని భర్తీ చేశాయి. ఇవి కొత్త దర్శకులు కొత్త హీరోహీరోయిన్లతో తీసిన సినిమాలే. వందల సంఖ్యలో వీళ్ళు వస్తున్నారు, వెళ్ళిపోతున్నారు. కొత్త సంవత్సరం ఫ్రెష్ గా మళ్ళీ కొత్త కొత్త దర్శకులు, హీరోహీరోయిన్లు రావడం, వెళ్ళిపోవడం.

        

పెట్టుబడికే కాదు, కొత్త టాలెంట్స్ కి కూడా కొదవలేదు. తమ కోసం వందల సినిమాలు తీస్తున్న నిర్మాతలకి న్యాయం చేద్దామని మాత్రం ఎవరికీ లేదు. ఒకరు ‘టాప్ గేర్’ అని రివర్స్ గేర్ వేస్తారు, ఇంకొకరు ‘ఎస్ 5 నో ఎగ్జిట్’ అని అవుటైపోతారు. ఇంకొకరు ‘డ్రైవర్ జమున’ అని పాత జమానాతో వచ్చి ఎటో వెళ్ళిపోతారు. కనీస అవగాహన లేకుండా చేసే పనేదైనా వుంటే సినిమాలు తీయడమేనేమో. ఇలా 2023 లో 300 రికార్డుని కూడా బ్రేక్ చేసినా ఆశ్చర్యం లేదు. అసలు నిర్మాతలకి అవగాహన వుంటే ఇలా జరగదు. కొత్తగా వచ్చే నిర్మాతలకి అవగాహనా తరగతులు నిర్వహించాలని ఆ మధ్య అనుకున్నారు. అదింకా కార్యరూపం దాల్చడం లేదు. 2023 లోనైనా సంఖ్య తగ్గించి నాణ్యత పెంచే వైపు దృష్టి సారిస్తా రేమో చూడాలి.

—సికిందర్

 

 

1277 : స్పెషల్ న్యూస్!

‘    ఫారెస్ట్ గంప్’ స్టార్ టామ్ హాంక్స్ లేటెస్ట్ కామెడీ- డ్రామా ‘ఏ మాన్ కాల్డ్ ఒట్టో’ ఇంకో మూడు రోజుల్లో ప్రేక్షకుల ముందుకు రాబోతోంది. అయితే ఇది దశల వారీ విడుదల. సోనీ పిక్చర్స్ కొత్త పంపిణీ వ్యూహానికి తెర తీసింది. సినిమాని ఒకేసారి గ్లోబల్ విడుదలకి కాదు కదా లోకల్ విడుదలకి కూడా పూనుకోవడం లేదు. లోకల్ గా రెండంచెల్లో, గ్లోబల్ గా మూడో అంచెలో దశల వారీ విడుదలకి ప్లాన్ చేసింది. ఇది మంచి ఫలితాలు అందిస్తే ఇతర స్టూడియోలకి, పంపిణీదారులకీ మార్గ దర్శకంగా వుంటుందని భావిస్తున్నారు.

        ‘ఏ మాన్ కాల్డ్ ఒట్టో’ క్రిస్మస్ మూవీగా విడుదల చేయలేదు. దీని విడుదలని కొత్త సంవత్సరపు ఆనందోత్సాహాల్ని  క్యాష్ చేసుకునేదుకు ఉద్దేశించారు. ఎంత లేదన్నా కొత్త సంవత్సరం ఫీల్ ని ఓ 15 రోజులైనా అనుభవిస్తారు మనుషులనే వాళ్ళు. ఆ తర్వాత ఆ సంవత్సరానికి తీసుకున్న నిర్ణయాలు, చేసిన బాసలు అవతల పారేసి ముందుకెళ్ళి పోతారు. ఆ 15 రోజుల ఉత్సాహాన్ని సెలబ్రేట్ చేసుకోవడానికి ఈ మూవీని అందిస్తున్నారు. ఈ పదిహేను రోజుల్లో ఏదో ఒకరోజు అన్ని ఏరియాల్లో విడుదల చేసేస్తే దాని శోభ అన్ని రోజులూ వుండకపోవచ్చు. దశల వారీగా అందిస్తూపోతే ఒక్కో ప్రాంతానికి ఒక్కో ఫ్రెష్ నెస్ తో వ్యాపిస్తూ పోతూంటుంది. అందుకని డిసెంబర్ 30, జనవరి 6, జనవరి 13 మూడు విడతలుగా విడుదల చేస్తున్నారు.

        

ఈ మూడంచెల ప్లాట్ ఫామ్ విడుదల వ్యూహాన్ని మౌత్ టాక్ కి ముడిపెట్టి రచించారు. మొదటి విడుదల మౌత్ టాక్ రెండో విడుదలని విస్తృత పర్చడానికి, రెండో విడుదల మౌత్ టాక్ మూడో విడుదలని మరింత విస్తృత పర్చడానికీ దోహదం చేస్తాయి. డిసెంబర్ 30 న కేవలం న్యూయార్క్, లాస్ ఏంజిలిస్ నగరాల్లో పరిమిత థియేట్రికల్ రిలీజ్ చేస్తారు. 2023 జనవరి 6 న అమెరికా వ్యాప్తంగా విడుదల చేసి, జనవరి 13న ప్రపంచ వ్యాప్తంగా విడుదల చేస్తారు. ప్రేక్షకుల్లో ఉత్కంఠని పెంచే ఈ వ్యూహం విజయవంతమైతే ఈ గ్లోబల్ యుగంలో తిరిగి వెనక్కి వెళ్ళినట్టే ఓల్డ్ ఈజ్ గోల్డ్ అనుకుంటూ.

        

పాతరోజుల్లో ఇలాగే విడుదలయ్యేవి సినిమాలు. మన దగ్గర కూడా ముందు ఏ సెంటర్స్ లో, కొన్ని బి సెంటర్స్ లో విడుదలయ్యాక, మిగిలిన బి సెంటర్స్ కి వచ్చేవి. బి సెంటర్స్ నుంచి సి సెంటర్స్ కి వచ్చేవి. ఏ, బి సెంటర్స్ ని చూసి మిగిలిన బి సెంటర్స్ ప్రేక్రకులు మా వూరి కెప్పుడొస్తుందా అని చూసే వాళ్ళు, చిట్ట చివరికి బి సెంటర్స్ ని చూసి మా పల్లెటూరి కెప్పుడొస్తుందాని లొట్టలేసుకుంటూ ఎదురు చూసేవాళ్ళు పాపం సి సెంటర్స్ అభాగ్యులు. ఇదే ఇప్పుడు ఇంకో కోణంలో సోనీ పిక్చర్స్ డిస్ట్రిబ్యూషన్ ప్లాన్.

నష్టనివారణ వ్యూహమే ఇది

    ప్లాట్‌ఫామ్ రిలీజ్ ప్లాన్ అనేది ఒక రకమైన పరిమిత విడుదల. అంటే  విస్తృత విడుదల కంటే తక్కువ థియేటర్‌లలో (సాధారణంగా 599 లేదా అంతకంటే తక్కువ) మొదట రిలీజ్ చేస్తారు. సానుకూల మౌత్ టాక్ అందుకుంటే, మార్కెటింగ్ ప్రచారాన్ని పెంచి మరిన్ని థియేటర్లకి విస్తరిస్తారు. ఈ వ్యూహంతో ప్రయోజనం ఏమిటంటే, మూవీ మార్కెట్ లో నిలబడే వరకు మార్కెటింగ్ ఖర్చులు అదుపులో వుంటాయి. మౌత్ టాక్ ని బట్టి ప్రచారం, థియేటర్లూ పెంచుకుంటూ పోతారు. మొదట్లోనే ఫ్లాప్ టాక్ వస్తే, పంపిణీదారు ప్రచారాన్ని విరమించుకోవచ్చు. తద్వారా ప్రకటనల, ప్రమోషన్ల ఖర్చులు తగ్గుతాయి. థియేటర్ల హైరింగ్ వ్యయం నుంచి కూడా తప్పించుకోవచ్చు.

        

మన దగ్గర ఒకేసారి వెయ్యి థియేటర్లలో విడుదల చేసి, ఒకేసారి పదుల కోట్లు ప్రమోషన్ల ఖర్చు భరించాక, తీరా ఫ్లాపయితే ఆ యెత్తున రిలీజ్ కైన వ్యయమంతా అదనపు నష్టంగా తేలుతుంది. బయ్యర్లు రోడ్డున పడతారు.

కోపిష్టి వర్సెస్ సరదా కుటుంబం

    ‘ఫారెస్ట్ గంప్’ లో లాంటి వినోదాత్మకమైన, హత్తుకునే కథలో టామ్ హాంక్స్ ని చూపించే ‘ఏ మాన్ కాల్డ్ ఒట్టో’ 60 ఏళ్ళ వ్యక్తి కథ. ఇతడి పేరు ఒట్టో ఆండర్సన్. ఇతను కోపిష్టి. భార్య చనిపోవడం, ఉద్యోగంలోంచి రిటైర్ అవడం, అతడిలో విరక్తిని పెంచి చచ్చిపోవాలన్న కోరికని పుట్టిస్తాయి. ఇంతలో పక్కింట్లో ఒక కుటుంబం దిగుతుంది ఇద్దరు పి‌ల్లలు, పిల్లి సహా. ఉల్లాసంగా గడిపే ఈ కుటుంబం, ఒంటరి కోపిష్టి ఒట్టోని చూసి, అతడి జీవితాన్ని తలకిందులు చేసి చూపించాలని, అందర్నీ విమర్శించే, జడ్జి చేసే అతడి దృక్పథాన్ని సవాలు చేయాలనీ నిర్ణయించుకుంటారు. ఈ నేపథ్యంలో కోపిష్టి వర్సెస్ సరదా కుటుంబం కథ వినోదభరితంగా సాగుతుంది.

        

‘ఏ మాన్ కాల్డ్ ఒట్టో’ స్వీడిష్ మూవీ ‘ఏ మాన్ కాల్డ్ ఓవ్’ కి రీమేక్. స్వీడిష్ రచయిత ఫ్రెడ్రిక్ బ్యాక్‌మన్ రాసిన నవల వీటికి ఆధారం. టామ్ హాంక్స్ తో బాటు మరియానా ట్రెవినో, రాచెల్ కెల్లర్, మాన్యువల్ గార్సియా-రుల్ఫో, కామెరూన్ బ్రిటన్ తదితరులు నటించారు. మార్క్ ఫార్స్టర్ దర్శకత్వం వహించాడు. 50 మిలియన్ డాలర్ల బడ్జెట్ తో నిర్మించిన ఈ మూవీని సోనీ పిక్చర్స్ 60 మిలియన్ డాలర్లకి పంపిణీ హక్కులు పొందింది.

***

 

1276 : రివ్యూ!

రచన - దర్శకత్వం: అశ్విన్ శరవణన్

తారాగణం: నయనతార, హనియా నఫీసా, వినయ్ రాయ్, సత్య రాజ్, అనుపమ్ ఖేర్, తదితరులు

సంగీతం: పృథ్వీ చంద్రశేఖర్, ఛాయాగ్రహణం : మణికంఠన్ కృష్ణమాచారి

బ్యానర్స్ : రౌడీ పిక్చర్స్, యూవీ కాన్సెప్ట్స్

నిర్మాత   : విఘ్నేష్ శివన్

        లేడీ సూపర్ స్టార్ (అని టైటిల్స్ లో వేశారు) నయనతార 2019 నుంచి మూడే తెలుగు సినిమాల్లో నటించింది- సైరా నరసింహా రెడ్డి, ఆరడుగుల బుల్లెట్, గాడ్ ఫాదర్. తమిళంలో అడపాదడపా నటిస్తోంది. ప్రయోగాత్మకాలు కూడా నటించింది. అయితే 2015 లో ఆమె నటించిన హార్రర్ ‘మాయ’ దేశవ్యాప్తంగా చర్చకి దారి తీసింది. ఇది తెలుగులో ‘మయూరి’ గా విడుదలైంది. దీని కథాకథనాలు, మేకింగ్ అద్భుతాన్ని ఆవిష్కరించాయి. హార్రర్ అంత కళాత్మకంగా తీయడం మన దేశంలో జరగలేదు. 10 కోట్ల బడ్జెట్ కి రెండు భాషల్లో 45 కోట్లు వసూలు చేసింది. ఇది 24 ఏళ్ళ దర్శకుడు అశ్విన్ శరవణన్ సాధించిన అపూర్వ విజయం. తర్వాత తాప్సీతో ‘గేమ్ ఓవర్’ అనే సస్పెన్స్ థ్రిల్లర్ తీశాడు. తిరిగి ఇప్పుడు నయనతారతో ‘కనెక్ట్’ అనే హార్రర్. ఇది హాలీవుడ్ క్లాసిక్ ఎక్సార్సిస్ట్ నుంచి స్పూర్తి పొందిన మాట నిజమేనని ఒప్పుకుంటూ, దీనికి కోవిడ్ లాక్ డౌన్ నేపథ్యాన్ని జోడించినట్టు చెప్పాడు. మరి ఇది తను తీసిన ‘మయూరి’కి కనీసం దగ్గరి ప్రమాణాలతో వుందా లేదా చూద్దాం...

కథ

    డాక్టర్ జోసెఫ్ (వినయ్ రాయ్), సుసాన్ (నయనతార), అమ్ము (హనియా నఫీసా) ఒక కుటుంబం. అమ్ముకి సంగీతం పట్ల ఆసక్తి. ఆమెకి లండన్ హార్వర్డ్ మ్యూజిక్ స్కూల్లో సీటు వస్తుంది. కానీ ఇంత చిన్న వయసులో పంపడానికి సుసాన్ ఒప్పుకోదు. ఇది జరిగిన మర్నాడే కోవిడ్ 19 దృష్ట్యా లాక్ డౌన్ విధిస్తుంది ప్రభుత్వం. దీంతో సుసాన్, అమ్ము ఇంట్లో బందీలైపోతారు. నగరంలో వేరే చోట సుసాన్ తండ్రి ఆర్థర్ (సత్యరాజ్) వుంటాడు. డాక్టర్ జోసెఫ్ కోవిడ్ డ్యూటీతో హాస్పిటల్లో బిజీ అయిపోతాడు. అతను కోవిడ్ సోకి మరణిస్తాడు. సుసాన్ దుఖంతో వుంటుంది. అమ్ము తట్టుకోలేక పోతుంది. అయితే ఇద్దరికీ కోవిడ్ సోకి క్వారంటైన్ లో వుంటారు. అమ్ముకి తండ్రి ఆత్మతో మాట్లాడాలన్పించి ఆన్ లైన్లో వూయిజా బోర్డు ని ఆశ్రయిస్తుంది. దాంతో దుష్టాత్మ ఆమెనావహిస్తుంది. దీంతో భయపడిపోయిన సుసాన్ లాక్ డౌన్ సమయంలో కూతుర్ని ఎలా కాపాడుకుందన్నది మిగతా కథ.

ఎలావుంది కథ

    ఓ బాలికకి దుష్టాత్మ ఆవహించడం, దాన్ని భూత వైద్యుడు వదిలించడం వంటి ‘ఎక్సార్సిస్ట్’ కోవలోనే వుంది కథ. ఇలాటి కథతోనే గత నెల తెలుగులో  ‘మసూద’ చూశాం. ప్రస్తుత కథ కి లాక్ డౌన్ నేపథ్యం. దీంతో ఎక్కడున్న పాత్రలు అక్కడుండి పోయి- ఆన్ లైన్లో (వీడియో కాల్స్) ద్వారా ఇంటరాక్ట్ అవుతూ వుంటారు. ఇలాగే సాగుతుంది మొత్తం కథ, ముంబాయి నుంచి ఆల్ లైన్లో భూత వైద్యం సహా. ఇదొక కొత్త క్రియేటివ్ ఐడియా కథనానికి. అయితే దీని నిర్మాణం లాక్ డౌన్ కాలంలో జరగలేదు.

        

2020 లాక్ డౌన్ సమయంలో మొత్తం సినిమా షూటింగ్, పోస్ట్ ప్రొడక్షన్ కార్యక్రమాలూ అన్నీ రిమోట్ గానే, ఆన్ లైన్ లో జరిపి మలయాళంలో ‘సీయూ సూన్’ అనే థ్రిల్లర్ని చాలా ప్రయోగాత్మకంగా తీశాడు దర్శకుడు మహేష్ నారాయణన్. తీసి ఓటీటీలో విడుదల చేసి- లాక్ డౌన్ ఏదీ సినిమాల్ని ఆపలేదని రుజువు చేశాడు.

        

‘సీయూ సూన్’ చేతిలో వున్న స్మార్ట్ ఫోన్స్, లాప్ టాప్స్, డెస్క్ టాప్స్ వంటి అప్లికేషన్సే  కథలు చెప్పేందుకు మాధ్యమాలు కావచ్చని చెప్పింది. ఇంత కాలం కథల్ని వీటి స్క్రీన్స్ పై ‘చూసేందుకు’ ఇవి మాధ్యమాలుగా వున్నాయి, ఇప్పుడు కథల్ని ‘చెప్పేందుకు’ ఈ స్క్రీన్స్ మాధ్యమాలవుతాయి. ఆనాడు మల్లాది వెంకట కృష్ణమూర్తి ప్రేమికుల మధ్య కేవలం ఉత్తరాలతో ప్రయోగాత్మకంగా ‘దూరం’ అనే నవల విజయవంతంగా నడిపారు. ఉత్తరాల్లోనే ఆ కథ ప్రవహిస్తూంటుంది. ఇప్పుడు స్మార్ట్ ఫోన్స్ లో, లాప్ టాప్స్ లో, డెస్క్ టాప్స్ లో, ఇంకా సీసీ కెమెరాల్లో, టీవీలో కథ పరుగెత్తుతూంటే ఎలా వుంటుంది? ఈ అనుభవమే ‘సీయూ సూన్’ ఇన్నోవేటివ్ అయిడియా.

        

దీనికి ఇంకో రూపం ‘కనెక్ట్’. దీని కథ కోసం ‘ఎక్సార్సిస్ట్’ ఐడియా తీసుకుని, వూయిజా బోర్డు గేమ్ ని జోడించాడు దర్శకుడు. ఆత్మలతో మాట్లాడే ఈ గేమ్ వికటించి దుష్టాత్మ పట్టుకునే కథ. వూయిజా బోర్డు గేమ్ కథలతో హాలీవుడ్ నంచి 2014 లో, 2016 లో రెండు సినిమా లొచ్చాయి.

        

అయితే ఐడియా, టెక్నికల్ అంశాలు రెండూ బావుండి, కథ విషయంలోనే కుంటుపడింది. ‘మయూరి’ ప్రమాణాలు మృగ్యమయ్యాయి. హార్రర్ సినిమా హార్రర్ లా వుండక ఏడ్పులతో వుంటే ట్రాజడీ సినిమా అన్పించుకుంటుంది. నయనతార పాత్ర ఏడుస్తూనే వుంటే, హార్రర్ తో థ్రిల్ ఏముంటుంది. కూతురికి పట్టిన హార్రర్ ని ఎదుర్కోవడానికి థ్రిల్స్ కి పాల్పడితేనే హార్రర్- థ్రిల్ నువ్వా నేనా అన్నట్టుంటాయి. దీనికి బదులు పాసివ్ క్యారక్టర్ గా ఏడ్పులతో మదర్ సెంటిమెంటుని రగిలించాలని చేసిన ప్రయత్నం ఫలించలేదు. భూతవైద్యుడు దుష్టాత్మని వదిలించే క్లయిమాక్స్ హార్రర్ లో కూడా నయనతార ఏడ్పులు మనల్ని హార్రర్ని అనుభవించకుండా చేశాయి. ఇలా కథ వొక శోక సాగరంలా మారింది.

నటనలు – సాంకేతికాలు

    నటనలు భావోద్వేగ రహితంగా వుండడం ఇంకో లోపం. నయన తార సహా అందరూ ఫ్లాట్ క్యారక్టర్స్ ని ఏ ఫీలూ ప్రదర్శించకుండా పొడిపొడిగా నటించేశారు. నయనతార ఏడ్పు ఒక ఫీలే. కథకి అవసరం లేని ఆమె ఫీలు అది. హార్రర్ తో భయం, సస్పెన్స్ ఫీలై, కూతుర్ని కాపాడుకునే  థ్రిల్స్  కి పాల్పడి వుంటే అప్పుడామెలో భావోద్వేగాలు పలికేవి. ఆమెకో గోల్, ఆ గోల్ కోసం పోరాటమనే సరైన దారిలో నటన వుండేది.

        

కూతురి పాత్ర వేసిన హనియా నఫీసాలో మంచి టాలెంటే వుంది. దుష్టాత్మ పీడితురాలిగా బాధ, ఆక్రోశం బాగా నటించింది. మంచం వూగిపోతున్న ‘ఎక్సార్సిస్ట్’ ఐకానిక్ సీను దర్శకుడు క్లయిమాక్స్ లో వాడుకున్నాడు. ఇక్కడ నఫీసాకి  నయనతార (ఏడ్పు) అడ్డుపడక పోతే, తన మీదున్న సీనుతో బలంగా ఆకట్టుకునేది. ఇక నయనతార తండ్రి పాత్ర వేసిన సత్యరాజ్, ముంబాయి భూత వైద్యుడు ఫాదర్ ఆగస్టీన్ పాత్ర వేసిన అనుపమ్ ఖేర్ వీడియో కాల్స్ లో నటన కనబర్చారు.

        

సినిమాలో చెప్పుకోదగ్గవి రెండున్నాయి- సంగీతం, ఛాయాగ్రహణం. రెండూ టాప్ సౌండ్ ఎఫెక్ట్స్ సహా. రెండు మూడు హార్రర్ బిట్స్ నిజంగానే భయపెడతాయి. థియేటర్లకి  దూరమవుతున్న ప్రేక్షకులకి థియేటర్ అనుభవాన్నివడానికే ఎఫెక్ట్స్ ని సాధ్యమైనంత బలంగా వాడుకున్నట్టు చెప్పాడు దర్శకుడు. అయితే ఎఫెక్ట్స్ తో బాటు కథ కూడా కనెక్ట్ అయితేనే థియేటర్స్ కి వెళ్ళడం గురించి ఆలోచిస్తారు ప్రేక్షకులు.

—సికిందర్