529- డార్క్ మూవీస్ స్క్రీన్ ప్లే సంగతులు

 

      పీడకల డార్క్ మూవీస్ ఎలిమెంట్స్ లో ఒకటని చెప్పుకున్నాం. పీడకల లేనిదే డార్క్ మూవీ పూర్తి కాదు. డార్క్ మూవీస్ కథలు, పాత్రలు అంటేనే మనసు లోపలి చీకటి కోణాల  వెలికితీత కాబట్టి, పీడకలల్ని భాగం చేశారు. డార్క్ మూవీస్ అంత నేరుగా ప్రేక్షకుల అంతరంగాల్ని కెలికే సినిమాలుండవు. డార్క్ మూవీస్ జానర్ ప్రధాన లక్ష్యమే నైతికతని ప్రశ్నించడం, అనైతికాన్ని ఖండించడం. ఈపని మూలాల్లోకి వెళ్లి - అంటే -  అంతరంగాల్లోకి వెళ్లి అక్కడ శస్త్రచికిత్స  చేస్తేగానీ పూర్తిగాదు. కనుక ఈ చికిత్సలో పీడకలలు భాగమయ్యాయి. అంతేగానీ ఏదో థ్రిల్ కోసం వుండాలన్నట్టు కాదు.  పీడకలలు రెండు రకాలు – ఏదో  కీడు తలపెడితే దాని గురించి వెంటాడే పీడకలలు, ఓ కీడుని ముందస్తుగా  హెచ్చరిస్తూ వచ్చే  పీడకలలు.  ఏ రకం పీడకలైనా  ఉద్దేశం ఒకటే – నిజం తెలుసుకుని సంస్కరించుకోమని చెప్పడమే. పీడకలల్లో భయపెట్టే అంశాలు నిజానికి నిజాలే.  అవి ప్రశ్నిస్తున్న, హెచ్చరిస్తున్న నిజాలని గుర్తించకుండా పెడ కేకలు పెడుతూ లేచిపోయి, కాసిని నీళ్ళు తాగేసి  కమ్మగా బజ్జుంటాం. 

            ఈ పీడకలల్ని అంతరంగం, అంటే సబ్ కాన్షస్ మైండ్ ఉత్పత్తి చేస్తుంది. దీనికి హెచ్చుతగ్గుల్ని సమం చేయడమే పని. లేకపోతే  సృష్టి బ్యాలెన్సు తప్పుతుంది. సృష్టిలో  మనతో సహా సమస్తం పదార్ధమే కాబట్టి,  పదార్ధమంటే శక్తి తరంగాల గుచ్ఛమే కాబట్టి, ఈ శక్తి తరంగాలు నిత్యం బ్యాలెన్స్ చేసుకుంటూ సృష్టిని కాపాడుతూంటాయి. ఈ అవగాహన నుంచే క్వాంటమ్  ఫిజిక్స్ పుట్టింది, స్పిరిచ్యు వాలిటీకి దగ్గరయ్యింది.  ఇలా హెచ్చు తగ్గుల్ని సమం చేయడానికే సృష్టి స్ట్రగుల్ చేస్తూంటుంది. ఒక తప్పువల్ల శక్తి తరంగాల తూకం ఆ వైపు మొగ్గితే, ఆ శక్తి తరంగాల్ని ఒప్పు వైపుకి మార్చి రెండిటిని బ్యాలెన్స్ చేస్తూంటేనే   ఈ సృష్టి నడిచేది. దీన్నే లా ఆఫ్ కాంపెన్సేషన్ (నష్టపరిహారం) అన్నాడు ఎమర్సన్. ఒకడు అవినీతి చేసి ప్రజాధనం కూడబెట్టి బ్యాలెన్సు చెడగొడితే, కేసుల రూపంలో మళ్ళీ ఆ ప్రజాధనాన్ని ప్రజలకి చేర్చి సమం చేయడం శక్తితరంగాల బ్యాలెన్సు కోసం సృష్టి చేసుకునే పని అన్నమాట. చేసింది తప్పయితే ఆ పాపపరిహారం చెల్లించుకోమనే లోక కల్యాణార్ధం పీడకలల రూపంలో చెప్తుంది అంతరంగం...

            డార్క్ మూవీస్ లో సందర్భాన్ని  బట్టి రెండిట్లో ఏదైనా ఓ రకం పీడకల వుంటుంది. ప్రస్తుత ‘బ్లడ్ సింపుల్’ లో ఏముందో చూద్దాం. నిన్నటి 32 వ సీనులో ఎబ్బీ బార్ కెళ్ళి మార్టీ చనిపోయాడన్న కొత్త నిజం తెలుసుకుంది. ఈ నిజం పీడకల రూపంలో ఎలా వచ్చిందో, ఏం చెప్తోందో చూద్దాం...

33. ఎబ్బీకి మార్టీ తో పీడకల రావడం 

           ఫేడిన్ :

           అదే లాంగ్ షాట్ - ఎబ్బీ బెడ్ మీద వుంటుంది. ఆమె కళ్ళు తెరచి క్షణం కదలకుండా అలా వుంటుంది. దగ్గుతుంది. బెడ్ మీంచి లేచి  చీకటి ఫ్లాట్ లో నడుచుకుంటూ బాత్రూం కెళ్తుంది. డోర్ వేసుకుంటుంది.

            సింక్ దగ్గర అద్దంలో తనని తాను చూసుకుంటుంది. బయటి  అపార్ట్ మెంట్ గోడమీద కొడుతున్నట్టు చప్పుడవుతూంటే చెవులు రిక్కిస్తుంది.  మొహం మీద నీళ్ళు జల్లుకుంటుంది. 

            ఆఫ్ స్క్రీన్ లో ఎక్కడ్నించో అద్దం పగిలిన చప్పుడవుతుంది. క్షణకాలం ఆ శబ్దం ప్రతిధ్వనిస్తుంది. నిశ్శబ్దం. బాత్రూం డోర్ వైపు చూస్తుంది. ఫ్లాట్ డోర్ లాక్ మీద గీస్తున్న శబ్దం. ఆకస్మాత్తుగా  లాక్ వూడిపోయి  డోర్ తెర్చుకున్న చప్పుడు.

            క్లోజ్ షాట్ లో ఎబ్బీ – కలవరపడుతుంది. టాప్ కట్టేసి కొయ్యబారిపోయి నించుంటుంది. మొహం మీది  నీటి  బిందువులు  జారుతూంటాయి. అడుగులు విన్పిస్తాయి. గాజు పెంకులు చిట్లుతున్న చప్పుడు. ‘రే?’ – అని అంటుంది.  

            సమాధానం వుండదు. అవతల గదిలో బెడ్ స్ప్రింగుల చప్పుడు. ఇక బాత్రూం డోర్ తీసుకుని బయటి కొచ్చేస్తుంది.  

            బాత్రూం లైటు తెర్చి వున్న తలుపులోంచి అవతల గదిలో ఫ్లోర్ మీద పడుతూంటుంది. ఆ వెలుతురులో  పగిలిన అద్దం పెంకులు కన్పిస్తూంటాయి.  అక్కడున్న బెడ్ మీద చీకట్లో ఎవరో కూర్చుని వుంటాడు. అతను తల పైకెత్తి చూస్తాడు.    

            అతను మార్టీ.
            బిగుసుకుపోతుంది ఎబ్బీ.

            ‘డోర్ లాక్ చేయాల్సింది లవర్ బాయ్...’ అంటాడు.  

            నెర్వస్ గా చూస్తుందతడి కేసి. ముఖం మీది  నీటి బిందువులు ఇంకా జారుతూనే వుంటాయి – ‘ఐ లవ్ యూ’ అంటాడు  మార్టీ. 

            పెదాల చివర్నుంచి స్మైలిస్తాడు – ‘స్టుపిడిటీలా వుంది కదూ ఐ లవ్ యూ అంటూంటే?’ అంటాడు. ఒకడుగు వెనక్కేసి నించుంటుంది – తనూ ‘ఐ లవ్ యూ’ అనే స్తుంది. ఆ మాట భయంవల్ల వచ్చిందంటాడు తల అడ్డంగా వూపుతూ.

            లేచి నిలబడతాడు. కాలికింద గాజు చిట్లుతుంది. కోటు మధ్య బటన్ తీసి, చెయ్యి పెడతాడు – ‘నీ వెపనేదో మర్చిపోయొచ్చినట్టున్నావ్’ అంటూ ఏదో తీసి ఆమె మీదికి విసురుతాడు. 

 .          క్లోజ్ షాట్ లో ఎబ్బీ చేతులు. ఆ వస్తువుని పట్టుకుంటుంది.  అది కాంపాక్ట్.

            ఎబ్బీ క్లోజ్ షాట్.
            చేతుల్లోకి చూస్తున్నదల్లా తలెత్తి అతణ్ణి చూస్తుంది.
            ‘వాడు నిన్ను కూడా చంపేస్తాడు’ అంటాడు మార్టీ. 

            నోటికి చేయి అడ్డం పెట్టుకుని వంగిపోయి, రక్తవాంతి చేసుకుంటాడు.
               అదిరిపడి లేచి కూర్చుంటుంది ఎబ్బీ.
            మొహం చెమట్లు పట్టేస్తుంది. చుట్టూ చూస్తుంది.

            ఎబ్బీ పాయింటాఫ్ వ్యూ – కిటికీ లోంచి వెన్నెల పడుతూంటుంది ఫ్లోర్ మీద. కిటికీ లోంచి రోడ్డవతలి బిల్డింగ్ ముందుభాగం కన్పిస్తూంటుంది.  చీకటిగా, నిశ్శబ్దంగా వుంటుంది.

***

 

     ఇదీ పీడకల        

      వెనక సీన్లో బార్ లో ఆమె రక్తం మరకల్ని చూసి వెనక్కి అలా పడిపోతూంటే ఫేడవుట్  అయి ప్రస్తుత సీన్లో ఫేడిన్ అయినప్పుడు - బెడ్ మీద వుంటుంది ఎబ్బీ నిద్రలో.  ఈ ఫేడవుట్ – ఫేడిన్ లతో ఒక సీన్లోంచి ఇంకో సీన్లోకి స్మూత్ ట్రాన్సి షన్. ఇక్కడొక సందేహం వస్తుంది. బార్లో మార్టీ రక్తం మరకల్ని చూస్తే, వెంటనే వెళ్లి రే ని ప్రశ్నించకుండా ఇంటికొచ్చి ఎలా నిద్ర పోయిందని. వెనుక 29 వ సీన్లో- మార్టీని ఆమె షూట్ చేసిందన్న అనుమానంతో వున్న రే,  ఆమెని ఈసడించుకుని వెళ్ళిపోతాడు. ఎబ్బీ కేమీ అర్ధంగాక ఆ తర్వాత 31 వ సీన్లో బార్ కెళ్ళి చూస్తే మార్టీ చనిపోయాడని తెలుస్తుంది.  ఈ పని చేసింది తను కాదని ఎలా నిరూపిస్తుంది? అందుకని వచ్చి పడుకుంది. పడుకున్నప్పుడు వచ్చిన ఈ పీడకలలో మార్టీ మీద ఎటాక్ మిస్టరీ వీడిపోయింది.

            ఇదెలాగో చూద్దాం. ఈ పీడకల రానున్న ప్రమాదాన్ని హెచ్చరిస్తోంది. కలలో మార్టీ కన్పించి హెచ్చరించాడు. మార్టీకి – అతడి ఆత్మకి – ఇప్పటికీ భార్య ఎబ్బీ  మీద పగలేదు. అతడిది లవ్ హేట్ రిలేషన్ షిప్ లా వుంది. ఇప్పుడూ ఆమె క్షేమమే కోరుకున్నాడు. అతడి పగ అంతా రే మీదనే. 

            ఈ పీడకల సీనుని ఎలా రూపొందించారో చూస్తే, పూర్తిగా సబ్ కాన్షస్ మైండ్ రికార్డింగ్ లా వుంటుంది. ఇలా వుండాలి కూడా. ఎన్నో నిజాలతో చాలా సంక్లిష్టంగా వుంటుంది. కలలో ఆమె లేచింది. బాత్రూం కెళ్ళింది. చిత్రీకరణలో వివరంగా వున్న ఈ బాత్రూం సీను చూస్తే, ఆమె సింక్ దగ్గర అద్దం  ముందు నిలబడి తనని తానూ చూసుకుంటుంది. ఫ్రేములో సింక్ కన్పించదు. ఫ్రేము లోంచి ఆమె తల కిందికి వెళ్తుంది. తిరిగి పైకెత్తితే మొహం మీద నీళ్ళుంటాయి.  ఇంకో రెండు సార్లు ఫ్రేము లోంచి ఆమె తల కిందికీ పైకీ అవుతుంది. ఇలా వంగడం, మొహం మీద నీళ్ళు జల్లుకుని లేవడం లోని అంతరార్ధమేమిటో వెంటనే మనకి బోధపడదు.

            ఇక మన మైండ్ గమనించినా గమనించకున్నా, సబ్ కాన్ష మైండ్ సీసీ కెమెరాలా  ప్రతీదీ గమనించి రికార్డు చేసుకుంటుంది. దాని దృష్టి నుంచి ఏదీ తప్పిపోదు. అది సర్వాంతర్యామి. సృష్టి అంతటా వ్యాపించి వుంటుంది. ఎబ్బీ బార్ కెళ్ళినప్పుడు బయట ఆఫ్ స్క్రీన్ లో ఏదో  చప్పుడవడాన్ని  ఆమె గమనించలేదు. కానీ సబ్ కాన్షస్ మైండ్ పట్టించుకుని రికార్డు చేసింది. ఆ చప్పుడు బార్  లోపలున్న విస్సర్ యాక్టివిటీ అని మనకి తర్వాత తెలుస్తుంది. తర్వాత ఆమె లోపలి కెళ్ళి నప్పుడు, బ్యాక్ ఆఫీసు డోర్ అద్దం పగిలిపోయి వుండడం, ఆ అద్దం పెంకులు నేలంతా పడుండడం చూస్తుంది. అలాగే వెనుక డోర్ లాక్ పగలగొట్టినట్టుగా కూడా గ్రహిస్తుంది. కానీ ఈ పని విస్సర్ చేశాడనీ, అతను  బాత్రూం లోనే దాక్కుని వున్నాడనీ ఆమెకి తెలీదు. 

            తర్వాత సేఫ్ దగ్గర సుత్తిని చూశాక, సేఫ్ డయల్ డ్యామేజీ అయి వుండడం చూశాక – ఇది రే పనే  అన్నట్టుగా ఆమెకి అర్ధమయ్యింది- మళ్ళీ డబ్బుకోసం రే వచ్చి ఈ ప్రయత్నం చేశాడని. మార్టీ చెయిర్ కింద రక్తపు మరకలు  చూశాక  సీక్వెన్స్ అర్ధమయ్యింది- డబ్బు కోసం మళ్ళీ వచ్చిన రే, మార్టీ తో గొడవ పడి చంపి, డబ్బున్న సేఫ్ తెరవడానికి విఫల యత్నం చేశాడని. ఇక్కడ ఆమె గ్రహించని విషయాలు రెండు- జస్ట్ ఆమె బార్లోకి వస్తున్నప్పుడు వెలువడుతున్న చప్పుడే  విస్సర్ సేఫ్ ని పగులగొడుతున్న చప్పుడని,  విస్సర్ బాత్రూం లో దాక్కున్నాడనీ.  బార్ బయట ఆమె చప్పుళ్ళు పట్టించుకుని వుంటే, రహస్యంగా బార్ లోకెళ్ళి,  విస్సర్ గారి వ్యవహారం అప్పుడే  చూసేసేది!

            ఇప్పుడు కలలో సీను ప్రారంభం తిరిగి ఆమెకి బార్ అనుభవాన్నే ఇస్తోంది సబ్ కాన్ష మైండ్. నిజాలు గుర్తించమని. బయట గోడ మీద బాదుతున్న చప్పుడు, బార్ బయట తను  పట్టించుకోని చప్పుడే. ఇప్పుడు చెవులు రిక్కించి వింటోంది. డోర్ లాక్ చప్పుడవడం, అద్దం పగిలి ముక్కలవడం – ఇదంతా బార్ సీన్నే తలపిస్తోంది. బార్ సీన్లో అదంతా రే నిర్వాకమని అర్ధం జేసుకున్న నేపధ్యంలో ఇప్పుడు, బెడ్ స్ప్రింగుల చప్పుడు కూడా విన్పించడంతో,   అతనే వచ్చాడనుకుని  ‘రే?’ అని అనేసింది పైకే. 

            కానీ ఆమె భయపడలేదు కలలో కూడా. మార్టీ ని రే చంపాడని ఆమెకి తోచినా, అతను తనకీ ప్రమాదం తలపెడతాడన్న భయం ఆమెకి లేదు. తనకోసమే ఇదంతా చేస్తున్నాడన్న భరోసా వుంది.

            అలా నిర్భయంగా ఆమె బాత్రూం డోర్ తీసి చూసినప్పుడు – ఇక్కడ   రివర్స్ లో వుంటుంది దృశ్యం. వెనుక సీన్లో  బార్ కెళ్ళి ఆమె లైటేసినప్పుడు ఆ వెలుగు బాత్రూం లో దాగిన విస్సర్ మీద పడిందని గమనించాం. ఇప్పుడు  బాత్రూం లోంచి లైటు వెలుగు అవతల గదిలో పడుతోంది. అంటే లైటు కాంతి అనేది విస్సర్ ఉనికికి సింబాలిజం అనుకుంటే,  ఈ సింబాలిజం ఇప్పుడు బాత్రూం లోంచి బయటికొచ్చేసి ఆమెకి చూపిస్తోంది - ఏమిటి?  ఇక్కడ ముందు గదిలో పడున్న అద్దం ముక్కల్ని.  కింద పడున్న అద్దం ముక్కల మేరకే  వెలుగు ఇక్కడ పడుతోంది. ఈ అద్దం  ముక్కలు కూడా విస్సర్ కి   సింబాలిజమే. బార్ లో అతనే వెనుక డోర్ అద్దం పగులగొట్టి లోపలికొచ్చాడు. ఇందుకే ఇప్పుడు బాత్రూం లోంచి లైటు వెలుగు,  అద్దం  ముక్కలూ ఇలా కనెక్ట్ అయ్యాయి. 

            దీనర్ధం తర్వాత మేల్కొన్నాక ఆమె ఆలోచించినా తట్టకపోవచ్చు. ఎందుకంటే ఆమె జీవితంలో విస్సర్ ఉనికేలేదు. అతణ్ణి వూహించలేదు.

            ఇక అద్దం పెంకుల కావల బెడ్ మీద కూర్చున్న మార్టీ కాళ్ళు రివీలవుతాయి. ఆ కాళ్ళకి హంటర్ బూట్లు అలాగే వుంటాయి, ఇంకా వేటాడే మూడ్ లోనే వున్నట్టు సూచిస్తూ. ఎబ్బీ సబ్ కాన్షస్ ఉత్పత్తి చేసి ఆమెకి చూపిస్తున్న స్వప్నావస్థలో  విస్సర్ బార్ లోకి జొరబడిన తీరునే మార్టీ మీద పెట్టి ఇక్కడ ఫ్లాట్ లో చూపిస్తోంది. విస్సర్ బార్ లో ఎలా జొరబడ్డాడో, ఇక్కడ మార్టీ అలాగే జొరబడ్డాడు.

             ‘డోర్ లాక్ చేయాల్సింది లవర్ బాయ్’ అంటాడు మార్టీ వ్యంగంగా-  ఆమెని రే తన రక్షణలో వుంచుకోవడంలేదన్న భావంతో. అంటే రే ని ఫూలిష్ గా నమ్ముతున్నావని ఉద్దేశం. అప్పుడు – ‘ఐ లవ్ యూ’  అంటాడు. అతనెప్పుడూ ఆమెని ప్రేమిస్తూనే వున్నాడు. శిక్షించాలనే ఆలోచన అతడికి వచ్చే ప్రసక్తి లేదు. అతడితో ఆమె సేఫ్టీ ఫీలవ్వొచ్చు.  ఆమెకూడా ఐలవ్ యూ అనేసేసరికి,  అది భయంవల్ల అంటాడు. 

            ఇప్పుడు లేచినిలబడి కోటు మధ్య బటన్ తీస్తాడు. చేయి కోటు లోపల పెట్టి కాంపాక్ట్  తీసి ఆమె మీదికి విసురుతాడు. విసురుతూ ‘నీ వెపనేదో మర్చిపోయొచ్చి
నట్టున్నావ్’ అంటాడు. 

            ఏమిటి దీనర్ధం? సబ్ కాన్షస్ పూర్తిగా సింబాలిజాలతోనే పని కానిచ్చేస్తుంది. కలల్ని చూపించేస్తుంది. ఈ కాంపాక్ట్ సింబాలిజం ఏమిటి? దాన్నెందుకు తీసి ఆమె మీదికి విసిరాడు? కోటు లోపల్నుంచి దాన్ని తీయడానికి మధ్య బటనే ఎందుకు తీశాడు? దాన్ని ఆమె వెపన్ అని ఎందుకన్నాడు?

            ఫస్టాఫ్ బిగినింగ్ లో ఎస్టాబ్లిష్ చేసిన ఆమె స్వభావం లోకెళ్తే,  ఆమె భర్తతో విసిగి బయట షికార్లు తిరుగుతూ సాంత్వన పొందుతోంది. కొత్త కొత్త హేండ్ బ్యాగులు కొనే అబ్సెషన్ ఇందులోంచే వచ్చింది. ఆ తిరుగుళ్ళతో ఎక్కడో తగిలిన  రేని ఆకర్షించి అతడితో ఎఫైర్ పెట్టుకుంది. ఆమె ఎఫైర్ పెట్టుకోవచ్చు, కానీ భర్త వుండగా కాదు. భర్తతో తెగతెంపులు చేసుకుని ఎవరితోనైనా ఎఫైర్ పెట్టుకోవచ్చు. లేకపోతే  చిక్కులొస్తాయి. శాంతి భద్రతల సమస్య తలెత్తుతుంది. సృష్టి సమతూకం దెబ్బ తింటుంది. అల్లకల్లోలం మొదలవుతుంది. ఆమె భర్తకి విడాకులివ్వలేదు, రేతో తిరుగుతోంది. 

            మార్టీని ఎలాగైతే ఆకర్షించి పెళ్లి చేసుకుని వుంటుందో,  అలాగే రేని కూడా ఆకర్షించి ఎఫైర్ పెట్టుకుంది. ఆకర్షణ ఆమె అస్త్రం. ఆ అస్త్రానికి ప్రతిరూపం ఈ కాంపాక్ట్. కాంపాక్ట్ అంటే మేకప్ అద్దుకునే పౌడరు.  దీన్నే  ‘నీ వెపనేదో మర్చిపోయొచ్చినట్టున్నావ్’ అని తీసి ఆమె మీదికి విసిరాడు. ఇప్పుడు దీని అవసరం ఆమెకుందన్న ఉద్దేశంతో. రే నిన్ను కూడా చంపేస్తాడూ, ఇక నువ్వు ఇంకొకణ్ణి పట్టే ఆకర్షణ మొదలెట్టూ అనే అర్ధంలో!

            పాత్రల స్థితిగతుల్లోకి ఎంత లోతుగా వెళ్లి ఆలోచిస్తే ఇలాటి  రక్తమాంసాలున్న చిత్రణలొస్తాయి! బ్యూటిఫుల్ క్రియేషన్.
            ఇక కోటు మధ్య  బటన్ తీయడ మేమిటి?  పై బటన్ కి – కింది బటన్ కీ  మధ్య బటనే తీసి కాంపాక్ట్ తీయడమేమిటి? అంటే, మొదటి బటన్ అనే నీకూ, రెండో బటన్ అనే  నాకూ మధ్య వుండేడ్చిన  ఈ కాంపాక్ట్ అనే ఆకర్షణ  తీసుకో - తీసుకుని ఫో- అనడమన్న మాట.

            ఇది సీను ముగింపు. సీను ముగింపుకీ ప్రారంభానికీ ఎలా లంకె వేశారో చూద్దామా?  బాత్రూం లో ఆమె మొహం మీద నీళ్ళు జల్లుకునే అంతు చిక్కని చర్యకి ఈ ముగింపులో సమాధాన ముంది. మూడు సార్లు వంగి వంగి మొహం మీద నీళ్ళు కొట్టుకుంది. మొహం కడుక్కోవడమంటే ముస్తాబవడమే కదా?  ఒకసారి మార్టీ కోసం అయింది, రెండోసారి రే కోసం అయింది, మూడోసారికీ రెడీ అయిపోతోంది... ఎవరి కోసం?  ఇది భావి జీవితం...ఈ చర్యకి సీను ముగింపులో కాంపాక్ట్ ఆమె మీదికి విసిరి ముక్తాయింపు నిచ్చాడు మార్టీ.  రే నిన్ను కూడా చంపేస్తాడూ, ఇదిగో మేకప్ చేసుకో,  ఇంకొకణ్ణి పట్టుకో - అనే అర్ధంలో. 

            ఆమె సింక్ దగ్గర మామూలుగా నిలబడే మొహం కడుక్కోవచ్చు. ఫ్రేములోంచి వంగిపోయి వంగిపోయి నీళ్ళు జల్లుకోవాల్సిన అవసరం లేదు. కానీ ఆమె మానసిక స్థితి అది. మగాళ్ళకి సాగిలపడే తత్త్వం.  బిగినింగ్ విభాగంలో రే తో  పొరపొచ్చా లొచ్చి నప్పుడు,   అతడికి లొంగిపోతూ చూసిన చూపు – టిల్ట్ డౌన్ యాంగిల్లో యజమాని కేసి బానిస చూసే చూపుతో -  ఆమె ఎంత బలహీనురాలో ఎస్టాబ్లిష్ అయింది. అదే ఇప్పుడు సింక్ దగ్గర బయటపడుతోంది. యథా మానసిక స్థితి, తథా బాడీ లాంగ్వేజీ.

            వాడు నిన్నుకూడా చంపేస్తాడని మార్టీ హెచ్చరించడమంటే, తనని చంపాడనేగా  అర్ధం. ఇలా పీడకల మొత్తం ఆమెకి స్పష్టం చేసేసింది – ఆ మెకిక రే వుండబోడన్న నిజం సహా. విస్సర్ గురించి మాత్రం ఆమె అర్ధం జేసుకోలేని హింట్స్ ఇచ్చింది. మార్టీ భళ్ళున రక్త వాంతి చేసుకోవడంతో ఆమెకి మెలకువ వచ్చేస్తుంది. 

            గదిలో చుట్టూ చూస్తే మామూలుగా వుంటుంది. కిటికీ లోంచి వెన్నెల పడుతూంటుంది. కిటికీ అవతల భవనం చీకట్లో నిశ్శబ్దంగా వుంటుంది. ఈభవనం చూపించి ముగిస్తారు సీనుని. చీకటి భవనాలు, సముద్రాలు, లోయలూ వంటి వాటిని సబ్ కాన్షస్ మైండ్ కి ప్రతీకలుగా చూపిస్తారు హాలీవుడ్ సినిమాల్లో.

(సశేషం)
-సికిందర్  

           
           
                       
           
           

528 : డార్క్ మూవీస్ స్క్రీన్ ప్లే సంగతులు

  

     సినిమాల్లో ప్రతీ పాత్రకీ ఓ పేరుంటుంది. పేరు స్క్రిప్టులో వుండి  స్క్రీన్ మీద పలక్క పోతే ఆ పాత్రని బట్టి దాని వీక్షణాసక్తిమారుతూం
టుంది.హీరో,  హీరోయిన్,  యాంటీ హీరో,  విలన్ పాత్రలకైతే మిస్టీరియస్ వాతావరణమేర్పడుతుంది, కమెడియన్ కైతే మరింత చులకన భావమేర్పడుతుంది. కోయెన్ బ్రదర్స్ ఈ పనే చేశారు. డిటెక్టివ్ విస్సర్ అనే పేరు స్క్రిప్టులో రాశారు గానీ, డైలాగుల్లో ఎక్కడా ఏ పాత్ర చేతా ఆ పేరుని పలికించరు. ఇలా  పేరులేని పాత్రగా మిస్టీరియస్ గా చెలామణి అవుతూంటాడు ఈ యాంటీ పాత్ర పోషించిన ఎమెట్ వాల్ష్. సినిమా మొత్తమ్మీద విస్సర్ కి మార్టీ తో మూడు, ఎబ్బీ తో రెండు సీన్లు వుంటాయి. ఎబ్బీకి  మొదటి సీన్లో దాక్కుని వుంటే, క్లయిమాక్స్ సీనులో  వచ్చిన వాడి పేరేమిటో తెలీదు ఎబ్బీకి. ఇక మార్టీకి విస్సర్ తో వున్న మూడు సీన్లలో,  మార్టీ కూడా విస్సర్ పేరు ఎక్కడా పలకడు. ఇలా సినిమాలో ఎక్కడా విస్సర్ అనే పేరే వినపడదు. కథలో ప్రధానపాత్ర విస్సరే. అగ్గి రాజేసి కూర్చున్నది ఇతనే. కానీ ఇతడి పేరు ప్రేక్షకులకి తెలీదు. డెషెల్ హెమెట్ నవల్లోంచి స్ఫూర్తి పొంది కోయెన్ బ్రదర్స్ ఇలా చేశారు. కోయెన్ బ్రదర్స్ తాము తీయాలనుకున్న ఈ డార్క్ మూవీ జానర్ ప్రక్రియకోసం, 1929 లో హెమెట్ రాసిన ‘రెడ్ హార్వెస్ట్’  హార్డ్ కోర్ డిటెక్టివ్ నవల ( ఫ్యాక్షన్ కథలాగే వుంటుంది, సినిమాలు వచ్చాయి. అకిరాకురసావా కూడా దీని స్ఫూర్తి తోనే ‘యొజింబో’ తీశారు) ని పరిశీలించారని  ఇదివరకే చెప్పుకున్నాం. ఇందులో డిటెక్టివ్ పాత్ర పేరు ‘ది కాంటినెంటల్ ఆప్’, కానీ ఈ పేరుని ఇతర పాత్రలెప్పుడూ పలకవు. 

            టాలీవుడ్ కీ హాలీవుడ్ కీ  ప్రధాన తేడా ఏమిటంటే, హాలీవుడ్ ప్రపంచవ్యాప్తంగా సినిమాల్ని అందిస్తుంది. కాబట్టి నవ్వుల పాలవకుండా జాగ్రత్తపడతారు మేకర్లు. తెలుగు సినిమాలు చూసి నవ్వుకుంటే చుట్టుపక్కల  నాల్గు వూళ్ళల్లో నవ్వుకుంటారంతే, విశ్వ వ్యాప్తంగా పరువేం పోదు. కాబట్టి హాలీవుడ్ దర్శకుడు కొత్త వాడైనా లోతైన అవగాహనతో కమర్షియల్ గా తీస్తాడు. కొత్త దర్శకులుగా కోయెన్ బ్రదర్స్ తీయాలనుకున్న నోయర్ జానర్ విధి విధానాల్ని  కూలంకషంగా అధ్యయనం చేసి ఇంత కళాత్మకంగా తీశారు. కళాత్మకం కాకపోతే అది నోయర్ మూవీ కాబోదు. రాబర్ట్ మెక్ కీ అంటాడు – మొదట మీరు సాధారణ  సినిమాలతో చేయితిప్పుకున్న తర్వాతే  కళాత్మకాల జోలికి పోండి - అని. కోయెన్ బ్రదర్స్ రావడం రావడమే కళాత్మకాన్ని ఎత్తుకుని ప్రూవ్ చేసుకున్నారు. మార్కెట్ లో నిలబడని  రోమాంటిక్ కామెడీల మత్తులో వూగుతూ వుండే మేకర్లకి  ఈ కళ  అర్ధమయ్యే ప్రసక్తే లేదు. సరదాగా రాస్తున్న దీన్ని సరదాగా చదివేసి అవతల పడేస్తే సరిపోతుంది.

            క్రితం వ్యాసం 31వ సీనుతో పాత్రలకి నిజాలు తెలిసే కథనం ప్రారంభమయిందని తెలుసుకున్నాం. ఈ సీనులో  మార్టీ ని పూర్తిగా చంపిన రేకి అసలు నిజాలు తెలుసుకునే ట్రాక్ ఏర్పాటయ్యిందని తెలుసుకున్నట్టే,  ఇప్పుడు 32 వ సీనులో ఎబ్బీకి కూడా తెలియని నిజాలు (భర్త చావు ఆమెకి తెలియనే తెలీదు) తెలిసే సీనులోకి మనం ప్రవేశిస్తున్నాం...

32. ఎబ్బీ బార్ కెళ్ళి పరిశీలించడం, విస్సర్ ఆమెని గమనించడం

       ఇలా రాశారు : ఎబ్బీ కారు దిగి చీకట్లో వున్న బార్ ఫ్రంట్ డోర్ కేసి అడుగులేస్తుంది. ఆఫ్ స్క్రీన్లో  లయబద్ధంగా దేన్నో కొడుతు

న్న చప్పుడు లీలగా విన్పిస్తూం
టుంది. ఆమె తాళం చెవితో డోర్ తీసి లోపలికి  అడుగు పెట్టగానే చప్పుడాగిపోతుంది. 

         ఎబ్బీ లైట్ స్విచ్చులేసి, చుట్టూ చూసి, బ్యాక్ ఆఫీసు డోర్ కేసి వెళ్తుంది. అది లాక్ చేసి వుంటుంది. లాక్ తీస్తూ - మార్టీ?-  అంటుంది ప్రశాంతంగా. 

            డోర్ తెర్చుకుంటుంది. చీకటిగా వున్న రూమ్ లోకి ఇవతలి లైటు పడుతుంది. 
            మార్టీ ఆఫీసులో బాత్రూం -
            బాత్రూం లోపలి నుంచి చూస్తే  తలుపు పూర్తిగా వేసి వుండదు. ఆఫీసు గదిలో పడుతున్న లైటు వెలుగు తలుపు సందులోంచి లోపలికి  ప్రసరిస్తూవుంటుంది. ఆ తలుపుని పట్టుకున్న విస్సర్ స్లీవ్ కఫ్, చెయ్యీ కన్పిస్తూంటాయి.

            ఎబ్బీ పైకి ఫోకస్ - డోర్ దగ్గర నిలబడి వున్న ఎబ్బీ ముందుకు అడుగులేసి చప్పున ఆగిపోతుంది. కెమెరాని దాటుకుని  వెళ్ళిపోతుంది.
            ఎబ్బీ పాయింటాఫ్ వ్యూ -   టేబుల్ మీద సగం కుళ్ళిన చేపలు  పడుంటాయి. టేబుల్ సొరుగులు కొన్ని లాగేసి వుంటాయి. వాటిలోని వస్తువులు టేబుల్  మీద చెల్లా చెదురుగా  పడుంటాయి.
            ఎబ్బీ పైకి ఫోకస్ - ఒకడుగు ముందు కేస్తుంది. ఆమె కాళ్ళ కింద గాజు ముక్కలు చిట్లుతున్న శబ్దం.
            ఎబ్బీ పాయింటాఫ్ వ్యూ - పగిలిన గాజు ముక్కలు చాలా పడుంటాయి కింద.

            ఎబ్బీ పైకి ఫోకస్ - కిందికి చూస్తున్న ఆమె తల తిప్పి బ్యాక్ డోర్  కేసి చూస్తుంది.

            ఎబ్బీ పాయింటాఫ్ వ్యూ- బ్యాక్ డోర్  విండో గ్లాస్ పగిలి, డోర్  హేండిల్ డ్యామేజీ  అయి వుంటుంది. బయటి నుంచి అద్దం పగులగొడితే దాని ముక్కలు లోపల పడ్డాయని తెలుస్తూంటుంది.
            ఎబ్బీ పైకి ఫోకస్ - నెమ్మదిగా టేబుల్ కేసి వెళ్తుంది చేపల్ని చూస్తూ. అక్కడ్నించి పక్కకి చూస్తుంది.
            ఎబ్బీ పాయింటాఫ్ వ్యూ - టేబుల్ వెనకాల సేఫ్ దగ్గర టవల్ పడుంటుంది. ఫ్రేములోకి ఎబ్బీ చెయ్యివచ్చి దాన్నందుకుంటుంది.

            స్లో మోషన్ లో - ఆ టవల్లో చుట్టి వున్న సుత్తి కిందపడి చప్పుడవుతుంది.
            ఎబ్బీ పైకి ఫోకస్ - కిందికి వంగి సుత్తి అందుకోబోతూంటే ఐ లెవెల్ లో సేఫ్ కాంబినేషన్ డయల్ ఫోకస్ లో కొస్తుంది. ఆ డయల్ సుత్తితో డ్యామేజీ చేసినట్టు వుంటుంది. ఎబ్బీ దృష్టి సుత్తి పైనుంచి టేబుల్ దగ్గరున్న చెయిర్ కింద నేల మీద పడుతుంది.

            ఎబ్బీ పాయింటాఫ్ వ్యూ - రక్తపు మరకలు.
            ఎబ్బీ పైకి ఫోకస్ -  అలాగే చూస్తూ లేస్తూంటే, టేబుల్ పైన ఆమె కళ్ళు పడతాయి. లేస్తున్నప్పుడు అద్దం ముక్కలు ఆమె కాలికింద శబ్దం చేస్తాయి.
            ఎబ్బీ పాయింటాఫ్ వ్యూ - చచ్చిన చేపలు, వాటి వెనకాల  టేబుల్ చుట్టూ పగిలిన అద్దం ముక్కలు.
            ఎబ్బీ పైకి ఫోకస్ - తదేకంగా చూస్తూంటుంది.
            ఎబ్బీ పాయింటాఫ్ వ్యూ - చచ్చిన చేపలు.

            ఎబ్బీ పైకి ఫోకస్ -  ఆమె వెనక్కి అలా పడిపోతూ వుంటే, ఆమెతో బాటే కెమెరా వొ రుగుతుంది, ఆమెని క్లోజ్ షాట్ లో వుంచుతూ. ఆమె తల తలగడ పైన పడుతుంది. స్లోగా కెమెరా పుల్ బ్యాక్ చేస్తే – ఆమె తన ఫ్లాట్ లో బెడ్ మీద వాలి వున్నట్టు రివీలవుతుంది. కళ్ళు విప్పార్చుకుని కదలకుండా వుంటుంది.
            ఎబ్బీ పాయింటాఫ్ వ్యూ - చీకటిగా వున్న ఫ్లాట్ కిటికీ అవతల లైటు వెలుగు
తున్న వీధి, అవతలి  బిల్డింగ్ ముందు భాగమూ  కన్పిస్తూంటాయి.

            ఎబ్బీ మీద లాంగ్ షాట్ - నిశ్చలంగా అలాగే వుంటుంది. ఓ క్షణం తర్వాత  బెడ్ మీంచి లేచి,  ఫ్రంట్ డోర్ దగ్గరికెళ్ళి లాక్ తీస్తుంది. తూలుతూ బెడ్ దగ్గరికొస్తుంది.

                                                                                   ఫేడవుట్

***

      ఈ సీను టేకింగ్ పూర్తిగా - ఇంటర్వెల్ సీనులో  రే మార్టీ ని చంపినప్పటి షాట్ కంపోజిషన్ తోనే వుంది. పాయింటాఫ్ వ్యూ షాట్స్ - ఫోకస్ షాట్స్ మాత్రమే రిపీటవుతూ. షాట్ కంపోజిషన్ కూడా ఒక కవిత్వం, ఒక వాక్య నిర్మాణం. ఈ షాట్స్ మనల్ని కేవలం దృశ్యాన్ని చూసేట్టు చేయవు, చదివింపజేయడం కూడా చేస్తాయి. మార్టీని రే చంపుతున్నప్పుడు ఏ షాట్స్  రికార్డు చేశాయో, అవే షాట్స్ ఎబ్బీకి నిజం తెలుస్తున్నప్పుడు రికార్డు చేశాయి. నిజాన్ని జరిగింది జరిగినట్టే చూపిస్తుంది ప్రకృతి. మనిషే వక్రీకరిస్తాడు. ఈసీను డైరెక్టర్ చెబుతున్నభాష్యం  కాదు, ఇంటర్వెల్ దగ్గర్నుంచి ప్రకృతే  వచ్చి చెప్తున్న భాష్యం. ఆమెకి నిజాన్ని తెలపడం కోసం ఇంత కష్టపడ్డారు దర్శకులు, ఇది మాత్రం నిజం. 

            ఐతే ఈ సీను ప్రారంభం స్క్రిప్టులో వున్నట్టు వుండదు. విస్సర్ సేఫ్ ని పగులగొడుతున్న షాట్ తోనే ప్రారంభముంటుంది సినిమాలో. బార్ లోకి ఎవరో వస్తున్నట్టు అన్పించి అతను బాత్రూం లో  దాక్కుంటాడు. అయితే ఎబ్బీ  బార్ దగ్గరికి వచ్చేముందు బార్ బయట కూడలిలో అదే యముడి వాహనం (విగ్రహం) షాట్  పడుతుంది ( హెడ్డింగ్ ఫోటో  చూడండి). అంటే యముడు (విస్సర్) లోపల వున్నాడనే అర్ధం. విస్సర్ మార్టీని చంపడానికి వచ్చినప్పుడు ఇదే దృశ్యం, ఇప్పుడు ఎబ్బీ వస్తున్నప్పుడు ఇదే దృశ్యం.

            ఎబ్బీ లోపలికొచ్చి లైట్లు వేయడం, ఆ లైటు వెలుగు మార్టీ ఆఫీసులోంచి అవతల బాత్రూంలో వరకూ పడ్డంలో గొప్ప అర్ధముంది. అసంకల్పితంగా ఆమె కుట్రదారుణ్ణి ఎక్స్ పోజ్ చేసేసింది, కానీ ఈ విషయమే ఆమెకి తెలీదు. ఎబ్బీ  - రే లని తను చంపినట్టు సృష్టించి మార్టీకి చూపించిన  ఫోటోకోసం వచ్చి సేఫ్ పగులగొడుతూంటే, ఎబ్బీ రావడం తో అంతరాయం కలిగి బాత్రూంలో దాక్కున్నాడు విస్సర్. ఆమె లైటేస్తే వెలుగులో తడిసిపోతున్నాడిలా!

            ఇది విస్సర్ కి రానున్న ప్రమాదానికి హెచ్చరిక. ఇదే తర్వాత వీళ్ళిద్దరి క్లయిమాక్స్ సీన్లో- చంపడానికి వచ్చిన విస్సర్ ఇలాగే  వెలుతురుకి ఎక్స్ పోజ్ అయిపోతూ తన ఉనికి చాటుకుంటూ వుంటాడు. ఆమె చీకట్లో వుండి  అతడి కదలికల్ని బట్టి వ్యూహం పన్నుతూంటుంది.  చీకటి వెలుగుల సయ్యాట.  ఆమెకి చీకటి సేఫ్ అయితే, అతడికి వెలుతురు డేంజర్. ఎవరైనా వెలుతురునే కోరుకుంటారు, చీకటిని కోరుకోరు. ఇక్కడ రివర్స్ అయిన పరిస్థితి. ఈ చీకటి వెలుగుల ప్లే డార్క్ మూవీస్ ఎలిమెంట్స్ లో ఒకటి.

             ఎబ్బీ బార్  కి రావడడం రావడం లైటెయ్యడంతో,  ఆమెకీ విస్సర్ కీ తర్వాత జరిగే లడాయికి  బీజం పడిపోయిందన్న మాట. ఇలా పరిస్థితుల కల్పన కూడా పరోక్షంగా కథ  చెబుతోంది. ప్రతీదీ కథ కోసమే చేశారు దర్శకులు. 

            ఈ సీనులో గాజుముక్కల తుంపర తెలుగు మెలోడ్రామాతో చెప్పుకుంటే, మార్టీ తో ఆమె సంసారం ముక్కచెక్కలయ్యిందనేందుకు నిదర్శనం. అక్కడే సేఫ్ ని చూసింది గానీ ఆ సేఫ్ లోనే తన మీద విస్సర్ సృష్టించిన ఫోటో వుందని తెలీదు. ఆమెకిప్పుడు ఖరారయ్యిందేమిటంటే,  రే మళ్ళీ వచ్చి మార్టీతో ఘర్షణ పడ్డాడని. చివరికి రక్తపు మరకలు  చూడగానే ఇక మార్టీ లేడని నిర్ధారణ అయిపోయి కుప్పకూలింది...

            ఇలా అంచెలంచెలుగా ఈ సీనుని బిల్డప్ చేసి ఆమెకి నిజాన్ని తెలియజేశారు.

(సశేషం) 

-సికిందర్

          

527 : రివ్యూ!

రచన- దర్శకత్వం :  సి. సత్యం

తారాగణం : భరత్‌,  సృష్టి, నాగినీడు, తనికెళ్ల భరణి, రఘుబాబు, తులసి, ప్రగతి, ధనరాజ్‌ సత్య, ‘తాగుబోతు' రమేష్ తదితరులు
సంగీతం: శేఖర్‌ చంద్ర,  కెమెరా: సాయి శ్రీరామ్
బ్యానర్: ఎస్‌.వి.కె. సినిమా
నిర్మాత: వంశీకృష్ణ శ్రీనివాస్‌
విడుదల : అక్టోబర్ 6, 2017
***

      కొత్త దర్శకులు తమకి  తెలిసిన సినిమా రకాలు రెండే అన్నట్టు  వారం వారం విఫలమై   వెళ్ళిపోతున్న ప్రస్తుత కాలంలో, ఇంకో కొత్త దర్శకుడు ఆ రెండిట్లో ఒక రకాన్ని తనుకూడా ఫాలో అయిపోతూ విఫలమయ్యాడు. రోమ కామెడీ అనే ప్రేమడ్రామా, దెయ్యం కామెడీ అనే హార్రర్ ట్రామా. ఈ రెండు రకాలని పంచుకుని  రెండు బ్యాచులుగా తయారై  థియేటర్ల దగ్గర ప్రేక్షకులు కనపడకుండా కర్ఫ్యూ విధిస్తున్నారు.  షోలు క్యాన్సిల్ చేయించుకుంటున్నారు. రేయ్ నిన్నే- అని పిల్చినా కూడా తిరిగి చూడని ప్రేక్షకులని గంపగుత్తగా  పెంచుకుంటు న్నారు. ఒకనాడు శాటిలైట్ హక్కుల బూమ్ లో చిన్నా చితకా చిల్లర  సినిమాలన్నీ శాటిలైట్ హక్కుల కోసమే తీశారు తప్ప ప్రేక్షకుల కోసం కాదు. ఇప్పుడు శాటిలైట్ హక్కులుకూడా లేకపోయాక, ఇప్పుడైనా ప్రేక్షకులకోసం తీయకుండా ఓ సినిమాకి దర్శకుడు అన్పించుకోవడమే టార్గెట్ అన్నట్టు అవే ఫ్లాపయ్యే రోమ కామెడీ లు, అవే దెయ్యం కామెడీలు తీసుకుంటూ అభివృద్ధి అనే మాటకి రెండు దశాబ్దాల దూరంలో గడిపేస్తున్నారు. 

        రివాజుగా ప్రస్తుత దర్శకుడు కూడా అదే 2000 - 2005 మధ్య యూత్ సినిమాల పేరుతో వెల్లువెత్తిన ‘లైటర్ వీన్ లవ్ స్టోరీస్’ అపజయాల బూమ్ లోనే   వుండిపోయి వీణ వాయించాడు. నేటి నెట్ యుగపు యూత్ కి కావాల్సింది గిటార్ సినిమాలు. అందుకే ఈ వీణ సినిమాల ముఖం చూడకుండా  ‘గిటార్ లవ్స్’ రుచి చూపిస్తున్న షార్ట్ ఫిలిమ్స్ ప్రేక్షకులుగా మారిపోతున్నారు పొలోమని యూత్. కాస్త ఆ టాలీవుడ్ అనే హోదా నుంచి దిగివచ్చి, క్షేత్ర స్థాయిలో వాస్తవ పరిస్థితి చూసి,  ఇక నైనా  ఈ దుకాణాలు కట్టేస్తారా ?

తెలిసిన రకాలు రెండే. ఇంకాస్త విస్తరిస్తే పెద్ద స్టార్ల యాక్షన్ సినిమాలు. ఈ రెండు దశా బ్దాలుగా ఇవే  చూస్తూ పెరిగిన కొత్త దర్శకులు, రచయితలూ చాలా దురదృష్ట వంతులు. ఈ దురదృష్ట వంతుల్ని ఈ రెండు దశాబ్దాల ఈ రెండు మూడు రకాల సినిమాలే తయారు చేశాయి. కిందటి తరం దర్శకులు రచయితలూ చాలా అదృష్టవంతులు. వాళ్ళ కాలంలో యాక్షన్, కామెడీ, ఫ్యామిలీ, భక్తీ, పౌరాణిక, జానపద, క్రైం, గూఢచార, కౌబాయ్, విప్లవ, చారిత్రక, దేశభక్తీ  వగైరా వగైరా  లేనిదంటూ లేని రకాల సినిమాలూ చూస్తూ పెరిగారు – ఆల్ రౌండర్ దర్శకులుగా, రచయితలుగా  అయ్యారు. విభిన్న సినిమాలని ప్రేక్షకులకి పంచారు.

‘ఓయ్ నిన్నే’ ఏనాటిదో చిన్నప్పట్నుంచి కలిసి పెరిగే కయ్యాల బావామరదళ్ళ అదే పాత పల్లెటూరి కథ. తమ మధ్య వున్నది ప్రేమే అని తెలీక ఆడే  అదే పాత డ్రామా. ఈ డ్రామా కూడా ఎలా నడపాలో తెలియక సెకండాఫ్ సాంతం అర్ధరహితంగా మార్చేసిన వైనం. ఎందుకంటే, ఇలాంటి ప్రేమ డ్రామాల్లో  పాత్రల మధ్య సమస్యలకి 2000 – 2005 బాపతు యూత్ సినిమాల్లో కూడా పరిష్కారాలు గందరగోళమే. కాబట్టి అదే గందరగోళం వారసత్వంగా వచ్చిందిప్పుడు. 

          హీరో రైతు అవాలనుకుంటాడు. హెడ్ మాస్టారైన తండ్రి  ఇంకా బాగుపడే పనేదైనా  చూసుకోమంటాడు. దీంతో ఇద్దరికీ  విభేదం. హీరోకి  చిన్నతనం నుంచీ కలిసి పెరిగిన మరదలుగా హీరోయిన్. ఇద్దరి మధ్య ఎప్పుడూ కయ్యాలు. ఆవారా హీరోకి ఇంట్లో లభించని ఆదరణ హీరోయిన్ ఇంట్లో లభిస్తుంది. ఇటు  హీరో తండ్రి హీరోయిన్ ని  కన్నకూతురిలా ఆదరిస్తాడు. హీరోయిన్ పెళ్లి చేయాలనుకుంటాడు హీరోయిన్ తండ్రి. వేరే పెళ్లి కొడుకు వస్తాడు. ఇప్పుడు హీరో హీరోయిన్లకి ఆందోళన. హీరో మీద ప్రేమ వుందని హీరోయిన్ ఎలా చెప్పాలి? హీరోయిన్ మీద ప్రేమే వుందని  హీరో కూడా ఎలా చెప్పాలి? ఇదీ సమస్య. ఇదీ ఇక ముందు కథ. ఎన్ని సార్లు అదేపనిగా చూడాలి ఈ అరిగిపోయిన పాతచింతకాయ కథ. 

          కొత్త దర్శకుల రోమప్రేమ డ్రామాలు రెండు రకాలు :  ప్రేమల్ని వెల్లడించుకోలేక హీరోహీరోయిన్లు హీనంగా బతకడం, అపార్ధాలతో విడిపోయి హీనంగా ప్రేక్షకుల్ని బాధించడం ఈ మధ్యే  తమిళ టైటిల్ తో తెలుగు రోమడ్రామా  ‘కాదలి’ లో  ఇద్దరు హీరోలలో ఎవరికి  ప్రేమ చెప్పాలో తెలియక,  ముగ్గురు ప్రేక్షకులున్న థియేటర్లో కనికరం లేకుండా హింసించింది హీరోయిన్ సెకండాఫ్ అంతా.  సేమ్ సీన్ ఇప్పుడు, కాకపోతే హీరో హీరోయిన్లు ఇద్దరూ టార్చర్ పెట్టేస్తారు.

సినిమాలు తొలి స్వర్ణయుగం,  మలి స్వర్ణయుగం,  వ్యాపారయుగం కూడా ముగిసి పోయి,  ఫైనల్ గా దివాలాయుగం నడుస్తోంది మహర్దశగా. 

          షరా మామూలుగా కొత్త హీరో హీరోయిన్లు. హీరో ఇంకా  శిక్షణపొందాలి. హీరోయిన్ కి ఇలాటి సినిమాల బారి నుంచి కొంత  రక్షణ కల్పిస్తే  కాస్త ఎదిగే అవకాశాలున్నాయి. కమెడియన్ల  కామెడీకి  అర్ధంలేదు. నాగినీడు, తనికెళ్ళ, తులసిలవి పాత మూస పాత్రలు. కానీ ఆ కాలంలో ఇలాటి పాత్రలైనా వాస్తవిక దృక్పథంతో వుండేవి. కొడుకు రైతు అవుతానంటే ఉపాధ్యాయుడైన నాగినీడుకి ఏమిటి అభ్యంతరం – ఇప్పుడు ఉద్యోగాలు వదులుకుని వ్యవసాయాల్లో అద్భుతాలు చేస్తున్న ఇంజనీర్లు వుండగా?  వ్యవసాయ రంగంలో ఇలాటి వారు వస్తే భవిష్యత్తులో ఆత్మహత్యలు చేసుకునే రైతులు వుంటారా? అన్ని కాలాలకి కలిపి ఒకే పాత్రచిత్రణలు సరిపెట్టేయడం ఎందుకంటే,  2000 - 2005  మధ్య తమ టీనేజిలో చూసి మోహం పెచుకున్న యూత్ సినిమాల జ్ఞానం ఇదే కాబట్టి.

          ఈ వృధా ప్రయాసకి శేఖర్ చంద్ర సంగీతం,  కోనసీమ అందాలు చూపించిన  సాయి శ్రీరాం ప్రయత్నం వృధాపోయాయి. నాల్గు వారాలు తమ కళానైపుణ్యాల్ని కూడా ప్రేక్షకులు ఎంజాయ్ చేయాలంటే అసలంటూ సినిమాలో విషయముండాలిగా?  

          పెద్ద విడుదలలు లేక ఖాళీగా వున్న ఈ వారంలో విడుదలైన పాత దర్శకుడి  ‘లావణ్యా విత్ లవ్ బాయ్స్’, మరో కొత్త దర్శకుడి ‘నేను కిడ్నాప్ అయ్యాను’  కూడా  సొమ్ము చేసుకోలేకపోయాయి షరా మామూలుగా.

-సికిందర్
https://www.cinemabazaar.in

  

525 : ప్ర. జ.

Q : Dear sir,
            You always propagate the necessity of the three act structure in screenplays, but Torantino, Nolan, or Alejandro movies couldn't follow up the structure? Then their movies are considered classics? How can you explain this?

- Dileep Kumar, ifl univ.

A : Every movie will have a three act structure come what may - ie a beginning, a middle and an end, but not neccesarily in that order. What you see in those movies that of those directors you have mentioned is- jumbled order.

Q : Sir.
            The way you are analyzing Blood Simple story structure is most educating enterprise to me. These writings reveal so many tremendous truths to me about script writing. So please don’t discontinue writing on this subject. This is my humble request.

JD Swamy, co-director

A : Request taken, have no worry about it. 

Q: Sir,
            Regarding Happy Bhag Jayegi, is it possible the writer doesn’t have any idea of how the hero and the heroine should get married? So obviously the Bagga character will not marry her. Her  father’s character won’t agree as well.  So the writer has no option but to do the only thing with hero’s  character? So to convince the audiences, he  might have created that Madhubala  scene, in which the hero compares his own life with that of heroine’s? Am I  correct?

K. Vidheer, associate director

A : The story was conceived keeping in mind that it shouldn’t  end up stereo typing the lead characters. If the hero gets married to heroine, it will become another regular masala.  And will also turn up another Indian boy meets Pak girl kinda movie. It’s outright out of box creation, to which in Telugu our people still consider taboo…

***

524 : స్క్రీన్ ప్లే టిప్

    ఈ వారం ‘స్పైడర్’,  ‘మహానుభావుడు’ రెండూ రెండు  నీతులు చెబుతూ వచ్చాయి. నీతి చెప్పాల్సిందే, లేకపోతే సమాజం చెడిపోతుందనికంగారుపుట్టినప్పుడు ఆ నీతిని ఎలా చెబితే ప్రభావశీలంగా వుంటుంది?  ఇదొకసారి పరిశీలిద్దాం. ‘మహానుభావుడు’ లో పరిసరాలపట్ల ఎలర్జీ వున్న హీరో తిరిగి ఆ పరిసరాల్లోనే - ప్రకృతిలోనే కలిసిపోయి పునీతుడవుతాడు. జోసెఫ్ క్యాంప్ బెల్ ప్రకారం హీరో పాత్ర ప్రయాణం కనువిప్పుతో మోక్షం పొందడం వైపే కొనసాగుతుంది. తప్పుని సరిదిద్దుకుని ఒప్పుని అంగీకరించే దిశకే వుంటుంది. ఈ రీత్యా ‘మహానుభావుడు’ హీరో అక్షరాలా మట్టిని మొహం మీద కొట్టుకుని తప్పుని ఒప్పుకున్నాడు. రోమాంటిక్ కామెడీని రోమాంటిక్ డ్రామాగా మార్చేశాక, ఇలా ఒక నీతిని చెప్పి పాతని రుచి చూపించినట్టయింది వేరే సంగతి.

          అయితే ఈ నీతి చెప్పడం పట్ల కూడా వున్న నిబద్ధత, చెప్పాలనుకుంటున్న పాయింటుని స్పష్టంగా, విజువల్ యాక్షన్ తో కలిపి చూపించిన పధ్ధతి ‘స్పైడర్’ లో లోపించడాన్ని గమనించవచ్చు.  ‘స్పైడర్’ లో మానవత్వం, సహాయగుణం తగ్గిపోవడం పట్ల అభ్యంతరం చెప్పారు.  ఐతే చిన్నప్పట్నుంచీ హత్యలు చేస్తున్న సైకోని పట్టుకోలేకపోవ డమనే అసమర్ధత ఇలా మెసేజి లివ్వడానికి అడ్డుపడలేదు కాబోలు. ఇదికూడా అలా  వుంచుదాం. అలా మానవత్వం, సహాయగుణం లేకుండా ప్రవర్తించే పాత్రల్ని చూపించకుండానే ఫిర్యాదులు  చేశారు. ఆఖరికి  హాస్పిటల్ కూలినా, బండ దొర్లి వస్తున్నా, సహాయానికి రాని మనుషులెవర్నీ చూపించకుండానే ఫిర్యాదులు, అభ్యంతరాలూ  వ్యక్తం చేశారు. మనుషులు మానవత్వంతో, సహాయ గుణంతో వుండాలని హీరో తనని తానే  చూపించుకుని చెప్పుకున్నాడు. మనుషుల్లో ఈ రెండు గుణాలు తగ్గిపోవడానికి ఆన్ లైన్లో రకరకాల స్క్రీన్ లకి అంకితమైపోవడం కారణమన్నాడు. ఇలా మాటలు చెప్పడం పాసివ్ ఉదాహరణల్ని ఉటంకించడమే. దీంతో సినిమాకి పెరిగే బలం ఏమీ లేదు. ప్రేక్షకులూ  స్పందించడానికి ఏమీ వుండదు. 

          ‘మహానుభావుడు’ లో చూపించింది ఎలర్జీ, దాంతో  విజువల్ గా యాక్టివ్ ఉదాహరణలు. చివరికి హీరో ప్రకృతిలో  కలవడం కూడా యాక్టివ్ గా వున్న విజువల్ ఎగ్జాంపులే. ఇలాగే ‘స్పైడర్’ లో ఇప్పుడున్న పోకడల్ని దృష్టిలో పెట్టుకుని - బండ దొర్లుతున్నప్పుడు, హాస్పిటల్ కూలుతున్నప్పుడూ మనుషులు ఎగబడి వీడియోలూ సెల్ఫీలూ తీసుకుంటూ ఎంజాయ్ చేస్తునట్టు చూపించివుంటే, అది యాక్టివ్ విజువల్ ఎగ్జాంపుల్ అయ్యేది, చెప్పే నీతి బలంగా చొచ్చుకెళ్లేది. రోజూ ఎక్కడోచోట రోడ్డు ప్రమాదాలప్పుడు చూస్తూనే వుంటాం ఛానెళ్ళ ప్రసారాల్లో -  దారిన పోతున్న వాళ్ళు సాయపడకపోగా ఫోటోలూ  వీడియోలూ తీసుకుని వెళ్ళిపోవడం. అది గొప్పని ఫీలవడం. సోషల్ మీడియాలో లైకులకోసం, వైరల్ అవడం కోసం పోస్టులు  చేసుకోవడం. ఏనాడో ఐన్ స్టీన్ భయపడింది నిజం చేస్తున్నారు. టెక్నాలజీ మనుషుల మధ్య ముఖాముఖీ స్పర్శని డామినేట్ చేసినప్పుడు మనుషులు ఈడియెట్స్ లా తయారవుతారేమోనని తనకి భయంగా వుందన్నాడు ఐన్ స్టీన్!

          అసలు ఒక నీతికి సంబంధించి మనుషులు ఎప్పుడేం చేస్తున్నారో చూసి, దాన్ని డ్రమటైజ్ చేసినప్పుడు కదా నీతి బలంగా నాటుకునేది. మరొకటేమిటంటే, ఆ బండ దొర్లడానికీ, హాస్పిటల్ కుప్ప కూలడానికీ పూర్తిగా సైకోతో హీరో ఆశక్తతే  కారణం. ఇంకా చెప్పుకుంటే చాలా లోపాలున్నాయి మొత్తం సెటప్ లో. మెసేజి ఇవ్వడానికే ఇంత గందరగోళం వుంటే, మనుషులు సాయపడడానికీ ఇంకా గందరగోళానికి లోనైపోతారు. ఆ సినిమాలో చూపించినట్టు ఇది ఫలానా వాడి అశక్తతతకి ఎగ్జాంపులేమో,  మనం సాయపడకూడదేమో నని సెల్ఫీలు తీసుకుంటారు.

-సికిందర్ https://www.cinemabazaar.in