805 : ఆధునిక స్క్రీన్ ప్లే సంగతులు

         స్క్రీన్ ప్లేల్లో మిడిల్ వన్, మిడిల్ టూలు ఒకే ఉష్ణోగ్రతతో వుండవు. మిడిల్ వన్ వేసవి ఎండ అయితే మిడిల్ టూ రోహిణీ కార్తె ప్రచండం. ఈ ఫీల్ చూపించకపోతే మొత్తం మిడిల్ అంతా చప్పగా వుంటుంది. ‘చిత్ర లహరి’లో ఇదే మర్చిపోయారు. చలికాలం తర్వాత ఎండా కాలం వస్తుంది, ఆ తర్వాత వర్షాకాలం. స్క్రీన్ ప్లేల్లో చలికాలం బిగినింగ్ అనుకుంటే, ఎండాకాలం మిడిల్. ఈ మిడిల్ ఎండాకాలంలో  మళ్ళీ మిడిల్ వన్ ఎండ ఒక ఉష్ణోగ్రతతో వుంటే, మిడిల్ టూ ప్రజ్వరిల్లిన ఉష్ణోగ్రతతో వడగాల్పులు వీచే రోహిణీ కార్తెగా వుంటుంది. ఇక ఎండ్ ఈ వేడినంతా చల్లబర్చే వర్షాకాలం. సినిమా చూసే ప్రేక్షకులకి అదొక జర్నీఅనుకుంటే, ఈ రుతువులు ఫీలయ్యేట్టు ఆ జర్నీని లేదా టూర్ ని రూపకల్పన చేసినప్పుడు ఆ అనుభవం వేరే వుంటుంది. ఈ రుతువులే కథనంలో మార్పులు. వీటివల్లే టైం అండ్ టెన్షన్ గ్రాఫ్ ఏర్పడుతుంది. దీనికి మూలం క్యారెక్టర్ ఆర్క్ (పాత్రోచిత చాపం). క్యారెక్టర్ లేకుండా ఏదీ ఏర్పడదు. క్యారెక్టరే బ్రహ్మ. ఇదే కథని పుట్టిస్తుంది, పాలిస్తుంది. దీనికో గోల్ వుంటుంది. ఆ గోల్ తో కథని పాలించే (కథనం నడిపే) క్రమంలో అది లోనయ్యే ఒడిడుకులే క్యారెక్టర్ ఆర్క్ ని ఏర్పరుస్తాయి. దాంతో కథనంలో  టైం అండ్ టెన్షన్ గ్రాఫ్, దీంతో రుతువుల అనుభవం.  

          ప్లాట్ పాయింట్ వన్ దగ్గర మొదలయ్యే మిడిల్ వన్ ఎలాగైతే ఇంటర్వెల్ కి దారి తీసే కథనంతో వుంటుందో, అలా ఇంటర్వెల్ నుంచి మొదలయ్యే మిడిల్ టూ, ప్లాట్ పాయింట్ టూకి దారి తీసే కథనంతో వుంటుందని తెలిసిందే. అంటే ప్లాట్ పాయింట్ వన్ దగ్గర ప్రధాన పాత్ర సమస్యలో పడితే, ప్లాట్ పాయింట్ టూ దగ్గర ఆ సమస్యలోంచి బయటపడుతుందన్న మాట. ఇది అన్ని స్క్రీన్ ప్లేలకి వాడుతున్న సాంప్రదాయ పధ్ధతి. ‘బేబీ డ్రైవర్’ లో ఇది తిరగబడిందని గత రెండు వ్యాసాల్లో గమనించాం. ఇక్కడ బేబీకి ప్లాట్ పాయింట్ వన్ దగ్గర సమస్య పుట్టలేదు, తన బాస్ డాక్ ని పడ్డ బాకీ తీర్చే సమస్యని పూర్తి చేసుకుని స్వేచ్ఛా జీవి అయిపోయాడు. డెబొరాతో జీవితాన్ని వూహించుకుంటూ వెళ్ళిపోయాడు. ఇలా ప్లాట్ పాయింట్ వన్ నుంచి వుండే ప్రత్యర్ధితో ఏర్పడే సమస్యా, దాన్ని సాధించే గోల్ కోసం మిడిల్ విభాగపు సంఘర్షణా అనే సాంప్రదాయ రొటీన్ కథనాన్ని బ్రేక్ చేసినట్టయ్యిందని చెప్పుకున్నాం. అంటే ఎక్కడో సెకండాఫ్ లో ప్లాట్ పాయింట్ టూ దగ్గర పరిష్కారమవ్వాల్సిన సమస్యా, పూర్తవ్వాల్సిన గోల్,  ఫస్టాఫ్ లోనే ప్లాట్ పాయింట్ వన్ దగ్గరే పూర్తయి పోయాయన్న మాట. ప్లాట్ పాయింట్ వన్ దగ్గర సమస్య పుడితేనే కథ పుడుతుంది, సమస్య తీరిపోతే ఇక మిడిల్ లో కథేముంటుంది? మిడిల్ ఎలా కొనసాగుతుంది? 

        ఇదికూడా గత వ్యాసంలో గమనించాం. మిడిల్ వన్ లో బేబీ,  ఫ్రీ బర్డ్ లా డెబొరాతో ఎంజాయ్ చేస్తున్నపుడు చూసిన డాక్ ని దుర్బుద్ధి పుట్టడం. డెబొరాని అడ్డం పెట్టుకుని బ్లాక్ మెయిల్ చేసి తిరిగి దోపిడీ జాబ్స్ కి రమ్మని బేబీని బెదిరించడం. ఇలా ఫ్రెష్ గా కథ పుట్టింది. ఎప్పుడూ ప్లాట్ పాయింట్ వన్ దగ్గరే సమస్యా దాంతో కథా పుట్టాలని స్ట్రక్చర్ నేర్పింది. ఇలాగే సినిమాలూ వస్తున్నాయి. స్ట్రక్చర్ తో క్రియేటివిటీకి పాల్పడితే ఆ కృత్రిమత్వం తొలగిపోతుంది. ఒకే పోతలో పోసినట్టు కథా నిర్మాణాలూ, దాంతో సినిమాలూ వుండవు. అలా డాక్ బ్లాక్ మెయిల్ కి లొంగిన బేబీ తిరిగి దోపిడీ జాబ్స్ మొదలెట్టాడు. 

          బీబీ డాక్ ఋణం తీర్చుకుని వెళ్ళిపోయాక, ఇది కావాలని మళ్ళీ డాక్ చేత కథని పుట్టించడం కాదా అన్పించవచ్చు. బేబీ డాక్ ఋణం తీర్చుకుని స్వేచ్ఛాజీవి అయ్యాడు సరే, మరి చట్టం బాకీ సంగతి? డాక్ కి పడ్డ బాకీ అతడికి దోపిడీలు చేసి పెట్టి తీర్చేశాడు బాగానే వుంది, మరి  దోపిడీల ఫలితంగా చట్టం దృష్టిలో తను నేరస్థుడైన సంగతి? ఇది మర్చిపోయి స్వేచ్ఛాజీవి ఎలా అయిపోతాడు? ముందు చేసిన నేరాలకి పరిహారం చెల్లించుకున్నాకే, చట్టం బాకీ తీర్చుకున్నాకే స్వేచ్ఛాజీవి అయి డెబొరాతో ఎంజాయ్ చేయగలడు. గత వ్యాసంలో ఇదంతా విశ్లేషించుకున్నాం. కాబట్టి ఇప్పుడు పుట్టిన కథ కథకోసం కావాలని పుట్టించిన కథ కాదు. చట్టం బాకీ అనే బ్యాలెన్సున్న పాయింటుతో, డాక్ నే ఉపయోగించి కొనసాగించిన కథ. బిగినింగ్ విభాగంలో బేబీ ఎప్పుడైతే నేరాలు చేశాడో, అప్పుడే మిడిల్ లో పుట్టాల్సిన కథ పుట్టి నిగూఢంగా వుండి పోయింది, అదిప్పుడు బయటపడింది. 

      ఇలా డాక్ తో సంఘర్షణ పుట్టి, డెబొరాని కాపాడుకునే గోల్ కూడా ఏర్పడింది బేబీకి. ఇలా కథా లక్షణాలు వాటికవే మొలకెత్తాయి. అయితే ఇప్పుడు ఇలా డాక్ తో కథ పుట్టినప్పుడు ఇతను ప్రత్యర్ధికాదు. కాబట్టి బేబీ ఇతడితో అమీతుమీ తేల్చుకునే కథనం వుండదు. ఈ మిడిల్లో పుట్టింది చట్టం బాకీ కథ. కాబట్టి పోలీసులే ప్రత్యర్ధులుగా వుంటారు. ఇంటర్వెల్ కల్లా బేబీ వెళ్లి వెళ్లి పోలీసులతోనే డైరెక్టుగా  పెట్టుకున్నాడు. ఆయుధాల కోసం బుచర్ గ్యాంగ్ దగ్గరి కెళ్ళినప్పుడు,  ఆ బుచర్ గ్యాంగ్ పోలీసులే నని తెలీక వాళ్ళని చంపేసి ఇక చట్టం ఉచ్చులో దారుణంగా ఇరుక్కున్నాడు బేబీ. ఇక చట్టం బాకీ తీర్చుకోక తప్పించుకోలేడు. ఇదీ ఇంటర్వెల్ వరకూ నడిచిన మిడిల్ వన్ కథనం, దాని తాలూకు వేసవి ఉష్ణోగ్రత. ఇక మిడిల్ టూ కథనంలో రోహిణీ కార్తె ఎలావుందో చూద్దాం...

          మిడిల్ టూ కథనం : రోహిణీ ఎండకి రోళ్ళు పగులుతాయట, రోళ్ళలో పాయసం ఉడుకుతుందట. బేబీగాడు ఎలా ఉడుకుతున్నాడో చూద్దాం. ఇంటర్వెల్లో వీడు పోలీసులుగా బయటపడ్డ బుచర్ గ్యాంగ్ ని చంపేసి కారులో పారిపోయాడు బ్యాట్స్, బడ్డీ, డార్లింగ్ లతో కలిసి. అలా పారిపోతున్నప్పుడు ఒక రెస్టారెంట్ ని చూసి ఏదైనా తిందాం కారాపమంటాడు బ్యాట్స్. బేబీ విన్పించుకోడు. రెస్టారెంట్ లో డెబొరా ముందుకు వీళ్ళని తీసికెళ్ళడం ఇష్టం లేదు. ఈ రెస్టారెంట్ బావుండదంటాడు. బ్యాట్స్ నసపెడుతూంటే భరించలేక ఆపుతాడు. రెస్టారెంట్ లో డెబొరాని చూసి ఆమె తెలియనట్టే వుంటాడు బేబీ. ఈ గ్యాంగ్ తో బీబీని చూసిన డెబొరా కూడా జాగ్రత్త పడుతుంది. కానీ వీళ్ళిద్దరూ లవర్స్ అని పసి గట్టేస్తారు గ్యాంగ్ ముగ్గురూ. న్యూసెన్స్ చేయవద్దని బ్యాట్స్ ని వారిస్తాడు బడ్డీ. బేబీ వీళ్ళతో ఇబ్బందికరంగా గడిపి వెళ్ళిపోతూ బిల్లు తనే పే చేస్తూ, ఒక నోట్ అందిస్తాడు డెబొరాకి. అందులో రాత్రి రెండు గంటలకి లాంగ్ డ్రైవ్ వెళ్దామని వుంటుంది. 

   నల్గురూ డాక్ దగ్గరికి తిరిగొస్తారు. అప్సెట్ అయిందంటాడు బ్యాట్స్. బుచర్ గ్యాంగ్ దగ్గర ఆయుధాలు తీసుకోమని డాక్ పంపిస్తే తాము వెళ్లారు. ఆ బుచర్ గ్యాంగ్ పోలీసులని తెలియడంతో చంపి రాక తప్పలేదు...బ్యాట్స్ అంటూంటే, డాక్ సీరియస్ అవుతాడు. వాళ్ళు పోలీస్ డిపార్ట్ మెంట్లో తన మనుషులేననీ, వాళ్లకి మామూళ్ళు ఇస్తున్నాననీ, వాళ్ళని చంపడమేమిటని నిలదీస్తాడు. ఈ సంగతి ముందే చెప్పొచ్చుకదా అంటాడు బ్యాట్స్. 

          డాక్ దగ్గర్నుంచి వచ్చేసి, డెబొరాకి కాల్ చేస్తాడు బేబీ. రెస్పాన్స్ రాదు. అసహనంగా గడుపుతాడు. అప్పుడు బ్లాక్ అండ్ వైట్ లో ఒక దృశ్యం అతడికి మెదుల్తుంది. ఆ బ్లాక్ అండ్ వైట్ దృశ్యంలో బేబీ, డెబొరాలు పురాతనంగా వుంటారు. ఏంతో పాత సన్నివేశం లాగా వుంటుంది. ఓ కారు వుంటుంది. లాంగ్ డ్రైవ్ కి ఆమెనాహ్వానిస్తూంటాడు. కట్ అవుతుంది. తేరుకుని డెబొరాదగ్గరికి బయల్దేరబోతాడు. ఫాలో అవుతున్న బడ్డీ ఆపేస్తాడు. బ్యాట్స్ కూడా వచ్చేస్తాడు. బేబీ ఇయర్ ఫోన్స్ లాగేస్తారు, ఐ - ఫోన్ తీసేసుకుంటారు. తీసికెళ్ళి డాక్ ఎదుట హాజరుపరుస్తారు. 

          డాక్ ఎదుట టేబుల్ మీద చాలా టేప్స్ పడుంటాయి. అవి డాక్ తో మీటింగ్స్ ని బేబీ రహస్యంగా రికార్డు చేసిన టేప్స్. బేబీ ఫ్లాట్ ని సోదాచేస్తున్నప్పుడు బ్యాట్స్, బడ్డీలకి దొరికాయి. అవి సరదాకి మ్యూజిక్ మిక్స్ చేసి ఎంజాయ్ చేస్తున్నానంటాడు బేబీ. వీడు పోలీస్ ఏజెంటని ఆరోపిస్తాడు బ్యాట్స్. పోలీస్ ఏజెంటైతే తమ  సంభాషణలు రికార్డ్ చేసిన టేప్స్ ని మ్యూజిక్ మిక్స్ చేసి చెడగొట్టడని అంటాడు డాక్. బేబీ మీద అనుమానాలు తొలగిపోతాయి. మరి రేపు పోస్టాఫీస్ జాబ్ ఓకేనా అని డాక్ అడిగితే, అది పూర్తి చేద్దామంటాడు బేబీ. 

      మార్నింగ్ పోస్టాఫీసు దోపిడీ కెళ్ళి డబ్బుతో పారిపోయి వస్తున్నప్పుడు బ్యాట్స్ గార్డుని చంపేస్తాడు. పోలీసులు వెంటబడతారు. బ్యాట్స్ కారెక్కేసి త్వరగా పోనిమ్మంటాడు.  బేబీ మొండి కేస్తాడు. రివాల్వర్ తో బెదిరించే సరికి కారుని పోనిస్తాడు బేబీ.  ఎదురుగా ఒక పికప్ వ్యాను ఆగి వుంటుంది. దాంట్లోంచి ఇనపరాడ్లు పొడుచుకుని వచ్చి కన్పిస్తూంటాయి. ఆ రాడ్లు బ్యాట్స్ ఛాతీలోకి దిగబడేలా పికప్ వ్యాన్ని గుద్దేస్తాడు బేబీ. రాడ్లు దిగబడి చచ్చిపోతాడు బ్యాట్స్. 

          పోలీసులు చుట్టుముట్టేస్తారు. డబ్బు తీసుకుని కారుదిగి పారిపోబోతారు బడ్డీ,  డార్లింగ్ లు.  బేబీ ఎప్పుడో జంపై పోతాడు. అతన్ని పోలీసులు ఛేజ్ చేస్తారు. ఇటు బడ్డీ,  డార్లింగ్ ల  మీద ఫైరింగ్ చేస్తారు. డార్లింగ్ చనిపోతుంది. దీంతో పోలీసుల మీద కాల్పులు జరుపుతూ విజృంభిస్తాడు బడ్డీ. 

          పోలీసుల్ని తప్పించుకుంటూ పరిగెడుతున్న బేబీ, షాపింగ్ మాల్ లో డ్రెస్ మార్చుకుని,  బయట కార్లూ మార్చేస్తూ ఎస్కేప్ అవుతూంటాడు. తన ఫ్లాట్ కి తిరిగొచ్చేస్తాడు. అక్కడ పెంపుడు తండ్రి జోసెఫ్ కింద పడి వుంటాడు. ఫ్లాట్ అంతా చిందర వందరై వుంటుంది. దాచుకున్న డబ్బు తీసి జోసెఫ్ కిచ్చేసి, ఎత్తుకెళ్ళి హాస్పిటల్లో చేర్పించి, డెబొరా దగ్గరికి వెళ్ళిపోతాడు. 

       రెస్టారెంట్ లో డెబొరా ఎదురుగా రివాల్వర్ పెట్టుకుని కూర్చుని వుంటాడు బడ్డీ. అప్పుడు కారుని  వెంటనే పోనివ్వక డార్లింగ్ చావుకి బేబీ కారకుడయ్యాడని అతడి కసి. ఇంతలో ఒక పోలీసు అధికారి లోపలి కొస్తాడు టాయిలెట్స్ కెళ్ళడానికి. బడ్డీ రివాల్వర్ దాచేస్తాడు. ఒక వెయిటర్ ఇటుగా రావడంతో అటు తిరిగి చూస్తాడు బడ్డీ. దీంతో తన రివాల్వర్ తీసి బడ్డీని కాల్చేసి డెబొరాతో పారిపోతాడు బేబీ. టాయిలెట్స్ లోంచి వచ్చి కిందపడ్డ బడ్డీని చూస్తాడు పోలీసు అధికారి. బతికున్న బడ్డీ అతణ్ణి కాల్చేస్తాడు. 

          దొరికిన ఒక డబ్బు బ్యాగుతో, డెబొరాని తీసుకుని డాక్ దగ్గరి కొస్తాడు బేబీ. ఈ డబ్బు వరకూ కాపాడానని బ్యాగు అందిస్తాడు. ఇప్పుడెక్కడికి పోతావ్ ఇంత జరిగాక, పైగా పోలీసుల్ని చంపిన వాళ్ళాల్లో నువ్వొకడివి – అని డాక్ హెచ్చరిస్తాడు. ఇంతలో బుచర్ అనుచరులు  వచ్చేసి డాక్ మీద దాడి  చేస్తారు. రెండు బుల్లెట్లు తగిలినన డాక్ తేరుకుని,  వాళ్ళని షూట్ చేసి చంపేస్తాడు. బడ్డీ వూడిపడి  డాక్ ని కాల్చేస్తాడు (ప్లాట్ పాయింట్ -2)

***

       పై మిడిల్ టూ కథనం 34 సీన్లతో, 33 నిమిషాల నిడివుంది. మిడిల్ వన్ కథనాన్ని బేబీని తిరిగి ట్రాప్ చేస్తూ డాక్ ప్రారంభించడంగా వుంటే, ఈ మిడిల్ టూ కథనం బేబీకి విముక్తి కల్గిస్తూ డాక్ మరణంతో ముగింపుగా వుంది. ఇక బేబీకి పోలీసులతో, బడ్డీతో సమస్య మిగిలే వుంది. ఈ మధ్యలో అంతా అతను డెబొరాకిచ్చిన మాట ప్రకారం లాంగ్ డ్రైవ్ వెళ్లేందుకు చేసిన విఫల యత్నాలున్నాయి. 

          మిడిల్ వన్ డెబొరాతో బేబీ రోమాన్సుగా ప్రారంభమై, డాక్ బెదిరింపుతో బేబీ తిరిగి గ్యాంగ్ లో చేరిన సంఘర్షణాత్మక వాతావరణంతో వేడిని పుట్టిస్తూ సాగింది. ఆ వేడి ఇంటర్వెల్లో పోలీసులైన బుచర్ గ్యాంగ్ ని చంపడంతో పెచ్చరిల్లిపోయింది. ఇప్పుడు మిడిల్ టూలో పోస్టాఫీస్ జాబ్ లో గార్డుని చంపడంతో పోలీసులతో ముఖాముఖీ ఘర్షణ ప్రా రంభమైపోయింది. మరోవైపు బడ్డీ కక్ష గట్టాడు. వాడినుంచి డెబొరాని కాపాడుకొస్తే డాక్ కూడా చనిపోవడంతో - ఇప్పుడు బేబీ ఒంటరిగా మిగిలాడు- బడ్డీనీ పోలీసుల్నీ ఎదుర్కోవడానికి. ఇలా ఉష్ణోగ్రత తారాస్థాయికి చేరింది.

          వీటన్నిటి మధ్యా అతడికి డెబొరాతో లాంగ్ డ్రైవ్ వెళ్ళాలన్న కోరిక. దీని తాలూకు ఒక మాంటేజి బ్లాక్ అండ్ వైట్ లో ఫ్లాష్ బ్యాకుగా పడుతుంది. లాంగ్ డ్రైవ్ అన్నది అతడి ఇప్పటి కల. ఆ కల గతంలో తీరిపోయినట్టు ఫ్లాష్ బ్యాక్ ఎందుకొచ్చింది? ఇది ఫ్లాష్ బ్యాక్ కాదు, ఫ్లాష్ ఫార్వర్డ్. భవిష్యత్తులో ఇది తీరని కోరికగా మిగల వచ్చన్న సంకేతం. అసలు డెబొరా తో రిలేషన్ షిప్పే అసాధ్యమయ్యే సూచన. కేవలం ఈ ఒక్క మాంటేజితో రొమాంటిక్ యాంగిల్ పట్ల సందేశాలు రేకెత్తించాడు దర్శకుడు. 

        ఈ మొత్తం కథలో ఇంకో అందం ఏమిటంటే, ఎక్కడా విలన్ అనే వాడు లేకపోవడం. బేబీ పరిస్థితులే, అతడి చేతలే అతడి పాలిట విలన్స్ అయ్యాయి. చట్టం బాకీ కథ అయినప్పటికీ ప్రత్యర్ధిగా ఏ పోలీసు అధికారినీ దింప లేదు కథలోకి. బేబీని పట్టుకోవడానికి ప్రయత్నించే కొందరు పోలీసు సిబ్బందినే చూపించారు. ఈ సిబ్బందికూడా మారిపోతూంటారు. ఇలా హీరోకి / యాంటీ హీరోకి ఒక ఎదుటి పాత్ర లేకుండా ఈ యాక్షన్ కథని లాగించేశారు. హీరోకి / యాంటీ హీరోకి ఒక ప్రత్యర్ది పాత్ర వుండడం రొటీన్, మూస. దీన్ని బ్రేక్ చేసేసి – విధియే బేబీ పాలిట విలన్ గా అదృశ్యం చేసి చూపించడంతో ఫ్రెష్ గా కన్పిస్తుందీ యాక్షన్. 

          ఎండ్ కథనం : డాక్ ని చంపిన బడ్డీని నానా తంటాలు పడి చంపేస్తాడు బేబీ. చచ్చే ముందు పాయింట్ బ్లాంక్ గా బడ్డీ పేల్చిన బులెట్ కి బేబీ చెవులు దిబ్బడ వేస్తాయి. ఏమీ విన్పించదు. చిన్నప్పుడు పేరెంట్స్ కారు యాక్సిడెంట్ అప్పటి అనుభవమే. ఏమీ విన్పించదు. ఎలాగో తేరుకుని బడ్డీని చంపేస్తాడు. ఇప్పుడు అతడికి ఇయర్ ఫోన్స్ లో మ్యూజిక్ వినే అవస్థ తప్పుతుంది. చెవుల్లో వెంటాడే శూన్యం - నిశ్శబ్దం ఇక లేదు. 

       తెల్లవారుతుంది. డెబొరా కారు డ్రైవ్ చేస్తూంటుంది. పక్కన బేబీ వుంటాడు. పచ్చటి ప్రకృతిమధ్య లాంగ్ డ్రైవ్ వెళ్తూంటారు. టేప్ లో బేబీ మదర్ పాడిన పాట వస్తూంటుంది. దూరంగా పోలీసులుంటారు రోడ్డు బ్లాక్ చేసి.  ఇది చూసి డెబ్బీ కారాపెస్తుంది ఆందోళనగా.  ఎస్కేప్ అవ్వాలని కారు రివర్స్ చేయబోతుంది. బేబీ ఆమెకి సారీ చెప్పి పోలీసులకి లొంగిపోతాడు.
          బేబీ జైలుకి పోతాడు. కోర్టులో కేసు నడుస్తుంది. డెబొరా, జోసెఫ్, ఇంకొందరు సాక్ష్యం చెప్తారు. బేబీ మంచోడే, చెడు నిర్ణయాలు తీసుకుని దారి తప్పాడనీ, ఎవరికీ హని చేయలేదనీ చెప్తారు. బేబీకి పాతికేళ్ళు జైలు శిక్ష విధిస్తాడు జడ్జి. ఐదేళ్ళ తర్వాతే పెరోల్ అప్లయి చేసుకోవాలని తీర్పు చెప్తాడు. 

          బేబీ జైలు జీవితం గడుపుతూంటాడు. డెబొరా పోస్ట్ కార్డులు పంపుతూంటుంది. ఆ పోస్ట్ కార్డులు తామిద్దరూ వెళ్ళాలని ఆమె ప్లాన్ చేస్తున్న లొకేషన్స్. బేబీ కి మళ్ళీ బ్లాక్ అండ్ వైట్ మాంటేజీతో అదే ఫ్లాష్ బ్యాక్ పడుతుంది. ఆ ఫ్లాష్ బ్యాక్ కలర్ లోకి మారుతుంది. బేబీ పెరోల్ మీద విడుదలై బయట వెయిట్ చేస్తున్న డెబొరాని కలుసుకుంటాడు. కిస్ చేస్తాడు...

***

        ఈ ఎండ్ కథనం, అంటే క్లయిమాక్స్ యాక్షన్, పోరాటాలూ లేకుండా ప్రశాంతంగా వుంటుంది. ఒక్క ప్రారంభంలో బడ్డీని చంపే యాక్షన్ తప్ప. పోలీసులతో యాక్షన్ వుండదు. మనోడికి పోలీసు ధ్యాసే వుండదు. తను నేరాలు చేశాడన్న ఫీలింగే వుండదు. ఎప్పుడు చూసినా అమాయకుడిలా ప్రశాంతంగా వుంటాడు. ప్లాట్ పాయింట్ వన్ లో కూడా డాక్ బాకీ తీరిపోయి డెబొరాతోతను ఫ్రీ బర్డ్ అయ్యాననుకున్నాడే తప్ప, చేసిన నేరాలకి చట్టపరంగా శిక్ష అనుభవించాలన్న స్పృహే లేదు. ఇప్పుడు కూడా బడ్డీ ని చంపితే సుఖాంతమయిందనునుకుని డెబొరాతో లాంగ్ డ్రైవ్ వెళ్లి పోయాడు. మిడిల్ టూ  అంతా తనని పట్టుకోవడానికి వెంటాడిన పోలీసుల విషయమే మర్చిపోయాడు. పాత్ర తత్వాన్ని బట్టే, ఫీలయ్యే దాన్ని బట్టే కథా కథానాలుంటాయి. అందుకని ఈ ఎండ్ విభాగంలో పోలీసులతో యాక్షన్ సీన్స్ లేవు. డెబొరాతో లాంగ్ డ్రైవ్ వెళ్తూ సింపుల్ గా పోలీసులకి దొరికిపోయాడు. ఎదురుతిరగకుండా లొంగిపోయాడు.

          ఇక ఇప్పుడు పెరోల్ మీద విడుదలవడం కూడా ఒకటో రెండో నేలలవరకే. ఆ తర్వాత మళ్ళీ జైలుకెళ్ళి శిక్షా కాలం పూర్తి చేయాల్సిందే. పాతికేళ్ళు జైలు శిక్ష అంటే ముసలోడు అయిపోవడమే. పచ్చని జీవితాన్ని నాశనం చేసుకోవడమంటే ఇదే. ఇందులో నీతీ, మెసేజ్ ఏదైనా వుంటే అది ఫీలవ్వచ్చు ప్రేక్షకులు.

***

      ‘బేబీ డ్రైవర్’ థీమాటిక్ స్టడీస్ కి అర్హమైనదని తేల్చారు విమర్శకులు. ఇదే ఈ వ్యాసాల్లో గమనిస్తూ వచ్చాం. ఒక రొటీన్ ఫార్ములా యాక్షన్ కథని ఫార్ములాకి భిన్నంగా, ఎక్కడికక్కడ స్ట్రక్చర్ తో క్రియేటివిటీకి పాల్పడుతూ, ఎలా తీయవచ్చో ఈ స్క్రీన్ ప్లే నిరూపించింది. తెలుగు మేకర్స్ దీన్ని ఎంతవరకు అర్ధం జేసుకుని తమ పాత మూస పంథా మార్చుకుంటారో చూడాల్సి వుంది. మేకర్స్ మేకింగ్ చేయకుండా ప్యాకింగ్ కే అలవాటు పడి నంత కాలం ఇలాటి సినిమాలని ఎంత విశ్లేషించుకోవడమూ, ఇవెంత చదవడమూ వృధా.

                                   అమెరికా లోని నేషనల్ బోర్డ్ ఆఫ్ రివ్యూ 2017 టాప్ మూవీస్ లో ఒకటిగా బేబీ డ్రైవర్ ని చేర్చింది. ఇంకా అనేక అవార్డులు రావడం ఒక ఎత్తైతే,  మూడు ఆస్కార్లకి నామినేట్ అవడం ఇంకొకెత్తు. ఎడిటింగ్, సౌండ్, సౌండ్ మిక్సింగ్ విభాగాల్లో నామినేట్ అయింది. ఇందులో యాక్షన్ సీన్స్ కి  రీ- రికార్డింగ్ షూట్ చేశాక ఆ యాక్షన్స్ కనుగుణంగా చేయలేదు. బేబీ ఇయర్ ఫోన్స్ లో వినే రకరకాల సాంగ్స్ ని ముందు రికార్డింగ్ చేసి, వాటికనుగుణంగా యాక్షన్ సీన్స్ కంపోజ్ చేశారు. సాంగ్స్ ని బట్టి డాన్స్ మూమెంట్స్ ఎలా చిత్రీకరిస్తారో, అలా బేబీ వినే సాంగ్స్ ని బట్టి యాక్షన్ మూవ్ మెంట్స్ చిత్రీకరించారు. ఇదీ బేబీ డ్రైవర్ టెక్నికల్ స్పెషాలిటీ. బేబీ డ్రైవర్ స్క్రీన్ ప్లే నిండా సాంగ్స్ తో సవివరమైన యాక్షన్ సీన్స్ వర్ణనే వుంటుంది. 

         ఇంతేకాదు, ఇది కథానాయకుడు బేబీ కథ కాబట్టి అతడి మానసిక ప్రపంచాన్ని ప్రతిబింబించే  నేపధ్య వాతావరణాన్ని ఆవిష్కరిస్తూ పోయారు. అతను లేత కుర్రాడు, ప్రపంచాన్ని లైట్ గా తీసుకుంటాడు, ఎప్పుడూ మ్యూజిక్ లో మునిగి వుంటాడు. అందుకని విజువల్స్ అలాటి  లైట్ కలర్స్ తోనే కూల్ గా వుంటాయి. ఈ లైట్ కలర్స్ విజువల్స్ లో ప్రధానంగా పింక్ కలర్ వుంటుంది. పింక్  రోమాంటిక్ కలర్. ఈ యాక్షన్ మూవీకి పోస్టర్స్ మీద కూడా పింక్ కలరే డామినేటింగ్ గా వుంటుంది. రోమాంటిక్ కథ నేపథ్యంగా నడుస్తున్న యాక్షన్ కథ ఇది! బీబీ మానసిక స్థితిని దృష్టిలో పెట్టుకుని ఎక్కడా డార్క్ షేడ్స్ రానివ్వలేదు. మూవీ మొత్తం కలర్ఫుల్ గా నయనానందకరంగా వుంటుంది. ఇదీ ప్రధాన పాత్రని దాని తాలూకు కథతో ఎటాచ్ చేయడమంటే. పాత్ర మనసే కథాలోకం మనసవుతుంది. ఈ సృష్టి ఎలాగైతే ఆ దేవుడి మనసైందో, అలాగే ఈ కథాలోకం బేబీగాడి మనసు. వాడు ఏ మనసుతో చూస్తున్నాడో అలాగే మనకు అన్నీ కన్పిస్తున్నాయి.         

              కాస్ట్యూమ్స్ కూడా కూల్ గా వుంటాయి. ఇతర పాత్రల కాస్ట్యూమ్స్ కూడా వాటి మనస్తత్వాల్ని బట్టే వుంటాయి – ఆ రకమైన కలర్స్ తో, స్టయిల్స్ తో. ‘బేబీ డ్రైవర్’ అనేది  ఏ దో రాశాం తీశాం చూస్కోండి మీ ఖర్మ టైపు తెలుగు మార్కు ప్యాకింగ్ కాదు. ఏం రాశావ్, ఏ పర్సెప్షన్ తో ఎందుకు రాశావ్; ఏం తీశావ్, ఏ కళాత్మకతతో ఎందుకు తీశావ్ ముందు చెప్పు – అని దబాయించే న్యూజనరేషన్ మేకింగ్.

―సికిందర్

804 : స్క్రీన్ ప్లే సంగతులు - 2

      

        ఈ కథలో హీరోయిన్ పాత్రకి ఏర్పాటు చేసిన పెళ్లి ఫోబియా కాస్తా కథకుడికి కథతోనే  ఫోబియా అన్నట్టుగా తయారయింది. కథని సరీగ్గా ఆలోచించాలంటే లైటర్ వీన్ ప్రేమ సినిమాలు అలవాటు చేసిన ఒకనాటి వెన్నాడే భయం. పాత్రతో ఆలోచిస్తే కథ వస్తుందా, లేక కథతో ఆలోచిస్తే కథ వస్తుందా...ఎలా ఆలోచించి తీస్తే ఏమవుతుందో ఆ నాలెడ్జిలోకి వెళ్ళాలంటేనే భయంభయం.  పైపైన అలా అలా రాసేసి లైటర్ వీనుగా తీసేస్తే చాలా సుఖం సుఖం. ఇవి రెండ్రోజులు కూడా సరీగ్గా ఆడడం లేదని వారం వారం తెలుస్తూనే వున్నా ఇంకా అలాగే తీస్తూ ఖుషీ ఖుషీ. ట్రైలర్స్ కి వచ్చే యూట్యూబ్ వ్యూస్ లెక్కేసుకుని ఎంతో హేపీ హేపీ. థియేటర్స్ లో పట్టుమని పదిమంది ప్రేక్షకులు లేకున్నా మీట్స్ సక్సెస్ మీట్స్. ఓ పదేళ్ళ క్రితం వరకూ ప్రేక్షకుల్లేక సగానికి సగం థియేటర్లు మూతబడిపోయిన పరిస్థితుల్లోంచి - ఉత్తరాది కార్పొరేట్ కంపెనీల పుణ్యమాని వూరూరా మల్టీప్లెక్సులు వెలుస్తూ, దీటుగా ప్రేక్షకులూ పెరిగిపోయి -  ప్రదర్శనా రంగం భళ్లున తెల్లారినట్టు విస్తరిస్తే -  దీన్నందుకుని లాభపడాలన్న ఆలోచన లేక, అవే అనామక సినిమాలతో అదే కురచ పరిధిలో పడకేసి, లైటర్ వీను అనే సిగార్ లైటర్ తో ఫ్యూచర్ ని ఎంచక్కా తుదముట్టించడం!

         ఇంకో వందేళ్ళ తర్వాత  ఎలాగూ సిగార్ లైటింగ్ దర్శకత్వాల్లో సెట్స్ మీద తగులబడిపోయే స్క్రిప్టు కాగితాలే  సినిమాలుగా మారబోతాయనే కాబోలు - 1919 లో ఏరికోరి దక్షిణదేశపు మొదటి చలనచిత్రంగా  ‘కీచక వధమ్’ నిర్మించారు. ఇప్పుడు 2019 లో వచ్చేసి ఈ కీచక వధమ్ శత వత్సర జ్ఞాపికగా, ‘సూర్యకాంతం’ కూడా శత వ్రక్కలై  వచ్చింది బాక్సాఫీసు వధమ్ గా. 

          కిందటి వ్యాసంలో ప్లాట్ పాయింట్ వన్ వరకు వచ్చాం. అభిషేక్ మళ్ళీ పెళ్లి రికార్డు వేసిన ఫలితంగా సూర్యకాంతం బిక్కచచ్చి కన్పించకుండా వెళ్లి పోయింది. ఆమెకున్న పెళ్లి ఫోబియాకేం చేయాలో అది చేయకుండా అభిషేక్ ఫూలిష్ గా మాట్లాడడంతో ఈ ప్లాట్ పాయింట్ వన్ కి అర్ధం లేకుండా పోయింది. కీచకుడు ఇలాగే పెళ్లి చేసుకొమ్మని వేధిస్తూంటే పంచభర్తృక ద్రౌపది వెళ్లి భీముడికి చెప్తే, గదుచ్చుకుని కీచుమన్పించాడు కీచకుడ్ని భీముడు. ఫోబియాకన్యక సూర్యకాంతంని పెళ్లి చేసుకొమ్మని వేధిస్తున్న అసలు అభిషేక్ ని వదిలేసి బాక్సాఫీసునే భస్మీపటలం చేశాడు కథకుడు సిగార్ లైటింగుచ్చుకుని.  

          తనని పెళ్లి చేసుకొమ్మని వేధిస్తున్న అభిషేక్ నే తిరిగి ప్రేమించి, అతడి ఎంగేజ్ మెంట్ ని చెడగొట్టే ‘అదర్ వుమన్’ గా సూర్యకాంతాన్ని రప్పించి ఇంటర్వెల్లో కథనే వధించాడు. భీముడు గదతో వెళ్ళాడు, సూర్యకాంతం పాప్ కార్న్ తో వచ్చింది. వచ్చి అభిషేక్ కి షాకిచ్చింది. అతడి నోట్లో పాప్ కార్న్ కుక్కి, “రీఫిల్ చేసుకురా, సెకండాఫ్ ఇంకా ఇంటరెస్టింగ్ గా వుంటుంది” అంది. 

          స్క్రీన్ ప్లే అదిరింది... ఇక సెకండాఫ్ సూపర్ ... లాంటి తెరమీద ప్రేక్షకులకి అవసరంలేని సొంత బాకాలూదుకోవడం ఇక్కడా వుంది. సినిమాలోకి (కథలోకి) కథకుడు / దర్శకుడు  వచ్చి కామెంట్ చేయడం చీప్ టేస్టని తెలీదు.  సెకండాఫ్ ఎందుకు ఇంటరెస్టింగ్ గా అన్పించిందో గానీ, ఫస్టాఫ్ మహా ఫ్లాట్ గా వుంది.  చూస్తే సెకండాఫ్ ప్రారంభంలోనే ఇప్పుడేం చేయాలో అర్ధంగావడం లేదని ఇద్దరు నటులు నెత్తిన తెల్లగుడ్డ లేసుకోవడం వుంది.

***

      కథలో ప్రధాన పాత్ర ఎవరన్న స్పష్టత లేకపోవడం చాలా సమస్యలకి దారి తీసింది. అభిషేకా, సూర్యకాంతమా, ఎవరు ప్రధాన పాత్ర ? ఇటీవలి ‘శుభలేఖ+లు’ కూడా ఈ స్పష్టత లేకనే ఫ్లాపయింది. ఇది కూడా హీరో, హీరోయిన్ ఎవరూ ఒక ప్రధాన పాత్రంటూ కాని హోల్ సేల్ ఫ్యామిలీ డ్రామా. హీరోహీరోయిన్లని పాసివ్ పాత్రలుగా మార్చేసి అట్టర్ ఫ్లాపయింది.  ‘సూర్యకాంతం’ కూడా ఒక ప్రధాన పాత్రంటూ లేని కలగూరగంప ట్రయాంగులర్ డ్రామాగా తయారయింది. హీరో హీరోయిన్ల పాసివ్ పాత్రల నసగా మారి అట్టర్ ఫ్లాపయింది. 

          ఒక ప్రధాన పాత్ర - అది ఎదుర్కొనే సమస్య - దానికి పరిష్కారం అనే సూటి గీత కథా పథకం మాత్రమే సినిమా కథవుతుంది. ఈ సూటి గీత హీరో, హీరోయిన్ - ఇద్దరికీ కనబడదు. ప్రేక్షకులకి తెలిసిన హీరోయిన్ గా నిహారిక వుండగా, తెలియని హీరో మీద కథ చేయాలనుకోరు. నిహారిక పాత్రదే కథవ్వాలి. ఆమే ప్రధాన పాత్రవాలి. అప్పుడు ఆమెకున్న  ఫోబియా - దాంతో సంఘర్షణ - పరిష్కారం - ఈ గీత మీద ఆమె కథ వుండాలి. ఇలా వుండదు. హీరోనే ప్రధాన పాత్ర అనుకున్నా, ఫోబియా గల ఆమెతో తనకి  సమస్య- ఆమెతో సంఘర్షణ -  ఫోబియాకి పరిష్కారం - ఈ గీత మీద కథ వుండాలి. ఇలా కూడా వుండదు. అసలు ఫోబియానే ఎత్తి పారేస్తే ఏ గీత మీద ఎవర్ని ప్రధాన పాత్రగా చేసుకుని కథగా వుంటుంది? 

          ఇందుకే ప్లాట్ పాయింట్ వన్ కూడా అర్ధం లేకుండా వుంది. ఆమె మదర్ చనిపోతే,  నీకు అండగా వుంటాను లైఫ్ లాంగ్ అనగానే భయపడి ఆమె జంప్ అయింది. ఇలా ఇదివరకు అన్నప్పుడు కూడా భయపడి జంప్ అయింది. అప్పుడతను ఆమె మదర్ ని కలిస్తే కూతురి ఫోబియా గురించి చెప్పింది. అయినా ఆ ఫోబియా కథేదో నడపకుండా కథకుడు ఇప్పుడు కథతో సంబంధం లేని అదే పెళ్లి యావ పెట్టడంతో ప్లాట్ పాయింట్ వన్ ఫ్లాప్ అయింది. ఒకవేళ ఆమె కన్పించక పోవడమే అతడి సమస్య అనుకున్నా, అలా అతనే ప్రధాన పాత్రనుకున్నా, ఈ సమస్యతో సంఘర్షించిందీ లేదు. గిల్టీ ఫీలయ్యిందీ లేదు. ఆమెని వెతికిందీ లేదు. ఏడాది పాటు కన్పించకుండా పోయినా ఫర్వాలేదనుకుని, వేరే అమ్మాయితో పెళ్ళికి సిద్ధ పడ్డాడు. అంటే ప్రధాన పాత్రగా సమస్యకి సంబంధించి అతడికి గోల్ కూడా లేదు. 

      ఇలా ప్రధాన పాత్ర కాకపోతే ప్రత్యర్ధి పాత్రవాలి. అంటే అతను ఏదైనా చర్యకి పాల్పడి వుండాలి. దానికామె బెదిరిపోయి పారిపోయి వుండాలి. ఇది బయటపడితే అతడికే ప్రమాదంగా వుండాలి. అందుకే ఆమెని వెతక్కుండా తేలుకుట్టిన దొంగలా వుండిపోవాలి. తను పాల్పడిన చర్య బయటపడకుండా చూసుకోవడమే తన గోల్ గా వుండాలి. ఇలా కూడా లేదు. కాబట్టి ప్రత్యర్ధి పాత్ర కూడా కాదు. ప్రధాన పాత్ర కాక, ప్రత్యర్ధి పాత్రా కాక, ఓ పాసివ్ సహాయ పాత్ర అయ్యాడు. 

          ఇక సూర్యకాంతంతో జరిగిన కథ పూజకి చెప్పేసి, ఆమెతో ఎంగేజ్ మెంట్ అనుకుంటున్నప్పుడు,  సూర్యకాంతం వచ్చేస్తుంది. ఇది ఇంటర్వెల్. ఈ సీన్లో అభిషేక్ షాక్ అవుతాడు. పిల్లిలా మారిపోతాడు. బెంబేలెత్తి పోతాడు. ఎందుకో? ఆమెని పెళ్లి చేసుకుంటానని మోసం చేశాడా? ఆమే ఏమీ చెప్పకుండా వెళ్ళిపోయింది. ఆమెదగ్గర ఫోటోలు, చాట్స్, కాల్స్ ఏమైనా వున్నాయా? వుంటే పూజకి చెప్పేశాక ఇక భయమెందుకు? నీ పాస్ట్ గురించి నేనేం చేయలేను, కానీ నీ ప్రెజెంట్, ఫ్యూచర్ మొత్తం నాదే నంటూ పూజా అభయమిచ్చాక  ఇంకా భయమెందుకు? ఏముందనిప్రేక్షకులు ఈ ఇంటర్వెల్ సీనుకి సీట్లకి అతుక్కుపోయి టెన్షన్ అనుభవించాలి. హీరో అలా కిందా మీదై పోతాడెందుకు? ఏముందని ఇంటర్వెల్ కి ఈ బిల్డప్? ఈ మాత్రానికి సెకండాఫ్ ఇంకా ఇంటరెస్టింగ్ గా వుంటుందని సూర్యకాంతం సెలవివ్వడం.

***

       కన్పించకుండా పోయిన ఈ ఏడాది కాలమంతా సూర్యకాంతం ఎక్కడుంది? ఏం చేసి బతికింది? ఫోబియా తగ్గి ఎవర్నైనా ప్రేమించిందా? పెళ్లి చేసుకుందా? అవి విఫలమై ఏమీ ఎరగనట్టు తన దగ్గరికి తిరిగి వచ్చిందా? ఎన్ని పెళ్ళిళ్ళు  లేదా ప్రేమలు ముక్క చెక్కలయ్యాయి? ఎవరైనా ఆత్మహత్యలు చేసుకున్నారా? ఏడాది అజ్ఞాతంలో వున్న ఈమె మారిటల్, లీగల్ స్టేటస్సులేమిటి? మెంటల్ కేసులు సహా ఎన్ని పోలీసు కేసులున్నాయి? ఎవర్నైనా చంపి తప్పించుకొచ్చిందా - ఈ సందేహాలు అభిషేక్ కి రావు. మనకొస్తే మన ఖర్మ. పైపైన రాసేసి తీసేసే లైటర్ వీను రాతతీతల బాధితులుగా...

          ఇంతకీ సంవత్సరం పాటు సూర్యకాంతం ఎక్కడికి అదృశ్యమై ఏం చేసిందో అదొక ఆగథా క్రిస్టీ సిండ్రోమా? ప్రఖ్యాత క్రైం రచయిత్రి ఆగథా క్రిస్టీ అదృశ్యమైన ఆ పదకొండు రోజులూ  ఎక్కడుందో ఏం చేసిందో, ఎలా తిరిగి వచ్చిందో ఎప్పటికీ తేలని మిస్టరీ. సూర్యకాంతం అగథా క్రిస్టీ దగ్గరికెళ్ళి కూడబలుక్కుని వచ్చిందా? వన్నియర్ ఆగి వెళ్ళు, అప్పుడు వాడు పెళ్లి చేసుకుంటూ వుంటాడు, వెళ్లి చెడగొట్టు-  అని పిచ్చి సలహా కాంతం కిచ్చిందా క్రిస్టీ? ఇది క్రిస్టీ కాంతం కుట్రా? 

          ఇక సెకండాఫ్ కథనేం చేయాలో అర్ధంగాక పాత్రల నెత్తిన తెల్ల గుడ్డ లేయించాక, పాత మూస ఫార్ములా డ్రామా మొదలు. ఇద్దరు హీరోయిన్లతో హీరో ఒకర్ని దాస్తూ ఇంకొకరితో తంటాలు. ఇంటర్వెల్ కే హీరో సూర్యకాంతాన్ని చూసి భయమూ, ఆ ఇంటర్వెల్లూ ఫాల్స్ అన్పించాక, మళ్ళీ ఇదొకటి. 

       ఇలా వుంటే, తర్వాత సూర్యకాంతం గురించి అభిషేక్ పూజ ముందు ఓపెనై పోయాక, పూజ కూడా  ఫూలిష్ గా ప్రవర్తిస్తుంది. తన కాబోయే భర్త మాజీ ప్రియురాలు సూర్యకాంతాన్ని ఎంటర్ టైన్ చేస్తుంది. ఎందుకు? జెలసీ పుట్టించి నెత్తి మీదికి తెచ్చుకోవడానికా? అయితే తమ ఎంగేజ్ మెంట్ రింగ్ సూర్యకాంతం చేతే సెలెక్ట్ చేయించమని కూడా అభిషేక్ ని కోరుతుంది. ఎందుకు? తనని పరిహసిస్తున్నట్టు ఫీలై సూర్యకాంతం పంతానికి పోవడానికా? ఆమెలో మళ్ళీ అభిషేక్ తో పెళ్లి మీద ఆశలు రేకెత్తించడానికా? నీ ప్రెజెంట్, ఫ్యూచర్ మొత్తం నాదేనంటూ అభిషేక్ కి చెప్పుకున్న పూజ,  తన చాప కిందికే నీళ్ళు తెచ్చుకునే పిచ్చి ప్రవర్తన. ఇదీ పాత్ర చిత్రణ. 

          అలా అభిషేక్ పూజకి తొడిగేందుకు పూజ కోరికమేరకు తనే రింగు సెలెక్టు చేసిన సూర్యకాంతం, ఎంగేజ్ మెంట్ సమయంలో తన వేలికే  పెట్టుకుని, తీయరాక  సీన్ క్రియేట్ చేస్తే -  ఈ ఎంగిలి సంబంధం వద్దని పూజమ్మ పేరెంట్స్ వెళ్ళిపోక, ఆ రింగునే కూతురికి తొడిగించి సెలబ్రేట్ చేసుకోవడం. ఉంగరం సెలెక్షన్ పథకం ఇలా కడదేరి, ఎంగిలి ఉంగరంతో మిగిలిన పిచ్చి పూజ - నీ ప్రెజెంట్, ఫ్యూచర్ మొత్తం నాదేనన్న డైలాగుని బానిస డైలాగుగా ప్రూవ్ చేసుకోవడం.

***

         ‘నీ పాస్ట్ గురించి నేనేం చేయలేను. కానీ నీ ప్రెజెంట్, ఫ్యూచర్ మొత్తం నాదే’ అని డిక్లేర్ చేసుకున్న అమ్మాయి,  ఆ మాజీ ప్రియురాల్ని తన ప్రేమ ఎరీనాలోకి రానిస్తుందా? ఇలా వుంటాయి చెప్పే మాటలు, చేసే పనులు. సినిమాలో కథ వున్నట్టు అన్పించాలంటే పాత్రల మధ్య సంఘర్షణ పుట్టాలి. ఇక్కడ పాత్రలు మూడూ చెట్టపట్టా లేసుకుంటే సంఘర్షణ ఎలా పుడుతుంది. సినిమా ఎలా అవుతుంది. 

          ఈ ఉంగరం ఎపిసోడ్ కంటే  ముందే సూర్యకాంతం అభిషేక్ కి చెప్పేస్తుంది -  ఎంగేజ్ మెంట్ సంగతి తెలిసే తను బ్రేక్ చేయడానికి వచ్చానని. అయినా ఆమెని పూజతో కలుపుతాడు. ఉంగరం షాపింగ్ కి తీసికెళ్తాడు. ఇలా గజిబిజిగా వుంటాయి పాత్రలు, కథనం. సెకండాఫ్ ఏమీ అర్ధం గావడం లేదని నెత్తిన తెల్లగుడ్డ లేసుకోవడం కరెక్టే. 

            ఇలా ఎంగేజ్ మెంటయిన జంటని సూర్యకాంతం టూర్ పంపుతుంది. తనూ అక్కడికి వెళ్లి డిస్టర్బ్ చేస్తుంది. ట్రూత్ గేమ్ అని ఆడతారు. ఈ ట్రూత్ గేమ్ లో పూజ అడిగిన ప్రశ్నకి తను తిరిగి వచ్చి రెండు సార్లు ప్రపోజ్ చేశాననీ, ఇక్కడి కొచ్చిందే వాళ్ళిద్దరి సంబంధాన్ని బ్రేక్ చేయడానికనీ చెప్పేస్తుంది సూర్యకాంతం. 

          ఎందుకు బ్రేక్ చేయడానికి వచ్చింది సూర్యకాంతం. ఇందులో అభిషేక్ చేసిన తప్పేమిటి? అభిషేక్ ప్రపోజ్ చేస్తే ఏడాది కన్పించకుండా పోయిన తను ఇప్పుడు వచ్చి అభిషేక్ ని ప్రేమిస్తున్నానంటే ఎలా కుదురుతుంది? అసలు తన ఫోబియా ఏమైంది? ట్రీట్మెంట్ తీసుకుని నయం చేసుకుందా? అభిషేక్ మీద ఇంటరెస్ట్ వుంటే ఇన్నాళ్ళూ తనెందుకు కాల్ చేయలేదు? తను ఇక రాదనుకుని అతను  పెళ్లి చేసుకుంటూంటే ఎలా వచ్చి బ్రేక్ చేస్తుంది? అతడి పేరెంట్స్ అమాయకులు కాబట్టి సరిపోయింది. లేకపోతే ఎవతివే నువ్వని తరిమి కొట్టే వాళ్ళు. దీన్ని పాత్ర అనాలా? అసలు సూర్యకాంతం క్యారక్టర్ బయోగ్రఫీ ఏమిటి? 

        ట్రూత్ గేమ్ లో సూర్యకాంతం అలా అన్నాక, పూజ రియాక్ట్ అవకుండా అభిషేక్ కే బ్రేకప్ చెప్పేసి వెళ్ళిపోతుంది! అభిషేక్ ప్రెజెంట్, ఫ్యూచర్ తనదేనని చెప్పుకున్న తను- ఇదే మాట సూర్యకాంతం కి చెప్పి అమీతుమీకి సిద్ధపడక జారుకుంటుంది. పాత్రలు అవి అన్న మాటలకే ఎక్కడా కట్టుబడవు. ఇక సంఘర్షణ ఎలా పుడుతుంది? ఇంత పేలవంగా ఇక్కడ ప్లాట్ పాయింట్ టూ వుంది. ఈ తప్పుడు ప్లాట్ పాయింట్ టూని సరిదిద్దడమెలా? 

          మొదట్లో సూర్యకాంతం ఫ్లాష్ బ్యాక్ విన్నాక - నీ ప్రెజెంట్, ఫ్యూచర్ నాదేనని పూజా చెప్పి వుండకూడదు. ఆమె ఆప్పుడు అభిషేక్ సిన్సియారిటీనీ, కమిట్ మెంట్ నీ అనుమానించి వుండాలి. అతడి పట్ల అపనమ్మకంతో వుండాలి. అతడే నమ్మకం కల్గించాలి. ఎట్టి పరిస్థితిలో నా ప్రెజెంట్, ఫ్యూచర్ నీదేనని అతను భరోసా ఇచ్చి వుండాలి. ఈ భరోసా ఇప్పుడు కన్పించక పూజ బ్రేకప్ చెప్పుకుని వెళ్ళిపోతే అర్ధముంటుంది. 

          పూజ బ్రేకప్ చెప్పేశాక అభిషేక్ లో అంతర్మథనం. సూర్యకాంతం వైపు మొగ్గు చూపడం. ఆమె పేరెంట్స్ తో తను మాట్లాడతానని వెళ్ళడం. అక్కడ తన పొరపాటు ఒప్పుకుని అభిషేక్, పూజలని కలపడం, ఇంతే. అంతలోనే మనసెందుకు మార్చుకుందో తెలీదు. లైటర్ వీనుగా మార్చుకుంది. ఇక అపూర్వ త్యాగమయిగా ఉత్తర మిచ్చి వెళ్లిపోతే,  అభిషేక్ వెతికి పట్టుకురావడం. ఇంట్లో కలుపుకోవడం. పూజని పెళ్లి చేసుకోవడం. ఆ ఇంట్లోనే  సూర్యకాంతం హేపీగా సెటిలైనట్టు ఎండ్. 

        పాపం, ఎలాటి సమస్యలతో సూర్యకాంతం ప్రేక్షకులకి పరిచయమైందో, అవి పరిష్కారమై జీవితం బాగుపడకుండా అలాగే మిగిలిపోయింది! సొంతిల్లు ఏమైందో. ఆ ఇంట్లో అమ్మమ్మ సూర్యకాంతం పటాలేమయ్యాయో,   అలాటి లెజెండ్ కిలాటి మనవరాలు ఈసురోమని మిగిలింది!

―సికిందర్

803 : స్క్రీన్ ప్లే సంగతులు

            మిడిల్ కథనం : అభిషేక్ (రాహుల్ విజయ్) పెళ్లి చేద్దామనుకుంటారు తల్లిదండ్రులు. పూజ  (పెర్లెన్ భేసానియా) తో పెళ్లి చూపులు ఏర్పాటవుతాయి. పరస్పరం నచ్చుతారు. త్వరలో నిశ్చితార్ధం పెట్టుకుందామనుకుంటారు. అభిషేక్, పూజలు కలుసుకోవడం మొదలెడతారు. కాల్స్ మాట్లాడుకుంటారు. సినిమాలకెళ్తారు. లంచ్ కెళతారు. ఇక నిశ్చితార్థానికి తేదీ అనుకుంటారు. అప్పుడు అభిషేక్ పూజతో మాట్లాడాలంటాడు. అప్పుడామెకి ఫ్లాష్ బ్యాక్ చెప్తాడు తన పూర్వ ప్రేమ సూర్యకాంతం (నిహారిక) గురించి. 

          ఫ్లాష్ బ్యాక్ లో బిగినింగ్ కథనం : సూర్యకాంతంని చూసి వెంటపడతాడు అభిషేక్. ఆమె కేర్ చేయదు. మాటమీద నిలబడదు. తప్పించుకునే రకం. ఎప్పుడెలా వుంటుందో తెలీదు. ఎప్పుడు మాయమైపోయి ఎప్పుడొస్తుందో తెలీదు. విచిత్రంగా అన్పిస్తున్న ఆమెకి అలాగే లవ్ చెప్తాడు. సమాధానం తర్వాత చెప్తానని మాయమై పోతుంది. అభిషేక్ ఆమె ఇంటికెళ్ళి తల్లి (సుహాసిని) ని కలుస్తాడు. కూతురి గురించి చెప్పుకొస్తుందామె. దాని చిన్నప్పుడు తనూ భర్తా బాగా కొట్లాడుకుని దానికి మనశ్శాంతి లేకుండా చేశారు. విడాకులు తీసుకుని ఇంకా గాయపర్చారు. ఇల్లంటే నాల్గు గోడలు కాదు, ఒక కుటుంబం. ఆ కుటుంబాన్ని ఇవ్వలేకపోయారు. దీంతో బయటే ఎక్కువ గడుపుతోంది. ఎప్పుడు తోస్తే అప్పుడు టూర్స్ కెళ్ళిపోతుంది. పెళ్ళంటే, భార్యాభర్తల సంబంధమంటే నమ్మకం పోయింది...ఇలా చెప్పుకుని బాధపడుతుంది సూర్యకాంతం తల్లి. 

        అయితే తనకి ఎవరి గురించీ చెప్పని ఆమె అభిషేక్ గురించి చెప్పేదనీ, అందుకని ఆమెతో క్లోజ్ గా వుంటున్న అతణ్ణి ఒక ప్రామీస్ చేయమనీ అంటుంది. తను ఎన్నాళ్లుంటుందో తెలీదు ...అది తిరిగిరావడానికి ఒక మనిషీ, వుండడానికి ఒక ఇల్లూ వుండేలా చూస్తావా అని. సరేనంటాడు. 

          సూర్యకాంతం తిరిగి వస్తుంది. ఇప్పుడంటాడు - నాకు తెలిసి ప్రేమా పెళ్ళీ వీటితో నీకేం ప్రాబ్లం లేదు, ఫ్రీడం లేకపోతేనే నీకు ప్రాబ్లం. ఆ ఫ్రీడం నీకిస్తాను, నాకు నచ్చినట్టు నువ్వుండనవసరం లేదని ఆమెతో అంటాడు. అప్పుడు కూడా ఆమె ఏమీ చెప్పదు. ఇంతలో గుండెపోటుతో తల్లి చనిపోతుంది. ఇక సూర్యకాంతంని తన ఇంటికే  తీసుకుపోతాడు. ఆ కుటుంబ సభ్యుల మధ్య బాధని మర్చిపోయి మామూలు స్థితికి వస్తుంది. ఆనందంగా గడుపుతుంది. అప్పుడంటాడు – ‘పర్సనల్ లాస్ జరిగినప్పుడు ఏంచెప్పాలో అర్ధంగాదు. బాగా ఆలోచించాను, అప్పుడర్ధమైంది. చెప్పడం కాదు, చెయ్యాలీ అని. నేను నీకు ప్రామీస్ చేస్తున్నా. నీ బాధని పోగొట్టలేనేమో గానీ, నువ్వు పర్మిషనిస్తే ఆ బాధతో ఫైట్ చేసే సంతోషాన్నిస్తాను లైఫ్ లాంగ్’ అని. 

          ఆమె హగ్ చేసుకుని, తనని ఇంటిదగ్గర డ్రాప్ చేయమంటుంది, అమ్మ గుర్తుకొస్తోందని అంటుంది. ఆమెని ఇంటిదగ్గర డ్రాప్ చేశాక మాయమైపోతుంది (ప్లాట్ పాయింట్ వన్).  

          మిడిల్ కథనం కంటిన్యూ : వస్తుందని ఎదురు చూస్తాడు. ఏడాది అవుతున్నా రాదు. దీంతో పూజతో సంబంధానికి ఒప్పుకున్నాడు. ఇదంతా విన్న పూజ అంటుంది – ‘నీ పాస్ట్ గురించి నేనేం చేయలేను. కానీ నీ ప్రెజెంట్, ఫ్యూచర్ మొత్తం తనదే’నని. 

          ఇక ఎంగేజి మెంట్ ఏర్పాట్లు చేసుకుంటూ వుండగా రాత్రి పూట అభిషేక్ కి భయానక అనుభవాలవుతాయి. ఇంట్లో దెయ్యం వున్నట్టు అన్పిస్తుంది. చూస్తే సూర్యకాంతం... సూర్యకాంతం వచ్చేసింది....అభిషేక్ షాక్ తింటాడు. అతడి నోట్లో పాప్ కార్న్ కుక్కి,  “రీఫిల్ చేసుకురా, సెకండాఫ్ ఇంకా ఇంటరెస్టింగ్ గా వుంటుంది”  అంటుంది (ఇంటర్వెల్). 

          మిడిల్ -2 కథనం : సూర్యకాంతం వచ్చేసిందని అభిషేక్ తల్లిదండ్రులకి కూడా తెలిసిపోయి గోల పెడతారు. ఇప్పుడు పూజని కాదని దీన్ని చేసుకుంటావా అంటారు. కాదంటాడు. సూర్య కాంతం గురించి పూజకి తెలుసాని ఫ్రెండ్ అడుగుతాడు. తెలుసంటాడు. పూజ గురించి సూర్యకాంతంకి తెలుసాని తండ్రి అడుగుతాడు. తెలియదంటాడు. ఎంగేజి మెంట్ గురించి సూర్యకాంతంకి తెలుసా అంటే తెలీదంటాడు. ఇలా తెలుసు, తెలియదుల మధ్య ఇప్పుడేం చేయాలో కూడా తెలియదంటాడు. ఫ్రెండ్, తండ్రీ నెత్తిన తెల్లగుడ్డ లేసుకుంటారు. 

      ఇక పూజని కలిసినప్పుడు సూర్యకాంతం నుంచి ఫోన్ రావడం, సూర్యకాంతంని  కలిసినప్పుడు పూజనుంచి కాల్  రావడం...ఇటూ అటూ అబద్ధాలు  చెప్పి తప్పించుకోవడం...ఇద్దరితో దాగుడుమూతలాడడం... చివరికి పూజకి తెలిసిపోయి మందలిస్తుంది, దాచిపెట్టకుండా తనతో సిన్సియర్ గా వుండమంటుంది. సూర్యకాంతాన్ని కలపమంటుంది. అప్పుడు చెప్పేస్తాడు సూర్యకాంతంకి తన ఎంగేజ్ మెంట్ గురించి. తనకి తెలుసంటుంది. తెలిసే బ్రేక్ చేయడానికి వచ్చానంటుంది. లోలోపల బాధ పడుతుంది. తర్వాత పూజా సూర్యకాంతం కలుసుకుంటారు. ఎంగేజి మెంట్ రింగ్ సూర్యకాంతం చేతే  సెలెక్ట్ చేయించమంటుంది పూజ. 

          ఆ రింగ్ ఎంగేజిమేంట్ లో పెట్టుకుని నానా హంగామా చేస్తుంది సూర్యకాంతం.  బయట మందు కొట్టి ఆటో డ్రైవర్లతో ఐటెం సాంగేసుకుంటుంది. అభిషేక్ ఆమెకి  నచ్చజెప్పుకోవడం ప్రారంభిస్తాడు. ఆమె వాళ్ళిద్దర్నీ టూర్ పంపుతుంది. అక్కడికెళ్ళి వాళ్ళిద్దరి మధ్య తనూ వూడి పడుతుంది. సరదాగా గడుపుతారు. ట్రూత్ గేమ్ ఆడుకుంటారు. ఆ గేమ్ లో పూజ అడిగిన ప్రశ్నకి నిజం చెప్పేస్తుంది సూర్యకాంతం - తను తిరిగి వచ్చి రెండు సార్లు ప్రపోజ్ చేశాననీ, ఇక్కడి కొచ్చిందే వాళ్ళిద్దరి సంబంధాన్ని బ్రేక్ చేయడానికనీ చెప్పేస్తుంది. దీంతో హర్టయిన పూజ అభిషేక్ తో ఎంగేజ్మెంట్ క్యాన్సిల్ చేసుకుని వెళ్ళిపోతుంది (ప్లాట్ పాయింట్ టూ). 

          ఎండ్ కథనం : ఏమీ అర్ధంగాక తండ్రికి ఫోన్ చేస్తాడు అభిషేక్. నువ్వే అలోచించి నిర్ణయం తీసుకోమంటాడు తండ్రి. అభిషేక్ సూర్యకాంతంకి సరెండర్ అయిపోతాడు. మీ ఇంట్లో నేను మాట్లాడి కన్విన్స్ చేస్తానని వెళ్తుంది. అటూ ఇటూ పేరెంట్స్ ఎదుట తన గురించి చెప్పుకుని, ఈ పెళ్ళికి అడ్డు రానని చెప్తుంది. పూజకో లెటర్ ఇచ్చి వెళ్ళిపోతుంది. ఇంటికొచ్చి ఆ లెటర్ చూసుకున్న అభిషేక్ సూర్యకాంతం ని వెతికి పట్టుకుంటాడు. నువ్వు మా ఇంట్లోనే మాతోనే వుండాలని, మా పెళ్లి చూడాలనీ తీసుకుపోతాడు...(అయిపోయింది)

***

     ఈ స్క్రీన్ ప్లే లో కథ పేరుతో వున్న కథ బిగినింగ్, మిడిల్, ఎండ్ లుగా విభజన జరిగి చక్కగా ఇమిడి వుంది. మొదలెట్టిన కథ ఒకటైతే, నడిపిన కథ స్ట్రక్చర్ చెడి, పాత్రలూ చెడి ఇంకొకటిగా వుంది. ఇది ఫ్లాష్ బ్యాక్ తో మిడిల్ - బిగినింగ్ - మిడిల్ - ఎండ్ లుగా నాన్ లీనియర్ కథనంగా వుంది. కథ వచ్చేసి షార్ట్ ఫిలిమ్స్ కి, లేదా వెబ్ సిరీస్ కి సరిపోయే కంటెంట్ తో వుంది మూడే మూడు పాత్రలతో. మూడు పాత్రల సినిమాయేతర కంటెంట్ ని సినిమాగా వెండితెర మీద మౌంట్ చేయడం అత్యాశే. ఎంతో బలమైన కంటెంట్ వుంటే గానీ,  అదీ బిగ్ స్టార్స్ తో  బాజీ రావ్ మస్తానీ, గౌతమీ పుత్ర శాతకర్ణి లాంటి మూడు పాత్రల కథలు హిట్ కాలేదు. నిహారిక లాంటి చిన్న హీరోయిన్, విజయ్, పెర్లేన్ లాటి కొత్త హీరోహీరోయిన్లతో ఇంత లైటర్ వీన్ కథ నిలబలేక తేలిపోయింది.  

          ఉన్న ఈ లైటర్ వీన్ కథకూడా ఏమాత్రం ఆసక్తి కల్గించని, ట్రెండ్ ముగిసిన-        అరిగిపోయిన ముక్కోణ ప్రేమ కథ. పైగా ఇది రెండు గంటల సినిమా నిడివికి చాలని కథ. ఈ కథని ఒకచోట కాకపోతే ఇంకో చోట మూడు చోట్ల ముగించెయ్యొచ్చు. ముగుస్తున్న చోటల్లా పొడిగిస్తూ పోయారు. షార్ట్స్ కి, వెబ్స్ కి సరిపోయే కథని చూయింగ్ గమ్ లాచేసి సాగదీస్తూ  పోయారు.

          పైగా ఈ కథ ఇప్పటి రియలిస్టిక్ ట్రెండ్ కి భిన్నంగా మూస ఫార్ములా డ్రామాల కాలంలో వుంది. ఈ కారణంగా యూత్ అప్పీల్ ని కోల్పోయింది. కానీ కాన్సెప్ట్ వచ్చేసి పెళ్ళంటే భయపడే, కమిట్ మెంట్ ఫోబియా లేదా గామోఫోబియా గల హీరోయిన్ సమస్యగా ఇవాళ్టి పోకడనే ఎత్తుకున్నారు. ఈ పోకడని, యూత్ ఫేస్ చేస్తున్న ప్రాబ్లంని, ఇప్పటి తాజా కథగా ఎలా డీల్ చేయాలో తెలియనట్టు – ఈ పాయింటు తీసేసి, అదే అరిగిపోయిన రొటీన్ ముక్కోణ ప్రేమ చట్రంలో బిగించి వదిలేశారు. దీంతో ప్రాబ్లం ఒకటి, నడిపిన కథ ఒకటిగా తయారయ్యింది. 

          దీన్ని స్క్రీన్ ప్లే రాయకముందే ఐడియా దశలోనే ఇన్ని లోపాలున్నాయి. ఐడియా దశలోనే ఇంకో పెద్ద లోపమేమిటంటే, ఇదే పాత్ర కథో నిర్ణయించుకోలేక పోవడం. సూర్యకాంతమా, అభిషేకా ఎవరి కథ ఇది? ఇది తెలుసుకోకపోవడం వల్ల ఐడియా దశలోనే ఈ కథ ఫెయిల్ అయింది. రెండూ పాసివ్ పాత్రలై, ఎవర్ని ప్రధాన పాత్రగా తీసుకుని కథని ఫాలో కావాలో తెలియని గందరగోళ పరిస్థితేర్పడింది. పైగా ఇప్పటి మార్కెట్ కి యూత్ అప్పీల్ వుండే రోమాంటిక్స్ తో  రోమాంటిక్ కామెడీ కాకుండా, యూత్ అప్పీల్ వుండని సీరియస్ రోమాంటిక్ డ్రామాగా చేశారు. ఇలా ఐడియా దశలోనే ఆపెయ్యాల్సిన కథ ఇది.

***

          తెలుగు సినిమా కథల్ని పైపైన రాసేసి, పైపైన తీసేసే ఒక మూఢ నమ్మకం రోమాంటిక్ కామెడీలు ప్రారంభమైన కాలంనుంచీ కొనసాగుతోంది. లైటర్ వీన్ ప్రేమకథలు ఇవే. ఎక్కడాకూదా కథ లోతుల్లోకి, పాత్రల లోతుపాతుల్లోకి వెళ్లి ఆలోచించకుండా, పైపైన ఏదో కథ అల్లేయడమే సినిమా అనే తేలికభావం చెలామణి కావడంతో కథల గురించి ఏమీ తెలియని అపరిపక్వతతో సినిమాలు తీసేవాళ్ళు వచ్చేస్తున్నారు. ఇలా సూర్యకాంతం కథ కూడా రాయడంలో అపరిక్వతా, లేక కావాలని అపరిపక్వ పాత్రల్ని తీర్చిదిద్దారా అన్నట్టు కథా కథనాల్లో సాంతం ఇమ్మెచ్యూరిటీ  నాట్య మాడుతూ వుంటుంది. అడుగడుగునా పాత్రల ఆలోచనలు, మాటలు, నిర్ణయాలు చాలా సిల్లీగా, బుద్ధిలేని తనంగా వుంటాయి. 

          మిడిల్ కథనంతో ప్రారంభం అభిషేక్ - పూజల పెళ్లి చూపులు ఓకే అవడం, ఇక షికార్లు తిరగడం అలా వుంచి ఈ పాత్రల పరిచయాలు కూడా వుండవు. వీళ్ళ చదువులు, కెరీర్స్ ఏవీ మనకి తెలీవు. పాత్రలకి ఒక ఉద్యోగం సద్యోగం అన్నట్టు వుండదు. ఈ కథకి ఇద్దరు లవర్స్ వుండాలి, వాళ్ళ బ్యాక్ గ్రౌండ్ ఏమిటనేది అనవసరం - పైపైన రాసేసి తీసేసే ఇలాటి లైటర్ వీన్ ప్రేమ సినిమాకి అన్నట్టు వుంటుంది. కాబట్టి ఇవి నేటి యువ ప్రేక్షకులు ఐడెంటిఫై చేసుకోగల రియలిస్టిక్ పాత్రలు కావు. మూలాలు లేని పాత మూస ఫార్ములా డ్రామా పాత్రలు. 

          పెళ్లి చూపులు ఏర్పాటయ్యే నాటికీ అభిషేక్ పూర్వ రంగం ఏమిటి, తర్వాత అతనే చెప్పుకునే ఫ్లాష్ బ్యాక్ ప్రకారం?  సూర్య కాంతం అనే అమ్మాయిని ప్రేమించి లవ్యూ చెప్తే, ఆమె ఏ సంగతీ చెప్పకుండా ఏడాది కాలంగా కన్పించకుండా పోయింది. ఈ పూర్వరంగంలో ఇప్పుడామెని మర్చిపోయి, పూజతో పెళ్లి చూపులకి సిద్ధపడ్డాడు. ఆమెతో షికార్లు తిరిగాడు. ఇక  ఎంగేజిమేంట్ అనుకునే సరికి పూజతో మాట్లాడాలని చెప్పి అర్జెంటుగా ఆమెకి తన గతం చెప్పుకున్నాడు.

          ఎందుకు చెప్పుకున్నాడు? సూర్యకాంతంతో ఫిజికల్ రిలేషన్ షిప్ తో వున్నాడా? లేనప్పుడు ఎందుకు చెప్పుకున్నాడు? సూర్యకాంతం తనని రిజెక్ట్ చేసి పోయినట్టే వున్నప్పుడు, తను చేసిన తప్పుకూడా లేనప్పుడు, పనిమాలా పూజకి ఎందుకు చెప్పుకున్నాడు? ఎందుకు చెప్పుకోవాలంటే ప్రేక్షకులకి ఫ్లాష్ బ్యాక్ కథ తెలియాలి కాబట్టి. ప్రేక్షకులకి బ్యాలెన్స్ వుండిపోయిన కథ తెలియడానికి పాత్ర ఇలా దిగజారాలన్న మాట. ఫ్లాష్ బ్యాక్ కి లీడ్ ఇలా వుందన్న మాట.

***

        ఇక ఫ్లాష్ బ్యాక్ గా వచ్చే బిగినింగ్ కథనంలో సూర్యకాంతం పాత్ర కూడా పనీపాటా లేనట్టు వుంటుంది. అభిషేక్ తో ఈమె వింత ప్రవర్తనకి కారణం పెళ్ళంటే భయమనే కమిట్మెంట్ ఫోబియా లేక గామో  ఫోబియా. ఆ మధ్య ‘ఇండియా టుడే’ యువతరంలో ఒక జాడ్యంలా విస్తరిస్తున్న ఈ ఫోబియా గురించి రాసుకొచ్చింది. ఈ ఫోబియాకి వేర్వేరు కారణాలుంటాయి. సింగిల్ లైఫ్ ని ఎంజాయ్ చేయడాన్ని ఇష్టపడే వాళ్ళు కూడా ఈ ఫోబియాతో వుంటారు. అమ్మాయిలతో తిరుగుతారు గానీ పెళ్లనేసరికి పరారవుతారు. అమ్మాయిలూ వయసు మీద పడుతున్నా కెరీరే ముఖ్యమనుకుని పెళ్లిని వాయిదా వేస్తూంటారు. ఇలా రకరకాల కారణాలుంటాయి. ఇవి కాక,  కొన్ని అనుభవాల వల్ల పెళ్ళికి నో అంటారు. చిన్నప్పడు మానసికంగా దెబ్బతింటే కూడా ఈ పరిస్టితి రావచ్చు. ఇలా రకరకాల కారణాలతో గామో  ఫోబియాని చిత్రిస్తూ, బాలీవుడ్ నుంచి కుప్ప తెప్పలుగా సినిమాలు వస్తున్నాయని రాసింది ‘ఇండియా టుడే’. 

          ఇటీవలే అనురాగ్ కాశ్యప్ తీసిన హిట్ ‘మన్మర్జియా’ కూడా వచ్చింది. ఇవన్నీ రియలిస్టిక్ లవ్ ఎంటర్ టైనర్లు. హాలీవుడ్ నుంచైతే ఇక చెప్పర్లేదు. ఇవి చూసి, ‘సూర్యకాంతం’ ని  చూస్తే - శవ్వ శవ్వ – నవ్వొస్తోంది! బెటర్ టు వాచ్ ‘వివాహబంధం’ లో సూర్యకాంతమ్మని. 

          రియలిస్టిక్ గా తీయాల్సిన మోడరన్ ప్రాబ్లంని, ముసలి చాదస్తాలు పెట్టుకుని అరిగిపోయిన మూస ఫార్ములాగా తీసినట్టుంది. సరే, ఇలా ఠికానా లేని సూర్యకాంతంకి ప్రేమిస్తున్నట్టు చెప్తాడు అభిషేక్. ఆమె మాయమైపోతుంది. అప్పుడామె తల్లిని కలిస్తే అసలు విషయం చెప్తుంది. దాని చిన్నప్పుడు తమ భార్యాభర్తల తగాదాలూ, విడాకులూ, ఇదంతా చూసి గాయపడి అదిలా తయారయ్యిందని...పెళ్ళంటే నమ్మకం పోగొట్టుకుందనీ. ఇంటి పట్టున వుండక టూర్లు వెళ్లిపోతుందనీ. 

          ఇక్కడ ఈ తల్లిగారిని చూస్తే ఏమిటంటే, ఒక్కగానొక్క కూతుర్ని బాగుపర్చే చర్యలేమీ తీసుకోలేదు. గాలికి వదిలేసి బాధపడుతూ కూర్చుంది మంచి డబ్బూ, ఎడ్యుకేషనూ వున్న  మదరమ్మ గారు. లాజిక్ అవసరం లేని మూస ఫార్ములా కథ కదా. 

          ఇదంతా చెప్పి ఒక కీ డైలాగు చెప్తుంది మదర్ - ఎవరి గురించీ చెప్పని కూతురు అభిషేక్ గురించి చెప్పేదని. అంటే ఏమిటర్ధం? అభిషేక్ అంటే సాఫ్ట్ కార్నర్ వున్నట్టే కదా? కానీ దీన్ని గుర్తించి ఆ మేరకు ఏ మాత్రం ప్రవర్తించడు. ఇక మదర్ ప్రామీస్ చేయమంటుంది. తను ఎన్నాళ్లుంటుందో తెలీదనీ,  అది తిరిగిరావడానికి ఒక మనిషీ, వుండడానికి ఒక ఇల్లూ వుండేలా చూడమనీ అంటుంది. అంటే కూతురిలాగే ఫోబియాతో తిరుగుళ్ళు తిరిగి వస్తూ వుండి పోవాలన్న మాట జీవితాంతం. అలా తిరిగి వస్తూంటే ఇంట్లో ఒక మనిషి వుండాలన్న మాట వెల్కం చెప్పడానికి. మదరమ్మకి కూతురి భవిష్యత్తు గురించి ఇటువంటి  బెస్ట్ ప్లాన్స్ వున్నాయి. కూతురు సైకియాట్రిక్  కేస్ అని ఇక గుర్తించే ప్రసక్తే లేదు, ట్రీట్మెంట్ ఆలోచనే లేదు. గోడకి మహానటి సూర్యకాంతం ఫోటోలన్నీ పెట్టుకుని వుంటుంది. ఆమె తన ఆమ్మట. ఆ అమ్మ సూర్యకాంతమ్మ దిగివస్తే నాల్గు దులుపుళ్ళు దులిపి తరిమి తరిమి కొడుతుంది. అప్పుడు రోడ్డున పడి తిరిగేది ఆ కూతురు కాదు, ఈ మదర్.

          ఇలాటి మదర్ పిచ్చి పిచ్చి మాటలకి అలాగేనని మాటిస్తాడు. ఈ మాట ప్రకారమైనా నడుచుకోడు తర్వాత. ఇలా సెటప్స్ వుంటాయి గానీ వీటి కొనసాగింపుల కోసం చూస్తే పే ఆఫ్స్ వుండవు. ఎక్కడిదక్కడే వదిలేస్తూ కథనం నడుస్తూంటుంది.     

     
          ఇప్పుడు ఇక్కడ ఇలా సూర్యకాంతం పాత్ర ఫోబియాతో వెల్లడయ్యాక, దీనికి డెప్త్ గురించిన ఆలోచన రాలేదు. ఎందుకు రాలేదంటే, లాజిక్ గీజిక్ పక్కన బెట్టి పైపైన రాసేసి తీసేయాలి కాబట్టి. లేకపోతే అభిషేక్ కంటే ముందు, అభిషేక్ తో పాటూ, సూర్యకాంతంకి ఇంకా చాలా మంది తగిలివుండాలి లవ్ కోసం వెంటపడి. సూర్యకాంతం లాంటి ఎక్సెంట్రిక్ పాత్రని ఇలా కదా విస్తరించి చూపాలి? ఈ విస్తరణ లేకే మూడు పాత్రల వెబ్ సిరీస్ కి పనికొచ్చే కథ కురచదై పోయింది సిల్వర్ స్క్రీన్ కి. 

          ఇక సూర్యకాంతం టూర్ నుంచి వచ్చాక ఫూలిష్ గా ప్రపోజ్ చేస్తాడు అభిషేక్. గొప్ప సైకాలజీ తెలిసిన వాడిలా మాట్లాడతాడు, ‘నాకు తెలిసి ప్రేమా పెళ్ళీ వీటితో నీకేం ప్రాబ్లం లేదు, ఫ్రీడం లేకపోతేనే నీకు ప్రాబ్లం. ఆ ఫ్రీడం నీకిస్తాను, నాకు నచ్చినట్టు నువ్వుండనవసరం లేదు’ అంటాడు!

          ఏమిటిది? ఇతడికేదో తెలిసిందట ఆమె మనసు. ఇంతకి ముందు ప్రపోజ్ చేశాడంటే ఆమె ఫోబియా గురించి తెలీదు. ఇప్పుడు ఫోబియా గురించి మదర్ చెప్పాక కూడా ఆ ఫోబియాతో ముడిపడిన పెళ్లిని ప్రపోజ్ చేయడమేమిటి? పైగా ‘నాకు తెలిసి ప్రేమా పెళ్ళీ వీటితో నీకేం ప్రాబ్లం లేదు, ఫ్రీడం లేకపోతేనే నీకు ప్రాబ్లం’ అంటాడు. చిన్నప్పుడు మానసికంగా దెబ్బతిని ప్రేమలూ పెళ్ళిళ్ళూ అనే వాటి మీదే నమ్మకం పోగొట్టుకుందని మదర్ చెప్పాక కూడా ఇంకేదో తెలిసిందని ఇలా మాట్లాడతాడు. ఆమె ప్రాబ్లం ఫ్రీడం గురించా? ఫ్రీడం ఇస్తే తీరిపోతుందా? అంటే ఆమెని పెళ్లి చేసుకుంటాడు, ఆమె ఎలాగైనా టూర్లు తిరిగి వచ్చే ఫ్రీడం వుంటుందన్నమాట. ఆమె సమస్య ఫోబియా అనేది కథకి అడ్డమని తీసి అవతల పారేశాడన్న మాట. 

          చిన్నప్పటి మానసిక గాయాలతో పెళ్లి ఫోబియాతో వున్నామెని ముందా ఫోబియాలోంచి బయటికి తీసుకొచ్చే ప్రయత్నాలు చేయకుండా, పెళ్లి కక్కుర్తి ఏమిటి? పెళ్ళంటూ ఇంకా బెదరగొట్టడమేమిటి? ఆ ఫోబియాలోంచి బయటికి తీసుకొచ్చే పద్ధతులున్నాయి. కామెడీగా చేస్తాడో ఇంకెలా చేస్తాడో వాడిష్టం. ఆమెకి నయమయ్యాక ఆమె నోటి నుంచే రావాలి  పెళ్ళనే మాట! 

          మధ్యలో మదర్ చనిపోవడమొకటి. ఇక ఒంటరిదైన సూర్యకాంతాన్ని తన ఇంటికే తీ సుకుపోయి, ఆ బాధలోంచి బయటికొచ్చేలా చేస్తాడు. ఒక మాంటేజ్ సాంగ్ ఆమె నవ్వుతూ తుళ్ళుతూ వున్న దృశ్యాలతో వుంటుంది. ఇదయ్యాక మళ్ళీ గోల మొదలెడతాడు. ఈసారి ఇంకా ఫూలిష్ గా, ‘పర్సనల్ లాస్ జరిగినప్పుడు ఏంచెప్పాలో అర్ధంగాదు. బాగా ఆలోచించాను, అప్పుడర్ధమైంది. చెప్పడం కాదు, చెయ్యాలీ అని. నేను నీకు ప్రామీస్ చేస్తున్నా. నీ బాధని పోగొట్టలేనేమో గానీ, నువ్వు పర్మిషనిస్తే ఆ బాధతో ఫైట్ చేసే సంతోషాన్నిస్తాను లైఫ్ లాంగ్” అనేసి!

       మళ్ళీ ఇదేమిటి? ఆమె పర్సనల్ లాస్ లోంచి బయటికే  వచ్చేసింది, వాకౌట్ చేసే సింది, ఆనందంగా వుందిప్పుడు. మళ్ళీ పర్సనల్ లాస్ అంటూ పుండుని గెలుకుతాడేమిటి? కోతి పుండు బ్రహ్మ రాక్షసి చేయాలనా? పర్సనల్ లాస్ జరిగినప్పుడు ఏంచెప్పాలో అర్ధంగాదా?  బాగా ఆలోచిస్తే అప్పుడర్ధమైందా? చెప్పడం కాదు, చెయ్యాలీ అని అర్థమైందా? చేశాడుగా ఆమెని  - అంత మాంటేజ్ సాంగ్ వేసి హ్యాపీగా. ఇంకేంటి? మళ్ళీ ప్రామీస్ చేస్తున్నాడా? ఆమె  బాధని పోగొట్టలేడేమో గానీ, ఆమె పర్మిషనిస్తే ఆ బాధతో ఫైట్ చేసే సంతోషాన్నిస్తాడా లైఫ్ లాంగ్? ఇదన్న మాట. చివరి కొచ్చేసి లైఫ్ లాంగ్ అంటున్నాడంటే పెళ్లి కక్కుర్తే. పెళ్లి కక్కుర్తితోనే ఇలా అర్ధం పర్ధం లేకుండా మాట్లాడుతున్నాడు. 

          అప్పుడామె ఫోబియాటో వుంటే తెలీక లవ్ చెప్పాడు, ఇప్పుడు ఫోబియాటో బాటు ఆమె మదర్ కూడా చనిపోయి వుంటే పెళ్ళంటున్నాడు. ఎంతసేపూ తన కక్కుర్తే. ఈ దెబ్బకి ఆమె పారిపోయింది. మళ్ళీ కన్పించకుండా చెక్కేసింది. అయ్యో మదర్ కి ప్రామీస్ చేసి ఇలా చేశానే, ఎక్కడుందో వెతకాలని ప్రయత్నించడు. మొగుడు వస్తాడని ఎదురు చూస్తూ కూర్చునే పెళ్ళాంలా కూర్చుంటాడు. తను అంత ఫూలిష్ గా మాట్లాడినందుకు వుందో సూసైడ్ చేసుకుందో కూడా పట్టదు. ఇది చాలా హాస్యాస్పదమైన ప్లాట్ పాయింట్ వన్ ఘట్టం.
(మిగతా రేపు)

―సికిందర్