596 : సందేహాలు - సమాధానాలు

Q :     మీ రివ్యూలు ఆసక్తికరంగా వుంటాయి లెంగ్త్  కాస్త ఎక్కువనిపించినా. అయితే మీరు తరచుగా వాడే పదం ‘జానర్’ అంటే ఏమిటి?
―విన్నకోట నరసింహా రావు  (ఊరి పేరులేదు)

 A :    మీ అభిమానానికి థాంక్స్. జానర్ గురించి చెప్పాలంటే, కళల్లో ఒక నిర్ణీత కేటగిరీని జానర్ అంటారు.  దీనికి తెలుగు అర్ధం ‘కళాప్రక్రియ’.  కథల విషయానికొస్తే జానపద కథలకి ఒక నిర్ణీత కళా ప్రక్రియ వుంటుంది, కామెడీకి ఒక నిర్ణీత కళా ప్రక్రియ వుంటుంది. ఇలా ఒక్కో కళాభివ్యక్తికి ఒక్కో నిర్ణీత ప్రక్రియ వుంటుంది. ఆ ప్రక్రియలోనే సృష్టి జరగాలి. దీన్నే జానర్ మర్యాద అంటారు. జానర్ అనే మాటని పక్కనబెట్టి సింపుల్ గా పిలుచుకోవాలంటే, అది జానపద కేటగిరీ, ఇది కామెడీ కేటగిరీ...ఇలా  చెప్పుకుంటే చక్కగా  అర్ధమైపోతుంది. ఫలానా కేటగిరీ అన్నాక ఆ కేటగిరీ కుండే లక్షణాలతోనే సృష్టి జరగాలని, జరిగి వుంటుందని  కూడా చప్పున అర్ధమైపోతుంది.
          జానర్ అనేది ఇంగ్లీషు ‘genre’ కి తెలుగు నుడికారం. ఇంగ్లీషులో ‘ఝాన్ర’ అని పలుకుతారు. తెలుగులో అలా పలికినా  రాసినా ఎబ్బెట్టుగా అన్పిస్తుంది. కాబట్టి ‘జానర్’ అని తెలుగైజుడు అయింది. ఇంగ్లీషులో మాటాడేప్పుడు ‘ఝాన్ర’ అనే పలకాలి. తెలుగులో మాటాడేప్పుడు ‘జానర్’ అనాలి. కొందరు సినిమా వాళ్ళు ఏదోలా నోరు తిప్పుతూ ‘జోనర్’  అంటారు. అంత నోరు ఏదోలా తిప్పాల్సిన అవసరంలేదు. ‘జొన్నలు’ అన్పించేలా నోరూరిస్తూ పలకాల్సిన అవసరమూ లేదు.

Q :  త్రీ యాక్ట్ లో రెఫ్యూజల్ ఆఫ్ కాల్ తప్పని సరి అని ఒక చోట చదివాను. మీరు కూడా రాసినట్టు గుర్తు. ‘శివ’  సినిమా త్రీ యాక్ట్ స్ట్రక్చర్ లో రెఫ్యూజల్ ఆఫ్ కాల్ ఎందుకు లేదు?లేకపోయినా అంత పర్ఫెక్ట్ గా ఆ ఆర్డర్ ఎందుకు వుంది?
 ―పేరు వెల్లడించ వద్దన్న టాలీవుడ్ దర్శకుడు  
A : కథనంలో రెఫ్యూజల్ ఆఫ్ కాల్ అనే మజిలీ 1950 లలో జోసెఫ్ క్యాంప్ బెల్ సూత్రీకరణ లోంచి వచ్చింది. అది పురాణ గాథల  నిర్మాణంలో ఆయన పట్టుకున్న మజిలీ, దాని సూత్రీకరణ. హాలీవుడ్ దాదాపు ’80 ల వరకూ జోసెఫ్ క్యాంప్ బెల్ మిథికల్ స్ట్రక్చర్ నే మార్పు చేర్పులు చేసుకుంటూ స్క్రీన్ ప్లేలు, వాటితో సినిమాలూ సృష్టించుకుంటూ వచ్చింది. (విచిత్రమేమిటంటే యూఎస్ నుంచి వచ్చిన దర్శకుడు దేవా కట్టా 2010 లో తీసిన  ‘ప్రస్థానం’ క్యాంప్ బెల్ ప్రభావంతోనే తీశారు. ఆ ఉన్నత కళావిలువల ఛాయలన్నీ అందులో కనపడతాయి. 2005 లోనే ఈ వ్యాసకర్తని ఆయన అడిగిన మొదటి ప్రశ్న కూడా - క్యాంప్ బెల్ ని చదివారా? అనే).  తర్వాతి కాలానికి – అంటే ’80 లలోనే  ఇది అవుట్ డేటెడ్ అయిపోయింది. స్ట్రక్చర్ ని మరింత సరళీకరించి, కథనానికి స్పీడు పెంచేలా కొత్త పారడైంని అందించిన సిడ్ ఫీల్డ్ ని ఫాలో అవడం మొదలెట్టింది హాలీవుడ్. ’90 లనుంచీ  ఇప్పటి వరకూ హాలీవుడ్ స్ట్రక్చర్ కి సిడ్ ఫీల్డ్ పారాడైంనే ఫాలో అవుతూ వస్తోంది. ఈ స్ట్రక్చర్ లో ‘రెఫ్యూజల్ ఆఫ్ కాల్’ అనే  మజిలీని తొలగించాడు సిడ్ ఫీల్డ్. పరిస్థితి డిమాండ్ చేస్తున్నా హీరో చర్యకి పూనుకోవడానికి తిరస్కరించే ఘట్టాన్నే ‘రెఫ్యూజల్ ఆఫ్ కాల్’ మజిలీ అన్నారు. ఇది బిగినింగ్ విభాగంలో ప్లాట్ పాయింట్ వన్ కి ముందు వస్తుంది. అప్పుడు ఒక సీనియర్ పాత్రో, ఇంకో సన్నిహిత పాత్రో (థ్రెషోల్డ్ క్యారక్టర్ అంటారు) వచ్చి హీరోకి నచ్చజెప్తుంది. అప్పుడు హీరో సరేనని చర్యకి పూనుకోవడానికి సిద్ధమవుతాడు ప్లాట్ పాయింట్ వన్ దగ్గర పరిస్థితి తీవ్రతరం కూడా అవడంతో. 
          ఇది పాత్ర చిత్రణకి సంబంధించిన ఒక షేడ్. సిడ్ ఫీల్డ్ పారాడైంలో దీని అవసరం లేదని తొలగించారు. ఎవరో వచ్చి నచ్చజెప్తే హీరో అప్పుడు ఫీలై చర్యకి పూనుకోకుండా, ఈ సెకండ్ హేండ్ ఫీలింగుకంటే,  తానుగా ఫీలై రంగంలో దిగాలన్న కథనానికి స్పీడు పెంచే ఇన్నోవేషన్ లో భాగంగా ఆ మజిలీ ఎగిరిపోయింది. ఇప్పటి హాలీవుడ్ సినిమాల్ని చూస్తే అవి హీరో పాత్రచిత్రణ సంగతుల్ని బాగా కుదించి, యాక్షన్ ఓరియెంటెడ్ గానే వుంటాయి. సినిమా వ్యాపారానికి  క్యారక్టరైజేషన్ కంటే, ప్లాట్ ప్రొగ్రెషన్  ముఖ్యమని వాళ్ళ కొత్త విధానం.
          ఇందుకే ‘శివ’ లో ఆ మజిలీ – లేదా క్యారక్టర్ షేడ్ లేకపోయినా ఆర్డర్ లో బిగువు తగ్గలేదు. అయితే బిగినింగ్ ఆర్డర్ లో ఆ మజిలీ వుంటుంది. ఒకేసారి హీరో సైకిలు చైన్ తో జేడీని కొట్టడు ప్లాట్ పాయింట్ వన్ లో. అంతకి ముందు జేడీ చేష్టల్ని గమనిస్తూనే వుంటాడు. ఎప్పుడైతే చేష్టలు ముదిరి హీరోయిన్ ని టీజ్ చేస్తాడో,  అప్పుడు చర్యకి పూనుకుని ఫైనల్ గా జేడీని కొట్టి ప్లాట్ పాయింట్ వన్ని సృష్టిస్తాడు. ఇక్కడ హీరోకి ఇంకో సీనియర్ పాత్రో, ఇంకెవరో కొట్టమని నచ్చజెప్పలేదు. ఇక్కడ హీరో స్వయంపోషకత్వం, స్వశక్తీ గలవాడు.
          సిడ్ ఫీల్డ్ తరచూ 19 వ శతాబ్దపు అమెరికన్ నవలారచయితా హెన్రీ జేమ్స్,  ‘ది ఆర్ట్ ఆఫ్ ఫిక్షన్’ వ్యాసంలో రాసిన మాటల్ని ప్రస్తావిస్తూంటాడు - “What is character but the determination of incident? And what is incident but the illumination of character?” అని.
          ఈ తరహా యాక్షన్ ఓరియెంటెడ్ పాత్రచిత్రణే  క్యాంప్ బెల్ పాసివ్ మజిలీని తొలగించింది. యాక్షన్ ఓరియెంటెడ్ పాత్రచిత్రణంటే యాక్షన్ సినిమాలకనే కాదు, ఫ్యామిలీ ప్రేమా, కామెడీ గిమిడీ ఏ రకం సినిమాలకైనా హీరో స్వయం నిర్ణాయక శక్తితో తానుగా సంఘటనల్ని సృష్టించి ఆశ్చర్య పర్చే వాడుగా,  మెరుపులు మెరిపించే వాడుగా వుండాలని అర్ధం. ఇలావుంది కాబట్టే ‘శివ’ లో సైకిలు చైను సంఘటన అంత పాపులరైంది. క్లాసిక్ గా వుండిపోయింది.
          అయితే గత డిసెంబర్ లో వచ్చిన ‘టైగర్ జిందా హై’ లో ఆ  రెఫ్యూజల్ ఆఫ్ కాల్ మజిలీ సహా, జోసెఫ్ క్యాంప్ బెల్ పురాణ ప్రక్రియలు అనేకం వున్నాయి. అవతల ఘోరాలు జరుగుతున్నాయ్ రారా బాబూ అంటే ససేమిరా అంటాడు సల్మాన్ (రెఫ్యూజల్ ఆఫ్ కాల్).  ఆ వచ్చిన అధికారులు ఖర్మ అనుకుని వెళ్ళిపోతారు. తర్వాత థ్రెషోల్డ్ క్యారక్టర్ గా కత్రినా కల్పించుకుని,  బుజ్జగిస్తే బయల్దేరతాడు. అయితే ఆనాటి క్యాంప్ బెల్ స్ట్రక్చర్ లో ఈ మిథికల్ క్యారక్టర్ లు, కథనమూ సీరియస్ గా వుంటే ఈ యాక్షన్ మూవీ నిలబడేది కాదు. ఆ మిథికల్ క్యారక్టర్స్ తో, కథనంతో ఎక్కడా సీరియస్ నెస్ అనేది లేకుండా,  తెగ నవ్విస్తూ పోవడడంతో ఈ టెర్రరిజం మూవీ మంచి కమర్షియల్ ఎంటర్ టైనర్ అయింది.

Q :     Just now, I read your review on 'Padmavath' movie. It's outstanding. I want to represent this review in my 'media policy' class. Cause, we discussed this controversy in the previous class. Could you please send me, the English version of this movie review.
- Dileep Kumar, EFLU
A :     Thanks for your compliment,  and as well as your idea of presenting the review in your class. But the shortcoming is that it cannot be had in English. I only write in Telugu for the blog, for Telugu audience. Hence I request you to make other arrangements of value, for translation.

Q :  మీరు అప్పుడప్పుడు స్క్రీన్ ప్లే టిప్స్ ఇచ్చేవారు సరదాగా చదువుకోవడానికి. మళ్ళీ ఎప్పుడిస్తారు?
―కె. ఏ. రాగిణి, హైదరాబాద్
A : ఈ ప్రశ్న మరికొందరు కూడా అడుగుతున్నారు. తప్పక వచ్చేవారం ప్రారంభిద్దాం. ఇప్పటికి 140 దాకా టిప్స్ ఇచ్చాం.

Q :  మిడిల్  మాటాష్ స్క్రీన్ ప్లే  అంటుంటారు కదా, అసలు ఒక కథకి మిడిల్  లో వుండాల్సిన బేసిక్ పాయింట్స్ ఏంటి? మిడిల్  లో ఎలాంటి సంఘటనలు జరగాలి? పాత్రలు ఎలా వుండాలి?  ఏ రూల్స్ పాటించకపోవడం వల్ల ఈ మిడిల్  మాటాష్ స్క్రిప్ట్స్ వస్తున్నాయి?
―శ్రవణ్, అసోసియేట్ దర్శకుడు

          మిడిల్లో వుండాల్సిన బేసిక్ పాయింట్స్ ప్లాట్ పాయింట్ వన్ దగ్గరే ప్రాణం పోసుకుంటాయి. కథ అనేది ఎప్పుడైనా ప్లాట్ పాయింట్ వన్ దగ్గరే  పుడుతుంది. అంతకి ముందుది కథ కాదు, ఉపోద్ఘాతం. వొళ్ళు మండిన సగటు ప్రేక్షకుడి భాషలో చెప్పుకోవాలంటే సోది చెప్పడం. ప్లాట్ పాయింట్ వన్ దగ్గర పుట్టిన కథ ప్లాట్ పాయింట్ టూ దాకా వుంటుంది. ప్లాట్ పాయింట్ టూ దగ్గర్నుంచి కథకి ముగింపే వుంటుంది. ఈ ప్లాట్ పాయింట్ వన్ నుంచి ప్లాట్ పాయింట్ టూ వరకూ స్క్రీన్ ప్లేలో 50 శాతం కథ ఆక్రమించి వుంటుంది. అంటే ఈ భాగమంతా మిడిల్ అన్న మాట. ఈ మిడిల్ భాగం తగ్గే కొద్దీ  కథాబలం కూడా తగ్గుతుంది.
          ప్లాట్ పాయింట్ వన్ దగ్గర కథ పుట్టాలనే బేసిక్ పాయింటుతో బాటు, అక్కడ్నించీ మిడిల్లో ఆ కథని నడిపించే మరికొన్ని బేసిక్స్ వుంటాయి. అవి : 1. సమస్య, 2. హీరోకి గోల్, 3. హీరో గోల్ ఎలిమెంట్స్ లో a. కోరిక, b. పణం, c. పరిణామాల హెచ్చరిక, d. ఎమోషన్ (‘శివ’ చూస్తే ఇవి బాగా అర్ధమౌతాయి).
          ఇవీ కథ, ఆ కథతో హీరోతో, ఆ హీరోతో ప్లేతో వుండే బేసిక్స్. కథే హీరో హీరోయే కథ - ఈ బేసిక్ బాగా గుర్తు పెట్టుకోవాలి. ఇందిరాయే ఇండియా - ఇండియాయే ఇందిరా అన్న స్లోగన్ తల్చుకుంటే ఇది బాగా గుర్తుంటుంది. ఇందిర నచ్చకపోతే, వాజ్ పాయే ఇండియా షైనింగ్ – ఇండియా షైనింగే వాజ్ పాయ్ అని ఎగ్జాంపుల్ పెట్టుకున్నా గుర్తుంటుంది. కథే హీరో హీరోయే కథ - కథలో పుట్టే సమస్య క్యాన్సర్. కాబట్టి ఆ క్యాన్సర్ ని తొలగించి కథనీ దాంతో తననీ పునీతం చేసుకోవడమే హీరోకుండే గోల్.
          ఇవన్నీ ప్లాట్ పాయింట్ వన్ దగ్గర ఏర్పడే సమస్యతో కథ పుట్టినప్పుడే వుండే బేసిక్స్. కథలో పుట్టే సమస్య  క్యాన్సర్ అయినప్పుడు, ఆ సమస్య లేదా క్యాన్సర్ అనేది వ్యతిరేక పాత్రకి ప్రతీక, లేదా సింబల్. అంటే ఇది హీరోకి వ్యతిరేక పాత్ర. దీన్ని నిర్మూలించడానికే హీరో సంఘర్షిస్తాడు. దీన్నే మిడిల్ బిజినెస్ అంటారు. ఈ మిడిల్ బిజినెస్ లో - సంఘర్షలోంచి అనేక సంఘటనలు పుడతాయి. వ్యతిరేక పాత్రతో ఈ సంఘర్షణలో హీరో పడుతూ లేస్తూ వుంటాడు. మిడిల్ బిజినెస్ కి ఇదే  బేసిక్ పాయింటు. ఈ మిడిల్ బేసిక్ పాయింటుని డైనమిక్స్ అంటారు. ఈ డైనమిక్సే మిడిల్లో టైం అండ్ టెన్షన్ గ్రాఫ్ ని ఏర్పరుస్తాయి.
          ఇప్పుడు వెళ్లి వెళ్లి ఈ సంఘర్షణ ప్లాట్ పాయింట్ టూ కి చేరుతుంది. ఇక్కడి వరకే కథ లేదా ఆ సమస్య, లేదా క్యాన్సర్, లేదా వ్యతిరేక పాత్ర  ప్రతాపం చూపించడం వుంటుంది. ఈ ప్రతాపం తీవ్రత ఇక్కడ ఇంకా పెరిగి,  హీరోకి జ్ఞానోదయమై,  ఒక పరిష్కారం దొరుకుతుంది. వ్యతిరేక పాత్రని  ఇక శాశ్వతంగా నిర్మూలించ గలిగే పరిష్కార మార్గం. ప్లాట్ పాయింట్ టూ ధర్మమే పరిష్కార మార్గాన్ని అందించడం.
          ఇప్పుడు చూస్తే మిడిల్ ప్రారంభంలో,  ప్లాట్ పాయింట్ వన్ దగ్గర పుట్టే సమస్యకి, ప్లాట్ పాయింట్ టూ దగ్గర అది సమసిపోయే పరిష్కార మార్గమన్న మాట. అంటే ప్లాట్ పాయింట్ వన్ సమస్య అయితే, ప్లాట్ పాయింట్ టూ పరిష్కారం అవుతాయన్న మాట. ఇవి రెండూ స్క్రీన్ ప్లేకి  ప్లేకి మూల స్థంభాల్లాంటివి. వీటి మధ్య జరిగే సంఘర్షణంతా  మిడిల్ బిజినెస్. ఇక మిడిల్ బిజినెస్ పూర్తి చేసిన ఆ హీరో,  ఆ పరిష్కార మార్గంతో ఎండ్ విభాగాన్ని ప్రారంభించి క్లయిమాక్స్ కెళ్ళిపోతాడు.
          ఇప్పుడు మిడిల్ మటాష్ కొస్తే, మిడిల్ శాతం తగ్గిపోవడం. ఇదెలా తగ్గుతుంది? మిడిల్ కి ముందుండే బిగినింగ్ విభాగం పెరగడం వల్ల. మరి బింగినింగ్   నిడివి ఎంత వుండాలి? మొత్తం స్క్రీన్ ప్లే మొత్తంలో పాతిక శాతమే వుండాలి. మిడిల్ ఎంత వుండాలి? స్క్రీన్ ప్లేలో సగం అంటే యాభై  శాతం వుండాలి. మరి ఎండ్? ఇది మిగిలిన పాతిక శాతం వుంటుంది.
          ఇప్పుడు పాతిక శాతమే వుండాల్సిన  బిగినింగ్ విభాగం యాభై శాతానికి పెరిగితే ఏమవు

తుంది? ఆ మేరకు బిగినింగ్ కీ ఎండ్ కీ మధ్య వుండే  మిడిల్ నిడివి సగానికి  సగం తగ్గిపోయి, పాతిక శాతం మిగులుతుంది. అప్పుడు స్క్రీన్ ప్లేలో  మిడిల్ ఉనికి ఎక్కడ వుంటుంది? ఇంటర్వెల్ అవతలికి జరిగిపోయి అక్కడ కన్పిస్తుంది. అప్పుడేమవుతుంది?  ఇంటర్వెల్ అవతలి వరకూ, అంటే  సెకండాఫ్ సగం వరకూ బిగినింగే వ్యాపించి వుంటుంది.  అయినంత మాత్రాన ఏమవుతుందని? ఈ బిగినింగ్ సెకండాఫ్ సగం దగ్గర ముగిసినప్పుడు,  ప్లాట్ పాయింట్ వన్ కూడా ఫస్టాఫ్ నుంచి సెకండాఫ్ సగానికి జరిగిపోయి అక్కడే ఏర్పాటవుతుంది. అంటే కథ అక్కడ పుడుతుందన్న మాట. ఆ పుట్టిన కథ అక్కడ కుంచించుకు పోయివున్న మిడిల్లో పావు శాతమో ఇంకా తక్కువో వుంటుంది. 

          ఇలా సెకండాఫ్ సగం దాకా కథే ప్రారంభం కాకపోవడం, ఆ ప్రారంభించిన  కథ కూడా ఇట్టే ముగిసిపోవడం జరుగుతాయన్న మాట.  కొండంత రాగం తీసి...అన్నట్టుగా వుంటుందన్న మాట సినిమా. ఫస్టాఫ్ అంతా వెస్ట్ చేసి, అక్కడెక్కడో  సెకండాఫ్ లో కథ ప్రారంభమయ్యే దాకా మునిసిపాలిటీ వాళ్ళు డ్రైనేజీ తవ్వుతున్నట్టు బారుగా కంపు కొడుతూ బిగినింగ్ విభాగమే పర్చుకుని వుంటుంది గనుక,  సినిమా భరించలేకుండా తయారవుతుంది.
          బిగినింగ్ విభాగమంటే ఉపోద్ఘాతమని కదా? వొళ్ళు మండిన సగటు ప్రేక్షకుడి భాషలో సోది అని కదా? ఈ సోది నిర్దేశించిన దాని పాతిక శాతం కంటే కూడా ఎంత తక్కువ వున్నా ఫర్వాలేదు, దాటిపోయి ఇలా మిడిల్ ని మటాష్ చేస్తూ దాడి చేస్తే, ఇప్పుడు  సగటు ప్రేక్షకుడికి ఇంకా మండిపోయి  -  ఎదవ సోది - అనేస్తాడు సినిమాని.  ఇలా పచ్చి నిజాలు మాటాడు కోకపోతే అంత సులభంగా మిడిల్ మటాషులు వదిలిపోయేలా లేవు.
          ఈ బేసిక్స్ రాసిరాసి బ్లాగు బాగా  అరిగిపోయింది.  బేసిక్స్ తెలియకుండానే పేజీలకి పేజీలు వీధి నాటకాల్లాగా రాసేస్తూంటారు. ఇలాగని తెలుగు నాటకరంగ అభివృద్దికి పనికొస్తారా  అంటే అదీ లేదు, ఆ బేసిక్స్ అసలే తెలీవు.

―సికిందర్

595 : 'భాగమతి' రివ్యూ - 5

  జి.అశోక్ దర్శకత్వంలో వచ్చిన ’భాగమతి’ కథ 2012 లోనే తయారై సిద్ధంగా వుందన్నారు. 2017 లో ఇదే దర్శకుడి ‘చిత్రాంగద’ విడుదలయ్యింది. అది స్ట్రక్చర్ తప్పిన మిడిల్  మటాష్ క్రియేటివిటీతో అట్టర్ ఫ్లాపయ్యింది. ఇప్పుడు 2018 లో ‘భాగమతి’ ని విడుదల చేశారు. చూస్తే ‘చిత్రాంగద’  ఏ స్ట్రక్చర్ తప్పిన మిడిల్ మటాష్ గా వుందో,  ‘భాగమతి’  అదే స్ట్రక్చర్ తప్పిన మిడిల్ మటాష్ తో వుంది. పైగా టైమింగ్స్ సహా అదే ప్లాటింగ్ (కథనం) తో వుంది. అంటే ‘భాగమతి’  కథ ముందు తయారైంది కాబట్టి ఆ క్రియేటివిటీయే కరెక్ట్ అన్పించి  ‘చిత్రాంగద’ కథనీ అలాగే తయారు చేశారన్న మాట. కానీ ఆ క్రియేటివిటీ తప్పని  చిత్రాంగద’ విడుదల తర్వాత తేలింది. అయినా ఈ క్రియేటివిటీకి  మాతృక అయిన ‘భాగమతి’ క్రియేటివిటీని సవరించుకోకుండా వున్నదున్నట్టు అలాగే తీసేశారు. అంటే దీనర్ధం,  అది క్రియేటివిటీ లోపమని అర్ధంగాక అయినా వుండాలి, లేదా  బిగ్ బ్యానరూ, అనూష్కా ఎలాగో బయట పడేస్తారనైనా అనుకుని వుండాలి. అదృష్టం బావుండి బైట పడేశారు. ఇక జి. అశోక్ ఇదే తరహా టెంప్లెట్ క్రియేటివిటీతో  ఇంకో బిగ్ బ్యానర్ నీ, స్టార్ వేల్యూనీ నమ్ముకుని ఇంకో భాగమతిని కూడా తీసెయ్యొచ్చు. విప్లవాత్మకంగా క్రియేటివిటీకి స్ట్రక్చర్ అవసరం లేదనీ, పునాదుల్లేకుండా ఇల్లు కట్టవచ్చనీ  నిరూపించవచ్చు...

        ‘భాగమతి’  కథ చూద్దాం : ప్రారంభంలో ఒక  అటవీ ప్రాంతంలో అదృశ్య శక్తేదో మనుషుల్ని చంపేస్తున్న ఓపెనింగ్ టీజర్ వుంటుంది.

A. ఫస్టాఫ్ : బిగినింగ్ విభాగం
          1. (ట్రాక్ -1) :  ఆ తర్వాత ఢిల్లీలో కేంద్రమంత్రి ఈశ్వరప్రసాద్ (జయరాం)  ప్రెస్ మీట్ లో తన మీద వచ్చిన ఒక ఆరోపణని ఖండిస్తూ తనెంత సచ్ఛీలుడో చెప్పుకుంటాడు. 

          అటు కేంద్ర హోంమంత్రి ,  ముఖ్యమంత్రి మాట్లాడుకుని  ఈశ్వర ప్రసాద్ గురించి ఒక నిర్ణయం తీసుకుంటారు. అతను ముఖ్యమంత్రి పదవికి ఎసరు పెట్టకుండా వుండాలంటే విగ్రహాల దొంగతనాల వ్యవహారంలో అతడి మీదున్న ఆరోపణలకి సంబంధించి రహస్య సీబీఐ విచారణ జరిపి ఇరికించాలనుకుంటారు.

          సీబీఐ అధికారిణిగా వైష్ణవి (ఆశా శరత్)  తన బృందంతో దిగుతుంది. ఆమె గతంలో ఈశ్వరప్రసాద్ దగ్గర  పియ్యేగా  పనిచేసిన చంచల (అనూష్కా)  అనే ఐఏస్ ఆఫీసర్ ని ప్రశ్నించి ఈశ్వరప్రసాద్ మీద సాక్ష్యం సంపాదించాలనుకుంటుంది. 

          చంచల తను ప్రేమించిన శక్తి (ఉన్నీ ముకుందన్) అనే సామాజిక కార్యకర్తని చంపిన కేసులో జైల్లో వుంటుంది. 

          వైష్ణవి బృందంలోని సీబీఐ అధికారి సంపత్ (మురళీ శర్మ) చంచలని దూరంగా పాడుబడ్డ భాగమతి బంగళాకి తరలిస్తాడు. ఈ బంగళాలో భాగమతి దెయ్యమై వుందని ప్రజలు భయపడుతూంటారు. ఈ వాతావరణంలోనే చంచలని విచారిస్తూంటుంది వైష్ణవి. 

          2. (ట్రాక్ -2) : చంచల ఫ్లాష్ బ్యాక్ వస్తుంది. ఇదులో ఐఏఎస్ ఆఫీసర్ గా చంచల ప్రాణాధార ప్రాజెక్టు కింద భూసేకరణ వ్యవహారాలు చూస్తూంటుంది. అ రైతుల ఆందోళనకి శక్తి నాయకత్వం వహిస్తూంటాడు. చంచలని వ్యతిరేకించిన ఇతను తర్వాత సహకరించడం మొదలెడతాడు. క్రమంగా ఇద్దరూ ప్రేమలో పడతారు. సీబీఐ సంపత్ తమ్ముడే శక్తి అని రివీలవుతుంది.

          3. (ట్రాక్ -3) : బంగాళాలో చంచలకి భయానక అనుభావా లెదురవుతూంటాయి. భాగమతి ఆత్మ ఆమెని ముప్పుతిప్పలు పెడుతూంటుంది.

          చివరికి భాగమతి ప్రత్యక్షమై తనెవరో ఏమిటో, తనకేం అన్యాయం జరిగిందో చెప్పుకుంటుంది. తను కాళంగి  రాజ్యపు రాణి. సేనాని చంద్రసేనుడు ఈ బంగళాలోనే  తనని బంధించి రాజ్యాన్ని కైవసం చేసుకున్నాడు. దీనికి భాగమతి పగబట్టింది. ఆ చంద్రసేనుడితో లెక్క తేల్చుకుంటానని శపథం చేస్తుంది.  దీంతో ఇంటర్వెల్.

B. సెకండాఫ్ : బిగినింగ్ విభాగం కంటిన్యూ

          4. (ట్రాక్ -1 కంటిన్యూ) : చంచల సైకిక్ ప్రవర్తన నాటకమని కొట్టి పారేస్తూ సీబీఐ బృందం విచారణ పేరుతో  ఆమెని మరింత  ఇబ్బంది పెడుతూంటుంది. ఇప్పుడు చంచల ఎదురు తిరగడం మొదలెడుతుంది.

          5. (ట్రాక్ -2 కంటిన్యూ) : చంచల ఫ్లాష్ బ్యాక్ కొనసాగుతుంది. శక్తితో ఆమె ప్రేమ ఖాయం అవుతుంది. ఆ ఫంక్షన్ కి కేంద్ర మంత్రి ఈశ్వరప్రసాద్ కూడా వస్తాడు. చంచలకి శక్తితో ఫ్లాష్ కట్స్ పడతాయి. ఆ ఫ్లాష్ కట్స్ లో ఆమె అతణ్ణి చంపుతున్నప్పటి దృశ్యాలుంటాయి.

          6. (ట్రాక్ – 1 కంటిన్యూ) : సిబీఐ బృందం సైకియాట్రిస్టు తో చంచలకి పరీక్ష చేయిస్తారు. చంచల తిరగబడి కొట్టడంతో అతను గాయపడతాడు. ఆమెకి నిజంగానే భాగమతి ఆత్మ ఆవహించిందని ధృవీ కరిస్తాడు.

          7. (ట్రాక్ 3 కంటిన్యూ) : సిబీఐ సంపత్ బంగళాలోకి ప్రవేశించి నిజంగానే భాగమతి ఆత్మ వుందని నమ్ముతాడు. చంచలని మానసిక వైద్యశాలకి తరలిస్తారు.

C. బిగినింగ్ విభాగం ముగింపు : ప్లాట్ పాయింట్ - 1

        8. (కథా ప్రారంభం) : మానసిక వైద్య శాలకి చంచలని చూడడానికి కేంద్ర మంత్రి ఈశ్వర ప్రసాద్ వస్తాడు. ఇంత జరుగుతున్నా చంచల  తనపేరు బయట పెట్టడం లేదంటే ఆమెకి తన మీద ప్రేమ వున్నట్టేనని అంటాడు. దీంతో వాళ్ళిద్దరి మధ్య వున్నసంబంధం ఓపెన్ అవుతుంది.

D. మిడిల్ విభాగం (కథ కొనసాగింపు):

          9. ( ట్రాక్ -2 కంటిన్యూ) : ఫ్లాష్ బ్యాక్ లో  భూముల వ్యవహారం వస్తుంది. తనకి తెలియకుండా ఎక్కువ భూములు నోటిఫై చేసి సంతకాలు పెట్టించుకున్నాడని ఎదురుతిరుగుతుంది చంచల. ఆమె నోరు మూయించడానికి ఆమె చేతిలో శక్తి చనిపోయేలా చేస్తాడు  ఈశ్వర ప్రసాద్.

E. మిడిల్ విభాగం + ప్లాట్ పాయింట్ -2 + ఎండ్ విభాగం :
          10. (కథ ముగింపు) : ఈ నేపధ్యంలో ఇప్పుడు ఈశ్వర ప్రసాద్ ని ఇలారప్పించి పగదీర్చుకోవడానికే భాగమతి పూనినట్టు నటించి చంచల గేమ్  ఆడిందని  రివీల్ అవుతుంది. ఇద్దరి మధ్య ఘర్షణలో ఈశ్వరప్రసాద్ చనిపోతాడు.

చెప్పేదొకటి –జరిగేదొకటి!

     ఇలావున్న కథలో ముందుగా సెటప్స్ – వాటి పే ఆఫ్స్ ఎలావున్నాయో చూద్దాం : ఓపెనింగ్ టీజర్ గా చూపించిన గిరిజనుల ఊచకోత దృశ్యాలకి  అదృశ్య శక్తితో  ‘ప్రిడేటర్’ (1987) ఇన్ స్పిరేషన్ కన్పిస్తుంది. ఇవి మనం చూస్తున్నప్పుడు ఈ అదృశ్య శక్తి భాగమతియే  అన్న అభిప్రాయం కల్గుతుంది. ఎందుకంటే భాగమతి సినిమా కాబట్టి. హార్రర్ ఎలిమెంటు ఆమెతో తప్ప మరొకదానితో కనెక్ట్ అయి వుండదని భావిస్తాం కాబట్టి. 

          క్లయిమాక్స్ లో కేంద్రమంత్రి కుట్ర బయటపడినప్పుడు, ఫ్లాష్ బ్యాక్ లో ఈ ఊచకోత దృశ్యాలు వస్తాయి. ఇది భూములు ఖాళీ చేయించడానికి అతనే జరిపిస్తున్న  ఊచకోతగా,  సెల్ ఫోన్లో లైవ్ గా చంచలకి చూపిస్తూంటాడు, ఆమె మనోస్థైర్యాన్ని దెబ్బ తీయడానికి. 

          ఈ సెటప్ – దీని పే ఆఫ్  తప్పుదోవ పట్టించేవిగా  వున్నాయి. కథలో హార్రర్ ఎలిమెంటు భాగమతితో వున్నప్పుడు,  కథలో ఏ హార్రర్ సంఘటన జరిగినా అది భాగమతి కారణంగానే చూపించాలి తప్ప- వేరేగా చీట్ చేయడం సరికాదు. కనుక ఓపెనింగ్ టీజర్ ఫెయిలయ్యింది. ప్రేక్షకుల్ని మాయ చేయవచ్చు గానీ మోసం చేయకూడదనేది స్క్రిప్టింగ్ మర్యాద. 

          ముఖ్యమంత్రి, కేంద్ర హోం మంత్రిలు కలిసి కేంద్ర ఇరిగేషన్ మంత్రి  ఈశ్వర ప్రసాద్ ని  ఇరికించడానికి విగ్రహాల దొంగతనాలనే కేసు విచారణ జరిపించేందుకు పూనుకుంటారు. ఇందుకు ఈశ్వరప్రసాద్ మాజీ పియ్యే చంచలని ప్రశ్నించాలని సీబీఐ వైష్ణవి నిర్ణయించి ఆ మేరకు చర్యలు తీసుకుంటుంది. కానీ చంచల ఎందుకు జైల్లో వుందో తెలీదా? చంచల, ఆమె చంపిందంటున్న కార్యకర్త శక్తి,  భూసేకరణ వ్యవహారంలో వున్నారు. అదే భూసేకరణ  వ్యవహారంలో ఇరిగేషన్ మంత్రి ఈశ్వర ప్రసాద్ కూడా ఇన్వాల్వ్ అయి వున్నాడు. ప్రకటించిన 127 గ్రామాలని 135 గా మార్చి చంచలని మోసం చేశాడు. (తెలంగాణా ఎనిమిది మండలాల్ని ఆంధ్రాలో కలిపిన ఇన్స్ పిరేషనేమో). ఆ తర్వాత ఆమె శక్తిని చంపిందని జైలుకెళ్ళింది. ఈ మొత్తం ఎపిసోడ్ లో ముఖ్యమంత్రికి , కేంద్ర హోం మంత్రికీ అనుమానాలే రావా ఈశ్వర ప్రసాద్ మీద? చంచల సాయం తీసుకుని ఉన్న ఈ కేసునే తిరగదోడి ఈశ్వరప్రసాద్ ని జైలుకి పంపవచ్చుగా? ఇంకేదో విగ్రహాల దొంగతనాలంటూ చంచలని హింసించి ఈశ్వరప్రసాద్ ని ఇరికించాలన్న ఆలోచనెందుకు? ప్రేక్షకుల మీద అనవసరమైన సమాచార భారాన్ని మోపడం కాకపోతే?  ఆడుకోవడానికి ఒక బంతి అంటూ వున్నాక, ఆ బంతితోనే ఆట సాగుతుంది తప్ప,  గ్యాలరీలో ప్రేక్షకకులెవరో ఆకతాయిగా ఇంకో బంతి  విసిరారని, ఆడుతున్న బంతిని  వదిలేసి  ఆ వచ్చిపడ్డ కొత్త బంతి వెంటపడి పోతారా  ఆటగాళ్ళు? భూముల వ్యవహారమనే ఒక బంతిని ప్రేక్షకుల మీదికి ఆల్రెడీ విసిరాక, కాదని ఆకతాయి కథకుడు ఇంకో విగ్రహాల దొంగతన మనే బంతిని వేసి పాయింటుని  చీల్చి కూర్చుంటాడా? 

          కాబట్టి ఈ కామన్ సెన్సు తో చూస్తే, సీబీఐ విచారణ అనే  సెటప్ ని - పే ఆఫ్ చేయడంలో ఫెయిలయ్యారు. అంటే ఈ కథ వుండడానికి వీల్లేదు. వీల్లేని కథని చూపెట్టారు. ఒకటేదో  సెటప్ చేస్తే, దాని కుండాల్సిన పే ఆఫ్ ని వేరే క్లోనింగ్ చేసి వికృతిని చూపిస్తున్నారు, చూపించాల్సిన ప్రకృతిని కాదు. ఓపెనింగ్ టీజర్ తో ఇదే జరిగింది, ఇప్పుడూ ఇదే జరిగింది. 

          ఇంటర్వెల్లో భాగమతి ఆత్మని సెటప్ చేశారు. ఆ తర్వాత ఈమే లేదు, ఈమె కథా లే దు. అదంతా తన గేమ్  కోసం చంచల సృష్టి అన్నట్టుగా తేల్చేశారు. కాబట్టి భాగమతి అబద్ధం, సెటప్ అబద్ధమని తేలిపోయింది.  కనుకే పే ఆఫ్ లేకుండా పోయింది. భాగమతి చంచల సృష్టించుకున్న ఫాంటసీయే   అయితే, సినిమా టైటిల్ భాగమతి మీద వుండరాదు,  చంచల మీదే వుండాలి . అప్పుడే ప్రేక్షకులు తాము చీటింగ్ కి గురయ్యామని ఫీలవకుండా వుంటారు. పబ్లిసిటీలో కూడా భాగమతిని ప్రేక్షకులు అస్సలు వూహించరు కాబట్టి,   ఇంటర్వెల్లో ఆమె ఎంట్రీతో  షాకింగ్ గా సర్ప్రైజ్ అవుతారు, థ్రిల్లవుతారు. ఇది బాక్సాఫీసుకి చాలా ప్లస్ అవుతుంది. అప్పుడు చంచల కథ డెప్త్ లేని సాదా పొలిటికల్ థ్రిల్లర్ అవుతుందే, అప్పుడు దాంతో మహిళా ప్రేక్షకులకి ఇబ్బంది కదా అనుకుంటే – ఒక్కటే,  అన్యాయానికి బలైన మాజీ ఐఎఎస్ అధికారి శ్రీలక్ష్మి ప్రతిఫలింపజేయడమే. చంచలకి దీన్ని అలా టచ్ చేసివదిలేశారు. అలాకాకుండా పూర్తి స్థాయి పాత్రే అది కావాలి. 

          సరే, చంచల  భాగమతి ఆత్మ పూనినట్టు ప్రవర్తిస్తుంది. మరి ఈ సెటప్ కి పే ఆఫ్ ఏమిటి? ఆమెని ఆసుపత్రిలో చేర్చడమా? ఎలా చేర్పిస్తారు, జైల్లోంచి బంగళాకి రహస్యంగా తరలించి విచారిస్తున్నప్పుడు? 

          మరి ఆసుపత్రికి తరలింపు సెటప్ కి పే ఆఫ్ ఏమిటి? చంచల దగ్గరికి మంత్రి వచ్చేయడమా? ఎలా వచ్చేస్తాడు, చంచలతో తన మీద చేస్తున్న కుట్ర తెలిసిపోయి? చంచల దగ్గరికి దేనికొ స్తాడు- వస్తే గిస్తే చంపిపారెయ్యడానికే వస్తాడు. వచ్చి పైగా,  నా మీద మనసుపడి వాళ్ళకి చెప్పడం లేదా నా రహస్యాలని ఎలా అంటాడు?

          క్లయిమాక్స్ లో వచ్చే చివరి ఫ్లాష్ బ్యాక్ లో- చంచల చేతిలో శక్తి చనిపోయే ఫ్లాష్ బ్యాక్ లో- మంత్రి చంచల చేతిలో పిస్తోలు పెట్టి శక్తిని చంపమని బెదిరిస్తున్నప్పుడు, ఆమె ఆ పిస్తోలు తనకే గురిపెట్టుకుని చస్తానని  ఎదురు తిరగవచ్చుగా? అవతల జరుగుతున్న గిరిజనుల ఊచ కోతని మంత్రి సెల్ ఫోన్లో లైవ్ గా  చూపించి బ్లాక్ మెయిల్ చేస్తూంటే, దాన్ని కూడా చంచల ఆపవచ్చుగా తనకే  పిస్తోలు గురి పెట్టుకుని?  శక్తి కూడా తనని చంపమనే చంచలని రెచ్చ గొట్టడ మేమిటి? చంపి హంతకురాలిగా భవిష్యత్తు నాశనం చేసుకుని ఆమె జైలుకి పోవాలని కోరుకుంటున్నాడా? అది  ప్రేమేనా? అసలక్కడ ఇద్దరికీ చచ్చేంత సీనులేదు. తమ ప్రేమ కోసం మంత్రిని అక్కడి కక్కడే కాల్చి చంపవచ్చు- మిగతా సంగతులు తర్వాత. అసలిది మెక్సికన్ స్టాండాఫ్ లాంటి సన్నివేశం. యుద్ధ కళలో దీనికో థియరీ కూడా వుంది. హాలీవుడ్ కౌబాయ్ సినిమాలు చూసి వుంటే వాటిలోంచి చాలా ఇన్స్ పిరేషన్ దొరికేది.
          ఇలా కీలక ఘట్టాలు, ప్లాట్ పాయింట్సూ  ఎక్కడికక్కడ కథ రద్దయి పోయే సెటప్స్ తోనే  వున్నాయి.

ఇక స్ట్రక్చర్ సంగతి 

     స్ట్రక్చర్ చూద్దాం : స్ట్రక్చర్ లేకుండా అదే అలవాటు పడ్డ  మిడిల్ మటాష్ కథా వంటకంతో, రెండు మూడు పెద్దా  చిన్నా సినిమాలు శరవేగంగా షూటింగులు జరుపుకుంటున్నాయనీ, ఇంకో రెండు మిడిల్ మటాషులు విడుదలకి చకచకా రెడీ అయిపోతున్నాయనీ చల్లని సేదదీర్చే సమాచారమందుతోంది. శుభం, గృహమే స్వర్గసీమ. మిడిల్ మటాషులే మేళతాళాలు. ఈ మూవీస్ కూడా ‘భాగమతి’ లాగే మట్టి అంటకుండా గట్టి హిట్టవ్వాలని కోరుకుందాం. ప్రేక్షకులు ఎక్కడైనా వినియోగదార్లు గానీ సినిమాల దగ్గర అంతగా కాదు కాబట్టి, నకిలీ  సినిమాలకైనా సగర్వంగా ఫెళఫెళలాడే అసలీ నోట్లే తీసిచ్చేస్తూంటారు కాబట్టీ,  కుచ్ భీ చల్తాహై. 

          పైన A - ఫస్టాఫ్ : బిగినింగ్ విభాగంలో 1 నుంచి 3  వరకు వున్న ఆర్డర్ లో మూడు విడివిడి ట్రాకులు తెరిచిపెట్టారు :  1. సీబీఐ ఎంక్వైరీ ట్రాకు, 2. చంచల ఫ్లాష్ బ్యాకు  ట్రాకు, 3. భాగమతి హార్రర్ ట్రాకు. ఈ మూడిటికి  సంబంధించిన సీన్లే ఫస్టాఫ్ లో రిపీటవుతూంటాయి. విడివిడిగా వీటిని ఫాలో అవడం, ఒక చోట ఆపిన వాటిని మళ్ళీ ఇంకోచోట మొదలెడితే,  జోడించుకుని ఫాలో అవడమనే అనవసర శ్రమ మనకుంటుంది.  

          వీటిలో ఏ ట్రాకు ప్రధాన కథనుకుని ఫాలో అవ్వాలి? భాగమతి ట్రాకే ప్రధాన కథనుకుంటూ ఫాలో అవ్వాలేమో, టైటిల్ అదే కాబట్టి. భాగమతి ట్రాకుతో ఈ మొదటి రెండు ట్రాకులు ఎప్పుడు ఎక్కడ ఎలా కలుస్తాయని ఎదురుచూడాలి ? 

          ఫస్టాఫ్ గంటంపావంతా ఈ బిగినింగ్ విభాగంతోనే ఏ డెవలప్ మెంటూ లేక వూరికే అలా అలా గడిపేశాక, ఇంటర్వెల్ దగ్గర భాగమతి కన్పించడంతో ఆమె దగ్గర మొదటి రెండు ట్రాకులు కలిశాయా? ఇక్కడ బిగినింగ్ ముగిసి, ప్లాట్ పాయింట్ వన్ ఏర్పడి, ఇంతసేపూ ప్రారంభం కాని కథ  ఇప్పుడు ప్రారంభమవుతోందని అన్పిస్తోందా? 

          కథ ప్రారంభమవ్వాలంటే ప్రధాన పాత్ర వుండాలి. ఆ ప్రధాన పాత్ర  ఇప్పుడు భాగమతియే అనుకోవాలా, టైటిల్  ఆమె మీదే  వుంది కాబట్టి? మరి ప్రధాన పాత్ర భాగమతి అయితే,  కథ ప్రారంభించాలంటే ఆమె సమస్యలో పడాలిగా? ఆమెకో చంద్ర సేనుడనే వాడితో  గతజన్మకి సంబంధించిన సమస్యేదో వెల్లడయ్యింది. మరి ఈ సమస్యలోకి మొదటి రెండు ట్రాకులు ఎలా వచ్చి కలిశాయో ఇక్కడ చూపెట్టాల్సింది చూపించారా?  ప్లాట్ పాయింట్ వన్ అన్పించే  ఈ ఘట్టంలో భాగమతి డిక్లేర్ చేసిన సమస్యతో ఆమెకో గోల్ ఏర్పడాలిగా? ఏమిటా గోల్? ఆ లెక్క తేల్చుకుంటానంటోంది గత జన్మలో చంద్రసేనుడి తోనేనా? అతనిప్పుడు ఈ జన్మలో వున్నాడా? వుంటే వెళ్లి చంపడానికి ఆత్మకి అడ్డేమిటి? కాబట్టి ఇదంతా ఆమె ప్రగల్భాలుగా తేలిపోతోంది. 

          బిగినింగ్ విభాగంలో ఓపెనింగ్ టీజర్ ని  ఇంటర్వెల్లోనో, ముగింపులోనో పే ఆఫ్ చేయవచ్చు గానీ, బిగినింగ్ విభాగంలో ప్రారంభించిన ట్రాకులు ప్లాట్ పాయింట్ వన్ని మించి దాటి పోవడానికి వీల్లేదు. అన్ని ట్రాకుల్నీ ప్లాట్ పాయింట్ వన్ దగ్గర కొలిక్కి తెచ్చి, బిగినింగ్ ని ముగించేసి, ఆ ట్రాకులన్నీ  కలిసి విసిరే ఉమ్మడి సమస్యతో పోరాటంగా,  ప్రధాన పాత్రకి  గోల్ నివ్వాలి. అప్పుడే ఈ క్రియేటివిటీ స్ట్రక్చర్ లో వుంటుంది. 

          ఇలా ఈ ఇంటర్వెల్ ఘట్టం ప్లాట్ పాయింట్ వన్ ఘట్టమనుకుంటే దీనికీ స్పష్టత  లేదు. మొదటి రెండు ట్రాకులూ ఎలా కలుస్తున్నాయో తేలలేదు, గోల్ ఏమిటో కూడా స్పష్టత  లేదు. కాబట్టి ఈ ఇంటర్వెల్ ని ప్లాట్ పాయింట్ వన్నే అనుకుంటే, ఇక్కడే ఎట్టకేలకు  కథ ప్రారంభమవుతోందనుకుంటే, ఈ ఇంటర్వెల్ బ్యాంగ్ అనేది మొత్తంగా కథకి బలహీనంగా, స్పష్టత లేకుండా, కన్ఫ్యూజింగ్ గా వుంది. ఇక్కడే కథేమిటో అర్ధమైపోవాలి. కానీ కథేమిటో ఇంటర్వెల్లో కూడా తెలియడం లేదు. చంచల ఫ్లాష్ బ్యాక్ లో అసలేం జరిగిందో తెలిస్తేగా కథేమిటో తెలియడానికి. కాబట్టి ఫ్లాష్ బ్యాక్ ఏమిటో పూర్తిగా తేలేవరకూ కథేమిటో తెలియజేయలేని దయనీయ స్థితిలో పడింది ఈ స్ట్రక్చర్ తప్పిన క్రియేటివిటీ.

          సరే, ఈ భాగమతినే  పట్టుకుని కొనసాగుతూ ఇప్పుడు ప్రారంభమైన అర్ధం కాని కథనే  సెకండాఫ్ లో చూద్దామంటే,  ఆమె చంచలకి పూని చంచల రూపంలో వుంది. అంటే చంచల ఎజెండా, ఇటు తన ఎజెండా భాగమతి పూర్తి చేసుకుంటుందని మనమనుకోవాలి. 

          పైన B. సెకండాఫ్ : బిగినింగ్ విభాగం కంటిన్యూ లో 4 నుంచి 8 ఆర్డర్ లో మళ్ళీ  ఫస్టాఫ్ లో ప్రారంభించిన సీబీఐ ఎంక్వైరీ, చంచల ఫ్లాష్ బ్యాకు, భాగమతి హార్రర్ ట్రాకులు మూడూ కంటిన్యూ అవుతూంటాయి.  

          అంటే ఇంటర్వెల్ బ్యాంగ్ ప్లాట్ పాయింట్ వన్ కాదన్న మాట! అక్కడ బిగినింగ్ ముగిసి ఇంటర్వెల్ తర్వాత మిడిల్ విభాగం ప్రారంభం కావడం లేదన్నమాట. ఇంకా బిగినింగే కొనసాగుతోందన్న మాట. అంటే స్ట్రక్చర్ తప్పిందన్న మాట. స్ట్రక్చర్ తప్పి మిడిల్ మటాష్ వైపు ప్రయాణిస్తోందన్న మాట స్క్రీన్ ప్లేకి ఆయువు పట్టులాంటి మిడిల్ లేకుండా!

          ఇంటర్వెల్ లోనే ప్లాట్ పాయింట్ వన్ ఏర్పడి వుంటే, మూడు ట్రాకులూ అక్కడే కలిసిపోయి, భాగమతి ట్రాకు  ఒక్కటే మిడిల్ లో కథలోకి రావాలి. అప్పుడా ట్రాకు చంచ వర్సెస్ సిబీఐ గా వుండాలి.  కానీ సీబీఐ ఎంక్వైరీ, చంచల ఫ్లాష్ బ్యాకు ట్రాకులు రెండూ విడివిడిగానే వచ్చేశాయి. కాబట్టి అది ప్లాట్ వన్నూ కాదు, ఇప్పుడు సెకండాఫ్ లో ఇది మిడిల్లూ కాదు. 

          కథేమిటో తెలియకుండా ఇంకా ఇలా ఫస్టాఫ్ బిగినింగ్ బిజినెస్సే నడుస్తోంది. ఈ బిజినెస్ చంచల హాస్పిటల్ సీనుతో పూర్తయ్యింది. ఇక్కడ మంత్రి రావడంతో ఫస్టాఫ్ నుంచీ ఈ గంటా 50 నిమిషాలూ జరుగుతున్న బిగినింగ్ బిజినెస్ అసలు దేనికో ఇప్పుడుమనకి అర్ధమై, బిగినింగ్ ముగుస్తూ ప్లాట్ పాయింట్ వన్ ఏర్పడింది – ఇక్కడ కథేమిటో అర్ధమై, మంత్రితో చంచల  గోల్ తో మిడిల్ ప్రారంభమయ్యింది!  ఎప్పుడో కనీసం ఇంటర్వెల్ దగ్గర ప్రారంభ మవ్వాల్సిన మిడిల్ మొరాయిస్తూ  మొరాయిస్తూ ఇప్పుడు ప్రారంభమయ్యిందన్నమాట!

          మిడిల్ ఇప్పుడు ప్రారంభమైతే ఇంకేం కథ వుంటుంది, అదెంత సేపు వుంటుంది. మంత్రితో ఫ్లాష్ బ్యాక్ వచ్చి, చంచల చేతిలో శక్తి ఎలా చనిపోయాడో మనకి తెలియ జేశాకే కథ అర్ధమై, చంచల గోల్ తో మిడిల్లో పడింది కథ. ఈ కథ వెంటనే అక్కడే చంచల మంత్రితో తేల్చుకోవడంతో ముగిసిపోయి, ఎండ్ కొచ్చేసింది. 

          ఈ కథతో భాగమతి కథకి ఏ సంబంధమూ లేదనీ, అదంతా మంత్రిని పట్టుకోవడానికి చంచల ఆడిన నాటకమనీ తేలిపోయింది. మిడిల్, ఎండ్ అంతా చంచల సాదా రొటీన్ పొలిటికల్ థ్రిల్లర్ కథే అయింది ఫ్లాట్ గా.

చిత్రాంగద చిత్రమే!

     ప్లాట్ పాయింట్ వన్ కి రావడానికి ఈ అదుపు తప్పి మిడిల్ స్పేస్ ని దురాక్రమించిన  బిగినింగ్ విభాగపు గంటా యాభై  నిమిషాల సుదీర్ఘ  నసపెట్టే బిజినెస్ లో, 4 సార్లు భాగమతి బంగళాలో భయపెడుతూ కాలక్షేపమే  చేశారు. ఫస్టాఫ్ లో చంచలతో మూడు సార్లు, సెకండా

ఫ్ లో సీబీఐ సంపత్ తో ఒకసారి, బంగళాలో అవే భయపెట్టే సీన్లు రిపీట్ చేశారు. ఇవి ఒక్కోటీ సుమారు ఏడు నిమిషాల చొప్పున,  మొత్తం సినిమాలో అరగంట తినేశాయి. ఏమీ లేని దానికి!

          ఇప్పుడు ‘చిత్రాంగద’  కొద్దాం. కథేమిటంటే, సైకాలజీ బోధించే అసిస్టెంట్ ఫ్రొఫెసర్ చిత్ర (అంజలి) కాలేజీ అమ్మాయిలతో బాటు హాస్టల్లో వుంటుంది. ఆ హాస్టల్ లో దెయ్యం తిరుగుతోందనీ, ఆ ఆడ దెయ్యం మగవాడిలా మీద పడి కోరిక తీర్చుకుంటోందనీ అమ్మాయిలు హాస్టల్ ఖాళీ చేసి వెళ్లిపోతూంటారు. ఆ దెయ్యం చిత్రే  అని బయటపడుతుంది. తనెందుకు మగపిశాచిలా ప్రవర్తిస్తోందో తెలుసుకోవాలని  నీలకంఠ (జయప్రకాష్)  అనే సైకియాట్రిస్ట్ ని సంప్రదిస్తుంది. ఆ హిప్నాటిక్ సెషన్ లో  ఒకావిడ ఎవరో ఒక వ్యక్తిని చెరువులో చంపేస్తున్నట్టు కన్పిస్తోందని చెప్తుంది. ఈ హత్య కలలోకి కూడా వస్తోందని చెప్పి, ఆ చెరువు  అమెరికాలో వుందని తెలుసుకుని ఫ్రెండ్ సువర్ణ (స్వాతీ దీక్షిత్) తో అక్కడికి బయల్దేరుతుంది.

          అక్కడ పరిచయమైన పోలీస్ కానిస్టేబుల్ ఇంట్లో వుంటూ చెరువు దగ్గర వుండాల్సిన అరేబియా రెస్టారెంట్  కోసం వెతుకుతూంటుంది. తన ప్రవర్తనకీ, తనకి వస్తున్న కలకీ ఈ ప్రాంతంతో వున్న సంబంధం ఏమిటా అని శోధిస్తున్నప్పుడు, ఆమె నమ్మలేని నిజాలు ఆమె గురించే బయటపడతాయి. ఇలా గతజన్మలో తానెవరో తెలిసినప్పుడు బిగినింగ్ ముగిసి ప్లాట్ పాయింట్ వన్ వస్తుంది. ఇప్పుడు మాత్రమే కథేమిటో మనకి అర్ధమవుతుంది. ఎప్పుడు?  సెకండాఫ్ చాలా గడిచిపోయాక. అప్పటివరకూ బిగినింగ్ బిజినెస్ అంతా ఏమిటి? ఫస్టాఫ్ నుంచీ ఈ సెకండాఫ్ సగం వరకూ చిత్ర  తనకేం జరుగుతోందో తెలుసుకునే ప్రయత్నమే. రిపీటయ్యే పారా నార్మల్ అనుభవాలే – ‘భాగమతి’ లో బిగినింగ్ అంతా పైన చెప్పుకున్న రిపీటయ్యే హార్రర్ అనుభవాల్లాగా. ఇలా సేమ్ టు సేమ్ టెంప్లెట్ అన్నమాట.

మిడిల్ మటాష్ – ఎండ్ సస్పెన్స్

      ‘చిత్రాంగద’ లో  వున్నది ఎండ్ సస్పెన్స్ కథనం. సెకండాఫ్ సగం వరకూ ఏం జరుగుతోందో, కథేమిటో అర్ధంగాని  సస్పన్స్ ని సెకండాఫ్ సగంలో ప్లాట్ పాయింట్ వన్ దగ్గర ఓపెన్ చేసే, అప్పుడు కథ ఇదీ అని తెలియజేశారు. అంతవరకూ కథని మూసి పెట్టారు గనుక – చివర్లో ఓపెన్ చేశారు కనుక,  మిడిల్ మటాష్ అవుతూ ఎండ్ లో ఒపెనయ్యే సస్పెన్స్ అయ్యింది, లేదా ఎండ్ సస్పెన్స్  అయింది. ఇదంతా సహన పరీక్ష కాబట్టి అట్టర్ ఫ్లాపయ్యింది. కిందటి వ్యాసం ‘ఎండ్ సస్పెన్స్ అంటే కథా ప్రారంభం కాదు’ లో దీన్ని వివరించాం. 

          ‘భాగమతి’ లో కూడా ఎండ్ సస్పెన్స్ అవుతూనే మిడిల్ మటాష్ అయింది. ఎండ్ సస్పెన్స్ అని తెలియనివ్వకుండా కవర్ చేస్తూ, మిడిల్ మటాష్ అవకుండా చూడాలంటే, కిందటి వ్యాసంలో చెప్పుకున్నట్టు- ‘ఛేజ్ ఏ క్రూకేడ్ షాడో’ బ్రిటిష్ మూవీ లాండ్ మార్క్ స్కీము ఫాలో అవ్వాల్సిందే. ఇది తప్ప ఇంకో మార్గం లేనేలేదు. 

          వచ్చిన మంత్రితో చంచల ఇదంతా అతడిని రప్పించి చంపడానికే  నటించిన నాటకమని ట్విస్ట్ ఇచ్చాక – ఇక మిడిల్ ప్రారంభం కాకూడదు. ఆ నాటకమే మిడిల్ గా అప్పటికే పూర్తయి వుండాలి. ఇక మినిస్టర్ రాకతో ఉపసంహారమే వుండాలి- ఫినిషింగ్ టచ్ గా, లేదా మాస్టర్ స్ట్రోక్ గా. అప్పుడు మాత్రమే స్ట్రక్చరూ, దాంతో రసపోషణా పుష్కలంగా వున్న క్రియేటివిటీ అన్పించుకుంటుంది. 

          ‘ఛేజ్ ఏ క్రూకేడ్ షాడో’, దీంతో వచ్చిన ఇండియన్ వెర్షన్ లన్నీ బంగళాలో వున్న ఘరానా నేరస్థురాల్ని పట్టుకోవడానికి బృందం ఆ బంగళాలో చేరి సృష్టించే డ్రామాగా వుంటే, ‘భాగమతి’ లో, ఘరానా నేరస్థుణ్ణే  చంచల తనదగ్గరికి  రప్పించుకునే డ్రామా క్రియేట్ చేసింది. ‘ఛేజ్ ఏ క్రూకేడ్ షాడో’ స్కీము కాకతాళీయంగా ఇలా రివర్స్ లో కుదరడం బాగానే వుంది గానీ, అసలా స్కీమే  ఏంటో తెలుసుకుని చేయలేదు. 

          ఇంతకీ ప్రేక్షకుల్ని భయపెట్టింది భాగమతి ఆత్మ కూడా కాదా?  దెయ్యంలా చంచలే భయపెట్టి బురిడీ కొట్టించిందా ప్రేక్షకుల్ని? అవన్నీ ఫాల్స్ హార్రర్ సీన్లేనా? కథకుడి క్రియేటివిటీ ఇంత కలాగాపులగపు  కథ సృష్టిస్తుందా? హార్రర్ అని ఇందుకే అనాలా!

 -―సికిందర్