1203 : బర్త్ డే స్పెషల్

        నేటితో 54 ఏళ్ళు పూర్తి చేసుకున్న పవర్ స్టార్ పవన్ కళ్యాణ్ రెండు పడవల ప్రయాణం సాగిస్తున్నారు. సినిమాలు, రాజకీయాలు. సినిమాల్లో హిట్ ఫ్లాపుల్లాగే రాజకీయాల్లో జయాప జయాలెదుర్కొన్నారు. స్థాపించిన జనసేన పార్టీ గత ఎన్నికల్లో ఎంత ప్రభావం చూపిందో తెలిసిందే. అయినా రాజకీయాల నుంచి తప్పుకోలేదు. సినిమాలు ఫ్లాపయినా సినిమాల నుంచి తప్పుకోలేదు. ఈవీవీ సత్యనారాయణ దర్శకత్వంలో 1996 లో 28 ఏళ్ళ లేత కుర్రాడిగా ‘అక్కడ అమ్మాయి ఇక్కడ అబ్బాయి’ తో ప్రారంభించిన సినిమా జీవితం, నేటికి 26 ఏళ్ళు పూర్తి చేసుకోగా, 2008 లో 40 ఏళ్ళ వయసులో ప్రారంభించిన రాజకీయ జీవితం, 14 ఏళ్ళు పూర్తి చేసుకుంది. ఈ 14 ఏళ్ళుగా ఎవరేమనుకున్నా అక్కడ సినిమాలు - ఇక్కడ రాజకీయాలు అన్నట్టు రెండు పడవల ప్రయాణం కొనసాగిస్తున్నారు.

        ఇంతా చేసి పవన్ కళ్యాణ్ నటించింది 27 సినిమాలే. గోకులంలో సీత, సుస్వాగతం, తొలి ప్రేమ, తమ్ముడు, బద్రి, ఖుషి, జల్సా, గబ్బర్ సింగ్, అత్తారింటికి దారేది, వకీల్ సాబ్, భీమ్లా నాయక్ వాటిలో ప్రధానమైనవి. ఇప్పుడు తాజా అప్డేట్ ఏమిటంటే పవన్ నటించిన ఈ బ్లాక్ బస్టర్స్ ని ఇప్పుడు రీరిలీజ్ చేసినా థియేటర్లు పగిలిపోతాయి. దీనికుదాహరణ సెప్టెంబర్ 2 న పుట్టిన రోజుని పురస్కరించుకుని నిర్మాతలు ఆగస్టు 31 న ‘తమ్ముడు’ ని రీరిలీజ్ చేశారు. ఈ ప్రకటన చేసిన కాస్సేపటికే రెండు తెలుగు రాష్ట్రాల్లో మల్టీప్లెక్సులకి,  సింగిల్ స్క్రీన్ థియేటర్లకి ప్రేక్షకులు తండోపతండాలుగా తరలివచ్చారు. వెంటనే థియేటర్ల ముందు హౌస్ ఫుల్ బోర్డులు దర్శన మిచ్చాయి. థియేటర్లు క్రిక్కిరిసిపోయి, బొమ్మపడేసరికి తెరమీద ఆనాటి యువ పవన్ ని చూసి ఒకటే కేరింతలు, పూనకాలు, డాన్సులు.   

తర్వాత సెప్టెంబర్ 1 న  నిర్మాతలు ‘జల్సా’ ని రీరిలీజ్ చేస్తే, దీన్నీ విరగదీశారు. ‘జల్సా’ ని ఏకంగా ప్రపంచవ్యాప్తంగా 501 షోలు వేశారు. అన్నీ హౌస్ ఫుల్స్. దీనికీ కేరింతలు, పూనకాలు, డాన్సులు. ప్రేక్షకులనుంచి ఇంత స్పందన రావడం చూసి సినిమా, రాజకీయ విశ్లేషకులే తెల్లబోయారు. పవర్ స్టార్ కి దీటుగా ఆడియన్స్ కూడా పవర్ చూపించారు. మరి ఎన్నికల్లో ఈ పవర్ ఏమైపోతుందో తెలీదు. ఓట్లు అనేసరికి ఎక్కడుంటారో జనం తెలీదు. మొన్న ఉత్తర ప్రదేశ్ ఎన్నికల్లో ప్రియాంకా గాంధీ ర్యాలీలకి ఎక్కడికెళ్ళినా వీధులు పట్టనంత జనం బ్రహ్మరథం  పట్టారు. అమ్మలక్కలు హారతులు పట్టారు. తీరా ఎన్నికల్లో వేసింది 2 శాతం ఓట్లే!  

పవన్ నటుడు మాత్రమే కాదు. రైటర్, సింగర్, స్టంట్ కో ఆర్డినేటర్, ప్రొడ్యూసర్ కూడా. వీటన్నిటితో బాటు పొలిటీషియన్ కూడా. 2008 లో అన్నయ్య చిరంజీవి ‘ప్రజారాజ్యం’ పార్టీ స్థాపిస్తే, పవన్ పార్టీ యువ విభాగం ‘యువరాజ్యం’ ఏర్పాటు చేస్తూ రాజకీయ జీవితాన్ని ప్రారంభించారు. ప్రజారాజ్యం పార్టీ సభ్యుడిగా వున్నప్పుడు ఎలాంటి పదవులు చేపట్టలేదు, ఎన్నికల్లో పోటీ చేయనూ లేదు. అయితే 2009 ఎన్నికల్లో ప్రజారాజ్యం ఎన్నికల్లో విఫలమైన దరిమిలా  2011లో చిరంజీవి పార్టీని  కాంగ్రెస్‌లో విలీనం చేశారు. దీంతో పైకి చెప్పుకోలేని అసంతృప్తితో వుండిపోయారు పవన్.

ఇక 2014లో తనే ‘జనసేన పార్టీ’ పేరుతో కొత్త రాజకీయ పార్టీని స్థాపించారు. ఈ సందర్భంగా ఆయన ప్రచురించిన పుస్తకం ఇజమ్  కూడా జనసేన పార్టీ ఐడియాలజీయే. రెండు తెలుగు రాష్ట్రాల్నిప్రభావితం చేస్తున్న సమస్యలపై చర్చించేందుకు ప్రధాని నరేంద్ర మోడీ తో సమావేశమై మద్దతుని  ప్రకటించారు. 2014 లో ఎన్నికల్లో పోటీకి పార్టీని దింపకుండా ఆంధ్రప్రదేశ్, తెలంగాణాల్లో తెలుగుదేశం - బిజెపి కూటమికి  ఉత్సాహంగా ప్రచారం చేశారు. కాంగ్రెస్ హటావో, దేశ్ బచావో నినాదాలిచ్చారు. 2017 లో సినిమా కమిట్మెంట్లు పూర్తి చేసిన తర్వాత పూర్తి స్థాయి రాజకీయ జీవితాన్ని ప్రారంభించాలనేది తన ఉద్దేశమని ప్రకటించారు.

ఆయన రాజకీయ జీవితం సెకండ్ ఇన్నింగ్స్ లో ప్రధానంగా ఉద్దానం కిడ్నీ వ్యాధి ఉదంతాన్ని లేవనెత్తి వార్తల్లో కొచ్చారు. 2019 ఎన్నికలకి సిద్ధమవుతూ ప్రజల్లోకి విస్తృతంగా దూసుకెళ్ళి సమస్యలు విన్నారు, ప్రభుత్వం దృష్టికి తెచ్చారు. ఆందోళనలు చేశారు. ఆంధ్రప్రదేశ్ కి ప్రత్యేక హోదా డిమాండ్ వాటిలో ఒకటి. 2019 ఎన్నికల్లో ఆవిష్కరించిన మ్యానిఫెస్టోలో అన్ని వర్గాల ప్రజల జీవితాల్నీ  మెరుగుపరిచేందుకు అనేక పథకాలు ప్రకటించారు. ఇలా విజయ పంథాలో పార్టీని తీసికెళ్తూ, లభిస్తున్న అశేష ప్రజాదరణతో ఎన్నికల్లో 140 స్థానాల్లో అభ్యర్ధుల్ని పోటీకి దింపితే, తనూ రెండు స్థానాల్లో పోటీ చేస్తే, తనతో బాటూ అందరూ ఓడిపోయారు ఒకే ఒక్క రాజోలు అభ్యర్ధి తప్ప. వై ఎస్ జగన్మోహన్ రెడ్డి పార్టీ వైఎస్ఆర్ కాంగ్రెస్, టీడీపీని కూడా చిత్తుగా ఓడించి అధికారంలో కొచ్చేసింది.

అయినా పార్టీ ఎత్తేసి వెళ్ళిపోలేదు పవన్. అంత ఘోర పరాభవాన్ని చవి చూసినా, ఎవరేమనుకుంటారన్న పట్టింపు కూడా లేకుండా పార్టీని నడుపుతూనే వున్నారు. ప్రజాందోళనలు చేపడుతూనే వున్నారు. ఇంతటి పట్టుదల అటు తమిళనాడులో రాజనీకాంత్ కీ లేదు, కమలహాసన్ కీ లేదు. విజయ్ కాంత్ కి అసలే లేదు. దేశంలో రాజకీయ పార్టీ నడుపుతున్న ఏకైక సినిమా స్టార్ గా పవన్ కళ్యాణే వున్నారు.

పవర్ స్టార్ అని పిలవకండి, పవర్ లేదని చెప్తూ ఇక వచ్చే 2024 ఎన్నికలకీ పొత్తుల్లేకుండా పోటీ చేసేందుకు పార్టీ శ్రేణుల్ని సన్నద్ధం చేస్తున్నారు. ఇప్పుడు పుట్టినరోజు సందర్భంగా తను నటిస్తున్న ‘హరి హర వీరమల్లు’ ఫస్ట్ గ్లింప్స్ ని అభిమానులకి గిఫ్ట్ గా విడుదల చేస్తున్నారు. 17 వ శతాబ్దపు మొఘల్ -కుతుబ్ షాహీల కాలం నాటి బందిపోటు అయిన వీర మల్లు, మొఘలుల నుంచి కోహినూర్ వజ్రాన్ని తస్కరించే కథతో ఇది తెరకెక్కుతోంది. క్రిష్ దీని దర్శకుడు. ఏఎం రత్నం నిర్మాత. నిధీ అగర్వాల్, అర్జున్ రాంపాల్, నర్గీస్ ఫక్రీ ఇతర తారాగణం. ఇది 2023 మార్చిలో విడుదలవుతుంది.

ఇది సరే, పీరియడ్ సినిమాలు రాజకీయాలకి పని చెయ్యవు, ఇప్పటి కళ్ళ ముందున్న పీడనల మాటేమిటి? 2024 ఎన్నికలకి ఆయన సినిమా ఆయుధమేమిటి? ఎన్టీఆర్ లాగా ప్రజా సమస్యలతో ఓ ‘బొబ్బిలి పులి’ లాంటి సంచలన సినిమాని దింపుతారా? 1983 లో ఎన్టీఆర్ అధికారంలోకి రావడానికి గతంలో నటించిన పౌరాణికాలతో బాటు, 1982 లో నటించిన ‘బొబ్బిలిపులి’ కీలక పాత్ర పోషించాయి. దాదాసాహెబ్ ఫాల్కే భారతీయ సినిమాని ప్రారంభించినప్పుడు, ఆయన వాస్తవికతని, మాయాజాలాన్నీ తన భావజాలానికి అనుకూలంగా మార్చుకున్నాడు. వాస్తవికతని  పేదరికంతో, బ్రిటీష్ వలస వాదాన్ని పురాణాలతో భర్తీ చేశాడు. అది దేశానికొక ఎజెండాని నిర్దేశించింది. ఎన్టీఆర్ పౌరాణిక పాత్రల్ని చిత్రీకరించడంలో ఇంకో ముందడుగేశారు. ఒక పౌరాణికం తీయడం వెనుక రాజకీయ ఉద్దేశం వుండేది. ఎన్టీఆర్ రాజకీయాలకి అతీతంగా పౌరాణిక సినిమాల్ని తీసి వుంటే అవి ఫక్తు ఆధ్యాత్మిక సినిమాలుగానే మిగిలిపోయేవి.

పవన్ కళ్యాణ్ నిర్మొహమాటంగా ఓట్ల కోసమే సినిమాలన్నట్టు సినిమాలు తీయకపోతే 2024 కోసం కష్టపడుతున్న ఈ అయిదేళ్ళూ కూడా  వృధా అవుతాయి. మీడియా చేతిలో లేని తనకి సినిమాలే ప్రచారాస్త్రాలు. మూస రాజకీయాల మత్తులో వున్న ఓటర్లని కొత్త రాజకీయ చైతన్యం వైపు నడిపించినప్పుడే పవర్ స్టార్ అని పిలవకండి, పవర్ లేదని మళ్ళీ చెప్పుకునే అగత్యం తప్పుతుంది.

***

 

1202 : రైటర్స్ కార్నర్

ఇది ఇన్పుట్స్ ప్రపంచం.  ఎందుకు ఇన్ పుట్స్ ప్రపంచం? ఇవ్వాళ  ప్రపంచం అందరికీ తెలిసిపోతోంది. ఎలా తెలిసిపోతోంది? అరచేతిలో స్మార్ట్స్ ఫోన్ల ద్వారా కూడా తెలిసిపోతోంది. ఐతే ఏం చేయాలి? సినిమా రచయిత గ్లోబలీకరణ చెందాలి. ఏ సినిమా రచయిత గ్లోబలీకరణ చెందాలి? హాలీవుడ్ నుంచీ టాలీవుడ్ దాకా, ఇంకేమైనా వుంటే మూసీ పక్కన వుండే డెక్కన్ వుడ్ దాకా అందరూ గ్లోబలీకరణ చెందాలి. చెందకపోతే  ఏమవుతుంది? కాలం కంటే,  ప్రేక్షకులకంటే వెనుక బడిపోతాయి స్క్రిప్టులు. తుపాకీ రాముడికైనా ప్రపంచజ్ఞానముంటుంది. వాడి వ్యాఖ్యానాల కంటే అన్యాయంగా కనపడతాయి స్క్రిప్టులు.  అవే మూస కథలు అలాగే రాస్తారు. నాల్గు మూస సినిమాలు చూసి ఒక మూస కథ  అల్లే పాత మేస్త్రీలుగా  మిగిలిపోతారు...

        

మూస ఎందుకు పనికిరాదు? ప్రపంచం మూసుకుని వున్న రోజుల్లో అవతలి విషయాలు తెలిసేవి కావు ప్రేక్షకులకి. అప్పుడా వచ్చే ఫార్ములా కథలు, మూస పాత్రలు, కృత్రిమ చిత్రీకరణలూ వాళ్ళ వినోదానికి సరిపోయేవి. ఇప్పుడు ప్రపంచం తెర్చుకున్నాక ఎన్నో కొత్త కొత్త విషయాలు – వాస్తవంగా ప్రపంచం అబ్బురపరుస్తున్న విధమూ  ఎప్పుటికప్పుడు తెలిసిపోతున్నాయి. వీటి ముందు ప్రపంచంలోకి చూడని ఫార్ములా కథలు, మూస  పాత్రలు, కృత్రిమ చిత్రీకరణలూ వెలవెలబోతున్నాయి. ఇప్పటి సినిమా రచయిత / దర్శకుడు ఇది గ్రహించక, సినిమా అంటే ఇంకా చిరంజీవి, బాలకృష్ణ, నాగార్జున,  వెంకటేష్ సినిమాలే, ఆ కథలే, పాత్రలే అనుకుంటూ వాటి వైపే చూస్తూ, వాటిలోంచే తీస్తూ, తరం మారిన ప్రేక్షకులకి దూరంగా, దయనీయంగా మిగిలిపోతున్నారు. 

       

    సొంత వూహలతో, ఆ వూహల్నికూడా పాత సినిమాలతో ధృవీకరించుకుని, ఇవ్వాళ  తోచిందల్లా స్క్రిప్టులు రాసుకునే కాలం కాదు. బయటి ప్రపంచంలోకి చూస్తేనే గానీ  ఇవ్వాళ్టి ప్రపంచంతో సంబంధం ముండే కాలీన స్క్రిప్టులు రాని అగత్యమేర్పడింది. ఒకప్పుడు హాలీవుడ్ లో క్రిమినల్స్ , గ్యాంగ్ స్టర్స్ సినిమాలు రాయాలంటే అలాటి పాత సినిమాలవైపే చూసి రాసేవారు. ఇక ఇలా పాత సినిమాలని చూసి కాదని, ఇవ్వాళ్టి ప్రపంచపు రియలిస్టిక్ క్రిమినల్, గ్యాంగ్ స్టర్ పాత్రలతో రాయాలని వొత్తిడి వచ్చినప్పుడు, ఆ జానర్ సినిమాల్లో కొత్తదనం ప్రారంభమయింది. 

        

    ఐడియాలు కొత్తగా రావడం లేదని కాదు. వాటికి కొత్త కథనాలే  రావడంలేదు. కొత్త ఐడియాలకే కాదు, ఎలాటి ఐడియాల కైనా కొత్త కథనాలు రావాలంటే ఇప్పుడు ఇన్పుట్స్ చాలా అవసరం. ఇన్పుట్స్ కి ముందుగా చూడాల్సింది ఇవ్వాళ్టి మార్కెట్ యాస్పెక్ట్ నే తప్ప, క్రియేటివ్ యాస్పెక్ట్ ని కాదు. ఫలానా ఈ ఐడియాకి నేటి మార్కెట్ కి తగ్గట్టు ఏఏ అంశాలని దృష్టిలో పెట్టుకోవాలో నిర్ణయించినప్పుడే అలాటి ఇన్పుట్స్ తీసుకోవాలి. సినిమా కథంటే మొదట మార్కెట్టే, ఆ తర్వాతే  క్రియేటివిటీ. 

        

    ఈ ఇన్పుట్స్ తీసుకోవడానికి కమర్షియల్ దృక్పథం వుండాలి. కమర్షియల్ సినిమాలు కాకుండా వాస్తవిక, సమాంతర సినిమాలే రాయాలనుకుంటే కమర్షియల్ ఇన్పుట్స్ తీసుకోకూడదు. ఆ వాస్తవిక దృక్పథంతో అలాటి వార్తల్లోంచో సినిమాల్లోంచో ఇన్పుట్స్  తీసుకోవాలి. ఇవ్వాళ్ళ తెలంగాణాలో  ఔత్సాహిక దర్శకులు విపరీతంగా దూసుకొచ్చేస్తున్నారు.  వీళ్ళు ఒక దగ్గరే ఆగిపోతున్నారు. కానీ అక్కడ ఆగిపోవడానికి తెలంగాణాలో ఇంకా బి.  నరసింగ రావు, గౌతం ఘోష్ సినిమాల కాలం కాదు.  తెలంగాణా ఉద్యమకాలంలోనే ఉద్యమ సినిమా లెవరూ చూడలేదు. తరం మారింది. తెలంగాణాలో కూడా ఈ తరానికి ఎకనమిక్స్, లేదా రోమాంటిక్స్ వుండే ఎంటర్ టైనర్లు కావాలి. 

        

    కానీ తెలంగాణా వైపు నుంచి వచ్చే ఔత్సాహిక దర్శకులు షార్ట్ ఫిలిమ్సో, వరల్డ్ మూవీసో అంటూ మోజు పెంచుకుంటున్నారు. దీనికి కమర్షియల్ సినిమాల ప్రపంచంతో ఏ మాత్రం సంబంధం లేదు. ఈ ఇన్పుట్స్ కమర్షియల్ సినిమాలు తీయడానికి ఏమాత్రం పనికి రావు. టాలీవుడ్ వరల్డ్ మూవీస్ ఉత్పత్తి చెయ్యదు. ప్రధాన స్రవంతి కమర్షియల్ సినిమాలే ఉత్పత్తి చేస్తుంది. తెలంగాణా నుంచి టాప్ డైరెక్టర్లు చాలా మందే వున్నారు. సురేంద్ర రెడ్డి, హరీష్ శంకర్, దశరథ్, వంశీ పైడిపల్లి, సంపత్ నంది, ఎన్. శంకర్, సందీప్ రెడ్డి, సంకల్ప్ రెడ్డి, తరుణ్ భాస్కర్, హను రాఘవపూడి...వీళ్ళంతా వరల్డ్ మూవీస్ చూసి కమర్షియల్ డైరెక్టర్లు కాలేదు. ఇద్దరు ముగ్గురు షార్ట్ ఫిలిమ్స్ తీసి వచ్చారు తప్ప, మిగిలిన వాళ్ళందరూ కమర్షియల్ సినిమాలకి పనిచేసి వచ్చిన వాళ్ళే. తెలంగాణా నుంచి ఇంకో రాబోతున్న వేణు ఊడుగుల కూడా కమర్షియల్ దర్శకుల దగ్గర పనిచేసిన వాడే. ఇప్పుడు తెలంగాణా ఔత్సాహిక దర్శకులకి తాము  కూడా ఇలా  టాప్ దర్శకులవ్వాలనే కలలుంటే,  అవి వరల్డ్ మూవీస్ ఇన్పుట్స్ తో నేరవేరవు. అలాగని తెలంగాణా జీవితపు వాస్తవిక కథా చిత్రాలు తీయాలనుకుంటే వరల్డ్ మూవీస్  అధ్యయనం చేసుకోవచ్చు. కానీ అలాటి తెలంగాణా జీవితపు వాస్తవిక కథా  చిత్రాలకి ఇప్పుడు మార్కెట్ ఎక్కడిది? పైన చెప్పుకున్నట్టు ఎకనమిక్స్ లేదా రోమాంటిక్సే మార్కెట్. ఈ ఔత్సాహిక దర్శకులు టాప్ తెలంగాణా దర్శకుల్లాగా ఎదగాలనుకుంటే అది మంచి ఆలోచనే. అప్పుడేం చేయాలంటే, ఇదే బ్లాగులోనే  కొన్ని వ్యాసాల్లో రాసినట్టు,  వరల్డ్ మూవీస్ కి ధడాలున తలుపులు మూసి పారేసి,  హాలీవుడ్ మూవీస్ మాత్రమే చూసుకోవాలి. ఆ ఇన్పుట్స్  మాత్రమే తీసుకోవాలి. 

        

    ఇక్కడ కూడా తప్పులో కాలేసే వీలుంది. మళ్ళీ హాలీవుడ్ సినిమాలనగానే కొందరు పాత మేధావులకి అదే ‘క్లాసాబ్లాంకా’, అదే ‘రోమన్ హాలిడే’, అదే ‘సౌండ్ ఆఫ్ మ్యూజిక్’ లే తప్ప,  ఇక హాలీవుడ్డే  లేదన్నట్టు వుంటారు. నేటి తెలుగు సినిమాలతో సంబంధం లేని వీళ్ళ రికమెండేషన్ల కి, ఉపన్యాసాలకి దూరంగా వుంటూ, గత ఇరవై ఏళ్లుగా వస్తున్న హాలీవుడ్ సినిమాలని ఇన్పుట్స్ గా తీసుకుంటే ప్రయోజన ముంటుంది.

        

ఎందుకు హాలీవుడ్ ని తీసుకోవాలంటే, అవి కమర్షియల్ సినిమాల త్రీయాక్ట్  స్ట్రక్చర్ లో వుంటాయి. వరల్డ్ మూవీస్ కి,  ఆ మాటకొస్తే ఒకప్పుడు వచ్చిన భారతీయ కళాత్మక సినిమాలకీ స్ట్రక్చర్ అనేది వుండదు. స్ట్రక్చర్ అంటే స్క్రీన్ ప్లేలో బిగినింగ్ - మిడిల్ - ఎండ్ లు. స్ట్రక్చర్  లేకపోవడమంటే మిడిల్ లేకపోవడం. అంతే గాక ప్రధాన పాత్రలు యాక్టివ్ పాత్రలుగా వుండవు, పాసివ్ గా వుంటాయి. ఇంకా చెప్పుకుంటే,  ప్రధాన పాత్ర కథ నడపదు, కథే ప్రధాన పాత్రని నడుపుతుంది. ఇన్ని వరల్డ్ సినిమాలు చూస్తున్న వాళ్ళు ఈ పాటికి ఈ సాంకేతిక తేడాలు గమనించే వుండాలి. మిడిల్ మిస్సయిన సినిమా కమర్షియల్ గా ఆడదు. వరల్డ్ మూవీస్ కీ, కమర్షియల్ సినిమాలకీ సాంకేతికంగా ఈ తేడా తెలిసిన తెలుగు ఔత్సాహిక దర్శకుడు / రచయిత ఛస్తే వరల్డ్ మూవీస్ చూడడు. ఈ వ్యాసకర్త కూడా వాటి జోలికి పోవడం లేదు.

        తెలంగాణా ఔత్సాహిక దర్శకుల ఇన్పుట్స్ విశేషాలు చెప్పుకున్నాక, అసలు ఇన్పుట్స్  అంటే ఏమిటి? సినిమాలేనా? ఇంకా ఏమైనా వున్నాయా? ఇది ఈ కింద చూద్దాం...

        ఇన్పుట్స్ పట్ల ఆసక్తి లేకపోతే ఏం జరగవచ్చో చూద్దాం... ఒక ఐడియా తడుతుంది. ఆ ఐడియాలో ఒక హీరో వుంటాడు. అతను చేసిన ఒక పని వల్ల ఇంకెక్కడో  వున్న తనకు తెలీని హీరోయిన్ జీవితం దెబ్బతింటుంది. ఇది హీరో తెలుసుకుని ఎలా చక్కదిద్దాడు..? అన్నప్రశ్న దగ్గర ఆగిపోయింది ఐడియా. దీన్నేం చేయాలా అని నల్గుర్నీ అడగడం ప్రారంభిస్తాడు సదరు కథకుడు. ఆ నల్గురూ తనలాంటి వాళ్ళే. వాళ్ళ దగ్గరా సమాధానం వుండదు. బాగా చర్చించుకుంటారు. అసలు హీరో చేసిన అంత దారుణమైన పనేమిటనేది కథకుడికి కూడా తెలీదు. హీరోయిన్ జీవితం దెబ్బతిందంటే ఏం జరిగిందో కూడా తెలీదు. ఇదే కాస్త చెప్పి పుణ్యం కట్టుకోమంటాడు. అది తెలిస్తే హీరోయిన్ జీవితాన్ని చక్కదిద్దే మార్గం తెలుస్తుంది. ఇలాకాదని ఇలాటి కథలతో ఏమేం సినిమాలు చూశామా అని వాళ్ళందరూ ఆలోచనలో పడతారు. ఫలానా ఫలానా  సినిమాలు చూడమంటూ కథకుడికి సలహా ఇస్తారు. కథకుడు ఎన్నో సినిమాలు చూస్తాడు. ఎక్కడా తను అనుకుంటున్న ఐడియా కనెక్ట్ అవదు. అంటే తన కొచ్చిన ఐడియాతో సినిమాలే రాలేదంటే తన ఐడియా ఎంత గొప్పదోనని ఆత్మవిశ్వాసం పెరిగిపోతుంది. ఎక్కడో వున్న హీరో ఇంకెక్కడో వున్న హీరోయిన్ జీవితాన్ని తెలియకుండా పాడుచేశాడు... ఎంత మంచి బంపర్ ఐడియా! కానీ మళ్ళీ అదే చిక్కు ప్రశ్న... ఎలా పాడు చేశాడు హీరోయిన్ జీవితాన్నీ? 

           

సర్లేరా, అసలా హీరో  ఏం చేస్తూంటాడో చెప్పిచావు – అంటారు స్నేహితులు. ఇది కూడా ఇప్పుడాలోచించి చావాలంటాడు కథకుడు. అన్నీ మేమే ఆలోచించి చావాలంటే ఎలారా అని చచ్చిపోతూంటారు స్నేహితులు. భీకరంగా మేధోమధనం జరుగుతుంది. మధ్య మధ్యలో గర్ల్ ఫ్రెండ్స్ తోకూడా అంతర్మధనం జరుగుతూంటుంది. ఏరా, మా జీవితాల్నేపాడు చేసే ఐడియాలు కావాల్రా మీకూ - అని గొడవలు కూడా జరుగుతూంటాయి వాళ్ళతో. 

        

    ఇదే గనుక ఇన్పుట్స్ వుంటే ఎలా వుంటుంది? ఎక్కడో వున్న హీరో వల్ల ఇంకెక్కడో వున్న హీరోయిన్ జీవితం పాడయ్యిందా? హీరో ఏం చేసివుంటాడు? అప్పుడు ఒకానొక దేశంలో ఒక వెడ్డింగ్ యాప్ వల్ల కొందరి పెళ్ళిళ్ళు పెటాకులైన వార్తా విశేషాలు గుర్తుకొస్తాయి. దాన్ని తనకొచ్చిన ఐడియాకి వాడుకుంటాడు  కథకుడు. అంటే హీరో అలాటి యాప్ ని డెవలప్ చేశాడు. దాన్ని హీరోయిన్ వాడుకుని పెళ్లి చేసుకోబోయి ఘోరంగా పరువు పోగొట్టుకుంది.  కానీ ఆ యాప్ అసలు  హీరో విడుదల చేయలేదు. అదింకా ప్రయోగ  దశలోనే వుంది. హీరో ఫ్రెండ్ వుంటాడు. అతడికి హీరోయిన్ తో చెడింది. కనుక ఆమె పెళ్లి చెడగొట్టాలని ఫ్రెండ్ దగ్గర ప్రయోగ దశలో వున్న యాప్ కొట్టేసి ఆమెకి పంపాడు... ఇలా కథని విస్తరించుకుంటూ పోగలడు కథకుడు తనదగ్గర ఇన్పుట్స్ వుంటే.  

    ఏ రంగంలో వున్నా కథకుడన్నాక అతడిలో జర్నలిస్టు అంశ, జిజ్ఞాస తప్పకుండా  వుంటాయి. తనలో జర్నలిస్టు పనిచెయ్యని కథకుడు కథకుడు కాదు. జర్నలిస్టులు వేరు, మనం వేరనీ, మనకి వివిధ ప్రపంచ విషయాలతో సంబంధం లేదనీ, మన కథకి మనం డ్రామా వరకూ ఆలోచించుకుంటే సరిపోతుందనుకుంటే ఆ కథకుడు డొల్లగా తయారవుతాడు. లోపలేమీ లేదు, కాబట్టి బయటికేమీ తీయలేడు. డ్రామా అంటే ఏమిటి? అది జడప్రాయం కాదు. టెంప్లెట్ కాదు. అది కూడా ఎప్పటికప్పుడు మారుతున్న ప్రపంచ విషయాలని తనలోకి తీసుకుంటుంది. తనని తాను సంస్కరించుకుంటుంది. తమకి ఉద్యోగాలివ్వలేదని నిరుద్యోగులు కాపేసి నాయకుణ్ణి చంపాలనుకోవడం మూస డ్రామా, లేదా టెంప్లెట్. నాయకుడే అనూహ్యంగా ఆ కాపేసిన నిరుద్యోగుల మీద కాల్పులు జరిపి చంపడం సీన్ రివర్సల్, చలనంలో వున్న యాక్షన్ – డ్రామా. యాక్షన్ కూడా టెంప్లెట్ లో బందీ అవదు. అది జడప్రాయం కాదు. ఫారిన్లో హీరో బర్త్ డే జరుపుకోవడం, వూళ్ళో తాత భోజనాలు పెట్టడం మూస. అన్ని వయసుల వాళ్ళూ సినిమాలు చూస్తున్న కాలంనాటి ఫార్ములా. కొన్ని వయసుల వాళ్ళే సినిమాలు చూస్తున్ననేటి డైనమిక్స్ కాదు. 

దర్శకుడు 90 - కథకుడు10

        కాలీన స్పృహ వుండని కథకుల గురించి ఒక కొటేషన్ వుంది : వీళ్ళు తమ పధ్నాల్గవ యేట తెలిసిన జ్ఞానంతో అక్కడే  వుండిపోతారని. తెలుగులో వచ్చే ప్రేమ సినిమాలు చూస్తే  ఈ అపరిపక్వతే  కన్పిస్తుంది. ప్రపంచ విషయాల పట్ల,ఇన్పుట్స్ పట్లా ఆసక్తి లేకపోవడం. ఇలాటి కథకులకి సినిమా కథ రాయాలన్న ఆసక్తి ఎప్పుడు పుడుతుందంటే, సినిమాల మీద మోజు పెంచుకున్న తర్వాతే. చిరంజీవి, బాలకృష్ణ, నాగార్జున, వెంకటేష్, విజయశాంతిలు  నటించిన ఎన్నో సినిమాలు చూసేశాం కదా, ఇక మనకి కూడా సినిమాలు తీయాలన్న కోరిక పుట్టేసింది, ఇక మనమే కథకులై పోవచ్చని వచ్చేస్తూంటారు. 

        

     కానీ ఏ మనిషిలోనూ ఎకాఎకీన కథకుడు పుట్టడు. ఎప్పటి నుంచో ఒక జర్నలిస్టు అంశ తనలో వుండే వుంటుంది. జర్నలిస్టు అంశే ప్రాచీన కాలంలో రాయించడం మొదలెట్టించింది. మొట్ట మొదట చరిత్రలు రాయించింది. అంటే శోధనతో రచన చేయడం మొదలైంది. శోధన అంటే జర్నలిజమే. ఆ రాసిన చరిత్రల్ని శోధించి  నాటకాలు రాశారు. నాటకాల నుంచి కావ్యాలూ, ఇతర సాహిత్య  ప్రక్రియలూ వెలువరించడం మొదలెట్టారు. ఇలా ఒకదాన్ని శోధిస్తూ  ఇంకొకటి కళా ప్రక్రియలు అవతరించాయి. నాటక కళని శోధించే సినిమాకళ వచ్చింది. 

        

    కనుక  దేన్నీ ఊహల్లోంచి సృష్టించ లేరు. ఇది బాగా గుర్తుపెట్టుకోవాలి. ఊహించి ఏదీ సృష్టించడం సాధ్యం కాదు. శాస్త్రాలన్నీ పదార్థ ఫలితాలే. పదార్థముంటేనే శాస్త్రం. ప్రాచీనకాలంలో రాజులనే పదార్ధముంది కాబట్టే వాళ్ళని గమనించి చరిత్రలు. చరిత్రలనే పదార్థముంది కాబట్టే అవి చూసి నాటకాలు. నాటకాలనే పదార్ధముంది కాబట్టే ఇవి చూసి ఇతర కావ్యాలూ కథలూ కాకరకాయలూ, అన్ని కళలూ! నాట్యాలనే పదార్థాలున్నాయి కాబట్టే వాటిని చూసి భరతముని నాట్య శాస్త్రమూ.  సినిమాలనే పదార్థాలున్నాయి కాబట్టే వాటిని చూసి స్క్రీన్ ప్లే శాస్త్రమూ.  విశ్వముంది కాబట్టే దాన్ని చూసి ఖగోళ శాస్త్రమూ. యాపిల్ కింద పడింది కాబట్టే దాన్ని చూసి గురుత్వాకర్షణ సిద్ధాంతమూ. పదార్థాలే ముందు, శాస్త్రాలు తర్వాత. వీటన్నిటి చోదక శక్తి మళ్ళీ శోధించే జర్నలిస్టు అంశే. 

        

    కాబట్టి సినిమాల మీద ఓ పొద్దుటే కోడెగిత్తలా పుట్టిన మోజుతో కథకులై  పోవడానికి సినిమాలనే పదార్థముంది ఓకే, మరి జర్నలిస్టు అంశ ఏదీ? పదార్థాన్ని (సినిమాల్ని) చూసి మోజైతే బాగానే రేగింది, మరి ఇప్పటికప్పుడు జీవితాల్నీ ప్రపంచాన్నీ శోధించాలంటే జర్నలిస్టు అంశ ఎలా పొడుచుకు వస్తుందీ? ఇంకా సినిమాల్ని ఏమని శోధిస్తావ్? ఆల్రెడీ నాటకాల్ని శోధించి బిగినింగ్ - మిడిల్ - ఎండ్ లతో ఓ సినిమా కళని స్థాపించారు. ఇంకా నువ్వేం స్థాపిస్తావ్? ఆల్రెడీ తెలుగు సినిమాల యాక్షన్ కి ఒక టెంప్లెట్, లవ్ కి ఇంకో టెంప్లెట్ వున్నాయి. వాటిలో నువ్వేం విషయం వేస్తావ్? వేసిన విషయమే వేస్తూ పోతావా? ఇందుకా మళ్ళీ  నువ్వు పుట్టి పెరిగిందీ?

        

   టాప్ దర్శకులు కూడా కొద్ది కాలంలోనే హతాశులవడానికి కారణం జర్నలిస్టు అంశ లోపించడమే. ఒక ఫ్యాక్షన్ టెంప్లెట్ పట్టుకునో, ఒక యాక్షన్ కామెడీ టెంప్లెట్ పట్టుకునో నాల్గు సినిమాలు తీసేసరికి వాళ్ళ పనై పోయింది. కానీ హిచ్ కాక్ చెప్పినట్టు,  సినిమా అంటే 90 శాతం రాత, 10 శాతమే తీత. ఇదిప్పుడు తారుమారైంది. 90 శాతం తీత, 10 శాతం రాతగా మారిపోయింది తలరాత. కాబట్టి ఓ పొద్దుటే సినిమాలు తీసేద్దామని వచ్చే నేటి దర్శకులు కమ్ రచయితల్లో  90 శాతం దర్శకుడవ్వాలనే కోరికే తప్ప, ముందు కథకుడయ్యేందుకు జర్నలిస్టు అంశ అసలే వుండదు, ఆసక్తి కూడా 10 శాతం మాత్రమే. కనుకే 90 శాతం ఫ్లాపులు.

        

    ఒక సీనియర్ దర్శకుడు పదిహేనేళ్ళ క్రితమెప్పుడో ఈ వ్యాసకర్తతో చెప్పారు :  చదవాలండీ, చదువుతూనే వుండాలి. ఏదని కాదు, వీలైనన్నివిషయాల మీద చదువుతూనే వుండాలి. దర్శకత్వమనేది శారీరకమే, మనం మానసికంగా స్ట్రాంగ్ గా వుండాలంటే చదవాలి... అని. 

        

    ఈ చదువు కొరవడితే ఇన్పుట్స్ వుండవు. ఇన్పుట్స్ లేకపోతే  అవుట్ పుట్ వుండదు. ఇప్పుడున్న  ట్రెండ్ ప్రకారం తెలుగులో దర్శకుడే కథకుడు, కథకుడే దర్శకుడనే ఫ్రెంచి ఓటర్ (auteur) విధానం అమల్లో వుంది. ఇది వరల్డ్ మూవీస్ కి యూరప్ దేశాల్లో పుట్టిన విధానం. హాలీవుడ్ లో 1920 ల నుంచే స్క్రీన్ రైటర్స్ అని విడిగా వుంటూ వస్తు న్నారు. వాళ్ళందించే కథలతోనే, స్క్రిప్టులతోనే దర్శకులు సినిమాలు తీస్తూంటారు. అరుదుగా క్వెంటిన్ టరాంటినో, కోయెన్ బ్రదర్స్, రియాన్ జాన్సన్ లాంటి తామే రాసుకుని తామే తీసే ‘ఓటర్స్’ వుంటారు. వీళ్ళు కూడా మామూలుగా వుండరు. వీళ్ళల్లో 90 శాతం కథకుడుంటే, 10 శాతమే దర్శకుడుంటాడు. అందుకే పల్ప్ ఫిక్షన్, బ్లడ్ సింపుల్, బ్రిక్ లాంటి వీళ్ళు తీసిన కమర్షియల్ అద్భుతాలొచ్చాయి, యూనివర్సిటీల్లో బోధనాంశాలయ్యాయి. పల్ప్ ఫిక్షన్ తో టరాంటినో ఆధునిక గ్యాంగ్ స్టర్ కథ స్క్రీన్ ప్లే స్ట్రక్చర్ లో అపూర్వ క్రియేటివిటీ ప్రదర్శించాడు. కోయెన్ బ్రదర్స్ 25 – 27 మధ్య వయస్కులుగా వుండగానే తొలి సినిమా బ్లడ్ సింపుల్ తో ఆశ్చర్యపర్చారు. ఫ్రెంచి జానరైన ఫిలిం నోయర్ ని 1930 లనుంచీ హాలీవుడ్ తన వ్యాపార తరహాకి అనుకూలంగా మార్చుకుని, హాలీ వుడ్ లో దాన్ని కూడా ఒక జానర్ గా కలుపుకున్నాక,  కాలానుగుణంగా కలర్ సినిమాలతో నియో నోయర్ గా మార్చుకుని,  ఇప్పటికీ తీస్తూనే వుంది. ఫ్రెంచి నుంచి తెచ్చుకున్న ఫిలిం నోయర్ కథలకోసం అమెరికాలోనే  డెషెల్ హెమెట్ రాసిన హార్డ్ కోర్ డిటెక్టివ్ నవలల్నే తీసుకున్నారు. తెలుగులో జానపద సినిమాలు ఎలా వచ్చేవో అంత విరివిగా  హాలీవుడ్  నోయర్ సినిమాలు వచ్చాయి, వస్తూనే వున్నాయి. 1980 లలో కోయెన్ బ్రదర్స్ వచ్చేటప్పటికి, వాళ్ళు వచ్చిన నోయర్ సినిమాలనే చూసి బ్లడ్ సింపుల్ తీయలేదు. వాళ్ళల్లో జర్నలిస్టు అంశ మేల్కొంది. అసలు డెషెల్ హెమెట్ ఏం ప్రతిపాదించాడబ్బా  అని హెమెట్ నవలలు చదవడం ప్రారంభించారు. అప్పుడు మాత్రమే ఆ జానర్ కి దగ్గరగా వెళ్లి అనుభవించగల్గి,  బ్లడ్ సింపుల్ తీసి రికార్డు సాధించారు.

        

    2005 లో రియాన్ జాన్సన్ బ్రిక్ తీసినప్పుడు కూడా హెమెట్ సాహిత్యాన్ని అధ్యయ నం చేశాడు. అతడికి ఫిలిం నోయర్, నియో నోయర్ లాగా అడల్ట్ కథతో, పెద్ద నటులతో తీసే ఉద్దేశం లేదు. అడల్ట్ ప్రపంచంగా వుంటూ వస్తున్న నోయర్ జానర్ని,  కాలేజీ టీనేజీ నోయర్ గా మార్చేసి సంచలనం సృష్టించాడు. ‘ఓటర్’ బాధ్యతల్ని నిర్వహించుకోవడం ఇలా వుంటుంది అధ్యయనాలతో కలుపుకుని.     

    

100 శాతం ఓటర్సేనా?

        అయితే తెలుగులో ఈ తరం దర్శక రచయితల్ని పూర్తిగా ఓటర్స్ అనలేం. యూరోపియన్ సినిమా ఫీల్డులో ఓటర్ అంటే రచన నుంచీ పోస్ట్ ప్రొడక్షన్ దాకా అన్నిశాఖలూ తనవే అన్నట్టు  ముద్రవేసుకునే దర్శకులని ఓటర్స్ అంటారు. సినిమాలో ఏ శాఖ పనితనం చూసినా ఆ దర్శకుడి ప్రత్యేక శైలియే కన్పిస్తుంది. యూరప్ లో జీన్ లక్ గోడార్డ్, ఇంగ్మార్ బెర్గ్ మన్, ఫ్రాంకోయిస్ ట్రూఫాట్ లాంటి గొప్ప దర్శకులు నిజమైన ఓటర్స్ అన్పించుకున్నారు. తెలుగులో చూస్తే, వంశీ సినిమాల అణువణువులో అన్నీ శాఖల్లో ఆయన శైలియే కొట్టొచ్చినట్టు కన్పిస్తుంది. నటీనటుల నటనల దగ్గర్నుంచీ భావోద్వేగాలు, సంభాషణలు, ఛాయాగ్రహణం, సంగీతం, కళా దర్శకత్వం, పోరాటాలూ సమస్తం ఆయన శైలిలోకి మారిపోయి కన్పిస్తాయి. క్వెంటిన్ టరాంటినో, కోయెన్ బ్రదర్స్, రియాన్ జాన్సన్ లు ఓటర్స్ గా ఇదే సాధించారు. ఇది సాధించాలంటే ముందు జర్నలిస్టు అంశతో, శోధనతో పూర్తి 90 శాతం కథకులవగల్గాలి. అవుతారా? అవడానికి మనస్కరించదు. 

        

    యూరప్ యూనియన్ చిన్న చిన్న దేశాల్లో అక్కడి కొద్దికొద్ది జనాభాకి,  చిన్న చిన్న బడ్జెట్లతో ‘ఓటర్స్’  తీసే పర్సనల్ సినిమాలు నప్పుతాయి. ‘ఓటర్స్’ తీసే సినిమాలు ఎంత వరల్డ్ మూవీస్ అని ఇప్పుడు ఫ్యాషన్ గా చెప్పుకుంటున్నా అవి ఆర్ట్ సినిమాలే. జర్మన్ ఎక్స్ ప్రెషనిస్టు కళ వాటికి  మూలం. ఈ సినిమాలు అక్కడి జీవితాల గురించి వుంటాయి, వినోదం గురించి వుండవు. కాబట్టి వాటి నేటివ్ జీవితాలతో అవి మిగతా ప్రపంచంలో ఆడవు. భారత దేశంలో కూడా,  కాశ్మీరు నుంచీ కన్యాకుమారీ దాకా కాదుకదా,  అబిడ్స్ నుంచి  అమీర్ పేట వరకూ కూడా ఎక్కడా ఆడినట్టు మనం చూడలేదు.  హాలీవుడ్ సినిమాలే మన గల్లీల్లో కూడా ఆడతాయి. 

        

    ఈ సినిమాల్లో కథనం హాలీవుడ్ లాగా సంఘటనలతో సాగదు, డైలాగులతో నిదానంగా సాగుతుంది. హాలీవుడ్ లాగా యాక్టివ్ పాత్రలు ఎప్పుడో గానీ వుండవు. భావాలు హాలీవుడ్ లాగా డైలాగులతో పలకరు, ముఖభావాల మీద ఫోకస్ చేసి పలకని మాటలు అర్ధం జేసుకోమంటారు. హలీవుడ్ లాగా కథకి స్ట్రక్చర్ వుండదు. పర్సనల్ సినిమాలు కాబట్టి. ‘ఓటర్’ గారి ఫీలింగ్సే సినిమాలుగా వుంటాయి. ఈ వరల్డ్ మూవీస్ పైన స్క్రీన్ ప్లే పుస్తకాలుండవు. స్ట్రక్చర్ అనేది వుంటే కదా? స్క్రీన్ ప్లే పుస్తకాలన్నీ హాలీవుడ్ సినిమాల గురించే వుంటాయి. 

        

    మరి ఇంతా చేసి యూరప్ అంతటా అక్కడి  వరల్డ్ మూవీస్ ఆడేదెంతా అంటే,  అక్కడ 80 శాతం మార్కెట్ ని హాలీవుడ్ సినిమాలే రాజ్యమేలుతున్నాయి. అందుకని హాలీవుడ్ సినిమాలు విశాల ప్రాతిపదికన ప్రపంచవ్యాప్తంగా ఆడాలి కాబట్టి,  అక్కడి స్టూడియోలు నిర్మాణ బాధ్యతల్ని ఒక్క ‘ఓటర్’ చేతిలో  పెట్టేయవు. ఒక దర్శకుడు, కథ ఇచ్చిన స్క్రీన్ ప్లే రచయిత, మరికొందరు  డెవలప్ మెంట్  రచయితలూ, స్టూడియో ఎగ్జిక్యూటివ్ లూ, మార్కెట్ నిపుణులూ మొత్తం కలిసి మహా ‘హుండీ’ యాగం నిర్వహిస్తారు. హుండీ ముఖ్యం. ఏ వొక  ‘ఓటర్’ కపాల మోక్షమో కాదు.

        

    అదృష్టవశాత్తూ తెలుగు సినిమాలు  ఒక చిన్న తెలంగాణా ప్రాంతం, ఇంకో ఒక చిన్న కోస్తాంధ్ర ప్రాంతం, మరింకో  చిన్న రాయల సీమ ప్రాంతమని విడివిడిగా,  చిన్న చిన్న ఏరియాలుగా విడిపోయి లేవు. అలా వుంటే యూరప్ లో చిన్న చిన్న ఇటలీ, జర్మనీ, ఫ్రాన్స్ దేశాల నేటివ్ జీవితాల వరల్డ్ మూవీస్ లాగే  ‘ఓటర్’  సినిమాలే వర్కౌట్ అవచ్చు. అలాలేదు. సినిమాల విషయంలో తెలుగు ప్రజలందరిదీ ఒకే అభిరుచి. అది కమర్షియల్ అభిరుచి. మరి హాలీవుడ్ అంత కాకపోయినా, హాలీవుడ్ లాగే వ్యాపారాత్మకంగా అన్ని ప్రాంతాల తొమ్మిది పది కోట్లమంది  తెలుగు ప్రేక్షకులకి కమర్షియల్ సినిమాలు అందించాలంటే, ఇప్పుడు కొనసాగుతున్న ‘ఓటర్’ సాంప్రదాయంలో, ఆ దర్శకుడు ఏ స్థాయి సినిమా కథకుడై  వుండాలి?

ఇన్పుట్స్  ఎక్కడ? 

        కేవలం సినిమాలు చూస్తూ సినిమా కథకులు కాలేరు. అందునా వరల్డ్ మూవీస్ చూసి కమర్షియల్ కథకులు కాలేరు. నాటకాలు చూసినా ఆ చూసే ప్రత్యక్ష డ్రామా వల్ల కమర్షియల్ రచన రాణించే అవకాశముంది. కమర్షియల్ సినిమాలు తీయాలనుకుంటే పక్కా కమర్షియల్ సినిమాలే చూడాలి. కళాత్మక సినిమాలకంటే, వరల్డ్ మూవీస్ కంటే కమర్షియల్ సినిమాలు తీయడమే కష్టం. కమర్షియల్ సినిమాలతో పండిత పామరులందనీ వినోదపర్చాల్సి వుంటుంది. కమర్షియల్ సినిమాలు చూస్తే డేటా బ్యాంక్ కి ఉపయోగపడాలి. కొన్ని స్క్రీన్ ప్లే పుస్తకాలూ, కొన్ని డౌన్ లోడ్ చేసుకున్న సినిమాలూ ఇవి మాత్రమే లైబ్రరీ అన్పించుకోవు. బ్యాకప్ గా డేటా బ్యాంక్ వుండాలి. డేటా బ్యాంక్ వుండాలంటే చదవడానికి కొంత టైము కేటాయించుకోవాలి. ఇక్కడే వస్తోంది సమస్య. అసలేమీ చదవరని ఒక సీనియర్ రచయిత విసుక్కున్నారు. అసలు ఇంగ్లీషు పరిజ్ఞానమే వుండదని ఒక సినిమా విమర్శకుడు విమర్శించారు. ఈ రెండూ సీరియస్ సమస్యలే ఇన్పుట్స్ కి. ఈ వ్యాసకర్త ఒక డిస్కషన్లో ఓ దర్శకుడుకి చెప్పిన కామెడీ సీక్వెన్సుని,  అక్కడున్న ఇంకో కథకుడు వేరేచోట తీసికెళ్ళి అమ్మేశాడు. ఆ  పెద్ద సినిమాలో ఆ సీక్వెన్స్ హిట్టయ్యింది. వేరే ఆఫీసులో ఈ వ్యాసకర్తే  రాస్తున్న సీన్లని అక్కడున్న కథకుడు కాపీ చేసుకుని పై అంతస్తులోనే వున్న వేరే ఆఫీసులో ప్రతిరోజూ చేరవేస్తూంటే ఒకరోజు పట్టుకున్నారు. ఇన్పుట్స్ లేకపోవడం వల్లే ఇలాటివి చేసే ఖర్మ పడుతుంది. వీళ్ళని చూస్తే నవ్వొస్తుంది – అడిగితే మనమే కావాల్సినన్ని ఇన్పుట్స్ ఇస్తాంగా? పని చేస్తున్న సినిమాలకే  ద్రోహం చేయడమెందుకు?  ఒకసారి ద్రోహి ఇంకెప్పటికీ అచ్చోసిన ద్రోహియే. 

         

    ఇప్పటికిప్పుడు కథకుల్లో జర్నలిస్టు అంశ పుట్టుకు రావాలంటే రాదు. అది దాదాపు పుట్టుకతోనే వుంటుంది. కాకపోతే కనీసం ఇప్పుడు ఆపద్ధర్మంగా జిజ్ఞాస అయినా పెంచుకుంటే కొంతలో కొంత బెటర్. శోధన అనేది నిత్య కార్యక్రమం అవ్వాలి. నీరవ్ మోడీ పారిపోయిన రోజు చానెల్లో ఒక క్యాబ్ వాలా బాధ వెళ్ళబోసుకున్నాడు. తన క్యాబ్ ఈఎంఐకి ఒక్క రూపాయి తక్కువ కట్టినందుకు  సీజ్ చేస్తామని బ్యాంకు వాళ్ళు నోటీసులిచ్చారని లబలబ లాడేడు. దీనికి నవ్వూ రావొచ్చు, కోపంతో తిట్టుకోనూ వచ్చు. ఇది సాధారణ ఓటర్లు చేసే పని. కానీ సినిమాలు తీసే ‘ఓటర్’ ఏం చేయాలి? ఓట్లేసే ఓటర్లలాగా తనుకూడా నవ్వుకునో తిట్టుకునో వదిలెయ్యాలా? అలా చేస్తే అతడికి సినిమాల గురించి మాట్లాడే అర్హత వుండదు.  వెంటనే నోట్ చేసుకుని డేటా బ్యాంకులో పెట్టుకోవాలి. తను స్వార్ధంతో వుండాలి. చూసే, వినే, చదివే ప్రతీదీ, రాసే – తీసే సినిమాల దృష్టితోనే వుండాలి. ఇది మనకి పనికొస్తుందా అని పరిశీలించి,  పనికొస్తుందనిపిస్తే డేటా బ్యాంకుకి పంపాలి. న్యూస్ పేపర్ విధిగా చదవాల్సి వుంటుంది. ఏదో పైపైన చదివేస్తే కాదు. అండర్ లైన్లు చేసే దృష్టితో పెన్ను పట్టుకుని చదవాలి. లైట్ రీడింగ్ మెటీరియల్ లాగా కొన్ని వార్తలు మాత్రమే చదివితే కాదు. ఎడిట్ పేజీ వ్యాసాలూ కూడా చదివితే వివిధ అంశాలపైన అభిప్రాయాలు తెలుస్తాయి. అలాగే పత్రికల్లో కథలూ ఇతర ఆర్టికల్సూ తప్పవు. ఇవన్నీ డేటా బ్యాంకు అవుతాయి. డేటా బ్యాంకు వున్న కథకుడు మంచి ఆస్తిపరుడు. 

        

    ఇదంతా ఒకెత్తు అయితే డిజిటల్ ప్లాట్ ఫాం ఒకెత్తు. ఇవ్వాళ వచ్చిన ఒక కథ ఐడియాకి సంబంధించి ఏది తెలుసుకోవాలన్నా ఇంటర్నెట్ ని మించిన వనరు లేదు. ప్రపంచ వ్యాప్తంగా ఎందరో జర్నలిస్టులు, రచయితలూ అహర్నిశలూ పనిచేస్తూ వెబ్ సైట్స్ ద్వారా అందిస్తున్న సమాచారం మనకి ఉత్తపుణ్యాన లభిస్తోంది. లేని అంశమంటూ లేదు. రోమాన్స్ ఎలాటి పోకడలు పోతోందో, బ్రేకప్స్ ఎన్ని విధాలుగా జరుగుతున్నాయో ప్రతీదీ అప్డేట్ అవుతూ వుంటాయి. లవర్స్ ఇంకెలాటి కొత్తకొత్త సమస్యలెదుర్కొంటున్నారో, వాటికి పూజాబేడీ లాంటి వాళ్ళు చెప్పే పరిష్కారాలేమిటో చదువుకుంటే,  మూస ప్రేమ డ్రామాలకి ఎలా తెరదించవచ్చో తెలుస్తుంది. 

        

    డేటాబ్యాంక్ సృష్టించుకోవడానికి యాప్స్ వున్నాయి. క్లిపిక్స్, పాకెట్ మొదలైనవి. వివిధ వెబ్ సైట్లలో కావాల్సిన ఆర్టికల్స్ ని అప్పటికప్పుడు క్లిప్ చేసి ఈ యాప్ లో సేవ్ చేసుకుంటే అరచేతిలో ఇన్పుట్స్ వున్నట్టే. టాపిక్స్ వారీగా వీటి బాక్సుల్లో సేవ్ చేసుకోవచ్చు. ఇవేకాక లోర్ ఫోర్జ్ అనే రైటర్ రిసోర్సెస్ యాప్ వుంది. ఇందులో చాలా జనరేటర్లు వుంటాయి. ముఖ్యంగా ప్లాట్, మోటివ్, కాన్ ఫ్లిక్ట్ జనరేటర్లు, క్యారక్టర్ టైప్స్, ఇన్ స్పిరేషన్, ఐడియా జనరేటర్లు మొదలైనవి. 

       

    రాయలేక పోవడానికి  కారణమొక్కటే, చదవకపోవడం. కొత్తగా రాయలేకపోవడానికి కారణమొక్కటే, చదవకపోవడం. చూసిన సినిమాలే చూసి ఆ పాత మూసే రాయడానికి కారణమొక్కటే, చదవకపోవడం. చదివితే మెదడుకి బాగా ఎక్కుతుంది. అదిక వూరుకోదు. ప్రాసెస్ చేసుకుంటూ వుంటుంది. ఎప్పుడో ఎక్కడో అవసరమొచ్చి ఆలోచిస్తూంటే,  అది యాప్ లో సేవ్ చేశావ్ చూసుకో ఫో అని గుర్తుచేస్తుంది. మనం యాప్ ని క్లిక్ చేస్తాం. ఇంతే, చాలా సింపుల్. ఈ మాత్రం దానికి రూమ్మేట్స్ తో, వాళ్ళ గర్ల్ ఫ్రెండ్స్ తో గరీబోళ్ళలాగా చొక్కాలు చించుకోవాలా? చుట్టూ ప్రపంచాన్ని, తీసే సినిమాల కోసం సమాచార కక్కుర్తితో చూడని కథకుడికి,  తన మనసులో గరీబీ హటావో ఎప్పుడుంటుంది?.

―సికిందర్

1201 : స్పెషల్ ఆర్టికల్

 

సెప్టెంబర్ 9 న విడుదల కానున్న రణబీర్ కపూర్ ‘బ్రహ్మాస్త్ర: శివ - పార్ట్ వన్’ కూడా బాయ్ కాట్ బారిన పడింది. ఈ మధ్య విడుదలవుతున్న ఏ హిందీ సినిమానీ  వదలడం లేదు కొత్తగా పుట్టుకొచ్చిన బాయ్ కాట్ బృందాలు. ఇదంతా పథకం ప్రకారం జరుగుతోందనొచ్చు. సెక్యులర్ బాలీవుడ్ ని దెబ్బ తీయాలని. ఆ మాట కొస్తే ఏ సినిమా రంగమైనా సెక్యులర్ గానే వుంటుంది. లేకపోతే ఏనాటిదో ‘షోలే’లో ముస్లిం పాత్రని ఉదారవాదిగా చూపించారని ఇప్పుడెందుకు బాయ్ కాట్ అవుతుంది. ఈ బహిష్కరణ పిలుపులకి బాలీవుడ్ నోరెత్తకుండా మౌనంగా వుంటోంది. నోరెత్తితే వాళ్ళ సినిమాలు బాయ్ కాట్ లిస్టులో చేరిపోతున్నాయి. తాప్సీ, అనురాగ్ కశ్యప్ నోరెత్తారని వాళ్ళ ‘దొబారా’ సినిమా బాయ్ కాట్ అయిపోయింది. ‘లాల్ సింగ్ చద్దా’ బావుందని హృతిక్ రోషన్ అనేసరికి అతడి రానున్న ‘విక్రమ్ వేద’ బాయ్ కాట్ అయిపోయింది.

       బాయ్ కాట్ ట్రెండ్ కి మౌనంగా వుండరాదని అర్జున్ కపూర్ నోరెత్తాడని అతడి రాబోయే ‘కుత్తే’ బాయ్ కాట్ గండంలో పడింది. తాజాగా సునీల్ శెట్టి నోరు విప్పాడు. ఈయన కూడా కాచుకోవాలి. రాబోయే షారుఖ్ కాన్ ‘పఠాన్’ కూడా బాయ్ కాట్ అయింది. కారణం ఇతడి కొడుకు డ్రగ్ స్మగ్లర్ అని. కానీ ఆ కేసులో కొడుకుని ఇరికించారని తేలిపోయినా అబద్ధాలతో బాయ్ కాట్ అయిపోతోంది. బాయ్ కాట్ కి వ్యతిరేకంగా వున్నాడని ఆఖరికి మోడీ భక్తుడు అక్షయ్ కుమార్ ‘రక్షాబంధన్’ కి కూడా బాయ్ కాట్ వేటు పడింది. ఇక అమీర్ ఖాన్ ‘లాల్ సింగ్ చద్దా’ సంగతి సరే!

ఇప్పుడు విడుదలకి సిద్ధమైన అత్యంత ఖరీదైన ‘బ్రహ్మాస్త్ర’ వంతు వచ్చింది. ఇందులో హీరోయిన్ ఆలియా భట్ నటించిన ‘డార్లింగ్స్’ ఇటీవలే విడుదలయ్యింది. ఈ సందర్భంగా ‘నేను నచ్చకపోతే నా సినిమా చూడకండి’ అనేసింది. దీంతో ఆమె నటించిన ‘బ్రహ్మాస్త్ర’ బాయ్ కాట్ అయిపోయింది. ఈమెతో బాటు హీరో రణబీర్ కపూర్, దర్శకుడు అయాన్ కపూర్ ‘పాత నేరాలు’ కూడా బాయ్ కాట్ కి కారణమయ్యాయి.  

ప్రతీ స్టార్ మీదా కన్నేసి, వాళ్ళ గతాన్ని తవ్వి తీసి బాయ్ కాట్ కి ఆయుధంలా వాడుకుంటున్నారు. అమీర్ ఖాన్ 2015 లో తన భార్య ఈ దేశంలో అభద్రత ఫీలవుతోందని చెప్పిన మాట పట్టుకుని ఇప్పుడు  ‘లాల్ సింగ్ చద్దా’ ని బాయ్ కాట్ చేశారు. ఆ భార్య హిందువే. అలాగే ‘పీకే’ లో హిందూ దేవుళ్ళని అవమానించాడని కూడా బాయ్ కాట్ చేశారు. ‘పీకే’ నిర్మాత, దర్శకుడు, రచయిత హిందువులే.

ఇప్పుడు రణబీర్ కపూర్ పాత నేరం : తను బీఫ్ తింటానని ఏనాడో ఒక మాట చెప్పడం. దీంతో ‘బ్రహ్మాస్త్ర’ బాయ్ కాట్ అయిపోయింది. రణబీర్ కపూర్ గురించి ఒక బ్లాగర్ పోస్ట్ చేసిన పాత వీడియో సోషల్ మీడియాలో వైరల్ అవుతోంది. ఆ వీడియోలో సదరు బ్లాగర్, రణబీర్ కపూర్ లంచ్ చేస్తూంటారు. అప్పుడు రణబీర్ కపూర్ ‘ఐయాం ఏ బిగ్ బీఫ్ గై’ (నేను పెద్ద బీఫ్ గాణ్ణి) అన్నాడు.

దీన్ని పట్టుకుని ‘బాయ్ కాట్ బ్రహ్మాస్త్ర’ ట్రోలింగ్ మొదలెట్టారు. ‘రణబీర్ కపూర్ బీఫ్ ఖాతా హై. యే  బ్రహ్మాస్త్ర కా హీరో హై. బాయ్ కాట్ బ్రహ్మాస్త్ర’ (రణబీర్ కపూర్ బీఫ్ తింటాడు. ఇతను బ్రహ్మాస్త్ర హీరో. బాయ్ కాట్ బ్రహ్మాస్త్ర) అని ట్రెండ్ అవుతోంది.  

అయాన్ ముఖర్జీ పాత నేరం : 2019 లో ఇంస్టాగ్రాంలో ఒక పోస్ట్. ‘డ్రాగన్ బ్రహ్మాస్త్రంగా మారింది, రణబీర్ కపూర్ పాత్ర పొడవాటి శిరోజాలతో రూమీ (సూఫీ కవి జలాలుద్దీన్ రూమీ) లాగా వుంటుంది, శివుడు కాదు’ అని రాశాడు!

‘రూమీ! మొదట అతను రూమీ. పొడవాటి జుట్టుతో రూమీ. ఈ గెటప్ సినిమాకి సంబంధించిన ఫస్ట్ లుక్ టెస్ట్ నుంచి వచ్చింది. ప్రేమనేది మీకూ మీతో ప్రతిదానికీ మధ్య వారధిలాంటిదని అన్నాడు రూమీ. ఈ ఫీలింగునే ఆధారంగా చేసుకుని రణబీర్ కపూర్ పాత్రని తీర్చిదిద్దాం. కానీ ఆ తర్వాత కొత్త ప్రేరణ, కొత్త ఆలోచనలు వచ్చాయి... డ్రాగన్ ని బ్రహ్మాస్త్రంగా మార్చి రణబీర్ పాత్రకి అందించాం. రణబీర్ గెటప్ మార్చాం. దాంతో రూమీ శివుడు అయ్యాడు’ అని ఇంస్టాలో పోస్ట్ చేశాడు ముఖర్జీ. నేరకపోయి ఇరుక్కోవడమంటే ఇదే!

ఆమె తను నచ్చకపోతే తన  సినిమా చూడకండి అంటుంది, ఆయన బీఫ్ తింటానంటాడు, ఈయన డ్రాగన్ ని బ్రహ్మాస్త్రంగా మార్చి, రూమీని శివుడు చేశానంటాడు!

ఇన్ని నేరాలు చేశాక ఇక సినిమా వుంటుందా? ఒక నెటిజన్ ట్విట్టర్ లో గొడ్డు మాంసం వ్యక్తిని బహిష్కరించాలన్నాడు. మరికొందరు సినిమాని బహిష్కరించడం సబబు కాదని వాదిస్తూ మద్దతుగా ట్వీట్ చేశారు. అతనేం తింటాడో అతనిష్టం - అన్నారు. ‘కనీసం మన చరిత్రపై సినిమా తీయడానికి ఏదో ఒకటి చేస్తున్నాడు కదా’ అని ఇంకో నెటిజన్  అయాన్ ముఖర్జీని ఓదార్చాడు.

ఇంకో నెటిజన్ ఇలా ట్వీట్ చేశాడు- ‘బ్రిటిష్ పౌరురాలు అలియా భట్ హిందూ వ్యతిరేక, భారతదేశ వ్యతిరేక వ్యక్తుల కుటుంబం నుంచి వచ్చింది. తండ్రి మహేష్ భట్ బాహాటంగా హిందూ వ్యతిరేకి. 26/11 టెర్రర్ దాడి ఆరెస్సెస్ కుట్ర అని అతను పేర్కొన్నాడు. అతడి సోదరుడు రాహుల్ భట్ కి ఈ టెర్రర్ దాడి నిందితుల్లో ఒకడైన డేవిడ్ హెడ్లీతో సంబంధాలున్నాయి’

పాత నేరాలకి క్షమాపణలు చెప్పినా వదలడం లేదు. అమీర్ ఖాన్ క్షమాపణ చెప్పినా వదల్లేదు. ఇప్పుడు విజయ్ దేవరకొండనీ వదలడం లేదు. శుభమా అని పానిండియాలో పాదం మోపుతూ విజయ్ తనకి సంబంధం లేని బాయ్ కాట్ ట్రెండ్ లో తలదూర్చి ఎడాపెడా కామెంట్లు చేశాడు. తనూ బాయ్ కాట్ అయిపోయాడు.

దీంతో ముంబాయిలో ఒక థియేటర్ ఓనర్ విజయ్ మీద విరుచుకుపడ్డాడు. విజయ్ వల్ల ‘లైగర్’ షోలకి థియేటర్ ఖాళీగా వుంటోందని. వెంటనే విజయ్ ముంబాయి వెళ్ళి ఓనర్ కి పాదాభివందనం చేసి మరీ క్షమాపణలు చెప్పాడు. కానీ అసలతను అలాటి సినిమాలో నటించినందుకు ప్రేక్షకులకి క్షమాపణలు చెప్పాలి. ‘లైగర్’ బాయ్ కాట్ అయినా, కాక పోయినా ఫ్లాపయ్యేదే.

ఈ బాయ్ కాట్ మేనియా ఇంకెంత కాలం సాగుతుందో తెలీదు. దీన్ని ఎదుర్కొంటూ కనీసం హీరోల ఫ్యాన్స్ కూడా రంగంలోకి దిగడం లేదు. ప్రస్తుతం బాలీవుడ్ జీవులు నోరు విప్పకుండా తమ పని తాము చేసుకుపోవడమే మంచిదేమో. అలాగే ఏవో చేసి అవి పాతనేరాలుగా రికార్డు అవకుండా చూసుకోవడం మంచిది.

***