1443 : మలయాళం రివ్యూ!

 

దర్శకత్వం : విపిన్ దాస్

తారాగణం : పృథ్వీరాజ్ సుకుమారన్, బాసిల్ జోసెఫ్, నిఖిలా విమల్, అనస్వర రాజన్

రచనా : దీపూ ప్రదీప్, సంగీతం : అంకిత్ మీనన్, ఛాయాగ్రహణం : నీరజ్ రేవీ

బ్యానర్: పృథ్వీరాజ్ ప్రొడక్షన్స్, ఈ 4 ఎంటర్‌టైన్‌మెంట్, నిర్మాతలు :  సుప్రియా మీనన్, ముఖేష్ మెహతా, సీవీ పార్థసారథి

విడుదల : జూన్ 28, 2024 (అమెజాన్ ప్రైమ్)

***

        ఇటీవల పెద్ద హిట్టయిన ‘ఆడుజీవితం’ హీరో పృథ్వీరాజ్ సుకుమారన్, మూడు హిట్టయిన సినిమాల దర్శకుడు, నటుడు  బేసిల్ జోసెఫ్ జోడీగా నటించిన ‘గురువాయూరంబాల నడాయిల్’ (గురువాయూర్ ఆలయం) మలయాళ మూవీ, 2024 మేలో విడుదలై ఈ సంవత్సరం హిట్టయిన 8 మలయాళం సినిమాల్లో ఒకటిగా నిలిచింది. ఇది ప్రస్తుతం అమెజాన్ ప్రైమ్ లో స్ట్రీమింగ్ అవుతోంది తెలుగు వెర్షన్ సహా. దీని దర్శకుడు విపిన్ దాస్ మూడు హిట్లు తీసి, నాల్గవ హిట్ తో ముందుకొచ్చాడు. పెళ్ళి చుట్టూ ఓ కామెడీ తీసి హిట్ చేసిన ఈ దర్శకుడి ‘కళ’ ఏమిటో తెలుసుకుందాం...

కథ

గురువాయూర్ కి చెందిన వినూ రామచంద్రన్ (బాసిల్ జోసెఫ్) దుబాయిలో ఉద్యోగం చేస్తూంటాడు. అతడికి అంజలి (అనస్వర రాజన్) తో నిశ్చితార్థం జరుగుతుంది. జంషద్ పూర్ లో అంజలి అన్న ఆనంద్ (పృథ్వీరాజ్ సుకుమారన్) ఉద్యోగం చేస్తూంటాడు. అతడితో వినూకి సన్నిహిత పరిచయమేర్పడుతుంది. వినూ పూర్వం పార్వతి (నిఖిలా విమల్) ని ప్రేమించి విఫలమయ్యాడు. ఆమె మోసం చేసిందని కోపం పెంచుకుని ముందుకు సాగలేక పోతూంటాడు. గతాన్ని మర్చిపొమ్మని వినూకి ఆనంద్ నచ్చజెప్తాడు. ఆనంద్ కి కూడా ఓ సమస్య వుంటుంది. భార్య పార్వతికి ఒక ప్రేమలేఖ రావడంతో గొడవపడి పుట్టింటికి పంపేశాడు. ఇది తెలుసుకుని వినూ ఆనంద్ కి నచ్చజెప్పి పార్వతిని తెచ్చుకునేలా చేస్తాడు.

       
ఇలా పరస్పరం ఇద్దరి సమస్యలు తీర్చుకున్నాక, వినూ పెళ్ళికి బయల్దేరి వచ్చి ఆనంద్ ని కలుస్తాడు. కలిస్తే అతడి భార్య మరెవరో కాదు, తనని మోసం చేసిన పార్వతే. ఈ మోసగత్తె కుటుంబంతో పెళ్ళి వద్దనుకుని ఫ్రెండ్స్ సహాయంతో తన పెళ్ళి చెడగొట్టుకునే ప్రయత్నాలు చేస్తాడు. ఆ ప్రయత్నాల్లో అంజలికి దొరికిపోయి విషయం చెప్పేస్తాడు. అంజలి అతడ్ని పెళ్ళి చేసుకోవడానికి అభ్యంతరం లేదని చెప్తుంది. రాజీ పడతాడు.

ఇంతలో పెళ్ళి చెడగొట్టడానికి ముందు ఒప్పుకోని వినూ ఫ్రెండ్ ఒకడు, ఇప్పుడు ఆనంద్ దగ్గరికెళ్ళి- మీ ఆవిడకి వినూ మాజీ ప్రియుడని చెప్పేస్తాడు. దీంతో అసలే కోపిష్టి అయిన ఆనంద్ అతడ్నీ, వినూనీ పట్టుకుని చిత్తుగా తన్ని పెళ్ళి క్యాన్సిల్ చేస్తాడు.

       
వినూ ఎదురు తిరిగి అనుకున్న ముహూర్తానికి గురువాయూర్ ఆలయంలో నీ చెల్లెలికి తాళి కట్టేస్తానని ఛాలెంజ్ చేస్తాడు. ఎలా కడ్తావో చూస్తానని ఆనంద్ ఎదురు ఛాలెంజీ చేస్తాడు. ఇప్పుడేం జరిగింది? ఇప్పుడు తన చెల్లెలితో వినూ పెళ్ళిని చెడగొట్టడానికి ఆనంద్ ఏఏ విఫల యత్నాలు చేశాడు? ఇంకా వినూ పాత విరోధులు ఒకరొకరే ముందుకొచ్చి పెళ్ళిని చెడగొట్టడానికి ఏఏ పథకాలేశారు? ఎప్పుడో గతంలో ఫ్రెండ్ శరవణన్ (యూగిబాబు) శోభనం రాత్రి పాల గ్లాసులో గొడ్డు కారం వేసి పెళ్ళి చెడగొట్టిన వినూ జీవితంలోకి ఆ శరవణన్ కక్ష గట్టుకుని పెళ్ళికి వచ్చి ఏం చేశాడు? గురువాయూర్ ఆలయంలో రసాభాస ఎలా జరిగింది? డ్రోన్ వచ్చి తాళినెలా ఎగరేసుకుపోయింది? అప్పుడేం జరిగింది? ఆనంద్ భార్యకి ప్రేమ లేఖ రాసిందెవరు? ఇదీ మిగతా కథ.

ఎలావుంది కథ

 వెడ్డింగ్ కామెడీ కథ ఇది. ఇందులో ప్రేమలు, డ్యూయెట్లు, ప్రేమలో సమస్యలు వగైరా వుండవు. అందుకని ఇది రోమాంటిక్ కామెడీ గానీ, రోమాంటిక్ డ్రామా గానీ కాదు. నేరుగా పెళ్ళి కథ మాత్రమే చెప్పదలిచాడు. కాబట్టి ఇందులో రోమాంటిక్ కామెడీ లేదా రోమాంటిక్ డ్రామా తాలూకు సీన్లని జొరబడనీయలేదు. వాటిని ఫిల్టర్ చేసి స్పష్టంగా వెడ్డింగ్ కామెడీ జా నర్ మర్యాదకి ఏం ఎలిమెంట్స్ కావాలో అవి మాత్రమే ప్రయోగించాడు. ఇది ప్రధానంగా పెళ్ళికి అటూ ఇటూ జట్టు కట్టిన శక్తులు సృష్టించే కాన్ఫ్లిక్ట్ చుట్టూ తిరిగే కథ. అందుకని ఈ కాన్ఫ్లిక్టే హైలైట్ అయ్యేలా రెండు మూడు వేర్వేరు సీన్లని కలిపి ఇంటర్  కట్స్ లో చూపిస్తూ థ్రిల్ నీ, స్పీడునీ, కామెడీనీ పెంచుతూ పోయాడు. దీంతో పాటు కథనంలో డైనమిక్స్ ని ప్రయోగించాడు. ఒక సీన్లో అనుకూలంగా జరిగితే వెంటనే తర్వాతి సీన్లో వ్యతిరేకంగా జరిగే డైనమిక్స్. ఈ ఇంటర్ కట్స్ తో బాటు డైనమిక్స్ వల్ల కథనంనిత్యం చలనంలో వుంటూ, ఫైర్ అవుతూ వుంటుంది. దీంతో ఈ రెండుంపావు గంటల వెడ్డింగ్ కామెడీ మంచి వినోద కాలక్షేపంలా తయారయ్యింది.

       
ఫస్టాఫ్ వినూ పాత్ర ఇష్టం లేని తన పెళ్ళిని చెడగొట్టుకునే కథ, సెకెండాఫ్ పెళ్ళికి సిద్ధ పడితే ఇతరులు ఆ పెళ్ళిని చెడగొట్టే కథ. ఈ రెండిటి మధ్య నలిగే వినూ కామెడీ పాట్లు. మధ్యలో తనతో విశసంగా లేదని భావిస్తున్న భార్య పార్వతితో ఆనంద్ పాట్లు. ఈ పాయింటుతో ఆనంద్- వినూల మధ్య శతృత్వం. ఈ గొడవల్లో వినూతో లేచిపోతనని పెళ్లికూతురు అంజలి బ్లాక్ మెయిల్. ఈ ప్రధాన పాత్రల చుట్టూ చేరి  రసాభాస చేసే ఇతర  పాత్రలు. ఈ పాత్రల్లో ఒక ఆడ పాత్ర కూడా వుంటే కాన్ఫ్లిక్ట్ కి యూత్ అప్పీల్ వచ్చేది.

       
క్లయిమాక్స్ గురువాయూర్ టెంపుల్ లో యాక్షన్ సీన్లు, డ్రోన్ ఎంట్రీ, తాళి గల్లంతు వగైరా. ఆద్యంతం నవ్వించడమే పనిగా పెట్టుకున్న ఈ వెడ్డింగ్ కామెడీ ప్రియదర్శన్ కామెడీ సినిమాల్ని గుర్తుకు తెస్తుంది.

నటనలు –సాంకేతికాలు

పృథ్వీరాజ్ సుకుమారన్ ఎప్పటిలాగే హుషారుగా పాత్ర పోషించాడు. కోపిష్టి పాత్ర కావడంతో బల ప్రయోగం కూడా చేస్తాడు. ఎత్తుగడలు వేసినప్పుడు యాక్షన్ లోకొచ్చి కథని మలుపులు తిప్పుతూంటాడు. ఈ కథకి హీరో బేసిల్ జోసెఫ్. పృథ్వీరాజ్ వ్యతిరేక పాత్ర. అందువల్ల వీళ్ళిద్దరి మధ్య సంఘర్షణతో నడుస్తూంతుంది కథ. పృత్వ్హీరాజ్ సీరియస్ పత్రాయితే జోసెఫ్ కామెడీ పాత్ర. ఈ డైనమిక్స్ కూడా బాగా పనికొచ్చాయి. జోసెఫ్ కామెడీ పాట్లు సున్నిత హాస్యంతో తెలివిగా నటించాడు.

       
పృథ్వీరాజ్ భార్యగా ఆకాశరామన్న ప్రేమ లేఖతో అపార్ధానికి గురయిన పాత్రలో నిఖిల జరుగుతున్న తతంగం సీరియస్ గా గమనిస్తూ వుంటుంది. ఎక్కువ మాట్లాడదు. జోసెఫ్ పెళ్ళి చేసుకునే అంజలి పాత్రలో అనస్వర  కేర్ ఫ్రీగా వుంటుంది. ఇక అటూ ఇటూ కుటుంబ పాత్రలు,  వూళ్ళో మేకవన్నె పులుల్లాంటి పాత్రలూ చాలా వున్నాయి.

       
ఇక పాటలు, లొకేషన్లు, కెమెరా వర్క్ సున్నిత కామెడీకి తగ్గట్టు సాఫ్ట్ గా కనిపిస్తాయి.       కథనానికి దర్శకుడు విపిన్ దాస్ వాడిన క్రియేటివిటీయే ఈ వెడ్డింగ్ కామెడీకి బాక్సాఫీసు బలాన్నిచ్చింది.

—సికిందర్

1442 : రివ్యూ!

రచన- దర్శకత్వం : నాగ్ అశ్విన్

తారాగణం : ప్రభాస్, దీపికా పదుకొనే, మృణాల్ ఠాకూర్, దిశా పటానీ, శోభన, అన్నాబెన్, అమితాబ్ బచ్చన్, కమల్ హాసన్, దుల్కర్ సల్మాన్, విజయ్ దేవరకొండ, రాజేంద్ర ప్రసాద్, బ్రహ్మానందం, శాశ్వత చటర్జీ తదితరులు

సంగీతం : సంతోష్ నారాయణన్, ఛాయాగ్రహణం : జోర్డీ స్టోజిలికోవిచ్, కూర్పు : కోటగిరి వెంకటేశ్వరరావు

బ్యానర్ : వైజయంతీ మూవీస్

నిర్మాతలు : అశ్వనీ దత్, ప్రియాంకా దత్, స్వప్నా దత్

విడుదల : 27 జూన్, 2024

కథ

ఈ కథ మహాభారత కాలంలో  కురుక్షేత్ర యుద్ధంతో ప్రారంభమవుతుంది. ఆ యుద్ధంలో అర్జునుడు (విజయ్ దేవరకొండ) విజయవంతంగా ప్రయోగించిన బ్రహ్మాస్త్రాన్ని ఉపసంహరించుకుంటే, అశ్వత్థామ (అమితాబ్ బచ్చన్) అలా చేయలేకపోతాడు. పాండవుల మీద ద్వేషంతో రగిలిపోతున్న అతను పాండవ స్త్రీల గర్భాల మీదకి  దారి మళ్ళిస్తాడు. అది గర్భంతో వున్న అర్జునుడి  కోడలు ఉత్తర కడుపుని ఛేదిస్తుంది.  దాంతో శ్రీకృష్ణుడు ఆమె గర్భంలోని మృత శిశువుని బతికించి, అశ్వత్థామని మరణం లేకుండా నరకం అనుభవించమని శపిస్తాడు. భవిష్యత్తులో ఆరువేల సంవత్సరాల నాడు పుట్టబోయే విష్ణువవతారం కల్కిని కాపాడాల్సిన బాధ్యత అతడి మీదేస్తాడు. దాంతోనే అతడికి శాప విముక్తి లభిస్తుందంటాడు.

ఇప్పుడు ఆరువేల సంవత్సరాల తర్వాత 2898 లో కాశీలోని అరాచక (డిస్టోపియన్) రాజ్యంలో పాలకుడు సుప్రీం యాస్కిన్ (కమల్ హాసన్) కాంప్లెక్స్ అనే స్థావరాన్ని ఏర్పర్చుకుని వుంటాడు. అతనొక కొత్త ప్రపంచాన్ని సృష్టించేందుకు సంతానోత్పత్తి లాబ్ ని సృష్టించుకుంటాడు. ఆ లాబ్ లో గర్భవతుల్ని బందీల్ని చేసి సీరం తీసి ప్రయోగాలు చేస్తూంటాడు. ఈ ప్రయోగాలకి సు - మేటి అలియాస్ సుమతి (దీపికా పదుకొనే) చిక్కుతుంది. ఆమె గర్భంలో పెరుగుతున్న శిశువు కల్కి.

         
ఇది గ్రహించిన అశ్వత్థామ ఆమెని కాపాడుకునేందుకు పోరాటం ప్రారంభిస్తాడు. ఇదే సమయంలో నేరస్థుల్ని పట్టుకుని  కాంప్లెక్స్ కి అప్పగించి పారితోషికాలు పొందే బౌంటీ హంటర్ భైరవ (ప్రభాస్) అనే షోకిల్లా రాయుడు, సుమతీ గురించి తెలుసుకుని, ఆమెని పట్టుకుని కాంప్లెక్స్ కి అప్పగించే ప్రయత్నాలు మొదలెడతాడు.

         
దీంతో అశ్వత్థామకీ, భైరవకీ మధ్య భీకర  ఘర్షణ ప్రారంభమవుతుంది. ఇప్పుడు సుమతీ కోసం వీళ్ళిద్దరి పోరాటంలో ఎవరు గెలిచారు? అశ్వత్థామ, భైరవల మధ్య వున్న గత సంబంధమేమిటి? ఈ సంఘర్షణలో యాస్కిన్ తీసుకున్న కఠిన చర్యలేమిటి? అసలు సుమతీ ఎవరు? ఇవీ మిగతా భాగంలో తెలిసే విషయాలు.

ఎలావుంది కథ

పురాణాన్ని ఆధునిక సైన్స్ ఫిక్షన్ తో మిక్స్ చేసి ఒక యాక్షన్ థ్రిల్లర్ ప్రయోగం చేసి నప్పుడు అందులో భావోద్వేగ బంధాన్ని మరిచారు. గర్భస్థ శిశువు కల్కి ప్రమాధంలో వుందన్న భక్తి భావం పాయింటు చుట్టూ తిరగాల్సిన ఈ మెగా బడ్జెట్ కమర్షియల్ కథని, చదును చేసి ఫీల్ లేకుండా చేశారు. ప్రేక్షకుల ఆత్మిక దాహాన్ని తీర్చే ఇలాటి పురాణ కథ భక్తిభావం ప్రవహిస్తూ స్పిరిచ్యువల్ థ్రిల్లర్ గా వుండాల్సింది- పురాణాన్ని వేరుగా, సైన్స్ ఫిక్షన్ ని వేరుగా చేసి చూపించారు. 

       
దీని మీద హాలీవుడ్ మార్వెల్ సైన్స్ ఫిక్షన్ సినిమాల ప్రభావం వుందనేది తెలిసిపోతూనే వుంది. అయితే మార్వెల్ యాక్షన్ థ్రిల్లర్లు స్పిరిచ్యువాలిటీతో సంబంధం లేనివి. వీటికి పూర్వం స్టీవెన్ స్పీల్ బర్గ్ తీసిన ‘రైడర్స్ ఆఫ్ ది లాస్ట్ ఆర్క్’ అనే యాక్షన్ మూవీ ప్రేక్షకుల ఆత్మిక దాహాన్ని తీర్చే స్పిరిచ్యువల్ థ్రిల్లర్ గా అంత హిట్టయింది. ఇందులో బైబిల్ కాలపు పురాతన వస్తువు (ఆర్క్) కోసం జర్మన్ నాజీలతో ఆర్కియాలజిస్టు హీరో పోరాటం వుంటుంది. చివరికి ఆ ఆర్క్ ని చేజిక్కించుకున్న నాజీలు మాడి మసై పోతారు.

       
ఆర్క్ ఎంత పవిత్రమైనదో, గర్భస్థ శిశువు కల్కి కూడా అంతే పవిత్రమైనది. దీన్ని హైలైట్ చేస్తూ, దీని చుట్టూ భక్తి భావం వర్సెస్ ప్రమాదం అనే ద్వంద్వాలతో కూడిన సంఘర్షణగా చూపించి వుంటే -ఇది ప్రేక్షకుల ఆత్మిక దాహాన్ని తీర్చే బలమైన భావోద్వేగ బంధంతో వుండేది. దీన్ని వదిలేసి ఇతర పాత్రల కథలతో, పోరాటాలతో అధిక సమయం గడిపేయడంతో ప్రధాన కథకి, పాత్రలకీ స్పేస్ లేకుండా పోయింది. ఫస్టాఫ్ ప్రభాస్ నాల్గు సీన్లలో, సెకండాఫ్ ఏడు సీన్లలో మాత్రమే కనిపిస్తాడు! దీంతో కథకి  ఎమోషనల్ కనెక్ట్, స్పిరిచ్యువాలిటీ, ఆత్మిక దాహం వగైరా అంశాలు ఆవిరై పోయాయి.

       
గంటన్నర ఫస్టాఫ్, గంటన్నర సెకండాఫ్ కథలో ఫస్టాఫ్ పెద్దగా ఏమీ జరగదు. కథ ప్రారంభం కాకుండా ఉపోద్ఘాతమే వస్తూంటుంది. సెకండాఫ్ దాదాపు గంట గడిచాక- అమితాబ్, ప్రభాస్ ల ఘర్షణకి బీజం పడ్డాకే కథ ప్రారంభమవుతుంది. అంటే సామాన్య భాషలో చెప్పుకుంటే ఇది మిడిల్ మటాష్ స్క్రీన్ ప్లే. ఇలాటి భారీ కథలు కథగా వుండనవసరంలేదు, గాథగా వుండొచ్చు. అందుకే ఇలా వుంది. ఆ తర్వాత అరగంట సుమతి కోసం జరిగే పోరాటంతో వూపందుకుంటుంది గాథ.  క్లయిమాక్స్ యాక్షన్, గాథ ముగిస్తూ సీక్వెల్ కోసం ఇచ్చే ట్విస్టూ బావుంటాయి. ఒకలాంటి సంతృప్తితో బయటికి పోవచ్చు ప్రేక్షకులు.

నటనలు – సాంకేతికాలు

ప్రభాస్ బౌంటీ హంటర్ గా సరదా పాత్ర పోషించాడు. పూరీ జగన్నాథ్ తీసిన ‘ఏక్ నిరంజన్’ లోకూడా బౌంటీ హంటర్ పాత్ర నటించాడు. ఈసారి పాత్రకి బుజ్జి అనే రోబో తోడయ్యింది. ఈ రోబోతోనే కామెడీలు చేశాడు. సినిమా ప్రారంభమయిన అరగంటకి ఎంట్రీ ఇచ్చే ప్రభాస్ ఫస్టాఫ్ లో కథతో స్పర్శ లేకుండా ఇంకో మూడు సీన్లు నటించి, వీటిలో రెండు సీన్లు దిశాపటానీ తో రోమాన్సు  చేసి వెళ్ళిపోతాడు. సెకండాఫ్ లో కూడా ఇతర పాత్రల కథలు అడ్డు రావడంతో అప్పుడప్పుడు మాత్రమే కనిపించి, చివరి అరగంట పూర్తిగా యాక్షన్ లో వుంటాడు. ప్రభాస్ ఇలా పొదుపుగా కనిపించడం ఫ్యాన్స్ కి ఇబ్బందే.

       
సెకండాఫ్ లో వచ్చే అమితాబ్ బచ్చన్ అశ్వత్థామగా అధిక యాక్షన్ లో వుంటాడు. ఈ యాక్షన్లో వీరత్వంతో బాటు నిస్సహాయత, పట్టుదల, త్యాగం మొదలైనవి తన స్కిల్స్ తో నటించి కట్టి పడేస్తాడు. అలాగే విలంగా రెండు సీన్లలో కన్పించే కమల్ హాసం కూడా. గర్భంలో కల్కిని మోస్తున్న కీలక పాత్రలో దీపికా పదుకొనే తో ఎమోషనల్ గా కనెక్ట్ అయ్యే పాత్రచిత్రణ వడం పెద్ద లోపం.

       
ఇక అతిధి పాత్రల్లో దుల్కర్ సల్మాన్, విజయ్ దేవరకొండ, మృణాల్ ఠాకూర్, రాజేంద్రప్రసాద్, బ్రహ్మానందం క్లుప్తంగా కనిపిస్తారు. టెక్నికల్ గా విజువల్  వండర్ అని చెప్పుకోవచ్చు. యుద్ధాలు జరిగి ధ్వంసమైన భూమ్మీద ఏర్పాటయిన కొత్త జీవితాలు, ఆవాసాలు, వాహనాలు, ఆయుధాలు, ఇంగ్లీషు కలిసిన తెలుగు భాష- ఇలా ఒక భవిష్యద్దర్శనం చేస్తుంది సినిమా దృశ్య వైభవంతో.

        
సంతోష్ నారాయణన్ సంగీతం పెద్ద హైలైట్. జోర్డీ స్టోజిలికోవిచ్ ఛాయాగ్రహణం అంతర్జాతీయ ప్రమాణాలు గలది. అలాగే కోటగిరి వెంకటేశ్వరరావు కూర్పు పదునుగా వుంది. దర్శకుడు నాగ్ అశ్విన్,  నిర్మాతలు అశ్వనీ దత్, కుమార్తెలు ప్రియాంకా దత్, స్వప్నా దత్ లు ఒక వెంటాడే డ్రామా తో కూడిన క్రియేషన్ ని అందించకపోయినా, పాన్ ఇండియాకి తెలుగు నుంచి ఒక గర్వకారణాన్ని మాత్రం అందించగలిగారు.

—సికిందర్

1441 : రివ్యూ!

 

రచన - దదర్శకత్వం : రాజేష్ జగన్నాధం

తారాగణం : వ రుణ్ సందేశ్, ఎనీ, శ్రియా రాణిరెడ్డి, తనికెళ్ల భరణి, అన్నీ, భద్రమ్, చత్రపతి శేఖర్, మైమ్ మధు తదితరులు

సంగీతం : సంతు ఓంకార్, ఛాయాగ్రహణం : రమీజ్ నవీత్  నిర్మాత: రాజేష్ జగన్నాధం

విడుదల : జూన్ 21, 2024

***

        తెరమరుగైన ‘హేపీడేస్’ హీరో వరుణ్ సందేశ్ చాలాకాలం తర్వాత తెరపైకొచ్చాడు. ఈసారి తనకి అలవాటయిన రోమాంటిక్ సినిమా కాకుండా సస్పెన్స్ థ్రిల్లర్ ప్రయత్నించాడు. దీనికి రాకేష్ జగన్నాథం కొత్త దర్శకుడు, నిర్మాత.  అయితే వారం వారం ఇంకో మార్గం లేనట్టు అర్షకత్వం వచ్చిపడుతున్న సస్పెన్స్ థ్రిల్లర్స్ సూచిస్తోంది. నిడివి కూడా రెండు గంటలే వుంది. ‘నిండా’ టైటిల్ బావుంది. బరువైన కథని సూచిస్తోంది. మరి ఇదెంత బలంగా ఆకట్టుకునే అవకాశముంది? చూద్దాం...

కథ

వివేక్ (వరుణ్ సందేశ్)  మానవ హక్కుల సంఘంలో పని చేస్తూంటాడు. అతడి తండ్రి (తనికెళ్ళ భరణి) జడ్జి. ఇతను మంజు అనే అమ్మాయి హత్య కేసులో బాలరాజు (ఛత్రపతి శేఖర్) కి మరణ శిక్ష విధిస్తాడు. అయితే బాలరాజుని తప్పుడుగా శిక్షించానని బాధపడుతూ మరణిస్తాడు. తండ్రి మాటలు నమ్మిన వివేక్, అమాయకుడైన బాలరాజుని కేసు నుంచి విడిపించడానికి రంగంలోకి దిగుతాడు. సాక్ష్యాధారాల్ని తారుమారు చేసిన ఒక ఎస్సైని, డాక్టర్ ని, లాయర్ని, కానిస్టేబుల్ ని, ఇద్దరు సాక్షుల్నీ కిడ్నాప్ చేసి గదిలో బంధించి నిజం కక్కించే పని చేపడతాడు. ఏమిటా నిజం? మంజునెవరు ఎందుకు చంపారు? బాలరాజునెలా ఇరికించారు? అసలు దోషిని పట్టుకుని ఉరిశిక్ష నుంచి బాలరాజుని వివేక్ ఎలా కాపాడాడు? ఇదీ మిగతా కథ.

ఎలావుంది కథ

ఒక బలహీన రొటీన్ సస్పెన్స్ థ్రిల్లర్ కథే. సస్పెన్స్, థ్రిల్ లేకుండా వారం వారం వస్తున్న అమెచ్యూర్ కథే. అయితే ఇది ఇంకో అడుగు ముందుకెసి సస్పెన్స్, థ్రిల్లే గాకుండా యాక్షన్ కూడా లేకుండా గదిలో డైలాగులతో నడిచే కథగా ముందుకొచ్చింది. కళ్ళు మూసుకుని డైలాగులు వింటూంటే కథ అర్ధమైపోతుంది. అంటే విజువల్ మీడియా లక్షణం కూడా లేని రేడియో నాటిక లాంటి కథ అన్నమాట. దీన్ని సినిమాగా తీయకుండా డైలాగులు రికార్డు చేసి ఆడియో విడుదల చేసినా సరిపోయేది.

       
మాస్కు వేసుకున్న వరుణ్ సందేశ్ ఆరుగుర్ని కిడ్నాప్ చేసి గదిలో బంధించడంతో మొదలవుతుంది. వాళ్ళకి మంజు హత్య కేసు వివరించి, దీన్ని మీరెలా తప్పుదోవ పట్టించారో చెప్పమంటూ హింసిస్తాడు. అప్పుడు ఒకొక్కరూ చెప్పే ఫ్లాష్ బ్యాక్స్ తో కథ వస్తూంటుంది. ఫస్టాఫ్ గదిలో ఈ సంభాషణే, సెకండాఫ్ లోనూ గదిలో టేబుల్ చుట్టూ కూర్చుని ఈ సంభాషణే. గదిదాటి బయటి కెళ్ళదు కథ. ఫ్లాష్ బ్యాక్స్ లోనే బయట పల్లెటూళ్ళో సీన్లు వస్తాయి. ఇలా అడిగి అడిగి అడుగుతూ పోతూంటే, వాళ్ళు చెప్పీ చెప్పీ చెప్తూ పోవడమే కథనం.

       
ఇంతా చేసి ఆ ఆరుగురు తప్పు ఒప్పుకుంటారే తప్ప, హత్య ఎవరు చేశారో వాళ్ళకీ తెలీదు. ఆ హత్యలో బాలరాజుని మాత్రం ఇరికించారు. ఇక్కడ్నుంచి క్లయిమాక్స్ లో నైనా అసలు దోషిని కనుక్కునేందుకు యాక్షన్ లో కొచ్చి బయట అడ్వెంచర్స్ చేస్తాడనుకుంటే అదీ జరగదు. జైల్లో వున్న బాలరాజునే అడిగితే బాలరాజు చెప్పేస్తాడు మంజుని చంపిందెవరో!

       
ఇలా డైలాగులతో నడిచే కథకి ఫ్లాష్ బ్యాక్స్ లో పల్లెటూళ్ళో వచ్చే సీన్లూ పేలవమే. పల్లెటూళ్ళో రోమాన్స్ చెప్పక్కర్లేదు. ఏ సీన్లో కూడా డ్రామా, భావోద్వేగాలుండవు. చిత్రీకరణలో దర్శకత్వ లోపం స్పష్టంగా కన్పిస్తుంది. పొలంలో హత్యకి గురై పడున్న అమ్మాయి శవమైతే – మేకప్ చెదరని గ్లామరస్ ఫేసుతో కళకళ లాడుతూ వుంటుంది. నిర్మాణంలో అన్ని  శాఖల్లోనూ అత్యంత బలహీనం ఈ సస్పెన్స్ థ్రిల్లర్.

నటనలు - సాంకేతికాలు

వరుణ్ సందేశ్ పాత్ర మానవ హక్కుల సంఘం ఉద్యోగి కాకపోయినా వచ్చే నష్టమేం లేదు. పాత్ర ఆ నేపథ్యం లోంచి వచ్చినట్టు కూడా వుండదు. పైగా 40 నిమిషాల పాటు వరుణ్ సందేశ్ మాస్క్ వేసుకుని ప్రేక్షకులకి మొహం చూపించడు. ప్రేక్షకులకి హీరో మొహం కనిపించకపోతే సినిమా ఎలా ఎంజాయ్ చేస్తారు. విలన్ ఆఖరి వరకూ మొహం చూపించకున్నా ఫర్వాలేదు. దీన్ని హీరోకి అప్లై చేస్తే ఎలా? ఆ ఆరుగురి ముందు మాస్కు వేసుకుని, ప్రేక్షకుల ముందు మాస్కు తీసేసి వుండాల్సింది. 40వ నిమిషంలో మాస్కు తీసేసి స్లోమోలో నడుచుకుంటూ పోతే అది బ్యాంగ్ అవుతుందా? అది వరుణ్ సందేశ్ అని ప్రేక్షకులకి ముందే తెలుసు. కాకపోతే మొహం చూడాలని వుంటుంది.

        
డైలాగ్ డెలివరీలో ఇంప్రూవ్ అయ్యాడు. కానీ నటించడానికి ఈ సినిమాలో విషయం లేదు. మిగిలిన పాత్ర ధారులందరూ కూడా బలహీన పాత్రల్ని బరువు మోస్తున్నట్టు నటించారు. సాంకేతికంగా చెప్పుకోవడానికేమీ లేదు. గదిలో బంధించిన కథకి సాంకేతికాలతో అవసరమే వుండదు. మొత్తానికి వరుణ్ సందేశ్ రూటు మార్చి సస్పెన్స్  థ్రిల్లర్ నటించినా కలిసిరాలేదు.

—సికిందర్

 

1440 : రివ్యూ!

 

రచన- దర్శకత్వం : నిథిలన్ స్వామినాథన్

తారాగణం : విజయ్ సేతుపతి, అనురాగ్ కశ్యప్. మమతా మోహన్ దాస్, భారతీ రాజా, అభిరామి, నటరాజ్ తదితరులు

సంగీతం :  ఆజనీష్ లోకనాథ్, ఛాయాగ్రహణం  : దినేష్ పురుషోత్తమన్

బ్యానర్స్ : ఎన్‌వీఆర్ సినిమా, ప్యాషన్ స్టూడియోస్

నిర్మాతలు : సుదర్శన్ సుందరం, జగదీష్ ఫళని స్వామి

విడుదల : జూన్ 14, 2024

***

        విజయ్ సేతుపతి 50వ సినిమా అనగానే ఆసక్తి, మార్కెట్ లో కదలిక, సోషల్ మీడియాలో హల్చల్ ఏర్పడ్డాయి. 50 వ సినిమాగా అతనేం ప్రత్యేకత చూపించబోతున్నాడ న్న కుతూహలమొకటి. దర్శకుడు నిథిలన్ స్వామినాథన్ తో, కీలక పాత్ర పోషించిన బాలీవుడ్ దర్శకుడు అనురాగ్ కశ్యప్ తో కలిపి ఆ ప్రత్యేకత ఎలా వుండబోతోంది? కమర్షియల్ సినిమాని ఏ భిన్న కోణంలో చూపించాడు? ఇందులో తన పాత్ర ఎలాటిది? ముసురు

కుంటున్న ఇన్నిప్రశ్నలతో ఈ తమిళ సినిమా కథ కూడా సంధిస్తున్న ప్రశ్నలేమిటి? ఇవి తెలుసుకునేందుకు ప్రయత్నిద్దాం...

కథ

మహారాజా (విజయ్ సేతుపతి) చిన్న సెలూన్ పెట్టుకుని జీవిస్తూంటాడు. ఒక ప్రమాదంలో భార్య చనిపోతే కూతురే లోకంగా బ్రతుకుతూంటాడు. ఓ రాత్రి ఇంట్లో దొంగలు పడతారు.  దొంగలు ఇంట్లోంచి లక్ష్మిని ఎత్తుకు పోతారు. మహారాజా పోలీస్ స్టేషన్ కెళ్ళి లక్ష్మిని వెతికి పెట్టమని కంప్లెయింట్ ఇస్తాడు. లక్ష్మి అనేది అతను చెత్తడబ్బాకి పెట్టుకున్న పేరు. చెత్తడబ్బా వెతకడమేమిటని పోలీసులు నవ్వి అవమానించి వెళ్ళగొడతారు. మహారాజా ఏడు లక్షలు లంచమిస్తానంటే ఒప్పుకుని చెత్త డబ్బా వెతకడం మొదలెడతారు.

       
ఏమిటీ చెత్తడబ్బా? అది ఎంతుకంత ముఖ్యమయింది మహారాజాకి? కూతురితో ఆ చెత్తడబ్బా కున్న సంబంధమేమిటి? పోలీసులు ఆ చెత్తడబ్బాని వెతికి పట్టుకోగలిగారా? అప్పుడేం జరిగింది? అప్పుడు బయటపడ్డ భయంకర రహస్యాలేమిటి? ఇందులో క్రిమినల్ సెల్వన్ (అనురాగ్ కశ్యప్) పాత్రేమిటి? ఇతడికి మహారాజా విధించిన  శిక్షేమిటి? ఈ ప్రశ్నలకి సమాధానాలు మిగతా కథ చూసి తెలుసుకోవాలి.

ఎలావుంది కథ

ఇది ప్రతీకారంతో కూడిన  సస్పెన్స్ థ్రిల్లర్ కథ. అయితే ప్రతీకార కథ అనేది చివరి వరకూ సస్పెన్స్ లో వుంటుంది. కథ మాత్రం లీనియర్ నేరేషన్ లో వుండదు. ముందుకీ వెనక్కీ నడుస్తూ నాన్ లీనియర్ గా వుంటుంది. చివర్లో ఈ నాన్ లీనియర్ దృశ్యాలన్నీ ఏది ఎప్పుడు ఎందుకు జరిగాయనే  ప్రశ్నలన్నిటికీ సమాధానమిస్తూ కొలిక్కి వస్తాయి. అయితే ఈ దృశ్యాల్ని క్రమపద్ధతిలో పేర్చుకుని కథని అర్ధం చేసుకోవడానికి మాత్రం మెదడుకి శ్రమ కల్గించాల్సిందే.

       
సింపుల్ గా చెప్పాలంటే ఇది విజయ్ సేతుపతి పాత్ర చెత్తడబ్బాని అడ్డు పెట్టుకుని తనకి జరిగిన అన్యాయానికి కారణమైన క్రిమినల్ ముఠాని ట్రాప్ చేసేందుకు పన్నిన పథకం. పోలీసుల సాయంతో ట్రాప్ చేసి పట్టుకున్నాక, అసలేం జరిగిందనేది అప్పుడు పొరలు పొరలుగా వీడిపోయే కథ. అంటే ఎండ్ సస్పెన్స్ అని నేరుగా తెలియకుండా ఎండ్ సస్పెన్స్ కథ నడపడం. ‘టు ఛేజ్ ఏ క్రూకెడ్ షాడో’ (1955) అనే హాలీవుడ్ మూవీ ఈ తరహా కథా సంవిధానానికి బాట వేసింది. అయితే చివర్లో విప్పాల్సిన ప్రశ్నలు ఎక్కువ వుండకూడదు. వుంటే తికమక, వాటితో మెదడుకి శ్రమా పెరిగిపోతాయి.

       
అయితే ప్రతీ వారం సస్పెన్స్ థ్రిల్లర్స్ పేరిట సినిమాలు వచ్చేసి క్రాఫ్ట్ తెలియక అపహాస్యమవుతున్న వేళ ‘మహారాజా’ ఒక మెచ్చదగ్గ ప్రయత్నమే. దర్శకుడు నిథిలన్ స్వామినాథన్ మేధో పరంగా స్క్రిప్టు మీద చాలా వర్క్ చేశాడు, కానీ కథలోంచి ఎక్కువ ప్రశ్నలు లాగి పరీక్షకి పెట్టాడు.

       
ఫస్టాఫ్ విజయ్ సేతుపతి పాత్ర పరిచయం, చెత్తబుట్ట కోసం పోలీసుల దర్యాప్తు, పోలీస్ స్టేషన్ లో సేతుపతి పడే అవమానాలు, మరో రెండు వేరే పాత్రలతో వేరే సంఘటనలు, తర్వాత ఈ సంఘటనల్లో సేతుపతి పాత్ర కూడా వున్నట్టు  ఫ్లాష్ బ్యాక్ లో రివీలవడం, ఆ పాత్రలతో యాక్షన్ సీను వగైరా వుంటాయి.

       
సెకండాఫ్ లో అనురాగ్ కశ్యప్ క్రిమినల్ పాత్ర కార్యకలాపాలతో కథలో కొత్త సంఘటనలు ప్రారంభమవుతాయి. చెత్తడబ్బా కోసం పోలీసుల వేట సాగుతూనే వుంటుంది. అనురాగ్ కశ్యప్ క్రిమినల్ అని తెలియని సేతుపతితో దృశ్యాలు వస్తాయి. చివరికి పోలీసులు నకిలీ చెత్తడబ్బా తయారు చేసి, దాని దొంగగా ఒకడ్ని చూపించేసరికి వాడితో సేతుపతి కూతురికి ముడిపెట్టి భయంకర రహస్యాలు వెల్లడవడం మొదలవుతాయి... ఇవి షాకింగ్ గా వుంటాయి. చివర్లో రివీలయ్యే కేవలం కూతురితో ఈ షాకింగ్ ఎలిమెంటే ప్రేక్షకులతో కనెక్ట్ అయి సినిమా సక్సెస్ కి దారితీసింది తప్ప...చిక్కుముడులతో వున్న కథ అర్ధమై కాదు. ఇంతా చేసి ఇది రెండుంపావు గంటల్లో ముగిసిపోయే కథ.

నటనలు- సాంకేతికాలు

తన 50వ సినిమాగా  గుర్తుండిపోయే పాత్ర నటించాడు విజయ్ సేతుపతి. గిరి గీసుకోకుండా ఎలాటి పాత్రనైనా నటించే సేతుపతి కమల్ హాసన్ బాటలో నడుస్తున్నట్టు అని పిస్తాడు. ఈ సినిమాలో ప్రతీ సీనూ అతడికి సవాలే. ఫస్టాఫ్ లో పోలీసులు తనతో ఎలా ప్రవర్తించినా, కొట్టినా బానిసలా పడుండే నటనని అత్యున్నతంగా కనబరుస్తాడు. అతడి విజృంభణ అంతా క్లయిమాక్సులోనే. రాక్షసుడవుతాడు. అంతర్లీనంగా కూతురి సెంటిమెంటుతో భావోద్వేగాల్ని రగిలిస్తూ.

       
సమాజంలో కుటుంబం వున్న మంచివాడిగా కనిపిస్తూ ఘోర నేరాలు చేసే పాత్రలో బాలీవుడ్ దర్శకుడు అనురాగ్ కశ్యప్ కూడా గుర్తుండే పాత్ర నటించాడు. చివరికి అతడి ఖాతాలో పడే శిక్ష ఘోరంగా వుంటుంది. మిగతా పోలీసుల పాత్రలు, దొంగల పాత్రలు నటించిన నటీనటులందరూ మంచి పనితనం కనబర్చారు. సాంకేతికంగా రియలిస్టికి మూవీ పోకడలతో వుంది. సంగీతం, ఛాయాగ్రహణం, యాక్షన్ సీన్లు, లొకేషన్లు, కాస్ట్యూమ్స్ వగైరా అన్నీ సహజంగా వుంటాయి.

        
ఇంతా చేసి దీన్ని కేవలం సస్పెన్స్ థ్రిల్లర్ గా ఉద్రేకపర్చి వదిలేయలేదు. చెప్పకుండానే కర్మ సిద్ధాంతం చెప్పే కథతో వుంటుంది- నువ్వు యితరులకేం చేస్తావో అదే నీకూ తిరిగొస్తుందని!

—సికిందర్

 

 

1439 : రివ్యూ

 

రచన - దర్శకత్వం : జ్ఞానసాగర్ ద్వారక
తారాగణం : సుధీర్ బాబు, మాళవికా శర్మ, సునీల్, జయప్రకాష్, లక్కీ లక్ష్మణ్, రవి కాలే, అర్జున్ గౌడ తదితరులు
సంగీతం : చైతన్ భరద్వాజ్, ఛాయాగ్రహణం : అరవింద్ విశ్వనాథన్  
బ్యానర్: శ్రీ సుబ్రహ్మణ్యేశ్వర సినిమాస్
నిర్మాత: సుమంత్ జి నాయుడు
విడుదల : జూన్ 14, 202

***

        నవ దళపతి (టైటిల్స్ లో ఇలాగే వేశారు) సుధీర్ బాబు ఒక పూర్తి స్థాయి మాస్ యాక్షన్ కి దిగాడు. చాలా ఇంటర్వ్యూలిచ్చి, ప్రమోట్ చేసి సినిమాని ప్రేక్షకుల ముందుకు తెచ్చాడు. జ్ఞాన సాగర్ ద్వారక దర్శకత్వం బాధ్యత తీసుకున్నాడు. అయితే వరస పరాజయాలతో సతమతమవుతున్న సుధీర్ బాబుకి ఈ కొత్త నేపథ్యపు మాస్ యాక్షన్ ప్రేక్షకుల్లోకి ఎంతవరకు వెళ్తుంది? ఈ సారైనా పాస్ మార్కులు పడతాయా? ఇందులో ప్లస్ మైనస్ లేమిటి? ఇవి తెలుసుకుందాం...

కథ

చిత్తూరు జిల్లా  కుప్పంలో తిమ్మారెడ్డి(లక్కీ లక్ష్మణ్ ), అతడి తమ్ముడు బసవ (రవి కాలే), కుమారుడు శరత్ రెడ్డి(అర్జున్ గౌడ) అరాచకాలు చేస్తూంటారు. ప్రజల భూములు లాక్కుని చంపడం కూడా చేస్తూంటారు. ఇక్కడికి వచ్చి సుబ్రహ్మణ్యం (సుధీర్ బాబు) పాలిటెక్నిక్ కాలేజీలో మెకానికల్ లాబ్ అసిస్టెంట్ గా ఉద్యోగంలో చేరతాడు. ఈ కాలేజీలోనే టీచర్ (మాళవికా శర్మ) ని ప్రేమిస్తాడు. ఇక్కడే సస్పెండ్ అయిన హెడ్ కానిస్టేబుల్ పళని స్వామి (సునీల్) తో స్నేహం ఏర్పడుతుంది. ఒకరోజు శరత్ రెడ్డి మనిషితో గొడవపడి కొట్టడంతో సస్పెండ్ అవుతాడు సుబ్రహ్మణ్యం. ఉద్యోగం పోయి, ఇంటిదగ్గర తండ్రి (జయప్రకాష్) చేసిన అప్పులు మీద పడి ఏం చేయాలా అని ఆలోచిస్తూంటే, పళని స్వామి దగ్గర ఒక పిస్తోలు కనిపిస్తుంది. దాని డిజైన్ కూడా చూపిస్తాడు పళని స్వామి. ఇక వాటి సాయంతో సుబ్రహ్మణ్యం డబ్బు సంపాదనకి నాటు పిస్తోళ్ళు తయారు చేయడం మొదలెడతాడు. వాటిని శరత్ రెడ్డికే అమ్ముతాడు. దీంతో అటు తమిళనాడు నుంచి గన్స్ సప్లై చేసే రాజ మాణిక్యంతో  గొడవలొస్తాయి. ఈ గొడవల్లో సుబ్రహ్మణ్యం తండ్రిని చంపబోయిన శరత్ రెడ్డిని సుబ్రహ్మణ్యం కొట్టడంతో అతను కోమాలోకి పోతాడు. దీంతో తిమ్మారెడ్డి సుబ్రహ్మణ్యం మీద పగబడతాడు.

       
ఇప్పుడు సుబ్రహ్మణ్యం ఏం చేశాడు? తిమ్మారెడ్డినీ, అతడి తమ్ముడ్నీ ఎలా ఎదుర్కొన్నాడు? ప్రజలంతా సుబ్రహ్మణ్యంని దేవుడుగా ఎందుకు కొలిచారు? ప్రజల కోసం సుబ్రహ్మణ్యం ఏం చేశాడు? ఇదీ మిగతా కథ.

ఎలావుంది కథ

వూళ్ళో  అరాచక శక్తుల్ని అణిచే, ప్రజలంతా ఆ అరాచక శక్తుల్ని అణిచిన కథానాయకుడ్ని కొలిచే, వందల సార్లు వచ్చిన రొటీన్ కథకి గన్ కల్చర్ /స్మగ్లింగ్ ని జోడించి కొత్త కథగా తయారు చేశారు. ఈ అరాచక శక్తుల పాత్రల్ని ‘కేజీఎఫ్’ సినిమాల్లోంచి దిగుమతి చేసుకున్నారు. గన్ కల్చర్ నార్త్ ఇండియాకి చెందినదైనా, దీన్ని తెలుగు నేటివిటీలోకి  తీసుకురావడానికి కేజీఎఫ్, పుష్ప  సినిమాల ఛాయల్ని అద్దారు. ఫలితంగా ఇది ఈ మధ్య వచ్చి ఫ్లాపయిన రూరల్ యాక్షన్ సినిమాలకి భిన్నంగా తయారయ్యింది. రెండున్నర గంటలు సాగినా బోరుకొట్టకుండా పకడ్బందీ చిత్రీకరణతో రూపొందింది. బలమైన సన్నివేశాలు, డైలాగులూ ఆద్యంతం కళ్ళు తిప్పుకోనివ్వకుండా చేస్తాయి. అయితే కరువయ్యిందేమిటంటే ఆ సన్నివేశాల్లో భావోద్వేగాలు. డ్రామాలో భావోద్వేగాలు, యాక్షన్ లో భావోద్వేగాలూ లోపించాయి. అలాగే సస్పెన్స్, టెన్షన్, థ్రిల్స్, కథలో మలుపులూ లేక- కేవలం ఒక నాన్ స్టాప్ యాక్షన్ సినిమాగా తయారయ్యింది. ఒక రొటీన్ ప్రతీకార కథకి గన్ కల్చర్, కేజీఎఫ్, పుష్పల హంగులు కూర్చి, భావోద్వేగాల పరమైన లోపాల్ని కవర్ చేస్తూ, అనుభవజ్ఞుడిలా తీర్చిదిద్దాడు దర్శకుడు.

       
ఫస్టాఫ్ పూర్తిగా కథని సెటప్ చేయడంతో సరిపోతుంది. పోలీస్ స్టేషన్లో సునీల్ పాత్ర చెప్పే ఫ్లాష్ బ్యాక్ తో ప్రారంభమవుతుంది. వూళ్ళో అరాచకాలు, ఆ అరాచకాల మధ్య సుధీర్ బాబు పాత్ర దిగడం, పాలి టెక్నిక్ లాబ్ లో పనిచేస్తూ టీచర్ ని ప్రేమించడం, ఒకడ్ని కొట్టడం, దాంతో ఉద్యోగం పోవడం, ఇంటికెళ్ళి  పోయి అప్పులపాయిన తండ్రిని ఓదార్చి తిరిగి రావడం,  సునీల్ పాత్ర దగ్గర పిస్తోలు చూసి నాటు పిస్తోళ్ళు తయారు చేయడం వగైరా జరుగుతూ, అరాచక శక్తులతో గన్ బిజినెస్, దీంతో తమిళనాడు గన్ స్మగ్లర్ తో గొడవలు, తండ్రి మీద హత్యా ప్రయత్నం, ఆ తర్వాత విలన్ తమ్ముడ్ని కొట్టి కోమాలోకి పంపడం - ఇదంతా ఫస్టాఫ్ కథ.

       
ఈ ఫస్టాఫ్ కథలో లోపాలేమిటంటే, గన్స్ తయారు చేసి వూళ్ళో అరాచక శక్తులకే అమ్మడం, దాంతో ఇంకింత రెచ్చిపోయి ఆ అరాచక శక్తులు అక్కడి జనాల్నే  కాల్చి చంపడం. ఇది సుధీర్ బాబు పాత్రని దెబ్బతీసే కథనం. అప్పుడైనా తప్పు తెలుసుకుని,  గన్స్ తయారీ ఆపేసి, అరాచక శక్తుల మీద పోరాటం ప్రకటించడు. డబ్బు కోసం ఇంకా భారీ యెత్తున గన్స్ తయారు చేసి ఇతరప్రాంతాలకి స్మగ్లింగ్ చేస్తూంటాడు. ఇక తమిళనాడు గన్ స్మగ్లర్ వచ్చి గొడవ పడడం దేనికో అర్ధం కాదు. సుధీర్ బాబు పాత్ర వూళ్ళోకి రాకముందు ఈ గన్ స్మగ్లర్ అరాచక శక్తులకి గన్స్ అమ్మకుండా ఏం చేస్తున్నాడు? ఇప్పుడెందుకొచ్చి గొడవ పడుతున్నాడు?

        
ఇక సెకండాఫ్ పూర్తిగా పగబట్టిన విలన్ కథ. ఈ కథలో సుధీర్ బాబు వూరికి విలన్ పీడా తొలగించి దేవుడవుతాడు. పాత కథే కాబట్టి సెకండాఫ్ ఏం జరుగుతుందో తెలిసిపోయే కథ. కాకపోతే పక్కదోవ  పట్టకుండా కథ చెప్పిన విధానం -దీని వేగం - హై ఓల్టేజ్ యాక్షన్ కూర్చోబెడుతాయి. సుధీర్ బాబు అన్ని  రకాల ఆయుధాలు ఎలా తయారు చేశాడో లాజిక్ అడగకూడదు. మిలిటరీ ఆయుధాలు కూడా అతడి చేతిలో వుంటాయి. క్లయిమాక్స్ యాక్షన్ సీన్లో ఇంకో భారీ ఆయుధం తీస్తాడు. ముగింపు మాస్ ప్రేక్షకులకి మాంచి కిక్.

నటనలు- సాంకేతికాలు

కొత్త లుక్ తో, చిత్తూరు భాషతో సాధారణ యువకుడి పాత్రని సుధీర్ బాబు బాగానే పోషించాడు. ఆ ఉగ్ర సుబ్రహ్మణ్యం పాత్ర పోరాటానికి తగిన భావోద్వేగాలు కూడా వుంటే నటన ఆకట్టుకునేది. ఇంటర్వెల్లో విలన్ తమ్ముడ్ని కొట్టి కాన్ఫ్లిక్ట్ ప్రారంభించినప్పుడు అది డొల్లగా వుంది. అప్పటికి ఒక లక్ష్యం, దేన్నైనా పణంగా పెట్టి తీసుకున్న రిస్క్ వంటి గోల్ ఎలిమెంట్స్ కాన్ఫ్లిక్ట్ లో లేకపోవడం వల్ల భావోద్వేగాలు పుట్టకుండా పోయాయి.

        ‘
శివ’ లో స్టూడెంటైన నాగార్జున మాఫియా రఘువరన్ అనుచరుడు జేడీని కొట్టి కాన్ఫ్లిక్ట్ ని ప్రారంభించినప్పుడు- అందులో ఒక సామాన్య స్టూడెంట్  గా నేరుగా ఓ పెద్ద మాఫియాతో పెట్టుకుంటూ క్రియేట్ చేసిన ఆందోళన, దీంతో అన్న కుటుంబాన్ని పణంగా పెడుతున్న రిస్కు వగైరా వర్కౌటై భావోద్వేగాలు బలంగా పుట్టుకొచ్చాయి.

        
సుధీర్ బాబు విలన్ తమ్ముడ్ని కొట్టడంవల్ల తనకెదురవబోయే ఏ అపాయాల జాడా లేదు. అందువల్ల తర్వాత కథకి ఏ భావోద్వేగాలూ పుట్టకుండా కాన్ఫ్లిక్ట్ డొల్లగా తయార

య్యింది. కష్టపడి బాగా నటించాడు. అయితే జీవంకూడా వుండాలి.

       
హీరోయిన్ మాళవికా శర్మ టెంప్లెట్ పాత్ర నటించింది. ఫస్టాఫ్ లో హీరో ప్రేమకి పనికొచ్చేట్టు, క్లయిమాక్స్ లో విలన్ కి పనికొచ్చేట్టు కన్పించింది.  సుధీర్ నేస్తం గా సునీల్ గుంభనంగా కన్పించే పాత్ర పోషించాడు సీరియస్ గా. సుధీర్ తండ్రి పాత్రలో జయప్రకాష్ బాధిత పాత్ర హింసాత్మక దృశ్యాలతో నటించాడు.  ఇక విలన్ పాత్రధారులు ముగ్గురూ కేజీఎఫ్ తరహా క్రౌర్యాన్ని ప్రదర్శించారు.

       
సినిమాకి ప్రధాన బలం సాంకేతికాలు. చైతన్ భరద్వాజ్ సంగీతంగానీ, అరవింద్ విశ్వనాథన్ ఛాయాగ్రహణంగానీ టాప్ క్లాస్ గా వున్నాయి. ఆంజనేయులు సమకూర్చిన యాక్షన్ సీన్స్ ఇంకో ఆకర్షణ. జ్ఞాన సాగర్ దర్శకత్వం వీటికి తీసిపోకుండా వుంది. అయితే ఓపెనింగ్స్ చూశాక సినిమాని ఇంకా బలంగా ప్రమోట్ చేయాల్సిన అవసరం కనపడుతోంది.

—సికిందర్