రచన- దర్శకత్వం : సుధా కొంగర
తారాగణం : వెంకటేష్‌., రుతికా సింగ్‌, ముంతాజ్‌ సర్కార్, నాజర్‌., జాకీర్ హుస్సేన్, తనికెళ్ల భరణి, రఘుబాబు, అనితా చౌదరి తదితరులు
మాటలు : హర్షవర్ధన్, సంగీతం: సంతోష్‌ నారాయణన్‌ , ఛాయాగ్రహణం: శక్తివేల్‌
బ్యానర్ :  వై నాట్‌ స్టూడియోస్‌
నిర్మాత: ఎస్‌.శశికాంత్‌
విడుదల : మార్చి 31, 2017
          ***
    గత రెండు నెలలుగా విడుదల వాయిదా పడుతూ పడుతూ మొత్తం మీద ఈ మండుటెండల్లో ప్రేక్షకుల తలుపు తడుతున్న  వెంకటేష్ ‘గురు’, బాక్సాఫీసు క్రీడకి  గెలుపు పాయింట్లు ముందే స్కోరు చేసేసుకుంది. దీని తమిళ- హిందీ మాతృకలే  దీని స్కోరేమిటో ముందే చెప్పేశాయి. కాబట్టి ఇప్పుడు ప్రత్యేకంగా ఏమిటి రిజల్టు, ఏమిటి టాక్ అని ఎంక్వైరీ చేసుకోనవసరం లేదు- ది బిగ్ ‘వీ’ ఈజ్ ఆల్రెడీ రిటెన్ ఆన్ ది ఎంటైర్ వాల్!

          ‘దృశ్యం’, ‘గోపాలా గోపాలా’ లాంటి విజయాల్లో వయసుకి తగ్గ పాత్రలు వేసిన వెంకటేష్, ఆ తర్వాత  ‘బాబు బంగారం’ లో కుర్ర పాత్రతో కుదేలయ్యాక, తిరిగి ఇప్పుడు వయసుని గౌరవించుకుంటూ గురువు పాత్ర పోషించారు. గౌరవనీయ పాత్రలు రీమేకులతోనే సాధ్యపడుతున్నాయి తనకి. 

          మణిరత్నం సహాయకురాలు, విశాఖపట్నం వాసి  సుధా కొంగర ఈ రీమేక్ చేస్తూ తెలుగులో అన్ని ఫార్ములా వెటకారాల్నీ పటాపంచలు చేశారు. క్లాస్- మాస్ ప్రేక్షకులతో భారీ ఓపెనింగ్స్ ని సాధించుకుంటూ – ఏదో రొటీన్ నే వూహించుకుంటూవచ్చిన ప్రేక్షకుల్ని అనూహ్యంగా ఈ సీరియస్ స్పోర్ట్స్ డ్రామాతో కట్టి పడేశారు – ఇటీవలే ఇలాటిదే  ‘దంగల్’ ని తెలుగులో కూడా చూసివున్న  ప్రేక్షకుల్ని నోరెత్తకుండా చేశారు. 

          ‘గురు’ - ఒక డిఫరెంట్ స్పోర్ట్స్ డ్రామా- జీవితంలో ఓ దిశా దిక్కూ లేకుండా కాలం  గడిపేసే స్లమ్ డాగ్స్ కి, అండర్ డాగ్స్ కీ ఒక ధృవ నక్షత్రం. కాకపోతే  ఈ జీవులకి చేయూత నిచ్చే వ్యక్తులు, వ్యవస్థా ఎవరా అని ఎదురు చూడాల్సిందే. సినిమాల్లో తప్ప అలాటి గురువెవరో  ‘మొండెదవ’ గా ఎప్పుడో గానీ రాడు. ఇప్పుడొచ్చిన  ‘మొండెదవ’ మామూలు ‘మొండెదవా’ కాదు. వీడి కథేమిటో ఒకసారి తెలుసుకుందాం...

కథ 

      తన పొగరురుతో, మొండితనంతో బాక్సర్ గా ఎదగలేకపోయిన ఆదిత్య (వెంకటేష్),  విమెన్స్ బాక్సింగ్ ఫెడరేషన్ లోనూ అదే ప్రవర్తనతో ట్రైనర్స్ ని  ముప్పు తిప్పలు పెడుతూంటాడు. ఇది తట్టుకోలేక అమ్మాయిలు లైంగిక హింస కంప్లెయింట్ పెడతారు.  ఫెడరేషన్ బాస్ దేవ్ ఖత్రీ  (జాకీర్ హుస్సేన్) ఇదే ఛాన్సు అనుకుని ఆదిత్యని వైజాగ్ కి ట్రాన్స్ ఫర్ చేసి పారేస్తాడు. దేవ్ తో ఆదిత్యకి పాత పగలు చాలానే  వుంటాయి.

          వైజాగ్ వచ్చిన ఆదిత్య,  మార్కెట్లో కూరగాయలమ్మే రఫ్ అండ్ టఫ్ కూలీ పిల్ల రామేశ్వరి అలియాస్ రాముడు (రుతికా సింగ్) లో వీధి పోరాటాల, సిగపట్ల మాస్ టాలెంట్ చాలా వుందని పసిగట్టి, తనే రోజుకి ఐదొందలు ఎదురిచ్చుకుంటూ బలవంతంగా ట్రైనింగ్ ఇప్పిస్తూంటాడు. తను మొండి అయితే ఆమె జగమొండి. ఏ మాత్రం మంచీ మర్యాదా వుండదు. పరువు  తీసి మాటాడినా దులుపుకుంటాడు. 

        ఈమెకి తల్లిదండ్రులు (రఘుబాబు, అనితాచౌదరి) లతో బాటు, ఓ ఆక్క లక్ష్మి (ముంతాజ్ సర్కార్- విఖ్యాత దివంగత మ్యాజిషియన్ పీసీ సర్కార్ కుమార్తె) వుంటుంది. బాక్సింగ్ లో ఈమెకి ప్రవేశమున్నా ఆదిత్య  రాముడునే ప్రోత్సహిస్తాడు. రాముడు ఇక అదిత్యని వదిలించుకుందామని అనుకున్నప్పుడు- తనకోసం రాముడు చేసిన ఒక త్యాగం తెలుసుకుని మనసు మార్చుకుంటుంది- ఆ మార్చుకున్న మనసు ఇంకెటో  వెళ్ళిపోయి మ్యాచ్ ఒడి- ఆదిత్య  ఆగ్రహానికీ  వెలివేతకీ గురవుతుంది.  

        మళ్ళీ ఇద్దరి మధ్య ఎలా సఖ్యత కుదిరిందీ,  ఆమెని వరల్డ్ ఛాంపియన్ గా చేయడానికి ఆదిత్య ఎలా సంఘర్షించాడూ, మధ్యలో దేవ్ ఆడిన గేమ్ ఏమిటీ...మొదలైనవి మిగతా కథలో తెలిసే అంశాలు. 

ఎలా వుంది కథ  |

       
        స్పోర్ట్స్ జానర్ కూడా ఓ టెంప్లెట్ లోనే వుంటుంది. ఓ క్రీడలో శిక్షణ ఇప్పియ్యడం, క్రీడా రాజకీయాలతో సంఘర్షించడం, చివరికి స్టేడియంలో ఛాంపియన్ గా గెలవడం. ఇదీ ఈ చట్రంలో వున్న కథే. కాకపోతే కమర్షియల్ ఫార్ములాలకి దూరంగా రియలిస్టిక్ గా చూపించారు. ఇదే దర్శకురాలి తమిళ ‘ఇరుధి సుత్రు’ (ఫైనల్ రౌండ్), హిందీ ‘సాలా ఖదూస్’ (మొండెదవ) లకి తెలుగు రీమేక్ అయిన ఈ కథ ఇంకో దర్శకుడి చేతిలో పడితే ఏమయ్యేదో గానీ- ఒరిజినల్ దర్శకురాలి ఒరిజినాలిటీ అంతా యీ రిమేక్ కి చాలా కలిసివచ్చింది. క్రీడ అంటే క్రికెట్టే అన్నట్టు తయారైన పరిస్థితుల్లో ఇలాటి సినిమాలే ఇతర క్రీడలని జనాలకి పరిచయం చేస్తూ వాటి ప్రశస్తిని చాటుతున్నాయి. 

ఎవరెలా చేశారు 

          మొండోడుగా వెంకటేష్  చాలా ప్రభావశీలంగా నటించిన పాత్ర ఇది. దర్శకుడి/ దర్శకురాలి విజన్ ని మన్నిస్తే  సీనియర్ స్టార్స్ తామూహించని ఎత్తులకి ఎదుగుతారని నిరూపించిన నటన ఇది.  క్రీడా జీవితంలో ఓడిపోయాడు, పెళ్ళాం లేచిపోయింది, అధికారులతో తగాదాలు పెట్టుకుంటాడు, ట్రైనర్స్ ని తన్నితగిలేసి  ట్రైనింగ్ ఇప్పిస్తాడు, తాగుతాడు, ఛీ కొట్టించుకునేలా వుంటాడు- ఇదంతా అర్ధం జేసుకుంటే-  ‘ఆమెకి గోల్డ్ మెడల్ సాధించి పెట్టడం కోసం నూట ఇరవై కోట్ల మంది జనం కాళ్ళు నాకమన్నా నాకే’ పని రాక్షసుడు అతడిలో కన్పిస్తాడు,  అర్ధం జేసుకోకపోతే  మొండెదవలా కన్పిస్తాడు. 

          రెండోదేమిటంటే, హీరోయిజమంతా తన పాత్రకే వుండాలన్న నియమం పెట్టుకోకుండా, హీరోయిన్ కి కావాల్సినంత రంగస్థలాన్ని వదలడం. అభిమానుల్లో తన ఇమేజికి దెబ్బ తగులుతుందనే అనుమానాలేవీ పెట్టుకోకుండా, ఆమె బూతుమాటలన్నీ పడడం. తెలుగు ప్రేక్షకులకి తొలిసారిగా ఒక సీనియర్ స్టార్ ఇంత పచ్చి పాత్రలో కన్పించడం, కదలకుండా కూర్చోబెట్టేయడం. దీంతో వెంకటేశ్ ఇప్పుడే నిజానికి విక్టరీ వెంకటేష్ అయినట్టు. 

          తమిళ హిందీల్లో నటించిన రుతికా సింగే హీరోయిన్ గా నటించింది. ఆమె మాట, చేత, తాటతీత మాస్ క్యారక్టర్ ని  ప్రేక్షకులు వూహించని స్థాయికి తీసికెళ్ళి పోయాయి - మూస ఫార్ములా కృత్రిమత్వం లేకుండా. ఇవన్నీ చేస్తూనే జీవంతో గుండెలు బరువెక్కిం చనూ గలదు తను.

          అక్కపాత్రలో ముంతాజ్,  చెల్లెలి మీద ఈర్శ్యాసూయల్ని పతాకస్థాయికి తీసికెళ్ళే సన్నివేశం మరపురానిది. ఇప్పుడొస్తున్న యువ హీరోయిన్లలో  కూడా చాలా  ప్రతిభ వుంటోంది. నూటికి తొంభై తొమ్మిది శాతం సినిమాల్లో వీళ్ళకి కరివేకు పాత్రలిచ్చి ఇంటికి పంపేస్తున్నారు. ఇక ప్రతినాయక దేవ్ ఖత్రీ పాత్రలో జాకీర్ హుస్సేన్ మెత్తగా పిండాలు పెడుతూంటాడు. జ్యూనియర్ కోచ్ గా నాజర్ ది కామెడీ పాత్ర.

          సాంకేతికంగా ఉన్నత స్థాయిలో వుంది- ఈ రియలిస్టిక్ జానర్ కి తగ్గ విజువల్స్ తో,  మ్యూజిక్ తో – కంటెంట్ ని సానబడుతూ కత్తిలా తయారుచేసిన సాంకేతిక ఔన్నత్యమిది...

 చివరికేమిటి 

       దర్శకురాలు సుధా కొంగర ఒకే కథతో మూడు సినిమాలు చేయడం – అందులో మొదటి రెండిట్లో దొర్లిన చిన్న చిన్న లోపాలు దీంట్లో సవరించుకోవడమూ ఒక ఎడ్యుకేషన్ లాగే ఉపయోగ పడిందామెకి. దృశ్యమాధ్యమాన్ని ఎలా వాడుకోవాలో ఎనలేని అవగాహన వుందామెకి. పఫర్ఫుల్ సినిమా ఎలా తీయాలో కూడా తెలుసామెకి. జానర్ మర్యాదని జానర్ మర్యాదతోనే  వుంచడమూ బాగా తెలుసామెకి. అయితే ప్లాట్ పాయింట్  వన్ దగ్గర హీరోయిన్ కి గురు మీద ప్రేమ కలగడమనే జానర్ మర్యాద తప్పిన  ఫార్ములా మూస వాసనే మింగుడు పడనిది. దీన్ని ఇంకో పావుగంట ఇంటర్వెల్ వరకూ భరించక తప్పదు మనకి. అప్పుడు ఆమెకి గురు క్లాసు పీకడంతో  ఈ మూస రొమాంటిక్ యాంగిల్ బాధ తొలగిపోతుంది. గురువు మీద అమ్మాయిలకి ఆకర్షణ పుట్టొచ్చు. అందులోనూ అక్షరం ముక్కరాని స్లమ్ డాగ్ పిల్లకి. కానీ గురువు గురువే. ఇందువల్ల మళ్ళీ జానర్ మర్యాద పట్టా లెక్కుతుంది. ప్లాట్ పాయింట్ టూ రాగానే, మళ్ళీ హీరోయిన్- నువ్వు రిజైన్ చేశావంటే ప్రేమే కదా అంటుంది- ఇక్కడ చాలా బ్యాడ్ గా కన్పిస్తుంది ఈ మాటనేసిన తను. ఇంతే కాదు- క్లయిమాక్స్ లో సదరు  ‘గురు’ గ్లామరస్ గా తయారై  కూడా వచ్చేస్తాడు!  ముగిస్తూ వీళ్ళు లవర్స్ అనే అర్థాన్నే ఇచ్చారు. ఈ రియలిస్టిక్ కథలో సినిమాటిక్ ట్విస్టులు ప్రేక్షకులు డిమాండ్ చేయలేదే- ఎందుకు తొందరపడాలి. స్పోర్ట్స్ లో సెక్సువల్ హెరాస్ మెంట్ అంటూ చెప్పారు బాగానే వుంది. కానీ ముగింపు చూస్తే  కోచ్ లతో ఎఫైర్సే క్రీడాకారిణులకిశ్రీరామ రక్ష అన్నట్టుగా,  లొంగిపోయినట్టు వుంది...

-సికిందర్ 

        ఎన్ని ఉగాదులు వచ్చినా తెలుగు సాంప్రదాయంలో రీమేక్ ఒకటే వుంటుంది,  హాలీవుడ్ సాంప్రదాయంలో రీబూట్ కూడా వుంటుంది. పాత  తెలుగుని రీమేక్ చేయడం తెలుగులో ఎప్పుడోగానీ జరిగే పనికాదు. హాలీవుడ్ లో హాలీవుడ్ సినిమాలనే రీమేక్ చేయడమో, లేదా రీబూట్ చేయడమో తరచూ జరిగేపని. ప్రస్తుతం హాలీవుడ్ నుంచి హాలీవుడ్ రీమేకులు గానీ, రీబూట్స్  గానీ 36 జరుగుతున్నాయి! తెలుగులో తమిళం నుంచి ఎక్కువగా రీమేకులు జరుగుతూంటాయి. కానీ రీబూట్ ఒక్కటీ జరగదు. రీమేకింగ్ నే తెలుగు నేటివిటీకి, స్టార్ కనెక్టివిటీకీ ఉపరితలంలో  కొన్ని మార్పు చేర్పులు చేసి పూర్తిచేస్తున్నారు. రీమేక్ తప్ప రీబూట్ లేకపోవడంతో  రీమేక్ కి పనికి రాని సినిమాలని కూడా  ఉపరితలంలో తాపీ పనిచేసి  రీమేక్ చేసేస్తున్నారు. నిజానికి ఇలాటి రీమేక్ కి పనికి రాని సినిమాలని రీబూట్ చేయాలి. కానీ రీమేక్ చేయాలంటేనే ఎన్నో సందేహాలతో వుండే ‘రీమేకిష్టులు’, మూలంలో ఒరిజినల్ స్వరూప స్వభావాల్ని మార్చివేసే రీబూటింగ్ ని అస్సలూహించలేరు. రీమేక్ తో  వర్కౌట్ కాని  సినిమాలని కూడా రీమేకే చేసేసి చేతులు కాల్చుకోవడం అలవాటుగా చేసుకున్నారు. హాలీవుడ్ లో కొన్ని సినిమాలని రీమేక్  చేస్తే సరిపోయినా కూడా, రీబూట్ చేసి మరీ ఇంకింత సక్సెస్ ని సాధిస్తున్నారు. 

          పరభాషల నుంచి రీమేకులే గాకుండా, పాత తెలుగు సినిమా కథల్నేఅటు ఇటు మార్చి రీసైక్లింగ్ చేస్తూంటారు. కనీసం ఈ సందర్భంలోనైనా రీబూట్ గురించి ఆలోచించడం లేదు. సాయి ధరమ్ తేజ్ నటించిన ‘విన్నర్’ పాత రీసైక్లింగ్ కథ అని తెలిసిందే. అందులో కొత్తగా గుర్రాల్ని పెట్టి జాక్ పాట్  కొట్టవచ్చనుకున్నారు. కానీ అదే కథని రీబూట్ చేసివుంటే (ఎలా చేయవచ్చో ఇదే బ్లాగులో ఫిబ్రవరి 26 నాటి ‘విన్నర్’ కి సంబంధించిన ఆర్టికల్ లో సందేహిస్తూనే  రాశాం- ఎందుకంటే,  రీబూటింగ్ అనే ప్రక్రియ ఒకటుందని తెలీకపోతే, ఇదేదో వ్యాసకర్త పెడుతున్న నస అనుకునే అవకాశముంది) బాక్సాఫీసు హిట్ కొట్టే వాళ్ళేమో.  

          కానీ పవన్ కల్యాణ్  సహా మెగా హీరోలు  రీబూట్ కి ఒప్పుకునే స్టార్స్  కారు. తమతమ సినిమాలు  ఫ్యాన్స్ ని దృష్టిలో పెట్టుకుని అవే  రొటీన్ మసాలాగా,  అవే జడప్రాయమైన పరిధుల్లో వుండాలని కోరుకుంటారు. కాబట్టి ఇప్పుడు అలాటి ఒక రొటీన్,  జడప్రాయమైన మసాలాగా,  రీమేక్ చేసిన పవన్ కల్యాణ్  నటించిన ‘కాటమరాయుడు’ గురించి చెప్పుకోవాల్సి వస్తే,   రీబూట్  గురించే చాలా చెప్పుకోవాలి. 

       కానీ రీబూట్ కి  అంగీకరించని హీరోల సినిమాల్ని ఆ దృష్ట్యా స్క్రీన్ ప్లే సంగతులు చెప్పుకుని లాభంలేదు. కాబట్టి  ‘కాటమరాయుడు’ రీబూట్ సంగతి పక్కన పెడదాం; అయినా దీన్నొక రీమేక్ గానే స్క్రీన్ ప్లే సంగతులు చెప్పుకోవడానికి కూడా ఏమీ కన్పించడం లేదు. ఎందుకంటే ఇది టెంప్లెట్ రూపంలో వున్న రీమేక్. టెంప్లెట్ సినిమాల్లో స్క్రీన్ ప్లే పరంగా చెప్పుకునేది ఏమీ వుండదని,  వాటి గురించి రాయడం కూడా ఈ మధ్య మానుకున్నాం. టెంప్లెట్ సినిమాల అందాల్ని కనిపెట్టి బి, సి సెంటర్ల ప్రేక్షకులే తిప్పి కొట్టగల సినిమా అక్షరాస్య సమర్ధులుగా ఎదుగుతున్నాక, ఈ మూడు నెలల్లోనే వరసగా విన్నర్, గుంటూరోడు, నేనోరకం, మా అబ్బాయి- అనే నాల్గుకి నాల్గూ టెంప్లెట్ సినిమాలూ అట్టర్ ఫ్లాపయ్యాయి. తాజాగా వీటి సరసన ‘కాటమ రాయడు’ చేరింది. సామాన్యుడు కూడా నేటి డిజిటల్ ప్రపంచానికి అలవాటై ముందుకు పోతూంటే, సినిమాలు సామాన్యుడికి వెనకబడే వుంటున్నాయి. 

          బోరు కొడుతున్న టెంప్లెట్ సినిమాలంటే- ఒక యాక్షన్ సీనుతో హీరో ఎంట్రీ, గ్రూప్ సాంగ్, హీరోయిన్ని పడేసే కామెడీ లవ్ ట్రాక్, టీజింగ్ సాంగ్, హీరోయిన్ లవ్ లో పడ్డాక డ్యూయెట్, విలన్ ఎంట్రీ, దాంతో ఇంటర్వెల్. ఇక సెకండాఫ్  లో హీరోయిన్ కట్ అయిపోయి విలన్ తో కథ మొదలు, అప్పుడప్పుడు హీరోయిన్ తో సాంగ్స్, అప్పుడప్పుడు విలన్ ఎటాక్స్, హీరోయిన్ తో ఒక ఫోక్ సాంగ్, విలన్ తో క్లయిమాక్స్, ముగింపు. తనతో ఈ పరిహాసం సామాన్యుడు భరించే పరిస్థితుల్లో లేకనే తిప్పి కొడుతున్నాడు. అయినా సామాన్యుడి బాధ పట్టించుకోకుండా దుందుడుకుగా ‘కాటమ రాయుడు’ కూడా ఇలాటి టెంప్లెట్ సినిమాగానే  వచ్చింది. 

         ఇప్పుడు ప్రస్తావన వచ్చింది గాబట్టి రీబూట్ గురించి క్లుప్తంగా చెప్పుకుంటే-   రీబూట్ అంటే  ఓ సినిమాలోని పాయింటు మాత్రమే తీసుకుని, ఆ బీజ స్థాయి నుంచీ మొత్తమంతా కొత్తగా నిర్మించుకు రావడం. రీసైక్లింగ్ ‘విన్నర్’ నే తీసుకుంటే- చిన్నప్పుడు తండ్రీ తాతల వివక్షకి గురై పారిపోయిన హీరో- ఇంకోవైపు వ్యాపారంలో కోట్లకి పడగెత్తిన తాతా తండ్రులు – ఈ పాత పాయింటునే  ఈ కాలానికి తగిన కథనంతో కొత్తగా చెబితే రీబూట్ చేసినట్టు. 1954 నాటి ఆల్ఫ్రెడ్ హిచ్ కాక్  Rear Window ని  2007 లో Disturbia గా రీబూట్ చేస్తే హిట్టయ్యింది. బ్యాట్ మాన్ బిగిన్స్, స్టార్ ట్రెక్, కేసినో రాయల్, అమేజింగ్ స్పైడర్ మాన్, రైజ్ ఆఫ్ ది ప్లానెట్ ఆఫ్ దిఏప్స్...ఇవన్నీ రీబూట్ చేసిన అనేక హిట్స్ లో కొన్ని. 

          అదే రీమేక్ అంటే,  ఆ మాతృకలో వున్న  పాయింటు సహా మొత్తమంతా యథాతథంగా వుంచడం. పైపైన కొన్ని మార్పు చేర్పులు చేస్తే చేయొచ్చు, బేసిక్ పాయింటు జోలికి పోవడం వుండదు. ఇప్పుడు ‘కాటమ రాయుడు’ రీమేక్ కోసం తీసుకున్న తమిళ  ‘వీరమ్’ సంగతి. 2014 లో ఇది అక్కడ మంచి ఫాలోయింగ్ వున్న సీనియర్ స్టార్ అజిత్ తో హిట్టయ్యింది. నెరిసిన జుట్టుతో, కొన్ని పాటల్లో తప్ప - సాంతం తమిళ సాంప్రదాయపు పంచకట్టుతో అతను పాత్ర పోషించాడు.  ఇదీ అతను ఈ సినిమాకి తన వంతుగా కంట్రిబ్యూట్ చేసిన తనదైన  యూనిక్ సెల్లింగ్ పాయింట్ (యూఎస్పీ). ఇంకా తమన్నా అనే ఒక హాట్ స్టార్, అప్పటి మార్కెట్ పరిస్థితులూ ఇవీ దాని విజయానికి తోడ్పడి ఉండొచ్చు. కథగా ఇందులో కొత్త ఏమీ లేదు. పైగా ఇది స్క్రీన్ ప్లే కూడా కాదు. తమిళంలో హిట్టయింది కాబట్టి తెలుగులో డబ్బింగ్ చేసి విడుదల చేశారు. ఓ ఛానెల్లో కూడా ప్రసారమయ్యింది. అయినా పవన్ తో దీన్ని రీమేక్ చేయడానికి పూనుకున్నారు- డబ్బింగూ, ఛానెల్లో ప్రసారమూ ఇవన్నీ పవన్ స్టార్ డమ్ ధాటికి నిలబడవనే అనుకుందాం;  కథో పాత్రో తన స్టార్ డమ్ తో అద్భుతాలు చేస్తాయనే నమ్మకంతో రీమేక్ కి పూనుకున్నారనే అనుకుందాం – అయితే పాత్ర ని అజిత్ తన యూఎస్పీ గా మార్చేసినట్టు- పవన్ అలాటి దేమీ చేయలేదు.  అజిత్ ఆ గెటప్ లో బాగా వయసుపై బడిన వాడిలా వుంటాడు- అతడిలో  హీరోయిన్ తండ్రి అల్లుణ్ణి చూడడం ఎబ్బెట్టుగానే వుంటుంది. ఈ ముసలివాడితో హీరోయిన్ రోమాన్స్ ఎలా చేస్తోందని కూడా అన్పిస్తుంది. కానీ అతడిది అంత పెద్ద వయసు కాదనీ, చిన్న వయసులోనే ఆహారపుటలవాట్ల వల్ల జుట్టు తెల్లబడిందనీ చెప్పి ఈ యూఎస్పీ ని జస్టిఫై చేసుకుంటారు. 

     'సోగ్గాడే చిన్ని నాయనా’ లో హుషారైన పెద్ద నాగార్జున సాంప్రదాయ ఆహార్యం, మీసకట్టూ ఒక యూఎస్పీ. మామూలుగా వుండే చిన్న నాగార్జున సేఫ్టీ. అలాగే పవన్ కాటమ రాయుడుగా వయసుకు తగ్గ గెటప్ తో ఒక యూఎస్పీ ని సృష్టించుకుని, సేఫ్టీకోసం అతి చిన్న ముద్దుల, అల్లరి  తమ్ముడుగా ఇంకో పాత్రలో తనే నటించి వుంటే –అనూహ్యంగా వుండేది వ్యవహారం. కానీ ఇది రీబూట్. రీబూట్ జోలికి మనం వెళ్ళడం లేదు.

          ఇక కథలో వున్నదేమిటి? ఈ కథ పాయింటేమిటి?  ఇది చెప్పడం చాలా కష్టం. ఎందుకంటే, తొలి సీనుతో  ఫ్రెష్ గా విలన్ తో బాటు, ముందునుంచే రగిలిపోతున్న పక్క విలన్ కూడా కాటమ రాయుడు అంతు చూడాలనుకుంటారు, ఆ తర్వాత  మొదటి పది నిమిషాల్లోనే కథ మలుపు తీసుకుంటూ పెళ్లి ఇష్టం లేని కాటమ రాయుడు  మీదికి తమ్ముళ్ళు హీరోయిన్ని ప్రయోగించాలనుకుంటారు, దీని తర్వాత ఇంటర్వెల్లో విలన్ ముఠాతో కాటమ రాయుడు  పాల్పడే హింస చూసి ప్రేమలో వున్న హీరోయిన్ బ్రేకప్ చెప్పేస్తుంది, ఆతర్వాత సెకండాఫ్ లో హీరోయిన్ కుటుంబ శత్రువులతో కాటమ రాయుడు తలపడి అంతు చూస్తాడు. ఇలా ఒకదాని తర్వాత ఇంకోటి పాయింట్లు దాడి చేస్తూంటాయి.  ఈ కథ ఏ పాయింటు మీద నడిచిందీ అంటే చెప్పలేని పరిస్థితి. ఒక పాయింటు ఆధారంగా కథ నడిచిందని చెప్పబోతే, మిగిలిన  పాయింట్లు ఎందుకున్నాయన్న ప్రశ్న తగుల్తుంది. కొన్ని సినిమాల్లో కథనం ఎపిసోడ్ల మయంగా వుంటూ –ఎక్కడికక్కడ ముగిసిపోతూ, స్టాప్ అండ్ స్టార్ట్ డాక్యుమెంటరీ బాపతు ఫ్లాప్ సినిమాలుగా తయారైన విచిత్రాలు చూశాం.  ‘వీరమ్’ ఇంకా తేడా. ఇందులో కథనం కాదు- స్టాప్ అండ్ స్టార్ట్ డాక్యుమెంటరీ టెక్నిక్ తో మల్టిపుల్ స్టోరీ పాయింట్లే  వచ్చి పడ్డాయి! ఇది కొత్త రికార్డు. 

         ‘వీరమ్’ మార్కెట్ యాస్పెక్ట్ కోసం యూఎస్పీ తో ఎలాగో తంటాలు పడ్డా, క్రియేటివ్ యాస్పెక్ట్ దగ్గర దొరికిపోయారు. క్రియేటివ్ యాస్పెక్ట్ పరంగా ఆర్గ్యుమెంట్ గానీ, స్ట్రక్చర్ గానీ, లాగ్ లైన్ గానీ కన్పించవు. లాగ్ లైన్ చూద్దామంటే అనేక స్టోరీ పాయింట్లు అడ్డుపడతాయి. స్ట్రక్చర్ చూద్దామన్నా అనేక స్టోరీ పాయింట్లే అడ్డుపడతాయి, ఆర్గ్యుమెంట్ చూద్దామన్నా మల్టిపుల్ స్టోరీ పాయింట్లే అడ్డుపడతాయి.

          కాబట్టి ఈ కథకి ఒక పాయింటు లేదు, పాయింటు లేక ఆర్గ్యుమెంట్ లేదు, ఆర్గ్యుమెంట్ లేక పాత్ర లేదు, పాత్ర లేక స్ట్రక్చర్ లేదు, స్ట్రక్చర్ లేక లాగ్ లైనూ లేదు. దీంతో ఇదొక సినిమాగా తీయాల్సిన కథే కాదు.  సినిమా కథలో ప్రశ్నించే ఒకే పాయింటు వున్నప్పుడే అన్నీ దారిలో పడతాయి. ప్రశ్నించనప్పుడు చూస్తున్నది సొదలాగే వుంటుంది ప్రేక్షకులకి. సినిమా కెళ్ళే ప్రేక్షకులు హీరోని పరీక్షకెళ్ళే – ప్రశ్నలకి జవాబులిచ్చే - విద్యార్థిగా చూడాలనుకుంటారు గానీ, పరీక్ష తీసుకునే మాస్టారుగా చూడాలనుకోరు. ఎందుకంటే ఇక్కడ విద్యార్థి ఆసక్తి కల్గించే యాక్టివ్ పాత్ర, మాస్టారు కూర్చుని వుండే పాసివ్  పాత్ర. 

          కనుక ఈ ‘కథ’ రీబూట్ కి తప్ప ని రీమేక్  పనికి రాదని తెలిసిపోతోంది. రీమేక్ కోసం చేసిన ఉపరితల మార్పు చేర్పులేమిటంటే, అసలే పనిలేకుండా వున్న మొదటి విలన్ కి పక్క విలన్ గా బిల్డప్ ఇచ్చి  ఇంకో పాత్ర సృష్టించడం, అలాగే తమన్నా శిల్పి పాత్రని శృతీ హాసన్ గాయని పాత్రగా మార్చడం. ‘వీరమ్’ లో ఇదే మొదటి విలన్ అయిన ప్రదీప్ రావత్ స్థానిక మార్కెట్ యార్డ్ ని శాసించే వ్యాపారిగా, కథలో తక్కువ ప్రాధాన్యం కలిగి వుంటాడు. రీమేక్ లో ఈ పాత్రని రావురమేష్ కిచ్చి, పక్క విలన్ గా కొత్త పాత్రని సృష్టించారు. ప్రదీప్ రావత్ నేమో మొదటి విలన్ ని చేసి,  బిగ్ షాట్ గా అట్టహాసంగా కథకి ఇతనే ప్రత్యర్ధి అన్నట్టు చూపారు. ఇంటర్వెల్ తర్వాత ఇంత కష్టపడి క్రియేట్ చేసిన ఈ విలన్ నే వదిలేశారు.  

          తమిళంలో అంతగా ప్రాధాన్యం లేకుండా వున్న ఫస్టాఫ్ విలన్ ని, ఏ దృష్టితో ఇంత బిల్డప్ తో తెలుగులో అర్ధం లేకుండా మార్చారు? ఉపరితల మార్పులు అసలుకే ఎసరు.  కథకి ఇద్దరు విడివిడి విలన్లుండడం బాక్సాఫీసుకి క్షేమం కాదనేది ఎలా మర్చిపోయారు. ఏ కథకైనా విలన్ ఒకడే వుంటాడు. ఎందుకంటే సమస్య- సంఘర్షణ-  పరిష్కారమనే యూనివర్సల్  స్క్రీన్ ప్లే ఒక విలన్ వుంటేనే ఏర్పడుతుంది. ఎలా పడితే అలా చేసేవి కమర్షియల్ సినిమా స్క్రీన్ ప్లేలు కావు, ఆర్ట్ సినిమా లేదా ఇండీ ఫిలిమ్స్ స్క్రీన్ ప్లేలు. ఇందుకే మన సినిమాలు కమర్షియల్ సినిమా ముసుగేసుకున్న ఉత్త ఆర్ట్ సినిమాలవుతున్నాయి.

      ఇక శృతీహాసన్ ఉపరితల మార్పుపాత్ర అయితే, కథని రెండుముక్కలు చేస్తూ - విన్నర్, నేనులోకల్, గుంటూరోడు టైపు అరిగిపోయిన ఇంటర్వెల్ సీనిచ్చింది. సెకండాఫ్ పట్ల ఏ మాత్రం ఆసక్తి కల్గించని, ఇక సెకండాఫ్ లో ఏం జరుగుతుందో తెలిసిపోయే, సెకండాఫ్ ని ఇక చూడనవసరం లేదని తేల్చేసే  ఇంటర్వెల్ మలుపు ఇది. ‘వీరమ్’ లో ఇలా లేదు!

          ‘వీరమ్’  ఇంటర్వెల్ కి మాస్టర్ స్ట్రోక్ ఇచ్చాడు దర్శకుడు మహానుభావుడు. అతుకులబొంత కథకి  కూడా ఇంటర్వెల్లో తెలిసో తెలీకో మెరుపులు మెరిపించాడు తమన్నా పాత్రతో. కనీసం ఈ మెరుపుల వల్ల ఇంటర్వెల్ దగ్గరే కథ తెగిపోయి, సెకండాఫ్ సిండ్రోం అనే సుడిగుండంలో పడలేదు సినిమా. 

          రైలు ప్రయాణంలో అజిత్ విలన్ ముఠాతో పాల్పడే హింసని చూసి కళ్ళు తిరిగి అలా.....పడిపోవడం మాత్రమే చేస్తుంది తమన్నా. అజిత్ ఆగిపోయి చూస్తూంటాడు. అలా చూస్తూంటే సింపుల్ గా విశ్రాంతి పడుతుంది. 

          ఇంటర్వెల్లో పెద్ద బ్యాంగే  ఇవ్వనవసరం లేదనీ, సన్నివేశం చేసే డిమాండ్ ని బట్టి సింపుల్ గానూ వుండొచ్చనీ సిడ్ ఫీల్డ్ అంటాడు – the function of the mid- point is to keep the story moving  forward, it is a link in the chain of the dramatic action connecting the First Half of Act -2, with the Second Half of Act -2  అనీ,  it can either be a quiet moment అనీ అంటాడు.కమర్షియల్ సినిమాల గురించే అన్నాడు, కళాత్మక సినిమాల గురించి ఎప్పుడూ అనలేదు.

          ‘వీరమ్’ ఇంటర్వెల్లో  వున్నది ఈ  quiet moment- నిశ్శబ్ద క్షణాలే. పైన చెపినట్టు అజిత్ హింసని చూసి తమన్నా కళ్ళు తిరిగి పడిపోతుంది. అతనామెనే  కళ్ళప్పగించి చూస్తూంటే విశ్రాంతి పడుతుంది.  దీంతో దానికదే కథ సెకండాఫ్ లోకి స్మూత్ గా ఫ్లో అయ్యింది, ఫస్టాఫ్- సెకండాఫ్ రెంటినీ కనెక్ట్ చేస్తూ. అంటే కథ ముందుకు సాగిందే తప్ప తెగిపోలేదు. అతడి హింసని ఆమె చూసి కళ్ళు తిరిగిపడిపోయింది – ఇప్పుడేమిటి?-  అన్న ప్రశ్న ఏర్పడింది. ఇప్పుడేం జరుగుతుంది?- అన్న సస్పెన్స్ ని కూడా సెకండాఫ్ పట్ల కల్గించింది. ఇక్కడితో ఆసక్తి చచ్చిపోకుండా కాపాడింది. ఏదైతే పరిస్థితిని మాత్రమే చూపిస్తే బలంగా వుంటుందో, దాన్ని మాటలతో  చెప్పిస్తే తేలిపోతుంది! ఇక్కడ తమన్నా గానీ, అజిత్ గాననీ ఒక్క డైలాగు పలికినా మొత్తం నాశనమయ్యేది   సెకండాఫ్ సహా.  అంటే ఈ సీన్ ని  డైలాగుల జోలికి పోకుండా,  సబ్ టెక్స్ట్ తో నిర్వహించి పైకెత్తారన్న మాట. 

         ‘కాటమ రాయుడు’ లో డైలాగులు పెట్టేశారు శృతీహసన్ కి. కాటమ రాయుడి హింసని వ్యతిరేకించి, ప్రేమని తెంచుకుని వెళ్ళిపోయే ఎమోషనల్ డైలాగులు! దీంతో మొత్తం చెడిపోయింది. కథ ఇక్కడ తెగిపోయింది. కథ తెగిపోవడంతో సస్పెన్స్ లేకుండా పోయింది.. సెకండాఫ్ ఏం జరుగుతుందో తెలిసిపోయింది. సినిమా ఇక్కడే ఫ్లాప్ అయ్యింది. టెంప్లెట్ సినిమాల్లో ఇంతే- ఇంకా ఇలాటి ఛాలెంజిలతోనే ఇవే   కాలం  చెల్లిన  ఇంటర్వెల్స్. 

          టెంప్లెట్ ఇంటర్వెల్స్  ఈ మూడు నెలల కాలంలోనే మచ్చుకి కొన్ని- ‘గుంటూరోడు’లో  హీరోయిన్ తో పెళ్లి గురించి ఆమె అన్నతో హీరో ఛాలెంజ్!   ‘నేను లోకల్’ లో హీరోయిన్ పెళ్లి సీనులో హీరోతో ఆమె తండ్రి ఛాలెంజ్!  ‘విన్నర్’ లో పెళ్ళి సీనులో హీరోకి కన్నతండ్రి ఛాలెంజ్!  ‘కాటమ రాయుడు’ ప్రేమ గురించి హీరోకి హీరోయిన్ ఛాలెంజ్!   

          ఇంటర్వెల్ ఛాలెంజ్! ఛాలెంజ్!! ఛాలెంజ్!!! తొడగొట్టి మీసం తిప్పి మరీ బాక్సాఫీసుతో ఛాలెంజ్!!!!   

          ఎప్పటికప్పుడు మారిపోయే బాక్సాఫీసు హుండీల్లో చెల్లని టెంప్లెట్ నాణేలు...   
ఎక్కడి కథలివి...ఎప్పటి ఇంటర్వెల్స్ ఇవి...ఏం ప్రేమలివి...ఏం పెళ్ళిళ్ళు ఇవి... ఎప్పటి ఛాలెంజులివి... ఏం మనుషులు వీళ్ళు... ఏ జమానాలో జీవిస్తున్నారింకా... తిప్పి తిప్పి కొడుకుతున్నారు సామాన్య ప్రేక్షకులు కూడా ఇందుకే. మన కళ్ళముందు కూరగాయలమ్మే ముసలమ్మ,  సెల్ ఫోన్లో మాటాడుతూ  ‘స్ట్రెయిట్ గా పో’ అని చెప్పగల్గి  డెవలప్ అవుతున్న డిజిటల్ ప్రపంచంలో,   ఇంకా టెంప్లెట్ ఆమ్లెట్స్  అమ్ముకుంటూ గడపడం జాతీయ స్థూల ఉత్పత్తికి ఏ మాత్రం దోహదం చెయ్యని నేరపూరిత నిర్లక్ష్య కార్యమే.

       ఇంటర్వెల్ తర్వాత మొదటి సీను నుంచే ‘కాటమ రాయుడు’ నీరసపడిపోవడాన్ని స్పష్టంగా ఫీలవ్వొచ్చు. కానీ ఇక్కడ్నించీ ‘వీరమ్’ దర్శకుడు అజిత్ తో కాస్తయినా పాత్రని నిలబెట్టే ప్రయత్నం చేశాడు. అర్ధోక్తిలో ఆపేసిన ఇంటర్వెల్ తర్వాత నుంచి సెకండాఫ్ లో ఏంజరగబోతుందీ  అని ఆసక్తితో చూస్తూంటే, అజిత్ తమన్నా  వున్న హస్పిటల్ బయట వుంటాడు. తర్వాత ఆమె పూర్తిగా కోలుకున్నాక ఆమె ఇంటికే వెళ్తాడు. జరిగిందానికి  సారీ చెప్తాడు. ఆమె కోరుకున్నట్టే మారడానికి ప్రయత్నిస్తానంటాడు. అప్పటికి కూడా ఆమె పల్లెత్తు మాటనదు. మనకి  అర్ధమైపోతున్నప్పుడు  వేరే అనాల్సిన అవసరం లేదు. ఇదంతా సెన్సిబుల్ గా, సస్పెన్స్ ఫుల్ గా  వుంటుంది-  అజిత్ పాత్రని నిలబెడుతూ.

          ఇలా కాకుండా కాటమ రాయుడు  తమ్ముళ్ళు విసిరే సవాలుకి తనని ఛీకొట్టిన హీరోయిన్ గ్రామానికి వెళ్ళిపోయి అక్కడ పడిగాపులు గాస్తూ డౌన్ అయిపోతాడు. ఆమె ఇంట్లో ఎలా తిష్ట వేయలా అని కామెడీగా ప్రయత్నాలు చేస్తాడు. ఇలా రాంగ్ ఇంటర్వెల్ సీను బాధితుడుగా మారిపోయి హీరోయిన్ కి సారీ కూడా చెప్పడు. ఆమె వూళ్ళో ఆమె దగ్గరికి అజిత్ వెళ్ళడానికి గల నేపధ్యం అర్ధవంతంగా వుంటే, పవన్ వెళ్ళడంలో అర్ధమే లేకుండా వుంది - ఇంటర్వెల్ సీను పుణ్యమాని.

          ఇంటర్వెల్లో తమన్నా ఛాలెంజి చేయకపోవడంతో, తర్వాత అజిత్ సారీ చెబితే వ్యతిరేకించకుండానూ వుండడంతో, ప్రేమలో సంఘర్షణ అనే పాయింటు తొలగిపోయి- ఆమె కుటుంబ శత్రువు మీదికి మళ్ళింది స్టోరీ పాయింటు- అదే వేరే విషయం. కానీ కాటమ రాయుడులో ఇంటర్వెల్ లో హీరోయిన్ ఛాలెంజింగ్ గా మాటాడి పాయింటు ఎస్టాబ్లిష్ చేసింది. కానీ ఇంటర్వెల్ తర్వాత ఆమెతో దీనిమీదే కథ వుండదు.  సింపుల్ గా ఆమె కథలోంచి అదృశ్య మైపోతుంది. ఆమె కుటుంబ శత్రువుని కాటమ రాయుడు అంతం చేశాక వచ్చేసి ప్రేమకి ఓకే అనేస్తుంది.

          కథని ‘జెనిటికల్’ గా రీబూట్ చేయకుండా ఈ పైపైన ఉపరితల మార్పులు చేసి సాధించిందేమిటి?  తమిళంలో ఉన్నది ఉన్నట్టు తీసినా  ఉట్టి కొట్టేవాడేమో కాటమ రాయుడు- ఇవ్వాళ ఉగాది పచ్చడి కూడా ఎంజాయ్ చేస్తూ!

-సికిందర్ 
cinemabazaar.in

రివ్యూ!

దర్శకత్వం : కిషోర్ కిషోర్ పార్థ‌సాని

తారాగణం : ప‌వ‌న్‌క‌ళ్యాణ్‌, శృతీహాస‌న్‌, రావు ర‌మేష్‌, ప్ర‌దీప్ రావ‌త్‌, తరుణ్ అరోరా, క‌మ‌ల్ కామ‌రాజు, శివ బాలాజీ, చైత‌న్య కృష్ణ‌, అజ‌య్, అలీ, పృథ్వీ  త‌దిత‌రులు
కథ : శివ,  స్క్రీన్ ప్లే : వాసూ వర్మ, దీపక్ రాజ్, రచన : ఆకులశివ, వేమారెడ్డి, శ్రీనివాస రెడ్డి, తిమ్మా రెడ్డి; సంగీతం : అనూప్ రూబెన్స్‌, ఛాయాగ్ర‌హ‌ణంః ప్ర‌సాద్ మూరెళ్ల‌
బ్యానర్ : నార్త్ స్టార్ ఎంట‌ర్‌టైన్మెంట్స్
నిర్మాతః శ‌ర‌త్ మ‌రార్‌
విడుదల : మార్చి 24, 2017
         ***

        గబ్బర్ సింగ్’  సీక్వెల్ గా  ‘సర్దార్ గబ్బర్ సింగ్’ లో నటించి భంగ పడ్డ పవన్ కల్యా ణ్  రీమేక్ మీద దృష్టి పెట్టి, 2014 లో తమిళంలో అజిత్- తమన్నాలు నటించిన  ‘వీరమ్’ ని ‘కాటమ రాయుడు’ గా మార్చుకుని ప్రేక్షకుల ముందు కొచ్చారు. ‘వీరమ్’ తెలుగులో డబ్బింగ్ అయి ‘వీరుడొక్కడే’ గా విడుదలయింది. డబ్బింగ్ అయిన సినిమాని రీమేక్ చేయడం చాలా అరుదుగా జరుగుతుంది. పవన్ కల్యాణ్  తన స్టార్ పవర్ తో డబ్బింగ్ ప్రభావాన్ని ని అధిగమించవచ్చన్న నమ్మకంతో రిస్కు చేశారు. మరి ఈ రిస్కు పే చేసిందా? ఈ రిస్కులో వున్న రిస్కేమిటి? రిస్కు రిస్కు కాకుండా ఎప్పుడుంటుంది? రిస్కు రిస్కు అయినప్పుడు ఇంకేం రిస్క్ చేయాలి.... ఇత్యాది సందేహాలకి సమాధానాలు ఈ కింద వెతుకుదాం...

కథ 

    రాయల సీమలో రాయల్ గా బతికే కాటమరాయుడు (పవన్ కల్యాణ్) కి నల్గురు తమ్ముళ్ళు (క‌మ‌ల్ కామ‌రాజు, శివ బాలాజీ, చైత‌న్య కృష్ణ‌, అజ‌య్), ఈ తమ్ముళ్ళ తో పాటు వుండే వకీలు (అలీ). తమ్ముళ్ళని అమితంగా ప్రేమించే కాటమరాయుడు పెళ్లి చేసుకోవాలనుకోడు. చేసుకుంటే ఆ వచ్చే భార్యవల్ల అన్నదమ్ముల అనుబంధం చెడి పోతుందనుకుంటాడు. పెళ్లి మాటెత్తితే శివాలెత్తి పోతాడు. కనుక తమ్ముళ్ళతో బాటు వకీలు లింగబాబు రహస్య ప్రేమాయణాలు మొదలెట్టుకుంటారు. కానీ అన్నకి పెళ్లి కాకుండా  తాము చేసుకోలేమని, అన్నని ప్రేమలోకి దింపాలనీ  ప్లానేస్తారు. ప్లాను ప్రకారం అవంతిక ( శృతీ హాసన్)  అనే క్లాసికల్ డాన్సర్ చేత వూళ్ళో  ప్రోగ్రాం ఇప్పించి ఆమెకి కాటమరాయుడు పడేలా చేస్తారు. ప్రేమలో పడ్డ కాటమరాయుణ్ణి తండ్రి (నాసర్)కి పరిచయం చేద్దామని అవంతిక తన వూరికి తీసుకుపోతూండగా దుండగులు కాటమరాయుడి మీద దాడి చేస్తారు.  అప్పుడు తిరగబడ్డ కాటమరాయుడి ప్రతాపం చూసి అవంతిక తనకి ఇలాటి హింసావాది వద్దని, అహింసా వాదియైన  తండ్రికి ఇది చెప్పుకోలేనని తెగతెంపులు చేసుకుని వెళ్ళిపోతుంది...

          పడకపడక ప్రేమలో పడ్డ కాటమరాయుడి పరిస్థితి ఇప్పుడేమిటి? ఆమె మనసు మార్చాడా, లేక తను మరాడా? ఆమె కుటుంబం వెనుక కథేమిటి? ఆమె కుటుంబాన్ని కూడా తను ఎలా కాపాడాడు?... ఇవి తెలుసుకోవాలంటే  వెండి తెరని ఆశ్రయించాల్సిందే.

ఎలావుంది కథ 

      నిజానికిది 1954 నాటి హాలీవుడ్ క్లాసిక్ ‘సెవెన్ బ్రైడ్స్ ఫర్ సెవెన్ బ్రదర్స్’  కి  తిరగేసిన వెర్షన్ లాంటి కథలా వుంటుంది. ఈ హాలీవుడ్ క్లాసిక్ ని 1982 లో అమితాబ్ బచ్చన్,  హేమమాలినిలతో  ‘సత్తేపే సత్తా’ మ్యూజికల్ హిట్ గా తీశారు. పొలం పనులు చూసుకునే అన్న మాట జవదాటని ఆరుగురు తమ్ముళ్ళుంటారు. వీళ్ళకి నాగరికత తెలీదు, మ్యానర్స్ వుండవు. అడవి మనుషుల్లా వుంటారు. ఈ వెధవలుంటే తన పెళ్లి కాదని హేమమాలినిని ప్రేమించే  అమితాబ్ బచ్చన్, తనకి ఒక్కడే తమ్ముడున్నాడని అబద్ధం చెప్పి పెళ్ళిచేసుకుని తీసుకొస్తాడు. రాగానే ఆమె ఈ చంఢాలమంతా చూసి, ఖర్మ అనుకుని ఆ కోతుల్ని మనుషులుగా మార్చే పనిలో పడుతుంది. ప్రేమల్లో కూడా పడేస్తుంది ఆరుగురమ్మాయిలతో. అప్పుడు రంగ ప్రవేశం చేస్తాడు అచ్చు అమితాబ్ బచ్చన్ లా వుండే విలన్ (అమితాబ్ డబుల్)...చాలా ఫన్నీగా వుంటుంది ఈ కథ. ఈ కథతో 1984 లో తెలుగులో కృష్ణ –జయసుధలతో టి. కృష్ణ దర్శకత్వంలో ‘అందరికంటే మొనగాడు’ వచ్చింది. కానీ నేటివిటీ సమస్యవల్ల ఆడలేదు.

          ఈ కథ ‘వీరమ్’ లో  పెళ్లి వద్దనే అన్న- కావాలనుకునే తమ్ముళ్ళ దాగుడుమూతల డ్రామాగా రూపం మార్చుకుంది. ఇదే మార్పులు లేకుండా  ‘కాటమరాయుడు’ గా రీమేక్ అయింది. 

ఎవరెలా చేశారు.

        కాటమ రాయుడిగా పవన్ చివరంటా  డామినేట్ చేశారు. కీలకమైన నల్గురు తమ్ముళ్ళ పాత్రల్ని, తనని సమస్యలో పడేసే హీరోయిన్ పాత్రనీ పక్కకు నెట్టేశారు. పక్కకి నేట్టేశాక తనకి మిగిలింది పది నిమిషాలకో సారి భారీ యాక్షన్ సీన్సే, ఓ ఆరు పాటలే. యాక్షన్ సీన్స్, పాటలూ వీటి ఆధారంగా తన స్టార్ పవర్ తో  సినిమాని నిలబెట్ట వచ్చను కున్నారు. సూర్య కూడా తన ‘సింగం -3’ తో ఇలాగే వన్ మాన్ షో చేస్తే, సెకండాఫ్ నుంచే అది మొనాటనీ బారినపడి చతికిలబడింది. ‘వీరమ్’ లో అజిత్ స్టార్ పవర్ తో – ఆ స్టార్ పవర్ కి తోడు  తనెలా వుంటాడో అలా నెరసిన జుట్టుతో, సాంతం పంచె కట్టుతో  నటించి - ఆ  లుక్ ని బాక్సాఫీసు విజయానికి యూఎస్పీగా  మార్చేశాడు. అంతేగానీ కథతో కాదు. పవన్ కల్యాణ్  అప్పుడప్పుడు పంచె కట్టడం తప్ప పాత్రకి తగ్గ లుక్ పై అస్సలు శ్రద్ధ పెట్టలేదు. తన పాత్రకి మారని తన రొటీన్ మీసకట్టే ఇబ్బందికరంగా తయారయ్యింది. ట్రిమ్ చేసిన అలవాటైన మీసాన్ని తిప్పబోతే చేతికే రావడం లేదు- లేని మీసాన్ని తిప్పడమెందుకు అనుకునేట్టు వుంది.  బాక్సాఫీసు విజయంకోసం తన వంతు యూఎస్పీ గా పవన్ ఏమీ ఇచ్చినట్టు కన్పించదు - కొత్తగా తనేం ఇచ్చినా ఇవ్వకపోయినా  ఫ్యాన్స్  మోసేస్తారులే అన్నట్టుంది. 

          ఫస్టాఫ్ లో శృతీహాసన్ తో ప్రేమ సన్నివేశాల్లోనే పవన్ అభిమానుల్ని అలరిస్తాడు. అయితే ఆరు పాటలున్నా అవి పెద్దగా ఆకట్టుకునేలా లేకపోవడంతో  తన స్టార్ పవర్ తో వాటికి ఊపు తీసుకురావడం సాధ్యం కాలేదు. మొత్తం మీద చెప్పొచ్చేదేమంటే,  తన స్టార్ పవర్ యాక్షన్ సీన్స్ కి పనికొచ్చిందే గానీ,  దారితప్పిన స్టోరీ పవర్ తనకి చాల్లేదు. 

          శృతీహాసన్ ‘సింగం -3’ లో ఎలా వుందో అలాగే వుంది. అదుపులోలేని షేపుతో, వన్నె తగ్గిన అందాలతో. పాత్రకూడా బలి అయిపోయింది.  ఇంటర్వెల్ లో కథని మలుపు తిప్పిన తను, తర్వాత ఆ ప్రేమ కథకి ప్రత్యర్ధిగా వుండక- ప్రేక్షక పాత్ర వహించింది.

          తమ్ముళ్ళ పాత్రల్లో నల్గురూ ప్రాధాన్యం లేక మగ్గి పోవాల్సి వచ్చింది. అలీ అయితే పాపం జాలి గొల్పే స్థితి. పృథ్వీ అయితే ఇంకా దయనీయ స్థితి. కమెడియన్లు కూడా వాళ్ళ సహజ పద్ధతిలో కామెడీ చేసుకునే స్వేచ్ఛతో కన్పించరు. విలన్లు తప్పించి, తమ్ముళ్ళు సహా  అందరూ, కాటమరాయుడి  భయానికి అన్నట్టు, చాటు మాటుగా వచ్చేసి గుసగుసలాడి వెళ్లిపోయే సెన్సార్  షిప్ బాధితుల్లాగా కన్పిస్తారు.  

          ప్రదీప్ రావల్, తరుణ్ అరోరా అనే ఇద్దరు విలన్లు వున్నారు. ఫస్టాఫ్ ప్రదీప్ తన పాత్ర చాలించుకు వెళ్ళిపోతే, సెకండాఫ్ తరుణ్ అరోరా స్వీకరిస్తాడు. పక్క విలన్ గా శాడిస్టుగా మొత్తమంతా రావురమేష్ వుంటాడు- ముగ్గురితో వచ్చిన సమస్యేమిటంటే, ముగ్గురూ పవన్ స్టార్ పవర్ కి తగ్గ విలన్ పాత్రలు కాలేకపోవడం. పక్క విలన్ వుంటే వుండొచ్చు గానీ, ఇలా ఒక ప్రధాన విలన్ వెళ్లిపోయి, ఆ స్థానంలో  మరో విలన్ వచ్చే సినిమాలు ఎక్కడా ఆడలేదు.

          అనూప్ రూబెన్స్ ఈసారి స్టార్ సినిమాకి సరిపోలేదు. పవన్ సినిమాల్లో పాటలు ఎప్పుడూ ఇంత బలహీనంగా లేవు. ప్రసాద్ మూరెళ్ళ ఛాయాగ్రహణం, రామ్ – లక్ష్మణ్ ల పోరాటాలు మాత్రం బావున్నాయి. ప్రొడక్షన్ విలువలు భారీగా వున్నాయి. స్క్రిప్టు మీద కూడా (ఆరుగురు రచయితలు) భారీగానే ఖర్చు పెట్టినట్టున్నారు. ఇవన్నీ పొందిన దర్శకుడు కిషోర్ ఈ రీమేక్ ని ఎక్కడో పట్టాలు తప్పించినట్టు మాత్రం ప్రేక్షకులే కాదు, ఫ్యాన్స్ కూడా అనుకుంటున్నారు.

చివరికేమిటి?

      డబ్బింగ్ అయిన సినిమాని రిమేక్ చేయడం స్టార్ పవర్ వుంటే రిస్కు కాకపోవచ్చు, కానీ ఆ వొరిజినల్ లో అసలు దేన్ని రిస్క్ చేశారో తెలుసుకోకపోతే  రీమేక్ చేయడం రిస్కే అవుతుంది. ఒక భాష లో ఒక సినిమా హిట్టవడం ఒక్కటే  రిమేక్ చేయడానికి గీటు రాయి అయితే, అన్ని రీమేకులూ హిట్టే అవుతాయి. ‘వీరమ్’ హిట్టవడానికి అజిత్ యూఎస్పీ (యూనిక్ సెల్లింగ్ పాయింట్), తమన్నా గ్లామర్ కోషెంట్,  దేవీశ్రీ ప్రసాద్ పాటలు, విడుదలైన 2014 నాటి పరిస్థితులు, తమిళ ప్రేక్షకుల అభిరుచులు, పెట్టిన బడ్జెట్ ...మొదలైనవి అనేకం తోడ్పడి వుంటాయి. ముమ్మాటికీ ‘వీరమ్’ దాని కథాకథనాలతో హిట్టవలేదని స్థానిక, జాతీయ మీడియాల్లో వచ్చిన రివ్యూలు చదివితే తెలిసిపోతుంది. కానీ కథా కథనాలనే నమ్మి, అజిత్ పోషించిన పాత్ర కూడా ఆకర్షించి  తెలుగులో రీమేక్ చేసినట్టు కన్పిస్తోంది. ఇది రిస్కే, మిగతా వాటిని పట్టించుకోక పోతే. ‘వీరమ్’ నే అవకతవక కథా కథనాలతో రిస్క్ చేసి, మిగతా పైన చెప్పుకున్న అంశాలతో కవర్ చేస్తేగానీ  అది హిట్టవ లేదని తెలుస్తోంది. రిస్కు ఎప్పుడు రిస్కు కాకుండా వుంటుందంటే- ఒరిజినల్ హిట్ చుట్టూ వుండే  కారణాలన్నీ  రీమేక్ కి కూడా బదలాయింపు అయినప్పుడు మాత్రమే. కానప్పుడు ఆ కథా కథనాల తాలూకు లొసుగులన్నీ వెంటాడతాయి. 

          ‘వీరమ్’ కి కథ కొకరు, మాటలకి ఒకరు ఇద్దరే రచయితలుంటే (ఇద్దర్లో  ఒకరు దర్శకుడు), ‘కాటమ రాయుడు’ రీమేక్ కి దర్శకుడితో  కలిపి ఏడుగురున్నారు! ఇంకా పవన్ ఇన్ పుట్స్ కూడా వుంటాయి. ఇంతమంది కలిసి ఒక్కటే గుర్తించలేకపోయారు- ఈ కథ ఇంటర్వెల్ దగ్గరే ఫ్రాక్చర్ అయి సెకండాఫ్ సిండ్రోమ్  లో పడిందని, ఈ కథకి కేంద్రబిందువుగా ఒకే సమస్యతో కూడిన సంఘర్షణ లేదనీ;  ఫస్టాఫ్ హీరో కథకి ఒక విలన్ తో ఒక సంఘర్షణ పూర్తయ్యాక, సెకండాఫ్ హీరోయిన్ కథకి ఇంకో విలన్ తో మొదలయ్యిందనీ! 

          ఇంకా చెప్పుకోవాలంటే , కథ ప్రారంభిస్తూనే పాయింటు లో కెళ్ళే కథలు ఫస్టాఫ్ వరకే సరిపోయి, సెకండాఫ్ లో వేరే కథగా సాగడం తెలుగు సినిమాల్లో తరచూ చూస్తున్నాం. ఇలాటి వన్నీ ఫ్లాపయ్యాయి- తెలివిగా మేనేజ్ చేయడం వల్ల  ‘దొంగాట’ తప్ప. ప్రస్తుత స్క్రిప్టుకి రచయితల్లో ఒకరైన వేమారెడ్డి దర్శకత్వంలో వచ్చిన ‘చక్కిలిగింత’ కి ఇదే జరిగిందని రివ్యూలో రాశాం. ఇది తెలుసుకుని వుంటే ‘వీరమ్’ కథలోనూ దీన్ని పసిగట్టి కిం కర్తవ్యం ఆలోచించే వారేమో.

          ‘కాటమరాయుడు’ ఎంతవరకు ఈ లోపాల్ని పవర్ స్టార్ స్టార్ పవర్ తో జయిస్తుందో ఈ వారాంతం తర్వాత తేలుతుంది.

-సికిందర్

(స్క్రీన్ ప్లే సంగతులు సోమవారం)