1345 : రివ్యూ!

 

దర్శకత్వం : అలీ అబ్బాస్ జాఫర్

తారాగణం : షాహిద్ కపూర్, రోణిత్ రాయ్, సంజయ్ కపూర్, డయానా పెంటీ తదితరులు రచన : ఆదిత్య బసు, సిద్ధార్థ్-గరిమ; ఛాయాగ్రహణం : మార్సిన్ లాస్కావిక్, సంగీతం- పాటలు : బాద్షా, అనుజ్ గర్గ్; నేపథ్య సంగీతం : జూలియస్ ప్యాకియం

బ్యానర్స్ : జియో స్టూడియోస్, AAZ ఫిల్మ్స్, ఆఫ్‌సైడ్ ఎంటర్‌టైన్‌మెంట్, Sradvn ప్రొడక్షన్

నిర్మాతలు : జ్యోతి దేశ్‌పాండే, సునీర్ ఖేతర్‌పాల్, గౌరవ్ బోస్, హిమాన్షు కిషన్ మెహ్రా, అలీ అబ్బాస్ జాఫర్, సుశీల్ చౌదరి

విడుదల : జూన్ 9, 2023

***

            ‘జెర్సీ’ (తెలుగులో ‘జెర్సీ’, 2019), కబీర్ సింగ్’ (తెలుగులో ‘అర్జున్ రెడ్డి’, 2021) లలో నటించిన బాలీవుడ్ హీరో షాహిద్ కపూర్, యాక్షన్ థ్రిల్లర్ ‘బ్లడీ డాడీ’ తో ప్రేక్షకుల ముందు కొచ్చాడు. పెద్ద తెర మీద కాకుండా దీన్ని జియో సినిమా ఓటీటీలో ఉచితంగా అందిస్తోంది. ఉచితం కాబట్టి ఖర్చు దండగన్నట్టు ఇతర భాషల్లో డబ్బింగ్ చేయకుండా, కేవలం హిందీలో అందించింది. దీనికి అలీ అబ్బాస్ జాఫర్ దర్శకుడు. సల్మాన్ ఖాన్ తో ‘సుల్తాన్’, ‘టైగర్ జిందా హై’, ‘భారత్’ వంటి హిట్స్ అందించిన జాఫర్, షాహిద్ కపూర్ తో ఈ థ్రిల్లర్ ఎలా తీశాడో తెలుసుకుందాం...

కథ

ఢిల్లీలో సుమైర్ ఆజాద్ (షాహిద్ కపూర్) నార్కోటిక్స్ కంట్రోల్ బ్యూరో అధికారి.  ఓ తెల్లారి పొద్దున్నే తన అసిస్టెంట్ జగ్గీ(జీషాన్ ఖాద్రి) తో కలిసి ఢిల్లీలో డ్రగ్స్ దందాని విచ్ఛిన్నం చేసి, 50 కోట్ల డ్రగ్స్ వున్న బ్యాగుని పట్టుకుంటాడు. ఢిల్లీ సమీపంలోని గురుగ్రామ్ లో సికిందర్ చౌదరి (రోణిత్ రాయ్) ఎమరాల్డ్ అట్లాంటిస్ అనే సెవెన్ స్టార్ హోటల్ ని- ఆ హోటల్లో డ్రగ్స్  రాకెట్ నీ నడుపుతూంటాడు. సుమైర్ పట్టుకున్న డ్రగ్స్ సికిందర్ చౌదరికి చెందిందే. దీంతో అతను సుమైర్ కొడుకు అధర్వ్ (సర్తాజ్ కక్కర్) ని కిడ్నాప్ చేసి డ్రగ్స్ వున్న బ్యాగుని డిమాండ్ చేస్తాడు. సుమైర్ కి డాక్టర్ అయిన భార్య తో విడాకులై వుంటాయి. కొడుకు కిడ్నాప్ అయ్యేసరికి సుమైర్ డ్రగ్స్ ని సికిందర్ చౌదరికి ఇచ్చేయడానికి బయల్దేరతాడు.

       
ఆ హోటల్ కే వచ్చిన ఇంకో నార్కోటిక్స్ ఉద్యోగిని అదితీ రావత్ (డయానా పేంటీ) సుమైర్ డ్రగ్స్ బ్యాగుతో రావడాన్ని చూసి, ఆ బ్యాగుని కొట్టేసి పై అధికారి సమీర్ సింగ్ (రాజీవ్ ఖండేల్వాల్) ని పిలుస్తుంది. ఇద్దరూ సుమైర్ మీద కన్నేసి వుంచుతారు. బ్యాగు పోగొట్టుకున్నట్టు తెలుసుకున్న సుమైర్ ఇరకాటంలో పడతాడు. ఇంకోవైపు ఆ డ్రగ్స్ కోసం హమీద్ షేక్ (సంజయ్ కపూర్) అనే ఇంకో స్మగ్లర్ వచ్చి సికిందర్ చౌదరి గొంతు మీద కూర్చుంటాడు.

        
డ్రగ్స్ వున్న బ్యాగుని పోగొట్టుకున్న సుమైర్ మైదా పిండి ప్యాకెట్స్ తీసికెళ్ళి సికిందర్ చౌదరికి అంట గట్టడంతో అది బయటపడి మొత్తం అభాసవుతుంది- ఇక సుమైర్ ని పట్టుకోవడానికి సికిందర్ చౌదరి గ్యాంగ్స్ వెంట పడతారు. మరోవైపు సమీర్, అదితీలు వెంటబడతారు. ఈ రెండు గ్రూపులకి దొరక్కుండా, స్టార్ హోటల్లోనే ఎక్కడో బందీగా వున్న కొడుకుని ఎన్సీబీ అధికారి సుమైర్ ఆజాద్ ఎలా విడిపించుకున్నాడన్నది మిగతా కథ.

ఎలావుంది కథ

రొటీన్ యాక్షన్ కథే. అయితే ఇది 2011 లో ఫ్రెంచి భాషలో (స్లీప్ లెస్ నైట్) ఒరిజినల్ గా నిర్మాణం జరుపుకుంది. తర్వాత హాలీవుడ్ లో రీమేకయింది. ఈ రెండూ బాక్సాఫీసుకి బలం చేకూర్చలేదు. కానీ 2015 లో కమల్ హాసన్ తమిళంలో ‘తూంగవనం’ గా రీమేక్ చేస్తే 50 కోట్ల బాక్సాఫీసుతో లాభాలు తెచ్చి పెట్టింది. దీన్ని తెలుగులో ‘చీకటి రాజ్యం’’ గా డబ్ చేశారు. ఇప్పుడు హిందీలో ‘బ్లడీ డాడీ’ గా రీమేకయింది.

       

‘చీకటి రాజ్యం’ చూసి వుంటే ‘బ్లడీ డాడీ’ వెలవెలబోతూ వుంటుంది. కేవలం ఒక రాత్రి నైట్ క్లబ్ లో జరిగే యాక్షన్ కథని కమల్ హాసన్ తన స్టార్ పవర్ తో, సహజ కామెడీతో ఎక్కడికో....తీసికెళ్ళిపోయారు. ఇది షాహిద్ కపూర్ విషయంలో లోపించింది- స్టార్ పవరూ లేదు, కామెడీ లేదు. కమల్ హాసన్ స్క్రిప్టు తయారు చేసుకుని, రాజేష్ సెల్వ దర్శకత్వంలో వేగంగా పరుగెత్తే టైం పాస్ గ్యారంటీ  థ్రిల్లర్ గా సొంత బ్యానర్ పై తీస్తే, హిందీలో అలీ అబ్బాస్ జాఫర్ స్లో గా సాగే డార్క్ థీమ్ థ్రిల్లర్ గా, ఫన్ కి దూరంగా వుంచేశాడు.

       
కమల్ హాసన్ కి కొడుకు కోసం ఫిజికల్ యాక్షన్, మాజీ భార్య కారణంగా ఎమోషనల్ యాక్షన్ - ఈ రెండిటి మధ్య నలిగే పాత్రగా రక్తి కట్టిస్తే, షాహిద్ కపూర్ కి ఈ రెండు షేడ్స్ లేక ఉపరితలంలోనే వుండిపోయాడు. కమల్ హాసన్ థ్రిల్లర్ కలర్ఫుల్ గా వుండడానికి పాపులర్ స్టార్స్ నటించడం ఇంకో కారణం. కమల్ కి యాంటీగా నార్కోటిక్స్ ఉద్యోగినిగా స్టార్ హీరోయిన్ త్రిష నటించడం, ఆమెతో కమల్ చేసే ఫైట్ ఒక ఎట్రాక్షన్ కావడం కలిసొచ్చాయి.  హిందీలో ఎవరికీ తెలియని డయానా పేంటీతో ఈ మ్యాజిక్ వర్కౌట్ కాలేదు. కమల్ సినిమాలో విలన్ గా ప్రకాష్ రాజ్ బలం వుంటే, హిందీలో రోణిత్ రాయ్ అనే పెద్దగా పేరు లేని పాత ఆర్టిస్టుతో విలన్ పాత్ర మామూలుగా వుంది. ఇంకో విలన్ గా ఒకప్పటి హీరో సంజయ్ కపూర్ ది ఓవరాక్షన్.

       
ఈ కథని కోవిడ్ -2 మహమ్మారి ముగిసిన సమయంలో స్థాపించారు. కోవిడ్-1, 2 లతో ఎంతో మంది చనిపోయి, మరెంతో మంది ఉపాధి కోల్పోయి నేరాల వైపు మళ్ళారని చెబుతూ కథ ప్రారంభించారు. నేరాల వైపు ఏ సామాన్యులు మళ్ళారో చూపించకుండా, డ్రగ్ స్మగ్లర్స్ అనే ప్రొఫెషనల్స్ తో కథ ప్రారంభిస్తే- ఆ డ్రగ్ స్మగ్లర్స్ కొత్తగా నేరాలకి పాల్పడేదేముంటుంది - అది వాళ్ళ నిత్య కార్యక్రమమే.

       
ఇక కోవిడ్ జాగ్రత్తలంటూ ప్రారంభ దృశ్యాల్లో మాస్కూలు వేసుకుని తిరగడం చూపించి, ఆ తర్వాత మర్చిపోయాడు దర్శకుడు. ఈ మాత్రం దానికి కోవిడ్ బిల్డప్ ఎందుకో అర్థంగాదు. ఆ హోటల్లో దాగుడు మూతలప్పుడు మాస్కు లేసుకుని వుంటే, ఎవరు ఎవరో తెలియక కన్ఫ్యూజన్ తో చాలా కామెడీగా యాక్షన్ వుండేది.

నటనలు -సాంకేతికాలు

ఈ సినిమాకి హీరోగా షాహిద్ కపూర్ గ్లామర్ లుక్ తో వుండి వుంటే బావుండేది. క్రిమినల్ గ్యాంగ్స్ లో ఒకడుగా తానూ రఫ్ లుక్ తోనే  గ్యాంగ్ స్టర్ లా వుంటే- అసలు ఎన్సీబీ అధికారిగా ఉద్యోగంలో వుంటాడా. అల్లరైపోయిన ముంబాయి ఎన్సీబీ అధికారి సమీర్ వాంఖడే క్లీన్ షేవ్ తో ఎంత అఫీషియల్ గా వుండేవాడని. ఆఫీసర్ కి, గ్యాంగ్ స్టర్ కీ తేడా లేకపోతే అదేం సినిమా అనుకోవాలి?

        
ఎన్సీబీ ఉద్యోగినిగా వేసిన డయానా పేంటీ ఫార్ములా సినిమా పాత్రే. పై అధికారి పక్కన కరివే పాకు పాత్ర. వెబ్ సిరీస్ లో స్త్రీ పాత్రలు- హీరోయిన్ పాత్రలూ ఎంత శక్తిమంతంగా వుంటున్నాయో గుర్తిస్తున్నట్టు లేదు సినిమా దర్శకులు.

       
రిచ్ విలన్ గా రోణిత్ రాయ్, అతడి పక్క వాద్యంగా సంజయ్ కపూర్ పాత విలన్లుగా వుంటారు. సాంకేతికంగా ఉన్నతంగా తీర్చి దిద్దాడు దర్శకుడు. ప్రారంభంలో ఔట్ డోర్ యాక్షన్ సీన్స్ బావున్నాయి. అయితే ఈ మేకింగ్ క్వాలిటీ అంతా పాపులర్ నటీనటులతో వుండుంటే సినిమా పై లెవెల్లో వుండేది. ఇంకోటేమిటంటే, ఎప్పుడో 2011 నాటి కాలపు ఫ్రెంచి థ్రిల్లర్ ని ఇప్పుడు రీమేక్ చేయడం విజ్ఞత అన్పించుకోదు. ఫ్రెంచి థ్రిల్లర్ ఫ్రెష్ గా వున్నప్పుడు, అప్పుడప్పుడే 2015 లో  కమల్ హాసన్ రీమేక్ చేయడం వేరే విషయం.

—సికిందర్    

 

1344 : రివ్యూ!

 

రచన -దర్శకత్వం : వై. శివ ప్రసాద్

తారాగణం : : స‌ముద్రకని, అన‌సూయా భ‌ర‌ద్వాజ్‌, మాస్ట‌ర్ ధృవ‌న్‌, మీరా జాస్మిన్, రాహుల్ రామ‌కృష్ణ‌, ధనరాజ్, తదితరులు

సంగీతం : చరణ్ అర్జున్, ఛాయాగ్రహణం : వివేక్ కాలెపు

బ్యానర్స్ : జీ స్టూడియోస్‌, కిర‌ణ్‌ కొర్ర‌పాటి క్రియేటివ్ వ‌ర్క్స్

నిర్మాత : కిర‌ణ్‌ కొర్ర‌పాటి

విడుదల : జూన్ 9, 2023

***

        ఈ వేసవి స్టార్  సినిమాలు విడుదల కాకపోవడంతో చిన్న సినిమాలతో ప్రేక్షకులు సరిపెట్టుకోవాల్సి వస్తోంది. చిన్న సినిమాల్లో కమర్షియల్ సినిమాలు, రియలిస్టిక్ సినిమాలు అనే రెండు కేటగిరీల్లో ప్రేక్షకులకి లభిస్తున్నాయి. అయితే కమర్షియల్ సినిమాల పట్ల చూపే ఎంతో కొంత ఆదరణ రియలిస్టిక్ సినిమాలు -అందులోనూ కన్నీటి కథలతో వుండే వాస్తవిక సినిమాల పట్ల చూపించడం లేదు. ఇది తెలిసికూడా కన్నీటి కథల్ని వినోదాత్మకంగా చూపించే ఆలోచనకి దూరంగా వుంటున్నారు మేకర్లు. చార్లీ చాప్లిన్ సినిమాలు కన్నీటి కథలే, కానీ నవ్విస్తాయి. అప్పుడే వ్యాపార విలువ. ఇలా కాకుండా ‘విమానం’ అనే వాస్తవిక సినిమాని విషాదంగానే తీసినప్పుడు బాక్సాఫీసు తలుపులు ఏ మేరకు బార్లా తెరచుకున్నాయో ఇప్పుడు తెలుసుకుందాం...

కథ

హైదరాబాద్ లో వీరయ్య (సముద్రకని) సులభ్ కాంపెక్స్ నడుపుకుంటూ జీవనం సాగిస్తూంటాడు. అతను వికలాంగుడు. అతడికో స్కూలు కెళ్ళే కొడుకు రాజు (మాస్టర్ దృవన్) వుంటాడు. రాజుకి విమానాల పిచ్చి. విమానం ఎక్కాలంటే పైలట్ కావాలని కలలు గంటూ వుంటాడు. తిండికే ఇబ్బంది పడుతున్న వీరయ్య కొడుకుని భవిష్యత్తులో పైలట్ గా ఎలా పంపుతాడో మధన పడుతున్న సందర్భంలో, కొడుకు బ్లడ్ క్యాన్సర్ బారిన పడతాడు. అదే సమయంలో రోడ్డు విస్తరణలో భాగంగా సులభ్ కాంప్లెక్స్ ని కూల్చేస్తారు. వీరయ్యకి దిక్కుతోచదు. ఒకవైపు కొడుక్కి ప్రాణాంతక బ్లడ్ క్యాన్సర్, మరో వైపు జీవనాధారం సమస్య. అయితే పైలట్ సంగతేమో గానీ, ముందు బ్లడ్ క్యాన్సర్ తో వున్న కొడుక్కి విమానం ఎక్కించి కోరిక తీర్చాలన్న తపనతో వీరయ్య డబ్బుకోసం ప్రయత్నాలు మొదలెడతాడు. ఇప్పుడు ఈ ప్రయత్నాల్లో ఎన్ని కష్టాలకి, ఎన్ని మోసాలకి లోనయ్యాడనేది మిగతా కథ. ఆఖరికి కొడుకుని విమానం ఎక్కించాడా లేదా అన్నది ప్రశ్న.

ఎలావుంది కథ

  ఇలాటిదే ‘ప్రేమ విమానం’ అని వెబ్ మూవీ గత నెల జీ5 లో విడుదలైంది. ఒకేలాటి కథలతో జీ5 ఈ రెండు సినిమాలు నిర్మించింది. అయితే ‘ప్రేమ విమానం’ కామెడీ కథ. ఇందులో విమానం ఎక్కాలన్న ఇద్దరు పిల్లల కలలు, వీళ్ళిద్దరికి ఇంకో ఇద్దరు ప్రేమికులు కలవడం, వీళ్ళందరికీ ఇంకో ఇద్దరు పెద్దలు కలిసి, మొత్తం అందరూ విమానమెక్కే కోర్కెని తీర్చుకునే కథ.

అయితే ప్రస్తుత ‘విమానం’ విషాద కథ. అసలే తారాగణ బలం లేని లోబడ్జెట్ మూవీ, పైగా కష్టాలూ కన్నీళ్ళ ఆర్ట్ సినిమా బాపతు వాస్తవిక సినిమా. దీంతో దీని మార్కెట్ యాస్పెక్ట్ ఓటీటీకే తప్ప థియేట్రికల్ రిలీజుకి కాకుండా పోయింది. పేదరికంలో పెద్ద కోరికల్ని హాస్యభరితంగా చూపించి సినిమాని థియేటర్ సినిమాగా మల్చవచ్చు. ఇలా చూపించిన సినిమాల్ని ప్రేక్షకులు ఎంజాయ్ చేశారు, అవార్డులు కూడా వచ్చాయి.

తమిళంలో ఇద్దరు పేద బస్తీ పిల్లల పిజ్జా తినాలన్న కోరికతో ‘కాకిముట్టై’, గుజరాతీలో సినిమా వేసుకుని చూడాలన్న ప్రయత్నాలతో పేద పిల్లల ‘చెల్లో షో’, మరాఠీలో దేశంలో తొలి సినిమా తీయాలన్న దాదా సాహెబ్ ఫాల్కే కోర్కెతో ‘హరిశ్చంద్రాచీ ఫ్యాక్టరీ’, కన్నడలో చావు కథతో ‘తిధి’...ఇవన్నీ నవ్వించే- వినోదాత్మక వాస్తవిక సినిమాలే. ‘హరిశ్చంద్రాచీ  ఫ్యాక్టరీ’ లో ఫాల్కే కష్టాలు ఎంత కామెడీగా వుంటాయో చెప్పక్కర్లేదు. ఇవి పైకి నవ్వించినా అంతర్లీనంగా వాస్తవంగా వున్న విషాదాన్ని ఫీలవుతూంటాం. ఈ ద్వంద్వాల పోషణే వీటి బలం కమర్షియల్ గా కూడా.

‘విమానం’ ఫ్లాట్ గా విషాదాన్నే చూపిస్తూ పోయింది. ఫస్టాఫ్ లో విమానాల పిచ్చితో కొడుకు సన్నివేశాలు, వాడి స్కూల్ మేట్స్ సన్నివేశాలూ హస్యంగానే వున్నా, తీరా కథలోకి వెళ్ళాక అంతా సీరియెస్సే. ఫస్టాఫ్ లో తండ్రీ కొడుకుల పాత్రల పరిచయం, పరిస్థితి, మరో వేశ్య పాత్ర పరిచయం, చెప్పులు కుట్టే వాడి పరిచయం, ఒక ఆటో డ్రైవర్ పరిచయం... ఇలా సాగుతూ ఇంటర్వెల్లో కథలోకి ప్రవేశిస్తుంది సినిమా. ఇక్కడ కొడుక్కి బ్లడ్ క్యాన్సర్ అనే మలుపు. అయితే ఇక్కడే సెకండాఫ్ లో కథ ఎలా వుండబోతోందో తెలిసి పోతుంది.

దీంతో సెకండాఫ్ లో కొడుకు కోరిక కోసం వీరయ్య పడే కష్టాలు వూహకందేవిధంగానే వుంటాయి. సులభ్ కాంప్లెక్స్ కోల్పోయి వెరే ఉద్యోగంలో చేరిన వీరయ్య దొంగతనం ఆరోపణతో పోలీసుల చేతిలో దెబ్బలు తినడం, తర్వాత జోకర్ వేషం వేసి డబ్బులు సంపాయిస్తే దుండగులు లాక్కోవడం లాంటి సన్నివేశాలు బాధపెట్టినా, సెకండాఫ్ లో వేరే మలుపు తీసుకోక కథలో ఈ కష్టాలే రిపీట్ అవడంతో, వీరయ్య కంటే మనమే ఇబ్బంది పడతాం చూడలేక.

ఈ కష్టాలకి తగ్గట్టు కథా నడక మందగించడం ఇంకో సమస్య. అయితే ముగింపులో ఇచ్చిన వూహకందని ట్విస్టు బావుంది. అయితే ఇది వీరయ్య పాత్రని మాత్రం జస్టిఫై చేయదు. 

నటనలు- సాంకేతికాలు

ఈ మధ్య తెలుగు సినిమాల్లో తరచుగా కన్పిస్తున్న సముద్రకని వికలాంగుడి పాత్రలో కొన్ని చోట్ల ప్రేక్షకుల్ని ఏడ్పిస్తాడు. కొడుకుతో బాండింగ్ కి సంబంధించిన సన్నివేశాలు కొన్ని భావోద్వేగాల లోతుతో కట్టి పడేస్తాయి. ఇవి కొన్ని చోట్ల మాత్రమే వుంటే సరిపోతుంది. అదే పనిగా చూపిస్తే వర్కౌట్ అవదు. కొడుకు పాత్రలో మాస్టర్ దృవన్ ఒక మంచి బాల నటుడు. అతడికి మార్కులు పడతాయి.

       
వేశ్య పాత్రలో అనసూయ ఒక టెర్రిఫిక్ నటి. పచ్చి వేశ్యలు కూడా అలా వుండరేమో, అలా నటించింది. చెప్పులు కుట్టే వాడి పాత్రలో రాహుల్ రామకృష్ణ. అయితే వీళ్ళిద్దరి మధ్య ట్రాకు మాత్రం అరకొరగానే వుంటుంది. ఆటో డ్రైవర్ గా ధన రాజ్ కి కూడా పూర్తి స్థాయి పాత్ర దక్కలేదు.

       
సినిమాలో మొత్తం అన్ని పాత్రలకీ పాత్ర చిత్రణ లోపం కన్పిస్తుంది. కంటెంట్ పరంగా విషాదంగా, భారంగా వున్న ఈ సినిమా సంగీతం (చరణ్ అర్జున్0, ఛాయాగ్రహణం (వివేక్ ), ఇంకా ఇతర ప్రొడక్షన్ విలువలు బావున్నాయి.

       
పోతే, సినిమా పేదరికాన్ని ఒక టెంప్లెట్ గా తరతరాలుగా మార్పులేకుండా అదే విధంగా చూపిస్తున్నారు. దీంతో కాలమొకటి, పాత్రలు వేరొకటిగా అసహజంగా తెరకెక్కుతున్నాయి. కోవిడ్ లాక్ డౌన్ల దెబ్బతో మధ్య తరగతి పేద తరగతికీ, పేద తరగతి కటిక దారిద్ర్యానికీ జారిపోయారు. ఇలాటి ఒకప్పుడు బాగానే బ్రతికి, పతనమైన మధ్య తరగతి జీవిగా వీరయ్యని చూపించి వుంటే, ప్రేక్షకులు ఐడెంటిఫై చేసుకుని -ఓన్ చేసుకోవడానికి ఎక్కువ అవకాశముండేది.

—సికిందర్

1343 : రివ్యూ!

రచన- దర్శకత్వం : కార్తీక్ జి. క్రిష్

తారాగణం : సిద్ధార్థ్, దివ్యాంశా కౌషిక్, అభిమన్యూ సింగ్, యోగి బాబు, మునీష్ కాంత్ తదితరులు

సంగీతం : నివాస్ కె ప్రసన్న, ఛాయాగ్రహణం : వాంచినాథన్ మురుగేశన్

బ్యానర్ : పాషన్ స్టూడియోస్

నిర్మాతలు : టీజీ విశ్వప్రసాద్, అభిషేక్ అగర్వాల్

విడుదల : జూన్ 9, 2023

        ఈ శతాబ్దం ఆరంభంలో ‘బాయ్స్’, ‘బొమ్మరిల్లు’, ‘నువ్వొస్తానంటే నేనొద్దంటానా’ మొదలైన హిట్ సినిమాలతో తెలుగు ప్రేక్షకులకి దగ్గరైన తమిళ హీరో సిద్ధార్థ్, చాలా కాలం కనుమరుగై 2021 లో కార్తికేయతో ‘మహాసముద్రం’ అనే మరో తెలుగులో నటించి నిరాశతో వెనుదిరిగాడు. తిరిగి ఇప్పుడు 45 ఏళ్ళ వయస్సులో తెలుగు- తమిళ భాషల్లో ‘టక్కర్’ అనే యాక్షన్ మూవీతో కొత్త తరం ప్రేక్షకుల ముందుకొచ్చాడు. అయితే కొత్తతరం తనని రిసీవ్ చేసుకునేందుకు ఎలాటి యూత్ ఫుల్ సినిమాని ప్రెజంట్ చేశాడు? తను ట్రెండ్ లోనే  వున్నాడా, లేక పాత బ్రాండ్ నే రిపీట్ చేశాడా? సినిమా కోసం తను చేసిన ప్రమోషన్లు ఫలించాయా? ఇవి తెలుసుకోవాలంటే విషయంలో కెళ్ళాలి...

కథ

పేద కుటుంబానికి చెందిన గుణశేఖర్ (సిద్ధార్థ్) పేద వాడిగా చావకూడదని, కోటీశ్వరుడవ్వాలన్న లక్ష్యంతో డబ్బు కోసం విఫలయత్నాలు చేస్తాడు. ఒక చైనీస్ బాస్ దగ్గర డ్రైవర్ గా చేరతాడు. రాజ్ (అభిమాన్యూ సింగ్) అనే ఓ కిడ్నాప్ గ్యాంగ్ బాస్ వుంటాడు. ఇతను డబ్బున్న వాళ్ళ అమ్మాయిల్ని కిడ్నాప్ చేసి డబ్బు గుంజడమో, లేదా విదేశాల్లో అమ్మేయడమో చేస్తూంటాడు. అలాటి ఒక ప్రయత్నంలో ఇతడి అనుచరులు పోలీసుల నుంచి తప్పించుకుంటూ గుణశేఖర్ కారెక్కేస్తారు. పోలీసులకి దొరక్కుండా కాపాడితే 50 లక్షలిస్తామంటారు.

       
తీరా పని పూర్తయ్యాక గుణశేఖర్ని గాయపర్చి పారిపోతారు. పోలీసులతో ఛేజింగులో కారు డ్యామేజీ కావడంతో చైనీస్ బాస్ ఏడేళ్ళు ఫ్రీగా డ్రైవర్ ఉద్యోగం చేయాలని బాండ్ రాయించుకుంటాడు. వీటన్నిటితో విసిగిపోయిన గుణ శేఖర్ ఆత్మ హత్యకి పూనుకుంటాడు. ఇది కూడా విఫలమై, యాభై లక్షలు ఇవ్వకుండా మోసం చేసిన గ్యాంగ్ కనపడితే తంతాడు. వాళ్ళ కారు వేసుకుని పారిపోతాడు. ఆ కారు డిక్కీలో కాత్యా (దివ్యాంశా కౌషిక్) అనే అమ్మాయి బందీగా వుంటుంది. ఎవరీ కాత్యా? ఈమె కూడా కిడ్నాపైందా? ఇప్పుడు గుణశేఖర్ ఈమెనేం చేయాలి? కిడ్నాప్ గ్యాంగ్ బాస్ రాజ్ బారి నుంచి ఈమెనెలా కాపాడాలి? ఇదీ మిగతా కథ.

ఎలావుంది కథ

1.5 రేటింగ్ తో అద్భుత కథ. సినిమాలో సిద్ధార్థ్ క్షవరం చేయించుకోబోతే మీసం తెగిపోయి పిల్లి గడ్డంతో మిగిలినట్టు తలాతోకా లేని కథ. ఈ గెటప్ బావుందని పిల్లి గడ్డం తోనే నటించాడు సిద్ధార్థ్. గెటప్ ఎంత ఎబ్బెట్టుగా వుందో కథ అంత ఘోరంగా వుంది. కథలో హాలీవుడ్ ‘బేబీ డ్రైవర్’ ఛాయలు కన్పిస్తాయి. కానీ ‘బేబీ డ్రైవర్’ లా వుండదు. అసలు కథే లేదు. కథ మొత్తం కలిపి చూస్తే స్థూలంగా పైన చెప్పిన విధంగా కనపడుతుంది. అతుకుల బొంతలా వున్న కథనాన్ని ఎడిట్ చేసి కూర్చితే పై విధంగా కనపడుతుంది ఇంటర్వెల్ వరకూ.

        

ఇక ఇంటర్వెల్ తర్వాత డ్రమెటిక్ క్వశ్చన్ –హీరోయిన్ తో ఏం చేయాలనేది. ఏం చేయాలో కోటీశ్వరుడవ్వాలనుకుంటున్న సిద్ధార్థ్ కి తెలీదు. హీరోయినే ఐడియా ఇచ్చే పరిస్థితి. ఎలాగూ నేను కిడ్నాప్ అయ్యాననని మా నాన్నకి తెలుసు గాబట్టి ఆ డబ్బు నువ్వే డిమాండ్ చేసి తీసుకో- అని. ఇలా హీరో పాసివ్ క్యారక్టర్ అయిపోయాక అతడితో సెకండాఫ్ కథ నస పెట్టే వ్యవహారంగా మారిపోతుంది. ఇక వీళ్ళని పట్టుకోవాలని రాజ్ గ్యాంగ్ వేట.

        

కోటీశ్వరుడవ్వాలన్న కోరిక నెరవేరక ఆత్మహత్య చేసుకోబోయిన తను, హీరోయిన్ తో అవకాశాన్ని తనే చూసి, ఆమెని కేర్ చేయకుండా అగ్రెసివ్ గా మారిపోయి - ఏ 100 కోట్లకో డిమాండ్ పెట్టి కలకలం రేపి వుంటే క్యారక్టర్, కథ పైకి లేచేవి. ఆమెకి అతడితో ప్రేమ, అతడికి ఆమెతో సంపద- ఈ డైనమిక్స్ తో రోమాంటిక్ సస్పెన్స్ ని కూడా క్రియేట్ చేసి- సెకండాఫ్ నడిపివుంటే బ్రతికి బయటపడేది సినిమా. నేటి కాలపు సినిమాలకి మార్కెట్ యాస్పెక్ట్ రోమాంటిక్స్ లేదా ఎకనమిక్స్ అయినప్పుడు- ఈ రెండూ తీరుతోంటే ఇంతకంటే ఏం కావాలి. చివర్లో హీరోని నైతిక ఆవరణలోకి తేవచ్చు- పేదరికంలోంచి బయట పడ్డమంటే అడ్డ మార్గాల్లో సంపాదించడం కాదని.

        

కనీస స్థాయిలో ఒక అర్ధవంతమైన కథ చెప్పలేనప్పుడు సినిమాలు తీసి ప్రేక్షకుల్ని చంపడమెందుకు. 

నటనలు – సాంకేతికాలు

సిద్ధార్థ్ చెప్పుకోదగ్గ నటుడు. ఈ సినిమాలో ఏం చూసి నటిద్దామనుకున్నాడో తెలీదు. ‘మహాసముద్రం’ తర్వాత మళ్ళీ టక్కర్ తిన్నాడు. పిల్లి గడ్డం అస్సలు పనికి రాలేదు. ప్రారంభంలో చూపిన తల్లి, చెల్లెలు ఏమయ్యారో కూడా పట్టించుకోలేదు. చెల్లెలు అడ్మిషన్ కోసం లక్ష అడిగితే ఇస్తానన్నాడు. అదికూడా ఏమైందో తెలీదు. ఈ బాధ్యతలు ప్రేక్షకులకి అప్పజెప్పినట్టున్నాడు. ప్రేక్షకులు జేబుల్లో బాగా నోట్ల కట్టలు పెట్టుకుని వెళ్ళాలేమో.

       
హీరోయిన్ తో ప్రేమాయణం, విలన్ తో సంఘర్షణ వంటి నటించడానికి పనికొచ్చే ముక్కలు కూడా మర్చిపోయాడు. డిక్కీలో హీరోయిన్ కనపడడమన్నది పేలవమైన ఇంటర్వెల్ మలుపు. ఈ మలుపులో కూడా అమాయకంగా చూస్తూ వుండిపోయాడు.

       
ఇక ‘మజిలీ’, ‘మైఖేల్’ సినిమాల్లో నటించిన హీరోన్ దివ్యాంశ ఈ సినిమాలో వృధా అయింది. గ్లామర్ కే తప్ప క్యారక్టర్ కి కాకుండా పోయింది. విలన్ అభిమాన్యూ సింగ్ విలన్ కి తక్కువ, కమెడియన్ కి ఎక్కువైపోయాడు. కథని హీరో పట్టించుకోక, విలన్ కూడా పట్టించుకోక వుంటే -మధ్యలో యోగిబాబు ఇష్టమొచ్చినట్టు కామెడీలు చేసుకున్నాడు.

        
ఈ సినిమాకి హీరో యాక్షన్ డైరెక్టర్. చెన్నై రోడ్ల మీద ఛేజింగ్స్ ఈ సినిమాకి హైలైట్. ఓ మూడు ఛేజింగులు వున్నాయి. అయితే ఇవి బాగా సాగదీసిన ఛేజింగులు. రెండుంపావు గంటల సినిమాలో కథలేదని తెలిసి వుండాలి యాక్షన్ డైరెక్టర్ కి- ఛేజింగులతో కవర్ చేశాడు. కెమెరా వర్క్, లొకేషన్స్ బావున్నా, పాటలు సూట్ కాలేదు.

        
మొత్తానికి తెలుగులో సిద్దార్థ్ రెండో పునరాగమన ప్రయత్నం టక్కర్ తిని బోర్లా పడింది. కొత్త దర్శకుడు కార్తీక్ జి క్రిష్ చేతిలో బాగా క్రష్ అయింది.

—సికిందర్

1342 : స్పెషల్ ఆర్టికల్

 

ఓటీటీల్లో సినిమాల్ని ముందుగానే విడుదల చేయడాన్ని నిరసిస్తూ జూన్ 7 -8 తేదీల్లో కేరళ రాష్ట్రవ్యాప్తంగా సినిమా థియేటర్లని మూసివేస్తున్నట్లు ఫిల్మ్ ఎగ్జిబిటర్స్ యునైటెడ్ ఆర్గనైజేషన్ ఆఫ్ కేరళ (FEUOK)  ప్రకటించింది. థియేటర్లలో విజయవంతంగా నడుస్తున్న ‘2018’, ‘పచ్చువుమ్ అద్భుత విళక్కుం’ సినిమాల నిర్మాతలు ఓటీటీల్లో  గడువుకంటే ముందే ప్రీమియర్ చేయడానికి అంగీకరించడంతో, ఎగ్జిబిటర్ల సంఘం ఈ తీవ్ర నిర్ణయం తీసుకుంది.

        ‘2018’, ‘పచ్చువుమ్ అద్భుత విళక్కుమ్’ సినిమాలు థియేటర్లలో విజయవంతంగా నడుస్తున్నాయనీ, అందుకని ఓటీటీల్లో ముందస్తుగా విడుదల చేయడాన్ని వ్యతిరేకిస్తూ, జూన్ 7- 8 తేదీల్లో సినిమా హాళ్ళను పూర్తిగా మూసివేసి నిరసన తెలియజేయాలని నిర్ణయించుకున్నట్టు ఎగ్జిబిటర్ల సంఘం ప్రకటించింది. సినిమాల్ని థియేటర్లలో విడుదల చేసిన తర్వాత, నిర్ణీత వ్యవధి గడిచాక మాత్రమే ఓటీటీ విడుదలకి అనుమతించేట్టు ప్రభుత్వం నిర్ణయం తీసుకోవాలని కోరింది.

       
ఓటీటీలో సినిమాల్ని ముందుగానే విడుదల చేయడం వల్ల థియేటర్ల యజమానులు సినిమా హాళ్ళని నడపడానికి ఇబ్బంది పడుతున్నారనీ, ఓటీటీలకి సమాంతరంగా సినిమా హాళ్ళని నడపలేమనీ, దీనికి ఒక పరిష్కారం కనుగొనాలనీ, పైన పేర్కొన్న రెండు సినిమాలు థియేటర్లలో మంచి వసూళ్ళతో ఆడుతూ వుండగానే, ఓటీటీ విడుదల తేదీల్ని ప్రకటించడంతో ప్రేక్షకులు థియేటర్లకి రావడం లేదనీ ఆవేదన వ్యక్తం చేసింది ఎగ్జిబిటర్ల సంఘం.

నిర్మాతలు ఇంకొన్ని రోజులు వేచి వుంటే ‘2018’ కేరళలో రూ. 200 కోట్లు వసూలు చేసిన తొలి మలయాళ సినిమాగా నిలిచిపోయేదనీ, ఇప్పటికే 25 రోజుల్లో రాష్ట్రంలో వసూళ్ళు రూ. 160 కోట్లు దాటాయనీ, రాష్ట్ర ప్రభుత్వానికి దాదాపు రూ. 60 కోట్ల వినోద పన్ను సమకూరిందనీ ఎగ్జిబిటర్ల సంఘం వెల్లడించింది. విడుదలైన మొదటి 10 రోజుల్లో రూ. 100 కోట్లు వసూలు చేసిన మొదటి మలయాళ సినిమాగా నిలిచిందనీ పేర్కొంది.

       
నిజానికి ఓటీటీల్లో విడుదలలకి సంబంధించి నిర్మాతలతో ఎగ్జిబిటర్ల సంఘం గతంలో ఒక ఒప్పందం కుదుర్చుకుంది కూడా. సినిమాల్ని థియేటర్లలో విడుదల చేసిన 42 రోజుల తర్వాత మాత్రమే ఓటీటీల్లో విడుదల చేయాలనేది ఆ ఒప్పందం. ఈ ఒప్పందాన్ని ‘2018’, ‘పచువుమ్ అత్బుత విళక్కుమ్’ నిర్మాతలు పరిగణనలోకి తీసుకోలేదు.

        
గతంలో చలనచిత్రాలు థియేటర్లలో విడుదలైన 32 రోజుల తర్వాత ఓటీటీల్లో విడుదల చేయాలని ఒక నిబంధన వుండేది.  అయితే ఈ నిబంధన ఆచరణ సాధ్యం కాదని తేలడంతో పునః పరిశీలించాల్సి వచ్చింది. సవరించిన వ్యవధి 42 రోజులుగా నిర్ణయించారు. ఇకముందు ఎవరైనా నిర్మాత ఈ నిబంధనని ఉల్లంఘిస్తే ఆ నిర్మాత సినిమాల్ని బహిష్కరిస్తామని సంఘం హెచ్చరించింది.

తమ డిమాండ్లని పరిష్కరించాలని 20 రోజుల అల్టిమేటం జారీ చేశామని సంఘం తెలిపింది. 20 రోజుల్లోగా తమ డిమాండ్లని నెరవేర్చకపోతే  సినిమా హాళ్ళని పూర్తిగా మూసివేసి నిరవధిక సమ్మెకు దిగుతామని మరో హెచ్చరిక జారీ చేసింది. అయితే సినిమాల్ని డైరెక్ట్-టు-ఓటీటీ విడుదల చేసుకుంటే అభ్యంతరం లేదని తెలిపింది.            

నిబంధనల ఉల్లంఘన వినోదపు పన్నుని కూడా ప్రతికూలంగా ప్రభావితం చేస్తున్న పరిస్థితుల్లో ప్రభుత్వం జోక్యం చేసుకోకపోవడం పై కూడా సంఘం స్పందించింది. ఇటీవలి వరకు ఈ సమస్య గురించి ప్రభుత్వానికి తెలియదనీ, ప్రభుత్వం ఇప్పుడు సమస్యని గుర్తించిందని భావిస్తున్నామనీ, ఇప్పటికే సంబంధిత మంత్రితో చర్చలు జరిపామనీ, సంబంధిత డేటాతో బాటు, ఇతర నివేదికల్ని మంత్రికి సమర్పించామనీ, ఈ విషయాన్ని పరిష్కరిస్తానని మంత్రి హామీ ఇచ్చారనీ సంఘం తెలిపింది.

చెత్త సినిమాలకి  నో!

ఓటీటీ విడుదలలతో సమస్య ఇలా వుండగా, కేరళలో థియేటర్లు ఎదుర్కొంటున్న భయంకర సంక్షోభం గురించి వార్తలు గత రెండు నెలలుగా వెలువడుతూనే వున్నాయి. మలయాళం సినిమాల బ్యాక్ టు బ్యాక్ ఫ్లాప్‌ల కారణంగా రాష్ట్రంలోని సినిమా హాళ్ళని  కాపాడేందుకు ఎగ్జిబిటర్ల సంఘం గత నెలలోనే అనేక చర్యల్ని వెల్లడించింది. వాటిలో ప్రధానమైనది చెత్త సినిమాల బహిష్కారం.

        
ఎగ్జిబిటర్లని తీవ్రంగా దెబ్బ తీస్తున్న సమస్య  చెత్త సినిమాలు. కేరళలో 1015 సినిమా హాళ్ళున్నాయి. నాణ్యత లేని సినిమాలకి ప్రేక్షకుల్లేక షోలు ఆపేయాల్సిన పరిస్థితి. దీంతో ఇలాటి సినిమాల్ని ప్రదర్శించకుండా వుండాలని ఎగ్జిబిటర్ల సంఘం నిర్ణయం తీసుకుంది. ఒకవేళ ఎగ్జిబిటర్ల తిరస్కరణకి గురైన సినిమాలని నిర్మాతలు థియేటర్లలో ప్రదర్శించాలని కోరుకున్నట్లయితే, థియేటర్ యజమానులకి  స్క్రీనింగ్ ఫీజు చెల్లించేలా నిబంధన విధించేందుకు సిద్ధమయ్యారు.

       
గత నెల జనరల్ బాడీ మీటింగులో, కొన్ని సినిమాలకు కనీస స్క్రీనింగ్ ఛార్జీని విధించాలని ఒక నిర్ణయానికి వచ్చారు. ఎందుకంటే ఇలాటి సినిమాలకి థియేటర్లలో చాలా తక్కువ మంది ప్రేక్షకులుంటారు. కొన్నిసార్లు కేవలం ముగ్గురు లేదా ఐదుగురు మాత్రమే వుంటారు. దీనివల్ల నిర్వహణ ఖర్చులు, విద్యుత్ ఛార్జీలు కూడా భరించడం కష్టమవుతోంది. ఈ సమస్యని పరిష్కరించడానికి, నాణ్యత లేనివిగా భావించే సినిమాల నిర్మాతల నుంచి  స్క్రీనింగ్ ఫీజులు వసూలు చేయాలని ప్లాన్ చేస్తున్నారు. ఈ మొత్తాన్ని చెల్లించడానికి నిరాకరించే నిర్మాతల సినిమాల్ని ప్రదర్శించ కూడదని నిర్ణయం తీసుకున్నారు. ఈ విధానం సింగిల్ స్క్రీన్ థియేటర్లకి మాత్రమే వర్తిస్తుంది, మల్టీప్లెక్సులకి కాదు.

       
మలయాళంలో అవసరానికి మించిన సినిమాలు ఉత్పత్తి చేస్తున్నారు. నెలకు పాతిక సినిమాలు విడుదల చేసి ప్రేక్షకుల నెత్తిన వేస్తున్నారు. ఇవన్నీ చెత్త సినిమాలు. ప్రేక్షకులు వీటి వైపు కన్నెత్తి కూడా చూడడం లేదు. ఒకప్పుడు గుణాత్మక సినిమాలకి పేర్గాంచిన మాలీవుడ్ ఇప్పుడు దేశంలోనే చావకబారు సినిమా పరిశ్రమ మారిపోయింది. ఇంకా చాలా వెనక్కిపోతే, 1970-80 లలో మలయాళ సినిమాలంటే ‘ఏ’ సర్టిఫికేట్ సెక్స్ సినిమాలనే పేరుండేది. సీమా నుంచీ షకీలా వరకూ హీరోయిన్లు శృంగార పాత్రలతో ప్రేక్షకుల్ని రెచ్చగొట్టే వాళ్ళు. ఇవి తెలుగు డబ్బింగులుగా తెలుగునాట కూడా దాడి చేశాయి. దీనికి ఆద్యుడు దర్శకుడు ఐవీ శశి. 100 సినిమాలు తీసిన శశి బూతు సినిమాలే ఎక్కువ తీశాడు. ఆ నిమిషం, అనుభవం, ఆలింగనం, అంగీకారం...అంటూ ఆ చవకబారు సినిమాలే ఇప్పుడు సోకాల్డ్ వాస్తవిక సినిమాలుగా పునరావృతమవుతున్నాయి.

       
వాస్తవికత అనే పైత్యం ముదిరి ఈ వందల కొద్దీ చెత్త సినిమాలతో నిర్మాతలు, పంపిణీ దార్లు, థియేటర్ల యజమానులు తప్ప- దర్శకులు, నటీనటులు, టెక్నీషియన్లూ అపార ఉపాధి అవకాశాలు పొందుతూ చెట్టపట్టా లేసుకు తిరుగుతున్నారు. ఇది విచిత్ర పరిస్థితి. ఇలా మాలీవుడ్ లో హమాలీలు ఎక్కువైపోయారు. మాలీవుడ్ లో సామర్థ్యానికి మించి మొత్తం ఈ ఏడాది 250 నుంచీ 300 వరకూ సినిమాలు థియేటర్లలో విడుదల కానున్నాయి. 

ఇలాటి సినిమాలకి ఫైనాన్స్ చేయడాన్ని నిలిపివేయాలని, లేదా డిస్ట్రిబ్యూటర్లు పంపిణీ చేయడం మానుకోవాలనీ, లేదా నటీనటులు ఇలాటి సినిమాల్లో నటించవద్దనీ ఎగ్జిబిటర్ల సంఘం డిమాండ్ చేసే హక్కులేదు. అయితే ఈ సినిమాల్ని ప్రదర్శించడానికి నిరాకరించే హక్కు మాత్రం వుంది.

        
సినిమాల నాణ్యతని అంచనా వేయడానికి ఎగ్జిబిటర్ల సంఘం పూనుకోవచ్చు. సినిమాల సంభావ్య విజయాన్ని అంచనా వేయడానికి, నాణ్యతని అంచనా వేయడానికీ  ఎగ్జిబిటర్లుగా తమకి నైపుణ్యాలున్నాయని చెప్పుకుంటున్నారు. ఈ మూల్యాంకన ప్రక్రియలో పరిగణించే నిపుణులుగా సినిమా దర్శకులు, నటీనటులు, నిర్మాణ సంస్థలు,  పంపిణీదారులూ వుండొచ్చు.

       
ఎగ్జిబిటర్ల సంఘం ఇంకో ఆక్షేపణ ఏమిటంటే, ఈ రోజుల్లో చాలా మలయాళ సినిమాలు ఓటీటీల్ని లక్ష్యంగా చేసుకునే ఏకైక ఉద్దేశ్యంతో నిర్మిస్తున్నారు. ఈ సినిమాలే థియేటర్లకి నష్టం కలిగిస్తున్నాయి. ఈ సినిమాల్ని చూడడానికి థియేటర్ కొచ్చిన ప్రేక్షకులు తాము మోసపోయామని గ్రహిస్తున్నారు. దీంతో మళ్ళీ థియేటర్లకి రావడానికి సందేహిస్తున్నారు. అందుకని థియేటర్లని రక్షించడానికి ఏకైక మార్గం థియేటర్లని దృష్టిలో వుంచుకుని థియేటర్ సినిమాల్ని నిర్మాతలు నిర్మించడమే.  ఇది హాళ్లకు వచ్చే ప్రేక్షకుల సంఖ్యని పెంచుతుంది. ఇలా రూపొందించిన సినిమాలే తమకి అవసరమని ఎగ్జిబిటర్ల సంఘం విన్నవించుకుంటోంది.

—సికిందర్