1022 : దర్శకుడి స్టోరీ

   ‘అర్జున్ రెడ్డి’ లాంటి సూపర్ డూపర్ హిట్ అందించిన దర్శకుడు సందీప్ రెడ్డి వంగాకి టాలీవుడ్ లో రెండో సినిమా దొరకడం లేదు. విజయ్ దేవరకొండ స్టార్ డమ్ ని ఏక్ దమ్మున పెంచేసిన ‘అర్జున్ రెడ్డి’ తర్వాత నుంచి  వంగా టాలీవుడ్ లో  ఖాళీగానే వున్నాడు. 2017 లో ‘అర్జున్ రెడ్డి’ విడుదలైంది. అప్పట్నుంచీ ఈ నాల్గేళ్ళూ చెయ్యని ప్రయత్నమంటూ లేదు. తెలుగు స్టార్స్ కి అతడి కథలు నచ్చలేదని అప్పట్లో చెప్పుకున్నారు. ఇక లాభం లేదని బాలీవుడ్ వైపు దృష్టి సారించాడు. అక్కడ అదృష్టం పలకరించింది. ‘అర్జున్ రెడ్డి’ రీమేక్ కి షాహిద్ కపూర్ అంగీకరించాడు. దీంతో అక్కడి నిర్మాణ సంస్థతో ‘కబీర్ సింగ్’ తీస్తే అది అతి పెద్ద హిట్టయ్యింది. 60 కోట్ల బడ్జెట్ తో తీస్తే 370 కోట్లు వసూలు చేసింది. ఇది వంగా సాధించిన పెద్ద రికార్డు. ఇది 2019 లో జరిగింది. తిరిగి టాలీవుడ్ మీద దృష్టి పెట్టి  మళ్ళీ ప్రయత్నాలు చేసీనా, నో అనే చెప్పింది టాలీవుడ్.

నిజానికి ‘అర్జున్ రెడ్డి’ కి కూడా నిర్మాతలు దొరకలేదు. నాల్గేళ్ళూ తిరిగి తిరిగి విసిగి, తానే స్వయంగా నిర్మించేందుకు పూనుకున్నాడు. తండ్రి, సోదరుడు నిర్మాతలుగా ముందుకొచ్చారు. అలా 5 కోట్ల బడ్జెట్ తో ‘అర్జున్ రెడ్డి’ నిర్మించారు. అది 50 కోట్లు వసూలు చేసి రికార్డు సృష్టించింది. అయినా తెలుగు స్టార్లు ఆసక్తి చూపలేదు.

        ‘కబీర్ సింగ్’ హిట్ ని చూసి కూడా తెలుగు స్టార్లు అవకాశమివ్వక పోవడంతో మళ్ళీ బాలీవుడ్ కెళ్ళిపోయాడు. వెంటనే అక్కడ రణబీర్ కపూర్ తో ఓకే అయ్యింది. సందీప్ చెప్పిన ‘యానిమల్’ స్టోరీకి కబీర్ సింగ్ నిర్మాతల్లో ఒకరైన భూషణ్ కుమార్ కూడా వెంటనే ఓకే చెప్పి ఎననౌన్స్ కూడా చేసేశారు. ఇక చక చకా పరిణితి చోప్రా, అనిల్ కపూర్, బాబీ డియోల్ వంటి స్టార్లు కూడా ఇందులో నటించేందుకు బుక్కైపోయారు.

        ఇదీ సందీప్ రెడ్డి లక్ బ్యాడ్ లక్ ల దొబూచులాట. బాలీవుడ్ లోనే లక్ వున్నట్టు అనుకోవాలి. అక్కడే సెటిలైతే తెలుగు నుంచి రెండో రామ్ గోపాల్ వర్మ అవుతాడు. ఇక టాలీవుడ్ కి రాంరాం, బాలీవుడ్ గయా రామ్ అనుకుని సెకండ్ వర్మ అయిపోతే సరి!

***

1

  

       అసలీ సినిమా మొత్తాన్నీ గమనిస్తే నాటక ధోరణిలో గాథ కన్పిస్తుంది. గాథ అంటేనే పాత స్కూల్లో చెప్పేది. నాటకంలో ఒక్కో అంకానికి తెరపడుతున్నట్టు ఒక్కో చాప్టర్ గా నిదానంగా సాగే ఈ గాథకి ఈ ధోరణిలోనే బలమైన ఆకర్షణ వుంది. అది హృదయాలకి గాలం వేస్తుంది. పాత అనేది లేదు. సాంప్రదాయం లేకపోతే ఆధునికత్వం లేదు. సాంప్రదాయం లేకపోతే దేన్ని చూసి ఆధునికత్వం వస్తుంది. సాంప్రదాయాన్ని వ్యతిరేకిస్తూ అభ్యుదయం పుడుతుంది. సాంప్రదాయం లేకపోతే అభ్యుదయం ఎక్కడ్నుంచి పుడుతుంది. పెద్దలు చేసే పెళ్ళిళ్ళు లేకపోతే ఠాట్ వీల్లేదని ప్రేమ పెళ్ళిళ్ళు ఎక్కడుంటాయి. వాళ్ళూ వీళ్ళూ కొట్టుకోవడం, వీధిన పడ్డం ఎక్కడుంటుంది. కాబట్టి సాంప్రదాయ అంశలేని ఏ ఆధునిక జీవితం, కళ, వ్యవహారం లేదు. దాన్ని కూడా కలుపుకుంటూ పోవాల్సిందే. ఇప్పుడున్న సినిమాల మేకింగ్ కి సినిమా ప్రేక్షకులు సినిమా ప్రేక్షకులు కాలేకపోతున్నారు. ఏదో పైపైన చూసేసి మర్చిపోవడమే. ఎంత హిట్ అన్పించుకున్నా మళ్ళీ మళ్ళీ చూసే ప్రేక్షకులు ఒకప్పటి లాగా వుండడం లేదు. సినిమా ప్రేక్షకుల్లోని ప్రేక్షకుల్ని చంపేస్తున్న ఈ మేకింగ్ తీరు తెన్నుల్ని సంస్కరించుకోవడానికి ‘దేర్ విల్ బి బ్లడ్’ లాంటి గాథలు ఎంతైనా ఉపయోగపడవచ్చు.  

      ఇప్పుడు ఎండ్ విభాగాని కొచ్చాం. మిడిల్ 2 లో భూములున్న బాండీ వచ్చి, పైప్ లైన్ వేసుకోవడానికి భూములు కావాలంటున్న డానీ ని బ్లాక్ మెయిల్ చేసే దగ్గర ఆగాం. డానీ చేసిన హెన్రీ హత్యని అడ్డుపెట్టుకుని ఈ బ్లాక్ మెయిల్. ఇప్పుడు డానీకి భూములు కావాలంటే, చర్చికి వచ్చి మతంలో చేరాలని బాండీ ఆదేశం. ఇది పీపీ 2 ఘట్టం. మతాన్ని వ్యతిరేకించే డానీకి ఇది ఇరకాటంలో పెట్టెసే ఘట్టం. గాథ మతాన్ని వ్యతిరేకిస్తూ ప్రారంభమయింది పీపీ 1 దగ్గర. దీనికి సమాధానంగా మతాన్ని ఒప్పుకోవాల్సిన ఈ పీపీ 2 ఘట్టం. గాథకి పీపీ 1 సమస్యా స్థాపన, పీపీ 2 పరిష్కార మార్గం. పీపీ 1, పీపీ 2 ల మధ్య ఈ  మిడిల్ 1, మిడిల్ 2 లతో వుండేదే సినిమా కథ (గాథ). దీని తర్వాత వుండేది కథ (గాథ) కాదు, కథకి (గాథకి) ముగింపు కథనం...

    ఎండ్ కథనం :  చర్చిలో డానీ ప్రాయశ్చిత్తం. డానీ ప్రత్యర్ధి పాస్టర్ ఇలై కార్యక్రమం నిర్వహిస్తాడు, ప్రభువు వైపు చూస్తూ నేను పాపిని, కొడుకుని వదిలేశానని పదేపదే గట్టిగా చెప్పమంటాడు. చెప్పాక డానీ జుట్టు పట్టుకుని సైతాను వదిలిస్తాడు. డానీ పునీతుడవుతాడు. ఇక బాండీ భూముల్ని లీజుకి తీసుకుని పైపు లైన్ వేయడం ప్రారంభిస్తాడు.

        ఎక్కడో వుంటున్న కొడుకుని తీసుకొచ్చి కలుపుతారు. కొడుకుని హత్తుకుంటాడు. కొట్టమని చెంప మీద కొట్టించుకుంటాడు. ఇక కొడుకు జ్యూనియర్ డానీతో ఆనందంగా జీవితం గడుపుతాడు. జూనియర్ పెద్దవాడై మేరీని పెళ్లి చేసుకుంటాడు. కొన్నాళ్ళ తర్వాత వచ్చి విడిగా వ్యాపారం చేసుకుంటాను, వాటా పంచమంటాడు. పంచనంటాడు డానీ. తండ్రిగా నిన్ను ఒప్పుకుంటాను గానీ, పార్టనర్ గా నీతో పొసగడం లేదంటాడు జ్యూనియర్. నీ తండ్రెవరు, అక్రమ సంతానానివి నువ్వని దూషిస్తాడు డానీ. అనాధగా దొరికితే పెంచి పోషించానంటాడు. తన గురించి ఈ కొత్త విషయాలు తెలుసుకున్న జూనియర్ విరక్తితో వెళ్ళిపోతాడు.

మరికొంత  కాలం గడిచి పోతుంది. ఆయిల్ మోతుబరిగా ఇంకింత ఎదిగి విశాలమైన బంగాళాలో ఒంటరిగా వుంటాడు డానీ. తాగుడు మరుగుతాడు. ఇప్పుడు ఇలై వస్తాడు. చాలా రిచ్ గా వుంటాడు. ఇన్నాళ్ళూ మతప్రచారం చేస్తూ దేశాలు తిరిగానంటాడు. రేడియో ప్రచారం కూడా చేశానంటాడు. తన కెందరో ఫ్యాన్స్ ఏర్పడ్డారంటాడు. కొన్నాళ్ళ క్రితం బాండీ చనిపోయాడనీ, బాండీ మనవడు హాలీవుడ్ ప్రయత్నాలు చేస్తున్నాడనీ, ఇప్పుడు తమకున్న భూములు అమ్మేయదల్చుకున్నాడనీ అంటాడు. డానీ లీజుకి తీసుకున్న ఆ భూములు కొనేసుకుంటే, తనకి కొంత కట్ మనీ వస్తుందనీ, తను చాలా ఇబ్బందుల్లో వున్నాననీ అంటాడు. పాత బాకీ ఐదువేలు కూడా ఇమ్మంటాడు.

        అయితే నువ్వు దొంగ పాస్టర్ నని ఒప్పుకో, మతం మూఢ నమ్మకమని అరిచి చెప్పుకో- అంటాడు డానీ. ఇలై అలాగే చేసేస్తాడు. తను దొంగ పాస్టర్ ననీ, మతం మూఢ నమ్మకమనీ అరిచి అరిచి చెప్తాడు. ఇలై చేత ఇలా చెప్పించాక, ఆ భూములు తనకి పనికిరావని చల్లగా చెప్తాడు డానీ. ఆ భూముల్లో స్ట్రా వేసి మిల్క్ షేక్ లా చమురుని తాగి పడేశా నంటాడు.

షాక్ తిన్న ఇలై అన్యాయం చేయవద్దంటాడు, అన్యాయమే చేస్తానని ఇలైని కొట్టి కొట్టి చంపేస్తాడు డానీ. చంపేసి, ‘ఐయామ్ ఫినిష్డ్’ అంటాడు. ది ఎండ్.

***

    విశ్లేషణ : మతం -పెట్టుబడి రెండిటి గాథ కొలిక్కి వచ్చింది. సంఘర్షించుకుంటే మతానికేమీ కాలేదు, పెట్టుబడికేమీ కాలేదు. అయ్యింది వాళ్ళిద్దరికే. నెగెటివ్ క్యారక్టర్లు గా మారిన క్యారక్టర్ల గాథ. ఈ గాథలో ఏ వొక క్యారక్టర్ విజయాన్నీ చూపలేరు. మతం మీద పెట్టుబడి విజయం, లేదా పెట్టుబడి మీద మత విజయం చూపలేరు. అసహజంగా వుంటుంది. మతం పెట్టుబడిని నాశనం చేయదు, పెట్టుబడి మతాన్నీనాశనం చెయ్యదు. మతం మీద నాస్తిక విజయం, పెట్టుబడి మీద కమ్యూనిస్టు విజయం చూపించ వచ్చు. మతమని ఒకరు, పెట్టుబడి అని ఒకరూ సంఘర్షించుకుంటే ఇద్దరూ అంతమవాలి, లేదా రాజీ పడాలి చివరికి. ఇది రాజీపడి సుఖాంతమయే గాథ కాలేదు. డానీ ఇలైలు మతం-పెట్టుబడి భావజాలాలు పరస్పర ఆధారభూతాలని గుర్తించలేదు. వాటిని అడ్డుపెట్టుకుని కక్ష తీర్చుకుందామనుకున్నారు. శిక్షలు పొందారు.

***

        2. ఈ ఎండ్ కథనంలో తిరిగి మిడిల్ 2 కథనం లోలాగే  క్యారక్టర్ల వారీ చాప్టర్లున్నాయి. పీపీ 2 లో బ్లాక్ మెయిల్ తో ఎంటరైన బాండీ, ఈ ఎండ్ ప్రారంభంలో డానీని చర్చిలో చేర్పించి నిష్క్రమిస్తాడు. ఈ చాప్టర్లో డానీ వదిలేసిన కొడుకు ప్రస్తావన వుండడంతో, తర్వాతి చాప్టర్ ఆ కొడుకు రాకతో ప్రారంభమవుతుంది. కొడుకు తను అక్రమ సంతానమని తెలుసుకుని వెళ్ళి పోయాక, ఇలై రాకతో చివరి చాప్టర్ ప్రారంభమవుతుంది. ఒకరి తర్వాత ఒకరుగా మూడు చాప్టర్లతో ఈ ఎండ్ వుంది. ఈ నాటక శైలి తెలుగులో వస్తే, బాగా లేదని  కొన్ని రివ్యూలే ఆడియెన్స్ కి మిస్ ఇన్ఫర్మేషన్ ఇచ్చేస్తాయి. దేన్ని ప్రమోట్ చేయాలో, దేన్ని డీమోట్ చేయాలో తెలుసుకోక పోతే.

***

         3. మొదటి చాప్టర్లో చర్చిలో డానీ నిష్కృతి పేర ఇలై ప్రతీకార పండగ చేసుకున్నాడు. వెనుకటి మిడిల్ 2 లో, బాకీ డబ్బుల కోసం వచ్చిన ఇలైని బురదలో పడేసి ఎడాపెడా కొట్టాడు డానీ. దాని ప్రతీకారమిలా... మిడిల్ 1 లో ప్రచ్ఛన్న పోరాటంగా, మిడిల్ 2 లో ప్రత్యక్ష పోరాటంగా సాగిన ఈ ప్రత్యర్ధుల మధ్య యాక్షన్ రియాక్షన్ల్ పరంపర, ఈ ఎండ్ లో కొలిక్కి వచ్చే క్రమం ప్రారంభమైంది.

        వ్యాపారం కోసం విధిలేక మతంలో చేరడాని కొచ్చిన డానీ చేత, పాపినని చెప్పిస్తాడు పాస్టర్ ఇలై. చెప్పించి, కొడుకుని వదిలేసిన పాపం ప్రభువు వైపు చూసి చెప్పమంటాడు. చెప్పాక, మోకాళ్ళ మీద కూర్చున్న డానీని ఎడాపెడా కొడుతూ సైతానుని వదిలిస్తాడు. కానీ ఆల్రెడీ తనలోనే సైతానుతో వున్న ఇలైని కూడా ప్రభువు గమనిస్తూనే వున్నాడు...

        నిజంగా డానీకి పాప ప్రక్షాళన అయ్యిందా? పాపాలన్నీ చెప్పుకున్నాడా? హెన్రీని హత్య చేసిన విషయం చెప్పుకోలేదు. ఇది కర్మ ఫలంగా తర్వాత యాక్షన్లో కొస్తుంది. హెన్రీ హత్యని అడ్డుపెట్టుకుని డానీని బ్లాక్ మెయిల్ చేసి మతంలో చేర్పించిన బాండీ, ఈ  విజయానికి ఆనందిస్తున్నాడు. ఇది బాండీ విజయమేనా?

డానీ చేసిన హత్యని స్వార్ధానికి ఉపయోగించుకున్నబాండీ, తనూ నేరంలో భాగస్వామి అయ్యాడు. హత్య విషయం కూడా డానీ చేత చెప్పిస్తే, డానీ అరెస్టయి అతడి బిజినెస్ వుండదు, తను భూములు లీజుకిచ్చి లాభపడే అవకాశముండదు. అందుకని నేరం గురించి తెలిసినా దాచి పెట్టాడు. మరి ఈ బ్యాడ్ కర్మకి శిక్షేమిటి?

కొన్ని శిక్షల్ని ముందే ఖరారు చేసి పట్టేస్తుంది ప్రకృతి, ముందు జరగబోయేది దానికి తెలుసు గనుక. కర్మ ఫలాలు అడ్వాన్స్ బుకింగ్ గానూ వుంటాయి, కరెంట్ బుకింగ్ గానూ వుంటాయి. ఎదైతే అది తీసుకుని షో చూసుకోవాలి. ఆ షో హిట్టే అవుతుంది, తెలుగు సినిమాల్లాగా 90% ఫ్లాప్స్ తో వుండదు. రేపు ఈ శిక్షనుంచి బాండీ తప్పించుకున్నా వారసులు తప్పించుకోలేరు. చూద్దాం ఏం జరుగుతుందో. మతం, పెట్టుబడి లాంటి వన్నీ మనుషులు ఏర్పర్చు కున్నవి. మతమైనా, పెట్టుబడి అయినా, మరేదైనా, అన్నిటికీ పైనుండేది మనుషులు ఏర్పర్చని ప్రకృతే.  అది యాక్షన్ రియాక్షన్ల బిజినెస్ తో బిజీగా వుంటుంది.

***

       4. రెండో చాప్టర్లో కొడుకు జూనియర్ డానీ వస్తాడు. మిడిల్ 2 లో పనికొచ్చే హెన్రీ ని ఛూసి, పనికిరాని చెవిటి పెంపుడు కొడుకుని రైలెక్కించేసి వదిలించుకున్న డానీకి, చర్చిలో పునీతుడయ్యాక బహుమతిగా తిరిగి అదే కొడుకు. ఇప్పుడెంతో ప్రేమగా చూసుకుంటాడు. తండ్రీ కొడుకులు గతంలో సరదాగా ఆడుకున్న ఆటలు ఇప్పుడు విజువలైజ్ అవుతాయి. సడెన్ గా ఈ కొత్త డిస్కవరీ థ్రిల్ చేసి ఆనంద పరుస్తుంది మనల్ని. ఎందుకంటే బిగినింగ్ లోగానీ, మిడిల్ రెండు విభాగాల్లో గానీ, వీళ్ళిద్దరి సాన్నిహిత్యం ఎక్కడా చూపించలేదు. ఎక్కడ చూపిస్తే రక్తి కట్టి సినిమా టాప్ అప్ అవుతుందో (వేరేపదం దొరక్క టాప్ అప్ అని వాడేశాం), అక్కడ చూపించేందు కోసం ప్రత్యేకంగా అట్టిపెట్టాడు దర్శకుడు. ఇది డైనమిక్స్. మనమేం చేస్తామంటే, ఫాదర్ - ఛైల్డ్ సెంటి మెంటని అక్కడా చూపించి, ఇక్కడా చూపించి చెడగొడతాం. ఎక్కడా టాప్ అప్ అవదు సినిమా. రీఫ్రెష్ అవదు. చద్దన్నంలా పడుంటుంది.

        జూనియర్ పెద్దవాడై మేరీని పెళ్లి చేసుకుంటాడు. మేరీని ఇప్పుడు చూపించడు దర్శకుడు. చిన్నతనంలో ప్రార్ధన చేయక తండ్రి చేత దెబ్బలు తింటూ వున్న మేరీకి, నాస్తికుడైన డానీ అండగా వున్నాడు. అతను ఆల్రెడీ నాస్తికుడు, ఆమె కాబోయే నాస్తికురాలు. ఇద్దరికీ అక్కడ సరిపోయింది. గత చాప్టర్లో, చర్చి సీనులో ఇలై డానీ చెమ్డా లెక్కదీసింతర్వాత, మతంలో చేరిన అతడ్ని, బేబీ మేరీ వాటేసుకుంటుంది. ఇలా తనుకూడా డానీని ఫాలో అయి మతాన్ని ఒప్పుకుని, ఫ్యామిలీ అయిందని ఈ ఒక్క షాట్ లో కథ చెప్పాడు దర్శకుడు. దీన్ని అండర్ లైన్ చేసుకోవచ్చు టిప్ బావుంటే.

ఇప్పుడు పెద్దవాడైన జూనియర్ మేరీని పెళ్లిచేసుకున్న విషయం డానీకి చెప్పడం ద్వారా తెలియజెస్తాడు దర్శకుడు. ఇక మెక్సికోలో విడిగా వ్యాపారం చేసుకుంటానని, వాటా పంచమని జూనియర్ అంటాడు. ఇలా జూనియర్ వాటా అడిగేసరికి, డానీకి జూనియర్ బాస్టర్డ్ గా కన్పిస్తాడు. ఎవడికి పుట్టావని అంటాడు. ‘బాస్టర్డ్ ఫ్రమ్ ఏ బాస్కెట్’ అని తిడతాడు. అనాధగా దొరికితే పెంచుకున్నానంటాడు. చాలా తూలనాడుతాడు. తన జన్మరహస్యం ఇలా తెలుసుకుని షాక్ తిన్న జూనియర్, ఏమీ చేయలేక ఒట్టి చేతులతో వెళ్ళిపోతాడు.  

     తమ పొజిషనేంటో తెలుసుకోకుండా ఎవర్నీ నమ్మి పని చేయకూడదు. ఒట్టి చేతులే మిగులుతాయి. బాల్యం నుంచీ డానీయే తండ్రి అనుకున్న జూనియర్, తల్లి ఏదని అడగలేదు. అడిగివుంటే తన పొజిషన్ అప్పుడే తెలిసేది. అందుకనుగుణంగా జీవితాన్ని మల్చుకునే వాడు. డానీ మీద ఆధారపడేవాడు కాదు. ఇదేమీ తెలుసుకోకుండా డానీ పార్టనర్ గా చేస్తే పార్టనర్ గా వుండి పోయాడు. కంపెనీ అభివృద్ధికి కష్టపడ్డాడు. ఇప్పుడు  తండ్రిగా డానీ ఓకే గానీ, పార్టనర్ గా పొసగడం లేదని వాటా అడిగేసరికి, బాస్టర్డ్ అన్నాడు. కనువిప్పయి, చేసేది లేక పడ్డ కష్టమంతా వదులుకోవాల్సి వచ్చింది జూనియర్ కి.

        తండ్రిగా ఓకే అనుకున్నాడు. హెన్రీని చూసి తనని రైలెక్కించి వదిలించుకున్న కోపం, పాలల్లో లిక్కర్ కలిపి తాగించిన కసీ అన్నీ మర్చిపోయాడు జ్యూనియర్ - తిరిగి వచ్చిన తనతో, చేసిన తప్పుకి డానీ చెంప మీద కొట్టించుకోవడంతో. తండ్రిగా ఓకే అన్పించాడు అప్పట్నుంచీ డానీ.

        కానీ తండ్రిగా కూడా ఓకే కాదనీ, చిన్నప్పట్నుంచీ తనని వ్యాపారంలో ఫ్యామిలీ లుక్ కోసమే వాడుకున్నాడనీ, అలా నమ్మించడానికే చిన్నప్పుడే పార్టనర్ గా చేశాడనీ తెలుసుకోలేకపోయాడు జూనియర్. తండ్రిగా నువ్వు ఓకే అనడంలో, ఓకే కాదన్న అతడికి తెలీని సత్యమూ దాగుంది. అదిప్పుడు బయటపడింది. ఇదీ డైలాగులు రాసే కళ. ఎవ్విరీథింగ్ ఈజ్ కనెక్టెడ్. గాథతో ఎక్కడో కనెక్ట్ అయ్యే వుంటున్నాయి డైలాగులు. తెలుగులో ఈ కళ ప్రదర్శించ వచ్చా? చాలా ఇన్స్ ఫైరింగ్ గా వుంది.

        డానీ సంగతి. డానీకి ఆనాడు జూనియర్ని పార్టనర్ గా చేయడానికి కన్పించని బాస్టర్డ్, ఈనాడు వాటా అడిగేసరికి బాస్టర్డ్ లా కన్పించాడు. తనని నమ్మిన మేరీ కోసమైనా సంయమనంతో లేడు. కొడుకుని వదిలేసిన పాపంతో ప్రభువు ముందు చెంపలు వాయించుకుని మతంలో చేరిన తను, తిరిగి అదే కొడుకుని శాశ్వతంగా వెళ్ళ గొట్టేశాడు. డానీ మారలేదు, మారడు. తియ్యటి సినిమాలు, కమ్మటి హీరోయిజాలూ మనుషులెలా వుంటారో చూపించవు.

***

       5.  మూడో చాప్టర్ కల్లా చాలా కాలం గడిచిపోతుంది. డానీ అల్ట్రా  రిచ్ గా పెద్ద బంగాళాలో ఒంటరిగా వుంటూ, తాగుడు మరుగుతాడు. నిజానికి భావిజీవితం గురించి కలలు గంటూ, తమ్ముడ్ని అంటూ వచ్చిన హెన్రీకి మిడిల్ 2 లో ఏం చెప్పాడు డానీ - పెద్ద బంగాళా కట్టుకుని మనుషులకి దూరంగా జీవించాలని...అతను మనుషుల్ని మొదట్నుంచీ అసహ్యించుకుంటున్నాడు. ఇప్పుడు కోరుకున్న పెద్ద బంగాళాలోనే వున్నాడు- కోరుకున్నట్టు తను అసహ్యించుకునే మనుషులకి దూరంగానే వున్నాడు- అయితే కొడుకుని వెళ్ళ గొట్టుకుని, నా అనే వాళ్ళంటూ సైతం లేని దిక్కులేని జీవితంతో, తాగుడే తోడై...

           మనుషులతో వుండడమనేది సార్వజనీన ప్రవర్తన. ఇది కాదనుకున్నందుకు సొంత మనుషులే వుండని దిక్కులేని జీవితమైంది.  మనమేం మాట్లాడతామో ఆలోచించి మాట్లాడాలి. రైటుగా మాట్లాడితే రైటుగా రిసీవ్ చేసుకుంటుంది సబ్ కాన్షస్, రాంగ్ గా మాట్లాడితే రాంగ్ గా రిసీవ్ చేసుకుని అది మోతాదు మించి నిజం చేసేస్తుంది. ఈ మైండ్ మెకానిక్స్ గురించి ‘ది పవరాఫ్ యువర్ సబ్ కాన్షస్ మైండ్’ అన్న అరవై ఏళ్ళ నాటి ప్రసిద్ధ పుస్తకంలో చక్కగా వివరిస్తాడు డాక్టర్ జోసఫ్ మర్ఫీ.

        ఇక ఇలై ఎంటరవుతాడు. ఈ మొత్తం గాథలో యాక్షన్ జరగడానికి పాత్రలు స్వయంగా చర్యలు తీసుకోవడం లేదని గమనించాలి. ఉదాహరణకి, మిడిల్ 2 లో డబ్బులడిగితే బురదలో వేసి ఇలైని కొట్టిన డానీ మీదికి ఇలై వెంటనే పోలేదు. తర్వాత డానీయే ఖర్మరా బాబూ అనుకుని మతంలో చేరడానికి చర్చికి వెళ్ళి, ఇలైకి చిక్కి దేహశుద్ధి చేయించుకున్నాడు. అలా దేహశుద్ధి చేయించుకున్న డానీ కూడా వెంటనే వెళ్ళి ఇలైని చిత్త శుద్ధితో తన్నలేదు.

కాలమే ఒకళ్ళ ముందు ఒకళ్ళని అవసరాలు సృష్టించి వ్యూహాత్మకంగా ప్రవేశ పెడుతూ, సెట్ రైట్ చేస్తోంది. కాలమే యాక్షన్ రియాక్షన్ల ఇంటర్ ప్లేని చూసుకుంటోంది. నిజ జీవితం ఇలాగే వుంటుంది. మనల్ని ఎవరో ఏదో అన్నాడని బదులు తీర్చుకోవాల నుకుని తీర్చుకోకుండా వుండి పోతాం. అతనే అవసరం పడి తర్వాతెప్పుడో మన దగ్గరికి వస్తాడు. అప్పుడు చూసుకుంటాం చూసుకోవాలనుకుంటే. గాథ ఈ స్కీముతో నడుస్తోంది. నిజ జీవితంలో జరిగే స్కీము. కమర్షియల్ కథల్లో చిరంజీవి వెంటనే వెళ్ళి రావుగోపాలరావుని కొట్టకపోతే రుచించదు. నిజ జీవితంలో మన చేతగానిది చిరంజీవి చేసి చూపాలనుకుంటాం. కథ యాక్టివ్ క్యారక్టర్లతో తియ్యటి డ్రీమ్ వరల్డ్ అయితే, గాథ పాసివ్ క్యారక్టర్లతో రియల్ లైఫ్. రియల్ లైఫ్ లో మనం పాసివ్ క్యారక్టర్లమే. సినిమాల్లో లాగా వెళ్ళి కొట్టలేం, సాంగేసుకోలేం .

***

      6. అలా మత ప్రచారమంటూ లోకం చుట్టిన వీరుడిగా తిరిగి తిరిగి డానీ దగ్గరికే వచ్చాడిప్పుడు ఇలై. టైమ్ ఈజ్ ది గ్రేటెస్ట్ లెవెలర్. కర్మల బాకీ తీర్చడానికి. డానీ చేతికి చిక్కాడిప్పుడు. ఆనాడెప్పుడో ప్రక్షాళన పేరుతో చర్చిలో నన్ను కొట్టావ్, ఇప్పుడు నిన్ను కొడతా టైపులో చిక్కాడు. పాస్టర్ ఇలై ఇప్పుడు కమీషన్ ఏజెంట్ అయిపోయాడు. బాండీ మనవడి భూముల్ని డానీకి అమ్మించి కమీషన్ పొందాలని. అలాగే పాత బాకీ ఐదువేలు ఇమ్మని కోరుతున్నాడు... తన కర్మల బాకీ మర్చిపోతున్నాడు...చర్చిలో చేసిన అవమానంతో ఐదు వేలు బాకీ అడిగే అర్హత కోల్పోయాడు. తానే చేసిన అవమానం తాలూకు బ్యాడ్ కర్మ బాకీ పడ్డాడు. దాన్ని అదే రూపంలో వసూలు చేసుకుంటున్నాడిప్పుడు డానీ... ’అయితే నువ్వు దొంగ పాస్టర్ ననీ, మతం మూఢ నమ్మకమనీ అరిచి అరిచి చెప్పుకో’ అంటూ.

        తప్పలేదు ఇలైకి డబ్బవసరంతో. ‘నేను దొంగ పాస్టర్ ని, మతం మూఢ నమ్మకం’ అని స్లోగన్స్ ఇస్తాడు. ఇప్పుడు డానీ భూములు బేరమాడుకోవాలి. బేరమాడుకోడు. ఇలైని సర్వ భ్రష్టుడ్ని చేయాలి.  అందుకే అంటాడు, ఇంకెక్కడి భూములూ…స్ట్రా వేసి మిల్క్ షేక్ లా చమురంతా ఎప్పుడో తాగేశాననీ.

     అప్పట్లో బాండీ భూముల చుట్టూ ఇలై వాళ్ళ భూములే కొన్నాడు చమురు కోసం. ఆ భూముల్లో చుట్టూ బోర్లు వేసి, భూములు అమ్మని బాండీ భూముల్లో చమురంతా కూడా తోడేశాడు డానీ!

     భోరు మంటాడు ఇలై. అన్యాయం చేయవద్దని ఏడ్చేస్తాడు. మొదటి చాప్టర్లో బాండీ విజయం గురించి చెప్పుకున్నాం. డానీ చేసిన హత్యని పురస్కరించుకుని, డానీని బ్లాక్ మెయిల్ చేసి లాభపడాలనుకున్నాడు బాండీ. అలా ఆ హత్యా నేరంలో భాగస్వామి అవుతూ బ్యాడ్ కర్మ రాసుకున్నాడు  అలా బాండీ అనుకున్న ప్లాను పారి డానీకి భూముల్ని లీజుకిచ్చి లాభపడ్డాడు. ఆ బ్యాడ్ కర్మ అడ్వాన్సుగా శిక్ష రాసేసిందని కూడా చెప్పుకున్నాం. ఆ శిక్ష ఇదే...ఆల్రెడీ ఆ భూముల్లో చమురు తాగేశాడు డానీ. ఈ శిక్ష నుంచి బాండీ తప్పించుకున్నా, బాండీ చేసిన దాంతో సంబంధం లేని మనవడు తప్పించుకోలేకపోయాడు. పెద్దలు చేసే పాపాలు పిల్లలకి అంటుకుంటాయని ఇందుకే అంటారు.

           ఇక నైతికంగా, ఆర్ధికంగా పూర్తిగా పతనమై రోదిస్తున్న ఇలైని, కొట్టి కొట్టి చంపేస్తాడు డానీ. చేసిన ఒక హత్యతో దొరకని డానీ, ఈ హత్యతో దొరికిపోతూ ‘ఐయామ్ ఫినిష్డ్’ అంటాడు.

***

        ఇంత చెప్పుకున్నాక, ఇంకా ఈ నాల్గు భాగాల సుదీర్ఘ వ్యాసానికి ఉపసంహారం అవసరం లేదు. జీవితాన్ని లోతుగా అధ్యయనం చేస్తూ ‘దేర్ విల్ బి బ్లడ్’ రూపంలో మనముందు కొచ్చిన ఈ కదిలించే గొప్ప గాథ, తెలుగులో గాథలు తీసి ఔన్నత్యాన్ని సాధించడానికేమైనా ఉపయోగపడుతుందేమోనని భావిద్దాం.

        ఈ వ్యాసాల్ని ఒకే బంచ్ గా పీడీఎఫ్ తీసి, డౌన్ లోడ్ చేసుకోవడానికి వీలుగా అందుబాటులో వుంచమని అంటున్నారు. ఎనిమిది వేల పదాలతో, 37 పేజీల ఈ నాల్గు వ్యాసాలు, ఒక చోట కాపీ పేస్ట్ చేసుకునేందుకు వీలుగా అందుబాటులోనే వున్నాయి.

 ―సికిందర్ 

      ప్రభుత్వం రైతు చట్టాలు తెచ్చింది. వద్దన్నారు రైతులు. ‘బావుంటుంది, తినండి, మీ కోసమే ఈ ఫలహారం’ అంది ప్రభుత్వం. ‘ఫలహారం మాకొద్దంటే తినమంటారేంటీ?’ అని ఆందోళనకి దిగారు రైతులు. ఇక రైతుల దారి రైతులది, ప్రభుత్వం దారి ప్రభుత్వానిదైంది. రైతులతో చర్చించకుండా చట్టాలు చేస్తే ఇలా వుంది. ఫంక్షన్ హాల్లో అడక్కుండా మెనూ తయారు చేసి, బావుంటుంది తినమంటే, ఇలాగే ఆందోళనకి దిగుతారు పోనీకదాని పెళ్ళికి వచ్చిన జనాలు. పాత్రలతో చర్చించకుండా కథకుడు చేస్తే ఇలాగే వుంటుంది కథ కూడా. ఈ బేసిక్స్ ని అర్ధం జేసుకోవడం లేదు కొందరు కథకులు. కథకుడు కథ నడప కూడదనీ, పాత్రల్నే కథని నడుపుకోనివ్వాలనీ ప్రాథమిక సూత్రం ఈ బ్లాగులో కీ బోర్డు అరిగి అరిగి కరిగి పోయేలాగా ఎన్నిసార్లు అ ఆలు గుర్తు చేసినా, అర్ధం జేసుకోక పోతే, ఈ బ్లాగు ఏమర్ధమవుతున్నట్టు. ఎందుకు చదువుతున్నట్టు.

        2. బేసిక్స్ నే ప్రశ్నిస్తూ వాదన కూడా. అక్షర మాల  అఆ లతో కాకుండా, ఇఈ లతో ప్రారంభమవుతుందనేలాటి వాట్సాప్ స్కూలు వాదన. ఇందాక వార్తలు చూస్తూంటే కథ రాయడానికి ఏ బేసిక్స్ ని  దృష్టిలో పెట్టుకోవాలో సరీగ్గా ఒక కామన్ సెన్సు టిప్ దొరికింది ఇది చెప్పడానికి. వార్తల్లో, ఫలానా వ్యక్తి ఫలానా విధంగా అన్నాడని వార్తలు చదువుతాడు. వ్యక్తి అనని మాటలు తను కల్పించి వార్తలు చదవడు. వార్తలు సేకరించాలంటే వ్యక్తులు ఏమంటున్నారో, ఏమనుకుంటున్నారో తెలుసుకోకుండా వార్తలు సేకరించరు. ఇంటర్వ్యూ చేసినప్పుడు కూడా వ్యక్తిని అడిగి తెలుసుకుంటాడు తప్ప, వ్యక్తిని కూర్చోబెట్టి తను చెప్పెయ్యడు ఇంటర్వ్యూ కర్త. కానీ కథకుడు మాత్రం పాత్రల్ని కూర్చోబెట్టి తను రాసేస్తూంటాడు వాటి కోసం కథ.

        3. సీనంటే మరేమిటో కాదు సిట్యుయేషన్. సిట్యుయేషన్ అంటే అవసరం. పాత్రల  అవసరం. పాత్రల అవసరాలే సిట్యుయేషన్ని సృష్టిస్తాయి. పాత్రల అవసరాలు చూడకుండా, ఆ సిట్యుయేషన్ తో కథకుడు తానుగా ఇంకేదో నచ్చింది ఫీలై సీను రాసేస్తే, అది సీను అవ దు, కథకుడి అధికారమవుతుంది. సీను మీద పాత్రలకే అధికారముంటుంది.  

        4. నచ్చడాలు నచ్చక పోవడాలు కథకుడి కుండవు. పాత్రలకే వుంటాయి. కథకుడి పాయింటాఫ్ వ్యూ గాలి బుడగ. స్వతంత్రంగా కథకుడి మైండ్ కి అర్ధం లేదు. పాత్రల మైండ్ లోపలుంటేనే ఎంతో కొంత అర్ధం పర్ధం. కథలు రాసి కథకుడు మెచ్యూర్ అవడు. పాత్రల్లోపల జీవించే మెచ్యూర్ అవుతాడు. కథ మీద కథకుడికి ఏ ఆధారిటీ లేదు, పాత్రలకే వుంది. కథకుడు కథలు రాయడు, పాత్రలు అనుకున్నదే రాస్తాడు. పాత్రలు అనుకుంటున్న దాంతోనే వాదిస్తాడు. కథంటే ఇన్నర్ ఇంజనీరింగ్, కథకుడు పై పైన వేసే పూతకాదు. బయట బయట వుంటే కథకుడికి రక్షణ లేదు, గర్భస్థ శిశువుగా పాత్రల్లోపలుంటేనే తన వాదంతో రక్షణ. ప్రతీ కథతో పాత్రలు పుట్టవు. అవి ఆల్రెడీ పుట్టివుంటాయి. కథకుడే  శిశువుగా పుట్టి నేర్చుకుంటాడు.

5. సింపుల్ ఉదాహరణ. హీరోయిన్, సెకండ్ హీరోయిన్, హీరో వున్నారు. హీరో హీరోయిన్లు ప్రేమలో వున్నారు. వీళ్ళ మధ్యకి సెకండ్ హీరోయిన్ వచ్చింది. ఈమెకి తనకంటే ఎక్కువ అర్హతలున్నాయని హీరోయిన్ కి ఇన్ఫీరియారిటీ ఏర్పడింది. హీరో తనతో వుంటాడా ఈమెతో వెళ్ళి పోతాడాని అనుమానం వేసింది, వీళ్ళిద్దరూ ఒకటై తనకి అన్యాయం చేస్తారేమోనని భయం ఏర్పడింది. దీంతో హీరో తనని ఎంత గాఢంగా ప్రేమిస్తున్నాడో తేల్చుకోవాలనుకుంది. సెకండ్ హీరోయిన్ సమక్షంలోనే హీరోకి టెస్టు పెట్టింది. ఆ టెస్టులో ప్రాణాలు పోయే ప్రమాదం జరిగి భయపడి పారిపోయింది. పారిపోయి హీరోతో కాంటాక్టు లేకుండా ఎక్కడో దాక్కుంది. ఇక కనిపించలేదు హీరో కనుక్కునే దాకా. ఇదీ సిట్యుయేషన్.

ఇప్పుడు, హీరోయిన్ అలా ఎలా పారిపోయి దాక్కుంటుందని కథకుడు ప్రశ్నిస్తే? ప్రాణాలుపోయే ప్రమాదం జరిగితే హీరోని వదిలేసి పారిపోయి, హీరో ఏమైపోయాడో పాపమని కూడా తల్లడిల్లకుండా, హీరోని కలుసుకునే ప్రయత్నం చేయకుండా, దాక్కోవడమేమిటని కథకుడు అనుకుంటే?

అప్పుడే కెవ్వున కేకేసి ఆ ప్రమాదం నుంచి హీరోని కాపాడి, టెస్టు పెట్టిన తన అసలు ఉద్దేశం చెప్పుకుని, క్షమించమని లొంగిపోతే కరెక్టా? లేదా అలా పారిపోయినా, కలుసుకోవడానికి తల్లడిల్లుతూ ప్రేక్షకుల కంట నీరు తెప్పించాలనుకుంటే కరెక్టా? ఏది కరెక్టు?

ఈ రెండూ తానుగా ఏదో ఫీలైపోతూ పునాది లేకుండా కథకుడాలోచించడమే. పాత్ర కోసం కథకుడు తనకి నచ్చిన విధంగా ఆలోచించి పెట్టి కథ చెయ్యడమే. రెండూ తప్పే. పాత్ర మైండ్ లో కెళ్ళి అప్పుడేం ఆలోచిస్తూ వుంటుందో చూడగల్గితే కథకుడు దారిలో వుంటాడు. పాత్ర ఆలోచనలే కథ. కథకుడి ఆలోచనలు కథ కాదు. వెనుక సీన్లని కథకుడు మర్చిపోతాడేమో గానీ, పాత్ర అస్సలు మర్చిపోదు. పాత్రకి సీన్లంటే అనుభవాల శ్రేణి. ఆ శ్రేణిలోంచే నిర్ణయాలు.

హీరోయిన్ మానసిక స్థితి సీక్వెన్స్ చూద్దాం : 1. తనకి తక్కువ అర్హతలున్నాయని సెకండ్ హీరోయిన్ వల్ల హీరోయిన్ కి ఇన్ఫీరియారిటీ ఏర్పడింది, 2. హీరో తనతో వుంటాడా ఈమెతో వెళ్ళి పోతాడాని అనుమానం వేసింది, 3. వీళ్ళిద్దరూ ఒకటై తనకి అన్యాయం చేస్తారేమోనని భయం ఏర్పడింది, 4. దీంతో హీరో తనని ఎంత గాఢంగా ప్రేమిస్తున్నాడో తేల్చుకోవాలనుకుంది, 5. సెకండ్ హీరోయిన్ సమక్షంలోనే హీరోకి టెస్టు పెట్టింది... టెస్టుకి దారి తీసిన కారణాలు కార్యకారణ సంబంధంతో వరస క్రమంలో- ఇన్ఫీరియారిటీ, హీరో మీద అనుమానం, వాళ్ళిద్దరంటే భయం, భయనివృత్తి నిర్ణయం...

ఇలా క్రమంగా ఆమె వాళ్ళిద్దరంటే భయపడే స్థితికి వచ్చింది. టెస్టు పెట్టినప్పుడు ఏం తేలుతుందో నన్న భయం. టెస్టులో వూహించని విధంగా ప్రమాదం జరిగి భయం రుజువైపోయింది. హీరో టెస్టు ఇష్టం లేక, వాళ్ళిద్దరూ కలిసి ప్రమాదం జరిపి తనని అడ్డు తొలగించు కోవాలకున్నారనీ ప్రాణ భయంతో పారిపోయింది. కనపడకుండా దాక్కుందంటే వాళ్ళంటే ప్రాణ భయంతోనే. దీనికంతటికీ మూలం - ట్రిగ్గర్ పాయింట్- డ్రైవింగ్ ఫోర్స్- ఏదై తే అది- తనకి తక్కువ అర్హతలున్నాయని అనుకోవడమే. ఈ సెటప్ కి పే ఆఫ్ ప్రమాదం.  

అప్పుడు ఇదంతా వదిలేసి, హీరోయిన్ తన మానసిక స్థితిని శుభ్రంగా తుడిపేసుకుని, ఎలా తల్లడిలుతూ వచ్చి ఇంకా హీరోనే ప్రేమిస్తున్నట్టు క్షమాపణ అడిగి సెటిలై పోతుంది? అది పాత్రేనా, ఎవడు పడితే వాడు కూర్చునే చబూత్రానా? వాళ్ళు చంపాలనుకున్నప్పుడు హీరోకి తన మీద ప్రేమే లేదని తేలిపోయాక? పాత్ర మైండ్ లోకి వెళ్ళి, ఏది ఎందుకాలోచిస్తోందో చూసే ఓపిక వుంటే, సీన్లు సరీగ్గా వస్తాయి. పాత్రలకి వాటి భావస్వాతంత్ర్యంతో కొనసాగే ప్రజాస్వామ్యాన్నివ్వాలి, కట్టడి చేసే నియంతృత్వం కాదు.

 6. కథ మీద ఆర్నెల్లు కూర్చున్నా, ఏడాది కూర్చున్నా, పాత్రల్లోపల గంటైనా కలిసి కూర్చున్నారా లేదా అన్నది పాయింటు. పాత్రలు సృష్టించుకునే కథాప్రపంచంలో కథకుడు పాత్రలు జరుపుకునే ఉత్తరప్రత్యుత్తరాలకి  కేవలం పోస్టు మన్ లాంటి వాడే తప్ప ఇంకో మహావీరుడు కాదు.

        7. కథ ఎంతవరకూ వచ్చిందని వాకబు చేయకుండా, పాత్రలెంతవరకూ వచ్చాయని వాటి ప్రోగ్రెస్ అడగడం రిలేటెడ్ గా వుంటుంది. కథతో కథకుడు అంతర్ దృష్టితో వుండడానికి.

8. టిప్స్ సీరియస్ అవుతున్నాయి కాబట్టి కాసేపు లైట్ గా... దర్శకుడు పెట్టింది కథకుడు తినడం కాక, కథకుడు పెట్టిందీ దర్శకుడు తినడం గాక, పాత్రలు పెట్టింది ఇద్దరూ కలిసి విందు చేసుకోవాలి. పక్కన ఒక బాటిల్ వుంచుకున్నా ఫర్వా లేదు.

9. బాటిల్ చేసే పని ఇంతా అంతా కాదు. కథకుడ్ని డబ్బులిచ్చేశాంగా రాస్తాడులే అన్నట్టు గాకుండా - బాటిల్, సిగ్గీ ప్యాక్ వంటి మంగళ ద్రవ్యాలు కూడా పెట్టి పంపిస్తూంటే, ఇంట్లో కూర్చుని తనలోని రెండో మనిషిని లేపుతాడు. అప్పుడు చచ్చినా కథలోకి వెళ్ళలేడు. పాత్రల్లోకే పరకాయ ప్రవేశం చేసి వాటితో విహరిస్తాడు. తెల్లారి వచ్చి తను కను గొన్న అమృత విషయాలు వెల్లడిస్తాడు. రెండో మనిషి కంట్రిబ్యూషన్ ఇంతా అంతా కాదు. టీంలో ఇంకొక మెంబర్ని ఫ్రీగా యాడ్ చేస్తాడు కథకుడు.

10. నటులు పరకాయ ప్రవేశం చేస్తారు కాబట్టే నటించగల్గుతారు. కథకుడు పరకాయ ప్రవేశం చేస్తే రాయగల్గుతాడు. అసలు కథకులు యాక్టింగ్ కోర్సు కూడా చేసి రావాలంటాడు ఒక హాలీవుడ్ అతను.

11. ఇప్పుడు సీరియస్... ప్రేక్షకులిప్పుడు ఎదిగిపోయారు. వాళ్ళతో పోటీ పడాలి. ఇంకా రెండు మూడేళ్ళ  క్రితం రాసుకున్న కథలతో ప్రయత్నాలు వృధా. అవి మూలన పడేసి, మారిన కొత్త బిజినెస్ మాడెల్ తో ఇప్పుడు రాసుకునే కథలు, రెండు మూడేళ్ళకైనా పనికొస్తాయి. సినిమా అనేది ఎప్పటికప్పుడు ప్రేక్షకులతో మారిపోయే బిజెనెస్. ఈ బిజినెస్ లో పాత్రల్ని అమ్మగల్గాలే గానీ కేవలం కథల్ని కాదు.

        12. మాటలు పాత్రల నోటి నుంచి రావాలి. ముద్ద చేసి పాత్రల నోట్లో పెట్టడం కాదు. పాత్రలు సృష్టించుకునే కథని పాత్రలే అనుభవిస్తాయి. వాటి మాటలు కథ గురించే వుంటాయి. పాత్రలనుభవిస్తున్న కథ లోంచే మాటలు వస్తాయి. ఏ మాట చెప్పినా అది కథతోనే రిలేటెడ్ గా వుంటుంది. ఈ సైన్సు కోసం  ‘దేర్ విల్ బి బ్లడ్’ చూడొచ్చు.

―సికిందర్  

 

 

Q :  సినిమా కంటెంట్ ని ఒకే మూసలో ఆలోచిస్తున్న వారికి ‘దేర్ విల్ బి బ్లడ్’ సంపూర్ణ విశ్లేషణ పెద్ద సినిమాల కంటెంట్ ని డిఫరెంట్ గా ఆలోచించేలా చేస్తుంది. కథలే గాక గాథలనేవి కూడా వున్నాయని కొత్త అవగాహన కలుగుతోంది. అయితే గాథల్లో నటించడానికి స్టార్స్ ముందుకొస్తారంటారా? రానప్పుడు ఇంత శ్రమ తీసుకుని మీరు విశ్లేషణ ఇచ్చి ప్రయోజనమేమిటి?

 ―శ్రీనివాస్ ఆర్, అసోసియేట్

A : గాథలు గాకపోయినా డిగ్నిఫైడ్ కథలతోనైనా ప్రయత్నాలు జరగడం లేదని కాదు, అయితే వాటిలో కూడా స్టార్స్ కి మసాలాలే కావాలి. ఫ్యాక్షన్ సినిమాల తర్వాత యాక్షన్ కామెడీలతో కొత్త దారి కన్పించింది. అయితే దశాబ్దంన్నర దాటినా ఈ దారే కన్పిస్తోంది. యాక్షన్ కామెడీల దగ్గరే ఆగి పోయారు స్టార్లు. ముందు దారి కనిపించడం లేదు. కనిపించినా నమ్మే పరిస్థితి లేదు. గొప్ప సినిమాలనేవి ఎన్టీఆర్, ఏఎన్నార్ ల దగ్గరే ఆగిపోయే పరిస్థితి వచ్చింది. ఇప్పటి జనరేషన్ ఎన్టీఆర్, ఏఎన్నార్ ల గొప్ప సినిమాల్ని యూట్యూబ్ లో విరగబడి చూస్తున్నారు. తరించిపోతూ కామెంట్లు పెడుతున్నారు. ఇప్పటి జనరేషన్ ని కూడా స్టార్లు నమ్మడం లేదు.

Q :  ‘నాంది’ సినిమా ఆర్టికల్ చదివాను. అయితే సినిమాలో హీరో ఒక సామాన్యుడు. తనకు నిజంగా రియల్ లైఫ్ లో అలా అన్యాయం జరిగినా, అతను జైలు నుంచి బయటకు వచ్చి మళ్లీ పోలీసుల మీద కేసులు పెట్టి పోరాటం చేసేంత ఓపిక, ధైర్యం ఉంటుందా? అతనలా చేస్తే పోలీసులు ఊరుకుంటారా? తనకు మళ్లీ పోలీసుల నుంచి ముప్పు ఉండదా? ఇవన్నీ తెలిసి సామాన్యుడు పోలీసులతో మళ్లీ పెట్టుకుంటాడా? అసలు ఈ సెక్షన్ లో ఉన్న లోపాలేంటి? వాటిని ఎలా సరిదిద్దాలి? ఎవరు సరిదిద్దాలి? ఇలా ఎన్నో సెక్షన్స్ దుర్వినియోగం చేస్తున్నారు కదా, దీనికి బాధ్యులు ఎవరు? ఇలాంటి బ్రహ్మాస్త్రం లాంటి సెక్షన్స్ గురించి కనీస అవగాహన కూడా లేకుండా ఉండడం ప్రజల తప్పే కదా?

―కిరణ్, అసోసియేట్

A : ప్రజల గురించి కాదు, ప్రేక్షకుల గురించి కాదు, సినిమా గురించి మాట్లాడుకోవాలి. ఆర్టికల్లో కాన్సెప్ట్ గురించే మాట్లాడుకున్నాం. చెప్పిన కాన్సెప్ట్ సినిమాలో లేనప్పుడు పాత్ర చిత్రణల గురించి మాట్లాడుకో నవసరం లేదు. మీ ఇతర ప్రశ్నలకి సమాధానాలు ఆర్టికల్లోనే వున్నాయి. నల్సార్ యూనివర్సిటీ వైస్ ఛాన్సెలర్  ప్రొ. డాక్టర్ ఫైజాన్ ముస్తఫా, యూట్యూబ్ లో హిందీలో ప్రసారం చేస్తున్న ‘లీగల్ ఎవేర్నెస్ వెబ్ సిరీస్’ ద్వారా, చట్టాల గురించి ఎంతో అవగాహన కల్గిస్తున్నారు. వీటిని ఇతర భాషల్లో కూడా ప్రసారం చేయాలని డిమాండ్స్ వున్నాయి. తెలుగులో కూడా ప్రసారమైతే న్యాయ విజ్ఞాన సంబంధమైన లోటు తీరవచ్చు ప్రజలకి.

Q :  ‘ఐ కేర్ ఎ లాట్’  అనే ఇంగ్లీష్ సినిమా నెట్ ఫ్లిక్స్ లో చూసాను. అందులో డబ్బు కోసం ఒంటరిగా ఉండే ముసలి వాళ్ళను బురిడీ కొట్టించి హీరోయిన్ వాళ్ళ ఆస్తులు అమ్ముకుని లాభపడే రకం. అయితే అనుకోకుండా విలన్ తల్లిని కూడా అలాగే చేయబోయి విలన్ తో పోరాడాల్సి వస్తుంది. కానీ చివరలో విలన్ ఇచ్చిన ఆఫర్ ఒప్పుకుని అతనితో కలిసి బిజినెస్ చేస్తుంది.  మళ్లీ సినిమా ఎండ్ లో కర్మ ఫలం అన్నట్టు తన తల్లిని మోసం చేసిన ఒక వ్యక్తి చేతిలో హీరోయిన్ చనిపోతుంది. ఇలా హీరో విలన్ తో కలిసిపోవడం అన్నది ఎక్కడా చూడలేదు. కొత్తగా అనిపించింది. అసలు ఇలాంటి ప్రయోగాలు ఎలా చేయాలి? అలా హీరో విలన్ ఒకటై పోతే కథ ఎలా ఉంటుంది వివరించండి.

―విడిఆర్, అసోసియేట్

A :  ఆ సినిమా చూడలేదు. కథ చదివితే, హీరోయిన్ తో ప్రాబ్లం వున్న మాఫియా బాస్, చివరికి హీరోయిన్ ని తనతో చేతులు కలపమంటాడు. చేతులు కలిపి రిచ్ గా డెవలప్ అవుతుంది. ఈ క్రమంలో ఆమె వల్ల అన్యాయానికి గురైన ఒకడు వచ్చి చంపేస్తాడు. ప్రధాన పాత్ర ప్రత్యర్ధితోనే చేతులు కలపడమన్నది కొత్త ఆల్టర్నేటే. అయితే ఇలా కొత్తగా కథ చెప్పే ధైర్యముండదు మనకి. హీరోయిన్ మాఫియా బాస్ ని బురిడీ కొట్టించడానికో- బకరా చేయడానికో చేతులు కలిపినట్టు టెంప్లెట్ లో పెట్టేస్తారు. ఇలా టెంప్లెట్ లో పెట్టేస్తే ‘మరో చరిత్ర’ వుండేది కాదు. ‘మరో చరిత్ర’ లో కమల్ - సరితలు గతంలో అవమానం చేసిన ఇద్దరు వచ్చి, వాళ్ళు కలుసుకోకుండా చంపేస్తారు. కర్మసిద్ధాంతం.

        పై సినిమాలో హీరోయిన్ ది నెగెటివ్ పాత్ర. అందుకని మాఫియాతో కలిసిపోయింది. ఆమె చేయాల్సిందేమిటి, ఇప్పటికైనా పాజిటివ్ గా మారి మాఫియాని ఎదుర్కోవడం. ఇలా చేయకపోవడంతో కర్మ ఫలం యాక్టివేట్ అయింది. అలా గతంలో ఆమె విరోధి వచ్చేసి తన విధి పూర్తి చేసుకుంటూ ఆమెని చంపేశాడు. ఇలాటి కథలకి ఇలా ప్లాట్ క్లయిమాక్స్ తో ముగింపు వుంటుంది. ఏ కథయినా స్టోరీ క్లైమాక్స్ కోసమే వుంటుంది. అంటే కమల్ - సరితలు ఏడాది పాటు కలుసుకోకుండా వుండాలన్న షరతు స్టోరీ పాయింటు. ఆ ఎడబాటుతో ఎలా స్ట్రగుల్ చేసి కలుసు కుంటారన్నది, కలుసు కోవడమన్నది, స్టోరీ క్లయిమాక్స్. కానీ అనుకున్నట్టుగా కలుసుకోలేక పోవడంతో ప్లాట్ క్లయిమాక్స్ అయింది. ప్లాట్ లో (కథనంలో) ఆల్రెడీ వాళ్ళ కర్మలు బీజాలు వేసి వున్నాయి కాబట్టి. పై హాలీవుడ్ సినిమాలో కూడా ఇదే. వర్మ ‘కంపెనీ’ ముగింపులో అనూహ్యంగా విజయ్ రాజ్ వచ్చి, అజయ్ దేవగన్ ని షూట్ చేసి చంపడం కూడా ఇలాటిదే.

Q : మీరు ‘నాంది’  సినిమా గురించి రాస్తూ, సెక్షన్ 211 ను సినిమాలో సరిగ్గా చూపించలేదన్నారు. మరి రియల్ లైఫ్ లో  సెక్షన్ 211 ని ఒక సగటు మనిషి పోలీసుల మీద ప్రయోగించే అవకాశం ఎంత వరకూ ఉంది? అలా ప్రయోగిస్తే పోలీసులు ఊరుకుంటారా? రక్షణ ఇచ్చే మా మీదే తిరగబడడమేమిటంటే, అప్పుడు చట్టాలు, కోర్టులు, ప్రభుత్వాలు ఏం చేస్తాయి?

―శివ, రైటర్

A :  ఆర్టికల్లోనే సమాధానముంది. ఈ చట్టం తీసుకుని పాత్ర, పోలీసుల మీది కెళ్తే ఏం జరుగుతుందో, ఏం జరగదో, ఎందుకు జరగదో చూపించి, ప్రశ్నించి వదిలేయాలన్నాం. పోలీసులే ఆలోచించేలా వాళ్ళ హృదయాల్ని తట్టినా చాలు.  

Q : మీరే 211 సెక్షన్  గురించి ఎంతో రీసెర్చ్ చేసి, కేరళ మాజీ డీజీపీ ఎన్ సి ఆస్థానా దీని మీద రాసిన సుదీర్ఘమైన ఆర్టికల్ గురించి చెప్పారు. మరి అలాంటిది ఈ సినిమా తీసిన మేకర్స్ ఎందుకు 211 సెక్షన్ గురించి అంత బాగా తెలుసుకోకుండా, మధ్యలో రివెంజ్ డ్రామా పెట్టీ ఒక గొప్ప ఇంటర్నేషనల్ స్థాయికి వెళ్లాల్సిన సినిమాను ఇలా ఒక మామూలు సినిమాగా చేశారు? మామూలు కమర్షియల్ సినిమాలు వదిలేద్దాం. అవి ఎలా ఉన్నా పెద్దగా ఎవరికీ నష్టం ఉండదు. కానీ ఇలాంటి కొత్త విషయాలు కొత్త సెక్షన్స్ గురించి ఎడ్యుకేట్ చేసే సినిమాల్లో కూడా మరీ ఇంత అలసత్వం, బాధ్యతా రాహిత్యం ఉంటే ఏమిటర్థం? భవిష్యత్తులో ఇలాంటి సినిమాలు తీయాలి అనుకునేవారికి మీరిచ్చే సలహా ఏమిటి?

―బిపిఎస్, అసోసియేట్

A : సలహా ఎందుకు, తట్టిందేదో చూద్దాం. నిజంగా రియలిస్టిక్ తీయాలనుకుంటే తీసే సబ్జెక్టుని రీసెర్చి చేసుకోవాలి. లేదూ మూస ఫార్ములా చాలనుకుంటే వచ్చిన మూస ఫార్ములాలు చూసుకోవాలి. ఓటీటీ తో కొత్తగా విస్తరిస్తున్న విశాలమైన గ్లోబల్ మార్కెట్ కూడా కావాలనుకుంటే రియలిస్టిక్స్ తీసుకోవాలి. లేదూ ఎబిసి సెంటర్ల పాత మార్కెట్టే  చాలనుకుంటే మూస ఫార్ములాలు తీసుకోవాలి. పైనుంచీ కిందిదాకా ప్రేక్షకుల చేతుల్లో స్మార్ట్ ఫోన్లు వచ్చేశాక ఏదీ లోకల్ గా లేదిప్పుడు. ఓటీటీ కారణంగా ఛానెళ్లలో ప్రసారం చేస్తున్న సినిమాలకి టీఆర్పీలు పడిపోతున్నాయని రిపోర్టు లొస్తున్నాయి. ఓటీటీ లో కూడా క్వాలిటీ కంటెంట్ ని కోరుకుంటున్నారు ప్రేక్షకులు. కనుక సబ్జెక్టులకి రీసెర్చి తప్పని సరి అవచ్చు.

        ఇక, రివ్యూల కోసం రీసెర్చి అవసరమా అని కూడా అన్పించక పోదు. ఎందుకంటే తీసే సినిమాలు అలాగే తీస్తారు. సినిమాలకి రీసెర్చి అంటే నవ్వడమే. కొందరే నమ్ముతారు. ఇగోని దాటి సబ్ కాన్షస్ లోకి వెళ్ళే వాళ్లు నమ్ముతారు.

Q : మీరు ‘నాంది’ సినిమా మీద రాసిన ఆర్టికల్ చదివాను. మరి సినిమా తీసిన వాళ్ళు ఇలా జనాలకు తప్పుడు సమాచారం ఇచ్చినందుకు వాళ్ళ మీద జనాలు కేసు వేయవచ్చా ? అలా వేస్తే ఏం జరుగుతుంది?

―కిరణ్, అసోసియేట్

A : ఏమీ జరగదు, కేసు వెనక్కొస్తుంది. ఒక న్యాయ విషయాన్నో, వైద్య విషయాన్నో, లేదా ఇంకేదైనా ఫోరెన్సిక్స్ లాంటి వైజ్ఞానిక విషయాన్నో సినిమా కోసం అలాగే చూపిస్తామన్న డిఫెన్స్ వుంటుంది. దీన్ని కాదనలేరు. ప్రేక్షకులే నిజమా కాదా క్రాస్ చెక్ చేసుకుని వూరుకోవాలి, ‘మహానుభావుడు’ ఓసిడి మీద తీశామని హైప్ ఇచ్చారు. తీరా అది మామూలు ఎలర్జీ గురించే వుంది. ఎలర్జీని  ఓసిడి అనుకున్నారు. కొన్ని సినిమాల్లో ఇందులోని పాత్రలు, సంఘటనలు ఎవర్నీ ఉద్దేశించినవి కావు, కల్పితాలని డిస్ క్లెయిమర్ వేస్తూంటారు. న్యాయ, వైద్య విషయాలకి కూడా ఇలా డిస్ క్లెయిమర్ వేస్తే గొడవుండదు. కానీ స్క్రిప్టులో రాస్తున్న న్యాయ విషయమో, వైద్య విషయమో ప్రతి అక్షరం పచ్చి అబద్ధమని వాళ్ళకే తెలియనప్పుడు ఏం చేస్తారు. సోషల్ మీడియాలో ఫేక్ న్యూస్ లాగా సినిమాలు తీసి వైరల్ చేయడమే!

Q :  హాయ్ అండి, ‘ఉప్పెన’ సినిమా పెద్ద హిట్. కొంత మంది మిత్రులు ఆ సినిమాను తిడుతూ ఇంకా ఎన్ని రోజులు ఈ పాత సినిమాలు, పాత సీన్స్ తో తీస్తారు అన్నారు. కొంత మంది ఇంటర్, డిగ్రీ కుర్రాళ్ళను అడిగితే అందరూ మాకు సినిమా బాగా నచ్చిందని అన్నారు. ఒక సినిమా అంత పెద్ద హిట్ అయిందంటే అందులో ప్రేక్షకుడికి నచ్చే అంశాలు ఉండే ఉంటాయి అని నా నమ్మకం. ఒక విశ్లేషకుడిగా ఆ సినిమా మీద మీ అభిప్రాయం చెప్పగలరా?

―మహేష్, రైటర్

A : మేల్ ఇగో లేదా సెల్ఫ్ పీటీ. మేల్ ఇగోతో వుండే వాళ్లకి తామే పరిస్థితుల్లో వున్నా అమ్మాయి తమ కోసమే వుండాలన్న మైండ్ సెట్ తో కావచ్చు;  ప్రస్తుతం దయనీయ స్థితిలో వున్న వాళ్ళకి అమ్మాయి తమ పట్ల జాలితో వుందన్న సెల్ఫ్ పీటీ వల్ల కావచ్చు - సినిమాని హిట్ చేసి వుంటారు. 

―సికిందర్