1370 : సందేహాలు- సమాధానాలు

 

Q:  నేను గత నాలుగు నెలలు కష్టపడి స్క్రిప్టు రాసుకున్నాను. ఇది నాకు ఫ్రెష్ గా వచ్చిన ఒరిజినల్ ఐడియానే  తప్ప ఎక్కడ్నుంచీ లిఫ్ట్ చేయలేదు. దీన్ని పిచింగ్ చేసేందుకు సిద్ధమవుతున్నాను. ఇంతలో నా కథ లాంటిదే కథతో ఒక భాషలో ఇటీవల హిట్ సినిమా వచ్చిందని తెలిసింది. ఆ సినిమా చూశాను. రెండూ ఒకటే. ఇప్పుడేం చేయాలో పాలుపోవడం లేదు. పడిన కష్టమంతా బూడిదలో పోసిన పన్నీరైంది. మళ్ళీ ఇంకో కథ ఆలోచించే మూడ్ లో లేను. పిచింగ్ చేయడానికి ఒక ముఖ్యమైన అపాయింట్ మెంట్ కోసం ట్రై చేస్తున్న సమయంలో ఇలా జరగడం భరించలేక పోతున్నాను. మళ్ళీ కొత్త కథ ఎప్పుడు రాసుకోవాలి, ఎప్పుడు పిచింగ్ చేయాలి నాకేం  అర్ధం గాలేదు. మీ సలహా కోసం ఎదురు చూస్తున్నాను. నేను త్రీ యాక్ట్స్ స్ట్రక్చర్ లో మీరు చెప్పే జాగ్రత్తలన్నీ తీసుకుని స్క్రిప్టు రాశాను.

—ఎల్ కె ఆర్, అసోసియేట్

A: మొదటిది : ముందుగా కేక్ కట్ చేసి తినేయండి. ఎందుకంటే మీరు సాధీంచింది చిన్న విషయమేమీ కాదు. ఒక భాషలోవచ్చి హిట్టయిన కథే మీకు తెలియకుండా మీరు రాశారంటే మీకు హిట్ స్క్రిప్టులు రాసే టాలెంట్ వున్నట్టే. మీరనుకుంటున్న ఈ కష్ట సమయంలో దీన్ని సిల్వర్ లైనింగ్ గా తీసుకోండి. మిమ్మల్ని మీరు అభినందించుకోండి. మీలోని రైటర్ ని చిన్నబుచ్చుకోకండి. వాడు మీరూహించని ఎత్తుకెదిగాడు. ఇక అన్నీ పక్కనబెట్టి వాడికో కేక్ కట్ చేసి తినిపించి ఎంజాయ్ చేయండి. ఇది చాలా ముఖ్యం ఇనుమడించిన ఉత్సాహంతో  ముందుకు సాగేందుకు.

రెండోది :  మీ కథ అచ్చం ఇంకో సినిమా కథలా ఎన్నటికీ వుండదు. ఎక్కడో తేడా వుంటుంది. ఆ తేడా పట్టుకుని కొత్త సీన్లు రాసుకుంటే పోలికే వుండదు. ఒకే లాంటి కథతో రెండు సినిమాలొచ్చిన చాలా సందర్భాలున్నాయి. ‘భరత్ అనే నేను’ - ‘లీడర్’,  ‘ఎక్స్ మెన్’ - ‘స్కై హై’ మొదలైనవి. ఇలాటి రెండు సినిమాల కథల్ని మూడు వాక్యాల లాగ్ లైన్లు గా రాసి చూడండి- ఎక్కడ డిఫరెంట్ గా వున్నాయి? అలాగే మీరు చెప్తున్న సినిమా (ఈ సినిమా పేరు మీరు రాయలేదు, రాయకూడదు కూడా), మీ కథ -  ఈ రెండిటి లాగ్ లైన్లు రాసి ఎక్కడ తేడాగా వున్నాయో గుర్తించండి. 

(సరీగ్గా పై పేరా పూర్తి చేయగానే పారిశ్రామిక రంగంలో ఓ ప్రముఖుడి నుంచి కాల్ వచ్చింది... మాట్లాడుతూ ఆయన ‘లీడర్’ అన్నారు, కాసేపటి తర్వాత ‘భరత్ అనే నేను’ అన్నారు. బుర్ర తిరిగిపోయింది ఈ కోయిన్సిడెన్స్ కి. టెలిపతీ అన్నమాట. అంటే సరైన వైబ్రేషన్స్ తోనే యూనివర్స్ తో కనెక్ట్ అయి వున్నామన్న మాటే!).

లాగ్ లైన్ లో ముఖ్యంగా కాన్ఫ్లిక్ట్ ని చూడండి. అది ఒకేలా వుంటే అందులో హీరో ఎదుర్కొనే సమస్యని మార్చండి. కథ మారిపోతుంది. ఈ కాన్ఫ్లిక్ట్ కి మీరిచ్చే ట్రీట్ మెంట్ మార్చెయ్యండి. ‘డాకూ మహరాజ్’ ఎన్నోసార్లు వచ్చిన పాత కథే. కానీ స్టయిలిష్ ట్రీట్ మెంట్ వల్ల డిఫరెంట్ గా మారింది. మీ కథకి నేపథ్యం కూడా మార్చవచ్చు. ‘ఎక్స్ మెన్’ సీరియస్ కథయితే, ‘స్కై హై’ సున్నిత హాస్యంతో కూడిన అలాటిదే కథ. అలాగే మీ ప్లాట్ పాయింట్స్ తో పోలిక వుంటే వాటినీ మార్చవచ్చు. అలాగే గోల్ ని సాధించే మీ హీరో బలాల్ని, బలహీనతల్ని హైలైట్ చేయొచ్చు. పైన చెప్పినట్టు అన్ని  సీన్లూ మార్చేయండి. ముఖ్యంగా ఎమోషనల్ ట్రాకుని పవర్ఫుల్ గా మార్చండి. దీనికోసం ఏవైనా సినిమాలు చూడండి- ‘ఖైదీ’ అయినా సరే. ఇకపోతే, మీ కథ తెర కెక్కితే -ఎక్కాలంటే- కొన్ని సంవత్సరాలు పట్టొచ్చు. అప్పటికి పోలికలు గీలికలు చూస్తూ ఎవరూ కూర్చోరు.

Q: స్క్రిప్టు లో సీన్లు రొటీన్ గా కట్ అని రాసి ఇంకో సీను  మొదలుపెట్టే విధానం తప్ప మరొకటి లేదంటారా? ఇలా వుంటే తర్వాత ఎడిటర్ కి ఉత్సాహముంటుందా?

—జెఆర్ఎస్, అసోసియేట్  

A: ట్రాన్సిషన్స్ అన్నవి ఎడిటింగ్ లో చాలా ముఖ్యం. ఎడిటర్ కి ఉత్సాహాన్నివ్వాలి ట్రాన్సిషన్స్. ఇవి స్క్రిప్టు లోనే రాసుకుంటే ముందు స్క్రిప్టు చదువుతున్నపుడే కథ మూడ్ అంతా క్రియేటయి పోతుంది. కంటెంట్ కొక బ్యూటీ వస్తుంది. అవసరమైన ప్రత్యేక సందర్భాల్లో సౌండ్ కూడా రాసుకుంటే ఆట్మాస్ఫియరంతా క్రియేటై పోతుంది. స్క్రిప్టు అంటే కేవలం డైలాగులతో నింపే పేజీలు కాదు, అది హృదయాల్ని కుదిపే అర్టు.

ఈ మధ్య ఒక డైలాగు వెర్షన్ చూడాల్సి వచ్చినప్పుడు- అందులో అన్నిసీన్లకీ కింద -cut to- అని రాసి వుంది. దీన్ని బట్టి కథనం ఎలా వచ్చి వుంటుందో వూహించొచ్చు. ఒక సీను ముక్కకి ఇంకో సీను ముక్క వరుసగా అతికించుకుంటూ పోవడమే దీని కథనం అన్నమాట. దీనికి ఎడిటింగ్ ఏముంటుంది. చాలా పూర్వం ఎడిటర్ కెవి కృష్ణా రెడ్డిని ఇంటర్వ్యూ చేసినప్పుడు-  డిజాల్వ్, ఫేడిన్, ఫేడవుట్, ఫ్రీజ్, స్ప్లిట్ స్క్రీ న్ వంటి ట్రాన్సిషన్స్ లేదా ఎడిటింగ్ టెక్నిక్స్, లేదా ఆప్టికల్ ఎఫెక్ట్స్ అన్నీ ఎడిటర్ దగ్గరే వుంటున్నాయన్నారు సాఫ్ట్ వేర్స్ రూపంలో. వీటితో  కథా స్వభావాన్ని సమన్వయం  చేసుకుంటూ కథాగమనం లో ఇమిడిపోయేట్టు వాడుకునే అవకాశం లేకుండా సీన్లు షూట్ చేస్తున్నారన్నారు. ఇప్పుడైతే  స్క్రిప్టు రాసేటప్పుడే -cut to- -cut to--cut to- అనేస్తున్నారు కత్తి పట్టుకుని!

-cut to- రాయకూడదని కాదు. నిజానికి ఇవే ఎక్కువుంటాయి. అయితే కథనంలో కొన్ని కీలక ఘట్టాల్లో మిగతా ఎఫెక్ట్స్ కూడా అవసరమే. అప్పుడే సినిమా వీక్షణానుభవం గొప్పగా వుంటుంది. నిజానికి వీటిని స్క్రీన్ ప్లే ట్రాన్సిషన్స్ అన్నారు, ఎడిటింగ్ ట్రాన్సిషన్స్ అనలేదు. ఈ స్క్రీన్ ప్లే ట్రాన్సిషన్స్ ని స్టోరీ టెల్లింగ్ టూల్స్ అని కూడా అన్నారు. ఇవి మొత్తం 12 విధాలుగా వుంటాయి. వీటి వాడకం గురించి  5C’s బుక్ లో తెలుసుకోవచ్చు- లేదా గూగుల్ చేస్తే లభిస్తాయి.

Q:  అల్లరి నరేష్ ‘బచ్చలమల్లి’ ఆ స్థాయిలో విఫలమవడానికి కారణం ఏంటి? ఆ కథ మీరు తరచూ చెప్పే గాథ అవ్వడమా? లేక హీరో మీద ఆడియన్స్ కి ఎంపతీ కలగకపోవడమా? లేక మరేదైనా కారణమా? కొంచెం వివరంగా చెప్పండి.

—ఏపీ, అసోసియేట్

A: మీరు చెప్పిన వాటిలో మొదటి ప్రశ్న, రెండో ప్రశ్న రెండూ కరెక్టే. ముఖ్యంగా దీన్ని గాథగా గుర్తించ గల్గినందుకు మీకు అవార్డు. ఎందుకంటే గాథని గుర్తించే మేకర్లు చాలా కొద్ది మంది. ఆ కొద్ది మందిలో మీరొకరు.  ‘బచ్చల మల్లి’ దర్శకుడు తీసింది గాథ లాంటి ఆర్ట్ సినిమా. ఇలా అనుకుని తీసినా బావుండేది. తీస్తున్నది కమర్షియల్ సినిమాతో కథ అనుకుని పొరబడి తీయడంతో అంతా తారుమారైంది. ఇది మామూలు గాథ కూడా కాదు, కమర్షియల్ విలువలు ఏ కోశానా లేని ట్రాజడీ గాథ.

       
గాథకి తగ్గట్టు ఇందులో కాన్ఫ్లిక్ట్ లేదు. ఉన్న కొద్ది కాన్ఫ్లిక్ట్ తో హీరోకి పరిష్కార దిశగా గోల్ లేదు. ఇక మూర్ఖుడైన హీరో ఎవరిపట్లా ఎంపతీ లేకుండా మూర్ఖుడు గానే గాథ ముగించుకుంటే -చచ్చిపోతే- ఎవరికి సింపతీ.  ఫస్టాఫ్ లో హీరోయిన్ తో ప్రేమలో పడ్డాక మారతాడు. ఎంపతీతో మారిన వాడిని కొందరు చూడలేక తిరిగి మూర్ఖుడిగానే మార్చేసి బలి తీసుకుంటే ఎంత సింపతీ అయినా కలుగుతుంది ప్రేక్షకులకి.

       

ఇలాటి క్యారక్టర్ తో రాజశేఖర్ నటించిన ‘రౌడీయిజం నశించాలి’ (మలయాళం లో మోహన్ లాల్ నటించిన ‘కిరీడం’ కి రీమేక్) మంచి ఉదాహరణ. స్థానిక మార్కెట్ మీద జులుం చెలాయిస్తున్న గ్యాంగ్ లీడర్ ఒకరోజు తన తండ్రిని కొట్టడం చూడలేక వాణ్ణి చిత్తుగా తంతాడు రాజేశేఖర్.  దాంతో మార్కెట్ లోని వ్యాపారులు అతడ్ని తమ హీరోగా చేసేసి అందలం ఎక్కించేస్తారు. అతడికి అందరి పట్లా ఎంతో ఎంపతీ. ఆ ఎంపతీతో రౌడీయిజంలోకి ప్రవేశంచిన రాజశేఖర్, చివరికి అందులోంచి బయట పడదామన్నా పడలేక అదే రౌడీయిజానికి బలై పోతాడు. బోలెడు సానుభూతి పాత్రకి. ఇది గాథ కాదు, కథ. పాసివ్ పాత్ర కాదు, యాక్టివ్ పాత్ర.

       
బచ్చల మల్లి ఇలాకాదు, మల్లి చిన్నప్పుడు తండ్రి వేరు కాపురం పెట్టినప్పుడు,  ఎవరు కావాలో తేల్చుకోమన్నప్పుడు, అతను మల్లి తల్లిని వదిలేసి, అప్పటికే తన వల్ల బిడ్డ తల్లిగా వున్న పెళ్ళి కానామెతో వెళ్ళిపోతాడు. ఈ ఇన్సైటింగ్ ఇన్సిడెంటే - తండ్రి మీద పుట్టిన ద్వేషమే మల్లి మూర్ఖుడుగా మారడానికి, చెడిపోవడానికి కారణంగా చూపించారు. కానీ భర్త పోతే పోయాడు, కొడుక్కి మంచీ చెడులు చెప్పైనా దారిలో పెట్టుకోవాలన్న ఏ ప్రయత్నమూ చేయదు అతడి తల్లి. అంతా అయిపోయాక గాథ చివర్లో మూర్ఖత్వం గురించి పాఠాలు చెబుతుంది!

       
ఇక్కడ విశేషమేమిటంటే, మల్లి మీద కంటే అతడి తండ్రి మీదే సానుభూతి కలుగుతుంది. తండ్రిని మల్లి అర్ధం జేసుకునే ప్రయత్నం చేయడు. రెండో ఆమెతో తండ్రి వెళ్ళి పోయాడంటే, ఆమెకి భార్య అనే హోదా నివ్వడానికే, ఆమెతో కన్న కొడుక్కి తండ్రిగా గుర్తింపు నివ్వడానికే. అంతేగానీ ఆమె మీద మోజుతో కాదు. ఈ తండ్రికి  కొడుకుగా తల్లితో సేఫ్ జోన్లోనే వున్నాడు మల్లి. ‘త్రిశూల్’ లో తండ్రి మోసం చేసి వెళ్ళి పోతే పెళ్ళికాని తల్లితో సేఫ్ జోన్లో లేడు అమితాబ్ బచ్చన్. ఇదే ‘పుష్ప’ లో హీరో పరిస్థితీ కూడా. హీరోకి జరిగిన అన్యాయాన్ని చూపించే పద్ధతి ఇదీ. అప్పుడే సింపతీ.

       
ఇక గాథలు ఎంత మోసం చేస్తాయంటే, అది కథ అనుకుని ప్లాట్ పాయింట్ వన్ కోసం, కాన్ఫ్లిక్ట్ కోసం, హీరో గోల్ కోసం ఎదురు చూస్తూంటాం. ఇవి ఎంతకీ రావు, ఇంటర్వెల్ కి కూడా. అయితే సెకండాఫ్ మధ్యలో వచ్చే కాన్ఫ్లిక్ట్ ఏమో- అంటే మిడిల్ మటాష్ స్క్రీన్ ప్లే కావచ్చేమో నని ఇంకా ఓపిక పట్టి- ఎదురు చూస్తూంటే- ఇది కూడా కాక జారుకుంటూ వెళ్ళి ముగిసిపోయే సరికి - అప్పుడు తెలుస్తుంది ఈ చూసిందంతా గాథ అనీ, ఇలా మోసపోయి టైమ్ వేస్ట్ చేసుకున్నామనీ. కాబట్టి డియర్ మేకర్స్, ముందు వొళ్ళు దగ్గరెట్టుకుని కథ చెప్పడం నేర్చుకోండి ఇక నైనా- పనికి రాని సోది గాథలు కాదు!  

       
ఫస్టాఫ్ ముప్పావు గంటకి మల్లి హీరోయిన్ తో ప్రేమలో పడతాడు. కానీ ఇంటర్వెల్ కి కూడా కాన్ఫ్లిక్ట్ రాదు. సెకండాఫ్ అరగంట గడిచాకే వస్తుంది- పెళ్ళిని ఆమె తండ్రి నిరాకరించడంతో. పెళ్ళి పత్రిక మీద నీ తండ్రి పేరుండాలని అనడంతో రెచ్చిపోయి కొట్టేందుకు దిగుతాడు. ఇక మళ్ళీ తాగేసి తిరిగేసి, ఆమె వేరే పెళ్ళి చేసుకుంటోంటే వెళ్ళి రచ్చ చేసేసి, ఆమె చావు చూసి- తను చచ్చిపోతాడు!  ఇదీ మూర్ఖుడి గాథ. పాత్ర ఎక్కడ పుట్టింది? తండ్రి రెండో ఆమెతో వెళ్ళి పోవడం దగ్గర పుట్టింది. ఆ పుట్టుకే తప్పు. కాబట్టి పాత్ర నడక అంతా తప్పు తప్పు.

—సికిందర్

 

 

 

సక్సెస్ కి క్వాంటమ్ మెకానిక్స్ దారి చూపుతోంది...

1369 : స్క్రీన్ ప్లే సంగతులు

 

 దర్శకత్వం : త్రినాథ రావు నక్కిన
తారాగణం : సందీప్ కిషన్, రావు రమేష్, రీతూ వర్మ, అన్షూ, మురళీ శర్మ, అజయ్, శ్రీనివాస రెడ్డి, హైపర్ ఆది తదితరులు
కథ, మాటలు :  ప్రసన్న కుమార్ బెజవాడ, స్క్రీన్ ప్లే : ప్రసన్న కుమార్ బెజవాడ, సాయి కృష్ణ
సంగీతం : లియోన్ జేమ్స్, ఛాయాగ్రహణం : నిజార్ షఫీ
బ్యానర్స్ : ఏకే ఎంటర్టైన్మెంట్స్, హాస్య మూవీస్,  జీ స్టూడియోస్
నిర్మాతలు : రాజేష్ దండా, ఉమేష్ కేఆర్ బన్సల్
విడుదల : ఫిబ్రవరి 26, 2025

***

             దర్శకుడు నక్కిన త్రినాథ రావు నుంచి 'మజాకా' అనే మరో కామెడీ ఫిబ్రవరి 26 న పోటీ లేని సోలో రన్ ని ఎంజాయ్ చేస్తూ రిలీజైంది. కానీ ఆ సోలో రన్ ని క్యాష్ చేసుకునే అవకాశాన్ని చేజార్చుకుంది. కారణం కంటెంట్. బాక్సాఫీసుకి వెళ్ళే ముందు రైటింగ్ టేబుల్ మీద దీనికి పని మిగిలే వుంది. కానీ సరాసరి బాక్సాఫీసు ముందే రైటింగ్ టేబులేసుకుని గబగబా రాసిచ్చేసినట్టుంది. దీంతో కంటెంట్ కి క్వాలిటీ అనేది లేకుండా పోయింది.  ఒక వైపు ప్రేక్షకులు ఇతర భాషల్లో క్వాలిటీ  కంటెంట్ కి అలవాటు పడుతూంటే ఇంకా ఇలాటి సినిమాలు తీసే కాలంలోనే వున్నారు. ఈ కంటెంట్ క్వాలిటీ చెక్ చేయాలంటే దీని స్క్రీన్ ప్లే సంగతుల్లోకి వెళ్ళాల్సిందే.

కథ

కృష్ణ (సందీప్ కిషన్), వెంకట రమణ (రావు రమేష్) లు తండ్రీ కొడుకులు. వెంకట రమణ భార్య చనిపోయింది. ఇప్పుడు కొడుకు పెళ్ళి చేద్దామంటే ఇద్దరు మగాళ్ళ మధ్య మా అమ్మాయిని పంపమని చెప్పేస్తున్నారు. అయితే తను మళ్ళీ పెళ్ళి చేసుకుంటే ఇంట్లో ఇంకో ఆడది వుంటుందని తెలుసుకుంటాడు వెంకటరమణ. తెలుసుకున్నదే తడవు యశోద (అన్షూ) అనే ఏజ్ బార్ అమ్మాయి ని చూసి వెంటపడతాడు. ఇటు కృష్ణ కూడా మీరా (రీతూ వర్మ) అనే అమ్మాయిని ప్రేమిస్తూంటాడు. ఇద్దరికీ ఈ ప్రేమ వ్యహారాలు అంత సులువుగా వుండవు చివరికెలాగో ఒప్పించుకుంటారు. ఇదీ బ్యాక్ గ్రౌండ్.

       
ఇప్పుడు తామిద్దరూ దొంగ చాటుగా వ్యవహారాలు నడుపుతున్నట్టు తండ్రీ కొడుకులకి ఎప్పుడు తెలిసిపోయింది? తెలిసిపోయి ఏం చేశారు? అటు యశోదా మీరా ల మధ్య వున్న బంధుత్వమేంటి? ఆ బంధుత్వంలో వాళ్ళిద్దరి మధ్య ఇంకే సమస్య పెళ్ళికి అడ్డుగా వుంది? దీన్నెలా పరిష్కరించుకుని పెళ్ళిళ్ళు చేసుకున్నారు? ....ఇదీ మిగతా కథ.

ఎలావుంది కథ

రోమాంటిక్ కామెడీ కథ. తండ్రీ కొడుకులు ఒకే కుటుంబంలోని ఇద్దరు అమ్మాయిల్ని ప్రేమించడం. ఇందులో ట్విస్ట్ అనుకుని కల్పించిన కాన్ఫ్లిక్ట్ ఏమిటంటే, ఆ ఇద్దరమ్మాయిలకి ఒకరంటే ఒకరికి పడదు. అందుకని తండ్రీ కొడుకుల్ని పెళ్ళి చేసుకుని ఒకే ఇంట్లో ఎలా వుంటారు? ఇదీ సమస్య. దీన్నెలా పరిష్కరించుకున్నారు తండ్రీ కొడుకులనేది కథ. ఈ కథకి చేసిన కథనంగానీ, పాత్ర చిత్రణలు గానీ పైపైన రాసేసి పైపైన తీసేయడంతో నవ్వుల పాలయింది కామెడీ. ఇదంతా పూర్తి ఔట్ డేటెడ్ సినిమా తీయడానికి దారి తీసింది. ఫస్టాఫ్ ప్రేమలు, ఏవో కామెడీలు చేసి నెట్టుకొచ్చినా, తీరా సెకండాఫ్ లోకొచ్చేసరికి కథకి సరైన దారీ  తెన్నూలేక, నాటు- మోటు కామెడీలతో వూపిరాడక విలవిల్లాడింది. వూపిరి కోసం కథ చేస్తున్న ఆర్తనాదాలే సెకండాఫ్.

స్క్రీన్ ప్లే సంగతులు

ఓపెనింగ్ లో బీచిలో తాగి పడిపోయిన తండ్రీ కొడుకుల్ని పోలీస్ స్టేషన్ కి తీసుకొచ్చి అడుగుతాడు ఇన్స్ పెక్టర్. వాళ్ళిద్దరికీ ఎఫైర్స్ వున్నాయని తెలుసుకుని, తను నవల రాస్తున్నానని- దాచకుండా ఎఫైర్స్ చెప్పమని దబాయిస్తాడు. ఈ ఓపెనింగే తేలిపోయింది. ఇలా ఇప్పటికిప్పుడు ఇన్స్ పెక్టర్ నవల రాస్తున్నాని చెప్తే కన్విన్స్ అవడానికి రెడీగా వుండరు ప్రేక్షకులు. లీడ్ ఇవ్వాలి. అంటే ఇలా పైపైన రాసేసి పైపైన తీసేయకుండా, లోతు పాతుల్లోకి వెళ్ళాలి. అతడికి నవలలు రాసే పిచ్చి వుంటే ముందు పాత్ర పరిచయంతో ఎస్టాబ్లిష్ చేయాలి. అతను కేసుల కోసం గాక, నవల కేదైనా ఐడియా దొరుకుతుందేమోనన్న దృష్టితో నేరస్థుల్ని టార్చర్ చేస్తున్నట్టుంటే ఆసక్తి కల్గించే లీడ్ ఎస్టాబ్లిష్ అవుతుంది. అలా ఐడియా కోసం తిరుగుతూ బీచికొస్తే, తాగిపడిపోయిన తండ్రీ కొడుకుల్ని చూసి ఇన్స్ ఫైర్ అయినట్టు చూపిస్తే పాత్రకి, ఓపెనింగ్ కి అందం చందం వుంటుంది.

       
ఇక తండ్రీ కొడుకులు ఇన్స్ పెక్టర్ కి చెప్పే ఫ్లాష్ బ్యాక్ మొదలవుతుంది. పైన కథలో చెప్పినట్టు వెంకటరమణ కొడుక్కి సంబంధాలు చూస్తూంటే ఆడవాళ్ళు లేని ఇంట్లో పిల్లనివ్వమని వెనక్కి పంపించేస్తూంటారు. అటు కొడుకు కృష్ణ మీరాని ప్రేమిస్తూంటాడు. ఇక కొడుకు పెళ్ళి అవాలంటే తాను మళ్ళీ పెళ్ళి చేసుకోవాలని వెంకటరమణ యశోదతో ప్రేమలో పడతాడు. ఈ తండ్రీ కొడుకులకి ఆ హీరోయిన్లిద్దరూ లొంగరు. తర్వాత మెత్తబడతారు. తండ్రీ కొడుకులు ఒకరికి తెలియకుండా ఒకరు నడుపుతున్న వ్యవహారాలు బైటపడి పరస్పరం దొరికిపోతారు. అయితే మీరా యశోదా ఒకే ఇంట్లో వుంటున్న బంధువులని తెలుసుకుని షాకవుతారు. ఇదీ ఫస్టాఫ్ విషయం- కథ కాదు, కథ ఇంకా మొదలవలేదు. ఎందుకంటే హీరోయిన్ల మధ్య బంధుత్వం హీరో లిద్దరితో వావివరసలకి అడ్డు కాలేదు. కేవలం హీరోయిన్ల బంధుత్వం రివీల్ చేయడానికే ఈ ఇంటర్వెల్. ఈ బంధుత్వమే ట్విస్టు అనుకున్నారు. వావివరసలకి బంధుత్వం అడ్డు కానప్పుడు ట్విస్టు ఎలా అవుతుంది? అదొక మలుపు (టర్నింగ్) మాత్రమే అవుతుంది.  ‘తూర్పు- పడమర’ లో’ వావివరసలే అడ్డు- కాబట్టి అది మతిపోగొట్టే ట్విస్టు అయింది.

2. ఇంటర్వెల్ ప్రాబ్లం

అంటే ఇంటర్వెల్లో కూడా బిగినింగ్ ముగిసి ప్లాట్ పాయింటు- 1కి రాలేదు. అంటే ఫస్టాఫ్ లో ఇంటర్వెల్లో కూడా కథ ప్రారంభం కాలేదు. అంటే కథేమిటో ఇప్పుడు కూడా మనకి తెలియలేదు. కథేమిటో ఇప్పుడు సెకండాఫ్ ఓపెనింగ్ లో తెలుస్తుంది. బంధువులైన యశోదా మీరాలకి మధ్య బద్ధ వైరముందని. కాబట్టి ఈ తండ్రీ కొడుకులని  చేసుకుని ఒకే ఇంట్లో వుండలేరని. ఇదీ వాళ్ళిద్దరితో వీళ్ళిద్దరికీ ఏర్పడ్డ కాన్ఫ్లిక్ట్. అంటే ప్లాట్ పాయింట్ -1 ఇప్పుడు ఏర్పడిందన్న మాట. ఎక్కడో  ఫస్టాఫ్ లో 45 నిమిషాలకైనా రావాల్సిన ఫ్లాట్ పాయింట్-1, స్థానభ్రంశం చెంది మిడిల్ ప్రాంగణమైన సెకండాఫ్ ప్రారంభంలో వచ్చిపడింది. అంటే బిగినింగ్ వచ్చేసి మిడిల్ ని కబ్జా చేసిందన్న మాట. అంటే బిగినింగ్ విభాగమనే ఉపోద్ఘాతమే ఇంత బారుగా సాగిందన్న మాట. అంటే సుమారు ఈ గంటా 25 నిమిషాల సేపూ అసలీ సినిమా కథేమిటో తేలక తల్లడిల్లుతామన్న మాట!

       
స్ట్రక్చర్ రీత్యా కంటెంట్ ని విప్పిచూస్తే ఈ అనారోగ్యాలు కన్పిస్తాయి. ఇవి అనారోగ్యాలే కాదనుకుంటే నిరభ్యంతరంగా ఇలాగే చేసుకోవచ్చు. కథలో మిగతా సీన్లలో ఏదైనా సీనుని మధ్యలో ఆపేసి తర్వాత కలపొచ్చు. సీనస్ ఇంటరప్టస్ (దృశ్య భంగం అనొచ్చేమో) అంటారు దీన్ని. ఈ టెక్నిక్ ని ఇంటర్వెల్ సీనుకి కూడా వాడొచ్చు. అయితే ఇంటర్వెల్లో హీరోయిన్ల బంధుత్వం రివీల్ చేసినప్పుడు, అది తండ్రీ కొడుకులతో పెళ్ళిళ్ళకి అడ్డొచ్చే బంధుత్వం కాదని తెలిసి పోతున్నప్పుడు, ఈ ఇంటర్వెల్ సీనుని మధ్యలో ఆపి  సెకండాఫ్ ఓపెనింగ్ లో పూర్తి చేయడం కుదరదు. ఎందుకంటే ఇంటర్వెల్లో బంధుత్వాన్ని రివీల్ చేసినప్పుడు కాన్ఫ్లిక్ట్ ఏర్పడలేదు. అది కేవలం ఒక మలుపు (టర్నింగ్) మాత్రమే. దీన్నేదో ట్విస్టు అనుకుని, ఇంటర్వెల్ కి బావుందనుకున్నట్టుంది.

        
అజిత్ నటించిన ‘పట్టుదల’ లో త్రిషని కిడ్నాప్ చేసిన ముఠా, నిజానికి ఈ కిడ్నాప్ త్రిష పన్నిన పథకమేనని చెప్పినప్పుడు అది ఇంటర్వెల్ కి పూర్తి స్థాయి టర్నింగ్. సీనస్ ఇంటరప్టస్ జరగలేదు. కానీ సెకండాఫ్ మొదలు పెట్టగానే ఇంటర్వెల్లో చెప్పింది ఉత్తిదే అన్నప్పుడు  ఇంటర్వెల్లో ప్రేక్షకుల్ని చీట్ చేసినట్టయ్యింది. అంటే ఫేక్ ఇంటర్వెల్ అయింది.

        
‘మత్తు వదలరా’ లో కూడా ఇలాటిదే ఫేక్ ఇంటర్వెల్ వస్తుంది. ఇంటర్వెల్లో ఏదో ఘోరం జరిపోతోందన్నట్టు సీనుని ఆపి, సెకండాఫ్ లో ఓపెన్ చేసినప్పుడు - ఆ ఇంటర్వెల్ ఉత్తిదే నని చెప్పడం ప్రేక్షకుల్ని ఫూల్స్ చేయడమే. దీని బదులు ఆ తలుపు కొట్టిన వ్యక్తిగా బ్రహ్మాజీనే చూపించి ఇంటర్వెల్ వేసి వుంటే, సస్పెన్స్ క్రియేట్ అయ్యేది- చచ్చిపోయిన బ్రహ్మాజీ పాత్ర ఎలా బ్రతికి వచ్చిందన్న ప్రశ్నతో. 

       
ఇంటర్వెల్ సీనుకి సీనస్ ఇంటరప్టస్ ఎప్పుడు వర్కవుట్ అవుతుందంటే -ఇంటర్వెల్లో మధ్యలో ఆపిన సీను వల్ల సస్పెన్స్ పుట్టినప్పుడు. అంటే ఇంటర్వెల్లో ఎవరో బయటి నుంచి దబదబ తలుపు బాదుతున్నారనుకుందాం. అంత వరకూ నడిచిన కథ ప్రకారం  హీరో కోసం పోలీసులు వెతుకుతున్నారనుకుందాం. అప్పుడు తలుపు బాదుతోంటే పోలీసులేనన్న భావం వస్తుంది, ఇప్పుడు హీరో ఏం చేస్తాడన్న సస్పెన్స్ పుడుతుంది. ఈ ఇంటర్వెల్ తర్వాత  సెకెండాఫ్ ఓపినింగ్ లో హీరో తలుపు తెరిస్తే- ఎదురుగా పోలీసులు గాక ఇంటి ఓనర్ నిలబడి వుంటే - అప్పుడు సీనస్ ఇంటరప్టస్ అవుతుంది.

3. కాన్ఫ్లిక్ట్ నిర్వహణ ఇంతేనా?

కాబట్టి ‘మజాకా’ సెకండాఫ్ ప్రారంభంలో చూపించిన కాన్ఫ్లిక్ట్ ని వెనక్కెళ్ళి ఇంటర్వెల్లోనే చూపించాలి. అప్పుడు స్ట్రక్చర్లో దోషం తొలగిపోతుంది. ఏమిటా కాన్ఫ్లిక్ట్? బంధువులైన హీరోయిన్లకి ఒకరంటే ఒకరికి పడదని, కాబట్టి తండ్రీ కొడుకులు వాళ్ళిద్దర్నీ కలిపి పెళ్ళిళ్ళు చేసుకుంటే అభ్యంతరం లేదనీ, మీరా తండ్రి (మురళీ శర్మ) అంటాడు. ఇదేమీ కొత్త పాయింటు కాదు- ఒకరంటే ఒకరికి పడని రెండు కుటుంబాల్ని కలిపి పెళ్ళి చేసుకునే కథలు వచ్చినవే. కాకపోతే ఇక్కడ పడకపోవడాన్ని హీరోయిన్లతో పెట్టారు. బావుంది, పాతలోంచి ఇన్నోవేట్ చేసిన ఐడియా.

       
ఇదే ఇన్నోవేషన్ని కాన్ఫ్లిక్ట్ తో కూడా చూపించాల్సింది... కానీ కాన్ఫ్లిక్ట్ నిర్వహణ మళ్ళీ పాత మూసలోకే తిరగబెట్టింది. హీరోయిన్లిద్దర్నీ కలపడమెలా అని చూసి చూసి వున్న రొటీనే హీరోలిద్దరి గోల్ అయింది. కానీ దీన్ని రివర్స్ చేసి, అసలే పచ్చగడ్డి వేస్తే భగ్గుమంటున్న హీరోయిన్లిద్దరి మధ్యా మరింత విద్వేష జ్వాలలు రగిలిస్తే ఎలా వుంటుందని  వ్యూహాత్మకంగా  గోల్ ని ఆలోచించలేదు.

       
అసలే విరోధంతో వున్న హీరోయిన్లని ఇంకా విడదీసే, వాళ్ళు తట్టుకోలేక ఇక చాలనుకుని వాళ్ళే కలిసిపోయే పాఠంగా వుంటే ఇందులో చాలా డైనమిక్స్ వర్కౌట్ అవుతాయి. అంటే వేల్యూ యాడెడ్ స్క్రిప్టుగా అప్ గ్రేడ్ అవుతుంది.  ఇంకా విడదీసే ప్రయత్నాలతో కథనం యాక్షన్ లో వుంటుంది, కొత్త సిట్యుయేషన్స్ క్రియేటవుతాయి, హీరోలు పైకి హెల్ప్ గా, వెనుక విలన్లుగా డబుల్ గేమ్ ప్లే చేస్తారు, కథనం కొత్తగా మారితే కామెడీ కూడా కొత్తగా మారుతుంది, ఇంకా కొత్త మలుపులు కూడా ఎదురై థ్రిల్స్ పెరుగుతాయి.

       
ఇలా కాకుండా వాళ్ళని కలపాలన్న చాదస్తపు కథనంతో నేలబారుగా తయారయింది స్క్రిప్టు. ఇలా కలిపే ప్రయత్నాలు సిల్లీగా ఓ అయిదు సార్లు చేసి విఫలమవుతారు. వీటిలో పెళ్ళి దగ్గర ఒకటి, చావుదగ్గర ఒకటి చేసే ప్రయత్నాలు లౌడ్ కామెడీ. ఇంత కంటే  క్రియేటివిటీ చేతగాలేదు. ఇక కలపలేమని తెలుసుకుని మీరా తండ్రినే అడుగుతారు. వెళ్ళి సపరేట్ గా పెళ్ళిళ్ళు చేసుకుని సపరేట్ గా కాపురాలు పెట్టమంటాడతను. ఈ ఆలోచన మనకి ముందెప్పుడో వస్తుంది. కథలో పాత్రలకి లేటుగా వస్తాయి. లేదా తండ్రీ కొడుకుల్లో ఒకరు పెళ్ళి చేసుకుని ఇంకొకరు త్యాగం చేయమంటాడు. ఇలా చెప్పి కూతురు మీరాకి  వేరే సంబంధం చూస్తాడు. వెంకటరమణ యశోదని లేపుకు పోయే ప్లానేస్తాడు. యశోదా కృష్ణని కొడుకులా చూడడంతో కరిగిపోయి, తాను పెళ్ళి మానుకుని తండ్రి పెళ్ళి చేయాలని నిర్ణయించుకుంటాడు. ఇలా కథ ఎలా పడితే అలా మలుపులు పెరుగుతూ చివరి అరగంట తెచ్చి పెట్టుకున్న త్యాగాలతో సీరియస్ అయిపోతుంది సెకండాఫ్.

4. ట్విస్టులంటూ టర్నింగులు

ఈ సెకండాఫ్ తో మెప్పించాలన్న ప్రయత్నంతో, స్పెషల్ ఎట్రాక్షన్  అనుకుంటూ కథకి చాలా ట్విస్టు లిచ్చామనుకున్నారు. అవి ట్విస్టులు కాదు సాధారణ టర్నింగులు. ట్విస్టులు  వేరు, టర్నింగు వేరు. ట్విస్టులో పజిల్ ఇమిడి వుంటుంది. అంటే చిక్కుముడితో వుంటుంది. ఈ చిక్కుముడిని విప్పడమే కథగా వుంటుంది. టర్నింగు కథని ముందుకు నడిపించే సాధారణ ప్రక్రియ. ట్విస్టు  ఎలా వుంటుందో ఉదాహరణకి-

        
1973 లో హాలీవుడ్ నుంచి  ‘40 క్యారట్స్’ అనే సినిమా వచ్చింది. ఇది బేతాళ కథలా వుంటుంది. దీన్ని తమిళంలో కె బాలచందర్ కమల్ హాసన్, శ్రీవిద్య, జయసుధ, మేజర్ సౌందరరాజన్, రజనీ కాంత్ లతో 1975 లో ‘అపూర్వ రాగంగళ్’ గా తీశారు. దీన్నే దాసరి నారాయణరావు 1976 లో నరసింహ రాజు, శ్రీవిద్య, మాధవి, సత్యనారాయణ, మోహన్ బాబులతో ‘తూర్పు -పడమర’ గా తీశారు.

          
ఈ కథలో  నరసింహ రాజు-శ్రీవిద్య ప్రేమించుకుంటారు, మరో వైపు మాధవి - సత్యనారాయణ ప్రేమించుకుంటారు. ఇలా వుండగా, మాధవి శ్రీవిద్య కూతురని, నరసింహరాజు సత్యనారాయణ కొడుకని కథ మధ్యలో రివీలై ట్విస్టు పడుతుంది.

          
ఇప్పుడేం చేయాలి? ఈ ట్విస్టులో పజిల్ నెలా విప్పాలి? తండ్రీ కొడుకులు తల్లీ కూతుళ్ళని ప్రేమించారు. తండ్రి కూతుర్ని ప్రేమించాడు, కొడుకు ఆమె తల్లిని ప్రేమించాడు.

          
ఈ ప్రశ్నకు బదులేది? ఈ సృష్టికి మొదలేది? అని పాట. బేతాళ కథల్లో 24 వ కథ ఇదే. కొడుకు రాణిని ప్రేమిస్తాడు, తండ్రి రాకుమారిని ప్రేమిస్తాడు.

          
ఈ వావివరసల చిక్కు ముడిని విప్పడానికి తమిళంలో రజనీ కాంత్ పాత్రని ప్రవేశపెడతారు, తెలుగులో మోహన్ బాబు పాత్రని ప్రవేశపెడతారు.

          
అంటే ఇక్కడ కథ మధ్యలోపడ్డ ట్విస్టు విప్పడానికి తాళంచెవి పాత్రని వాడారు. ట్విస్టులో మలుపు వుండదు, పజిల్ వుంటుంది. ఈ పజిల్ ని విప్పే తాళం చెవిని కనుగొన గల్గితేనే కథ ముందుకెళ్తుంది.

          
కథ మధ్యలో ట్విస్టు వేస్తే దాన్ని విప్పే తాళం చెవి పాత్రని కనుగొని చివర్లో వాడతారు. అంతవరకు ఈ చిక్కుముడి ఎలా వీడుతుందన్న సస్పన్స్ తో కథ నడుపుతారు. కాబట్టి ‘మజాకా’ లో ట్విస్టులంటూ  ప్రేక్షకుల్ని మభ్య పెట్టనవసరం లేదు. అవి సాధారణంగా కథలో వచ్చే మలుపులే. వాటిలో పజిల్ వుండదు.

5. చివరికేమిటి

ఫస్టాఫ్ లో రహస్య ప్రేమాయణాలు నడుపుతున్న తండ్రీ కొడుకులు ఒకరి కొకరు దొరికిపోయినప్పుడు- ప్లాట్ పాయింట్ -1 ని ఏర్పాటు చేసి కథ ప్రారంభించి వుంటే మొత్తం స్క్రిప్టు ఆర్డర్ లో వుండేది. తండ్రికి పెళ్ళయితేనే కొడుక్కి పెళ్ళవుతుంది కాబట్టి, ముందు తండ్రి తను పెళ్ళి చేసుకోవడానికి సహకరించమంటే, అలాగే కొడుకు రచనా సహకారం అందించి ఈ కథని దారిలో పెడితే- అప్పుడు ముందు హీరోయిన్ల బంధుత్వంతో ఒక షాకు, తర్వాత ఇంటర్వెల్లో హీరోయిన్ల మధ్య వైరంతో ఇంకో షాకు ఇస్తే - ఈ కాన్ఫ్లిక్ట్ ని సెకండాఫ్ లో రివర్స్ ఇంజనీరింగ్ చేసుకుంటూ పోతే సరిపోయేది.

       
పోతే, పైపైన రాసేసి పైపైన తీసేశారనడానికి ఇంకో ఉదాహరణ- యశోద పాత్ర. ఈమె 30 దాటినా పెళ్ళి చేసుకోకుండా ఎందుకుందంటే- టీనేజిలో ప్రేమించిన వాడు మళ్ళీ వస్తానని మాటిచ్చి వెళ్ళాడుట. కానీ ఎంతకీ రాలేదట! మాటిచ్చాడు కాబట్టి తను అభిసారికలా ఎదురుచూస్తూ ఇలా భ్రహ్మచారిణిగా మిగిలిపోయిందట!

       
ఈమె అమోఘ మెచ్యూరిటీకి తోటి బంధువైన మీరాతో మోరల్ పోలీసింగ్ ఒకటి! నీతులు చెబుతూ మీరాని తన చెప్పుచేతల్లో వుంచుకుని స్వేచ్ఛ లేకుండా చేసే పెత్తనం. కానీ తను వెంకటరమణతో లేచిపోవా లనుకోవడానికి నీతులేం అడ్డురాలేదు. రైటింగ్ టేబులంటే ఈమెకి వొళ్ళు మంటలా వున్నట్టుంది...ముందు కానీయ్, తర్వాత స్క్రీన్ ప్లే సంగతుల్లో చూసుకుందాం అన్నట్టుంది.

—సికిందర్

1368 : సందేహాలు - సమాధానాలు

 

Q : మీ బ్లాగు రెగ్యులర్ గా ఫాలో అవుతున్నాను. స్క్రీన్ ప్లేకి సంబంధించి కొత్త సమాచారం అందిస్తూ నాలాంటి వారికి తోడ్పడుతున్నందుకు కృతజ్ఞతలు. అయితే ఇది వరకు  సందేహాలు - సమాధానాలు శీర్షిక రెగ్యులర్ గా వచ్చేది. ఈ మధ్య రావడం లేదు. ఈ శీర్షిక నా వరకు చాలా ముఖ్యమైనది. ఇది ఇక ముందు వస్తుందా రాదా తెలుపగలరు.
—ఎంపీఆర్, అసోసియేట్

A : 2020, 21 రెండేళ్ళు కోవిడ్ లాక్ డౌన్ తో సినిమా రంగం చిన్నాభిన్నమైంది. ఆ పరిస్థితుల్లో పాఠకులు చెల్లాచెదురయ్యారు. సందేహాలు అడిగేవాళ్లే లేరు సమాధానాలివ్వడానికి. అప్పుడాగిపోయిన శీర్షిక ఇప్పటికీ పుంజుకోలేదు. నెలకి ఒకటీ అరా ప్రశ్నలు వస్తే వాట్సాప్ లోనే వ్యక్తిగతంగా సమాధానమిస్తున్నాం. ఎక్కువ ప్రశ్నలొస్తే వారం వారం కాకపోయినా నెలలో రెండు సార్లు ఇవ్వొచ్చు. గత వారం మూడు ప్రశ్నలొచ్చాయి. వీటికి బ్లాగు ముఖంగానే సమాధానమిస్తున్నాం. మీరు ప్రశ్నలు పంపుతూ వుండండి-శీర్షికని రెగ్యులర్ గా నిర్వహిద్ధాం. ఒక సమస్యేమిటంటే, చాలా మందికి ప్రశ్నలు అడగడం రావడం లేదు. అందుకని ప్రశ్నలు పంపలేకపోతున్నారు. బ్లాగులో ఆర్టికల్స్ మొక్కుబడిగా చదివి వదిలేస్తే విషయం మీద పట్టు సాధించలేరు. అలా ప్రశ్నలడగడం రాదు. తాముంటున్న రంగంలో తమ మీద స్కిల్స్ పరంగా ఎంతో కొంత ఇన్వెస్ట్ చేస్తేనే ఎదగ గలుగుతారు. ఇన్వెస్ట్ చేయడమంటే డబ్బులు పెట్టుబడి పెట్టి నేర్చుకోవడమని కాదు. అలా కూడా చేయొచ్చు ఫిలిమ్ ఇనిస్టిట్యూట్ లో కోర్సు తీసుకుని. ఇన్వెస్ట్ చేయడమంటే జీవితాన్ని పెట్టుబడిగా పెట్టి నేర్చుకోవడం. దీనికి ఈ ఉచిత బ్లాగు ఎల్లప్పుడూ తోడుంటుంది.

Q : మీ ‘తండేల్’ స్క్రీన్ ప్లే సంగతులు చదివాను. You are right. Conflict సరిగా లేదు. నేనైతే director కు ఈ  విధంగా చెప్పే వాడిని- హీరో ఒక చిన్న ఫైట్ తో కాకుండా, సినిమా పరిచయంలోనే అతను తండేల్, అంటే నాయకుడు. హీరోయిన్ కోరిక మేరకు  వేటకు వెళ్లనని, ఇదే చివరి సారని, వచ్చిన డబ్బుతో కోల్డ్ స్టోరేజ్ బిజినెస్ చేస్తానని, దానితో మిగతా వాళ్లకు కూడా మేలు జరుగుతుందని చెప్పేవాడు (స్టోర్ చేసి రేట్ ఎక్కువ వచ్చినప్పుడు అమ్మడం ద్వారా).

ఇక హీరో పాకిస్తాన్ లో ఉన్నప్పుడు హీరోయిన్ గుజరాత్ లో నేల మీద కూర్చుని ధర్నా చేయడం, మంత్రి ఇంటి ముందు పెళ్లి చీర కట్టుకునే  చీప్ సీన్ ల కన్నా కూడా, ఢిల్లీ వెళ్లి కోర్టు ద్వారా లీగల్ పోరాటం, ఉద్యమం ద్వారా (social media and on the street etc) ప్రజల్లో ఒక మూవ్ మెంట్ తీసుకు రావడం  లాంటివి చేయాలి (‘రోజా’ సినిమాతో పోలిక వచ్చినా సరే).

ఇక పొతే director కు హీరో oriented  సినిమా చేయాలా, హీరోయిన్ oriented చేయాలా స్పష్టత లేదు. కామెడీ ఏమిటంటే, సుష్మా స్వరాజ్ కూతురు మంత్రి కాదు.  సాయి పల్లవి కొత్త ఫారిన్ మినిస్టర్ ను కలవాలి. నిజానికి ఆమె ఎవరినీ కలవ కూడదు. ఉద్యమం చేస్తే వాళ్లే సాయిపల్లవి దగ్గరికి రావాలి.

—సీఎస్సార్, దర్శకుడు

A : అసలు ‘తండేల్’ కాన్సెప్ట్ ఏమిటి? బలమైన ప్రేమ కథ చెప్పడమా, లేక పాక్ లో బందీల్ని విడిపించడమా? దేనికి మార్కెట్ వుంటుంది? ప్రేమకా, ఉద్యమనికా? దీని మీద స్క్రీన్ ప్లే సంగతుల్లో స్పష్టత నిచ్చాం. అయినా మీరు హీరోయిన్ ఉద్యమం చేసి హీరోని విడిపించాలంటున్నారు. హీరోయిన్ కోరిక మేరకు  వేటకు వెళ్లనని, ఇదే చివరి సారని, వచ్చిన డబ్బుతో కోల్డ్ స్టోరేజ్ బిజినెస్ చేస్తానని, దానితో మిగతా వాళ్ళకి కూడా మేలు జరుగుతుందని చెప్పాలంటున్నారు. ఇలాటి మాటలతో కథ ముడిపడదు. అందుకని అతడెన్ని మాటలు చెప్పినా, అతడి చేతికి దారం కట్టి ఆమె ప్రేమో వేటో తేల్చుకో పొమ్మనాలని అన్నాం. ఒకే సినిమాలో రెండు కథలు చెప్పబోతే ఈ సినిమాలో జరిగినట్టే వుంటుంది. హీరోయిన్ కట్టిన దారం కోసం ఆ ప్రేమని నిలబెట్టుకోవడానికి పాక్ అధికారుల గుండెల్ని కదిలించేలా హీరో గనుక చేస్తే విడుదల దానికదే జరిగి పోతుంది. విడుదల కోసం అంత రభస రచ్చ పూర్తిగా అప్రస్తుతం. ప్రేమ కథలో ప్రేమతో గెలవాలి.

సుష్మా స్వరాజ్ విదేశాంగ శాఖ మంత్రిగా వున్నప్పుడు విదేశాల్లో ఇరుక్కున్న ఎందర్నో ఒక ట్వీట్ చేసినా, ఫోన్ కాల్ చేసినా తక్షణ చర్యలు  తీసుకుని విడుదల చేయించేవారు. అందుకని ఆవిడ స్థానంలో కూతురు, ఎంపీ అయిన బాసురీ స్వరాజ్ ని మంత్రిగా చూపించి వుంటారు.

Q : మీమీద నా కంప్లెయింట్ ఏంటంటే మీరు బ్లాగుని పట్టించుకోవడం మానేశారు. రెగ్యులర్ గా రివ్యూలు లేవు, ఇతర ఆర్టికల్స్ లేవు. ఇక ఇంతేనా? ఏదైనా మార్పు వస్తుందా?

—ఏవీఎం,  టెక్సాస్

A : వస్తుంది. ఈ మధ్య నెలకి ఇద్దరికీ సినాప్సిస్ లు సెటప్ చేయడంతో సరిపోతోంది. ఒక్కో సినాప్సిస్ కి 15 రోజులైనా పడుతోంది. కథ ఒక్క రోజులో వచ్చేసినా డీటెయిల్డ్ సినాప్సిస్ కి టైము ఎక్కువ పడుతోంది. అందుకని బ్లాగులో కంటెంట్ మిస్సవుతోంది. ఈ వారం నుంచి ఇలా జరక్కుండా చూద్దాం. మీ యూఎస్ నుంచి గత రెండు రోజులుగా వ్యూస్ తాకిడి విపరీతం గా వేలల్లో పెరిగింది. ఓ వారం రోజులుగా  ఫ్రాన్స్, జర్మనీ, సింగపూర్, వియత్నాం, ఆస్ట్రియా, ఆస్ట్రేలియా, బ్రిటన్, కెనడా, చైనా, జపాన్, సౌత్ కొరియా, హాంగ్ కాంగ్, ఐర్లాండ్, బాంగ్లాదేశ్, బెల్జియం ...ఇలా చాలా దేశాల నుంచి విపరీతంగా వ్యూస్ వస్తున్నాయి. వీటిలో కొన్ని దేశాల్లో ఎన్నారై లున్నారు. మిగతా దేశాల నుంచి వస్తున్న వ్యూస్ స్పామ్ అనుకోవాలా? ఈ వ్యూస్ ని చూస్తే బాగా రాయాలి, చాలా రాయాలి, రెగ్యులర్ గా రాయాలని ఆవేశం వచ్చేస్తోంది... కానీ ఏం చేస్తాం, పరిస్థితులిలా వున్నాయి.

—సికిందర్

1367 : స్క్రీన్ ప్లే సంగతులు!

 

రచన - దర్శకత్వం : మగిళ్ తిరుమేని

తారాగణం :  అజిత్, త్రిష, అర్జున్, రెజీనా కాసాండ్రా, ఆరవ్ తదితరులు

సంగీతం :  అనిరుధ్ రవిచంద్రన్, ఛాయాగ్రహణం : ఓం ప్రకాష్,

బ్యానర్ : లైకా ప్రొడక్షన్స్

నిర్మాత : సుభాస్కరన్ అల్లీరాజా

విడుదల : ఫిబ్రవరి 6, 2025

***

        గత పదేళ్ళుగా అజిత్ కుమార్ ఒకే మూసలో ఫార్ములా యాక్షన్ సినిమాలు తప్ప వేరే కొత్తదనం జోలికిపోవడం లేదు. సూర్య, కార్తీ, విజయ్ సేతుపతి, ధనుష్ లాంటి ఇతర తమిళ స్టార్లు విభిన్న ప్రయోగాలు చేస్తూంటే, తను మాత్రం అవే కృత్రిమ యాక్షన్ ఫార్ములాలతో అక్కడే వుండిపోయాడు. ఈ లిస్టులో  ‘విదాముయర్చి’ ని కొత్తగా చేర్చాడు. ఆరు సినిమాలు తీసిన మగిళ్ తిరుమేని దీనికి దర్శకుడు. ఇతడికంటే ముందు దర్శకుడు విఘ్నేష్ శివన్ ని ఫైనల్ చేసిన అజిత్, ఎంత టైమిచ్చినా అతను సరైన స్క్రిప్టు సిద్ధం చేయడం లేదని మురుగ దాస్, అట్లీ లాంటి ఎందరో దర్శకుల్ని పరిశీలించాడు. చివరికి  మగిళ్ తిరుమేనికి అవకాశమిచ్చాడు. ఇంతా చేసి రొటీన్ యాక్షన్ సినిమాలతో తనకున్న మోజుని ఈ సినిమాతో అట్టడుగు స్థాయికి చేర్చాడు. ఒకే మూసలో ఫార్ములా యాక్షన్ సినిమాలు నటిస్తున్న తనకి, ఇంతకంటే లో- ర్యాంకు లేదని గ్రహిస్తే ఇక వీటికో నమస్కారం పెట్టి కొత్తదనం వైపు ఏమైనా చూస్తాడేమో నని ఫ్యాన్స్ కూడా ఆశగా ఎదురు చూస్తున్నారు. మరి ‘పట్టుదల’ ఇంత అట్టడుగు స్థాయికి ఎలా చేరిందని, ఎందుకు చేరిందని ఎవరికైనా సందేహాలు వస్తాయి. వీటికి సమాధానం కోసం ప్రయత్నిద్దాం...

కథేమిటి

    అర్జున్ (అజిత్)  జార్జియాలోని టిబిలిసిలో అమెరికన్ కంపెనీలో పని చేస్తూంటాడు. ఇక్కడే  కాయల్ (త్రిష- కాయల్ అంటే అందమైన కళ్ళు గలది అట) తో  ప్రేమలో పడతాడు. ఇంతలో అతడికి అజర్ బైజాన్ లోని బాకు అనే నగరానికి ట్రాన్స్ ఫర్ అవుతుంది. ఓ మూడేళ్ళ తర్వాత ఆమెని పెళ్ళి చేసుకుంటాడు. తర్వాత ఆమెకి అబార్షన్ అయి పిల్లలు పుట్టని పరిస్థితి ఏర్పడుతుంది. దీంతో అతడికి దూరం కావడం ప్రారంభిస్తుంది. తొమ్మిది సంవత్సరాల తర్వాత తనకి ప్రకాష్ అనే అజ్ఞాత వ్యక్తితో ప్రేమ వ్యవహారం వుందని  చెబుతుంది. ఆమె నిజాయితీకి మెచ్చుకుని సమస్య  పరిష్కరించుకుందామని అతనంటే,  విడాకులు  కావాలని అంటుంది. అప్పటిదాకా టిబిలిసిలోని తన పేరెంట్స్ దగ్గర వుంటానని అంటుంది.

కారులో ఆమెని తీసుకుని టిబిలిసి బయల్దేరతాడు. దారిలో ఒక కారులో తాగుబోతులు రాష్ డ్రైవ్ చేసి - వాళ్ళే గొడవకి దిగుతారు. అర్జున్ మౌనంగా వాళ్ళ మాటల్ని భరించి తనే సారీ చెప్తాడు. ఆ తాగుబోతుల లీడర్ కిషోర్ (ఆరవ్) అర్జున్  పెట్రోలు కోసం బంకులో ఆగినప్పుడు అక్కడికొచ్చేస్తాడు. కాయల్ షాపింగ్ చేసుకోవడానికి  వెళ్తుంది. కిషోర్ అర్జున్ ని రెచ్చగొట్టడం మొదలెడతాడు. అటు షాపులో కాయల్ కి దీపిక (రెజీనా కాసాండ్రా), రక్షిత్ (అర్జున్) లు పరిచయమవుతారు. వాళ్ళు ఒక పార్సిల్ ని డెలివరీ ఇవ్వడానికి ట్రక్కులో వెళ్తున్నట్టు చెప్తారు. తర్వాత కాయల్ ని తీసుకుని బయల్దేరిన అర్జున్ కారు హైవేమీద పోతూ విధ్యుత్ లోపంతో ఆగిపోతుంది. రిపేరు చేయడానికి విఫల యత్నం చేస్తాడు. మెకానిక్ కి ఫోన్ చేద్దామంటే సిగ్నల్స్ వుండవు.

       
ఇంతలో ట్రక్కు వస్తూ కనిపిస్తుంది. దాన్ని ఆపి డ్రైవ్ చేస్తున్న రక్షిత్ కి ప్రాబ్లం చెప్తాడు. రక్షిత్ వల్ల కూడా రిపేరు కాదు. ఇలాకాదని, కొంత దూరంలో కాఫీ షాప్ వుందని, అక్కడ్నించి లాండ్ లైన్లో మెకానిక్ కి కాల్ చేయవచ్చని దీపిక చెప్తుంది. కాయల్ వాళ్ళతో బయల్దేరుతుంది. చాలా సేపటిదాకా కాయల్  మెకానిక్ తో తిరిగి రాదు. ఇంతలో కారు స్టార్ట్ అవుతుంది. అర్జున్ కారులో కాఫీ షాప్ కి బయల్దేరతాడు. అక్కడికి లేడీస్ ఎవరూ రాలేదని కాఫీ షాప్ ఓనర్ చెప్తాడు. మరి కాయల్ ఎటు వెళ్ళినట్టు?

       
అర్జున్ కి ఆందోళన పెరుగుతుంది. కాయల్ కిడ్నాప్ అయినట్టు అర్ధమైపోతుంది. ఎందుకు కిడ్నాప్ చేశారు? అసలు దీపికా రక్షిత్ లెవరు? కాయల్ ని ఎక్కడికి తీసికెళ్ళారు? ఇప్పుడేం చేయాలి? ఏం చేయాలో అర్ధంగాదు అర్జున్ కి...

ఎలావుంది కథ

     1997 లో విడుదలైన కర్ట్ రస్సెల్ నటించిన ‘ది బ్రేక్ డౌన్’ ని కాపీచేసి ఈ కథ తీస్తూంటే పారమౌంట్ పిక్చర్స్ కి తెలిసిపోయి నోటీసు పంపారు. 11 కోట్లకి సెటిల్ చేసుకుని కాపీ మచ్చ తుడిపేసుకుని అధికారిక రీమేకుగా చట్టబద్ధత పొందారు. ఈ పని ముందే చేసి వుండాల్సింది. అయితే ముందు కాపీ చేయాల్సి వచ్చినా ఎప్పుడో 28 ఏళ్ళనాటి కాలం  చెల్లిన, అరిగిపోయిన హాలీవుడ్ కథనే ఎందుకు సెలెక్టు చేసుకున్నాడో దర్శకుడు తెలీదు. ఈ కాలం చెల్లిన, అరిగిపోయిన  కథ అజిత్ లాంటి పెద్ద స్టార్ కి కురచనై పోయిన కథ కూడా. మూడోది- ఇది ఒక రోజులో అంటే 24 గంటల్లో ముగిసిపోయే రోడ్ ట్రిప్ థ్రిల్లర్ కథ. చిన్న హీరోతో తీయాల్సిన ఒక రోజు జరిగే కథతో పెద్ద స్టార్ ని పెట్టి తీయడం ఏం మార్కెట్ యాస్పెక్టో తెలీదు. ఇవన్నీ కలిసి ‘పట్టుదల’ ని పట్టులేని ప్రయత్నంగా తయారు చేశాయి. బడ్జెట్లో సగం కూడా వసూలు చేయలేకపోయిన ఇలా తీసిన ఈ సినిమా ఇతర స్టార్లకి హెచ్చరికలా వుంటుంది.  ఇతర స్టార్లని హెచ్చరించడం కోసమే ఈ సినిమా తీసినట్టుంది- 11 కోట్లు దీని కథకి సమర్పించుకుని!

స్క్రీన్ ప్లే సంగతులు

    ఒరిజినల్ కథలో కర్ట్ రస్సెల్- కేథ్లీన్ క్విన్లాన్ లు బోస్టన్ నుంచి బయల్దేరి శాండీగో కారులో పోతూంటారు. వాళ్ళు భార్యాభర్తలు. వాళ్ళ బ్యాక్ గ్రౌండ్ ఇంకేమీ చెప్పరు. ఇద్దరూ అన్యోన్యంగా వుంటారు. అలా పోతున్నాక దారిలో కారు పాడయి, తర్వాత మెకానిక్ కోసం ట్రక్కులో వెళ్ళి మాయమైపోతుంది కేథ్లీన్.

        
‘పట్టుదల’ లో ముందు కథ కొంత జోడించాడు దర్శకుడు. భార్యా భర్తలుగా అర్జున్- కాయల్ ల సంబంధాలు క్షీణించి వుంటాయి. దీని ఫ్లాష్ బ్యాక్ లో వాళ్ళ పరిచయం ప్రేమా పెళ్ళీ వగైరా వస్తాయి. పెళ్ళి తర్వాత అబార్షన్, వేరొకరితో తనకి ఎఫైర్ వుందని ఆమె చెప్పడం, విడాకులు కోరడం, విడాకులయ్యేదాకా పేరెంట్స్ దగ్గర వుంటాననడం, అర్జున్ ఆమెని తీసుకుని బయల్దేరడమూ ఈ జోడించిన కథలో వుంటాయి.

       
ఇలా ఇండియనైజ్ చేయడం అవసరమే. అయితే ఈ ఇండియనైజ్ చేసిన బ్యాక్ గ్రౌండ్ తో, కాయల్ తో ఇంటర్వెల్లో ఇచ్చిన మలుపుని అర్జున్ కి వ్యతిరేకంగా ఆమెని  నిలబెట్టి కథకి కొత్తదనాన్ని నింపొచ్చు.  ఇలా చేయలేదు.

2. ఏమిటి ఇంటర్వెల్ మలుపు?

    ఫస్టాఫ్ లో కాయల్ మీద ముందే పన్నిన కుట్ర ప్రకారం రక్షిత్, దీపికా, మైకేల్ ముఠా ఆమెని కిడ్నాప్ చేసి అర్జున్ దగ్గర డబ్బులాగడం గురించే ఈ కథ. 45వ నిమిషంలో కాయల్ మాయమవడంతో ప్లాట్ పాయింట్ 1 వచ్చి మిడిల్ 1 లో పడుతుంది కథ. కాన్ఫ్లిక్ట్ తో కూడిన ఈ సెగ్మెంట్ లో - మిడిల్ 1 కథ ఇంటర్వెల్ వరకూ కాయల్ ని అర్జున్  వెతుక్కోవడం గురించే వుంటుంది. ఇంటర్వెల్ లో కిడ్నాప్ గ్యాంగ్ దొరికిపోతారు- కాయల్ దొరకదు. ఈ ఇంటర్వెల్లో ఒరిజినల్లో లాగే బలమైన మలుపు వస్తుంది. దీన్ని దీపిక  రివీల్ చేస్తుంది- కాయల్ ని తాము కిడ్నాప్  చేయలేదని, ఇదంతా తమని కిరాయికి మాట్లాడుకుని కాయల్ ఆడుతున్న డ్రామేననీ-చెప్పి షాకిస్తుంది దీపిక!

        
అయితే ఈ మలుపుని ఇలాగే మనుగడలో వుంచి సెకెండాఫ్ నడపాల్సింది. ఇలా చేయలేదు. ఇంటర్వెల్ తర్వాత సెకండాఫ్ ప్రారంభించాక తాను చెప్పింది జోక్ అని కొట్టి పారేస్తుంది దీపిక. దీంతో ఇంటర్వెల్లో ఇది కాయల్  డ్రామా అంటూ  బ్రహ్మాండంగా చూపించిన సెటప్ ని - జోకుగా  చెప్పి పేఆఫ్ చేయడం -1997 నాటి కాలంలో ఒరిజినల్ కి చెల్లిందేమో గానీ ఇప్పుడు కాదు.

       
ఇలా చేశాక ఇక మిడిల్ 2 లో కథేముంటుంది- అదే కాయల్ ని వెతుక్కోవడం, అర్జున్ ఎనిమిది కోట్లు డబ్బు తెచ్చినా  రక్షిత్ గ్యాంగ్ కాయల్ ని  అప్పగించకపోవడం, అర్జున్ ఒక్కొక్కరి అంతూ చూస్తూ పోయి చివరికి కాయల్ ని కనుక్కోవడం ఇదే కథ!

       
ఇలా డెప్త్ లేకుండా ఫ్లాట్ గా సాగే ఫక్తు కిడ్నాప్ తతంగంతో ఈ సెకెండాఫ్ ఫస్టాఫ్ కంటే బలహీనంగా తయారయ్యింది. పైగా రక్షిత్- దీపికలు మానసిక రోగులని వాళ్ళ ఫ్లాష్ బ్యాక్ వేసి కథకి ఇంకింత నష్టం చేశారు. విలన్ పాత్రలకి ఇలాటి శాడ్ గా వుండే ఫ్లాష్ బ్యాకులేస్తే ఎవరికి సానుభూతి కలుగుతుంది? సెకండాఫ్ ని నిలబట్టే ఒక్క కీలకాంశం, కొత్త మలుపూ ఏదీ లేదు.

       
1997 లో సెల్ ఫోన్లు లేవు. కాబట్టి ఫోన్ చేసుకోవడానికి లాండ్ లైనే గతి. ఇప్పుడు  సెల్ ఫోన్లు వున్నాయి -కానీ సిగ్నల్స్ లేవన్నారు. అందుకని లాండ్ లైను కోసం వెళ్ళింది కాయల్ బాగానే వుంది- కానీ సెల్ ఫోన్ చేతిలో వున్న అర్జున్ రక్షిత్, దీపికలని, వాళ్ళ ట్రక్కునీ, దాని నెంబర్ ప్లేటునీ వీడియోతీసి కాయల్ నిచ్చి పంపి వుంటే ఇంత రభస జరిగేది కాదుగా?ఇంకోటేమిటంటే ఫస్టాఫ్ లో అర్జున్ ని పూర్తిగా పాసివ్ గా వుంచారు. ముఠా చేతిలో దెబ్బలు తింటాడే తప్ప ఎదురు తిరగడు. దీంతో అజిత్ లాంటి యాక్షన్ స్టార్ తో యాక్షన్ సీన్లే లేవు ఫస్టాఫ్ లో.

ఇంటర్వెల్ లో ఇది అర్జున్ మీద కాయల్ పన్నిన కుట్ర అన్నప్పుడు, ఆమె కుట్రగానే సెకండాఫ్ నడిపి వుంటే అర్జున్ ఎమోషన్స్, స్ట్రగుల్ ఎంత బలంగా వుండేవి? విడాకుల ప్రపోజల్ పెట్టిన కాయల్ ఇలా డబ్బు లాగుతోందా, ఎవరితోనో ఎఫైర్ వుందని అంది- ఆ ఎఫైర్ రక్షిత్, కిషోర్ వీళ్ళలో ఎవరితో....ఇలాటి అనుమానాలతో, సంఘర్షణతో, ఆమెని పట్టుకుని గట్టి బుద్ధి చెప్పాలన్న పట్టుదలతో అర్జున్ నడుచుకుని వుంటే- పతాక సన్నివేశాల్లో చివరికి ఆమె అమాయకురాలనీ, ఇదంతా ఆమెని వాడుకుని గ్యాంగ్ పాల్పడ్డ కుట్ర అనీ అప్పుడు తెలుసుకుంటే - ఎంతో కొంత బెటరయ్యేది ఈ రీమేక్!

1987 లో విడుదలైన ఫ్రెంచి మూవీ ‘ది వానిషింగ్’ ఇలాటిదే హీరోయిన్ ప్రయాణం మధ్యలో అదృశ్యమయ్యే కథ. అయితే ప్లాట్ పాయింట్ వన్ లో అదృశ్యమయ్యాక అదే రోజు జరిగి ముగిసే కథగా ఇది వుండదు. అదృశ్యమయ్యాక మూడేళ్ళు  గడిచిపోతాయి. హీరో ఇంకో గర్ల్ ఫ్రెండ్ తో వుంటాడు. అప్పుడు ఒక సైకో పిక్చర్ లోకి రావడంతో హీరోయిన్ మిస్సయిన మిస్టరీ తెలుసుకుంటూ సాగుతాడు హీరో...

‘పట్టుదల’ ని కూడా ఏకబిగిన 24 గంటలు సాగే కథగా - రియల్ టైమ్ ప్లాట్ గా గాకుండా, టైమ్ లాప్స్ తో రెగ్యులర్ సినిమాగా కథ కాలాన్ని పెంచి వుంటే- అజిత్ లాంటి పెద్ద స్టార్ కి సూటయ్యేది. 

—సికిందర్