రివ్యూ..

బాలయ్య వేసవి బ్యాంగ్ !

** నందమూరి బాలకృష్ణ, సోనల్ చౌహాన్, రాధికా ఆప్టే, జగపతిబాబు, బ్రహ్మానందం, సుమన్, జయప్రకాష్ రెడ్డి, రావురమేష్, చలపతిరావు, ఎల్బీ శ్రీరాం, సుహాసిని, కల్యాణి, హంసానందిని తదితరులు..

సంగీతం : దేవీశ్రీ ప్రసాద్,  ఛాయాగ్రహణం : సి. రాంప్రసాద్   కూర్పు : కోటగిరి వెంకటేశ్వర రావు  కళ : ఏఎస్ ప్రకాష్   యాక్షన్ : రాం- లక్ష్మణ్, కణల్ కన్నన్  మాటలు : ఎం. రత్నం

బ్యానర్ : వారాహి చలన చిత్రం- 14 రీల్స్ ఎంటర్ టైన్మెంట్

నిర్మాతలు : రాం ఆచంట, గోపి ఆచంట, అనిల్ సుంకర

రచన- దర్శకత్వం : బోయపాటి శీను

విడుదల : 28 మార్చి 2014     సెన్సార్ : ‘A’

***

వేసవికీ, ‘నందమూరి బాలకృష్ణ- బోయపాటి శీను’ ల కాంబినేషన్ కీ ఏదో బలమైన బాక్సాఫీసు బంధం ఉన్నట్టుంది. సరిగ్గా నాల్గేళ్ళ క్రితం 2010 వేసవిలో ఈ ఇద్దరి కాంబినేషన్ లో ‘సింహా’ ఎంత బలమైన హిట్ గా నిల్చిందో, అందుకేమాత్రం తీసిపోని విజయ ఢంకా మోగిస్తూ ఇప్పుడు ‘లెజెండ్’ వచ్చింది. మధ్యలో బోయపాటికి  ‘దమ్ము’తో శృంగభంగమైతే- ఈ సారి ఆ వైఫల్య కారణాన్ని హీరో మీదనుంచి విలన్ మీదికి తోస్తూ తప్పించుకో జూశాడు. దీంతో ‘లెజెండ్’ దంతా ఏకపక్ష గోడు అయ్యింది!

అసలే ఎన్నికల సమయంలో విడుదలౌతున్న ఈ సినిమా- బాలకృష్ణ ఇంటి పార్టీ కి ప్రచారంచేసిపెట్టే అస్త్రంగా రాబోతోందన్న ఊహాగానాల్ని పటాపంచలుచేస్తూ, ఫక్తు ఫ్యాక్షన్ మార్కు మరో ఫార్ములాగా మాత్రమే ఫ్యాన్స్ కోసం ‘సర్వాంగ సుందరంగా’ ముస్తాబయింది.

అడుగడుగునా భగభగ మండిపోతూ బాలకృష్ణ తన భుజాలమీద  ఒన్ మాన్ షోగా అవలీలగా మోసుకొచ్చి బాక్సాఫీసు ముంగిట పడేసిన ఈ హై వోల్టేజ్ యాక్షన్ థ్రిల్లర్ ఒక్కటి రుజువు చేసింది- బిగ్ స్టార్స్ కి ఇంతకంటే గత్యంతరం లేదు. గతం వైపే చూపు తప్ప వర్తమాన భవిష్యత్ కాలాల కొత్తదనంతో సంబంధం వుండదు. ఒక పాత  ఫ్యాక్షన్ ఫార్ములాలోంచి, రూపం మార్చి ఇంకో ఫ్యాక్షన్ ఫార్ములాని లాగే అనివార్య విన్యాసమే శ్రీరామరక్ష అయితే ఇందుకు తప్పుబట్టాల్సిందేమీ వుండదు. 

బాలకృష్ణ లోని శక్తివంతమైన నటుణ్ణి ఎలా బయటికి తీసి హిట్ కొట్టాలో  తెలుసుకోవాలంటే కేరాఫ్ అడ్రసుగా మారిన బోయపాటిని స్టడీ చేయాల్సిందే. ఇక బాలకృష్ణ ఉన్నంత కాలం బోయపాటీ, బోయపాటి ఉన్నంత కాలం బాలకృష్ణా ఉభయకుశలోపరిగా వుంటారనుకోవచ్చు వేసవికో ఫ్యాక్షన్ రీసైక్లింగ్ చేసుకుంటూ!

విశాఖ తీరాన ఫ్యాక్షన్ ఘరానా!

కర్నూలు నుంచి ఫ్యాక్షన్ తొడగొట్టి విశాఖపట్నంలో మకాం వేసే చిత్రణ అదేదో వర్తమాన రాజకీయ ముఖచిత్రంలా అన్పిస్తే అదిక్కడితో అంతమౌతుంది. మిగతా కథాకమామిషు అంతా పాతఫ్యాక్షన్ కాల్పనికమే. కర్నూలునుంచి పెళ్లి సంబంధానికి వైజాగ్ వచ్చి వెళ్తూ ఫ్యాక్షనిస్టు జితేంద్ర (జగపతిబాబు) పక్కూళ్ళో అనుకోకుండా ఓ రోడ్డుప్రమాదం చేసి అక్కడి పెద్ద మనిషి  (సుమన్) ముందు పంచాయితీకి హాజరవుతాడు. ఆ పెద్దమనిషి బాధితుడికి నష్టపరిహారమూ క్షమాపణా డిమాండ్ చేస్తాడు. మాట వినని జితేంద్ర కి లెంపకాయకూడా కొడతాడు. 

దీంతో ఈ వైజాగ్ లోనే మకాం వేసి ఆ పెద్దమనిషి కుటుంబాన్ని తుదముట్టిస్తానని ప్రతిన బూనుతాడు జితేంద్ర.

దరిమిలా ఆ పెద్దమనిషినీ, అతడి భార్య (సుహాసిని)నీ మట్టుబెట్టేస్తాడు జితేంద్ర. దీనికి రియాక్టయిన పెద్దమనిషి పెద్దకొడుకు జయదేవ్ (బాలకృష్ణ-1) జితేంద్ర తండ్రిని హతమార్చేస్తాడు. ఈ హత్యలు చూసి చలించిన నాయనమ్మ పెద్దమనవణ్ణి కుటుంబ బహిష్కారం గావించి, చిన్న మనవడు కృష్ణ (బాలకృష్ణ-2) ని లండన్ పంపించివేస్తుంది.

ఈ పూర్వకథ లోంచి వర్తమానానికొస్తే, కృష్ణ దుబాయిలో ప్రత్యక్షమౌతాడు. అక్కడ  స్నేహ (సోనల్ చౌహాన్) అనే మోడర్న్ గర్ల్ ని ప్రేమించి నానమ్మ కి పెళ్లి ప్రతిపాదన పంపుతాడు. పెళ్లి శత్రువు పొంచివున్న వైజాగ్ లో వద్దనీ, మేమంతా దుబాయ్ కేవచ్చి చేస్తామనీ నానమ్మ అంటుంది. కానీ కృష్ణ వెంటవుండే మాణిక్యం (బ్రహ్మానందం) ప్రోద్బలంతో వైజాగ్ కే చేరతాడు కృష్ణ స్నేహతో.

చేరగానే ఒక అన్యాయాన్ని ఎదుర్కొని జితేంద్ర ముఠా ని తంతాడు. దీంతో జితేంద్ర లో పాత  పగ మేల్కొని కృష్ణ పెళ్లి బృందం మీద దాడి చేస్తాడు. కృష్ణ సహా బృందమంతా ఇక హతమౌతారన్న క్షణాన అజ్ఞాతంగా వున్న జయదేవ్ ప్రచండంగా ఏతెంచి శత్రుసంహారం  గావిస్తాడు. జితేంద్ర తప్పించుకుంటాడు...ఇప్పుడు అజ్ఞాతంలో వున్న జయదేవ్ కథతో ఫ్లాష్ బ్యాక్ ప్రారంభమౌతుంది...

ఇక కుటుంబాన్ని జితేంద్ర బారినుంచి కాపాడే ఏకైక దిక్కుగా జయదేవ్ ఉంటాడు. ఓ పక్క బామ్మ ఛీత్కారాల్ని భరిస్తూ, మరదలి ప్రేమతో సతమతమౌతూ ఏకాకి జీవితం గడుపుతున్న అతను ఎన్ని అవమానాలు, అవాంతరాలూ ఎదురైనా కుటుంబ క్షేమాన్నే కాంక్షిస్తూ ఉద్యమిస్తూంటాడు...

బాలయ్య బాలయ్యా రాసుకుంటే...

ఇద్దరు బాలయ్యల బలాబలాల జుగల్బందీ ఇది. ఇందులో రెండో బాలయ్యది ప్రథమార్ధంలో ముగిసిపోయే రోమాంటిక్ పాత్రైతే, మొదటి బాలయ్యది ద్వితీయార్ధం పగ్గాలందుకునే  యాక్షన్ పాత్ర. ఈ యాక్షన్ బాలయ్య పాత్రే కథకి బలాన్నీ అర్ధాన్నీ చేకూరుస్తుంది. ఈ పాత్రలో బాలకృష్ణ నటనని ప్రేక్షకులు కళ్ళప్పగించి వీక్షిస్తారు. ఎందుకంటే ఇది వయసుకుకి తగ్గట్టున్న సీరియస్ పాత్ర. అదే ప్రథమార్ధమంతా రోమాంటిక్ బాలయ్యని ఆ వయసులో చూడలేక ఒకటే గగ్గోలు పెడతారు ప్రేక్షకులు. మొదటి పాటకి డాన్సులూ డ్రెస్సులూ అయితే మరీ ఎబ్బెట్టుగా కూడా వుంటాయి.

జయదేవ్ పాత్రకిచ్చిన గెటప్, డ్రెస్ సెన్స్, డైలాగులు, అంతర్గత-బహిర్గత సంఘర్షణల సమాహారంతో సమగ్ర పాత్రచిత్రణా ఈ సినిమాకి ప్రత్యేకాకర్షణలు. ద్వితీయార్ధంలో కామెడీ లేదనే విమర్శ అసంగతమైనది. బోయపాటి ఒక సీరియస్ ఆర్గ్యుమెంట్ తో ఆలోచనాత్మకంగా ప్రవేశించిన జయదేవ్ పాత్ర కోసం గాక, కామెడీ వైపు నిలబడి వుంటే మొత్తం అభాసయ్యేది.

జయదేవ్ పాత్రలో బాలకృష్ణ ని చూస్తే సమీప భవిష్యత్ లో ఏ యంగ్ స్టారూ ఆయన్ని బీట్ చేయలేడని రాసిచ్చేయొచ్చు. అసలు ఈ పాత్రే యంగ్ స్టార్స్ కి దుస్సాధ్యమైనది. యంగ్ స్టార్సే కాదు- తన సమకాలీనులు సైతం హిట్టివ్వలేని తరుణాన బాలకృష్ణ  ఇంకో విజయం సాధించాడు.

ఇక జగపతిబాబు ఈ సినిమాకి రెండో దన్ను. వయసుమళ్ళిన విలన్ గా అవతారమెత్తి తనలో ఇన్నాళ్ళూ బయల్పడని అసలుసిసలు నటుణ్ణి దృశ్యమానం చేశాడు. మోహంలో, కళ్ళల్లో ఆ కరుడుగట్టిన విలనీ ఎక్స్ ప్రెషన్స్ తెలుగు తెరకి ఇక హిందీ దుష్టనాయక అవసరాన్ని వేలెట్టి ప్రశ్నిస్తున్నట్టున్నాయి.

హీరోయిన్లిద్దర్లో సోనల్ చౌహాన్ అందాల ఆరబోతకి, రాధికా ఆప్టే సెంటిమెంట్ల పంటకీ ఉపయోగపడ్డారు. ఇతర తారాగణమంతా  ప్యాడింగ్ అవసరాలు తీరిస్తే, బ్రహ్మానందం కాసేపు వెర్బల్ కామెడీ చేసి తప్పుకున్నాడు.

సాంకేతికాలు సోసో...

అత్యధిక బడ్జెట్ కేటాయించి ఎంత కనువిందు చేసినా వీనులవిందు చేయలేకపోవడం ఒక లోటు. దేవీశ్రీప్రసాద్ సంగీతంలో పాటలు ఒక్కటీ క్యాచీగా లేవు. థియేటర్ లోంచి  బయటికొస్తే గుర్తుండవు. కానీ బ్యాక్ గ్రౌండ్ సంగీతం మాత్రం చెవులు పగిలే స్థాయిలో సమకూర్చాడు. ఈ హోరులో డీ టీ ఎస్ అనే శబ్దగ్రాహక కళ కకావికలమై పోయింది. ఇక అగ్రస్థాయి ఛాయాగ్రాహకుడు రాంప్రసాద్ కేమేరాపనితనం ఎంత ఉన్నతంగా వుందో, దాంతో పోటీపడుతూ ఏఎస్ ప్రకాష్ కళా దర్శకత్వం అంత ద్విగుణీ కృతమైంది. పోతే, యాక్షన్ కోరియోగ్రఫీలో రాం-లక్ష్మణ్, కణల్ కన్నన్ లు లాజిక్ ని తీసి అవతలపెట్టి గాలిలో చేసిన విన్యాసాలు ఇలాటి బిగ్ స్టార్ కమర్షియల్స్ కే నప్పుతాయని ఇంకోసారి రుజువుచేశాయి. కోటగిరి కూర్పు దర్శకుడు ఉద్దేశించిన కథన వేగాన్ని అందుకున్నట్టే వుంది.

ఎం. రత్నం రాసిన సంభాషణలు ఫ్యాన్స్ కి మంచి హుషారు. దర్శకుడుగా బోయపాటి శీను కమర్షియల్ గా బాలకృష్ణ ని ఆకాశాని కెత్తేస్తూ ప్రెజెంట్ చేయడంలో మరోసారి  సక్సెస్సయ్యాడు.

స్క్రీన్ ప్లే సంగతులు

గతంలో ఫ్యాక్షన్ సినిమాలు వెల్లువెత్తిన కాలంలో వేషం కట్టిన ‘ఇంటర్వెల్ తర్వాత ఫ్లాష్ బ్యాక్’ అనే ఓకే తరహా మూస స్క్రీన్ ప్లే తనాన్నే ‘లెజెండ్’ లో కూడా  చూడొచ్చు. నడుస్తున్న ప్రస్తుత కథ ఆగిపోయి, గతం తాలూకు ఫ్లాష్ బ్యాక్ కథ సుదీర్ఘంగా  క్లైమాక్స్ వరకూ సాగడం వల్ల – ఇంటర్వెల్ దగ్గర ఆగిపోయిన ప్రధాన కథ- అంటే  ప్రస్తుత కథ తాలూకు టెన్షన్ గ్రాఫ్ కూడా పతనమై చప్పబడిపోతుంది సినిమా. అంతేగాక ఇప్పుడు రెండో పాత్ర కథ కూడా మొదట్నించీ చూడాల్సి వస్తుంది. ఇలా మొదటిపాత్ర కథ ఫస్టాఫ్ లో, రెండో పాత్ర కథ సెకండాఫ్ లోనూ చూడ్డంతోనే సరిపోయి- క్లైమాక్స్ లో పిసరంత అసలు కథ చూస్తాం. అదీ తెలిసిపోయే కథగానే వుంటుంది. ఏమంటే దుష్టసంహారం గావించడమే హీరోకి మిగిలివుండే పిసరంత అసలు కథ.

ఎలాటి స్క్రీన్ ప్లే స్ట్రక్చర్ కీ, రొటీన్ మూస కథకీ అతీతంగా వ్యక్తిపూజ ఇమేజులతో  అలరారే స్టార్స్  మాత్రమే తమ భుజాలమీద ఇలాటి లోపభూయిష్ట రచనతో కూడిన సినిమాల్ని ఒన్ మాన్ షోగా లాక్కురాగలరు. కాకపోతే ఆ పాత్ర చిత్రణ ‘దమ్ము’ లో ఎన్టీఆర్ లా వుండకూడదు. వుంటే  అట్టర్ ఫ్లాపవుతుంది.  ‘దమ్ము’లో ఎన్టీఆర్ ది పసలేని పాసివ్ పాత్ర. విలన్ మత్రమే యాక్టివ్ క్యారక్టర్. హీరో ఎంతసేపూ రియాక్టివ్ గా తిరగబడుతూ అయ్యోపాపం అన్పించుకునే స్థితిలో దయనీయంగా ఉంటాడు. పైగా యుద్ధం కూడా చేయనంటాడు.

‘లెజెండ్’ లో హీరో ఒక లక్ష్యం కోసం నిత్యం రగిలిపోయే యాక్టివ్ పాత్రకావడం వల్ల –స్టార్ ఇమేజి కూడా తోడయ్యి బలహీన స్క్రీన్ ప్లే గండాన్ని దాటేసింది. అయితే దర్శకుడు ఎటుతిరిగీ పాసివ్ పాత్రల పట్ల మమకారం చంపుకోనట్టుంది. ‘దమ్ము’లో హీరో పాసివ్ గానూ, విలన్ ని యాక్టివ్ గానూ చూపించినట్టు- ‘లెజెండ్’ లో దీన్ని తిరగేసి విలన్ ని పాసివ్ చేసి, హీరోని యాక్టివ్ చేశాడు. దీంతో విలన్ గా వేసిన జగపతిబాబు పాత్ర రియాక్టివ్ గా పెడబొబ్బలు పెడుతూ చతికిలబడే బలహీనుడిగా మారిపోయింది. బలమైన విలన్ లేకపోవడంతో ఏకపక్షంగా హీరో గొడవే ఎంతసేపూ చూడాల్సిన మొనాటనీకి దారితీసిందీ సినిమా!

మానవాతీత  శక్తుల మెగా ఇమేజుడికి ఎదురెవరూ ఉండరని ఉద్దేశమేమో!

లాజిక్ కూడా బలాదూరవుతుంది. అన్నేళ్ళూ హీరో అజ్ఞాతంలో ఉండాల్సిన అవసరమేమిటి? ఎప్పుడో విలన్ కథ ముగించేసి వుండొచ్చు కదా? తన పగ కోసం కర్నూలు విలన్ వైజాగ్ వచ్చి పాగా వేస్తే , వైజాగ్ ని ఏలే వంశంలోని హీరో సీనులోంచి మాయమవడమేమిటి? ఇలాటి లాజిక్ ని పూర్వపక్షంజేసే అంశాలెన్నో అడుగడుగునా కన్పిస్తాయి.

-సికిందర్

రివ్యూ..

ఈ 'జర్నీ' దారితప్పింది!

విక్రం ప్రభు, సురభి, హరిరాజన్, వంశీకృష్ణ, గణేష్ వెంకట్రామన్ తదితరులు

సంగీతం : సి. సత్య        ఛాయాగ్రహణం : శక్తి    యాక్షన్:  రాజశేఖర్   కూర్పు : శ్రీకర్ ప్రసాద్ 

బ్యానర్ :  లక్ష్మి గణపతి ఫిలిమ్స్     నిర్మాత : సుబ్రహ్మణ్యం.బి 

రచన- దర్శకత్వం : శరవణన్. ఎం 

 విడుదల :  21 మార్చి, 2014 

***

2011లో రొటీన్ కమర్షియల్స్ నుంచి కాస్త ఆటవిడుపుగా  ‘జర్నీ’ అనే ప్రయోగాత్మక సినిమాతో ప్రతిష్టాత్మకంగా పరిచయమైన దర్శకుడు ఎం. శరవణన్- తిరిగి ఇప్పుడు ‘సిటిజన్’ అనే సోషియో థ్రిల్లర్ తో తెలుగు ప్రేక్షకుల్ని అలరిద్దామని విచ్చేశాడు. ఈ సినిమా తమిళంలో ‘ఇవన్ వేరమాతిరి’ [అతను ను డిఫరెంట్] గా గత డిసెంబర్ లో విడుదలయ్యింది. దివంగత మహానటుడు శివాజీ గణేశన్ మనవడైన విక్రం ప్రభుని  హీరోగా, కొత్తనటి సురభిని  హీరోయిన్ గానూ తీసుకుని శరవణన్ ఈ సినిమాని కొత్తఆలోచన- కొత్త స్క్రీన్ ప్లే- కొత్త ప్రయత్నం- ప్రతీదీ కొత్తే- నంటూ ప్రచారం చేసుకుంటూ అదృష్టాన్ని పరీక్షించుకోబోయాడు.  

‘జర్నీ’తో మొదలైన అతడి వెండితెర ప్రస్థానం అంతే  సాంఘీక  ప్రయోజనంతో, క్రాసోవర్ సినిమాల వైపే ఇకపైన కూడా కొనసాగుతుందని ఊహించి ఉన్నవారికి, ఈ తాజా నజరానా ఏమిచ్చిందని విషయంలోకి తొంగి చూస్తే- సంభ్రమాశ్చర్యాలు కలక్క మానదు- దటీజ్ శరవణన్ అన్నమాట!

న్యాయవిద్యలో అన్యాయపాలన

2008 లో దేశవ్యాప్తంగా సంచలనం సృష్టించిన చెన్నై అంబేద్కర్ న్యాయ కళాశాల హింసాత్మక ఉదంతాన్నిఐడియా గా తీసుకుని, యువతరం తమ చుట్టూ జరిగే అన్యాయాలకి స్పందించి ప్రతిఘటించాలంటూ అంతర్లీన సందేశాన్నిస్తూ మొదలౌతుందీ సోషియో థ్రిల్లర్.

ఆ న్యాయ కళాశాలలో మంత్రి కోటాకింద కేటాయించాల్సిన అభ్యర్ధుల జాబితాని న్యాయ శాఖా మంత్రి ఆదిశేషయ్య (హరి రాజన్ ) పంపిస్తే, ఆ అభ్యర్ధులందరూ క్రిమినల్ కేసులున్న వాళ్ళని తిరస్కరిస్తాడు ప్రిన్సిపాల్. దీంతో  ఆదిశేషయ్య కొందరు విద్యార్థుల్ని ఎగదోసి కళాశాలలో విధ్వంసం సృష్టిస్తాడు. ముగ్గురు విద్యార్థులు చనిపోతారు. పోలీసులతో బాటు ప్రజలూ  ఇదంతా మనకెందుకులే అని పట్టించుకోకుండా వెళ్ళిపోతారు. ఈ ఘోరాన్ని సహించలేకపోతాడు గుణశేఖర్ (విక్రం ప్రభు). బాధ్యుడికి శిక్ష పడాల్సిందేనని ఉద్యుక్తు డవుతాడు. ఇతను విజ్ కాం (విజువల్  కమ్యూనికేషన్స్ ) చదివిన నిరుద్యోగి. పక్కా ప్లాను వేసి ఆదిశేషయ్య తమ్ముడు ఈశ్వర్ (వంశీ కృష్ణ )ని కిడ్నాప్ చేసి ఓ నిర్మాణంలో వున్న భవనం టాయిలెట్లో బంధిస్తాడు.

ఈశ్వర్ ఆరు హత్యలు చేసి జైలుశిక్ష పడ్డ హంతకుడు. ఇటీవలే పదిహేను రోజులు పెరోల్ మీద విడుదలై వచ్చాడు. ఇతడ్ని కనపడకుండా చేస్తే, తిరిగి జైలు కెళ్ళకుండా ఆదిషేశయ్యే మాయం చేశాడన్న ఆరోపణ లెదుర్కొని మంత్రి పదవికి రాజీనామా చేస్తాడనీ, అదే అతడికి తగిన శిక్షవుతుందనీ గుణశేఖర్ అంచనా.

పెరోల్ గడువుతీరి తమ్ముడు కన్పించకపోవడంతో ఆదిశేషయ్య వేట మొదలెడతాడు. మరో వైపు ఈశ్వర్ ఉప్పందించడంతో ప్రతిపక్ష నాయకుడు గోలెడతాడు. తమ్ముడు దొరక్క ఆదిశేషయ్య రాజీనామా చేయాల్సి వస్తుంది. దీంతో తన ఆపరేషన్ పూర్తయి ఈశ్వర్ ని విడుదల చేసేస్తాడు గుణశేఖర్.

బయటపడ్డ ఈశ్వర్ తనని బంధించిన ‘గుర్తు తెలియని’ యువకుడ్ని పట్టుకునేందుకు తన వేట మొదలెడతాడు. ఇలా వుండగా, గుణశేఖర్ కి ఒకమ్మాయి మాలిని (సురభి) పరిచయమై ప్రేమలో కూడా పడుతుంది. గుణశేఖరే ఇంకా ఏ నిర్ణయమూ తీసుకోలేక పోతాడు. ఇంతలో ఆమె కన్పించకుండా పోతుంది....

ఇలా సాగే ఈ కథలో సాధారణ యువకుడి పాత్రలో హీరో విక్రం ప్రభు చాలా క్యాజువల్ గా కన్పిస్తాడు. అతడి రూపురేఖలు సాధారణ గల్లీ కుర్రాళ్ళని పోలి వుండడం కలిసివచ్చింది. ఎంత క్యాజువల్ గా కన్పిస్తాడో, యాక్షన్ సీన్లలో అంత విజృంభిస్తాడు. కొత్తనటి సురభి సైతం సాధారణ మధ్యతరగతి అమ్మాయి కి సరిపోయే హంగులతో వుంది. విలన్ గా వంశీ కృష్ణ  చాలా వయోలెంట్ గా కన్పిస్తాడు. ఆదిషేశయ్యగా హరిరాజన్, పోలీసు ఉన్నతాధికారిగా గణేష్ వెంకట్రామన్ కూడా ఫర్వాలేదు.

సంగీతానికీ, పాటలకీ పెద్దగా ప్రాధాన్యం లేదు అలాగే, యాక్షన్ డైరెక్ట్ రాజశేఖర్ సమకూర్చిన ఛేజింగ్స్, ఫైట్స్ అతి  హింసాత్మకంగా వున్నాయి. వీటికే భారీగా ఖర్చు పెట్టివుంటారు. శ్రీకర్ ప్రసాద్ ఎడిటింగ్ షార్ప్ గానే వుంది, అయితే అసలు విషయమే సరుకులేనిదిగా వుంది.

దర్శకుడు శరవణన్ ఏదో ఎత్తుకుని ఇంకేదో ఎత్తేశాడు. ఈ సినిమాతో అతను వాస్తవిక సినిమా, ప్రయోగాత్మక సినిమా అనే కమిట్ మెంట్ల నుంచి పలాయనం చిత్తగిస్తూ –బిగ్ స్టార్స్ దృష్టిలో పడాలన్న తపన పెంచుకుని- ఒక పాత మూస యాక్షన్ ఫార్ములా చుట్టేసి హమ్మయ్యా అనుకున్నాడు! ఇక ఎవరో సూపర్ స్టార్ నుంచి కాల్ రావడమే తరువాయి...

స్క్రీన్ ప్లే సంగతులు..

నిజానికి శరవణన్ కి వాస్తవిక సినిమా మీద అవగాహన లేనట్టే, యాక్షన్ సినిమా కూడా తీయడం రాదు. మొదటి సినిమా ‘జర్నీ ‘ తీసినప్పుడు అది పేపర్లో చదివిన  ఘోర రోడ్డు ప్రమాద వార్త అని తనే చెప్పుకున్నాడు. అలా హైవే ప్రమాదాల గురించి సందేశాన్ని అందించడమే తన ధ్యేయమని చెప్పాడు. మూడు జంటల ప్రేమాయణాన్ని అకస్మాత్తుగా చివర్న రోడ్డు ప్రమాదం పాల్జేసి –అక్కడ్నించీ రోడ్డు ప్రమాదాల మీద డాక్యుమెంటరీలా ఎత్తుకున్నాడు. సినిమా బాణీ మారిపోయింది, వరస మారిపోయింది. ఒక సినిమా స్క్రీన్ ప్లేకి చివర్లో న్యూస్ ఐటెం జోడించిన అక్రమంగా కళ తెలిసిన సినిమా జీవులు ఆక్రోశించేలా చేశాడు. 

రోడ్డు ప్రమాదాలు అనేది  నాన్ ఫిల్మిక్ థీం. అందుకే  దాన్ని సినిమా కథగా మల్చడంలో విఫలమయ్యాడు. మరి ఈ సినిమా ఎందుకు గుర్తుండి పోతుందంటే – ఇందులో అనితరసాధ్యంగా –మూస ఫార్ములా జోలికి పోకుండా- క్రాసోవర్ సినిమాని తలపిస్తూ -అత్యంత సహజ ధోరణిలో మూడు ప్రేమ కథల్ని సృష్టించ గల్గాడు గనుక!

ప్రస్తుత సినిమాలోనూ 2008 నాటి సంఘటనంటూ వాస్తవిక ధోరణిలో మొదలెట్టి, దానికి మూసఫార్ములా కథనం జోడించేసి- కొత్తఆలోచన- కొత్త స్క్రీన్ ప్లే- కొత్త ప్రయత్నం- ప్రతీదీ కొత్తే- నంటూ ప్రచారం చేసుకున్నాడు. ఈ చెప్పిన నాల్గు ‘కొత్తల్లో’ ఏదీ సినిమాలో జాడలేదు. నిజానికి 2008 నాటి ఆ నిజ సంఘటన కులాల పోరుకు సంబంధించింది. హిందీలో ప్రకాష్ ఝా కూడా ఇలాగే రిజర్వేషన్ సమస్య (1990 నాటి మండల్ కమిషన్ వ్యతిరేక ఉద్యమం) మీద కాలేజీ సినిమా (ఆరక్షణ్ -2011)అంటూ అగ్రవర్ణ పాత్రలో అమితాబ్ బచ్చన్ నీ, దళిత విద్యార్థి పాత్రలో సైఫలీ ఖాన్ నీ చూపించి- తీరాచూస్తే, ఆ సమస్య ఎలా చెప్పాలో తెలియనట్టు, కథ మధ్యలోనే వదిలేసి- ప్రైవేటు కాలేజీల అక్రమాలంటూ వేరే కథ ఎత్తుకుని సాగిపోయాడు!

శరవణన్ కూడా కులాల పోరు గురించి చెప్పలేకపోయినా, కనీసం ఆ ఎత్తుకున్న న్యాయ కళాశాలల్లో రాజకీయ జోక్యం పాయింటు నైనా ఆలోచనాత్మకంగా చర్చించి వుంటే ఒక మంచి సినిమా అయ్యేది.

పాయింటుకి వేరే తెలిసిన రొటీన్ యాక్షన్ ఫార్ములానే జోడించడంతో తను ‘జర్నీ’తో పొందిన మన్నన కూడా కోల్పోయాడు. సరే, ఈ మూస ఫార్ములా కూడా సవ్యంగా ఉందా అంటే ఇందులోనూ  హస్యాస్పదమైన గిమ్మిక్కులెన్నో!

కొత్త స్క్రీన్ ప్లే అన్నప్పుడు – హీరో లక్ష్యం ఇంటర్వెల్లోనే పూర్తవడం కొత్త స్క్రీన్ ప్లేనా?కొత్త స్క్రీన్ ప్లే అన్నప్పుడు – హీరో లక్ష్యం ఇంటర్వెల్లోనే పూర్తవడం కొత్త స్క్రీన్ ప్లేనా? అసలు స్క్రీన్ ప్లే అంటే ఏమిటో అదైనా తెల్సా? అసలంటూ రూల్స్ తెలిసి ఉంటేనే కదా ఆ రూల్స్ ని ఎలా బ్రేక్ చేసి  కొత్త ప్రయోగం చేయాలో తెలిసేది?

ఈ కథని మూడంకాల స్క్రీన్ ప్లే లో అమర్చి చూస్తే  ఇలా వుంటుంది : మొదటి పదిహేను నిమిషాల్లోనే కాలేజీ హింస, హీరో రియాక్షన్, కిడ్నాప్ జరిగిపోయి మొదటి అంకం ముగిసిపోతుంది, రెండో అంకంలో కిడ్నాపైన తమ్ముడి కోసం మంత్రి వేట, హీరోతో హీరోయిన్ ప్రేమాయణం,  మంత్రి  రాజీనామా, హీరో ఆశయం నెరవేరడం జరిగి ఇంటర్వెల్  వస్తుంది. ఇంటర్వెల్ తర్వాత ఇదే రెండో అంకం రెండో భాగంలో హీరో మీద పగ దీర్చుకోవడం కోసం విలన్ (మంత్రి తమ్ముడు) వేట, హీరోయిన్ కిడ్నాప్, హీరోయిన్ కోసం హీరో వెతుకులాట జరిగి, ఆమె ఎక్కడుందో కనుక్కోవడంతో రెండో అంకం ముగుస్తుంది. ఇక మూడో అంకం ప్రారంభమై హీరో విలన్లమధ్య ఫైట్, విలన్ ని చంపి హీరోయిన్ని హీరో పొందడంతో కథ ముగుస్తుంది.

సమస్యెక్కడ వచ్చిందంటే, ఇంటర్వెల్లో హీరో ఆశయం నెరవేరిపోవడంతో అక్కడే కథ ముగిసిపోయింది. సెకండాఫ్ లో హీరోకి అశయంలేదు, లక్ష్యంలేదు. అందుకే అతను కథలో బేకారుగా, పనిలేక ప్యాసివ్ గా వుంటున్నట్టు ఫీలింగ్ ఏర్పడి బోరుకోట్టడం ప్రారంభిస్తుంది. ఆశయమంతా సినిమా బాక్సాఫీసు విజయానికే ఆత్మహత్యా సదృశంగా, అసహజంగా విలన్ కే ఏర్పడ్డంతో- హీరోయిజం పూర్తిగా పక్కకు తప్పుకుంది. రెండోది, ఫస్టాఫ్ లో ఎలాటి కథైతే నడిచిందో, అదే సెకండాఫ్ లో రిపీటవుతుంది. కాకపోతే పాత్రలు తారుమారయ్యాయి. ఫస్టాఫ్ లో విలన్ ని హీరో కిడ్నాప్ చేసి మంత్రిని పరుగులు పెట్టిస్తే, సెకండాఫ్ లో విలన్ హీరోయిన్ని కిడ్నాప్ చేసి హీరోని పరుగులు పెట్టిస్తాడు...నఅలాగే దీన్ని (హీరోయిన్ని) నన్ను అడ్డం పెట్టుకుని అన్నయ్యని ఎలా దెబ్బ కొట్టాడో, అలాగే దీన్ని అడ్డం పెట్టుకుని వాణ్ణి దెబ్బ కొట్టాలి-అంటాడు విలన్. ఇది చాలా హాస్యాస్పదమైన కథా పథకం. ఫస్టాఫ్ కథనాన్నే సెకండాఫ్ లోనూ  చూపిస్తానంటే అదెలాటి కొత్తదనమున్న స్క్రీన్ ప్లేనో దర్శకుడికే తెలియాలి.

మూడోది, విలన్లకి (తండ్రీ కొడుకులకి) తమ ప్రత్యర్ధి ఎవరో చివరి వరకూ తెలీదు. క్లైమాక్స్ దాకా హీరో ముఖాముఖీ కానేకాడు. సాధారణ సూత్రాల ప్రకారం ముఖాముఖీ ఎప్పుడవుతారో అప్పట్నించే సినిమాలో అసలు కథ ప్రారంభ మైనట్టు లెక్క. ఈ సినిమాలో క్లైమాక్స్ లో నే ముఖాముఖీ అయ్యారు గనుక, ఇక్కడే అసలు కథ ప్రారంభ మయ్యిందనుకోవాలి. ఇలా మూడో అంకంలో కథ ప్రారంభం అయ్యిందంటే అంతవరకూ రెండో అంకం లేకుండా మొదటి అంకమే చాంతాడంత సాగిందన్నమాట. అప్పుడిది మిడిల్ మటాష్ స్క్రీన్ ప్లే అవుతుంది.  స్పీల్ బెర్గ్ మాటల్నే ఇక్కడా  ఉటంకించుకుంటే -

ఇదీ విషయం. ఇంకా చెప్పాలంటే ఇంటర్వెల్లో ముగిసి పోయిన కథని మళ్ళీ ఎత్తుకోవడమంటే, అది సినిమాలకి పనికిరాని స్టార్ట్ అండ్ స్టాప్ టెక్నిక్ కిందకొస్తుంది. ఎపిసోడ్లుగా సాగే టీవీ సీరియళ్ళకి పనికిరావొచ్చు. 2003లో నందమూరి హరికృష్ణ నటించిన ‘టైగర్ హరిశ్చంద్ర ప్రసాద్’ ఇలాగే స్టార్ట్ అండ్ స్టాప్ టెక్నిక్ బారిన పడి విడివిడి ఎపిసోడ్లుగా సాగి ఫ్లాపయ్యింది.

ఇక ఉన్న స్క్రీన్ ప్లే లోనే కథనం కూడా ఎలా వుందో ఒక్క శాంపిల్ చూస్తే  చాలు. విలన్ని బంధించి ఉంచిన టాయిలెట్ బయటే హీరో, హీరోయిన్ బ్యాంక్ ఎక్కౌంట్ నంబర్ అడిగి తెలుసుకుంటూ- లోపల విలన్ కి వినపడేలా గట్టిగా ఆ నంబర్ రిపీట్ చేస్తాడు. దర్శకుడు ఇలా ఎందుకు చేశాడంటే, తర్వాత ఆ  నంబర్ పట్టుకుని విలన్ హీరోయిన్ని పట్టుకునేందుకట!

అంత ప్రమాదకరమైన ఖైదీ అయిన విలన్ పెరోల్ మీద వచ్చి ఇంకో హత్య కూడా చేస్తాడు. అసలతడికి పెరోల్ దొరికే అవకాశం ఏకోశానా లేదు. మరీ తప్పదనుకుంటే కస్టడీ పెరోల్ లభించాలి. అంటే ఎస్కార్టుగా పోలీసులుంటారు. అదీ చాలా ఎమర్జెన్సీ విషయానికి  ఆరుగంటల పాటు మాత్రమే అమలయ్యే పెరోల్ గా లభిస్తుంది. అసలీ తమ్ముడు కన్పించకపోతే మంత్రి ఆయన అన్న ఎలా బాధ్యుడవుతాడో అంతుపట్టదు. తక్షణం  ఎందుకు రాజీనామా చేయాలో కూడా ఓ పట్టాన అర్ధంగాదు!

బందీగా ఉంచుకున్న విలన్ని పనిపూర్తయ్యాక హీరో ఇంటర్వెల్లో పోలీసులకి దొరికేలా చేయకుండా, ఊరిమీదికి వదిలేసి ప్రాణాల మీదికి తెచ్చుకోవడం- 'అతను డిఫరెంట్' అనడానికి నిదర్శనమేమో? 

-సికిందర్

ఎన్నికల సినిమాలకి ఎన్నెన్ని కళలో !

ఆటగాళ్ళ మధ్య ఆ ఇద్దరు..

ఈసారి ఎన్నికలు  ఎంత వేడి పుట్టిస్తున్నాయో ఎన్నికల సినిమాలూ అంతే హడావిడి చేస్తున్నాయి...2009 లో లేని సందడి  అంతా  ఈసారి పార్టీలు పెరిగిపోవడంతో- విపక్షాలు అనేకానేక అనైక్య ఎజెండాలతో తమలోతామే సిగపట్లకి సిద్ధపడ్డంతో- ఎన్నికల రణరంగం ఉత్కంఠ భరితంగా తయారై, రాజకీయ సినిమాలకి కావలసినంత మసాలా దినుసులు అందిస్తోంది -ఎక్కడో ఢిల్లీలో వుండే  ‘ఆమ్ ఆద్మీ’  అల్లరి లీడర్ కేజ్రీ వాల్ నుంచీ సైతం పిండుకోగల నవరసాల్నీ కూడా వదలకుండా!

మార్చి పదిహేడు హోలీ రోజున ఉన్నట్టుండీ ఫిలిం నగర్లో కొత్త సినిమా పోస్టర్లు వెలిశాయి. అచ్చం కేజ్రీవాల్ గెటప్ తో వున్న నటుడితో ‘క్రేజీవాలా’ అనే టైటిల్ ని మెరిపిస్తూ  క్రేజ్ సృష్టించాయా పోస్టర్లు. ఇప్పటికే వున్న ఎన్నికల సినిమాలకి తోడు ఇదొకటి తయారయ్యిందన్న మాట! పరీక్షగా చూస్తే ఆ ‘క్రేజీవాలా’ గా నటిస్తున్న నటుడెవరో కాదు-ప్రఖ్యాత కమెడియన్ ఎం. ఎస్. నారాయణ! కేజ్రీవాల్ ట్రేడ్ మార్క్ పార్టీ టోపీ, మఫ్లర్, స్వెట్టర్ లు ధరించి, కళ్ళద్దాలు పెట్టుకుని సాక్షాత్తూ కేజ్రీవాలే దిగివచ్చాడా అన్నంత అచ్చుగుద్దిన పోలికలతో ఎమ్మెస్ అవతరించడం హాట్ టాపిక్కే అయ్యింది!

రెండు పెద్ద సినిమాలతో బాటు ఎన్నికల సందేశాలు మోసుకొస్తున్న మరిన్ని చిన్న సినిమాల్లో నిశ్చయంగా ఎమ్మెస్ సినిమా ప్రత్యేకాకర్షణ అవుతుంది. రెండు పెద్ద సినిమాల రధసారధులు నందమూరి బాలకృష్ణ, మంచు మోహన్ బాబులు.

మున్సిపల్, జడ్పీ, అసెంబ్లీ, లోక్ సభ ఎన్నికలన్నీ ఒకే సారి కట్టగట్టుకుని వచ్చేసినట్టు, ఎన్నికల సినిమాలు కూడా పదమూడు వరకూ ఈ రెండు నెలల్లో  సొమ్ములు చేసుకునేందుకు స్పీడుగా దండు కట్టి వచ్చేస్తున్నాయి. ఎంత స్పీడుగానంటే, హోలీ నాడే [మార్చి 10] ప్రారంభమైన ‘క్రేజీవాలా’ నిర్మాణం పూర్తిచేసుకుని అప్పుడే ఏప్రిల్ మూడో వారానికల్లా ప్రేక్షకుల ముందుకు వాలిపోయే రికార్డంత! ఏప్రిల్ దాటితే ఈ సినిమాలకు విలువుండదు. మార్చి చివరివారం నుంచి ఏప్రిల్ ఆఖరు వరకూ నెలరోజుల్లో ఈ సినిమాలన్నీ విడుదలై పోతున్నాయి. ఇన్ని సినిమాలు చూసే వాళ్ళెవరంటారా? ‘ఎడ్యుకేషన్’ కోసం చూడాల్సిందే!

ఈ సారి ఎన్నికల సినిమాలు ఒకటో రెండో తప్పితే ఆయా పార్టీల ప్రచార సాధనాలుగా మాత్రం రావడం లేదు. కాస్త ఓటర్లని జాగృత పర్చే సదాశయంతో వస్తున్నాయి. ఇది కొత్త మార్పు. గతంలో ఒకపార్టీ నాయకుడికి వ్యతిరేకంగా ఇంకో పార్టీ సానుభూతిపరులు వ్యంగ్య బాణాలతో నూన్యత పర్చే సినిమాలు తీసేవాళ్ళు. ఇప్పుడలాకాదు. ఇప్పుడు ఎన్నికలకి మిశ్రమ నేపధ్యం ఏర్పడింది. విభజన మీద ఒకరైతే -అభివృద్ధి  మీద మరొకరు, సమైక్యం మీద ఇంకొకరు, విలీనమ్మీద, అవినీతి మీద, రాజన్న రాజ్యం మీద, కాంగ్రెస్ హటావో మీద తలా ఒకరూ...ఇలా బెత్తం పుచ్చుకుని  ఓటర్లకి పాఠాలు చెప్పడానికి రకరకాలుగా బయల్దేరినప్పుడు, సినిమాలూ తక్కువేం తిన్లేదు. ఎన్నికల సినిమా అంటే  పాత మూస నుంచి కొంచెం తేడాగా అవీ ఓటర్ల పట్ల సామాజిక ధర్మం నెరవేర్చడానికి వేం చేస్తున్నాయి.

మొత్తం పదమూడు  ఇలాటి  సినిమాలు ఇంతవరకూ లెక్కలో కొచ్చాయి. లెజెండ్, రౌడీ, ఆటోనగర్ సూర్య, ప్రతిఘటన, ప్రభంజనం, ప్రతినిధి, వైఎస్సార్, జై రాజశేఖరా, జగన్నాయకుడు, రాజ్యాధికారం, గీత, ఆ  ఐదుగురు, క్రేజీవాలా...ఇవన్నీఈ నెలరోజుల్లో విడుదలవుతున్నాయి. ఇవే కాక రేసుగుర్రం, రభస, మనం, జండాపై కపిరాజు, అనామిక, చందమామ కథలు, ఐ, విశ్వరూపం -2, తను మొన్నే వెళ్ళిపోయింది..మొదలైన అగ్ర హీరో హీరోయిన్ల, దర్శకుల సినిమాలెన్నో మార్చి చివరి వారం నుంచీ ఏప్రిల్ చివరి  వారం మధ్య విడుదల కాబోతున్నాయి. వీటితో పై ఎన్నికల సినిమాలు ఢీ కొని నిలబడ గల్గేవి బాలకృష్ణ ‘లెజెండ్’, మోహన్ బాబు ‘రౌడీ’, నాగచైతన్య ‘ఆటోనగర్ సూర్య’ లాంటి పెద్ద సినిమాలే కన్పిస్తున్నాయి.

ఏ సినిమా కథాకమామిషేమిటో ఈ క్రింద చూద్దాం..

ఓటర్ని కాదు, షూటర్ని!

నందమూరి బాలకృష్ణ...’లెజెండ్’...మరోసారి ‘సింహా’ ఫేం బోయపాటి శ్రీను దర్శకత్వంలో నటిస్తూ ఎన్నికల మంటల్లో, వేసవి కాష్ఠంలో  హైపర్ ఎమోషనల్ డైలాగుల ఆజ్యం పోయడానికి సిద్ధమైపోయారు. నువ్వు భయపెడితే భయపడ్డానికి ఓటర్ని అనుకున్నావ్ బే-షూటర్ని! కాల్చి పారేస్తా నాకొడకా.....సీటు కాదు కదా  అసెంబ్లీ గేటు కూడా దాట నివ్వను...నాకు ఒక బ్యాడ్ హేబిట్టుంది, లైఫ్ లో కొన్నింటిని చూడకూడదు, వినకూడదు అనుకుంటా, పొరపాటున అవి నా కంటికి కన్పించినా, చెవికి విన్పించినా టెంపర్ లేచుద్ది... రాజకీయం నీ ఫుడ్డులో ఉంది, నువ్వు పడుకునే బెడ్డులో ఉంది,  కానీ అది నా బ్లడ్డులోనే ఉందిరా బ్లడీ ఫూల్!...వంటి తూటాల్లాంటి డైలాగులతో ఎన్నికల్ని  టార్గెట్ చేస్తూ బాక్సాఫీసు బరిలోకి దూకారు. ఈసారి ఎన్నికల్లో పోటీచేసే ఉద్దేశంతోనే  ఇలాటి సన్నివేశాల్ని, సంభాషణల్నీ రాజకీయ ప్రత్యర్ధుల్ని దృష్టిలో పెట్టుకునే  రూపొందించినట్టు తెలుస్తోంది. ఐతే పార్టీ అధ్యక్షుడు నారా చంద్రబాబు నాయుడు ఎన్నికల్లో బాలయ్యని నిలబెడతారా లేక పార్టీ ప్రచారానికే ఉపయోగించుకుంటారా అన్నది తేలాల్సి వుంది.

విడుదలకి ముందే ఈ సినిమా సృష్టిస్తున్న సంచలం దృష్ట్యా బిజినెస్ ఇదివరకు ఏ బాలయ్య సినిమాలకీ జరగని రేంజిలో [45 కోట్లు] జరిగిందనీ, కాదు ఈ సినిమా నిర్మించిన 14 రీల్స్ సంస్థే ‘నేనొక్కడినే’ తో బయ్యర్లకి భారీ నష్టాలు మిగల్చడంతో  వాళ్ళు అడ్వాన్సులు అంతంత మాత్రమే ఇచ్చారనీ చెప్పుకుంటున్నారు. 14 రీల్స్ బ్యానరుపై సాయి కొర్రపాటి నిర్మించిన ఈ భారీ కమర్షియల్ లో బాలయ్యకి హీరోయిన్లుగా రాధికా ఆప్టే, సోనల్ చౌహాన్ లు నటించారు. ప్రత్యేక పాత్రలో విలన్ గా జగపతి బాబు నటించారు.  ప్రప్రథమంగా బాలయ్య సినిమాకి దేవీశ్రీ  ప్రసాద్ సంగీతం అందించారు.

ఈ సినిమానే ఒక రాజకీయ వ్యూహంతో నిర్మించారని అంటున్నారు. బాలకృష్ణ ఎన్నికల్లో నిలబడే మాటెలా వున్నా, చంద్రబాబు అధికారంలోకి రావడానికీ, అటు కేంద్రంలో చక్రం తిప్పడానికీ ఈ సినిమా ఓ మెట్టులా ఉపయోగపడేలా, పార్టీ కార్యకర్తల్లో ఆత్మ స్థైర్యం నింపేలా ఉండాలనీ ప్లాన్ చేసినట్టు నిర్మాణ సంస్థ వర్గాలు వివరిస్తున్నాయి. ఇక నోట్లతో బాటు ఎన్ని ఓట్లు ఈ సినిమా కురిపిస్తుందో వేచిచూడాల్సిందే. నోట్ల లెక్క విడుదలవ్వగానే తెలిసిపోయినా, ఓట్ల పంట కోసం మాత్రం మే రెండో వారం దాకా  ఊపిరి బిగబట్టి ఎదురు చూడాల్సిందే.

రౌడీ గారి ఆగమనం!

రాంగోపాల్ వర్మ దర్శకత్వంలో మోహన్ బాబు- విష్ణు నటించిన ‘రౌడీ’ నిజంగా ఎన్నికలని దృష్టిలో పెట్టుకుని తీయకపోయినా, దీని హంగుల దృష్ట్యా ఎన్నికల  సినిమా-  పోనీ రాజకీయ సినిమాగానే చూడాల్సి వుంది. ‘లెజెండ్’ లాగా ఈ సినిమా వివరాలు బయటికి రాకున్నా, టీజర్స్ ని చూస్తే  మోహన్ బాబు పవర్ఫుల్ డైలాగుల సినిమా ఇదని తెలుస్తోంది. 18 రోజుల అతితక్కువకాలంలో నిర్మాణం పూర్తి చేసుకున్న ఈ పొలిటికల్ థ్రిల్లర్ షూటింగ్ రాయలసీమ ప్రాంతంలో జరగడాన్ని బట్టి, దీనికి ఫ్యాక్షన్ నేపధ్యమే వుండొచ్చు. చాలాకాలం తర్వాత మోహన్ బాబుతో కలిసి జయసుధ నటించారు. సాయి  కార్తీక్ సంగీత దర్శకుడు. ఏవీ పిక్చర్స్ బ్యానర్ పై పార్థ సారధి, గజేంద్ర, విజయకుమార్ లు నిర్మించారు.

నిర్మాతలు చెప్పిందాన్నిబట్టి మోహన్ బాబు కి ఈ సినిమా ‘పెదరాయుడు’, ‘రాయసీమ రామన్న చౌదరి’ లకంటే శక్తివంతమైన సినిమా అవుతుంది. ఇప్పటికే రెండు భాగాల ఫ్యాక్షన్ సినిమా ‘రక్తచరిత్ర’ తీసివున్న వర్మ ఈ తాజా రాజకీయ థ్రిల్లర్ లో ఏ అంశాన్ని స్పృశించారో మరికొద్ది రోజుల్లో తెలిసిపోతుంది.

మాటకుమాట-దెబ్బకుదెబ్బ!

నాపేరు సూర్య..ఆటోనగర్ సూర్య..నా ప్రపంచంలో మాటకుమాట, దెబ్బకుదెబ్బే సమాధానం. ఇంకా నా క్యాస్ట్ ఏంటో మీకు అర్ధం కాలేదు కదూ ?...నాది మోటార్ క్యాస్ట్..మనిషి బరువుని, బాధని మోసుకెళ్ళే క్యాస్ట్... అంటూ రాబోతున్నాడు నాగ చైతన్య ‘ఆటోనగర్ సూర్య’తో. ఇది విజయవాడ రాజకీయాల రభస. మీరు ఓకే అంటే ఒక రాధ, ఒక రంగా, ఒక నెహ్రూలాగా ఎదుగుతారు... అనే డైలాగు కూడా ఈ సినిమాలో వుంది. ఎంతోకాలంగా విడుదల వాయిదాలు పడుతూ వస్తున్న ఈ దేవకట్టా సినిమాలో డైలాగులు లీకు కాకుండా ఎంతకాలం ఆగుతాయి? రాధా  రంగాలతో ముడిపెట్టి దేవినేని నెహ్రూ పేరుని ప్రస్తావించడం వివాదం రేపవచ్చని ఫిలిం నగర్ భోగట్టా. ఇది ఎలాటి ఎన్నికల సందేశాలూ ఇవ్వకపోవచ్చు, కానీ తెలిసిన ఒకప్పటి బెజవాడ హత్యారాజకీయాల్నే చిత్రించడంతో-ఎన్నికల సమయంలో తనదైన పంథాలో వేడి పుట్టించ వచ్చు.

సమంతా హీరోయిన్ గా నటించిన ఈ సినిమాలో మరొక హీరోయిన్ రకుల్ ప్రీత్ సింగ్. సంగీతం అనూప్ రూబెన్స్. నష్టాల్లో వున్న ఆర్ ఆర్ మూవీ మేకర్స్ బ్యానర్ పై కె. అచ్చిరెడ్డి, డా. వెంకట్ లు ఈ రాజకీయ థ్రిల్లర్ ని నిర్మించారు.

పై మూడు సినిమాలూ ప్రధానమైతే వీటిలో రెండే –లెజెండ్, రౌడీ-మిగతా అన్ని ఎన్నికల సినిమాలకి సవాలు విసురుతాయి. ఆటలో ఎంతమంది వున్నా బాలయ్య , మోహన్ బాబులే విజేతలుగా నిలుస్తారు. వీళ్ళిద్దరి సినిమాలే ఎన్నికల రణరంగంలో సొమ్ములు చేసుకుంటాయి.

చిన్న సినిమాల పెద్ద సందేశాలు!

ఇక ఎన్నికల చిన్న సినిమాలు పెద్ద సందేశాలే మోసుకొస్తున్నాయి. ఒక్కోటి ఒక్కో అంశాన్ని స్పృశించాయి. వీటిలో ఎక్కువగా ప్రచారం పొందుతున్నది తమ్మారెడ్డి భరద్వాజా దర్శకత్వంలో ఛార్మీ నటించిన ‘ప్రతిఘటన’. ఢిల్లీ నిర్భయ కేసునే ప్రస్తుత రాజకీయాలతో మేళవించి తీశారు. స్త్రీలమీద జరుగుతున్న అత్యాచారాల్ని  నేపధ్యంగా తెసుకుని, రాజకీయ వ్యవస్థని చూపిస్తూ, మనుషులు మారితేనే సమాజం, నాయకులూ మారతారని చెబుతూ ఈ సినిమా తీశామని భరద్వాజ ప్రకటించారు. ఛార్మీ జర్నలిస్టుగా నటిస్తే, రేష్మా రేప్ బాధితురాలిగా నటించింది. ఎం.ఎం. కీరవాణి సంగీతం, ఎస్. గోపాల రెడ్డి ఛాయా గ్రహణం వహించిన ఈ సినిమాని చరిత చిత్ర పతాకం మీద ఆరేళ్ళ విరామం తర్వాత  దర్శకుడు భరద్వాజా నిర్మించారు.

ఇందులో ఒక విశేషం ఛార్మీ, కీరవాణి, గోపాలరెడ్డి ముగ్గురూ పారితోషికం తీసుకోకుండా పనిచేయడం. కథ అంతగా కదిలించడమే కారణం. ఇంకో విశేషం కాస్త సమకాలీన రాజకీయ రంగులు పులుముతూ చిరంజీవి రాజకీయ జీవితంమీద సన్నివేశాలు చేర్చడం. ఇవింకా గాసిప్సే. నిజమెంతో సినిమా విడుదలైతే గానీ తెలియనంత గోప్యాన్ని పాటిస్తున్నారు యూనిట్ సభ్యులు. 

తమిళ నటుడు అజ్మల్, సందేశ్, శ్రీ ఐరా, నక్షా శెట్టీ లు నటించిన ‘ప్రభంజనం- పేబ్యాక్ టు సొసైటీ’ అనే సామాజికార్ధి కాంశాల్ని చర్చించే సినిమాకి దర్శకుడు-నిర్మాత వి.  భాస్కర్రావు. చైతన్య ఆర్ట్ క్రియేషన్స్ ఈయన స్థాపించిన సంస్థ. స్వాతంత్ర్యానంతరం దేశం సామాజిక, ఆర్ధిక వ్యవస్థ ఎలా వుంది, వీటిపై రాజకీయ వ్యవస్థ ప్రభావం ఎలావుందీ  అన్నవి ఈ సినిమా విశ్లేషిస్తుందని భాస్కర్రావు చెప్పారు. దీనికి సంగీతం ఆర్.పి. పట్నాయక్. కథ నచ్చి సిరివెన్నెల సీతారామ శాస్త్రి ఐదు పాటలు రాశారు. అజ్మల్ ఇందులో ఓటర్లలో చైతన్యం తెసుకువచ్చే గుడ్ సీఎం గా నటిస్తున్నాడు. ఇంకా గొల్లపూడి, కోట, నాజర్, నాగేంద్ర బాబు, జయప్రకాశ్ రెడ్డి తదితరులు నటిస్తున్నారు.

గతంలో ‘ఆ నలుగురు’, ‘వినాయకుడు’ అనే సినిమాలు తీసిన ప్రేం మూవీస్ ప్రైవేట్ లిమిటెడ్ అధినేత ప్రేమ్ కుమార్ పట్రా ఇన్నాళ్ళకు ‘ఆ ఐదుగురు- అతడే సీఎం ’ అనే ఎన్నికల సినిమా తీస్తున్నారు. సత్యం, మార్గం, లక్ష్యం, నమ్మకం, సమాధానం అనే ఆయుధాల్ని నమ్మి ఓ ఐదుగురు యువకులు సమాజాన్ని మార్చిన విధం ఇందులో చూపిస్తున్నారు. తనిష్, క్రాంతి, క్రాంతి కుమార్, కృష్ణ తేజ, శాశికాంత్ లు అ ఐదుగురు యువకులుగా నటించారు. ఇతర పాత్రల్లో పోసాని, నాగినీడు, బాబూ మోహన్, ఫిష్ వెంకట్ లు నటించారు.  దీనికి సుద్దాల అశోక్ తేజ పాటలు రాయడమేగాక, తొలిసారిగా మాటలు రాశారు. ‘మంత్ర’ ఆనంద్ సంగీతం సమకూర్చారు.

 ఇక -18 సంవత్సరాల వయసులో ప్రేమించి పెళ్లి చేసుకుంటే జేవితం పాడయిపోతుందని అందరూ అంటారు, అదే 18 సంవత్సరాల వయసులో ఓటేస్తే ప్రభుత్వం పాడయి పోతుందని ఎవరూ అడగరే...అడగడానికే వస్తున్నా, వస్తున్నా... అనే  నారా రోహిత్ డైలాగులతో విడుదలైన టీజర్ కూడా ఆసక్తి రేపుతోంది

 

ఈరోజుల్లో రూపాయికే విలువ లేదు, ఇక పైసల్ని పట్టించుకునేదెవరు? కానీ ఈ హీరో అలాకాదు, కేవలం ఎనభై నాల్గు పైసలకోసం ఎకంగా ముఖ్యమంత్రినే కిడ్నాప్ చేస్తాడు. యంత్రాంగాన్ని తన కాళ్ళ దగ్గరికి తీసుకొస్తాడు. ఇలా ప్రస్తుత రాజకీయాలు సగటు మనిషి జీవితాన్ని ఎలా మారుస్తున్నాయో ఈ సినిమా ద్వారా చూపిస్తున్నామని నిర్మాత జె. సాంబశివరావు తెలియజేస్తున్నారు. ప్రజా శ్రేయస్సుని కాంక్షించే సిసలైన ప్రజా ప్రతినిధి ఎలా వుండాలో ఈ సినిమాలో చూపిస్తున్నట్టు దర్శకుడు ప్రశాంత్ మండవ అంటున్నారు. ఇందులో నారా రోహిత్ కి జంటగా శుభ్రా అయ్యప్ప నటిస్తోంది. సంగీతం సాయి కార్తీక్, బ్యానర్ సుధా మూవీస్.

వేద ఆర్ట్స్ బ్యానర్ మీద  కొమ్మి కౌశల్యాదేవి నిర్మిస్తున్న సందేశాత్మక  ‘గీత- దమ్మున్న సినిమా’ ’ చలన చిత్రంలో  హీరో హీరోయిన్లుగా నవకేష్, ఆకాంక్ష నటించారు. వామపక్ష భావజాలంతో సినిమా రంగంలో అడుగుపెట్టిన దర్శకుడు రామారావు ఏలేటి –భగవద్గీత, విప్లవ గీతాల సమ్మేళనంగా ఈ సినిమా తీసినట్టు చెబుతున్నారు.  బడుగు, బలహీన వర్గాల వారు ఎదుర్కొంటున్న సమస్యల్ని  ప్రతిబింబించేలా ఉంటుందిట. సమాజంలో దుర్మార్గుల్ని  వేదాల్లోని  అంశాలతో ఎలా నిర్మూలించవచ్చనేది ఇందులో చూపిస్తున్నారు. దీనికి పద్మ నావ్ టి. సంగీతం.

ఇకపోతే ఈ సందడిలో ఆర్. నారాయణ మూర్తి గురించి చెప్పుకోకపోతే బావుండదు. ఇది ఆయన వుండి తీరాల్సిన సందర్భం.  సొంత  'స్నేహాచిత్ర పిక్చర్స్‌' బ్యానర్‌ మీద దర్శకత్వం వహిస్తున్న  'రాజ్యాధికారం' సినిమా ఈ ఎన్నికల సీజన్లో ఇంకో ఎంట్రీ. రాజ్యాధి కారం మీద పెత్తనం చెలాయిస్తే పర్యవ సానాలెలా ఉంటాయో ఈ సినిమా ద్వారా ఆయన చెప్పబోతున్నారు. . ఓటు బ్యాంకు రాజకీయాల్ని కూడా ఎండగట్ట బోతున్నారు. డబ్బుని ఎరగా వేసి అధికారం  కొనుక్కుని నాయకులు రాజ్యా లేలుతున్నారన్నారనీ, మరోపక్క ఎంతో చిత్తశుద్దితో రాజకీయాలు చేసిన అనేకమంది మహానేతలు ప్రజలకోసం సర్వస్వం త్యాగం చేశారనీ - ఈ తేడాని తన సినిమాలో చూపిస్తున్నట్టు నారాయణమూర్తి చెబుతున్నారు. అంతేకాదు, దేశ సంస్కృతికి పట్టుగొమ్మలైన పల్లెసీమల్లో నేతలనబడే వాళ్ళు వైషమ్యాలు రేపుతున్నారనీ, ఎన్నికలతర్వాత తమదారి తాము చూసుకుని ఓటర్లని ఘోరంగా మోసం చేస్తున్నారనీ, అలాంటి నాయకులకి ఓటుతో బుద్ధి చెప్పి ప్రజాస్వామ్యాన్ని ఎలా కాపాడుకోవాలో తెలియజేయడానికి తమ ‘రాజ్యాధికారం’ సినిమా తోడ్పడుతుందని వివరిస్తున్నారు.

ఇక దివంగత నాయకుడు డా. వై.ఎస్. రాజశేఖర  రెడ్డి  జీవితంమీద రెండు సినిమాలు రాబోతున్నాయి- ‘జై రాజశేఖరా-  -- దేవుడుకాని దేవుడు’ , ‘వై ఎస్సార్’  అనేవి.  ‘జై రాజశేఖరా - దేవుడు కాని దేవుడు’ లో  వైఎస్సార్ గా  సుమన్ నటిస్తున్నారు. ఎం.సుబ్బారెడ్డి దర్శకుడు. సత్యదేవా ఆర్ట్ ప్రొడక్షన్స్ బ్యానరు ద్వారా అప్పారావు నిర్మాత. ఈ సినిమాలో వైఎస్సార్ చేవెళ్ల నుంచి ఇచ్ఛాపురం వరకూ  జరిపిన పాదయాత్ర  ప్రత్యేకా కర్షణగా ఉంటుందిట. ముఖ్యమంత్రిగా ఆయన ప్రవేశపెట్టిన సంక్షేమ పథకాలు, వాటి వల్ల లబ్ధి పొందిన ప్రజలు, వారి అభిప్రాయాలు ఇందులో  కీలకం కానున్నాయట. రాజమండ్రి నుంచి వైఎస్‌ఆర్ పాదయాత్రలో ప్రత్యక్షంగా పాల్గొన్నాను. అద్భుతమైన పాలన అందించి దేవుడు కాని దేవుడిగా ప్రజల గుండెల్లో నిలిచారాయన. 40 రోజులు ఏకధాటిగా చిత్రీకరణ జరిపి ఎన్నికల కంటే ముందే ఈ సినిమాని విడుదల చేస్తామని నిర్మాత అప్పారావు అంటున్నారు. ఒక మహామనిషి కథను తెరకెక్కించే అవకాశం ఇతర పాత్రల్లో జయసుధ, రమ్యకృష్ణ, రోజా, కవిత నటిస్తున్నారు.

రాజా, మమతా రాహుల్, శిరీష ప్రధాన తారాగణంగా విజయాంజనేయ ప్రొడక్షన్స్ బ్యానర్ మీద  ప్రముఖ అలనాటి దర్శకుడు పి.చంద్రశేఖర్‌రెడ్డి దర్శకత్వంలో వి.ఎ.పద్మనాభరెడ్డి  ‘జగన్నాయకుడు’ అనే సినిమాకి శ్రీకారం చుట్టారు. మూడు తరాల కథతో తీస్తున్న ఈ సినిమాలో  తాతగా, గ్రామ పెద్దగా రంగనాధ్ నటిస్తున్నారు. పేదలకోసం పాటుపడే డాక్టర్ గా , ముఖ్యమంత్రిగా ఎదిగే కొడుకు పాత్రలో భానుచందర్ కన్పిస్తారు. ఈయన  కుమారుడిగా నటిస్తున్న హీరో రాజా,  వ్యాపారవేత్తగా పైకొచ్చి ముఖ్యమంత్రి స్థాయికి ఎలా చేరుకున్నాడన్నది అసలు కథగా వుంటుంది.

చివరిగా ...తాజా సంచలనం ‘క్రేజీవాలా’ గురించి చెప్పుకోవాల్సి వస్తే, యంఎస్‌.నారాయణ ప్రధాన పోషిస్తున్న ఈ సినిమాని సౌండ్‌ ఎన్‌ క్లాప్స్‌ సంస్థాధినేత జివిజయకుమార్‌గౌడ్‌ నిర్మిస్తున్నారు.   మోహన్‌ ప్రసాద్‌ దర్శకత్వం. ఇది పూర్తిగా రాజకీయ సినిమానే అయినా  రాజకీయాలమీద  విమర్శకాదనీ, వ్యంగ్యాస్త్రం గానీ కాదనీ, కేవలం ఉన్నదున్నట్టు రాజకీయాలని  ప్రస్తావించే సినిమా మాత్రమేనీ దర్శకుడు అంటున్నారు. 

అసలు రాజ్యాంగం అంటే ఏమిటి, దేనిప్రాతిపదికన రాజ్యాంగం ఉంది, దాన్ని ఎలా ఉపయోగించుకుంటే పాలన సక్రమంగా ఉంటుంది, ప్రస్తుత పరిస్థితులు ఎలా వున్నాయి, ఎలాంటి మార్పు రావాలి...అనే అంశాలతో ఎన్నికల ముందు ఓటర్లకి  అవగాహన కల్పించడానికి తెరకెక్కిస్తున్నట్టు చెబుతున్నారు.  నిజాయితీతో తీస్తున్న ఇందులో రఘుపతిరాఘవరాజారాం అనే పాత్రని పరుచూరి గోపాలకృష్ణగారు పోషిస్తున్నారు. ఇంకా ఇతర పాత్రల్లో నాగబాబు, షఫి, ఖడ్గం పృథ్విరాజ్‌, గౌతరరాజు, ఉత్తేజ్‌ నటిస్తున్నారు. సంగీతం సునీల్‌ కశ్యప్‌.

నెలరోజుల్లో ఈ పదమూడు సినిమాల్లో  పండగ చేసుకునేవి ఎన్ని, దండగయ్యేవి ఎన్ని అనేవి త్వరలో తేలిపోతుంది. ఒకటి మాత్రం నిశ్చయం- ఓటరు తెలివైన వాడు. ఎవరో  చైతన్యం తీసుకురావాల్సిన అగత్యం లేదు. ఓటేవరికి వేయాలో, ఎందుకు వేయాలో అతడికి బాగా తెలుసు. అతడి అంతరంగాన్ని కనిపెట్టడం ఎవరికీ సాధ్యమయ్యేది కాదు. ఇలాటి సినిమాల్ని సరాదాగా చూసేస్తాడు తప్పితే,  వీటినిబట్టి మారడు గాక మారడు. అసలీ సినిమాలు చూడలా వద్దా అనేది కూడా అతడికి మాత్రమే తెలిసిన రహస్యం!

-సికిందర్