520 : స్పెషల్ ఆర్టికల్

     మెయిన్ స్ట్రీమ్  కమర్షియల్ స్టార్ మూవీస్ కి కథ రాయడమే మీ ధ్యేయమైతే, హై కాన్సెప్ట్ ప్రక్రియలో కథల్ని ఆలోచించండి.  ఇతర ప్రక్రియలు  అంతగా వర్కౌట్ కావు. ఏ స్టార్లు నటించినా నటించకపోయినా, ఏ స్టార్ డైరెక్టర్లు దర్శకత్వం వహించినా వహించకున్నా, రివ్యూలు ఎలా రాసినా రాయకున్నా, సోర్స్ మెటీరియల్ ఎక్కడిదో తెలిసిపోతున్నా,  మౌత్ టాక్ ఎలా వున్నా  - వీటితో సంబంధం లేకుండా  ప్రేక్షకుల్ని ఆకర్షించే హై కాన్సెప్ట్ కథల్ని ఎంచుకోండి. మౌలికంగా హైకాన్సెప్ట్ కథలు యాక్షన్, సస్పెన్స్ థ్రిల్లర్, కామెడీ, రోమాంటిక్ కామెడీ, హార్రర్, సైన్స్ ఫిక్షన్, ఫ్యామిలీ మొదలైన జానర్లకి చెందినవై వుంటాయి. ఏకవాక్యంలో కథ తెలిసిపోయేట్టు వుంటాయి. కథలో స్టార్ ధరించే పాత్రకి అత్యంత డోలాయనమాన స్థితిని, గడ్డు పరిస్థితిని  సృష్టిస్తాయి. ఇది వరకే  వచ్చేసిన సినిమాల్లోని కొన్ని ఎలిమెంట్స్ తో బాటు, ఇదివరకెన్నడూ చూడని విశిష్టతలు గల  ఎలిమెంట్స్ ని కూడా కలిగి వుంటాయి. ఇవి పక్కా కమర్షియల్ మూవీస్ గా తయారవుతాయి. వీటిలో కళాత్మకత, సృజనాత్మఅంటూ కూర్చోకండి.  వీటికి అటువంటి విజయాలుండవు. మీరు కళ కోసమే తపిస్తూ, విశాలప్రాతిపదికన మాస్ మీడియా మార్కెట్ తో సరిపోలే  వ్యాపార కోణాన్ని నిర్లక్ష్యం చేస్తే, మీ కథ ఎన్నటికీ తెరకెక్కే అవకాశముండదు. ఒకటి బాగా గుర్తు పెట్టుకోండి - హై కాన్సెప్ట్ కొస్తే మీరు ప్రేక్షకులకి కథని అమ్మరు, స్టార్ నే అమ్ముతారు. అడ్వర్టైజ్ మెంట్ రంగంలో స్టార్ ఉత్పత్తిని అమ్ముతాడు, కానీ సినిమా రంగాని కొచ్చేసరికి  సినిమా అనే ఉత్పత్తి స్టార్ ని అమ్ముతుంది! 

          హై కాన్సెప్ట్ కథలు కొత్త కొత్త పాయింట్లతో వుంటాయి. ఐడియాయే కింగ్. గుర్తుండి పోయే టైటిల్స్ , ఆ టైటిల్స్ తో కథదేని గురించో తెలిసిపోయేట్టు వుంటాయి. విజువల్ లాగ్ లైన్స్  వుంటాయి. అంటే ఒక లైన్లో పాయింటు చెప్తేస్తే  కథ కళ్ళకి కడుతుంది. పైగా యూనివర్సల్ అప్పీల్ ని కలిగి వుంటాయి.  సింపుల్ గా వుండే సింగిల్ యాక్షన్ లైన్, బలమైన ఒక సమస్య, దాంతో దేనికైనా తెగించే సాహసం, ఒక ట్విస్టు...ఇంతే హై కాన్సెప్ట్ కథల స్వరూపం.  

          ఇవి పాత్ర చిత్రణలకంటే వేగంగా సాగే కథనాలపై దృష్టి పెడతాయి. దీంతో విజువల్ యాక్షన్ పెరిగి ఉత్కంఠ రేపుతాయి. ఇలా కాకుండా లో - కాన్సెప్ట్ కథలైన ఇతర డ్రామాలు, కామెడీలు క్యారెక్టర్ ఆధారిత కథనాలతో వుండడం వల్ల- విజువల్ యాక్షన్ కంటే ఫీలింగ్స్, సెంటిమెంట్స్, పాత్రచిత్రణలతో కూడిన కంటెంట్ తో బరువెక్కి వుంటాయి.

నిర్మాణం 

       హై కాన్సెప్ట్ కథల నిర్మాణం ఇలా వుంటుంది : కేవలం రెండు  పిల్లర్స్ మీద కట్టిన బ్రిడ్జి లాగా. మహాసముద్ర తీరంలో ఒక బలమైన పిల్లర్ (ప్లాట్ పాయింట్ వన్) ఏర్పాటు చేసి,  సుదూరంగా నడిసముద్రంలో మరో  పిల్లర్ (ప్లాట్ పాయింట్ టూ) వేసి, మొదటి పిల్లర్ దగ్గర్నుంచి రెండో పిల్లర్ కి కథని చేరవేస్తూ వుంటాయి. ఈ రెండు పిల్లర్ల మధ్య వారధిగా కథనం వుంటుంది.  ఇంతేనా విషయం? ఇంత సింపుల్ గానా? ఔను, షేక్స్ పియర్ ఇలాగే చేశాడు, మిల్టన్ ఇలాగే  చేశాడు, డాంటే ఇలాగే చేశాడు, యురెపిడిస్ ఇలాగే చేశాడు, సఫక్లిస్ ఇలాగే చేశాడు, ఈస్కలస్ కూడా ఇలాగే చేశాడు. మహాకావ్యాలు ఇలాగే  వున్నాయి. ఇందుకే ఇంతకాలం నిలబడ్డాయి. ఇందులో చౌకబారుగా, నేలబారుగా, ఫార్ములాగా ఏమీ లేదు – కథంటూ థ్రిల్ చేస్తూ ఒక నియమిత వేగంతో క్లయిమాక్స్  కేసి పరుగులు దీస్తున్నాక.   ఇక్కడ తెలియాల్సిన కిటుకేమిటంటే, మీ కథలో వుండే విషయం ఏదైతే ‘సంగతి’ చెబుతూ వుంటుందో, అది ప్రకటితమయ్యే విధంగా హై కాన్సెప్ట్ ఎలిమెంట్స్ ని వాడుకోగలగడమే.
అప్పుడొక ‘గాడ్ ఫాదర్’  అవుతుంది, ఒక ‘రైడర్స్ ఆఫ్ ది  లాస్ట్ ఆర్క్’ అవు
తుంది, ఒక ‘టైటానిక్’ కూడా అవుతుంది... మీ ఇష్టం! 

       హై కాన్సెప్ట్ కి ఇంకా ఈ ఎలిమెంట్స్ వుంటాయి :  హై లెవెల్లో  వినోదాత్మక విలువలు, అంతే హై లెవెల్లో ఒరిజినాలిటీ, వైభవోపేత దృశ్యాలు, స్పష్టమైన ఎమోషనల్ ఫోకస్, ఇప్పుడేం జరుగుతుంది? అన్న ఉత్కంఠ మొదలైనవి.  హై లెవెల్లో  వినోదాత్మక విలువల విషయానికొస్తే, దీన్ని నిర్వచించడం కష్టమే. ఇది పోర్నోగ్రఫీని నిర్వచించడం లాంటిది. చూసే కంటిని బట్టి వుంటుంది. సింపుల్ గా చెప్పాలంటే, మీ దృష్టినాకర్షించి చప్పున ఓ ఊహాలోకాల్లోకి మిమ్మల్ని బదిలీ చేసేదేవైనా,  హై లెవెల్లో  వున్న వినోదాత్మక విలువలవుతాయి. ఇలాకాక, మిమ్మల్ని లాజికల్ గా ఆకర్షిస్తే, మీకు కుతూహలమూ ఆసక్తీ కల్గిస్తే, వినోదం కల్గించే అవకాశం లేదు.

          హై లెవెల్ ఒరిజినాలిటీ గురించి చెప్పుకుంటే, ఒరిజినాలిటీ అంటే ఏమిటో అర్ధం జేసుకోవాలి. ఒరిజినాలిటీ అంటే ఫ్రెష్ గా, కొత్తగా, నూతన కల్పన చేసినదిగా, నోవెల్ గా వుండే ఐడియా. ఉన్న ఒక ఐడియాని భిన్నమైన అప్రోచ్ తో చూస్తే  హై లెవెల్ ఒరిజినాలిటీ అన్పించుకుంటుంది.  ఒక ఐడియా తెలిసిన సెట్టింగ్ తోనే వుండొచ్చు.  దాన్ని కొత్త అప్రోచ్ తో మార్చివేయగలిగితే  హై కాన్సెప్ట్ ఐడియాగా మారిపోతుంది. ‘ఫ్రాంకెన్ స్టీన్’  తెలిసిన కథ- దుష్టశక్తి మనుషుల పని బట్టడం. దీని కొత్త అప్రోచ్ వచ్చేసి, మనుషులే ఆ దుష్ట శక్తి పనిబట్టడం. ‘డాగ్ డే ఆఫ్టర్ నూన్’ తెలిసిన ఐడియా - డబ్బు కోసం బ్యాంకుని దోచుకోవడం. కొత్త అప్రోచ్ : ప్రేమించిన ‘మగరాయుణ్ణి’ లింగమార్పిడి చేయించడం కోసం బ్యాంకు దోచుకోవడం. ‘లార్డ్ ఆఫ్ ది ఫైల్స్’  తెలిసిన కథ :  దీవిలో చిక్కుకున్న ఓడ ప్రమాద బాధితుల్ని కాపాడడం. కొత్త అప్రోచ్ : దీవిలో చిక్కుకున్నది స్కూలు పిల్లలైతే, వాళ్ళు నాగరికత వదిలేసి మృగ లక్షణాలతో చెలరేగడం. కనుక  ఒరిజినాలిటీ అనేది కొత్తగా సృష్టించడం కాకపోయినా, ఉన్నదానికి నూతన కల్పన చేయడంలో కూడా వుంటుంది.  కాబట్టి హై కాన్సెప్ట్ ఐడియాల్ని అప్రోచ్ - సెంట్రిక్ గా చూడాలి. 

          విజువల్ వైభవం గురించి చెప్పుకోవాలంటే,  హై కాన్సెప్ట్ ఐడియాలే  విజువల్ వైభవం ఉట్టి పడుతూ వుంటాయి. విన్నా చదివినా కళ్ళముందు ఆ దృశ్య వైభవాలని  ఆటోమేటిగ్గా మెదడు పిక్చరైజ్ చేసేస్తుంది. కాబట్టి ఐడియాలోనే దృశ్య వైభవమంతా  ఇమిడి వుంటుంది. వుండేట్టు చూసుకోవాలి.  ఎమోషనల్ ఫోకస్ కొస్తే, హై కాన్సెప్ట్ ఐడియా వినగానే విజువల్ వైభవాన్ని  మెదడు ఎలా జనరేట్ చేస్తుందో, ఎమోషన్స్ ని  కూడా అలా ప్రసారం చేసేస్తుంది. ఏ ఎమోషన్ పడితే ఆ ఎమోషన్ కాదు. భయం, సంతోషం, హాస్యం, ప్రేమ, ద్వేషం, క్రోధం – ఈ భావోద్వేగాలు మాత్రమే ఉత్పన్నయ్యేట్టు ఐడియా వుండాలి. ఈ మౌలిక భావోద్వేగాలు త్వరగా, బలంగా, గాఢంగా ప్రేక్షకుల్ని కట్టి పడేస్తాయి. ఇక పోతే, మాస్ ఆడియెన్స్  అప్పీల్ గురించి : హై కాన్సెప్ట్ స్టార్ సినిమాల మాస్ అప్పీల్ పరిధికి అంతు వుండదు. దీనికోసం ఫ్యామిలీ ఆడియెన్స్ ని, ఉత్తమాభిరుచులుగల ప్రేక్షకులనీ  కూడా దాటుకుని మాస్ ప్రేక్షకుల్ని కలుపుకోవడం కోసం ఏమైనా చేస్తాయి, ఎలాగైనా సాగిపోతాయి.

          ఇక ఇప్పుడేం జరుగుతుందన్న ఆదుర్దా పుట్టించే ఎలిమెంట్ : డైనోసారస్ లని క్లోనింగ్ చేస్తే ఏం జరుగుతుంది? (జురాసిక్ పార్క్), ఆడవాళ్ళు కనడం ఆపేస్తే ఏం జరుగుతుంది? (చిల్డ్రెన్  ఆఫ్ మెన్), మార్షియన్స్ భూమ్మీదికి దండయాత్ర చేస్తేనో? (వార్ ఆఫ్ ది వరల్డ్స్).  ఇలా ఆదుర్దా కల్గించేట్టుగా  ఐడియా లేకపోతే  హై కాన్సెప్ట్ లో కాన్సెప్ట్ అవుతుంది.

పిచింగ్ 

      స్టోరీ అయిడియాలు, ట్రీట్ మెంట్లు, స్క్రీన్ ప్లేలూ ఇవన్నీ హై కాన్సెప్ట్ పరిధిలో ఏర్పడవచ్చు. ఐతే హై కాన్సెప్ట్ ఐడియాలు ‘పిచ్’ కి పనికి రావాలి. అంటే,  ఒక సెల్ ఫోన్ ని అమ్మాలనుకుందాం. దాన్ని చూపించగానే ఇంకేం వివరించనక్కర్లేకుండా అవతలి వ్యక్తికి దాని విలువ అర్ధమైపోయి కొనేసేట్టు వుండాలి.  బస్సు హైజాక్ అయింది - హైజాక్ చేసిన వాళ్ళలో ఒకడి భార్య బస్సులో వుంది – ఆమె పిల్లాడికి  అర్జంటుగా గుండాపరేషన్ చేయించేందుకు తీసికెళ్తోంది.... ఇలా చెప్పగానే మొత్తం సినిమా కళ్ళ ముందు కట్టి ఉత్సుకత రేపుతుంది. ఇంకేం వివరించక్కర్లేదు. దీన్ని పిచింగ్ అంటారు. ఇలాటి ఐడియాల్ని పిచ్ – డ్రైవెన్ ఐడియాలంటారు. పిచ్ – డ్రైవెన్ ఐడియాలే హై కాన్సెప్ట్ స్టార్ మూవీ కి అమ్ముడుపోతాయి. ఇలాకాక, మొత్తం చాలాసేపు వివరిస్తే గానీ అర్ధంగాని ఐడియాల్ని ఎగ్జిక్యూషన్ – డ్రైవెన్ ఐడియాలంటారు. అంటే ఒక సెల్ ఫోన్ విడి భాగాలన్నీ పట్టుకెళ్ళి, ఒకొక్కటి వివరిస్తూ, బిగిస్తూ,  పూర్తి చేసి - ఇదిగో ఇలా వుంటుంది సెల్ ఫోన్ అని చూపించడంలాంటిదన్నమాట. ఇలాటి ఎగ్జిక్యూషన్ – డ్రైవెన్ ఐడియాల్ని చెప్పి ఒప్పించాలంటే చాలా కాలం పడుతుంది. ఈ కారణం చేతనే ‘పల్ప్ ఫిక్షన్’, ‘స్టార్ వార్స్’, ‘సైడ్  వేస్’ లాంటి ఐడియాల్ని  పిచింగ్ తో నిర్మాతలకి అమ్మలేక పోయారు. 

            ఒక కథని ఒక్కరే ఓకే చెయ్యరు. కంపెనీలో వివిధ ఎగ్జిక్యూటివ్ ల పాత్ర కూడా వుంటుంది. ఒకరు మరొకరికి ఆ ఐడియాని పాస్ చేస్తూంటారు. ఇందుకు ఏకవాక్యంలో పిచింగ్ కి పనికొచ్చే ఐడియాలైతే  ఒకరి నోటి మాటగా ఇంకొకరికి సులభంగా వినిమయమవుతాయి. అదే ఎగ్జిక్యూషన్ – డ్రైవెన్ ఐడియాలైతే చాలా సేపు చెబుతూ కూర్చుంటే గానీ అర్ధంగావు.  జేమ్స్ బానెట్ స్క్రిప్టులు రాస్తున్నప్పుడు, ఒక ఐడియా తట్టి ఏజెంట్ కి కాల్ చేశాడు. బెర్ముడా ట్రయాంగిల్ లో హీరోయిన్ తప్పిపోయిందని ఐడియా చెప్పాడు. ‘ఐ లవ్ ఇట్, ఐవిల్ కాల్ బ్యాక్’ అన్నాడా ఏజెంట్. పది నిమిషాల తర్వాత కాల్ చేసి, ‘డన్, స్క్రిప్టు రాసేయ్యండి’ అని గ్రీన్ సిగ్నలిచ్చాడు. ఆ పదినిమిషాల్లో జరిగిందేమిటంటే, ఆ ఏజెంట్ ఒక నిర్మాతకి కాల్ చేసి బానెట్ ఐడియాని పిచింగ్ చేశాడు. వెంటనే ఆ నిర్మాత ఓకే చేసి, ఆఫీసులో ఒక నంబర్ ఇచ్చాడు. ఆ నంబర్ కి ఏజెంట్ కాల్  చేసి పిచింగ్ చేస్తే, ఆ ఎగ్జిక్యూటివ్ కి వెంటనే నచ్చి తన పై ఎక్జిక్యూటివ్ కి పిచింగ్ చేశాడు. ఆ పై ఎగ్జిక్యూటివ్ కి కూడా వెంటనే నచ్చి నిర్మాతకి కన్ఫర్మ్ చేశాడు. నిర్మాత ఏజెంట్ కి కాల్ చేసి గో ఎహెడ్ చెప్పాడు.

          ఇలా తూటాలా పిచింగ్ కి పనికొచ్చే ఐడియాలే హై కాన్సెప్ట్ అయిడియాలు. ఇలా కాని అయిడియాలు హై కాన్సెప్ట్ కి పనికి రావు (మన లోకల్ లెవెల్లో ఇలాటిదే ఒకసారి జరిగింది – టైటిల్ భూకైలాస్, భూములు అమ్ముకుంటే యాబై కోట్లు వచ్చాయి, హీరో వేణుమాధవ్ -  అనగానే వెంటనే ఆఘమేఘాలమీద నిర్మాతల్నీ, వేణుమాధవ్ నీ ఓకే చేసుకున్నారు దర్శకుడు శివనాగేశ్వర రావు.  పిచింగ్ పవర్ ఎలా వుంటుందో చెప్పడానికే ఈ ప్రస్తావన). 

      బెర్ముడా ట్రయాంగిల్ లో హీరోయిన్ తప్పిపోయింది...గాలి దుమారం లేచింది - ఎడారి లో కాదు - నడి  మధ్య నగరంలో... గుమ్మంలో పసి పాపని వదిలేసి పోయారు - ఆయా గుమ్మంలో కాదు – బ్రహ్మచారుల గుమ్మంలో... విధి కలిపిన ప్రేమికులు వాళ్ళు -  చర్చిలో కాదు - టైటానిక్ షిప్ లో... భార్య కిడ్నాప్ అయింది - డబ్బులివ్వడానికి భర్త ఒప్పుకోలేదు...టీనేజి అమ్మాయిని దుష్టశక్తి ఆవహించింది....ఇవన్నీ హై కాన్సెప్ట్ సినిమాలుగా తెరకెక్కిన కిల్లర్ ఐడియాలే. హై కాన్సెప్ట్ కథల్లో పాత్రలు డెప్త్ తక్కువ వుంటాయి. పత్రాల మధ్య సంబంధాల చిత్రణ అంతంత మాత్రంగా వుంటుంది. హై కాన్సెప్ట్ కథల్లో భారమంతా స్టార్ మోసేట్టు వుండవు. యాక్షన్ అయినా, లవ్ అయినా, కామెడీ అయినా, ఫ్యామిలీ అయినా హై కాన్సెప్ట్ కథలు యాక్షన్ ఓరియెంటెడ్ గానే వుంటాయి గనుక బరువైన పాత్రలు, బరువైన కథలుండవు. స్టార్ పాత్ర సాధించాల్సిన సమస్యకి క్లియర్ గోల్, ఆ గోల్ కోసం వినూత్న వ్యూహాలూ వుంటాయి. బ్యాక్ గ్రౌండ్ లో తలపెట్టిన కాన్సెప్ట్ రన్ అవుతూనే,  పాత్ర ఆ బ్యాక్ డ్రాప్ లో కథ నడిపిస్తూ వుంటుంది. నడిపిస్తున్న కథ ఎంత ముఖ్యమో, బ్యాక్ డ్రాప్ లో విషయం పరోక్షం గా ఒక మెసేజ్ ఇచ్చేట్టు వుండడం అంతే ముఖ్యం. ‘జురాసిక్ పార్క్’ లో లవ్ ట్రయాంగిల్ నడిపిస్తూనే, దీని బ్యాక్ డ్రాప్ లో వున్న డైనోసారస్ క్లోనింగ్ ప్రమాదాలేమిటో పరోక్షంగా హెచ్చరిస్తూంటుంది.  

(వివిధ ప్రాప్తి స్థానాల నుంచి)

-సికిందర్

రైటర్స్ కార్నర్

హై కాన్సెప్ట్ స్క్రిప్ట్ అంటే బిగ్ కలెక్షన్స్ ని రాబట్టే  స్క్రిప్ట్. ఈ ఆర్టికల్ లో మీకు బిగ్ కలెక్షన్స్ ని  సాధించి పెట్టే  హై కాన్సెప్ట్ స్క్రిప్ట్ కి మిలియన్ డాలర్ అయిడియాలు ఎలా రూపొందుతాయో  అవుట్ లైన్ గురించి చెప్తాను. మీరు డబ్బుకోసమే స్క్రిప్టులు రాయాలని ఈ రంగంలోకి వచ్చి వుండకపోయినా, ఆర్ధిక భద్రత వుండాలని అందరూ కోరుకుంటారు. దురదృష్టవశాత్తూ  సినిమాలు క్యారక్టర్ డెవలప్ మెంట్ తోనే నిండిపోయి, యాక్షన్ కి చాలా తక్కువ చోటు కల్పించడం వల్ల  అనుకున్న బాక్సాఫీసు ఫలితాలు సాధించలేక పోతున్నాయి. రచయితగా మీరు తిరుగులేని సక్సెస్ సాధించేందుకు స్మాష్ హిట్ స్క్రిప్టు రాయాలనుకుంటే,  హై కాన్సెప్ట్ అయిడియాల గురించి ఆలోచించడం మొదలెట్టాల్సిందే.

        చెప్పుకోవాలంటే హై కాన్సెప్ట్ స్క్రిప్టులు సింపుల్ గానే  వుంటాయి. కొన్ని పదాల్లో కుదించి క్లుప్తంగా చెప్పినా చిన్న  పిల్లలు కూడా చక్కగా అర్ధం చేసుకుంటారు. హై కాన్సెప్ట్ స్క్రిప్టుల్లో క్యారక్టర్ డెవలప్ మెంట్ ని కనిష్ట స్థాయిలో వుంచుతూ, ఈ లోటుని భర్తీ చేయడానికి ప్రేక్షకులు అభిమానించే టాప్ స్టార్స్ ని ఎంపిక చేసుకుంటారు. హై కాన్సెప్ట్ మూవీస్ భారీ ఎత్తున స్పెషల్ ఎఫెక్ట్స్ ని కూడా కలిగి వుండి  పోస్ట్ ప్రొడక్షన్ దశలోనే భారీ ప్రచారాన్ని పొందుతాయి. ప్రేక్షకుల క్యూరియాసిటీని పెంచుతాయి.

       ఓ బిగ్ ఐడియా, ఇంకో ఆకర్షణీయమైన టైటిల్, క్యూరియాసిటీని పెంచే ఓ లాగ్ లైన్ ...ఇవీ చాలు హై కాన్సెప్ట్ మూవీ స్క్రిప్టు ప్లాన్ చేసేందుకు. 

        థింక్ బిగ్!

       మీకో గొప్ప కాన్సెప్ట్ తట్టిందంటే మీరిక హై కాన్సెప్ట్ కి స్థాయికి దగ్గరైనట్టే. మీరు రాసే స్క్రిప్టులో  క్వాలిటీ లేకపోయినా అది అమ్ముడుపోయే అవకాశాలకి ఏమీ నష్టం కల్గించదు.  ప్రొడ్యూసర్లు చాలావరకూ హై కాన్సెప్ట్ స్క్రిప్టుల్ని  చదవకుండానే కొనేస్తూంటారు. కథాసంగ్రహంలో మీరిచ్చే హై కాన్సెప్ట్ అవుట్ లైన్ కి పడిపోతే ఇంకేమీ అడగరు. చాలా సినిమాలు మంచి కథతో, పాత్రలతోనే  వుంటాయి. కానీ వాటి ఇనీషియల్ ఐడియాల పాలనే ఏమంత బావుండదు. అందుకని మీరనుకున్న హై కాన్సెప్ట్ లో ఇనీషియల్ ఐడియా సరీగ్గా ప్రతిఫలించేలా ఎక్కువ సమయం కేటాయించి మీరు కృషి చేయాల్సి వుంటుంది. ముందు నిర్మాణాత్మకంగా ఇనీషియల్ ఐడియా లేకపోయినట్లయితే, మీరేం చేసీ దాన్ని మీ హై కాన్సెప్ట్  స్క్రిప్టులో ప్రతిఫలింపజేయలేరు.

     గుర్తుంచుకోండి! నిజమైన హై కాన్సెప్ట్ మూవీ ఐడియా అంటే....

        తేలికగా అర్ధమయ్యేది
        ఒకటి రెండు వాక్యాల్లో చెప్పగల్గేది
        ప్రేక్షకుల క్యూరియాసిటీని పెంచేది
        అధిక కాన్ ఫ్లిక్ట్ తో నిండి వుండేది.
        ఓ భారీ స్థాయి సంఘటనని చూపించేది
        సీక్వెల్ కి అవకాశమిచ్చేది
        టాప్ స్టార్స్ ని ఎట్రాక్ట్ చేసేది
        ఫ్రెష్ గా, మార్కెటబుల్ గా వుండేది.
        తెలిసిన ఐడియానే, జా=నర్ నే కొత్తగా చూపించేది...  

      మీరొకసారి జాస్, ఇండిపెండెన్స్ డే, స్టార్ వార్స్, జురాసిక్ పార్క్  వంటి హై కాన్సెప్ట్ మూవీస్ ని గమనించినట్లయితే, వీటిలో పై జాబితాలో చెప్పుకున్న ప్రతీ ఒక్క అంశమూ చోటుచేసుకునే వుంటుంది. నేనిది రాస్తూ, ఇప్పుడే ఐఎండిబి (ఇంటర్నేషనల్ మూవీ డేటా బేస్) లో ‘ఇండిపెండెన్స్ డే’ మూవీ  పేజీని క్లిక్ చేశాను. దీని యూజర్ రేటింగ్ ని చూస్తే 10/6.9 మాత్రంగానే వుంది. అయినప్పటికీ ఈ మూవీ ప్రపంచవ్యాప్తంగా బిలియన్ డాలర్ల వసూళ్లు రాబట్టింది. భారీ వసూళ్లు సాధించే హై కాన్సెప్ట్ మూవీస్ ఉత్తమ చలన చిత్రాలన్పించుకోవాలన్న రూలేమీ లేదు.

       హై కాన్సెప్ట్ స్క్రిప్టు ఐడియాని కనిపెట్టాలంటే మొట్ట మొదట వేసుకోవాల్సింది  ‘అలా జరిగితే?’ అన్న ప్రశ్న ఒక్కటి. గ్రహాంతర జీవులు  భూమి మీద దాడి చేస్తే? - ఇది ‘ఇండిపెండెన్స్ డే’ మూవీ ఐడియా. రాక్షస బల్లులకి తిరిగి ప్రాణం పోస్తే?- ఇది ‘జురాసిక్ పార్క్’ మూవీ ఐడియా. సొరచేప మనుషుల మీద దాడి చేస్తే?- ఇది ‘జాస్’ ఐడియా.

        మొత్తం మీడియానంతా నిరంతరం గమనిస్తూ వుండండి. సినిమాలు చూడండి, నవలలు చదవండి, వార్తలు చూడండి, సోషల్ మీడియాలో నెటిజనుల కథనాలూ పరిశీలించండి...’అలా జరిగితే?’  అన్న ప్రశ్నకి తగ్గ పాయింటు మీకెక్కడో దొరక్కపోదు.

టైటిల్, లాగ్ లైన్!

      కమర్షియల్ విలువలున్న మంచి టైటిల్, లాగ్ లైన్ ఈ రెండూ మూడు  పాజిటివ్ ఎఫెక్ట్స్ ని  క్రియేట్ చేస్తాయి : ఇవి మీరు స్క్రిప్టు రాయడానికి ఇన్స్పైర్ చేస్తాయి, నిర్మాత-దర్శకుడు-స్టార్ ఎవరైనా కళ్ళప్పగించి చూస్తూ మీ స్క్రిప్టుని వినేలా చేస్తాయి, దాన్ని నిర్మిస్తే సులభంగా మార్కెట్ చేసుకునే వీలు కల్పిస్తాయి మీ హై కాన్సెప్ట్ టైటిల్ అండ్ లాగ్ లైన్ లు. 

      టైటిల్ పొట్టిగా వుండాలి. వుంటూ ఆ మూవీ థీమ్ గురించీ, స్వభావం గురించీ ప్రేక్షకులకి సదభిప్రాయం కల్గించాలి. సింపుల్ గా వుంటూనే క్యూరియాసిటీని పెంచే టైటిల్ కీ, లాగ్ లైన్ కీ ‘స్టార్ వార్స్’ ఒక మంచి ఉదాహరణ.

            స్టార్ వార్స్ లాగ్ లైన్ చూడండి - A long time ago in a galaxy far, far away…

            వెంటనే ఈ మూవీ  మారుమూల అంతరిక్షంలో  మంచికీ చెడుకీ మధ్య జరిగే పోరాటమని తెలిసిపోతుంది. ఒకటి రెండు పంచ్ లతో కూడిన లాగ్ లైన్ లో మీ కాన్సెప్ట్ అంటా తెలిసిపోవాలి. టైటిల్ కీ, లాగ్ లైన్ కీ లోబడి మీరీ కింది మూడు ప్రశ్నలకి జవాబులు చెప్పేట్టుండాలి :

        కథేమిటి?
        హీరో దేన్ని పణంగా పెడుతున్నాడు?
        హీరో కోరికలూ అవసరాలూ ఏమిటి?

         హై కాన్సెప్ట్ మూవీస్ ని విమర్శకులు దుయ్యబడుతూంటారు. ఇది గమనించాల్సిన విషయం. అలాంటప్పుడు మీ గ్రేట్ కాన్సెప్ట్ ని మీరెందుకు ఇంకో అడుగు ముందుకేసి, మాయ చేస్తూనే మనసుకి పట్టే డెప్త్ తో సమ్మోహనాస్త్రంగా సంధించకూడదు?

- ఎడ్వర్డ్  నోమ్స్
http://www.cinemabazaar.in

       

976 : సందేహాలు - సమాధానాలు

Q :  నాని నటించిన ‘వి’ సినిమా రివ్యూలో స్టార్ సినిమాలకి హై కాన్సెప్ట్ కథ వుండాలని రాశారు. అన్ని స్టార్ సినిమా కథలు హై కాన్సెప్ట్ అయి వుండాలా? అసలు హై కాన్సెప్ట్ అనే మాట టాలీవుడ్ లో నేను వినలేదు.
―దర్శకుడు  

A : హాలీవుడ్ లో వినే వుంటారు. అక్కడ స్టార్ సినిమాలకి హై కాన్సెప్ట్స్ నే ఆలోచిస్తారు. అంతేగానీ పదుల కోట్ల స్టార్ సినిమాలకి రెండు కోట్ల చిన్న హీరోల సినిమా కథలు  ఆలోచించరు. ‘వి’ లో నాని చేసిన పొరపాటు తన స్టార్ ఇమేజికి చాలని చిన్న హీరో సినిమా కథని - అంటే ‘లో – కాన్సెప్ట్’ ని ఓకే చేసుకోవడమే. నానియే నటించిన ‘గ్యాంగ్ లీడర్’ లో ఆల్రెడీ ఈ పొరపాటు చేశాడు. అది చిన్న హీరో చేసుకోవాల్సిన ‘లో- కాన్సెప్ట్’ సినిమా. ఇదే దర్శకుడు విక్రమ్ కుమార్ తీసిన ‘మనం’ హై కాన్సెప్ట్ స్టార్ సినిమా. భారీ బడ్జెట్ తో తీసినంత మాత్రాన స్టార్ సినిమా అయిపోదు. విషయం హై కాన్సెప్ట్ అయి వుండాలి. ఇంకా వివరాలు కావాలంటే ఈ లింకు క్లిక్ చేయగలరు - స్టార్ మూవీస్ అంటే...

Q :  ‘వి’ లో నెలకొన్న ఎండ్ సస్పెన్స్, మిడిల్ మాటాష్ స్క్రీన్ ప్లే సమస్యల్ని రివ్యూలో వివరిస్తారనుకున్నాము.
―కెవిపి, అసోసియేట్
A : ‘వి’ స్క్రీన్ ప్లే సంగతులు రాయలేదు కాబట్టి సమస్యల విషయం అలా వుండిపోయింది. ఇంకోటేమిటంటే, ‘వి’ ఒక జానర్లో కూడా లేదు. ఎప్పుడే జానర్లోకి వెళ్ళిపోయి రసాస్వాదనని దెబ్బతీస్తుందో మనమే కాచుకోవాలి. దీని స్క్రీన్ ప్లే సంగతులు రాయాలంటే కొన్ని రోజులు పట్టేలా వుంది.

        (మరో మూడు ఫోన్లు వచ్చాయి. ఆ సందేహాలకి సమాధానాలు బ్లాగులో చూడమన్నాం. 1. ‘బుచ్చి నాయుడు కండ్రిగ’ లాటి ప్రేమ సినిమాలు  ఓటీటీలో సక్సెస్ అవుతాయా, ఓటీటీ ని దృష్టిలో పెట్టుకుని చిన్న సినిమాలు ఎలా తీయాలి? -  ‘బుచ్చి నాయుడు కండ్రిగ’ లాటి ప్రేమ సినిమాలు ఓటీటీలో కాదుకదా థియేటర్లలో కూడా ఒక్క రోజు ఆడవు. అది కాలం చెల్లిన ప్రేమ సినిమా. పైగా పీరియడ్ బ్యాక్ డ్రాప్. ఇంకా చూసి చూసి వున్న అవే టెంప్లెట్ సీన్లు. పాయింటు వచ్చేసి ప్రేమకి కులం అడ్డు. ఈ కులాల కథలేమిటి పిచ్చి కాకపోతే. ఓటీటీ ప్లాట్ ఫామ్స్ బోల్డ్, వయోలెంట్, అర్బన్ సబ్జెక్టుల్ని ఫిక్స్ చేసుకున్నాయి. అవి కూడా కొత్త వాళ్ళతో తీస్తే సమస్యే. ఒక ప్రధాన కార్పొరేట్ ఓటీటీ ప్లాట్ ఫామ్ పోస్ట్ ప్రొడక్షన్ వివరాలడుగుతోంది. దాన్నిబట్టి నిర్ణయించే రేట్లు దారుణంగా వున్నాయి. థియేటర్లలో విడుదల చేస్తే ఒక రేటు, చేయకపోతే ఇంకో రేటు. ఏదైనా క్షవరమే. ఇప్పటికే తీసిన సినిమాలు ఓటీటీకి ఇచ్చుకున్నా ఇవ్వకపోయినా, కొత్తగా ప్లాన్ చేసే సినిమాలు ఇంకో ఆరు నెలలకైనా కోవిడ్ తోకముడ్చుకోవచ్చని నమ్మి థియేటర్లని దృష్టి లో పెట్టుకుని మొదలు పెట్టుకుంటే మంచిది. అప్పుడైనా కండ్రిగలు, కడగండ్లు తీసి విడుదల చేస్తే ప్రేక్షకులు క్షమించరు. కోవిడ్ తర్వాత కొత్త శకంలోకి అడుగుపెట్టబోతున్నాం. 

        2. ఒక్క ముక్కలో అసలు కథంటే ఏమిటి? - ఒక్క ముక్కలో కథంటే ప్రశ్న, ఆ ప్రశ్నకి తగ్గ సమాధానం. ప్రశ్న పుడితేనే ఆ ప్రశ్నతో పాత్ర సంఘర్షించి, తగిన సమాధానం కనుగొంటుంది. ఆ సమాధానం పాత ఫార్ములా సమాధానమై వుండకూడదు, వర్తమాన పరిస్థితులకి వర్తించేదై వుండాలి. ఇది స్క్రీన్ ప్లేలో ప్లాట్ పాయింట్ వన్ (ప్రశ్న), ప్లాట్ పాయింట్ టూ (సమాధానం) లకి వివరణ. 

        3. మలయాళం సినిమాలని చూసిన లొకేషన్లలోనే మళ్ళీ మళ్ళీ చూడక తప్పదా? - నిజమే, మలయాళ రూరల్ సినిమాలు అవే లోకషన్లతో కనబడుతున్నాయి. అవే కొండలు, అవే లోయలు, అవే ఇళ్ళు. వరసబెట్టి తెలుగు సినిమాలు అరకు లోయలో తీస్తే ఎలా వుంటాయో అలా వుంటున్నాయి. పైత్యం బాగా ముదిరింది. వీటికి రివ్యూలు రాస్తునప్పుడు అద్భుతమైన కొండ కోనలు, లోయలూ పచ్చదమంటూ పదేపదే రాయడం కూడా పైత్యమే. రాయబోయే ‘కిలోమీటర్స్ అండ్ కిలోమీటర్స్’ రివ్యూ కూడా ఇలాగే తయారైంది). 

―సికిందర్
         

993 : సందేహాలు -సమాధానాలు

 

Q : మొదటగా నా విన్నపం ఏంటంటే వారంలో కనీసం నాలుగు ఆర్టికల్స్ ఉండేలా చూడండి. ఇక నా ప్రశ్న- కామెడీ ప్రధానంగా తక్కువ బడ్జెట్లో కాన్సెప్ట్ బేస్డ్ మూవీస్ (హీరోకి చిన్న ఆరోగ్య సమస్య ఏదో ఉండడం, బట్టతల లాంటివి) కు స్క్రీన్ ప్లే ఎలా రాసుకోవాలో, ఏమేమి ఉండేలా చూసుకోవాలో, ప్రధాన పాత్రను ఎలా నిర్వహించాలో కొంచెం విపులంగా వివరిస్తారా.

―అశోక్ పి, అసోసియేట్ 

A : చాలా మందిది ఇదే ఫిర్యాదు. నిజమే, వ్యాపకాలు పెరిగి వ్యాసాలు తగ్గాయి. ఎన్నో పెండింగులో వున్నాయి. వారానికి మూడు తెల్లారి ఆరుగంటలకల్లా పోస్టయ్యేలా గత రెండు వారాలుగా ప్రయత్నిస్తూనే వున్నాం. చాలా కొత్త సినిమాల రివ్యూలు కూడా మిస్సవుతున్నాయి. ఒక సినిమా చూడడం ప్లస్ రివ్యూ రాయడం ఆరేడు గంటల సమయం తీసుకుంటుంది. ఇంకాస్త వ్యాపకాలు కొలిక్కి రావాలి. వ్యాపకాలంటే షికార్లు కావు, సినిమా కథల రాతలే. వీటిలో ఒక పెద్ద బడ్జెట్ పాత మూసని కొత్త సీసాలో పోసేసరికి సరికి తలప్రాణం తోకకొచ్చింది. ఇంతా చేసి అదేమవుతుందో తెలీదు. వ్యాసాలు తప్పకుండా ఈ వారం నుంచి ప్రయత్నిద్దాం. రెండోదేంటంటే, పవర్ ప్రాబ్లం చాలా వుంది ఈ మధ్య వర్షాల వల్ల.   

రెండో ప్రశ్నకి - ముందుగా అర్ధం చేసుకోవాల్సిందేమిటంటే, కాన్సెప్ట్ బేస్డ్ మూవీస్ అనే మాట తప్పు. ఏ సినిమా అయినా కాన్సెప్ట్ తోనే వుంటుంది. కాన్సెప్ట్ లేకుండా సినిమా ఎలా వుంటుంది. కాబట్టి వున్నవి లో- కాన్సెప్ట్ సినిమాలు, హై కాన్సెప్ట్ సినిమాలనేవే. హై కాన్సెప్ట్ సినిమాలంటే భారీ సినిమాలు : బాహుబలి, రోబో, ఇన్సెప్షన్, గాడ్ ఫాదర్, మ్యాట్రిక్స్, జూరాసిక్ పార్క్ లాంటివి. ఇలాటివి కానివన్నీ లో- కాన్సెప్ట్ సినిమాలే. 

హీరోకి చిన్న ఆరోగ్యసమస్యలతో, వ్యక్తిత్వ లోపాలతో వుండేవన్నీ సాధారణ లో- కాన్సెప్ట్ సినిమాలే. కాకపోతే ఇవి కామెడీలుగా ఎక్కువుంటాయి. మతిమరుపుతో ‘భలే భలే మగాడివోయ్’ లాగా. అధిక బరువుతో  ‘సైజ్ జీరో’ లా. బట్టతలతో హిందీ ‘బాలా’ లాగా. ఇలాటి సమస్యల్ని డీల్ చేసేప్పుడు జాగ్రత్తగా వుండాలి. రీసెర్చి బాగా చేసుకోవాలి. లేకపోతే ఓసిడి (అబ్సెసివ్ కంపల్సివ్ పర్సనాలిటీ డిజార్డర్) అని ప్రచారం చేసి, సాధారణ ఎలర్జీ గురించి చూపించినట్టవుతుంది. ప్రేక్షకులు ఇదే ఓసిడి అనుకునే తప్పుడు సమాచారం వెళుతుంది. అలాగే ‘సైజ్ జీరో’లో అధిక బరువు గురించి చెప్తూ, దాన్నొదిలేసి క్లినిక్కులు చేసే మోసాల కథగా మారిపోయి- సెకండాఫ్ సిండ్రోమ్ లో పడి ఫ్లాపయ్యే ప్రమాదముంటుంది. 

ఫలానా ఈ విధమైన కథకి స్క్రీన్ ప్లే ఎలా రాసుకోవాలని పదేపదే అడుగుతూంటారు. పదేపదే చెప్తూనే వున్నాం. పాత్ర- సమస్య- సంఘర్షణ- పరిష్కారమూ అనే చట్రమే వుంటుంది ఎంత చిన్న లో- కాన్సెప్ట్ కైనా, ఎంత పెద్ద హై కాన్సెప్ట్ కైనా. మనిషి బ్రెయిన్ కి ప్రతి రూపమే స్క్రీన్ ప్లే అనీ, ఈ స్ట్రక్చర్ మారేది కాదనీ ఎన్నోసార్లు చెప్పుకున్నాం. ఈ బేసిక్ పాయింటుని ముందు  బాగా గుర్తుంచుకుంటే బావుంటుంది.

ఇక తక్కువబడ్జెట్, లేదా జీరో బడ్జెట్ స్క్రిప్టు ఎలా చేసుకోవాలో మూడు వ్యాసాలిచ్చాం. ఇక్కడక్లిక్ చేసి స్క్రోల్ డౌన్ చేయండి. ఇలాటి వ్యాసాల్ని డౌన్ లోడ్ చేసుకుని వుంచుకుంటే రిఫరెన్సులుగా మీకుపయోగపడతాయి.

―సికిందర్

787 : స్క్రీన్ ప్లే సంగతులు

          1990 లో జపాన్ రచయిత యుకిటో కిష్రో సృష్టించిన ‘గన్మ్’ అనే తొమ్మిది  భాగాల పాపులర్ కామిక్స్ సిరీస్ లోని మొదటి భాగమే జేమ్స్ కెమెరాన్ నిర్మించిన ‘అలీటా’. 1999 లోనే కామిక్స్ హక్కులు పొంది 2003 లో స్క్రీన్ ప్లే రాయడం పూర్తి చేసినప్పటికీ,  నిర్మాణం ఎప్పటికప్పుడు వాయిదా పడుతూ వచ్చింది. చివరికి రాబర్ట్ రోడ్రిగ్స్ కి దర్శకత్వ బాధ్యతలప్పగిస్తూ 2017 లో నిర్మాణం ప్రారంభించాడు. ఇప్పుడు అమెరికాలో కంటే ఇండియాలోనే ముందుగా విడుదలయింది (ఫిబ్రవరి 8), ఇండియాలో కంటే బ్రిటన్ లో ముందు విడుదలయ్యింది (ఫిబ్రవరి 6), అమెరికాలో నిన్న విడుదలైంది  (ఫిబ్రవరి14).
          ఆకాశంలో వేలాడుతూ వుండే సాలెం సిటీకీ, భూమ్మీద ఐరన్ సిటీకీ మధ్య జరిగే సంఘర్షణే అలీటా కాన్సెప్ట్. యుకిటో కిష్రో తన ‘గన్మ్’ కామిక్స్ లో ఆకాశంలో వేలాడుతూ వుండే సిటీని ‘జెరూ’ అన్నాడు. జెరూ అన్నా, సాలెం అన్నా జెరూసలెం పేరులోని భాగాలే. క్రైస్తవుల పుణ్యక్షేత్రం. అంటే పైనున్న సాలెం సిటీ ఆధ్యాత్మిక రూపం, కిందున్న ఐరన్ సిటీ భౌతిక (శరీర) రూపం. అంటే పైన సాలెం సిటీ సబ్ కాన్షస్ మైండ్, కింద ఐరన్ సిటీ కాన్షస్ మైండ్, గొప్ప కథల పరిభాషలో. 

          అంటే ఇది మనం ఎన్నో సార్లు చెప్పుకున్న గొప్పకథల నిర్మాణంలో వుండే కాన్షస్  - సబ్ కాన్షస్ మైండ్ ల లడాయి అన్నమాట. అంటే మనసూ అంతరాత్మల ఇంటర్ ప్లే అన్నమాట. స్టార్ వార్స్, జాస్, బ్యాక్ టు ది ఫ్యూచర్, టైటానిక్, ఇంకా చాలా బ్లాక్ బస్టర్స్  ఇలా గొప్ప కథలయ్యాయి. 

       మనిషి మానసిక లోకంలో కాన్షస్ మైండ్ కీ, సబ్ కాన్షస్ మైండ్ కీ మధ్య ఇగో వుంటుంది. ఇలా రెండిటి మధ్య  ద్వారపాలకుడిలా వుండే ఇగో, ఇటు పక్క వున్న కాన్షస్ మైండ్ (మనసు) ని, అటు పక్క వున్న సబ్ కాన్షస్ మైండ్ (అంతరాత్మ) తో కలవనీయదు. మనిషిలోని మంచి గుణాలకి అడ్డు పడుతుంది. గొప్ప కథల్లో కొచ్చేసరికి ఈ ఇగో, కాన్షస్ ఇగోగా హీరో పాత్రకి సింబాలిక్ అవుతుంది. 

          అంటే ఇప్పుడు హీరో పాత్ర =  కాన్షస్ ఇగో అన్నమాట. కాన్షస్ ఇగో లక్షణాలన్నీ హీరోకి వుంటాయి. ఎప్పటి దాకా? స్క్రీన్ ప్లేలో బిగినింగ్ విభాగం ముగిసి ప్లాట్ పాయింట్ వన్ వచ్చే దాకా. ఇందుకేనేమో తెలుగు సినిమాల బిగినింగ్ విభాగాల్లో హీరో అంత ఆవారాగా బతికేస్తూంటాడు. మన కాన్షస్ మైండ్ పెద్ద ఆవారాయేగా. 

         ఇలా కాన్షస్ మైండ్ కి (మనసుకి) ప్రతినిధి హీరో. గొప్ప కథల స్క్రీన్ ప్లేల్లో బిగినింగ్ విభాగం కాన్షస్ మైండ్ గా వుంటే, మిడిల్ విభాగం సబ్ కాన్షస్ మైండ్ గా వుంటుంది. ఈ సబ్ కాన్షస్ మైండ్ అంటే కాన్షస్ ఇగోకి, అంటే హీరోగారికి పడదని కూడా గతంలో చెప్పుకున్నాం. 

          ఇగో వల్ల మనసు నిలకడ లేనిది. అది భౌతిక ప్రపంచపు ఆనందాల్ని కోరుకుంటుంది. భౌతిక ప్రపంచపు ఆనందాల్ని సరైన తీరులో, శాశ్వత ప్రాతిపదికన పొందాలన్నా అంతరాత్మతో కనెక్ట్ అవ్వాలి. ఇది నచ్చదు. మొత్తం మనిషి శారీరక, మానసిక వ్యవస్థల తల్లి వేరు అంతరాత్మలోనే వుంటుంది. అంతరాత్మకి తెలీకుండా ఏదీ జరగదు. అంతరాత్మకి ఇంత అధికార మివ్వడం ఇగోకి నచ్చదు. అది నీతులు చెప్తుందని, జాగ్రత్తలు చెప్తుందని. ఇందుకే మనుషులు ఆత్మ విమర్శ ఓ పట్టాన చేసుకోరు. నీతులూ నిజాలూ  చెప్పే అంతరాత్మకి దూరంగా వుంటూ, మనసు దాని కాన్షస్ ప్రపంచంలో అది ఆవారాగిరీగా ఎంజాయ్ చేసేస్తూంటుంది. ఏదోనాటికి జీవితాన్ని ఎదుర్కోక తప్పదు. అంతరాత్మలోకి తొంగి చూడకా తప్పదు. మరి అంతరాత్మ అంటే అంత ఎలర్జీ కదా, ఇగో మత్తు పూనిన మనసుకి? అప్పుడెలా?

         ఇదిగో ఇలాంటప్పుడే స్క్రీన్ ప్లేలో ప్లాట్ పాయింట్ వన్ అనే మలుపు వుంటుంది. ఇక్కడ రచయిత గారేం చేస్తారంటే,  ఆ కాన్షస్ ఇగో అనే హీరో గారి మెడలు బట్టి మిడిల్ విభాగంలోకి ఒక్క నెట్టు నెట్టి పారేస్తారంతే. అంటే సబ్ కాన్షస్ మైండ్ లోకి ఒక్క తోపు తోసి పారేసి చేతులు దులుపుకుంటారు – శని వదలినట్టు!  

          ఇలా సబ్ కాన్షస్ మైండ్ లోకి ఇంత బలవంతంగా వచ్చి పడ్డ హీరోగారు, ఇదేంట్రా అని నానా చావూ చచ్చి, అక్కడ అన్ని పచ్చి నిజాలూ పిచ్చ నీతులతో సంఘర్షణ జరిపి, నేర్చుకోవాల్సిన పాఠాలన్నీ తెగ నేర్చేసుకుని  - పునీతుడై - ఒడ్డునపడి -  హమ్మయ్యా అని మోక్షం పొందుతాడు. ఇదే ఎండ్ విభాగం. ఇప్పుడు ఇగోతో అడ్డగోలుగా బతికేసిన హీరో పరివర్తన చెంది, మెచ్యూర్డ్ ఇగోగా మారతాడు. ఇగో చచ్చేది కాదు, నశించేదీకాదు. ఇగో వదులుకో, ఇగో మానుకో అనడం మూర్ఖత్వం. ‘శైలజా రెడ్డి అల్లుడు’ లో ఇగోల పోరాటమే. ఏ పాత్రా మెచ్యూర్డ్ ఇగోగా మారదు. పదార్ధానికి వినాశంలేదు, రూపం మారుతుందంతే. కనుక ఇగోని మెచ్యూర్డ్ ఇగోగా రూపం మార్చే సైకో థెరఫీయే గొప్ప కథల లక్ష్యం. ఇలాటి గొప్ప కథలతో కూడిన  సినిమాలని చూస్తున్నప్పుడు తెలియకుండానే మనం సైకో థెరఫీకి లోనవుతాం. పురాణాల్లాగా ఇగోని మెచ్యూర్డ్ ఇగోగా మార్చేవే, మానసిక చికిత్స చేసేవే గొప్ప కథలు.

***

పారడైంతోనే పని 

      ఇదే జోసెఫ్ క్యాంప్ బెల్ తేల్చాడు. పురాణాలన్నీ వాటి కథలతో సైకో థెరఫీ చేసేవే. మానసిక శాస్త్రం నేర్పేవే దేవుళ్ళనే వూహా రూపాల్ని చూపిస్తూ. ఒక్కో పురాణం ఒక్కో మానసిక శాస్త్రం. దీంట్లో పురాణ పాత్ర చేసే ప్రయాణం పన్నెండు మజిలీలతో వుంటుందని తేల్చాడు. అప్పుడిది మిథికల్ స్ట్రక్చర్ అయింది. దీన్ని మోనోమిథ్ అన్నాడు.

          ఇలా మోనోమిథ్ వచ్చేసి పురాణాల్లో వుండే పాత్ర, దాని ఆధ్యాత్మిక యానంలో  ఎదుర్కొనే పన్నెండు మజిలీల కథానిర్మాణమూ. ఈ కథానిర్మాణం వచ్చేసి అరిస్టాటిల్ ఇచ్చిన బిగినింగ్ - మిడిల్ - ఎండ్ విభాగాలతో కూడిన త్రీ యాక్ట్ స్ట్రక్చరే. ఐతే ప్రపంచ  పురాణాల్లో ఈ మూడు విభాగాల్లో పన్నెండు మజిలీలు (ప్లాట్ పాయింట్లు) వుంటాయని క్యాంప్ బెల్ పరిశోధనా సారాంశం.

         1930 ల నుంచీ డెబ్బైల వరకూ ఇంకో మార్గం లేక హాలీవుడ్ సినిమాలు నాటకాలకి అరిస్టాటిల్ ఇచ్చిన త్రీయాక్ట్ స్ట్రక్చర్ నే అనుసరిస్తూ వచ్చాయి. 1949 లో జోసెఫ్ క్యాంప్ బెల్ తన మోనోమిథ్ థియరీతో  ‘ది హీరో విత్ ఏ థౌజండ్ ఫేసెస్’ అన్న  ప్రసిద్ధ గ్రంథాన్ని ప్రచురించాడు. చాలా ఆలస్యంగా 1970 లలో దీన్ని జార్జి లూకాస్ ‘స్టార్ వార్స్’ స్క్రీన్ ప్లేకి వాడుకుని హాలీవుడ్ లో వాడుకలోకి తెచ్చాడు. ఇది ఓ దశాబ్దం పాటూ సాగేక,  సిడ్ ఫీల్డ్ వచ్చి అదే మోనోమిథ్ ని  కేవలం మూడు ప్లాట్ పాయింట్లకి కుదించి,  దాన్ని పారడైంగా ప్రవేశపెట్టాడు.  

          మోనోమిథ్ స్ట్రక్చర్ లో 12 ప్లాట్ పాయింట్లతో చాలా కథ, చాలా పాత్రచిత్రణలు, చాలా వివరణలూ వుంటూ అప్పటి కాలం ప్రేక్షకుల కాలక్షేపానికి తగ్గట్టు, 12 గేర్లతో కూడిన పదహారు టైర్ల ట్రక్కులా నిదానమైన నడకతో వుంటే - పారడైం వచ్చేసి, మూడు ప్లాట్ పాయింట్లతో మూడు గేర్లతో కూడిన నాల్గు టైర్ల ఎస్యూవీ కారుగా తక్కువ కథ, తక్కువ పాత్రచిత్రణలు, తక్కువ వివరణలూ, ‘ఎక్కువ యాక్షన్’ తో  స్పీడందుకుంది. తరం మరీనా ప్రేక్షకుల కాలక్షేపానికి బాగా పనికొచ్చింది. ప్లాట్ పాయింట్ వన్ దగ్గర కిక్ కొట్టి ఫస్ట్ గేర్ వేసి, ఇంటర్వెల్లో సెకెండ్ గేర్ నొక్కి, ప్లాట్ పాయింట్ టూ దగ్గర థర్డ్ గేరేస్తే టాప్ రేంజిలో వెళ్ళిపోతుంది.

          బయట ప్రపంచం యమ స్పీడందుకుంటే, తలుపులు మూసిన థియేటర్లో సినిమాలు ఇంకా తీరుబడిగా కళా ప్రదర్శన చేస్తూ, కృష్ణా రామా అనుకుంటూ కూర్చోలేవు. జీవించే కళే మారిపోయాక కళాప్రదర్శనేమిటి. 1990 ల నుంచీ ఇవాళ్టి దాకా హాలీవుడ్ కి కొత్త బైబిల్ సిడ్ ఫీల్డ్ పారడైం.

***

సింపుల్ లైను - హై కాన్సెప్ట్ సక్సెస్ 

       ఈ పారడైంతో భారీ బడ్జెట్  హై కాన్సెప్ట్ సినిమాలొచ్చేసి కథాపరంగా సింప్లిఫై
అయిపోయాయి. పాత్ర - దానికో గోల్ - ఆ గోల్ సాధన, ఇంతే. పాత్ర (బిగినింగ్), గోల్(మిడిల్), గోల్ సాధన (ఎండ్), ఇంతే. మాస్ అప్పీలే వీటి మార్కెట్ యాస్పెక్ట్. ఇలా జురాసిక్ పార్క్, ఇన్సెప్షన్, క్యూరియస్ కేస్ ఆఫ్ బెంజమిన్ బటన్, మాట్రిక్స్, ఫేసాఫ్...ఆక్వామాన్ వరకూ ఎన్నో.  

          హై కాన్సెప్ట్ కథల పాయింటు ‘ఇలాజరిగితే?’ (what if?) అన్న ప్రశ్నతో వుంటుంది. ఈ ప్రశ్నే కథకి ఐడియా. గ్రహాంతర వాసులు భూమ్మీదికి దండ యాత్ర కొస్తే? (‘ఇండిపెండెన్స్ డే’ ఐడియా), డైనోసారస్ లని మళ్ళీ పుట్టిస్తే? (‘జురాసిక్ పార్క్’ ఐడియా), సముద్ర గర్భంలో రాజు సప్త సముద్రాల్ని జయించాలనుకుంటే? (‘ఆక్వామాన్’ ఐడియా). 

         ఇలా ప్రపంచవ్యాప్తంగా ప్రేక్షకులకి సింపుల్ గా అర్థమై పోతాయి హై కాన్సెప్ట్ కథలు. ప్రశ్నే పాత్రకి సవాలు ఈ కథల్లో. ఈ ప్రశ్నని ఎదుర్కోవడమే యాక్షన్ ఓరియెంటెడ్ గా వుండే కథ. ప్రశ్నని ఎదుర్కోవడం గోల్, ఆ ప్రశ్నని నిర్వీర్యం చేయడం గోల్ సాధన. సింపుల్ గా అర్ధమైపోతాయి కథలు మూడు ప్లాట్ పాయింట్ల పారాడైంతో. ప్రశ్నని పట్టుకుని కథ తక్కువ, ఆ తక్కువ కథతో ఎక్కువ యాక్షన్ … తక్కువ కథతో ఎక్కువ యాక్షన్ … ఇదే హై కాన్సెప్ట్ హాలీవుడ్ సినిమాల యూఎస్పీ (యూనిక్ సెల్లింగ్ పాయింట్). 

          సహజంగానే ప్రశ్న సబ్ కాన్షస్ మైండ్ కి ప్రతీకైతే, దాని సాధన కాన్షస్ ఇగో (హీరో) గోల్. మూడు ప్లాట్ పాయింట్ల సిడ్ ఫీల్డ్ పారడైంలోనూ హై కాన్సెప్ట్ కథలకి కాన్షస్ - సబ్ కాన్షస్ మైండ్ ల లడాయీ ఎటూ పోలేదు. మహా మోనోమిథ్ స్థానంలో, కట్టే కొట్టే తెచ్చే టైపు  చిన్న పారడైం రావడం వల్ల కథల నాణ్యతేమీ తగ్గిపోలేదు.  

***

ఎటూకాని బిజినెస్ 

       కానీ జేమ్స్ కెమెరాన్ ‘అలీటా’ విషయంలో అనుసరించిన స్క్రిప్టింగ్ ప్రక్రియ అటు  మోనోమిథ్థూ కాక, ఇటు పారడైమూ కాక త్రిశంకు స్వర్గంలో వేలాడింది. ఆకాశంలో సాలెం సిటీ ఏమో గానీ, సినిమా త్రిశంకు స్వర్గంలో తలకిందులుగా వేలాడింది. ఆయన సిడ్ ఫీల్డ్ పారడైంతో స్క్రీన్ ప్లే రాయడం నేర్చుకుని, ‘టెర్మినేటర్’, ‘టైటానిక్’ లు తీశానని చెప్పుకున్నాక, ‘అలీటా’ విషయంలో అదే పారడైంని ఎందుకు చేపట్ట లేదో ...

          హాలీవుడ్ స్క్రీన్ ప్లే పేజీకి నిమిషం వస్తుంది. కెమెరాన్ 180 పేజీల స్క్రీన్ ప్లే రాసి, దాన్ని రెండు గంటలకి వచ్చేట్టు 120 పేజీలకి తగ్గించమని దర్శకుడు రాబర్ట్ రోడ్రిగ్స్ కిచ్చాడు. దాంతో పాటు 600 పేజీల నోట్సూ ఇచ్చాడు. ఇవి ముందేసుకుని రోడ్రిగ్స్  రెండు గంటల స్క్రీన్ ప్లే చేశాడు, కెమెరాన్ ఓకే చేశాడు. సినిమా తీసి విడుదల చేశారు. సినిమా చప్పగా వుందన్నారు జనం. అంతర్జాతీయ రివ్యూలు ఒకటే చెప్పాయి -  అలీటాకి ఒక నిలకడైన గోల్ అంటూ లేదని.     

  
          తెలుగు సినిమాల్లో హీరోలకి గోల్ లేకపోవడమూ, వుంటే పాసివ్ గా వుండి పోవడ మూ గత ఇరవై ఏళ్లుగా కొత్త మేకర్ల చేతుల్లో చూస్తున్నాం. స్క్రీన్ ప్లేల  గురించి ఎన్నో చెప్పే హాలీవుడ్ మేకర్లు కూడా గోల్ ని మర్చిపోతారా అంటే, కన్ఫ్యూజన్ ఎక్కువైతే తప్పకుండా మర్చిపోతారు. 

          ‘అలీటా’ హై కాన్సెప్ట్ కథలా సింపుల్ గా లేదు. పైగా ఆకాశ నగరంతో మంచి ఆధ్యాత్మిక  సువాసనేసింది. ఇంకేం ఇది మోనోమిథ్ లోకి వచ్చేస్తుందని మోనోమిథ్ చేయబోయి చేయలేక వదిలేస్తే ఏమవుతుందో అదే అయ్యింది ‘అలీటా’. 

          భీష్మించుక్కూర్చున్న తెలుగు సినిమాలా ఇంటర్వెల్ దాకా కథే ప్రారంభం కాదు. ఏమేమో జరుగుతూంటాయి. జరగాల్సిన చోట జరక్క కొన్ని ముందు జరుగుతూంటాయి. కొన్ని జరక్కుండా వుండిపోతాయి. అన్నిటికంటే ముఖ్యం చెప్పిందేదీ జరగదు. ఇంకేదో జరుగుతుంది. అసలు అలీటా ఏం చేయాలనుకుంటోందో అంత సూపర్ బ్రెయిన్ గా చెప్పుకునే ఆమెకే తెలీదు! ప్లాట్ పాయింట్స్ కూడా ఇదిగో ప్లాట్ పాయింట్ అంటే,  అదుగో మిడిల్ - అదిగో మిడిల్ అంటే,  ఇదిగో ఎండ్ అన్నట్టే వుంటాయి. ఏదీ ఏదీ కాదు,  అంతా భ్రాంతియే. దీన్ని బాలీవుడ్ రోహిత్ శెట్టి కిస్తే గిలక్కొట్టి సూపర్ హిట్ చేసేవాడు.

***

గ్రాండ్ బిగ్ పిక్చర్ 

        మహాయుద్ధం జరిగిన మూడొందల ఏళ్ల తర్వాత సర్వ నాశనమైన ప్రపంచం ఇంకా కోలుకోనట్టు అడ్డదిడ్డ భవనాలు నిర్మించుకున్న ఐరన్ సిటీ వుంటుంది. ఐరన్ సిటీ మీద శూన్యంలో వేలాడుతూ స్వర్గతుల్యమైన అద్భుత నగరం సాలెం వుంటుంది. దానివైపు ఆశగా చూస్తూ దాన్ని చేరుకోలేమని అనుకుంటూ వుంటారు ప్రజలు. పక్కకెళ్ళి ఒక పాత ముచ్చట చెప్పుకుంటే,  ఇజ్రాయెల్ పాలస్తీనా నిత్య సంఘర్షణల్లో ఇజ్రయీలీ దళాలకి  పాలస్తీనాని ఆక్రమించే ఆసక్తి లేదనీ, ఆక్రమించి వాళ్ళ డ్రైనేజీలని మెయింటెయిన్ చేసే చంఢాలం కోరుకోవడంలేదనీ చెప్పుకున్నారు.

          సరీగ్గా దీన్ని గుర్తు చేసేలా రివర్స్ సన్నివేశం వుంటుంది. పైనున్న సాలెం నగరపు డ్రైనేజీ అంతా కిందున్న ఐరన్ సిటీ మీద పడుతుంది. ఐరన్ సిటీ ఇస్లామిక్ నగర నమూనాలో వుంటుంది.

          గొప్ప కథల్లో కాన్షస్ - సబ్ కాన్షస్ మైండ్ ల ఇంటర్ ప్లే గురించి వివరించే జేమ్స్ బానెట్ - సైకలాజికల్ గా మనిషి మానసిక లోకమెలా వుంటుంది, దీన్ని ప్రతిబింబిస్తూ గొప్ప కథలెలా వుంటాయి, మళ్ళీ దీన్ని ప్రతిబింబిస్తూ ప్రపంచంలో ఏమేం జరుగుతాయీ సోదాహరణగా చెప్పాడు. మనిషి ద్వేష పూరితుడై విషాదాంతాన్ని కొని దెచ్చుకోవడం ఒక సైకాలజీ. ‘బేసిక్ ఇన్ స్టింక్ట్’, ‘ఫాటల్ ఎట్రాక్షన్’ లాంటి సినిమాల్లో ఇది మైకేల్ డగ్లస్ పాత్రవుతుంది. నిజజీవితంలో-  ప్రపంచంలో-  ఒక హిట్లర్, ఒక ముస్సోలినీ, ఒక ఫెర్డినాండ్ మార్కోస్...అవుతారు. 

          ఇలా మానసిక కాల్పనిక వాస్తవిక  సంభవాల్లో ఏకత్వం ఉలిక్కిపడేలా చేస్తుంది. పైనున్న సాలెం సిటీ మనిషి ఆధిపత్య భావపు సైకాలజీ అనుకుంటే, కిందికి డ్రైనేజీ వదిలడం చేసిన కల్పన, ఈ కల్పన పాలస్తీనా మీద ఇజ్రాయెల్ దళాలు చేసిన వ్యాఖ్యానంగా వాస్తవమై వుంది. ఎటూ పోవు పోలికలు. మానసికం కాల్పనికం, కాల్పనికం వాస్తవికం – ఈ త్రివేణీ సంగమం అద్భుత దృశ్యాన్ని ఆవిష్కరిస్తుంది. ఒక గ్రాండ్ బిగ్ పిక్చర్ ని చూపిస్తుంది. 

          కెమెరాన్ మూడు పొరల్లో ఈ కథని వూహించాడు. ఒక పొరలో పైనున్న సాలెం సిటీ సబ్ కాన్షస్ మైండ్ అవుతూ, కిందున్న ఐరన్ సిటీ కాన్షస్ మైండ్ అయ్యే సైకలాజికల్ పొర; పైనున్న సాలెం సిటీ స్వర్గం అవుతూ, కిందున్న మనుషులు దానికోసం అంగలార్చే స్పిరిచ్యువల్ పొర; పైనున్న సాలెం సిటీ సామ్రాజ్యవాదమవుతూ, కిందున్న ఐరన్ సిటీ బాధిత ప్రాంతమయ్యే పొలిటికల్ పొర. మనుషుల్ని శాసించేవి మూడే - మనసు, మతం, రాజకీయం. పై పొరల్లో ఈ మూడూ పొందుపర్చాడు. 

      వీటిలో సైకలాజికల్ నీ, స్పిరిచ్యువాలిటీనీ కలిపి కాన్సెప్ట్ చేశాడు. ఐతే కాన్సెప్ట్ ప్రకారం పై లోకాన్నందుకోవడమే ప్రధాన పాత్ర గోల్ గా పెట్టుకోలేదు. పైలోకాల్లో వున్న ప్రత్యర్ధి పాత్రకే గోల్ పెట్టాడు. అంటే విలన్ కే గోల్ వుండి, హీరోకి లేకపోవడం లాంటిదన్న మాట. అలీటాని చంపి అరుదైన ఆమె సూపర్ బ్రెయిన్ ని కాజేసే ప్రత్యర్ధి గోల్. అప్పుడు అలీటా పాసివ్ పాత్రే కదా? 

          పైన నోవా పేర మెరిసిపోయే ఈ ప్రత్యర్ధి తెల్లవాడు. భూమ్మీద అతడి ఏజెంటుగా వెక్టర్ నల్లవాడు. ఇతడి చేతిలో భూమ్మీద  పరిపాలన. ఈ పరిపాలనలో నేరస్థుల్ని వేటాడే వారియర్ హంటర్స్ అనే దళం. దీనికి సమాంతరంగా సైబర్ సైంటిస్టు డాక్టర్ ఇడో ఒక వారియర్ హంటర్. శిథిలాల్లో మొండెం లేని అమ్మాయి తల. అందులో సజీవంగా వున్న మెదడు. డాక్టర్ ఇడో దానికి సైబర్ శరీరాన్నిచ్చి సైబోర్గ్ గా మార్చడం. ఆమె అలీటా అవడం.

***

ఎన్నెన్ని కోరికలు!

కెమెరాన్, రోడ్రిగ్స్

       సైబోర్గ్ అలీటాకి తానెవరో, ఏం జరిగి మూడొందల ఏళ్ల క్రితం శరీరాన్ని కోల్పోయిందో గుర్తుకు రాదు. ఇది తెలుసుకోవాలన్న కోరికతో వుంటుంది. అంతలో బాయ్ ఫ్రెండ్ పరిచయమై అతను పైన వేలాడుతున్న సాలెం సిటీని చూపిస్తే, అక్కడికి చేరుకోవాలన్న కోరిక కూడా పుడుతుంది. ఇంతలో తనకి ప్రాణం పోసిన డాక్టర్ ఇడో మీద హంటర్ వారియర్స్ దాడి చేస్తే, వాళ్ళనుంచి డాక్టర్ ని కాపాడేక, తను హంటర్ వారియర్ కావాలన్న కోరిక కూడా పుడుతుంది. బాయ్ ఫ్రెండ్ సాలెం సిటీ చేరుకునే లక్ష్యంతో వుంటే, అక్కడికి అతన్ని చేరవేయాలన్న కోరిక కూడా పుడుతుంది. ఇన్నికోరికల అలీటా ఏ కోరికకీ న్యాయం చేయదు. 

          ఒక కోరికతో కొన్ని సీన్లు సాగేక, ఆ కోరికని వదిలేసి ఎదురైన ఇంకో కోరికతో ఇంకొన్ని సీన్లు సాగడం. ఇలా నాల్గు కోరికలు మారిపోతూ నాల్గు ఎపిసోడ్లుగా కథ నడవడం. స్టార్ట్ అండ్ స్టాప్ ఫెయిల్యూర్ బాపతు ఎపిసోడిక్ కథనం. ఇలా తెలుగులో ఎన్ని వచ్చి ఫ్లాప్ కాలేదు. సినిమా అన్నాక ఒకే కోరిక, ఒకే పోరాటం, దాంతో ఒకే కథ అనేది సామాన్య సూత్రం. దీన్ని బ్రేక్ చేస్తే ఎపిసోడిక్ కథనమవుతుంది. ఎపిసోడిక్ కథనం డాక్యుమెంటరీ అవుతుంది. డాక్యుమెంటరీ సినిమా అవదు. 

        ఆ కోరికలు కూడా పరస్పర విరుద్ధమైనవి. మొదట మూడొందల ఏళ్ల క్రిందట తానెవరో తెలుసుకోవాలన్న కోరికతో వుంటే, బాయ్ ఫ్రెండ్ సాలెం సిటీని చూపిస్తాడు. అక్కడికి చేరుకోవాలన్న కోరిక ఆమెకి పుడుతుంది. అక్కడికి (స్వర్గానికి) చేరుకోవాలనుకు
న్నప్పుడు, తానెవరో ఇంకా తెలుసుకోవాల్సిన అవసరమే లేదు. స్వర్గంలో పూర్వ జన్మలన్నీ తెలిసిపోతాయి. నోవా గారు ఇచ్చే లిస్టు చదువుకోవచ్చు.  

          అలీటా శత్రువులతో రెండు సార్లు యాక్షన్ సీన్స్ లో వున్నపుడు, ఆమె మెదడులో తను పాల్గొంటున్న యుద్ధ దృశ్యాలు ఫ్లాష్ అవుతాయి. దాన్ని బట్టి పూర్వం తాసు సైనికురాలేమో అనుకుంటుంది. దీనికి కంక్లూజన్ వుండదు. సినిమా మొత్తం చూశాక అలీటా ఎవరన్న ప్రశ్న మనకే వుంటుంది, తెలుసుకోవడం ఆమె మర్చిపోతుంది.

       ఇక సాలెం సిటీకి చేరుకోవాలని ఆమెకి పుట్టిన కోరిక, బాయ్ ఫ్రెండ్ అక్కడికెళ్ళే ప్రయత్నాల్లో వున్నాడని తెలియడంతో, ఆర్ధికంగా అతడికి హెల్ప్ చేసే ప్రయత్నాలతో తన కోరికకే విరుద్ధమై పోతుంది. 

          బాయ్ ఫ్రెండ్ సాలెం సిటీ చేరుకునే ఆర్ధిక అవసరాలకోసం సైబోర్గులని చంపి విడిభాగాలు తీసి అమ్ముకుంటూంటాడు. క్లయిమాక్స్ లో చివరికామే సాలెం సిటీకి తీసికెళ్తున్నప్పుడు, నోవా అడ్డుకుంటూ ముళ్ళ చక్రం ఆపరేట్ చేసి బాయ్ ఫ్రెండ్ ని చంపేస్తాడు. ఎలాగూ అలీటా క్లయిమాక్స్ లో మోటార్ బాల్ అనే మృత్యు క్రీడ గెల్చి, సాలెం సిటీకి ప్రవేశాన్ని పొందుతున్నప్పుడు, తనతో బాటూ బాయ్ ఫ్రెండ్ ని తీసికెళ్ళ వచ్చు. ఆర్ధి కంగా అతడికి తోడ్పడే అవసరమేమిటి? విడిగా అతణ్ణి సాలెం సిటీకి చేరవేయడం దేనికి? తను మృత్యు క్రీడ గెల్చి బాయ్ ఫ్రెండ్ తోనే సాలెం సిటీ కెళ్తే, బాయ్ ఫ్రెండ్ ని నోవా చంపే వాడు కాదుగా? 

          ఇక హంటర్ వారియర్ గా వుండలాన్న కోరిక : ఈ కోరికతో హంటర్ వారియర్స్ క్లబ్బు కెళ్ళి తనని సభ్యురాలిగా చేరుకోవాలని ఫైట్ చేస్తుంది. స్వర్గానికే వెళ్ళా లనుకున్నప్పుడు ఇంకా యమభటులతో పనేముంది? స్వర్గానికి టికెట్ నిచ్చే ఆ మోటార్ బాల్ అనే మృత్యుక్రీడ మీద దృష్టి పెట్టి, అటు వైపు కృషి చేయకుండా? 

          ఇలా పరస్పర విరుద్ధ భావాలతో వుండే పాత్ర పాసివ్ పాత్రే. ఏం చేయాలో స్పష్టత వుండదు. ఏం చేయాలన్న స్పష్టత ప్రత్యర్ధి నోవాకే వుంది. అతడికి సూపర్ ఎనర్జీ తో వున్న ఆమె మెదడు కావాలి. దీనికి వెక్టర్ ని పురిగొల్పాడు. వెక్టర్ హంటర్ వారియర్స్ ని ఉసిగొల్పాడు. హంటర్ వారియర్స్ ఆమె మృత్యుక్రీడ గెలవకుండా చంపి మెదడు అపహరించే ప్లానేశారు......అంటే ప్రత్యర్ధి వైపు నుంచి కథ స్పష్టంగా – ఒక లైనులో పారడైంలోనే  వుంది. 

          దీన్ని ప్రధాన పాత్ర అలీటా వైపు మారిస్తే, సూపర్ బ్రెయిన్ వున్న అలీటా సాలెం సిటీకి ప్లానేస్తే, కౌంటర్ గా నోవా ఆమె సూపర్ బ్రెయిన్ ని అపహరించాలని ప్లానేశాడు. దీన్ని what if? ప్రశ్నగా మారిస్తే, “సాలెం సిటీ గోల్ తో వున్న అలీటా సూపర్ బ్రెయిన్ ని కోల్పోయే ప్రమాదం ఏర్పడితే?”...ఈ ప్రశ్నతో అలీటాకి థ్రెట్ ఎంతుందో పైకే కన్పించిపోతోంది. ఇదే ఈ సింపుల్ లైనుతో కూడిన కథకి యూఎస్పీ. 

          హై కాన్సెప్ట్ కథ ఒక ప్రశ్నతో సింపుల్ లైన్ కథగా వుంటుందని పైన చెప్పుకున్నాం. సూటిగా మాస్ అప్పీల్ తో సామాన్య ప్రేక్షకులకి కూడా అర్ధమైపోయే కథ. అంటే అప్పుడు అలీటాకి పూర్వ జన్మ జిజ్ఞాస వుండకూడదు. బాయ్ ఫ్రెండ్ ఇచ్చిన స్ఫూర్తితో సాలెం సిటీకి చేరుకోవాలన్నదే ఏకైక గోల్. బాయ్ ఫ్రెండ్ కి ఆర్ధికంగా సాయపడే ఆలోచన కూడా వుండకూడదు. హంటర్ వారియర్స్ క్లబ్ లో చేరే ఆలోచన అసలే వుండకూడదు. ప్లాట్ పాయింట్ వన్ ఆమెకి సాలెం సిటీ వెళ్ళాలన్న ఏకైక గోల్. మిడ్ పాయింట్ తన బ్రెయిన్ కోసం హంటర్ వారియర్స్ ప్రయత్నిస్తున్నారన్న టర్నింగ్, ఇక ప్లాట్ పాయింట్ టూ వచ్చేసి  హంటర్ వారియర్స్ ని ఎదుర్కొంటూ మోటార్ బాల్ మృత్యు క్రీడలో పాల్గొనడం. ఇంతే, సింపుల్. 

        నిజమే,ఇదంతా చదువుతున్న వాళ్లకి రెండొందల మిలియన్ డాలర్ల మెగా మూవీ తీస్తున్న హాలీవుడ్ అపర బ్రహ్మలకి ఎలా తీయాలో తెలీదా, ఎక్కడో హైదరాబాద్ లో కూర్చుని రాస్తున్నాడు -  అన్పించవచ్చు. ఏం చేస్తాం, ఈ బ్లాగు వున్నదే రాయడానికి కాబట్టి రాయాల్సి వస్తోంది. రాయకపోయినా తంటా, రాసినా మంట. తప్పదు. 

          ఈ కథకి కథనాన్ని పారడైం లో ఆలోచించకుండా మోనోమిథ్ లో ఆలోచించడం వల్ల, అదికూడా గజిబిజిగా ఆలోచించడం వల్ల, ఇంటర్వెల్ వరకూ రకరకాల దశలు మారుతూ ఎటూ కదలకుండా వుండిపోతుంది స్టోరీ బిజినెస్. ఈ బిగినింగ్ విభాగంలో ఆర్డినరీ వరల్డ్, కాల్ టు అడ్వెంచర్, రెఫ్యూజల్ ఆఫ్ ది  కాల్, మీటింగ్ ది మెంటర్, క్రాసింగ్ ది థ్రెషోల్డ్;  టెస్ట్స్, ఎలైస్, ఎనిమీస్; అప్రోచ్ అనే 7 మజిలీల్లో మొదటిదే కాసేపు వుంటుంది. మిగిలినవి అలీటా మారిపోయే రకరాల కోరికల మధ్య గల్లంతవుతాయి. ఇంటర్వెల్ లో ఆమె వెక్టర్ పంపిన మహా సైబోర్గ్ తో తలపడి ముక్కచెక్కలవుతుంది. ఆమెకి డాక్టర్ ఇడో ఇచ్చిన శరీరం ఛిన్నాభిన్నమై పడిపోతుంది. మళ్ళీ కొత్త శరీరమిస్తాడు డాక్టర్. ఇంటర్వెల్ లోనే ఈ స్థాయి పతనం ఎంత రాంగ్ కథనమంటే, మోనోమిథ్ కూడా ఒప్పుకోదు, పారడైం కూడా ఒప్పుకోదు. అరిస్టాటిల్ కూడా ఒప్పుకోడు. ప్రధాన పాత్ర సర్వశక్తులూ కోల్పోయి కుప్పకూలే ఈ ఘట్టం కథనంలో ఎప్పుడొస్తుందంటే, క్లయిమాక్స్ ముందు ప్లాట్ పాయింట్ టూ లోనే!

      పారడైం లో, లైట్ ప్లాట్ లైన్ తో, హెవీ యాక్షన్ చేయకుండా, అర్ధమవడానికి పెనుభారమైపోయిన హెవీ కథతో అలీటాని అర్ధంగాని బొమ్మలా తయారుచేశారు. హాలీవుడ్ మంత్రం ఒకటే - హై కాన్సెప్ట్ కి లైట్ కథతో యాక్షన్ హెవీగా వుండాలి, అదే హెవీ డ్రామాకి హెవీ కథతో లైట్ యాక్షన్ వుండాలి. హెవీ కథ, హెవీ యాక్షన్ అంటూ వుండవు. లైట్  కథ లైట్ యాక్షన్ అంటూ వుండవు. కథ - యాక్షన్ పరస్పరం యాంటీగా వుంటాయి. తెలుగులోనే ఇంకా లైటర్ వీన్ లవ్ స్టోరీస్ అంటూ కొత్త సిద్ధాంతాన్ని కనుగొని, లైట్ కథకి  లైట్ యాక్షన్ తగిలించి చావగొడుతున్నారు. ఇందులో తాజాగా నిన్న విడుదలైన తెలుగు డబ్బింగ్ ‘దేవ్’ కూడా చేరి ఫ్లాపయింది. కలియుగం యాక్షన్ లో వుంటే కబుర్లతో పని జరుగుతుందను కుంటున్నారు. 

          క్లయిమాక్స్ మోటార్ బాల్ మృత్యు క్రీడలో అలీటా పద్మవ్యూహంలో చిక్కుకునే యాక్షన్ సీనుంటుంది. తన సూపర్ బ్రెయిన్ తో దీన్ని ఛేదించి సాలెం సిటీకి టికెట్ కొడుతుంది. కానీ స్క్రీన్ ప్లే అనే త్రిశంకు స్వర్గంలో పడి విలువైన ప్రేక్షకుల టికెట్ కొట్టడంలో విఫలమైంది.

―సికిందర్