688 : రివ్యూ

దర్శకత్వం : అనురాగ్ కశ్యప్
తారాగణం : తాప్సీ, అభిషేక్ బచ్చన్, విక్కీ కౌశల్, ఆష్నూర్ కౌర్ తదితరులు
రచన : కణికా ధిల్లాన్, సంగీతం : అమిత్ త్రివేది, ఛాయాగ్రహణం : సిల్వెస్టర్ ఫొనెస్కా
 బ్యానర్స్ : కలర్ ఎల్లో ప్రొడక్షన్స్, ఫాంటమ్ ఫిలిమ్స్
నిర్మాతలు : ఆనంద్ ఎల్ రాయ్, వికాస్ భల్
విడుదల : సెప్టెంబర్ 14, 2018

       వివిధ నేర ప్రవృత్తుల్ని విజయవంతంగా తెర కెక్కిస్తూ వస్తున్న దర్శకుడు అనురాగ్ కశ్యప్ ప్రేమ ప్రవృత్తిని చేపట్టాడు. గతంలో ‘దేవ్ –డీ’ అనే ఒక ప్రేమ ప్రవృత్తిని ఆల్రెడీ పరిచయం చేశాడు. ఫార్ములా ప్రేమలకి దూరంగా ప్రేమల్లో చీకటి కోణాల్ని చూపే వాస్తవికతని మరోసారి ‘మన్ మర్జియా’ (మనోభీష్టాలు) గా చేసి దృశ్యీకరించాడు. ప్రయోగాత్మక పాత్రల బాట పట్టిన ‘పింక్’ ఫేమ్ హీరోయిన్ తాప్సీ (తాపసీ పేరు కాస్తా ఇంగ్లీష్ స్పెల్లింగు చూసి తెలుగులో తాప్సీ అయిపోయింది, ఆరతీ అగర్వాల్ ఆర్తీ అగర్వాల్ అయినట్టు...తాప్సీ, ఆర్తీ, భార్తీ (భారతి) లు హిందీ ఉచ్ఛారణలు మాత్రమే, తెలుగు ఉచ్ఛారణలు కాదు) ఈసారి ఇంకో డార్క్ పాత్ర పోషించింది. మరి వీళ్ళిద్దరి తొలి కాంబినేషన్ లో అభిషేక్ బచ్చన్ ఏం చేస్తున్నట్టు. ‘పింక్’ లో అమితాబ్ బచ్చన్ గారు తాప్సీ ని కాపాడేరు. కుమారుడు ఇప్పుడు డార్క్ షేడ్ తాప్సీతో ఏం చేశారు? దారిలో పెట్టారా? దగా చేశారా?...ఓసారి చూసి తెలుసుకుందాం...

కథ 

      పంజాబ్ లోని అమృత్ సర్. అక్కడ తల్లి, తండ్రీ, ఓ చెల్లెలూ వున్న రూమీ (తాప్సీ) సిగరెట్లు, మందు, సెక్స్ కొట్టే మధ్యతరగతి అమ్మాయి. డీజే అయిన విక్కీ (విక్కీ కౌశల్) అనే బాయ్ ఫ్రెండ్ తో ఇంట్లోనే డాబా మీద గదిలో పట్టపగలు చాటుమాటుగా అదే పనిగా సెక్స్ కొడుతూ ఒకరోజు దొరికిపోతుంది. ఇక పెళ్లి చేసేస్తామంటారు తల్లిదండ్రులు. ఒక లండన్ సంబంధం వుందంటారు. విక్కీని తప్ప ఎవర్నీ చేసుకోనంటుంది. రేపు విక్కీని తెచ్చి మాట్లాడిస్తానంటుంది. మాట్లాడించకపోతే లండన్ సంబంధం చేసుకోవాలంటారు. కానీ విక్కీ రావడానికి ఒప్పుకోడు. అతడికి ప్రేమా సెక్సూ ఓకే గానీ, పెళ్ళంటే భయం. ఐతే లేచిపోదామంటుంది. ఆ ప్రయత్నం కూడా సాగదు. ఇక తప్పనిసరై లండన్ సంబంధం ఒప్పుకుంటుంది. లండన్ పెళ్లి కొడుకు ఎన్నారై రాబీ (అభిషేక్ బచ్చన్) కి విక్కీ గురించి తెలుస్తుంది. వాడితో తిరిగిన ఇది నాతో పెళ్ళికి ఎందుకు రెడీ అయిందీ చూద్దామని పెళ్లి చేసుకుంటాడు. విక్కీని మర్చిపోదామనుకుని రాబీని చేసుకున్న రూమీ, అదే తన మన్ మర్జియాలతో ఇరకాటంలో పడుతుంది. మనసూ తనువూ రాబీకి ఇవ్వలేక ఇబ్బందుల్లో పడిపోతుంది. రాబీ ఇంటరెస్టింగ్ గా ఇదంతా గమనిస్తూంటాడు...దీనికి పరిష్కారమేమిటి? విడాకులేనా? విడాకులతో సమస్య తీరిందా?...ఇదీ కథ.

ఎలావుంది కథ 

     కథకి ‘మన్ మర్జియా’ అనే టైటిలే ఒక మంచి ఆకర్షణ. గతంలో ‘మన్’, ‘మన్ పసంద్’, ‘మనోరంజన్’ లాంటి టైటిల్స్ తో సినిమా లొచ్చాయి గానీ, ఈ టైటిల్ అంత మనోరంజకంగా అన్పించవు. ‘మన్ మర్జియా’ మనసు పులకించే అద్భుతమైన వాక్యం. కవిత్వంలో ఇంత వరకూ కన్పించని హిందీ - ఉర్దూల ఈ పదబంధమే ఒక మనోహరమైన ప్రయోగం. మ్లానమైన మనసుని కడిగిపారేసే, ఈ పాజిటివ్ ఫీలింగునిచ్చే టైటిల్ నిజానికి ఈ కథా వస్తువుకి  విరుద్ధమైనది. కథ వచ్చేసి మనసు చీకటి కోణాల్ని చూపెడుతుంది, విరుద్ధంగా టైటిల్ అందమైన అనుభూతుల్ని ప్రేరేపిస్తుంది. అంటే డార్క్ మూడ్ లో పాత్రలుంటాయే తప్ప ఆ డార్క్ మూడ్ లోకి ప్రేక్షకులు ఏ మాత్రం వెళ్లరు. ఇంతవరకూ వచ్చిన డార్క్ మూడ్ కథలతో సినిమాల్లోనైతే  ప్రేక్షకుల్ని కూడా డార్క్ మూడ్ లోనే ముంచేసేవిగా వున్నాయి. 

          కథ ముక్కోణ ప్రేమ కథే అయినా రొటీన్ గా మరో ఏడ్పుల ముక్కోణ ప్రేమ అయిపోలేదు. ‘మౌన రాగం’, ‘హమ్ దిల్ దే చుకే సనమ్’, ‘ధడ్కన్’ లాంటి ముక్కోణ కథలకి ఇక్కడ సెక్స్ ని జోడిస్తే కొత్త ముక్కోణమై పోయింది. ఒక హీరోయిన్ - ఇద్దరు హీరోల ట్రయాంగిల్ లో రెండో హీరోని పెళ్లి చేసుకున్న హీరోయిన్,  ప్రేమించిన మొదటి హీరోని మర్చిపోలేక పోవడమనే పాత ఫార్ములా కథకి,  సెక్స్ ని కలపడంతో ముక్కోణ ప్రేమ కథ అప్డేట్ అయిపోయింది. ఈ ఇన్నోవేట్ చేసిన ఐడియాకే ముందు మార్కులేయాలి. పెళ్ళయిన హీరోయిన్ మొదటి హీరోతో రంకు సాగించడమనే బి గ్రేడ్, సి గ్రేడ్ సినిమాల కథని మెయిన్ స్ట్రీమ్ లోకి తీసుకొచ్చారు. సొసైటీలో పెళ్లయినా, కాకపోయినా రంకులెన్నో- కొన్ని మర్డర్లతో – పరువుతీసి సంచలనం సృష్టిస్తూ వుంటాయి. ఇలాటి ఒక రంకు (రిలేషన్ షిప్ అనే గొప్ప పేరు దీనికి) కథే ఈ మనసు ఇష్టాయిష్టాల కొత్త ప్రేమల కథ. 

         యూత్ ప్రేమ కథలు చెప్తున్నప్పుడు, కథంతా బాక్సాఫీసు అప్పీల్ కోసం హీరోహీరోయిన్ల చేతుల్లోనే వుండాలన్న ఈ కాలపు రోమాంటిక్ జానర్ మర్యాదని పూర్తిగా పాటించడం ఇక్కడ కన్పిస్తుంది. హీరోహీరోయిన్లు కలగాపులగం చేసుకున్న వాళ్ళ ప్రేమలతో చేతులెత్తేస్తే, ఎందుకో ఘోరంగా మనోభావాల్ని దెబ్బతీసుకున్న పెద్ద వయసు పాత్రలు జోక్యంచేసుకుని, విలువలూ నీతులూ తలంటుపోసి, తిరిగి సాంప్రదాయ చట్రంలోనే బిగించి పారేసే నాన్సెన్స్ ఇక్కడ లేదు. మనోభావాల్ని కనిపెట్టిన వాడెవడో వాడు జీవితంలో ఎడా పెడా ఓడిపోయిన వాడై వుంటాడు. ఇది ప్రేమ సినిమాలకొచ్చిన చావైంది. ప్రేమల్లో యూత్ తాము సృష్టించుకునే సమస్యల్నితామే పరిష్కరించుకునే స్వావలంబనని, సృజనాత్మకతనీ పెంపొందించుకునే దృష్టితో వుండేవే నేటి నిజమైన, ప్రాక్టికాలిటీ గల, రోమాంటిక్ జానర్ కథలు. ఇలాటిదే ఈ కథ.   

ఎవరెలా చేశారు

      గత నెల విడుదలైన ‘నీవెవరో’ తర్వాత మరో యాంటీ హీరోయిన్ పాత్ర డేరింగ్ గా నటించింది తాప్సీ. స్వార్ధం, అయోమయం, పంతం, పిరికితనం అన్ని అవలక్షణాల పుట్ట ఈ పాత్ర. చాలా సంకీర్ణ భావోద్వేగాల పాత్ర. నెగెటివ్ నుంచి పాజిటివ్ లోకి వచ్చినట్టే వచ్చి మళ్ళీ నెగెటివ్ లోకే వెళ్ళిపోతూంటుంది పదేపదే. తల్లిదండ్రులతో మాట్లాడడానికి రానన్న బాయ్ ఫ్రెండ్ తో సెక్స్ తో ఎరవేసి మరీ మోసపోతుంది. వాణ్ణి ఎందుకు నమ్ముతుందో అర్ధంగాని అయోమయం. ఒక్క లేచిపోదామని తను చెప్పినప్పుడు మాత్రం ప్రాక్టికల్ గా ఆలోచిస్తుంది. లేచిపోయి ఎక్కడుంటాం, అద్దె ఎలా కడతాం, ఏంచేసి బతుకుతాం అన్న ప్రశ్నలకి బాయ్ ఫ్రెండ్ తెల్లమొహం వేయడంతో ఛీ కొట్టి వెళ్ళిపోతుంది. మళ్ళీ మామూలే, వాడే కావాలి.

          అభిషేక్ పాత్రతో పెళ్ళయాక, హానీమూన్లో తన పరిస్థితికి కాశ్మీర్ మంచు పర్వతాల మధ్య గుండెలు పగులగొట్టుకుని ఏడ్చేస్తుంది. ఈ ఏడ్పుని కూడా దర్శకుడు అనురాగ్ కశ్యప్ తనదైన స్టయిల్ లో మర్చిపోలేని  విధంగా ఔట్ డోర్లో ఏకాంత సన్నివేశంగా  చిత్రీకరించాడు. మళ్ళీ మామూలే, సిగరెట్ దమ్ము కొట్టి ఏడ్పంతా మర్చిపోతుంది. హనీమూన్లోనే క్యాజువల్ గా చెప్తుంది, తను వర్జిన్ కాదని. తను కూడా వర్జిన్ కాదంటాడు. ఫస్ట్ నైట్ మాత్రం ఆమె వల్ల యింకా జరగదు. ఇది ఇలాటి కథల్లో మామూలే. ఎందుకంటే హీరోయిన్ని పవిత్రంగా మొదటి హీరోకి అప్పజెప్పాలి. అందుకని హీరోయిన్ ముభావంగా, పాసివ్ గా వుండిపోతుంది. ఇక్కడ తాప్సీ పాత్రకి ఈ సెంటిమెంట్స్ ని కాపాడే ఫార్ములా లేదు.  భర్త సమక్షంలోనే రహస్యంగా బాయ్ ఫ్రెండ్ తో మెసేజీలు, మంతనాలు. హనీ మూన్ ఎలావుంది, మజా వస్తోందా అని ఇంటి దగ్గర్నుంచి ఫోన్ వస్తే – ఆసలేమైందంటే లాస్ట్ మూమెంట్ లో కండోం వేసుకోలేదని ఆయనకి గుర్తొచ్చింది... ఆయన కండోం తెచ్చుకునే వరకూ హనీమూనూ ... అని కసికసిగా అనేస్తుంది. 

      నగర జీవితాల్లో ఉన్నత కుటుంబాల్లో ఇలాటి పాత్రల్ని చూపించేవారు. ఇప్పుడు మధ్యతరగతి కుటుంబాల్లో నిర్మొహమాటంగా చూపిస్తున్నారు. మధ్య తరగతి కుటుంబాల్లో కొందరు స్త్రీలు ఎందుకిలా మారుతున్నారో ‘లిప్ స్టిక్ అండర్ మై బురఖా’ లో దర్శకురాలు అలంకృతా శ్రీవాస్తవ చక్కగా విశ్లేషించింది. 

          తాప్సీ ఎలాటి సన్నివేశంలోనూ నటనలో విఫలం కాదు. ఆమెని చూస్తున్న కొద్దీ ఆసక్తే.
          ఇక అభిషేక్ బచ్చన్. ఇతడిదో చిత్రమైన పాత్ర. విక్కీ గురించి తెలిసీ నన్నెందుకు చేసుకున్నావ్, మంచమ్మాయనా? హాట్ గా వున్నాననా?...అని ఆమె అడిగితే, మంచమ్మాయో కాదో ఆలోచించలేదంటాడు, హాట్ గా వున్నావని చేసుకున్నానంటాడు. ఆమె ఎప్పటికై నా విక్కీని మర్చిపోతుందని నమ్మి మౌనంగా ఆమె చేష్టల్ని భరిస్తాడు. ఎప్పుడైతే ఆమె దొంగ చాటుగా వెళ్లి విక్కీతో సెక్స్ కొట్టించుకుంటుందో అప్పుడుగానీ కళ్ళు తెర్చుకోవు. ఎంత ఉద్రిక్త పరిస్థితుల్లో కూడా కూల్ గా వుంటూనే సమస్యని ఓ కొలిక్కి తెచ్చే పాత్రని అభిషేక్ నీటుగా పోషించాడు. 

          విక్కీ కౌశల్ బాయ్ ఫ్రెండ్ పాత్ర కామిక్ రిలీఫ్. తను డీజే నంటాడు, డాన్సు లేస్తాడు, సెక్స్ చేస్తాడు, పెళ్ళనే సరికి పిల్లిలా పారిపోతాడు. మళ్ళీ ఆమెని కోరుకుంటాడు. అస్థిర మనస్తత్వంతో చిక్కడు దొరకడుగా వుంటాడు. 

          పూర్తిగా మనసులోని చీకటి కోణాలతో, వాటి తాలూకు మానసిక సంఘర్షణలతో, సంఘటనలతో సాగే ఈ నియో కమర్షియల్ మూవీ – మ్యూజికల్ గా ఒక క్రియేటివిటీతో డార్క్ మూడ్ ని పోగొట్టేసి ప్రేక్షకుల్ని ఎంటర్ టైన్ చేస్తూ పోతుంది. వ్యూహాత్మకంగా మొత్తం పన్నెండు పాటలతో మూడ్ ని ఎలివేట్ చేస్తూ ఈ అసహజ పాత్రల పచ్చి కథకి షుగర్ కోటింగ్ ఇస్తూ పోయారు. ఇలా చేసి వుండకపోతే ఈ తరహా కథని భరించడం కష్టమయ్యేది. ఇంతేగాక హిందీలో అపూర్వంగా ఒక రోమాంటిక్ మూవీని ఇన్నేసి పాటలతో బ్రాడ్వే మ్యూజికల్ లా చూస్తున్న ఫీల్ కల్గించారు. ఆస్కార్ అవార్డు హాలీవుడ్ ‘చికాగో’ అనే బ్రాడ్వే మ్యూజికల్ పాటలతోనే కథ చెప్తూ పోయినట్టు, ఇక్కడ ఒక కీలక సన్నివేశం వచ్చి నప్పుడల్లా నేపధ్య సంగీతం బదులు హుషారయిన పాట మొదలైపోతుంది. విషాద పాటొకటి చివర్లో అభిషేక్ నిజం తెలుసుకున్నప్పుడు వస్తుంది. 

     పంజాబీ అయిన రచయిత్రి కణికా ధిల్లాన్ పంజాబ్ నేటివిటీలో, పంజాబీ పాత్రలతో సహజంగా రాయగల్గింది. ఆమె రాతే ఆయువుపట్టు ఈ రెబల్ ట్రయాంగులర్ కి. ఇక్కడామె స్త్రీ పక్షపాతం చూపించకుండా, ఏ భావజాలం జోలికీ పోకుండా, సృష్టించిన పాత్రల మనో విశ్లేషణలతోనే ప్రాక్టికల్గా, లాజికల్ గా రాసుకొచ్చింది. రైటింగ్ బావున్నప్పుడు మేకింగ్ లో మిగతా అన్ని శాఖలూ సార్ధకమవుతాయి. 

          దర్శకుడు అనురాగ్ కశ్యప్ ప్రేమల మూలాల్లోంచి పాత్రల్ని వొలిచి భావోద్వేగాల్ని చూపించాడు. ప్రేమల మూలాలు సెక్సే ఫ్రాయిడ్ ప్రకారం. టెక్నికల్ గా ఎలాటి హంగామా లేకుండా దృశ్యాల్ని సహజత్వం ఉట్టిపడేలా తీశాడు. ముగింపులో చాలా లాంగ్ ట్రాకింగ్ షాట్ వుంటుంది. వీధుల్లో అభిషేక్, తాప్సీలు నడుచుకుంటూ నడుచుకుంటూ పోతూనే చాలాసే పు మాట్లాడుకునే షాట్. వీళ్ళు లైఫ్ పార్టనర్స్ గా కలిసి నడవలేదు, విడిపోతున్నప్పుడైనా కలిసి నడవాలనేమో... ఈ లాంగ్ వాకింగ్ లో మాటలతోనే ముగింపు వచ్చేస్తుంది కథకి ఒక ఫినిషింగ్ టచ్ తో. ఒక సస్పన్స్ తో ముగింపుని ఆపేస్తూ కూడా.

          దీనికి ముందు అభిషేక్ ఇంకో అమ్మాయిని పెళ్లి చూపులు చూసినప్పుడు, ఆమె ఒక మాట అడుగుతుంది. తన పేరేంటో చెప్పమని. చెప్పలేకపోతాడు. ఫర్వాలేదు టైం తీసుకుని చెప్పమని వెళ్ళిపోతుంది. ఆమె పేరుకూడా చెప్పలేని మతిమరుపు వుందంటే,  అతడి మనసులో ఇంకా తాప్సీ పాత్ర వున్నట్టే.  ఇదే మాట తను ఒకప్పుడు తాప్సీతో అంటాడు - నీ మనసులో వాడున్నాడా నేనున్నానా చెప్పమని. ఆమె చెప్పలేకపోతే, ఫర్వాలేదు టైం తీసుకుని చెప్పమంటాడు. ఇదే మాట ఇప్పుడు తనకి ఎదురైంది. ఇలా చిన్న చిన్న మాటల్లో నిగూఢా ర్థాలతో  బలమైన సన్నివేశాలు తీశాడు అనురాగ్. 

చివరికేమిటి 

       ప్రేమలు ఎంత గజిబిజిగా వుంటున్నాయో ప్రాక్టికల్ గా చూసి తీసినప్పుడు మూస ఫార్ములాలు తీసే అగత్యం ఏర్పడదు. చాలా పూర్వం వేశ్యతో ప్రేమ కథలుగా ‘దస్తక్’, ‘జరూరత్’ లాంటి ఏ – సర్టిఫికేట్ ‘పెద్దలకు మాత్రమే’ సినిమా లొచ్చేవి. ఇప్పుడా అగత్యం, వేర్పాటూ లేవు. ‘రిలేషన్ షిప్’ లో ఎవర్నైనా బోల్డ్ గా చూపించొచ్చు. అప్పుడే సినిమాలు చరిత్ర క్రమాన్ని నమోదు చేస్తూ కాలపరీక్షకి నిలబడతాయి. దీనికి మనస్తత్వాల లోతైన అవగాహన అవసరం. లోతుపాతుల్లేకుండా రాత్రికి రాత్రి ఏదీ సృష్టి జరగదు. అలవాటుగా రాసి తీసే దర్శకుడు ఈసారి రాయకుండా, రాసిన రచయిత్రి కాన్సెప్ట్ చెడకుండా తీసి, బాలీవుడ్ కమర్షియల్ సినిమాని అర్ధవంతమైన నియో - కమర్షియల్ వైపుకి నడిపించాడు. ‘మన్ మర్జియా’ ప్రేమల మీద వేసిన కొత్త సెర్చిలైట్.

―సికిందర్  

687 : స్పెషల్ ఆర్టికల్

గేట్ కీపర్ : జేసన్ బ్లమ్
నిర్మాత, బ్లమ్ హౌస్ ప్రొడక్షన్స్
ఆమోదించిన స్క్రిప్టులలో కొన్ని : పారా నార్మల్ యాక్టివిటీ, విప్లాష్, గెటవుట్
         

      స్క్రీన్ రైటింగ్ లో చీకాకు పెట్టె ట్రెండ్ : సెల్ఫ్ డబ్బా కొట్టుకునే కామెడీలు ఎక్కువవుతున్నాయి. కథలో జరుగుతున్న వాటి గురించి పాత్రలు కామెంట్లు చేయడం. స్క్రీన్ ప్లే అదిరిందనో ఇంకేదనో రచయిత / దర్శకుడు సెల్ఫ్ డబ్బా కొట్టుకుంటూ పాత్రలచేత పలికించడం. 2000 సంవత్సరం ఆరంభంలో ఇది ఫన్నీగానే అన్పించేది ప్రేక్షకులకి. ఇప్పుడు ఓవరై పోయింది.  ఇంకా పాత్రలు ఇతర సినిమాల్ని ప్రస్తావిస్తూంటాయి. ఇది కథలోంచి ఇతర సినిమాల పైకి ప్రేక్షకుల దృష్టి మళ్లించడమే. మీరు థియేటర్లో వున్నారని ప్రేక్షకులకి గుర్తు చేయడమే. కానీ రచయిత చేయాల్సింది ప్రేక్షకులు తాము థియేటర్లో వున్నామన్న సంగతి మర్చిపోయేలా చేయడమే.

జేసన్ బ్లమ్

       

          స్క్రిప్టు సాంప్రదాయ ఫార్మాట్ ని అనుసరించక తప్పదా? :  అస్సలు అవసరంలేదు. దాదాపు మేం చేసిన సినిమాలు ఫార్మాట్ ని బ్రేక్ చేసినవే. ‘పారానార్మల్ యాక్టివిటీ’ తో మొదటి సారిగా ఫార్మాట్ ని బ్రేక్ చేశాం. ఈ ఎనబై నిమిషాల మూవీలో ఫస్ట్ యాక్టే (బిగినింగ్) 45 నిమిషాలూ నడుస్తుంది. ఆ తర్వాత సగానికి ప్రధాన మలుపు వస్తుంది. సినిమాల్లో త్రీ యాక్ట్ స్ట్రక్చర్ ని బ్రేక్ చేయడం రిస్కుతో కూడుకున్న పనే. మేం చేసే ప్రతీ సినిమా ఫార్మాట్ అనే ఒక కాన్సెప్ట్ వుందనే హెచ్చరిక చేస్తూనే వుంటుంది.  

          చదివిన మొదటి మంచి స్క్రిప్టు : ‘సినిస్టర్’, ఆ తర్వాత ‘గెటవుట్’. 

      ఉన్న పాత సినిమాలనే సోర్స్ గా తీసుకుని రాసే స్క్రిప్తుల గురించి : నిజం చెప్పాలంటే ఈ సమ్మర్ లో బాగా సక్సెస్ అయిన సినిమాలు సూపర్ హీరో సినిమాలే. వీటికే ప్రేక్షకులు ఎక్కువ వుంటున్నారు. వంద మిలియన్ డాలర్లతో నేను  సినిమా తీస్తే ఇదే పని చేస్తాను. పాత సినిమాలని సోర్స్ గా తీసుకుని కామెడీలు తీస్తున్నారు. వాటికంటే హార్రర్స్ ని రీబూట్ చేయడం మేలు. హార్రర్స్ కాన్సెప్ట్స్ మీద ఆధారపడతాయి; కామెడీలు ఎక్కువగా నటుల మీదా కమెడియన్ల మీదా ఆధార పడతాయి. 

           స్క్రిప్టు నచ్చలేదని చెప్పడం : దీని గురించి నాకు స్ట్రాంగ్ ఫీలింగ్స్ వున్నాయి. ఎందుకంటే స్క్రిప్టు బాగాలేదంటే కడిగి పారేసే వాళ్ళే ఎక్కువ. అందుకని అభిప్రాయం చెప్పడంలో వెంటనే రెస్పాండ్ అయి, నా పర్సనల్ టేస్టుకి లింకు పెడతాను. పర్సనల్ గా నాకు నచ్చలేదంటే కొంత బ్రతికి బయట పడతాను.

***

686 :స్పెషల్ ఆర్టికల్

       నేడు హాలీవుడ్ సినిమా రచన ఎలా జరుగుతోందన్నఅంశంపై న్యూయార్క్ మ్యాగజైన్ జరిపిన పరిశోధనలో భాగంగా కొందరు టాప్ హాలీవుడ్ ప్రొడ్యూసర్లని, ఎగ్జిక్యూటివ్ లని ఇంటర్వ్యూ చేసింది. హాలీవుడ్ లో సినిమా కథల ఎంపికకి గేట్ కీపర్లు అనదగ్గ ఏడుగురి నుంచి వివరాలు సేకరించింది. కథల ఎంపికలో గేట్ కీపర్లు వేటికి ప్రాధాన్యమిస్తారు? స్క్రిప్టుల్లో వ్యాకరణానికి, అక్షర దోషాలకి ఎలా రియాక్టవుతారు? స్క్రిప్టు నిడివి పట్ల ఏ నిబంధనలు పాటిస్తారు? స్క్రిప్టుకి నో చెప్పాల్సివస్తే ఎలా చెప్తారు?...మొదలైన వాటికి సమాధానాలు రాబట్టిన స్టేసీ విల్సన్ హంట్ రిపోర్టింగ్ నేటి నుంచి వరుసగా...

గేట్ కీపర్ : మైకేల్  బార్కర్ 

కో- ప్రెసిడెంట్, సోనీ పిక్చర్స్ క్లాసిక్స్
ఆమోదించిన స్క్రిప్టుల్లో కొన్ని : క్రోషింగ్ టైగర్ - హిడెన్ డ్రాగన్, ఆల్ ఎబౌట్ మై మదర్, మిడ్నైట్ ఇన్ పారిస్
          ప్రస్తుతం నేనిష్టపడే స్క్రిప్టులు : ముందుగా నేనీ ప్రశ్న వేసుకుంటాను – ఈ పాత్రలు, ఈ కథ కాలపరీక్షకి నిలబడతాయా? ఇప్పుడున్న ప్రపంచాన్ని ఇవి ప్రతిబింబిస్తున్నాయా? నన్నాశ్చర్యపర్చే ఫ్రెష్ నెస్ కోసం కూడా చూస్తాను. నేనూ మా ఇంకో కో- ప్రెసిడెంట్ టామ్ బెర్నార్డ్ కలిసి పెడ్రో అల్మొడోవర్ రాసిన ‘టాక్ టు హర్’ అన్న స్క్రిప్టు చదువుతున్నప్పుడు ఒక చోట ఇలా వుంది – స్క్రీన్ డార్క్ అవుతుంది. ఒక నగ్నంగా వున్న పొట్టి మనిషి, చాలా పెద్దావిడ మీదికి ఎక్కి ఆమె వెజినాలోకి ఒక దూకు దూకుతాడు! – పిచ్చెక్కిపోయింది మాకు!
        స్క్రీన్ రైటింగ్ లో తలనొప్పి కల్గించే ట్రెండ్ : అమెరికన్ స్క్రీన్ ప్లేలు చాంతాడంత వుంటూ తలనొప్పి పుట్టిస్తాయి. మైకేల్ హేనెకా వంటి యూరోపియన్ రచయితల నుంచి వచ్చే స్క్రిప్టులు పొట్టిగా వుంటాయి. ఇక పదిహేను పేజీలూ, ఇరవై పేజీలూ తిరగేసినా విషయం వున్న చోటే వుంటే ఇంకో తలనొప్పి వచ్చేస్తుంది. ఏమిటిది... ఎందుకివన్నీ జరుగుతున్నాయీ అన్పిస్తుంది.
        ఇష్టపడని స్క్రిప్టులు: హార్రర్ స్క్రిప్టులు. కౌబయ్స్ స్క్రిప్టులంటే పడిచస్తాను.
        చదివిన మొదటి మంచి స్క్రిప్టు : డేవిడ్ మమెట్ స్క్రిప్టులు వైభవంతో కట్టి పడేస్తాయి. వుడీ అలెన్ స్క్రిప్టులు చదవలేదు. ఆయన సినిమాలు మాకున్న నాలెడ్జి కంటే తక్కువ నాలెడ్జి తో వుంటాయి.  
        మూవీ బడ్జెట్ గురించి : ఎప్పుడూ మా మెదళ్ల మీద ఇదే స్వారీ చేస్తూంటుంది. చాలాసార్లు ఈ స్క్రిప్టు మేం తీయలేమని చేతులెత్తేస్తూంటాను. నోరా ఎఫ్రాన్ ఇండీ ఫిలిం చేయాలనుకుంటున్నానని ఒక స్క్రిప్టు పంపింది. ఏ కోశానా అది లో-బడ్జెట్ లో తీసేలా లేదు. ఆమె బిగ్ మూవీస్ తీయడంవల్ల ఇండీ మూవీస్ స్క్రిప్టు ఎలా వుండాలో అర్ధం జేసుకోలేదు.  
        ముగింపులో ఏమాశిస్తానంటే : చాలా సినిమాలు చూశాను. ముగింపులు ప్రేక్షకుల్ని కదిలించగల్గాలి. పంచ్ పడాలి. లేకపోతే మౌత్ టాక్ కి నష్టం వస్తుంది. మంచి ముగింపు చాలా ముఖ్యం.

***

685 :స్ట్రక్చర్ అప్డేట్స్

      T – Time-bound :  కార్పొరేట్ వ్యవస్థలో SMART గోల్స్ నిర్ణీత కాలానికి ఉద్దేశించినవై వుంటాయి. ఆ డెడ్ లైన్ లోగా గోల్స్ ని సాధించాల్సి వుంటుంది. సినిమాల్లో జానర్ ఏదైనా, మీ ప్రధాన పాత్రకి ఇచ్చిన గోల్ కి ఒక డెడ్ లైన్ ఏర్పాటు చేస్తే, అది కథకి బిగిని పెంచడమే గాక, చెక్కుచెదరని ఫోకస్ ని కూడా ఇస్తుంది. క్లయిమాక్స్ లో ఈ డెడ్ లైన్ ని అతిక్రమించి కూడా గడియారం ముల్లు టిక్ టిక్స్ తో టెన్షన్ ని పతాక స్థాయికి చేర్చవచ్చు. అయితే వాస్తవికతని బలిపెట్టే విధంగా మీ కథకి కాలావధిని కుదించ కూడదు. 

          మీ కథ ఒరిజినల్ కాలావధిని ఈ మూడు సందర్భాల్లో విస్తరించ వచ్చు : 1. ప్రధాన పాత్ర పాల్పడే చర్యలు లాజికల్ గా ఒక కాలావధిలో అసాధ్యమైనప్పుడు. అంటే, ప్రధానపాత్ర ఆదివారం బ్యాంకు కెళ్తూంటే మీ కథకి 24 గంటల కాలావధిని  నిర్ణయించడం సబబు అన్పించుకోదు.

       2. ఒకరంటే ఒకరికి తెలియని హీరో హీరోయిన్లకి ప్రేమ పుట్టినప్పుడు కథ ఒక కాలావధిలో ఒదగదు. రోడ్ థ్రిల్లర్ ‘స్పీడ్’ లో లాగా తప్పని సరైనప్పుడు కుదురుతుంది. కానప్పుడు సాధ్యం కాదు.

      3. మీ ప్రధాన పాత్రకి ప్రత్యర్ధి నెదుర్కోవడానికి తగిన స్కిల్స్ సంపాదించుకోవడానికి చాలినంత సమయం లేనప్పుడు, మీ కథకి కాలావధిని నిర్ణయించడం కుదరదు. ప్రధాన పాత్రకి స్కిల్స్ వున్న సహాయ పాత్రని జత చేసినప్పుడు గోల్ కి డెడ్ లైన్ విధించవచ్చు. 

       ఇకపోతే SAMRT గోల్ ఎలిమెంట్స్ లో A (Actionable) గురించి చెప్పుకున్నాం (స్మార్ట్ గోల్ సెట్టింగ్ -4 చూడండి). దీనికి అనుబంధంగా వుండే Adaptable ఎలిమెంట్ గురించి ఇప్పుడు తెలుసుకుందాం. అంటే మీ ప్రధాన పాత్ర ఒక గోల్ ని విడనాడి మరొక గోల్ ని చేపట్టడమన్నమాట. ఇది సాధారణంగా ఇంటర్వెల్లో జరుగుతుంది. 

          నూటికి నూరు శాతం స్పష్టత కోసం ఒరిజినల్ గోల్ తో పాటూ ఈ కొత్త గోల్ రెండూ SMART  ఫ్రేమ్ వర్క్ లోనే వుండేట్టు చూసుకోవాలి. ఇలా లేనప్పుడు మీ కథ వెంటనే ఎపిసోడిక్ కథనం బారిన పడుతుంది. దిక్కూదిశా వుండవు. ఉన్నపళాన కుప్పకూలుతుంది. మీ ఫ్యాన్స్ తీవ్ర నిరాశకి లోనవుతారు.

      ‘లీగల్లీ బ్లాండ్’ లో చూద్దాం. ఇందులో ముందుగా రీస్ విథర్ స్పూన్ మాజీ బాయ్ ఫ్రెండ్ ని తిరిగి పొందేందుకు హార్వర్డ్ లా స్కూల్లో జాయినవుతుంది. కానీ ఇంటర్వెల్లో, ఇతనెప్పుడూ తనని తక్కువే అంచనా వేస్తాడని తెలుసుకుని, అతణ్ణి తిరిగి పొందే ఒరిజినల్ గోల్ ని వదిలేసుకుంటుంది. 

          రోమాంటిక్ రిలేషన్ షిప్ ద్వారా తన విలువని తెలుసుకునేలా చేసే బదులు, చదువులో ప్రూవ్ చేసుకుని చూపించాలని నిర్ణయించుకుంటుంది. ఈ కొత్త గోల్ కూడా నిర్దుష్టంగా (S) వుంటుంది. చదువులో ప్రూవ్ చేసుకునేందుకు గాను ఒక ప్రొఫెసర్ దగ్గర ఇంటర్న్ గా చేరుతుంది. తద్వారా హత్య కేసులో ఇరుక్కున్న సహ విద్యార్థినిని విడిపించ వచ్చని. 

          ఇలా సెకండాఫ్ ని డామినేట్ చేసే ఈ కొత్త గోల్ కూడా SMART గోల్ అయింది. ఇది Specific గా వుంది : ఆమె మానసిక స్థితిని తెలుపుతూ. ఇది Measurable గా వుంది : హత్య కేసులో దోషియా నిర్దోషియా అని నిందితురాలిపై జ్యూరీ ఇచ్చే తీర్పు – రీస్ విథర్ స్పూన్ కి జయమో అపజయమో తేల్చేసే స్పష్టమైన సూచికగా. Actionable గా వుంది : నిందితురాలిని ఇంటర్వ్యూ చేయడం, అనుకూల సాక్ష్యాల్ని కనుగొనడం, కేసులో ఎలా ప్రొసీడవాలో ప్రొఫెసర్ తో చర్చించడం వగైరా. Realistic గా వుంది : అలవాటుగా ఇతరులు తనని తక్కువ అంచనా వేసినా, తన తెలివిని, తన ఉత్సాహాన్నీతను ప్రదర్శించుకుంటూ, ఇంకో పాత్ర సాయం తీసుకుని, కిందా మీదా పడి మొత్తానికి సాధించడం. ఇది కామెడీ కాబట్టి ఆమె సామర్ధ్యం పట్ల విశ్వసనీయతని నమ్మించే అవసరం లేకుండా. Time-bound గా కూడా వుంది : కోర్టు విచారణకి దానికదే డెడ్ లైన్ ఏర్పాటయి వుంది. 

             ఇక్కడొక తేడా గమనించాలి. ఇక్కడ విథర్ స్పూన్ గోల్ మార్పు, ‘సిల్వర్ లైనింగ్స్’ లో హీరో గోల్ మార్పులా లేదు. ఇంటర్వెల్లో విథర్ స్పూన్ వ్యూహాత్మకంగా ఇంకో గోల్ కి మారింది. ‘సిల్వర్ లైనింగ్స్’ హీరో తన ఆంతరంగిక అభిలాష కోసం బాహ్య కోరికని విడనాడాడు. ఇది క్లయిమాక్స్ లో వస్తుంది.  

          చివరగా ఒక టిప్ : మీ ప్రధాన పాత్ర గోల్ ని SMART పరిధిలోకి తీసుకు రావడం కష్టమనిపిస్తే, ఈ టెక్నిక్ ని వాడండి...ప్రొఫెసర్ మైకేల్ హాగ్ దీని గురించి చెప్పారు. అసంఖ్యాక కమర్షియల్ సినిమాల ప్రపంచంలో ఈ ఐదింటిలో ఒక గోల్ వుంటుందని ఆయన చెప్పారు : 1. గెలవడం, 2. ఆపడం, 3. తప్పించుకోవడం, 4. అప్పజెప్పడం, 5. తిరిగి పొందడం. 

          ముందుగా వీటిలో మీ కథకి తగ్గట్టుగా ఒకదాన్ని తీసుకోండి. దీంతో గోల్ కి నిర్డుష్టత్వం దాని కదే వస్తుంది. ఆ తర్వాత SMART లోని ఒక్కో ఎలిమెంటునీ అప్లయి చేస్తూ పోండి. గోల్ చర్యలు మీరు సృష్టించే ప్రధాన పాత్రలకే కాదు, రచయితగా మీకూ వర్తిస్తాయి. బలమైన కథనంతో కూడిన కథల్ని సృష్టించే క్లబ్బులో మీకూ చేరాలని గోల్ గా వుంటే, ఈ కింది చర్యలు చేపట్టడం గురించి ఆలోచించండి. 

      మీ కథని పోలిన సినిమాలుంటే ఓ ఐదూ పదీ పోగేసుకోండి. వాటిలో ప్రతీ ప్రధాన పాత్ర గోల్ నీ SMART ఫ్రేమ్ వర్క్ లో పెట్టి పరిశీలించండి. అప్పుడు రాయడానికి లొంగని మీ కథ గురించి ఆలోచించండి. మీ ప్రధాన పాత్రకి SMART గోల్ అంటూ వుందా? లేకపోతే  కల్పించండి. ఇప్పుడు వర్కౌట్ అవుతోందా? ఇంకా వర్కౌట్ కాకపోతే, ప్రత్యర్ధి పాత్ర వైపు చూడండి, తీసుకుంటున్న రిస్కులవైపు చూడండి. ఇవి పకడ్బందీ స్క్రీన్ ప్లేకి పనికొచ్చేంత బలీయంగా వున్నాయా?

          రచయితగా మీరేం సాధించాలనుకుంటున్నారు? మీ కలల్ని కూడా మీరు SMARTly గా నిర్వచించుకుంటే, మీరేం  సాధించాలనుకుంటున్నారో అది మీరెన్నడూ వూహించనంత సులభతరమై పోతుంది. గుడ్ లక్, మీ గోల్స్ తో మీకూ  మీ రైటింగ్ కీ!  

―హెచ్ ఆర్ డికొస్టా
(అయిపోయింది)

స్క్రీన్ ప్లే సంగతులు

684 : స్ట్రక్చర్ అప్డేట్స్

      A – Actionable: ప్రధాన పాత్ర ఏం సాధించాలనుకుంటోందో ఆ గోల్ విస్పష్టంగా వుండాలి. లేకపోతే మీ ఫ్యాన్స్ కి ప్రధాన పాత్ర బోరు కొడుతుంది. గోల్ కి స్పష్టత లోపిస్తే, ఆ గోల్ కోసం ప్రధాన పాత్ర వివిధ చర్యలు (యాక్షన్) తీసుకోవడానికి కూడా ఏమీ వుండదు. ఇందుకే గోల్ నిర్దుష్టంగా వుండాలని  SMART     గోల్ లో మొదటి ఎలిమెంట్ S ప్రాధాన్యం గురించి అంతగా చెప్పుకున్నాం. గోల్ నిర్దుష్టంగా వుంటే యాదృచ్ఛికంగా కొన్ని చర్యలు వాటంతటవే మెదులుతాయి. ఇవే కథనంలో కొన్ని సంఘటనలని సృష్టిస్తాయి. ఈ సంఘటనలని నిర్మించుకుంటూపోతే మీ కథకి బలమైన వెన్నెముక డెవలప్ అవుతుంది. 

          ‘ఇన్ ది లైన్ ఆఫ్ ఫైర్’ లో ఎలా వుందో చూద్దాం. హత్యా కుట్రలోంచి అమెరికా అధ్యక్షుణ్ణి కాపాడ్డం సీక్రెట్ సర్వీస్ ఏజెంట్ గోల్. దీనికి చర్యల పరంపర ఇలా వుంది: కుట్ర జరుగుతోందని కనిపెట్టడం, దీన్ని అధ్యక్షుడికి తెలపడం, అధ్యక్షుడు కొట్టి పారేయడం, ఏజెంట్ ఈ కుట్రని ఎలా ఆపాలని కొలీగ్స్ తో చర్చిండం. ఇవీ SMART లో  మూడో ఎలిమెంట్ అయిన A ని ప్రతిబింబిస్తాయి. 

          ‘సిల్వర్ లైనింగ్స్’ లాంటి కథలో, ప్రధాన పాత్ర బాహ్యంగా కోరుకుంటున్నది ఒకటి, అంతరంగంలో అభిలషిస్తున్నదొకటి. రెండూ కథనంలో మిళితమై వుంటాయి. ఇలాటి సందర్భాల్లో చర్యల పరంపరని సృష్టించాలంటే చాలా జాగ్రత్త తీసుకోవాలి. 

          కొన్ని చర్యలు మొదటి దాని బాటలో వుంటాయి : ప్రధాన పాత్ర తన భార్య చిన్నప్పటి పాఠ్యపుస్తకాలు చదవాలనుకోవడం, ఆమె గురించి ఇద్దరికీ తెలిసిన ఫ్రెండ్స్ ని అడిగి తెలుసుకోవడం లాంటివి. 

          రెండో దాని విషయానికొస్తే, భార్యని రెస్టారెంట్ కి తీసికెళ్ళడం, ఆపోకిరీల బారి నుంచి ఆమెని కాపాడ్డం లాంటివి వస్తాయి. ఏది జరిగినా తీసుకునే ప్రతీ చర్యకీ ప్రతిచర్య వుండేలా చూడాలి. చర్యా దాని ప్రతిచర్యలే కథని ముందుకు నడిపిస్తాయి. ఈ పరంపరతో  కథనంలో టెన్షన్ ని పెంచుతూ పోవాలి.  

          R – Realistic : మీ ప్రధాన పాత్ర గోల్ కి ఎదురయ్యే అవాంతరాల్ని విశ్వసనీయంగా అధిగమించాలి. సులభంగా గోల్ సాధించేస్తే మీ ప్రధాన పాత్రని ఫ్యాన్స్ నమ్మరు. అలాగే చిట్టచివరికి అంతిమంగా సాధించే విజయం ప్రశ్నార్ధకం కూడా కాకూడదు. గోల్ సాధన ఇంకే ప్రశ్నలూ రేకెత్తించకుండా లాజికల్ గా, వాస్తవికంగా అన్పించాలి. 

      రెడ్, టేకెన్, ది బోర్న్ ఐడెంటిటీ మొదలైన మూవీస్ లో ప్రధాన పాత్రలు తీసుకునే చర్యలు ఎంతో వాస్తవికంగా వుంటాయి. ఎందుకంటే ఆ పాత్రలు సీఐఏ శిక్షణ పొందిన ప్రొఫెషనల్ పాత్రలు. ఇదేగాక, ఇంకే జానర్ పాత్రయినా దాని వృత్తి వ్యాపకాలతో ప్రొఫెషనల్ గానే గోల్ సాధించాలని మరువకూడదు. SAMRT లో చెప్పే ముఖ్య పాఠమిది. 

          కథనం మిడిల్ విభాగంలో, మీ ప్రధాన పాత్ర గోల్ కవసరమైన ప్రత్యేక స్కిల్స్ పొందాలన్నా, లేదా తానున్న స్థితినుంచి పూర్తిగా మార్పు చెందాలన్నా కొన్ని సమస్యలు ఉత్పన్నమవుతాయి. ఈ మార్పు, లేదా స్కిల్స్ కి టైం ఫ్రేం తక్కువుంటే ఆ పొందే మార్పు లేదా స్కిల్స్ నమ్మశక్యంగా వుండవు. అంతలోనే అనుకుని అంతలోనే పోరాట యోధుడిగా మారడం పాత్రకి సహజత్వాన్నివ్వదు. అలాగే రాత్రికి రాత్రి పాత్రకి సైబర్ స్పెషలిస్టు స్కిల్స్ వచ్చేశాయని చూపించడం నమ్మదగ్గ కథనమన్పించుకోదు. 

          ఇలా మీ ప్రధాన పాత్ర దాని చర్యలకి విశ్వసనీయంగా పాల్పడే పరిస్థితి లేనప్పుడు, క్లయిమాక్స్ పరిధికి కూడా పరిమితు లేర్పడతాయి. ఇలాటి సమస్యల్నిఅధిగమించాలంటే ఒకటే చేయాలి.  

      స్కిల్స్ లేని పాత్ర స్కిల్స్ వున్న పాత్రతో జత కట్టేలా చూడాలి –‘లివ్ ఫ్రీ ఆర్ డై హార్డ్’ లో లాగా. అలాగే స్క్రీన్ ప్లేలో సెటప్ విభాగం, అంటే బిగినింగ్ లో కల్పన చేయడం ద్వారా ఇలాటి సమస్యని  అధిగమించవచ్చు. ‘కమింగ్ టు అమెరికా’ లో బిగినింగ్ విభాగంలో ప్రిన్స్ అకీమ్ ని మార్షల్ ఆర్ట్స్ తో చూపిస్తారు. ఆ తర్వాత మిడిల్ కథనంలో, సాయుధుడుగా వచ్చే దొంగని కేవలం మాపింగ్ హేండిల్ నుపయోగించి దెబ్బ తీస్తాడు ప్రిన్స్. ఒక సాధారణ పాత్రకి మార్షల్ ఆర్ట్స్ తెలుసని ముందే చూపించడంతో, ఇప్పుడు అదే సాధారణ పాత్ర సాయుధ దుండగుడ్ని సులభంగా ఎదుర్కోవడం సమస్య కాలేదు. 

          రోమాన్స్ విషయానికొస్తే, ఇక్కడ కూడా టైట్ టైం ఫ్రేంతో ప్రేమికులు ప్రేమని సఫలం చేసుకునే క్లయిమాక్స్ వాస్తవికంగావుండదు. ‘ది ప్రపోజల్’ లోలాగా, హీరో హీరోయిన్లకి పూర్వ పరిచయమే వుండి,  ఇప్పుడు కథాకాలంలో ప్రేమలో పడితే, క్లయిమాక్స్ కి టైం ఫ్రేమ్ సమస్య ఎదురు కాదు. 

          అలాగే హీరో హీరోయిన్లు ఇప్పుడు కథాకాలంలోనే పరిచయమై ప్రేమలో పడ్డారంటే,  వాళ్ళెంత మేడ్ ఫర్ ఈచ్ అదరో మీ ఫ్యాన్స్ నమ్మేలా ముందు చిత్రీకరించుకొస్తే, అప్పుడు టైం ఫ్రేమ్ ఎంత వున్నా క్లయిమాక్స్ కి అభ్యంతరాలుండవు.

―హెచ్ ఆర్ డికొస్టా
(రేపు T ఎలిమెంట్)