1405 : స్క్రీన్ ప్లే సంగతులు

డియర్ రీడర్స్,  ‘ఆంధ్రా కింగ్ తాలూకా’ స్క్రీన్ ప్లే సంగతులు కోసం మీ నుంచి రోజూ మెసేజులు, కాల్స్ వస్తున్నాయి. ఈ ఆలస్యం అనివార్యంగా ఉద్దేశపూర్వకంగా జరిగిందే … కారణం ‘ఆంధ్రా కింగ్ తాలూకా’’ పరిస్థితే.

నిన్న డిసెంబర్ 5 తేదీ అనూహ్యంగా ‘అఖండ 2’ విడుదల  వాయిదా పడడంతో, ‘ఆంధ్రా కింగ్ తాలూకా’ రన్నింగ్ కి బ్రీతింగ్ స్పేస్ పెరిగినట్టయ్యింది. అయితే ఈ బ్రీతింగ్ స్పేస్ లో ఆక్సిజన్ పీల్చగల్గే స్థితిలో వుందా? బాక్సాఫీసు  అగ్రిగేటర్ సాచ్నిక్ ప్రకారం విడుదల తేదీ నుంచీ అన్ని భాషల్లో వసూళ్ళు పడిపోతూ వచ్చి నిన్న తొమ్మిదవ రోజుకి  12% ఆక్యుపెన్సీ తో కనిష్ట స్థాయికి చేరుకున్నాయి. నిర్మాతలు, హీరో ప్రెస్ మీట్ పెట్టి పుష్ చేసినప్పటికీ పరిస్థితిలో మార్పు లేదు. ఇప్పుడు ఈ బ్రీతింగ్  స్పేస్ లో ఏం చేసి ఆక్సిజన్ అందించగలరు. చేసిందంతా డీఎన్ఏ లాగా డిజిటల్ ఫార్మాట్ లో సినిమాలో ఫిక్స్ అయిపోయింది. దాన్ని మార్చలేరు. మార్పు చేర్పులన్నీ ముందుగా స్క్రిప్టు దశలోనే  జరగిపోవాలి. కనుక స్క్రిప్టు దశలో ఏం చేశారు, ఎందుకు చేశారు, ఎలా చేశారు అన్నవి  తెలుసుకోవాలి. అక్కడే తెలుస్తుంది ఈ పరిస్థితికి కారణం. అంతేగానీ నవంబర్ లో విడుదల చేయడం మంచిది కాదు, అందులోనూ జనాల దగ్గర డబ్బులుండని చివరి రోజుల్లో విడుదల చేశాం- వంటి బాహ్య పరిస్థితుల్ని చెప్పుకుంటే లోపల్నుంచి మార్పు ఎప్పటికీ రాదు. ఓవర్ గా పోకుండా మంచి ఫిల్ గుడ్ మూవీ తీసినా ఆడకపోతే ఇంత కష్టపడి చేయడమెందుకు- స్టాండర్డ్  టెంప్లెట్లో  మాస్ సినిమాలే తీసుకోవచ్చని నిర్మాత చెప్పడం కూడా సరి కాదు. తీసింది పక్కా క్లాస్ జానర్ ఫీల్ గుడ్ మూవీ కాదు, మాస్ జానర్ లోనే ఫీల్ గుడ్ జానర్ ని కలిపి తీశారు. తీసినప్పుడు విధానం తెలుసుకోక తప్పులో కాలేస్తూ పోయారు.

  ‘ఆంధ్రా కింగ్ తాలూకా’ ఫీల్ గుడ్ కి మాస్ మసాలా జానర్ కలిపిన మిశ్రమంతో అసలు జరిగిందేమిటి? ఎలాజరిగింది? ఎందుకు జరిగింది? దీనికి తరుణోపాయమే మిటి?...ఇవి తెలియజేయడానికి సినిమా వసూళ్ళ పరిస్థితి చూసి గత ఆరు రోజులూ ఆపాల్సి వచ్చింది ఈ స్క్రీన్ ప్లే సంగతుల్ని…ఇప్పుడు ఈ కింద డీప్ ఎనాలిసిస్ లో తప్పొప్పుల్ని తెలుసుకుందాం…

A. కథేమిటి?

1. 2002 లో ఆంధ్రాకింగ్ సూపర్ స్టార్ సూర్య కుమార్ కథ :  సూపర్ స్టార్ సూర్య కుమార్ (ఉపేంద్ర) 100 వ సినిమా పూర్తి చేయడానికి నిర్మాత దగ్గర ఫైనాన్స్ లేక తనే 3 కోట్ల రూపాయల కోసం విఫలయత్నాలు చేసి, చివరికి ఇల్లమ్మేయడానికి సిద్ధపడతాడు. ఇంతలో అతడి ఎక్కౌంట్ లో 3 కోట్ల రూపాయలు పడతాయి. ఎక్కడిదీ డబ్బు? ఎవరు వేశారు ఎక్కౌంట్ లో? మేనేజర్ (రాజీవ్ కనకాల) ఆరా తీస్తే వేసినతని ఊరూ పేరూ తెలుస్తాయి. ఈ సాగర్ ఎవరని అడిగితే, సూర్య ఫ్యాన్స్ అసోసియేషన్ మాజీ ప్రెసిడెంట్ అంజి (శ్రీనివాస రెడ్డి) చెక్ చేసి, ఈ సాగర్ అనే అతను సూర్య ఫ్యాన్స్ అసోసియేషన్ ప్రెసిడెంట్ అని చెప్తాడు. రాజమండ్రి దగ్గర గోడపల్లి లంకలో వుంటాడని చెప్పి, ఇతను తనకి తెలుసనీ అతడి గురించి చెప్పడం మొదలెడతాడు.

2. ఫ్లాష్ బ్యాక్ - 1 : సాగర్ గురించి అంజి చెప్పే కథ : చిన్నప్పట్నుంచీ  సాగర్ సూర్య ఫ్యాన్. చిన్నప్పుడు  తండ్రి సింహాద్రి (రావు రమేష్) తో థియేటర్ కొస్తాడు. ఆ రోజు సూర్య కొత్త సినిమా విడుదల. టికెట్లు దొరకవు. టికెట్లు పంచుతున్నఅంజి సింహాద్రికి టికెట్లు నిరాకరిస్తాడు. ఈ టికెట్లు కటౌట్లు పెట్టిన, టపాసులు పేల్చిన ఫ్యాన్స్ కేనని చెప్పేస్తే, వెంటనే చిన్న పిల్లాడయిన సాగర్ ఎవరూ ఊహించని విధంగా కటౌట్ మీదికెక్కేసి ‘ఆంధ్రాకింగ్’ బ్యానర్ కట్టేస్తాడు. ప్రేక్షకుల హర్షాధ్వానాల మధ్య అంజి సింహాద్రికి టికెట్లు ఇచ్చేస్తాడు. తండ్రితో కలిసి సాగర్ సూర్య కొత్త సినిమా చూసి ఎంజాయ్ చేస్తాడు. 

3. సూర్య కథ -2 : ఈ ఫ్లాష్ బ్యాక్ తెలుసుకున్న సూర్య - ‘నా అభిమాని నాకే డబ్బులు పంపించాడా?’ అని అతడ్ని కలవాలంటాడు. ‘సాయపడింది అతను, రుణ పడింది నేను. నేను వెళ్ళి  తీరాలి’ అని బయల్దేరతాడు ఎవరు చెప్పినా ఆగకుండా.

కారులో ఆ వూరు చేరుకుంటూ మధ్యలో  ఓ హోటల్ దగ్గరాగుతాడు. తూఫాను వల్ల వర్షం కురుస్తూ వుంటుంది. ఆ హోటల్లో టీవీ న్యూస్ వస్తూంటుంది. కొందరు జర్నలిస్టులు ఆందోళన చేస్తూంటారు. జర్నలిస్టు ఈశ్వర్ (రాహుల్ రామకృష్ణ) మీద సూర్య ఫ్యాన్స్ దాడి చేసిన విషయాన్ని ప్రస్తావిస్తూ, ఇందుకు  ఆంధ్రా కింగ్ సూర్యే వచ్చి క్షమాపణలు చెప్పాలని డిమాండ్ చేస్తూంటారు. సూర్య అక్కడికి చేరుకుని క్షమాపణలు చెప్తాడు. ఈశ్వర్ సూర్య ఫ్యాన్స్ అసోసియేషన్ వైస్ ప్రెసిడెంట్ అని కూడా తెలుస్తుంది. మరి నువ్వు నామీద అలా ఎందుకు రాశావని సూర్య అడిగితే, సాగర్ కి తెలియాలనే రాశానంటాడు.

4. ఫ్లాష్ బ్యాక్ -2 : సాగర్ గురించి ఈశ్వర్ చెప్పే కథ : థియేటర్ ముందు సూర్య మరో కొత్త సినిమా రిలీజ్ రోజు. ప్రాంగణం ప్రేక్షకులతో ఫ్యాన్స్ తో కోలాహలంగా వుంటుంది. ఇప్పుడు యువకుడుగా ఎదిగిన సాగర్ హంగామా చేస్తూంటాడు. వెంట ఫ్రెండ్ ఈశ్వర్ వుంటాడు. ఆ థియేటర్ ఓనర్ పురుషోత్తం (మురళీ శర్మ) కొడుకు రంగా (యజుర్వేద్) తన ఫ్రెండ్స్ తో  సాగర్ కి వ్యతిరేకంగా వుంటాడు. సాగర్ తో బాటు వీళ్ళందరూ ఒకే కాలేజీలో స్టూడెంట్స్. ఇప్పుడు రంగా ఫ్రెండ్ ఒకడు సూర్య కటౌట్ ని  పడేసే ప్రయత్నం చేస్తాడు. వెంటనే సాగర్ పెద్ద సాహసం చేసి ఆ కటౌట్ పడిపోకుండా చూస్తాడు. ఇంతలో సినిమా బాక్సు రాలేదని ఎవరో చెప్పేసరికి థియేటర్ లోకి పరిగెడతాడు. అక్కడ సూర్య కొత్త సినిమా రిలీజ్ కి అక్కసుతో వుంటాడు రంగా. అతడితో మాటామాటా పెరిగి, ఈ సినిమా ఫ్లాపయితే కాలేజిలో మీరేం చెప్పినా  చేస్తాననీ, అలాగే సూపర్ హిట్టయితే తను ఏం చెప్పినా చెయ్యాలనీ పందెం కాస్తాడు సాగర్. ఇంతలో ఒకడు వచ్చి బాక్సు రాకపోవడంతో షో క్యాన్సిల్ అయిందని చెప్పేసరికి, సాగర్ కోపంతో థియేటర్ అద్దం పగలడతాడు. ఆ పగిలిన అద్దం లోంచి లోపలున్న పురుషోత్తం కూతురు మహాలక్ష్మి (భాగ్యశ్రీ బోర్సే) కనిపించేసరికి ఆమె అందానికి స్టన్ అవుతాడు. ఆమె పక్కకు జరిగేసరికి మళ్ళీ అటు అద్దం పగలగొడతాడు. ఆ పగిలిన అద్దం లోంచి ఆమె చూసేసరికి  ప్రేమలో పడిపోతాడు.

థియేటర్ అద్దాలు పగులగొట్టినందుకు లాకప్ లో వుంటాడు సాగర్, ఈశ్వర్ తో బాటు. అక్కడ లవ్ మూడ్ లో వుంటే కవిత్వం చెప్పి ఎత్తి పొడుస్తాడు ఈశ్వర్. సాగర్ తండ్రి వచ్చి విడిపించుకు పోతాడు. వాళ్ళ వూరు గోడపల్లి కరెంటు లేని లంక. పడవలో నది దాటి చేరుకోవాలి. ఇంటి దగ్గర సాగర్ తల్లి తులసి వుంటుంది.

ఇదయ్యాక,  కాలేజీలో రంగాతో కలబడతాడు సాగర్- సూర్య సినిమా కలెక్షన్స్  తక్కువ చెప్పి ప్రచారం చేస్తున్నందుకు. ఈ గొడవతో ప్రిన్సిపాల్ సాగర్, ఈశ్వర్ లిద్దరికీ కమ్యూనిటీ సర్వీస్ శిక్ష వేస్తాడు. ఇద్దరూ క్యాంటీన్ లో బల్లలు తుడవడం, సప్లయర్ పనులు చేయడం చేస్తూంటారు. అప్పుడు క్యాంటీన్ కొచ్చిన మహాలక్ష్మితో సాగర్ లవ్ ట్రాక్ మొదలవుతుంది. కొత్త సినిమా రిలీజ్ కి సాగర్ కి టికెట్లు దొరక్కపోతే మహాలక్ష్మి ఇప్పిస్తుంది. అప్పుడు అడుగుతుంది సూర్య అంటే ఎందుకింత పిచ్చి అని. సాగర్ చెప్పడం మొదలెడతాడు.

5. ఫ్లాష్ బ్యాక్ - 3: సాగర్ చెప్పే తన చిన్నప్పటి కథ : తండ్రి స్కూల్లో చేర్పించడానికి తీసుకుపోతాడు.  హెడ్ మాస్టర్ సాగర్ కి పరీక్ష  పెడతాడు. నత్తి వల్ల  సమాధానం పలకలేక పోతాడు సాగర్. హెడ్ మాస్టర్ ఫెయిల్ చేసి పంపేస్తాడు. ఇంటికి తీసుకొచ్చి చితకబాదుతాడు తండ్రి సింహాద్రి. ఏడ్చేస్తున్న సాగర్ కి టేప్ రికార్డర్ లో సూర్య మోటివేట్ చేస్తూ పాడే  గేయం వినిపిస్తుంది. దాంతో ఎక్కడలేని శక్తి వచ్చేసి నత్తి పోతుంది. దీంతో అప్పట్నుంచీ సూర్యకి ఫ్యాన్ అయిపోతాడు సాగర్.

6. ఫ్లాష్ బ్యాక్ -4 : సాగర్ గురించి ఈశ్వర్ చెప్పే కథ కంటిన్యూ : సాగర్ మహాలక్ష్మి ఇంటికెళ్ళి ఆమె తండ్రిని సర్ప్రైజ్ చేస్తాడు. మహాలక్ష్మి కంగారు పడుతుంది. అక్కడే వున్న రంగా అడ్డుకుంటాడు. సాగర్ తమ లంకలో తిరునాళ్ళు జరుగుతున్నాయని, తప్పకుండా రావాలనీ  ఆహ్వానించి వెళ్ళి పోతాడు. 

తిరునాళ్ళకి మహాలక్ష్మి వస్తుంది. అప్పుడే ఇటు సమీపంలో సూర్య  సినిమా షూటింగ్ జరుగుతోందని సాగర్ వెళ్ళబోతున్న వాడల్లా, మహాలక్ష్మిని చూసి డైలమాలో పడతాడు. ముందు షూటింగ్ కి వెళ్ళి  రమ్మని పంపించేస్తుంది.

లొకేషన్ లో లోపలెక్కడో షూటింగ్ జరుగుతూంటే మేనేజర్ (రఘుబాబు) ఇలా వచ్చిన సాగర్ ఎవరో తెలుసుకుంటాడు. ఇంతలో సూర్యకి చక్కర కేళీలంటే ఇష్టమని తెలుసుకుని పరిగెడతాడు సాగర్. అరటి తోటలో గెల కోసుకుని వస్తూంటే రంగా, అతడి గ్రూపు ఎటాక్ చేస్తారు. వాళ్ళని చిత్తు చేసి వెళ్ళి, అరటి గెల మేనేజర్ కి అందించి మెప్పు పొందుతాడు సాగర్.

తిరిగి తిరునాళ్ళ కొచ్చిన సాగర్, మహాలక్ష్మితో క్లోజ్ గా గడుపుతాడు. ఆ రాత్రి వాళ్ళ మహాలక్ష్మి థియేటర్ నేమ్ బోర్డు పక్కన ‘ఐ లవ్ యూ’ అని నియాన్ లైట్ల డిస్ ప్లే పెట్టి ఎంజాయ్ చేస్తాడు. థియేటర్ లో బాక్సు సెక్షన్లో  మహాలక్ష్మితో ప్రైవేటుగా కూర్చుని సినిమా చూస్తాడు. థియేటర్ లో వెతుక్కుంటూ వచ్చిన ఆమె తండ్రి పురుషోత్తంకి సాగర్, మహాలక్ష్మిల వ్యవహారం తెలిసిపోయి గొడవకి దిగుతాడు. ఆమె అన్న సాగర్ ని పట్టుకుని కొడతాడు. ఆవారా ఫ్యాన్ బ్యాచ్ కి ఏం అర్హత వుందని ప్రేమిస్తాడని సాగర్ ని ఘోరంగా తిడుతూ అవమానిస్తాడు పురుషోత్తం. సాగర్ ఛాలెంజీ విసురుతాడు- తమ లంకలో బ్రహ్మాండంగా 70 ఎంఎం డిటిఎస్ థియేటర్ మహాలక్ష్మి పేరుతోనే కట్టి, సూర్య నూరవ సినిమా రిలీజ్ చేసి, మహాలక్ష్మిని చేసుకుని చూపిస్తానని ఛాలెంజీ చేస్తాడు. సాగర్ కి పిచ్చిపట్టిందని విభేదించిన  ఈశ్వర్ తెగతెంపులు చేసుకుని వెళ్ళిపోతాడు.

7. సెకండాఫ్ :  సూర్య కథ -2 : రాత్రి తూఫాను వర్షంలో సూర్యతో చేరుకుని మహాలక్ష్మి థియేటర్ ని చూపిస్తాడు ఈశ్వర్. సూర్య సినిమాలు రిలీజ్ అయినప్పుడు సాగర్ ఎలా హంగామా చేస్తాడో చెప్పుకొస్తూంటే,అతడి కళ్ళు వినైల్ బోర్డు మీద పడతాయి. ఆ బోర్డు మీద మహాలక్ష్మి పెళ్ళి ప్రకటన వుంటుంది. 

దీంతో కంగారుపడి సూర్యని మహాలక్ష్మి ఇంటికి తీసికెళ్తాడు ఈశ్వర్. ఆ పెళ్ళిలో ఇలా ఎందుకు చేశావని మహాలక్ష్మిని ప్రశ్నిస్తాడు సూర్య. సాగర్ మోసం చేశాడని చెప్పుకొస్తుంది మహాలక్ష్మి.

8. ఫ్లాష్ బ్యాక్ -5 :  సాగర్ గురించి మహాలక్ష్మి చెప్పే కథ : మహాలక్ష్మి థియేటర్ బుకింగ్ క్లర్క్ (సత్య) సాగర్  థియేటర్ కట్టడానికి 3 కోట్లు అవుతుందని లెక్క వేసి చెప్తాడు. సాగర్ బ్యాంకు లోన్ కోసం వెళ్తే అక్కడ పని  జరగదు. మహాలక్ష్మి తన నగలు తెచ్చి ఇవ్వబోతే తీసుకోడు. ఇక డబ్బు ఎక్కడా పుట్టక, లంకలోనే ఓపెన్ ఏర్  టూరింగ్ టాకీస్ కడతాడు. కరెంటు కోసం జనరేటర్ ఏర్పాటు చేస్తాడు. థియేటర్ కట్టడానికి డబ్బులు కూడబెట్టడా నికి టూరింగ్ టాకీస్ ప్రారంభించి సక్సెస్ ఫుల్ గా నడుపుతూంటే, రంగా వచ్చేసి ఎటాక్ చేసి తగులబెట్టేస్తాడు. 

దీంతో వూరుకోక సాగర్ ఇసుక వ్యాపారం మొదలెడతాడు. అతడికి వూరంతా తోడ్పడతారు. ఆ ఇసుక మీద సంపాదించిన డబ్బుతో అనుకున్న థియేటర్ కట్టి, కరెంటు రప్పించి, థియేటర్ ప్రారంభోత్సవం కోసం కొత్త సినిమా తెద్దామని వెళ్తే, రంగా ప్రోద్బలంతో డిస్ట్రిబ్యూటర్ ఇవ్వడు. ఇక సూర్య మేనేజర్ సాయం తీసుకుందామని నగరాని కెళ్ళి కలుస్తాడు. అక్కడ సూర్యకి 3 కోట్లు పుట్టక నూరవ సినిమా ఆగిపోయిందని తెలుసుకుని డిస్టర్బ్ అవుతాడు. తిరిగి వచ్చేసి 3 కోట్ల డబ్బు కోసం థియేటర్ ని పురుషోత్తంకే అమ్మకానికి పెడతాడు. బదులుగా మహాలక్ష్మిని వదులుకుంటా నంటాడు. పురుషోత్తం సంతోషించి సాగర్ కి ఆ డబ్బు ఇచ్చి పంపేసి,  మహాలక్ష్మికి తను అనుకున్న సంబంధం చేయడానికి పూనుకుంటాడు.

9. సూర్య కథ -3 : జరిగిందంతా విన్న సూర్య, తనకోసం సాగర్ చేసిన త్యాగంతో కదిలిపోతాడు. సాగర్ ని వదులుకోవద్దని చెప్పి మహాలక్ష్మి పెళ్ళి మాన్పిస్తాడు. సాగర్ ని కలవడానికి పెరిగిన తూఫాను వర్షంలో బయల్దేరతాడు.  తూఫాను బీభత్సానికి గోడపల్లి వాసులు సాగర్ కట్టిన థియేటర్లో తలదాచుకుంటారు. సూర్య అలా రావడంతో షాకైన సాగర్ - సూర్యల మధ్య మొదటిసారి కలుసుకున్న ఈ సీనులో తనంటే సాగర్ అభిమానం, త్యాగం, ఆత్మవిశ్వాసం చూసి, సాగర్ నుంచి నేర్చుకోవాల్సింది చాలా వుందని తెలుసుకుని, ఆశీర్వదించి నిష్క్రమిస్తాడు. ఇంటికి వెళ్ళి, ఇల్లమ్మేసి జీరో నుంచి స్టార్ట్ అవుదామని మేనేజర్ కి చెప్తాడు. 

B. దర్శకుడి పాయింటాఫ్ వ్యూతో పిక్చరైజేషన్ :

50 కోట్లతో నిర్మించినట్టు చెబుతున్న ఈ సినిమా కథ, సాగర్  మహాలక్ష్మిని పెళ్ళి చేసుకోవడాన్ని సవాలుగా తీసుకుని అందుకు థియేటర్ నిర్మించి, దాన్ని తన అభిమాన స్టార్ సూర్య ఆగిపోయిన సినిమా పూర్తి చేయడానికి అమ్మేసి, మహాలక్ష్మితో ప్రేమని త్యాగం చేసుకోవడంగా, హృద్యమైన ముగింపుతో వుంది.   

కథకి పదేళ్ళ క్రితం తను ప్లాన్ చేసిన విధంగా, సాగర్ పాత్ర జీవితంగా, అనుకున్న ఫీల్ గుడ్ మూడ్ తో, అనుకున్న బయోపిక్ గా, తన పాయింటాఫ్ వ్యూ పెట్టుకుని, అందుకనుగుణంగా జాగ్రత్తగా పిక్చరైజ్ చేశాడు దర్శకుడు మహేష్ బాబు. సాగర్ కథని ముగింపు తప్ప, ఫ్లాష్ బ్యాక్స్ తో చెప్పుకొచ్చి, భావోద్వేగాలతో బలమైన క్లయిమాక్స్ కి చేర్చాడు. కమర్షియల్ మాస్ సినిమాని ఫీల్ గుడ్ మూవీగా కూడా అందించవచ్చన్న ఒక ఇన్నోవేషన్ కి ప్రయత్నించి -సఫలమో విఫలమో -ఒక ఎగ్జాంపుల్ గా నిలిచాడు. 

దర్శకుడు ఫిక్సయిన తన పాయింటాఫ్ వ్యూలో - కథలో సాగర్,  సినిమా స్టార్ సూర్య అంటే పడిచచ్చే, అతడి కోసం ఏమైనా చేసే వీరాభిమానిగా కనిపిస్తాడు. అతను సూర్య ఫ్యాన్స్ అసోసియేషన్ కి ప్రెసిడెంట్ కూడా. ఈ అసోసియేషన్ వైస్ ప్రెసిడెంట్ గా ఈశ్వర్ వుంటాడు. వీళ్ళిద్దరూ తప్ప అసోసియేషన్ లో ఇంకెవరూ సభ్యులు కన్పించక పోవడం ఒక వెలితిగా వుంటుంది. అదే అటు రంగాని చూస్తే, సాగర్ కి వ్యతిరేకంగా పెద్ద గ్రూపు నేసుకుని వుంటాడు. అయితే థియేటర్ ఓనర్ కొడుకైన ఈ రంగా, టాప్ స్టార్ ఆంధ్రాకింగ్ సూర్య ఫ్యాన్స్ అసోసియేషన్ తో శత్రుత్వం కథకి రిలేటెడ్ గా అన్పించదు. అసలు ఫ్యాన్స్ అసోసియేషన్ జోలికెవరైనా వెళ్తారా, పోటీ స్టార్ అభిమానులైతే తప్ప? అలాటిది థియేటర్ ఓనర్ కొడుకే ఇలా శత్రుత్వం పెంచుకుంటే, థియేటర్లో తమ స్టార్ సినిమాలు విడుదల చేయకుండా అడ్డుకునే పవర్ వాళ్ళకుంటుంది. కనుక ఈ సాగర్ తో రంగా పెట్టుకునే గొడవలు కథకి అతకకుండా వుంటూ, సినిమా మేజర్ పార్టుకి కథాపరంగా చూసేందుకు ఇబ్బంది కలిగిస్తూ వుంటాయి. దీన్ని దర్శకుడు గమనించాడో లేదో. దీంతో పాటు తర్వాత తన చెల్లెల్ని ప్రేమిస్తున్నాడని రంగా సాగర్ మీద మరింత కక్ష పెంచుకోవడం కూడా కన్విన్స్ చేయదు. అసలు థియేటర్ ఓనరైన పురుషోత్తమైనా, దర్శకుడు చెప్పకపోతే, తనే కొడుక్కి చెప్పి ఈ గొడవలు మాన్పించి వుండాల్సింది. 

B (1) సాగర్ సైకో ఎనాలిసిస్ : 

సాధారణంగా సినిమా స్టార్స్ ఫ్యాన్స్ కథల్లో ఎవరైనా ఆశించే టెంప్లెట్ ఏమిటంటే, పోటీ స్టార్ ఫ్యాన్స్ తో కొట్లాటలు వుండాలని. ఇదే ఇక్కడ అదృశ్యమవడంతో, సూర్య ఫ్యాన్ అయిన సాగర్ - ఎవరికీ ఫ్యాన్ కాని రంగాల మధ్య ఘర్షణలు కథకి అడ్డంకిగా మారాయి. దీనికి దర్శకుడు చెప్పేదేమిటంటే, ఫ్యాన్స్ ని అగ్రెసివ్ గా కాకుండా పాజిటివ్ గా చూపించాల

నుకున్నామని. కానీ థియేటర్ కి ఫిలిం  బాక్సు రాలేదని సాగర్ అగ్రెసివ్ గానే- ప్రెసిడెంట్ హోదాని కూడా మర్చిపోయి  థియేటర్ అద్దాలు పగులగొట్టేసి లాకప్ లో పడతాడు. ఒక్కసారి లాకప్ లో పడి, ఎఫ్ ఐ ఆర్ గనుక నమోదైతే, ఇక జీవితంలో విద్యా ఉద్యోగ అవకాశాలు హుళక్కి అయిపోతాయని అతను తెలుసుకుని వుంటే బావుండేది. ఇక్కడ హీరోయిన్ ని చూసి సాగర్ ప్రేమలో పడేందుకు, థియేటర్ కి ఫిలిం బాక్సు రాని పరిస్థితిని కల్పించి, ఆ కారణంగా చూపి అద్దం పగుల గొట్టించి, తద్వారా పగిలిన అద్దంలోంచి ఆమెని సాగర్ కి చూపించాలనే పరస్పర విరుద్ధ కాన్సెప్ట్స్ ని కలిపి సీను చేయడం వల్ల,  ప్రేమ సంగతేమో గానీ, అతడి క్రిమినల్ యాక్టివిటీ హైలైట్ అయి అతడి ప్రెసిడెంటుగిరీని దిగజార్చింది. 

ఫ్యాన్స్ ని అగ్రెసివ్ గా చూపాలని లేకపోతే, అసోసియేషన్ వైస్ ప్రెసిడెంట్ గా, ప్రెసిడెంట్ సాగర్ తో విడిపోయిన ఈశ్వర్ నే, ఫ్యాన్స్ కొట్టి చెయ్యి ఎందుకు విరగ్గొట్టారు అతనేదో పత్రికలో తమ స్టార్ కి వ్యతిరేకంగా ఏదో రాశాడని?

కాబట్టి ఈ కథ ఫ్యాన్స్ కీ ఫ్యాన్స్ కీ మధ్య గొడవలతో సహజంగా, రిలేటెడ్ గా వుండాలి- కథ కావల థియేటర్ ఓనర్ కొడుకుతో కాకుండా.  సినిమా స్టార్స్ కుండే ఫ్యాన్స్ ని నిజంగానే పాజిటివ్ గా చూపించాలని వుంటే- రెండు ఫ్యాన్స్ గ్రూపుల మధ్య గొడవల్లేని ఫ్రెండ్ షిప్ తో కూడిన సత్సంబంధాలు చూపించి, నేటి సోషల్ మీడియాలో పరస్పరం దెబ్బతీసుకునే ఫ్యాన్స్ గ్రూపులకి ఆదర్శంగా చేయొచ్చు. దీన్ని ఎవరైనా హర్షిస్తారు. 

పోతే, తను అభిమానించే సూపర్ స్టార్ సూర్య ప్రతిష్ట కోసం ఏమైనా చేసే సాగర్ కి, ఆ స్టార్  పట్ల గల అభిమానానికి డెప్త్ కూడా వుంటే బావుండేది. ఆ డెప్త్ సూర్య పేరు మీద సేవా కార్యక్రమాలు చేస్తూనో, మరేవో మానవీయ చర్యలు చేపడుతూనో  వుంటే కనిపిస్తుంది. ఇవి మిస్సయ్యాయి. అంటే సాగర్ తన అభిమాన స్టార్ కి ఆపాదించే విధంగా కథలో ఎలాటి ఎంపతీనీ క్రియేట్ చేయలేదు. ఎంపతీ అనేది ప్రేక్షకుల్ని పాత్రతో, కథతో కనెక్ట్ చేసే బలమైన భావోద్వేగం. ఫ్యాన్స్ కి దేవుడు లాంటి సూపర్ స్టార్ ప్రపంచంలో ఎక్కడైనా ఎల్లలులేని ఆరాధనీయుడే. Praise your lord అనే భక్తి భావంతో తేలిపోయే ఫ్యాన్స్ నుంచి ప్రశంసలు అందుకుంటూ వుంటాడు. ఇలా ప్రేక్షకుల దృష్టిలో సూపర్ స్టార్ అయిన సూర్య, సాగర్ ద్వారా దైవ సమానుడుగా ఎమోషనల్ గా ఎలివేట్ కావాల్సింది కాలేదు. మరొకటేమిటంటే, సాగర్ ఇంట్లో కనీసం ఒక్క సూర్య పోస్టర్ కూడా  లేకపోవడం. 

ఇక సూర్య కుమార్ ఫ్యాన్స్ అసోసియేషన్ ప్రెసిడెంట్ గా ఒక్కసారైనా సూర్యని సాగర్ కలవక పోవడం ఒకటుంది. ఈ కథ జరుగుతున్న 2002 లో వివిధ ఫ్యాన్స్ అసోసియేషన్స్ వాళ్ళు హైదరాబాద్ వెళ్ళి తమ స్టార్ ని కలుసుకుని ఫీడ్ బ్యాక్స్ ఇవ్వడం, నటించే సినిమాల విషయంలో సలహా సూచనలివ్వడం చేసేవాళ్ళు. ఇప్పుడూ చేస్తూంటారు. కానీ సాగర్ లంకలో తిరునాళ్ళు  జరుగుతున్నప్పుడు, సమీపంలో సూర్య సినిమా షూటింగ్ జరుగుతూంటే , అక్కడి కెళ్ళిన సాగర్ సూర్యని కలవకుండా బయట బయటే స్టాఫ్ కి సూర్య ఇష్టపడే అరటి గెల ఒకటి అందించేసి రావడం చూస్తే- ఈ రకమైన సాగర్ ధోరణి అతను సూర్యని కలవడానికి సిగ్గు పడుతున్నాడేమో అనే అర్ధాన్నిస్తోందని దర్శకుడు గమనించి వుంటే బావుండేది. వాళ్ళిద్దర్నీ ముగింపులోనే కలపాలన్న ఆలోచన పెట్టుకోవడం వల్ల ఇలాటి లోపాలేర్పడ్డాయి. 

సరే, ముగింపులోనే కలపవచ్చు- ఐతే దానికి తగిన అర్ధాన్నీ జోడించాలి. అంటే పూర్వమెప్పుడో కొత్త ఫ్యాన్ గా అత్యుత్సాహంతో మొదటిసారిగా సూర్యని కలవడానికెళ్తే, ఏదో మూడ్ లో వున్న సూర్య - ఎహె పోరా!-  అని గేటు వేయించేస్తే, దెబ్బతిన్న సాగర్ అప్పట్నుంచీ సూర్యని కలవట్లేదని జస్టిఫై చేయొచ్చు. అయినా అభిమానం చంపుకోలేదని చూపిస్తూ సాగర్ మీద ప్రేక్షకుల  ప్రేమని మరింత పెంచొచ్చు. ఇలా ఈ నేపథ్యంలో  ముగింపులో ఇద్దరూ కలుసుకునేట్టు చేస్తే , అప్పుడు గతంలో తను గెంటేసిన సాగర్ తో సూర్య భావోద్వేగాలు ఎలా వుంటాయి! ఆల్ డ్రామా ఈజ్ కాన్ఫ్లిక్ట్. కాన్ఫ్లిక్ట్ లేకపోతే డ్రామా లేదు. గతంలో సూర్య సాగర్ ని గెంటేసి వుంటే కాన్ఫ్లిక్ట్. 

ఇంకా సాగర్ కి మహాలక్ష్మి చేత టికెట్లు ఇప్పించి ప్రేమని బలీయం చేయడానికి సాగర్ పాత్రని దెబ్బతీసే విధంగా సీను లేకుండా చూడాల్సింది దర్శకుడు. సాగర్ సినిమా టికెట్లు ఇమ్మని అడిగితే బుకింగ్ క్లర్క్ లేవు పొమ్మని కసురుకుంటాడు. సాగర్ నిస్సహాయంగా వుండిపోతే, మహాలక్ష్మి వచ్చి టికెట్లు ఇప్పించి ఆదుకుంటుంది. థియేటర్లో ఒక ఫ్యాన్స్ ప్రెసిడెంట్ కిలా జరగదేమో. కథలో తను సృష్టించిన హీరో పాత్రకి కథకుడే విలువ ఇవ్వకపోతే, ప్రతిష్ట పెంచకపోతే, ప్రేక్షకుల దృష్టిలో పడిపోయిన ఆ క్యారెక్టర్ ని ఇంకెందుకు కేర్ చేస్తారు ప్రేక్షకులు? ఒకటి జస్టిఫై చేయడానికి ఇంకోటి కిల్ చేయడం సరైన పధ్ధతి కాదేమో.

ఇలాటిదే ఒక విషయాన్ని ఎస్టాబ్లిష్ చేయడానికి ఇంకో విషయాన్నీ కిల్ చేసిన సీన్లు దర్శకుడు గమనించినట్టు లేదు- అవి సాగర్ చిన్నప్పటి ఫ్లాష్ బ్యాకులో వున్నాయి. చిన్నప్పుడు స్కూల్లో అడిగిన ప్రశ్నకి సాగర్ సమాధానం చెప్పలేక పోయాడని హెడ్ మాస్టర్ అడ్మిషన్ నిరాకరించ వచ్చా? దాంతో తండ్రి ఇంటికి తీసికెళ్ళి ఆ కొడుకుని చితకబాదొచ్చా? కొడుకు సమాధానం  చెప్పలేకపోవడానికి  అతడి క్రానిక్ స్టేజి కెళ్ళిన నత్తియే కారణమని తండ్రికీ, హెడ్ మాస్టర్ కీ తెలియదా? నత్తికి  కారణం మెదడుకీ స్వరపేటికకీ మధ్య నరాల సమస్య. వంశపారంపర్యంగా జన్యు సమస్య కూడా కావొచ్చు. దీనికి స్పీచ్ థెరఫీ అవసరం. ఆ స్పీచ్ థెరఫీకి కొన్ని నెలలు పడుతుందని డాక్టరు చెప్పి వుంటే- ఈ సమస్య నుంచి ఎలాగైనా త్వరగా బైట పడాలని సాగర్ స్ట్రగుల్ చేస్తూంటే, అప్పుడు అనుకోకుండా సూపర్ స్టార్ సూర్య టేపులో పాడిన మోటివేషనల్  గేయం విని - ఉవ్వెత్తున లేచిన భావోద్వేగంతో ఆ లోపాన్ని జయించేశాడని పిక్చరైజ్ చేసి వుంటే ఎంత బావుండేది? పిల్లల సమస్యని అర్ధం జేసుకోకుండా రాక్షసంగా దండించడమే పెద్దరికం అన్నట్టు చూపిస్తే ఎలా? లాఠీ తీసుకుని తండ్రి అలా కొడుతున్న సీను తీవ్రతని సెన్సార్ వాళ్ళు పట్టించుకోవాల్సింది. 

అయితే ఏదో అల్లరి చిల్లరిగా తిరిగి ఫ్యాన్ అయిపోయాడని  చూపకుండా, చిన్నప్పుడు తన జీవితాన్నే మార్చేసిన గేయంతో సూర్య అభిమానిగా మారాడని  బేస్ వేయడం, డెప్త్ వున్న మంచి థీమాటిక్ ఐడియానే.

తర్వాత, సూర్య తన వూళ్ళో జరుగుతున్న తిరునాళ్ళకి ఆహ్వానించేందుకు మహాలక్ష్మి ఇంటికెళ్ళే సీనుతో వచ్చిన సమస్య! ఏంటా సమస్య? చెబితే కోటి రూపాయలు బహుమానం! సరే, చెప్పేద్దాం…ఇటు తిరునాళ్ళు, అటు సూర్య సినిమా షూటింగు ఏకకాలంలో జరుగుతున్నప్పుడు, సాగర్ తిరునాళ్ళకి ఆహ్వానించడమేమిటి? సూర్య ఫ్యాన్స్ ప్రెసిడెంట్ గా సాగర్ కి షూటింగ్ గురించి ముందే సమాచారముంటుంది. అప్పుడతను షూటింగ్ కి ఆహ్వానించాలి గానీ, తిరుణాళ్ళేమిటి? మహాలక్ష్మి తండ్రి పురుషోత్తం థియేటర్ ఓనరే కాబట్టి షూటింగ్ కి రాకుండా వుండడు. ఇలా ఈ సీను కథకీ, పాత్రలకీ రిలేటెడ్ గా వుంటుంది. తిరునాళ్ళేమిటి? కథలో ఇమడని ఈ తిరునాళ్ళ  దృశ్యాల షూటింగ్ ఖర్చు, దాని పోస్ట్ ప్రొడక్షన్ ఖర్చూ దండగ అయినట్టే కదా? 

పోతే, లవ్ ట్రాకు లవర్స్ మధ్య మాత్రమే సున్నితంగా నీటుగా వుంది. ఇదే సున్నితత్వం సాగర్ కి మహాలక్ష్మి తండ్రి పురుషోత్తంతో కూడా వుండాలి. ఎందుకంటే, చిన్నప్పట్నుంచీ తన రోల్ మోడల్ గా సూర్యని అభిమానిస్తున్న సాగర్ కి, సూర్యలో వున్న హూందాతనం, వ్యవహారశైలి, దయాగుణం, గ్రేస్ మొదలైన పాజిటివ్ వ్యక్తిత్వ విశిష్టతలకి ప్రభావితమై అవి సాగర్ లో కనిపిస్తూ వుండాలి. విరుద్ధంగా సాగర్ లో పర్సనాలిటీ డిజార్డర్స్ కనిపిస్తున్నాయి. తను కాలేజీ స్టూడెంట్ మాత్రమే కాదు, సూర్య ఫ్యాన్స్ ప్రెసిడెంట్ కూడా. కానీ ప్రేమ విషయంలో కూడా అతడి బిహేవియర్ కాలేజీ స్టూడెంట్ అన్నట్టే వుంటుంది. అసలతను కాలేజీ స్టూడెంట్ బిహేవియర్ నుంచి సూర్య గుణగణాల్ని జీర్ణించుకున్న ఫ్యాన్స్ ప్రెసిడెంట్ బిహేవియర్ కి మారాలి. మారి వుంటే కథ కూడా సరైన గాడిలో పడేది. ఒక ఫ్యాన్స్ ప్రెసిడెంట్ ప్రేమ వ్యవహారాన్ని ఎలా హేండిల్ చేస్తాడో ఓ కొత్తతరహా, ఇది వరకు రాని కొత్త సీన్లతో కథ వచ్చేది. 

కానీ తన పాయింటాఫ్ లో దర్శకుడు సాగర్ క్యారక్టర్ కున్న డబుల్ షేడ్స్ ని  గుర్తించకుండా, కాలేజీ స్టూడెంట్ షేడ్ కే ఫిక్స్ అయిపోయి  కథ లాగించేయడం వల్ల రొటీన్ ఆవారా లవర్ సీన్లే చూడాల్సి వచ్చింది మనకి. ఈ రొటీన్ వల్లే థియేటర్ మీద మహాలక్ష్మి బోర్డు పక్కన ‘ఐ లవ్ యూ’ నియాన్ లైట్ల డిస్ ప్లే పెట్టి పురుషోత్తంని రెచ్చగొట్టాడు.  పురుషోత్తం కూడా సాగర్ ఫ్యాన్స్ ప్రెసిడెంట్ అన్న స్పృహే లేకుండా ప్రవర్తించడం కూడా పాత్ర చిత్రణ లోపమే. అసలు ఈ కథలో ఎవ్వరూ కూడా సాగర్ ఒక పెద్ద సూపర్ స్టార్ ఫ్యాన్స్ అసోసియేషన్ కి ప్రెసిడెంట్ అని తెలుసుకుని ఆ రకమైన విలువ, గుర్తింపూ  ఇవ్వకపోవడం ఈ కథ ఎలివేట్ అవకపోవడానికి ప్రధాన కారణం.కథకి కథానాయకుడే ప్రధానాకర్షణగా లేకపోతే, కథని ఇంకేం కాపాడుతుంది? 

ఇంటర్వెల్ సీను లో మహాలక్ష్మితో థియేటర్ లో దొరికిపోయాక పురుషోత్తం కొట్టి గాయపరచి చెప్పే మాటలకి, సాగర్ ఎదురుతిరిగి చేసిన ఛాలెంజిని పరిశీలించాలి. ప్రేమ కథల్లో థియేటర్ కట్టి చూపిస్తా, వంద కోట్లు సంపాదించి చూపిస్తా లాంటి ఎమోషనల్ కంటెంట్ లేని  మూస ఫార్ములా ఛాలెంజిల కిప్పుడు కాలం చెల్లిందనాలి. ఇవి ఎలా సాధిస్తాడో ఓ టెంప్లెట్ లో చూసి చూసి వున్నారు ప్రేక్షకులు. ఇవి నిజ జీవితంలో జరిగేవి కావు. 

ఇప్పటి దేశకాలమాన పరిస్థితుల్లో సినిమాటిక్ పరిష్కారాలు సంతృప్తి పర్చలేవు. జీవితంలో ఎదురవుతున్న అనుభవాలు వేరు. ఇప్పటి జీవితాల్లో రెండే సమస్యలు వేధిస్తున్నాయి. అయితే రిలేషన్ షిప్ సమస్యలు, కాకపొతే ఆర్ధిక సమస్యలు. కనుక సినిమా థీమ్స్ రోమాంటిక్స్ లేదా ఎకనామిక్స్ అవుతున్నాయి. ధరలు పెరిగిపోతూ. జీతాలు పెరక్క, అసలు ఉపాధులకే గ్యారంటీ లేక స్ట్రగుల్ చేస్తున్న ప్రజలకి -ఎప్పుడు ఉన్నత స్థితికి ఎదుగుతామా అన్నఆందోళనతో జీవితం గడిచిపోతోంది.  ఆ ఉన్నత స్థితికి చేరుకునే, జీవితంలో పనికొచ్చే ప్రాక్టికల్ మార్గాలు చూపాలి తప్ప- మూడు నెలల్లో థియేటర్, వందరోజుల్లో వంద కోట్లు లాంటి మోసపూరిత చిట్కాలు కాదు.

ఫస్టు ఎవరైనా ఒక గోల్ సాధించాలంటే దాని ఎండ్ పిక్చర్ చూడాలి. ఎలా సాధిస్తామన్నది కాదు. సాధిస్తే జీవితం ఎలా వుంటుందో ఆ ఎండ్ పిక్చర్ చూడాలి. డైలాగులు కొట్టి సాగర్ చేసేలాంటి ఛాలెంజీల కిప్పుడు బాక్సాఫీసులో ఏ విలువా లేదు. డైలాగ్ ఛాలెంజిలు కాలం చెల్లి పోయాయి. పురుషోత్తం అలా అవమానిస్తున్నప్పుడు ఛాలెంజి చేయకుండా సాగర్ ఆ ఛాలెంజికి తగ్గ ఎండ్ పిక్చర్ ని ఊహించుకోవాలి.

బ్రహ్మాండమైన 70 ఎం ఎం థియేటర్ కట్టేశాడు, 100 వ సూర్య సినిమాతో ప్రారంభోత్సవం చేశాడు, ప్రారంభోత్సవానికి సూపర్ స్టార్ సూర్య వచ్చేశాడు, మేళతాళాలు మోగుతున్నాయి…సాగర్ ని భుజాలకెత్తుకుని డాన్స్ చేశాడు, జనం తండోపతండాలుగా తరలి వస్తున్నారు, ఇది చూసి చప్పట్లు కొడుతున్నారు, టికెట్లు దొరక్క కొట్టుకుంటున్నారు….అప్పుడే మహాలక్ష్మిని పెళ్ళి చేసుకుని వచ్చేసి  ఇదంతా చూసి ఎంజాయ్ చేస్తున్నాడు సాగర్. జీవితం సూపర్  రిచ్ గా మారింది. పెద్ద బంగాళా, కార్లు, నౌకర్లు, సంతృప్తిగా పేరెంట్స్. ఆనంద బాష్పాలతో పురుషోత్తం వచ్చి కౌగిలించు కోవడాలు…సాగర్ కట్టలకి కట్టలు నోట్లు లెక్కబెట్టడం…ఇష్టం వచ్చినట్టు ఎండ్ పిక్చర్ ని ఊహించుకోవచ్చు!

 ఎందుకిలా? ఎందుకంటే డైలాగుల కంటే దృశ్య భాషకి ప్రేక్షకుల సబ్ కాన్షస్ మైండ్ బాగా కనెక్ట్ అవుతుంది. ఏదైనా సాధించాలంటే ముందు దృశ్య భాషలో ఎండ్ పిక్చర్ ని ఊహించుకుంటూ వుంటే, మన సబ్ కాన్షస్ మైండ్ ఇంప్రెస్ అయి అదెలా సాధించాలో అదే చూసుకుంటుంది. ఛాలెంజి చేసుకునే కథలకి తోడ్పడే సైంటిఫిక్ మెథడ్ ఇది. 

(ఆర్టికల్ నిడివి పెరగడం వలన రెండు భాగాలుగా చేశాం. దర్శకుడి పాయింటాఫ్ వ్యూ, స్ట్రక్చర్, జానర్ బెండర్ లతో కూడిన రెడీగా వున్న రెండో భాగాన్ని రేపు చూడండి)

-సికిందర్

1404 : స్పెషల్ ఆర్టికల్

 

    ఎల్ ఓ ఏ లో ప్రతిజ్ఞ బూనడాన్ని, లేదా ధృవీకరించడాన్ని అఫర్మేషన్ అంటారు. మన విషయానికొస్తే దర్శకత్వమనే  లక్ష్యాన్ని సాధించడానికి ఆ లక్ష్యాన్ని పదే పదే వల్లించడం ద్వారా మెదడుని వున్న స్థితినుంచి కొత్త స్థితికి రీవైరింగ్ చేయడమన్న మాట. చిన్నప్పుడు పాఠాలు బట్టీ పట్టి దాన్ని జ్ఞాపకంగా సబ్ కాన్షస్ మైండ్ లో నిల్వ చేయడం లాంటి దన్న మాట. ఈ అఫర్మేషన్స్ మెదడులోనే కాదు, మెదడుతో కనెక్ట్ అయి వుండే శరీర కణాలన్నిటా చేరిపోతాయి. కాబట్టి అఫర్మేషన్స్ జాగ్రత్తపడి పాజిటివ్ గా వుండేట్టు చూసుకోవాలి. ఒకరి మీద కోపంతో ‘వాడ్ని దెబ్బ కొట్టి నేను డైరెక్టర్ నవుతా!’  అని ఆవేశం చూపిస్తే, అది నెగెటివ్ ఫీలింగ్. అప్పుడా కోపంతో కూడిన ఆ నెగెటివ్ ఫీలింగ్ వెళ్ళి వెళ్ళి లివర్ ని ఎటాక్ చేస్తుంది. ఎలాటి నెగెటివ్ ఫీలింగ్స్ కి ఆ ఎటాక్స్ శరీరమంతటా జరుగుతూంటాయి. ఎవరి మీదయితే నెగెటివ్ ఫీలింగ్ తో వుంటామో, ఆ వ్యక్తికేం కాదు, లక్షణంగా వుంటాడు- మనమే మన శరీరాన్ని దెబ్బతీసుకుని రోగాల బారిన పడతాం. ఏ నెగెటివ్ ఫీలింగ్ ఏ అవయవాన్ని దెబ్బతీసి, ఏ అనారోగ్యాన్ని తెచ్చి పెడుతుందో వెల్ నెస్ కోచ్ లూయీస్ హే తన ప్రసిద్ధ పుస్తకం ‘యూ కెన్ హీల్ యువర్ సెల్ఫ్’  లో పెద్ద లిస్టే ఇచ్చింది.

మరి -’నీ వూరొచ్చా, నీ ఇంటికొచ్చా, నీ నట్టింటికొచ్చా!’ అని కోపం బద్దలు చేసుకుని మీసం తిప్పి, తొడగొట్టడాన్ని హీరోయిజంగా సినిమాలో చూపించడం తప్పు కాదా అంటే- అదే కదా ఐరనీ, అలాకాకుండా ‘నిన్ను క్షమించాను పో!’ అంటే  సినిమాలు ఆడతాయా? కనుక సినిమాలో తన్నాలి, జీవితంలో క్షమించాలి - ఈ లౌక్యంతో తప్పించుకు తిరగాలి.

కనుక అఫర్మేషన్స్ పాజిటివ్ గా వుండేట్టు చూసుకోవాలి. కొత్తగా పాజిటివ్ అఫర్మేషన్స్ ఇచ్చినప్పుడు అప్పటివరకూ మెదడులో వైరింగ్ అయి వున్న పాత నమ్మకాల బలహీన న్యూరల్ పాత్ వేస్ ని చెరిపేసి, కొత్త పాత్ వేస్ తో రీవైరింగ్ చేస్తాయి. మెదడులో రెటిక్యులర్ యాక్టివేటింగ్ సిస్టమ్ (ఆర్ఏఎస్) అని రాడార్ వుంటుంది. ఇది రోజంతా పంచేంద్రియాల ద్వారా మెదడుకి భారీగా చేరే 74 గిగా బైట్ల సమాచారాన్ని (ఇది 16 సినిమాలు చూడడంతో సమానం) ఫిల్టర్ చేసి- ఏ సమాచారం ఫీలింగ్ తో వుందో దాన్ని మాత్రమే సబ్ కాన్షస్ మైండ్ కి పంపిస్తుంది. ఫీలింగ్ లేకపోతే గుండె అడ్డుకుంటుంది. సబ్ కాన్షస్ మైండ్ ఆ ఫీలింగ్ తో వున్న సమాచారాన్ని ఇమేజెస్ రూపంలో జ్ఞాపకాలుగా మార్చుకుని నిల్వ చేసుకుంటుంది. ఎప్పుడు ఏ పనికి ఏ ఇమేజి అవరసరముందో దాన్ని ఆర్ ఏ ఎస్ కి పంపిస్తుంది. అప్పుడా ఆర్ ఏ ఎస్ ఆ ఇమేజిని  విశ్వంలోకి ప్రసారం చేసి, దాంతో మన కోరికల్ని నిజం చేయడానికి ప్రయత్నిస్తుంది.ఈ మెకానిజం తెలుసుకోకపోతే ఏదో చెప్తార్లే అని మొత్తం ఎల్ ఓ ఏ నే బేఖాతరు చేసే అవకాశముంది. 

ఈ కింద ఇచ్చిన అఫర్మేషన్ ని ప్రతీ రోజూ ఉదయం లేవగానే చదవాలి. లేదా అయిదారు నిముషాలు వచ్చే ఈ పాఠాన్ని మొబైల్ లో రికార్డు చేసుకుని ఇయర్ ఫోన్స్ పెట్టుకుని వినొచ్చు. ముందుగా గుర్తుంచుకోవాల్సిందేమిటంటే, అనుకున్న లక్ష్యం పూర్తయన ఫీలింగుతో అపర్మేషన్ చేయాలి. అంటే ఆల్రెడీ దర్శకుడైనట్టు ఫీలవ్వాలి. దర్శకుడవుతాను, దర్శకుడవడం నా లక్ష్యం, లేదా దర్శకుడవ్వాలనుకుంటున్నాను- అనే  భవిష్యత్ కాలానికి చెందే ప్రార్ధన చేయకూడదు. విశ్వానికి భవిష్యత్ కాలం లేదు, భూత కాలం లేదు, వుండే దొక్కటే- స్తంభించిన వర్తమాన కాలం. కాబట్టి ఈ వర్తమానంలో -ఇప్పుడు దర్శకుడి హోదా ఫీలయ్యి ప్రార్ధన పంపాలి.

అఫర్మేషన్ : 

“విశ్వానికి ధన్యవాదాలు. నా వృత్తి జీవితంలో జరిగే దేనికైనా నేను 100% బాధ్యత తీసుకుంటున్నాను. దర్శకత్వ అవకాశాలు సంపాదించడం, కోల్పోవడం రెండింటికీ నేను 100% బాధ్యత తీసుకుంటున్నాను. లక్ష్యాన్నిసాధించడానికి, సాధనలో  విఫలమవడానికీ  నేను 100% బాధ్యత తీసుకుంటున్నాను. ఎందుకంటే నా వృత్తి జీవితంలో ఏం జరుగుతోందో అది పూర్తిగా నా సృష్టి. నా ఆకర్షణ. నా వృత్తితో నేను చెడు సంబంధం కలిగి వున్నందుకు క్షమాపణలు. అవకాశాలు  సంపాదించడం కష్టమని భావించినందుకూ క్షమాపణలు. 

“అవకాశాలు సంపాదించేటప్పుడు నా గురించి నన్ను తక్కువ చేసుకుని ఆలోచించినందుకూ క్షమాపణలు. దర్శకత్వ ప్రయత్నాలు చేస్తున్న ఇతరుల గురించి చెడుగా ఆలోచించినందుకూ క్షమాపణలు. నేను కోరుకున్న దర్శకత్వ అవకాశాలు నా జీవితంలోకి వచ్చినందుకూ  ధన్యవాదాలు. దర్శకత్వం నన్ను వరించినందుకూ  ధన్యవాదాలు. దర్శకత్వం నన్ను ధనవంతుడిగా మార్చినందుకూ ధన్యవాదాలు. నా చుట్టూ వున్న దర్శకులని ధనవంతులుగా చేసినందుకూ  ధన్యవాదాలు. వారు కూడా దానికి పూర్తి అర్హులు. ఎందుకంటే విశ్వం దృష్టిలో మనమందరం ఒకటి కాబట్టి.

“నా శరీరంలోని ప్రతి కణం దైవిక కాంతితో ప్రకాశిస్తోంది. ప్రతి శ్వాస నా శరీరానికి సమతుల్యతని, శాంతిని తెస్తోంది. నేను ప్రతిరోజూ ఆరోగ్యంగా మారుతున్నాను. నేను శారీరకంగా, మానసికంగా, భావోద్వేగపరంగా బలంగా మారుతున్నాను. నేను నా ప్రతి హృదయ స్పందనని అనుభవిస్తున్నాను. నన్ను నేను కొత్త ప్రాణశక్తితో నింపుతున్నాను. నేను లోతైన శాంతితో నిండిన వ్యక్తిని. ప్రతి ప్రశ్నకు, ప్రతి అవసరానికీ  సమాధానం నాలోనే వుంది. నా దగ్గర వున్న ప్రతిదానికీ నేను చాలా కృతజ్ఞుడ్ని. 

జీవితంలోని అనంతమైన అవకాశాలతో నన్ను అనుసంధానిస్తున్నాను. నేను శక్తివంతమైన అయస్కాంతాన్ని. నా సానుకూల వైబ్‌లు ఎల్లప్పుడూ దర్శకత్వ అవకాశాల్ని ఆకర్షిస్తున్నాయి. 

“ఎస్, ఊహించని అనేక వైపుల నుంచీ దర్శకత్వ అవకాశాలు  నాకు వస్తున్నాయి. ఈ అవకాశాల్ని హృదయపూర్వకంగా గౌరవిస్తున్నాను. నాకు లభించిన అవకాశాల్ని నా జ్ఞానంతో, విచక్షణతో సద్వినియోగం చేసుకుంటున్నాను. నేను ప్రతిరోజూ కొత్త అవకాశాల్ని ఆకర్షిస్స్తున్నాను. నేను నా పనిని ప్రేమిస్తున్నందున అవకాశాలు నావైపు వస్తున్నాయి. 

“నేను నాకు లభిస్తున్న దర్శకత్వ అవకాశాలకి పూర్తి విలువని జోడించి  తిరిగి ఇస్తున్నాను. నేను ఎంత ఎక్కువ విలువ జోడిస్తూంటే, అన్ని ఎక్కువ అవకాశాలు నాకు లభిస్తున్నాయి. సరైన మార్గంలో అవకాశాలు సంపాదించడానికి నాకు చాలా ఆలోచనలు వస్తున్నాయి. నా కలలన్నింటినీ నెరవేర్చుకోవడానికి నాకు పూర్తి సామర్థ్యం వుంది.  అందువల్ల నా లక్ష్యం వైపు వేగంగా కదులుతున్నాను. నేను కృతజ్ఞతతో, ​​కృతజ్ఞతా భావంతో అవకాశాల్ని స్వీకరిస్తున్నాను. 

“అవకాశం ఒక సానుకూల శక్తి, ఇది నా జీవితంలోకి సులభంగా స్వచ్ఛమైన తరహాలో వస్తోంది. అవతల ప్రతి ఒక్కరి వ్యక్తి విజయాన్నీ నేను ఆనందిస్స్తున్నాను. అందరికీ విజయం, సంపద, ఆరోగ్యం, శ్రేయస్సు, ఆనందమూ పుష్కలంగా ఇమ్మని విశ్వాన్ని ప్రార్థిస్స్తున్నాను. 

“నేను ఇతరులతో  సులభంగా డబ్బు పంచుకోగలుగుతున్నాను. డబ్బు సంపాదించడం ఇప్పుడు నాకు చాలా సులభం అయ్యేలా నన్ను ఇంత పెద్దవాడిని చేసినందుకు ధన్యవాదాలు. ప్రియమైన దర్శకత్వమా, ఈ రోజు నేను నిన్ను ప్రేమిస్తున్నానని ప్రకటిస్తున్నాను. నాకు ఇప్పుడు నీతో ప్రేమ సంబంధమే వుంది. నువ్వు చిన్న రూపాల్లో, మధ్యస్థ రూపాల్లో, పెద్ద రూపాల్లో - ఏ రూపంలో నా దగ్గరికి వచ్చినా నేను నిన్ను ప్రేమిస్తున్నాను. నేను చిన్నస్థాయి సినిమాని, పెద్ద స్థాయి సినిమానీ  రెండిటినీ ప్రేమిస్తున్నాను. అవకాశం ఈ దిశ నుంచి, ఆ దిశ నుంచి, ఏ దిశ నుంచి వచ్చినా స్వీకరిస్తున్నాను. 

“ప్రియమైన దర్శకత్వమా, నేను నిన్ను ప్రేమిస్తున్నాను. అందుకే నేను నిన్ను చాలా జాగ్రత్తగా చూసుకుంటున్నాను. విలువైనదిగా భావిస్తున్నాను. ఇతరులని దర్శకులుగా  చేసినందుకు నేను నిన్ను ప్రేమిస్తున్నాను. నేను వారి పట్ల ఎంత సంతోషంగా వుంటానో!  కొన్నిసార్లు నా నుంఛి దూరంగా వెళ్ళినందుకు కూడా నేను నిన్ను ప్రేమిస్తున్నాను. ఎందుకంటే కొన్నిసార్లు నువ్వు నా ద్వారా ఇతరులని దర్శకులుగా చేస్తూండ వచ్చు. నా ద్వారా ఇతరులని దర్శకులుగా చేసినా, ఇతరుల ద్వారా నన్ను దర్శకుడ్ని చేసినా రెండూ నాకిష్టమే. నా గతంలో నన్ను ప్రత్యక్షంగా గానీ, పరోక్షంగాగానీ నన్ను  బాధపెట్టిన, నా అవకాశాల్ని దెబ్బతీసిన వారందరినీ క్షమిస్స్తున్నాను. ఎందుకంటే వారిని నేను ఆకర్షించాను, నాకు జరిగిందంతా నా సృష్టే. దీనికి నేను 100% బాధ్యత తీసుకుంటున్నాను. 

“నా జీవితంలో వారిని ఆకర్షించినందుకు, నా జీవితంలో ఆ ఫ్రీక్వెన్సీని సృష్టించడానికి నేను చేయవలసినదంతా చేసినందుకూ క్షమాపణలు. అవకాశాల  గురించి నాకు ఒక పాఠం నేర్పించినందుకు వారందరికీ ధన్యవాదాలు. నాకు ఆ పాఠం అవసరమని నాకు తెలుసు. నా గతంలో నన్ను మోసం చేసిన, లేదా అవకాశాలు  సంపాదించడంలో నాకు మద్దతు ఇవ్వని వారందరినీ ఈ రోజు నేను క్షమిస్తున్నాను.

“అదే విధంగా నాకు తెలిసి, లేక తెలియక నేనెవర్నయినా మోసం చేసి వుంటే, బాధించి వుంటే, నష్టపరచి వుంటే, వాళ్ళ అవకాశాల్ని దెబ్బ తీసి వుంటే,  ఆ దివ్యాత్ములందరికీ క్షమాపణలు చెప్పుకుంటున్నాను. వారికి నా క్షమాపణలు, క్షమాపణలు, హృదయపూర్వక క్షమాపణలు. 

“నిర్మాతలు నాకు అవకాశాలు ఇవ్వడానికి ఇష్టపడుతున్నారు. ఎందుకంటే వారు నాకిచ్చిన అవకాశానికి ఎంత డబ్బు పెట్టుబడి పెడతారో నేను వారికి 10 రెట్లు తిరిగి ఇస్తున్నానని నమ్ముతున్నారు కాబట్టి. వారు నాకు ఇచ్చే డబ్బుకి నేను కచ్చితంగా విలువని జోడిస్తున్నాను. ప్రతిరోజూ ఇందుకే నేను నా జీవితంలో అవకాశాల్ని ఆకర్షిస్తున్నాను. నేను ప్రతిరోజు  దర్శకుడ్ని అని నమ్ముతున్నాను.  “అందుకే ప్రతిరోజూ అవకాశాల్నిఆకర్షిస్తున్నాను. నేను దర్శకుడిగా మారడం నాకు చాలా సౌకర్యవంతంగా వుంది. నేను కలుగన్న పెద్ద భవంతిలో నివసించడం చాలా సౌకర్యంగా వుంది. నేను నా అందమైన కలల కార్లనీ నడపడం చాలా సౌకర్యంగా వుంది. నేను నా కుటుంబ, బంధు మిత్రుల సౌఖ్యం కోసం డబ్బు ఖర్చుచేయడం చాలా తృప్తిగా వుంది. నేను డబ్బు ఖర్చు చేసే ప్రతిసారీ నేను డబ్బు సంపాదించడానికి దర్శకత్వ అవకాశాలు మరింత పెరుగుతూ వస్తున్నాయి.

“నా చేతినుంచి ఎల్లప్పుడూ డబ్బు ప్రేమతో వెళ్తోంది. వెళ్ళిన చోటల్లా అది ప్రేమతో కొన్ని రెట్లు పెరుగుతోంది. అందుకే నేను ఎల్లప్పుడూ ప్రేమతో డబ్బు ఇస్తున్నాను. కిరాణా షాపులో సరుకులు కొన్నా, బంకులో పెట్రోలు కొట్టించుకున్నా, మరెక్కడ డబ్బు ఖర్చు చేసినా, ఎల్లప్పుడూ ప్రేమతో, దాతృత్వ భావంతో ఇస్తున్నాను. అది కొన్ని రెట్లు పెరిగి నాకు తిరిగి వస్తున్నందుకు విశ్వానికి ధన్యవాదాలు చెప్పుకుంటున్నాను. 

“ప్రియమైన విశ్వమా, నేను ప్రతిరోజు ఈ ప్రార్ధన చేసినప్పుడల్లా రోజంతా నిశ్చింతగా గడుపుతున్నాను. నాకు మరో సంతోషకరమైన రోజుని ఇచ్చిన నీకు కృతజ్ఞతలు. నా ఈ రోజు విశ్వం కోసమే, విశ్వానికే నా రోజులన్నీ అంకితం. విశ్వం నాకేమిచ్చినా, ఇవ్వకపోయినా విశ్వం పట్ల నేను సదా కృతజ్ఞతతోనే వుంటాను!” 

ఎవరికైనా కెరీర్ ఒకడుగు ముందుకూ. నాల్గు అడుగులు వెనక్కీ వెళ్తూంటే ఈ అఫర్మేషన్ చేయొచ్చు- ‘నాలో వున్నజ్ఞానం నన్ను అనంతం వైపు నడిపిస్తోంది’

-సికిందర్ 

1403 : డీప్ రివ్యూ!

                                                          కథ, దర్శకత్వం: సెల్వమణి సెల్వరాజ్ తారాగణం: దుల్కర్ సల్మాన్, భాగ్యశ్రీ బోర్సే, రానా దగ్గుబాటి, సముద్రకని, రవీంద్ర విజయ్, నిళల్ గళ్ రవి, భగవతీ పెరుమాళ్, బిజేష్ నగేష్ తదతరులు స్క్రీన్ ప్లే: సెల్వమణి సెల్వరాజ్ -తమిళ్ ప్రభ, సంగీతం: ఝాను చందర్, బ్యాక్ గ్రౌండ్ స్కోర్: జేక్స్ బిజోయ్, ఛాయాగ్రహణం : డానీ సాంచెజ్-లోపెజ్, కూర్పు : లెవెల్లిన్ ఆంథోనీ గోన్సాల్వెజ్ బ్యానర్స్ : స్పిరిట్ మీడియా,  వేఫేరర్ ఫిల్మ్స్ నిర్మాతలు : రానా దగ్గుబాటి, దుల్కర్ సల్మాన్, ప్రశాంత్ పొట్లూరి,జోం వర్ఘీస్ విడుదల : నవంబర్ 14, 2025 ***         వర్ధమాన మలయాళ స్టార్ దుల్కర్ సల్మాన్ మలయాళ- తెలుగు- తమిళ-హిందీ భాషల్లో  వైవిధ్యభరిత సినిమాలు నటిస్తూ ప్రత్యేకత చాటుకుంటున్నాడు. మహానటి, సీతారామం, లక్కీ భాస్కర్, చుప్ -ది రివెంజ్ ఆఫ్ ది  ఆర్టిస్ట్, లోకా వంటి వైవిధ్యంతో కూడిన సినిమాల తర్వాత, మరిన్ని ప్రత్యేకతలతో తాజాగా తమిళంలో ‘కాంత’ నటించాడు. ఇది ఆసక్తి రేపుతూ తెలుగులో విడుదలైంది.  సల్మాన్ తో చేతులు కలిపి బహు భాషా  నటుడు, నిర్మాత రానా దగ్గుబాటి ఈ మూవీలో నటించడంతో మరింత క్రేజ్ వచ్చింది. ఇంకా తమిళ నటుడు సముద్రకని ఒక ముఖ్య పాత్రలో, తెలుగులో మిస్టర్ బచ్చన్, కింగ్డం సినిమాల హీరోయిన్ భాగ్యశ్రీ బోర్సే ఇంకో ముఖ్యపాత్రా నటించిన ఈ మూవీకి  దర్శకుడు సెల్వమణి సెల్వరాజ్. ఇతను క్రైమ్ డాక్యుమెంటరీ సిరీస్ 'ది హంట్ ఫర్ వీరప్పన్' తో పెద్ద పేరు సంపాదించుకున్నాడు. అలాగే నీలా (2016), లైఫ్ ఆఫ్ పై (2012) వంటి విభిన్న సినిమాలతో తనకంటూ ఒక విజువల్ శైలిని ఖరారు చేసుకున్నాడు. ఇప్పుడు ‘కాంత’అనే పీరియెడ్ డ్రామా థ్రిల్లర్ తో ఇంకో విజయం సాధించేందుకు ప్రేక్షక లోకం ముందుకొచ్చాడు. పోర్ట్ ఫోలియో చూస్తే  ఇంత ఆకర్షణీయంగా వున్న ఈ మూవీలో వున్నదేమిటి, అదెంతవరకూ మెప్పిస్తుందీ ఈ కింద డీప్ రివ్యూలో చూద్దాం…

కథేమిటి?

    ఈ కథ 1950ల నాటి మద్రాసులోని  మోడరన్ స్టూడియోస్ లో ప్రారంభమవుతుంది. ఈ స్టూడియోలో లోపలేం జరుగుతోందో  బయటికి సమాచారం రాదు. అంత నిగూఢంగా సినిమా నిర్మాణ కార్యకలాపాలు జరుగుతూంటాయి. అయితే ఈ స్టూడియో నష్టాల్లో వుంటుంది. దీంతో స్టూడియో అధినేత, నిర్మాత మార్టిన్ (రవీంద్ర విజయ్) దర్శకుడు అయ్యా (సముద్రకని) ని పిలిఛి, చాలా కాలం క్రితం ఆగిపోయిన ‘శాంత’ అనే సినిమాని పూర్తి  చేయమంటాడు.ఈ ఆగిపోయిన సినిమాలో హీరో టీకే మహదేవన్ (దుల్కర్ సల్మాన్) నటించాడు. ఇతను అప్పట్లో అయ్యా (తమిళంలో అయ్యా అంటే సర్ అని అర్ధం) శిష్యుడు. 

వీధి నాటకాలేస్తున్న మహదేవన్ ని ప్రోత్సహించి సినిమా హీరో చేశాడు అయ్యా. ఇప్పుడు అదే మహదేవన్ స్టార్ గా ఎదిగాడు. ఎదగడంతో బాటు తనంత మొనగాడు లేడని ఇగో  పెంచుకున్నాడు. పేరుకి ముందు నట చక్రవర్తి  తగిలించారు అభిమానులు. ఇప్పుడు గురువుగారు దర్శకుడు అయ్యా ఆగిపోయిన  ‘శాంత’ ని పూర్తి చేసేందుకు అడగడంతో మహదేవన్ కొన్ని కండిషన్లు పెడతాడు. సినిమా టైటిల్ ‘కాంత’ గా మార్చాలనీ, తను చనిపోయే క్లయిమాక్స్ కూడా మార్చాలనీ వగైరా. అసలు అయ్యా ఈ సినిమాని తన తల్లి జీవితం ఆధారంగా నివాళిగా తీసేందుకు సంకల్పించాడు. శిష్యుడు ఇలా షరతులు పెట్టడంతో అతడికి  వొళ్ళు మండిపోతుంది. ఇక్కడనుంచీ ఇద్దరి మధ్యా ఇగోల సంఘర్షణ మొదలవుతుంది. షూటింగ్ చేస్తున్నారన్న మాటేగానీ ఇద్దరి మధ్య మాటలుండవు. అసలు అయ్యాని పక్కనబెట్టి, తన ఫ్యాన్స్ కి నచ్చే విధంగా కలుషితం చేసి తనే షూట్ చేస్తూంటాడు మహదేవన్.

ఈ సినిమాలోకి హీరోయిన్ గా కుమారి (భాగ్యశ్రీ బోర్సే) వస్తుంది తల్లి పాత్ర నటించడానికి. ఆమె భర్తగా మహదేవన్. సెట్ లో ఆమె మహదేవన్ ధోరణి చూసి అయ్యాని సపోర్టు చేస్తుంది. ఈమెని బర్మా శరణార్ధుల శిబిరంలో చూసి సినిమా నటిని చేశాడు అయ్యా. ఇక మహదేవన్ పత్రికాధిపతి కుమార్తె దేవి (గాయత్రీ శంకర్) ని వివాహం చేసుకుని వున్నాడు. ఇప్పుడు కుమారి పట్ల ప్రేమని పెంచుకుంటాడు. ఈ ప్రేమాయణం చూసి అయ్యా రగిలిపోతాడు. తన సినిమాని, తను తెచ్చిన హీరోయిన్ నీ లాగేసుకుంటున్న మహదేవన్ కి ఇక బుద్ధి చెప్పక తప్పదని భావిస్తాడు. ఇలా ఉద్రిక్తతల మధ్య షూటింగ్ జరుగుతూండగా- క్లయిమాక్స్ తీస్తున్నప్పుడు మర్డర్ జరుగుతుంది. క్లయిమాక్స్ లో వాడిన రివాల్వర్ తోనే మర్డర్ జరుగుతుంది…

ఎవరు చేశారీ మర్డర్? ఎందుకు  చేశారు? ఇందులో ఎవరెవరు ఇరుక్కున్నారు? ఇంకా ఎవరెవరు సాక్షులుగా, అనుమానితులుగా వున్నారు? కేసు చేపట్టిన పోలీసు అధికారి ఫీనిక్స్ (రానా దగ్గుబాటి) దర్యాప్తు ఎలా సాగింది? హంతకుడుగా ఎవర్ని పట్టుకున్నాడు? హత్య చేయడం వెనుక హంతకుడి ఉద్దేశమేమిటి? …ఇదీ మిగతా కథ .

ఎవరెలా చేశారు?

    దుల్కర్ సల్మాన్ ఈ పీరియెడ్ కథలోని మహదేవన్ పాత్రని 75 ఏళ్ళ నాటి మనుషుల బాడీ లాంగ్వేజ్, మాట తీరు, హావ భావాలు మొదలైనవి అచ్చంగా గుర్తు చేస్తూ సినిమాకి డెప్త్ తెచ్చాడు. సినిమాలో రెండు పాత్రలు పోషించాడు-నిజ జీవితంలో టాప్ స్టార్ మహదేవన్ గా, టాప్ స్టార్ గా సినిమాలో నటిస్తున్న మోహన్ పాత్రగా. కెమెరా ముందు మోహన్ పాత్ర నటిస్తున్నప్పుడు నాటి సినిమాల్లోని అతి నాటకీయతని అద్భుతంగా పోషించాడు. ఏకకాలంలో ఈ రియల్ లైఫ్ / రీల్ లైఫ్ పాత్రలు రెండిటి పార్శ్వాల్నీ మార్చి మార్చి ప్రదర్శించే బొమ్మా బొరుసు ఆటాడుకున్నాడు. 

సాధారణంగా నటులు సన్నివేశం నటిస్తున్నప్పుడు రియల్ లైఫ్ ని మర్చిపోయి పాత్రలో లీనమైపోతారు. కట్ చెప్పాకే పాత్రలోంచి రియల్ లైఫ్ కొస్తారు. ఈ ప్రొఫెషనలిజం వుంటుంది. హీరోయిన్ తో నటిస్తున్నప్పుడు ఎక్కడో కాస్త వశం తప్పి షాట్ చెడగొట్టే సందర్భాలు చాలా అరుదు. అయితే దుల్కర్ హీరోయిన్ తో మోహన్ గా నటిస్తున్నప్పుడు పాత్ర ప్రకారం, ఆమె ఆడతనపు అభినయం చూసి ఏకాగ్రత చెదిరి రియల్ లైఫ్ లో కొచ్చేసి మహదేవన్ లా రియాక్షనిచ్చే సందర్భాలెన్నో వుంటాయి. తీస్తున్న సినిమా షాట్స్ ని చిత్రీకరిస్తున్నప్పుడు దృశ్యం బ్లాక్ అండ్ వైట్ లోకి వస్తుంది. ఎందుకంటే ఆ షాట్స్  కెమెరా పాయింట్ ఆఫ్ వ్యూ కాబట్టి- కెమెరాలో రీలు నాటి సినిమాలకి తగ్గట్టే బ్లాక్ అండ్ వైటే కాబట్టీ.

హీరోయిన్ తో మోహన్ గా నటిస్తున్న తెలుపు నలుపు షాట్స్ లో, మహదేవన్ గా రియా క్షనిచ్చినప్పుడు అతడి క్లోజప్ కలర్ లో కొచ్చేస్తుంది. తేరుకుని మళ్ళీ హీరోయిన్ని చూసినప్పుడు బ్లాక్ అండ్ వైట్ లోకి మారుతుంది. ఈ రీల్ లైఫ్ /రియల్ లైఫ్ ల జుగల్బందీ చాలా సార్లు ఫ్లాష్ అవుతూంటుంది ఫస్టాఫ్ అంతా. ఇదంతా దర్శకుడి సృజనాత్మకతే. దుల్కర్ ఈ రెండు పాత్రల వేర్వేరు క్షణ కాలపు రియాక్షన్స్ ని బొమ్మా బొరుసు చేసి ఆడుకున్నాడు.

హైలైట్ అనదగిన ఇంకో సీనులో నటన వుంటుంది- దర్శకుడు అయ్యా పాత్రలో సముద్రకని, ఒక షాట్ లో అడ్డు తగిలి- ఈ 4 స్టెప్స్ చేసి చూపించమని ఛాలెంజి విసురుతాడు. ఆ  షాట్లో 4 స్టెప్స్ వేస్తూ మిర్రర్ దగ్గరికెళ్ళి- మిర్రర్ కేసి తల కొట్టుకోవాలి. ఒక్కో డైలాగుతో ప్రతీ స్టెప్ లో బాడీ లాంగ్వేజీ ఎలా వుండాలో, ఎక్స్ ప్రెషన్స్ ఏమివ్వాలో, తెర మీద మారిపోయే ఏఏ ఎమోషన్స్ ని ఎస్టాబ్లిష్ చేయాలో వివరిస్తాడు సముద్రకని. ప్రతీ స్టెప్ లో మారిపోయే ‘కంటెంట్’ తో దుల్కర్ అవలీలగా ఛేంజోవర్స్ చూపిస్తూ వెళ్ళి రక్తం చిందేలా తల మిర్రర్ కేసి కొట్టుకుంటాడు!

ఇలా ఫస్టాఫ్ లో చాలా టెక్నిక్కు లున్నాయి. సాధారణంగా ఇంత మైక్రోలెవెల్ పాత్రచిత్రణ, చిత్రీకరణలో సృజనాత్మకతా కమర్షియల్ సినిమాల్లో వుండవు. దర్శకుడు ఆర్ట్ హౌస్ సినిమా స్కూలుకి చెందిన వాడు కాబట్టి కమర్షియల్ సినిమా అయినా చుట్టేయకుండా, ప్రేక్షకులకి చిరకాలపు చుట్టరికాన్ని చుట్టబెట్టాడు. దుల్కర్ పాత్రకి ఇంకో వెర్షన్ వుంది : ఫ్లాష్ బ్యాక్ ఈవెంట్స్ లో పాతికేళ్ళ కుర్రాడిగా వీధి నాటకా లేస్తున్నప్పటి శరీరం, సొగసూ. 

అయితే ఈ మహదేవన్ పాత్రతో ఒకటే ఇబ్బంది- ఆ రోజుల్లో స్టార్లు ఇలా పొగరుతో వుండే వాళ్ళా? దర్శకుల మాట జవదాటే వాళ్ళా? తమని నటుల్ని చేసిన గురువులంటే గౌరవ భావంతో వుండేవాళ్ళు. 1950 - 1970 ల మధ్య తమిళంలో అయినా తెలుగులోనైనా సినిమాలకది మలి స్వర్ణయుగం. ఇంకా వ్యాపార యుగం ప్రారంభం కాలేదు. 1970 ల నుంచి వ్యాపార యుగంతో స్టార్లు శాసించే రోజులు ప్రారంభమయ్యాయి. ఈ నేపథ్యంలో చూస్తే మహదేవన్ పాత్ర చిత్రణ అసహజంగా అన్పిస్తుంది. ఈ ప్రశ్న వేధిస్తూంటే  సమాధానం సెకండాఫ్ లో లభించినట్టు అన్పిస్తుంది-  ఆ ఫ్లాష్ బ్యాక్ పార్టులో ఇదే సినిమాలో నటిస్తూ అప్పుడూ గురువు మాట వినలేదు మహదేవన్. అప్పుడు కోపంతో కుర్చీ ఎత్తి అతడి మీదికి విసిరాడు అయ్యా. దాంతో ఆగకుండా తప్పుడు కేసులో అరెస్టు చేయించి తనే బెయిలు మీద విడిపించాడు అయ్యా. దీంతో కహదేవన్ తెగతెంపులు చేసుకుని అయ్యా మీద ప్రతీకారం పెంచుకున్నాడు. ఆ ప్రతీకారమే ఇప్పుడు తీర్చుకుంటున్నాడని జస్టిఫై చేశాడు దర్శకుడు. అయినా మళ్ళీ ఇదే ప్రశ్న- ఇంకా స్టార్ గా ఎదగని గతంలో అయినా మహదేవన్ గురువైన అయ్యా మాట ఎందుకు ఖాతరు చేయలేదు? ఇదే ఈ పాత్రతో వచ్చిన ఇబ్బంది!

ఇక సముద్రకనితో ఇగో క్లాషెస్ సీన్లు, స్టూడియో బయట హీరోయిన్ భాగ్యశ్రీ బోర్సే తో పాత స్టయిల్ రోమాంటిక్ సీన్లూ, ఇంటర్వెల్ ముందు సృష్టించే అల్లకల్లోలపు సీనూ దుల్కర్ టాలెంట్ కి నిదర్శనాలు. ఇంతే, దీన్తర్వాత సెకండాఫ్ కొస్తే మిస్సింగ్ ఇన్ యాక్షన్ ఐపొతాడు. ఇక్కడ్నుంచీ 50 నిమిషాలూ ఓ నాల్గు సీన్లలో తప్ప కనిపించడు. ఈ నాల్గు సీన్లలో కూడా ఏమీ చేయడు. హత్య కేసులో అనుమానితుడి పాత్రగా లొంగి వుంటాడు- సెకండాఫ్ కథ రానా దగ్గుబాటి చేతుల్లోకి వెళ్ళిపోవడంతో. క్లయిమాక్స్ లోనే తిరిగి యాక్షన్ లోకొస్తాడు. ఇలా ఫస్టాఫ్ ని బలంగా నిలబెట్టగల్గిన దుల్కర్, సెకండాఫ్ లో కథ మర్డర్ మిస్టరీగా జానర్ మారిపోవడంతో సినిమాని కాపాడలేక పోయాడు.

హీరోయిన్ భాగ్యశ్రీ బోర్సే సినిమాకి పెద్ద ఎట్రాక్షనే. ఆమె క్లోజప్స్ లో ఇచ్చిన వివిధ షాట్స్ ని మర్చిపోలేం. 1950 లనాటి సౌకుమార్యం, సహజత్వం, ఆడతనం, నేటివిటీ నటనలోకి తీసుకొచ్చింది. ఆడతనపు హీరోయిన్ పాత్రల్ని చూసి కాలమైంది. పాత సినిమాలు చూసుకోవాల్సిందే. అలాటి పాత సినిమా హీరోయిన్ ని చూపించాడు దర్శకుడు. ఆమె నటించిన కుమారి పాత్ర గ్లామర్ కోసం లేదు, ఒకవైపు అయ్యాతో గురుభక్తి, మరోవైపు తనని ప్రేమించే పెళ్ళయిన మహదేవన్ తో ఎటూ తేల్చుకోలేని స్థితి- ఈ రెండిటి మధ్య గుంభనంగా సేఫ్ గేమ్ ఆడుకునే ఆరిందా. 

సముద్రకని విషయానికొస్తే- గురువుగా సముద్రకని శిష్యుడి అవిశ్వాసానికి అనుభవించే మానసిక సంఘర్షణతోనే నలిగి పోతూంటాడు. షూటింగ్ మధ్యలో శిష్యుడ్ని పీకి పారేసే ధైర్యం లేదు. కానీ పరిస్థితి పీక్ కి వెళ్ళాక డిక్లేర్ చేసేస్తాడు- షూటింగులో ఉన్నట్టుండి పైనుంచి షాండ్లియర్ విరిగిపడడంతో కొద్దిలో తప్పించుకున్న శిష్యుడ్ని ఉద్దేశింఛి- ‘నీ కళ్ళల్లో చావు భయం కన్పించింది- నాకు సంతృప్తిగా వుంది. అందుకే నిన్ను చంపబోతున్నాను’ అని తెగించి చెప్పేస్తాడు. శిష్యుడు చావడానికి రాలేదు. అందుకే తీస్తున్న సినిమా క్లయిమాక్స్ లో కుమారి చేతిలో చచ్చే సీనుని మార్చి పారేశాడు. అంటే గురూ గారు తన సొంత తల్లి శాంత జీవిత కథతో నివాళిగా తీస్తున్న సినిమా కథనే మార్చేశాడు. గురువుగారి తల్లి శాంత వ్యసనపరుడైన భర్తని కాల్చి చంపేసే కథ అది…శాంత పేరు కూడా కాంతగా మార్చేశాడు శిష్యుడు. ఇలా ప్రొఫెషనల్ గా ఇగోల సంఘర్షణే కాదు, పర్సనల్ గా కూడా తన జీవితంలోకి చొరబడ్డ విశ్వాస ఘాతకుడైన శిష్యుడి మీద ప్రతీకారంతో రగిలిపోయే పాత్రని బలంగా, అర్ధవంతంగా  ప్రెజెంట్ చేశాడు సముద్రకని.

ఇక పోలీసు అధికారి ఫీనిక్స్ గా ఇంటర్వెల్ తర్వాత ఎంటరయ్యే రానా దగ్గుబాటి కామిక్ సెన్స్ తో నవ్వించే ప్రయత్నం చేస్తాడు. అది అరుపులతో లౌడ్ గా వుంటుందే తప్ప నవ్వించదు. 50 నిమిషాల సేపూ సాగే అతడి దర్యాప్తు పార్టు చాలా మైనస్ సినిమాకి. ఎందుకో చివర చూద్దాం. ఐదేళ్ళ క్రితం ఈ కథ పట్టుకుని తన దగ్గరి కొచ్చిన దర్శకుడ్ని హీరోగా దుల్కర్ అయితే బావుంటుందని దుల్కర్ ని బలవంతంగా ఒప్పించాడు రానా. కానీ తన పాత్ర ఎలా వుందో దాని మీద వర్క్ చేసుకోలేదు. ఇదే సెకండాఫ్ బాక్సాఫీసు అప్పీల్ని దెబ్బతీసింది. 

అల్లుడు మహదేవన్ ప్రేమ వ్యవహారాల్ని కనిపెట్టే పత్రికాధిపతిగా నిళల్ గళ్ రవి గుర్తుండి పోయే ఎక్స్ ప్రెషన్స్ ఇచ్చాడు. కూతురు దేవి పాత్రలో గాయత్రీ శంకర్ కూడా గుర్తుంటుంది. ఈమెకీ భాగ్యశ్రీకీ మధ్య ప్రచ్ఛన్న యుద్ధం జరుగుతూంటుంది. క్లయిమాక్స్ చూసేందుకు ఈమె సెట్స్ కొచ్చినప్పుడు, చూడకుండానే కుర్చీ లోంచి లేచి వెళ్ళిపోయే పరిస్థితి వస్తుంది. అప్పుడా కుర్చీలో భాగ్యశ్రీ కూర్చునే విధానం గొప్ప అర్ధాన్నిస్తుంది- సబ్ టెక్స్ట్ గా. ఇది కూడా గుర్తుండి పోయే గొప్ప సీను. 

ఇతర మైనర్ పాత్రలు చాలా వున్నాయి. కానీ ఒక్క తెలుగు పాత్రా లేదు. తెలుగు సినిమా పరిశ్రమ కూడా మద్రాసు సినిమా పరిశ్రమలో అంతర్భాగం అప్పట్లో. కానీ ఆ నటులుగానీ, సాంకేతికులుగానీ, దర్శకుడు అయ్యా అసిస్టెంట్లుగా గానీ తెలుగు పాత్ర ఒక్కటీ కథలో భాగంగా తెర మీద కన్పించకపోవడం విచిత్రం- రానా కూడా తమిళ పాత్రే. ఈ సినిమాని మాత్రం తెలుగు- తమిళ భాషల్లో తీసి విడుదల చేశారు. 1950లలో జరిగే కథంటే చరిత్రని రికార్డు చేయడమే. అలాటిది ఆ మద్రాసు ఉమ్మడి సినిమా చరిత్రలో తెలుగు కళాకారుల ఉనికినే విస్మరించారు. 

సాంకేతికాల సంగతి?

    ఝాను చందర్ సంగీతంలో మూడు పాటలూ తీసి పక్కన పెట్టేయాలి. పీరియెడ్ కథలో నేటి కాలపు  స్లో పాటలు నాన్ సింక్. జేక్స్ బిజోయ్ బ్యాక్ గ్రౌండ్ స్కోరు మాత్రం పీరియెడ్ సినిమాల స్వరాలు పలికింది సింపుల్ గా. ఇది పాత సినిమాల బిజిఎం కి దగ్గరగా వుంది. ఇలాగే ఝాను చందర్ పాటలు కూడా వుండాల్సింది.  డానీ సాంచెజ్-లోపెజ్ కెమెరా వర్క్ లైటింగ్ ఎఫెక్ట్స్ ప్రధానంగా  పీరియెడ్ వాతావరణ సృష్టి కళాత్మకంగా వుంది. కలర్ లో వచ్చే భాగాలు బ్లూ-బ్రౌన్ టింట్స్ తో కూల్ గా వుంటాయి. కంటికి చలవ చేశాయంటారు అలా. రామలింగం కళాదర్శకత్వం కూడా. కానీ  లెవెల్లిన్ ఆంథోనీ గోన్సాల్వెజ్ ఎడిటింగ్ నిర్దాక్షిణ్యంగా సెకండాఫ్ నిడివిని తగ్గించేసి వుండాల్సింది! ఫస్టాఫ్ లో కలర్ / బ్లాక్ అండ్ వైట్ జుగల్బందీ షాట్స్ కి ఫాస్ట్ కటింగ్స్, అలాగే సినిమా సాంతం అంచెలంచెలుగా వచ్చే జరిగిన కథ తాలూకు మల్టీపుల్ ఫ్లాష్ బ్యాకుల ఎడిటింగ్, ప్రేక్షకులు కన్ఫ్యూజ్ అవకుండా కూర్పు చేశాడు. సినిమా ఎక్కువ భాగం స్టూడియోలోనే సాగుతుంది. అవుట్ డోర్ లొకేషన్స్ తక్కువ.

ఇంతకీ కథెలా వుంది?

    జానర్ బెండర్ అంటూ రెండు విజాతీ జానర్లు కలిపి చేసిన కథే కొంప ముంచింది. కమర్షియల్ సినిమా ప్రయోగాలకి పరిమితులుంటాయి. పైగా జానర్ బెండర్ గా ఇది ఇండీ ఫిలిం అని ఇంకో మాటన్నాడు రానా. ఇండీ ఫిలిమ్స్ ఎంత మంది ప్రేక్షకులు చూస్తారు, వాటి మార్కెట్ ఎంత. సాధారణంగా లో- బడ్జెట్ సినిమాలుగా ఇవి వుంటాయి. ఫస్టాఫ్ కళ్ళప్పగించి చూసి, సెకండాఫ్ కళ్ళుమూసుకుని కునుకు తీసేలా చేసేది జానర్ బెండర్ కాదేమో. ముందు మార్కెట్ యాస్పెక్ట్ పట్ల స్పష్టతో వుంటే, దాంతో క్రియేటివ్ యాస్పెక్ట్ స్పష్టంగా వస్తుంది. 

ఐతే ఏమాటకామాటే చెప్పుకుంటే, దర్శకుడు సెల్వమణి సెల్వరాజ్ మనుషుల్లోని అహం, ఆశ, ద్రోహం వంటి థీమ్స్ చుట్టూ ఈ కథ తీయాలనుకున్నాడు. నాటి తమిళ నటుడు, గాయకుడు ఎంకె త్యాగరాజ భాగవతార్ జీవితం ఆధారంగా ఈ కథ వుంటుందని ప్రచారం కూడా జరిగింది. భాగవతార్ ని తమిళ సినిమాలకి మొదటి సూపర్ స్టార్ గా పేర్కొంటారు. అయితే దుల్కర్ సల్మాన్ పాత్ర టీకే మహదేవన్ పేరు సహా కథ పూర్తిగా కల్పితమని స్పష్టం చేశాడు తర్వాత దర్శకుడు. అయినా సినిమా విడుదలయ్యాక దుల్కర్ మీదే కేసేసేశారు భాగవతార్ వారసులు. భాగవతార్ జీవితాన్ని తప్పుగా చిత్రీకరించారని ఆరోపణ. 

భాగవతార్ తమిళ సినిమాల్లో ఉచ్ఛస్థితిలో వున్నప్పుడు మర్డర్ చేశాడు. అప్పట్లోనే హీరో హీరోయిన్ల ఎవైర్స్ మీద కథనాలు రాసే ఎల్లో జర్నలిస్టు లక్ష్మీ కాంతన్ తన వారపత్రిక ‘సినిమా తూటు’ లో, భాగవతార్ పరువుని అదే పనిగా తూట్లు పొడుస్తూంటే, 1944 లో నటుడు ఎంఎస్ కృష్ణన్, స్టూడియో యజమాని శ్రీరాములు నాయుడులతో కలిసి లక్ష్మీకాంతన్ ని కత్తిపోటుతో కైలాసానికి పంపేసి, శ్రీకృష్ణ జన్మ స్థానానికెళ్ళి పోయాడు భాగవతార్. కోర్టులో శిక్ష పడింది. 1947 లో పై కోర్టులో అప్పీలు చేసుకుని నిర్దోషిగా విడుదలై పోయాడు. కానీ అప్పుడు మళ్ళీ నటించిన సినిమాలు ఆడలేదు. ఇక జీవితం మీద వైరాగ్యం పెంచుకుని, గాయకుడుగా మారి, గుళ్ళూ గోపురాల్లో కచేరీలు చేసుకుంటూ తిరుగుతూ, 1959 లో ఓ కచేరీలో అనారోగ్యం పాలైతే, ఎవరో ఇచ్చిన ఆయుర్వేద టానిక్ సేవించి- అది వికటించడంతో మరణించాడు. ఇది పోయెటిక్ జస్టిసేమో చేసిన హత్యకి. 

ఇలా దుల్కర్ పాత్ర పేరు, హీరోయిన్ తో ఎఫైర్, హత్యకేసులో ఇరుక్కోవడం వంటి మూడు సారూప్యాలు తప్ప భాగవతార్ జీవితంతో ఇంకే సంబంధం కనపడదు కథలో. 

రెండోది, ఈ కథలో మద్రాసులో మోడరన్ స్టూడియో అనేది అప్పట్లో సేలంలో కొనసాగిన మోడరన్ థియేటర్స్ లిమిటెడ్ వారి స్టూడియోని గుర్తుకు తెస్తుంది. మోడరన్  థియేటర్స్ స్టూడియోని 1935 లో టీఆర్ సుందరం ముదలియార్ ప్రారంభించాడు. అప్పట్లోనే సూటు బూటు హేట్ వేసుకుని కార్పొరేట్ స్టయిల్లో నడిపేవాడు స్టూడియోని. తర్వాత అతడి వారసులు 1982 వరకూ సూటు బూటు హేట్ వేసుకునే అదే కార్పొరేట్ స్టయిల్లో నడిపారు. మొత్తం 5 భాషల్లో 150 కి పైగా సినిమాలు నిర్మించారు. తెలుగులో ఎన్టీఆర్ -కృష్ణకుమారి -జమున లతో ‘వీరకంకణం’, ఎస్వీ రంగారావుతో ‘మొనగాళ్ళకు మొనగాడు’, కృష్ణ- కాంచన- గుమ్మడి లతో ‘నేనూ మనిషినే’  మొదలైన 15 సినిమాలూ  తీశారు. కళాకారులుగా అన్నాదురై, కరుణానిధి, ఎమ్జీఆర్ లాంటి ఎందరికో తొలి అవకాశాల్నిచ్చి ప్రముఖుల్ని చేసింది ఈ స్టూడియో.

ఇదంతా కథలో మోడరన్ స్టూడియో రూపంలో కనిపిస్తుంది. ఓనర్ కూడా సూటు బూటు వేసుకునే వుంటాడు హేట్ తప్ప. ఫస్టాఫ్ కథనం ఓపెనింగ్ ఇమేజితో ఇలా వుంటుంది … బ్లాక్ అండ్ వైట్ లో ఆ  రోజుల్లో హాలీవుడ్ ఫిలిం నోయర్ క్రైం జానర్ సినిమాల్లో కన్పించే లాంటి సీను…రాత్రి పూట మూసి వున్న ఎత్తైన మోడరన్ స్టూడియో గేటు. ఆకాశంలో ఉరుములు, మెరుపులు…హోరున వర్షం. ఆ  వర్షంలో మెల్లిగా నల్ల కారొచ్చి ఆగడం. తర్వాత మొహం కన్పించని హేట్ పెట్టుకున్న మనిషి బూటు కాళ్ళు మెట్లెక్కడం…మెట్లెక్కి గది ముందు ఆగితే,  వెనుక ఫ్లోర్ మీద పొడుగ్గా అతడి నీడ. ఈ నీడ కథ చెప్పే ఫిలిం నోయర్ 9 సింబాలిజమ్స్ లో ఒకటి…అంటే ఆ పాత్ర అంతర్గత మానసిక సంక్షోభాన్ని,  నైతిక సంశయాన్నీ, దాచి పెట్టిన ఉద్దేశాల్నీ ఈ నీడ సూచిస్తూ, మరో పక్క వెంటాడే గతాన్నీ, లేదా అనుభవించక తప్పని విధి విలాసాన్నీ స్పష్టం చేస్తుంది. అప్పుడు  అకస్మాత్తుగా రెండు గన్ షాట్లు…. దీంతో స్క్రీను బ్లాంక్ అయి టైటిల్స్ పడతాయి. 

ఈ ఓపెనింగ్ ఇమేజి కథ సారాంశాన్ని చెప్తోంది. ఎవరిదో హత్య జరిగింది, ఎవరో హత్య చేశాడు… ఈ సస్పెన్సు హుక్ గా పనిచేస్తూంటే, మొత్తం కథ తెలుసుకోవడానికి ఉత్కంఠతో ఉపక్రమిస్తాం. టైటిల్స్ తర్వాత దర్శకుడు క్లుప్తత పాటిస్తూ నాలుగే నాలుగు సీన్లతో నేరుగా కథ ప్రారంభించేశాడు- ఈ క్లుప్తతకి/ క్రియేటివిటీకి దర్శకులు/రచయితలు ఎవరైనా మంత్రముగ్ధులవ్వాల్సిందే. 

మొదటి సిను : స్టూడియో ఓనర్, నిర్మాత మార్టిన్ ప్రభాకరన్  దర్శకుడు అయ్యాని పిలిచి ఆగిపోయిన సినిమా ప్రారంభించమని చెప్పడం, అయ్యా అయిష్టంగా వుంటే, నష్టాల్లో వున్న స్టూడియో కోసం తప్పదని మార్టిన్ ఒప్పించడం; రెండో సీను :  షూటింగ్ ఏర్పాట్ల హడావిడి;  మూడో సీను :  హీరోయిన్ కుమారి ఎంట్రీ, అయ్యా ఆమెతో -  మా అమ్మ కథలో అమ్మవి నీవే, అన్నీ నీవే నని చెప్పేయడం; నాలుగో సీను : ఆర్భాటంగా టాప్ స్టార్ మహదేవన్ ఎంట్రీ. అయిష్టంగా వున్న అయ్యాని చూసి- టైటిల్ మార్చేయ్, క్లయిమాక్స్ కూడా మార్చేసేయ్ అని అయ్యా ఆశల  మీద దుమ్ము పోయడం, ఇద్దరి మధ్యా ఇగోల పోరాటం మొదలై పోవడం… నాలుగే చిన్న చిన్న సీన్లు! 

నస లేకుండా ఇలా వెంటనే ప్రారంభమయ్యే కథ,  చకాచకా  మహదేవన్- అయ్యాలతో ఇగోల సంఘర్షణ, కుమారితో మహదేవన్ ప్రేమాయణం, మధ్య మధ్య మల్టీపుల్ ఫ్లాష్ బ్యాకులతో అయ్యా- మహదేవన్ ల గతం- ఇవి  చూపిస్తూ పాయింటు కొస్తుంది. అంటే కుమారితో మహదేవన్ ప్రేమాయణానికి అయ్యా ఇక మహదేవన్ ని చంపాలన్నంత కసి పెంచుకోవడం చూపించి- సినిమా ప్రారంభంలో హుక్ గా వేసిన ఓపెనింగ్ ఇమేజి దగ్గరికొస్తుంది కథ. ఇప్పుడు కూడా ఓపెనింగ్ ఇమెజిఒ హత్య చేసిన ఆగంతకుడ్ని రివీల్ చేయకుండా- హుక్ ని కొనసాగిస్తూ హత్యతో ఇంటర్వెల్ కొస్తుంది ఫస్టాఫ్.

అయితే ఓపెనింగ్ ఇమేజిలో హుక్ గా వాడిన రహస్యాన్ని ఇంటర్వెల్లో విప్పడం అమల్లో వున్న సాంప్రదాయం ప్రకారం కరెక్టే గానీ, పూర్తిగా విప్పకపోవడం కాదు. ఓపెనింగ్ ఇమేజికి ఇంటర్వెల్లో ఏమీ మిగలకూడదు- అంటే ఇక్కడ హత్య చేసిన ఆగంతకుడెవరో స్పష్టంగా చూపించె య్యాల్సిందే! అప్పుడే ఇంటర్వెల్ బ్యాంగ్ నిస్తుంది. లేకపోతే  ఇంటర్వెల్ పేలవంగా వుంటుంది. ఇంటర్వెల్లో ఇంకా ఆగంతకుడ్ని దాచిపెడితే కథ ఎండ్ సస్పెన్స్ లో పడుతుంది. ఎండ్ సస్పెన్స్ లో పడిందంటే కథ ఆత్మహత్య చేసుకున్నట్టే!  ఓపెనింగ్ ఇమేజికి పే ఆఫ్ పాయింట్ ఇంతర్వెల్లే.  ఇంటర్వెల్ దాటిందంటే ఓపెనింగ్ ఇమేజికి లైఫ్ వుండదు. ఈ పొరపాటువల్ల సెకండాఫ్ సెకండాఫ్ సినిమా మోయలేని భారమైపోయింది! 

మిస్టరీ  చుట్టూ  సెకండాఫ్

    సినిమా క్రైం కథలకి సంబంధించి మర్డర్ మిస్టరీ అన్న మాటే ఎప్పుడూ వాడొద్దు. ఆలోచన చేయొద్దు. మర్డర్ మిస్టరీ అంటే ఏమిటి? హత్య చేసిందెవరో చివరి వరకూ తెలియక పోవడం. చివరి వరకూ తెలియకపోతే ఏమవుతుంది? చివరి వరకూ విలన్ అనేవాడు కనిపించడు.  చివరి వరకూ విలన్ అనేవాడు కన్పించక పోతే ఏమవుతుంది ? ఊహించండి- యాక్షన్ సినిమాల్లో హీరో సంఘర్షించడానికి విలనే లేకపోతే ఎలా వుంటుంది? అలాగే మర్డర్ మిస్టరీతో వుంటుంది. అంతవరకూ హీరో హంతకుడు (విలన్) ఎవరో తెలుసుకునేందుకు  అనుమానితుల్ని ప్రశ్నిస్తూ  కాలం గడపాల్సిందే. అలా గడిపితే ఏమవుతుంది? తాడూ బొంగరం లేని వాడిలా వుంటాడు హీరో. తాడూ బొంగరం లేకపోతే ఏమవుతుంది? కథ ఉరి తాడులా వుంటుంది ప్రేక్షకులకి. ఎంతసేపూ డైలాగులతో కథ నడవడమే తప్ప యాక్షన్ వుండదు. అప్పుడెప్పుడో చిట్టచివరికి హంతకుడు (విలన్) ఎవరో కనిపెడతాడు హీరో. అప్పుడు ఉలిక్కిపడి- వార్నీ, వీడా హంతకుడు/విలన్ అని ప్రేక్షకులు బోలెడు ఆశ్చర్య పడిపోతారని సదరు దర్శకుడికి నమ్మకం. 

మర్డర్ మిస్టరీలనేవి నవలల్లో చదవడానికి బావుంటాయి. సినిమాగా చూడ్డానికి బావుండవు.  కానీ దాదాపు 1970 ల వరకూ మర్డర్ మిస్టరీ సినిమాలు ఆడేవి. అప్పటి కాలానికి అప్పటి ప్రేక్షకులు. కానీ తర్వాత ఫ్లాప్ కావడం మొదలెట్టాయి. అప్పుడు కారణం తెలుసుకున్నారు హాలీవుడ్ దర్శకులు. చదవడానికి బావుండే  మర్డర్ మిస్టరీలు సినిమాగా చూడలేక పోవడానికి కారణం-  సినిమా అనేది విజువల్ మీడియా. విజువల్ మీడియా డైనమిక్స్ వేరు, ప్రింట్ మీడియా డైనమిక్స్ వేరు. విజువల్ మీడియాలో కంటికి యాక్షన్ కనపడాలి. ఇలా తరం మారిన ప్రేక్షకుల అభిరుచి తెలిశాక మర్డర్ మిస్టరీలతో సినిమాలు తీయడం మానేశారు. మరేం చేశారు? మర్డర్ మిస్టరీల్లో హంతకుడెవరో  చివరి వరకూ సస్పెన్స్ లో పెడుతున్నారు. ఇందుకే ఇవి ఎండ్ సస్పెన్స్ కథలయ్యాయి. ఇవి విజువల్ మీడియా అయిన సినిమాల్లో యాక్షన్ లేకుండా చేస్తున్నాయి. కథ యాక్షన్ లో వుండాలంటే ఏం చేయాలి? హంతకుడెవరో హత్య చేస్తున్నప్పుడే చూపించెయ్యాలి. చూపించేశాక అతనెలా పట్టుబడతాడదన్నది సస్పెన్స్ లో పెట్టి, పట్టుకునే కథగా  సీన్లు నడపాలి. అప్పుడు యాక్షన్ లో వుంటుంది కథ.. అందుకని దీన్ని సీన్ టు సీన్ సస్పెన్స్ కథలన్నారు. హాలీవుడ్ ఈ పనే చేస్తోంది అప్పట్నుంచీ.

ఈ విషయం  ఈ బ్లాగులో వందల సార్లు చెప్పి వుంటాం- ఏదో గొప్ప అనుకుని మర్డర్ మిస్టరీ లంటూ  ఎండ్ సస్పెన్స్ లో పడేయ్యొద్దు  కథల్ని మొర్రో- సీన్ టు సీన్ సస్పెన్స్ చేసుకోవాలని ! ఎవరైనా  వినిపించుకుంటేగా? ఇంకా మర్డర్ మిస్టరీలే తీస్తూ ప్రతీ సినిమానీ ఫ్లాప్ చేసుకుంటున్నారు!

‘కాంత’ తో ఇదే జరిగింది ఇంటర్వెల్ సీనులో. హత్య చేస్తున్న హంతకుడెవరో ఇంకా సస్పెన్స్ లో పెట్టేసి కాలం చెల్లిన ఎండ్ సస్పెన్స్ కథల డంప్ లో పడేశారు సినిమాని.

సెకండాఫ్ మొదలవగానే పోలీసు అధికారి ఫీనిక్స్ (రానా దగ్గుబాటి) వస్తాడు స్టూడియోకి. శవాన్ని చూస్తాడు. ఇన్వెస్టిగేషన్ మొదలుపెడతాడు. హత్య రివాల్వర్ తో జరిగింది. రెండు షాట్లు పేలాయి. హంతకుడు చంపి రివాల్వర్ అక్కడే పడేసి పోయాడు. అది 35 ఎం ఎం కోల్ట్ రివాల్వర్. దీన్ని క్లయిమాక్స్ సీనులో వాడారు. షూటింగులో డమ్మీ రివాల్వర్ కాకుండా రియల్ గన్ ఎందుకు వాడారని నిలదీస్తాడు. దాని మీద హంతకుడి వేలి ముద్రలు పడొచ్చని సీజ్ చేస్తాడు. ఆ రివాల్వర్ స్టూడియో ఓనర్ మార్టిన్ ది.  మార్టిన్ దాన్ని ఎవరు తీశారో తెలియదంటాడు. ఫీనిక్స్ మొత్తం అందర్నీ ప్రశ్నించడం మొదలెడతాడు.  షూటింగులో ఆ రివాల్వర్ అయ్యా ఇచ్చినట్టు మేకప్ మాన్ చెప్తాడు. అప్పుడు అందులో బుల్లెట్లు లేవంటాడు. ఇప్పుడు బుల్లెట్లు ఎవరు పెట్టారని అడగడం మొదలెడతాడు ఫీనిక్స్. ఇలా మొదట అయ్యాని అనుమానిస్తాడు. తర్వాత మహదేవన్ ని బలంగా అనుమానిస్తాడు. మార్టిన్ ని కూడా అనుమానితుల జాబితాలో వేస్తాడు. ఇలా కథ అక్కడక్కడే ఈ ప్రశించడాలతో తిరుగుతూ వుంటుంది. రివాల్వర్ హంతకుడి చేతికెలా వచ్చింది, అందులో బుల్లెట్లు ఎలా వచ్చాయన్న ప్రశ్నల చుట్టే స్టూడియోలోనే 50 నిమిషాల సేపూ  సెకండాఫ్ గడిచిపోతుంది… చిట్ట చివరికి క్లయిమాక్స్ లో హంతకుడ్ని ఫీనిక్స్ పట్టుకోడు- హంతకుడే ఫీలయ్యి చెప్పేస్తాడు. ఎందుకు చంపాడో కూడా చెప్తాడు. 

స్టోరీ రైటింగ్ ఇలా

    ఇదన్న మాట ఎండ్ సస్పెన్స్ మిస్టరీ కథనం. ఇన్వెస్టిగేషన్, అందులో లాజిక్కులు తీయడం, ఊహాగానాలు చేయడం, అనుమానం వున్న వాళ్ళని కొట్టడం ఇవన్నీ సహనపరీక్ష పెట్టేస్తూ సెకండాఫ్ ని కుప్పకూల్చుతాయి. అయ్యా, మహదేవన్ ఇద్దర్లో ఒకరు హంతకుడని మనకి తెలిసిపోతున్న సిట్యుయేషన్ లో, ఇద్దరికీ కారణాలున్నాయని, ఎవరు చంపితే ఏంటని తేలికభావం ఏర్పడుతుంది మిస్టరీ పట్ల. చివర్లో ఇద్దర్లో ఒకడు హంతకుడ్నని చెప్పుకుని, ఎందుకు చంపాడో తెలిసిన కారణమే చెప్పేసరికి ముగింపు కూడా తేలిపోయి మొత్తం సినిమాకే ఎసరొచ్చింది.

అదే ఇంటర్వెల్లో చంపుతున్నప్పుడు చూపించేస్తే షాక్ వేల్యూతో ఆ  హంతకుడ్ని ఫాలో అవుతూ, ఎలా పట్టుబడతాడో, ముగింపు ఎలా వుంటుందో నని,  సీన్ టు సీన్ సస్పెన్స్ తో పరుగెట్టే కథని థ్రిల్లింగ్ గా చూసేవాళ్ళం. ఇదీ ఎండ్ సస్పెన్స్ కీ, సీన్ టు సీన్ సస్పెన్స్ కీ వున్న క్వాలిటేటివ్ తేడా. ఇందుకే ఇంటర్వెల్లో రివీల్ చేయకుండా అలాగే సెకండాఫ్ నడపడంతో ఫస్టాఫ్ ఇగోల కథకి సెకండాఫ్ మర్డర్ మిస్టరీతో జానర్ బెండర్ చేసినట్టు చెప్పుకున్నారు. దీని ఫలితం ఎలా వుందో చూశాం. అదే హంతకుడ్ని ఇంటర్వెల్లో రివీల్ చేసేస్తే, ఇగోల కథే మర్డర్ కి దారి తీసి యాక్షన్ తో కంటిన్యూ అవుతున్న ఒకే జానర్ కథగా  సెకండాఫ్ సేఫ్ గా వుండేది.

ఇంకోటేమిటంటే, సినిమా షూటింగులో నిజ రివాల్వర్ అనేది కథ కోసం కాంప్రమైజ్ అయ్యిందే తప్ప లాజిక్ లేదు. సినిమా షూటింగ్స్ లో డమ్మీ రివాల్వర్సే వాడతారు. ఒకవేళ నిజ రివాల్వర్ వాడాల్సి వస్తే బుల్లెట్లు పెట్టకుండా దాని ఛాంబర్ ని బ్లాంక్ చేస్తారు. అలా చేస్తే నిజ రివాల్వర్ డ్యామేజి అవుతుంది. అలా ఎవ్వరూ చెయ్యరు. డమ్మీ రివాల్వరే వాడతారు. ఇది తెలిసికూడా నిజ రివాల్వర్ పెట్టి  కథ చేశారంటే కథ కోసం లాజిక్ ని బలి చేశారు.

రెండోది, రివాల్వర్ మీద వేలిముద్రలు ఎవరివో తెలుసుకుంటే దొరికిపోతాడు హంతకుడు. ఇది పక్కనబెట్టి, హంతకుడెవరు హంతకుడెవరని స్తూడియోనే పట్టుకు వేలాడుతూంటాడు  ఫీనిక్స్.ఇలా ఇన్వెస్టిగేషన్ పార్టు కూడా విఫల కథనంగా తయారైంది. 

హిచ్ కాక్ ఐడియా

        ఆల్ ఫ్రెడ్ హిచ్ కాక్ తీసిన ;సైకో; కథతో ఒక సమస్య వచ్చింది. ప్రధాన పాత్ర తో మొదలైన కథ, ఆ ప్రధాన పాత్ర హత్యకి గురవడంతో దాని కథ అర్దాంతరంగా ముగిసి, ఇంకో ప్రధాన పాత్ర తో వేరే కథ మొదలవుతుంది. ఇది అప్పట్లో రాబర్ట్ బ్లాచ్ అనే రచయిత రాసిన నవల. ఈ కథ తనకి నచ్చడం లేదని హిచ్ కాక్ తో అన్నాడు స్క్రీన్ ప్లే రచయిత జోసెఫ్ స్టెఫానో.  ప్రధాన పాత్ర చనిపోయాక దాంతో ప్రారంభమైన కథే అర్ధాంతరంగా ముగిసిపోవడం ఒకటైతే, అక్కడ్నించీ ఇంకో ప్రధాన పాత్రని తెచ్చి వేరే కథ ప్రారంభమవడం తనకి మింగుడు పడ్డం లేదన్నాడు. 

అప్పుడు హిచ్ కాక్, ‘ఈ రెండో పాత్ర ఆంథోనీ పెర్కిన్స్ నటిస్తే?’ అన్నాడు. స్టెఫానో స్టన్నయ్యాడు. సమస్య తీరిపోయింది. ఆంథోనీ పెర్కిన్స్ స్టార్ డమ్ వున్న నటుడు. అతను నటిస్తే కథలో ఏర్పడ్డ గండి పూడిపోతుంది. మొదటి ప్రధాన పాత్ర హీరోయిన్ జానెట్ లే తో ఆమె కథగా ప్రారంభమైన సినిమా, ప్లాట్ పాయింట్ వన్ లో హీరో ఆంథోనీ పెర్కిన్స్ కొత్తగా ప్రధాన పాత్రగా వచ్చి, ఆమెని హత్య చేస్తే, ఆమె కథని మర్చిపోయి అతడి సైకో కథలో లీనమైపోతారు ప్రేక్షకులు. ఇలా స్టార్స్ వల్ల కథతో కొన్ని అక్రమాలు సక్రమమై పోతాయన్నమాట. 

జానెట్ పాత్రలో అనూష్కా వుందనుకుందాం. సినిమా ప్రారంభమై ఓ ఇరవై నిమిషాలు ఆమె పాత్ర పరిచయం, జీవితం, ఆశయం చూస్తూ వున్నాం. ఇంతలో ఎక్కడ్నించో నాగార్జున వచ్చి ఆమెని కసక్ మన్పించి తన కథ మొదలెట్టుకుంటే, ఈ సర్ప్రయిజ్ ఎంట్రీకి అనూష్కా కథని మర్చిపోయి, నాగార్జున కొత్త కథని ఫాలో అవుతామా లేదా? ఇదీ స్టార్ చేసే మ్యాజిక్ అంటే! 

నవల చదువుతున్నప్పుడు పాత్రల రూపాలు అందులో కన్పించవు. అప్పుడు బాగా లేని కథతో నవల మింగుడు పడదు. స్టెఫానో సమస్య ఇదే. ఐతే బాగా లేదన్పించిన ‘సైకో’ నవల్లో ఆంథోనీ పెర్కిన్స్ ని వూహించుకోమని హిచ్ కాక్ ఎప్పుడైతే అన్నాడో, అప్పుడు స్టెఫానో సెట్ రైట్ అయిపోయాడు. 

‘కాంత’ లో బాగా పాపులరైన, ప్రేక్షకులు విపరీత క్రేజ్ పెంచుకున్న రశ్మికా మందన్న వుందనుకుందాం, ఆమెని దుల్కర్ సల్మాన్ కస్సక్ మన్పిస్తే థియేటర్ దాదాపు ఏడ్పులతో, శాపనార్ధాలతో దద్దరిల్లుతుంది. దుర్మార్గుడు  దుల్కర్ ఎంత పని చేశాడు, వీణ్ణి పట్టుకోండ్రా-  పట్టుకుని కసకసమని…

ఇదీ స్టోరీ మేకింగ్ అంటే! స్టోరీ రైటింగ్ చేస్తూ కూర్చుంటే పంచ్ లేని చప్పిడి పదార్ధమే వస్తుంది. ‘కాంత ఒక చప్పిడి పదార్ధమనేది యదార్ధం. ఒక కళాత్మక విషాదం!

-సికిందర్