ప్రభుత్వం రైతు చట్టాలు తెచ్చింది. వద్దన్నారు రైతులు. ‘బావుంటుంది, తినండి, మీ కోసమే ఈ ఫలహారం’ అంది ప్రభుత్వం. ‘ఫలహారం మాకొద్దంటే తినమంటారేంటీ?’ అని ఆందోళనకి దిగారు రైతులు. ఇక రైతుల దారి రైతులది, ప్రభుత్వం దారి ప్రభుత్వానిదైంది. రైతులతో చర్చించకుండా చట్టాలు చేస్తే ఇలా వుంది. ఫంక్షన్ హాల్లో అడక్కుండా మెనూ తయారు చేసి, బావుంటుంది తినమంటే, ఇలాగే ఆందోళనకి దిగుతారు పోనీకదాని పెళ్ళికి వచ్చిన జనాలు. పాత్రలతో చర్చించకుండా కథకుడు చేస్తే ఇలాగే వుంటుంది కథ కూడా. ఈ బేసిక్స్ ని అర్ధం జేసుకోవడం లేదు కొందరు కథకులు. కథకుడు కథ నడప కూడదనీ, పాత్రల్నే కథని నడుపుకోనివ్వాలనీ ప్రాథమిక సూత్రం ఈ బ్లాగులో కీ బోర్డు అరిగి అరిగి కరిగి పోయేలాగా ఎన్నిసార్లు అ ఆలు గుర్తు చేసినా, అర్ధం జేసుకోక పోతే, ఈ బ్లాగు ఏమర్ధమవుతున్నట్టు. ఎందుకు చదువుతున్నట్టు.

        2. బేసిక్స్ నే ప్రశ్నిస్తూ వాదన కూడా. అక్షర మాల  అఆ లతో కాకుండా, ఇఈ లతో ప్రారంభమవుతుందనేలాటి వాట్సాప్ స్కూలు వాదన. ఇందాక వార్తలు చూస్తూంటే కథ రాయడానికి ఏ బేసిక్స్ ని  దృష్టిలో పెట్టుకోవాలో సరీగ్గా ఒక కామన్ సెన్సు టిప్ దొరికింది ఇది చెప్పడానికి. వార్తల్లో, ఫలానా వ్యక్తి ఫలానా విధంగా అన్నాడని వార్తలు చదువుతాడు. వ్యక్తి అనని మాటలు తను కల్పించి వార్తలు చదవడు. వార్తలు సేకరించాలంటే వ్యక్తులు ఏమంటున్నారో, ఏమనుకుంటున్నారో తెలుసుకోకుండా వార్తలు సేకరించరు. ఇంటర్వ్యూ చేసినప్పుడు కూడా వ్యక్తిని అడిగి తెలుసుకుంటాడు తప్ప, వ్యక్తిని కూర్చోబెట్టి తను చెప్పెయ్యడు ఇంటర్వ్యూ కర్త. కానీ కథకుడు మాత్రం పాత్రల్ని కూర్చోబెట్టి తను రాసేస్తూంటాడు వాటి కోసం కథ.

        3. సీనంటే మరేమిటో కాదు సిట్యుయేషన్. సిట్యుయేషన్ అంటే అవసరం. పాత్రల  అవసరం. పాత్రల అవసరాలే సిట్యుయేషన్ని సృష్టిస్తాయి. పాత్రల అవసరాలు చూడకుండా, ఆ సిట్యుయేషన్ తో కథకుడు తానుగా ఇంకేదో నచ్చింది ఫీలై సీను రాసేస్తే, అది సీను అవ దు, కథకుడి అధికారమవుతుంది. సీను మీద పాత్రలకే అధికారముంటుంది.  

        4. నచ్చడాలు నచ్చక పోవడాలు కథకుడి కుండవు. పాత్రలకే వుంటాయి. కథకుడి పాయింటాఫ్ వ్యూ గాలి బుడగ. స్వతంత్రంగా కథకుడి మైండ్ కి అర్ధం లేదు. పాత్రల మైండ్ లోపలుంటేనే ఎంతో కొంత అర్ధం పర్ధం. కథలు రాసి కథకుడు మెచ్యూర్ అవడు. పాత్రల్లోపల జీవించే మెచ్యూర్ అవుతాడు. కథ మీద కథకుడికి ఏ ఆధారిటీ లేదు, పాత్రలకే వుంది. కథకుడు కథలు రాయడు, పాత్రలు అనుకున్నదే రాస్తాడు. పాత్రలు అనుకుంటున్న దాంతోనే వాదిస్తాడు. కథంటే ఇన్నర్ ఇంజనీరింగ్, కథకుడు పై పైన వేసే పూతకాదు. బయట బయట వుంటే కథకుడికి రక్షణ లేదు, గర్భస్థ శిశువుగా పాత్రల్లోపలుంటేనే తన వాదంతో రక్షణ. ప్రతీ కథతో పాత్రలు పుట్టవు. అవి ఆల్రెడీ పుట్టివుంటాయి. కథకుడే  శిశువుగా పుట్టి నేర్చుకుంటాడు.

5. సింపుల్ ఉదాహరణ. హీరోయిన్, సెకండ్ హీరోయిన్, హీరో వున్నారు. హీరో హీరోయిన్లు ప్రేమలో వున్నారు. వీళ్ళ మధ్యకి సెకండ్ హీరోయిన్ వచ్చింది. ఈమెకి తనకంటే ఎక్కువ అర్హతలున్నాయని హీరోయిన్ కి ఇన్ఫీరియారిటీ ఏర్పడింది. హీరో తనతో వుంటాడా ఈమెతో వెళ్ళి పోతాడాని అనుమానం వేసింది, వీళ్ళిద్దరూ ఒకటై తనకి అన్యాయం చేస్తారేమోనని భయం ఏర్పడింది. దీంతో హీరో తనని ఎంత గాఢంగా ప్రేమిస్తున్నాడో తేల్చుకోవాలనుకుంది. సెకండ్ హీరోయిన్ సమక్షంలోనే హీరోకి టెస్టు పెట్టింది. ఆ టెస్టులో ప్రాణాలు పోయే ప్రమాదం జరిగి భయపడి పారిపోయింది. పారిపోయి హీరోతో కాంటాక్టు లేకుండా ఎక్కడో దాక్కుంది. ఇక కనిపించలేదు హీరో కనుక్కునే దాకా. ఇదీ సిట్యుయేషన్.

ఇప్పుడు, హీరోయిన్ అలా ఎలా పారిపోయి దాక్కుంటుందని కథకుడు ప్రశ్నిస్తే? ప్రాణాలుపోయే ప్రమాదం జరిగితే హీరోని వదిలేసి పారిపోయి, హీరో ఏమైపోయాడో పాపమని కూడా తల్లడిల్లకుండా, హీరోని కలుసుకునే ప్రయత్నం చేయకుండా, దాక్కోవడమేమిటని కథకుడు అనుకుంటే?

అప్పుడే కెవ్వున కేకేసి ఆ ప్రమాదం నుంచి హీరోని కాపాడి, టెస్టు పెట్టిన తన అసలు ఉద్దేశం చెప్పుకుని, క్షమించమని లొంగిపోతే కరెక్టా? లేదా అలా పారిపోయినా, కలుసుకోవడానికి తల్లడిల్లుతూ ప్రేక్షకుల కంట నీరు తెప్పించాలనుకుంటే కరెక్టా? ఏది కరెక్టు?

ఈ రెండూ తానుగా ఏదో ఫీలైపోతూ పునాది లేకుండా కథకుడాలోచించడమే. పాత్ర కోసం కథకుడు తనకి నచ్చిన విధంగా ఆలోచించి పెట్టి కథ చెయ్యడమే. రెండూ తప్పే. పాత్ర మైండ్ లో కెళ్ళి అప్పుడేం ఆలోచిస్తూ వుంటుందో చూడగల్గితే కథకుడు దారిలో వుంటాడు. పాత్ర ఆలోచనలే కథ. కథకుడి ఆలోచనలు కథ కాదు. వెనుక సీన్లని కథకుడు మర్చిపోతాడేమో గానీ, పాత్ర అస్సలు మర్చిపోదు. పాత్రకి సీన్లంటే అనుభవాల శ్రేణి. ఆ శ్రేణిలోంచే నిర్ణయాలు.

హీరోయిన్ మానసిక స్థితి సీక్వెన్స్ చూద్దాం : 1. తనకి తక్కువ అర్హతలున్నాయని సెకండ్ హీరోయిన్ వల్ల హీరోయిన్ కి ఇన్ఫీరియారిటీ ఏర్పడింది, 2. హీరో తనతో వుంటాడా ఈమెతో వెళ్ళి పోతాడాని అనుమానం వేసింది, 3. వీళ్ళిద్దరూ ఒకటై తనకి అన్యాయం చేస్తారేమోనని భయం ఏర్పడింది, 4. దీంతో హీరో తనని ఎంత గాఢంగా ప్రేమిస్తున్నాడో తేల్చుకోవాలనుకుంది, 5. సెకండ్ హీరోయిన్ సమక్షంలోనే హీరోకి టెస్టు పెట్టింది... టెస్టుకి దారి తీసిన కారణాలు కార్యకారణ సంబంధంతో వరస క్రమంలో- ఇన్ఫీరియారిటీ, హీరో మీద అనుమానం, వాళ్ళిద్దరంటే భయం, భయనివృత్తి నిర్ణయం...

ఇలా క్రమంగా ఆమె వాళ్ళిద్దరంటే భయపడే స్థితికి వచ్చింది. టెస్టు పెట్టినప్పుడు ఏం తేలుతుందో నన్న భయం. టెస్టులో వూహించని విధంగా ప్రమాదం జరిగి భయం రుజువైపోయింది. హీరో టెస్టు ఇష్టం లేక, వాళ్ళిద్దరూ కలిసి ప్రమాదం జరిపి తనని అడ్డు తొలగించు కోవాలకున్నారనీ ప్రాణ భయంతో పారిపోయింది. కనపడకుండా దాక్కుందంటే వాళ్ళంటే ప్రాణ భయంతోనే. దీనికంతటికీ మూలం - ట్రిగ్గర్ పాయింట్- డ్రైవింగ్ ఫోర్స్- ఏదై తే అది- తనకి తక్కువ అర్హతలున్నాయని అనుకోవడమే. ఈ సెటప్ కి పే ఆఫ్ ప్రమాదం.  

అప్పుడు ఇదంతా వదిలేసి, హీరోయిన్ తన మానసిక స్థితిని శుభ్రంగా తుడిపేసుకుని, ఎలా తల్లడిలుతూ వచ్చి ఇంకా హీరోనే ప్రేమిస్తున్నట్టు క్షమాపణ అడిగి సెటిలై పోతుంది? అది పాత్రేనా, ఎవడు పడితే వాడు కూర్చునే చబూత్రానా? వాళ్ళు చంపాలనుకున్నప్పుడు హీరోకి తన మీద ప్రేమే లేదని తేలిపోయాక? పాత్ర మైండ్ లోకి వెళ్ళి, ఏది ఎందుకాలోచిస్తోందో చూసే ఓపిక వుంటే, సీన్లు సరీగ్గా వస్తాయి. పాత్రలకి వాటి భావస్వాతంత్ర్యంతో కొనసాగే ప్రజాస్వామ్యాన్నివ్వాలి, కట్టడి చేసే నియంతృత్వం కాదు.

 6. కథ మీద ఆర్నెల్లు కూర్చున్నా, ఏడాది కూర్చున్నా, పాత్రల్లోపల గంటైనా కలిసి కూర్చున్నారా లేదా అన్నది పాయింటు. పాత్రలు సృష్టించుకునే కథాప్రపంచంలో కథకుడు పాత్రలు జరుపుకునే ఉత్తరప్రత్యుత్తరాలకి  కేవలం పోస్టు మన్ లాంటి వాడే తప్ప ఇంకో మహావీరుడు కాదు.

        7. కథ ఎంతవరకూ వచ్చిందని వాకబు చేయకుండా, పాత్రలెంతవరకూ వచ్చాయని వాటి ప్రోగ్రెస్ అడగడం రిలేటెడ్ గా వుంటుంది. కథతో కథకుడు అంతర్ దృష్టితో వుండడానికి.

8. టిప్స్ సీరియస్ అవుతున్నాయి కాబట్టి కాసేపు లైట్ గా... దర్శకుడు పెట్టింది కథకుడు తినడం కాక, కథకుడు పెట్టిందీ దర్శకుడు తినడం గాక, పాత్రలు పెట్టింది ఇద్దరూ కలిసి విందు చేసుకోవాలి. పక్కన ఒక బాటిల్ వుంచుకున్నా ఫర్వా లేదు.

9. బాటిల్ చేసే పని ఇంతా అంతా కాదు. కథకుడ్ని డబ్బులిచ్చేశాంగా రాస్తాడులే అన్నట్టు గాకుండా - బాటిల్, సిగ్గీ ప్యాక్ వంటి మంగళ ద్రవ్యాలు కూడా పెట్టి పంపిస్తూంటే, ఇంట్లో కూర్చుని తనలోని రెండో మనిషిని లేపుతాడు. అప్పుడు చచ్చినా కథలోకి వెళ్ళలేడు. పాత్రల్లోకే పరకాయ ప్రవేశం చేసి వాటితో విహరిస్తాడు. తెల్లారి వచ్చి తను కను గొన్న అమృత విషయాలు వెల్లడిస్తాడు. రెండో మనిషి కంట్రిబ్యూషన్ ఇంతా అంతా కాదు. టీంలో ఇంకొక మెంబర్ని ఫ్రీగా యాడ్ చేస్తాడు కథకుడు.

10. నటులు పరకాయ ప్రవేశం చేస్తారు కాబట్టే నటించగల్గుతారు. కథకుడు పరకాయ ప్రవేశం చేస్తే రాయగల్గుతాడు. అసలు కథకులు యాక్టింగ్ కోర్సు కూడా చేసి రావాలంటాడు ఒక హాలీవుడ్ అతను.

11. ఇప్పుడు సీరియస్... ప్రేక్షకులిప్పుడు ఎదిగిపోయారు. వాళ్ళతో పోటీ పడాలి. ఇంకా రెండు మూడేళ్ళ  క్రితం రాసుకున్న కథలతో ప్రయత్నాలు వృధా. అవి మూలన పడేసి, మారిన కొత్త బిజినెస్ మాడెల్ తో ఇప్పుడు రాసుకునే కథలు, రెండు మూడేళ్ళకైనా పనికొస్తాయి. సినిమా అనేది ఎప్పటికప్పుడు ప్రేక్షకులతో మారిపోయే బిజెనెస్. ఈ బిజినెస్ లో పాత్రల్ని అమ్మగల్గాలే గానీ కేవలం కథల్ని కాదు.

        12. మాటలు పాత్రల నోటి నుంచి రావాలి. ముద్ద చేసి పాత్రల నోట్లో పెట్టడం కాదు. పాత్రలు సృష్టించుకునే కథని పాత్రలే అనుభవిస్తాయి. వాటి మాటలు కథ గురించే వుంటాయి. పాత్రలనుభవిస్తున్న కథ లోంచే మాటలు వస్తాయి. ఏ మాట చెప్పినా అది కథతోనే రిలేటెడ్ గా వుంటుంది. ఈ సైన్సు కోసం  ‘దేర్ విల్ బి బ్లడ్’ చూడొచ్చు.

―సికిందర్  

 

 

Q :  సినిమా కంటెంట్ ని ఒకే మూసలో ఆలోచిస్తున్న వారికి ‘దేర్ విల్ బి బ్లడ్’ సంపూర్ణ విశ్లేషణ పెద్ద సినిమాల కంటెంట్ ని డిఫరెంట్ గా ఆలోచించేలా చేస్తుంది. కథలే గాక గాథలనేవి కూడా వున్నాయని కొత్త అవగాహన కలుగుతోంది. అయితే గాథల్లో నటించడానికి స్టార్స్ ముందుకొస్తారంటారా? రానప్పుడు ఇంత శ్రమ తీసుకుని మీరు విశ్లేషణ ఇచ్చి ప్రయోజనమేమిటి?

 ―శ్రీనివాస్ ఆర్, అసోసియేట్

A : గాథలు గాకపోయినా డిగ్నిఫైడ్ కథలతోనైనా ప్రయత్నాలు జరగడం లేదని కాదు, అయితే వాటిలో కూడా స్టార్స్ కి మసాలాలే కావాలి. ఫ్యాక్షన్ సినిమాల తర్వాత యాక్షన్ కామెడీలతో కొత్త దారి కన్పించింది. అయితే దశాబ్దంన్నర దాటినా ఈ దారే కన్పిస్తోంది. యాక్షన్ కామెడీల దగ్గరే ఆగి పోయారు స్టార్లు. ముందు దారి కనిపించడం లేదు. కనిపించినా నమ్మే పరిస్థితి లేదు. గొప్ప సినిమాలనేవి ఎన్టీఆర్, ఏఎన్నార్ ల దగ్గరే ఆగిపోయే పరిస్థితి వచ్చింది. ఇప్పటి జనరేషన్ ఎన్టీఆర్, ఏఎన్నార్ ల గొప్ప సినిమాల్ని యూట్యూబ్ లో విరగబడి చూస్తున్నారు. తరించిపోతూ కామెంట్లు పెడుతున్నారు. ఇప్పటి జనరేషన్ ని కూడా స్టార్లు నమ్మడం లేదు.

Q :  ‘నాంది’ సినిమా ఆర్టికల్ చదివాను. అయితే సినిమాలో హీరో ఒక సామాన్యుడు. తనకు నిజంగా రియల్ లైఫ్ లో అలా అన్యాయం జరిగినా, అతను జైలు నుంచి బయటకు వచ్చి మళ్లీ పోలీసుల మీద కేసులు పెట్టి పోరాటం చేసేంత ఓపిక, ధైర్యం ఉంటుందా? అతనలా చేస్తే పోలీసులు ఊరుకుంటారా? తనకు మళ్లీ పోలీసుల నుంచి ముప్పు ఉండదా? ఇవన్నీ తెలిసి సామాన్యుడు పోలీసులతో మళ్లీ పెట్టుకుంటాడా? అసలు ఈ సెక్షన్ లో ఉన్న లోపాలేంటి? వాటిని ఎలా సరిదిద్దాలి? ఎవరు సరిదిద్దాలి? ఇలా ఎన్నో సెక్షన్స్ దుర్వినియోగం చేస్తున్నారు కదా, దీనికి బాధ్యులు ఎవరు? ఇలాంటి బ్రహ్మాస్త్రం లాంటి సెక్షన్స్ గురించి కనీస అవగాహన కూడా లేకుండా ఉండడం ప్రజల తప్పే కదా?

―కిరణ్, అసోసియేట్

A : ప్రజల గురించి కాదు, ప్రేక్షకుల గురించి కాదు, సినిమా గురించి మాట్లాడుకోవాలి. ఆర్టికల్లో కాన్సెప్ట్ గురించే మాట్లాడుకున్నాం. చెప్పిన కాన్సెప్ట్ సినిమాలో లేనప్పుడు పాత్ర చిత్రణల గురించి మాట్లాడుకో నవసరం లేదు. మీ ఇతర ప్రశ్నలకి సమాధానాలు ఆర్టికల్లోనే వున్నాయి. నల్సార్ యూనివర్సిటీ వైస్ ఛాన్సెలర్  ప్రొ. డాక్టర్ ఫైజాన్ ముస్తఫా, యూట్యూబ్ లో హిందీలో ప్రసారం చేస్తున్న ‘లీగల్ ఎవేర్నెస్ వెబ్ సిరీస్’ ద్వారా, చట్టాల గురించి ఎంతో అవగాహన కల్గిస్తున్నారు. వీటిని ఇతర భాషల్లో కూడా ప్రసారం చేయాలని డిమాండ్స్ వున్నాయి. తెలుగులో కూడా ప్రసారమైతే న్యాయ విజ్ఞాన సంబంధమైన లోటు తీరవచ్చు ప్రజలకి.

Q :  ‘ఐ కేర్ ఎ లాట్’  అనే ఇంగ్లీష్ సినిమా నెట్ ఫ్లిక్స్ లో చూసాను. అందులో డబ్బు కోసం ఒంటరిగా ఉండే ముసలి వాళ్ళను బురిడీ కొట్టించి హీరోయిన్ వాళ్ళ ఆస్తులు అమ్ముకుని లాభపడే రకం. అయితే అనుకోకుండా విలన్ తల్లిని కూడా అలాగే చేయబోయి విలన్ తో పోరాడాల్సి వస్తుంది. కానీ చివరలో విలన్ ఇచ్చిన ఆఫర్ ఒప్పుకుని అతనితో కలిసి బిజినెస్ చేస్తుంది.  మళ్లీ సినిమా ఎండ్ లో కర్మ ఫలం అన్నట్టు తన తల్లిని మోసం చేసిన ఒక వ్యక్తి చేతిలో హీరోయిన్ చనిపోతుంది. ఇలా హీరో విలన్ తో కలిసిపోవడం అన్నది ఎక్కడా చూడలేదు. కొత్తగా అనిపించింది. అసలు ఇలాంటి ప్రయోగాలు ఎలా చేయాలి? అలా హీరో విలన్ ఒకటై పోతే కథ ఎలా ఉంటుంది వివరించండి.

―విడిఆర్, అసోసియేట్

A :  ఆ సినిమా చూడలేదు. కథ చదివితే, హీరోయిన్ తో ప్రాబ్లం వున్న మాఫియా బాస్, చివరికి హీరోయిన్ ని తనతో చేతులు కలపమంటాడు. చేతులు కలిపి రిచ్ గా డెవలప్ అవుతుంది. ఈ క్రమంలో ఆమె వల్ల అన్యాయానికి గురైన ఒకడు వచ్చి చంపేస్తాడు. ప్రధాన పాత్ర ప్రత్యర్ధితోనే చేతులు కలపడమన్నది కొత్త ఆల్టర్నేటే. అయితే ఇలా కొత్తగా కథ చెప్పే ధైర్యముండదు మనకి. హీరోయిన్ మాఫియా బాస్ ని బురిడీ కొట్టించడానికో- బకరా చేయడానికో చేతులు కలిపినట్టు టెంప్లెట్ లో పెట్టేస్తారు. ఇలా టెంప్లెట్ లో పెట్టేస్తే ‘మరో చరిత్ర’ వుండేది కాదు. ‘మరో చరిత్ర’ లో కమల్ - సరితలు గతంలో అవమానం చేసిన ఇద్దరు వచ్చి, వాళ్ళు కలుసుకోకుండా చంపేస్తారు. కర్మసిద్ధాంతం.

        పై సినిమాలో హీరోయిన్ ది నెగెటివ్ పాత్ర. అందుకని మాఫియాతో కలిసిపోయింది. ఆమె చేయాల్సిందేమిటి, ఇప్పటికైనా పాజిటివ్ గా మారి మాఫియాని ఎదుర్కోవడం. ఇలా చేయకపోవడంతో కర్మ ఫలం యాక్టివేట్ అయింది. అలా గతంలో ఆమె విరోధి వచ్చేసి తన విధి పూర్తి చేసుకుంటూ ఆమెని చంపేశాడు. ఇలాటి కథలకి ఇలా ప్లాట్ క్లయిమాక్స్ తో ముగింపు వుంటుంది. ఏ కథయినా స్టోరీ క్లైమాక్స్ కోసమే వుంటుంది. అంటే కమల్ - సరితలు ఏడాది పాటు కలుసుకోకుండా వుండాలన్న షరతు స్టోరీ పాయింటు. ఆ ఎడబాటుతో ఎలా స్ట్రగుల్ చేసి కలుసు కుంటారన్నది, కలుసు కోవడమన్నది, స్టోరీ క్లయిమాక్స్. కానీ అనుకున్నట్టుగా కలుసుకోలేక పోవడంతో ప్లాట్ క్లయిమాక్స్ అయింది. ప్లాట్ లో (కథనంలో) ఆల్రెడీ వాళ్ళ కర్మలు బీజాలు వేసి వున్నాయి కాబట్టి. పై హాలీవుడ్ సినిమాలో కూడా ఇదే. వర్మ ‘కంపెనీ’ ముగింపులో అనూహ్యంగా విజయ్ రాజ్ వచ్చి, అజయ్ దేవగన్ ని షూట్ చేసి చంపడం కూడా ఇలాటిదే.

Q : మీరు ‘నాంది’  సినిమా గురించి రాస్తూ, సెక్షన్ 211 ను సినిమాలో సరిగ్గా చూపించలేదన్నారు. మరి రియల్ లైఫ్ లో  సెక్షన్ 211 ని ఒక సగటు మనిషి పోలీసుల మీద ప్రయోగించే అవకాశం ఎంత వరకూ ఉంది? అలా ప్రయోగిస్తే పోలీసులు ఊరుకుంటారా? రక్షణ ఇచ్చే మా మీదే తిరగబడడమేమిటంటే, అప్పుడు చట్టాలు, కోర్టులు, ప్రభుత్వాలు ఏం చేస్తాయి?

―శివ, రైటర్

A :  ఆర్టికల్లోనే సమాధానముంది. ఈ చట్టం తీసుకుని పాత్ర, పోలీసుల మీది కెళ్తే ఏం జరుగుతుందో, ఏం జరగదో, ఎందుకు జరగదో చూపించి, ప్రశ్నించి వదిలేయాలన్నాం. పోలీసులే ఆలోచించేలా వాళ్ళ హృదయాల్ని తట్టినా చాలు.  

Q : మీరే 211 సెక్షన్  గురించి ఎంతో రీసెర్చ్ చేసి, కేరళ మాజీ డీజీపీ ఎన్ సి ఆస్థానా దీని మీద రాసిన సుదీర్ఘమైన ఆర్టికల్ గురించి చెప్పారు. మరి అలాంటిది ఈ సినిమా తీసిన మేకర్స్ ఎందుకు 211 సెక్షన్ గురించి అంత బాగా తెలుసుకోకుండా, మధ్యలో రివెంజ్ డ్రామా పెట్టీ ఒక గొప్ప ఇంటర్నేషనల్ స్థాయికి వెళ్లాల్సిన సినిమాను ఇలా ఒక మామూలు సినిమాగా చేశారు? మామూలు కమర్షియల్ సినిమాలు వదిలేద్దాం. అవి ఎలా ఉన్నా పెద్దగా ఎవరికీ నష్టం ఉండదు. కానీ ఇలాంటి కొత్త విషయాలు కొత్త సెక్షన్స్ గురించి ఎడ్యుకేట్ చేసే సినిమాల్లో కూడా మరీ ఇంత అలసత్వం, బాధ్యతా రాహిత్యం ఉంటే ఏమిటర్థం? భవిష్యత్తులో ఇలాంటి సినిమాలు తీయాలి అనుకునేవారికి మీరిచ్చే సలహా ఏమిటి?

―బిపిఎస్, అసోసియేట్

A : సలహా ఎందుకు, తట్టిందేదో చూద్దాం. నిజంగా రియలిస్టిక్ తీయాలనుకుంటే తీసే సబ్జెక్టుని రీసెర్చి చేసుకోవాలి. లేదూ మూస ఫార్ములా చాలనుకుంటే వచ్చిన మూస ఫార్ములాలు చూసుకోవాలి. ఓటీటీ తో కొత్తగా విస్తరిస్తున్న విశాలమైన గ్లోబల్ మార్కెట్ కూడా కావాలనుకుంటే రియలిస్టిక్స్ తీసుకోవాలి. లేదూ ఎబిసి సెంటర్ల పాత మార్కెట్టే  చాలనుకుంటే మూస ఫార్ములాలు తీసుకోవాలి. పైనుంచీ కిందిదాకా ప్రేక్షకుల చేతుల్లో స్మార్ట్ ఫోన్లు వచ్చేశాక ఏదీ లోకల్ గా లేదిప్పుడు. ఓటీటీ కారణంగా ఛానెళ్లలో ప్రసారం చేస్తున్న సినిమాలకి టీఆర్పీలు పడిపోతున్నాయని రిపోర్టు లొస్తున్నాయి. ఓటీటీ లో కూడా క్వాలిటీ కంటెంట్ ని కోరుకుంటున్నారు ప్రేక్షకులు. కనుక సబ్జెక్టులకి రీసెర్చి తప్పని సరి అవచ్చు.

        ఇక, రివ్యూల కోసం రీసెర్చి అవసరమా అని కూడా అన్పించక పోదు. ఎందుకంటే తీసే సినిమాలు అలాగే తీస్తారు. సినిమాలకి రీసెర్చి అంటే నవ్వడమే. కొందరే నమ్ముతారు. ఇగోని దాటి సబ్ కాన్షస్ లోకి వెళ్ళే వాళ్లు నమ్ముతారు.

Q : మీరు ‘నాంది’ సినిమా మీద రాసిన ఆర్టికల్ చదివాను. మరి సినిమా తీసిన వాళ్ళు ఇలా జనాలకు తప్పుడు సమాచారం ఇచ్చినందుకు వాళ్ళ మీద జనాలు కేసు వేయవచ్చా ? అలా వేస్తే ఏం జరుగుతుంది?

―కిరణ్, అసోసియేట్

A : ఏమీ జరగదు, కేసు వెనక్కొస్తుంది. ఒక న్యాయ విషయాన్నో, వైద్య విషయాన్నో, లేదా ఇంకేదైనా ఫోరెన్సిక్స్ లాంటి వైజ్ఞానిక విషయాన్నో సినిమా కోసం అలాగే చూపిస్తామన్న డిఫెన్స్ వుంటుంది. దీన్ని కాదనలేరు. ప్రేక్షకులే నిజమా కాదా క్రాస్ చెక్ చేసుకుని వూరుకోవాలి, ‘మహానుభావుడు’ ఓసిడి మీద తీశామని హైప్ ఇచ్చారు. తీరా అది మామూలు ఎలర్జీ గురించే వుంది. ఎలర్జీని  ఓసిడి అనుకున్నారు. కొన్ని సినిమాల్లో ఇందులోని పాత్రలు, సంఘటనలు ఎవర్నీ ఉద్దేశించినవి కావు, కల్పితాలని డిస్ క్లెయిమర్ వేస్తూంటారు. న్యాయ, వైద్య విషయాలకి కూడా ఇలా డిస్ క్లెయిమర్ వేస్తే గొడవుండదు. కానీ స్క్రిప్టులో రాస్తున్న న్యాయ విషయమో, వైద్య విషయమో ప్రతి అక్షరం పచ్చి అబద్ధమని వాళ్ళకే తెలియనప్పుడు ఏం చేస్తారు. సోషల్ మీడియాలో ఫేక్ న్యూస్ లాగా సినిమాలు తీసి వైరల్ చేయడమే!

Q :  హాయ్ అండి, ‘ఉప్పెన’ సినిమా పెద్ద హిట్. కొంత మంది మిత్రులు ఆ సినిమాను తిడుతూ ఇంకా ఎన్ని రోజులు ఈ పాత సినిమాలు, పాత సీన్స్ తో తీస్తారు అన్నారు. కొంత మంది ఇంటర్, డిగ్రీ కుర్రాళ్ళను అడిగితే అందరూ మాకు సినిమా బాగా నచ్చిందని అన్నారు. ఒక సినిమా అంత పెద్ద హిట్ అయిందంటే అందులో ప్రేక్షకుడికి నచ్చే అంశాలు ఉండే ఉంటాయి అని నా నమ్మకం. ఒక విశ్లేషకుడిగా ఆ సినిమా మీద మీ అభిప్రాయం చెప్పగలరా?

―మహేష్, రైటర్

A : మేల్ ఇగో లేదా సెల్ఫ్ పీటీ. మేల్ ఇగోతో వుండే వాళ్లకి తామే పరిస్థితుల్లో వున్నా అమ్మాయి తమ కోసమే వుండాలన్న మైండ్ సెట్ తో కావచ్చు;  ప్రస్తుతం దయనీయ స్థితిలో వున్న వాళ్ళకి అమ్మాయి తమ పట్ల జాలితో వుందన్న సెల్ఫ్ పీటీ వల్ల కావచ్చు - సినిమాని హిట్ చేసి వుంటారు. 

―సికిందర్ 

1017 : రివ్యూ

        అల్లరి నరేష్ తాజా సక్సెస్ ఫుల్  ‘నాంది’ వార్తల్లో వుండడానికి ఐపీసీ సెక్షన్ 211 గురించి ప్రప్రథమంగా తీయడం కారణం. తెలుగులోనే కాదు, దేశంలో ఇంకో భాషలో ఈ అంశంతో రాకపోవడం మరో కారణం. ఒక చట్టం గురించి ప్రప్రథమ సినిమా అంటే అది లోకల్ సినిమా అవదు, జాతీయ సినిమానే అవుతుంది. జాతీయ మార్కెట్ కూడా  వుంటుంది. పైగా వాస్తవిక సినిమా అవుతుంది. కానీ ఎంత వాస్తవికమని, ఎంత ప్రయోజనకరమని చూసినప్పుడు అది కేవలం మభ్యపెట్టే సినిమాగా తేలిపోకూడదు. కమర్షియల్ హిట్టవచ్చు, 211 గురించి ఏదో తీశారటన్న హైప్ తో పరుగులు తీసే ప్రేక్షకులతో తప్పక హిట్టే అవుతుంది. తీరా చూసి ఆ హైప్ సృష్టించిన చట్టం గురించి ఎలా ఫీలయ్యారన్నది అసలు విషయం.   

        హిందీలో సెక్షన్ 375, ఆర్టికల్ 15 వంటి లీగల్ థ్రిల్లర్ సినిమాల గురించి ఎందుకు ప్రత్యేకంగా చెప్పుకుంటారు. అవి ప్రాక్టికల్ గా, ప్రొసీజురల్ గా, ప్రొఫెషనల్ గా చట్టాల పట్ల సరైన అవగాహన కల్గించినందుకు. గైడెన్స్ ఇచ్చినందుకు. ఇలా ప్రత్యేకంగా ప్రస్తావించడానికి ఒక ‘నాంది’ కూడా తగిన అర్హతలు సంపాదించుకుని వుండాలి. కానీ తీసుకున్న 211 కాన్సెప్ట్ తో ఈ అవకాశం రాలేదు. దేశంలో 211 చాలా రొటీన్ గా అమలవుతున్న చట్టమే. ఈ సినిమాతో ఇదే నాంది అవాలని చెప్పలేరు. ఇదేదో ప్రజలకి తెలియకుండా, వాళ్ళ హక్కుల్ని గుర్తు చేయకుండా మరుగున వుండిపోయిన చట్టం కాదు. మరీ ముఖ్యంగా, ఈ సినిమాలో చూపించినట్టు తప్పుడు కేసు పెట్టిన పోలీసుల మీద బాధితుడు ప్రయోగించగల బ్రహ్మాస్త్రం కూడా కాదు.

        ఎవర్నో ఇరికించి పోలీసులు కేసు పెడతారు. అతను నిర్దోషిగా విడుదలై వచ్చి, తన మీద తప్పుడు కేసు పెట్టారని పోలీసుల మీద సెక్షన్ 211 ప్రకారం కేసు పెట్టడం కుదరదు ఈ సినిమాలో చూపించినట్టుగా. చాలా చాలా అరుదైన పరిస్థితుల్లోనే ఇది జరిగింది. ఎందుకని తెలుసుకునేందుకు, కేరళ మాజీ డీజీపీ ఎన్ సి ఆస్థానా దీని మీద రాసిన సుదీర్ఘమైన ఆర్టికల్ వుంది.

        ఆస్థానా ప్రకారం, ఇద్దరు ప్రైవేట్ వ్యక్తుల మధ్య సెక్షన్ 211 కేసులు కోర్టులు అనుమతిస్తాయి. ఇలాటి కేసులు కోకొల్లలుగా వున్నాయి. ఒక వ్యక్తి పెట్టిన కేసులో ఇంకో వ్యక్తి మీద విచారణ సాగి నిర్దోషిగా విడుదలైతే, ఇతను ఆ కేసు పెట్టిన వ్యక్తి మీద తప్పుడు కేసులో ఇరికించాడని 211 పెట్టొచ్చు. ఇదే పని పోలీసులు చేస్తే పోలీసుల మీద ఈ కేసు పెట్టలేరు. పోలీసుల మీద డిపార్ట్ మెంటల్ చర్యలు తీసుకోవచ్చు. అసలు పోలీసులు తప్పుడు కేసులు పెడితే బాధ్యత పై స్థాయిలో ఐపీఎస్ అధికారులకే వుంటుందంటారు ఆస్థానా. కాబట్టి ఈ సినిమాని సీరియస్ గా తీసుకోకుండా, ఓ కాలక్షేప రివెంజి యాక్షన్ డ్రామాగా మాత్రమే చూసేస్తే సరిపోతుంది. మరి 211 చట్టంతో ఎలా తీసివుంటే ఇది గమనార్హమైన నేషనల్ సినిమా కూడా అయివుండేదో ఈ క్రింద తర్వాత చెప్పుకుందాం...

***

        2. సూర్య ప్రకాష్ (నరేష్) ఓ సాఫ్ట్ వేర్ ఉద్యోగి. తల్లి దండ్రులతో మధ్యతరగతి జీవితం. ఉద్యోగంలో చేరాడని మీనాక్షి (నవమి) తో సంబంధం చూస్తారు. మీనాక్షితో ఎంజాయ్ చేస్తూంటే, దీంతో సంబంధం లేకుండా ఓ పౌర హక్కుల నేత హత్య జరుగుతుంది. ఒక సీఐ కిషోర్ (హరీష్ ఉత్తమన్) వుంటాడు. హంతకుల్ని పట్టుకునేందుకు పైనుంచి వొత్తిడి పెరగడంతో కొన్ని సీసీ టీవీ ఫుటేజీలు పోగేసి సూర్య ప్రకాష్ ని అరెస్టు చేసి కేసు పెడతాడు. ఈ హత్య తను చేయలేదని గోల పెడుతూ బెయిలు కూడా రాక ఐదేళ్ళు జైల్లో మగ్గుతాడు సూర్య ప్రకాష్. ఈ లోగా అతడి తల్లిదండ్రులు న్యూసెన్స్ గా తయారయ్యారని వాళ్ళని చంపి, ఆత్మహత్యలుగా చిత్రిస్తాడు సీఐ. ఒక లాయర్ ఆద్య (వరలక్ష్మీ శరత్ కుమార్) వుంటుంది. ఈమె వచ్చి, 211 చట్టం గురించి సూర్యకి చెప్పి, అతడి మీద నడుపుతున్న కేసు బూటకమని తేల్చి, సీఐ మీద 211 కేసు పెట్టిస్తుంది. పెట్టాక ఈ కేసుతో ఎలా పోరాడారన్నది మిగతా కథ.

***

        3. ముందుగా, ఉన్న కథ ఎలా వుందో చూద్దాం. కథకి ఏది పాయింటు అనుకున్నారు - 211 చట్టం. చాలా సేపూ చూపించిన కథేమిటి - బెయిలు రాక ఏళ్ళ కేళ్ళు జైల్లో మగ్గడం. బెయిలు రాక ఏళ్ళకేళ్ళు జైల్లో మగ్గడం గురించి ఈ కథ కాదు. తప్పుడు కేసులోంచి బయటపడి, సీఐ మీద 211 కేసు పెట్టడం గురించి వెంటనే పాయింటు కొచ్చెయాల్సిన కథ. కనుక అరెస్టయిన వెంటనే తప్పుడు ఎఫ్ ఐ ఆర్ ని రద్దు చేయించుకుని బయట పడాలి. బయట పడి సీఐ మీద 211 తో న్యాయపోరాటం మొదలు పెట్టేయాలి. ఇంతకి మించి అతడి అరెస్టు గురించి కథకి అవసరం లేదు. కథ 211 గురించి కాబట్టి. ఇంకో నస కాదు, రీళ్ళకి రీళ్ళ జైల్లో మగ్గాల్సిన విషయం కాదు.

        స్క్రీన్ ప్లే స్ట్రక్చర్ రీత్యా అతడి అరెస్టు సమస్యకి దారితీసే పరిస్థితుల కల్పనలో భాగంగా ఉపయోగపడేది మాత్రమే కాబట్టి. ‘శివ’ లో నాగార్జున జేడీని వీరబాదుడు బాదాడంటే అది భవానీతో పోరాటానికి దారి తీసేందుకే. అంతేగానీ కొత్త కొత్త సైకిల్ చెయిన్లు తెప్పించి జేడీని కొడుతూ కూర్చోడానికి కాదు. అప్పుడది ‘శివ’ అయ్యేది కాదు, శవ్వ శవ్వ అయ్యేది -కోట శ్రీనివాసరావు నోరు కొట్టుకుంటే. ‘నాంది’ లో కూడా ఆ దారి తీసిన సమస్య 211 తో పోరాటం కోసమే అవుతుంది కాబట్టి. దీంతో ప్లాట్ పాయింట్ వన్ ఫినిష్ అవుతుంది. ఇంకో నసలేదు. ఇక ఎఫ్ ఐఆర్ రద్దు చేయించుకుని బయటపడి, సీఐ మీద 211 తో పోరాటమే మిగిలిన కథ. 

 

        తప్పుడు హత్య కేసు పెట్టడమే జీవితానికి పెద్ద డ్యామేజీ. ఇంతకి మించిన  జీవితాన్ని పోగొట్టే డ్యామేజీ వుండదు. అరెస్టయినప్పుడు వ్యక్తిగతంగా, వృత్తి గతంగా జరిగిన డ్యామేజీని ఎన్ని కోణాల్లో, ఏ స్థాయిలో, ఎంత ఎమోషన్ బిల్డప్ చేసి చూపించినా నష్టం లేదు. ఇక పాయింటు మీద ఫోకస్ చేసి వెంటనే 211 కథ మొదలెట్టుకోవాలి.

        రెండోది, తల్లిదండ్రుల్ని సీఐ చంపడం. అలాంటప్పుడు 211 కథ ఎందుకు? తప్పుడు కేసులో ఇరికించిన సీఐ పేరెంట్స్ ని కూడా చంపిన రివెంజీ అంటే సరిపోతుందప్పుడు. ఇది కానప్పుడు అతను విడుదలై 211 కేసు పెట్టాడంటే ఎందుకు పెట్టాడు? తల్లిదండ్రుల్ని చంపిన కోపంతోనా, లేక తప్పుడు కేసులో ఇరికించిన అన్యాయానికా? ఏదనుకోవాలి? ఒక కథలో రెండు పాయింట్లు తలెత్తకూడదు. కన్ఫ్యూజన్ ఏర్పడుతుంది. కాబట్టి ఏళ్ళకేళ్ళు జైల్లో మగ్గిన కథలాగే, తల్లి దండ్రుల మరణం కూడా 211 పాయింటుని అప్రస్తుతం చేసేసింది, కథలోంచి పాయింటుని పక్కకు నెట్టేసింది. అసలీ పాయింటు అవసరమే లేదన్నట్టు తయారయ్యింది. ఇప్పుడే కనిపెట్టినట్టు హైప్ కోసం తప్ప.

***

        4. సరే, పాయింటుతో నడిపిన కథ చూద్దాం. పోలీసుల మీద 211 కేసేయడం లోని అసంబద్ధతని అలా వుంచుదాం. ఇది చూసి ప్రేక్షకులెవరైనా ఇదే పని చేస్తే భంగ పాటుకి గురవుతారు. కేవలం ఇక్కడున్న కథకి అప్లయి చేసి మాత్రమే చెప్పుకుంటున్నాం. పాయింటేమిటి? సీఐ వేసిన కేసు తప్పుడు కేసని నిరూపించి శ్క్షింప జేయడం. ఏ శిక్ష?  కేసు ఏదైతే ఆ కేసులో దోషికి పడే శిక్షతో సమాన శిక్ష అని 211 చెబుతుంది. అంటే, ఇక్కడ హత్య కేసులో ఇరికించాడు కాబట్టి శ్రీమాన్ సీఐ మహాశయులు గారికి యావజ్జీవ శిక్ష, లేదా మరణ శిక్ష కాకపోయినా, ఖాయంగా ఏడేళ్ళ శిక్షతో జనరంజకమైన ఘన సన్మానం. ఇదే ముగింపు. ఇంకో ముగింపు వుండదు ఈ కథకీ, పాయింటుకీ. ఈ ముగింపు లేదా తీర్పు ఒక హెచ్చరిక. ఎవరూ తప్పుడు కేసులు పెట్టేందుకు వెనుకాడేలా హెచ్చరిక! ఇంతటితో సినిమాకి శుభం పడాలి. ఇంకా అశుభాలు జరగడానికి వీల్లేదు.

        అశుభమే జరిగింది. హీరో అతడి లాయర్, ఈ పాయింటు వదిలేసి  అసలు హత్య చేసింది సీఐ ప్లస్ మంత్రి గింత్రి ఎట్సెట్రా బ్యాచి అని నిరూపించేంత పెద్ద పనికి పూనుకున్నారు, నిరూపించారు కూడా. హత్య కేసులో ఈ దోషులకి శిక్ష పడేలా చేశారు. కథకి ఇదే ముగింపు, మారిపోయిన  తప్పుడు ముగింపు అయింది. అసలు పాయింటు ఎగిరిపోయి కథకి అవసరంలేని తప్పుడు పాయింటుతో తప్పుగా ముగిసి, రివెంజీ కథకి న్యాయం  చేసింది తప్ప 211 కి కాదు. ఇది రివెంజీ కథ అని తేల్చేసింది.

        దీంతో తప్పుడు కేసులో ఇరికించినందుకు 211 ప్రకారం హెచ్చరికలా, సీఐకి మాత్రమే దానికి తగ్గ శిక్ష అనే ఉద్దేశిత పాయింటుకి ఇక్కడకూడా ప్రాధాన్యం లేకుండా చేశారు. ఇందుకే ఈ సినిమాలోని 211 చట్టాన్ని సీరియస్ గా తీసుకోకుండా, తమాషాగా ఓ రొటీన్ మూస రివెంజీ డ్రామాగా చూసేయాలని చెప్పుకునేది.

***

        5. ముందు అరెస్ట్ చేసి కేసు పెట్టేయ్, తర్వాత ఎవిడెన్స్ గివిడెన్స్ చూద్దాంలే అన్న వింత ధోరణిని పోలీసులు అనుసరిస్తూంటారు. ఇలాటి లవ్ జిహాద్ కేసుల్లో ఎఫ్ ఐ ఆర్ లనే కొట్టేస్తూ పోయాయి కోర్టులు. ఇటీవల సంచలనం సృష్టించిన దిశారవి కేసులో బెయిలు మంజూరు చేస్తూ తీవ్ర వ్యాఖ్యలు చేసింది కోర్టు. అసలు అభియోగాన్ని నమ్మేందుకు సాక్ష్యాలే లేనప్పుడు కేసేమిటని మండి పడింది కోర్టు. ఇది ల్యాండ్ మార్క్ జడ్జిమెంటు అయింది ఇలా చేసే పోలీసులకి హెచ్చరికలా.   

        అయితే ఇదే బెయిల్ ఆర్డరులో పోలీసుల మీద చర్య తీసుకోమని కూడా కోర్టు ఉత్తర్వులిచ్చి వుండాల్సిందని న్యాయ నిపుణులు చెప్తున్నారు. ఇదే జరగడం లేదు. పోలీసులు పెట్టింది తప్పుడు కేసని తేలినా, తీర్పుల్లో పోలీసుల మీద చర్యకి జడ్జీలు ఆదేశించడం లేదు. విడుదలైన నిందితుడు ఏడుస్తూ ఇంటికి పోవాల్సిందే. న్యాయ నిపుణులు రిట్ పిటిషన్ వేయ వచ్చని అంటున్నారు. ఎవరు వేస్తారు.  

        ‘నాంది’ లో జడ్జి పోలీసు విచారణ కోసం కేసుని వాయిదాల మీద వాయిదాలేస్తూ బెయిల్ ఇవ్వకుండానే వుంటాడు. నిందితుడు సూర్యప్రకాష్ లాయర్ ఎందుకుంటాడో ఏమీ చెయ్యడు. సీఐ పెట్టిన ఎఫ్ ఐ ఆర్లో మూడు మౌలిక లోపాలున్నాయి. నిందితుడు సూర్య ప్రకాష్ పౌర హక్కుల నేత వెనకాలే మూడు చోట్ల కనబడుతున్న మూడు సీసీ టీవీ ఫుటేజీలే వుంటాయి.

        అప్పుడు జడ్జీ ఏం చేయాలి  - ‘మిస్టర్ సీఐ, ఇది ఎఫ్ ఐ ఆరేనా? ఈ ఫుటేజీలు కేవలం సర్కమ్ స్టేన్షియల్ ఎవిడెన్సు. నడిరోడ్డు మీద నిందితుడు హతుణ్ణి చంపుతున్నట్టు ఇలాటి ఫుటేజీలతో కూడిన ఫిజికల్ కాంటాక్ట్ ఎవిడెన్స్ ఏదీ? అసలు ఒక పౌర హక్కుల నేతని సాఫ్ట్ వేర్ ఇంజనీర్ ఎందుకు చంపాడో కారణం చూపే మోటివ్ ఏదీ? రంగయ్య పుల్లయ్యని చంపితే ఎందుకు చంపాడో  చెప్పనవసరం లేదా? ఆ సమయంలో నిందితుడు తను ఎక్కడున్నాడని చెప్పాడో ఎలిబీ ఏదీ? కాబట్టి వీటన్నిటి దృష్ట్యా ఈ ఎఫైయార్ చెల్లదని ప్రకటిస్తూ  రద్దుచేస్తున్నా’ -  అని కేసు ముగించేస్తే, కేసులోంచి బయట పడ్డ సూర్యప్రకాష్  సీఐ మీదికి పోవడానికి రూటు క్లియరై పోతుంది.

***

        6. 211 తో పోరాటమెలా చేయాలి? పౌరుల మీద ఈ చట్టం పనికొఛ్చినప్పుడు, పోలీసుల మీద ఎందుకు పనికి రాదు? జడ్జీలు ఎందుకొప్పుకోరు? ప్రభుత్వం ఎందుకొప్పుకోదు? రాజకీయ వ్యవస్థ ఎందుకొప్పుకోదు? ఈ పోరాటంలో గెలవాలనే లేదు, ఓడిపోయినా సరే, ఈ ప్రశ్న ఒక్కటి దేశవ్యాప్తంగా వైరల్ అవుతుంది, తట్టి లేపుతుంది. తెలుగు సినిమా వైరల్ అవుతుంది. జాతీయ అవార్డుకి పంపుకోవచ్చు. ఇందుకే మార్కెట్ యాస్పెక్ట్ కి తగ్గ క్రియేటివ్ యాస్పెక్ట్, క్రియేటివ్ యాస్పెక్ట్ కి తగ్గ మార్కెట్ యాస్పెక్ట్ వుండేలా చూసుకోవడం చాలా ముఖ్యమని ఈ బ్లాగులో పదేపదే గుర్తు చేసేది.

―సికిందర్

 

 

     ఇంటర్వల్ సీన్లో ఆయిల్ ప్లాంట్ పేలిపోవడం -"This attack we won like crazy!” మూమెంట్ లాంటిది డానీకి అర్నాబ్ లాగా. దురదృష్టంలో అదృష్టాన్ని చూశాడు- పేలుడుతో కాళ్ళ కింద చమురు సముద్రాలున్నాయని తెలిసి! ఇదే సమయంలో ఇదే పేలుడు కొడుకు వినికిడి శక్తి పోగొట్టిందని బాధతో వుంటాడు ఇప్పుడు సెకండాఫ్ లో. డాక్టర్ కి చూపిస్తాడు. లాభం లేదని అంటాడు డాక్టర్ పరీక్షించి. ఏం చేయాలో అర్ధం గాదు. కంపెనీ విస్తరణ కార్యక్రమాలు చేపడతాడు. చుట్టు పక్కల భూముల్లో మరిన్ని ప్లాంట్లు నిర్మిస్తాడు. ఇదంతా చూసి ఇలై వస్తాడు. చర్చి చందా పదివేల్లో ఐదు వేలు బాకీ ఇమ్మంటాడు. డానీ రగిలిపోయి మీదపడి కొట్టడం మొదలెడతాడు. బురదలో తొక్కితొక్కి కొడతాడు. నీ మహిమలతో నా కొడుక్కి నయం చేయలేక పోయావ్, డబ్బులు కావాలా అని దారుణంగా కొడతాడు.

        దీంతో ఇలై ఇంటికి వెళ్ళిపోయి తండ్రిని కొడతాడు. కిందపడేసి ఎలాపడితే అలా కొడతాడు. నీవల్లే వాడిక్కడ బలపడ్డాడని నోటి కొచ్చినట్టు తిడతాడు. కొన్ని రోజులు గడుస్తాయి...హెన్రీ అనే అతను వచ్చి డానీ ఇంటి ముందుంటాడు. ఎవరు నువ్వంటే, మనం అన్నదమ్ముల మంటాడు. మన తల్లులు వేరైనా తండ్రి ఒకడే అంటాడు. మూడు నెలల క్రితం తండ్రి కూడా పోయేసరికి, ఎక్కడా సెటిల్ కాలేక వచ్చాననీ, ఇక్కడ పని ఇప్పిస్తే ఇక్కడే వుంటాననీ అంటాడు. 

       డానీ చాలా ప్రశ్నించి, గుర్తింపు పత్రాలు చూసి సరేనంటాడు. బిజినెస్  మీటింగుల్లో తన వెంట వుంచుకుంటాడు. సముద్రంలో ఈత కొడతారు. కలిసి సరదాగా గడుపుతారు. డానీ తన కలల గురించి చెప్తాడు. పెద్ద బంగాళా కొనుక్కుని, మనుషులకి దూరంగా ఒక్కడే గడపాలన్న కలలు.

        జూనియర్ డానీ వీళ్ళని గమనిస్తూ వుంటాడు. ఓ రాత్రి ఇంటిని తగుల బెట్టేసి పారిపోతాడు. డానీ పట్టుకుని, వీడికి సైన్ లాంగ్వేజీ నేర్పించాలని తీసుకుని బయల్దేరతాడు, ట్రైన్ ఎక్కించి వదిలేసి వచ్చేస్తాడు.

        ఆయిల్ కంపెనీతో మీటింగ్ కి వెళ్తాడు. వాళ్ళకి ఆయిల్ సరఫరా చేయాలంటే పైపు లైన్ వేయాలి. పైపు లైన్ వేయాలంటే మధ్యలో విలియం బాండీ భూములున్నాయి. విలియం బాండీ కోసం పోతే అతను ఇంటి దగ్గరుండడు. తిరిగి హెన్రీతో గడుపుతాడు. గడుపుతూంటే అనుమానం వేసి నిజం చెప్పమని బెదిరిస్తాడు. తను హెన్రీ కాదనీ, హెన్రీ క్షయ వ్యాధితో చనిపోయాడనీ, తను హెన్రీలా నటిస్తూ ఇక్కడ ఉపాధి పొందాననీ చెప్పేస్తాడు డూప్లికేట్ హెన్రీ. దీంతో అతణ్ణి చంపి పాతి పెట్టేస్తాడు డానీ.

చెట్టుకింద నిద్ర పోతూంటే వచ్చి లేపుతాడు విలియం బాండీ. నువ్వేం చేశావో నాకు తెలుసులే గానీ, అదలా వుంచితే, నీకు పైపు లైను వేయడానికి నా భూములు అవసరం. భూములు కావాలంటే చర్చికొచ్చి నువ్వు మతాన్ని ఒప్పుకోవాలి - అని బ్లాక్ మెయిల్ చేస్తాడు.

***

        2.  పై మిడిల్ 2  కథనం బ్లాక్ మెయిల్ తో పీపీ 2 గా ఏర్పడింది. ప్లాట్ పాయింట్ 2 అంటే మొత్తం మిడిల్ విభాగ మంతటికీ ముగింపు. ఈ పీపీ 2 అనేది మిడిల్ ప్రారంభంలో పీపీ 1 లోని విషయానికి వ్యతిరేకంగా వుండడం స్ట్రక్చర్ అవుతుంది. సాధారణంగా కథల్లో పీపీ 1 దగ్గర పాత్ర ప్రాబ్లంలో పడితే, పీపీ 2 లో పాత్రకి ఆ ప్రాబ్లంకి  పరిష్కార మార్గం లభిస్తుంది. పీపీ 1 లో పాత్ర తానే ఇంకొకరికి ప్రాబ్లం సృష్టిస్తే, పీపీ 2 లో తానే ఇంకా ప్రాబ్లం లో పడుతుంది. అలా ఇక్కడ ఈ గాథలో కూడా డానీ చాలా ప్రాబ్లంలో పడ్డాడు బాండీ బ్లాక్ మెయిల్ తో. పీపీ 1 లో డానీ భూములు కొనడానికి ఇలై ఇంటికి రావడమనే ఘట్టం మతంతో కొట్లాట పెట్టుకోవడమైంది. అడుగడుగునా మతాన్ని అవమానిస్తూ పోయాడు. ఇప్పుడు పీపీ 2 లో అదే మతాన్ని ఒప్పుకోవాల్సిన ఇరకాటంలో పడ్డాడు బాండీ బ్లాక్ మెయిల్ తో. ఇదీ ఈ గాథ మిడిల్ స్ట్రక్చర్ స్థూలంగా.

***

        3.  మిడిల్ 2 ప్రారంభం కొడుకు జూనియర్ డానీ వైద్యంతో వుంది. డాక్టర్ కూడా తేల్చేయడంతో చాలా ఆందోళన పడ్డాడు డానీ. వీడేం తప్పు చేశాడనీ ఈ శిక్ష. ఇంటర్వెల్ పేలుడుతో చమురు సముద్రాలున్నాయనుకోవడం, మతం మీద తనదే గెలుపనుకోవడం విజయంతో ఉత్థానమైతే, ఇప్పుడు ఈ మిడిల్ 2 ప్రారంభంలో కొడుకు సమస్యతో అపజయంతో పతనం. చేసేదిలేక ఇంటర్వెల్ పాయింటుని అందిపుచ్చుకుని, గాథని కొనసాగిస్తూ కంపెనీ విస్తరణ కార్యక్రమాలు చేపట్టాడు. ఇక అందినంతా చమురు తోడుకుందామని.

        ఇప్పుడు ఇలై వచ్చి బాకీ డబ్బులు అడిగాడు. అతడి మీద ఎటాక్ చేసి చిత్తుగా తన్నేశాడు డానీ. కొడుకు చెవిటివాడైన కష్టంలో తనుంటే, మహిమలతో బాగుచేయకుండా వచ్చి డబ్బులు అడుగుతాడా అని కొట్టేశాడు. పాస్టర్ అనికూడా చూడకుండా కొట్టేశాడు. వూహించని షాకింగ్ దృశ్యానికి తెగబడ్డాడు. మిడిల్ 1 ప్రచ్ఛన్న యుద్ధంగా వుంటున్నది కాస్తా, ఇప్పుడు మిడిల్ 2 తో ప్రత్యక్ష యుద్ధంగా ఇలా మారిపోయింది. టైమ్ అండ్ టెన్షన్ గ్రాఫ్ కి న్యాయం చేస్తూ. స్క్రీన్ టైమ్ గడుస్తున్న కొద్దీ, టెన్షన్ పెరుగుతూ పోవాలన్న రూలు ప్రకారం.

        ఇది డానీ ఉత్థానమే. నైతికంగా కాదు, ఇగో పరంగా. నైతికంగా పాస్టర్ ని కొట్టి పతనం. ఇలైకి ఇది ఇగో పరంగా ఇప్పుడు పతనం. మిడిల్ 1 చర్చి సీనులో అతను మతాన్ని వదిలేసినట్టు సైతానుగా మారాడు. దానికి శిక్షగా డానీ చేతిలో ఇప్పుడు దెబ్బలు. ఎలా చేసుకున్న ఇద్దరి కర్మలే అలా ఈ గాథని నడిపిస్తున్నాయి.

        ఇక్కడ దెబ్బలు తిన్న ఇలై వెళ్ళి రియాక్షన్ గా తండ్రిని కొట్టాడు. పాస్టర్ అయివుండి తండ్రిని కొట్టాడు (పతనం). అతడి అంతం ఇక సమీపించింది...

        ఈ మిడిల్ 2 కథనపు అల్లిక గమనించాలి. చాప్టర్ తర్వాత ఇంకో చాప్టర్ గా దేనికదిగా నడుస్తోంది. దీంతో ప్రతీ చాప్టర్ స్పష్టంగా వుంటూ, బలంగా ముద్ర వేస్తోంది. మొదటి చాప్టర్ కొడుకు వైద్యం, రెండో చాప్టర్ డానీ ఇలైని కొడితే ఇలై తండ్రిని కొట్టడం. ఇలా ఒక చాప్టర్ నడుస్తూండగా ఇంకో చాప్టర్ సీను మధ్యలో వేయడం గానీ, ఇంకో రాబోయే చాప్టర్ లోని పాత్రని  తేవడం గానీ జరగలేదు. ఈ విధానం కథకి పనిచేస్తుందా లేదా ఆలోచించాల్సిన విషయం. గాథకి మాత్రం బావుంది.

        ఇలాగే ఇప్పుడు మూడో చాప్టర్ లో డానీ తమ్ముడి నంటూ హెన్రీ రాక. ఇక వీళ్ళిద్దరితో వరసగా సీన్లు వస్తాయి. అన్నదమ్ములుగా ఇద్దరి బాండింగ్. ఆయిల్ బిజినెస్. ఈ చాప్టర్ ఎక్కడికి దారి తీస్తుందోనన్న ఉత్కంఠ. డానీ తన కలలు హెన్రీతో పంచుకుంటాడు. ఇది జరుగుతూండగా మధ్యనుంచి ఇంకో చాప్టర్ లాగుతాడు దర్శకుడు. కొడుకు జూనియర్ డానీ చాప్టర్.

        ఈ చాప్టర్ లో తండ్రినీ హెన్రీనీ చూస్తూ, చెవిటి వాడైన తను హర్ట్ అవుతాడు జూనియర్ డానీ. తనని పట్టించుకోవట్లేదు తండ్రి. ఇక హెన్రీ తోనే వుంటాడేమో, తను అక్కర్లేదిక. దీన్ని నిజం చేస్తాడు డానీ. ఎప్పుడో పసి తనంలో ఎవడికో పుట్టిన వీణ్ణి లాలించడం వేస్టనీ, పాలల్లో మద్యం కలిపి తాగించేస్తూ వుండిన డానీ, అదే ఇప్పుడు మళ్ళీ చేస్తాడు. పదేళ్ళ ఎదిగిన కొడుకు కళ్ళ ముందే. ఇన్నాళ్ళూ బిజినెస్ కి పనికొచ్చిన వీడు, ఇప్పుడు చెవిటి వాడుగా వేస్ట్ అన్నట్టు, హెన్రీయే ఇప్పుడు అవసరమన్నట్టు, పాలల్లో మద్యం కలిపి, బలవంతగా సీసా నోట్లో కుక్కి తాగిస్తాడు. దీంతో జూనియర్ డానీ డిసైడ్ అయిపోతాడు. ఇక డానీ, హెన్రీ నిద్రపోతూండగా ఇంటికి నిప్పంటించి పరారవుతాడు.

        డానీ పట్టుకొచ్చి, సిటీలో వీడికి సైన్ లాంగ్వేజీ నేర్పేందుకు జాయిన్ చేయాలని తీసుకు బయల్దేరతాడు. కొడుకుతో పాటు ట్రైనెక్కి కూర్చుంటాడు. ఇప్పుడే వస్తాను, ఎక్కడికీ వెళ్లొద్దని చెప్పి ట్రైను దిగుతాడు. అంతే, మళ్ళీ ఇక రాడు. ట్రైన్ కదులుతూంటే కంగారుగా దిగిపోబోతాడు కొడుకు. ఎవరో వెనక్కి లాగి కాపాతారు. ట్రైన్ వెళ్లిపోతుంది. డానీ కారెక్కి ఇంటికెళ్ళి పోతాడు. కొడుకుని ఇలా వదిలించుకున్నాడన్న మాట. హృదయ విదారకంగా వుండే ఈ ఫ్యామిలీ డ్రామాలో డానీ ఇగోకి మరో విజయం, నైతికంగా పరాజయం. ఇలా కొడుకు చాప్టర్ మరో చాప్టర్ సీను అడ్డురాకుండా, ఏకధాటిగా నడుస్తూ, బ్రేక్ అవని భావోద్వేగాల్ని తారాస్థాయికి తీసేకెళ్ళి ముగుస్తుంది.

***

         4. తిరిగి హెన్రీ చాప్టర్ అందుకుంటుంది. హెన్రీతో గడుపుతున్నప్పుడు ఒక అనుమానం వచ్చి ఒక ప్రశ్న అడుగుతాడు. ఆ ప్రశ్నకి చెప్పలేక హెన్రీ డూప్లికేట్ గా దొరికిపోతాడు. రెచ్చిపోయి అతణ్ణి చంపి పాతి పెట్టేస్తాడు డానీ. హెన్రీని చూసి కొడుకుని అలా వదిలించుకున్న డానీకి, హెన్రీయే దొంగగా తేలాడు. ఇగో పతనం. కొడుకు నైతిక విజయం. హెన్రీని చంపడం హెన్రీ మీద డానీ ఇగో విజయం. ఈ విజయంతో చాప్టర్ పూర్తయ్యింది.

        ఇంతకీ గాథలో హెన్రీ ప్రవేశం దేనికి? లేకపోతే వచ్చే నష్టమేమిటి? మధ్యలో టైమ్ పాస్ లాగా అన్పించే ఈ చాప్టర్ తో గాథకి ఇంకేదైనా ఉపయోగముందా? వుంది. డానీ బయోగ్రఫీ కోసం, డానీ అధోగతి కోసం. ఈ గాథ మొదట్నుంచీ ఇప్పటి వరకూ డానీ ఎవరో, పుట్టుపూర్వోత్తరా లేమిటో, ఎక్కడ్నించి వచ్చాడో ఏమీ తెలియదు. ఇదెక్కడో చెప్పక పోతే పాత్ర సమగ్రంగా వుండదు. ఎక్కడ చెప్పాలి? ఫస్టాఫ్ బిగినింగ్ విభాగంలో పాత్రల పరిచయ క్రమంలో చెప్పేయాలా? సర్వ సాధారణంగా చెప్పేస్తారు తెలుగు సినిమాల్లో. ఇలా చెప్పేస్తే పాత్రతో సస్పెన్స్ పోతుందంటే అర్ధం జేసుకోరు. పాత్ర ఎవరో తెలియక పోతే తెలుసుకోవాలన్న త్రెడ్ తో పాత్రని ఫాలో అవుతూంటారు ప్రేక్షకులు. ప్రేక్షకుల్ని కూర్చోబెట్టాలన్న ధ్యాస వుండాలిగా ముందు కథకుడికి.

        ఆఫ్ కోర్స్, కథతో ఫాలో అవుతారు ప్రేక్షకులు. అయితే ఒక్క కథతో ఫాలో అయితే సరిపోదు. పాత్ర ఎవరో తెలుసుకోవాలన్న సస్పెన్స్ తో కూడా ఫాలో అయితే కథకి డైమెన్షన్ వస్తుంది. ఎప్పటిదాకా ఫాలో అవాలనేది కథని బట్టి వుంటుంది. ఈ గాథలో సెకండాఫ్ లో ఆ టైమింగ్ వచ్చింది.   

 హెన్రీ చాప్టర్ ఇందుకే. అతనొస్తేనే డానీ బయోగ్రఫీ వస్తుంది. ఇలాగాక, డానీ ఎక్కడో తాగుతూ ఎవరికో తన బ్యాక్ గ్రౌండ్ చెప్పుకోవచ్చు. అది పాత్రకి కథకుడు బయటి నుంచి తన వంతుగా అతికించి నట్టవుతుంది. మాట్లు వేసే వాడిలా అతికింపులు అతికించే కథకుడు చీడపురుగు కథకీ పాత్రకీ. వెంటనే కథకుడి మీద ఎండో సల్ఫాన్ స్ప్రే కొట్టాలి. దోమల మందు పెట్టినా సరే.

       హెన్రీ రాకతో డానీ తన గతాన్ని స్మరించుకునే వీలయ్యింది. అతడికో తండ్రీ,  ఆ తండ్రికో ఇద్దరు భార్యలూ వుండే వాళ్ళని మనకి తెలిసింది. తను ఎప్పుడు ఇల్లొదిలేసి వచ్చేశాడో తెలియదు. ఆర్కియాలజీ చేశాడు. అలా అలా ఒక గమ్యం కోసం తిరుగుతూ,  వెండి గనులతో ప్రయత్నం చేసి చమురు దాకా వచ్చాడు. తండ్రి ఇటీవలే చనిపోయాడని ఇప్పుడు హెన్రీ చెప్పేదాకా తెలీదు.

        ఇలా డానీ బ్యాక్ గ్రౌండ్ తెలియడానికి ఈ చాప్టర్ ఉపయోగపడింది. ఇంకా డానీ గురించి ఇంకో పార్శ్వం తెలియకుండా వుండిపోయింది : అతడి ఇన్నర్ డ్రీమ్ వరల్డ్ ఏమిటో మనకి తెలియదు. అది తమ్ముడికేగా వెల్లడించుకో గలడు. ఎక్కడో పెద్ద బంగళా, మనుషులకి దూరంగా ఏకాంతంలో జీవితం...అయితే ఒక లోటు వుందని కూడా చెప్తాడు. బంగాళాలో ఆడుకుంటూ తన పిల్లలు...అంటే అతడికి పెళ్ళి చేసుకోవాలని వుంది. కానీ సంపన్నుడుగా ఎదగాలన్న కోరిక పెట్టుకుని పెళ్ళిని తెగ నిర్లక్ష్యం చేశాడన్న మాట.

        అతడి లోపలి మనిషిని మనమిలా చూశాక, అతడ్ని చూసి నవ్వాలో ఏడ్వాలో తెలియదు మనకిప్పుడు. లోలోపల దాచుకునీ కల లు చూస్తే అలా వున్నాయి, వాటి కోసం చేసే పనులు చూస్తే ఇలా వున్నాయి....

        ఇప్పుడు హెన్రీని చంపి హంతకుడు కూడా అయ్యాడు. ఇలై లాగే ఇతడి అంతం కూడా సమీపించింది ఈ మిడిల్ 2 లో. ప్రత్యర్ధులిద్దరి క్యారెక్టర్స్ జర్నీ సమాంతరంగా సాగుతున్నట్టు గమనించాలి. మిడిల్ 2 సంఘర్షణ అంటే మిడిల్ 1 కంటే హై డిగ్రీ సంఘర్షణ. మర్డర్ అంత పతాకస్థాయికి తీసికెళ్ళే అంతటి సంఘర్షణ ఇంకోటి వుండదు. ఇలా డానీని హంతకుడుగా అథోగతిన పడేయడం కోసం కూడా హెన్రీ రాక, అతడి చాప్టర్ తప్పవు.

***

        5. ఈ హత్య కనిపెట్టిన విలియం బాండీ వచ్చి, డానీని బ్లాక్ మెయిల్ చేయడం డానీకి పీక్కోలేని ఇరకాటం. మతానికి ముడిపెట్టి బ్లాక్ మెయిల్ చేస్తున్నాడు బాండీ. దొరికావురా మతాన్ని అవమానిస్తావురా, ఇప్పుడొచ్చి మతాన్ని ఒప్పుకుని, పాపినాని క్షమించమని వేడుకో- అనే టైపులో బాండీకి చిక్కాడు డానీ. ఇప్పుడేం చేస్తాడు?  మతానికి లొంగిపోతాడా? బద్ధశత్రువు ఇలై చేతుల మీదుగా? ఇది ఎండ్ విభాగంలో చూద్దాం.

―సికిందర్

Q :  హాయ్ అండి, ‘ఉప్పెన’ సినిమా పెద్ద హిట్. కొంత మంది మిత్రులు ఆ సినిమాను తిడుతూ ఇంకా ఎన్ని రోజులు ఈ పాత సినిమాలు, పాత సీన్స్ తో తీస్తారు అన్నారు. కొంత మంది ఇంటర్, డిగ్రీ కుర్రాళ్ళను అడిగితే అందరూ మాకు సినిమా బాగా నచ్చిందని అన్నారు. ఒక సినిమా అంత పెద్ద హిట్ అయిందంటే అందులో ప్రేక్షకుడికి నచ్చే అంశాలు ఉండే ఉంటాయి అని నా నమ్మకం. ఒక విశ్లేషకుడిగా ఆ సినిమా మీద మీ అభిప్రాయం చెప్పగలరా?

―మహేష్, రైటర్

          A : మేల్ ఇగో లేదా సెల్ఫ్ పీటీ. మేల్ ఇగోతో వుండే వాళ్లకి తామే పరిస్థితుల్లో వున్నా అమ్మాయి తమ కోసమే వుండాలన్న మైండ్ సెట్ తో కావచ్చు;  ప్రస్తుతం దయనీయ స్థితిలో వున్న వాళ్ళకి అమ్మాయి తమ పట్ల జాలితో వుందన్న సెల్ఫ్ పీటీ వల్ల కావచ్చు - సినిమాని హిట్ చేసి వుంటారు. 

***