532 : డార్క్ మూవీస్ స్క్రీన్ ప్లే సంగతులు

          కథల్లో సమస్యకి పరిష్కార మార్గాన్ని కనుగొనాల్సింది  ప్రధాన పాత్రే. ప్రధాన  పాత్ర విలన్ అయినా సరే ఆ విలనే పరిష్కార మార్గాన్ని కనుగొనాలి. ఎందుకంటే ఒక ప్రధాన పాత్రగా తనే కథని ప్రారంభిస్తాడు గనుక. ఎవరు కథని ప్రారంభిస్తే వాళ్లే తలెత్తిన సమస్యకి పరిష్కార మార్గాన్ని కనుగొనాలి. అయితే విలన్ ప్రధాన పాత్రగా వున్నప్పుడు,  ఆ విలనే పరిష్కార మార్గాన్ని కనుగొనాల్సి వచ్చినప్పుడు,  ఫలితం వ్యతిరేకంగా వచ్చి అతడికి విషాదాంత మవుతుంది కథ.  అదే ప్రధాన పాత్రగా హీరో కథ నడిపిస్తూ పరిష్కారమార్గాన్ని కనుగొన్నప్పుడు,  సుఖాంత మవుతుంది కథ. పరిష్కార మార్గమంటే ముగింపు కాదు, ముగింపుకి తెర్చుకున్న ద్వారం. ఇది ప్లాట్ పాయింట్ టూ దగ్గర లభిస్తుంది. దీంతో మిడిల్ పూర్తయి ఎండ్ విభాగంలో పడుతుంది స్క్రీన్ ప్లే.
          

          ‘బ్లడ్ సింపుల్’ లో విస్సర్ అనే విలన్ ప్రధాన పాత్ర. ఇతనే మార్టీని ‘చంపి’ కథ ప్రారంభించాడు.  కథని ముగించాలంటే అతడికో పరిష్కార మార్గం దొరకాలి. ఈ పరిష్కార మార్గాన్ని ఎవరు సరఫరా చేయాలి?  విస్సర్ రహస్యం తెలుసుకున్న వాడు సరఫరా చేయాలి. ఈ రహస్యం తెలుసుకోబోతున్నవాడు రే. కాబట్టి రే నే విస్సర్ కి పరిష్కారం అందించి కథ ముగించడానికి తోడ్పడాలి.

            ప్రధాన పాత్రగా గుమ్మడి విలన్ గా వేసిన ‘నేనూ మనిషినే’ లో ఒక జడ్జిగా గుమ్మడి హత్య చేసి దొరక్కుండా ఎత్తులేస్తూంటాడు.  సత్యనారాయణ బాధిత పాత్ర. గుమ్మడిని ఇక చంపెయ్యాలనుకుని రివాల్వర్ తో హత్యాప్రయత్నం చేసి దొరికిపోతాడు. తీరా చూస్తే తను  గుమ్మడి మీద హత్యాయత్నం చేస్తూ వాడిన  రివాల్వర్,  గుమ్మడి హత్య చేయడానికి వాడిన రివాల్వర్ ఒకటే. ఇది తెలీక దాన్ని తెచ్చుకుని గుమ్మడి మీద హత్యాయత్నం చేయడంతో, గుమ్మడి చేసిన హత్య కూడా తనే చేశాడని ఇరుక్కుంటాడు. 

            ‘బ్లడ్ సింపుల్’ లో విస్సర్ మార్టీని షూట్ చేసి చంపేశాననుకుని వెళ్ళిపోతాడు. రే వచ్చి చూస్తే మార్టీ బతికే వుండడంతో,  అతణ్ణి సజీవ సమాధి చేసేసి పూర్తిగా చంపేస్తాడు. ఫలితంగా తనే హంతకుడవుతాడు. ఇదే పరిస్థితి సత్యనారాయణది. అక్కడ గుమ్మడి ఎస్కేప్, ఇక్కడ విస్సర్ ఎస్కేప్.

            కానీ ఆ కథని ఒక ప్రధాన పాత్రగా గుమ్మడి ముగించాల్సిందే.  ఎలా ముగిస్తాడు? తను చేసిన హత్యలో సత్యనారాయణ బాగా ఇరుక్కున్నాడని టాటా చెప్పేసి హేపీగా వెళ్లి పోవడమా? ఇది కథా ప్రయోజనమన్పించుకోదు. కథా ప్రయోజనం నేరానికి తగిన శిక్ష!  మరి గుమ్మడి కి ఏ పరిష్కారమార్గం దొరికి కథా ప్రయోజనం ప్రకారం కథని ముగించాడు?

            కోర్టులో సత్యనారాయణ పరిస్థితి చూసి గుమ్మడిలో అంతర్మధనం మొదల
వుతుంది. నేరం ఒప్పుకుని లొంగిపోతాడు.  ఈ కథలో గుమ్మడి కథ ముగించడానికీ,  అందుకో పరిష్కార మార్గం దొరకడానికీ సత్యనారాయణ పరిస్థితి దోహదం చేసింది. అలాగే విస్సర్ కి కూడా రే ఆ పరిష్కార మార్గాన్ని అందించబోతున్నాడు. ఇదెలాగో చూద్దాం. గత సీన్లో ఎబ్బీ పీడకల వ్యవహారం చూశాం. దీంతో ఆమె ఏం చేసిందో ఇప్పుడు చూద్దాం...

33. మార్టీ హత్య గురించి ఎబ్బీ రేలు మాటామాటా అనుకోవడం

            ఇలా రాశారు –

            రే ఇంటి ముందు ఎబ్బీ కారు దిగి ఫోర్ గ్రౌండ్ లో నడుచుకుంటూ పోతుంది. కిటికీ దగ్గర నిలబడి లోపలికి  చూస్తుంది. గోడ కేసి చూస్తూ బెడ్ మీద కూర్చుని వుంటాడు రే. పిలుస్తుంది. తిరిగి చూస్తాడు. 

            లివింగ్ రూమ్ వైడ్ షాట్ – స్క్రీన్ డోర్ తీసుకుని  ఎబ్బీ వస్తూంటుంది. గది ఖాళీగా వుంటుంది ఫర్నిచర్ తప్ప. కింద అట్టపెట్టె లుంటాయి. అర్ధంగాక చూస్తూ - ‘సామానేమైంది?’ అంటుంది.  

            అతను ముందుకు అడుగులేస్తాడు.  నేలమీద కత్తి, చుట్ట చుట్టిన తాడూ వుంటాయి. తాడు మీద అతడి కాలు పడుతుంది. వంగి కత్తి ని అందుకుంటాడు. ‘డిక్కీలో’ – అంటాడు ఆమె ప్రశ్నకి సమాధానంగా. ‘వెళ్ళిపోతున్నావా?’ అంటుంది. అతను అట్టపెట్టెకి తాడు కట్టి కసిక్కున కోస్తాడు కత్తితో -  ‘అదేగా నువ్వు కోరుకునేది’  అంటాడు. తల అడ్డంగా వూపుతుంది. ‘వస్తావా నాతో?’ అంటాడు. ముందు అసలేం జరిగిందో తెలియాలంటుంది.

            ‘నువ్వు జీతం డబ్బుల కోసం బార్ కి వెళ్ళావ్. మార్టీ తో ఘర్షణ పడ్డావ్. అప్పుడేదో జరిగిపోయింది...’  అని ఆమె అంటూంటే, తలూపుతూ చిర్నవ్వుతో చూస్తాడు. మళ్ళీ అంటుంది ఎబ్బీ- ‘అది నువ్వు కాదంటావా? మరి  దొంగోడెమో ...నువ్వెళ్ళే సరికీ...’

            ‘నీ రివాల్వర్ తో దొంగోడా?’ అంటాడు. 

            కత్తిని జేబులో పడేసుకుని,  ఆమె వున్న డోర్ వైపు అడుగులేస్తాడు, ‘ఇంకెవరూ రాలేదు, ఎబ్బీ. నీకు నిజం చెప్తాను’ అంటాడు -  ‘నిజం ఏమిటంటే, రెండ్రోజులుగా నావొంట్లో బాగోలేదు. తినలేక పోతున్నాను, కళ్ళు మూయలేక పోతున్నాను. ఏం చెయ్యాలో తెలియడం లేదు. సరే, ఎబ్బీ...’

            ఆమెకి అభిముఖంగా నిలబడి చేతులు ప్యాంట్ జేబుల్లో పెట్టుకుని, ఇబ్బందిపడుతూ  – ‘ నిజమేమిటంటే, నేను పాతి పెట్టినప్పుడు అతను బతికున్నాడు’  అంటాడు. అతణ్ణి తీక్షణంగా చూస్తుంది. 

            వెనక వారగా ఆకాశంలో ఒక వస్తువు తిరుగుతూ తిరుగుతూ వచ్చి,  పెద్ద శబ్దంతో స్క్రీన్ డోర్ కి ఠపీ మని కొట్టుకుంటుంది. ఇద్దరూ ఉలిక్కిపడి అటుకేసి చూస్తారు. ఎబ్బీ చటుక్కున డోర్ తీసుకుని బయటికి వెళ్ళిపోతుంది. రే ఆమెని ఆపకుండా వుండిపోతాడు.  

            బయట – ఇందాక స్క్రీన్ డోర్ కి కొట్టుకుని కింద పడ్డ న్యూస్ పేపర్ని దాటుకుని -  ముందు కెళ్ళి పోతుంది ఎబ్బీ.
            ఎబ్బీతో ట్రాకింగ్ షాట్ – తన కారు వైపు వెళ్ళిపోతూ రే కారు వైపు చూస్తుంది.

            ఎబ్బీ పాయింటాఫ్ వ్యూ- ట్రాకింగ్ ఫార్వర్డ్ – రే కారు వెనుక సీట్లో కప్పిన వస్త్రం రక్తం తో అంతకంతకూ  ఎర్రబారి వుంటుంది...

***

            పై సీను పరస్పరం నిజాలు తెలుసుకునే ట్రాక్ లో భాగంగా వచ్చింది. అంచెలంచెలుగా పరస్పరం నిజాలు తెలుసుకుంటున్నారు.  ఇక కథ క్లయిమాక్స్ కి వెళ్ళాలి కాబట్టి మిగిలున్న ఈ ప్రక్రియ. ఈ సీనుకి సబ్ కాన్షస్ డ్రైవ్  29 వ సీన్లో వుంది. ఆ సీన్లో ఎబ్బీ మరొకర్ని చూసుకుందన్న అనుమానంతో రే ప్రవర్తనలో వచ్చే మార్పు. అస్థిమితంగా తిరుగుతూ అక్కడున్న అట్టపెట్టెని అందుకోవడం, పడెయ్యడం గమనించాం. ఆ సబ్ కాన్షస్ చర్య ముందే అతడికి జరగబోయేదాని గురించి చెప్పేసింది. ఇప్పుడు అదే జరుగుతోంది-

            ఎబ్బీ వచ్చేసరికి సామాను సర్దుకుంటున్నాడు. ఆమె ‘సామానేమైంది?’ అన్నప్పుడు అతడి కాలు తాడు మీద పడుతుంది. తామిద్దరి మధ్య బంధానికి  అతడి సమాధానమది. ఆమె ‘వెళ్ళిపోతున్నావా?’ అన్నపుడు, అట్టపెట్టెకి తాడు కట్టి కసిక్కున కోస్తాడు కత్తితో. తెగిపోయింది బంధం. ఆ తర్వాత బార్ లో జరిగిందాని పైకి సంభాషణ మళ్ళుతుంది. ఆమె మార్టీ ని షూట్ చేసిందనే అతడి అపార్ధం మాత్రం తొలగడం లేదు. అతను అడిగితేగా? తనని వాడుకుని మరొకరితో సెటిలవుతోందన్న అనుమానంతో వున్నాడు పైగా. అతడలా అనుకోవడానికి ఆమె మాటలే తోడ్పడ్డాయి. 

            అందుకే వూరొదిలి వెళ్ళిపోతున్నాడు. ఆమె రాత్రి వచ్చిన కలలో మార్టీ మాటలకి కలత చెంది ఇక్కడి కొచ్చింది. రే నిన్ను కూడా చంపేస్తాడని మార్టీ పలికాడు. మరొకర్ని చూసుకోమని కూడా అన్నాడు. ఆమె ఇవేమీ పట్టించుకునే స్థితిలో లేదు. ఆమెకి బార్ కి వెళ్లి చూసినప్పుడు మార్టీ చనిపోయాడనీ, రే చంపాడనీ అనుకుంది. ఇది మార్టీ మాటల్లో బయటపడ్డంతో ఆమెకి నిర్ధారణ అయిపోయింది.  ఇప్పుడు రేని ఈ విషయంగా నిలదీయాలని వస్తే,  ఎదురు చూడనివిధంగా అతను ప్రయాణం కడుతూ షాకిచ్చాడు. 

            ఇప్పుడు కూడా రే - నువ్వు షూట్ చేశావనీ, అతను చావలేదనీ, బతికుంటే నీకు మంచిదికాదని పాతి పెట్టాననీ   క్లియర్ గా చెప్పలేక పోతున్నాడు. నువ్వు షూట్ చేశావనే మాట వాడకుండా, కేవలం కొనవూపిరితో వున్న మార్టీని సమాధి చేసేశానని చెప్పాడు. కథలో ఎప్పుడూ  కూడా అతను ఆమెని హర్ట్ చేయాలన్న ఉద్దేశంతో లేడు. తనని తాను శిక్షించుకునే ధోరణిలోనే వుంటున్నాడు. అతను మార్టీని చంపి సుఖంగా ఏమీ లేడు. లోలోపల చేసిన తప్పుకి కుంగిపోతున్నాడు. అందుకే ఇప్పుడు ఫైనల్ గా స్క్రీన్ డోర్ దగ్గర ఆమెకి అభిముఖంగా చేతులు ప్యాంటు జేబులో పెట్టుకుని మాట్లాడుతున్నాడు. సెల్ఫ్ ఇమేజి బాగా లేదని అన్పించినప్పుడే ఇలాటి బాడీ లాంగ్వేజీ ప్రదర్శిస్తారు మనుషులు. తను పాతి పెట్టినప్పుడు మార్టీ బతికున్నాడని చెప్పేశాడు. 

            ఇప్పుడు ఒకటి జరుగుతుంది. ఈ షాకింగ్ వార్తకి ఆమె అతణ్ణి తీక్షణంగా చూస్తూండగానే - స్క్రీన్ డోర్ అద్దంలోంచి బయట ఏదో వస్తువు ఎగురుతూ రావడం మనకి కన్పిస్తుంది. అది పెద్ద చప్పుడుతో అద్దానికి కొట్టుకుని అవతల పడిపోతుంది. అదేమిటో మనకి తెలీదుగానీ, ఎవరో విసిరితే వచ్చి తగిలిందని మనకి అర్ధమవుతుంది. ఎవరు? ఏం విసిరారు? ఎందుకు విసిరారు? విస్సర్ కాక వీళ్ళ గురించితెలిసిన మరో వ్యక్తి ఎవరు?...ఇలా రకరకాల ప్రశ్నలు వేధిస్తాయి.

            వాళ్ళిద్దరూ అది డోర్ కి తగలగానే ఉలిక్కి పడి అటు చూస్తారు. ఆమె వెంటనే డోర్ తీసుకుని వెళ్ళిపోతుంది. అప్పుడు మనకి కన్పిస్తుంది బయట పడున్న న్యూస్ పేపర్. 

            ఆమె పిడుగు లాంటి వార్త విన్నది. అందుకే న్యూస్ పేపర్ తో ఈ ఎఫెక్ట్. దీన్ని ఇంకోలా చేయవచ్చు. న్యూస్ పేపర్ లేకుండా - రే అన్న మాటకి సంగీత దర్శకుడు ధనా ధనామని ఏదో వాయించి బ్రహ్మాండమైన ఎఫెక్ట్ ఇవ్వొచ్చు. అది కృత్రిమంగానే వుంటుంది తప్ప యాక్షన్ తో డ్రమటైజ్ చేసినంత ఎఫెక్టివ్ గా వుండదు. మనం ఉలిక్కి పడ్డానికి ఏమీ వుండదు. అది పేపర్ బాయ్ పేపర్ వేసే సమయం. అప్పుడు సరీగ్గా ఆ డోర్ దగ్గరే నిలబడ్డారు. ఈ డోర్ దగ్గర నిలబడ్డం కావాలని నిలబెట్టినట్టు వుండచ్చు న్యూస్ పేపర్ ఎఫెక్ట్ కోసం. ఇక్కడ లోపలికి ఎంటరవగానే ఎబ్బీ చూసిన పరిస్థితికి ఆమె ఇంకా లోపలికి వచ్చే అవకాశం లేదు. అతను సామాను సర్డుకుంటూంటే విస్తుపోయి డోర్ దగ్గరే నిలబడిపోయింది. ఇందులో దర్శకులు కావాలని అక్కడ నిలబెట్టిందేమీ  లేదు. అలాగే ఆమెకి దూరంగా అట్టపెట్టెలు కడుతున్న రే, నిజం చెప్తానని యాదృచ్ఛికంగా ఆమె దగ్గరికే వస్తాడు. అతను  కావాలని డోర్ దగ్గరికి వచ్చిందేమీ లేదు. సీను కేవలం డైలాగులతో నడిచిపోకుండా ఏదైనా సంఘటన కూడా జరిగితేనే చలనశీలంగా వుంటుంది. ఎక్కువ ఆకట్టుకుంటుంది. 

            ఇక ఆమె కారు దగ్గరికి వెళ్ళిపోతూ, రే కార్లోకి చూసినప్పుడు,  సీటు మీద కప్పిన వస్త్రం రక్తసిక్తంగా కన్పించడం ఆమెకి పూర్తి సమాచారం ఇవ్వడం కోసమే. లేకపోతే రే పాతి పెట్టానని అంటే ఆమె నమ్మాలని లేదు. ఐతే ఇద్దరి మధ్యా  విస్సర్ వున్నాడని ఇప్పటికీ వాళ్లకి తెలీదు. ఇది బాకీ వుంది కథలో. ఒకటొకటే ఎలా క్లియర్ చేసుకుంటూ పోతున్నారో గమనించాలి. రాబోయే ప్లాట్ పాయింట్ టూ కల్లా ఇవన్నీ క్లియర్ అయితేనే పరిష్కార మార్గం (విస్సర్) కి దొరుకుతుంది.

34. ఎబ్బీ వెళ్లి మారిస్ కి ఫిర్యాదు చేయడం

        ఈ సీనుని ఎడిటింగ్ లో తగ్గించేశారు. ఎబ్బీ బార్ టెండర్ మారీస్ ఇంటి కెళ్ళి,  రే తనతో ఏం చెప్పాడో,  మార్టీ ఎలా చనిపోయాడో చెప్పే సీను ఇది. మార్టీ బతికే వున్నాడనీ, అన్సర్ మిషన్ లో అతడి మెసేజి వుందనీ, రే డబ్బు దొంగిలించినట్టు చెప్పాడనీ అంటాడు మారీస్. ఐతే బతికుంటే ఎక్కడున్నాడో తెలుసుకోవాలంటుంది ఎబ్బీ. 

            ఇదంతా కట్ చేశారు ప్రేక్షకులకి తెలిసిన సమాచారమే కాబట్టి. ఇందులో మార్టీ బతికున్నాడన్న అపోహ ఇద్దరికీ కలగడం ఒక్కటే కొత్త విషయం. మార్టీ ఎక్కడున్నాడో తెలుసుకోవాలంటుంది ఎబ్బీ. ఇదంతా కృత్రిమంగా, అనవసరంగా వుంది. వెనుక సీన్లో చూసిన దృశ్యాలతో మార్టీ చనిపోయాడని ఆమె నమ్మిందని ప్రేక్షకులు నమ్మాక (లేకపోతే  న్యూస్ పేపరుతో పిడుగు లాంటి వార్త ఎఫెక్ట్ కి అర్ధమే వుండదు), మళ్ళీ ఆమె ఇప్పుడు మారీస్ ఏదో చెప్పాడని, మార్టీ బతికుంటే ఎక్కడున్నాడో తెలుసుకోవాలని అనడం అర్ధరహితమై పోతుంది. 

            దీని తర్వాత రెండో సీనులో మారీస్ మార్టీ ఇంటికెళ్ళి పరిశీలిస్తూంటాడు. స్క్రిప్టులో రాసిన ఈ సీను కూడా అర్ధరహితమే. దీన్ని పూర్తిగా తొలగించారు. పకడ్బందీగా రాసుకొస్తున్న కోయెన్ బ్రదర్స్, నమ్మశక్యంగాని ఈ రెండు సీన్ల దగ్గర ఎందుకు పొరబడ్డారో. అలాగే మార్టీ ఇంట్లో పెంపుడు కుక్క ఏమైందో కన్పించదు. యజమాని కన్పించకపోతే దాని పరిస్థితేమిటి?  అది కథకి అడ్డుపడు
తుందని వదిలేసినట్టున్నారు గానీ, పెంపుడు కుక్క కూడా వుండి వుంటే  ప్రేక్షకుల వెంట్రుకలు నిక్కబొడిచేలా దృశ్యాలుండేవి. యజమానిని వెతుక్కుంటూ వచ్చి, రే పాతి పెడుతూంటే అడ్డుకునే దృశ్యం వుండివుంటే,  హార్రర్ ఎఫెక్ట్ తో వొళ్ళు జలదరించే దృశ్యం వెంటాడేది మనల్ని. అది రే మీద పగబట్టి వెంటాడుతూంటే కథనానికి మంచి వూపు వచ్చేది.

            ప్రస్తుత ఎడిట్ చేసిన సీనులో,  ఎబ్బీ మారీస్ ఇంటికెళ్ళి  తలుపుకొట్టి, అతను  తీయగానే  ‘నీతో అర్జెంటుగా మాటాడాలి’ అని లోపలి కెళ్ళి పోవడంతో కట్ అవుతుంది.ఐతే దీంతో కూడా ఈ సీను ప్రయోజనం నెరవేరలేదు. కథలో వున్న పాత్రలకి కథలో ఏం జరుగుతోందో తెలియాలి కాబట్టి - ఆ జరిగింది (మార్టీ చావు) మారిస్ కి తెలిపే ఉద్దేశంతో ఇలా ఎబ్బీ ని పంపించి సీను కట్ చేస్తే సరిపోయిందనుకున్నా, అసలు మార్టీ ని చంపానన్న రే పట్ల ఆమె దృక్పథ మేమిటిప్పుడు? ఇది పాత్రకి అవసరం. ఆమె ఇప్పుడు తీసుకోవాల్సింది రే చెప్పిన మాటల పైన నిర్ణయం. ఇదే కన్పించదు. దీంతో పాత్ర చిత్రణ దెబ్బతింది.

***

35. రే వెళ్లి బార్ లో సేఫ్ తెరిస్తే ఫేక్ ఫోటో బయట పడడం      

        ఈ సీను కూడా ఎడిట్ అయ్యింది. స్క్రిప్టులో ఈ సీను ప్రారంభం రాత్రిపూట కారులో వెళ్తున్న రే,  ఎవరో అనుసరిస్తున్నట్టన్పించి ఆపేస్తాడు. వెనుక వస్తున్న కారు కూడా ఆగిపోతుంది. చాలా సేపూ రెండు కార్లూ ఆగే వుంటాయి. ముందు కెళ్ళి పొమ్మని రే చెయ్యూపితే,  వెనుక కారు క్రాస్ చేసి వెళ్ళిపోతుంది. అది విస్సర్ కారు. అతను రే ని కనిపెడుతున్నాడన్న మాట. ఇది కట్ చేశారు. లేకపోతే జరగబోయేది మనకి ముందే తెలిసిపోతుంది. 

            ఇంతవరకూ కట్ చేస్తే, మిగతా సీను ఈ కిందివిధంగా రాశారు:

            బార్లో ఆఫ్ స్క్రీన్ లో లైటు స్విచ్ వేసిన చప్పుడు. మార్టీ టేబుల్ మీద చచ్చిన చేపల షాట్. షాట్ కట్ చేసినప్పుడు ఈగ చేసే రొద  తీవ్రమవుతుంది.

            రే మీద క్లోజ్ షాట్.

            డోర్ దగ్గర నిలబడి చేపల్ని చూస్తూంటాడు రే.

            ఆఫీసు వైడ్ షాట్ - చుట్టూ చూస్తాడు రే. కింద  అడ్డం ముక్కలు అలాగే పడుంటాయి. చూపు  సేఫ్ వైపు మళ్ళుతుంది. అక్కడున్న సుత్తిని చూస్తాడు. సేఫ్ దగ్గరికి వెళ్లి గొంతుక్కూర్చుంటాడు.

            రే క్లోజ్ షాట్ -  దెబ్బతిన్న సేఫ్ డయల్ ని ప్రయత్నించి ఓపెన్ చేసేస్తాడు. లోపలున్న వస్తువుల్ని కదిలిస్తూంటే, మడత పెట్టి వున్న ఫోటో తగుల్తుంది.
            రే పాయింటాఫ్ వ్యూ – తనూ ఎబ్బీ శవాలై వున్న ఫోటో.

            రే మీద ఫోకస్ – మార్టీ టేబుల్ సజెషన్ లో.
            నెమ్మదిగా లేస్తాడు. టేబుల్ మీద చేపల కిందున్న విస్సర్ లైటర్ అంచు మెరుస్తూంటుంది.

              ఫోర్ గ్రౌండ్ లో టేబుల్ దగ్గరి కొస్తాడు. ఫోటోని టేబుల్ మీద పరుస్తాడు. ఒక్క క్షణం దానికేసే చూసి,  సడెన్ గా  ఫ్రేములోంచి తప్పుకుంటాడు.

            బయట కొచ్చి కారెక్కి పోనిస్తూ ఆపేస్తాడు. దూరంగా చీకట్లో ఓ కారాగి వుంటుంది. దాన్నే చూస్తూంటాడు. అది విస్సర్ కారు. ఆ కారు దాటుకుని వెళ్ళిపోతాడు.

***

   ఇది ప్లాట్ పాయింట్ టూ సీను.   

  దీన్ని ప్రేరేపించింది 31 వ సీను. అంటే ఆ ప్లాట్ పాయింట్ టూ కి దారి తీయించే పించ్ టూ అన్నమాట. ఫస్టాఫ్ లో ఇంటర్వెల్ ని ప్రేరేపించే పించ్ వన్ సీను ఎలా వుంటుందో, సెకండాఫ్ లో ప్లాట్ పాయింట్ టూ ని ప్రేరేపించే పించ్ టూ సీను అలా వుంటుంది. ఆ పించ్ వన్  సీన్లో మారీస్ వచ్చి, రే మీద డబ్బు దొంగతనం ఆరోపణ చేసి వెళ్ళాడం తెలిసిందే. 

          దీంతో రే మనసుని ఒకటి దోలుస్తూండాలి సహజంగానే. ఆ ఆరోపణ అబద్ధమని.  ఆరోపణ  డబ్బు సేఫ్ లోనే వుండాలి.  ఇదేదో తేల్చుకోవడానికే ఇలా బార్ కొచ్చాడు. వచ్చి చూస్తే, సేఫ్ లో ఫేక్ ఫోటో బయట పడింది. దీంతో ఈ గేమ్ లో తనూ - ఎబ్బీ – మార్టీయే గాక, మరొకడున్నాడని అర్ధమైంది. వాణ్ణి మార్టీ తామిద్దర్నీ  చంపడానికి నియమిస్తే, వాడు చంపకుండా ఫేక్ ఫోటో సృష్టించి మార్టీని నమ్మించాడనీ, ఏదో తేడా వచ్చి మార్టీ ని షూట్ చేసి వెళ్లి పోయాడనీ,  అసలు మిస్టరీ అంతా ఇప్పుడు రే కి వెల్లడైపోయింది.

          ఇది చాలా షాకింగ్ సంగతి రేకి. ముందు తమని చంపడానికే మార్టీ కుట్ర పన్నాడన్న భయంకర నిజంతో, ఇప్పుడు తను మార్టీ ని అలా చంపేసి వుండడం పక్కగా న్యాయమే అన్పించ వచ్చు రేకి. ఇది  పోయెటిక్ జస్టిస్, మార్టీ ఎలా చేసుకుంటే అలా అనుభవించక తప్పదన్న నీతితో. కానీ చట్టం దృష్టిలో తాను దోషియే రే.

          ఎవడా నాల్గో వాడు?  వాడే సేఫ్ లో ఫోటో తొలగించడానికి వచ్చి వుంటాడు. అందుకే ఆఫీసు ఇలా ధ్వంసమైంది. సేఫ్ తెరవలేక వెళ్లి పోయుంటాడు. ఇప్పుడు రే ఏం చేయాలి?
          రే ఏం చేయడానికీ సమయంలేదు. మార్టీ నియమించిన హంతకుడు ఎప్పుడైనా దాడి చేయవచ్చు ఫోటో కోసం. రే కారెక్కి  వెళ్లిపోతూంటే ఎదురుగా  కాపేసి వున్నది వాడే. ఇక్కడ రే ఏం నిర్ణయం తీసుకున్నాడో, వాడి పక్కనుంచే వెళ్ళిపోయాడు. 

          విస్సర్ విషయానికొస్తే, ఎబ్బీ బార్ కొచ్చినప్పుడు సేఫ్ పగుల గొడుతున్నాడు. ఆమె వెళ్ళిపోయాక తిరిగి  ఆ ప్రయత్నం చేసి ఫోటో దక్కించుకో వచ్చు. అప్పటికీ అది తెరచుకుని వుండి వుండదు. వెళ్ళిపోయిన ఎబ్బీ విషయం చెప్తే,  రే బార్ కొస్తాడని వూహించాడు. రే బార్ కొచ్చి  సేఫ్ తెరిచాడు. ఫోటో తీసి చూసేశాడు. ఇప్పుడు వాళ్ళిద్దర్నీచంపడం మినహా మార్గం లేదు విస్సర్ కి. ఈ ప్లాట్ పాయింట్ టూ సీన్ లో,  ప్రధాన పాత్ర విస్సర్ ముందున్న సవాలు ఇది. దీనికి వాళ్ళిద్దర్నీ చంపడమే పరిష్కారం!

          చనిపోక ముందు మార్టీ రే మీద కసితో డబ్బు దొంగతనం ఆరోపణ చేసింది వూరికే పోలేదు. ఈ ఆరోపణ గురించే రే బార్ కొచ్చి ఇలా విస్సర్ కి చిక్కాడు. మార్టీ ప్రతీకారం ఇలా తీరుతోంది. 31 వ సీన్లో మారీస్ వచ్చి డబ్బు దొంగతనం ఆరోపణ చేసి వెళ్ళాక, రే కారులో వస్త్రం కప్పిన సీట్లోంచి రక్తం ఉబికి రావడం గమనించాం. అంటే సమాధిలోంచి మార్టీ వెంటాడుతున్నట్టు అర్ధం జేసుకున్నాం. ఆ ఆరోపణతో  రే ని బార్ కి పరుగెత్తిస్తే, రే వచ్చి ఫోటో తీసి విస్సర్ కి చిక్కాడు. ఇంకేం, మార్టీ ప్రతీకారం తీరిపోయింది. 

          మరి మార్టీ తనని షూట్ చేసిన విస్సర్ మీద కూడా ప్రతీకారం తీర్చుకోవాలిగా? అది చట్టం చూసుకుంటుంది. చేపల కింద వున్నవిస్సర్ లైటర్ తో. విస్సర్ ఫోటో గురించి ఎంత ఆందోళనతో వున్నాడంటే , లైటర్ సంగతే మర్చిపోయాడు. 

          ఇలా మార్టీ ప్రతీకారం తేర్చుకునే ట్రాక్ లోంచే రే కి నిజాలు తెలియాలన్న కథనం సాగింది. ప్లాట్ పాయింట్ టూ కి చేరవేసింది. ఈ సీనులో ఒక సింబాలిజముంది.  రే సేఫ్ దగ్గర వంగినప్పుడు టిల్ట్ అప్ యాంగిల్లో పైన సీలింగు ఎల్లో కలర్ లో మెరుస్తూంటుంది. మార్టీని విస్సర్ షూట్ చేసే సీన్లో ఇలాగే  మార్టీ సేఫ్ దగ్గరున్నప్పుడు,  టిల్ట్ అప్ షాట్ లో  పైన సీలింగ్ ఎరుపు - నలుపు గడులుగా ప్రకాశించడాన్ని గమనించి, అది అతడి మరణం ఎలా  వుండబోతోందో తెలియజేప్తోందని చెప్పుకున్నాం.

          ఇప్పుడు రే మరణానికి కూడా ఈ సింబాలిజంతో అర్ధం తీస్తే, ఇతను మార్టీలా అంత యాతన పడకుండా మెరుపు వేగంతో మార్టీ దగ్గరికి చేరుకుంటాడని తెలుస్తోంది.

(సశేషం)

-సికిందర్ 

531 : సందేహాలు - సమాధానాలు

Q : సర్,
          మీరు కథ వేరు, గాథ వేరు అని చాలా సార్లు రివ్యూలలో రాస్తున్నారు. అంటే ఏమిటి? వాటినెలా గుర్తించాలి?  గాథలు ఎందుకు సినిమాలకి పనికిరావు?
          -వి. సూర్యకాంత్, స్ట్రగ్లింగ్ రచయిత
A : ఒకసారి  ఇక్కడ క్లిక్ చేసి చదవండి, మీకు అన్నీ అర్ధమవుతాయి.

Q : సర్,
          TFI  కి మీరు చేస్తున్న హెల్ప్ ఎవరూ చేసి వుండరు. ఏ ప్రతిఫలం  ఆశించకుండా ఇంత నాలెడ్జి షేర్ చేయడం awesome సర్. నాకు క్యారక్టర్ డెవలప్ మెంట్ అంటే ఏమిటో తెలుసుకోవాలనుంది. కొంచెం డిటైల్డ్ గా చెప్తారా? కొన్ని కథల్లో హీరో క్యారక్టర్ మెచ్యూర్డ్ గా వుంటుంది. ‘శ్రీమంతుడు’ లో మహేష్ బాబు క్యారక్టర్ లాగా. ఇలాంటి క్యారక్టర్ వున్నప్పుడు గ్రోత్ వుండదు కదా? అప్పుడేం చేయాలి బోర్ కొట్టకుండా? ‘పెదరాయుడు’ టైపు క్యారక్టర్స్ కి గ్రోత్ వుండదు కదా? ఎలా మొదలైందో అలాగే ముగుస్తుంది కదా?
 - అశోక్ పొడపాటి, సహాయ దర్శకుడు
A :    TFI కి హెల్ప్ చేసేంత లేదుగానీ, ఈ వ్యాసకర్త తనని తానూ  ఎడ్యుకేట్ చేసుకునేందుకే ఇదంతా. కాకపోతే పనిలోపనిగా ఇలా రాసి నల్గురికీ  తెలియపర్చుకుంటూ ఎడ్యుకేట్ అవుతున్నానను కుంటున్నాడు. ప్రతిఫలం ఆశించడం వుంటుంది. వచ్చి కథల్ని రిపేరు చేయించుకుంటే డబ్బులు అడగడం వుంటుంది.
         ఇక  క్యారక్టర్ డెవలప్ మెంట్ గురించి : మిడిల్ లో సంఘర్షిస్తున్నప్పుడు ఆటోమేటిగ్గా ఆ అనుభవాల్లోంచి నేర్చుకోవడమే పాత్ర ఎదుగుదల. పాత్ర డెవలప్ అవ్వాలన్నా, ఎదగాలన్నా మిడిల్లో జరిగే సంఘర్షణలోంచే. అప్పుడే క్యారక్టర్ గ్రోత్ అంటారు. ఇది జరక్కపోతే  మిడిల్లో కథనం చప్పగా వుంటుంది. 
          ‘శ్రీమంతుడు’ క్యారెక్టర్ గురించి :  హీరోయిన్ చెప్తేనే  తానేం చేయాలో గోల్ తెలుసుకున్న పాసివ్ క్యారక్టర్ అది.  ఇక్కడ్నుంచీ రియాక్టివ్ పాసివ్  క్యారక్టర్ గా కొనసాగుతుంది. దీని ఎదుగుదల కృత్రిమం. వివరంగా కావాలంటే ‘శ్రీమంతుడు’ స్క్రీన్ ప్లే సంగతులు చూడండి. 
          ఇక క్యారక్టర్ మెచ్యూర్డ్ గా వుంటే చెప్పడానికి కథేముంటుంది? క్యారక్టర్ యాక్టివ్ గా  అనుభవాల్లోంచి నేర్చుకుంటూ వుంటేనే తగిన కథని సృష్టిస్తుంది. మంచి కథల్లో క్యారక్టర్ ప్రారంభం ఇగోతోనే  వుంటుంది. ఈ ఇగోని  చివరికి  మెచ్యూర్డ్ ఇగో వైపుగా నడిపించేదే  సరైన మంచి కథ.  

          ‘పెదరాయుడు’ కథకాదు, ట్రాజడీ గాథ. ట్రాజడీల్లో పాత్రలు ఎదిగే మాట వుండదు. ‘దేవదాసు’ ఎదిగాడా? రెండువేల ఏళ్ల నాడు అరిస్టాటిల్  ఏం చెప్పాడో,  అది ఇప్పుడూ ట్రా జడీలకి సంబంధించి జరుగుతూనే వుంది.

Q : Sir,
          Really, you are doing great  job. Your articles are very useful to those who are aspiring to become film makers like me. We are grateful to you. Sir, please answer me for this question : In Taxi Driver  why Travis Bickle  tries  to kill the presidential candidate? Because, Betsy has been working for that presidential candidate’s election campaign? Or just to  overcome his metaphysical emptiness?

-Dileep Kumar, ifl univ.

A :  Thanks for your compliment. I wish you all the success in your endeavourment. To your query, this is my suggestion  : it’s a pure form of jealousy. Angry that Betsy doesn’t respect him,  Travis sets to kill the presidential candidate, who is Betsy’s father figure, whom she looks up to and respects, admires, loves etc etc…

(స్క్రీన్ ప్లేలకి సంబంధించి మీ సందేహాలు మెసెంజర్ కి పంపినా, వాట్సాప్ కి పంపినా వ్యక్తిగతంగా సమాధానాలివ్వడం కుదరదు. ఇతరులకి కూడా ఉపయోగపడేలా బ్లాగ్  లోనే  ప్రత్యక్షమవుతాయి)

-సికిందర్

                    

530 : రివ్యూ!

రచన – దర్శకత్వం : ఓంకార్

తారాగణం : నాగార్జున అక్కినేని, సమంతా అక్కినేని, సీరత్ కపూర్, అశ్విన్‌, వెన్నెల కిషోర్‌, ప్రవీణ్, షకలక శంకర్‌, రావు రమేష్‌,  నరేష్‌,
కథ : రంజిత్ శంకర్, మాటలు : అబ్బూరి రవి, సంగీతం : తమన్, ఛాయాగ్రహణం : ఆర్. దివాకరన్
బ్యానర్ : పివిపి సినిమా, మ్యాటినీ ఎంటర్ టైన్మెంట్
నిర్మాత : ప్రసాద్ వి. పొట్లూరి
విడుదల అక్టోబర్ 13, 2017
***

     అక్కినేని నాగార్జున చాలా రోజులకి వచ్చారు. తెలుగులో ఒక కొత్త రకం పాత్రకి ఇన్స్ పైర్ అయి ఈ  ‘హార్రర్ కామెడీ’ కి స్టార్ మూవీ హోదా కల్పిస్తూ సమంతాతో నటిస్తూ వచ్చారు. ‘రాజుగారి గది’ తీసిన దర్శకుడు ఓంకార్ ఈసారి కూడా హార్రర్ కామెడీ అభిప్రాయం కల్గిస్తూ,  ‘రాజుగారి గది -2’ అంటూ సీక్వెల్ కాని సీక్వెల్ తీశారు. హార్రర్ కామెడీల సీజన్ ఎంతకీ ముగియడం లేదు. ఈసారి స్టార్లే నటించడంతో కొత్త గ్లామర్ వచ్చి ప్రేక్షకులకి కూడా వెరైటీయే. ఇంత ఆకర్షణీయమైన ప్యాకేజిగా కన్పిస్తున్న ఇందులో వున్న విష యమేమిటి? ఎంతవరకు ఒక తేడా గల వినోదాన్నిచ్చారు? ఒకసారి చూద్దాం...

కథ 

      అశ్విన్, కిషోర్, ప్రవీణ్ ( అశ్విన్, వెన్నెల కిషోర్, ప్రవీణ్) అనే ముగ్గురు క్లాస్ మేట్స్ ఒక  రిసార్ట్ ప్రారంభిస్తారు. అక్కడ సుహానిసా (సీరత్ కపూర్) వచ్చి బస చేస్తుంది. కిషోర్, ప్రవీణ్ లు ఆమె వెంట పడుతూంటారు. ఆమె అమ్మాయి కాదనీ, ఆత్మ అనీ తెలుసుకుని భయపడతారు. ఇది అశ్విన్ నమ్మడు. ఒకరోజు అశ్విన్  కూడా నమ్మే అనుభవం ఎదురవుతుంది. దీంతో చర్చి ఫాదర్ (నరేష్) ని సంప్రదిస్తారు.  ఆయన వచ్చి ఆత్మని వెళ్ళ గొట్టడం తన వల్ల కాక రుద్ర (నాగార్జున) ని రికమెండ్ చేస్తాడు. రుద్ర ఒక మెంటలిస్టు. మనోనేత్రంతో చూసి కేసులు పరిష్కరిస్తూంటాడు. ఈయన వచ్చి సుహానిసా ఆత్మ కాదని,  ఆమెలోకి వేరే అమ్మాయి ఆత్మ ప్రవేశించిందని తెలుసుకుని, ఆ అమ్మాయెవరో  తెలుసుకోవడానికి ప్రయత్నిస్తాడు. అప్పుడు అమృత (సమంత) అనే అమ్మాయి గురించి తెలుస్తుంది. ఎవరీ అమృత? ఎందుకని ఈమె చనిపోయి ఆత్మ అయింది? ఏం అన్యాయం జరిగింది? ఇప్పుడేం కోరుకుంటోంది?... ఇవి తెలియజేస్తూ సాగేదే మిగతా కథ.

ఎలావుంది కథ? 

      ఇది కథ  కాదు, గాథ.  2016 లో మలయాళం లో విడుదలైన ‘ప్రేతం’ రీమేక్ ఇది. మలయాళంలో పెద్దగా ఆడలేదు. హార్రర్ కంటే ఎమోషనల్ డ్రామా ఎక్కువై,  అదీ నిలబడని సందేశాలతో ముగియడం వల్ల. తెలుగులో యథాతధంగా తీశారు. అభ్యంతరకర వీడియోలు తీసి అమ్మాయిల జీవితాలతో ఆడుకునే సంస్కృతిని  చూపించారు. కానీ కథా ప్రయోజనం కన్పించదు,  గాథ కాబట్టి.  ఇలాటి పరిస్థితుల్లో బాధితులు ఏం చేయాలో  ఆపరేటింగ్ పార్ట్ చూపించకుండా, గాథ కుండే లక్షణాలకి తగ్గట్టు ఒదార్పులతో సరిపెట్టారు. కలియుగం యాక్షన్లో వున్నప్పుడు ఓదార్పులతో పనిజరగదు, అది ఇంకింత సెల్ఫ్ పిటీని పెంచుతుంది. బర్నింగ్ ఇష్యూలకి గాథలు పనికిరావు. ఇందుకు ఉద్దేశించిన పాత్ర కూడా అయోమయంగా వుంది . ప్రేక్షకుల  నుంచి అయ్యో పాపమనే సానుభూతిని రాబట్టుకోవడమే గాథ చేసే పని. ఇది కూడా ఇదే చేసింది, సమస్యకి పరిష్కారం మాత్రం లభించదు. చెబుతున్నది కథ అని పొరబడుతూ గాథ చెప్పడం వల్ల ఈ పరిస్థితి. పైగా టైటిల్ కీ ఈ గాథకీ సంబంధం కూడా లేదు.

ఎవరెలా చేశారు

     నాగార్జున పోషించిన మెంటలిస్టు  రుద్ర పాత్ర 40 వ నిమిషంలో వస్తుంది. ఆయన గ్లామర్ ని కాపాడుకుంటూ స్టన్నింగ్ కాస్ట్యూమ్స్ తో అట్టహాసంగా  కన్పిస్తారు. పారా సైకాలజిస్టు పాత్ర పాతబడిందనేమో,   మెంటలిస్టు పాత్రని మలయాళం లోంచి అలాగే దించారు. మైండ్ రీడింగ్ చేసి వినోదపర్చే మెంటలిస్టులు నిజానికి మెజీషియన్ వృత్తిలో వుంటారు. వీళ్ళని హార్రర్ - క్రైం నవలల్లో, సినిమాల్లో దించేసి కేసుల్ని పరిష్కరించే  కాల్పనిక పాత్రలుగా మార్చేశారు విదేశాల్లో. దేశీయంగా మొదటిసారి మలయాళ ‘ప్రేతం’ లో దీన్ని ప్రవేశపెట్టారు. 

ఈ పాత్రలో నాగార్జున మరీ రజనీకాంత్ ‘చంద్ర ముఖి’ పారా సైకాలజిస్టు లాంటి పవర్ఫుల్ పాత్ర పోషించలేదు.  కారణం తను తలపడే ఆత్మ అంత పవర్ఫుల్ కాకపోవడం వల్ల. సాత్విక నటనతోనే ఆత్మకీ – అన్యాయం చేసిన పాత్రకీ సమన్వయకర్తగా నటించి ఇద్దరికీ నచ్చజెప్పి ముగించారు. అదే అన్యాయం చేసిన పాత్ర మగపాత్ర అయితే అంతు  చూసేవారేమో. నీ ప్రాణం తీసే శత్రువైనా సరే క్షమించడంలో  గొప్పదనముందనే పాత్ర,  నేర పరిశోధకుడి పాత్ర ఎలా అవుతుందనేది తర్వాతి సంగతి. 

     ఇక సమంత పోషించిన అమృత పాత్ర ఫ్లాష్ బ్యాక్ లో వచ్చేపాత్ర. ఈమె లా కోర్సు లో టాపర్. కేసుల దర్యాప్తులో  ఎవరు నేరం చేశారు, ఎందుకు చేశారు, ఏం ప్రయోజనం పొందారు - అనే మూడు ప్రశ్నలేసుకోవడం ముఖ్యమని నమ్ముతుంది. కానీ తననెవరో అభ్యంతరకర వీడియో తీశారని అవమానం ఫీలై ఆత్మహత్య చేసేసుకుంటుంది! 

     పాత్రని పరిచయం చేసిన దానికీ,  దాని ప్రవర్తనకీ పొంతన కనపడదు. ఇది కథలో పాత్రయితే పోరాడేది న్యాయవాద స్పిరిట్ తో. పోరాడి తనలాంటి బాధితులకి ఆదర్శంగా నిలబడేది.  ఇది గాథలో పాత్ర కావడం వల్ల పాసివ్ గా ట్రాజడీ పాలబడింది. ఇలా చేయాలన్నా కూడా ఆమెని లా కోర్సులో టాపర్ గా బిల్డప్ ఇవ్వకూడదు, సగటు అమాయక అమ్మాయిగా చిత్రిస్తే పాత్ర నడకకి అడ్డుపడదు. 

     చనిపోయాక తనకి ఎవరు అన్యాయం తలపెట్టారో తెలుసుకుని ప్రతీకారం తీర్చుకోవడానికి మనుషులమీదే ఆధారపడుతుంది. ఆత్మకి తెలియకపోవడ మేమిటి? అన్నీ తెలుస్తాయి. తెలుసుకోమని మనుషుల్ని పురమాయించడమేమిటి?  ఇలా ఆత్మ పాత్ర చిత్రణ  కూడా ప్రపంచంలో ఎక్కడా లేనివిధంగా ఆషామాషీగా పాసివ్ గా మారింది. ఆత్మలు పాసివ్ గా వుంటాయా? వుంటే హార్రర్ సినిమాలా వుంటుందా? ఇందుకే ఇది హార్రర్ సినిమాలా లేదు. 

     అమృత తండ్రి పాత్రలో టీచర్ గా రావురమేష్ మరో బలహీన  పాత్ర. బయట ఉపాధ్యాయుడిగా గొప్పపేరు. ఇంట్లో కూతురికి - నీ ప్రాణం తీసే శత్రువైనా సరే క్షమించడంలో  గొప్పదనముందనే సూక్తి నేర్పుతాడు. ఈ సూక్తిని ఆమె మర్చిపోయి ఆత్మగా ప్రతీకారం తీర్చుకోబోతుంది. మెంటలిస్టు గుర్తుచేస్తేనే తగ్గుతుంది. ఈమె తండ్రి ఎంత గొప్ప ఉపాధ్యాయుడైతేనేం, సమస్యల్ని  ఎదుర్కొనే ధైర్యం కూతురికి నేర్పలేకపోయాడు. కూతురి వీడియో వూరూవాడా అయి లోకం దెప్పిపొడుస్తోందని గుండాగి చనిపోతాడు. నా కూతురిని ఎవడ్రా అనేది - అని ఆ కూతురికి బాసటగా నిలబడాల్సింది పోయి!  ఎందుకిలా అంటే ఇది గాథలో పాత్ర కాబట్టి.  గాథల్లో బాధిత పాత్రలే తప్ప పోరాడే పాత్రలుండవు. 

          హీరోలు కాని హీరోలుగా సినిమాని ప్రారంభించే అశ్విన్‌, వెన్నెల కిషోర్‌, ప్రవీణ్ లు షకలక శంకర్ తో కలిసి ఫస్టాఫ్ అంతా ఆత్మలతో టెంప్లెట్ కామెడీలే చేసుకుంటూ ఎంటర్ టైన్ చేస్తారు. సీరత్ కపూర్ తో కొన్ని సేల్ఫీ సీన్లు నవ్విస్తాయి. సీరత్ కపూర్ పొట్టి నిక్కర్లు తప్ప ఇంకోటి వేసుకోనని శపథం చేసినట్టు  స్కిన్ షో చేసుకుంటూ తిరుగుతుంటుంది. 

     తమన్ పాటలు బిట్ సాంగ్స్ గానే వచ్చిపోతాయి. సినిమాలో హార్రర్ అనేది లేకపోయినా ఆయన హార్రర్ ఫీలైపోతూ బ్యాక్ గ్రౌండ్ మ్యూజిక్ బాగా ఇచ్చారు. దివాకరన్ కెమెరా పనితనం ఓకే. గ్రాఫిక్స్ కూడా బావున్నాయి. అబ్బూరి రవి మాటలు ఫస్టాఫ్ కామెడీ కి, సెకండాఫ్ విషాదానికీ సరిపోయేట్టే  వున్నాయి. పివిపి ప్రొడక్షన్ విలువలు స్థాయికి తగ్గట్టున్నాయి. 

చివరికేమిటి 

      ‘రాజుగారి గది’ తీసిన దర్శకుడు  ఓంకార్ మలయాళ రీమేక్ ని  విషయంతో సంబంధం లేకుండా ‘రాజుగారి గది -2’ టైటిల్ తో విడుదల చేశారు. పైన చెప్పుకున్నట్టు భావోద్వేగాల చింతనే తప్ప చివరికి ఏం  తేల్చామనే విషయం పట్టించుకోలేదు. ఇందుకే దీనికో స్క్రీన్ ప్లే లేకుండా పోయింది. గాథలకి స్ట్రక్చర్ వుండదు. అందుకనే ఫస్టాఫ్ లో గాథ మొదలవలేదు. కథయితే మొదలై వుండేదేమో. ఫస్టాఫ్ దెయ్యం కామెడీలతో గడిపేశారు. 40 వ నిమిషంలో నాగార్జున పాత్ర వచ్చినా దాని పరిచయ ఎపిసోడ్ ఒకటి సాగి, ఇంటర్వెల్ లో సమంతా ఆత్మకి  ఎదురుకావడంతో అర్ధోక్తిలో ఆగుతుంది. 

     సెకండాఫ్ ఇరవయ్యో నిమిషం లో అసలు గాథే మిటో తెలుస్తుంది సమంతా పాత్ర ఫ్లాష్ బ్యాక్ లో. ఇక గాథ మొదలవుతుంది. ఇదే కథ అయి ఇప్పుడు ప్రారంభమై వుంటే,  మిడిల్ మటాష్ స్క్రీన్ ప్లే అయ్యేది. గాథ కావడం వల్ల సంఘర్షణ లేదు. సంఘర్షణ లేకపోతే కథ అవదు. ఇక్కడ గాథతో ఇంకోటేం జరిగిందంటే, ఎండ్ సస్పెన్స్ బారిన పడింది. ఫ్లాష్ బ్యాక్ తర్వాత దాదాపు ముగింపు వరకూ వీడియో ఎవరు తీశారనే దర్యాప్తు తోనే సాగుతుంది. వీడియో తీసిన పాత్ర చిట్టచివర్లో తెలిసి ఆ పాత్ర కూడా డిఫెన్స్ లో పడడంతో సంఘర్షణకి తావే లేకుండా పోయింది. ఇక నాగార్జున కౌన్సెలింగ్ మొదలవుతుంది.

     మహేష్ భట్ ‘రాజ్’  కోవలో కథ చేసి ఓంకార్ దీన్ని పవర్ఫుల్ గా నిలబెట్టాల్సింది. అప్పుడు థ్రిల్, హార్రర్, సస్పెన్స్, అన్ని ఎమోషన్సూ కలగలిసి సమస్యతో సంఘర్షణతో, ఆర్గ్యుమెంట్ తో ఒక సమగ్ర ఆవిష్కరణయేది. 

     చివరిగా, సమంతా పాత్ర అదేదో బరితెగించి తనే వీడియో దిగి వైరల్ చేసినట్టు- ఆమె చుట్టూ పాత్రలు అలా తిడతాయేమిటి? తండ్రి శవం దగ్గర కూడా,  చెడ బుట్టిందని అలా శాపాలు పెడతారేమిటి? చూపించే భావోద్వేగాలకైనా లాజిక్ అవసరం లేదా? సమంతాది నెగెటివ్ పాత్రా?

-సికిందర్ 
https://www.cinemabazaar.in

529- డార్క్ మూవీస్ స్క్రీన్ ప్లే సంగతులు

 

      పీడకల డార్క్ మూవీస్ ఎలిమెంట్స్ లో ఒకటని చెప్పుకున్నాం. పీడకల లేనిదే డార్క్ మూవీ పూర్తి కాదు. డార్క్ మూవీస్ కథలు, పాత్రలు అంటేనే మనసు లోపలి చీకటి కోణాల  వెలికితీత కాబట్టి, పీడకలల్ని భాగం చేశారు. డార్క్ మూవీస్ అంత నేరుగా ప్రేక్షకుల అంతరంగాల్ని కెలికే సినిమాలుండవు. డార్క్ మూవీస్ జానర్ ప్రధాన లక్ష్యమే నైతికతని ప్రశ్నించడం, అనైతికాన్ని ఖండించడం. ఈపని మూలాల్లోకి వెళ్లి - అంటే -  అంతరంగాల్లోకి వెళ్లి అక్కడ శస్త్రచికిత్స  చేస్తేగానీ పూర్తిగాదు. కనుక ఈ చికిత్సలో పీడకలలు భాగమయ్యాయి. అంతేగానీ ఏదో థ్రిల్ కోసం వుండాలన్నట్టు కాదు.  పీడకలలు రెండు రకాలు – ఏదో  కీడు తలపెడితే దాని గురించి వెంటాడే పీడకలలు, ఓ కీడుని ముందస్తుగా  హెచ్చరిస్తూ వచ్చే  పీడకలలు.  ఏ రకం పీడకలైనా  ఉద్దేశం ఒకటే – నిజం తెలుసుకుని సంస్కరించుకోమని చెప్పడమే. పీడకలల్లో భయపెట్టే అంశాలు నిజానికి నిజాలే.  అవి ప్రశ్నిస్తున్న, హెచ్చరిస్తున్న నిజాలని గుర్తించకుండా పెడ కేకలు పెడుతూ లేచిపోయి, కాసిని నీళ్ళు తాగేసి  కమ్మగా బజ్జుంటాం. 

            ఈ పీడకలల్ని అంతరంగం, అంటే సబ్ కాన్షస్ మైండ్ ఉత్పత్తి చేస్తుంది. దీనికి హెచ్చుతగ్గుల్ని సమం చేయడమే పని. లేకపోతే  సృష్టి బ్యాలెన్సు తప్పుతుంది. సృష్టిలో  మనతో సహా సమస్తం పదార్ధమే కాబట్టి,  పదార్ధమంటే శక్తి తరంగాల గుచ్ఛమే కాబట్టి, ఈ శక్తి తరంగాలు నిత్యం బ్యాలెన్స్ చేసుకుంటూ సృష్టిని కాపాడుతూంటాయి. ఈ అవగాహన నుంచే క్వాంటమ్  ఫిజిక్స్ పుట్టింది, స్పిరిచ్యు వాలిటీకి దగ్గరయ్యింది.  ఇలా హెచ్చు తగ్గుల్ని సమం చేయడానికే సృష్టి స్ట్రగుల్ చేస్తూంటుంది. ఒక తప్పువల్ల శక్తి తరంగాల తూకం ఆ వైపు మొగ్గితే, ఆ శక్తి తరంగాల్ని ఒప్పు వైపుకి మార్చి రెండిటిని బ్యాలెన్స్ చేస్తూంటేనే   ఈ సృష్టి నడిచేది. దీన్నే లా ఆఫ్ కాంపెన్సేషన్ (నష్టపరిహారం) అన్నాడు ఎమర్సన్. ఒకడు అవినీతి చేసి ప్రజాధనం కూడబెట్టి బ్యాలెన్సు చెడగొడితే, కేసుల రూపంలో మళ్ళీ ఆ ప్రజాధనాన్ని ప్రజలకి చేర్చి సమం చేయడం శక్తితరంగాల బ్యాలెన్సు కోసం సృష్టి చేసుకునే పని అన్నమాట. చేసింది తప్పయితే ఆ పాపపరిహారం చెల్లించుకోమనే లోక కల్యాణార్ధం పీడకలల రూపంలో చెప్తుంది అంతరంగం...

            డార్క్ మూవీస్ లో సందర్భాన్ని  బట్టి రెండిట్లో ఏదైనా ఓ రకం పీడకల వుంటుంది. ప్రస్తుత ‘బ్లడ్ సింపుల్’ లో ఏముందో చూద్దాం. నిన్నటి 32 వ సీనులో ఎబ్బీ బార్ కెళ్ళి మార్టీ చనిపోయాడన్న కొత్త నిజం తెలుసుకుంది. ఈ నిజం పీడకల రూపంలో ఎలా వచ్చిందో, ఏం చెప్తోందో చూద్దాం...

33. ఎబ్బీకి మార్టీ తో పీడకల రావడం 

           ఫేడిన్ :

           అదే లాంగ్ షాట్ - ఎబ్బీ బెడ్ మీద వుంటుంది. ఆమె కళ్ళు తెరచి క్షణం కదలకుండా అలా వుంటుంది. దగ్గుతుంది. బెడ్ మీంచి లేచి  చీకటి ఫ్లాట్ లో నడుచుకుంటూ బాత్రూం కెళ్తుంది. డోర్ వేసుకుంటుంది.

            సింక్ దగ్గర అద్దంలో తనని తాను చూసుకుంటుంది. బయటి  అపార్ట్ మెంట్ గోడమీద కొడుతున్నట్టు చప్పుడవుతూంటే చెవులు రిక్కిస్తుంది.  మొహం మీద నీళ్ళు జల్లుకుంటుంది. 

            ఆఫ్ స్క్రీన్ లో ఎక్కడ్నించో అద్దం పగిలిన చప్పుడవుతుంది. క్షణకాలం ఆ శబ్దం ప్రతిధ్వనిస్తుంది. నిశ్శబ్దం. బాత్రూం డోర్ వైపు చూస్తుంది. ఫ్లాట్ డోర్ లాక్ మీద గీస్తున్న శబ్దం. ఆకస్మాత్తుగా  లాక్ వూడిపోయి  డోర్ తెర్చుకున్న చప్పుడు.

            క్లోజ్ షాట్ లో ఎబ్బీ – కలవరపడుతుంది. టాప్ కట్టేసి కొయ్యబారిపోయి నించుంటుంది. మొహం మీది  నీటి  బిందువులు  జారుతూంటాయి. అడుగులు విన్పిస్తాయి. గాజు పెంకులు చిట్లుతున్న చప్పుడు. ‘రే?’ – అని అంటుంది.  

            సమాధానం వుండదు. అవతల గదిలో బెడ్ స్ప్రింగుల చప్పుడు. ఇక బాత్రూం డోర్ తీసుకుని బయటి కొచ్చేస్తుంది.  

            బాత్రూం లైటు తెర్చి వున్న తలుపులోంచి అవతల గదిలో ఫ్లోర్ మీద పడుతూంటుంది. ఆ వెలుతురులో  పగిలిన అద్దం పెంకులు కన్పిస్తూంటాయి.  అక్కడున్న బెడ్ మీద చీకట్లో ఎవరో కూర్చుని వుంటాడు. అతను తల పైకెత్తి చూస్తాడు.    

            అతను మార్టీ.
            బిగుసుకుపోతుంది ఎబ్బీ.

            ‘డోర్ లాక్ చేయాల్సింది లవర్ బాయ్...’ అంటాడు.  

            నెర్వస్ గా చూస్తుందతడి కేసి. ముఖం మీది  నీటి బిందువులు ఇంకా జారుతూనే వుంటాయి – ‘ఐ లవ్ యూ’ అంటాడు  మార్టీ. 

            పెదాల చివర్నుంచి స్మైలిస్తాడు – ‘స్టుపిడిటీలా వుంది కదూ ఐ లవ్ యూ అంటూంటే?’ అంటాడు. ఒకడుగు వెనక్కేసి నించుంటుంది – తనూ ‘ఐ లవ్ యూ’ అనే స్తుంది. ఆ మాట భయంవల్ల వచ్చిందంటాడు తల అడ్డంగా వూపుతూ.

            లేచి నిలబడతాడు. కాలికింద గాజు చిట్లుతుంది. కోటు మధ్య బటన్ తీసి, చెయ్యి పెడతాడు – ‘నీ వెపనేదో మర్చిపోయొచ్చినట్టున్నావ్’ అంటూ ఏదో తీసి ఆమె మీదికి విసురుతాడు. 

 .          క్లోజ్ షాట్ లో ఎబ్బీ చేతులు. ఆ వస్తువుని పట్టుకుంటుంది.  అది కాంపాక్ట్.

            ఎబ్బీ క్లోజ్ షాట్.
            చేతుల్లోకి చూస్తున్నదల్లా తలెత్తి అతణ్ణి చూస్తుంది.
            ‘వాడు నిన్ను కూడా చంపేస్తాడు’ అంటాడు మార్టీ. 

            నోటికి చేయి అడ్డం పెట్టుకుని వంగిపోయి, రక్తవాంతి చేసుకుంటాడు.
               అదిరిపడి లేచి కూర్చుంటుంది ఎబ్బీ.
            మొహం చెమట్లు పట్టేస్తుంది. చుట్టూ చూస్తుంది.

            ఎబ్బీ పాయింటాఫ్ వ్యూ – కిటికీ లోంచి వెన్నెల పడుతూంటుంది ఫ్లోర్ మీద. కిటికీ లోంచి రోడ్డవతలి బిల్డింగ్ ముందుభాగం కన్పిస్తూంటుంది.  చీకటిగా, నిశ్శబ్దంగా వుంటుంది.

***

 

     ఇదీ పీడకల        

      వెనక సీన్లో బార్ లో ఆమె రక్తం మరకల్ని చూసి వెనక్కి అలా పడిపోతూంటే ఫేడవుట్  అయి ప్రస్తుత సీన్లో ఫేడిన్ అయినప్పుడు - బెడ్ మీద వుంటుంది ఎబ్బీ నిద్రలో.  ఈ ఫేడవుట్ – ఫేడిన్ లతో ఒక సీన్లోంచి ఇంకో సీన్లోకి స్మూత్ ట్రాన్సి షన్. ఇక్కడొక సందేహం వస్తుంది. బార్లో మార్టీ రక్తం మరకల్ని చూస్తే, వెంటనే వెళ్లి రే ని ప్రశ్నించకుండా ఇంటికొచ్చి ఎలా నిద్ర పోయిందని. వెనుక 29 వ సీన్లో- మార్టీని ఆమె షూట్ చేసిందన్న అనుమానంతో వున్న రే,  ఆమెని ఈసడించుకుని వెళ్ళిపోతాడు. ఎబ్బీ కేమీ అర్ధంగాక ఆ తర్వాత 31 వ సీన్లో బార్ కెళ్ళి చూస్తే మార్టీ చనిపోయాడని తెలుస్తుంది.  ఈ పని చేసింది తను కాదని ఎలా నిరూపిస్తుంది? అందుకని వచ్చి పడుకుంది. పడుకున్నప్పుడు వచ్చిన ఈ పీడకలలో మార్టీ మీద ఎటాక్ మిస్టరీ వీడిపోయింది.

            ఇదెలాగో చూద్దాం. ఈ పీడకల రానున్న ప్రమాదాన్ని హెచ్చరిస్తోంది. కలలో మార్టీ కన్పించి హెచ్చరించాడు. మార్టీకి – అతడి ఆత్మకి – ఇప్పటికీ భార్య ఎబ్బీ  మీద పగలేదు. అతడిది లవ్ హేట్ రిలేషన్ షిప్ లా వుంది. ఇప్పుడూ ఆమె క్షేమమే కోరుకున్నాడు. అతడి పగ అంతా రే మీదనే. 

            ఈ పీడకల సీనుని ఎలా రూపొందించారో చూస్తే, పూర్తిగా సబ్ కాన్షస్ మైండ్ రికార్డింగ్ లా వుంటుంది. ఇలా వుండాలి కూడా. ఎన్నో నిజాలతో చాలా సంక్లిష్టంగా వుంటుంది. కలలో ఆమె లేచింది. బాత్రూం కెళ్ళింది. చిత్రీకరణలో వివరంగా వున్న ఈ బాత్రూం సీను చూస్తే, ఆమె సింక్ దగ్గర అద్దం  ముందు నిలబడి తనని తానూ చూసుకుంటుంది. ఫ్రేములో సింక్ కన్పించదు. ఫ్రేము లోంచి ఆమె తల కిందికి వెళ్తుంది. తిరిగి పైకెత్తితే మొహం మీద నీళ్ళుంటాయి.  ఇంకో రెండు సార్లు ఫ్రేము లోంచి ఆమె తల కిందికీ పైకీ అవుతుంది. ఇలా వంగడం, మొహం మీద నీళ్ళు జల్లుకుని లేవడం లోని అంతరార్ధమేమిటో వెంటనే మనకి బోధపడదు.

            ఇక మన మైండ్ గమనించినా గమనించకున్నా, సబ్ కాన్ష మైండ్ సీసీ కెమెరాలా  ప్రతీదీ గమనించి రికార్డు చేసుకుంటుంది. దాని దృష్టి నుంచి ఏదీ తప్పిపోదు. అది సర్వాంతర్యామి. సృష్టి అంతటా వ్యాపించి వుంటుంది. ఎబ్బీ బార్ కెళ్ళినప్పుడు బయట ఆఫ్ స్క్రీన్ లో ఏదో  చప్పుడవడాన్ని  ఆమె గమనించలేదు. కానీ సబ్ కాన్షస్ మైండ్ పట్టించుకుని రికార్డు చేసింది. ఆ చప్పుడు బార్  లోపలున్న విస్సర్ యాక్టివిటీ అని మనకి తర్వాత తెలుస్తుంది. తర్వాత ఆమె లోపలి కెళ్ళి నప్పుడు, బ్యాక్ ఆఫీసు డోర్ అద్దం పగిలిపోయి వుండడం, ఆ అద్దం పెంకులు నేలంతా పడుండడం చూస్తుంది. అలాగే వెనుక డోర్ లాక్ పగలగొట్టినట్టుగా కూడా గ్రహిస్తుంది. కానీ ఈ పని విస్సర్ చేశాడనీ, అతను  బాత్రూం లోనే దాక్కుని వున్నాడనీ ఆమెకి తెలీదు. 

            తర్వాత సేఫ్ దగ్గర సుత్తిని చూశాక, సేఫ్ డయల్ డ్యామేజీ అయి వుండడం చూశాక – ఇది రే పనే  అన్నట్టుగా ఆమెకి అర్ధమయ్యింది- మళ్ళీ డబ్బుకోసం రే వచ్చి ఈ ప్రయత్నం చేశాడని. మార్టీ చెయిర్ కింద రక్తపు మరకలు  చూశాక  సీక్వెన్స్ అర్ధమయ్యింది- డబ్బు కోసం మళ్ళీ వచ్చిన రే, మార్టీ తో గొడవ పడి చంపి, డబ్బున్న సేఫ్ తెరవడానికి విఫల యత్నం చేశాడని. ఇక్కడ ఆమె గ్రహించని విషయాలు రెండు- జస్ట్ ఆమె బార్లోకి వస్తున్నప్పుడు వెలువడుతున్న చప్పుడే  విస్సర్ సేఫ్ ని పగులగొడుతున్న చప్పుడని,  విస్సర్ బాత్రూం లో దాక్కున్నాడనీ.  బార్ బయట ఆమె చప్పుళ్ళు పట్టించుకుని వుంటే, రహస్యంగా బార్ లోకెళ్ళి,  విస్సర్ గారి వ్యవహారం అప్పుడే  చూసేసేది!

            ఇప్పుడు కలలో సీను ప్రారంభం తిరిగి ఆమెకి బార్ అనుభవాన్నే ఇస్తోంది సబ్ కాన్ష మైండ్. నిజాలు గుర్తించమని. బయట గోడ మీద బాదుతున్న చప్పుడు, బార్ బయట తను  పట్టించుకోని చప్పుడే. ఇప్పుడు చెవులు రిక్కించి వింటోంది. డోర్ లాక్ చప్పుడవడం, అద్దం పగిలి ముక్కలవడం – ఇదంతా బార్ సీన్నే తలపిస్తోంది. బార్ సీన్లో అదంతా రే నిర్వాకమని అర్ధం జేసుకున్న నేపధ్యంలో ఇప్పుడు, బెడ్ స్ప్రింగుల చప్పుడు కూడా విన్పించడంతో,   అతనే వచ్చాడనుకుని  ‘రే?’ అని అనేసింది పైకే. 

            కానీ ఆమె భయపడలేదు కలలో కూడా. మార్టీ ని రే చంపాడని ఆమెకి తోచినా, అతను తనకీ ప్రమాదం తలపెడతాడన్న భయం ఆమెకి లేదు. తనకోసమే ఇదంతా చేస్తున్నాడన్న భరోసా వుంది.

            అలా నిర్భయంగా ఆమె బాత్రూం డోర్ తీసి చూసినప్పుడు – ఇక్కడ   రివర్స్ లో వుంటుంది దృశ్యం. వెనుక సీన్లో  బార్ కెళ్ళి ఆమె లైటేసినప్పుడు ఆ వెలుగు బాత్రూం లో దాగిన విస్సర్ మీద పడిందని గమనించాం. ఇప్పుడు  బాత్రూం లోంచి లైటు వెలుగు అవతల గదిలో పడుతోంది. అంటే లైటు కాంతి అనేది విస్సర్ ఉనికికి సింబాలిజం అనుకుంటే,  ఈ సింబాలిజం ఇప్పుడు బాత్రూం లోంచి బయటికొచ్చేసి ఆమెకి చూపిస్తోంది - ఏమిటి?  ఇక్కడ ముందు గదిలో పడున్న అద్దం ముక్కల్ని.  కింద పడున్న అద్దం ముక్కల మేరకే  వెలుగు ఇక్కడ పడుతోంది. ఈ అద్దం  ముక్కలు కూడా విస్సర్ కి   సింబాలిజమే. బార్ లో అతనే వెనుక డోర్ అద్దం పగులగొట్టి లోపలికొచ్చాడు. ఇందుకే ఇప్పుడు బాత్రూం లోంచి లైటు వెలుగు,  అద్దం  ముక్కలూ ఇలా కనెక్ట్ అయ్యాయి. 

            దీనర్ధం తర్వాత మేల్కొన్నాక ఆమె ఆలోచించినా తట్టకపోవచ్చు. ఎందుకంటే ఆమె జీవితంలో విస్సర్ ఉనికేలేదు. అతణ్ణి వూహించలేదు.

            ఇక అద్దం పెంకుల కావల బెడ్ మీద కూర్చున్న మార్టీ కాళ్ళు రివీలవుతాయి. ఆ కాళ్ళకి హంటర్ బూట్లు అలాగే వుంటాయి, ఇంకా వేటాడే మూడ్ లోనే వున్నట్టు సూచిస్తూ. ఎబ్బీ సబ్ కాన్షస్ ఉత్పత్తి చేసి ఆమెకి చూపిస్తున్న స్వప్నావస్థలో  విస్సర్ బార్ లోకి జొరబడిన తీరునే మార్టీ మీద పెట్టి ఇక్కడ ఫ్లాట్ లో చూపిస్తోంది. విస్సర్ బార్ లో ఎలా జొరబడ్డాడో, ఇక్కడ మార్టీ అలాగే జొరబడ్డాడు.

             ‘డోర్ లాక్ చేయాల్సింది లవర్ బాయ్’ అంటాడు మార్టీ వ్యంగంగా-  ఆమెని రే తన రక్షణలో వుంచుకోవడంలేదన్న భావంతో. అంటే రే ని ఫూలిష్ గా నమ్ముతున్నావని ఉద్దేశం. అప్పుడు – ‘ఐ లవ్ యూ’  అంటాడు. అతనెప్పుడూ ఆమెని ప్రేమిస్తూనే వున్నాడు. శిక్షించాలనే ఆలోచన అతడికి వచ్చే ప్రసక్తి లేదు. అతడితో ఆమె సేఫ్టీ ఫీలవ్వొచ్చు.  ఆమెకూడా ఐలవ్ యూ అనేసేసరికి,  అది భయంవల్ల అంటాడు. 

            ఇప్పుడు లేచినిలబడి కోటు మధ్య బటన్ తీస్తాడు. చేయి కోటు లోపల పెట్టి కాంపాక్ట్  తీసి ఆమె మీదికి విసురుతాడు. విసురుతూ ‘నీ వెపనేదో మర్చిపోయొచ్చి
నట్టున్నావ్’ అంటాడు. 

            ఏమిటి దీనర్ధం? సబ్ కాన్షస్ పూర్తిగా సింబాలిజాలతోనే పని కానిచ్చేస్తుంది. కలల్ని చూపించేస్తుంది. ఈ కాంపాక్ట్ సింబాలిజం ఏమిటి? దాన్నెందుకు తీసి ఆమె మీదికి విసిరాడు? కోటు లోపల్నుంచి దాన్ని తీయడానికి మధ్య బటనే ఎందుకు తీశాడు? దాన్ని ఆమె వెపన్ అని ఎందుకన్నాడు?

            ఫస్టాఫ్ బిగినింగ్ లో ఎస్టాబ్లిష్ చేసిన ఆమె స్వభావం లోకెళ్తే,  ఆమె భర్తతో విసిగి బయట షికార్లు తిరుగుతూ సాంత్వన పొందుతోంది. కొత్త కొత్త హేండ్ బ్యాగులు కొనే అబ్సెషన్ ఇందులోంచే వచ్చింది. ఆ తిరుగుళ్ళతో ఎక్కడో తగిలిన  రేని ఆకర్షించి అతడితో ఎఫైర్ పెట్టుకుంది. ఆమె ఎఫైర్ పెట్టుకోవచ్చు, కానీ భర్త వుండగా కాదు. భర్తతో తెగతెంపులు చేసుకుని ఎవరితోనైనా ఎఫైర్ పెట్టుకోవచ్చు. లేకపోతే  చిక్కులొస్తాయి. శాంతి భద్రతల సమస్య తలెత్తుతుంది. సృష్టి సమతూకం దెబ్బ తింటుంది. అల్లకల్లోలం మొదలవుతుంది. ఆమె భర్తకి విడాకులివ్వలేదు, రేతో తిరుగుతోంది. 

            మార్టీని ఎలాగైతే ఆకర్షించి పెళ్లి చేసుకుని వుంటుందో,  అలాగే రేని కూడా ఆకర్షించి ఎఫైర్ పెట్టుకుంది. ఆకర్షణ ఆమె అస్త్రం. ఆ అస్త్రానికి ప్రతిరూపం ఈ కాంపాక్ట్. కాంపాక్ట్ అంటే మేకప్ అద్దుకునే పౌడరు.  దీన్నే  ‘నీ వెపనేదో మర్చిపోయొచ్చినట్టున్నావ్’ అని తీసి ఆమె మీదికి విసిరాడు. ఇప్పుడు దీని అవసరం ఆమెకుందన్న ఉద్దేశంతో. రే నిన్ను కూడా చంపేస్తాడూ, ఇక నువ్వు ఇంకొకణ్ణి పట్టే ఆకర్షణ మొదలెట్టూ అనే అర్ధంలో!

            పాత్రల స్థితిగతుల్లోకి ఎంత లోతుగా వెళ్లి ఆలోచిస్తే ఇలాటి  రక్తమాంసాలున్న చిత్రణలొస్తాయి! బ్యూటిఫుల్ క్రియేషన్.
            ఇక కోటు మధ్య  బటన్ తీయడ మేమిటి?  పై బటన్ కి – కింది బటన్ కీ  మధ్య బటనే తీసి కాంపాక్ట్ తీయడమేమిటి? అంటే, మొదటి బటన్ అనే నీకూ, రెండో బటన్ అనే  నాకూ మధ్య వుండేడ్చిన  ఈ కాంపాక్ట్ అనే ఆకర్షణ  తీసుకో - తీసుకుని ఫో- అనడమన్న మాట.

            ఇది సీను ముగింపు. సీను ముగింపుకీ ప్రారంభానికీ ఎలా లంకె వేశారో చూద్దామా?  బాత్రూం లో ఆమె మొహం మీద నీళ్ళు జల్లుకునే అంతు చిక్కని చర్యకి ఈ ముగింపులో సమాధాన ముంది. మూడు సార్లు వంగి వంగి మొహం మీద నీళ్ళు కొట్టుకుంది. మొహం కడుక్కోవడమంటే ముస్తాబవడమే కదా?  ఒకసారి మార్టీ కోసం అయింది, రెండోసారి రే కోసం అయింది, మూడోసారికీ రెడీ అయిపోతోంది... ఎవరి కోసం?  ఇది భావి జీవితం...ఈ చర్యకి సీను ముగింపులో కాంపాక్ట్ ఆమె మీదికి విసిరి ముక్తాయింపు నిచ్చాడు మార్టీ.  రే నిన్ను కూడా చంపేస్తాడూ, ఇదిగో మేకప్ చేసుకో,  ఇంకొకణ్ణి పట్టుకో - అనే అర్ధంలో. 

            ఆమె సింక్ దగ్గర మామూలుగా నిలబడే మొహం కడుక్కోవచ్చు. ఫ్రేములోంచి వంగిపోయి వంగిపోయి నీళ్ళు జల్లుకోవాల్సిన అవసరం లేదు. కానీ ఆమె మానసిక స్థితి అది. మగాళ్ళకి సాగిలపడే తత్త్వం.  బిగినింగ్ విభాగంలో రే తో  పొరపొచ్చా లొచ్చి నప్పుడు,   అతడికి లొంగిపోతూ చూసిన చూపు – టిల్ట్ డౌన్ యాంగిల్లో యజమాని కేసి బానిస చూసే చూపుతో -  ఆమె ఎంత బలహీనురాలో ఎస్టాబ్లిష్ అయింది. అదే ఇప్పుడు సింక్ దగ్గర బయటపడుతోంది. యథా మానసిక స్థితి, తథా బాడీ లాంగ్వేజీ.

            వాడు నిన్నుకూడా చంపేస్తాడని మార్టీ హెచ్చరించడమంటే, తనని చంపాడనేగా  అర్ధం. ఇలా పీడకల మొత్తం ఆమెకి స్పష్టం చేసేసింది – ఆ మెకిక రే వుండబోడన్న నిజం సహా. విస్సర్ గురించి మాత్రం ఆమె అర్ధం జేసుకోలేని హింట్స్ ఇచ్చింది. మార్టీ భళ్ళున రక్త వాంతి చేసుకోవడంతో ఆమెకి మెలకువ వచ్చేస్తుంది. 

            గదిలో చుట్టూ చూస్తే మామూలుగా వుంటుంది. కిటికీ లోంచి వెన్నెల పడుతూంటుంది. కిటికీ అవతల భవనం చీకట్లో నిశ్శబ్దంగా వుంటుంది. ఈభవనం చూపించి ముగిస్తారు సీనుని. చీకటి భవనాలు, సముద్రాలు, లోయలూ వంటి వాటిని సబ్ కాన్షస్ మైండ్ కి ప్రతీకలుగా చూపిస్తారు హాలీవుడ్ సినిమాల్లో.

(సశేషం)
-సికిందర్