రివ్యూలు, సాంకేతికాలు, స్క్రీన్ ప్లే సంగతులు...

టికెట్లు దొరకడం యోగం, సినిమాలు చూడడం భోగం, రివ్యూలు రాయడం రోగం!

18, మే 2023, గురువారం

1329 : రివ్యూ!


 

రచన - దర్శకత్వం : నందినీ రెడ్డి
తారాగణం: సంతోష్ శోభన్, మాళవికా నాయర్, షావుకారు జానకి, రాజేంద్ర ప్రసాద్, రావు రమేష్, నరేష్, వెన్నెల కిషోర్ తదితరులు
స్క్రీన్ ప్లే : షేక్ దావూద్, మాటలు : లక్ష్మీ భూపాల, సంగీతం: మిక్కీ జె మేయర్, ఛాయాగ్రహణం : సన్నీ కూరపాటి, రిచర్డ్ ప్రసాద్
బ్యానర్స్ : స్వప్న సినిమా, మిత్ర విందా మూవీస్
నిర్మాత : ప్రియాంకా దత్
విడుదల : మే 18, 2023
***

        యువ హీరో సంతోష్ శోభన్ 2011 లో ఎంట్రీ ఇచ్చినప్పట్నుంచీ నటించిన 9 సినిమాలూ సక్సెస్ కి దూరంగా వుండిపోయి స్ట్రగుల్ చేస్తున్న సందర్భంలో, 10 వ అవకాశంగా అన్నీ మంచి శకునములే విడుదలైంది. ఒక్క గత సంవత్సరమే నటించిన లైక్ షేర్ అండ్ సబ్ స్క్రైబ్’, కళ్యాణం కమనీయం’, శ్రీదేవీ శోభన్ బాబు మూడూ అట్టర్ ఫ్లాపయ్యాక, ఇప్పుడు పేరున్న దర్శకురాలు నందినీ రెడ్డి దర్శకత్వంలో నటించే అవకాశాన్ని దక్కించుకున్నాడు. 2019లో కొరియన్ రీమేక్ ఓహ్ బేబీ హిట్ తర్వాత నాల్గే ళ్ళకి నందినీ రెడ్డి  కొత్త సినిమా వెండితెర నలంకరించింది. మహానటి, సీతా రామం వంటి హిట్స్ అందించిన స్వప్న సినిమా సంస్థ నుంచి తాజాగా వస్తున్న కుటుంబ ప్రేక్షకుల సినిమా అన్పి స్తున్న  అన్నీ మంచి శకునములే ఎలా వుంది? మళ్ళీ కుటుంబ ప్రేక్షకులకి అదే పాత కాలక్షేపమా, లేక కొత్త ఉత్సాహమేమైనా వుందా పరిశీలిద్దాం...

కథ  

ప్రసాద్ (రాజేంద్ర ప్రసాద్), దివాకర్ (రావు రమేష్), సుధాకర్ (నరేష్) కుటుంబాల మధ్య వాళ్ళ ముత్తాతలు సంపాదించిన కాఫీ ఎస్టేట్ గురించి తగాదాలుంటాయి. ఈ తగాదాలుండగా, సుధాకర్ కొడుకుగా రిషి (సంతోష్ శోభన్), ప్రసాద్ కూతురుగా ఆర్య (మాళవికా నాయర్) పుడతారు. ఒకే సమయంలో పుట్టిన వీళ్ళిద్దరూ హాస్పిటల్లో చేతులు మారిపోతారు. దీంతో ప్రసాద్ కొడుకుగా రిషి, సుధాకర్ కూతురుగా ఆర్య పెరిగి ప్రేమలో పడతారు. ఆర్య కాఫీని విదేశాలకి ఎగుమతి చేయాలనే బిజినెస్ మైండ్ తో వుంటుంది.రిషి ఈ క్షణం ఎంజాయ్ చేయాలన్న లేజీ మైండ్ తో వుంటాడు. మరి భావాలు కలవని వీళ్ళిద్దరి ప్రేమ ఏమైంది? తాము పుట్టుకతో చేతులు మారిపోయామని ఎప్పుడు తెలుసుకున్నారు? వీళ్ళు తారుమారైన సంగతి కుటుంబాలకెప్పుడు తెలిసింది? కాఫీ ఎస్టేట్ తగాదా ఎలా తీరింది? ఇదీ మిగతా కథ.

ఎలా వుంది కథ

ఒక ప్రేక్షకుడు దీన్ని 1952 నాటి కథగా ట్వీట్ చేశాడు. నిజమే, యూట్యూబ్ లో ప్రేక్షకులు బోలెడు పాత కుటుంబ సినిమాల్ని తనివిదీరా ఎంజాయ్ చేస్తూండగా, అదే మళ్ళీ నందినీ రెడ్డి తీయడమెందుకు? ఈ కాలపు కొత్త కుటుంబ కథ చెప్పొచ్చుగా? ఒక హాస్పిటల్, ఇక్కడ ఇద్దరు పిల్లలు పుట్టడం, ఇద్దరు నర్సులు పొరబడి ఆ పిల్లల్ని తారుమారు చేయడం- వంటి కథలతో ఎన్ని తెలుగు, హిందీ, తమిళ సినిమాలు రాలేదు. బ్రిటన్ లో డినైజ్ రాబిన్స్ కూడా 50 ఏళ్ళ  క్రితం ఈ ఫార్ములాతోనే నవలలు రాసింది.
       
ఇక రెండు కుటుంబాల మధ్య తగాదాలనే ఇంకో పాత ఫార్ములా కలిపి చేసేస్తే ఫీల్ గుడ్ ఫ్యామిలీ సినిమా అవుతుందని దర్శకురాలు భావించింది. కానీ తెరమీద వేరేగా వచ్చింది. అక్కడక్కడా కొన్ని నవ్వించే సీన్లు మాత్రం వర్కౌట్ అయ్యాయి తప్పితే
, మొత్తం కథగా దీన్ని కొత్తగా చెప్పలేని అవే పాత సన్నివేశాల్ని చూపించే ట్రాప్ లో పడిపోవడంతో, రెండు గంటలా 34 నిమిషాల సుదీర్ఘ సహన పరీక్ష అయిందీ సినిమా. దర్శకురాలు ప్రేక్షకులతో కలిసి చూస్తే వాళ్ళు పడే బాధ తెలుస్తుంది. బోరుకైనా పరిమితి వుంటుంది.
       
తెలుగులో ఇక కుటుంబ సినిమాలు తీయకపోవడం ఉత్తమం. పాత కథలే తీసినా
, కనీసం యూట్యూబ్ పాత సినిమాల్లోని భావోద్వేగాలు, కుటుంబ బంధాలు, నాటకీయతా కాపీ చేసైనా తీయలేనప్పుడు తీయడం వృధా!

నటనలు- సాంకేతికాలు

సంతోష్ శోభన్ టాలెంట్ వున్న నటుడు. ప్రతీసారీ టాలెంట్ ని నిరూపించుకుంటూనే వున్నాడు కానీ, సినిమాలే సహకరించడం లేదు. అతడి టాలెంట్ కి కలిసొచ్చే అంశం ఈజ్. ఎలాటి పాత్రనైనా ఈజ్ తో సహజంగా నటించేస్తాడు. ఇది మూడో సినిమా తనూ నేను తోనే మెయింటెయిన్ చేస్తూ వస్తున్నాడు. అయితే ఈ సారికూడా పాత్ర కుదర్లేదు. కారణం కాన్ఫ్లిక్ట్ లేకపోవడం. ముగింపులో మాత్రం భావోద్వేగాలతో కట్టి పడెసే నటన కనబర్చాడు. ఇక కుటుంబ దృశ్యాల్లో చాలా సార్లు సీనియర్ నటుల డామినేషన్ తో డ్యామేజీ అయ్యాడు. దీన్ని బ్యాలెన్స్ చేయలేదు దర్శకురాలు. మాళవికా నాయర్ తో రొమాన్స్ కూడా విషయం లేక ఫ్లాట్ గా సాగడంతో రాణించడం కష్టమై పోయింది శోభన్ కి. రెండు పాటలైనా ఆదుకుని వుంటే సినిమాలో వున్న బోరు కొంత తగ్గేది.
       
మాళవికా నాయర్ పాత్రకి వ్యాపార దృక్పథముంది గానీ దీని తాలూకు పాత్రచిత్రణ కొరవడింది. ఆదర్శాలు మాటల వరకే
, ఆలోచనలు విషయం లేని ప్రేమ గురించే అన్నట్టుగా వుంది. ఇక సహాయ పాత్రల్లో రాజేంద్ర ప్రసాద్, రావురమేష్, నరేష్, గౌతమి ఇంకా చాలా మంది నటీనటులు, వాళ్ళ కోపాలు, ఆనందాలు, పాటలూ ఏవీ ప్రేక్షకులకి తాకకుండా, తామరాకుపై నీటి బొట్టు టైపులో వుండిపోతారు.
       
మిక్కీ జె మేయర్ సంగీతం ఎవరేజ్ గా వుంది. కూనూరు
, ఇటలీ లొకేషన్స్ లో సన్నీ, రిచర్డ్స్ ల కెమెరా వర్క్ టైటిల్ కి తగ్గ మూడ్ తో వుంది. లక్ష్మీ భూపాల రాసిన మాటలు వుండాల్సిన చోట బలంగా, లేని చోట్ల తేలికగా వున్నా, మొత్తం కథని డ్రైవ్ చేసే ఫ్లో తో లేవు. ఎందుకంటే కథకే ఒక ఫ్లో లేదు. కారణం షేక్ దావూద్ స్క్రీన్ ప్లే స్క్రీన్ ప్లే కాకుండా స్క్రీన్ ఫ్లూ అయి వ్యాపించడం. మళ్ళీ దీనికి కారణం కథలో కాన్ఫ్లిక్ట్ లేకపోవడం. కాన్ఫ్లిక్ట్ లేకపోతే ఎంత స్లోగా సాగాలో అంత స్లోగా సినిమా సాగి తీరుతుంది.

చివరికేమిటి?

కథలో కాన్ఫ్లిక్ట్ మర్చిపోయి ఎవరైనా సినిమా తీస్తారా? తీస్తే ఏం కథ చూస్తున్నామో అర్ధమవుతుందా? కథంటేనే కాన్ఫ్లిక్ట్ (సంఘర్షణ). రెండు కుటుంబాల మధ్య దశాబ్దాల కాన్ఫ్లిక్ట్ వుంది- ఇది వెనక్కి వెళ్ళిపోయి, నానా తిప్పలుపడి ఎలాగో హీరోహీరోయిన్ల మధ్య ఇంటర్వెల్లో ఇగోలకి సంబంధించిన కాన్ఫ్లిక్ట్ పుడుతుంది. దీంతో సెకండాఫ్ మీద ఆసక్తి పెంచుకుని చూస్తే, హీరోహీరోయిన్లు ఇగోల తగాదాలే మర్చిపోతారు. దీంతో ఏ కాన్ఫ్లిక్ట్ లేని కథ - సంబంధం లేని సీన్లతో, కామెడీలతో చివరి వరకూ సహనాన్ని పరీక్షిస్తూ తీసికెళ్ళి - ఆనాడు పుట్టుకతో హీరోహీరోయిన్లు తారుమారైన విషయం బయటపడి సుఖాంత మవుతుంది.
       
కథలో ఒక చోట ఒక పాయింటు ఉత్పన్న మవుతుంది- పుట్టి తారుమారురైన హీరో ఆ పెంపుడు తల్లి స్వభావంతో పెరుగుతాడు. హీరోయిన్ ఆ పెంపుడు తండ్రి స్వభావంతో పెరుగుతుంది. అప్పుడు తాము తారుమారైన విషయం తెలిస్తే ఆ పెంపుడు తల్లి
, ఆ పెంపుడు తండ్రి స్వభావాల్ని పుణికి పుచ్చుకుని పెరిగిన తాము, వాటిని కలుషితం చేసుకోలేక-  నిజం బయటపడకుండా చేసే ప్రయత్నాలతో కాన్ఫ్లిక్ట్ పుట్టి వుంటే- ఇది యూత్ అప్పీలున్న హీరోహీరోయిన్ల కథగా కాస్త నయమన్పించుకునేది.

—సికిందర్

 

16, మే 2023, మంగళవారం

1328 : రివ్యూ!


 

రచన- దర్శకత్వం : నెల్సన్ వెంకటేశన్
తారాగణం : ఐశ్వర్యా రాజేష్, జితన్ రమేష్, సెల్వరాఘవన్, అనుమోల్ తదితరులు సంగీతం : జస్టిన్ ప్రభాకరన్, ఛాయాగ్రహణం :  గోకుల్ బెనోయ్
బ్యానర్ : డ్రీమ్ వారియర్ ప్రొడక్షన్స్
నిర్మాతలు: ఎస్ ఆర్ ప్రకాష్ బాబు, ఎస్ ఆర్ ప్రభు
విడుదల : మే 12, 2023
***

        హీరోయిన్ ఐశ్వర్యా రాజేష్ నటించిన తమిళ సినిమాలు ఫిబ్రవరి -మే మధ్య 4 నెలల్లో 4 విడుదలయ్యాయి. ఇంకో 8 నిర్మాణంలో వున్నాయి. ఈమె హీరోల పక్క ఆడిపాడే రెగ్యులర్ హీరోయిన్ గా గాక, హీరోయిన్ ప్రధాన సినిమాలు నటిస్తూ ప్రత్యేక స్థానం పొందింది. అభిమానులు ఆమెని సూపర్ స్టార్ అనేశారు. సినిమాలు కూడా అలాగే హిట్ట వుతున్నాయి. ఈ నాలుగు నెలల్లో  ది గ్రేట్ ఇండియన్ కిచెన్’, రన్ బేబీ రన్’, సొప్పన సుందరి’, ఫర్హానా. తెలుగులో 2019 లో కౌసల్యా కృష్ణ మూర్తి తో ప్రారంభించి, మిస్ మ్యాచ్’, వరల్డ్ ఫేమస్ లవర్’, టక్ జగదీష్’, రిపబ్లిక్ లలో నటించింది. 7 కోట్ల బడ్జెట్ తో తీసిన ఫర్హానా తమిళ తెలుగు హిందీ భాషల్లో విడుదలైంది.
        
థ్రిల్లర్ని ముస్లిం సినిమాగా తీయాల్సిన అవసరం ఎందుకొచ్చిందన్న ప్రశ్నకి- మలయాళంలో, హిందీలో ఎన్నో ముస్లిం సినిమాలు తీస్తున్నప్పుడు, తమిళంలో తనెందుకు తీయకూడదని దర్శకుడు నెల్సన్ వెంకటేశన్ సమాధానమిచ్చాడు. ఇటీవల తెలుగులో హిట్టయిన మసూద అనే చేతబడి సినిమాని ముస్లిం సినిమాగా తీసినప్పుడు పాతబడిపోయిన చేతబడి కథలకి కొత్త ప్రాణం పోసినట్టయింది. రెగ్యులర్ గా వచ్చే సినిమాలనే నేపథ్యాలు మారిస్తే కొత్తవైపోతాయి. ఈ మార్కెట్ యాస్పెక్ట్ తోనే వచ్చిన ఫర్హానా అనే థ్రిల్లర్ ఎలా వుందో చూద్దాం...

కథ

చెన్నై ట్రిప్లికేన్ గల్లీల్లో దిగువ మధ్య తరగతి కుటుంబానికి చెందిన ఫర్హానా (ఐశ్వర్యా రాజేష్) పిల్లలతో, భర్త కరీం (జితన్ రమేష్) తో, తండ్రి అజీజ్ భాయ్ తో నివసిస్తూ వుంటుంది. తండ్రి సాంప్రదాయవాది, కఠినంగా వుంటాడు. భర్త సౌమ్యుడు. తండ్రి నడిపే చెప్పుల షాపులో పనిచేస్తూంటాడు. ఆన్లయిన్ వ్యాపారాలు పెరగడంతో చెప్పుల షాపుకి కస్టమర్లు రావడం తగ్గిపోతారు. దీంతో ఆర్ధిక ఇబ్బందులు చూసి ఫర్హానా ఉద్యోగం చేస్తానంటుంది. తండ్రి వ్యతిరేకిస్తాడు. భర్త ఒప్పుకుంటాడు. ఫర్హానాకి కాల్ సెంటర్ లో పనిచేసే నిత్య (అనుమోల్) అనే ఫ్రెండ్ వుంటుంది. ఆమె కాల్ సెంటర్లో ఉద్యోగం ఇప్పిస్తుంది. ఇంట్లో మగ్గిన జీవితంలోంచి బయటి ప్రపంచంలోకి, బయటి ప్రపంచంలో ఆర్ధిక స్వావలంబన లోకీ ఆమె జీవితం థ్రిల్లింగ్ గా మారిపోతుంది.
        
ఇంతలో కొడుకు అనారోగ్యానికి ఎక్కువ ఖర్చయ్యే పరిస్థితి వస్తుంది. దీంతో కాల్ సెంటర్ లో ఎక్కువ జీతం వచ్చే సెక్షన్ కి మార్పించమని నిత్యని కోరుతుంది. ఆ సెక్షన్ లో పని చేస్తున్న నిత్య, అదే సెక్షన్ కి ఫర్హానాని మార్పిస్తుంది. ఇక్కడ పనిచేయడం మొదలెట్టిన ఫర్హానాకి షాకింగ్ విషయం తెలుస్తుంది. ఇది సెక్స్ చాట్ సెక్షన్. కాలర్స్ తో సెక్సీగా మాట్లాడి సంతృప్తి పర్చాలి.
        
ఏం చేయాలో అర్ధంగాక, మానెయ్యలేక, అలాగే పనిచేస్తున్న ఫర్హానాకి ఒక కాలర్ కాల్స్ చేయడం మొదలెడతాడు. ఇతను మర్యాదస్తుడిలా వుంటాడు. కవిత్వం మాట్లాడతాడు. బాధల్లో వున్నట్టు అనిపిస్తాడు. సానుభూతితో దగ్గరవుతుంది. దగ్గరయ్యాక కలవాలంటాడు. ఇలా అన్నాక మొదలవుతుంది ఆమెకి అతడితో అసలు కథ. ఏమా కథ? అతడ్ని ఎలా కలుసుకుంది? కలుసుకుంటే ఏం జరిగింది? అసలతను ఎవరు? ఏ ఉద్దేశంతో ఆమెని ట్రాప్ చేశాడు? చివరికి ఆమె జీవితం ఏమైంది?... ఈ ప్రశ్నలకి సమాధానాలు మిగతా సినిమాలో తెలుస్తాయి.

ఎలా వుంది కథ

ఆప్యాయంగా మాట్లాడినంత మాత్రాన అపరిచితులకి ఫిదా అయిపోకూడదని చెప్పే కథ. ఈ కథలో కాల్ సెంటర్ లో దాదాపు ఉద్యోగినందరూ ప్రొఫెషనల్ గానే వుంటారు. కాలర్స్ తో ఎఫైర్స్ కి దూరంగా వుంటారు. ఒక ఉద్యోగిని ఫోన్ సెక్స్ తో రియల్ సెక్స్ ట్రాప్ లోకి లాగిన వాడికి పడిపోయి హత్యకి గురవుతుంది. ఫర్హానా కాలర్ మాటల్ని పర్సనల్ గా తీసుకుని ఫ్రెండ్ అవుదామనుకుంటుంది. దీనికి కారణం చివర్లో భర్తకి చెప్తుంది- మన కష్టాలు తప్ప మనం ఏమీ మాట్లాడుకోలేదు, సడెన్ గా వాడు బాగా మాట్లాడేసరికి దగ్గరయ్యానని. ఇంట్లో ఈతిబాధలు తప్ప ఇంకేం ముచ్చట్లాడుకోక పోతే బయటి వ్యక్తులకి ఇలాగే పడిపోతారని చెప్పడం.
          
లిప్ స్టిక్ అండర్ మై బురఖా (2016) లో రోజీ అనే ఆమ్మాయి ఒక యువకుడితో ఫోన్ సెక్స్ చేస్తూంటుంది. చివరి కతను పెళ్ళికి కూడా సిద్ధమైపోతాడు. తీరా చూస్తే ఆమె 55 ఏళ్ళ విడో ఉషా అనీ, తను బకరా అయ్యాననీ తెలుసుకుని ఆమె సామానంతా  విసిరేసి, ఆమెని వీధిలోకి నెట్టేస్తాడు. వీధిలో ఆమె పరువంతా పోతుంది. ఆన్లయిన్ పరిచయాలతో ఇలాటివి కూడా జరుగుతూంటాయి.
        
ఇది ఫర్హానా పాత్ర దృష్టి కోణంలో సాగే కథ. దాదాపు ప్రతీ సీనులో తనుంటుంది. అయితే తను బకరా అవదు. త్వరలోనే కాలర్ ఉద్దేశం పసిగట్టి దూరం పెట్టడం మొదలెడుతుంది. అతను బ్లాక్ మెయిల్ చేస్తాడు. ఆమె భయాల్నీ కష్టాల్నీ పెంచేస్తాడు. ఇల్లు కనుక్కుని అక్కడిదాకా వచ్చేస్తాడు. అయితే ఎవరి కంటా పడకుండా గేమ్ ఆడుతూంటాడు. అతనెలా వుంటాడో ఆమెకి తెలియదు. ప్రేక్షకులకి కూడా కనపడడు. గొంతు మాత్రమే విన్పిస్తూంటుంది. ఈ సస్పెన్స్ ఫ్యాక్టరే ఈ థ్రిల్లర్ ని నిలబెట్టింది. అయితే ఫస్టాఫ్ లో, అలాగే సెకండాఫ్ లో కొన్ని చోట్ల డ్రాప్ అయిపోతుంది వేగం. దీనికి కారణం ఫర్హానా పాత్ర నిదానంగా వుండడం.  
        
ఇది హీరోయిన్ పాత్ర దృక్కోణంలో హీరోయిన్ ప్రధాన కథయినప్పుడు, ముగింపులో ఆమె గెలుపు కుటుంబం చేతుల్లోకి, ఇంకొందరి చేతుల్లోకీ వెళ్ళి పోకుండా తన చేతిలోనే వుండుంటే- ఇది ఉమన్ ఎంపవర్మెంట్ గురించి చెప్తున్న కథగా బలంగా వుండేది. కాలర్ ఎంత సీక్రెట్ గా ఆపరేట్ చేస్తున్నాడో, అంత సీక్రెట్ గా ఆమె ఈ లేకి వ్యవహారం బయటగానీ, ఇంట్లోగానీ తెలిసిపోకుండా మేనేజ్ చేసి కాలర్ ని దెబ్బకొట్టి వుంటే - క్యారక్టర్ ప్రేక్షకాభిమానం బాగా పొంది వుండేది. ఐశ్వర్యా రాజేష్ రియల్ సూపర్ స్టార్ అయ్యేది.

నటనలు - సాంకేతికాలు

పాత్రని తడుముకోకుండా నటించేసింది ఐశ్వర్యా రాజేష్. కమర్షియల్ సినిమా హీరోయిన్ గా కాదు, సెమీ రియలిస్టిక్ హీరోయిన్ గా సహజ భావోద్వేగ ప్రకటనతో. ఈ సినిమాలో దర్శకుడు ప్రేక్షకుల్ని కథాప్రపంచంలో మాత్రమే ఇన్వాల్వ్ చేయడు, క్యారక్టర్ వరల్డ్ లోకి కూడా తీసికెళ్తాడు. ఈ క్యారక్టర్ వరల్డ్ లో ఐశ్వర్యా రాజేష్ పాత్రకి ఇల్లే లోకంగా ఇంటి పని, వంటపని; తండ్రితో, భర్తతో, పిల్లలతో సంబంధాలు; కుటుంబ ఆర్ధిక సమస్యలు, బాధ్యతలు;  బయట కాల్ సెంటర్ లో పూర్తిగా వేరైన కార్పొరేట్ ప్రపంచంతో వ్యవహరించడం, ఈ ఆనందంలో కాలర్ తో చేదు అనుభవాలూ-  ఇవన్నీ తడుముకోకుండా నటించేసింది.
        
పాత్రకి ఇంకో తత్వం కూడా వుంది-  మతం పట్ల విశ్వాసం, ఐదు పూటలా నమాజు, రంజాన్ ఉపవాసాలు, జకాత్, రంజాన్ విందు వినోదాలూ కథాక్రమంలో కథలో కలిసిపోయేలా చేసుకు పోతూంటుంది. ఇక హజ్ కి వెళ్ళడమే మిగిలింది. అయితే రంజాన్ కి ఫ్రెండ్ నిత్యని పిలవడం మర్చిపోయినట్టున్నాడు దర్శకుడు. కొడుకు బర్త్ డేకి మాత్రం కాల్ సెంటర్లో స్వీట్లు  పంచమన్నాడు.
        
సౌమ్యుడైన భర్తగా, కళ్ళు దించుకుని మాట్లాడే పాత్రలో జింతన్ రమేష్ ఇంకో రియలిస్టిక్ క్యారక్టర్ కి న్యాయం చేశాడు. అలాగే నిత్య పాత్రలో అనుమోల్. ఇక గొంతు విన్పిస్తూ చివరి దృశ్యాల్లో మాత్రమే తెరపై కొచ్చే విలన్ దయాకర్ గా, దర్శకుడు సెల్వ రాఘవన్ సాఫ్ట్ సైకోతనం మంచి ఫినిషింగ్ టచ్ సినిమాకి.
        
మూడు పాటలున్నాయి. షాపింగ్ మాల్ లో సెల్వరాఘవన్ రివీలయ్యే సందర్భంలో వచ్చే సాంగ్ బావుంటుంది. బ్యాక్ గ్రౌండ్ మ్యూజిక్ ని కూడా జస్టిన్ ప్రభాకరన్ బాగానే ఇచ్చాడు. గోకుల్ బెనోయ్ ఛాయాగ్రహణం థ్రిల్లర్ ఫీల్ ని ఎలివేట్ చేసుకుంటూ పోయింది, ఇతర సాంకేతిక విలువలు, ప్రొడక్షన్ విలువలూ ఖైదీ నిర్మాతల స్థాయిలో వున్నాయి.

చివరికేమిటి

సినిమాలో చూపించిన కాల్ సెంటర్ వ్యవహారాన్నీ, కాల్స్ చేసే వాళ్ళ కల్చర్ నీ దేన్నీ విమర్శించకుండా, వాటి పై మెసేజి లివ్వకుండా, అమ్మాయిలు అపరిచితుల కాల్స్ కి పడిపోరాదని చెప్పడానికి మాత్రమే కాల్ సెంటర్ ని నేపథ్యంగా వాడుకున్నాడు దర్శకుడు. కథ ముగిశాక, అదే కాల్ సెంటర్ కి మొదట చేరిన బ్యాంకింగ్ కాల్స్ రిసీవ్ చేసుకునే సెక్షన్ కే జాబ్ కి వెళ్తూంటుంది హీరోయిన్. ఎక్కువ శాలరీకి ఆశపడినందుకే ఇదంతా జరిగింది. ఇప్పుడు బుద్ధి తెచ్చుకుంది.
       
ఫస్టాఫ్ కుటుంబ జీవితం
, జాబ్ లో చేరడం, కాలర్ తగలడం, అతడి మాటలకి పడిపోయి ఫోన్లోనే ఫ్రెండ్ షిప్ చేయడం జరుగుతూ, ఇంకో ఉద్యోగిని హత్యకి గురవడం వంటివి వుంటాయి. సెకండాఫ్ లో కాలర్ కలవాలని ప్రయత్నించడం, బ్లాక్ మెయిల్ చేయడం, స్టాకింగ్ చేయడం జరుగుతూ వచ్చి, ఇతనెవరో తెలుసుకోవడానికి ఆమె పూనుకోవడంతో క్లయిమాక్స్ దిశగా వెళ్తుంది కథ.
       
అయితే ఈ హీరోయిన్ ఓరియెంటెడ్ కథలో హీరోయిన్ గా  ఒంటి చేత్తో కాలర్ అంతు చూడకుండా
, ఇంట్లో చెప్పేయడంతో యాక్టివ్ గా వున్న పాత్ర కాస్తా బేలగా, పాసివ్ గా మారిపోయింది. ఆడవాళ్ళు రక్షణ కోసం చివరికి మగవాళ్ళ దగ్గరికి రావాల్సిందే అన్నట్టు తిరోగమన పంథాకి పోవడం తెలిసో తెలియకో దర్శకుడు చేసిన పొరపాటు. అయినా ఈ సినిమాని మత ప్రచార ప్రధాని ప్రమోట్ చేయట్లేదు కాబట్టి తమిళనాడులో కొందరు ముస్లిములే బ్యాన్ చేసుకుంటున్నారు. నేను ముస్లిముల మధ్యే పుట్టి పెరిగానురా అని దర్శకుడు మతసామరస్యం చెప్పుకుంటున్నాడు.
—సికిందర్

 

14, మే 2023, ఆదివారం

1327 : రివ్యూ!


రచన-దర్శకత్వం : యలమంద చరణ్
తారాగణం: సునీల్శ్రీనివాస రెడ్డివెన్నెల కిషోర్సోనియా చౌదరిస్నేహల్ కామత్పృథ్వీరాజ్, గోపరాజు రమణ,  ధనరాజ్వైవా హర్ష తదితరులు
సంగీతం: శేఖర్ చంద్ర, ఛాయాగ్రహణం : సాయి
బ్యానర్స్ : హిమాలయ స్టూడియో మాన్షన్స్మిర్త్ మీడియా
నిర్మాతలు: ఉదయ్ కిరణ్శ్రీకాంత్
విడుదల : మే 12, 2023 
***

        చిన్న సినిమాలు అరుదుగా కొత్త ఐడియాలతో వస్తాయి. వచ్చినప్పుడు అవి మంచి టాక్ తో థియేటర్లలో నిలబడేలోగా అదృశ్యమైపోతూంటాయి. మంచి టాక్ తో నిలబడే దాకా చిన్న సినిమాని థియేటర్లలో వుంచే కాలం కాదిది. చిన్న సినిమా మార్నింగ్ షోకే హిట్ టాక్ తో వైరల్ అవకపోతే ఇక అవకాశం వుండదు. అలాటి వైరల్ అయ్యే అవకాశమున్న భువన విజయమ్ ఈ వారం విడుదలైంది. ఓ పది మంది కమెడియన్ పాత్రల కథతో సినిమా అంటే ఎంత కామెడీ ప్రధానంగా వుంటుందో తెలిసిందే. ఒక కొత్త అయిడియా గల సినిమాని ఇంతమంది కమెడియన్లు కలిసి వైరల్ చేయాల్సిందే. మరి కొత్త దర్శకుడు తన తొలి ప్రయత్నంతో ఏం చేశాడు? ఇది తెలుసుకుందాం...
కథ


ఆటో డ్రైవర్ యాదగిరి (ధనరాజ్) అనేవాడికి భూమ్మీద నూకలు చెల్లిపోతాయి. ఇద్దరు యమభటు లొచ్చి లాక్కెళ్ళడానికి ప్రయత్నిస్తారు. అయితే అవతల ఇంకొకడికి కూడా చావుతో అపాయింట్ మెంటుంది. వాణ్ణి కూడా పట్రమ్మని చిత్ర గుప్తుడు ఆజ్ఞాపించడంతో, యమ భటులు యాదగిరి ఆత్మని వెంటబెట్టుకుని, రెండో వాడి ఆత్మకోసం వెళ్తారు. అదొక జాతకాల పిచ్చిగల సినిమా నిర్మాత చలపతి (గోపరాజు రమణ) ఆఫీసు. ఈయన నిర్మించిన సినిమాలతో ప్రియతమ్ కుమార్ (సునీల్) అనే వాడు టాప్ స్టార్ అయి కూర్చున్నాడు. ఇప్పుడు ఈయనతో మరో సినిమా తీయాలి. అందుకని కథలు వినే కార్యక్రమం పెట్టుకుంటాడు. ఏడుగురు రచయితలు వచ్చి కథలు విన్పిస్తారు. ఈ రచయితల్లో ఒకడు చలపతి కారు డ్రైవర్, ఇంకొకడు రైటర్ గా మారిన దొంగ. ఈ ఏడుగురూ అద్భుతమైన కథలు చెప్పడంతో ఏ కథ తీసుకోవాలో తేల్చుకోలేక పోతాడు చలపతి. నాకెవరి కథ ఇస్తారో మీరే తేల్చుకోండి, ఆ కథకి పది లక్షలిస్తానంటాడు చలపతి. ఈ ఏడుగురు రచయితల్లోనే ఒకడికి చావుతో అపాయింట్ మెంటుంది. వాడి ఆత్మకోసమే వెయింటింగులో వున్నారు యమభటులు.
        
పైన యమలోకం, కింద ఆఫీసులో భువన విజయమ్ అనే మందిరం. ఈ మందిరంలోకి మంతనాలాడుకోవడానికి ప్రవేశిస్తారు రచయితలు. నిర్మాత డ్రైవర్ బతిమాలుకుంటాడు- తన కూతురు ఆస్పత్రిలో వుందని, బ్రతికించుకోవాలంటే 8 లక్షలు కావాలనీ, కనుక తన కథని ఆమోదించమని ఏడ్చేస్తాడు.
        
ఆమోదించడానికి మిగతా రచయితలు సిద్ధపడ్డారా? రచయితల్లో చావబోయే రచయిత ఎవరు? ఎవరి కథ ఇవ్వాలన్న దాని గురించి కథ కోసం ఇంత మేధోమధనం జరుగుతూంటే, అవతల స్టార్ హీరో ప్రీతమ్ కుమార్ గతం మర్చిపోవడంతో ఇప్పుడేం చేశాడు నిర్మాత చలపతి? కథ తీసుకున్నాడా? చలపతి డ్రైవర్ సమస్య తీరిందా? చావబోయే రచయిత చచ్చాడా?...వీటికి సమాధానాలు మిగతా కథలో తెలుస్తాయి.

ఎలావుంది కథ

శ్రీకృష్ణ దేవరాయలి ఆస్థానం భువనవిజయం లో అష్ట దిగ్గజ కవులు కొలువుదీరే వారన్న ఆలోచనని తీసుకుని ఈ కథ చేశాడు కొత్త దర్శకుడు చరణ్. ట్రైలర్ లో ఇదే చెప్పాడు. అయితే ఎనిమిది మంది కవుల స్థానంలో 7 గురు రచయితల్ని సృష్టించి కథ నడిపాడు. ఇంకో రచయిత వున్నా మతిస్థిమితం లేని అతను రచయిత కాలేడు. ఇక ఈ కథ ఎలా నడపాలన్న దాని విషయంలో మాత్రం తప్పటడుగు వేశాడు. కమెడియన్లే రచయితలైనప్పుడు కథని  పూర్తి స్థాయి పగలబడి నవ్వించే కామెడీతో నడపకుండా, అక్కడక్కడ మాత్రమే నవ్విస్తూ, విషయ సామర్థ్యాన్ని పూర్తి స్థాయిలో వినియోగించుకో లేకపోయాడు. ఇదే ఈ సినిమాని వైరల్ కాకుండా ఆపింది. చిన్న సినిమా ఫస్ట్ డే ఫస్ట్ షోకే హిట్ టాక్ రాకపోతే, ఇంకా తర్వాత దాని పరిస్థితి దైవా ధీనమే. దీనికంటే చిన్న చిన్న హార్రర్ కామెడీలు బాగా ఆడాయి. ఎందుకంటే అవి కామెడీ మీద దృష్టి పెట్టాయి కాబట్టి.
        
ఈ కథలో ఇంకో సమస్య ప్రధాన పాత్ర లేకపోవడం. స్టార్ హీరోగా వేసిన సునీల్ ప్రధాన పాత్ర కాలేడు. రచయితలు సునీల్ కి కథ ఇవ్వడమే ఈ సినిమా కథ అయినప్పుడు, రచయితల్లోనే  ఒకరు ప్రధాన పాత్రగా వుండాలి. కానీ నిర్మాత డ్రైవరుగా వున్న రచయితకి, కూతురి వైద్య చికిత్స కారణం చెప్పి భావోద్వేగ భరిత కథతో అతడ్ని ప్రధానం చేశారు. ఇతనే ప్రధాన పాత్ర అనుకున్నా లాజిక్ అడ్డొస్తుంది. నిర్మాత డ్రైవర్ అయిన తను నిర్మాతకి సమస్య చెప్పుకుంటే కూతురి వైద్యం చేయించేయవచ్చు. తన యజమానికి కథే అమ్మి డబ్బు సంపాదించే రిస్కు తీసుకోనవసరం లేదు.
        
ఇలా ప్రధాన పాత్ర లేకపోవడం, కమెడియన్లతో ప్రేక్షకులాశించే కామెడీని బలహీనం చేసి గంభీరంగా కథ చెప్పబోవడం, ఆ కథ కూడా అంతంత మాత్రంగా వుండడం కొత్త దర్శకుడి టాలెంట్ ని బయట పెట్టాయి. భువనవిజయంలో తెనాలి రామకృష్ణుడ్ని కూడా మర్చిపోయాడు కొత్త దర్శకుడు.

నటనలు- సాంకేతికాలు

సునీల్ ఒక్కడే కాస్త నవ్విస్తాడు. గతాన్ని మర్చిపోయిన స్టార్ గా గజినీ టైపు క్యారక్టర్ తో కామెడీ ఫర్వాలేదు. అయితే సినిమా షూటింగులో తగిలిన దెబ్బతో  జ్ఞాపక శక్తిని కోల్పోయిన తనని, కర్రతో కొడితే జ్ఞాపక శక్తి రావడమనే పాత చింతకాయ చిట్కా ఇబ్బంది పెట్టేదే. ఎనిమిదో రచయితగా మూగవాడి పాత్రలో వెన్నెల కిషోరే ఈ సినిమాకి ఆకర్షణ. పెద్ద రచయితగా పృథ్వీరాజ్అతడి అసిస్టెంట్ గా పనిచేసి అతడికే పోటీ రచయితగా మారిన పాత్రలో శ్రీనివాస్ రెడ్డిదొంగోడైన  రైటర్ గా వైవా హర్ష నటించారు.  నిర్మాతగా గోపరాజు రమణరొమాంటిక్ పాత్రల్లో సోనియా చౌదరిస్నేహల్ కామత్ కని పిస్తారు.
        
ఈ సినిమాలో పాటల్లేవు. నిడివి కూడా రెండు గంటలలోపే. ఫస్టాఫ్ నత్తనడక నడిచినా సెకండాఫ్ కథ ఎంపిక గురించి చేసే కామెడీలు కొన్ని నవ్విస్తాయి. ఒకే ఇంట్లో సింగిల్ లొకేషన్లో ఈ కథంతా జరుగుతుంది. అయితే సింగిల్ లొకేషన్ సినిమాలు బోరు కొట్టకుండా, సీను సీనుకీ మారిపోయే పరిస్థితి తో వేగంగా సాగే కథనం ఎలా చేయాలో ఇలాటి హాలీవుడ్ సినిమాల్లో తెలుస్తుంది. కొత్త దర్శకుడు ఈ రీసెర్చి చేసుకోనట్టుంది. ఊహించని మలుపులు కూడా లేకుండా సినిమా చప్పగా  సాగుతుంది. క్లయిమాక్స్ ఏం జరుగుతుందో ముందే తెలిసి పోతుంది.
        
ఇంతమంది కమెడియన్లతో కామెడీ తీయడానికి కొత్త దర్శకుడి అనుభవం సరిపోలేదు. అనుభవమున్న రచయితల తోడ్పాటు తీసుకుంటే తప్ప భువన విజయమ్ కి సరైన విజయం అంత సులభం కాదు.
—సికిందర్

 

12, మే 2023, శుక్రవారం

1326 : రివ్యూ!


 

రచన- దర్శకత్వం : వెంకట్ ప్రభు
తారాగణం: నాగ చైతన్య అక్కినేని, కృతీ శెట్టి, అరవింద్ స్వామి, ప్రియమణి, శరత్ కుమార్, సంపత్ రాజ్, ప్రేమ్ జీ అమరేన్, వెన్నెల కిషోర్, ప్రేమీ విశ్వనాథ్ తదితరులు
మాటలు : అబ్బూరి రవి, సంగీతం : ఇళయరాజా, యువన్ శంకర్ రాజా ; ఛాయాగ్రహణం : ఎస్ ఆర్ కదిర్
బ్యానర్ : శ్రీనివాసా సిల్వర్ స్క్రీన్
నిర్మాత: శ్రీనివాస చిట్టూరి
విడుదల : మే 12. 2023

        హీరో నాగచైతన్య 2021-22 లలో లవ్ స్టోరీ’, బంగార్రాజు’, థాంక్యూ లలో నటించి, థాంక్యూ అట్టర్ ఫ్లాపయ్యాక ఇప్పుడు కస్టడీ అనే యాక్షన్ తో ప్రేక్షకుల్ని బుజ్జగించడానికి వచ్చాడు. అటు తమ్ముడు అఖిల్ ఏజెంట్ తో మళ్ళీ మొదటికొచ్చాడు. అఖిల్ అంతర్జాతీయ గూఢచారిగా నటిస్తే తను మామూలు పోలీస్ కానిస్టేబుల్ గా కస్టడీ లో నటించాడు. ఇప్పుడు గూఢచారికంటే కానిస్టేబుల్ బెటర్ అన్పించుకున్నాడా లేదా అన్నది ప్రశ్న.

        నిర్మాత శ్రీనివాస చిట్టూరి మాత్రం కస్టడీ ని తెలుగు ఎమోషన్స్ లోడ్ చేసిన హాలీవుడ్ సినిమా అన్నారు. అంతే కాదు, నాగార్జున కెరీర్ లో శివ ఎలా గుర్తుండి  పోయిందో, నాగచైతన్య కెరీర్ లో కస్టడీ అలా గుర్తుండి పోతుందన్నారు. నిర్మాతే ఇలా నమ్మి ప్రకటిస్తే ప్రేక్షకులకి మంచి భరోసా, కొంత ధైర్యం కూడా లభిస్తాయి.
       
తమిళ దర్శకుడు వెంకట్ ప్రభు తమిళంలో
మానాడు హిట్ తర్వాత 'కస్టడీ ని తెలుగు-తమిళం ద్విభాషా చలన చిత్రంగా తీశాడు. భారీ తారాగణాన్నీ, ఇళయరాజా సంగీతాన్నీ జత చేశాడు. నాగచైతన్య సరసన హీరోయిన్ గా ట్రెండింగ్ లో వున్న కీర్తీ శెట్టిని తీసుకున్నాడు. సినిమాలో కీర్తి శెట్టి పాత్ర పేరు రివీల్ చేయాడానికి కూడా ఈవెంట్ ని ప్లాన్ చేశాడు. ఇంతా చేస్తే పాత్ర పేరు రేవతి. ఇవన్నీ దృష్టిలో పెట్టుకుని ఇప్పుడు కథని రివీల్ చేస్తే ఏముందో చూద్దాం...

కథ

    సఖినేటి పల్లిలో శివ (నాగచైతన్య) ఓ కానిస్టేబుల్. డ్యూటీ అంటే ప్రాణమిచ్చే అతను  డ్రైవింగ్ స్కూలు నడిపే రేవతి (కీర్తీ శెట్టి) ని ప్రేమిస్తాడు. ఒకరోజు సీఏం దాక్షాయణి (ప్రియమణి) కాన్వాయ్ ని ఆపి అంబులెన్స్ కి దారివ్వడంతో వార్తల్లో కొస్తాడు శివ. రేవతితో కులాలు వేరు కావడంతో ప్రేమలో సమస్యలొస్తాయి. ఆమె ఇంట్లో వేరే సంబంధం (వెన్నెల కిషోర్) చూడడంతో -నీతో వచ్చేస్తా లేదా చచ్చిపోతా అంటుంది శివతో. శివ రేవతి కోసం పరిగెడుతూంటే దారిలో, డ్రంకన్ డ్రైవ్ కేసులో రాజు (అరవింద్ స్వామి) అనే క్రిమినల్ ని సీబీఐ అధికారి (సంపత్ రాజ్) అరెస్టు చేసి పోలీసు స్టేషన్ కి తీసికెళ్తాడు.
       
రాజుని చంపడానికి పోలీస్ కమీషనర్ (శరత్ కుమార్) పోలీసుల్ని, రౌడీల్నీ రంగంలోకి దింపుతాడు. దీంతో దీన్ని నివారించడానికి రాజుని తీసుకుని శివ పారిపోతాడు. రాజుకి చట్టప్రకారం శిక్ష పడాలన్నది అతడి లక్ష్యం. మరి పెద్ద పెద్ద అధికారుల్ని ఎదిరించి శివ తాను అనుకున్న లక్ష్యం నేర వేర్చుకున్నాడా లేదా అన్నది మిగతా కథ.

ఎలావుంది కథ

    ఇలాటి కథ సినిమాగా తీయాలంటే, విట్నెస్ ప్రొటెక్షన్ కథలతో హాలీవుడ్ లో వచ్చిన చాలా సినిమాలు చూసి తీయొచ్చు. మెల్ గిబ్సన్ నటించిన బర్డ్ ఆన్ ఏ వైర్ (1990) వాటిలో ఒకటి. కానీ దర్శకుడు వెంకట్ ప్రభు ఈ క్రిమినల్ ప్రొటెక్షన్ కథని ప్రేక్షకుల్ని పూర్తిగా కస్టడీ లోకి తీసుకుని, బంధించి టార్చర్ చేస్తూ- చూస్తారా చస్తారా అని బెదిరిస్తున్నట్టు తీశాడు. నిర్మాత చెప్పిన తెలుగు ఎమోషన్స్ తో హాలీవుడ్ సినిమా అంటే ఇదేనేమో. ఇది నాగచైతన్య కెరీర్ లో గుర్తుండిపోయే మాటేమోగానీ, ప్రేక్షకుల తెలుగు ఎమోషన్స్ కి అయిన గాయాలు మాత్రం బాగా గుర్తుంటాయి.
       
ఓ కానిస్టేబుల్ వ్యవస్థని ఎదిరించి నేరస్థుడికి శిక్షపడేలా చూడాలనుకునే పాయింటు బాగానే వుంది. ఈ పాయింటుని అమలు చేయబోయే సరికి ఏ లాజిక్కూ
, ఏ కామన్ సెన్సూ లేకుండా పోయాయి. కథకంటే, కానిస్టేబుల్ వ్యూహాలూ ప్రతివ్యూహాలతో కూడిన రసవత్తర డ్రామా కంటే, ఊకదంపుడు పోరాటాలూ ఛేజింగులూ ఇవే నిండిపోయాయి.
       
పైన చెప్పిన
బర్డ్ ఆన్ ఏ వైర్ లో అంత స్టార్ హీరోహీరోయిన్లు (మెల్ గిబ్సన్, గోల్డీ హాన్) తో  కథ పెద్దగా ఏమీ వుండదు. కానీ యాక్షన్ సీన్స్ జరగడానికి కల్పించిన ట్విస్టులే యాక్షన్ సీన్స్ ని ఎంజాయ్ చేసేలా చేస్తాయి. వెంకట్ ప్రభు కథలో ఈ ఎంజాయ్ మెంటుతో కూడిన ఎంటర్టైన్మెంట్ వుండదు. సినిమా సాంతం రిలీఫ్ లేకుండా సీరియస్సే. సహన పరీక్ష పెట్టే ఫైట్సే. పైగా తమిళ నటులు ఎక్కువై పోయేసరికి తెలుగు సినిమా చూస్తున్నట్టు కూడా వుండదు.
       
నాగచైతన్య ఈ బి గ్రేడ్ కథతో
, బి గ్రేడ్ సినిమా ఎందుకు నటించినట్టో తెలియదు. అతడి కెరీర్ లో ఇది మరో జోష్ లాంటిది.

నటనలు- సాంకేతికాలు

    నాగ చైతన్య సాధారణ కానిస్టేబుల్ పాత్రలో ఒదిగిపోవడానికి చేసిన ప్రయత్నం మాత్రం బాగా ఫలించింది. నటుడిగా నిలబడ్డాడు. నిజానికి నిజ జీవితంలో కానిస్టేబుల్స్ ని ఇన్స్పైర్ చేయగల విషయం పాత్రలో వుంది. దీన్ని దర్శకుడు గుర్తించకపోవడంతో ఆకారానికే తప్ప, ఆలోచనకి కాకుండాపోయింది పాత్ర. ఏ మాత్రం భావోద్వేగాలు పలకని నటన పూర్తిగా ఫ్లాపయ్యింది. కథకే కాదు పాత్రకీ న్యాయం చేయలేదు. హీరోయిన్ తో ప్రేమకథ కూడా ఒక డ్రై సబ్జెక్టు.
        
హీరోయిన్ కీర్తీ శెట్టి గ్లామర్ తో సినిమా నెట్టుకొచ్చింది. ఫస్టాఫ్ లో ప్రేమ కథ ఆగి, యాక్షన్ కథ మొదలవడంతో స్పేస్ ఫిల్లర్ పాత్రగా వుండిపోయింది. ఇక ప్రియమణి, అరవింద్ స్వామి, శరత్ కుమార్, సంపత్ రాజ్ ల వంటి హేమా హేమీలున్నా సినిమాకి బలం పెరగలేదు. చిన్న చిన్న పాత్రల్లో ఈ హేమా హేమీలు నటించారు.
        
ఇదిలా వుంటే, ఇక ఇళయరాజా- యువన్ శంకర్ రాజా తండ్రీ కొడుకుల సంగీతం అట్టర్ ఫ్లాపయ్యింది. ఇళయరాజా నాగార్జున శివ చూసి ఫీలయినట్టు ఫీలవ్వాలిగా సంగీతం చేయడానికి. ఆయనకి తోడు రామజోగయ్య రాసిన పాటలు నిర్లక్ష్యంగా వున్నాయి.నిర్మాత ప్రొడక్షన్ విలువలకి మాత్రం బాగా ఖర్చు పెట్టారు. దర్శకుడి కంటే సాంకేతిక నిపుణులే తమ ప్రతిభని చూపెట్టుకున్నారు. దర్శకుడి సృజనాత్మకతకి ఏ విషయంలోనూ రాణింపు లేదు. సినిమా నడక కూడా మందకొడిగా వుంటుంది.

చివరికేమిటి

        సింగిల్ షాట్ యాక్షన్ సీను అని ఈ సినిమా గురించి చాలా వినపడింది. సింగిల్ షా ట్ లో తీసిన ఈ ఒక యాక్షన్ సీను చాలా బావుంది. మెచ్చుకుని తీరాలి. దర్శకుడు ఇది చెప్పి నాగ చైతన్యని పడెయ్యలేదు కదా? ఫస్టాఫ్ ఇంటర్వెల్ ముందు వరకూ నాగచైతన్య- కీర్తీ శెట్టిల విసుగు పుట్టించే ప్రేమ కథని సాగదీసి సాగదీసి, దాన్ని వదిలేసి, ఇంటర్వెల్ ముందు అరవింద్ స్వామీ ఎంట్రీతో అసలు కథలోకి వస్తాడు. ఆసక్తిగానే కథ మొదలైంది కదా అనుకుంటే, సెకండాఫ్ లో వుంటుంది టార్చర్. ఈ టార్చర్ ని భరించి చూడాలనుకుంటే సినిమా చూడొచ్చు.  లేదంటే చక్కగా వెళ్ళి రామబాణం చూసుకోవచ్చు. రెండో టార్చర్ భరించలేకపోతే మొదటి టార్చరే బెటర్ అనిపిస్తుంది.

—సికిందర్


8, మే 2023, సోమవారం

1325 : రివ్యూ!


 

రచన- దర్శకత్వం : సుదీప్తో సేన్
తారాగణం : అదా శర్మ, యోగితా బిహానీ, సోనియా బలానీ, సిద్ది ఇద్నానీ, దేవదర్శిని, విజయ్ కృష్ణ, ప్రణయ్ పచౌరీ, ప్రణవ్ మిశ్రా తదితరులుసంగీతం : వీరేష్ శ్రీవల్స, బిషఖ్ జ్యోతి; ఛాయాగ్రహణం :  
బ్యానర్: సన్‌షైన్ పిక్చర్స్
నిర్మాత: విపుల్ అమృత్ లాల్  షా

విడుదల : మే 5, 2023
***
        గుజరాత్ కి చెందిన బాలీవుడ్ అగ్ర నిర్మాత, దర్శకుడు  విపుల్ అమృత్ లాల్ షా స్టార్స్ తో భారీ కమర్షియల్ సినిమాలు తీసిన వాడే. 2002 నుంచీ అమితాబ్ బచ్చన్, సల్మాన్ ఖాన్, అక్షయ్ కుమార్, అర్జున్ కపూర్ లతో దర్శకుడుగా 6 సినిమాలు; అక్షయ్ కుమార్, జాన్ అబ్రహాం, విద్యుత్ జమ్వాల్ లతో నిర్మాతగా 8 సినిమాలూ తీసి, ప్రస్తుతం జాన్ అబ్రహాంతో ఫోర్స్3 నిర్మిస్తున్నాడు. ఇంతలో తానూ గుజరాత్ లాబీలో చేరాలనుకున్నట్టుగా, కాశ్మీర్ ఫైల్స్ సరళిలో ప్రభుత్వానికి ఓట్లు, తనకి నోట్లు ప్రణాళికతో కేరళ స్టోరీ తీశాడు. ఇది హిట్టయ్యింది.

        టు కర్నాటకలో ఎన్నికల ప్రచారం చేస్తూ ప్రధాని కూడా అన్ని ఎన్నికల నియమావళులనూ, పదవీ మర్యాదనూ తుంగలో తొక్కి ఓట్ల కోసం సినిమాకి ప్రచారం చేశాడు. ఇంతలో సినిమాలో చెప్పినట్టుగా 32 వేలమంది కేరళ యువతుల అదృశ్యం నిజమని కాసేపు, కాదని కాసేపూ నిర్మాత అమృత్ లాల్ కన్ఫ్యూజన్ లో వుండగా, నిన్న గుజరాత్ స్టోరీ రిలీజ్ అయింది. గుజరాత్ నుంచి 41, 621 మంది వివాహితలు, అవివాహితలూ  అదృశమయ్యారని ప్రభుత్వానికి చెందిన నేషనల్ క్రైమ్ రికార్డ్స్ బ్యూరో కన్ఫ్యూజన్ లేని అంకెలు విడుదల చేసింది. ఇతర రాష్ట్రాల్లో వ్యభిచార గృహాలకి అమ్మేసి వుంటారని అధికారుల అంచనా. దీంతో కేరళ స్టోరీ కి ఏ బురఖాలో తల దాచుకోవాలో తెలియని పరిస్థితి ఏర్పడింది.
        
దీనికి తోడు ఇండియా టుడే, ఇండియన్ ఎక్స్ ప్రెస్, ఎన్డీ టీవీ, టైమ్స్ ఆఫ్ ఇండియా, చివరికి గోదీ మీడియా అయిన ఆజ్ తక్ వంటి జాతీయ మీడియా సంస్థలు ఈ సినిమాకి 0.5 నుంచి 1.5 వరకు మాత్రమే రేటింగ్స్ నిర్ణయించాయి. ఇది చాలా అన్యాయమే. మరీ అంత తీసిపారేయాల్సిన అవసరం లేదు. ఎందుకంటే, ఈ సినిమా ద్వారా మైనారిటీ వర్గాన్ని ఎండగట్టే సృజనాత్మక స్వేచ్ఛ మాటున, విద్యావంతులైన మెజారిటీ వర్గ యువతుల తెలివిని ఎంత అపహాస్యం చేశారో అర్ధం జేసుకునే అవకాశం లభిస్తుంది. ఈ సినిమా వేరే ఎవరైనా తీసి వుంటే ఈపాటికి 100 కేసులు పడేవేమో. 
       
బెంగాలీ దర్శకుడు సుదీప్తో సేన్ 10 వాస్తవిక సినిమాలు తీసి స్ట్రగుల్ చేస్తున్న దర్శకుడు. తను వెలుగులోకి రావడానికి కేరళ స్టోరీ తీయాలనుకోవడం మంచి నిర్ణయం. ప్రభుత్వ పాలనా వైఫల్యాల పుట్ట మీద బురఖా వేసి
, బురఖాల మీద- గడ్డాల మీదా కోపాన్ని మళ్ళించే ఇలాటి తెలివైన సినిమాలే నేటి జాతీయ అవసరం. అలాగే, అదా శర్మ పూరీ జగన్నాథ్ నితిన్ తో తీసిన హార్ట్ ఎటాక్ తో తెలుగులో పరిచయమై, ఇంకో నాల్గు తెలుగు సినిమాలు, కొన్ని తమిళ హిందీ సినిమాలూ నటించిన ఛోటా నటి. ఈమె నట జీవితానికి కేరళ స్టోరీ ఓ మలుపు కాగలదు. ఈ నేపథ్యంలో ఈ సినిమా కథా కమామిషేమిటో ఓసారి చూద్దాం...

కథ

శాలినీ ఉన్ని కృష్ణన్ (అదా శర్మ), గీతాంజలి (సిద్ధీ ఇద్నానీ) అనే ఇద్దరు హిందూ విద్యార్థినిలు, నిమా (యోగితా బీహానీ) అనే క్రిస్టియన్ విద్యార్థిని, ఆసిఫా (సోనియా బలానీ) అనే ముస్లిం విద్యార్థిని నల్గురూ కేరళలోని కాసర్ గోడ్ లో నర్సింగ్ కాలేజీలో చదువుతూ హాస్టల్లో వుంటారు. ఆసిఫా సిరియా ఉగ్రవాద సంస్థ ఐసిస్  స్లీపర్ సెల్ ఏజెంట్ గా వుంటుంది. ఈ స్లీపర్ సెల్ స్థానిక నాయకుడి ఆదేశాల ప్రకారం, ఇతర మతాల అమ్మాయిలకి మాయ మాటలు చెప్పి మతంలోకి మార్చి, ముస్లిం యువకులతో ప్రేమలోకి దింపితే, ఆ ముస్లిం యువకులు పెళ్ళిళ్ళు చేసుకుని సిరియా తీసికెళ్ళి పోయి పవిత్ర యుద్ధంలో పాల్గొనాలని ప్లాను.
        
ఆసిఫాతో ఈ ప్లాను ఆలస్యమవుతూంటే, వాళ్ళని గర్భతుల్ని చేసి పెళ్ళికి దారి క్లియర్ చేయమని ఆదేశిస్తాడు నాయకుడు. ముస్లిం యువకుడు రమీజ్ తో ప్రేమలో పడ్డ శాలిని గర్భవతవుతుంది. ఇంకో ముస్లిం తో గీతాంజలి కూడా గర్భవతై ఆత్మహత్య చేసుకుంటుంది. నిమా సురక్షితంగా వుంటుంది. ఇక గర్భవతైన శాలిని పెళ్ళి చేసుకోమని అడిగితే, మతం మారితే చేసుకుంటా నంటాడు రమీజ్. విధిలేక ఆమె మతం మారితే,  పెళ్ళి జరిగే సమయంలో పరారవుతాడు. ఇక దిక్కుతోచని శాలిని వేరే ఒకడ్ని పెళ్ళి చేసుకోక తప్పదనీ, పెళ్ళి చేసుకుని సిరియా వెళ్తే అల్లా స్వర్గాన్ని అనుగ్రహిస్తాడనీ నూరిపోస్తాడు నాయకుడు. దీంతో శాలినీ ముక్కూ మొహం తెలీని వాణ్ని చేసుకుని సిరియా వెళ్ళాక, అక్కడ అసలు మోసం గ్రహిస్తుంది.

ఎలావుంది కథ

ఇది కేరళలో జరుగుతున్న లవ్ జిహాద్ ని పురస్కరించుకుని చేసిన కల్పిత కథ అన్నారు దర్శకుడు, నిర్మాత. టీజర్ లో 32000 అమ్మాయిలన్నారు, సినిమా విడుదలకి ముందు సుప్రీం కోర్టులో కాదు ముగ్గురు అమ్మాయిలే అన్నారు, సినిమాలో ఒకమ్మాయి కథే చూపించారు. ఇలా వుంది విశ్వసనీయత. అసలు లవ్ జిహాద్ పదాన్నే కేంద్రప్రభుత్వం గుర్తించడం లేదనీ, అలాటి కేసులు ప్రభుత్వ దృష్టికి రాలేదనీ, కేంద్ర మంత్రి జి. కిషన్ రెడ్డి లోక్ సభలో ప్రకటించాక, మత మార్పిడి చట్టం తేవాలన్న ఆలోచనే కేంద్ర ప్రభుత్వానికి లేనప్పుడు, కొన్ని  బీజేపీ రాష్ట్రాలే చట్టం చేస్తూ, దాన్ని లవ్ జిహాద్ చట్టమని అననప్పుడు, కేరళలో లవ్ జిహాద్ అంటూ దుమారం రేపిన కేసుని సుప్రీం కోర్టు కొట్టేసి, మతాంతర ప్రేమ జంటని ఏకం చేసినప్పుడు- ఇవన్నీ సాక్ష్యాలే. వీటిని కాదని బడాయికి పోయి అభూతకల్పనల, నమ్మదగని  సినిమా తీశారు.
        
కేరళలో మతశక్తులు లేవని కాదు. ఇరు వర్గాల మత శక్తులూ చక్కగా వున్నాయి. వీటి మధ్య సిరియా కనెక్షన్ తో కొట్లాటలు జరుగలేదు. ఇండియా నుంచి సిరియా కెళ్ళిన ముస్లింలు 100 మంది వరకూ వుంటారని కేంద్ర ప్రభుత్వమే ప్రకటించింది. ఇందులో లవ్ జిహాద్ బాధితులైన హిందూ అమ్మాయిల లెక్క చెప్పలేదు. అయితే సినిమాలో చూపించిన ముగ్గురమ్మాయిల అనుభవాలూ నిజమని సినిమా కర్తలు చెప్తున్నారు. నిజమే కావచ్చు. అయితే మొత్తం ఒక రాష్ట్రాన్నీ, మతాన్నీ చెడుగా చూపిస్తూ సినిమా తీయడం సృజనాత్మక స్వేచ్ఛ అన్పించుకోదు, రాజకీయ ఎజెండా అన్పించుకుంటుంది. టెర్రరిజం మీద చాలా సినిమాలు తీశారు. ఇలా చూపించలేదు. ఒక వర్గం స్మగ్లర్లతో, మాఫియాలతో తీసిన సినిమాల్లో కూడా వీళ్ళని వ్యతిరేకించే అదే వర్గంలో మంచి వాళ్ళని కూడా చూపించారు. కానీ కేరళ స్టోరీ లో మొత్తం ఆ వర్గాన్ని బ్యాడ్ గా చూపించారు మంచిదే, రాజకీయ ఎజెండా కాబట్టి. కానీ మెజారిటీ వర్గాన్ని అసమర్ధులుగా చూపిస్తున్నామని తెలుసుకో లేదు అభూతకల్పిస్టులు.
        
ఇక కేరళ దృశ్యాలకి సిరియా వికృత దృశ్యాలు కలిపి చూపించడంతో రెచ్చగొట్టే కావాల్సినంత మసాలా దొరికినట్టయ్యింది. అయితే ఈ సిరియా దుర్మార్గాలు కొత్తగా చూస్తున్నవేం కావు. మీడియాలో తెలిసినవే. కేరళలో స్లీపర్ సెల్ నాయకుడంటాడు- ఔరంగజేబు ప్రారంభించిన పని మనం పూర్తి చేయాలని. ఇదొక వక్రీకరణ. ఔరంగజేబు తల్చుకుని వుంటే - వాళ్ళు పాలిస్తున్న ఈ దేశానికి హిందూస్థాన్ అని పేరు పెట్టుకునే వాళ్ళే కాదు.
        
పోతే, 2020 లో నెట్ ఫ్లిక్స్ సిరీస్ కాలిఫేట్ లో కూడా ఇలాగే స్వీడెన్ కి చెందిన ముగ్గురమ్మాయిల కథ. మోసపోయి సిరియా పవిత్ర యుద్ధం లో ఇరుక్కునే కథ చూడొచ్చు. 

నటనలు - సాంకేతికాలు 

అదా శర్మ నటించిన ఈ పాత్ర వేరే కమర్షియల్ సినిమాల్లోనైతే, విషయం తో కూడి వుండి - ఇంకెవరైనా సమర్ధురాలైన నటితో తీసి వుండేవాళ్ళు. తన మీద ఆధారపడ్డ ఈ కథలో కదిలించే, సానుభూతిని పొందే సన్నివేశాలన్నిటినీ చెడగొట్టింది. ఇందుకు కూడా నేషనల్ మీడియా అలాటి రేటింగ్స్ ఇచ్చి వుంటుంది. ఆమె నటన గురించి చెప్పుకునేందుకు ఏమీలేదు.
        
దర్శకుడు చిత్రించిన పాత్ర గురించి చెప్పుకోవాలి. నర్సింగ్ చదువుతున్న తను సేఫ్ సెక్స్ తెలియనట్టు గర్భం తెచ్చుకోవడం, పెళ్ళి కోసం మతం మార్చుకోవడం, పెళ్లి కొడుకు పారిపోతే ఇంకొకడ్నిపెళ్ళి చేసుకోవడం, వాడితో అల్లా ఆనుగ్రహించే స్వర్గం కోసం సిరియా వెళ్ళడం లాంటివి‌ చేసేస్తూంటుంది.
        
ఆసిఫా ప్లాను ప్రకారం పబ్లిక్ గా నల్గురు కుర్రాళ్ళ చేత ఈవ్ టీజ్ చేయించి  బట్టలు చించేస్తే, పోలీస్ కంప్లెయింట్ ఇచ్చి లోపలేయించకుండా ఆసిఫా మాటల్ని నమ్ముతుంది. బురఖా వేసుకుంటే రేపులు జరగవని ఆసిఫా చెప్పింది నమ్మేసి బురఖాలు వేసుకోవడం మొదలెడతారు. అల్లా గురించి ఏవో మాటలు ఆసిఫా చెప్తే, నమ్మేసి ముస్లిం కుర్రాళ్ళని ప్రేమిస్తారు. గర్భవతులవుతారు. మోసపోయానని తెలిసీ గీతాంజలి కంప్లెయింట్ ఇవ్వకుండా ఆత్మహత్య చేసుకుంటుంది.  కూతురు (అదాశర్మ) పెళ్ళవుతూంటే వచ్చేసిన ఆమె తల్లి, ఏడ్చి వెళ్ళి పోతుంది. ఆమె కంప్లెయింట్ ఇచ్చి వుంటే  స్లీపర్ సెల్ ముఠా అప్పుడే కటకటాల్లో వుండేది. కూతురు దక్కేది.
        
ఇలా అడుగడుగునా పాత్రలు అసమర్ధంగా ప్రవర్తిస్తే ఈ కథకి వేరే అర్ధాలొస్తాయని దర్శకుడు గ్రహించ లేదు. తమతోనే వుంటూ ఆసిఫా కుట్రలు చేస్తోందని తెలిసిపోతున్నప్పుడు- రెండు పీకుళ్ళు పీకితే సరిపోయేదానికి ప్రాణాల మీదికి  తెచ్చుకున్న సిల్లీ పాత్రలివి.
        
సాంకేతికంగా అరాచకంగా వుంది. కేరళ దృశ్యాలు గానీ, సిరియా దృశ్యాలు గానీ పూర్ గా వున్నాయి. యాక్షన్ సీన్స్ కి అవకాశం లేదు. అదాశర్మ చివర్లో పారిపోయే రెండు మూడు దృశ్యాలు కూడా క్లయిమాక్స్ ని నీరుగార్చేస్తాయి. మనీషా కోయిరాలాతో తీసిన కాబూల్ ఎక్స్ ప్రెస్ లో గానీ, ఎస్కేప్ ఫ్రమ్ తాలిబన్ లో గానీ టెర్రిఫిక్ గా దృశ్యాలుంటాయి. ఇక కేరళ సంగీతం, పాటలు ఒరిజినల్ హిందీ వెర్షన్లో తమాషాగా వున్నాయి.

చివరికేమిటి

సిరియా వదిలి పారిపోతూ అంతర్జాతీయ దళాలకి చిక్కిన అదా శర్మ తన కథ చెప్పుకోవడంతో ఈ సినిమా ప్రారంభమవుతుంది. ఇక్కడికి రావడానికి ముందు కేరళలో జరిగిన కథంతా మల్టీపుల్ ఫ్లాష్ బ్యాకులుగా వస్తూంటుంది. దీంతో పాటు సిరియాలో ఎదుర్కొన్న అనుభవాలూ మల్టీపుల్ ఫ్లాష్ బ్యాకులుగా సెకండాఫ్ పై వరకూ సాగుతూనే వుంటాయి. ఆమె భద్రతా దళాలకి దొరికిన ప్రధాన కథ అక్కడే వుంటుంది ఏమీ జరక్కుండా. దీంతో మల్టీపుల్ ఫ్లాష్ బ్యాకులు చూసీ చూసీ విసుగొచ్చేస్తుంది. ముందుకూ వెనక్కీ కదిలే ఈ నాన్ లీనియర్ నేరేషన్ వల్ల ఏదైనా బలం వుంటే అది కథ కోల్పోయింది. ఆమె మొత్తం చెప్పడం ముగించాక భద్రతా దళాల క్యాంపులోనే సినిమా ముగుస్తుంది.
        
ఇలాటి విశ్వసనీయత, సృజనాత్మకత, నటనలు, డ్రామా వున్న కథకి ఉపసంహారంగా ఇద్దరు బాధితుల స్టేట్మెంట్లు జత చేశారు. ఇక్కడ 32000 మంది ప్రస్తావన లేదుగానీ, సెకండాఫ్ లో క్రిస్టియన్ అమ్మాయి పాత్ర- పోలీసు అధికారులకి చెప్తుంది-  చాలా డేటా అందిస్తుంది. ఇంత డేటా తెలిసి వుంటే ఎలా మోసపోయిందో పక్కన పెడితే, మొత్తం 30 వేల మంది అమ్మాయిలు అదృశ్యమయ్యారని, అప్పటి ముఖ్యమంత్రి ఊమెన్ చాండీ చెప్పారనీ తప్పుడుగా చెప్తుంది. సుప్రీం కోర్టుకి టీజర్ నుంచి 32000 అంకె తొలగిస్తామని చెప్పిన నిర్మాత సినిమాలోంచి తొలగించలేదు. 2006-12 మధ్యకాలంలో 2667 మంది యువతులు స్వచ్ఛందంగా ఇస్లాంలోకి మారారని మాత్రమే చాండీ అసెంబ్లీలో ప్రకటించారు. దీన్ని 3000 చొప్పున తానే లెక్కకట్టి, ఆ తర్వాత పదేళ్ళలో-ఇప్పటికి 30 వేలు అని చెప్పేసినట్టుంది ఆమె!
        
ఈ అంకెల సంక్షోభమేమిటో నిన్న గుజరాత్ స్టోరీ ప్రకటించిన నేషనల్ క్రైమ్ రికార్డ్స్ బ్యూరేయే చెప్పాలి! కానీ అంకెలు ఇప్పుడెంత సరిదిద్దినా వెళ్ళాల్సిన 32000 సంఖ్య  ప్రేక్షకుల్లోకి వెళ్ళిపోయాక దాంతో అనుకున్న ఎజెండా హిట్టయినట్టే! హేట్సాఫ్ టు రెండో వివేక్ అగ్నిహోత్రీ...

—సికిందర్