రివ్యూలు, సాంకేతికాలు, స్క్రీన్ ప్లే సంగతులు...

టికెట్లు దొరకడం యోగం, సినిమాలు చూడడం భోగం, రివ్యూలు రాయడం రోగం!

14, డిసెంబర్ 2022, బుధవారం

1264 : న్యూస్


  సూపర్ స్టార్ రజనీకాంత్  72వ పుట్టిన రోజు సందర్భంగా రెండు సంబరాలు జరిగాయి. డిసెంబర్ 10 న బాబా రీ రిలీజ్, డిసెంబర్ 12 న జైలర్ ఫస్ట్ లుక్ టీజర్ రిలీజ్. రెండూ ఫ్యాన్స్ ని నిరాశపర్చాయి. తలైవా కేమైంది, ఇలా చప్పగా రెండు సంబరాలు కా నిచ్చేశారని కుమిలిపోతున్నారు. బాబా ఇదివరకే ఫ్లాప్ అయినా, దీని రీరిలీజ్ కల్లా ఎదిగివచ్చిన కొత్త తరం ప్రేక్షకులు హిట్ చేస్తారులే అనుకుంటే అది జరగలేదు. 2002 లో విడుదలైన బాబా విశేషమేమిటంటే ఇది టీవీల్లో సీడీల్లో ఓటీటీల్లో ఎక్కడా విడుదల కాలేదు. కాబట్టి 2002 తర్వాత ఎవ్వరూ చూసే అవకాశం లేదు. అయినా  ఇన్నాళ్ళకి తిరిగి థియేటర్లకే వస్తే ఏ మాత్రం క్రేజ్ లేదు. ఈ పుండు మీద కారం జల్లినట్టు జైలర్ ఫస్ట్ లుక్ టీజర్ కూడా తుస్సుమనడంతో బెంబేలెత్తి పోయారు.

        రీ తుస్సుమనలేదుగానీ, మిశ్రమ స్పందన వస్తోందని సర్ది చెప్పుకుని డిప్రెషన్ నుంచి తేరుకునే ప్రయత్నం చేస్తున్నారు. ముత్తువేల్ పాండియన్ గా జైలర్ లో నటిస్తున్న రజనీకాంత్ స్క్రీన్ ప్రెజెన్స్ కి తొలిసారి ఈ పరిస్థితి ఎదురైంది. రజనీ గెటప్ బావుంది, కాదనలేం, కానీ దర్శకుడు నెల్సన్ దిలీప్ కుమార్ రజనీని  ప్రెజెంట్ చేసిన విధానం ఏమాత్రం బాగా లేదు.
        
యాక్షన్ లేదు, పైగా రజనీ స్లో మూమెంట్స్, కత్తిని తీసినప్పుడు కూడా చప్పట్లు పడే హీరోయిజం లేదు, ముగింపు కూడా చప్పగానే వుంది, బిజీఎం అయితే పూర్తిగా ఫ్లాపయ్యింది. సినిమా విడుదలకి ఇంకా చాలా సమయముంది గాబట్టి, ఇతర ప్రోమోలు, ట్రైలర్స్ ఈ మైనస్ పాయింట్స్ ని కవర్ చేస్తాయేమో చూడాలని ఫ్యాన్స్ ఆశ. గత సినిమాల్ని  పరిశీలిస్తే, రజనీ స్క్రీన్ ప్రెజెన్స్ ఫ్యాన్స్ ని, ఆడియెన్స్ నీ ఎప్పుడూ మంత్రముగ్దుల్నే చేశాయి.
        
కథ చూస్తే బిగ్ బడ్జెట్ యాక్షన్ హంగామా, టీజర్ చూస్తే లో గ్రేడ్ సరంజామా. టీజర్ లో మందుగుండు పేలితేనే కదా జైలర్ కి జోష్ వచ్చేది? ఒక కరుడుగట్టిన గ్యాంగ్‌స్టర్ జైలు నుంచి తప్పించుకోవడానికి పన్నిన పన్నాగాన్ని రజనీ తిప్పికొట్టే జైలర్ గా బోలెడు యాక్షన్ కి స్కోపున్న కథ. ఈ ఎనర్జిటిక్ పాత్రలో రజనీని చూడాలనుకున్న ఫ్యాన్స్ కి నిద్రపుచ్చే విధంగా టీజర్ రావడంతో లబోదిబో మంటున్నారు. కొరియా, జపాన్ వంటి దేశాల్లో కూడా రజనీ ఫ్యాన్స్ వున్నారు. వారి పరిస్థితేంటో తెలీదు.
        
మొత్తానికి బాబా రీరిలీజ్ తో, జైలర్టీజర్‌తో సౌత్ ఇండియన్ సూపర్ స్టార్ రజనీకాంత్ పుట్టినరోజు వేడుకలు వన్నె తగ్గాయి. రజనీ గత రెండు సినిమాలు ఫ్లాప్ కావడంతో జైలర్ ఏమవుతుందోనని ఆందోళన ఓ పక్క. శివకార్తికేయన్ తో డాక్టర్, విజయ్ తో బీస్ట్ సినిమాలతో బ్లాక్ బస్టర్ డైరెక్టర్ గా గుర్తింపు తెచ్చుకున్న నెల్సన్ దర్శకత్వం వహిస్తున్న జైలర్  పై భారీ అంచనాలే వున్నాయి.

ఇందులో రజనీకాంత్‌తో పాటు శివరాజ్‌కుమార్, రమ్యకృష్ణ, యోగిబాబు, వసంత్ రవి, వినాయకన్‌లు కీలక పాత్రలు పోషిస్తున్నారు. ఇది 2023 ఏప్రెల్ లో విడుదల కావచ్చు. రజనీ, నెల్సన్ దిలీప్ కుమార్, సంగీత దర్శకుడు  అనిరుధ్ రవిచందర్‌ల కాంబినేషన్ ఇది మొదటిది. రజనీకాంత్ చివరిసారిగా 2021లో  అన్నాత్తే’, దీనికి ముందు  2020 లో దర్బార్‌ లో కనిపించారు. ఈ రెండూ బాక్సాఫీస్ డిజాస్టర్స్ గా నిలిచాయి.
        
ఇప్పుడు ఏ స్టార్ అయినా పాన్ ఇండియా ఇమేజ్ గురించి మాట్లాడుతున్నారు. కానీ రజనీకాంత్ ఆ ఇమేజ్‌ని అందుకోలేదు. బాలీవుడ్ స్టార్స్ కూడా రజనీకాంత్ సినిమాల కోసం ఎదురు చూస్తున్నారంటే ఆయన రేంజ్ ఏ స్థాయిలో వుందో తెలుస్తోంది. అయితే పానిండియా లెవెల్ ని ఆయన అందుకోవాలి. స్టైల్ అంటే రజనీకాంత్, రజనీకాంత్ అంటే స్టైల్ అనేది పానిండియా లెవెల్లో శంకర్ తీసిన రోబో’, రోబో2 లతోనే వర్కౌట్ అయింది.
        
పాన్ ఇండియా మార్కెట్‌తో పాటు జపాన్ వంటి అంతర్జాతీయ మార్కెట్‌లోనూ ఈ రెండు బ్లాక్ బస్టర్స్ సత్తా చాటాయి. అలాంటిది  ఈ మధ్య కాలంలో ఆ రేంజ్ సినిమాలు రాకపోవడంతో తలైవా అభిమానులు నిరాశకి గురవుతున్నారు.
        
ఇకపోతే, బ్రేకింగ్ న్యూస్ ఏమిటంటే, జైలర్ కామెడీ థ్రిల్లర్‌గా వుండొచ్చట. దర్శకుడు నెల్సన్ డాక్టర్ ని కామెడీ థ్రిల్లర్ గానే తీశాడు. జైలర్ కూడా ఇదే టైపులో వుంటుందని తెలుస్తోంది. రజనీకాంత్ సినిమాలు చూస్తూ పెరిగిన ప్రేక్షకులకి ఆయన అద్భుతమైన కామిక్ టైమింగ్ గురించి పూర్తిగా తెలుసు. అయినప్పటికీ ఆయన గత సినిమాల్లోని క్వాలిటీ ఇటీవలి  సినిమాల్లో కానరావడం లేదు. రజనీతో సినిమాలు తీస్తున్న కొత్త తరం దర్శకులతో వచ్చిన మార్పు ఇది.

పోతే, జైలర్ ఒక్కడే కాదు, ఇంకో ఇద్దరు జైలర్లు వున్నారని బైట పడింది. జైలర్ అనే ఒక మలయాళ సినిమా, జైలర్ అనే విదేశీ సినిమా ఒకేసారి రెడీ అవుతున్నాయి. ఈ సమాచారం ఇంటర్నెట్‌లో వైరల్‌ అవుతోంది.

—సికిందర్


13, డిసెంబర్ 2022, మంగళవారం

1263 : న్యూస్


  పాకిస్తానీ వెబ్ సిరీస్ సేవక్ -ది కన్ఫెషన్స్ ని కేంద్ర ప్రభుత్వం నిన్న నిషేధించింది. దేశ సార్వభౌమత్వం, సమగ్రత, భద్రత, విదేశీ సంబంధాలు ఈ వెబ్ సిరీస్ తో దెబ్బతినేలా వున్నాయని ప్రకటించింది. వెబ్ సిరీస్‌లో భారత వ్యతిరేక కంటెంట్‌ ని చూపించినందుకు పాకిస్తాన్‌ కి చెందిన ఓటీటీ ప్లాట్‌ఫాం విడ్లీ టీవీ వెబ్‌సైట్, రెండు మొబైల్ అప్లికేషన్‌లు, నాలుగు సోషల్ మీడియా ఖాతాలు, ఒక స్మార్ట్ టీవీ యాప్‌ ని బ్లాక్ చేసినట్టు కేంద్రం ప్రకటించింది. అయితే ఈ వెబ్ సిరీస్ యూట్యూబ్ లో అందుబాటులో వుంది. నవంబర్ 26 నుంచి స్ట్రీమింగ్ అవుతున్న వెబ్ సిరీస్ మొదటి ఎపిసోడ్ యూట్యూబ్ లో అప్ లోడ్ అవగా, రెండో ఎపిసోడ్ గత వారం అప్ లోడ్ అయింది.

        మాచార ప్రసార మంత్రిత్వ శాఖ వెబ్ సిరీస్‌లో వున్న అనేక అభ్యంతరకర అంశాలని హైలైట్ చేసింది. వీటి ఆధారంగా ఈ నిర్ణయం తీసుకుంది. 1) వెబ్ సిరీస్ టైటిల్స్ లో జాతీయ పతాకంలో అశోక చక్రాన్ని మంటల్లో చూపడం, 2) భారత్ కి సంబంధించిన చారిత్రక ఘటనల వక్రీకరణ- ఉదా. ఆపరేషన్ బ్లూ స్టార్, దాని పర్యవసానాలు; అయోధ్యలో బాబ్రీ మసీదు కూల్చివేత, క్రైస్తవ మిషనరీ గ్రాహం స్టీన్స్ హత్య, మాలెగావ్ పేలుళ్ళు, సంఝౌతా ఎక్స్ ప్రెస్ పేలుళ్ళు, సట్లెజ్ యమునా లింక్ కాలువకి  సంబంధించిన అంతర్జాతీయ నదీ జలాల వివాదం మొదలైనవి.

3)  భారత ప్రభుత్వంపై ప్రజల్లో విద్వేషాన్ని పెంచే చిత్రీకరణలు. ఉదా. ఆపరేషన్ బ్లూ స్టార్ పర్యవసానంగా జరిగిన సంఘటనల గాయాల్ని తర్వాతి తరం సిక్కు ప్రజల్లో రేపడం, భారత ప్రభుత్వం ముస్లిం సమాజ ప్రయోజనాలకు వ్యతిరేకమని  చెప్పడం, బాబ్రీ మసీదు కూల్చివేతలో అన్ని రాజకీయ పార్టీలూ చేతులు కలిపాయని చూపడం; ముస్లింలు, సిక్కులు, క్రైస్తవులు భారతదేశ అంతర్గత ముప్పు అని ఒక న్యూస్ ఛానెల్ పేర్కొంటున్నట్టు చూపడం.

4) భారత్ పట్ల సిక్కు సమాజంలో వేర్పాటువాదాన్ని, అసంతృప్తినీ ప్రేరేపించడం; ఆపరేషన్ బ్లూ స్టార్‌ ని అమాయక సిక్కుల ఊచకోతగా చిత్రీకరించడం, ఆపరేషన్ బ్లూ స్టార్ తర్వాత పంజాబ్‌లోని పరిస్థితుల్ని దురుద్దేశపూర్వకంగా, బలమైన మతతత్వ స్వరంతో చూపించడం; హింస, దానిపై పోలీసు చర్య మతపరమైన కారణాలతో జరిగినట్టు చూపడం, పంజాబ్‌లోని పోలీసులందర్నీతలపాగాలు లేకుండా చూపడం, సిక్కుయేతర పోలీసులు సిక్కు జనాభాని ఖలిస్తానీ ఉగ్రవాదులుగా ముద్రవేశారని చెప్పడం.

5) ఒక సన్నివేశంలో, హిందూ పిల్లలు ముస్లిం-క్రిస్టియన్- సిక్కు మతస్థుల్ని చంపడానికి పెరగాలని, వారివల్ల మైల పడిన మాతృభూమిని శుభ్రపరచాలని ఒక హిందూ పూజారి ప్రకటిస్తున్నట్లు చూపించడం.

6) షెడ్యూల్డ్ కులాల వారిని హిందువులుగా వుండవలసిందిగా బలవంత పెడుతున్నట్టు ఒక దృశ్యంలో చిత్రీకరించడం. మతపరమైన చిహ్నాల నుపయోగించి, 1984 నాటి సిక్కు వ్యతిరేక అల్లర్లను సిక్కులపై హిందువులు చేసిన దాడిగా చూపించడం.

పై ఉద్దేశపూర్వక దుష్ప్రచార సామగ్రిని కలిగి వున్నందున్న వెబ్ సిరీస్ ని నిషేధిస్తు న్నట్టు కేంద్రం విడుదల చేసిన ఉత్తర్వుల్లో  పేర్కొంది. ఇప్పటికే సోషల్ మీడియాలో వెబ్ సిరీస్ కి వ్యతిరేకంగా దుమారం రేగుతోంది.

సేవక్: ది కన్ఫెషన్స్వెబ్ సిరీస్ ఎనిమిది ఎపిసోడ్స్ లో రెండు ఇప్పటికే విడుదలయ్యాయి. కేంద్రం ఓటీటీ ప్లాట్ ఫాంని బ్యాన్ చేసినా యూట్యూబ్ లో వైరల్ అవుతోంది. పాకిస్థానీ నిర్మాతలు భారత ప్రభుత్వ బ్యాన్ ని ఎదుర్కోవడానికే యూట్యూబ్ లో అప్లోడ్ చేస్తున్నట్టుంది. ఈ వెబ్ సిరీస్ 1984 నుంచి 2022 వరకూ భారత్ లో తీవ్రవాద గ్రూపులు చేసిన దురాగతాల్నివివరిస్తూ రచయిత సాజి గుల్, దర్శకుడు అంజుమ్ షెహజాద్ రూపొందిస్తున్నారు.

రెండవ ఎపిసోడ్‌ మొదటి దానికంటే తీవ్రమైన కంటెంట్ తో వుంది. భారత్ లోని ముస్లిం, సిక్కు కుటుంబాల్ని నాశనం చేసిన కొన్ని లోతైన రాజకీయ రహస్యాల్ని విప్పుతున్నట్టు చెప్పుకుంటూ సాగుతోందీ ఎపిసోడ్. ఈ వెబ్ సిరీస్ నవంబర్ 26న పాకిస్థాన్‌లో విడుదలైంది. అప్పటి ప్రధాని ఇందిరా గాంధీ హత్య తర్వాత జరిగిన సిక్కు వ్యతిరేక అల్లర్లు, 2002లో గుజరాత్ అల్లర్లు, బాబ్రీ మసీదు వివాదం- వీటి ఆధారంగా వెబ్ సిరీస్ ని రూపొందించినట్టు చెప్పుకుంటున్నారు. హిందూ సాధువుల్ని క్రిమినల్స్ గా చూపడంతో బాటు, మహారాష్ట్రలోని యాంటీ టెర్రరిస్ట్ స్క్వాడ్ అధిపతి హేమంత్ కర్కరేని, జర్నలిస్టు గౌరీ లంకేష్ నీ, ఖలిస్తానిస్టు దీప్ సిద్ధూని  కూడా వెబ్ సిరీస్‌లో చూపించారు.

సాధూజీ కెహతే హై జిస్ దిన్ మనుష్ జనమ్ లేతా హై, ఉసీ దిన్ ఉస్ కా రాక్షస్ భీ జనమ్ లేతా హై (మనిషి జన్మించినప్పుడే అతడితో బాటూ రాక్షసుడూ జన్మిస్తాడని సాధూజీ అంటున్నారు) వంటి డైలాగులున్నాయి. ఈ కథలో సినిమా హీరో జీత్ సింగ్ మరణం వెనుక వున్న నిజాన్ని తెలుసుకోవాలనే తపనతో జర్నలిస్టు విద్య, ఆమె ఇన్‌ఫార్మర్ మన్నూ సాగించే ప్రయాణంలో గత చరిత్రలో సంఘటనలు వెల్లడవుతూంటాయి. ఒకవైపు కాశ్మీర్ ఫైల్స్’, ఇంకో వైపు సేవక్ ది కన్ఫెషన్స్’,  మరోవైపు రాత్రయిందంటే గోదీ మీడియా హిందూ ముస్లిం డిబేట్ల మంటలు- ఈ ఫేక్ న్యూసులన్నీ సృష్టిస్తున్న కాలుష్యాన్నంతా కడిగి, మాతృభూమిని శుభ్రపర్చాల్సిన అవసరం చాలా వుంది.

—సికిందర్

 

 

 

 

12, డిసెంబర్ 2022, సోమవారం

1262 : రివ్యూ + స్క్రీన్ ప్లే సంగతులు

దర్శకత్వం : గంగాధర్
తారాగణం: విశ్వక్సేన్, వికాస్ వశిష్ట, ప్రియా వడ్లమాని, అయేషా ఖాన్, చైతన్య రావు, రవిశంకర్ తదితరులు
కథ, స్క్రీన్ ప్లే, మాటలు: సందీప్ రాజ్, సంగీతం: కాల భైరవ, ఛాయాగ్రహణం:  శ్రీనివాస్ బెజుగం
బ్యానర్: పాకెట్ మనీ పిక్చర్స్
నిర్మాతలు: ప్రదీప్ యాదవ్, మోహన్ యెల్లా
విడుదల : డిసెంబర్ 9, 2022
***
        క్రైమ్ సినిమాలు విరివిగా వస్తున్న క్రమంలో ముఖచిత్రం ఇంకో కొత్త దర్శకుడి ప్రయత్నంగా తెరపై కొచ్చింది. ఒకప్పుడు ఇవే క్రైమ్ సినిమాలు అన్ని భాషల్లో బి గ్రేడ్ సినిమాలుగా వచ్చి వెళ్ళి పోయేవి. ఇదే పరిస్థితి హార్రర్ సినిమాలది. హార్రర్ సినిమాల్ని ఈ శతాబ్దం ఆరంభంలో బాలీవుడ్ లో స్టార్స్ తో తీస్తూ బి గ్రేడ్ నుంచి అప్గ్రేడ్ చేయడంతో ప్రేక్షకులు పెరిగి మెయిన్ స్ట్రీమ్ సినిమాలుగా రావడం మొదలెట్టాయి. క్రైమ్ సినిమాలతో ఇది జరగలేదు.

        దీంతో చిన్న హీరో హీరోయిన్లతో, కొత్త హీరో హీరోయిన్లతో ఇప్పటికీ ఇవి మెయిన్ స్ట్రీమ్ లోకి రావడం లేదు. తెలుగులో ఎప్పుడో వచ్చే అడివి శేష్ క్రైమ్ సినిమాలు తప్ప స్టార్ స్టేటస్ కి అప్ గ్రేడ్ అవుతున్న దాఖలాల్లేవు. అయితే కొన్ని చిన్న సినిమాలు క్రైమ్ తో తీస్తే దృష్టినాకర్షించే కథాంశాలతో వుంటాయి. ఇది అరుదుగా జరుగుతుంది. దీన్ని జాగ్రత్తగా ఒడిసి పట్టుకుని ప్రేక్షకుల్లోకి తీసికెళ్ళ గలిగితే చిన్న క్రైమ్ సినిమాయే పెద్ద హిట్టయ్యే అవకాశముంటుంది. ఇలాటిదొక మెయిన్ స్ట్రీమ్ కథాంశం ముఖచిత్రం ది. మరి ఈ అవకాశాన్ని సొమ్ము చేసుకోగలిగారా? దీనికి గంగాధర్ అనే అతను కొత్త దర్శకుడు. రచన చేసింది కలర్ ఫోటో దర్శకుడు. ఈ ఇద్దరూ చేతిలో వున్న యూనివర్సల్ కథాంశాన్ని క్రైమ్ తో జోడించి ఏ మేరకు సద్వినియోగం చేసుకుని బాగు పడ్డారో చూద్దాం...  

కథ

    రాజ్  (వికాస్ వశిష్ట) కాస్మెటిక్ సర్జన్ హైదరాబాద్ లో. అతడ్ని మాయా ఫెర్నాండెజ్ (ఆయేషా ఖాన్) ప్రేమిస్తూంటుంది. ఈ చిన్నప్పటి ఫ్రెండ్ ని కాదనుకుని విజయవాడలో మహతి (ప్రియా వడ్లమాని) ని పెళ్ళి చేసుకుంటాడు. ఒక రోజు మాయా రోడ్డు ప్రమాదంలో మొహం చితికిపోయి కోమాలో కెళ్ళి పోతుంది. మరోవైపు మహతి మెట్ల మీంచి జారిపడి చనిపోతుంది. వీళ్ళిద్దరూ కూడా చిన్ననాటి స్నేహితురాళ్ళే. ఇప్పుడు మొహం చితికి పోయిన మాయ కోమాలోంచి తేరుకున్నాక ఛూస్తే, తన ముఖం మహతిలా మారిపోయి వుంటుంది. మొహం చితికిన మాయాకి చనిపోయిన భార్య మహతి చర్మం తీసి ప్లాస్టిక్ సర్జరీ చేశానని చెప్తాడు రాజ్. ఇప్పుడు మహతిలా వున్న మాయా జీవితమేమిటి? ఆమె మహతి గురించి తెలుసుకున్న నిజమేంటి? దాంతో మహతితో రాజ్ పాల్పడిన నేరాన్ని ఎలా బయటపెట్టి శిక్షించింది? ఇందులో లాయర్ విశ్వ (విశ్వక్సేన్) పోషించిన పాత్రేమిటి? ... వీటికి సమాధానాలు మిగతా కథలో తెలుస్తాయి.

ఎలావుంది కథ

    వైవాహిక అత్యాచారం (మారిటల్ రేప్) స్టోరీ ఐడియాతో ఈ క్రైమ్ కథ చేశారు. తెలుగు సినిమాల్లో బహుశా ఇది మొదటిసారి. ఇలా యూనిక్ ఐడియాగా వున్న దీని కథా విస్తరణ గందరగోళంగా వుంది. యూనిక్ ఐడియా గల్లంతయింది. సామాజిక బాధ్యత పెద్ద మాటగా అన్పించవచ్చుగానీ, ఈ యూనిక్ ఐడియా విషయంలో ఈ కథ ఒక బాధ్యతే అవుతుంది. కానీ అల్లరి నరేష్ తో నాంది తీసినప్పుడు చట్టంలోని సెక్షన్ 211 తో దేశ భాషల్లో ఎక్కడా రాని యూనిక్ కథని ఎలా బాధ్యత లేకుండా కిల్ చేశారో, అలా ముఖ చిత్రం తో చేశారు. ఈ కథ ఏ వైవాహిక అత్యాచార బాధితులకి బాసటగా వుండాలో అది గాకుండా చేశారు.  

        వైవాహిక అత్యాచారం దానికదే ఒక నేరం (కోర్టులు ఒప్పుకోకపోయినా నైతికంగా నేరమే). ఈ మౌలిక పాయింటుని  ఇంకో నేరంతో కలిపి కథ చేస్తే మౌలిక పాయింటే గల్లంతై పోతుంది. ఏదో వొక పాయింటుతో కథ చేయాలి- వైవాహిక అత్యాచారమా? ముఖ మార్పిడి  నేరమా? ఏదో వొకటి. రెండూ కలిపి చేస్తే మొదటిది బలై పోతుంది. ఇదే జరిగింది. ఈ ముఖ మార్పిడి కూడా గజిబిజి క్రైమ్ కథే.

        వైవాహిక అత్యాచారం ఐడియా అనుకున్నాక, దీని మార్కెట్ యాస్పెక్ట్ విశ్లేషించుకోకుండా, ముఖ మార్పిడి క్రైమ్ తో క్రియేటివ్ యాస్పెక్ట్ కి పూనుకున్నారు. మార్కెట్ యాస్పెక్ట్ తో స్పష్టత లేకుండా క్రియేటివ్ యాస్పెక్ట్ కి పాల్పడితే ఇంతే. మార్కెట్ యాస్పెక్ట్ ని బట్టి క్రియేటివ్ యాస్పెక్ట్ వుంటుంది. ఇది బ్లాగులో పదేపదే చెప్పుకున్న పాత విషయమే.

       వైవాహిక అత్యాచారం విస్తృత మార్కెట్ యాస్పెక్ట్ వున్న స్టోరీ పాయింటు. దేశంలో ఇంతవరకూ రాని పానిండియా మూవీగా  ఈ తెలుగు సినిమా వెళ్ళగల సామర్ధ్యమున్న పాయింటు. లొట్టపీసు లోకల్ సినిమా కాదు. ఈ పాయింటుని కాస్త రీసెర్చి ఏదో చేసుకున్నట్టు కూడా కనిపించదు. కోర్టులో తోచినట్టు వాదనలు జరిపి, వైవాహిక అత్యాచారం నిందితుడైన హీరో రాజ్ పాత్రకి పదేళ్ళు శిక్ష పడేట్టు చేసి శుభం అనేశారు.

        వైవాహిక  అత్యాచారాన్ని నేరంగా సుప్రీం కోర్టు కూడా గుర్తించనప్పుడు, శిక్షెలా పడుతుంది? భార్య సమ్మతి లేకుండా భర్త శృంగారానికి బలవంతం చేయడం రేప్ కిందికొచ్చే నేరంగా పరిగణించడానికి గతంలో రెండు రాష్ట్రాల హైకోర్టులు కూడా ఒప్పుకోలేదు. అసలు భార్యకి భర్త తనని రేప్ చేస్తున్నాడని నిరూపించడమే కష్టమని ప్రముఖ లాయర్ ఫ్లేవియా అగ్నెస్ అంటున్నారు. ఫలానా రాత్రి తను మూడ్‌లో లేనని, తను నిద్రపోయిన తర్వాత, లేదా అనారోగ్యంతో వుంటే, బలవంతం చేశాడని ఆమె నిరూపించాలి. ఇదొక ఛాలెంజ్ అవుతుందని ఆమె అంటున్నారు.

        అంటే దీన్ని కథగా చేయాల్సి వస్తే ఆ భార్య కోర్టులో విఫలమై బాధితురాలిగానే మిగలాలి చివరికి. అప్పుడు కోర్టులకీ, పార్లమెంటుకీ వినబడేలా ఆక్రోశించాలి. ఒక గట్టి ప్రశ్నతో ముగించాలి. ముఖచిత్రం కథలో మరణించిన స్నేహితురాలు మహతికి న్యాయం కోసం మాయా కోర్టులో పోరాడుతుంది. అయితే మహతి భర్తని శిక్షించలేమని కోర్టు తీర్పుతో తెలుసుకుని- మయా తనూ ఒక నిర్ణయం తీసుకుని తిరుగుబాటు చెయ్యాలి- స్త్రీ స్వాతంత్ర్యాన్ని చట్టం గుర్తించకపోతే, వైవాహిక అత్యాచారం నుంచి రక్షణ కల్పించకపోతే- స్త్రీ ఎందుకు పెళ్ళి చేసుకుని రిస్కు చేయాలి? ఏ మగాడు ఎలాటి వాడో ఎలా తెలుస్తుంది? అందుకని నేను పెళ్ళే చేసుకోను- స్వతంత్రంగా వుండగలిగేంత జీతం వచ్చే ఉద్యోగం సంపాదించుకుని బతికేస్తాను, మీ పెళ్ళి వ్యవస్థకో గుడ్ బైరా నాయనా  - అనేసి వాకౌట్ చేస్తే ఎంతో కొంత అర్ధముండొచ్చు కథకి. సామాజిక బాధ్యతో, కథా ప్రయోజనమో, మరోటో నెరవేర్చి పుణ్యం కట్టుకున్నట్టు వుంటుంది. ఇలా యూనిక్ ఐడియాతో ఇది సినిమా వైరల్ అవడానికి అవకాశమున్న మార్కెట్ యాస్పెక్ట్ అవుతోంది.

ఇంకా వుంది...

        మార్కెట్ యాస్పెక్ట్ చెప్పుకున్నాక, క్రియేటివ్ యాస్పెక్ట్ చూద్దాం. క్రియేటివ్ యా స్పెక్ట్ చూస్తే ఇది ఎక్కువగా ముఖమార్పిడి కథగా వుంది. ఈ కథలోంచి వైవాహిక అత్యాచారమనే స్టోరీ ఐడియా బయటికి రావడానికి సెకండాఫ్ లో ఇరవై నిమిషాలూ పట్టింది! ముఖమార్పిడి కథ పొదిగితే ఆ గుడ్డుని పగులగొట్టుకుని పుట్టిందే వైవాహిక అత్యాచారం అసలు కథన్న మాట. ఏం ఖర్మ! అంటే ఇలా సెకండాఫ్ లో అసలు కథ రివీల్ అయిందంటే మిడిల్ మాటాష్ స్క్రీన్ ప్లే అన్నమాట. గృహమే కదా స్వర్గసీమా అన్నట్టు మనో వీధుల్లో మాయా విహారం చేస్తూ రచిస్తే వచ్చేది మిడిల్ మాటాష్ స్క్రీన్ ప్లే అనే చెత్త. మిడిల్ మటాష్ స్క్రీన్ ప్లే సినిమాకి పనికి రాదా అంటే, కమర్షియల్ సినిమాకి పనికి రాదు. డబ్బులు రాని ఆర్ట్ సినిమా చేసుకోవచ్చు. ఆర్ట్ సినిమాలు మంచివి కాదని కాదు, యూరప్ తీసికెళ్ళి మంచిగా ఆడించుకోవచ్చు.

        హాలీవుడ్ నుంచి ఎవడో ఒకడు స్క్రీన్ ప్లే సంగతులు చెబుతూనే వుంటాడు నిత్యాన్న ప్రసాదం లాగా. మనకేం పట్టదు. మనకి మనమే స్క్రీన్ ప్లే సూపర్ హీరోలం, వీరులం. ఒకడు చెప్పేదేంటి. మన మనో వీధులు, సందులు, గొందులు మనకి పట్టా చేసి పెట్టి వున్నాయి. ఇంకొకడు చెప్పేదేంటి. ఎందుకు చెబుతున్నాడో, ఎక్కడెక్కడో తొంగి చూసి, సినిమాల్లోంచి సంగతులు లాగి, లాభ నష్టాలు ఎందుకు చెబుతూంటాడో అస్సలు అర్ధం గాదు! మన పట్టా పాస్ బుక్ తప్ప ఇంకేదీ అర్ధం గాదు.

        ఈ కథ ఫస్ట్ యాక్ట్ ఇలా వుంటుంది- ప్లాస్టిక్ సర్జన్ గా ప్రధాన పాత్ర హీరో రాజ్ పరిచయం, అతడి క్లాస్ మేట్ గా ప్రేమిస్తున్న మాయ పరిచయం కావడం, మాయని కాదని రాజ్ విజయవాడలో మాయా ఫ్రెండే అయిన మహతిని పెళ్ళి చేసుకోవడం, మాయాకి రోడ్డు ప్రమాదంలో ముఖం చితికి పోయి కోమాలో కెళ్ళి పోవడం, మహతి మేడ మీంచి పడి చనిపోవడం, మహతి బతకాలంటే మాయా కోలుకోవాలని రాజ్ అనడం- ఇంటర్వెల్.

      సుమారు గంట సేపు ఫస్ట్ హాఫ్ వుంటుంది. పై స్టోరీ బీట్స్ చూస్తే ఇంటర్వెల్లో కూడా కథేమిటో అర్ధం గాదు. మహతి బతకాలంటే మాయా కోలుకోవాలన్న రాజ్ మాటలతో ఇంటర్వెల్ ఏమర్ధమయ్యింది? అంటే చనిపోయిన మహతి రూపంతో మాయాకి సర్జరీ చేసి ఆమెలో మహతిని చూసుకోవాలనా? ఇదేనా సెకండాఫ్ లో చూడబోయే కథ? ఇదేనా ఫస్ట్ యాక్ట్ ముగింపు? ప్లాట్ పాయింట్ వన్? ఇవన్నీ నిర్ధారణ లేని వూహాగానాలు. ఎందుకంటే కాన్ఫ్లిక్ట్ ఏర్పడకపోతే కథ గురించి వూహాగానాలే తప్ప కథేమిటో అర్ధంగాకుండా పోతుంది. ఇదే జరిగింది ఇంటర్వెల్ తో- కాన్ఫ్లిక్ట్ లేక!

        ఇక సెకండాఫ్ లో కోమాలోనే వున్న మాయాకి సర్జరీ చేసి మహతిలాగా మార్చేస్తాడు. ఆమె కోమాలోంచి కోలుకున్నాక మహతి చనిపోయిన విషయం చెప్పి- మహతిలాగా తెచ్చుకుని ఇంట్లో వుంచుకుంటాడు. ఇలా ఇరవై నిమిషాలు గడిచాక ఆమెకి మహతి ఫోన్లో రికార్డింగ్స్ బయటపడతాయి- వాటి ప్రకారం రాజ్ శాడిస్టు. ఎప్పుడు పడితే అప్పుడు వచ్చి రేప్ చేస్తున్నాడు. తను ప్రెగ్నెంట్ అయింది. అయినా వదలడం లేదు... ఇలా వైవాహిక అత్యాచారం విషయం ఇప్పుడు బయట పడుతుంది.

మిడిల్ కి మిగిలింది ఇంతే

    అంటే కథేమిటో ఇప్పుడు అర్ధమవుతోందన్న మాట. అంటే కాన్ఫ్లిక్ట్ ఫస్టాఫ్ ఇంటెర్వెల్ దాటుకుని సెకండాఫ్ లో ఇరవై నిమిషాల కొచ్చిందన్న మాట. అంటే సెకండాఫ్ లో సెకండ్ యాక్ట్ వుండాల్సిన స్పేస్ ని ఫాస్ట్ యాక్టే ఆక్రమించి సెకండాఫ్ ని- అంటే మిడిల్ ని మటాష్ చేసిందన్న మాట. అందుకే మిడిల్ మటాష్ స్క్రీన్ ప్లే అన్నమాట.

        ఇప్పుడు సెకండాఫ్ లో సెకండ్ యాక్ట్ ఇరవై నిమిషాలు స్పేస్ ని నష్టపోయాక సెకండ్ యాక్ట్ కీ, ఆ తర్వాత థర్డ్ యాక్ట్ కీ మిగిలింది 40 నిమిషాలే. ఇందులోనే రెండూ పంచుకోవాలి. పంచుకుంటే సెకండ్ యాక్ట్ కి మిగిలింది పదీ పదిహేను నిమిషాలే. అంటే రెండు గంటల సినిమాలో 50 శాతం, అంటే గంట పాటు నడవాల్సిన సెకండ్ యాక్ట్ - అంటే మిడిల్- ఇంతలా కృశించి పోయిందన్న మాట!   

        ఇలా సినిమా ప్రారంభమయ్యాక గంటా 20 నిమిషాల పాటూ కథే ప్రారంభం కాలేదంటే అది సినిమా కాదన్న మాట. ఈ కథ వైవాహిక అత్యాచారం గురించి అని ఎప్పుడో సెకండాఫ్ లో తెలిసే వరకూ ప్రేక్షకులు కూర్చుని ఏం చేయాలి? ఇలావుందన్న మాట స్టోరీ ఐడియాతో క్రియేటివ్ యాస్పెక్ట్ సంగతి.

        చెప్పాలనుకున్న ముఖమార్పిడితో వైవాహిక అత్యాచారం కథ గనుక స్ట్రక్చర్ లో పెట్టి చెప్తే ఇలా వుంటుంది- ఫస్టాఫ్ అరగంటకల్లా మహతి చనిపోయి, ఆమె రూపంతో మాయాకి సర్జరీ జరిగి ఫస్ట్ యాక్ట్ - అంటే బిగినింగ్- ముగిసి ప్లాట్ పాయింట్ వన్ వస్తుంది. ఇప్పుడు సెకండ్ యాక్ట్- అంటే మిడిల్- ప్రారంభమై మాయా వచ్చి మహతిలా గా రాజ్ తో రాజ్ ఇంట్లో వుంటూంటే, ఇంటర్వెల్లో మహతి ఫోన్ రికార్డింగ్స్ ద్వారా  వైవాహిక అత్యాచారం విషయం బయట పడి, రాజ్ తో కాన్ఫ్లిక్ట్ ఏర్పడుతుంది. ఇలా కథేమిటో ఇంటర్వెల్లో అర్ధమయ్యేట్టు వుంటుంది.

    అయితే ప్రపంచమంతటా వైవాహిక అత్యాచారమనే అపరిష్కృత సమస్యగా వున్న బర్నింగ్ టాపిక్ గురించి సినిమా తీయాలనుకుంటే దాన్ని ముఖ మార్పిడి కథతో చేస్తే గజిబిజి అవుతుంది. ముఖ మార్పిడి విడిగా వేరే పాయింటు - ఆస్తికోసం భార్యని చంపి ఆమె ముఖాన్ని ప్రేయసికి అతికించి ఆడే నాటకంలాగా వేరే కథవుతుంది. దీనికి వైవాహిక అత్యాచారం పాయింటు కలిపితే డామినేట్ చేసేది ముఖమార్పిడి పాయింటే!

        అందుకని శుభ్రంగా కల్తీలేని వైవాహిక అత్యాచారం కాన్సెప్ట్ తో క్రైమ్ థ్రిల్లర్ చేస్తే, స్ట్రక్చర్ ఇలా వస్తుంది - ఫస్ట్ యాక్ట్ లో ప్లాస్టిక్ సర్జన్ గా ప్రధాన పాత్ర హీరో రాజ్ పరిచయం, అతడి క్లాస్ మేట్ గా ప్రేమిస్తున్న మాయా పరిచయం కావడం, మాయాని కాదని రాజ్ విజయవాడలో మాయా ఫ్రెండే అయిన మహతిని పెళ్ళి చేసుకోవడం, తర్వాత మహతి మేడ మీంచి పడి చనిపోవడంతో మాయాకి అనుమానాలతో ప్లాట్ పాయింట్ వన్ ఏర్పడ్డం.

        ప్లాట్ పాయింట్ వన్ మాయాతో ఎందుకంటే, మహతికి న్యాయం కోసం పోరాడేది మాయానే. ఇలా ప్లాట్ పాయింట్ వన్ లో ప్రధాన పాత్ర రాజ్ కి, ప్రత్యర్ధి పాత్రగా మాయా ఎస్టాబ్లిష్ అయిపోతుంది. ఎదురెదురు పాత్రల ఎస్టాబ్లిష్ మెంట్ లేకపోతే కథ సాగదు. సాగినా ఎలా సాగాలో తెలీదు.

        ఇప్పుడు ప్లాట్ పాయింట్ వన్ లో ప్రధాన పాత్ర చేతిలో వున్న గోల్ ప్రత్యర్ధి పాత్ర అయిన మాయా చేతికొచ్చేస్తుంది. మహతి మరణం మీద ఈమెకి అనుమానాలున్నాయి. ఈ అనుమానాలు తీర్చుకునే గోల్ తో సెకండ్ యాక్ట్ -అంటే మిడిల్- ప్రారంభమవుతుంది. ఈ మిడిల్లో సంబంధిత కథ జరుగుతూ, మాయా రాజ్ ఇంటికొస్తే, మహతి ఫోన్ రికార్దింగ్స్ దొరికి- ఆమె రాజ్ చేతిలో వైవాహిక అత్యాచార నరకాన్ని అనుభవించిందన్న నిజం తెలిసి -రాజ్ తో కాన్ఫ్లిక్ట్ ప్రారంభమై పోతూ ఇంటర్వెల్ వస్తుంది.

        ఇక సెకండాఫ్ లో సెకండ్ యాక్ట్ కొనసాగుతూ రాజ్ తో మాయాకి మిడిల్ బిజినెస్ మొదలవుతుంది. అంటే యాక్షన్- రియాక్షన్లతో కూడిన సంఘర్షణ. ఈ సంఘర్షణలో లాయర్ సాయం తీసుకుంటుంది. ప్రతిఘటించే రాజ్ తో సంఘర్షణ వెళ్ళి వెళ్ళి మాయాకి తగిన సాక్ష్యాధారాలు చిక్కడంతో- ప్లాట్ పాయింట్ టూ ఏర్పడి సెకండ్ యాక్ట్ - అంటే మిడిల్- పూర్తవుతుంది.

        ఇక థర్డ్ యాక్ట్ లో - అంటే ఎండ్ లో - కోర్టు డ్రామా వస్తుంది. ఇక్కడ మహతి బలైన వైవాహిక అత్యాచార నేరాన్ని లాయర్ తో కలిసి నిరూపిద్దామంటే, వైవాహిక అత్యాచారం అసలు నేరమే  కాదని కోర్టు కొట్టేస్తుంది. పైగా మహతీది ప్రమాదవశాత్తూ మరణం కాదని కూడా నిరూపించలేక పోతుంది మాయా. మహతిని చంపడం కూడా చేసిన రాజ్ ఓ నవ్వు నవ్వి వెళ్ళిపోతాడు. మాయా న్యాయ వ్యవస్థ మీద, ఇలాటి పెళ్ళి వ్యవస్థ మీదా ఓ రెబల్ స్టేట్ మెంట్ పారేసి- సెల్ఫ్ రిలయెంట్ ఇండిపెండెంట్ వుమన్ గా వాకౌట్ చేస్తుంది. ఇలా రఫ్ గా, కల్తీలేని శుభ్రపర్చిన వైవాహిక అత్యాచారం కథ సూటిగా తగిలేట్టు వుండొచ్చు.

ఇలా వుంది క్రైమ్ జానర్ మర్యాద
        ఇక సినిమాలో ముఖమార్పిడి కథ కూడా ఎలా వుందంటే- రాజ్ మహతి శవాన్ని ఏం చేశాడో తెలియదు. ఆమె ముఖ చర్మాన్ని తెచ్చి కోమాలో వున్న మాయాకి సర్జరీ చేసి అతికించేస్తాడు! ఆమెకి తెలియకుండా, ఆమె అంగీకారం లేకుండా మహతి ముఖంగా మార్చేస్తాడు. ఇది నేరం. అతను చేసింది ఐడెంటిటీ రీప్లేస్‌మెంట్ సర్జరీ. ఈ సర్జరీ చేయించుకునేది ఇద్దరే- క్రిమినల్స్, కొందరు పౌరులు. క్రిమినల్స్ ఎందుకు చేయించుకుంటారో తెలిసిందే. పౌరుల విషయానికొస్తే -తమ లొకేషన్‌లు, సామాజిక కనెక్షన్‌లు, రోజువారీ కదలికలు, ప్రైవేట్ సమాచారమూ ట్రాక్ చేయకుండా ప్రభుత్వాన్ని, లేదా వివిధ సంస్థల్ని నిరోధించడానికి ఐడెంటిటీ రీప్లేస్‌మెంట్ సర్జరీ చేయించుకుని తిరుగుతారు. దొరికితే చారల దుస్తులేసుకుని వేరే ఐడెంటిటీ నెంబర్ బిళ్ళతో కటకటాల వెనక్కి పోతారు.

        మాయా ఇదే పరిస్థితిలో పడుతుందని పట్టించుకోలేదు కథకుడు. ఆమె మహతిలా బతకాలన్నా ఎలా బతుకుతుంది? ముఖం మార్చుకోవచ్చు. ఆధార్ కార్డులెలా మేనిపులేట్ చేస్తుంది. సింపుల్ గా ఎక్కడో ఆధార్ అథెంటికేషన్ లో దొరికిపోతుంది. అసలు తన మీద రాజ్ చేసిన ఈ అక్రమాన్ని ఎలా సహిస్తుంది. వెంటనే కంప్లెయింట్ చేసి లోపలేయించాలి. కానీ ఇలా కూడా చేయదు. అతను మహతీలా ఇంటికి తీసుకుపోతే మహతిలా జీవిస్తూంటుంది!! తను మహతి అయితే మాయా ఏమైంది? దీనికేం చెప్తుంది? మాయా కనిపించడం లేదని ఇంటి ఓనర్ కంప్లెయింట్ చేస్తే ఏం చేస్తుంది?

        ఇక మహతికి న్యాయం కోసం కోర్టు కెక్కాక కోర్టుని దారుణంగా మోసపుచ్చుతోందని కూడా కథకుడు పట్టించుకో దల్చుకోలేదు. లాజిక్కా బొందా? సినిమా కథకి లాజిక్కేంటి, ఇదింతే అన్నట్టు దూసుకుపోయాడు. క్రైమ్ కథకి అతి ముఖ్య యోగ్యత, జానర్ మర్యాద లాజికల్ రీజనింగ్ అన్న విషయం అవసరమన్పించలేదు కథకుడికి. 

        చచ్చిపోయిన మహతి రూపంలో మహతిలా కోర్టులో కేసు పోరాడుతున్న మాయానీ, ఆమె లాయర్నీ చూస్తే- 
పాపం జడ్జి గారికి, ప్రాసిక్యూటర్ గారికీ ఈమె మహతి కాదు మాయా అని ఇంకా తెలీదు. మహతీయే అనుకుని జడ్జి గారి తీర్పు పాఠం...వైవాహిక అత్యాచార నేరం రుజువైనందున దోషి రాజ్ కి పదేళ్ళు కారాగార శిక్ష! ఇంతేనా, అతను హంతకుడు కూడా అన్న విషయం తెలియదా? వైవాహిక అత్యాచారం నేరమా? అది రుజువు చేయగల నేరమా? ఈజిట్? ఓకే, థాంక్యూ!

నటనలు-సాంకేతికాలు

        ఇందులో విశ్వక్సేన్ ది ముగింపులో కోర్టులో లాయర్ గా వాదించే అతిధి పాత్ర మాత్రమే. ఈ పాత్ర, మనసుపెట్టి నటించలేదు. కోర్టులో కామెడీ చేయాలా వద్దా అని డైలమాలో పడి ఎటూ గాకుండా నటించి సరిపెట్టాడు. మహతిగా నటించిన ప్రియా వడ్లమాని నటన ఒక్కటే చెప్పుకోదగ్గది. అయితే మహతిగా చనిపోయాక, మాయాకి తన రూపం వచ్చి, ఇంకా మహతిలాగే తను నటించడంలో లాజిక్ ఏమాత్రం లేదు. రూపం మారినంత మాత్రాన మహతి మాయ ఎలా అయిపోతుంది? మహతిగా రూపం మారిన ఆయేషా ఖానే మహతిగా నటించాలి, ప్రియా వడ్లమాని కాదు. ఈ లాజిక్ కూడా వదిలేసి ఆషామాషీగా పాత్రల్ని చుట్టేశారు.

        ఆయేషా ఖాన్ ఫస్టాఫ్ లో అరగంట కనిపించి కోమాలో కెళ్ళిపోయే పాత్ర. పాత్రకి రూట్స్ లేవు, నటనా కూడా సరిగా లేదు. హీరో రాజ్ గా, విలన్ గా వికాస్ వశిష్ట నటన కథా కథనాల ప్రమాణాలకి తగ్గట్టుంది. లాజిక్ లేని పాత్ర. ఇతడి ఫ్రెండ్ గా, మరో డాక్టర్ గా చైతన్యా రావు నటించాడు.

     ఇక సంగీతం గానీ, సాంకేతిక విలువలుగానీ లో బడ్జెట్ కి తగ్గట్టుగానే వున్నాయి. ఇలా కొత్తదర్శకుడు, ఇంకో దర్శకుడూ కలిసి- మారిటల్ రేప్ కథని గజిబిజి గందరగోళం చేసి వదిలారని చెప్పాలి. బాగుపడిందేమీ లేదు. ఇది చూశాక జీతేంద్ర- ముంతాజ్ లు నటించిన రూప్ తేరా మస్తానా గుర్తుకొస్తుంది - క్యారక్టర్ రీప్లేస్ మెంట్ థ్రిల్లర్.

—సికిందర్