1091 : హాలీవుడ్ రివ్యూ

 

మార్వెల్ స్టూడియోస్ సరికొత్త ప్రపంచ కానుకగా ‘షాంగ్ చీ అండ్ ది లెజెండ్ ఆఫ్ ది 10 రింగ్స్’ తో ప్రేక్షకుల్ని అలరించేందుకు వచ్చేసింది. బాక్సాఫీసుకి పట్టిన కోవిడ్ దుమ్ము దులుపుతోంది. వుషూ, కైనెటిక్, వుక్సియా మొదలైన డిఫరెంట్ ఫైటింగ్ స్టయిల్స్ తో అద్భుతాలు చేస్తోంది. ముఖ్యంగా ఏడాది పాటు ప్లాన్ చేసిన బస్సు యాక్షన్ సీనుతో వైరల్ అవుతోంది. హీరో ప్లస్ స్టంట్ మాన్ సిము లియూ ‘షాంగ్ చీ’ గా కొత్త సూపర్ మాన్ గా అవతరించాడు. సిము లియూతో బాటు నటవర్గమంతా చైనీయులతో నిండిపోయిన ఈ సూపర్ మెగా ఫాంటసీ అడ్వెంచర్ ఓ హోమ్లీ ఎంటర్ టైనర్. వికృత జీవులతో పోరాటంతో బాటు, విడిపోయిన ఫ్యామిలీ కథ కూడా చూపించే ఈ ‘టెన్ రింగ్స్’ కున్న అద్భుత శక్తులేమిటి? ఒక షార్ట్ ఫిలిమ్ తో బాటు, మరో మూడు ఛోటా మోటా సినిమాలు మాత్రమే తీసిన ఆసియన్ మూలాలున్న దర్శకుడు డెస్టిన్ డానియేల్ క్రెటన్, ఇంత భారీ హాలీవుడ్ ప్రాజెక్టుని ఎలా నిర్వహించాడు? ఇవి చూద్దాం...

కథ

        వెన్వూకి అధికార దాహం ఎక్కువ. ‘టెన్ రింగ్స్ ఆర్గనైజేషన్’ అనే దాన్ని స్థాపించి, ప్రభుత్వాల్ని పడగొడుతూ, రాజ్యాల మీద రాజ్యాలు జయిస్తూ వుంటాడు. వెయ్యేళ్ళుగా అతను ఈ దండయాత్రలు చేస్తూ వుంటాడు. అతడి చేతిలో తిరుగు లేని టెన్ రింగ్స్ అనే దైవిక ఆయుధముంది. దాంతో దైవిక శక్తులూ అమరత్వమూ అతడి సొంత మయ్యాయి. ఈ క్రమంలో 1996 లో చైనీస్ పురాణ మృగాలున్న టాలో అనే గ్రామాన్ని స్వాధీనం చేసుకునేందుకు వెళ్తే, రక్షక భటురాలు ఇంగ్ లీ అడ్డుకుని ఓడిస్తుంది. ఆమెతో ప్రేమలో పడతాడు. గ్రామస్థులు వెన్వూని వ్యతిరేకించినా అతడితోనే వెళ్ళిపోతుంది ఇంగ్ లీ. వాళ్ళకి పెళ్ళయి షాంగ్ చీ అనే కొడుకు, జియాలింగ్ అనే కూతురు పుడతారు. ఇక ఆర్గనైజేషన్ని మూసేసి, 10 రింగ్స్ ని  పక్కన పెట్టేస్తాడు వెన్వూ.

        కొడుకు షాంగ్ చీ పెరుగుతున్నప్పుడు తల్లిని ఐరన్ గ్యాంగ్ అనే వెన్వూ శత్రువులు చంపేస్తారు. దీంతో షాంగ్ చీకి మార్షల్ ఆర్ట్స్ శిక్షణ ఇప్పించి, ఐరన్ గ్యాంగ్ నాయకుణ్ణి చంపేయమని పంపుతాడు వెన్వూ. ఆ నాయకుణ్ణి కొడుకు షాంగ్ చీ చంపేశాక, తండ్రి గురించి ఒక నిజం తెలిసి, శాన్ ఫ్రాన్సిస్కో పారిపోతాడు. అక్కడ షాన్ అని పేరు మార్చుకుంటాడు. 

  ప్రస్తుతానికొస్తే, షాన్ ఒక స్టార్ హోటల్లో కేటీ అనే యువతితో కలిసి పని చేస్తూంటాడు. తన పుట్టుపూర్వోత్తరాలు రహస్యంగా వుంచుతాడు. మరో వైపు చెల్లెలు జియాంగ్ లీ కూడా ఇంట్లోంచి పారిపోయి, ఇప్పుడు మకావూలో అండర్ గ్రౌండ్ ఫైట్ క్లబ్ నడుపుతూంటుంది. షాంగ్ చీ మెడలో చిన్నప్పుడు తల్లి ఇచ్చిన లాకెట్ వుంటుంది. దాని కోసం షాంగ్ చీ మీద 10 రింగ్స్ గ్యాంగ్ వచ్చేసి దాడి చేస్తారు. ఆ దాడిని తిప్పి కొట్టి, చెల్లెలి మీద కూడా లాకెట్ కోసం జరిగిన అలాటి దాడిని తిప్పికొడతాడు షాంగ్ చీ. ఇప్పుడు అక్కడికి తండ్రి వెన్వూ వచ్చేస్తాడు.

        ఇప్పుడు దేనికి వచ్చాడు వెన్వూ? ఈ తండ్రి అధికార కాంక్ష, హింసాత్మక చరిత్ర  పడక దూరమైన షాంగ్ చీ ఇప్పుడేం చేశాడు? ఇద్దరి మధ్య వైరం ఎక్కడికి దారి తీసింది? వెన్వూ కోరిన కోరికేమిటి? అది షాంగ్ చీ తీర్చాడా? ఇందులో టెన్ రింగ్స్ దైవిక ఆయుధం పోషించిన పాత్రేమిటి? ఇదీ మిగతా కథ.

కామిక్ బుక్ ఫాంటసీ

1973 లో మార్షల్ ఆర్ట్స్ లెజెండ్ బ్రూస్ లీ కి పోటీగా, సాంస్కృతిక వారసుడిగా, ‘షాంగ్ చీ’ అనే అమెరికన్ సూపర్ హీరో కామిక్ బుక్ పాత్ర సృష్టించి, బొమ్మల కథలు చెప్పారు రచయిత స్టీవ్ ఇంగిల్ హార్ట్, చిత్రకారుడు జిమ్ స్టార్లిన్. డిస్నీ కామిక్స్ కి ఇదొక పాపులర్ సిరీస్. మార్వెల్ స్టూడియోస్ రూపొందిస్తున్న కామిక్ సిరీస్ లో భాగంగా, 25 వ మూవీగా ‘షాంగ్ చీ అండ్ ది లెజెండ్ ఆఫ్ ది టెన్ రింగ్స్’ పేరుతో దీన్ని తెర కెక్కించారు.

        

ఇది చైనీస్ వీర గాథ. అందుకని నటీనటులందరూ చైనీసే కన్పిస్తారు. అమెరికాలోని శాన్ ఫ్రాన్సిస్కో నగరం కథకి వేదిక. అమెరికాలోని చైనీస్ సమాజం తప్ప మరొకటి ఇందులో కన్పించదు. కోవిడ్ సమయంలోనే నిర్మాణం జరుపుకుంటున్నా, కోవిడ్ కి చైనా కారణమనే బలపడిన అభిప్రాయాలకి, విమర్శలకీ సినిమాలో తావివ్వకుండా; రాజకీయాలకీ, వివక్షకీ దూరంగా చైనీయుల అందమైన కథ అమెరికాలో చూపించారు అమెరికన్ నిర్మాతలు. మన అక్షయ్ కుమారేమో ఒక మత వర్గానికి వ్యతిరేకంగా ‘సూర్యవంశీ’ తీసి ఆనందించాడు. జేబులు నింపుకున్నాడు. ఏదైనా కుల వర్గానికి వ్యతిరేకంగా కూడా ఒకటి తీసి వుంటే తెలిసేది ఏం జరిగేదో.      

  చైనా కథని చైనీయులతోనే తీయాలనుకుని రచయితనీ (డేవిడ్ కాలహామ్),  దర్శకుడినీ (డెస్టిన్ డానియేల్ క్రెటన్) కూడా చైనీస్ - అమెరికన్లనే తీసుకున్నారు. ప్రధానంగా ఈ కథ చెదిరిపోయిన కుటుంబం గురించి. కుటుంబం చెల్లాచెదురవడానికి కుటుంబ పెద్ద వెన్వూ దుష్టత్వం కారణమైతే, కుటుంబం కలవకుండా అడ్డుకునేది డ్వెల్లర్- ఇన్- డార్క్ నెస్ అనే చైనీస్ పురాణ వికృత దుష్ట జీవి. షాంగ్ చీ తండ్రి తోనూ, డ్వెల్లర్-ఇన్- డార్క్ నెస్ తోనూ పోరాడతాడు. దివ్య శక్తులున్న 10 రింగ్స్ ని అస్త్రాలుగా ధరించిన తండ్రిని ఓడించడం అతడికి తెలిసిన ఏ విద్యతోనూ సాధ్యం కాదు గానీ, అదే 10 రింగ్స్ ని తను చేపట్టాక వికృత దుష్ట జీవిని అంతమొందించి విజయం సాధించ గల్గుతాడు. మోచేతులకి ధరించే ఈ రింగ్స్ మరేమీటో కాదు, విష్ణువు చేతిలో సుదర్శన చక్రానికి ప్రతి రూపాలే అనుకోవాలి. ఇలా దైవ శక్తి (మతం) తో దుష్ట శిక్షణ చేయాల్సింది పోయి, రాజకీయాలకి వాడుకుని మనుషుల్ని చంపుతున్నాడు వెన్వూ. టెన్ రింగ్స్ తో తనే దశ కంఠుడుగా మారిపోయాడు. ఇలాటి వాళ్ళకి శిక్ష డ్వెల్లర్-ఇన్- డార్క్ నెస్ లాంటి దైవాన్ని ఎదిరించే ఇంకో దుష్ట శక్తి చేతిలోనే వుంటుందని చెప్పే కథ. దీనికి యాక్షన్ కథగా సాగే కుటుంబ కథగా షుగర్ కోటింగ్ ఇచ్చి నిలబెట్టారు.

హింసలేని అద్భుత రసం

అద్భుత రసపు కథల్లో హింస వుండదు. జేమ్స్ బాండ్ సినిమాల్లో హింస వుండదు, యాక్షన్ వుంటుంది. హింస బీభత్స రసపు తరగతి. అద్భుత రసంతో ఈ ఫ్యామిలీ యాక్షన్ ఎక్కడా రక్తం చిందించకుండా, జుగుప్స లేకుండా హోమ్లీగా వుంటుంది. తెలుగు సినిమాల్లో లాగా అరుచుకుని ఖడ్గాలతో ఉరుకురికి తెగ నరుక్కుని, మురికి రక్తాలు పారించే లాంటి సోకాల్డ్ ఫ్యామిలీ స్టోరీ కాదిది. ఈ ఫ్యామిలీ పూర్వ కథ కొంత మల్టీపుల్ ఫ్లాష్ బ్యాక్స్ లో వస్తుంది. తల్లితో చిన్నప్పుడు షాంగ్ చీ, అతడి చెల్లెలి అనుబంధం సహా. సున్నిత కథగా చెప్పే చిన్నప్పటి మాంటేజెస్ అన్నీ డబుల్ హోమ్లీగా వుంటాయి- టాలో చైనీస్ గ్రామంలో. గ్రామం సెట్ వొక అందమైన ఫోటో ఆల్బమ్.

శాన్ ఫ్రాన్సిస్కో సీన్స్ ఆధునిక సెటప్. ఇక్కడ ఆధునిక కమర్షియల్ పాత్రలుంటాయి హీరో హీరోయిన్లు సహా. హీరోహీరోయిన్ల మధ్య తర్వాత ప్రేమకి దారితీసే స్నేహం సరదాగా వుంటుంది. తన స్కిల్స్ నీ, గతాన్నీ ఆమెనుంచి దాస్తూంటాడు. పబ్లిక్ బస్సులో టెన్ రింగ్స్ గ్యాంగ్ తో యాక్షన్ సీనులో అతడి విశ్వరూపం చూసి ‘హూ ఆ ర్యూ?’ అంటుంది అనుమానంగా. తర్వాత తండ్రి వచ్చి ఒక కోరిక కోరాక, కథ చైనీస్ టాలో గ్రామానికి మారుతుంది. తల్లి ఇంగ్ లీ చనిపోలేదనీ, ఈ గ్రామంలోనే బంధించి వుందనీ అనుమానం తండ్రికి. ఈ గ్రామానికి పెద్ద పీడలా వుంటుంది డ్వెల్లర్- ఇన్- డార్క్ నెస్ అనే చైనీస్ పురాణ వికృత దుష్ట జీవి.

        చాలాసార్లు చెప్పుకున్నట్టు హాలీవుడ్ హై కాన్సెప్ట్ సినిమాలు  సింపుల్ కథ- భారీ యాక్షన్ గా వుంటాయి. ఇది కూడా అంతే. ఈ సింపుల్ కథ వల్ల సెకండాఫ్ కొంత సేపు డల్ గా వుండడం గమనించ వచ్చు. మొదట తండ్రీ కొడుకుల మధ్య సంఘర్షణ, తర్వాత దుష్ట జీవితో సంఘర్షణగా వుంటుంది ఈ ఫాంటసీ కథ.

హాలీవుడ్ తో చైనీస్ నట వర్గం

మొదటే చెప్పుకున్నట్టు ఈ చైనీస్ కథలో నటులందరూ చైనీయులే. కని పించేదంతా అమెరికాలో చైనీస్ సమాజమే, సంస్కృతే. నట వర్గంలో కొత్త మార్వెల్ హీరో షాంగ్ చీ పాత్రలో సిము లియూ, స్టంట్ మాన్ కూడా కావడంతో సీజీ తోడ్పాటుతో యాక్షన్ సీన్స్ థ్రిల్ చేస్తాయి. అతడి పాత్ర ద్విముఖాలుగా వుంటుంది. పైకి యాక్షన్ తో బలంగా వున్నా, లోపల చిన్నప్పట్నుంచీ మోస్తున్న కుటుంబ ట్రాజడీతో బలహీనంగా వుంటాడు. ఈ కుటుంబ ట్రాజడీ అతణ్ణి చివరిదాకా వెన్నాడు తూంటుంది.  

        తల్లి హత్యకి గురయింది, చెల్లెలు ఏమైందో తెలీదు, తండ్రి అలా వున్నాడు... ‘నువ్వు గతాన్నుంచి తప్పించుకు పారిపోలేవు’  అంటాడు పెద్దయ్యాక తండ్రి. ‘నీ గుండెల్లో చీకటి వెలుగుల్ని చూడు. నిన్ను నీవు తెలుసుకోవాలంటే చీకటి వెలుగులు రెండిటినీ ఎదుర్కోవాలి’  అంటుంది చిన్నప్పుడు తల్లి. అతడి అంతర్సంఘర్షణ తండ్రితో దూరాల్నే పెంచుతుంది- ‘నువ్వు నాకు తోడుగా వుండాల్సిన సమయమిది’ అంటాడు తండ్రి. అది జరిగే పని కాదంటాడు షాంగ్ చీ - ‘నువ్వు మనుషుల్ని చంపే క్రిమినల్ వి’ అంటాడు. ఇది వెళ్ళి వెళ్ళి ఇద్దరూ కొట్టుకునే దాకా పోతుంది. తల్లి నేర్పిన పోరాట విద్యనే తండ్రి మీద ప్రయోగిస్తాడు. చివరికేమయ్యాడు తండ్రనేది వెండి తెరమీదే చూడాలి. 

అతడి మీద కొరియోగ్రాఫ్ చేసిన యాక్షన్ సీన్స్ కూడా పాత్ర ప్రయాణంతో బాటే తీవ్రత- ఉష్ణోగ్రత పెంచుకుంటూ పోతాయి. వుషూ స్టయిల్ ఒక రేంజి అయితే, కైనెటిక్ స్టయిల్ పై రేంజి, వుక్సియా స్టయిల్ ఇంకా పై రేంజి - ఇలా...ఏడు డిఫరెంట్ స్టయిల్స్ కథలో అతడి పాత్ర ఎదుగుదల క్రమాన్ని చాటుతూంటాయి సూక్ష్మంగా గమనిస్తే. కొన్ని హాలీవుడ్ సినిమాల్లో ఏదైనా ఒక అర్ధంతోనే వుంటుంది. ఇక్కడ వివిధ స్టయిల్స్ తో హీరో యాక్షన్ జర్నీ, పాత్ర ఎదుగుదలని తెలిపే అద్భుత విజువల్ స్టోరీ టెల్లింగ్ అనొచ్చు.

        ఇక ఏడాది పాటు ప్లాన్ చేశామని చెప్తున్న మేజర్ పబ్లిక్ బస్సు యాక్షన్ సీను, డ్రైవింగ్ రాని హీరోయిన్ చేసే పిచ్చి డ్రైవింగ్ తో ఫన్నీగా వుంటూనే, సబ్ కాన్షస్ మైండ్ కి కనెక్ట్ అవుతుంది -కారణం, ఈ యాక్షన్ సీన్ త్రీ యాక్ట్స్ స్ట్రక్చర్ లో వుండడమే.

సినిమా స్క్రీన్ ప్లేకి త్రీయాక్ట్స్ స్ట్రక్చర్ ఎలాగో, అలా కన్పిస్తుందీ యాక్షన్ సీను పరిశీలనగా చూస్తూంటే. బిగినింగ్, మిడిల్, ఎండ్ - మధ్య రెండు ప్లాట్ పాయింట్లు. ముందు చిల్లరగాళ్ళతో ఫన్నీ ఫైట్ అయ్యాక (బిగినింగ్), చేతికి మండే కత్తిని కట్టుకున్న ‘రేజర్ ఫిస్ట్’ అనే వాడు, వాడి హై గ్రేడ్ గ్యాంగూ దిగుతారు (ప్లాట్ పాయింట్ వన్), ఇక వీళ్ళని చితగ్గొట్టే గోల్ తో విజృంభిస్తాడు షాంగ్ చీ (మిడిల్), ఇది ఉష్ణోగ్రత పెరిగి పెరిగి బస్సులోంచి బయట పడిపోతాడు షాంగ్ చీ (ప్లాట్ పాయింట్ టూ), ఇక మళ్ళీ బస్సు లోకొచ్చి మరింత హై టెన్షన్ యాక్షన్ తో ముగించేస్తాడు (ఎండ్). ఈ సీను వైరల్ అవడానికి ఇలా త్రీ యాక్ట్స్ స్ట్రక్చర్లో కొరియోగ్రాఫ్ చేయడమే కారణం కావొచ్చు.

            గర్ల్ ఫ్రెండ్ కేటీగా ఆక్వాఫినా ఫన్నీ క్యారక్టర్ నటించింది. స్టార్ సినిమాల్లో తెలుగు హీరోయిన్ లాగే పెద్దగా పాత్ర లేదీమెకు గానీ, క్లయిమాక్స్ లో హీరోని కాపాడేందుకు మంచి యాక్షన్లోకి దిగుతుంది.

చెల్లెలు జియాంగ్ లీగా మెంగర్ ఝాంగ్ స్టేజి నటి. ఇదే తొలి మూవీ ఈమెకి. ఇంత పెద్ద తొలి మూవీ. స్టేజి నటనకీ, కెమెరా ముందు నటనకీ తేడాల వల్ల ఇబ్బందులు పడుతూనే నటించింది. అండర్ గ్రౌండ్ ఫైట్ క్లబ్ నడిపే పాత్రగా మార్షల్ ఆర్ట్స్ లో శిక్షణ పొందింది. పాత్రగా తన  కుటుంబ విచ్ఛిన్నంతో రెబెల్ ఆసియన్ గర్ల్ గా మారే ఈమె క్యారక్టర్, ఎందరో ఫ్యాన్స్ ని సంపాదించి పెట్టింది కూడా అప్పుడే. తనని చిన్నప్పుడు వదిలేసి వెళ్ళి పోయాడని అన్నమీద కోపం. షాంగ్ చీకి తండ్రితో బాటు, ఇటు చెల్లెలితో టెన్షన్. ఫైట్ క్లబ్ లో విరగదీసి కొట్టే ఈమెతో మ్యాచ్ గెలవలేక పోతాడు. ఐతే ఇలా కొట్టి ఓడించడం ద్వారా, తన భవిష్యత్ పోరాటంలో బెస్ట్ రైట్ హేండ్ నేనే నని తెలియజెప్పడమే ఈమె ఉద్దేశమని తర్వాత గ్రహిస్తాడు. ఉద్దేశాలు డైలాగులతో కాకుండా ఇలా యాక్షన్ రూపంలో బయటపడే విజువల్ రైటింగ్- స్టోరీ మేకింగిక్కడ!

        తల్లి పాత్రలో ఫలా చెన్ నటించింది. గ్రామ రక్షక భటురాలిగా ఒక యాక్షన్ సీన్ తో బాటు, పిల్లలతో కుటుంబ సెంటిమెంటు సీన్లతో కథకి లంగరు వేసింది. ఈమె కేంద్రంగానే మొత్తం కథ ఉద్భవించింది.   

        ఇప్పుడు హాంకాంగ్ మూవీ లెజెండ్ టోనీ లియాంగ్ గురించి చెప్పుకోవాలి.  వెయ్యేళ్ళుగా బ్రతుకుతున్న రాజకీయ కర్కశుడుగా, వినాశకుడుగా యాక్షన్ ఓరియెంటెడ్ తండ్రి పాత్రలో (వెన్వూ) ఎపిక్ సీన్స్ నటించాడు. టెన్ రింగ్స్ మహాత్మ్యంతో నిత్య యౌవనుడుగా పాత్రలో నటన ఒక అరుదైన అవకాశం, ఛాలెంజి. మరణం లేని నిత్య యౌవనుడు కాబట్టి కొడుకు వయసులోనే కనపడతాడు అరవై ఏళ్ళ టోనీ లియాంగ్!

    ప్రారంభంలో టాలో గ్రామం మీదికి దండెత్తి నప్పుడు రక్షక భటురాలిగా వుండే ఇంగ్ లీతో మార్షల్ ఆర్ట్స్ ఫైట్ ఒక కీలక దశలో రోమాంటిక్ టెన్షన్ క్రియేటవుతుంది కొన్ని క్షణాలు. దాంతో ఆమెతో ప్రేమలో పడిపోతాడు. ఈ షాట్ చాలా సెన్సిటివ్ గా, బ్యూటీఫుల్ గా తీశాడు దర్శకుడు. పెళ్ళి చేసుకున్న ఇంగ్ లీ మీద ఎంత ఫ్రేమంటే, ఆమె మరణించిందన్న మాటే నమ్మడు. టాలో గ్రామంలో బంధించి వుందనే నమ్ముతాడు. రావణ లంక లాంటి ఆ గ్రామం నుంచి సీత లాంటి భార్యని విడిపించుకోవడమే లక్ష్యంగా కొడుకు మీద వొత్తిడి తెస్తాడు. లియాంగ్ కొడుక్కి టెన్ రింగ్స్ ని అప్పజెప్పే సీనుని  కూడా లాండ్ మార్క్ సీనుగా చేసిపెట్టాడు. అతను హాంకాంగ్ మూవీ లెజెండ్, అంతే. ప్రతీ సన్నివేశమూ అతడి నటనకి సలాము చేయాల్సిందే.

మెయిన్ విలన్, చైనీస్ పురాణ దుష్టజీవి డ్వెల్లర్- ఇన్- డార్క్ నెస్ మనుషుల ఆత్మల్ని భక్షించే రాక్షసి. దీన్ని వెయ్యేళ్ళుగా టాలో గ్రామంలో బంధించి వుంచారు. ఇది చనిపోయిన వెన్వూ భార్య ఇంగ్ లీ లాగా నటిస్తూంటుంది. టెన్ రింగ్స్ నుపయోగించి తనని విడిపించమని వెన్వూని బతిమాలుకుంటుంది. ఇది తన భార్యే అనుకుని విడిపిస్తే వెన్వూ మీద పడి అతడి పని బడుతుంది. దీనికి యాంటీగా గ్రేట్ ప్రొటెక్టర్ అనే ఫ్రెండ్లీ చైనీస్ డ్రాగన్ వుంటుంది. ఇది షాంగ్ చీకి హెల్ప్ చేస్తుంది క్లయిమాక్స్ దృశ్యాల్లో. ఇంకా చాలా వింత జీవులున్నాయి. ఇవన్నీ డ్వెల్లర్- ఇన్- డార్క్ నెస్ సహా, సీజీ సృష్టులే. వీటి విజువల్ ఎఫెక్ట్స్ అత్యంత రిచ్ గా వున్నాయి.

చివరికేమిటి

ఓ రెండు గంటలు క్లీన్ అండ్ గ్రీన్ ఎంటర్ టైనర్. అయితే ఏదో కాలక్షేపానికే అన్నట్టు గాకుండా, అంతరార్ధాలతో స్పిరిచ్యువల్ జర్నీగా ప్రేక్షకుల ఆత్మిక దాహాన్ని తీరుస్తుంది. అంటే సబ్ కాన్షస్ తో కనెక్ట్ అవుతుంది. వివిధ హాలీవుడ్ సూపర్ మాన్ సినిమాలన్నీ స్పిరిచ్యువల్ జర్నీలే ముసుగేసిన పురాణ పాత్రలతో. ఇలాటి కామిక్ బుక్స్ కూడా ఇంతే. దీన్ని దర్శకుడు క్రెటన్ మనోహరంగా విజువలైజ్ చేశాడు తెరమీద మార్వెల్ ప్రమాణాలతో. ఒక చైనీస్ మాయా ప్రపంచాన్ని సృష్టించాడు. చైనా, కొరియా, జపాన్, ఇంకా ఇతర ఆసియన్ దేశాల సినిమాల విజువల్ ఇన్స్పిరేషన్ తో ‘షాంగ్ చీ’ ని చిత్రిక పట్టాడు. జీవితంలో బాధ, డ్రామా, హాస్యం మొదలైన వాటిని దృశ్యమానం చేయడానికి పై ఇన్స్పిరేషన్ తీసుకున్నాడు.

        మార్వెల్ స్టూడియో ఓ ఇరవై ఏళ్ళ క్రితం స్క్రిప్టు ప్రారంభించి వుండొచ్చు, క్రెటన్ మాత్రం ఏళ్ళకి ఏళ్ళు స్క్రిప్టు మీద పని చేయలేదు. కేవలం మొన్న 2019 లోనే దర్శకుడిగా నియమితుడై ఇంత సినిమా తీసి ఇచ్చేశాడు. ప్రాచీన చైనా, ఆధునిక అమెరికా రెండిటి కలగలుపుగా, హాలీవుడ్  విజన్ లో చూపిట్టిన చైనీస్ -అమెరికన్ దర్శకుడు క్రెటన్, పిల్లలు కూడా ఎంజాయ్ చేసే హానికరం కాని క్రియేషన్ని ప్రపంచం ముందుంచాడు.

—సికిందర్  

 

1091 : రైటర్స్ కార్నర్

 

       ప్రతి వృత్తికీ సాధనాలు అవసరం. ప్రాథమికంగా పారా పలుగూ లేకుండా మీరు ఇల్లు నిర్మించలేరు. బ్రోకర్ లేకుండా షేర్స్ వ్యాపారం చేయలేరు. బాస్కెట్‌ బాల్ ఆటగాళ్ళు   హూప్స్, బాల్ లేకుండా బాస్కెట్ బాల్ ఆడలేరు. చిత్రకారులకి కుంచెలు, రంగులు అవసరం...మీరు సినిమా రచయితైతే  మీకో టూల్ బాక్స్ అవసరం! ఆ టూల్ బాక్స్ లో ఏఏ సాధనాలు అవసరం? ఓ పెన్నూ కాగితమా? ఓ కంప్యూటరా? ఇవి సరే, ఇంకేం అవసరం? వృత్తిపరంగానో, అభిరుచిగానో  స్క్రీన్‌ప్లేలు రాయాలనుకుంటే, మీరు మీ సొంత టూల్ బాక్స్ ని అనుభవాల సారంగా నిర్మించుకోవడం, అనుకూలీకరించు కోవడమూ ప్రారంభించాల్సిందే!

        సినిమా రచన భౌతికమైనది కాబట్టి మీకు టైప్‌రైటర్ లేదా రైటింగ్ సాఫ్ట్ వేర్ తో బాటు చాలా రిఫరెన్స్ పుస్తకాలతో కూడిన కంప్యూటర్ అవసరం. స్క్రీన్ రైటింగ్ అనేది ఒక క్రాఫ్ట్ కాబట్టి మీకు విద్య, శిక్షణ, అభ్యాసం చాలా అవసరం. స్క్రీన్ రైటింగ్ అనేది ఒక కళ కాబట్టి కూడా మీరు అనుభవించిన ప్రతి అనుభవం, మీరు ఎప్పుడైనా చూసిన లేదా చదివిన ప్రతి కథ, మీరు ఎప్పుడైనా విన్న ప్రతి విషయం మీరు ఉద్వేగభరితంగా భావించే ప్రతిదానికీ  అవసరం. ఈ వ్యక్తిగత అనుభవాలన్నీ మీ టూల్‌ బాక్స్ లోకి వెళ్ళడానికి అవసరం.

అదృశ్య సాధనాలు :

         “నేను ఐదేళ్ళ వయసులో నా మొదటి స్క్రీన్‌ప్లే రాసేశా, పన్నెండు సంవత్సరాల వయసులో నా మొదటి ఆస్కార్‌ గెలిచేశా, నా రెండవ ఆస్కార్ పదిహేనవ యేట వచ్చేసింది...” చెప్పాడు యమ బిజీగా వున్న పిల్లవాడు. “ఈ వయస్సులో మీరు దేని గురించి రాశారండీ?” అడిగాడు అనామకుడు. "జీవితం గురించి రాసేశా!” చెప్పాడు బుడ్డోడు. “కానీ మీరు తగినంత జీవితాన్ని అనుభవించలేదు కదండీ?” అన్నాడు అనామకుడు. "ఓహ్, అనుభవించేశా!” అరిచాడు బుడతడు,“తెలీదేమో మీకూ, నా గత జన్మల విశేషాలన్నీనాకు బాగా గుర్తుంటాయి మరి!” అన్నాడు మళ్ళీ ముక్కు తుడుచుకుంటూ.

        ఇలా మీ వ్యక్తిగత అనుభవాలే, పరిశీలనలే మీ అదృశ్య సాధనాలు. ఇదేం మీరు భౌతికంగా బయట కొనుగోలు చేసి మీ ఊహాత్మక టూల్‌ బాక్స్ లో వుంచగలిగేది కాదు. కానీ ఇది అన్ని రచనా వ్యాసంగాలకీ ముఖ్యావసరమే. మీరు ఎంత ఎక్కువ తెలుసుకుంటే, చూస్తే, అనుభూతిస్తే, అంత ఎక్కువ రాసేటప్పుడు సారం మీ రచనల్లో  ప్రవహిస్తుంది. ఈ రకమైన సాధనాలని సేకరించడానికి సంవత్సరాలు పట్టొచ్చు.

        ఈ రకమైన సాధనాలని మరింత అభివృద్ధి చేయడానికి ఉత్తమ మార్గం ప్రతిదీ వినడం, గ్రహించడం, ప్రాసెస్ చేయడమే. ప్రపంచంలో అత్యంత చెడ్డ లేదా నీచమైన వ్యక్తికి కూడా ఒక దృక్కోణం వుంటుంది. రచయితగా మీ విలువలకి, నమ్మకాలకి విరుద్ధంగా వుండే విభిన్న దృక్కోణాలని మీరు అర్థం చేసుకోవాలి. ఇతర వ్యక్తుల్ని అర్థం చేసుకోవడానికి మీరు ఎంత ఓపెన్‌గా వుంటే, మీ పాత్రలు అంత లోతుగా వుంటాయి. క్యారెక్టర్ డెవలప్‌మెంట్‌లో తప్పు, ఒప్పు అన్నవి వుండవు - కేవలం దృక్కోణాలే వుంటాయి. అందుకే చాలా మంది రచయితలు విశ్లేషకులుగా పుట్టుకొచ్చారు.

        "మీకు తెలిసింది రాయండి" అన్నారు. మీ వ్యక్తిగత అనుభవాలతో నాలెడ్జ్ బేస్ పెరిగేకొద్దీ (దురదృష్టవశాత్తూ, వయస్సుతో పాటూ), మీరు మీ అదృశ్య సాధనాలని విస్తరించడమూ, ఉన్నతస్థాయి రచనలల్నిచేయడమూ ప్రారంభిస్తారు. నా సలహా, నోట్ ప్యాడ్ దగ్గరుంచుకుని బయటకి వెళ్ళండి. బయట ఏం తెలుసుకుంటున్నారో రాసుకోండి. తిరిగి వచ్చాక విశ్లేషించుకోండి. మీరు లోతైన రచనలు చేయడానికి ఇది అవసరం.

క్రాఫ్టింగ్ సాధనాలు :

        “నేను ఆ సినిమా కంటే బ్రహ్మాండమైన సినిమా కథ రాయగలను. వందల కొద్దీ సినిమాలు చూశా, నాకు చాలా ఈజీ!” చెప్పాడు బిజీ ప్రేక్షకుడు. “సరే రాయ్ మరి” చెప్పాడు అనామకుడు. నెలరోజుల తర్వాత, “ఏం సార్, పూర్తయిందా మీ బ్రహ్మాండమైన సినిమా కథ?” అడిగాడు అనామకుడు. “ఫస్ట్ పేజీ మీద హెవీ వర్క్ చేస్తున్నానబ్బా ఆగు!” అన్నాడు హెవీ ప్రేక్షకుడు.

        మీ క్రాఫ్టింగ్ సాధనాలు మీ సినిమా రచన విద్యా, శిక్షణా, అభ్యాసాల ద్వారా మాత్రమే అభివృద్ది చెందుతాయని గుర్తు పెట్టుకోండి. సినిమాలు చూస్తున్నంత మాత్రాన ఏమీ వొరగదు. మీకు సినిమా రచనలో డిగ్రీ లేకుంటే (చాలా మందికి వుండదు కూడా), వర్క్ షాపులు, స్క్రీన్ రైటింగ్ పుస్తకాలతో స్వబోధనా మీకు తోడ్పడతాయి. కొత్తగా వచ్చేవాళ్ళు కనీసం రెండు వర్క్ షాపులు హాజరవాలని నేను సిఫార్సు చేస్తున్నాను. ఇక్కడ మీకు ఇతరులు ఎలా రాస్తున్నారో చదవడానికీ, చర్చించడానికీ అవకాశముంటుంది. దీంతో అపారమైన అంశాల మీద మీకు పట్టు లభిస్తుంది. ఇతరులు చేస్తున్న తప్పులు కూడా తెలుసుకుని మిమ్మల్ని దిద్దుకోగల్గుతారు.

       సినిమా రచన ప్రాథమికాలని నేర్చుకోవడంలో సార్వత్రిక కథా నిర్మాణం (యూనివర్సల్ స్టోరీ స్ట్రక్చర్) తెలుసుకోవడం అతి ముఖ్యమైన భాగం. మౌలిక కథా నిర్మాణం జానపద కథల నుంచి, పురాణాల నుంచీ లభిస్తోంది. ఈ విషయాలని బోధించే తరగతులకి మీరు హాజరైతే వృత్తిలో మీరు ముందుంటారు.

        ఈ విద్య మీకు స్క్రీన్ రైటింగ్ పుస్తకాల్లోంచి కూడా లభిస్తుంది. మరొక క్రాఫ్టింగ్ సాధనం తిరగ రాయడం. రాసింది దిద్దుకుంటూ తిరగ రాయడం. ఎన్నిసార్లయినా తిరగ రాయండి. ఎంత ఎక్కువ సాధన చేస్తే అంత మంచి రచయితవుతారు. సినిమా రచననేది ఒక క్రాఫ్టు. ఎంత సాధన చేస్తే అంత మేలైన రచయితవుతారు.

భౌతిక సాధనాలు:

        ఇక్కడ కొన్ని రిఫరెన్సు పుస్తకాలని సూచిస్తున్నాను. అసంఖ్యాకంగా లభిస్తున్న స్క్రీన్ రైటింగ్ పుస్తకాల్లో ఏవి తీసుకోవాలన్న తికమక లేకుండా మీకు సూచిస్తున్నాను. పాత్ర, కథ ఎల్లప్పుడూ ఒకదానితో ఒకటి ముడిపడి వుంటాయి. ఏ పుస్తకం దేని కవసరమో ఈ కింద జాబితాలో బ్రాకెట్లలో సూచిస్తున్నాను.

        1. ది ఆర్ట్ ఆఫ్ డ్రమటిక్ రైటింగ్, లాజోస్ ఎగ్రి - ఈ పుస్తకం 1946 లో వెలువడింది. ప్రత్యేకంగా ప్లే రైటింగ్ (నాటకాల) కోసం. స్క్రీన్ రైటింగ్ కోసం దీన్ని సిఫార్సు చేస్తాను. ఇందులో వున్న లోతైన సమాచారంతో బలమైన రచనలు చేయగల్గుతారు (క్యారెక్టర్ డెవలప్‌మెంట్, స్టోరీ స్ట్రక్చర్)

      2. పోయెటిక్స్, అరిస్టాటిల్ మాస్టర్ - కథా నిర్మాణాన్ని పరిశోధించి విశ్లేషించిన మొదటి పండితుడు. ఆయన చెప్పిన బేసిక్స్ ఇంకా మారలేదు (స్టోరీ స్ట్రక్చర్)

        3. ది హీరో విత్ ఏ థౌజండ్ ఫేసెస్, జోసెఫ్ కాంప్‌బెల్ - ఈ పుస్తకం చదవడం అంత తేలికైనది కాదు. అయితే క్లాసిక్ మిథ్ స్ట్రక్చర్‌ (మోనో మిథ్) ని ఉపయోగించి కథానాయకుడి కథా ప్రయాణాన్ని వివరిస్తుంది (క్యారెక్టర్ డెవలప్‌మెంట్, స్టోరీ స్ట్రక్చర్)

        4. ది రైటర్స్ జర్నీ, క్రిస్టఫర్ వోగ్లర్ - ఇది ‘ది హీరో విత్ ఏ థౌజండ్ ఫేసెస్’ కి గైడ్ లాంటిది. దీని కంటెంట్ ని నేరుగా దాని నుంచి తీసుకున్నారు. ఫిల్టర్ చేసి విషయం చెప్పారు. పురాణాల నిర్మాణంపై దృష్టి పెట్టి రాశారు (స్టోరీ స్ట్రక్చర్)

       5. స్టీలింగ్ ఫైర్ ఫ్రమ్ ది గాడ్స్, జేమ్స్ బానెట్  - ఇది కూడా పురాణాల నిర్మాణాన్ని పరిశోధించి రాసిన పుస్తకం. కల్పిత కథలకి మీకు కొత్త అంతర్దృష్టిని కల్పిస్తుంది (క్యారెక్టర్ డెవలప్‌మెంట్, స్టోరీ స్ట్రక్చర్)

        6. స్క్రీన్ రైటింగ్ ఫ్రమ్ ది హార్ట్, జేమ్స్ ర్యాన్  - పాత్ర చోదిత కథా కథనాలకి  సహాయపడే ప్రత్యేకతలున్న పుస్తకం (క్యారెక్టర్ డెవలప్‌మెంట్)

     7. స్క్రీన్‌ప్లే, సిడ్ ఫీల్డ్ - ప్లాట్ పాయింట్‌లని పేజీ నంబర్‌లుగా మార్చి చూపిన ప్రసిద్ధ పుస్తకం. స్క్రీన్‌ప్లే నిర్మాణాన్ని నేర్చుకోవడం ప్రారంభించడానికి ఇది మంచి పుస్తకం. ఐతే ఒక హెచ్చరిక - అలాగని పేజీ నంబర్లు ముందే అనుకుని ప్లాట్ పాయిట్స్ రాయకండి. అంకాల నిడివిని బట్టి పేజీ నంబర్లు మారవచ్చు.  

—గినీ వాన్ నేమ్ (రచయిత్రి, నిర్మాత)

        గమనిక : పై పుస్తకాల్లో మొదటి ఐదిటి గురించి బ్లాగులో అప్పుడప్పుడు ప్రస్తావిస్తున్నదే. అలాగే ముందుగానే ఈ పుస్తకాలు చదివే ప్రయత్నం చేయవద్దని కూడా చెప్పాం. ఇవి హయ్యర్ స్టడీస్. ప్రాథమికంగా బేసిక్స్ తెలియకపోతే ఈ పుస్తకాలు అర్ధం గావు. బేసిక్స్ నేర్చుకున్నాకే, ఎంతో అనుభవం పొందిన తర్వాతే వాటి జోలికెళ్ళాలంటూ, బేసిక్స్ కోసం సిడ్ ఫీల్డ్  - ‘స్క్రీన్‌ప్లే’ పుస్తకాన్ని సూచిస్తూ వచ్చాం. కనుక పై జాబితాలో చివర సూచించిన సిడ్ ఫీల్డ్  - ‘స్క్రీన్‌ప్లే’ మాత్రమే మొదట అభ్యసించాలి. ఏ పుస్తకం పడితే ఆ పుస్తకం కొనేసుకుంటే అయోమయ జీవిగా మిగిలిపోవడం ఖాయం – సికిందర్

1090 : రివ్యూ

దర్శకత్వం : మల్లిక్ రామ్
తారాగణం: తేజ సజ్జ, శివానీ రాజశేఖర్, సత్య, శివాజీ రాజా, తులసి తదితరులు
కథ : ప్రశాంత్ వర్మ, స్క్రీన్ ప్లే - మాటలు : లక్ష్మీ భూపాల, సంగీతం: రథన్, ఛాయాగ్రహణం : విద్యాసాగర్
బ్యానర్ : మహాతేజ క్రియేషన్స్, ఎస్ ఒరిజినల్ బ్యానర్
విడుదల: నవంబర్ 19, 2021, డిస్నీ + హాట్ స్టార్

        సైన్స్ ఫిక్షన్ ని జత చేసి ‘అద్భుతం’ అనే ఇంకో ప్రేమ సినిమా కొత్త వాళ్ళతో డిస్నీ + హాట్ స్టార్ లో స్ట్రీమ్ అవుతోంది ఈ రోజు నుంచి. హీరో తేజ సజ్జా, హీరోయిన్ శివానీ రాజశేఖర్, దర్శకుడు మల్లిక్ రామ్ కొత్త వాళ్ళు. రొటీన్ ప్రేమ సినిమాలతో విసిగిన ప్రేక్షకులకి కాస్త డిఫరెంట్ గా సైన్స్ ఫిక్షన్ రోమాన్స్ ఉత్సాహాన్నిచ్చేదే. ‘అద్భుతం’ అని టైటిల్ కూడా వుంటే అద్భుత జర్నీలో తేలియాడే ఫీల్ కూడా పుట్టి, ఇంట్లోనే కదా థియేటర్ కేళ్ళే పని లేదుగా అని పిల్లా పాపలతో డిజిటల్ స్క్రీన్స్ ముందు కూర్చోవచ్చు అల్పాహారాలు పెట్టుకుని. ఇక ఒక మౌస్ క్లిక్ తో మొదలవుతుంది ఆట. అప్పుడుంటుంది అసలు తండ్లాట. అదేమిటో చూద్దాం...

కథ

    సూర్య (తేజ సజ్జా) ఒక ఛానెల్లో పని చేస్తూంటాడు. ఒక రోజు ఆఫీసులో అయిన ఒక అనుభవంతో ఆత్మ హత్యకి సిద్ధపడతాడు. ఇంకో చోట వెన్నెల (శివాని) వుంటుంది. ఈమె కూడా ఒక కారణంతో ఆత్మహత్యకి పూనుకుంటుంది. ఇంతలో సూర్య సెల్ కి అతడి నెంబరుతోనే మెసేజి వస్తుంది. అది వెన్నెల సెల్ నుంచి వస్తుంది. తన నెంబర్ వెన్నెల దగ్గరెలా వుంది? తెలుసుకుంటే ఆమే తనూ వేర్వేరు కాలాల్లో వున్నట్టు తెలుస్తుంది. ఆమె 2014 లో, తను 2019 లో. ఇదెలా సాధ్యం? ఇప్పుడేం చేయాలి? ఇద్దరూ ఎలా కలుసుకోవాలి? అసలు ఇద్దరి మధ్య వున్న సంబంధమేమిటి? ఇదీ మిగతా కథ.

ఎలావుంది కథ

  వివిధ జానర్ల సైన్స్ ఫిక్షన్ సినిమాలు వస్తూంటాయి. వాటిలో ప్రేమ కథలొకటి. ఈ ప్రేమ కథల్లో సైన్స్ ఎక్కువై ప్రేమ తగ్గినా, ప్రేమ ఎక్కువై సైన్స్ తగ్గినా, లేదా సైన్సే మిస్సయినా ఫలితాలు బావుండవు. సైన్స్ సృష్టించిన కథా ప్రపంచంలో ప్రేమ కథలుంటే రెండూ కలిపి అద్భుతంగా ఫీలవగల్గుతాం- మనమూ ఆ కాల్పనిక సైన్స్ ప్రపంచంలో విహరిస్తూ. ‘ఎటర్నల్ సన్ షైన్ ఆఫ్ ది స్పాట్ లెస్ మైండ్’ (2005), ‘ఎబౌట్ టైమ్’ (2013), ‘ఐయాం యువర్ మాన్’ (2021) వంటివి కొన్ని. తెలుగులో ‘ఆదిత్య 369’ చూసినా మనం మొత్తం వేరే ప్రపంచంలో వున్నట్టు ఫీలవుతాం. అలా ఫీలయ్యేట్టు చేయకపోతే అది సైన్స్ ఫిక్షన్ కాదు.

  ‘అద్భుతం’ సైన్స్ ఫిక్షన్ జానర్లో లో భిన్న కాలాల టైమ్ జంబ్లింగ్ కథ. వేర్వేరు కాలాల్లో  వున్న హీరో హీరోయిన్ల ఫోన్ కాల్స్ కలిసి మొదలయ్యే కథలు. ఆ మధ్య తెలుగులో ఇలా ‘ప్లే బ్యాక్’ అనే సస్పెన్స్ థ్రిల్లర్, గత నెలలోనే ‘నేను లేని నా ప్రేమ కథ’ అనే రోమాన్స్ వచ్చాయి. ‘అద్భుతం’, ‘నేను లేని నా ప్రేమ కథ’ ఒకటే. రెండిటి ఇంటర్వెల్ సీన్లు ఒకటే. రెండిట్లోనూ ఎత్తుకున్న సైన్స్ ని వదిలేసి రోటీన్ ప్రేమ కథల్లోనే పడ్డారు. కాబట్టి ‘అద్భుతం’ ఏదో అద్భుతమనుకుంటే నిరాశ తప్పదు. వారం వారం వస్తున్న అవే పస లేని ప్రేమ సినిమాల్లో ఇదీ ఒకటి.

     ‘నేను లేని నా ప్రేమ కథ’ లో కాలాల ఎడం 17 ఏళ్ళు వుంటుంది. దాంతో 1983 లో వుంటున్న హీరోయిన్ కథకి పీరియెడ్ లుక్ తో బాటు ఆమె కట్టూబొట్టూ, భాషా ఆ కాలంలోకి తీసికెళ్తాయి. ‘అద్భుతం’ లో కేవలం అయిదేళ్ళే కాలాల ఎడం. 2014 కీ, 2019 కీ తేడా వుండని కాలం. దీంతో రెండు కాలాల దృశ్యాలూ, పాత్రల తీరులూ ఒకలాగే వుంటాయి. సైన్స్ ఫిక్షన్ ఫీల్ కలగక పోవడానికి ఇదే ప్రధాన కారణం.

        ‘నేను లేని నా ప్రేమ కథ’ లో కనీసం కథనమైనా డైనమిక్ గా వుంది. అనేక చోట్ల ఓ ప్రశ్న రేకెత్తిస్తూ రీఫ్రెష్ అవుతూ పోయే కథనం. వీటితో మలుపులూ సస్పెన్సూ ఏర్పడే కథనం. ‘అద్భుతం’ లో ఇది కూడా లేదు. ఏ మలుపులూ సస్పెన్సూ లేని చాలా నీరసమైన పూర్ కథనంగా ఇది వుంటుంది.

        ప్రేమ సినిమాలెన్ని తీసినా వాటికి ఎప్పటికప్పుడు వయసుకొచ్చిన యువ  ప్రేక్షకులు వుంటూనే వుంటారు. అయినా తీస్తున్న ప్రేమ సినిమాలు ఫ్లాపవుతున్నాయంటే లేత కుర్రాళ్ళకి కూడా పట్టని ఓల్డ్ సరుకుగా అనిపిస్తున్నాయన్న మాట. సినిమాలు చూసే వయసు కొచ్చిన నేటి లేత కుర్రాళ్ళ ప్రపంచంలో కెళ్ళి నేటివైన ప్రేమ సినిమాల్ని ఆవిష్కరిస్తే తప్ప అద్భుతాలు జరగవు.

 నటనలు- సాంకేతికాలు

    తేజకిది మొదటి సినిమా. తర్వాత నటించిన సినిమా ముందు వచ్చి వుంటే వచ్చి వుండొచ్చు. ఈ మొదటి సినిమాలో నీటుగా ఆత్మవిశ్వాసంతో నటించాడు. స్క్రీన్ ప్రెజెన్స్ వుంది. సీన్లు బాగా తీసివుంటే తనకి బావుండేది. పైపైన క్యారక్టర్ ని చిత్రించేయకుండా ఈ కథకి ప్రధాన పాత్రగా చేసి, ఒక గోల్, దాంతో డ్రైవ్ కల్పించి వుంటే స్క్రీన్ ప్లే ఇలా దెబ్బతీసేది కాదు తనని. ప్రారంభంలో ఆత్మహత్యా యత్నానికి బలమైన కారణం ఎలాలేదో, నటించడానికి అలా బలమైన కథ ఎక్కడా లేదు. సెకండాఫ్ లో ఫాదర్ సెంటి మెంటు, ట్రాజడీ కథని పక్కదోవ పట్టించాయే తప్ప తనకుపయోగ పడలేదు. హీరోయిన్ శివానితో ఫోన్ రోమాన్సు కూడా సాగి సాగి, వుండాల్సిన ప్రత్యక్ష రోమాన్స్ అప్పీల్ లేకుండా చేసింది. రెండు పాటల్లో రోమాంటిక్ గా కనిపించాడు.

   కొత్త హీరోయిన్, అలనాటి హీరో రాజశేఖర్ కుమార్తె శివానీ ఎమోషనల్ సీన్లలో కంటే మిగతా సీన్లలో హీరోని కేర్ చేయని పాత్ర నటించడంలో స్పీడు కనబర్చింది. తేజాకీ తనకీ భవిష్యత్తు వుంది. ఇక తేజ తండ్రిగా శివాజీ రాజా, శివానీ తండ్రిగా దేవీ ప్రసాద్, నానమ్మగా తులసి నటించారు. తేజ ఫ్రెండ్ గా సత్య బాగానే ఎంటర్ టైన్ చేస్తాడు కామెడీతో. ప్రొడక్షన్ విలువలు, విజువల్స్ రిచ్ గా వున్నాయి అద్భుతం టైటిల్ కి తగ్గట్టు. మిగిలిన విషయాలే అద్భుతంగా లేవు.

చివరికేమిటి

     పాత ప్రేమకి సైన్స్ ఫిక్షన్ సింగారం. నామ్ కే వాస్తే సైన్స్ ఫిక్షన్. అద్భుతమన్నాక ప్రతీ సీనూ పరవళ్ళు తొక్కుతూ అద్భుతాలు చేయాల్సింది పోయి- అద్భుత రసంతో లవ్ ని ఒక అడ్వెంచర్ గా చూపాల్సింది పోయి, చూసి చూసి వున్న అదే పాత రొటీన్ ప్రేమ డ్రామా కింద మార్చేశారు. కొత్త దర్శకుడి చేతిలో ఏమీ లేదు. ‘జాంబీ రెడ్డి’ దర్శకుడు ప్రశాంత్ వర్మ ఇచ్చిన కథే తీశాడు.

        ఫస్టాఫ్ ఫోన్ కాల్స్ తోనే లవర్స్ ఇద్దరికీ సరిపోతుంది. తాము వేర్వేరు కాలాల్లో వున్నట్టు తెలుకోవడానికి వాళ్ళకీ, మనకీ చాలా సమయం పడుతుంది. ప్రారంభంలో ఆత్మహత్యా యత్నం సీన్లోనే అలా మెసేజెస్ రావడంతో ఇద్దరూ వేర్వేరు కాలాల్లో వున్నట్టు ఓపెన్ చేసేసి మలుపు తిప్పి వుంటే ఫస్టాఫ్ బోరు అంతా తప్పేది. విషయం లేక ఇంటర్వెల్ వరకూ ఫ్లాట్ గా కథ నడుస్తూంటుంది. విషయం తెలిశాక సెకండాఫ్ లో హీరో పాత ప్రేమ ఫ్లాష్ బ్యాకు వస్తుంది. గతంలో ఇద్దరూ ప్రేమికులేననీ తెలిపే ఫ్లాష్ బ్యాక్. ఫ్లాష్ బ్యాక్ పూర్తయ్యాక ఇద్దరూ ఇప్పుడు కలుసుకునే కథ. ఈ కథని టైమ్ జంబ్లింగ్ సైన్స్ ఫిక్షన్ కథ చేయకుండా, ఐదేళ్ల క్రితం విడిపోయిన లవర్స్ తిరిగి కలుసుకునే కథగా చేసినా తేడా ఏమీ రాదు. ఇంకో విషయమేమిటంటే టైమ్ జంబ్లింగ్ పాయిటు వదిలేసి ఎక్కడికో వెళ్ళిపోవడం. ఇంత అద్భుతంగా సినిమా చూపిస్తే ఎందుకు చూడరు ప్రేక్షకులు?

—సికిందర్ 

1089 : హాలీవుడ్ రివ్యూ

 

        రెండు వేల ఏళ్ళ క్రితం ఈజిప్షియన్ రాణి క్లియోపాత్రాకి పెళ్ళినాడు పెళ్ళికొడుకు మార్కస్ ఆంటోనియస్ కానుకగా ఇచ్చిన మూడు అండాకార వజ్ర ఖచిత కళాకృతులు (ఎగ్స్) ని , వెతికి తెచ్చిన వారికి 300 మిలియన్ డాలర్లు చెల్లిస్తానని ప్రకటిస్తాడొక ఈజిప్షియన్ బిలియనీర్. ఇతను వీటిని కుమార్తె  పెళ్ళిలో చదివించాలనుకుంటాడు.    

ఇలా వుండగా, రోమ్ లోని ఒక మ్యూజియంలో క్లియోపాత్రా ఎగ్ అపహరణ కేసుకి సంబంధించి దర్యాప్తులో ఇంటర్ పోల్ ఏజెంట్ ఊర్వశీ దాస్ (రీతూ ఆర్య) తో సహకరించేందుకు ఎఫ్ బీఐ ఏజెంట్ జాన్ హార్ట్లీ (డ్వాయెన్ జాన్సన్) వస్తాడు. మ్యూజియంలో ఒరిజినల్ ఎగ్ ని అపహరించి నకిలీ ఎగ్ వుంచినట్టు గుర్తించిన అతనూ ఊర్వశి, వెంటనే యాక్షన్లోకి దిగుతారు. కళా ఖండాల చోరుడు నోలన్ బూత్ (రేయాన్ రేనాల్డ్స్) ని వెంటాడుతారు. నోలన్ తప్పించుకుని ఎగ్ తో బాలీలోని తన నివాసానికి చేరుకుంటాడు. అక్కడే వున్న జాన్ అతడ్ని పట్టుకుంటాడు. అక్కడికే వచ్చిన ఊర్వశి, నోలన్ తో బాటు జాన్ ని పట్టుకుంటుంది. జాన్ నోలన్ తో కుమ్మక్కయ్యాడని ఆరోపించి, నోలన్ తో బాటు  రష్యన్ జైల్లో వేయిస్తుంది. అక్కడ ఎగ్స్ అన్వేషణలో వున్న బిషప్ (గాల్ గడోట్) వీళ్ళిద్దరితో బేరమాడుతుంది. ఆమెతో బేరం ఒప్పుకుని ప్లాను ప్రకారం నోలన్, జాన్ తో కలిసి జైల్లోంచి తప్పించుకుని ఎగ్స్ వేటలో పడతాడు...

        ఈ వేటలో నోలన్ విజయం సాధించాడా? ప్రపంచానికి తెలియని మూడో ఎగ్ జాడ ఎలా కనుక్కున్నాడు? ఈ క్రమంలో ఎదుర్కొన్న కష్టాలేమిటి? మోసాలేమిటి? జాన్, బిషప్ ల నిజ స్వరూపాలేమిటి? ఇవి తెలియడమే మిగతా కథ.

స్టార్ పవర్ - స్టోరీ పవర్

    నెట్ ఫ్లిక్స్ 200 మిలియన్ డాలర్ల భారీ మొత్తానికి  కొని విడుదల చేసిన ఈ హాలీవుడ్ యాక్షన్ కామెడీ హిందీ, తెలుగు, తమిళ భాషల్లో విడుదలైంది. ఇందులో క్లియోపాత్రా ఎగ్స్ అనేది సినిమా కోసం కల్పించిన కథ. చారిత్రక స్పర్శ గల ఈ కల్పిత కథ వల్ల సినిమాకో విషయ గాంభీర్యం ఏర్పడింది. దీనికి కాంట్రాస్ట్ గా పూర్తిగా యాక్షన్ కామెడీ చేశారు కథని.  ఎక్కడా సీరియస్ గా వుండదు. ఏది ఎందుకు జరుగుతున్నాయో కూడా లాజిక్ లేకుండా మాస్ అప్పీల్ తో నవ్వించడమే పనిగా పెట్టుకున్నారు. దీనికి సారధులు ముగ్గురు స్టార్స్ - రేయాన్ రెనాల్డ్స్, డ్వాయెన్ జాన్సన్, గాల్ గోడాట్. తెర మీద ఈ స్టార్స్ కన్పిస్తే చాలు, కథ అవసరం లేదన్నట్టు ప్రవర్తించాడు దర్శకుడు రాసన్ మార్షల్ థర్బర్. దీంతో స్టార్ పవర్ తో దేశాదేశాల లొకేషన్స్ లో హంగామాయే తప్ప స్టోరీ పవర్ లేకుండా పోయింది.

        ముగ్గురూ లోకం చుట్టిన వీరుల్లా రోమ్, బాలీ, లండన్, రష్యా, కైరో, అర్జెంటీనా, పారిస్, సార్డినా తిరిగేస్తారు. ఒక్కో దేశం పేరు తెర నిండుగా బండగా పడుతూంటాయి - మాస్ సినిమా కదా? తీరా చూస్తే ఆ దేశాల్లో ఇండోర్స్  లోనే సీన్సు జరుగుతాయి. ఈ మాత్రం ఇండోర్ సీన్స్ కి దేశాలు వెళ్ళడం ఎందుకో అర్ధం గాదు. ప్రతీ దేశంలో ఒక్కో యాక్షన్ సీనుమాత్రం అదరగొట్టేస్తారు. రష్యాలో హెలీకాప్టర్ తో  యాక్షన్ సీను, అర్జెంటీనాలో పారిపోయిన జర్మన్ నాజీకి చెందిన పురాతన కారుతో యాక్షన్ సీను లాంటివి. ఆరుకి ఆరూ యాక్షన్ సీన్సు  స్టార్స్ సెలబ్రిటీ స్టేటస్ తో పోటీ పడతాయి.

లాజిక్ కి డైలాగ్ పంచ్

     భూగర్భంలో ఈ నాజీ రహస్య బంకర్ ని యాక్సిడెంటల్ గా కనుగొన్నాక అందులో విద్యుద్దీపాలు దేదీప్యమానంగా వెలిగి పోతూండడం చూసి, బంకర్లో ఈ లైటింగ్ ఎలా సాధ్యమని మనకి డౌటు వస్తూండగానే, కరెంటు బిల్లు ప్రతీ నెలా కరెక్టుగా కడుతున్నట్టుంది - అనేస్తాడు రెనాల్డ్స్. ఇలా ప్రతీ చోటా లాజిక్ ని డైలాగులతో నవ్వించి ఎగుర గొట్టేస్తూంటారు. అయితే జలపాతం దగ్గర అద్భుత యాక్షన్ నైట్ సీను పట్ట పగలులా ఎలా వెలిగిపోతోందో డైలాగు కొట్టలేదు.

         కళా ఖండాల దొంగగా రెనాల్డ్స్ జేమ్స్ బాండ్ అడ్వెంచర్లు చేయడం ఈ యాక్షన్ కామెడీ ప్రత్యేకత. అతను అతి తెలివైన వాడు, చురుకైన వాడు. కష్ట సమయంలో కూడా డోంట్ కేర్ అన్నట్టు డైలాగులు కొట్టే రకం. నోరు తెరిస్తే కామెడీ పంచులే వస్తాయి. తన వల్ల తనతో బాటు అరెస్టయి జైల్లోపడ్డ ఎఫ్బీఐ ఆఫీసరు జాన్సన్ కి తనే దిక్కు. అలుసుగా తీసుకుని డైలాగులతో హింసిస్తూ వుంటాడు. తెలుగు డబ్బింగ్ డైలాగులు బాగా పేలాయి. జాన్సన్ కూడా డైలాగులు కొట్టడంలో తక్కువేం కాదు- జైల్లో ఫైటింగు సీను వద్దని నేను ఫీలవుతున్నాను- అంటాడొక సారి.

        చేయని నేరానికి జైల్లో పడ్డ జాన్సన్ బాధేమిటంటే, తను నిర్దోషియని నిరూపించుకోవాలంటే రెనాల్డ్స్ తో వుండక తప్పదు. క్లియోపాత్రా ఎగ్స్ ఎక్కడెక్కడెక్కడున్నాయో కనుక్కొని బయటపడాలంటే రెనాల్డ్సే దిక్కు. రెనాల్డ్స్ ఏడ్పించినా ఏడ్వక తప్పదు. దీంతో ఒకరంటే ఒకరికి పడని ఈ పోలీసు-దొంగ జోడీ ప్రయాణ కథ వినోద భరితంగానే వుంటుంది. వీళ్ళిద్దర్నీ గుప్పెట్లో పెట్టుకుని ఆడించే అసలు దొంగ గాల్ గోడాట్ హీరోయిన్ కామెడీ అదనం.

        అయితే ఎగ్స్ తో వుండాల్సిన కథే కథ కాకుండా సినిమా బోలుగా తయారైంది. వీళ్ళకి ప్రత్యర్ధిగా ఇంటర్ పోల్ ఏజెంట్ ఊర్వశీ దాస్ పాత్రలో వున్న బ్రిటిష్ నటి రీతూ ఆర్య కూడా ఏమీ చేయలేని పరిస్థితి. క్లయిమాక్స్ లో పాత తెలుగు సినిమాల్లో లాగా బిలబిలమంటూ పోలీసులతో వచ్చేసి, యూఆర్ అండర్ అరెస్ట్ అంటూ అందర్నీ పట్టుకునే లాంటి సీన్సే ఈమెకుంటాయి. ఇదొక ఆఫ్ స్క్రీన్ కామెడీ.

        రెనాల్డ్స్, జాన్సన్ లకి నాన్న లుండే వాళ్ళు. రెనాల్డ్స్ నాన్న పోలీసు అయితే తను దొంగగా మారాడు. జాన్సన్ నాన్న దొంగ అయితే తను పోలీసు అయ్యాడు. పాత్రల మధ్య ఈ ఫార్ములా డైనమిక్స్ బావున్నాయి. చిన్నప్పుడు తన వాచీ దొంగిలించాడని రెనాల్డ్స్ ని అపార్ధం జేసుకుని మాట్లాడ్డం మానేశాడు నాన్న. పెద్దయ్యాక రెనాల్డ్స్ కి ఆ వాచీ దొరికి కసి దీరా పగుల గొట్టి పారేస్తే, అందులోనే బయట పడింది మూడో ఎగ్ రహస్యం. దాంతో ప్రపంచ యాత్ర ప్రారంభించి ఈ కథకి శ్రీకారం చుట్టాడన్న మాట. కథ పట్టించుకోకుండా స్టార్ కామెడీని ఎంజాయ్ మాత్రం చేయొచ్చు ఈ హాలీవుడ్ మెగా మాస్ మూవీతో.

—సికిందర్