934 : స్క్రీన్ ప్లే సంగతులు

        విషయం 12. విక్రం ప్రీతి పేరెంట్స్ ని కలుస్తాడు. ప్రీతి ఒక అనాధ అనీ; మోహన్, లక్ష్మీ లు ఆమె పెంపుడు తల్లిదండ్రులనీ తెలుసుకుంటాడు. సరస్వతి అనే ఆవిడ నడిపే అనాధాశ్రయం నుంచీ మోహన్ తమ్ముడు శివ, మరదలు ప్రియ, ప్రీతిని చిన్నప్పుడు దత్తత తీసుకుని యూఎస్ వెళ్ళారనీ, అక్కడ వాళ్ళిద్దరూ ప్రమాదంలో చనిపోవడంతో, ప్రీతిని తెచ్చుకుని మోహన్ లక్ష్మీలు పెంచుకున్నారనీ తెలుసుకుంటాడు. ఆ అనాధాశ్రయాన్ని  ప్రీతి మేనేజ్ చేస్తోందని కూడా తెలుసుకుంటాడు. అనాధాశ్రయం నిర్వాహకురాలు సరస్వతి, ప్రీతి ఇచ్చే నిధులు దుర్వినియోగం కావడం లేదని చెప్తుంది.

        వివరణ: కిడ్నాపర్ ని పట్టించే దూదీ సూదీ వుండగా ప్రీతి పేరెంట్స్ దగ్గర ఆరాలు తీస్తున్నాడు విక్రం. ఎక్కడ మా కూతురు? దూదీ సూదీ దొరికాక కిడ్నాపర్ ని పట్టుకోక ఇక్కడి కెందు కొచ్చావ్? - అనాల్సింది అనడు మోహన్. పైగా కూతురు పుట్టుపూర్వోత్తరాలు చెప్పుకొచ్చాడు. ఇంకా ప్రీతి మొన్న రాత్రి ఎక్కడి కెళ్ళిందీ, నిన్న సాయంత్రం ఎక్కడి కెళ్ళిందీ అంటూ ప్రేక్షకులకి తెలిసిన విషయాలే అడిగాడు విక్రం. అంటే కాలేజీలో చదివే మీ కూతురు - ఎక్కడో సిటీ లో పబ్బుల్లో క్లబ్బుల్లో పడి తాగి - అర్ధరాత్రి ఔటర్ రింగ్ రోడ్డుమీద రూల్స్ ని అతిక్రమిస్తూ - డ్రంకెన్ డ్రైవ్ చేస్తూ తిరిగొస్తూంటే మీకేం పట్టదా? కన్న కూతురు కాదనా? మీ వల్లే ఈ కిడ్నాప్ అనే నేరం జరిగి నాకు తలనొప్పి వచ్చిందని తెల్సా? ...అని నిలదీయడు, అసలే తనకున్న ఫ్లాష్ బ్యాక్ తో సతమతమవుతున్న విక్రం. 

       శ్రీదేవి నటించిన ‘మామ్’ అనే థ్రిల్లర్లో, కూతురు ఆ నైట్ ఎక్కడో ఫాం హౌస్ కి పార్టీకి వెళ్తోంటే, ‘సెల్ చార్జింగ్ వుందా?’  అనడుగుతుంది శ్రీదేవి. ఆమె చేయాల్సింది పోలీస్ యాప్ డౌన్ లోడ్ చేసివ్వడం, బ్యాగులో ఒక  చిల్లీ స్ప్రే వుంచడం- ఒక తల్లిగా, అందులోనూ టీచర్ గానూ. ఇవేం చెయ్యక, ముందు తను బాధ్యతగా వుండక, కూతురు గ్యాంగ్ రేప్ అయిపోతే కత్తి పట్టుకుని రివెంజికి బయల్దేరుతుంది. ఇప్పుడేం లాభం నేరం జరిగే అవకాశమిచ్చేశాక?

        సరైన నేర కథలు కేవలం నేరస్థుణ్ణి పట్టుకునే దర్యాప్తు కథలుగా వుండవు. నేరము -నీతి చుట్టూ వుండే ప్రశ్నల్ని ఎక్కుపెట్టే క్రియేటివ్ ప్రక్రియలు. నైతిక విలువలకి పట్టంగట్టే, నైతిక బాధ్యతల్ని గుర్తుచేసే కళా రూపాలు. ఫిలిం నోయర్ జానర్ అప్పట్లో ఇదే చేసింది. తెలుగులో ‘నేనూ మనిషినే’  (1974) అనే క్రైం థ్రిల్లర్లో జడ్జి అయిన గుమ్మడి హత్య చేస్తాడు. తమ్ముడైన ఉన్నత పోలీసు అధికారి కృష్ణ, అన్నకి అనుకూలంగా కేసులో వాస్తవాల వక్రీకరణలకి పాల్పడతాడు (ఇందులో బుల్లెట్స్ తో వుండే బాలస్టిక్స్ సైన్స్ గురించి అప్పట్లోనే చూపించారు). రక్తసంబంధానికే లొంగి పోతాడు. హోదావల్ల అవకాశం దక్కితే స్వార్ధాలు, నైతికపతనాలు, అధికార దుర్వినియోగాలూ, సమస్త రుగ్మతలూ ఎలా వెల్లువెత్తుతాయో ఇక్కడ చూస్తాం మనం. చివరికి గుమ్మడియే దిగివచ్చి నైతిక ధర్మాన్ని స్థాపిస్తాడు. నేర కథలు నైతిక విలువల బ్యాక్ డ్రాప్ లో నైతిక విలువల్ని, బాధ్యతల్ని గుర్తు చేస్తూ వుంటాయి. 

        ‘ప్రిజనర్స్’ (2013) లో ఇదెక్కువైపోయి, ఇన్వెస్టిగేషన్ తగ్గిపోయింది. ‘హిట్’ లో ఇన్వెస్టిగేషన్ అడ్డదిడ్డంగా పెరిగిపోయి, మోరల్ ప్రెమీస్ గల్లంతయ్యింది. ‘ప్రిజనర్స్’ లో ఇద్దరు బాలికలు అదృశ్యమవుతారు. పోలీస్ డిటెక్టివ్ లోకీ అనేవాడు కేసు చేపడతాడు. కానీ బాలికల్లో ఒకరి తండ్రి కిడ్నాపర్ మీద రివెంజితో చెలరేగిపోతాడు. ఇలా ఫాదర్స్ రివెంజి డ్రామా అయింది. ఇందులో పోలీస్ డిటెక్టివ్ లోకీ, మన విక్రం లాగే పర్సనల్ ఫ్లాష్ బ్యాక్ తో కిందా మీదా అవుతూంటాడు. బాగానే కాపీ కొట్టాడు మన విక్రం ని ‘ప్రిజనర్స్’ దర్శకుడు. 

 
        ఇక ప్రీతి మేనేజ్ చేస్తున్న అనాధాశ్రయంలో  నిధులు దుర్వినియోగం కావడం లేదని చెప్పించి, అనుమానాల్నిమాత్రం అలాగే వదిలేశాడు కథకుడు. ఆమె అదృశ్యంలో అనాధాశ్రయం కోణాన్ని కొత్తగా కలిపాడు. అనుమానితుల సంఖ్య పెంచడానికి. 

        విషయం: 13. ఇరుగుపొరుగుతో ప్రీతి ఎలా వుంటుందని పేరెంట్స్ ని అడుగుతాడు విక్రం. షీలాతో క్లోజ్ గా వుంటుందని చెప్తాడు ప్రీతి తండ్రి మోహన్. మోహన్ లక్ష్మిల లాలాజలం, వేలిముద్రల శాంపిల్స్ తీసుకుంటారు. యూఎస్ లో తన తమ్ముడి ఆస్తి ప్రీతికి బదిలీ అయిందని చెప్తాడు మోహన్. అనుమానితుల లిస్టులో ప్రీతి పేరెంట్స్ ని కూడా చేరుస్తాడు రోహిత్. 

        వివరణ: అనుమానితుల సంఖ్య ఇంకా పెంచుతున్నాడు. ఇక్కడ ప్రీతి ఆస్తి కోణాన్ని ముందుకు తెస్తూ ఆమె పెంపుడు పేరెంట్స్ మీద అనుమానాలు రేకెత్తిస్తున్నాడు. ఆమెని కిడ్నాప్ చేయించి ఆస్తినెలా కొట్టేస్తారు. ఆమెని చంపేసివుంటారా? విక్రంకి ఈ అనుమానం వచ్చిందా? రాలేదు, అతడి స్కిల్స్ కి అంత సీను లేదు. ఒక దిశాదిక్కూ, వ్యూహం విధానం లేని ఇన్వెస్టిగేషన్. ఆ పేరెంట్స్ ని కూర్చోబెట్టి లాలాజలం, వేలిముద్రల శాంపిల్స్ లాగేశాడు. మేమెందుకివ్వాలి శాంపిల్స్ అని వాళ్ళు తిరగబడలేదు. చీఫ్ కి కంప్లెయింట్ చేయలేదు, ఇబ్రహీం విషయంలో చేసినట్టుగా. ఈ శాంపిల్స్ వ్యవహారం తర్వాత చివర్లో కథకుడు కథలో వాడుకోవడానికి- వీళ్ళని ఇరికించడానికి- అవసరం. కథలో ఈ అపహాస్యం ఎలా జరిగిందో గత వ్యాసంలో చెప్పుకున్నాం.   

 
        విక్రం వీళ్ళకైనా దూది చూపించి ప్రశ్నించడు - ప్రీతి ఫ్రెండ్స్ ఎవరైనా అత్తరు వాడతారా? పోనీ ప్రీతి డ్రగ్స్ తీసుకుంటోందా? ఆమె కారు దగ్గర విరిగిన సిరంజీ దొరికింది. ఆమె సెల్ ఫోన్ ఏదీ? ఆమె కాల్స్, సోషల్ మీడీయా యాక్టివిటీ చెక్ చేయాలి...అంటూ అడగాల్సిన ముఖ్య ప్రశ్నలేవీ అడగడు. ఇక పొరుగున షీలాతో ప్రీతి క్లోజ్ గా వుంటోందని ఇంకో క్లూ. ఇంకో అనుమానితురాలు. 

        విషయం 14. పొరుగున వుండే షీలాని కలిస్తే,  ప్రీతి ఒక్కతే  తనతో మాట్లాడుతుందనీ, తను డైవర్సీ కావడంతో ఎవరూ తనతో మాట్లాడరనీ అంటుంది షీలా. ప్రీతి మిస్సయిన సమయంలో తను తన కూతుర్ని కలవడానికి వెళ్లినట్టు చెప్తుంది.    

         వివరణ: షీలాతో ఇలా ఒక సబ్ ప్లాట్ ని ప్రారంభించాడు. తర్వాత దీంతో ఇంటర్వెల్ సీను క్రియేట్ చేశాడు. సబ్ ప్లాట్ తో ఇంటర్వెల్ క్రియేట్ చేస్తారా, మెయిన్ ప్లాట్ తో చేస్తారా? ఇది ఇంటర్వెల్ సీన్లో చూద్దాం. షీలా బాధేమిటంటే తనను డైవర్సీ అవడం వల్ల ఇక్కడందరూ తనని దూరం పెట్టారని. ప్రీతి ఒక్కతే తనతో ఫ్రెండ్లీగా వుంటోందని. ఇంకా నయం, డైవర్సీతో నీకు సావాసాలేమిటని ఆ జనం, ఆమె పేరెంట్స్ ఆమెని ఇంట్లో కూర్చోబెట్టలేదు. ఈ డైవర్సీని  అన్యాయంగా కథకుడిలా కథకోసం కావాలని ఒంటరి చేశాడు. ఇది ఇంటర్వెల్ సీన్లో తెలుస్తుంది. కథ కోసం పాత్రనా, పాత్ర కోసం కథనా? పాత్ర కోసం కథనుకుంటే ఒక డైవర్సీ తో ఇలా చెయ్యడు. పాత్రకి అన్యాయం చేయకుండా కథనే మార్చుకుంటాడు. మార్చుకునేలా చేస్తుంది పాత్ర. డైవర్సీ అంటే నెగెటివ్ క్యారక్టర్ కాదని తిరగబడుతూ. ఈ సినిమాలో లేడీస్ ని నెగెటివ్ గానే చిత్రించాడు కథకుడు. విక్రం పాయింటాఫ్ వ్యూలో నేహా బెడ్ మీద ఇంకొకడితో వుండగా, ప్రీతి అనే స్టూడెంట్ ని పబ్బుల్లో తాగే అమ్మాయిగా (కనీసం బాధితురాలైన పాత్రని నెగెటివ్ మరకలతో చూపించకూడదన్న కథా మర్యాద పాటించకుండా), షీలా డైవోర్సీ కాబట్టి అనుమానించదగ్గ క్యారక్టర్ అన్నట్టుగా, ఆఖరికి ‘హిట్’ ఉద్యోగి రోహిత్ భార్య స్వప్నని హంతకురాలిగా... ఇక నేహా తల్లిని, ప్రీతి తల్లినీ ఒట్టి దిష్టి బొమ్మలుగా. తన కథలో లేడీసంతా ఇలా వున్నారని గమనించాడో లేదో కథకుడు. 

      ఇక షీలాకి కూడా దూది చూపించి- అడగడు విక్రం. కథలో దూదిని సృష్టించి కథకుడు దానికదే ఒక ప్లాట్ డివైస్ అయ్యేలా చేసుకున్నాడు. చేసుకున్నాక ప్లాట్ డివైస్ ని  ప్లే చేస్తూ వుండాల్సిందే. దాంతో మిస్టరీ అంతు చూడాల్సిందే. ఈ కథా పథకం ఓకే అనుకుంటే, అప్పుడు వెనక్కెళ్ళి ఇబ్రహీం తో సీను దగ్గర, అతడికి దూది చూపిస్తే అతను కూడా తెలియదని చెప్పేలా చేసి కేసుని జటిలం చెయొచ్చు. కేసు దర్యాప్తులో ఒక ప్రధాన క్లూని పట్టుకు సాగకపోతే, కథనం ఏకత్రాటిపై వుండదు. విక్రం చేస్తున్నట్టుగా దారి పొడవునా ఏవేవో క్లూలు ఏరుకోవడమే. కథనం ఎటెటో వెళ్ళిపోవడమే.

        ఇంకోటేమిటంటే విక్రం అసలు క్రిమినల్ మైండ్ ని తెలుసుకునే ప్రయత్నమే చేయడం లేదు. కథకి ఓ పాయింటుని ఎస్టాబ్లిష్ చేసే ఆలోచనే చేయడం లేదు. ఇన్వెస్టిగేషన్ ఎలా చేయాలో ట్రైనింగ్ వుంటుంది. ఈ ట్రైనింగ్ చేసొచ్చాడో లేదో తెలీదు. కిడ్నాపర్ ఎందుకు కిడ్నాప్ చేశాడు? వాడు పరిచితుడా, అపరిచితుడా? పరిచితుడైతే మోటివ్ ఏమిటి. కాకపోతే మోటివ్ ఏమిటి? డబ్బుకోసమా? అయితే పేరెంట్స్ కి కాల్స్ ఎందుకు చేయడం లేదు? ఒకవేళ కాల్స్ ని పేరెంట్స్ దాస్తున్నారా? వాళ్ళ ఫోన్స్ ని సీజ్ చేసి ఎందుకు చెక్ చేయ కూడదు? కిడ్నాపర్ ఒకడేనా, వాడి వెనుక ఇంకెవరైనా వున్నారా? బ్లూ సెడాన్ కారుందంటే ఆ కారెవరిది? నగరంలో ఎన్ని బ్లూ సెడాన్ కార్లున్నాయి, వాటి రిజిస్ట్రేషన్ వివరాలేమిటి? అసలు ఈ కిడ్నాపర్ ప్రీతి బాయ్ ఫ్రెండా? వాడితో కలిసి ప్రీతి ప్లాన్ చేసిందా? తన ప్లాన్ ఎవిడెన్స్ సహా నేహాకి తెలిసిపోయిందని ఆమెని తనే కిడ్నాప్ చేయించిందా? కిడ్నాపర్ ఒకే రకం అత్తరు వాడుతున్నాడంటే, ఈ అత్తరు ఎక్కడ కొంటున్నాడు?... వగైరా వగైరా ప్రశ్నావళితో అర్జెంటుగా అదృశ్య విలన్ ని ప్రేక్షకుల సౌకర్యార్ధం క్రియేట్ చేయాల్సిన అవసరముంది ఈ కథకి. ప్రేక్షకులు విలన్ని ఫీల్ కాకపోతే, విలన్ చుట్టూ మిస్టరీని అనుభవించక పోతే, ఇంకేదీ పట్టించుకోరు. ఎండ్ సస్పెన్స్ కథలో చివరి వరకూ విలన్ కన్పించని అసంతృప్తిని ఇలా తీర్చాలి. నేరం -అదృశ్య విలన్- హీరో అనే  త్రికోణం మీద ఫోకస్ చేసి నడిపినప్పుడు, పాయింటు కొచ్చి కథ ఒక కథలా వుండే అవకాశముంది

. 

          ఇప్పుడు విక్రం క్యారక్టరైజేషన్ ఎలా వుండొచ్చంటే, ఎక్కడికెళ్ళినా అత్తరు వాసన కోసం ముక్కుపుటాలెగరేయ వచ్చు. ఎవర్ని కలిసినా అత్తరు వాసన కోసం పట్టి పట్టి వాసన చూడొచ్చు. ఈ అత్తరు - దూది అన్నవి ఈ కథలో ప్లాట్ డివైస్ ప్రాముఖ్యాన్ని సంతరించుకుని ఇలా తప్పనిసరి చేస్తున్నాయి కథనాన్ని మరి. ఇంకా విలన్ని ట్రాప్ చేయడానికి అదే అత్తరు తనే పూసుకు తిరగొచ్చు. హాలీవుడ్ క్లాసిక్ ‘డెత్ విష్’ (1974) లో ఇలాగే చేస్తాడు ఛార్లెస్ బ్రాన్సన్. తన పెళ్ళయిన కూతుర్ని రేప్ చేసిన దోపిడీ దొంగల్ని పోలీసులు పట్టుకోలేకపోతూంటే, తానే రంగంలోకి దిగుతాడు. ఆ దోపిడీ దొంగలెవరో తెలీదు. నగరంలో వున్న దోపిడీ దొంగలందర్నీ ఒక పథకం ప్రకారం నిర్మూలిస్తాడు. బంగారం, లేదా డబ్బు ప్రదర్శిస్తూ రాత్రి పూట నగరంలో సంచరిస్తూంటాడు. అవి చూసి దొంగలు దోచుకోవడానికి మీది కొచ్చినప్పుడు కాల్చి చంపుతూంటాడు...ఈ మూవీకి ఎంత పేరొచ్చిందో, అంత వివాదాస్పదమైంది. సోసైటీతో కనెక్ట్ చేయకుండా క్రైం కథల్ని చెప్పలేరు. సొసైటీ అవకాశమిస్తేనే క్రైములు జరిగేది. 

        ‘హిట్’ సినిమా ఆ మధ్య  ఔటర్ రింగ్ రోడ్డు మీద జరిగిన దిశా కేసు స్పూర్తితో తీశారని కొందరనుకుంటున్నారు. అలాంటప్పుడు, అలాటి నేరాల అనాటమీని విప్పి ప్రేక్షకుల ముందు పెట్టాలి. లేదా దిశా కేసు ఎలా ముగిసిందో తెలిసిందే - అలా విక్రం మోటార్ సైకిలు మీద సంచరిస్తూ,  కిడ్నాపర్స్ ని ట్రాప్ చేసి కాల్చి చంపడం మొదలెట్టాలి మోటార్ సైకిల్ డైరీస్ రాసుకుంటూ.

        కథకుడి కథలో విక్రం ఒకరితర్వాత ఒకరు అనుమానితుల్ని పోగేసుకుంటూ, ఒకదానితర్వాతొకటి ఏవేవో క్లూస్ ఏరుకుంటూ పాసివ్ కథనం చేసేకన్నా, ఇలా పాయింటు పట్టుకుని అదృశ్య విలన్ కోసం యాక్షన్లోకి దిగితే, మోక్షం లభించేదేమో ఈ కథకి. అంటే ఇలా చేసి ఎండ్ సస్పెన్స్ కథల్ని నిలబెట్టుకోవాలని చెప్పడం కాదు. ఎండ్ సస్పెన్స్ కథలు వద్దేవద్దు!! 

      విషయం 15. విక్రం, రోహిత్ లు పబ్ కెళ్తారు. అక్కడ బార్ అటెండర్ ని ప్రశ్నించబోతే అతను భయపడి పారిపోతాడు. వెంటాడి పట్టుకుంటే అతడి దగ్గర డ్రగ్స్ బయటపడతాయి. అతణ్ణి పోలీసులకి అప్పజెప్తాడు విక్రం. ప్రీతి పేరెంట్స్ ని కలిసి పూజకి ఏర్పాట్లు చేయమంటాడు. ప్రీతి క్షేమం కోసం ఏర్పాటు చేసే పూజకి ఎవరెవరు వస్తారో, ఎవరెవరు రారో కనిపెట్టేందుకు.

        వివరణ: ‘ప్రిజనర్స్’ లో అదృశ్యమైన బాలికల గురించి కొవ్వొత్తుల ప్రదర్శన ఏర్పాటు చేస్తాడు పోలీస్ డిటెక్టివ్ లోకీ. ప్రదర్శనకి ఆ బాలికల కుటుంబాలకి తెలిసిన వాళ్ళలో ఎవరెవరొస్తారు, ఎవరెవరు రారు చూసి విలన్ ని పట్టుకోవాలని. ఒకవేళ వచ్చినవాళ్ళలో విలన్ కూడా వుంటే కనిపెట్టి పట్టుకోవచ్చని. ఆ వచ్చినవాళ్ళలో ఒకడు దొంగ చూపులు చూస్తూంటాడు. వాణ్ణి పట్టుకోబోతే పారిపోతాడు. వెంటాడితే వాడు జంతు కళేబరాల దగ్గరికి దారి తీస్తాడు. ఫాల్స్ లీడ్ అని వదిలేస్తాడు లోకీ. 

        విక్రం పబ్ కెళ్ళి బార్ అటెండర్ ని ప్రశ్నించబోతే వాడు భయపడి పారిపోతాడు. వెంటాడి పట్టుకుంటే డ్రగ్స్ సప్లయర్ గా బయటపడతాడు.       ఫాల్స్ లీడ్ అనుకుని వాణ్ణి పోలీసులకి అప్పజెప్పి చేతులు దులుపుకుంటాడు విక్రం. ఇలా ఎలా చేస్తాడు? ‘ప్రిజనర్స్’ లో వాడికి బాలికలతో సంబంధం లేదు. ఇక్కడ బార్ అటెండర్ డ్రగ్స్ సరఫరా చేస్తూంటే, పబ్ కొచ్చే ప్రీతితో సంబంధం వుండొచ్చుగా? ఫ్రెండ్ తో కలిసి ఆమె డ్రగ్స్ కి అలవాటు పడిందేమో? లేకపోతే ఈ ప్రీతి వచ్చే పబ్ లో డ్రగ్స్ యాంగిల్స్ ని సృష్టించడమెందుకు సీనులో? ఇంకో సినిమాలోంచి కాపీచేస్తే, కథెలా రాసుకున్నామో చూసుకుని కాపీ చేయాలి. ప్రీతి ఈ పబ్ కొస్తున్నట్టు కథ రాసుకుని, ‘ప్రిజనర్స్’ లో సీను తెచ్చి మార్చి పెట్టుకుంటే, ఇలాగే అర్ధమొస్తుంది ప్రీతితో. ఇందుకే ఏ సీను రాయాలన్నా సెటప్స్ అండ్ పే ఆఫ్స్ సరి చూసుకోవాలనేది. 

        అలా పబ్ ఎపిసోడ్ ఫెయిలయ్యాక విక్రం ఇలా ప్లానేశాడు పూజా కార్యక్రమమంటూ. ‘ప్రిజనర్స్’ లో కొవ్వొత్తుల ప్రదర్శన అనే డిటెక్టివ్ లోకీ ప్లానుని, విక్రం పూజా కార్యక్రమంగా మార్చుకున్నాడు. ‘ప్రిజనర్స్’ లో కొవ్వొత్తుల ప్రదర్శన లోంచే అనుమానితుడి పలాయనమనే సీనుంది. విక్రం దీన్ని విడదీసి వేర్వేరు సీన్లుగా పెట్టుకున్నాడు. పూజకి తెలిసిన వాళ్ళు ఎవరెవరొస్తారు, ఎవరెవరు రారు చూసి, రాని వాళ్ళని అనుమానించాలని. పూజ కేర్పాట్లు చేసుకోమంటాడు ప్రీతి పేరెంట్స్ తో. ప్రీతి పేరెంట్స్ ని ఆల్రెడీ అనుమానితుల లిస్టులో పెట్టాడు. వాళ్ళనే పూజ పెట్టుకోమనడమేమిటి? విక్రంని అర్ధం జేసుకోవడం షెర్లాక్ హోమ్స్ వల్ల కూడా కాదు. అసలు పూజ కేర్పాట్లు చేయించి తనకే ఇబ్బంది తెచ్చుకుంటున్నాడని తెలుసుకోవడం లేదు. మనకి తెలుస్తోంది... ఎందుకంటే అతడి మైండ్ మనకి తెలుసు. 

       విషయం 16. పూజకి అందరూ వస్తారు. ఎవరి మీదా అనుమానం రాదు. ఇంతలో పొరుగున వుండే షీలా పరుగెత్తుకొచ్చి, తలుపు దగ్గర లెటర్ దొరికిందని చెప్తుంది. ఆ లెటర్లో - డేడ్ బాడీ వికారాబాద్ రాజూ గెస్ట్ హౌస్ ముందు వుందని రాసి వుంటుంది. విక్రం షాకవుతాడు. నేహా మెదుల్తుంది. డిస్టర్బ్ అవుతాడు. ప్రీతి కోసం పూజ దగ్గర హోమంలో మంట చూసి తలతిరిగి పడిపోతాడు (విశ్రాంతి).

        వివరణ :  మాయమైన ప్రీతి క్షేమాన్ని కాంక్షిస్తూ చేస్తున్న పూజకి మనకి చూపించిన అనుమానితులందరూ హాజరయ్యారు షీలా తప్ప. డైవర్సీగా ఆమెని బాయ్ కాట్ చేశారు కాబట్టి ఆమె రాదు. పోనీ అంత క్లోజ్ గా వుండే ప్రీతి కోసం ఇంట్లోనైనా ప్రార్ధించదు. ఇంట్లో ప్రార్ధిస్తున్నట్టు ఒక ఇంటర్ కట్ షాట్ వేయాలని ఆలోచించలేదు. ఉన్న ఒక్క ఫ్రెండ్ పట్ల ఆమె వైఖరిని కూడా దిగజార్చారు. ఇల్లు కాలి ఒకరేడుస్తూంటే చలి కాచుకున్నట్టు ఆమె పాత్ర చిత్రణ చేశారు. ఇది తర్వాత చూద్దాం. 

        పూజకి పోలీసు పటాలమంతా వచ్చింది చీఫ్ సహా. వీళ్ళు దేనికి, విక్రం ఒక్కడే వచ్చి కనిపెట్టక? ‘ప్రిజనర్స్’ లో పోలీసులు ఏర్పాటు చేసిన కొవ్వొత్తుల ప్రదర్శనగా బాలికల పేరెంట్స్ కి తప్ప ఇతరులకి తెలీనివ్వకుండా, పోలీస్ డిటెక్టివ్ లోకీ ఏర్పాట్లు చేసి, రహస్యంగా వుండి గమనిస్తూంటాడు ఆహుతుల్ని. విక్రం ఇంకెప్పుడాలోచిస్తాడు సక్రమంగా? ‘హిట్’ టీములో కూడా అనుమానితులున్నారా వాళ్ళంతా రావడానికి? వీళ్ళంతా ఇలా వచ్చి వుంటే, నిజంగానే ఏమీ ఎరగనట్టు విలన్ కూడా వస్తే, పోలీసుల్ని చూసి దొరికిపోకుండా తన చర్యలతో జాగ్రత్త పడడా? 

        ఇంతలో షీలా కేకలు పెడుతూ వచ్చేసింది. విక్రం ని తీసికెళ్ళి ఇంటి మెట్టు మీద ఒక లెటర్ని చూపించింది... ఆ లెటర్లో - డెడ్ బాడీ వికారాబాద్ రాజూ గెస్ట్ హౌస్ ముందు వుందని విషయం. 

        ఇది ఇంటర్వెల్ సీను. ఇక్కడ్నించీ ఈ ఇంటర్వెల్ సీనంతా చెడిపోవడం చూస్తాం. ప్రీతి కోసం పూజ జరుగుతూంటే, డెడ్ బాడీ గురించి లెటర్ రావడం మంచి బ్యాంగే. కానీ సెకండాఫ్ లో వెల్లడయ్యే అసలు విషయాన్ని బట్టి చూస్తే ఇంటర్వెల్ బ్యాంగ్ చీటింగ్. ప్రేక్షకుల మెదళ్ళకి మేత పెడుతూ, వాళ్ళ  ఐక్యూని పరీక్షిస్తూ నడుపుతున్న కథతో  చీటింగ్. 

      సెకండాఫ్ లో వెల్లడయ్యే దాన్ని బట్టి ఈ లెటర్ కావాలని అబద్ధంగా షీలా సృష్టించిందే. డెడ్ బాడీ లేదు, ఏమీ లేదు. తనని అందరూ దూరం పెడుతున్నారు కాబట్టి పబ్లిసిటీ చేసుకుని వార్తల కెక్కడానికే  ఈ లెటర్ సృష్టి అంటూ తనే ఒప్పుకుంటుంది. తనకి వున్న ఒకే ఒక్క ఫ్రెండ్ ట్రాజడీ లోంచి లాభం పొందాలన్న దురాలోచన అన్నమాట. ఇలావుంది పాత్ర చిత్రణ ఇంటర్వెల్ సీను కోసం. 

        రెండో విఘాతమేమిటంటే, షీలా ఆమె పాట్లతో చేసింది పూర్తిగా ఆమెకి సంబంధించిన సబ్ ప్లాట్. ఒక సబ్ ప్లాట్ ని తీసుకొచ్చి మెయిన్ ప్లాట్ కి ముడిపెడుతూ ఇంటర్వెల్ ఎలా ఇస్తారు? మెయిన్ ప్లాట్ లో వున్న విక్రం, ప్రీతి, నేహా, అదృశ్య విలన్ పాత్రల్లో ఒకదాంతో ముడి పెట్టాలి గాని. ఈ కథకైతే  అదృశ్య విలన్ తో ఇంటర్వెల్ ఇవ్వాలి. ఇక అదృశ్య విలన్ రంగంలోకి దిగాడన్నస్టోరీ డెవలప్ మెంట్ - ఛేంజ్ ఓవర్ - చూపించాలి. మెయిన్ ప్లాట్ గేరు మార్చాలి ఇంటర్వెల్ తో. 

        మూడో విఘాతమేమిటంటే. మంట చూసి విక్రం కుప్ప కూలడం. అసలా లెటర్ చూడగానే ప్రీతి మెదలదు. అది ప్రీతి డెడ్ బాడీ కావచ్చనుకోడు (మన మెంటల్ రిఫ్లెక్షన్లో ప్రీతియే ఫ్లాషవుతుంది. అవ్వాలి కూడా. ఎందుకంటే మనం ప్రీతి కథనే ఫాలో అవుతున్నాం, నేహా కథని కాదు. నేహా కథే లేదు). విక్రం విపరీతంగా షేక్ అయిపోతూ నేహాతోనే  ప్రేమ దృశ్య మాలిక దర్శించుకుంటాడు. వాటీజ్ దిస్ విక్రం భాయ్? కాస్త మమ్మల్ని కనికరించు. నువ్వు తేల్చుకోవాల్సింది ఈ కేసుతో కాదు, నిన్నింతలా అన్ పాపులర్ చేస్తున్న స్టోరీ రైటర్ తో!

      విక్రం ఎప్పుడు మంట చూసినా తన ఫ్లాష్ బ్యాక్ గుర్తుకొచ్చి విచలితుడైపోతాడు. అలాంటిది ఎందుకు ప్లాన్ చేయాలి ఈ పూజ? పూజ అంటే మంట వుంటుందని తెలీదా? మంట చూసి ఇంటర్వెల్ ని మసి చేస్తాడని తెలీదా? విక్రం! ఏంటబ్బా ఇది? నువ్వు ఫస్ట్ లాక్ డౌన్ లోకెళ్ళిపో!

        చివరికి ప్రీతీ డెడ్ బాడీ కాదు, నేహా డెడ్ బాడీ కాదు, విక్రం ఫ్లాష్ బ్యాక్ గురించి  ఇంటర్వెల్. ఫ్లాష్ బ్యాకులో ఏం జరిగిందో మనకి తెలియని ఫ్లాష్ బ్యాకు గురించి ఇంటర్వెల్!

***
        ఎండ్ సస్పెన్స్ కథల్లో ఇంటర్వెల్ అంటే  అనుమానితుల్లో ఒకరి మీద కీలక  సమాచారం లభించడం లేదా, అదృశ్యంగా వున్న విలన్ తను దొరక్కుండా ట్విస్టు ఇవ్వడం.

(రేపు మిడిల్ టూ సంగతులు)

―సికిందర్ 

933 : స్క్రీన్ ప్లే సంగతులు

       విషయం: 8. ప్రీతిని కిడ్నాప్ చేసిన వాడే కచ్చితంగా నేహా ఫ్లాట్ కెళ్లాడని, అతనెవరని రోహిత్ తో అంటాడు విక్రం. ఓకే, ఎక్కడ స్టార్ట్ చేద్దామని రోహిత్ అడుగుతాడు. ప్రీతి కేసు ఫైల్స్, ఓఆర్ఆర్ ఎంట్రీ ఎగ్జిట్ ఫుటేజీ, అలాగే ఫోరెన్సిక్స్ కి పంపిన కేస్ మెటీరియల్ మొత్తం తన టేబుల్ కి రావాలంటాడు విక్రం. స్టడీ చేసి ఇన్వెస్టిగేషన్ స్టార్ట్ చేద్దామంటాడు. నేహా ప్రీతి కేసు గురించి ఏమైనా మాట్లాడిందేమో షిండేని కనుక్కోమంటాడు. అలాగే నేహా ఫ్యామిలీ అండ్ ఫ్రెండ్స్ దగ్గర శాంపిల్స్ కలెక్ట్ చేసుకోవడానికి కోర్టు పర్మిషన్ తీసుకున్నారేమో తెలుసుకోమంటాడు.

        వివరణ : మొత్తానికి ప్రీతి కేసు ఛార్జి తీసుకున్న విక్రం దర్యాప్తు ప్రారంభించాడు. విక్రం కథలోకి రావడానికి ఇప్పటికే 37 నిమిషాలు వృధా అయ్యాయి. ఇప్పుడు కేసు టేకప్ చేశాక యాక్షన్లోకి దిగిపోకుండా, ఇంకా ప్రీతిని కిడ్నాప్ చేసిన వాడే కచ్చితంగా నేహా ఫ్లాట్ కెళ్లాడనీ, ప్రీతి కేసు ఫైల్స్, ఓఆర్ఆర్ ఎంట్రీ ఎగ్జిట్ ఫుటేజీ, అలాగే ఫోరెన్సిక్స్ కి పంపిన కేస్ మెటీరియల్ మొత్తం తన టేబుల్ కి రావాలనీ అంటూ ప్రేక్షకులకి తెలిసిన ఉపోద్ఘాతమే వల్లెవేస్తూ సీను వేస్ట్ చేస్తున్నాడు (ఈ సీను తీయడానికి ఎంత ఖర్చయి వుంటుందో). వెనుక జరిగిన సీను ప్రకారం, నేహా సూది మీద డిటెక్షన్ అనే పాయింటు వచ్చింది. తను చీఫ్ దగ్గర కేసు పర్మిషనంటూ తీసుకున్నాక, నేహా లీడ్ నే పట్టుకుని ఇక డైరెక్టుగా - హాఫ్ వేలో ఫోరెన్సిక్ లాబ్ లో నేహా కంప్యూటర్ చెక్ చేస్తూ యాక్షన్ లోకి దిగిపోకుండా, ఇంకా ఏదో కేస్ మెటీరియల్ తన టేబుల్ కి రావాలనీ, స్టడీ చేయాలనీ చెప్తూ కూర్చున్నాడు. 

        పైగా ప్రీతి కేసు గురించి నేహా ఏమైనా మాట్లాడిందేమో షిండేని కనుక్కోమనడం ఒకటి! ఇదేం పోలీస్ దర్యాప్తు? ఇంకా షిండేని కనుక్కునేదేమిటి? నేహా కంప్యూటర్ని ఓపెన్ చేయమనక. ప్రీతీ కేసుతో నేహా కేసుకి సంబంధమున్నప్పుడు, రెండు కేసుల్నీ క్లబ్ చేసి విక్రం, అభిలాష్ లని కంబైన్డ్ దర్యాప్తు చెయ్యండ్రా అని మెడలు వంచాలి చీఫ్. కానీ చీఫే సిగ్గుతో తల వంచుకుని వున్నాడు. వీళ్ళకి సెల్యూట్ చేసే మర్యాద కూడా లేకపోతే ఏం చేస్తాడు. 

     ఇంతకీ తను రోహిత్ ని అడిగినవేవీ టేబుల్ మీదికి రావు, స్టడీ చేసేదీ వుండదు.  ఇక నేహా ఫ్యామిలీ అండ్ ఫ్రెండ్స్ దగ్గర శాంపిల్స్ కలెక్ట్ చేసుకోవడానికి కోర్టు పర్మిషన్ తీసుకున్నారేమో తెలుసుకోమనడం ఒకటి. లాలాజాలం, వేలిముద్రలు శాంపిల్స్ తీసుకోవడాంకి కోర్టు పర్మిషన్ ఎందుకు? ఇవి క్యారక్టర్ బిల్డప్ డైలాగులు. తనకెంతో తెలుసనీ ప్రేక్షకులు అనుకోవడానికి బిల్డప్. ఇలా తప్పుడు సమాచారమిస్తూ. 

        అసలు నేహా ఫ్యామిలీ అండ్ ఫ్రెండ్స్ దగ్గర శాంపిల్స్ దేనికి? శుభ్రంగా కిడ్నాపర్ ని పట్టిచ్చే దూదీ సూదీ వుండగా? అవి పట్టుకుని వాణ్ణి పట్టుకోకుండా, ఇంకా ఫ్యామిలీ అండ్ ఫ్రెండ్స్ ని అనుమానిస్తూ శాంపిల్స్ అడుగుతున్నాడంటే ఏమనాలి? ఇలాటి స్కిల్స్ కోసమా ఇంట్రడక్షన్లో  అంత శాంపిల్ స్కిల్స్ చూపించి బిల్డప్ ఇచ్చింది?

        తర్వాత ప్రీతి పేరెంట్స్ దగ్గర శాంపిల్స్ తీసుకునే సీనూ వస్తుంది. ఈ సీను తీయడానికి ఎంత ఖర్చైందో. మార్కెట్ యాస్పెక్ట్, క్రియేటివ్ యాస్పెక్ట్... ఇక బడ్జెట్ యాస్పెక్ట్ కూడా గుర్తు చేయాలేమో స్క్రీన్ ప్లే సంగతుల్లో...ఇంతకీ ఈ శాంపిల్స్ దేనికంటే, చివర్లో ప్రీతి శవం దొరికినప్పుడు ఆమె పంటి మీద తండ్రి డీఎన్ఏ, తొడ మీద అనాధాశ్రయం సరస్వతి తెల్ల వెంట్రుకా సాక్ష్యాలుగా దొరుకుతాయి. అంటే ఆమె హత్యలో పాల్గొన్న రోహిత్, ఆమె తండ్రి చర్మాన్నీ, సరస్వతి శిరోజాన్నీ వాళ్ళకి తెలియకుండా తీసుకుని శవానికి అంటించాడట. వాళ్ళని ఇరికించడానికి. దీనికోసం కథకుడు ఫ్యామిలీ అండ్ ఫ్రెండ్స్ శాంపిల్స్ అంటూ అసహజ మాటలు విక్రం చేత అలా అన్పించడన్నమాట. అలా ప్రీతి పేరెంట్స్ నుంచి ముందస్తుగా శాంపిల్స్ సేకరించేలా చేశాడన్న మాట కథకుడు. ఇంత అడ్డగోలుగా మర్డర్ మిస్టరీ వుంటే ఎలా? 

        విషయం: 9. విక్రం ఎస్సై ఇబ్రహీం ని అతడి ఇంటికి తీసుకెళతాడు. దారిలో స్కూటర్ రిపేరు కిచ్చానని మెకానిక్ ఫాహద్ దగ్గరాగి స్కూటర్ తీసుకుంటాడు ఇబ్రహీం. ఇంటికెళ్ళాక నిన్ను అనుమానించడం లేదనీ, ఇంకేమైనా మర్చిపోయావేమో గుర్తు తెచ్చుకుని చెప్పమంటాడు విక్రం. ఇదే జరిగిందని చెప్తాడు ఇబ్రహీం. ఒకసారి ఇల్లు చూడొచ్చా అని గదిలోకి వెళ్లి అక్కడున్న అత్తరు బాటిల్ తీసి వాసన చూస్తాడు విక్రం. రోహిత్ వస్తాడు. ఈ అత్తరు కాదన్నట్టు తలాడిస్తాడు విక్రం. బయల్దేరుతూ ఇబ్రహీం కి సిగరెట్ ఆఫర్ చేస్తూ, మళ్ళీ అవసరమైతే హెల్ప్ చేయాలని షేకాండిస్తాడు విక్రం. అక్కడ్నించి తిరిగి వెళ్తూ, ఇబ్రహీం చూశానంటున్న బ్లూ కారు ఇంకెవరూ  చూడలేదని, శ్రీనివాస్ ఇన్వెస్టిగేషన్ లో కూడా బ్లూ కారు జాడలేదనీ అంటాడు. అరచేతికున్న సెల్లో ఫేన్ టేప్ తీసిస్తూ, దీని మీద ఇబ్రహీం వేలిముద్రలు కలెక్ట్ చేసుకోమంటాడు. ఇబ్రహీం తాగి పడేసిన సిగరెట్ పీక మీద ఇబ్రహీం డీఎన్ఏ తీసుకోమంటాడు.

        వివరణ : ఇక్కడ ఎస్సై ఇబ్రహీం మీద దృష్టి పెట్టిన విక్రం అతడింట్లో ఇంకో దర్యాప్తు కాని దర్యాప్తు చేశాడు అతణ్ణి అనుమానిస్తూ. అమ్మాయిల మిస్సింగ్ కేసులిలా దర్యాప్తు చేస్తే, ఈ లోగా మిస్సయిన అమ్మాయిలు చచ్చూరుకోవడమే. ఇబ్రహీం ఇంట్లో అత్తరు సీసా వాసన చూసి, ఇది కాదన్నట్టు రోహిత్ ని చూసి తలూపుతాడు విక్రం. ఇది సిల్లీ సీను. ఆ ఇబ్రహీంకి ఆ దూదినే  చూపించి - ఇది నీదేనా కాదా చెప్పమంటే, ఈ అత్తరు మెకానిక్ ఫాహెద్ వాడతాడని వెంటనే చెప్పెసేవాడు ఇబ్రహీం. ఖేక్ ఖతం, దుకాన్ బంద్. ఇలా మూడోసారి కూడా సినిమా అయిపోతే ఇంకేంటి సీన్లు తీయడం? ఎన్ని షార్ట్ మూవీస్ తీస్తున్నారో అర్ధం గావడం లేదు.

        ఇక బయటికి వస్తూ ఇబ్రహీంకి సిగరెట్ ఆఫర్ చేసి, షేకాండిచ్చి వచ్చి, తన అరచేతికున్న సెల్లో ఫేన్ టేప్ తీసి రోహిత్ కిచ్చి, దాని మీద ఇబ్రహీం వేలిముద్రలు కలెక్ట్ చేసుకోమనడం ఇంకో తప్పుడు సంగతి. ఇబ్రహీం వేలిముద్రలు సేకరించడానికి విక్రం వాడిన టెక్నిక్. అయితే ఇబ్రహీం చేయి కలిపినప్పుడు అతడి వేళ్ళు విక్రం అరచేతిలోపల తాకడం లేదు, అరచేతి పైన తాకుతున్నాయి. విక్రం సెల్లో ఫేన్ టేపు అంటించుకున్నది అరచేతి లోపల. ఇబ్రహీం వేలిముద్రలు ఎక్కడ పడినట్టు? వేలిముద్రలు పడలేదు, కాలిముద్రలు పడలేదు. రోహిత్ దాన్ని లాబ్ లో టెస్ట్ చేయిస్తే తెల్లమొహం వేయక తప్పదు. ఇబ్రహీంకి ఆ సెల్లో ఫేన్ స్పర్శ తగిలే వుంటుంది. నా చేతి వేళ్ళు దానికి తగల్లేదుగా? - అనుకునే వుంటాడు. జోక్ చేయడం కాదు, సీరియస్ గానే  చెప్పుకుంటే ఒక ఆలోచన వస్తోంది...కమెడియన్లని పెట్టి కామెడీ ఇన్వెస్టిగేషన్ అంటూ తీస్తే, ఇంకో కొత్త జానర్ పుట్టుకొచ్చేలా వుంది. 

        ఇబ్రహీం డీఎన్ఏ కూడా సేకరించాలన్న దురాశతో విక్రం సిగరెట్ కూడా ఆఫర్ చేశాడు.  ఇబ్రహీం తాగి పడేసిన సిగరెట్ పీక మీద ఇబ్రహీం డీఎన్ఏ కూడా తీసుకోమన్నాడు విక్రం. సిగరెట్ పీక టూ ఇన్ వన్ అన్న సంగతి తెలీదేమో విక్రంకి. ఆ సిగరెట్ పీక మీదే డీఎన్ఏ కోసం ఇబ్రహీం ఉమ్మితో బాటు, అతడి వేలిముద్రలు కూడా పడతాయి. అరచేతికి ఏదో టేప్ అంటించుకుని తన మైండ్ బ్లోయింగ్ టెక్నిక్ తో ప్రేక్షకుల్ని ఆశ్చర్య చకితుల్ని చేయనవసరం లేదు. అసలు ఇబ్రహీం డీఎన్ఏ, వేలిముద్రలు తీసుకుని ఏం చేద్దామని? సింపుల్ గా  అతడికి దూది చూపించి యాది తెప్పిస్తే అయిపోయేదానికి. 

     కిడ్నాపర్ తో నేరుగా లింకున్న ఇంత ఇంక్రిమినేటింగ్ ఎవిడెన్సు - ఈ దూదీ- సూదీ  వుండగా, ఇంకెలా ఈ సినిమా చూపించినా షార్ట్ మూవీసే పుట్టుకొస్తాయి- తడవకో ఖేల్ ఖతం, దుకాన్ బంద్ అవుతూ. 

        ఈ సినిమాలో చివరి వరకూ విక్రం కాదేదీ కవిత కనర్హం అన్నట్టు, ఏదిపడితే అది ర్యాగ్ పికర్ లా ఎత్తుకెళ్ళి ఫోరెన్సిక్ లాబ్ లో పడెయ్యడం చూడొచ్చు. చీటికీ మాటికీ ఫోరెన్సిక్ లాబ్ అంటూ పాన్ షాప్ లా వాడేశాడు. తమ ‘హిట్’ నే  అలా ట్రీట్ చే స్తున్నప్పుడు ఫోరెన్సిక్ లాబ్ ని వదిలిపెడతారా. 

        విషయం: 10. కాలేజీకి వెళ్లి అజయ్, సంధ్య అనే స్టూడెంట్స్ ని దర్యాప్తు చేస్తాడు. అజయ్ మీద అనుమానాలు రావు. కిడ్నాపైన ముందు రోజు తనూ ప్రీతీ పబ్ కెళ్లామని అంటుంది సంధ్య. అక్కడేం జరగలేదని అంటుంది.  చంద్రమౌళి అనే టీచర్ మీద అనుమానం వ్యక్తం చేస్తుంది. చంద్రమౌళిని కలిసి అతడి పాత్రేమీ లేదని నిర్ధారించుకుంటాడు విక్రం. 

        వివరణ: ఈ సీన్లు కూడా వృధా. చంకలో పిల్లనుంచుకుని వూరంతా తిరిగిన సామెత. దూదీ సూదీ వున్నాక ఈ కాలేజీ కహానీలకి అర్ధం లేదు. 

        విషయం: 11. పబ్ లో ఏం జరిగిందో తెలుసుకోవాలని రోహిత్ తో అంటాడు విక్రం. ప్రీతి కేసు గురించి షిండేకి నేహా ఏమైనా చెప్పిందేమో కనుక్కున్నావా అని అడుగుతాడు. ఆమె ఏం చెప్పలేదని అంటాడు రోహిత్. ఇంతలో అభిలాష్ వచ్చి, ప్రీతి మీద నీకెందుకు ఆసక్తి అని నిలదీస్తాడు. 

        వివరణ:  కాసేపు దూదీ సూదీ మర్చిపోయి, ఇంకా చేస్తున్న దర్యాప్తు కూడా ఎలా చేస్తున్నాడో చూద్దాం. పబ్ లో ఏమైనా జరిగిందేమో తెలుసుకోబోతున్నాడు మంచిదే. ఈ పబ్ సీను ‘ప్రిజనర్స్’  ( 2013)  లో వేరే సీనులోంచి తీసి వాడినట్టుగా వుంది. ఇది తర్వాత చూద్దాం. పోతే మళ్ళీ షిండే గురించి అదే పేలవమైన డైలాగు. నేహా షిండేకి ఏమీ చెప్పలేదని రోహిత్ జవాబు. అంటే షిండే దాస్తున్నట్టా? మరెందుకు షిండే ఆమె కంప్యూటర్ ఓపెన్ చేసి, ఇంత ప్రధానమైన కేసు గురించి తెలుసుకోడు? ఆమె లేకపోతే ఇక కేసు మురిగిపోవాల్సిందేనా? ఇప్పటికీ విక్రం ఎందుకు వెళ్లి సూది సమాచారం కావాలని కోరడు? కోరాలని తెలీదు కాబట్టి. 

        ఇక నేహా మిస్సింగ్ కేసు ఏమైందో, అభిలాష్ ఏం చేస్తున్నాడో తెలీదు. ఇప్పుడొచ్చి ప్రీతి మీద నీకెందుకు ఆసక్తి అంటూ విక్రంతో గొడవపడతాడు. ఈ పాత్రల ప్రాబ్లమ్స్ ఏమిటో, గొడవలేమిటో అర్ధంగాదు. ప్రేక్షకులకి అనవసర మానసిక శ్రమ. 

        మర్డర్ మిస్టరీలకి ఎండ్ సస్పెన్సులతో వాటి జానర్ మర్యాదలుంటాయి. అవైనా పాటించలేదు. బ్లేక్ స్నీడర్ ‘సేవ్ ది క్యాట్’ స్క్రీన్ ప్లే రచనా పుస్తకం చదివానన్న కొత్త దర్శకుడు, సినిమా ఇలా తీశాడేమిటా అన్పించక మానడు. స్క్రీన్ ప్లే స్ట్రక్చర్ పుస్తకాలు చదవడం వేరు, జానర్ మర్యాదలు తెలుసుకోవడం వేరు. తను తీసిన ఈ ఎండ్ సస్పెన్స్ మర్డర్ మిస్టరీని ఎలా రాసి ఎలా తీస్తారో రీసెర్చి కూడా చేసివుంటే ఇంత గందరగోళం వుండేది కాదు.

(మిడిల్ వన్ మిగతా భాగం మరింత సరదాగా రేపు)

―సికిందర్

932 : స్క్రీన్ ప్లే సంగతులు

    పోలీస్ క్రైం థ్రిల్లర్స్ లో హీరోయే పోలీస్ డిటెక్టివ్ గా వుండి తీరాలని రూలుందా ? పోలీస్ డిటెక్టివ్ గా విలన్ ఆర్టిస్టు వేసి, హీరో హంతకుడిగా వేసి, హీరోని విలన్ పట్టుకునే రివర్స్ యాక్షనుంటే ఫ్లాపవుతుందా?...ఇలా రోల్ రివర్సల్ చేసినప్పుడే ఈ జానర్ కథలు టెంప్లెట్ నుంచి బయటపడతాయని అభిప్రాయపడ్డాడు హాలీవుడ్ రచయిత. ఇదేదో బావుందనే అన్పిస్తుంది. అన్నిసద్గుణాలున్నపాత్రలో నేచురల్ స్టార్ నాని, హత్య చేసి తప్పించుకుంటూ వుంటే- అన్ని దుర్గుణాలు ప్రదర్శిస్తూ విలన్ పాత్రధారి జగపతిబాబు - పోలీస్ డిటెక్టివ్ గా నానిని పట్టుకునే క్రైం థ్రిల్లర్ గా వస్తే, ప్రేక్షకులు హాహాకారాలే చేస్తారు. ప్రేక్షకుల్నివీలైనంత సఫర్ చేయమనే చెప్పి పోయాడు ఆల్ఫ్రెడ్ హిచ్ కాక్. ఎంత హత్య చేస్తే మాత్రం అంత మంచి వాడైన నానిని హంతకుడిగా పట్టుకోవాలా అని మోరల్ డైలమాలో పడిపోతారు. సెంటిమెంటుకీ చట్టానికీ మధ్య తేల్చుకోలేక నలిగిపోతారు ప్రేక్షకులు...ఛాలెంజిగా వుంటుంది మేకర్ కి. మోరల్ ప్రెమీస్ వున్న పోలీస్ ఇన్వెస్టిగేషన్ కథ కలకాలం గుర్తుంటుంది... కాకపోతే ఎండ్ సస్పెన్సుగా వుండకూడదు. వుంటే హంతకుడెవరో పోలీస్ డిటెక్టివ్ తెలుసుకోవడానికే కథ ముగింపు కొస్తుంది. మూసిపెట్టిన ఎండ్ సస్పెన్స్ కథలో ప్రత్యర్ధుల మధ్య కాన్ఫ్లిక్ట్ వుండదు. దాంతో డ్రమెటిక్ క్వశ్చన్ వుండదు. పాసివ్ పాత్రలా ఒక్కడే దిక్కుతోచక తిరుగుతూంటాడు పోలీస్ డిటెక్టివ్... 

       ‘హిట్’ఇన్వెస్టిగేటర్ విక్రం ప్రాబ్లం ఇదే. దీనిగురించి చివరి వ్యాసంలో చూద్దాం. క్రిందటి వ్యాసంలో బిగినింగ్ విభాగపు కథలో విక్రంకి గర్ల్ ఫ్రెండ్ నేహాతో చెడడం, స్టూడెంట్ ప్రీతి అదృశ్యమవడమనే మిడిల్ విభాగానికి చేరేసే రెండు సెటప్స్  చూశాం. ప్రీతి అదృశ్యం ప్లాట్ పాయింట్ వన్ మలుపుగా వచ్చింది. ఇక్కడ్నించీ ఇప్పుడు మిడిల్ లో ప్రారంభమయ్యే కథేమిటో చూద్దాం. ముందుగా ఇంటర్వెల్ వరకూ మిడిల్ వన్ కథ చూద్దాం...

మిడిల్ వన్ కథ:  
       1. ఎస్సై ఇబ్రహీం రోడ్డు మీదే వున్న ప్రీతి కారుని బయటి నుంచి చెక్ చేస్తాడు. టోల్ బూత్ కెళ్ళి నిన్న సాయంత్రం 5.30 -6.30 మధ్య సీసీ టీవీ ఫుటేజీ అడుగుతాడు. ఒక షాపు కెళ్ళి బ్లూ కారు గురించి ఆరా తీస్తాడు. టోల్ బూత్ నుంచి అందిన సీసీ టీవీ ఫుటేజీ చెక్ చేస్తాడు 6.29కి టోల్ గేట్లో ఒక్ కార్గో ట్రక్ కన్పిస్తుంది. బ్లూ కారు కన్పించదు. ఇతర టోల్ బూత్స్ ఫుటేజీలు తెప్పించుకుని చూసినా బ్లూ కారు కన్పించదు. అది ఎగ్జిట్ అవకుండా, రోడ్డు మీద కంటిన్యూ అవకుండా ఏమైనట్టని ఆలోచనలో పడతాడు. 

       2. పోలీస్ స్టేషన్ కొచ్చిన ‘హిట్’ చీఫ్ విశ్వనాథ్, ఇబ్రహీంని సస్పెండ్ చేస్తాడు. ప్రీతి పేరెంట్స్ మోహన్, లక్ష్మిల ముందే అతణ్ణి తిట్టి, అతడిమీద అనుమానంతో సస్పెండ్ చేసి, కేసులో నిందితుడిగా నిర్ణయిస్తాడు. 

       3. మనశ్శాంతి కోసం లీవ్ పెట్టి ఎక్కడో గడుపుతున్నవిక్రంకి, రెండు నెలల  తర్వాత నేహా కన్పించడం లేదని ఫోరెన్సిక్స్ షిండే కాల్ చేస్తాడు. విక్రం షాకవుతాడు. నేహాతో గడిపిన ప్రేమ దృశ్యాలు మెదుల్తాయి. 

       4. విక్రం వచ్చేసి చీఫ్ ని కలుస్తాడు. నేహా మిస్సింగ్ కేసు తనకిమ్మంటాడు. అభిలాష్ కిచ్చానంటాడు చీఫ్. అభిలాష్ వచ్చి, నేహా మిస్సింగ్ కేసులో విక్రం మీద అనుమానాలున్నాయనీ, ఈ కేసులో ఇన్వాల్వ్ కావద్దనీ హెచ్చరిస్తాడు. మీకు నచ్చినా నచ్చక పోయినా ఇన్వెస్టిగేట్ చేస్తానని చెప్పేసి వెళ్లి పోతాడు విక్రం. 

       5. రెండు రోజుల క్రితమే నేహా తనతో మాట్లాడిందని రోహిత్ తో అంటాడు విక్రం. రాత్రి పూట రహస్యంగా నేహా ఫ్లాట్ చెక్ చేస్తాడు విక్రం. నేహా చున్నీని అందుకుంటే, ప్రేమ దృశ్యాలు గుర్తుకొస్తాయి. ఫ్లాట్ లో ఏదో ఘాటు వాసనేస్తున్నట్టు గమనిస్తాడు. ఫ్లాట్ లో ఎవరో బలవంతంగా ప్రవేశించినట్టు లేదనీ, కారు కూడా మామూలుగా పార్క్ చేసి వుందనీ అంటాడు. లివింగ్ రూంలో స్ట్రాంగ్ అత్తరు వాసనేస్తోందనీ, దీన్నిబట్టి ఎవరో వచ్చి వుండాలనీ అంటాడు. అత్తరు వాసన పోలీసుల వల్ల వచ్చి వుండొచ్చు కదాని రోహిత్ అంటాడు. టెలికాం డిపార్ట్ మెంటుకెళ్ళి నేహా కాల్ లిస్టు మొత్తం తీసుకురమ్మంటాడు విక్రం. 

       6. షిండేని కలిసి నేహా డీల్ చేస్తున్న కేసుల డిటెయిల్స్ కావాలంటాడు విక్రం. ఆ ఫైల్స్ లో ప్రీతి మిస్సింగ్ కేసు ఫైల్ వుంటుంది. అది చూసి నేహా మిస్సింగ్ కి ప్రీతితో సంబంధమున్నట్టు అనుమానిస్తాడు. ప్రీతి కేసు చూస్తున్న శ్రీనివాస్ ని కలిస్తే, ప్రీతి కేసులో ఏదో ఇంపార్టెంట్ లీడ్ దొరికినట్టు నేహా తనకి చెప్పిందని అంటాడు. ప్రీతి కారున్న చోట దూదీ, విరిగిన సిరంజీ దొరికినట్టు చెప్తాడు. ఆ దూది అత్తరు వాసనేస్తుంది విక్రంకి. సిరంజి మీద ప్రీతి బ్లడ్ గానీ, డీఎన్ఏ గానీ లేదంటాడు శ్రీనివాస్. 

       7. విక్రం చీఫ్ ని కలిసి ప్రీతి కేసు తన కిమ్మంటాడు. ప్రీతి ఫాదర్ తన ఫ్రెండేనని, ఈ కేసు విక్రం చూస్తానంటే అంతకంటే ఏం కావాలని శ్రీనివాస్ నుంచి తప్పించి, కేసుని విక్రం కిచ్చేస్తాడు చీఫ్. 

       8. ప్రీతిని కిడ్నాప్ చేసిన వాడే కచ్చితంగా నేహా ఫ్లాట్ కేళ్లాడని, అతనెవరని రోహిత్ తో అంటాడు విక్రం. ఓకే, ఎక్కడ స్టార్ట్ చేద్దామని రోహిత్ అడుగుతాడు. ప్రీతి కేసు ఫైల్స్, ఓఆర్ఆర్ ఎంట్రీ ఎగ్జిట్ ఫుటేజీ, అలాగే ఫోరెన్సిక్స్ కి పంపిన కేస్ మెటీరియల్ మొత్తం తన టేబుల్ కి రావాలంటాడు విక్రం. స్టడీ చేసి ఇన్వెస్టిగేషన్ స్టార్ట్ చేద్దామంటాడు. నేహా ప్రీతి కేసు గురించి ఏమైనా మాట్లాడిందేమో షిండేని కనుక్కోమంటాడు. అలాగే నేహా ఫ్యామిలీ అండ్ ఫ్రెండ్స్ దగ్గర శాంపిల్స్ కలెక్ట్ చేసుకోవడానికి కోర్టు పర్మిషన్ తీసుకున్నారేమో తెలుసుకోమంటాడు.

       9. విక్రం ఎస్సై ఇబ్రహీం ని అతడి ఇంటికి తీసుకెళతాడు. దారిలో స్కూటర్ రిపేరు కిచ్చానని మెకానిక్ ఫాహద్డ్ దగ్గరాగి స్కూటర్ తీసుకుంటాడు ఇబ్రహీం. ఇంటికెళ్ళాక నిన్ను అనుమానించడం లేదనీ, ఇంకేమైనా మర్చిపోయావేమో గుర్తు తెచ్చుకుని చెప్పమంటాడు విక్రం. ఇదే జరిగిందని చెప్తాడు ఇబ్రహీం. ఒకసారి ఇల్లు చూడొచ్చా అని గదిలోకి వెళ్లి అక్కడున్న అత్తరు బాటిల్ తీసి వాసన చూస్తాడు విక్రం. రోహిత్ వస్తాడు. ఈ అత్తరు కాదన్నట్టు తలాడిస్తాడు విక్రం. బయల్దేరుతూ ఇబ్రహీం కి సిగరెట్ ఆఫర్ చేస్తూ, మళ్ళీ అవసరమైతే హెల్ప్ చేయాలని షేకాండిస్తాడు విక్రం. అక్కడ్నించి తిరిగి వెళ్తూ, ఇబ్రహీం చూశానంటున్న బ్లూ కారు ఇంకెవరూ  చూడలేదని, శ్రీనివాస్ ఇన్వెస్టిగేషన్ లో కూడా బ్లూ కారు జాడలేదనీ అంటాడు. అరచేతికున్న సెల్లో ఫేన్ టేప్ తీసిస్తూ, దీని మీద ఇబ్రహీం వేలిముద్రలు కలెక్ట్ చేసుకోమంటాడు. ఇబ్రహీం తాగి పడేసిన సిగరెట్ పీక మీదే ఇబ్రహీం డీఎన్ఏ తీసుకోమంటాడు.

         10. కాలేజీకి వెళ్లి అజయ్, సంధ్య అనే స్టూడెంట్స్ ని దర్యాప్తు చేస్తాడు. అజయ్ మీద అనుమానాలు రావు. కిడ్నాపైన ముందు రోజు తనూ ప్రీతీ పబ్ కెళ్లామని అంటుంది సంధ్య. అక్కడేం జరగలేదని అంటుంది.  చంద్రమౌళి అనే టీచర్ మీద అనుమానం వ్యక్తం చేస్తుంది. చంద్రమౌళిని కలిసి అతడి పాత్రేమీ లేదని నిర్ధారించుకుంటాడు విక్రం. 

       11. పబ్ లో ఏం జరిగిందో తెలుసుకోవాలని రోహిత్ తో అంటాడు విక్రం. ప్రీతి కేసు గురించి షిండేకి నేహా ఏమైనా చెప్పిందేమో కనుక్కున్నావా అని అడుగుటాడు. ఆమె ఏం చెప్పలేదని అంటాడు రోహిత్. ఇంతలో అభిలాష్ వచ్చి, ప్రీతి మీద నీకెందుకు ఆసక్తి అని నిలదీస్తాడు.   

   
       12. విక్రం ప్రీతి పేరెంట్స్ ని కలుస్తాడు. ప్రీతి ఒక అనాధ అనీ; మోహన్, లక్ష్మీ లు ఆమె పెంపుడు తల్లిదండ్రులనీ తెలుసుకుంటాడు. సరస్వతి అనే ఆవిడ నడిపే అనాధాశ్రయం నుంచీ మోహన్ తమ్ముడు శివ, మరదలు ప్రియ  ప్రీతిని చిన్నప్పుడు దత్తత తీసుకుని యూఎస్ వెళ్ళారనీ, అక్కడ వాళ్ళిద్దరూ ప్రమాదంలో చనిపోవడంతో, ప్రీతిని తెచ్చుకుని మోహన్ లక్ష్మీలు పెంచుకున్నారనీ తెలుసుకుంటాడు. ఆ అనాధాశ్రయాన్ని  ప్రీతి మేనేజ్ చేస్తోందని కూడా తెలుసుకుంటాడు. అనాధాశ్రయం నిర్వాహకురాలు సరస్వతి, ప్రీతి ఇచ్చే నిధులు దుర్వినియోగం కావడం లేదని చెప్తుంది.

       13. ఇరుగుపొరుగుతో ప్రీతి ఎలా వుంటుందని పేరెంట్స్ ని అడుగుతాడు విక్రం. షీలాతో క్లోజ్ గా వుంటుందని చెప్తాడు ప్రీతి తండ్రి మోహన్. మోహన్ లక్ష్మిల లాలాజలం, వేలిముద్రల శాంపిల్స్ తీసుకుంటారు. యూఎస్ లో తన తమ్ముడి ఆస్తి ప్రీతికి బదిలీ ట్రాన్స్ అయిందని చెప్తాడు మోహన్. అనుమానితుల లిస్టులో ప్రీతి పేరెంట్స్ ని కూడా చేరుస్తాడు రోహిత్. 

       14. పొరుగున వుండే షీలాని కలిస్తే,  ప్రీతి ఒక్కతే తనతో మాట్లాడుతుందనీ, తను డైవర్సీ కావడంతో ఎవరూ తనతో మాట్లాడరనీ అంటుంది షీలా. ప్రీతి మిస్సయిన సమయంలో తను తన కూతుర్ని కలవడానికి వెళ్లినట్టు చెప్తుంది. 

       15. విక్రం, రోహిత్ లు పబ్ కెళ్తారు. అక్కడ బార్ అటెండర్ ని ప్రశ్నించబోతే అతను భయపడి పారిపోతాడు. వెంటాడి పట్టుకుంటే అతడి దగ్గర డ్రగ్స్ బయటపడతాయి. అతణ్ణి పోలీసులకి అప్పజెప్తాడు విక్రం. ప్రీతి పేరెంట్స్ ని కలిసి పూజకి ఏర్పాట్లు చేయమంటాడు. ప్రీతి క్షేమం కోసం ఏర్పాటు చేసే పూజకి ఎవరెవరు వస్తారో, ఎవరెవరు రారో కనిపెట్టేందుకు.

       16. పూజకి అందరూ వస్తారు. ఎవరి మీదా అనుమానం రాదు. ఇంతలో పొరుగున వుండే షీలా పరుగెత్తుకొచ్చి, తలుపు దగ్గర లెటర్ దొరికిందని చెప్తుంది. ఆ లెటర్లో - డేడ్ బాడీ వికారాబాద్ రాజూ గెస్ట్ హౌస్ ముందు వుందని రాసి వుంటుంది. విక్రం షాకవుతాడు. నేహా మెదుల్తుంది. డిస్టర్బ్ అవుతాడు. ప్రీతి కోసం పూజ దగ్గర హోమంలో మంట చూసి తలతిరిగి పడిపోతాడు (విశ్రాంతి).

మిడిల్ వన్ వివరణ :

        ఏ సినిమా కథయినా స్క్రీన్ ప్లే మిడిల్ విభాగంలోనే ప్రారంభమవుతుంది. బిగినింగ్ విభాగంలో చూసేదంతా కధకి ఉపోద్ఘాతం మాత్రమే, కథ కాదు. ఇలా మిడిల్లో ప్రారంభమయ్యే కథలో ఏం జరుగుతుందంటే, ప్లాట్ పాయింట్ వన్ దగ్గర ఏర్పడ్డ సమస్య కారకుడైన ప్రత్యర్ధితో  ప్రధాన పాత్ర సంఘర్షించడం జరుగుతుంది. ప్రత్యర్ధితో సంఘర్షించి సమస్యని పరిష్కరించుకునే ‘గోల్’ తో ప్రధాన పాత్ర వుంటుంది. ఈ గోల్ లో నాల్గు విటమిన్లు వుంటాయి. కోరిక, పణం, పరిణామాల హేచ్చరిక, ఎమోషన్. ఇదంతా ప్రధానపాత్ర వ్యక్తిగత అనుభవం. అతను గోల్ తీసుకోవడానికి అతను లోనైన వ్యక్తిగత అనుభవమే అంతర్గతంగా కారణమవుతుంది. కానీ ప్రధాన పాత్ర పోలీస్ డిటెక్టివ్ లాంటి, లేదా గూఢచారి లాంటి  ప్రొఫెషనల్ పాత్రయితే, గోల్ తీసుకోవడానికి వ్యక్తిగత కారణాలుండవు. వృత్తిగత కారణాలే వుంటాయి. అతడి గోల్ బహిర్గతంగా డ్యూటీ రూపంలో పై అధికారి నుంచి వచ్చి మీద పడుతుంది. ఇంత మాత్రాన పైన చెప్పుకున్న గోల్ ఎలిమెంట్స్- విటమిన్లు మాయమై పోవు. అప్పుడా పోలీస్ డిటెక్టివ్ కోరిక కేసుని పరిష్కరించి తీరాలని వుంటుంది. పోలీస్ డిటెక్టివ్ కి  గోల్ కోసం దేన్నైనా పణంగా పెట్టాలని వుంటుంది. పోలీస్ డిటెక్టివ్ కి పరిణామాలేం పొంచివున్నా ఎదుర్కోవాలని వుంటుంది. పోలీస్ డిటెక్టివ్ ఈ కథా ప్రయాణంలో హత్యకి గురైన వ్యక్తి గురించి ఎక్కడో ఎమోషనల్ గా కనెక్ట్ అవుతాడు. ఈ విటమిన్లు అన్నీ కలిసి పనిచేస్తేనే ఒక సజీవమైన పోలీస్ డిటెక్టివ్ పాత్ర, ఒక బలమైన డెప్త్ వున్న క్రైం థ్రిల్లర్ తయారవుతాయి.  

      ఇవి ‘హిట్’ లాంటి ఎండ్ సస్పెన్స్ కథలో సాధ్యపడవు. ఎందుకంటే సమస్య వుంటుంది గానీ, సమస్యకి కారణమైన ప్రత్యర్ధి పాత్ర కన్పించదు చివరిదాకా. ప్రత్యర్ధిని వెతుక్కోవడమే సరిపోతుంది పోలీస్ డిటెక్టివ్ కి. ఆ ప్రత్యర్ధి అయిన హంతకుడెవరో వెతుక్కోవడమే కథై పోతుంది. అంటే సింపుల్ గా చెప్పాలంటే హీరోకి విలన్ లేని కథ. నాకో విలన్ కావాలీ అని కథలో హీరో దీనంగా తిరుగాడే వ్యధ. ఇలా సినిమా చూపించలేమని హాలీవుడ్ ఏనాడో గుర్తించింది. టాలీవుడ్ ఇంకా ఇందులోనే మునిగి తేలుతోంది. చాలా మంచి విషయం. 

       విక్రంతో స్క్రీన్ ప్లేకి సమస్య ఇదే. ఈ మిడిల్ వన్ లో సమస్యతో సంఘర్షిస్తూ వుంటాడే తప్ప నేరస్థుడి జాడ తెలుసుకోలేడు. అతడి స్కిల్స్ కి చిటికెలో తెలుసుకునే అవకాశం కళ్ళ ముందున్నా దాన్ని గుర్తించడు. కనీసం ఇంటర్వెల్లో అయినా నేరస్థుణ్ణి కథకుడు ప్రేక్షకులకి రివీల్ చేయాలనుకోడు. 

       ప్రీతి ఒక్కటే కాదు నేహాతో రెండు మిస్సింగులు. ఇంటర్వెల్లో లెటర్ ప్రకారం శవం ఎవరిదీ- ప్రీతిదా, నేహాదా?ఎవరిది? ఓ పక్క ఈ ప్రశ్న రేకెత్తిస్తూనే, మరోపక్క హోమంలో మంటకి రియాక్షన్ గా  విక్రం కి తన ఫ్లాష్ బ్యాక్ గుర్తొచ్చి పడిపోవడం. అంటే ఇంటర్వెల్ వేసింది కథకి ముఖ్యమైన  శవం ఎవరిదన్న ప్రశ్న మీద కాదా? కథకి ముఖ్యం కాని విక్రం ఫ్లాష్ బ్యాక్ మీదా? దేంతో థ్రిల్లవాలి ప్రేక్షకులు? ఇలా ఇది ఇంపాక్ట్ కోల్పోయిన ఫ్రాక్చరైన ఇంటర్వెల్ కూడా అయింది. అసలు డెడ్ బాడీ ఎవరిదన్న ప్రశ్నకూడా ఉత్తుత్తిదే. అది ఉత్తుత్తి లెటరేనని తర్వాత సెకండాఫ్ లో వెల్లడిస్తాడు కథకుడు. ఇలా ఈ ఇంటర్వెల్ తో ప్రేక్షకుల్ని ఫూల్స్ చేయడం కూడానన్న మాట, ఫాల్స్ ఇంటర్వెల్ వేసి. ‘మత్తువదలరా’ లో కూడా ఇలాటిదే చూశాం. 

మిడిల్ వన్ మరింత వివరణ:

        ఇది పోలీస్ ప్రోసీజురల్ సినిమా అని జానర్ కరెక్టుగానే చెప్పాడు దర్శకుడు. అదే సమయంలో ఇది అందరికీ అర్ధంగాదని సెల్ఫ్ గోల్ స్టేట్ మెంట్ కూడా ఇచ్చేశాడు. ‘16 డి’ తమిళ దర్శకుడు కూడా ఇలాగే అనేశాడు- అర్ధం కావాలంటే రెండోసారి చూడాలని. తమకే అర్ధంగాని కన్ఫ్యూజన్ తో తీస్తే వందసార్లు చూసినా ప్రేక్షకులకి అర్ధంగావు. పైకి బావుందని చెప్పడం తప్ప. నేర న్యాయ వ్యవస్థ గురించి ఎలా పడితే అలా చూపించేస్తే నమ్మేసే ప్రమాదముంది పైగా. దర్శకుడు ఇది ‘ఇన్ఫార్మేటివ్ థ్రిల్లర్’ అని కొత్త మాట వాడేడు. ఇలాటి జానర్ లేదు. క్రైం థ్రిల్లర్ అంటే సినిమా సాంతం విషయం తేల్చకుండా, లెక్కలేనన్ని క్లూలూ సాక్ష్యాలిస్తూ, ఇన్ఫర్మేషన్ని ప్రేక్షకుల మీద డంప్ చేయడం కాదు. ఇన్ఫర్మేషన్ తో కథ వుండదు, కథ మొదలు కాదు, థ్రిల్ వుండదు, పైగా మేకర్ కే బోలెడు కన్ఫ్యూజన్. ఈ ఇన్నేసి కన్ఫ్యూజింగ్ క్లూల కథాకమామిషేమిటో ఇక చూద్దాం...

       విషయం 1. ఎస్సై ఇబ్రహీం రోడ్డు మీదే వున్న ప్రీతి కారుని బయటి నుంచి చెక్ చేస్తాడు. టోల్ బూత్ కెళ్ళి నిన్న సాయంత్రం 5.30 -6.30 మధ్య సీసీ టీవీ ఫుటేజీ అడుగుతాడు. ఒక షాపు కెళ్ళి బ్లూ కారు గురించి ఆరా తీస్తాడు. టోల్ బూత్ నుంచి అందిన సీసీ టీవీ ఫుటేజీ చెక్ చేస్తాడు 6.29కి టోల్ గేట్లో ఒక్ కార్గో ట్రక్ కన్పిస్తుంది. బ్లూ కారు కన్పించదు. ఇతర టోల్ బూత్స్ ఫుటేజీలు తెప్పించుకుని చూసినా బ్లూ కారు కన్పించదు. అది ఎగ్జిట్ అవకుండా, రోడ్డు మీద కంటిన్యూ అవకుండా ఏమైనట్టని ఆలోచనలో పడతాడు. 

       వివరణ: ఎస్సై ఇబ్రహీం ప్రీతి కారుని బయటి నుంచే చెక్ చేసి వదిలెయ్యడం పోలీసుతనం కాదు. లోపల ప్రీతి బ్యాగుంది. ఆ బ్యాగుని పోలీస్ డాగ్ కి చూపిస్తే ప్రీతి పక్కనే ఆగిన బ్లూ కారెక్కిందని తేలిపోయేది. ఆ బ్లూ కారులో ప్రీతి తొంగి మాట్లాడడం క్రితం సాయంత్రం చూశాడు కూడా. ఇప్పుడైనా ఆ బ్లూ కారాగిన చోట చెక్ చేయడు. చెక్ చేస్తే దూదీ సూదీ దొరికేవి. ఇవి తర్వాత ఈ కేసు టేకప్ చేసిన శ్రీనివాస్ కి దొరికాయి. ఇబ్రహీం ఆ దూదికి అత్తరు వాసన చూసి వుంటే, వెంటనే తనకి తెలిసిన మెకానిక్ ఫాహద్ ని పట్టుకునే వాడు. వాడు అత్తరు వాడతాడు. కథకుడు వీణ్ణి కిడ్నాపర్ గా ఎండ్ లో రివీల్ చేసినప్పుడు ఇదే వివరిస్తాడు. దూది చూపించి ఇబ్రహీం నాల్గు పీకితే, ప్రీతిని కిడ్నాప్ చేశానని వాడు అప్పుడే చెప్పేసే వాడు. ఖేల్ ఖతం, దుకాన్ బంద్. ఇంకా పొడిగించి సినిమా తీయడానికేముంది? ఇలా కథ అల్లితే ప్లాట్ పాయింట్ వన్ దగ్గరే పూర్తయ్యే షార్ట్ మూవీ తయారవుతుందని గుర్తించాలి. 

       కేవలం కథకుడి వల్ల ఇబ్రహీం తెలివి హీనంగా ప్రవర్తించాడు. కథకుడు పాత్రల మధ్య దూరి కథ నడపడం నేర్పితే ఇంతే. కథకుడు పాత్రల్ని మాత్రమే కనగలడు, వాటి తలరాతని కాదు. కథకుడికి కథ గురించి తెలిసేది గోరంత, పాత్రలకి తేలిసేది కొండంత. పాత్రల్ని ఫాలో అవుతూంటే కథకుడికి ఓహో ఇంత కథుందాని అప్పుడు తెలుస్తుంది. కథల విషయంలో కథకుడు పాత్రల నుంచి నిత్యం నేర్చుకునే విద్యార్థి. మాస్టర్ స్టోరీ టెల్లర్ అని ఎవడూ లేడు. అనవసర పోజులు. వున్నదల్లా రైటర్ కి తమ కథ చెబుతూ రాయించుకున్న మాస్టర్ క్యారక్టర్సే. ఎప్పుడైతే రైటర్ క్యారక్టర్స్ కథ తను కనిపెట్టి రాయాలని ఉబలాట పడతాడో, అప్పుడా క్యారక్టర్స్ పాసివ్ గా మారి, లేదా తెలివి తక్కువగా తయారై ఆ ఉబలాటాన్ని తీర్చేస్తాయి. 

     టోల్ బూత్ ఫుటేజీలో 6.29 కి కార్గో ట్రక్ ని చూపించడం మంచి ఎత్తుగడ. ప్రేక్షకులు పట్టుకోలేని ఎత్తుగడ. ఎండ్ విభాగంలో కథకుడు రివీల్ చేసినప్పుడు, ఈ కార్గో ట్రక్ లోనే బ్లూ కారుంటుంది. ట్రక్ నడిపే వాడు మెకానిక్ ఫాహదే. ప్రీతిని బ్లూ కారులో కిడ్నాప్ చేశాక, ఆమె సహా కారుని ట్రక్ ఎక్కించి తరలించాడన్న మాట.     అందుకే ఇంకే బూత్ దగ్గరా ఆ కారు కన్పించ లేదు. ఇదీ ఆ కారు మిస్టరీ. 

       విషయం 2. పోలీస్ స్టేషన్ కొచ్చిన ‘హిట్’ చీఫ్ విశ్వనాథ్, ఇబ్రహీంని సస్పెండ్ చేస్తాడు. ప్రీతి పేరెంట్స్ మోహన్, లక్ష్మిల ముందే అతణ్ణి తిట్టి, అతడిమీద అనుమానంతో సస్పెండ్ చేసి, కేసులో నిందితుడిగా నిర్ణయిస్తాడు. 

       వివరణ : ఎస్సై ఇబ్రహీంని సస్పెండ్ చేయాల్సి వుంటే సైబరాబాద్ పోలీస్ కమీషనర్ చూసుకుంటాడు. ‘హిట్’ చీఫ్ కేం పని? అతనెందుకు పోలీస్ స్టేషన్ కొచ్చాడు? పోలీస్ ప్రొసీజురల్ అంటే ఇది కాదేమో? ప్రీతి కేసు ‘హిట్’ కివ్వాలావద్దా సైబరాబాద్ కమీషనరే నిర్ణయిస్తాడు. అయినా హత్య కేసుల గురించి ప్రత్యేకంగా ఏర్పాటయిన ‘హిట్’ కి, జూరిస్డిక్షన్ తప్పి మిస్సింగ్ కేసుల ఉత్సాహమేమిటి? ఓవరాక్షనేమిటి? 

       ఇబ్రహీంని చీఫ్ సస్పెండ్ చేసిన విధానం కూడా సరిగ్గా లేదు. అసలు ప్రీతి మిస్సింగ్ గురించి కంప్లెయింట్ ఇవ్వడానికి ఆమె తండ్రి వచ్చినప్పుడు కూడా, అతడి చేత కావాలని కొట్లాట పెట్టినట్టుంది ఇబ్రహీం ని సస్పెండ్ చేసే ఈ సీనుకోసం. ఇబ్రహీం ఏమీ చెప్పుకోనీయకుండా, ప్రీతి పేరెంట్స్ ముందు చీఫ్ ఇలా అంటాడు, ‘నిన్న వాళ్లతో ఏదో వాగావట? తప్పు చేసి రుబాబ్ చూపిస్తావారా? ఇంకా ఒక్క మాట మాట్లాడకు. అయినా పని చేయడమంటే నీకు బద్ధకమారా? నిన్ను సస్పెండ్ చేస్తున్నాను. లాస్ట్ గా ఆ అమ్మాయితో మాట్లాడింది నువ్వేనటగా? ఇన్వెస్టిగేషన్ కి పిలిస్తే నాటకాలడకుండా రావాలి. కోపరేట్ చేయలేదనుకో, ఇమ్మీడియేట్ గా పాతేస్తా!’

       సిల్లీ! ఐపీఎస్ అయిన చీఫ్ పరువే పోయింది. ఇది ఈ జానర్ కి సెట్టయ్యే  లాంగ్వేజీ కాదు. వేరే మసాలా సినిమా డైలాగులు. అసలు బ్లూ కారులో ప్రీతి తొంగి మాట్లాడినట్టు చూశానని ఇబ్రహీం ప్రీతి తండ్రికి అప్పుడే చెప్పాడు. చివరగా మాట్లాడింది తనే ఎలా అవుతాడు. అసలు ఒక హిట్ చీఫ్ కి ఎస్సైని సస్పెండ్ చేసే అధికారమెక్కడిది? సస్పెండ్ చేశాక, తన ఫ్రెండ్ అయిన ప్రీతి ఫాదర్ తో అంటాడు, ఈ కేసు సమర్ధుడైన స్టాఫ్ కిస్తానని. మిస్సింగ్ కేసు పోలీస్ స్టేషన్ నుంచి ఎలా హైజాక్ చేసుకు పోతాడు? పోతే పోయాడు, తన ఫ్రెండ్ కోసం ఇంత ఫీలైన ఈ కేసు - ఈ కథలో హీరో అయిన విక్రం కివ్వకుండా - వేరే ఎవరో శ్రీనివాస్ కివ్వడమేమిటి? కథలో ఆడియెన్స్ ఆశించే డైనమిక్స్ కి విలువ ఇవ్వాలిగా? బిగినింగ్ విభాగంలో విక్రం ఆరునెలలు లీవ్ పెట్టినప్పుడు, ఎప్పుడు పిలిస్తే అప్పుడు వస్తానని రాశావ్ కాబట్టి వెళ్ళమంటాడు చీఫ్. దీని ప్రకారమైనా ఇప్పుడు పిలవాలిగా? సెటప్ చూపించి పేఆఫ్ మర్చిపోతే ఎలా? 

      అసలు బిగినింగ్ విభాగంలో ఈ లీవ్ అంశం చూస్తూంటే, అనవసరంగా కథకుడు జరగబోయేది చెప్పేస్తున్నట్టుంది. ఎప్పుడు పిలిస్తే అప్పుడొస్తానని అంటే సస్పెన్స్ ఏముంటుంది? ఇది చెప్పకుండా లీవ్ పెట్టేసి కథలోంచి వెళ్ళిపోతే, మళ్ళీ కథలోకి ఎలా వస్తాడన్న సస్పెన్సు వుంటుంది.  

       విషయం 3. మనశ్శాంతి కోసం లీవ్ పెట్టి ఎక్కడో గడుపుతున్నవిక్రంకి, రెండు నెలల  తర్వాత నేహా కన్పించడం లేదని ఫోరెన్సిక్స్ షిండే కాల్ చేస్తాడు. విక్రం షాకవుతాడు. నేహాతో గడిపిన ప్రేమ దృశ్యాలు మెదుల్తాయి. 

       వివరణ : ఏదో ఫ్లాష్ బ్యాక్ వల్ల మతిచెడి, గర్ల్ ఫ్రెండ్ నేహా అల్టిమేటంతో లీవ్ పెట్టి, నార్మల్ అయ్యేందుకు ఎక్కడో గడుపుతున్న విక్రం, ఈ రెండు నెలల్లో ఏ మేరకు బాగు పడ్డాడో ప్రోగ్రెస్ చూపించేలేదు. అలాంటప్పుడు ఈ పీరియెడ్ చూపించడ మెందుకు? సెటప్స్ తప్ప ప్రేక్షకులాశించే పేఆఫ్స్ లేకపోతే ఎలా? నడుస్తున్న కథలో ఏమీ జరక్కపోతే కథెలా? 

       సరే, షిండే కాల్ చేసి నేహా కన్పించడం లేదనే సరికి, విక్రం డిస్టర్బ్ అయిపోయి - వెంటనే నేహాతో గడిపిన ప్రేమ దృశ్యాలు వేసుకోవడ మేమిటి? ఇది సరైన మెంటల్ రిఫ్లెక్షనేనా? (మానసిక ప్రతిఫలనం). మనమీద అలిగి వెళ్ళిపోయిన ఒక మనిషి ప్రమాదంలో పడ్డాడని తెలిస్తే, వెంటనే ఆ మనిషి అలిగి వెళ్ళిపోయిన సన్నివేశమే మెదుల్తుంది. చివరిసారి ఎప్పుడు చూశామో అదే మెదుల్తుంది. దీని తర్వాతే మిగతా పాత జ్ఞాపకాల్లోకి వెళ్తాం. 

       నేహా కన్పించడం లేదని కాల్ వచ్చేసరికి, నేహాని చివరిసారి చూసిందే గుర్తుకు రావాలి. ఆమె అప్పుడు అల్టిమేటం ఇస్తూ మాటాడిందే మెదలాలి. ఈ షాక్ సబ్సైడ్ అయ్యాక, నెమ్మది నెమ్మదిగా ఆమెతో పాత ప్రేమ జ్ఞాపకాల్లోకి వెళ్ళాలి. ఇది డ్రామా. ఇదికాక పోతే ప్రేక్షకులు ఫీలవని తాటాకు చప్పుళ్ళు. అసలు నేహా అల్టిమేటం అన్నది బిగింబింగ్ లో చేసిన సెటప్. దీనికి పేఆఫ్ ఇప్పుడామె కన్పించకపోవడం. దీనికి రిఫ్లెక్షన్ ఈ సెటప్ కీ, పేఆఫ్ కీ మధ్యనే వుండాలి. ఎప్పటివో పాత ప్రేమ దృశ్యాలు కాదు. సెటప్స్ అండ్ పేఆఫ్స్ లో కనెక్షన్స్, డైనమిక్స్ వుంటేనే ఉత్తేజకరంగా వుంటుంది కథనం. 

       విషయం 4. విక్రం వచ్చేసి చీఫ్ ని కలుస్తాడు. నేహా మిస్సింగ్ కేసు తనకిమ్మంటాడు. అభిలాష్ కిచ్చానంటాడు చీఫ్. అభిలాష్ వచ్చి, నేహా మిస్సింగ్ కేసులో విక్రం మీద అనుమానాలున్నాయనీ, ఈ కేసులో ఇన్వాల్వ్ కావద్దనీ బెదిరిస్తాడు. మీకు నచ్చినా నచ్చక పోయినా ఇన్వెస్టిగేట్ చేస్తానని చెప్పేసి వెళ్లి పోతాడు విక్రం. 

       వివరణ : తన గర్ల్ ఫ్రెండ్ మిస్సింగ్ కేసు తనకిమ్మని అడుక్కునేంత దైన్యం హీరో పాత్రకి మరొకటుండదు. ఏంతో స్కిల్స్ తో పరిచయం చేసిన హీరోపాత్రకి కాకుండా ప్రీతి కేసు శ్రీనివాస్ కిపోయింది, ఇప్పడు నేహా కేసూ అభిలాష్ కి పోయింది. ఇంతకీ హీరో పాత్ర ఎవరు? హూ ఈజ్ దిస్ గై ఇన్ దిస్ ఎంటైర్ ‘ప్రిస్టీజియస్’ స్టోరీ వరల్డ్ ? 

       ఇలాకాక, ప్రీతి కేసు విక్రమే ఇన్వెస్టిగేట్ చేస్తూంటే, ఇప్పుడు నేహా కూడా మిస్సైతే, విక్రం పాత్రకి ఎంత బిగ్ బ్యాంగ్ వుండేది? రెండు మిస్సింగ్ కేసులు ఒకే పాయింటుగా వుండి, విక్రంకి బ్యాంగ్ ఇవ్వాల్సిందిపోయి - పాయింటుని చీల్చి పంపకాలు చేస్తే, రేషన్ కోసం ఇలాగే  అడుక్కోవాలి వలసకూలీ విక్రం. కథలో డ్రామా వుండాలంటే డైనమిక్స్ వుండాలి. డైనమిక్స్ మరచిన కథనం మృతపాయమైనది. 

       నేహా కేసులో ఇన్వాల్వ్ ఆయితే బావుండదని చీఫ్ ముందే అభిలాష్ విక్రం ని బెదిరించడం. చీఫ్ కి నచ్చినా నచ్చక పోయినా ఇన్వెస్టిగేట్ చేస్తానని విక్రం కూడా చెప్పేసి వెళ్ళిపోవడం. చీఫ్ అంటే ఎవరికీ లెక్కే లేదు. కనీసం వచ్చినప్పుడు సెల్యూట్ చెయ్యరు అడిషనల్ డిజిపి అయిన చీఫ్ కి. ‘హిట్’ సంస్థ కథా మర్యాద లేని సత్రంలా తయారయ్యింది. దీని సీక్వెల్ తీస్తే ఇంకెలా వుంటుందో!

      నేహా కేసులో విక్రం మీద అనుమానాలున్నాయని కూడా అంటాడు అభిలాష్. ‘నా గర్ల్ ఫ్రెండ్ కేసులో నన్నే అనుమనిస్తావ్ బే?’ అని లాగి ఒక్కటి పీకాల్సింది పీకడు విక్రం. ‘చూపించురా, ఆధారాలు చూపించు’ అని కూడా అనడు. దీంతో విక్రంని మనం కూడా అనుమానించే పరిస్థితి. మరి అనుమానాలతో ఇబ్రహీంని సస్పెండ్ చేసొచ్చిన చీఫ్, ఇప్పుడు విక్రం ని సస్పెండ్ చెయ్యడు. ఉత్తుత్తి కారణాలతోనే ఈ అనుమానాలు. కథకుడు పైపైన రాసేసి పైపైన తీసేసే పధ్ధతి నవలంబిస్తున్నట్టు కన్పిస్తోంది.  

       నేహా మామూలు వ్యక్తి కాదు. ఫోరెన్సిక్స్ ల్యాబ్ సైంటిస్టు. ఆమె మిస్సింగ్ తీవ్రమైనదిగా పరిగణించాల్సిన కేసు. పాత్రల్లో, ఈ సీన్స్ లో టెన్షన్ పుట్టించాల్సిన కథనం. కథకుడు నిర్లక్ష్యం చేసిన ప్రధానాంశం ఏమిటంటే బలాబలాల సమీకరణ చేయకపోవడం. మంచికీ చెడుకీ మధ్య స్పష్టమైన గీత గీయకపోవడం. మేం హిట్ సభ్యులమంతా ఒకవైపు, మీ నేరగాళ్ళంతా ఒకవైపూ అనే విధాన నిర్ణయం చేయకపోవడం. హిట్ సభ్యుల మధ్యే అనుమానాలు, కొట్లాటలు పెడితే ఇది మంచికీ చెడుకీ పోరాటమని ఎలా హైలైట్ అవుతుంది. చీఫ్ కింద చీఫ్ ఇన్వెస్టిగేటర్ గా విక్రం, మిగిలిన వాళ్ళంతా విక్రం కింద టీంగా ఏర్పడి- కలిసి కదం తొక్కితే ఎలా వుంటుంది... ఇక ఈ టీం సభ్యుడే, అతడి భార్యే హంతకులని చివరికి చూపిస్తే, కథకుడ్నిఎలా అర్ధం జేసుకోవాలి. సీక్వెల్లో ఇవి సరిదిద్దుకుని కథా మర్యాదతో సినిమా రైటింగ్ చేస్తాడని ఆశిద్దాం.     

 
       విషయం 5. రెండు రోజుల క్రితమే నేహా తనతో మాట్లాడిందని రోహిత్ తో అంటాడు విక్రం. రాత్రి పూట రహస్యంగా నేహా ఫ్లాట్ చెక్ చేస్తాడు విక్రం. నేహా చున్నీని అందుకుంటే, ప్రేమ దృశ్యాలు గుర్తుకొస్తాయి. ఫ్లాట్ లో ఏదో ఘాటు వాసనేస్తున్నట్టు గమనిస్తాడు. ఫ్లాట్ లో ఎవరో బలవంతంగా ప్రవేశించినట్టు లేదనీ, కారు కూడా మామూలుగా పార్క్ చేసి వుందనీ అంటాడు. లివింగ్ రూంలో స్ట్రాంగ్ అత్తరు వాసనేస్తోందనీ, దీన్నిబట్టి ఎవరో వచ్చి వుండాలనీ అంటాడు. అత్తరు వాసన పోలీసుల వల్ల వచ్చి వుండొచ్చు కదాని రోహిత్ అంటాడు. టెలికాం డిపార్ట్ మెంటుకెళ్ళి నేహా కాల్ లిస్టు మొత్తం తీసుకురమ్మంటాడు విక్రం. 

       వివరణ : ఇక్కడ కొత్త విషయం బయటపడింది...సెలవు పెట్టి ఎక్కడో గడుపుతున్న విక్రంతో, నేహా కాంటాక్టులోనే వున్నట్టు ఇప్పుడు వెల్లడిస్తున్నాడు కథకుడు. అలాంటప్పుడు షిండే నుంచి ఆమె కన్పించడం లేదని కాల్ రాగానే, ఆమె చివరి ఫోన్ కాల్ మెదలాలి విక్రంకి. ఇలా ఈ వెనకటి సీన్లో మార్చుకోవాల్సి వుంటుంది. నేహా ఫోన్లు చేసి మాట్లాడుతూనే వుందంటే, ఆమె కోపం తగ్గిందని కూడా అర్ధం. ఆమె చెప్పినట్టు వినీ లీవ్ పెట్టి రెస్టు తీసుకుంటున్నాడు కాబట్టి. ఇదే సమయంలో ఆమె అతడి ‘హిట్’ డిపార్ట్ మెంట్ లో డెవలప్ మెంట్స్ చెప్పకుండా వుండదు. ‘హిట్’ చేపట్టిన ప్రీతి మిస్సింగ్ కేసులో తను వర్క్ చేస్తున్నట్టు. కథకుడు చిట్ట చివర్లో రివీల్ చేసే దాన్నిబట్టి ఆమె చేస్తున్న వర్క్ ఏమిటి? ప్రీతి కిడ్నాపైన చోట దొరికిన సిరంజి ముక్క మీద వేలిముద్రలు తీసే పని. ఇలా సిరంజి సూది మీద వేలిముద్రలు పాక్షికంగా నైనా సరే సేకరించడం సాధ్యపడదు. కానీ కథకుడు కథకోసం ఫోరెన్సిక్స్ ని విరిచి పెట్టుకున్నాడు కాబట్టి, ఆమె వరకూ ఇది అసాధారణ కేసు. ఇంత అసాధా రణ కేసు గురించి విక్రం కి చెప్పకుండా వుంటుందా? ఆమె ఇవేమీ చెప్పినట్టు లేదు. అసలు ఫోన్ కాల్స్ లో ఏం మాట్లాడేదో కూడా కథకుడు చెప్పలేదు. తనకే తెలిసి వుండదు. కథ చెప్పే టెక్నిక్ లో, మాయమవబోయే మనిషి కీలక సమాచారమేదో  అస్పష్టంగానైనా చెప్పడమనే రొటీన్ కంపల్సరీగా వుంటుంది. చచ్చే వాడు చెవిలో ఏదో చెప్పి చచ్చాడని చూపించినట్టు. ఈ ఇంపార్టెంట్ బీట్ ని స్పృశించకుండా నేహాని పేలవంగా మాయం చేశాడు కథకుడు.  

        ఇక విక్రం నేహా ఫ్లాట్లో చెక్ చేస్తున్నపుడు ఆమె చున్నీ అందుకుని మొహానికి అద్దుకోగానే మరోసారి ఆమెతో ప్రేమ దృశ్యాల సేవనం. బెడ్ మీదికి చూసినప్పుడు, బెడ్ మీద ఆమె మరొకడితో వున్నట్టు మొదట కన్పించి, తేరిపార చూస్తే తనే కన్పించడం టోటల్ మెస్. అంటే ఆమె క్యారక్టర్ మీద మనసులో అనుమాన బీజం వుందన్నమాట. చాలా బ్యాడ్ థింకింగ్. రెండు నెలల సెలవులో మానసికంగా బాగు పడింది లేదు. ఆమె తనతో ఫోన్లో మాట్లాడుతున్నప్పటికీ ఇలా ఆలోచిస్తున్నాడు. తనతో పడుకున్న నేహా ఇంకెవరితోనైనా పడుకోవచ్చన్నలేకి ఆలోచనలు. ఇలా చేసి విక్రం ఎలాటి చిక్కులో పడ్డాడంటే, ఇకామెకి తన తప్పుడు ఆలోచనలు చెప్పేసి లెంపలేసుకుంటే గానీ, ఆమెతో రిలేషన్ షిప్ లో వుండే అర్హత లేదు.

       ఫ్లాట్లో అత్తరు వాసన రావడం గురించి...కథకుడు మెకానిక్ ఫాహెద్ కి కనెక్ట్ చేస్తూ చివర్లో రివీల్ చేసే ఈ అత్తరు మిస్టరీని బట్టి, ఇది కథకి ప్రధాన క్లూ. ఈ క్లూకి ప్రీతి కిడ్నాపైన చోట దొరికిన అత్తరు వాసన దూది, ఫిజికల్ ఎవిడెన్స్ అయింది. దీనిమీద సరైన దృష్టే పెట్టడు అన్ని స్కిల్స్ వున్న విక్రం. 

       ఇక టెలికాం డిపార్ట్ మెంటుకెళ్ళి నేహా కాల్ లిస్టు మొత్తం తీసుకురమ్మని రోహిత్ కి చెప్పడం. ఇది రాంగ్ ఇన్ఫర్మేషన్. ఎలా పడితే అలా కాల్ లిస్టులు తీసుకుని దుర్వినియోగం చేస్తున్నారని కేంద్ర ప్రభుత్వం 2016 లో కట్టడి చేసింది. సంబంధిత పోలీసు శాఖ ఉన్నతాధికారి గోప్యంగా వుంచుకునే పాస్ వర్డ్ గల, ఆయన పర్సనల్  ఈ మెయిల్ ఎక్కౌంట్ నుంచి రిక్వెస్ట్ అందితేనే ఆయనకి కాల్ లిస్టు ఈ మెయిల్ ద్వారా పంపుతారు నెట్వర్క్ ప్రొవైడర్లు. ఇలా ఇక్కడ  విక్రం చీఫ్ కి చెప్పి తెప్పించాలి కాల్ లిస్టు. కానీ చీఫ్ ని ధిక్కరించి అనధికారికంగా చేపట్టాడు ఈ కేసుని. మరొకటేమిటంటే, నేహా కాల్ లిస్టు కావాలన్నవిక్రం, ఆ తర్వాత ఈ విషయమే మర్చిపోతాడు. ఇక నేహా కాల్ లిస్టు వూసే వుండదు ఇంత ఇంపార్టెంట్ కేసులో. ‘హిట్’ పని తీరేమిటో ఎవడికీ అర్ధంగాదు. అడ్డగోలు డ్యూటీలు, అడ్డగోలు దర్యాప్తులు. 

       ఈ సీను దగ్గర్నుంచి గమనించాల్సిందేమిటంటే, ఈ కథలో చివర్లో రివీలయ్యే హంతకుడు రోహిత్, విక్రం వెంటే వుండడం. కానీ రహస్యంగానైనా దర్యాప్తుని దారి మళ్ళించే ప్రయత్నాలు చేయకపోవడం. వీక్ క్యారక్టరైజేషన్. 

       విషయం 6. షిండేని కలిసి నేహా డీల్ చేస్తున్న కేసుల డిటెయిల్స్ కావాలంటాడు విక్రం. ఆ ఫైల్స్ లో ప్రీతి మిస్సింగ్ కేసు ఫైల్ వుంటుంది. అది చూసి నేహా మిస్సింగ్ కి ప్రీతితో సంబంధమున్నట్టు అనుమానిస్తాడు. ప్రీతి కేసు చూస్తున్న శ్రీనివాస్ ని కలిస్తే, ప్రీతి కేసులో ఏదో ఇంపార్టెంట్ లీడ్ దొరికినట్టు నేహా తనకి చెప్పిందని అంటాడు. ప్రీతి కారున్న చోట దూదీ, విరిగిన సిరంజీ దొరికినట్టు చెప్తాడు. ఆ దూది అత్తరు వాసనేస్తుంది విక్రంకి. సిరంజి మీద ప్రీతి బ్లడ్ గానీ, డీఎన్ఏ గానీ లేదంటాడు శ్రీనివాస్. 

       వివరణ : ‘హిట్’ నుంచి ప్రీతి కేసుని అధికారికంగా శ్రీనివాస్ చూస్తూంటే, విక్రంకి ఆ ఫైల్స్ ఎలా అందిస్తాడు షిండే? ఏమిటిది? కథేనా, లేక ఉరికొయ్యనా? అడుగడుగునా ఉరి తీస్తున్నాడు కథకుడు. ఆ ఫైల్స్ లో ప్రీతి మిస్సింగుకీ, నేహా మిస్సింగుకీ ఏదో లింకు కన్పిస్తుంది విక్రమాచార్యుడికి. అంతే, ప్రీతి కేసు చూస్తున్న శ్రీనివాస్ ని కలుస్తాడు. అప్పుడు ప్రీతి కేసులో ఏదో ఇంపార్టెంట్ లీడ్ దొరికినట్టు నేహా తనకి చెప్పినట్టు అంటాడు శ్రీనివాస్. ఏమిటా లీడ్ అన్న ప్రశ్న రాదు విక్రంకి. శ్రీనివాస్ అందించిన దూది నందుకుని దానికి అత్తరు వాసన చూస్తాడు. కానీ ఎలర్ట్ అవడు. ఈ దూది శ్రీనివాస్ దగ్గరెందుకుంది? సూదితో బాటు దూదీ నేహా పరిశోధనకి వెళ్ళిపోవాలిగా? కథకుడు విక్రం కి చూపించడానికి శ్రీనివాస్ దగ్గర అట్టి పెట్టినట్టుంది. 

       సూది మీద ప్రీతి బ్లడ్ గానీ, డీఎన్ఏ గానీ లేదంటాడు శ్రీనివాస్. ఎందుకు లేవు. వుండాలిగా? వుండకపోతే కిడ్నాపర్ ఈ ఇంజెక్షన్ ప్రీతికే ఇచ్చాడని ఎలా వాదిస్తారు కోర్టులో? ఏ ఇంజెక్షన్ ఇచ్చాడో సూది లోపల శోదించక పోతే, అది స్పృహ తప్పించే ఇంజెక్షన్ అని ఎలా రుజువు చేస్తారు కోర్టులో? బలవంతంగా ఇంజెక్షన్ ఇస్తున్నపుడు సూది విరిగి పడితే, మిగతా సిరంజిని ఎక్కడ విసిరేశాడు కిడ్నాపర్? అటు తుప్పల్లో వెతికారా? కిడ్నాపర్ వేలిముద్రల కోసం విసిరేసిన సిరంజీని వెతక్కుండా, దాన్ని విరిగిన సూది మీద వేలిముద్రలు తీసే అశాస్త్రీయ ప్రయత్నమేమిటి? 

       చివర్లో మనకి కథకుడు రివీల్ చేసే నేహా చెప్పిన ఇంపార్టెంట్ లీడ్ ఏమిటంటే, ఆ విరిగిన సూది మీద ఫాహెద్ వేలిముద్రలు మ్యాచ్ అవడం. ఈ రిపోర్టు బయటికి వస్తే, ఫాహెద్ చేత ప్రీతిని కిడ్నాప్ చేయించిన రోహిత్, అతడి భార్య స్వప్నాలు దొరికిపోతామని, అదే ఫాహెద్ చేత నేహాని కూడా కిడ్నాప్ చేయించారన్న మాట. అందుకే ఆమె గదిలో అత్తరు వాసన. 

       దూది, సూదీ, ఇంపార్టెంట్ లీడ్ అంటూ శ్రీనివాస్ చెప్పినప్పుడు వెంటనే విక్రం ఏం చేయాలి? నేహా ఇన్వెస్టిగేషన్ ప్రాసెస్ ని ఆమె కంప్యూటర్ లోంచి షిండేకి చెప్పి తీయించాలి! ఇప్పుడు కూడా ఖేల్ ఖతం, దుకాన్ బంద్. ఇక్కడ ఐపోయే కథని ఇంకా గంటన్నర పొడిగించడమా? అంటే కథకుడు ప్లే చేస్తున్న క్లూస్ టైమింగ్స్  అండ్ ప్లేస్ మెంట్స్ ఎలా వున్నాయంటే, సెల్ఫ్ గోల్ చేసేలా వున్నాయి గజిబిజి కథనంతో. 

       ఇదంతా శ్రీనివాస్ నుంచి వింటున్న రోహిత్ కూడా ఏం చేయాలి? నేహా కంప్యూటర్ ని హ్యాక్ చేసి, ఫాహెద్ దొరికిపోకుండా ఎవిడెన్స్ ని తునాతునకలు చేసి తుప్పల్లో పారెయ్యాలి! కంప్యూటర్నే ఎత్తుకెళ్ళి బ్లాస్ట్ చెయ్యాలి! హిట్ టీం ని ఇంత  లో- నాలెడ్జితో చూపిస్తే ఎలా?   

       విషయం 7. విక్రం చీఫ్ ని కలిసి ప్రీతి కేసు తన కిమ్మంటాడు. ప్రీతి ఫాదర్ తన ఫ్రెండేనని, ఈ కేసు విక్రం చూస్తానంటే అంతకంటే ఏం కావాలని శ్రీనివాస్ నుంచి తప్పించి, కేసుని విక్రం కిచ్చేస్తాడు చీఫ్. 

       వివరణ : మళ్ళీ రేషన్ కోసం వచ్చాడు వలస కూలీ విక్రం. మన చీఫ్ చాలా హేపీ. ఆ పిల్ల తండ్రి తన ఫ్రెండేగా. కేసు విక్రం చూస్తానంటే ఇంతకన్నా పరమానందం ఏముంటుంది చీఫ్ కాని చీఫ్ కి? కేసుని శ్రీనివాస్ నుంచి పీకి విక్రం కిచ్చి పారేశాడు, పాపం శ్రీనివాస్. ఇక ముందు నేహా కేసుని కూడా అభిలాష్ నుంచి పీకి విక్రం కిచ్చేసే  పవిత్ర కార్యముంది చీఫ్ కి. ఏదైనా పీకి మనకూ ఇస్తాడేమో చూడాలని ఆరాటంగా వుంది. డామ్ గుడ్ అడ్మినిస్ట్రేటర్.    

(మిడిల్ వన్ మిగతా భాగం సరదాగా రేపు!)

―సికిందర్