రివ్యూలు, సాంకేతికాలు, స్క్రీన్ ప్లే సంగతులు...

టికెట్లు దొరకడం యోగం, సినిమాలు చూడడం భోగం, రివ్యూలు రాయడం రోగం!

1, మే 2020, శుక్రవారం

932 : స్క్రీన్ ప్లే సంగతులు


    పోలీస్ క్రైం థ్రిల్లర్స్ లో హీరోయే పోలీస్ డిటెక్టివ్ గా వుండి తీరాలని రూలుందా ? పోలీస్ డిటెక్టివ్ గా విలన్ ఆర్టిస్టు వేసి, హీరో హంతకుడిగా వేసి, హీరోని విలన్ పట్టుకునే రివర్స్ యాక్షనుంటే ఫ్లాపవుతుందా?...ఇలా రోల్ రివర్సల్ చేసినప్పుడే ఈ జానర్ కథలు టెంప్లెట్ నుంచి బయటపడతాయని అభిప్రాయపడ్డాడు హాలీవుడ్ రచయిత. ఇదేదో బావుందనే అన్పిస్తుంది. అన్నిసద్గుణాలున్నపాత్రలో నేచురల్ స్టార్ నాని, హత్య చేసి తప్పించుకుంటూ వుంటే- అన్ని దుర్గుణాలు ప్రదర్శిస్తూ విలన్ పాత్రధారి జగపతిబాబు - పోలీస్ డిటెక్టివ్ గా నానిని పట్టుకునే క్రైం థ్రిల్లర్ గా వస్తే, ప్రేక్షకులు హాహాకారాలే చేస్తారు. ప్రేక్షకుల్నివీలైనంత సఫర్ చేయమనే చెప్పి పోయాడు ఆల్ఫ్రెడ్ హిచ్ కాక్. ఎంత హత్య చేస్తే మాత్రం అంత మంచి వాడైన నానిని హంతకుడిగా పట్టుకోవాలా అని మోరల్ డైలమాలో పడిపోతారు. సెంటిమెంటుకీ చట్టానికీ మధ్య తేల్చుకోలేక నలిగిపోతారు ప్రేక్షకులు...ఛాలెంజిగా వుంటుంది మేకర్ కి. మోరల్ ప్రెమీస్ వున్న పోలీస్ ఇన్వెస్టిగేషన్ కథ కలకాలం గుర్తుంటుంది... కాకపోతే ఎండ్ సస్పెన్సుగా వుండకూడదు. వుంటే హంతకుడెవరో పోలీస్ డిటెక్టివ్ తెలుసుకోవడానికే కథ ముగింపు కొస్తుంది. మూసిపెట్టిన ఎండ్ సస్పెన్స్ కథలో ప్రత్యర్ధుల మధ్య కాన్ఫ్లిక్ట్ వుండదు. దాంతో డ్రమెటిక్ క్వశ్చన్ వుండదు. పాసివ్ పాత్రలా ఒక్కడే దిక్కుతోచక తిరుగుతూంటాడు పోలీస్ డిటెక్టివ్... 

       ‘హిట్’ఇన్వెస్టిగేటర్ విక్రం ప్రాబ్లం ఇదే. దీనిగురించి చివరి వ్యాసంలో చూద్దాం. క్రిందటి వ్యాసంలో బిగినింగ్ విభాగపు కథలో విక్రంకి గర్ల్ ఫ్రెండ్ నేహాతో చెడడం, స్టూడెంట్ ప్రీతి అదృశ్యమవడమనే మిడిల్ విభాగానికి చేరేసే రెండు సెటప్స్  చూశాం. ప్రీతి అదృశ్యం ప్లాట్ పాయింట్ వన్ మలుపుగా వచ్చింది. ఇక్కడ్నించీ ఇప్పుడు మిడిల్ లో ప్రారంభమయ్యే కథేమిటో చూద్దాం. ముందుగా ఇంటర్వెల్ వరకూ మిడిల్ వన్ కథ చూద్దాం...

మిడిల్ వన్ కథ:  
      
1. ఎస్సై ఇబ్రహీం రోడ్డు మీదే వున్న ప్రీతి కారుని బయటి నుంచి చెక్ చేస్తాడు. టోల్ బూత్ కెళ్ళి నిన్న సాయంత్రం 5.30 -6.30 మధ్య సీసీ టీవీ ఫుటేజీ అడుగుతాడు. ఒక షాపు కెళ్ళి బ్లూ కారు గురించి ఆరా తీస్తాడు. టోల్ బూత్ నుంచి అందిన సీసీ టీవీ ఫుటేజీ చెక్ చేస్తాడు 6.29కి టోల్ గేట్లో ఒక్ కార్గో ట్రక్ కన్పిస్తుంది. బ్లూ కారు కన్పించదు. ఇతర టోల్ బూత్స్ ఫుటేజీలు తెప్పించుకుని చూసినా బ్లూ కారు కన్పించదు. అది ఎగ్జిట్ అవకుండా, రోడ్డు మీద కంటిన్యూ అవకుండా ఏమైనట్టని ఆలోచనలో పడతాడు. 

      
2. పోలీస్ స్టేషన్ కొచ్చిన ‘హిట్’ చీఫ్ విశ్వనాథ్, ఇబ్రహీంని సస్పెండ్ చేస్తాడు. ప్రీతి పేరెంట్స్ మోహన్, లక్ష్మిల ముందే అతణ్ణి తిట్టి, అతడిమీద అనుమానంతో సస్పెండ్ చేసి, కేసులో నిందితుడిగా నిర్ణయిస్తాడు. 

      
3. మనశ్శాంతి కోసం లీవ్ పెట్టి ఎక్కడో గడుపుతున్నవిక్రంకి, రెండు నెలల  తర్వాత నేహా కన్పించడం లేదని ఫోరెన్సిక్స్ షిండే కాల్ చేస్తాడు. విక్రం షాకవుతాడు. నేహాతో గడిపిన ప్రేమ దృశ్యాలు మెదుల్తాయి. 

      
4. విక్రం వచ్చేసి చీఫ్ ని కలుస్తాడు. నేహా మిస్సింగ్ కేసు తనకిమ్మంటాడు. అభిలాష్ కిచ్చానంటాడు చీఫ్. అభిలాష్ వచ్చి, నేహా మిస్సింగ్ కేసులో విక్రం మీద అనుమానాలున్నాయనీ, ఈ కేసులో ఇన్వాల్వ్ కావద్దనీ హెచ్చరిస్తాడు. మీకు నచ్చినా నచ్చక పోయినా ఇన్వెస్టిగేట్ చేస్తానని చెప్పేసి వెళ్లి పోతాడు విక్రం. 

      
5. రెండు రోజుల క్రితమే నేహా తనతో మాట్లాడిందని రోహిత్ తో అంటాడు విక్రం. రాత్రి పూట రహస్యంగా నేహా ఫ్లాట్ చెక్ చేస్తాడు విక్రం. నేహా చున్నీని అందుకుంటే, ప్రేమ దృశ్యాలు గుర్తుకొస్తాయి. ఫ్లాట్ లో ఏదో ఘాటు వాసనేస్తున్నట్టు గమనిస్తాడు. ఫ్లాట్ లో ఎవరో బలవంతంగా ప్రవేశించినట్టు లేదనీ, కారు కూడా మామూలుగా పార్క్ చేసి వుందనీ అంటాడు. లివింగ్ రూంలో స్ట్రాంగ్ అత్తరు వాసనేస్తోందనీ, దీన్నిబట్టి ఎవరో వచ్చి వుండాలనీ అంటాడు. అత్తరు వాసన పోలీసుల వల్ల వచ్చి వుండొచ్చు కదాని రోహిత్ అంటాడు. టెలికాం డిపార్ట్ మెంటుకెళ్ళి నేహా కాల్ లిస్టు మొత్తం తీసుకురమ్మంటాడు విక్రం. 

      
6. షిండేని కలిసి నేహా డీల్ చేస్తున్న కేసుల డిటెయిల్స్ కావాలంటాడు విక్రం. ఆ ఫైల్స్ లో ప్రీతి మిస్సింగ్ కేసు ఫైల్ వుంటుంది. అది చూసి నేహా మిస్సింగ్ కి ప్రీతితో సంబంధమున్నట్టు అనుమానిస్తాడు. ప్రీతి కేసు చూస్తున్న శ్రీనివాస్ ని కలిస్తే, ప్రీతి కేసులో ఏదో ఇంపార్టెంట్ లీడ్ దొరికినట్టు నేహా తనకి చెప్పిందని అంటాడు. ప్రీతి కారున్న చోట దూదీ, విరిగిన సిరంజీ దొరికినట్టు చెప్తాడు. ఆ దూది అత్తరు వాసనేస్తుంది విక్రంకి. సిరంజి మీద ప్రీతి బ్లడ్ గానీ, డీఎన్ఏ గానీ లేదంటాడు శ్రీనివాస్. 

       7. విక్రం చీఫ్ ని కలిసి ప్రీతి కేసు తన కిమ్మంటాడు. ప్రీతి ఫాదర్ తన ఫ్రెండేనని, ఈ కేసు విక్రం చూస్తానంటే అంతకంటే ఏం కావాలని శ్రీనివాస్ నుంచి తప్పించి, కేసుని విక్రం కిచ్చేస్తాడు చీఫ్. 

      
8. ప్రీతిని కిడ్నాప్ చేసిన వాడే కచ్చితంగా నేహా ఫ్లాట్ కేళ్లాడని, అతనెవరని రోహిత్ తో అంటాడు విక్రం. ఓకే, ఎక్కడ స్టార్ట్ చేద్దామని రోహిత్ అడుగుతాడు. ప్రీతి కేసు ఫైల్స్, ఓఆర్ఆర్ ఎంట్రీ ఎగ్జిట్ ఫుటేజీ, అలాగే ఫోరెన్సిక్స్ కి పంపిన కేస్ మెటీరియల్ మొత్తం తన టేబుల్ కి రావాలంటాడు విక్రం. స్టడీ చేసి ఇన్వెస్టిగేషన్ స్టార్ట్ చేద్దామంటాడు. నేహా ప్రీతి కేసు గురించి ఏమైనా మాట్లాడిందేమో షిండేని కనుక్కోమంటాడు. అలాగే నేహా ఫ్యామిలీ అండ్ ఫ్రెండ్స్ దగ్గర శాంపిల్స్ కలెక్ట్ చేసుకోవడానికి కోర్టు పర్మిషన్ తీసుకున్నారేమో తెలుసుకోమంటాడు.

      
9. విక్రం ఎస్సై ఇబ్రహీం ని అతడి ఇంటికి తీసుకెళతాడు. దారిలో స్కూటర్ రిపేరు కిచ్చానని మెకానిక్ ఫాహద్డ్ దగ్గరాగి స్కూటర్ తీసుకుంటాడు ఇబ్రహీం. ఇంటికెళ్ళాక నిన్ను అనుమానించడం లేదనీ, ఇంకేమైనా మర్చిపోయావేమో గుర్తు తెచ్చుకుని చెప్పమంటాడు విక్రం. ఇదే జరిగిందని చెప్తాడు ఇబ్రహీం. ఒకసారి ఇల్లు చూడొచ్చా అని గదిలోకి వెళ్లి అక్కడున్న అత్తరు బాటిల్ తీసి వాసన చూస్తాడు విక్రం. రోహిత్ వస్తాడు. ఈ అత్తరు కాదన్నట్టు తలాడిస్తాడు విక్రం. బయల్దేరుతూ ఇబ్రహీం కి సిగరెట్ ఆఫర్ చేస్తూ, మళ్ళీ అవసరమైతే హెల్ప్ చేయాలని షేకాండిస్తాడు విక్రం. అక్కడ్నించి తిరిగి వెళ్తూ, ఇబ్రహీం చూశానంటున్న బ్లూ కారు ఇంకెవరూ  చూడలేదని, శ్రీనివాస్ ఇన్వెస్టిగేషన్ లో కూడా బ్లూ కారు జాడలేదనీ అంటాడు. అరచేతికున్న సెల్లో ఫేన్ టేప్ తీసిస్తూ, దీని మీద ఇబ్రహీం వేలిముద్రలు కలెక్ట్ చేసుకోమంటాడు. ఇబ్రహీం తాగి పడేసిన సిగరెట్ పీక మీదే ఇబ్రహీం డీఎన్ఏ తీసుకోమంటాడు.


         10. కాలేజీకి వెళ్లి అజయ్, సంధ్య అనే స్టూడెంట్స్ ని దర్యాప్తు చేస్తాడు. అజయ్ మీద అనుమానాలు రావు. కిడ్నాపైన ముందు రోజు తనూ ప్రీతీ పబ్ కెళ్లామని అంటుంది సంధ్య. అక్కడేం జరగలేదని అంటుంది.  చంద్రమౌళి అనే టీచర్ మీద అనుమానం వ్యక్తం చేస్తుంది. చంద్రమౌళిని కలిసి అతడి పాత్రేమీ లేదని నిర్ధారించుకుంటాడు విక్రం. 

       11. పబ్ లో ఏం జరిగిందో తెలుసుకోవాలని రోహిత్ తో అంటాడు విక్రం. ప్రీతి కేసు గురించి షిండేకి నేహా ఏమైనా చెప్పిందేమో కనుక్కున్నావా అని అడుగుటాడు. ఆమె ఏం చెప్పలేదని అంటాడు రోహిత్. ఇంతలో అభిలాష్ వచ్చి, ప్రీతి మీద నీకెందుకు ఆసక్తి అని నిలదీస్తాడు.   
   
      
12. విక్రం ప్రీతి పేరెంట్స్ ని కలుస్తాడు. ప్రీతి ఒక అనాధ అనీ; మోహన్, లక్ష్మీ లు ఆమె పెంపుడు తల్లిదండ్రులనీ తెలుసుకుంటాడు. సరస్వతి అనే ఆవిడ నడిపే అనాధాశ్రయం నుంచీ మోహన్ తమ్ముడు శివ, మరదలు ప్రియ  ప్రీతిని చిన్నప్పుడు దత్తత తీసుకుని యూఎస్ వెళ్ళారనీ, అక్కడ వాళ్ళిద్దరూ ప్రమాదంలో చనిపోవడంతో, ప్రీతిని తెచ్చుకుని మోహన్ లక్ష్మీలు పెంచుకున్నారనీ తెలుసుకుంటాడు. ఆ అనాధాశ్రయాన్ని  ప్రీతి మేనేజ్ చేస్తోందని కూడా తెలుసుకుంటాడు. అనాధాశ్రయం నిర్వాహకురాలు సరస్వతి, ప్రీతి ఇచ్చే నిధులు దుర్వినియోగం కావడం లేదని చెప్తుంది.

       13. ఇరుగుపొరుగుతో ప్రీతి ఎలా వుంటుందని పేరెంట్స్ ని అడుగుతాడు విక్రం. షీలాతో క్లోజ్ గా వుంటుందని చెప్తాడు ప్రీతి తండ్రి మోహన్. మోహన్ లక్ష్మిల లాలాజలం, వేలిముద్రల శాంపిల్స్ తీసుకుంటారు. యూఎస్ లో తన తమ్ముడి ఆస్తి ప్రీతికి బదిలీ ట్రాన్స్ అయిందని చెప్తాడు మోహన్. అనుమానితుల లిస్టులో ప్రీతి పేరెంట్స్ ని కూడా చేరుస్తాడు రోహిత్. 

      
14. పొరుగున వుండే షీలాని కలిస్తే,  ప్రీతి ఒక్కతే తనతో మాట్లాడుతుందనీ, తను డైవర్సీ కావడంతో ఎవరూ తనతో మాట్లాడరనీ అంటుంది షీలా. ప్రీతి మిస్సయిన సమయంలో తను తన కూతుర్ని కలవడానికి వెళ్లినట్టు చెప్తుంది. 

      
15. విక్రం, రోహిత్ లు పబ్ కెళ్తారు. అక్కడ బార్ అటెండర్ ని ప్రశ్నించబోతే అతను భయపడి పారిపోతాడు. వెంటాడి పట్టుకుంటే అతడి దగ్గర డ్రగ్స్ బయటపడతాయి. అతణ్ణి పోలీసులకి అప్పజెప్తాడు విక్రం. ప్రీతి పేరెంట్స్ ని కలిసి పూజకి ఏర్పాట్లు చేయమంటాడు. ప్రీతి క్షేమం కోసం ఏర్పాటు చేసే పూజకి ఎవరెవరు వస్తారో, ఎవరెవరు రారో కనిపెట్టేందుకు.

      
16. పూజకి అందరూ వస్తారు. ఎవరి మీదా అనుమానం రాదు. ఇంతలో పొరుగున వుండే షీలా పరుగెత్తుకొచ్చి, తలుపు దగ్గర లెటర్ దొరికిందని చెప్తుంది. ఆ లెటర్లో - డేడ్ బాడీ వికారాబాద్ రాజూ గెస్ట్ హౌస్ ముందు వుందని రాసి వుంటుంది. విక్రం షాకవుతాడు. నేహా మెదుల్తుంది. డిస్టర్బ్ అవుతాడు. ప్రీతి కోసం పూజ దగ్గర హోమంలో మంట చూసి తలతిరిగి పడిపోతాడు (విశ్రాంతి).

మిడిల్ వన్ వివరణ :


        ఏ సినిమా కథయినా స్క్రీన్ ప్లే మిడిల్ విభాగంలోనే ప్రారంభమవుతుంది. బిగినింగ్ విభాగంలో చూసేదంతా కధకి ఉపోద్ఘాతం మాత్రమే, కథ కాదు. ఇలా మిడిల్లో ప్రారంభమయ్యే కథలో ఏం జరుగుతుందంటే, ప్లాట్ పాయింట్ వన్ దగ్గర ఏర్పడ్డ సమస్య కారకుడైన ప్రత్యర్ధితో  ప్రధాన పాత్ర సంఘర్షించడం జరుగుతుంది. ప్రత్యర్ధితో సంఘర్షించి సమస్యని పరిష్కరించుకునే ‘గోల్’ తో ప్రధాన పాత్ర వుంటుంది. ఈ గోల్ లో నాల్గు విటమిన్లు వుంటాయి. కోరిక, పణం, పరిణామాల హేచ్చరిక, ఎమోషన్. ఇదంతా ప్రధానపాత్ర వ్యక్తిగత అనుభవం. అతను గోల్ తీసుకోవడానికి అతను లోనైన వ్యక్తిగత అనుభవమే అంతర్గతంగా కారణమవుతుంది. కానీ ప్రధాన పాత్ర పోలీస్ డిటెక్టివ్ లాంటి, లేదా గూఢచారి లాంటి  ప్రొఫెషనల్ పాత్రయితే, గోల్ తీసుకోవడానికి వ్యక్తిగత కారణాలుండవు. వృత్తిగత కారణాలే వుంటాయి. అతడి గోల్ బహిర్గతంగా డ్యూటీ రూపంలో పై అధికారి నుంచి వచ్చి మీద పడుతుంది. ఇంత మాత్రాన పైన చెప్పుకున్న గోల్ ఎలిమెంట్స్- విటమిన్లు మాయమై పోవు. అప్పుడా పోలీస్ డిటెక్టివ్ కోరిక కేసుని పరిష్కరించి తీరాలని వుంటుంది. పోలీస్ డిటెక్టివ్ కి  గోల్ కోసం దేన్నైనా పణంగా పెట్టాలని వుంటుంది. పోలీస్ డిటెక్టివ్ కి పరిణామాలేం పొంచివున్నా ఎదుర్కోవాలని వుంటుంది. పోలీస్ డిటెక్టివ్ ఈ కథా ప్రయాణంలో హత్యకి గురైన వ్యక్తి గురించి ఎక్కడో ఎమోషనల్ గా కనెక్ట్ అవుతాడు. ఈ విటమిన్లు అన్నీ కలిసి పనిచేస్తేనే ఒక సజీవమైన పోలీస్ డిటెక్టివ్ పాత్ర, ఒక బలమైన డెప్త్ వున్న క్రైం థ్రిల్లర్ తయారవుతాయి.  

      ఇవి ‘హిట్’ లాంటి ఎండ్ సస్పెన్స్ కథలో సాధ్యపడవు. ఎందుకంటే సమస్య వుంటుంది గానీ, సమస్యకి కారణమైన ప్రత్యర్ధి పాత్ర కన్పించదు చివరిదాకా. ప్రత్యర్ధిని వెతుక్కోవడమే సరిపోతుంది పోలీస్ డిటెక్టివ్ కి. ఆ ప్రత్యర్ధి అయిన హంతకుడెవరో వెతుక్కోవడమే కథై పోతుంది. అంటే సింపుల్ గా చెప్పాలంటే హీరోకి విలన్ లేని కథ. నాకో విలన్ కావాలీ అని కథలో హీరో దీనంగా తిరుగాడే వ్యధ. ఇలా సినిమా చూపించలేమని హాలీవుడ్ ఏనాడో గుర్తించింది. టాలీవుడ్ ఇంకా ఇందులోనే మునిగి తేలుతోంది. చాలా మంచి విషయం. 

       విక్రంతో స్క్రీన్ ప్లేకి సమస్య ఇదే. ఈ మిడిల్ వన్ లో సమస్యతో సంఘర్షిస్తూ వుంటాడే తప్ప నేరస్థుడి జాడ తెలుసుకోలేడు. అతడి స్కిల్స్ కి చిటికెలో తెలుసుకునే అవకాశం కళ్ళ ముందున్నా దాన్ని గుర్తించడు. కనీసం ఇంటర్వెల్లో అయినా నేరస్థుణ్ణి కథకుడు ప్రేక్షకులకి రివీల్ చేయాలనుకోడు. 

       ప్రీతి ఒక్కటే కాదు నేహాతో రెండు మిస్సింగులు. ఇంటర్వెల్లో లెటర్ ప్రకారం శవం ఎవరిదీ- ప్రీతిదా, నేహాదా?ఎవరిది? ఓ పక్క ఈ ప్రశ్న రేకెత్తిస్తూనే, మరోపక్క హోమంలో మంటకి రియాక్షన్ గా  విక్రం కి తన ఫ్లాష్ బ్యాక్ గుర్తొచ్చి పడిపోవడం. అంటే ఇంటర్వెల్ వేసింది కథకి ముఖ్యమైన  శవం ఎవరిదన్న ప్రశ్న మీద కాదా? కథకి ముఖ్యం కాని విక్రం ఫ్లాష్ బ్యాక్ మీదా? దేంతో థ్రిల్లవాలి ప్రేక్షకులు? ఇలా ఇది ఇంపాక్ట్ కోల్పోయిన ఫ్రాక్చరైన ఇంటర్వెల్ కూడా అయింది. అసలు డెడ్ బాడీ ఎవరిదన్న ప్రశ్నకూడా ఉత్తుత్తిదే. అది ఉత్తుత్తి లెటరేనని తర్వాత సెకండాఫ్ లో వెల్లడిస్తాడు కథకుడు. ఇలా ఈ ఇంటర్వెల్ తో ప్రేక్షకుల్ని ఫూల్స్ చేయడం కూడానన్న మాట, ఫాల్స్ ఇంటర్వెల్ వేసి. ‘మత్తువదలరా’ లో కూడా ఇలాటిదే చూశాం. 


మిడిల్ వన్ మరింత వివరణ:
        ఇది పోలీస్ ప్రోసీజురల్ సినిమా అని జానర్ కరెక్టుగానే చెప్పాడు దర్శకుడు. అదే సమయంలో ఇది అందరికీ అర్ధంగాదని సెల్ఫ్ గోల్ స్టేట్ మెంట్ కూడా ఇచ్చేశాడు. ‘16 డి’ తమిళ దర్శకుడు కూడా ఇలాగే అనేశాడు- అర్ధం కావాలంటే రెండోసారి చూడాలని. తమకే అర్ధంగాని కన్ఫ్యూజన్ తో తీస్తే వందసార్లు చూసినా ప్రేక్షకులకి అర్ధంగావు. పైకి బావుందని చెప్పడం తప్ప. నేర న్యాయ వ్యవస్థ గురించి ఎలా పడితే అలా చూపించేస్తే నమ్మేసే ప్రమాదముంది పైగా. దర్శకుడు ఇది ‘ఇన్ఫార్మేటివ్ థ్రిల్లర్’ అని కొత్త మాట వాడేడు. ఇలాటి జానర్ లేదు. క్రైం థ్రిల్లర్ అంటే సినిమా సాంతం విషయం తేల్చకుండా, లెక్కలేనన్ని క్లూలూ సాక్ష్యాలిస్తూ, ఇన్ఫర్మేషన్ని ప్రేక్షకుల మీద డంప్ చేయడం కాదు. ఇన్ఫర్మేషన్ తో కథ వుండదు, కథ మొదలు కాదు, థ్రిల్ వుండదు, పైగా మేకర్ కే బోలెడు కన్ఫ్యూజన్. ఈ ఇన్నేసి కన్ఫ్యూజింగ్ క్లూల కథాకమామిషేమిటో ఇక చూద్దాం...

       విషయం 1. ఎస్సై ఇబ్రహీం రోడ్డు మీదే వున్న ప్రీతి కారుని బయటి నుంచి చెక్ చేస్తాడు. టోల్ బూత్ కెళ్ళి నిన్న సాయంత్రం 5.30 -6.30 మధ్య సీసీ టీవీ ఫుటేజీ అడుగుతాడు. ఒక షాపు కెళ్ళి బ్లూ కారు గురించి ఆరా తీస్తాడు. టోల్ బూత్ నుంచి అందిన సీసీ టీవీ ఫుటేజీ చెక్ చేస్తాడు 6.29కి టోల్ గేట్లో ఒక్ కార్గో ట్రక్ కన్పిస్తుంది. బ్లూ కారు కన్పించదు. ఇతర టోల్ బూత్స్ ఫుటేజీలు తెప్పించుకుని చూసినా బ్లూ కారు కన్పించదు. అది ఎగ్జిట్ అవకుండా, రోడ్డు మీద కంటిన్యూ అవకుండా ఏమైనట్టని ఆలోచనలో పడతాడు. 

       వివరణ: ఎస్సై ఇబ్రహీం ప్రీతి కారుని బయటి నుంచే చెక్ చేసి వదిలెయ్యడం పోలీసుతనం కాదు. లోపల ప్రీతి బ్యాగుంది. ఆ బ్యాగుని పోలీస్ డాగ్ కి చూపిస్తే ప్రీతి పక్కనే ఆగిన బ్లూ కారెక్కిందని తేలిపోయేది. ఆ బ్లూ కారులో ప్రీతి తొంగి మాట్లాడడం క్రితం సాయంత్రం చూశాడు కూడా. ఇప్పుడైనా ఆ బ్లూ కారాగిన చోట చెక్ చేయడు. చెక్ చేస్తే దూదీ సూదీ దొరికేవి. ఇవి తర్వాత ఈ కేసు టేకప్ చేసిన శ్రీనివాస్ కి దొరికాయి. ఇబ్రహీం ఆ దూదికి అత్తరు వాసన చూసి వుంటే, వెంటనే తనకి తెలిసిన మెకానిక్ ఫాహద్ ని పట్టుకునే వాడు. వాడు అత్తరు వాడతాడు. కథకుడు వీణ్ణి కిడ్నాపర్ గా ఎండ్ లో రివీల్ చేసినప్పుడు ఇదే వివరిస్తాడు. దూది చూపించి ఇబ్రహీం నాల్గు పీకితే, ప్రీతిని కిడ్నాప్ చేశానని వాడు అప్పుడే చెప్పేసే వాడు. ఖేల్ ఖతం, దుకాన్ బంద్. ఇంకా పొడిగించి సినిమా తీయడానికేముంది? ఇలా కథ అల్లితే ప్లాట్ పాయింట్ వన్ దగ్గరే పూర్తయ్యే షార్ట్ మూవీ తయారవుతుందని గుర్తించాలి. 

       కేవలం కథకుడి వల్ల ఇబ్రహీం తెలివి హీనంగా ప్రవర్తించాడు. కథకుడు పాత్రల మధ్య దూరి కథ నడపడం నేర్పితే ఇంతే. కథకుడు పాత్రల్ని మాత్రమే కనగలడు, వాటి తలరాతని కాదు. కథకుడికి కథ గురించి తెలిసేది గోరంత, పాత్రలకి తేలిసేది కొండంత. పాత్రల్ని ఫాలో అవుతూంటే కథకుడికి ఓహో ఇంత కథుందాని అప్పుడు తెలుస్తుంది. కథల విషయంలో కథకుడు పాత్రల నుంచి నిత్యం నేర్చుకునే విద్యార్థి. మాస్టర్ స్టోరీ టెల్లర్ అని ఎవడూ లేడు. అనవసర పోజులు. వున్నదల్లా రైటర్ కి తమ కథ చెబుతూ రాయించుకున్న మాస్టర్ క్యారక్టర్సే. ఎప్పుడైతే రైటర్ క్యారక్టర్స్ కథ తను కనిపెట్టి రాయాలని ఉబలాట పడతాడో, అప్పుడా క్యారక్టర్స్ పాసివ్ గా మారి, లేదా తెలివి తక్కువగా తయారై ఆ ఉబలాటాన్ని తీర్చేస్తాయి. 

     టోల్ బూత్ ఫుటేజీలో 6.29 కి కార్గో ట్రక్ ని చూపించడం మంచి ఎత్తుగడ. ప్రేక్షకులు పట్టుకోలేని ఎత్తుగడ. ఎండ్ విభాగంలో కథకుడు రివీల్ చేసినప్పుడు, ఈ కార్గో ట్రక్ లోనే బ్లూ కారుంటుంది. ట్రక్ నడిపే వాడు మెకానిక్ ఫాహదే. ప్రీతిని బ్లూ కారులో కిడ్నాప్ చేశాక, ఆమె సహా కారుని ట్రక్ ఎక్కించి తరలించాడన్న మాట.     అందుకే ఇంకే బూత్ దగ్గరా ఆ కారు కన్పించ లేదు. ఇదీ ఆ కారు మిస్టరీ. 

       విషయం 2. పోలీస్ స్టేషన్ కొచ్చిన ‘హిట్’ చీఫ్ విశ్వనాథ్, ఇబ్రహీంని సస్పెండ్ చేస్తాడు. ప్రీతి పేరెంట్స్ మోహన్, లక్ష్మిల ముందే అతణ్ణి తిట్టి, అతడిమీద అనుమానంతో సస్పెండ్ చేసి, కేసులో నిందితుడిగా నిర్ణయిస్తాడు. 

       వివరణ : ఎస్సై ఇబ్రహీంని సస్పెండ్ చేయాల్సి వుంటే సైబరాబాద్ పోలీస్ కమీషనర్ చూసుకుంటాడు. ‘హిట్’ చీఫ్ కేం పని? అతనెందుకు పోలీస్ స్టేషన్ కొచ్చాడు? పోలీస్ ప్రొసీజురల్ అంటే ఇది కాదేమో? ప్రీతి కేసు ‘హిట్’ కివ్వాలావద్దా సైబరాబాద్ కమీషనరే నిర్ణయిస్తాడు. అయినా హత్య కేసుల గురించి ప్రత్యేకంగా ఏర్పాటయిన ‘హిట్’ కి, జూరిస్డిక్షన్ తప్పి మిస్సింగ్ కేసుల ఉత్సాహమేమిటి? ఓవరాక్షనేమిటి? 

       ఇబ్రహీంని చీఫ్ సస్పెండ్ చేసిన విధానం కూడా సరిగ్గా లేదు. అసలు ప్రీతి మిస్సింగ్ గురించి కంప్లెయింట్ ఇవ్వడానికి ఆమె తండ్రి వచ్చినప్పుడు కూడా, అతడి చేత కావాలని కొట్లాట పెట్టినట్టుంది ఇబ్రహీం ని సస్పెండ్ చేసే ఈ సీనుకోసం. ఇబ్రహీం ఏమీ చెప్పుకోనీయకుండా, ప్రీతి పేరెంట్స్ ముందు చీఫ్ ఇలా అంటాడు, ‘నిన్న వాళ్లతో ఏదో వాగావట? తప్పు చేసి రుబాబ్ చూపిస్తావారా? ఇంకా ఒక్క మాట మాట్లాడకు. అయినా పని చేయడమంటే నీకు బద్ధకమారా? నిన్ను సస్పెండ్ చేస్తున్నాను. లాస్ట్ గా ఆ అమ్మాయితో మాట్లాడింది నువ్వేనటగా? ఇన్వెస్టిగేషన్ కి పిలిస్తే నాటకాలడకుండా రావాలి. కోపరేట్ చేయలేదనుకో, ఇమ్మీడియేట్ గా పాతేస్తా!’

       సిల్లీ! ఐపీఎస్ అయిన చీఫ్ పరువే పోయింది. ఇది ఈ జానర్ కి సెట్టయ్యే  లాంగ్వేజీ కాదు. వేరే మసాలా సినిమా డైలాగులు. అసలు బ్లూ కారులో ప్రీతి తొంగి మాట్లాడినట్టు చూశానని ఇబ్రహీం ప్రీతి తండ్రికి అప్పుడే చెప్పాడు. చివరగా మాట్లాడింది తనే ఎలా అవుతాడు. అసలు ఒక హిట్ చీఫ్ కి ఎస్సైని సస్పెండ్ చేసే అధికారమెక్కడిది? సస్పెండ్ చేశాక, తన ఫ్రెండ్ అయిన ప్రీతి ఫాదర్ తో అంటాడు, ఈ కేసు సమర్ధుడైన స్టాఫ్ కిస్తానని. మిస్సింగ్ కేసు పోలీస్ స్టేషన్ నుంచి ఎలా హైజాక్ చేసుకు పోతాడు? పోతే పోయాడు, తన ఫ్రెండ్ కోసం ఇంత ఫీలైన ఈ కేసు - ఈ కథలో హీరో అయిన విక్రం కివ్వకుండా - వేరే ఎవరో శ్రీనివాస్ కివ్వడమేమిటి? కథలో ఆడియెన్స్ ఆశించే డైనమిక్స్ కి విలువ ఇవ్వాలిగా? బిగినింగ్ విభాగంలో విక్రం ఆరునెలలు లీవ్ పెట్టినప్పుడు, ఎప్పుడు పిలిస్తే అప్పుడు వస్తానని రాశావ్ కాబట్టి వెళ్ళమంటాడు చీఫ్. దీని ప్రకారమైనా ఇప్పుడు పిలవాలిగా? సెటప్ చూపించి పేఆఫ్ మర్చిపోతే ఎలా? 

      అసలు బిగినింగ్ విభాగంలో ఈ లీవ్ అంశం చూస్తూంటే, అనవసరంగా కథకుడు జరగబోయేది చెప్పేస్తున్నట్టుంది. ఎప్పుడు పిలిస్తే అప్పుడొస్తానని అంటే సస్పెన్స్ ఏముంటుంది? ఇది చెప్పకుండా లీవ్ పెట్టేసి కథలోంచి వెళ్ళిపోతే, మళ్ళీ కథలోకి ఎలా వస్తాడన్న సస్పెన్సు వుంటుంది.  

      
విషయం 3. మనశ్శాంతి కోసం లీవ్ పెట్టి ఎక్కడో గడుపుతున్నవిక్రంకి, రెండు నెలల  తర్వాత నేహా కన్పించడం లేదని ఫోరెన్సిక్స్ షిండే కాల్ చేస్తాడు. విక్రం షాకవుతాడు. నేహాతో గడిపిన ప్రేమ దృశ్యాలు మెదుల్తాయి. 

       వివరణ : ఏదో ఫ్లాష్ బ్యాక్ వల్ల మతిచెడి, గర్ల్ ఫ్రెండ్ నేహా అల్టిమేటంతో లీవ్ పెట్టి, నార్మల్ అయ్యేందుకు ఎక్కడో గడుపుతున్న విక్రం, ఈ రెండు నెలల్లో ఏ మేరకు బాగు పడ్డాడో ప్రోగ్రెస్ చూపించేలేదు. అలాంటప్పుడు ఈ పీరియెడ్ చూపించడ మెందుకు? సెటప్స్ తప్ప ప్రేక్షకులాశించే పేఆఫ్స్ లేకపోతే ఎలా? నడుస్తున్న కథలో ఏమీ జరక్కపోతే కథెలా? 

       సరే, షిండే కాల్ చేసి నేహా కన్పించడం లేదనే సరికి, విక్రం డిస్టర్బ్ అయిపోయి - వెంటనే నేహాతో గడిపిన ప్రేమ దృశ్యాలు వేసుకోవడ మేమిటి? ఇది సరైన మెంటల్ రిఫ్లెక్షనేనా? (మానసిక ప్రతిఫలనం). మనమీద అలిగి వెళ్ళిపోయిన ఒక మనిషి ప్రమాదంలో పడ్డాడని తెలిస్తే, వెంటనే ఆ మనిషి అలిగి వెళ్ళిపోయిన సన్నివేశమే మెదుల్తుంది. చివరిసారి ఎప్పుడు చూశామో అదే మెదుల్తుంది. దీని తర్వాతే మిగతా పాత జ్ఞాపకాల్లోకి వెళ్తాం. 

       నేహా కన్పించడం లేదని కాల్ వచ్చేసరికి, నేహాని చివరిసారి చూసిందే గుర్తుకు రావాలి. ఆమె అప్పుడు అల్టిమేటం ఇస్తూ మాటాడిందే మెదలాలి. ఈ షాక్ సబ్సైడ్ అయ్యాక, నెమ్మది నెమ్మదిగా ఆమెతో పాత ప్రేమ జ్ఞాపకాల్లోకి వెళ్ళాలి. ఇది డ్రామా. ఇదికాక పోతే ప్రేక్షకులు ఫీలవని తాటాకు చప్పుళ్ళు. అసలు నేహా అల్టిమేటం అన్నది బిగింబింగ్ లో చేసిన సెటప్. దీనికి పేఆఫ్ ఇప్పుడామె కన్పించకపోవడం. దీనికి రిఫ్లెక్షన్ ఈ సెటప్ కీ, పేఆఫ్ కీ మధ్యనే వుండాలి. ఎప్పటివో పాత ప్రేమ దృశ్యాలు కాదు. సెటప్స్ అండ్ పేఆఫ్స్ లో కనెక్షన్స్, డైనమిక్స్ వుంటేనే ఉత్తేజకరంగా వుంటుంది కథనం. 

       విషయం 4. విక్రం వచ్చేసి చీఫ్ ని కలుస్తాడు. నేహా మిస్సింగ్ కేసు తనకిమ్మంటాడు. అభిలాష్ కిచ్చానంటాడు చీఫ్. అభిలాష్ వచ్చి, నేహా మిస్సింగ్ కేసులో విక్రం మీద అనుమానాలున్నాయనీ, ఈ కేసులో ఇన్వాల్వ్ కావద్దనీ బెదిరిస్తాడు. మీకు నచ్చినా నచ్చక పోయినా ఇన్వెస్టిగేట్ చేస్తానని చెప్పేసి వెళ్లి పోతాడు విక్రం. 

       వివరణ : తన గర్ల్ ఫ్రెండ్ మిస్సింగ్ కేసు తనకిమ్మని అడుక్కునేంత దైన్యం హీరో పాత్రకి మరొకటుండదు. ఏంతో స్కిల్స్ తో పరిచయం చేసిన హీరోపాత్రకి కాకుండా ప్రీతి కేసు శ్రీనివాస్ కిపోయింది, ఇప్పడు నేహా కేసూ అభిలాష్ కి పోయింది. ఇంతకీ హీరో పాత్ర ఎవరు? హూ ఈజ్ దిస్ గై ఇన్ దిస్ ఎంటైర్ ‘ప్రిస్టీజియస్’ స్టోరీ వరల్డ్ ? 

       ఇలాకాక, ప్రీతి కేసు విక్రమే ఇన్వెస్టిగేట్ చేస్తూంటే, ఇప్పుడు నేహా కూడా మిస్సైతే, విక్రం పాత్రకి ఎంత బిగ్ బ్యాంగ్ వుండేది? రెండు మిస్సింగ్ కేసులు ఒకే పాయింటుగా వుండి, విక్రంకి బ్యాంగ్ ఇవ్వాల్సిందిపోయి - పాయింటుని చీల్చి పంపకాలు చేస్తే, రేషన్ కోసం ఇలాగే  అడుక్కోవాలి వలసకూలీ విక్రం. కథలో డ్రామా వుండాలంటే డైనమిక్స్ వుండాలి. డైనమిక్స్ మరచిన కథనం మృతపాయమైనది. 

       నేహా కేసులో ఇన్వాల్వ్ ఆయితే బావుండదని చీఫ్ ముందే అభిలాష్ విక్రం ని బెదిరించడం. చీఫ్ కి నచ్చినా నచ్చక పోయినా ఇన్వెస్టిగేట్ చేస్తానని విక్రం కూడా చెప్పేసి వెళ్ళిపోవడం. చీఫ్ అంటే ఎవరికీ లెక్కే లేదు. కనీసం వచ్చినప్పుడు సెల్యూట్ చెయ్యరు అడిషనల్ డిజిపి అయిన చీఫ్ కి. ‘హిట్’ సంస్థ కథా మర్యాద లేని సత్రంలా తయారయ్యింది. దీని సీక్వెల్ తీస్తే ఇంకెలా వుంటుందో!

      నేహా కేసులో విక్రం మీద అనుమానాలున్నాయని కూడా అంటాడు అభిలాష్. ‘నా గర్ల్ ఫ్రెండ్ కేసులో నన్నే అనుమనిస్తావ్ బే?’ అని లాగి ఒక్కటి పీకాల్సింది పీకడు విక్రం. ‘చూపించురా, ఆధారాలు చూపించు’ అని కూడా అనడు. దీంతో విక్రంని మనం కూడా అనుమానించే పరిస్థితి. మరి అనుమానాలతో ఇబ్రహీంని సస్పెండ్ చేసొచ్చిన చీఫ్, ఇప్పుడు విక్రం ని సస్పెండ్ చెయ్యడు. ఉత్తుత్తి కారణాలతోనే ఈ అనుమానాలు. కథకుడు పైపైన రాసేసి పైపైన తీసేసే పధ్ధతి నవలంబిస్తున్నట్టు కన్పిస్తోంది.  

       నేహా మామూలు వ్యక్తి కాదు. ఫోరెన్సిక్స్ ల్యాబ్ సైంటిస్టు. ఆమె మిస్సింగ్ తీవ్రమైనదిగా పరిగణించాల్సిన కేసు. పాత్రల్లో, ఈ సీన్స్ లో టెన్షన్ పుట్టించాల్సిన కథనం. కథకుడు నిర్లక్ష్యం చేసిన ప్రధానాంశం ఏమిటంటే బలాబలాల సమీకరణ చేయకపోవడం. మంచికీ చెడుకీ మధ్య స్పష్టమైన గీత గీయకపోవడం. మేం హిట్ సభ్యులమంతా ఒకవైపు, మీ నేరగాళ్ళంతా ఒకవైపూ అనే విధాన నిర్ణయం చేయకపోవడం. హిట్ సభ్యుల మధ్యే అనుమానాలు, కొట్లాటలు పెడితే ఇది మంచికీ చెడుకీ పోరాటమని ఎలా హైలైట్ అవుతుంది. చీఫ్ కింద చీఫ్ ఇన్వెస్టిగేటర్ గా విక్రం, మిగిలిన వాళ్ళంతా విక్రం కింద టీంగా ఏర్పడి- కలిసి కదం తొక్కితే ఎలా వుంటుంది... ఇక ఈ టీం సభ్యుడే, అతడి భార్యే హంతకులని చివరికి చూపిస్తే, కథకుడ్నిఎలా అర్ధం జేసుకోవాలి. సీక్వెల్లో ఇవి సరిదిద్దుకుని కథా మర్యాదతో సినిమా రైటింగ్ చేస్తాడని ఆశిద్దాం.     
 
       విషయం 5. రెండు రోజుల క్రితమే నేహా తనతో మాట్లాడిందని రోహిత్ తో అంటాడు విక్రం. రాత్రి పూట రహస్యంగా నేహా ఫ్లాట్ చెక్ చేస్తాడు విక్రం. నేహా చున్నీని అందుకుంటే, ప్రేమ దృశ్యాలు గుర్తుకొస్తాయి. ఫ్లాట్ లో ఏదో ఘాటు వాసనేస్తున్నట్టు గమనిస్తాడు. ఫ్లాట్ లో ఎవరో బలవంతంగా ప్రవేశించినట్టు లేదనీ, కారు కూడా మామూలుగా పార్క్ చేసి వుందనీ అంటాడు. లివింగ్ రూంలో స్ట్రాంగ్ అత్తరు వాసనేస్తోందనీ, దీన్నిబట్టి ఎవరో వచ్చి వుండాలనీ అంటాడు. అత్తరు వాసన పోలీసుల వల్ల వచ్చి వుండొచ్చు కదాని రోహిత్ అంటాడు. టెలికాం డిపార్ట్ మెంటుకెళ్ళి నేహా కాల్ లిస్టు మొత్తం తీసుకురమ్మంటాడు విక్రం. 

       వివరణ : ఇక్కడ కొత్త విషయం బయటపడింది...సెలవు పెట్టి ఎక్కడో గడుపుతున్న విక్రంతో, నేహా కాంటాక్టులోనే వున్నట్టు ఇప్పుడు వెల్లడిస్తున్నాడు కథకుడు. అలాంటప్పుడు షిండే నుంచి ఆమె కన్పించడం లేదని కాల్ రాగానే, ఆమె చివరి ఫోన్ కాల్ మెదలాలి విక్రంకి. ఇలా ఈ వెనకటి సీన్లో మార్చుకోవాల్సి వుంటుంది. నేహా ఫోన్లు చేసి మాట్లాడుతూనే వుందంటే, ఆమె కోపం తగ్గిందని కూడా అర్ధం. ఆమె చెప్పినట్టు వినీ లీవ్ పెట్టి రెస్టు తీసుకుంటున్నాడు కాబట్టి. ఇదే సమయంలో ఆమె అతడి ‘హిట్’ డిపార్ట్ మెంట్ లో డెవలప్ మెంట్స్ చెప్పకుండా వుండదు. ‘హిట్’ చేపట్టిన ప్రీతి మిస్సింగ్ కేసులో తను వర్క్ చేస్తున్నట్టు. కథకుడు చిట్ట చివర్లో రివీల్ చేసే దాన్నిబట్టి ఆమె చేస్తున్న వర్క్ ఏమిటి? ప్రీతి కిడ్నాపైన చోట దొరికిన సిరంజి ముక్క మీద వేలిముద్రలు తీసే పని. ఇలా సిరంజి సూది మీద వేలిముద్రలు పాక్షికంగా నైనా సరే సేకరించడం సాధ్యపడదు. కానీ కథకుడు కథకోసం ఫోరెన్సిక్స్ ని విరిచి పెట్టుకున్నాడు కాబట్టి, ఆమె వరకూ ఇది అసాధారణ కేసు. ఇంత అసాధా రణ కేసు గురించి విక్రం కి చెప్పకుండా వుంటుందా? ఆమె ఇవేమీ చెప్పినట్టు లేదు. అసలు ఫోన్ కాల్స్ లో ఏం మాట్లాడేదో కూడా కథకుడు చెప్పలేదు. తనకే తెలిసి వుండదు. కథ చెప్పే టెక్నిక్ లో, మాయమవబోయే మనిషి కీలక సమాచారమేదో  అస్పష్టంగానైనా చెప్పడమనే రొటీన్ కంపల్సరీగా వుంటుంది. చచ్చే వాడు చెవిలో ఏదో చెప్పి చచ్చాడని చూపించినట్టు. ఈ ఇంపార్టెంట్ బీట్ ని స్పృశించకుండా నేహాని పేలవంగా మాయం చేశాడు కథకుడు.  

        ఇక విక్రం నేహా ఫ్లాట్లో చెక్ చేస్తున్నపుడు ఆమె చున్నీ అందుకుని మొహానికి అద్దుకోగానే మరోసారి ఆమెతో ప్రేమ దృశ్యాల సేవనం. బెడ్ మీదికి చూసినప్పుడు, బెడ్ మీద ఆమె మరొకడితో వున్నట్టు మొదట కన్పించి, తేరిపార చూస్తే తనే కన్పించడం టోటల్ మెస్. అంటే ఆమె క్యారక్టర్ మీద మనసులో అనుమాన బీజం వుందన్నమాట. చాలా బ్యాడ్ థింకింగ్. రెండు నెలల సెలవులో మానసికంగా బాగు పడింది లేదు. ఆమె తనతో ఫోన్లో మాట్లాడుతున్నప్పటికీ ఇలా ఆలోచిస్తున్నాడు. తనతో పడుకున్న నేహా ఇంకెవరితోనైనా పడుకోవచ్చన్నలేకి ఆలోచనలు. ఇలా చేసి విక్రం ఎలాటి చిక్కులో పడ్డాడంటే, ఇకామెకి తన తప్పుడు ఆలోచనలు చెప్పేసి లెంపలేసుకుంటే గానీ, ఆమెతో రిలేషన్ షిప్ లో వుండే అర్హత లేదు.

       ఫ్లాట్లో అత్తరు వాసన రావడం గురించి...కథకుడు మెకానిక్ ఫాహెద్ కి కనెక్ట్ చేస్తూ చివర్లో రివీల్ చేసే ఈ అత్తరు మిస్టరీని బట్టి, ఇది కథకి ప్రధాన క్లూ. ఈ క్లూకి ప్రీతి కిడ్నాపైన చోట దొరికిన అత్తరు వాసన దూది, ఫిజికల్ ఎవిడెన్స్ అయింది. దీనిమీద సరైన దృష్టే పెట్టడు అన్ని స్కిల్స్ వున్న విక్రం. 

       ఇక టెలికాం డిపార్ట్ మెంటుకెళ్ళి నేహా కాల్ లిస్టు మొత్తం తీసుకురమ్మని రోహిత్ కి చెప్పడం. ఇది రాంగ్ ఇన్ఫర్మేషన్. ఎలా పడితే అలా కాల్ లిస్టులు తీసుకుని దుర్వినియోగం చేస్తున్నారని కేంద్ర ప్రభుత్వం 2016 లో కట్టడి చేసింది. సంబంధిత పోలీసు శాఖ ఉన్నతాధికారి గోప్యంగా వుంచుకునే పాస్ వర్డ్ గల, ఆయన పర్సనల్  ఈ మెయిల్ ఎక్కౌంట్ నుంచి రిక్వెస్ట్ అందితేనే ఆయనకి కాల్ లిస్టు ఈ మెయిల్ ద్వారా పంపుతారు నెట్వర్క్ ప్రొవైడర్లు. ఇలా ఇక్కడ 
 విక్రం చీఫ్ కి చెప్పి తెప్పించాలి కాల్ లిస్టు. కానీ చీఫ్ ని ధిక్కరించి అనధికారికంగా చేపట్టాడు ఈ కేసుని. మరొకటేమిటంటే, నేహా కాల్ లిస్టు కావాలన్నవిక్రం, ఆ తర్వాత ఈ విషయమే మర్చిపోతాడు. ఇక నేహా కాల్ లిస్టు వూసే వుండదు ఇంత ఇంపార్టెంట్ కేసులో. ‘హిట్’ పని తీరేమిటో ఎవడికీ అర్ధంగాదు. అడ్డగోలు డ్యూటీలు, అడ్డగోలు దర్యాప్తులు. 

       ఈ సీను దగ్గర్నుంచి గమనించాల్సిందేమిటంటే, ఈ కథలో చివర్లో రివీలయ్యే హంతకుడు రోహిత్, విక్రం వెంటే వుండడం. కానీ రహస్యంగానైనా దర్యాప్తుని దారి మళ్ళించే ప్రయత్నాలు చేయకపోవడం. వీక్ క్యారక్టరైజేషన్. 

       విషయం 6. షిండేని కలిసి నేహా డీల్ చేస్తున్న కేసుల డిటెయిల్స్ కావాలంటాడు విక్రం. ఆ ఫైల్స్ లో ప్రీతి మిస్సింగ్ కేసు ఫైల్ వుంటుంది. అది చూసి నేహా మిస్సింగ్ కి ప్రీతితో సంబంధమున్నట్టు అనుమానిస్తాడు. ప్రీతి కేసు చూస్తున్న శ్రీనివాస్ ని కలిస్తే, ప్రీతి కేసులో ఏదో ఇంపార్టెంట్ లీడ్ దొరికినట్టు నేహా తనకి చెప్పిందని అంటాడు. ప్రీతి కారున్న చోట దూదీ, విరిగిన సిరంజీ దొరికినట్టు చెప్తాడు. ఆ దూది అత్తరు వాసనేస్తుంది విక్రంకి. సిరంజి మీద ప్రీతి బ్లడ్ గానీ, డీఎన్ఏ గానీ లేదంటాడు శ్రీనివాస్. 

       వివరణ : ‘హిట్’ నుంచి ప్రీతి కేసుని అధికారికంగా శ్రీనివాస్ చూస్తూంటే, విక్రంకి ఆ ఫైల్స్ ఎలా అందిస్తాడు షిండే? ఏమిటిది? కథేనా, లేక ఉరికొయ్యనా? అడుగడుగునా ఉరి తీస్తున్నాడు కథకుడు. ఆ ఫైల్స్ లో ప్రీతి మిస్సింగుకీ, నేహా మిస్సింగుకీ ఏదో లింకు కన్పిస్తుంది విక్రమాచార్యుడికి. అంతే, ప్రీతి కేసు చూస్తున్న శ్రీనివాస్ ని కలుస్తాడు. అప్పుడు ప్రీతి కేసులో ఏదో ఇంపార్టెంట్ లీడ్ దొరికినట్టు నేహా తనకి చెప్పినట్టు అంటాడు శ్రీనివాస్. ఏమిటా లీడ్ అన్న ప్రశ్న రాదు విక్రంకి. శ్రీనివాస్ అందించిన దూది నందుకుని దానికి అత్తరు వాసన చూస్తాడు. కానీ ఎలర్ట్ అవడు. ఈ దూది శ్రీనివాస్ దగ్గరెందుకుంది? సూదితో బాటు దూదీ నేహా పరిశోధనకి వెళ్ళిపోవాలిగా? కథకుడు విక్రం కి చూపించడానికి శ్రీనివాస్ దగ్గర అట్టి పెట్టినట్టుంది. 

       సూది మీద ప్రీతి బ్లడ్ గానీ, డీఎన్ఏ గానీ లేదంటాడు శ్రీనివాస్. ఎందుకు లేవు. వుండాలిగా? వుండకపోతే కిడ్నాపర్ ఈ ఇంజెక్షన్ ప్రీతికే ఇచ్చాడని ఎలా వాదిస్తారు కోర్టులో? ఏ ఇంజెక్షన్ ఇచ్చాడో సూది లోపల శోదించక పోతే, అది స్పృహ తప్పించే ఇంజెక్షన్ అని ఎలా రుజువు చేస్తారు కోర్టులో? బలవంతంగా ఇంజెక్షన్ ఇస్తున్నపుడు సూది విరిగి పడితే, మిగతా సిరంజిని ఎక్కడ విసిరేశాడు కిడ్నాపర్? అటు తుప్పల్లో వెతికారా? కిడ్నాపర్ వేలిముద్రల కోసం విసిరేసిన సిరంజీని వెతక్కుండా, దాన్ని విరిగిన సూది మీద వేలిముద్రలు తీసే అశాస్త్రీయ ప్రయత్నమేమిటి? 

       చివర్లో మనకి కథకుడు రివీల్ చేసే నేహా చెప్పిన ఇంపార్టెంట్ లీడ్ ఏమిటంటే, ఆ విరిగిన సూది మీద ఫాహెద్ వేలిముద్రలు మ్యాచ్ అవడం. ఈ రిపోర్టు బయటికి వస్తే, ఫాహెద్ చేత ప్రీతిని కిడ్నాప్ చేయించిన రోహిత్, అతడి భార్య స్వప్నాలు దొరికిపోతామని, అదే ఫాహెద్ చేత నేహాని కూడా కిడ్నాప్ చేయించారన్న మాట. అందుకే ఆమె గదిలో అత్తరు వాసన. 

       దూది, సూదీ, ఇంపార్టెంట్ లీడ్ అంటూ శ్రీనివాస్ చెప్పినప్పుడు వెంటనే విక్రం ఏం చేయాలి? నేహా ఇన్వెస్టిగేషన్ ప్రాసెస్ ని ఆమె కంప్యూటర్ లోంచి షిండేకి చెప్పి తీయించాలి! ఇప్పుడు కూడా ఖేల్ ఖతం, దుకాన్ బంద్. ఇక్కడ ఐపోయే కథని ఇంకా గంటన్నర పొడిగించడమా? అంటే కథకుడు ప్లే చేస్తున్న క్లూస్ టైమింగ్స్  అండ్ ప్లేస్ మెంట్స్ ఎలా వున్నాయంటే, సెల్ఫ్ గోల్ చేసేలా వున్నాయి గజిబిజి కథనంతో. 

       ఇదంతా శ్రీనివాస్ నుంచి వింటున్న రోహిత్ కూడా ఏం చేయాలి? నేహా కంప్యూటర్ ని హ్యాక్ చేసి, ఫాహెద్ దొరికిపోకుండా ఎవిడెన్స్ ని తునాతునకలు చేసి తుప్పల్లో పారెయ్యాలి! కంప్యూటర్నే ఎత్తుకెళ్ళి బ్లాస్ట్ చెయ్యాలి! హిట్ టీం ని ఇంత  లో- నాలెడ్జితో చూపిస్తే ఎలా?   

       విషయం 7. విక్రం చీఫ్ ని కలిసి ప్రీతి కేసు తన కిమ్మంటాడు. ప్రీతి ఫాదర్ తన ఫ్రెండేనని, ఈ కేసు విక్రం చూస్తానంటే అంతకంటే ఏం కావాలని శ్రీనివాస్ నుంచి తప్పించి, కేసుని విక్రం కిచ్చేస్తాడు చీఫ్. 

       వివరణ : మళ్ళీ రేషన్ కోసం వచ్చాడు వలస కూలీ విక్రం. మన చీఫ్ చాలా హేపీ. ఆ పిల్ల తండ్రి తన ఫ్రెండేగా. కేసు విక్రం చూస్తానంటే ఇంతకన్నా పరమానందం ఏముంటుంది చీఫ్ కాని చీఫ్ కి? కేసుని శ్రీనివాస్ నుంచి పీకి విక్రం కిచ్చి పారేశాడు, పాపం శ్రీనివాస్. ఇక ముందు నేహా కేసుని కూడా అభిలాష్ నుంచి పీకి విక్రం కిచ్చేసే  పవిత్ర కార్యముంది చీఫ్ కి. ఏదైనా పీకి మనకూ ఇస్తాడేమో చూడాలని ఆరాటంగా వుంది. డామ్ గుడ్ అడ్మినిస్ట్రేటర్.    

(మిడిల్ వన్ మిగతా భాగం సరదాగా రేపు!)

సికిందర్

30, ఏప్రిల్ 2020, గురువారం


డియర్ రీడర్స్,
రేపట్నుంచి ఆర్టికల్స్ ఉదయం 6 గంటలకి పోస్ట్ అవుతాయి.
***

25, ఏప్రిల్ 2020, శనివారం

    స్క్రీన్ ప్లే సంగతులు అతి శ్రమ పెట్టకూడదు. అత్యంత శ్రమ పెట్టిందీహిట్ -ది ఫస్ట్ కేస్’.... దీని క్రియేటివ్ యాస్పెక్ట్ లో ఐదు మేజర్ సమస్యలున్నాయి. 1. కథా మర్యాద తప్పడం, 2. జానర్ మర్యాదని అతిగా ప్రదర్శించడం, 3. ఎన్నెన్నో క్లూస్ తో ప్రేక్షకుల జ్ఞాపక శక్తికి అతిగా పరీక్ష పెట్టడం,4. పాసివ్ పాత్ర, 5.ఎండ్ సస్పెన్స్ కథ నడపడం. ఈ జానర్లో పోలీస్ ఇన్వెస్టిగేషన్ అంటేనే లాజిక్ తో కూడుకున్నది. ఫార్ములా సినిమాల్లో పోలీసు దర్యాప్తులో లాజిక్ ని వదిలేసి సినిమాటిక్ లిబర్టీ అంటూ వెళ్లి పోవచ్చేమో గానీ, ఇలాటి పోలీస్ ప్రోసీజురల్ జానర్ లో కుదరదు. ఇది పక్కా ప్రొఫెషనల్ గా వుండాల్సిందే. ఇటీవలే ఇలాటి క్రైం థ్రిల్లర్ జానర్ మర్యాదల గురించి వివరంగా పేర్కొంటూ ఆరు వ్యాసాలిచ్చాం గమనించే వుంటారు.ఈ వ్యాసాలిచ్చాక వచ్చిన ఈ మొదటి పోలీస్ థ్రిల్లర్ ‘హిట్’ గురించి ఇలా రాయాల్సివచ్చింది. అసలు రాయాల్సింది ‘ఏజెంట్ రాఘవ్ - క్రైం బ్రాంచ్’ అనే వొక పక్కా హిందీ టీవీ క్రైం ఎపిసోడ్ గురించి. సరే,ఎవ్విరీ డిటెయిల్  కౌంట్స్అని పోలీస్ ప్రోసీజురల్ అయిన ‘16 డితమిళ డబ్బింగ్ కి ట్యాగ్ లైన్ గా వుంటుంది. ఇన్వెస్టిగేషన్ లో ప్రతీదీ లాజికల్ గా వుండాల్సిందే. నిజ జీవితంలో పోలీస్ డిటెక్టివ్ అనే అతను, లేదా ఇన్వెస్టిగేషన్ ఆఫీసర్ (ఐఓ)  - సినిమాని సినిమాగా చూడాలన్న వితండ వాదంతో లాజిక్ లేని ఇన్వెస్టిగేషన్ చేస్తే కోర్టులో శృంగభంగమవుతుంది. సినిమాని సినిమాగా చూడాలి యువరానర్ అని వాదిస్తే, కథని కథలాగా చూసి కేసు రాసుకురామ్మంటాడు జడ్జి. నేర ఘటనని నేర ఘటన లాగా చూస్తేనే ఇన్వెస్టిగేషన్ నిర్దుష్టంగా చేసి కోర్టులో దోషుల్ని శిక్షింప జేయగలడు ఆఫీసర్. ఐనా కూడా ఎంత ఇన్వెస్టిగేషన్ సినిమా అయితే మాత్రం, ఇంత భూతద్దంలో చూడాలా అనుకుంటే చేసేదేం లేదు. బుద్ధిపూర్వకంగా మెదడుకి పరీక్ష పెట్టే ఉద్దేశంతో, పజిల్స్ తో సాగే ఈ ‘హిట్’ లో పజిల్స్ ని పరిశీలించాల్సిందే...ఈ వ్యాసం ఉద్దేశం సినిమాని తక్కువ చేయడం కాదు, ఇన్నేసి పొరపాట్లు మళ్ళీ ఇంకెవరైనా చేయకుండా వుండాలన్నసదుద్దేశమే. అయినా ఇదంతా కాదు, మేం తీసేది మేం తీస్తామంటే అదీ ఓకే, నో ప్రాబ్లం.

      ఈ స్క్రీన్ ప్లే సంగతుల్లో ఎండ్ సస్పెన్స్ గా వున్న ఈ కథలో, ప్లస్ లు మైనస్ ల గురించి ఇలా చెప్పుకుంటున్నామంటే, వీటిని సరిదిద్దుకుంటే ఈ ఎండ్ సస్పెన్స్ కథ ఓకే అయిపోతుందని కాదు. ముమ్మాటికీ కాదు. పోలీస్ థ్రిల్లర్ జానర్ మర్యాదల గురించి గత వ్యాసాల్లో చెప్పుకున్న విధంగా, ఎండ్ సస్పెన్స్ ఈ జానర్ కథ కాదు. ప్రైవేట్ డిటెక్టివ్ కథ వుతుంది, అదీ ప్రింట్ మీడియా కథవుతుంది. విజువల్ మీడియాగా పోలీస్ డిటెక్టివ్ కథకి సీన్ టు సీన్ సస్పెన్స్ వుండాల్సిందే. కనుక ‘హిట్’ అనే ఈ ఎండ్ సస్పెన్స్ కథైనా ఎన్ని లోపాలతో, ఎన్ని దీపాలతో వుందని మాత్రమే ఇక్కడ తెలుసుకోవడం. ఈ లోపాలు సరిదిద్దుకుని ఎండ్ సస్పెన్స్ సినిమాలు ఇంకా తీయమని కాదు. ఎండ్ సస్పెన్స్ సినిమాలన్నీ గత ఇరవై ఏళ్లుగా ఫ్లాపయ్యాయి. ఈ విషయం కొన్ని వందల రివ్యూలలో విన్నవించుకుంటున్నాఅలాగే తీస్తున్నారు. బేసిక్ నాలెడ్జి ప్రాబ్లం. 

       ఈ సినిమాని మెదడుకి ఎంతో పదునుబెట్టి చూసివుంటారు. అలాగే ఈ స్క్రీన్ ప్లే సంగతుల వ్యాసాలూ అంతే శ్రమకోర్చి చదవడానికి సిద్ధపడాలని చెప్పేందుకు చింతించక తప్పడం లేదు. 

      
వ్యాసంలో ఫస్టాఫ్ లో – మొదట బిగినింగ్ విభాగం వరకూ చూద్దాం. కథనంలో ఎక్కడేం జరుగుతూ ఎలా ముందుకు సాగిందో పరిశీలిద్దాం. ఇక్కడ ఇస్తున్న అంకెలు సీన్ నెంబర్లు కావు. ముందుగా బిగినింగ్ విభాగపు బిజినెస్. ఇది విక్రం పానిక్ ఎటాక్ తో ప్రారంభమవుతుంది. తర్వాత తన మానసిక సమస్యకి మెడికల్ సలహా కాదని ఇలాగే డ్యూటీ చేస్తానంటాడు.      

      
1. విక్రం ఒక హత్యా స్థలంలో కలుపు మొక్కల లాజిక్ తో శవం ఆచూకీ కనుగొంటాడు. ఇలా పోలీస్ ఇన్వెస్టిగేటర్ గా విక్రం స్కిల్స్ ఏమిటో మనకి పరిచయమవుతుంది. 

      
2. తర్వాత రివాల్వర్ తో కాల్చుకుని ఒకతను ఆత్మహత్య చేసుకున్న ఘటనా స్థలానికెళ్తే, అక్కడ డ్యూటీలో వున్నఇన్వెస్టిగేటర్ అభిలాష్ అడ్డుకుంటాడు. ఇద్దరి మధ్య గొడవలున్నట్టు అర్ధమవుతుంది. మృతుడు రివాల్వర్ తో కాల్చుకుంటూ సెల్ లో రికార్డు చేసుకుని, ఆత్మహత్య చేసుకున్నట్టు చెప్తాడు అభిలాష్. మరి సెల్ ఎలా ఆఫ్ చేశాడని అడుగుతాడు విక్రం. కాబట్టి ఇంకో వ్యక్తి  రికార్డు చేసి వుండాలనీ, ఇది బలవంతంగా చేయించిన ఆత్మహత్యనీ తేలుస్తాడు విక్రం. అసలు చేతులకి గ్లవ్స్ తొడుక్కోకుండా, సెల్ ని ఎందుకు ముట్టుకున్నావని నిలదీస్తాడు అభిలాష్ ని. ఇలా విక్రం స్కిల్స్ మనకి ఇంకోసారి తెలుస్తాయి.   

      
3. తర్వాత విక్రం ఫోరెన్సిక్ లాబ్ కి వెళ్తాడు. అక్కడ సైంటిఫిక్ ఆఫీసర్ నేహా అతడి గర్ల్ ఫ్రెండ్ గా పరిచయమవుతుంది. అతడి మెంటల్ కండిషన్ గురించి ఆమె తీవ్రంగానే మాట్లాడి, ఇక లీవ్ పెట్టి రెస్టు తీసుకోకపోతే, తనని చూడ్డం మానెయ్యమని చెప్పేస్తుంది. అక్కడే లాబ్ ఇంచార్జి షిండే పరిచయమవుతాడు. విక్రం కొలీగ్ రోహిత్ ఫ్లాట్లో, అతడి భార్య స్వప్న పరిచయమవుతుంది. 

      
4. ఆ తర్వాత టీవీ వాయిసోవర్ వస్తూంటుంది...నగరంలో కొత్తగా ఏర్పాటయిన ‘హిట్’ శాఖ వల్ల హత్యలు తగ్గినట్టు, ఇక మిస్సింగ్ కేసులు, కిడ్నాప్ కూడా చేపడతారనీ ప్రకటన...

      
5. ‘హిట్’ (హొమిసైడ్ ఇంటర్వెన్షన్ టీమ్) కార్యాలయంలో చీఫ్ విశ్వనాథ్ పరిచయమవుతాడు. ఇతడ్నివిక్రం కలిసి, ఆరు నెలల లీవ్ లెటర్ ఇస్తాడు. లెటర్ లో, ఎప్పుడు పిలిస్తే అప్పుడు వస్తానని రాశాడు కాబట్టి, వెంటనే లీవ్ మంజూరు చేస్తాడు విశ్వనాథ్.

      
6. ప్రీతి అనే స్టూడెంట్ ఫ్రెండ్స్ ని కలవడానికి కారులో బయల్దేరుతుంది. ఔటర్ రింగ్ రోడ్డు మీద కారు పాడయి ఒకపక్క నాపుకుని చూస్తూంటే, అటుగా వస్తున్న ఎస్సై ఇబ్రహీం కారాపి దిగి విషయం కనుక్కుంటాడు. తను రావిర్యాల గేటెడ్ కమ్యూనిటీలో వుంటాననీ, కారు పాడయిందనీ అంటుంది ప్రీతి. తన కార్లో డ్రాప్ చేస్తానని అతనంటే ఒప్పుకోదు. ఎవరికైనా కాల్ చేశావా అంటే, సెల్ ఫోన్ ఇంట్లో మర్చిపోయాననీ, దాని కోసం ఇంటికి తిరిగి వెళ్తూంటేనే కారు పాడయిందనీ  అంటుంది. అతను తన సెల్ లో మాట్లాడిస్తాడు. తండ్రితో మాట్లాడి తను ఎక్కడుందో చెప్తుంది. ఎస్సై ఇబ్రహీం వెళ్ళిపోతాడు. 

       ఒక పోలీస్ స్టేషన్ కెళ్ళి ఫైలు అందిస్తే ఇది కాదు, వేరే ఫైల్ అంటే వెనక్కి బయల్దేరతాడు ఇబ్రహీం. వెనక్కి వస్తూంటే అదే స్పాట్ లో ప్రీతి ఆగి వున్న ఒక బ్లూ కార్లోకి తొంగి మాట్లాడుతూ కన్పిస్తుంది. ఇబ్రహీం తన పోలీస్ స్టేషన్ కెళ్ళిపోయి వేరే ఫైలుతో తిరిగి వస్తూంటే, ఇప్పుడు అక్కడాగి వున్న ప్రీతి కారు ముందు ఇంకో కారు వుంటుంది. ఇప్పుడు అక్కడ ప్రీతి తండ్రి మోహన్ వుంటాడు. ఇక్కడ ప్రీతి లేదంటాడు. ఇంటికి చేరుకుందేమో కనుక్కోమంటాడు ఇబ్రహీం. కనుక్కుంటే రాలేదని చెప్తుంది ప్రీతి తల్లి లక్ష్మి. ఫ్రెండ్స్ దగ్గరికి వెళ్ళిపోయిందేమో, ఒకవేళ రాత్రికి రాకపోతే తనకి కంప్లెయింట్ చేయమంటాడు ఇబ్రహీం. 

      
7. ఉదయం పోలీస్ స్టేషన్ కి వెళ్లి ప్రీతి రాలేదని అంటాడు మోహన్. ‘నాకెందుకు కాల్ చేయలేదు?’ అంటాడు ఇబ్రహీం. మోహన్ సీరియస్ అయిపోతూ, ‘చెప్తే అర్ధం గాదా నీకూ?నిన్ననే సీరియస్ గా తీసుకుని వుంటే...నా కూతురితో చివరిగా మాటాడింది నువ్వే. అసలెందుకు తనని రోడ్డు మీద వదిలేసి వచ్చావ్?’ అని దురుసుగా మాట్లాడతాడు. ఇబ్రహీం కూడా సీరియస్ అయిపోయి ధూంధాం చేస్తాడు. కంప్లెయింట్ ఇచ్చి వెళ్ళమంటాడు. 

       ఈ పోలీస్ స్టేషన్ సీను 25నిమిషాల కొచ్చే ప్లాట్ పాయింట్ -1 సీను. దీంతో బిగినింగ్ విభాగం ముగిసింది. 

       బిగినింగ్ విభాగం వివరణ :
    ఈ బిగినింగ్ సీన్స్ లో జరగాల్సిన బిజినెస్ చూద్దాం. కథా నేపథ్య రంగం ఏర్పాటు, పాత్రల పరిచయం, సమస్యకి దారితేసే పరిస్థితుల కల్పన, సమస్య ఏర్పాటూ అనే నాల్గు టూల్స్ తో...1. కథా నేపథ్య రంగ ఏర్పాటులో హిట్ శాఖనీ, పోరెన్సిక్స్ శాఖనీ, ప్రీతి అదృశ్యాన్నీ పరిచయం చేసి, వీటి కేంద్రంగా కథ నడవబోతున్నట్టు సూచనలిచ్చారు, 2. పాత్రల పరిచయాల్లో ఈ కథలో దోషులుగా పట్టుబడ బోయే విక్రం కొలీగ్ రోహిత్, అతడి భార్య స్వప్నలని పాజిటివ్ గా పరిచయం చేస్తూ, తురుపు ముక్కల్లా చేతిలో వుంచుకున్నాడు కథకుడు. దూరదృష్టితో ఇది మంచి ఆలోచన. ఇక ‘హిట్’ ఇన్వెస్టిగేటర్ విక్రం, చీఫ్ విశ్వనాథ్, ఇంకో కొలీగ్ అభిలాష్ తో బాటు, ఫోరెన్సిక్స్ లో విక్రం గర్ల్ ఫ్రెండ్ గా నేహానీ పరిచయం చేశారు. ఫోరెన్సిక్స్ ఇంచార్జిగా షిండేని పరిచయం చేశారు. మరో పక్క ప్రీతి పేరెంట్స్ తో బాటు, ఎస్సై ఇబ్రహీంనీ పరిచయం చేశారు. ఈ పాత్రలన్నీ బిగినింగ్ విభాగం నుంచే కథని నడిపే పాత్రలు. 

       3. సమస్యకి దారితీసే పరిస్థితుల కల్పనని, ప్రీతి ఫ్రెండ్స్ ని కలవడానికి బయల్దేరడం దగ్గర్నుంచీ ఎత్తుకున్నారు, 4. సమస్య ఏర్పాటుని, ప్రీతి పేరెంట్స్ ప్రీతి మిస్సింగ్ కంప్లెయింట్ ఇవ్వడంతో చేశారు.

 
బిగినింగ్ విభాగం మరింత వివరణ :
      
1. కథకి నేపథ్య రంగాన్నిఏర్పాటు చేస్తూ, ‘హిట్’ అనే హొమిసైడ్ ఇంటర్వెన్షన్ టీమ్ ని, ఫోరెన్సిక్ లాబ్ నీ చూపిస్తూ వీటి చుట్టూ కథ వుండబోతుందని తెలియజెప్పారు. హొమిసైడ్ ఇంటర్వెన్షన్ టీమ్ హత్య కేసుల్ని విచారించే బృందమన్నారు. హొమిసైడ్ అంటే హత్య. ఈ బృందం వల్ల నగరంలో హత్యలు తగ్గాయని పరిచయ వాక్యాలు చెప్పారు. ఈ బృందం ఇలా సక్సెస్ అయిన దృష్ట్యా ఇకపైన మిస్సింగ్, కిడ్నాప్ వంటి కేసుల్ని కూడా చేపడుతుందనీ ప్రకటించారు. ఈ విధంగా  ప్రీతి మిస్సింగ్ కేసుని చేపట్టినట్టు చూపించారు. ఇలా ఇది మిస్సింగ్ కేసు పరంగా ‘హిట్’ చేపట్టిన ఫస్ట్ కేస్ అయినట్టు ప్రతిపాదించారు. టైటిల్ కి న్యాయం చేశామనుకున్నారు. 

       హత్యలు వంటి మేజర్ క్రైమ్స్ కోసం ఏర్పాటయిన ఈ ప్రత్యేక హైటెక్ శాఖ, ప్రొటోకాల్ తప్పి మిస్సింగులు, కిడ్నాపుల కేసులూ పట్టించుకుంటూ విలువైన ఎనర్జీ వేస్ట్ చేసుకుంటుందా? మిస్సయిన, కిడ్నాపయిన వ్యక్తులు హత్యకి గురయితే అప్పుడు రంగ ప్రవేశం చేయవచ్చేమో. మరిప్పుడేం చేయాలి? హొమిసైడ్ ఇంటర్వెన్షన్ టీమ్ స్థాపనోద్దేశాన్ని పరిరక్షించాలంటే, ప్లాట్ పాయింట్ వన్ కల్లా ప్రీతి మర్డరవాలి. ఆ మర్డర్ కేసుతోనే ‘హిట్’ రంగంలోకి దిగాలి. 

       కేవలం ప్రీతి మిస్సింగ్ అని చెప్పడం వల్ల ప్లాట్ పాయింట్ వన్ బలహీనంగా తయారైంది. ఎప్పుడైతే ఫస్ట్ యాక్ట్ ఇలా బలహీనంగా వుంటుందో, అప్పుడు సెకండాఫ్ లో థర్డ్ యాక్ట్ కూడా కుదరక బలహీనమవుతుందని జనరల్ రూలు స్క్రీన్ ప్లే రచనలో. మొత్తం కథకి డీఎన్ఏ అంతా ప్లాట్ పాయింట్ వన్ లోనే వుంటుంది. డీఎన్ఏ పుచ్చిపోయిందా, ఇక చచ్చిపోవడమే కథ. 

       ప్రీతి ఎలాగూ మిస్సయిన రాత్రే మర్డర్ అయిందని తర్వాత ఎండ్ విభాగం కథనంలో కథకుడు మిస్టరీ విప్పాడు కాబట్టి, ప్లాట్ పాయింట్ వన్ దగ్గరే ఆమె అలా మర్డరై వుండచ్చన్న అనుమానాలు సృష్టించాల్సి వుంటుంది. ఎస్సై ఇబ్రహీం మర్నాడు ఆ స్పాట్ కొచ్చి ప్రీతి కారు చెక్ చేస్తున్నప్పుడు, అతనొక విషయం పూర్తిగా మర్చిపోయాడు. ప్రీతి కారు ముందు బ్లూ కారు ఆగి వున్నట్టూ, అందులోకి తొంగి చూస్తూ ప్రీతి మాట్లాడుతున్నట్టూ క్రితం సాయంత్రం తను చూసి వున్నాడు గనుక, ఆ బ్లూ కారు వుండిన స్పాట్ ని వెంటనే చెక్ చేయాలి. చెక్ చేసి వుంటే అక్కడ దూదీ, విరిగిన సిరంజీ అప్పుడే దొరికేవి. ఎస్సై ఇబ్రహీం అనవసరంగా వీటిని మిస్ చేసుకున్నాడు. ఫలితంగా అర్ధం లేకుండా సస్పెండ్ అయ్యాడు. తర్వాత ఈ స్పాట్ లోనే కదా ఫోరెన్సిక్ కి ఆ దూదీ, విరిగిన సిరంజీ లభించినట్టు మిడిల్ కథనంలో వెల్లడించాడు కథకుడు? 

       ఇబ్రహీం మూసి వున్న ప్రీతి కారు అద్దాల్లోంచి లోపలికి తొంగి చూస్తాడు. అప్పుడు సీట్లో ఆమె హేండ్ బ్యాగు చూసి డోర్ తెరిపించే ప్రయత్నం చేస్తాడనుకుంటాం. అదేమీ చేయకుండా, కారుని సీజ్ చేయకుండా వెళ్ళిపోతాడు. కనీసం వీడియో కూడా తీయించడు. వీడియో లేకుండా ప్రీతి కారక్కడ వదిలేసిందని స్థల సాక్ష్యం ఏముంటుంది కోర్టులో? ఇక్కడే కాదు, ఈ సినిమాలో ఎక్కడా, ఏ నేరస్థలంలోనూ వీడియోగ్రఫీయే వుండదు. కనీసం ఫోటోగ్రఫీ కూడా వుండదు. 

       ఇబ్రహీం కారు డోర్ తీయించి బ్యాగు సీజ్ చేసి వుంటే, డాగ్ స్క్వాడ్ ని పిలిపించి, బ్యాగుని చూపించి వుంటే, ఆ డాగ్సే ఆమె వాసన పట్టుకుని ఎటు వెళ్లిందో పరుగెత్తేవి. ఆఫ్ కోర్స్, ఆమె ఎక్కడ వాహనం ఎక్కేస్తే అక్కడివరకూ వెళ్లి ఆగిపోతాయి. ఆమె పక్కనే ఆగిన బ్లూ కారెక్కి వెళ్లిందో లేదో, ఇప్పుడే అనుమాన నివృత్తి అయ్యేది. అసలు ఓఆర్ ఆర్ మీద రాత్రంతా అలా వదిలేసి వున్న ప్రీతి కారుని పెట్రోలింగ్ పోలీసులు కూడా చూసి వూరుకోలేరు. 

       ఇదంతా అలా వుంచి, ఇబ్రహీం ప్రీతి ఇంట్లో వదిలేసి పోయిన ఆమె సెల్ ఫోన్ చెక్ చేసి కూడా వుండాల్సింది. ఎవరైనా మొట్టమొదట ఆ పనే చేస్తారు. ఫ్రెండ్స్ ని కలవడానికి బయల్దేరిన ఆమె రాకపోవడంతో ఫ్రెండ్ ఆమె సెల్ కి కాల్స్ చేసే వుంటారు. రాత్రంతా ఆమె పేరెంట్స్ ఎక్కడ వెతికారో తెలీదు. ఇంకా చీకటి పడ కుండానే ఫ్రెండ్స్ నుంచి కాల్స్ వస్తూండాలి. అప్పుడే పేరెంట్స్ అప్రమత్తమై పోలీసులకి చెప్పేసి వుంటే రాత్రి నుంచే వేట మొదలయ్యేది. తీరుబడిగా ఉదయం పోలీస్ స్టేషన్ కి వెళ్లి ఎస్సై ఇబ్రహీం మీద అనవసరంగా అరిచాడు. 

       మరొకటేమిటంటే, ఎండ్ విభాగంలో కథకుడు రివీల్ చేసే అసలు విషయాన్ని బట్టి, ప్రీతి ఎక్కిన బ్లూ సెడాన్ కారు వాడు క్రిమినల్ లా కనిపించే మెకానిక్. వాడు కారాపితే వాడి దగ్గరికెందుకు వెళ్లి మాట్లాడింది? తండ్రే పికప్ చేసుకోవడానికి వస్తున్నాడన్నాక? తను వున్నది పెద్ద గోల్కొండ, రావిర్యాల టోల్ బూత్స్ కి మధ్యనే అని తండ్రికి చెప్పింది కదా? అంత దగ్గరలో వున్నప్పుడు తండ్రి కోసం వెయిట్ చేయకుండా, ఇంకేదో కారెక్కేసి వెళ్ళిపోతే - ఆ వచ్చిన తండ్రిని కంగారు పెట్టడం కాదా? అసలు ఎస్సై ఇబ్రహీం డ్రాప్ చేస్తాను రమ్మన్నప్పుడు, పోలీస్ కారెక్కనని అన్న తనే, ఎవడో బ్లూ కారు వాడి దగ్గరికి ఎందుకు వెళ్ళింది? అమ్మాయిలెవరైనా  అలా ఏకాంతంలో చిక్కుబడి పోతే కార్లాపే వాళ్ళుంటారు. వాళ్ళని ఇగ్నోర్ చేయకుండా, అసలు ఎవరి కంటా బడకుండా తన కార్లోనే కూర్చోకుండా, ఎందుకు రోడ్డు మీద నిలబడాలి? ఓ పక్క పోలీసులు అమ్మాయిలకి అన్నన్ని జాగ్రత్తలు చెప్తూ ప్రచారం చేస్తూంటే, ఒక స్టూడెంట్ అయివుండి ఆ జాగ్రత్తలు విననే లేదా? ఏ లోకంలో జీవిస్తోంది? ఇలా ఇన్ని లోపాలతో సమస్యకి దారితీసే పరిస్థితుల కల్పనా వుంది. దీన్ని బట్టే - ఇన్ని లోపాలమయంగా - ప్లాట్ పాయింట్ వన్ దగ్గర సమస్య ఏర్పాటయింది.

        పాత్ర ఆదర్శంగా వుండాలి. ఎవరైనా చూస్తే పాత్ర నుంచి నేర్చుకునేలా  వుండాలి. వాహనం ట్రబులిస్తే ఎవరి సహాయమూ తీసుకో కుండా తమకి కాల్ చేయాలని పోలీసులే అంటున్నారు. కాల్ చేయడానికి తన దగ్గర సెల్ లేదు. అలాంటప్పుడు కార్లోనే కూర్చోవాలి. ఏ పోలీస్ పెట్రోలింగ్ వాహనమో వస్తుంది. వాళ్లకి చెప్పాలి. ఎస్సై వచ్చినప్పుడు అతడి కారెక్కననడం తప్పు. మెకానిక్ ని పంపించమని చెప్పొచ్చు. లేదా ఇల్లు దగ్గరలోనే వుందని చెప్పి, అతడి సెల్ అడుక్కుని మాట్లాడి, అతడికి థాంక్స్ చెప్పి కార్లోనే కూర్చుంటే సరిపోతుంది. 

       తర్వాత ఆ వచ్చిన బ్లూ కారు కిడ్నాపర్ ఆమెని టార్గెట్ చేసి ప్లానింగ్ తోనే వచ్చాడు కాబట్టి, జాగ్రత్తలు తీసుకున్న ఆమెని ఎలా కిడ్నాప్ చేశాడన్నది సీను లో జరగాలి. ఇల్లు దగ్గరలోనే వుంది కాబట్టి ఆమె అక్కడ వెయిట్ చేయడంలో జస్టిఫికేషనుంది. దూరంగా ఎక్కడో వుంటే వెయిట్ చేసేది కాదేమో. ఎస్సై చెప్పినట్టు వినేదేమో. పాత్ర ఆదర్శవంతంగా వుండాలి. అన్నిజాగ్రత్తలూ తీసుకున్నా అపాయంలో పడిందంటే సానుభూతి వుంటుంది. జాగ్రత్తలే తెలీని పాత్ర పట్ల సానుభూతి ఏర్పడదు. పైగా కథని చెడగొట్టిందని వైరాగ్యం పుడుతుంది. ప్రీతి నీతి ప్లాట్ పాయింటు స్వాహాయై నమః.
***
      
2. పాత్రల పరిచయ క్రమంలో ఇన్వెస్టిగేటర్ విక్రంని మానసిక పీడితుడిగా చిత్రించడం ఈ జానర్ మర్యాదకి ఎలా భంగకరమో క్రితం వ్యాసంలోనే చూశాం. అంతే గాకుండా, ఈ మానసిక సమస్య అతణ్ణి పాసివ్ పాత్రగా కూడా మార్చింది. ఇక్కడ గతంలో తన చెల్లెలి దారుణ హత్యకి పిచ్చెత్తి పోవడం కాదు కావాల్సింది, ఆ హంతకుణ్ణి పట్టుకునే ఎమోషనల్ గోల్ తో వుండడం కావాలి. అప్పుడు పాసివ్ నెస్ పోతుంది.  ‘ఏజెంట్ రాఘవ్ -క్రైం బ్రాంచ్’ టీవీ ఎపిసోడ్స్ లో, రాఘవ్ కి అపారమైన స్కిల్స్ తండ్రి నుంచే వచ్చాయి. తండ్రి సైకియాట్రిస్ట్. తండ్రి క్లయంటే తండ్రిని హత్య చేశాడు. ఆ కేసు పోలీసులు సాల్వ్ చేయలేని కేసుగా మిగిలిపోయింది. క్రైం బ్రాంచ్ లో చేరాక రాఘవ్ కి, ఆ హంతకుణ్ణి పట్టుకోవడంగా ఇన్నర్ గోల్ వుంటుంది. అలా యాక్టివ్ పాత్రగా వుంటాడు. 

       పోలీస్ డిటెక్టివ్ కి విషాదకర బ్యాక్ స్టోరీ ఇస్తే రొటీన్ హీరో అయిపోతాడు. ఈ జానర్లో పోలీస్ డిటెక్టివ్ అయినా, స్పై జానర్లో స్పై అయినా, సొంత బాధలతో వుండరు. ఒక ప్రొఫెషనల్స్ గా ప్రపంచ బాధే తమ బాధగా వుంటారు. సోషల్ ఆర్డర్ ని స్థాపించేందుకు శ్రమిస్తారు. ఇలా చూసినప్పుడు విక్రంకి రన్నింగ్ స్టోరీలో మిస్సైన గర్ల్ ఫ్రెండ్ నేహాతో ఎమోషనల్ ఆర్క్ ఒక్కటి వుంటే సరిపోతుంది. మిడిల్ విభాగంలో ప్రీతి కేసు పరిశోధిస్తూ ఒక చోట అంటాడు- ప్రీతి ఎమోషనల్ గా టచ్ చేసిందని. ఆ మాట మిస్సయిన నేహా గురించి అనాల్సింది. 

       ఇక ప్రారంభంలో రెండు సీన్లు ఇన్వెస్టిగేటర్ గా విక్రం స్కిల్స్ తెలియజేయడానికి ఉద్దేశించాడు కథకుడు. స్కిల్స్ అనగానే ఇటీవల ఒక కథ డిస్కషన్స్ లో జరిగింది ప్రస్తావించక తప్పని అవసరం వస్తోంది (ఎప్పుడో తప్పనిసరైతే తప్ప వెల్లడించడం జరగదు. అదీ పరోక్షంగానే వుంటుంది)...ఒక స్టార్ హీరో కథ డిస్కషన్స్ లో హీరోని  స్కిల్స్ తో పరిచయం చేయడం అవసరమా అన్న ప్రశ్న వచ్చింది అంతా జరిగిపోయాక. చాలా సినిమాల్లో ఇది రొటీనే. ఈ టెంప్లెట్ అవసరమా అన్పించింది దర్శకుడికి. నిజమే, కథలో హీరో సమర్ధుడు కాబట్టి, ఆ సమర్ధత ఎలా వుంటుందో ఓపెనింగ్ లో రెండు శాంపిల్స్ రుచి చూపించి - ఓ విజయోత్సవ గ్రూప్ సాంగేయడం ఎన్ని సినిమాల్లో చూడ్డం లేదు విసుగ్గా? 

       హీరో సమర్ధత ముందుగానే శాంపిల్స్ రుచి చూపించేస్తే, తర్వాత తెలుసుకుని ఆడియెన్స్ థ్రిల్లవుతూ వుండడానికేముంటుంది? హీరో ముందే మెచ్యూర్డ్ అని చూపించేస్తే, ఇక మెచ్యూర్ అవడానికేముంటుంది? కథ ఓపెనింగ్ లోనే ముగిసినట్టు వుంటుంది. కథంటే ఇమ్మెచ్యురిటీ నుంచి మెచ్యురిటీకి ప్రయాణం కదా? అదే ‘హీరోస్ జర్నీ’ కదా స్క్రీన్ ప్లే పరిభాషలో? ఒక సామాన్య జీవితం గడుపుతున్న హీరో, అసాధారణ జీవితం ఎదురయ్యేసరికి, దాన్ని మధిస్తూ, ఆ అనుభవాల్నుంచీ నేర్చుకుంటూ, స్కిల్స్ డెవలప్ చేసుకుంటూ, సమస్యని సాధించి- విజేత అవడం సహజ వ్యక్తిత్వ పరిణామ క్రమం కదా?

        ‘శివ’ లో మాఫియాగా మారే నాగార్జునకి మొదట్నుంచీ మాఫియా స్కిల్స్ తెలుసా? విద్యార్థిగా సామాన్య జీవితం గడుపుతున్నఅతను, మాఫియాలతో తలపడి- అసాధారణ చీకటి ప్రపంచంలోకి ఎంటరయ్యాకే కదా -స్కిల్స్ నేర్చుకుంటూ మాఫియాగా మారి కథ ముగించాడు? ఈ ఫ్రేం వర్క్ లో ఆలోచించాక, స్కిల్స్ ప్రదర్శన అవసరం లేదనిపించింది. ‘హీరోస్ జర్నీ’ అనే సహజ ట్రీట్మెంటే స్టార్ హీరో కథకి ఓకే అయింది.

       ఇన్వెస్టిగేటర్ విక్రంని ప్రత్యేకంగా స్కిల్స్ తో పరిచయం చేయడమెందుకు? స్కిల్స్ అంటూ లేకపోతే ఆ ఉద్యోగంలో, తర్వాత ఈ సినిమాలో వుండేవాడు కాదుకదా? కథకుడు టెంప్లెట్ సీన్లు పెట్టుకున్నాడు. ఇవెలా వున్నాయో చూస్తే... మొదటి సీను కలుపు మొక్కలతో బాగానే వుంది. రెండో సీనులోనే కథకుడు విఫలమయ్యాడు. విక్రం స్కిల్స్ ని కిల్ చేశాడు. 

       ఇదెలాగో చూద్దాం. రెండో శాంపిల్ సీన్లో
ఒకతను రివాల్వర్ తో కాల్చుకుని ఆత్మహత్య చేసుకుని వుంటాడు. ఘటనా స్థలానికెళ్తే విక్రం చేయాల్సిన మొదటి పని సీనాఫ్ క్రైంని చూడడం చెయ్యడు. వేరే ఏవో సెర్చి చేస్తూ గదులు తిరుగుతూంటాడు. దర్శకుడు కూడా సీనాఫ్ క్రైం ని ఒక మాస్టర్ షాట్ తో డిటెయిల్స్ ఫ్రేములో రిజిస్టర్ చేసి మనకి చూపించడు. ఆ డిటెయిల్స్ కుర్చీలో తలవాల్చేసి వున్న హతుడు, తలకి బుల్లెట్ గాయం, కింద రక్తపు మడుగు, కింద రివాల్వర్, బుల్లెట్ షెల్ మొదలైనవి- ఏది ఏ పొజిషన్లో వుండి, ఏం జరిగిందో అర్ధమవడానికి ఒక సింగిల్ ఫ్రేములో రిజిస్టర్ చెయ్యడు.  

        హతుడు కుర్చీలో తల వాల్చేసి కూర్చున్న షాట్, కింద రక్తం మడుగు షాట్, కిందే రివాల్వర్, బుల్లెట్ కేస్ షాట్...ఇలా విడివిడి షాట్స్ వుంటాయి. వీటిని పేర్చుకుని చూస్తే రివాల్వర్, బుల్లెట్ కేస్ హతుడి ముందు పడి వుంటాయి. హతుడి కుడివైపు రక్తం మడుగు వుంటుంది. ఒక షాట్ లో హతుడు కుడి పైపు తల వాల్చి వుంటాడు, షర్టు మీద కుడి వైపు రక్తం వుంటుంది. ఇంకో షాట్లో ఎడం వైపు వాల్చి వుంటాడు... ఇలా ఘటనా స్థల కంపోజిషన్ గందరగోళంగా వుంటుంది. 

       ఇది ఆత్మహత్య అని చెప్పడానికి హతుడు సెల్ ఫోన్లో స్వయంగా వీడియో రికార్డింగ్ చేశాడని అభిలాష్ చెప్తూ సెల్ ఫోన్ విక్రం కి అందిస్తాడు. అభిలాష్ చేతులకి గ్లవ్స్ వుండవు. విక్రం ఫ్యాషన్ గా ఒక చేతికే గ్లవ్స్ తొడుక్కుంటాడు. సెల్ ఫోన్లో వీడియో చూస్తాడు. హతుడు సెల్ ఫోన్ని కొంతదూరం ముందు పెట్టుకుని, కుర్చీలో కూర్చుని, కుడి చేత్తో రివాల్వర్ తో తల కుడి పైపు కాల్చుకుని, రివాల్వర్ ముందుకు పడేసి, ఎడం వైపు తల వాల్చేస్తాడు (ఒక షాట్ లో తల కుడి వైపు వాల్చాడని, షర్టు మీద కుడి వైపు రక్తం వుందనీ పైన చెప్పుకున్నాం). 

        ఈ విడియో చూసి, వీడియోని హతుడెలా ఆఫ్ చేశాడని విక్రం అడుగుతాడు. కాబట్టి ఇది ఇంకెవరో వుండి చేయించిన ఆత్మహత్య అని తేల్చేస్తాడు. ఒకవేళ ఇది చేయించిన ఆత్మహత్యే అనుకుందాం, మరి బుల్లెట్ కేస్ ముందుకు వచ్చి ఎలా పడింది? రివాల్వర్ ఫైర్ చేసినప్పుడు, బుల్లెట్ కేస్ రివాల్వర్ని బట్టి రివాల్వర్ కి కుడి వైపో, ఎడం వైపో, వెనక్కో వెళ్లి పడుతుంది. ట్రిగ్గర్ నొక్కినప్పుడు ఫైరింగ్ పిన్ టచ్ అయి, బుల్లెట్ నుంచి బుల్లెట్ కేస్ విడిపోయి, అలా పడిపోతుంది. బుల్లెట్ మాత్రమే ముందుకు దూసుకెళ్తుంది. బుల్లెట్ కేస్ వెళ్లి ముందుకు పడదు. బుల్లెట్ కేస్ శవం ముందు పడిందంటే అతను కాల్చుకోవడం కాదు, ఇంకెవరో ముందు నుంచి కాల్చి వుండాలి. ఇలా రాంగ్ సీను మనకి చూపిస్తూ విక్రం చేత క్లోజ్ చేయించారు. ఇది సినిమా కాబట్టి సినిమాగానే చూడాలంటే ఓ నమస్కారం పెట్టాలి. ఎలా పడితే అలా వాడెయ్యడానికి సినిమా అనే మాధ్యమం మునిసిపాలిటీ డస్ట్ బిన్నేమో! 

       విక్రంకీ అభిలాష్ కీ పడదని ఈ సీను మొదట్లోనే చూపించారు. ఇప్పుడు చేతులకి గ్లవ్స్ లేకుండా హతుడి సెల్ ఫోన్ ముట్టుకున్నందుకు, విక్రం పంచ్ డైలాగు కొట్టి అభిలాష్ ని చిన్నబుచ్చుతాడు. అంటే విక్రం స్కిల్స్ ని మనకి శాంపిల్ చూపించడానికి, అట్టహాసంగా, ఏంతో గర్వకారణంగా చూపిస్తున్న హొమిసైడ్ ఇంటర్వెన్షన్ టీం విశ్వసనీయతనే దెబ్బ తీస్తున్నాడన్న మాట కథకుడు. అభిలాష్ సెల్ ఫోన్ని అలా హేండిల్ చేసి, వేలిముద్రల సాక్ష్యాల్నే నాశనం చేస్తూ - కేసుని మూసీలో కలిపేశాడు. 

       అసలిన్ని ‘స్కిల్స్’ చూపిస్తున్న విక్రం, ఈ ‘ఆత్మహత్య’ జరిగిన ఫ్లాట్ కి వచ్చినప్పుడు, బయట నిలబడి గ్లవ్స్ లేని చేత్తో, అన్ ప్రొఫెషనల్ గా డోర్ ఫ్రేం మీద వేళ్ళు టకటక లాడిస్తూ, అభిలాష్ ని చూస్తాడు. డోర్ ఫ్రేం మీద వేలి ముద్రల సాక్ష్యాల్ని కూడా కలుషితం చేస్తూ. ‘హిట్’ అనే టీంని అడుగడుగునా ఫ్లాప్ చేస్తున్నాడు కథకుడు.   

      
ఇక కథామర్యాదని కాపాడే - ఈ సినిమా టైటిల్ గా ప్రకాశిస్తున్న ‘హొమిసైడ్ ఇంటర్వెన్షన్ టీం’ సెటప్ ఎలావుందో చూద్దాం. దీని చీఫ్ గా ఎడిజిపి ర్యాంకు అధికారిగా విశ్వనాథ్ ని చూపించారు ఓకే. సీఐడీ శాఖ ఈ ర్యాంకు అధికారి చేతిలోనే వుంటుంది. అయితే ఈ అధికారి కింద ఎవరికీ డిసిప్లిన్ లేదు. చీఫ్ కెలాటి పట్టింపూ లేదు. ఎలాపడితే అలా కేసులు పంచేస్తాడు. ఒక్క కేసూ విక్రం కి ఒరిజినల్ గా  దక్కదు. ప్రారంభంలో అభిలాష్ చూస్తున్న ఆత్మహత్య కేసు దగ్గర్నుంచీ, తర్వాత శ్రీనివాస్ చూస్తున్న ప్రీతీ మిస్సింగ్ కేసుతో బాటు, అభిలాషే చూస్తున్ననేహా మిస్సింగ్ కేసు వరకూ, ఎదైనా వాళ్ళనుంచి చీఫ్ పీకి, లేదా విక్రం పీకించుకుని పొందే  కేసులుగానే వుంటాయి. ఇలా ఎంగిలిపడిన - సెకెండ్ హేండ్ కేసులతో అతనొక నమ్మబలికిన పాసివ్ క్యారక్టర్ లా వుంటాడు. హీరో పాత్ర పట్ల కథకుడికున్న అభిమానం అలాంటిది.

       ఇక టీం స్పిరిట్ విషయనికొస్తే, విక్రంకీ అభిలాష్ కీ పడదు. అసలుకి అభిలాష్ మొదట చూపిన ఆత్మహత్య కేసు చేపట్టి ఫీల్డులో వున్నాడు. అక్కడికి విక్రం వస్తాడు. వస్తూంటే చీఫ్ నుంచి మెసేజ్ వస్తుంది చేరుకున్నావా అని. నేను ఆభిలాష్ కి కాల్ చేస్తాను నువ్వెళ్ళు - అని మరో మెసేజ్ పెడతాడు చీఫ్. దీనికి కూడా జవాబుగా ఎమోజీ పెడతాడు విక్రం, ‘నేను నీ సీనియర్ని, ఎమోజీలు పెట్టకు’ అని ఇంకో మెసేజి పెడతాడు చెఫ్ మందలింపుగా. అయినా దీనికీ జవాబుగా ఎమోజీనే  పెడతాడు విక్రం. ఇలావుంది పై అధికారితో విక్రం కేర్లెస్ తనం.

       ఇప్పుడు ఇక్కడ అభిలాష్ కి అప్పగించిన ఆత్మహత్య కేసు తను పొందేందుకు విక్రం చీఫ్ కి చెప్పుకుని, తనని రానియ్యని అభిలాష్ కి చీఫ్ చేత ఫోన్ చేయించుకుని- వచ్చి ఈ కేసు హైజాక్ చేశాడన్న మాట. ఇదీ టీం స్పిరిట్. పాసివ్ క్యారక్టర్ స్పిరిట్. చీఫ్ కూడా తోటి స్టాఫ్ ఆత్మస్థయిర్యాన్నిదెబ్బతీసే ఇలాటి అన్ ప్రొఫెషనల్ నిర్ణయాలు తీసుకోకూడదని అనుకోడు. 

       విక్రంకీ అభిలాష్ కీ మధ్య గొడవలేంటి? ఒక టీం అన్నాక ఒకే జట్టుగా వుంటూ క్రిమినల్స్ ఆటకట్టించి మంచి పేరు తెచ్చుకునే ఒకే లక్ష్యంతో వుండక? ఇంకోటేమిటంటే ప్రీతిని చంపిన హంతకులు విక్రం కొలీగ్ రోహిత్, అతడి భార్య స్వప్నాలే అని తేల్చడం! ఇంతకంటే కథా మర్యాద చెడగొట్టడం వుంటుందా? చాలా బ్యాడ్ టేస్టు కథకుడికి! నగరానికి గర్వకారణంగా ప్రారంభించిన ‘హిట్’ డిపార్ట్ మెంట్ లోనే ఇంటి దొంగలా? ఇంకెందుకూ మూసేసి వెళ్ళిపోక!

       మిడిల్ విభాగం రేపు.

సికిందర్