502 : రివ్యూ!

రచన - ద‌ర్శ‌కత్వం: సందీప్ రెడ్డి
తారాగ‌ణం: విజ‌య్ దేవ‌ర కొండ‌, శాలినీ పాండే, కాంచన, రాహుల్ రామ‌కృష్ణ‌, జియాశ‌ర్మ‌, క‌మ‌ల్ కామ‌రాజు, సంజ‌య్ స్వరూప్‌, త‌దిత‌రులు
సంగీతం: ర‌ధ‌న్‌, ఛాయాగ్రహణం : రాజు తోట‌
బ్యానర్ : భ‌ద్ర‌కాళి పిక్చర్స్
నిర్మాత: ప్ర‌ణయ్ రెడ్డి వంగా
విడుదల : ఆగస్టు 25, 2017
***

        ఇప్పుడొస్తున్న తెలంగాణా దర్శకులు తెలుగు సినిమాలకి  విసుగెత్తిన మూస ఫార్ములాల అలసత్వాన్ని వదిలించి, టాలీవుడ్ కలలో కూడా తలపెట్టని  వాస్తవిక కథా చిత్రాల్ని కాస్త మేధస్సుని కూడా జోడించి ప్రధానస్రవంతికి  అపూర్వంగా పరిచయం చేస్తున్నారు. ఇందుకు అలాటి నిర్మాతలు కూడా ముందుకొస్తున్నారు. రాష్ట్రం విడిపోవడం ఎవరికి లాభం, ఎవరికి నష్టమో గానీ భాషల అడ్డుగోడల్ని ఛేదించి తెలుగు సినిమాలు మరుగున పడిన ఇంకో పార్శ్వాన్ని ప్రదర్శించుకుంటున్నాయి. తెలుగు సినిమాలు  మూలన పడేసిన తెలుగుదనం తిరిగి పలకరించడంతో ఉభయరాష్ట్రాల్లోనూ భాషల కతీతంగా ద్వారాలు తెర్చుకుంటున్నాయి. ‘పెళ్లిచూపులు’, ‘అప్పట్లో ఒకడుండే వాడు’, ‘పిట్టగోడ,’ ఇప్పుడు ‘అర్జున్ రెడ్డి’, రేపు ‘నీదీ నాదీ ఒకే కథ’ ఈ కోవకి చెందుతాయి. 

          తీస్తే ప్రేమని వెల్లడించలేకపోవడం, లేకపోతే అపార్ధాలతో విడిపోవడం – అనే ఈ రెండు  పాత చింతకాయ సిల్లీ నాన్సెన్స్  కథల చుట్టే ముష్టి ఫార్ములా ప్రేమ సినిమాల్ని తిప్పితిప్పి తీస్తున్న మిడిమేలపు జనాభా  ఇక మేల్కొనే టైం అయింది. మేల్కోకపోతే ఇంటికెళ్ళి పోయే టైం వస్తుంది. భవిష్యత్ టాలీవుడ్  తెలంగాణా ప్రైవేట్ లిమిటెడ్ అవుతుంది. 

          ‘అర్జున్ రెడ్డి’ ప్రేమ మామూలే.  పరిణామాలు మామూలైనవి కావు.  మూస దర్శకులు ధైర్యం చేయలేని చీకటి కోణాల్లోకి ప్రయాణించి ప్రేమంటే ఇదీ అని చెప్తుంది. ప్రేమలోకి వెళ్లేముందు పరిణామాల్నిదృష్టిలో పెట్టుకోవాలని హెచ్చరిస్తుంది. ఈ పని ‘దేవదాసు’ ఎప్పుడో చేశాడు. శరత్  ‘దేవదాసు’ ఇప్పుడు పనిచెయ్యకపోవచ్చు, అప్పుడున్న షరతుల్లేని ఆధునిక – విశృంఖల ‘దేవదాసు’  ఇప్పుడు కావాలి.  

       ఆర్జున్ రెడ్డి (విజయ్)  సంపన్న కుటుంబానికి చెందిన మెడికో. మంగళూరు మెడికల్ కాలేజీలో హౌస్ సర్జన్ చేస్తూంటాడు. అతను యూనివర్సిటీ టాపర్. కానీ కోపమెక్కువ.  ఈ  కోపంతో ఎవర్ని ఎప్పుడు కొట్టేస్తాడో తెలీదు. ఫుట్ బాల్ టీం ని అలాగే కొట్టి సస్పెండ్ అవుతాడు. ఆ సమయంలో ప్రీతీ శెట్టి (శాలినీ పాండే)  అనే జ్యూనియర్ ని చూసి ప్రేమిస్తాడు. ఆమెని ర్యాగింగ్ సమస్య నుంచి కాపాడతాడు. ఆమె కూడా ప్రేమిస్తుంది. అర్జున్ మాస్టర్స్ చేయడానికి ముస్సోరీ వెళ్ళిపోతాడు. అక్కడికి వచ్చేస్తుంది. ఇంకింత బలంగా  ప్రేమిస్తాడు. ఇక పెళ్లి విషయం ఆమె తండ్రితో మాట్లాడాలని కర్ణాటక వస్తాడు. తుళు భాషలో చెడామడా తిడతాడు ఆమె తండ్రి. కులం, ప్రాంతీయత ఇవన్నీ ముందుకు తెచ్చి రెండు దెబ్బలు కొట్టి వెళ్ళ గొట్టేస్తాడు. కూతురికి వేరే పెళ్లి చేసేస్తాడు. హతాశుడైన అర్జున్ మందూ మాదక
ద్రవ్యాలూ మరిగి,   ఒక పిచ్చి డాక్టర్ గా తయారై, హైదరాబాద్ లో జాబ్ చేస్తూంటాడు. హాస్పిటల్లోనే తాగి ఆపరేషన్లు చేసేస్తూంటాడు. ఒక కుక్క పిల్లని కొనుక్కుని  ప్రీతి అని పేరు పెట్టుకుంటాడు. ప్రీతిని మర్చిపోలేకపోతాడు. ఇదీ కథ. ఇదెలా ముగుస్తుందనేది ద్వితీయార్ధం. 

ఎలా వుంది కథ 

   ప్రేమకథలో ప్రేమకథ చెప్పకుండా, పాత్ర కథ చెబితే ప్రేమ సినిమాల స్వరూపం ఎలా మారిపోతుందో తెలియజేసే వాస్తవిక కథ. దీన్ని ‘దేవదాసు’ లో పట్టుకున్నట్టుందీ కథ. కొన్ని పాత్రలు కూడా అలాగే వున్నాయి- అర్జున్ దేవదాసులాగా, ప్రీతి పార్వతి లాగా, మిత్రుడు భగవాన్ లాగా, సినిమా హీరోయిన్ చంద్రముఖి లాగా. రోడ్డున పడి  అరుగుమీద చేరాక అర్జున్  పక్కన కుక్క కూడా దేవదాసు కుక్క లాగా. ముగింపులో తప్ప సెకండాఫ్ లో హీరోయిన్ కన్పించక
పోయినా హీరో పాత్ర ప్రవర్తనతోనే, మార్పులు చెందే జీవితంతోనే ఏకోన్ముఖంగా కథ నడపడం కత్తిమీద సామే. దీన్ని అత్యున్నతంగా సాధించిందీ కథ. కథ కంటే క్యారక్టర్ స్టడీ మీద ఎక్కుపెట్టి మూస ప్రేమలు అలవాటైన ప్రేక్షకుల గుండెల్లో బాధని రగిలించే, రాణించే కాన్సెప్ట్. ఈ వాస్తవికతని కూడా బంగారు పళ్ళెంలో తియ్యగా పెట్టి ఇవ్వలేదు, ఇందులో ధారాళంగా అశ్లీల పదాలూ, అశ్లీల దృశ్యాలూ, ప్రేమలో కరకు వాస్తవాలూ  ‘ఏ’ సర్టిఫికేట్ కి న్యాయం చేస్తూ బోనస్ గా వున్నాయి – న్యూసినిమా ధోరణిలో. పోతే ముగింపే రాజీపడి వాస్తవిక ధోరణి తప్పుతూ మూస ఫార్ములాలోకి తిరగబెట్టడం మింగుడుపడదు. ఈ ముగింపుతో పాత్రలే అర్ధంలేనివిగా తేలాయి. ఈ వాస్తవిక కథకి కథా ప్రయోజనమే దెబ్బతింది. 

ఎవరెలా చేశారు

      విజయ్ ఆశ్చర్య పరుస్తాడు. కమర్షియల్ సినిమా నటనల ఛాయలు పడకుండా వాస్తవిక పాత్రని అత్యంత సహజంగా నిర్వహించాడు. బావున్న రోజుల్లో ఆ రోషం, చెడిపోయాక పిచ్చి చూపులు, కన్ఫ్యూజన్ బాగా ప్రాక్టీసు చేసి నటించాడు. ఫస్టాఫ్ వరకూ యాక్టివ్ పాత్రే, సెకండాఫ్ లో పాసివ్ గా మారిపోతాడు. వాస్తవిక కథా చిత్రాలకి యాక్టివ్ – పాసివ్ లు వర్తించవు. ఎక్కువగా కథే పాత్రని నడిపిస్తుంది. సినిమా సాంతం ఆయా కాలాల్ని బట్టి విభిన్న గెటప్స్ లో కనిపిస్తాడు. ఆ గెటప్స్ లో అప్పటి పాత్రలాగే అన్పిస్తాడు. అత్యంత పరాకాష్టకి చేరడం- హస్పిటల్లో ఉద్యోగంపోయి,  ఇంట్లోంచి తండ్రి వెళ్ళగొట్టి, ఫ్లాట్ లోంచి యజమాని కూడా వెళ్ళ గొట్టి, డబ్బులేక వస్తువులు అమ్ముకుంటూ రోడ్డున పడ్డాక- రెండు సీన్లలో. విజయ్ ఆంటోనీ కి ‘బిచ్చాగాడు’ ఎలాగో, విజయ్ కి ‘అర్జున్ రెడ్డి’ అలాగ. ‘దేవదాసు’ – ‘బిచ్చగాడు’  రెండూ కలిసి ‘అర్జున్ రెడ్డి’ అయ్యాడు- ఇది బాగా తరచి చూస్తే  తప్ప దొరికిపోని క్రియేటివిటీ. 

          హీరోయిన్ శాలినీ పాండే చాలా లో- ప్రొఫైల్ పాత్ర నటించింది. మాటలుకూడా తక్కువే. హా వభావాలే ఆమె భాష. వేరే పెళ్ళయి పార్వతి లాగా వెళ్ళిపోవడం వరకూ ఓకే గానీ, ఆ తర్వాతే ఆమె పాత్ర  రొటీన్ మూస ఫార్ములా పాత్రగా మారిపోయి, తీవ్ర అసంతృప్తికి లోనుజేస్తుంది చివర్లో. 

          ఇక విజయ్ ఫ్రెండ్ పాత్రలో రాహుల్ రామకృష్ణ  ఒక కొత్త ఆకర్షణ. ఇతను కూడా హాస్యాన్ని వంకర్లు తిరిగిపోతూ నాటకీయంగా, కమర్షియల్ గా నటించలేదు. పాత్రపరంగా పక్కా ఆధునిక భగవాన్ పాత్ర,  ‘దేవదాసు’ లో పేకేటి శివరాంని గుర్తుకు తెస్తూ. అర్జున్ అన్న పాత్రలో కమల్ కామరాజు, తండ్రి పాత్రలో సంజయ్ స్వరూప్ సహజనటులు. ఇక నానమ్మగా అలనాటి హీరోయిన్ కాంచన ఒక వండర్ఫుల్ చేరిక. 

          టెక్నికల్ గా కెమెరా వర్క్ సాంప్రదాయ షాట్స్ తో వుంది. ఎడిటింగ్ లో కూడా గిమ్మిక్కులు చేయలేదు. విజయ్ మీద బిల్డప్ షాట్స్, డీటీఎస్ మోతా లేవు. పాటలు ఏడువున్నాయి- ఏదీ దృశ్య, శబ్ద కాలుష్యాల్ని పరివ్యాప్తం చేయకుండా ఆరోగ్యకరంగా వున్నాయి. లొకేషన్స్ కథని డామినేట్ చేయకుండా కథకి తగ్గట్టుగా వున్నాయి. దర్శకుడు కొత్తవాడయినా కొత్త విజన్ లో ఈ ప్రేమకథని చూశాడు. మామూలుగా అయితే కాలేజీ సీన్లు, క్లాస్ రూమ్ సీన్లు ఇంకా చూపించడానికేమీ లేనట్టుగా వెటకారంగా,  విషయలేమితో వుంటాయి. కానీ ఇక్కడ ఆ ఫార్ములాకి దూరంగా, సహజంగా, విషయంతో కొత్తగా వుంటాయి. 

చివరికేమిటి 

      కొత్త దర్శకుడు సందీప్ రెడ్డి వినోదాత్మక వాస్తవికత ఎలా
వుంటుందో ‘పెళ్లిచూపులు’ నుంచి ఇంకో మెట్టు పైకి తీసికెళ్లి చూపిం
చాడు. చిత్రీకరణ మీద మంచి పట్టు సాధించాడు. రచనాపరంగా బయట మాట్లాడుకునే భాష వాడి దృశ్యాల్ని ప్రేక్షకులకి సన్నిహితంగా చేశాడు. అయితే దీన్ని మూడుగంటల సినిమాగా తీయక్కర్లేదు. అరగంటకి పైగా తగ్గించవచ్చు. ఫస్టాఫ్ ఇంటర్వెల్ కే గంటన్నర పట్టింది. ఇక్కడ పాయింటు కొచ్చి, సెకండాఫ్ లో హాస్పిటల్లో ఉద్యోగం పోయే దగ్గర పరిష్కార మార్గానికొచ్చి,  ఆ తర్వాత పరిష్కరించిన విధానంతోనే ముగింపు చెడిపోయింది. ఏదో కాలక్షేప బఠానీ అనుకుని ఈ మూవీ తీసి వుంటే అది వేరు. కానీ సీరియస్ వాస్తవిక పాత్రని చర్చిస్తూ దాన్ని మూసఫార్ములా  ముగింపుతో సరిపెట్టేస్తే ఎలా? దీంతో హీరో హీరోయిన్ల పాత్రల మౌలిక తత్త్వాలే  దెబ్బతినిపోయాయి. వాళ్ళు మెడికల్ రంగంలో వున్నారు. అంత అజ్ఞానంగా ఎలా వుంటారు తమ శారీరక కలయిక విషయంలో? ఫార్ములా ముగింపు కోసమే కదా హీరోయిన్ పాత్రతో ఈ అసంగతాలు. 

          దీంతో ఏం చెప్పాలనుకుంటున్నారు? భగ్నప్రేమలతో అలమటించిపోండి, పెళ్ళయిన ప్రేయసిని వదలకండి- అనా? భగ్న ప్రేమలు సరే, వేరే పెళ్ళిళ్ళు సరే- move on man, move on- ఇంకా జీవితం చాలా ఇస్తుందని  చెప్పడమా? చివరికి అర్జున్ వ్యసనాలు మానుకుని పరివర్తన చెంది, విదేశీ యాత్రకి వెళ్ళినప్పుడు చాలా ఫ్రెష్ గా అన్పిస్తాడు. హాయిగా- he is certainly moving on – అన్పించి ఏంతో  బావుంటాడు. అలా తిరిగి వచ్చి - నాకు సంబంధం చూడండి డాడ్ -  అంటాడేమో, తనలాంటి పరిస్థితుల్ని ఎదుర్కొనే యూత్ కి ఇన్స్పైరింగ్ గా కొత్త జీవితాన్ని ప్రారంభిస్తాడేమో అనుకుంటే, ఎందుకు భయపడ్డాడో దర్శకుడు- పెళ్ళయిన ప్రేయసి దగ్గరికే పంపి లాజిక్ లేని ఫార్ములా ముగింపుతో - వాస్తవిక కథా చిత్రాన్ని  అవాస్తవికంగా మార్చాడు. 

         
 -సికిందర్
cinemabazaar.in

501: రివ్యూ!

రచన - దర్శకత్వం: శివ

తారాగణం: అజిత్‌, కాజల్‌ అగర్వాల్‌, అక్షరా హాసన్‌, వివేక్‌ ఒబెరాయ్‌, శరత్‌ సక్సేనా, భరత్‌ రెడ్డి, కరుణాకరన్‌, ఆరవ్‌ చౌదరి, కరుణాకరన్ తదితరులు
రచన : శివ, కనిలన్ వైరముత్తు; మాటలు: రాజేష్‌, సంగీతం : సంగీతం: అనిరుధ్‌ రవిచంద్రన్‌,
ఛాయాగ్రహణం : వెట్రి, బ్యానర్ : సత్యజ్యోతి ఫిలింస్‌, సమర్పణ : టి.జి.త్యాగరాజన్‌
నిర్మాతలు: అర్జున్‌ త్యాగరాజన్‌, సెంథిల్‌ త్యాగరాజన్‌
విడుదల : ఆగస్టు 24, 2017
***
        తమిళ స్టార్ సినిమాలు లోకల్ మాస్ ఇమేజిని  పక్కనబెడుతూ నెమ్మదిగా గ్లోబల్ కంటెంట్ ని అందుకుంటున్నాయి. రంగూన్, 24, సింగం 3, భైరవ, విశ్వరూపం 2, ఇప్పుడు వివేకం...అజిత్ -  దర్శకుడు శివాల కాంబినేషన్ లో గతంలో వీరం, వేదాలం అనే రెండు పెద్ద హిట్స్ వచ్చాయి. తిరిగి ఇప్పుడు వివేకంతో వచ్చారు. వివేకంని పూర్తిస్థాయి విదేశీ స్పై థ్రిల్లర్ గా తీస్తూ తమిళ సినిమాని మరో మెట్టు పైకి ఎక్కించే ప్రయత్నం చేశారు ఏ హాలీవుడ్ ప్రమాణాలకీ తీసిపోకుండా. వంద కోట్ల బడ్జెట్ తో అత్యంత ప్రతిష్టాత్మకంగా నిర్మించామంటున్న ఈ స్పై థ్రిల్లర్ అజిత్ ని నిలబెట్టిందా, లేక సూర్యకి సింగం 3 మిగిల్చిన అనుభవం లాంటిది అందించిందా అన్నది ప్రశ్న. రెండేళ్ళ తర్వాత అజిత్ నటించిన వివేకంలో వివేకం పాలెంత,  అవివేకం పర్సెంటేజీ ఎంత అనేది ఓ సారి చూద్దాం...

కథ 

     తూర్పు యూరప్ లోని సెర్బియాలో టెర్రరిజం  వ్యతిరేక సీక్రెట్ ఏజెన్సీ పని చేస్తూంటుంది. అందులో ఏకే అనే అజయ్ కుమార్ (అజిత్) ఏజెంట్ గా వుంటాడు. కన్నుగప్పి తిరిగే విద్రోహులు ఎక్కడున్నా వెతికి పట్టుకుని చంపడంలో ఇతను స్పెషలిస్టు. ఇతడికో అందమైన భార్య హాసిని (కాజల్ అగర్వాల్)  వుంటుంది. ఈమెకి భర్త ఏ ప్రమాదకర డ్యూటీ మీద వెళ్ళినా క్షేమంగా తిరిగి వస్తాడనే నమ్మకం వుంటుంది. ఈ నమ్మకమే అతణ్ణి గెలిచేలా చేస్తూంటుంది. ఏజెన్సీలో నల్గురు ప్రాణమిత్రులు కూడా వుంటారు. వాళ్ళల్లో ముఖ్యుడు ఆర్యన్ (వివేక్ ఒబెరాయ్). నటాషా (అక్షరా హాసన్)  అనే ఒక గుర్తు తెలియని హ్యాకర్ వుంటుంది. ఆమెదగ్గర అణుబాంబుల్ని పేల్చగల సీక్రెట్ కోడ్స్ తో కూడిన డ్రైవ్స్ వుంటాయి. కొన్ని కార్పోరేట్ శక్తులు సీక్రెట్ సొసైటీగా ఏర్పడి, అణుశక్తితో ప్రపంచంలో భూకంపాల్ని సృష్టించి వ్యాపారం చేసుకుంటూ వుంటాయి. అలాటి ప్లుటోనియం బాంబుల్ని పేల్చే కొడ్సే నటాషా దగ్గరవుంటాయి. ఈమెని పట్టుకుని ఆ ప్రమాదాన్ని నివారించే బాధ్యత జేకేకి అప్పగిస్తారు. ఆమె వేటలో బయల్దేరిన జేకేకి ఆమె దొరికేసరికి వూహించని విధంగా కొన్ని సంఘటనలు జరిగి షాక్ అవుతాడు. అక్కడ్నించీ అతను  తీవ్ర ప్రమాదంలో పడతాడు. ఇలామిత్రులు శత్రువులై అతణ్ణి వాడుకున్న ద్రోహాన్ని ఎలా ఎదుర్కొన్నాడనేది మిగతా కథ.

ఎలావుంది కథ 

       ఫాస్ట్ అండ్ ఫ్యూరియస్ - 8 తిరగేసిన కథలా వుంది. ఇందులో ఐదుగురు మిత్రులైన సీక్రెట్ ఏజెంట్లు. ఏ డేటాబేస్ లోనూ వివరాల్లేని సిఫర్ అనే ఒక ఆడ సైబర్ టెర్రరిస్టు. ఈమె విన్ డిసిల్ భార్యనీ చిన్నారి కొడుకునీ కిడ్నాప్ చేసి అతణ్ణి తన కార్యకలాపాలకి వాడుకుంటుంది. విన్ డిసిల్ మిత్రులు తమకి ద్రోహం చేసి ఏదో కుట్రకి పాల్పడుతున్నాడని అతడి కార్యకలాపాల్ని అడ్డుకోవడం. ఇంతే. ఈ కథ కాస్తా ‘వివేకం’ లో మిత్రులే ద్రోహులై, సిఫర్ లాంటి నటాషా మంచి పిల్లగా తేలి, మిత్ర ద్రోహులు వర్సెస్ హీరో యాక్షన్  కథగా  రూపాంతరం చెందింది. ఇందులో హీరో ఒక మాటంటాడు- దేవుడు తన వైపు వున్నాడని. దీనికి విలన్ నవ్వి- కోతి నుంచి మనిషి ఎలా పరిణామం చెందాడో,  దేవుడు కూడా అలాగే పరిణామం చెందాడు డబ్బుగా – అంటాడు. బాగానే వుంది కానీ,  ఈ తిరగేసిన కథ బాక్సాఫీసు దగ్గర డబ్బుగా పరిణామం చెందడం కష్టమే.

ఎవరెలా చేశారు 

      దేశంలో నెరసిన జుట్టుతో అజిత్ ఒక విలక్షణ హీరో. చాలా గ్లామరస్ ఫేసు కూడా. ఈయనకి స్పై యాక్షన్ తోడైతే అది హై వోల్టేజ్ యాక్షన్ గా పరిణామం చెందడం ఖాయం. ఇదే చూస్తామిక్కడ. పైగా తను విసిరే రెండు లైన్ల పంచ్ డైలాగులు. ఫ్రెండ్ షిప్ మీద ఎన్నిసార్లు మార్చి మార్చి రెండు లైన్ల పంచ్ లు  విసురుతాడో లెక్కేలేదు. ఫాస్ట్ అండ్ ఫ్యూరియస్ -8  లో విన్ డిసిల్ సహా నల్గురు మిత్రులూ పేల్చే సింగిల్ లైన్ డైలాగులు ఎంత ఉర్రూతలూగించాయో తెలిసిందే. స్టార్ ని హీమాన్ గా చూపిస్తున్నప్పుడు ఆ స్థాయిలో అతడి నోట్లోంచి మాటలు వూడి  పడకపోతే పేలవంగా వుంటాడు. డైలాగ్స్ పరంగా కూడా అజిత్ వండర్ చేశాడు. ఆధునిక తెలుగు స్టార్ యాక్షన్ మూవీస్ కి డైలాగ్స్ పరంగా ఎఫ్ ఎఫ్ -8 ఒక గైడ్ అని ఆ రివ్యూలో రాశాం. అదిప్పుడు తమిళ ‘వివేకం’ లో కన్పిస్తోంది. 

          హాలీవుడ్ కూడా కళ్ళప్పగించి చూసే స్థాయిలో అజిత్ చేసిన స్టయిలిష్ స్పై పోరాటాలు ఈ సినిమాకి పెద్ద హైలైట్. అయితే ఇవే మైనస్ కూడా సరైన కథ లేకపోవడం వల్ల. ఇక భార్య పాత్రలో కాజల్ అగర్వాల్ చాలా బ్యూటిఫుల్. చాలా అందంగా ఆమె చెప్పే మాటలకి కళ్ళు చెమ్మగిల్లుతాయి. కానీ ‘నేనేరాజు - నేనే మంత్రి’ లోలాగా ఆమెది  అర్ధం లేని పరాజితురాలి పాత్ర కాదు. అనుక్షణం భర్తకి దన్నుగా వుండే, ఎట్టి  పరిస్థితుల్లో ప్రమాదాలనుంచి లాక్కు వచ్చే బలమైన సతీసావిత్రి పాత్ర. మహేష్ భట్ హిట్  ‘రాజ్’ (రహస్యం) అనే హార్రర్ లో దుష్ట శక్తి నుంచి భర్తని కాపాడుకునే కసితో వుండే బిపాషా బసు పోషించిన పాత్ర కూడా ఇలాటిదే సతీసావిత్రి పాత్ర. ఈ హార్రర్ కి మహిళలు కూడా ఎగబడి పెద్ద హిట్ చేశారు. కానీ ‘వివేకం’ కి ఈ అదృష్టం లేదు. కాజల్ పాత్ర ఎంత బావున్నా, యాక్షన్ హోరు దాన్ని మింగేసింది. అదే ఎఫ్ ఎఫ్ -8 లో విన్ డిసిల్ ఫ్యామిలీ స్టోరీ కథలో కలిసిపోతుంది. విన్ డిసిల్ కి పుట్టిన ఉయ్యాలూగే బుడ్డోడి కామెడీ జేసన్ స్టాథంతో ఎప్పటికీ గుర్తుండిపోయే ఎపిసోడ్స్. 

           బాలీవుడ్ లో కనుమరుగవుతున్న హీరో వివేక్ ఒబెరాయ్ విలన్ గా నటించాడు. హీరోని పోగుతూ వుండే విలన్. విలనీ పండలేదు. కంప్యూటర్ స్క్రీన్స్ ముందే  కూర్చుని తెగ వాగుతూ వుండే వీక్ విలన్. 

          అక్షరా హాసన్ ఎందుకో నటాషా పాత్రకి సరిపోలేదు. ఈ పాత్రలో కొత్త హీరోయిన్ కంటే, ఎవరైనా ప్రముఖ సీనియర్ నటి వుంటే వూపు వచ్చేది. కనీసం నయనతార. ఎఫ్ ఎఫ్ -8  లో ఇదే అడవిలన్ సిఫర్ గా ప్రముఖ ఆస్కార్ నటి చార్లీజ్ థెరాన్ నటించి కథకి  మరింత క్రేజ్ తెచ్చింది. 

          కళ్ళప్పగించి చూసే కెమెరా వర్క్ వెట్రి చేశాడు. కళ్ళుతిరిగే యాక్షన్ కొరియోగ్రఫీ దర్శకుడు శివ చేశాడు. కిక్ ఇచ్చే సంగీతాన్ని అనిరుధ్ ఇచ్చాడు. ఇండియాలో ఈ స్థాయి యాక్షన్ మూవీ ఇదే. ఒక స్థాయిగల స్టార్ సినిమాలతో సరిపెట్టుకోలేకపోతున్న ప్రేక్షకులకి స్పై మూవీస్ తో అంతర్జాతీయ స్థాయికి తీసికెళ్ళి సంతృప్తి పర్చాలేమో. కానీ మొన్న తెలుగు ‘లై’, ఇవ్వాళ తమిళ ‘వివేకం’ ఇది సాధించాయా? 

చివరికేమిటి?

          ఏమీ లేదు, ఫాస్ట్ అండ్ ఫ్యూరియస్సే. ఇప్పుడు మనం కొత్తగా కళ్ళు తెర్చి తీస్తున్న సీరియస్ స్పై సినిమాలు హాలీవుడ్ తీసి తీసి బోరు కొట్టించుకుని, ఎంటర్ టైనర్ స్పైలు తీస్తున్నారు. ‘లై’ లోనూ ‘వివేకం’ లోనూ లోపించింది ఇదే. ఫస్టాఫంతా ఇంటర్వెల్ ముందు వరకూ తెరపైకే రాని నటాషాని పట్టుకునే వెతుకులాటే సరిపోతుంది. హీరో పక్కన కమెడియన్ కరుణాకరన్ నవ్విస్తూంటాడు గానీ, సెకండాఫ్ లో మాయమైపోతాడు. సెకండాఫ్ అంతా విలన్ అయిన ఫ్రెండ్ మీద పగతీర్చుకునే వ్యవహారమే. ఇదీ సీరియస్సే. చీటికీ మాటికీ రిలీఫ్ లేకుండా యాక్షన్ సీన్లు. ‘సింగం త్రీ’ పరిస్థితే ఇక్కడా ఎదురవుతుంది. హాలీవుడ్ సినిమాల్లో యాక్షన్ హీరోకి ఇంటి దగ్గర హీరోయిన్ తో ఏదో టెన్షన్ వుండే ఫార్ములా వుంటుంది. ఇదే ఫార్ములా  కొన్నిసార్లు అజిత్ - కాజల్ ల మధ్య బెడిసి కొట్టింది. అతను భీకర పోరాటంలో వున్నప్పుడు ట్రింగు ట్రింగు మని సెల్ మోగడం, అతను పోరాటం చేస్తూనే ఆమె కబుర్లు వినడం. ఆమెతో ఒక సీను మాత్రం బాగా పండింది. ఆమెని చంపడానికి శత్రువులు చుట్టుముట్టినప్పుడు, ఎక్కడ్నించో బుల్లెట్ దూసుకురావడం, భర్త వచ్చాడనే ఆనందాన్ని ప్రకటిస్తూ ఆమె చేసే యాక్షన్ బాగా పేలింది.  అజిత్ కంటే కాజల్ ఫన్నీ క్యారక్టర్. 

          ఇక ఈ మొత్తం గందరగోళంలో స్క్రీన్ ప్లే అనే పదార్ధం ఎప్పుడు నోట్లో పడుతుందా అని నోరు తెర్చుకుని చూడడమే. అది పడదు, మనకి ఆశ తీరదు. ఫ్రెండ్స్ తో సెంటిమెంట్లు దెబ్బ తిన్న కథ, భార్యతోమళ్ళీ అదే సెంటి మెంట్ల కథా చెప్పుకురావడం వల్ల  ఏదీ హత్తుకునేలా  లేకుండా పోయింది. ఫ్రెండ్స్ ని ఎఫ్ ఎఫ్ -8 ఫ్రెండ్స్ లాగే ఎంటర్ టైనింగ్ యాక్షన్ లో వుంచి, భార్యతో ఎమోషనల్ ట్రాక్ వుండివుంటే - కాంట్రాస్ట్ తో కాస్తయినా కథ అనే పదార్ధం కనబడేది.

-సికిందర్
         

500 : డార్క్ మూవీస్ స్క్రీన్ ప్లే సంగతులు - 13

     ఇంటర్వెల్ స్పాట్ అనేది ఓ చౌరస్తా,  సెకండాఫ్ అనేది కారడవి. చౌరస్తాలో నిలబడి కారడవి లోకి చూస్తున్నప్పుడు ఏ మార్గాన వెళ్తే తప్పిపోకుండా దాటవచ్చో తెలియడం అవసరం. ఇంటర్వెల్ అనే చౌరస్తా నుంచీ ఈ సెకండాఫ్ అనే కారడవిలో దారీతెన్నూ కానరాక, గల్లంతయిన  తెలుగు సినిమాలెన్నో. కారడవిలో కొన్ని గల్లంతయినా గమ్మత్తుగా గట్టెక్కుతాయి స్టార్ క్రేజ్ వల్ల - ‘నిన్నుకోరి’, ‘నేనే రాజు నేనే మంత్రి’ లాంటివి- ఎత్తుకున్న పాయింటుని కిల్ చేస్తూ. కొన్ని సార్లు ‘బ్రహ్మోత్సవం’ లాంటివి  ఎంత స్టార్ పవర్ వున్నా, అట్టర్ ఫ్లాప్ అయిపోతాయి సెకండాఫ్ లో దారి తప్పడంవల్ల.  సెకండాఫ్ సిండ్రోమ్ అనేది తెలుగు సినిమాలకి స్వకీయ  శాపం. ఇంకా కాటమరాయుడు, సర్దార్ గబ్బర్ సింగ్, డిక్టేటర్, బ్రూస్ లీ, జ్యోతి లక్ష్మి, సైజ్ జీరో, ఆటోనగర్ సూర్య, దొంగోడు, ధమ్ లాంటివి వచ్చి బోల్తా కొడుతూనే వుంటాయి. సింపుల్ గా ఏమిటంటే ఐడియా స్థాయిలోనే , పోనీ దాని తర్వాత సినాప్సిస్ దశలోనే దొరికిపోయే ఈ తప్పుని - చాలా ఖరీదైన  తప్పుని -  మొదటే గుర్తించలేక స్క్రీన్ ప్లేలూ డైలాగులూ అనే దశలు కూడా పూర్తి చేసేసి, షూటింగ్ కూడా చేసి పారేసి,  మార్నింగ్ షోకల్లా తెల్లమొహం వేయడం పరిపాటవుతోంది. ఐడియా దగ్గరే, సినాప్సిస్ దగ్గరే తేలిపోయే జాతకాన్ని సినిమా అంతా తీసిగానీ  తెలుసుకోలేక పోవడం- ప్చ్ ప్చ్ ప్చ్, చాలా బ్యాడ్ సాంప్రదాయం.  ఐడియాకి శాస్త్రం ఏమిటీ, సినాప్సిస్ కి సూత్రాలేమిటీ అనుకుంటే, ఆతర్వాత ఇక దేనికీ ఏదీ వుండదు- ఎటూకాని సినిమా వుంటుంది. 

            “The function of the mid- point is to keep the story moving  forward, it is a link in the chain of the dramatic action connecting the First Half of Act -2, with the Second Half of Act -2” అనీ రాశారు సిడ్ ఫీల్డ్. సిడ్ ఫీల్డ్ ని బోలెడంత మంది చదివేస్తున్నారు. సిడ్ ఫీల్డ్ ని చదవడం వేరు, పాటించడం వేరు. సిడ్ ఫీల్డ్ ని చదివినా, ఇంకెవర్ని చదివినా, రాయడాని కొచ్చేటప్పటికి ఏమీ అర్ధంగాక  చేతులెత్తేసే వాళ్ళే ఎక్కువ. ఆస్ట్రేలియా నుంచి ఒక తెలుగు షార్ట్ ఫిలిం స్క్రీన్ ప్లే అందింది మూల్యాంకన కోసం. పది సీన్ల ఆ కథ స్ట్రక్చర్ తో అద్భుతమైన శైలిలో మెచ్యూర్డ్ గా,  ఎక్సైటింగ్ గా వుంది. దాన్ని సరిదిద్దడానికేమీ లేకుండా పోయింది. చాలాచాలా అరుదుగా ఇలాటి మెరుపులు మెరుస్తాయి. 

            ఉపోద్ఘాతం ఆపి విషయానికొద్దాం. ఏదో అనుకుని మొదలెడితే ఈ ‘బ్లడ్ సింపుల్’ మహాభారతమై పోయింది. ఎంతకీ తెగడం లేదు. జీవితమంతా చెట్టుకింద తపస్సు చేసి రాసుకునే పరిస్థితి. ఎబ్బీ, రే, మార్టీ, విస్సర్ పాత్రలు చుట్టూ చేరి  తమని ఇంకా ఇంకా తెలుసుకోమని రొద పెడుతున్నాయి. డార్క్ మూవీస్ లక్షణమే ఇంత. ఆర్టు సినిమాల్లో కూడా ఇంత విషయముండదు. క్రితం వ్యాసంలో ఫస్టాఫ్ పూర్తి చేశాం, ఇప్పుడు సెకండాఫ్ కొస్తే- ఇంటర్వెల్ దగ్గర మార్టీని రే సజీవ సమాధి చేసిన నేపధ్యంలో ఇప్పుడేమిటి? ఎలా సాగాలి ముందు కథ? 

            ఇంటర్వెల్ అనే చౌరస్తాలో నిలబడి సెకండాఫ్ అనే కారడవిలోకి చూస్తే ఏం కన్పిస్తుంది? ముగింపు కన్పిస్తోందా? కాదు, ప్లాట్ పాయింట్ టూ మాత్రమే కన్పిస్తుంది. ఈ పీపీ టూకి దారేసుకుంటూ వెళ్ళడమే కారడవిలో కాంట్రాక్టు మేస్త్రీ పని. స్క్రీన్ ప్లే పరిభాషలో సెకండాఫ్ అంటే మొత్తం సెకండాఫ్ అంతా  కాదు. మిడిల్ – 2 వరకు మాత్రమే. అంటే  ప్లాట్ పాయింట్ టూ వరకు. పీపీ వన్ నుంచీ ఇంటర్వెల్ వరకూ మిడిల్ ఫస్టాఫ్, ఇంటర్వెల్ నుంచీ పీపీ టూ వరకూ మిడిల్ సెకండాఫ్.

            ప్లాట్ పాయిట్ వన్ దగ్గర ఏర్పడే గోల్ సహిత సమస్యకి పీపీ టూ దగ్గర పరిష్కారమార్గం దొరుకుతుంది. ఆ పరిష్కార మార్గంతో పై చేయి సాధించి  క్లయిమాక్స్ పూర్తి చేస్తుంది పాత్ర. పీపీ టూ దగ్గర ఏం జరగాలో తెలియాలంటే పీపీ వన్ లోకి చూడాలి తప్ప మరో ఆలోచన పనిచెయ్యదు. ఈ రెండూ ఎదురెదురు అద్దాల్లాంటివి. ఏ కథకైనా ముగింపు పీపీ వన్ లోనే దాగి వుంటుంది. దాన్ని పట్టుకోగల్గాలే తప్ప, ఇంకేదో చేద్దామంటే కుదరదు. ఎలాగయితే మిడిల్  వన్ కి గమ్య స్థానం ఇంటర్వెల్లో, అలా మిడిల్ టూకి పీపీ టూ గమ్యస్థానం. 

            ఈ గమ్యస్థానం తెలియాలంటే పీపీ వన్ ని చూడాలి. పీపీ వన్ దగ్గర  పైకి వేరు లోపల వేరుగా వున్న గోల్ తో మిస్టీరియస్ గా కథ ప్రారంభించిన విస్సర్, ఆ తర్వాత అనేక ఒడిడుకుల పాలయ్యాక, ఒడ్డున పడాలంటే, పీపీ వన్ దగ్గర ఏ ఎబ్బీ, రేలని చంపకుండా వేరే ప్లానేశాడో - ఆ ఎబ్బీ, రే లనే  చంపి బయటపడాలి. ఇదే కథకి  ముగింపు. ఐతే ఇతను యాంటీ హీరో అవడంవల్ల ఆ తర్వాత బతికి వుంటాడా లేదా అనేది క్యారక్టర్ ముగింపు. పీపీ టూ మాత్రం ఎబ్బీ - రేల మీద అఘాయిత్యం తలపెట్టడమే. డ్రామాకి  డార్క్ మూవీస్ కర్మ సిద్ధాంతాన్ని బాగా వాడుకుంటాయి. ఎబ్బీ - రేలని చంపుతానని మార్టీకి విస్సర్ మాటిచ్చి ప్లేటు ఫిరాయించినా, వాళ్ళని చంపాల్సిన మౌలిక పరిస్థితిని ప్రకృతి ఎప్పుడో ఒకప్పుడు కల్పించక మానదు. మాటతోనో, చేతతోనో, ఆలోచనతోనో మనుషులు చేసుకునే మంచి చెడు కర్మల్ని ప్రకృతి లేదా సబ్ కాన్షస్ మైండ్ ఏదీ బ్యాలెన్స్ ఉంచదు. ఏదో ఒక రూపంలో న్యూటన్ మూడో చలన సూత్రాన్ని రుచి చూపించి తీర్తుంది : ప్రతీ చర్యకీ సమానమైన వ్యతిరేక ప్రతిచర్య! 

            అప్పుడు ఎబ్బీ- రేలని విస్సర్ చంపాల్సి రావడమే పీపీ టూ సీను అవుతుంది. ఈ సీనుకి పించ్ టూ సీను ఉప్పందించాలి. ఏమిటా పించ్ టూ సీను? చూద్దాం.

            అయితే,  ఇంటర్వెల్ దగ్గర్నుంచీ మిడిల్ టూకి ఏఏ సీన్లు వేస్తూపోతే, పీపీ టూలో ఎబ్బీ, రేలని విస్సర్ చంపే సీను రావచ్చు? ఈ సీన్లే కారడవిలో వేసుకునే రాచ బాట. ఈ సీన్లని దేని ఆధారంగా వేయాలి?  వెనుక కథ ప్రారంభమయ్యాక మిడిల్ వన్ లో నాటిన యుక్తులతోనే. ఏమిటా యుక్తులు? యుక్తులన్నీ విత్తనాలు. అవి ఇప్పుడు మిడిల్ టూ లో మొలకెత్తుతాయి.

            హత్యా స్థలంలో విస్సర్ లైటర్ ని మర్చిపోయాడు, విస్సర్ తీసిన ఫేక్ ఫోటో మార్టీ సేఫ్ లో దాచాడు, ఎబ్బీ చంపిందని రే అనుకుంటున్నాడు, విస్సర్ అనే కిల్లర్ వున్నాడని ఎబ్బీ - రేలకి తెలీదు. సింపుల్ గా నాల్గే యుక్తులు. ఈ నాల్గిటినీ పే ఆఫ్ చేస్తూ వేసేవే మిడిల్ టూ సీన్లు అవుతాయి. దీనికే కాదు, ఇంకే జానర్ కథ కైనా ఆ కథా సంవిధానానికి తగ్గట్టు ఈ ఏర్పాట్లే వుంటాయి. 

            ముందుగా ఎవరితో  ప్రారంభించాలి? విస్సర్ తోనా, ఎబ్బీ – రేలతోనా?  ఇక్కడే వుంటుంది కారడవిలో వేసే మొట్ట మొదటి కీలక అడుగు. చాలా వరకూ హ్యూమన్ టచ్ ని కాదని, యాక్షన్ తోనే  ముందుకి దూకేస్తూంటారు. ఆ దూకడం దూకడం ఎక్కడ తేల్తారో దిక్కుతోచని టూర్ అయిపోతుంది. సెకండాఫ్ సిండ్రోమ్  నోట్లో తలపెట్టడం అవుతుంది.  విస్సర్ ని యాక్షన్ లోకి దింపుతూ  లైటర్ కోసం, మార్టీ దాచిన ఫేక్ ఫోటో కోసం కథగా సెకండాఫ్  ప్రారంభించేసే చపలత్వాకి లోనైతే, ఏమవుతుంది? ప్రధానంగా రసభంగమవుతుంది. రసభంగంతో రభసా రచ్చా రెండూ  అవుతాయి. 

            హ్యూమన్ టచ్ ఎప్పుడూ అరిటాకులాంటిది. యాక్షన్ ముల్లు లాంటిది. కాబట్టి ముందుగా అరిటాకు కథే చెప్పాలి. చెప్పినంత చెప్పి అప్పుడు ముల్లుతో పొడవాలి. అరిటాకే లేనప్పుడు ముల్లుతో దేన్ని పొడుచుకుంటారు – అందుకే ప్రేక్షకులు గోళ్ళు గిల్లుకుంటూ కూర్చుంటారు.  మిడిల్ వన్ లో ఏం అరిటాకు పర్చారు?  తమ వెనుక ఒక కుట్ర జరుగుతోందని తెలీని హ్యూమన్ టచ్ తో వున్న ప్రేమకథ అనే అరిటాకు. పీపీ వన్ దగ్గర  ఏ కథ పుట్టిందో అదే కొనసాగాలి తప్ప,  ఇంటర్వెల్ తర్వాత మారిపోకూడదు. ఏకసూత్రత దెబ్బ తిని రసభంగమవుతుంది. పీపీ వన్ దగ్గర కథ పుట్టించిన వాడు విస్సర్, కథకి పుట్టిన వాళ్ళు ఎబ్బీ- రేలు. పుట్టిన వాళ్ళ గురిచే కథ వుంటుంది తప్ప, పుట్టించిన వాడి గురించి కాదు- వాడు సూత్రధారి.  తెరచాటున వుండి సరైన సమయంలో సరైన నిర్ణయం తీసుకుని వస్తాడు. 

            ఈ తెరచాటు పాత్రతో కాక తెరమీద స్ట్రగుల్ చేస్తున్న అరిటాకు పాత్రల కథనే కొనసాగిస్తూ సెకండాఫ్ ప్రారంభించాలనేది ‘బ్లడ్ సింపుల్’ కూడా చెప్తున్న యూనివర్సల్ ట్రూత్. రేపు సీన్లు చూద్దాం.

(సశేషం)

 -సికిందర్ 

499 : డార్క్ మూవీస్ స్క్రీన్ ప్లే సంగతులు - 12

     ఇప్పుడు వచ్చేది ఇంటర్వెల్ సీను. అంటే మిడిల్ లో మొదటి భాగానికి ముగింపు అన్నమాట. ఈ సీనే ఇంటర్వెల్ తర్వాత వచ్చే మిడిల్ టూ కి ప్రారంభం. ఎప్పుడైనా ప్లాట్ పాయింట్ (పీపీ) వన్ కీ ఇంటర్వెల్  సీనుకీ సంబంధం వుంటుంది. ఎందుకంటే,  ఇంటర్వెల్ సీను అనేది ఇటు ఫస్టాఫ్ లో పీపీ వన్ నీ, అటు సెకండాఫ్ లో వచ్చే పీపీ  టూనీ కలిపివుంచే కొక్కెం లాంటిది. త్రాసుని రెండు వైపులా బ్యాలెన్స్ చేసే దండెం లాంటిది. అప్పుడే ఫస్టాఫ్,  సెకండాఫ్ లు చెదిరిపోకుండా వుంటాయి. అంతే  కాదు, ఇంకో రెండు లింకు సీన్లు కూడా వుంటాయి. మొదటి లింకు సీను ఇంటర్వెల్ కి ముందు  వుంటుంది, రెండో లింకు సీను పీపీ టూ కి ముందు  వుంటుంది. మొదటి లింకు సీను ఇంటర్వెల్ కి దారితీయిస్తే, రెండో లింకు సీను పీపీ  టూకి దారి తీయిస్తుంది. వీటిని పించ్ -1, పించ్ - 2  అంటారు. తెలుగులో ఉత్ప్రేరకాలనొచ్చు. పీపీ వన్, టూలు, ఇంటర్వెల్ ఈ మూడు సీన్లూ  కలిసి స్క్రీన్ ప్లేలకి మూల స్తంభాల్లాంటివి. వీటితోనే స్క్రీన్ ప్లే అనే సౌధం నిలబడుతుంది. ఇక పీపీ  వన్ దగ్గర ఏ సమస్య లేదా సంఘర్షణ మొదలయ్యిందో అది ఇంటర్వెల్లో తీవ్రస్థాయికి చేరాలి. తర్వాత ప్లాట్ పాయింట్ టూ దగ్గర అది సమసిపోగల పరిష్కార మార్గం దొరకాలి. ఈ రీత్యా ‘బ్లడ్ సింపుల్’ ఇంటర్వెల్  సీను చూద్దాం...

23.  మార్టీ ని రే అలాగే లాక్కెళ్ళి సజీవ సమాధి చేయడం.

     ఇలా రాశారు : కారు లాంగ్ షాట్-  డోర్ విసురుగా తెర్చుకుంటుంది. కారు నుంచి దూరంగా పరిగెడుతూంటాడు రే. నడుం లెవెల్లో కెమెరా ట్రాక్ చేస్తూంటే, హైవే దిగిపోయి పక్కనున్న  మైదానంలోకి వురుకుతూంటాడు.యాభై అడుగుల దూరంలో వగరుస్తూ ఆగిపోతాడు. లో-  యాంగిల్లో  ఫ్రేం లోకొస్తాడు. కీచురాళ్ళ ధ్వనితో కి అతడి వూపిరి శృతి. వెనక రోడ్డు కేసే అలా నిలబడిపోయి చూస్తూంటాడు.

              రే పాయింటాఫ్ వ్యూ - కారు లాంగ్ షాట్.  నిర్మానుష్యమైన హైవేమీద వదిలేసిన కారు. హైవేమీద ఫోకస్ అవుతూ హెడ్ లైట్లు. కారులో కదలిక లేదు.  
            రే మీద ఫోకస్  - ఆయాసం తగ్గుతుంది. చెమట్లు. కొన్ని క్షణాల తర్వాత -  అయిష్టంగానే కారువైపు అడుగులేస్తూ రే.
            రే పాయింటాఫ్ వ్యూ -  కారు కేసి ట్రాకింగ్ షాట్. కారులో కదలిక లేదు.
            రే మీద ఫోకస్ – నెమ్మదిగా  కారు వెనక వైపుకి అడుగులు. బ్యాక్ విండో లోంచి లోపలికి చూపు.
             రే పాయింటాఫ్ వ్యూ - ఖాళీగావున్న బ్యాక్ సీటు. ఇటు హైవే వైపు  తెర్చుకున్న డోర్.
            రే మీదికి ఫోకస్ -  రియాక్షన్ లేదు.  కారు వెనుక నుంచి పక్కకొచ్చి హైవే మీదికి చూపు.
            రే పాయింటాఫ్ వ్యూ –మోకాళ్ళ మీద ప్రాకుతూ మార్టీ. రక్తపు జాడలు. కారు హెడ్ లైట్స్ తో రోడ్డు మీద  అతడి పొడవాటి నీడ.

            రే మీదికి ఫోకస్  - ఇంకా రియాక్షన్ లేదు.  కారులో కూర్చుని ఎదర అద్దంలోంచి చూస్తూ ఇగ్నిషన్ కీస్ కోసం తడుములాట.
            రే పాయింటాఫ్ వ్యూ  - ప్రాకుతున్న మార్టీ.
              రే మీదికి ఫోకస్ - కారు స్టార్ట్ చేసి టార్గెట్ (మార్టీ) కేసి చూపు. ఆలోచన. నిర్ణయం. ఇగ్నిషన్ నుంచి కీ లాగివేత.  వెనక్కి వెళ్లి డిక్కీ తీసి అందులోంచి షావెల్...
            లో యాంగిల్లో మార్టీ - ఫ్రంట్ నుంచి ఫోకస్.  హెడ్ లైట్స్ నేపధ్యంలో ప్రాకుతూ.  షావెల్ ని ఈడ్చుకుంటూ రే అనుసరణ. మార్టీ ఎదుటకొచ్చి షావెల్ తో కొట్టబోతూ...
            రే క్లోజ్ షాట్ – షావెల్ తో ఆగిపోతూ మార్టీ కేసు చూపు. నిశ్శబ్దం. దూరంగా శబ్దం.
            రే పాదాల క్లోజప్  - రే కాలిని పట్టేసుకుని మార్టీ చెయ్యి.
            రే మీదికి ఫోకస్ –షావెల్ ని సరిగా పట్టుకుంటూ వణుకు. పెద్దదవుతూ ఏదో శబ్దం.
            రే పాదాల మీద ఫోకస్ –మార్టీ పట్టునుంచి కాలు విదిలింపు.
            రే మీద ఫోకస్ – మార్టీ మీది నుంచి చూపులు రోడ్డు పైకి.  మరింత పెద్దదవుతూ శబ్దం.
            రే పాయింటాఫ్ వ్యూ - దూరంగా హెడ్ లైట్స్ కాని హెడ్ లైట్స్ లాంటి వెలుగు.
            రే మీదికి ఫోకస్ –  షావెల్ ని దించుతూ రోడ్డు కేసే చూపు. ఉక్రోషంగా  వెళ్లి షావెల్  డిక్కీలో షావెల్ పడవేత.  మార్టీ వెనకవారగా అడుగులు.
             మార్టీ క్లోజ్ షాట్ – చంకల్లోకి చేతులు పోనిచ్చి మార్టీని కారు దగ్గరికి ఈడ్చివేత. కార్లోకి ఎక్కిస్తూంటే మార్టీకి  దగ్గు. దగ్గుతో రక్తం. హోరుమని ఇంజన్ శబ్దం.
            కారు పైకప్పు వారగా మీడియం షాట్ – కారు డోర్  వేసేసి దానికి అతుక్కుపోయి రే. వెనుక నుంచి భారీ ట్రక్కు దాటవేత.

            ఓపెన్ మైదానం – రే కారు ఫుల్ షాట్.
            కట్ చేస్తే ఆకస్మిక  నిశ్శబ్దం. ప్రొఫైల్ లో రే కారు. మైదానంలో నడి  మధ్య ఆపి వున్న కారు.  ఆఫ్ స్క్రీన్ లో షావెల్ తో తవ్వుతున్న శబ్దం.
            లెటరల్ ట్రాక్ షాట్ - కారు దగ్గర్నుంచి హెడ్ లైట్స్ వెలుగు వారగా లెటరల్ ట్రాక్ షాట్. సమాధి తవ్వడం పూర్తి చేసిన రే,  అందులోంచి పైకి రాక. షావెల్ ని మట్టిలో గుచ్చి, కారు వైపు నడక.
            వెరీ వైడ్ షాట్ -  మిడిల్ బ్యాక్ గ్రౌండ్ లో కారు.  అవతల కారు హెడ్ లైట్స్ . మార్టీ ని సమాధి కేసి ఈడ్చి అందులో పడవేత.
            హై షాట్ లో సమాధి – సమాధిలో వెల్లికిలా మార్టీ.
            క్లోజ్ షాట్ లో రే – చెమటలు కక్కుతూ షావెల్ తో మట్టి లాగుతున్న సవ్వడి.
            హై  షాట్ లో సమాధి – ఫోర్ గ్రౌండ్ లో  రే. మార్టీ మీద మట్టి వేస్తూ. మార్టీలో చిన్న కదలిక.
            లో షాట్ లో రే – ఆగి సమాధిలోకి చూపు. తిరిగి మట్టి  విసరడం మొదలు. ఫ్రేములో కొస్తూ పోతూ కదలిక.

            హై షాట్  లో – మట్టి పడుతూంటే దాని కింద మార్టీ కదలిక. బలహీన శబ్దం. పైకి లేస్తూ కుడి చెయ్యి.
            సమాధిలోంచి లో- షాట్ - సమాధి అంచు మీద రే. హెడ్ లైట్స్ బ్యాక్ డ్రాప్.  నీడపడుతున్న ఫోర్ గ్రౌండ్ లో పైకి లేస్తున్న మార్టీ చెయ్యి. చేతిలో ఎబ్బీ రివాల్వర్.  చూపుడు వేలికి అలాగే బ్యాండేజీ.
            క్లోజ్ షాట్ లో రే – నిటారుగా, నిశ్చలంగా. బిక్క మొహంతో చూపులు. రివాల్వర్ రేంజిలో అలాగే నించుని.
            హై షాట్ లో మార్టీ – రివాల్వర్ మరింత ముందుకు. చూపుడు వేలితో కుదరక,  మధ్య వేలితో ట్రిగ్గర్ బిగింపు.
            లో షాట్ లో రే – అదే చూపు.
            హై  షాట్ లో మార్టీ  - వణుకుతూ రివాల్వర్.  ట్రిగ్గర్  లాగివేత.  ఖాళీ ఛాంబర్ క్లిక్ మన్న శబ్దం.
            లో షాట్ లో రే – బ్లాంక్ గా మార్టీ కేసి చూపులు.
            సైడ్ షాట్ లో – రే సమాధిలోకి వంగుతూ, రివాల్వర్ వున్న మార్టీ చెయ్యి వెనక్కిపోతూ. ఇంకో రెండు సార్లు ట్రిగ్గర్ లాగివేత.  క్లిక్ క్లిక్ మన్న ఖాళీ ఛాంబర్. నెమ్మదిగా రివాల్వర్ బ్యారెల్ ని పట్టుకుని రే చెయ్యి. మార్టీ చేతిలోంచి రివాల్వర్ లాగివేత.
          క్లోజ్ షాట్ లో షావెల్ అంచు – మట్టిని తవ్వుతూ.
            మీడియం షాట్ లో రే – క్రోధంగా సమాధిలోకి మట్టి విసురుతూ.
            హై షాట్ లో సమాధి – మట్టి కింద మాయమవుతూ మార్టీ.
            మీడియం షాట్ లో రే – వగరుస్తూ మట్టిని తోస్తూ.
            హై షాట్ లో   – సగం మట్టితో నిండిపోయిన సమాధి.
          మీడియం షాట్ లో రే – సమాధిని కప్పేస్తూ.
            హైషాట్ లో సమాధి – పూర్తిగా కప్పేసి. చదును చేస్తూ రే.
            క్లోజ్ షాట్ లో  షావెల్ అంచు – సమాధి మీద పెట్టి ఎడాపెడా కొడుతూ...

***

   ఇంటర్వెల్  సీను పీపీ వన్ కి వ్యతిరేకంగా వుంటుంది, వుండాలి. కానీ తెలుగు సినిమాల్లో పీపీ వన్నే ఇంటర్వెల్ సీనుగా వుంటున్నప్పుడు,  కథ దాని సొగసు కోల్పోవడమే జరుగుతోంది. అంటే ఒక మూలస్థంభం మిస్ అవుతోంది.  ఇంటర్వెల్ లోపు పీపీ  వన్ ఒక ఘట్టం, ఇంటర్వెల్ ఇంకో ఘట్టం. ఈ రెండు వేర్వేరు ఘట్టాల బదులు ఒకటే చూపించి సరిపెట్టేస్తూంటారు ఇంటర్వెల్లో.   దీంతో  పీపీ  వన్ సీను అదే, ఇంటర్వెల్ సీను కూడా అదే అన్నట్టు వుంటోంది. పీపీ వన్ అనే గుంటూరు దాటిపోయి ఇంటర్వెల్ అనే విజయవాడ చేరాక  ఇదే గుంటూరు అంటున్నారు. బెజవాడ చూపించి విజయవాడ అనొచ్చు.  గుంటూరుని  విజయవాడ ఎలా అంటారు? 

            ఇంటర్వెల్ సీను పీపీ వన్ బైప్రొడక్టు మాత్రమే. దానికి సొంత అస్తిత్వం లేదు. పైగా పీపీ వన్ తర్వాత వచ్చే పించ్- వన్ సీను వల్లే ఇంటర్వెల్ ఏర్పడుతుంది-మంగళగిరి టచ్ చేయకుండా విజయవాడ చేరలేమన్నట్టు. ఇన్ కం టాక్స్ ఎగ్గొట్టినట్టు పీపీలు, పించులు ఎగేసి ఇంటర్వెల్ మీద వెళ్లి పడిపోతే ఎలా? 

            ఇంటర్వెల్ సీను పీపీ వన్ సీనుకి వ్యతిరేక ప్రతిబింబం. పీపీ వన్ సీనులో ఎబ్బీ,  రేలని చంపే ఒప్పందం మార్టీ విస్సర్ తో చేసుకున్న సంగతి చూశాం. ఇంటర్వెల్ సీన్లో తనే కొనవూపిరితో సజీవ సమాధి అయ్యాడు మార్టీ. ఇలా ఇంటర్వెల్ అనే నిలువుటద్దంలో పీపీ వన్ రూపం చెడి కన్పిస్తోంది. ఇలా ఎన్ని సినిమాల్లో వుంటుంది? దీని టెక్నిక్ ఏమిటి? పించ్ వన్ సీను ఏర్పాటులోనే టెక్నిక్ వుంటుంది.  పించ్ వన్ సీ ను ఏది? మార్టీ బతికే వున్నాడని రే కారు దూకి  పారిపోయే 22 వ సీను. 

            చాలా డిస్టర్బింగ్ సీను. ఎబ్బీ కోసం రే ఏమైనా చేసే నిర్ణయాత్మక ఘట్టం. ఎలాగంటే, ముందు ఎబ్బీయే చంపిందనుకుని, అది శవమనుకుని, దాన్ని పాతి పెట్టబోయాడు. తీరా శవం కాదని తెలిశాక ఆగలేదు. మార్టీ బతికి వుంటే ఎబ్బీకి ఇంకా ప్రమాదమనుకున్నాడు. అందుకే తనే సజీవ సమాధిచేసేసి  హంతకుడయ్యాడు ఆమె బదులు. ఆమె షూట్ చేస్తే మార్టీ పూర్తిగా చావకపోతే హంతకురాలవదు. పూర్తిగా చంపిన రే హంతకుడవుతాడు. ఆమె మీద హత్యాయత్నం నేరం మాత్రమే వుంటుంది ఒకవేళ బయటపడితే. ఇది రే అభిప్రాయంలో. రే కి తెలిసి విస్సర్ లేడు. 

            మనకి తెలిసి విస్సర్ వున్నాడు. మన అభిప్రాయంలో ఇప్పుడు విస్సర్ హత్యాభియోగం నుంచి తప్పించుకోగలడు. రే ఇరుక్కుంటాడు హంతకుడై! ఇదీ పించ్ వన్ సీను. ఎంత ఉల్టాపల్టా!  హంతకుడు విస్సర్ అని మనం అనుకుంటున్నప్పుడు, రే హంతకుడుగా మారాడు. ఇలా పించ్ వన్ సీను మార్టీని సజీవ సమాధి చేసే అతి భయానక ఇంటర్వెల్ సీనుకి దారితీసింది. 

            ఇలాకాకుండా, ఆఁ... మార్టీ చచ్చాడా. ఐతే నేరం ఎబ్బీ మీద పడకుండా మాంచి  లవ్ ఎమోషన్ తో రే తీసికెళ్ళి పాతేస్తాడు డెడ్ బాడీని. ఇంకేంటి? దటీజ్ అవర్ బ్లాస్టింగ్ ఇంటర్వెల్ బ్యాంగ్- అని సంబరపడితే జాలి పడాల్సిందే. శవాన్ని పాతిపెట్టబోవడం ప్రేక్షకులు వూహించేదే. ప్రేక్షకులు వూహించే ఇంటర్వెల్ అదొక ఇంటర్వల్ అవుతుందా? శవాన్ని పాతిపెట్టడంలో లవ్ ఎమోషన్ బలంగా వుంటుందా? శవం కొనవూరితో వున్నా మనిషిగా ట్విస్ట్ ఇచ్చి, ఆ కొనవూపిరితో వున్న మనిషిని పాతిపెట్టి ఆమె బదులు తను హంతకుడవడం గాఠ్ఠి ఎమోషన్ అవుతుందా?  చిక్కు ముడిగా తయారవుతున్న నేరకథ ఆలంబనంగా ప్రేమకథ కూడా బలీయం అవుతూపోయే కథాపథకమే  బ్లడ్ సింపుల్ ది.

***

     కామెడీ అయితే కామెడీగా, ప్రేమ అయితే రోమాంటిక్ గా, ఫ్యామిలీ అయితే అనుబంధాల పరంగా, యాక్షన్ అయితే యాక్షన్ పరంగా,  ఏదైతే దాని  జానర్ మర్యాదతో కూడిన కథనం టైం అండ్ టెన్షన్ (టీటీ) గ్రాఫ్ ని ఏర్పరుస్తుంది. కథ మొదలయ్యే- లేదా సమస్య ఏర్పడే- లేదా గోల్ ఏర్పాటయ్యే పీపీ వన్ దగ్గర్నుంచీ,  ఈ టీటీ గ్రాఫ్ అంతకంతకూ పైకి లేస్తూ పోతుంది. లేవలేదంటే చేవలేనట్టే కథనంలో. 

            ఈ మిడిల్ వన్ లో,  పీపీ వన్ నుంచీ ఇంటర్వెల్ వరకూ టీటీ గ్రాఫ్ ఎలా వుందో ఒకసారి చూద్దాం :  పీపీ వన్ గా వున్న 13వ సీనులో ఎబ్బీ, రే లని చంపే ఒప్పందం మార్టీ, విస్సర్ ల మధ్య కుదిరిన నేపధ్యంలో-

          14.  ఎబ్బీ తనకోసం వేరే ఫ్లాట్ చూసుకుంది. ఈ సీను ఎలా వుందంటే, తామిద్దర్నీ విస్సర్ చంపబోతాడని తెలీక ఆమె జీవితాన్ని తనకి నచ్చిన  విధంగా ప్లాన్ చేసుకుంటున్న కాంట్రాస్ట్ తో వుంది.  ఇది టెన్షన్ ని పుట్టిస్తోందా లేదా?
          15.  ఎబ్బీ బార్ కెళ్ళి మార్టీకీ రేకీ మధ్య మళ్ళీ గొడవ జరక్కుండా చూసుకోమని చెప్పింది. ఇది కూడా కాంట్రాస్టే. ఒకపక్క తామిద్దరూ చావబోతూంటే,  తను శాంతి ప్రయత్నాలు చేస్తున్న ఐరనీతో కూడిన టెన్షన్.
          16.  రే బెడ్రూంలో ఎబ్బీ అలికిడి విని మార్టీ వచ్చినట్టున్నాడని రే కి అనుమానం వ్యక్తం చేసింది. వచ్చింది మార్టీ అనుకుంటున్నారు, మనకి విస్సర్ అని తెలుసు. ఇది  కూడా ఐరనీ తో కూడిన  టెన్షన్.
          17.  విస్సర్ రహస్యంగా రే ఫ్లాట్ కొచ్చి ఎబ్బీ రివాల్వర్ కొట్టేశాడు. వాళ్ళిద్దర్నీ చంపేశాడు- ఇదెంత టెన్షన్!
          18.  విస్సర్ మార్టీకి ఫోన్ చేసి వాళ్ళిద్దర్నీ చంపేశాననడం మరింత టెన్షన్.
          19.  విస్సర్ మార్టీ దగ్గరికెళ్ళి మర్డర్ ఫోటో చూపించి డబ్బు తీసుకుని, మార్టీని షూట్ చేయడం ఇంకింత టెన్షన్. అతను లైటర్ మర్చిపోవడం మరీ టెన్షన్.
          20.  రే బార్ కొచ్చి మార్టీ శవాన్నీ, రివాల్వర్నీ చూసి ఈ హత్య ఎబ్బీ చేసిందను
కున్నాడు. ఇప్పుడు శవాన్ని ఏం చేస్తాడనే టెన్షన్.
          21. కారులో శవంతో రే బార్ లోంచి బయట పడడం థ్రిల్ల్ తోడైన  టెన్షన్.
          22. మార్టీ ఇంకా బతికే వున్నాడని కారుదూకి పారిపోయాడు రే. మార్టీ బతికే వుండడం వూహించని టెన్షన్.
          23. మార్టీ ని సజీవంగా  సజీవ సమాధి చేయడం ఇంటర్వెల్ కి తారాస్థాయికి చేరిన టెన్షన్.

        ఇంకోసారి ఇలా చూద్దాం : 13 వ సీన్లో పీపీ వన్ దగ్గర చంపాలన్న నిర్ణయం తర్వాత రెండు సీన్లలో టెన్షన్ కోసం  చావబోయే పాత్రల్లో ఒకటైన ఎబ్బీతో ఐరనీని వాడుకుని మొదటి రెండు మెట్లు ఎక్కించారు. 

          ఐరనీ అనే ఎమోషన్ తర్వాత 16 వ సీన్లో – చంపే కార్యక్రమం మొదలెడుతూ విస్సర్ ని ఎంటర్ చేస్తూ,  హార్రర్ అనే ఎమోషన్ తో  మూడో మెట్టు ఎక్కించారు. 

          17 వ సీన్లో – వాళ్ళిద్దర్నీ విస్సర్ చంపుతున్నట్టు చూపిస్తూ హార్రర్ ఎమోషన్ తో నాల్గో  మెట్టు ఎక్కించారు.
          18 వ సీన్లో - చంపేశానని విస్సర్ మార్టీకి ఫోన్ చేయడం ద్వారా – ఇప్పుడేమిటి? అన్న ప్రశ్నరేకెత్తించే హార్రర్ ఎమోషన్ తో ఐదో మెట్టు ఎక్కించారు.
          19 వ సీన్లో – విస్సర్ అనూహ్యంగా మార్టీని చంపడంద్వారా షాకింగ్ గా విస్సర్ అసలు రంగు జోడిస్తూ హర్రర్ ఎమోషన్ తో ఆరో  మెట్టు ఎక్కించారు.
          20వ సీన్లో- రే మార్టీ శవాన్ని మాయం చేయాలనుకోవడం ద్వారా హార్రర్ ఎమోషన్ కి లవ్ ఎమోషన్ జోడించి ఏడో మెట్టు ఎక్కించారు.
          21 వ సీన్లో- మార్టీ శవాన్ని రే కారులో వేసుకెళ్లడాన్నిచూపడం ద్వారా థ్రిల్ తో  కూడిన హార్రర్ ఎమోషన్ తో  ఎనిమిదవ  మెట్టు ఎక్కించారు.
          22 వ సీన్లో – మార్టీ బతికే వున్నాడని చూపడం ద్వారా  హార్రర్ ఎమోషన్ కి అనేక ప్రశ్నలు జోడిస్తూ తొమ్మిదవ మెట్టు ఎక్కించారు.
          23 వ సీన్లో- మార్టీని సజీవ ససమాధి  చేస్తూ, విస్సర్ బదులు రే హంతకుడవుతూ, మరింత బలీయమైన లవ్ ఎమోషన్ ని హార్రర్ ఎమోషన్ కి కలిపి,  ఇంటర్వెల్ అనే పదవ మెట్టు ఎక్కించారు. 

          అంటే టెన్షన్ అనేది ఒక టూల్ అయితే, ఈ టూల్ ని వాడుకోవడానికి హార్రర్ అనే ఎమోషన్ ని రెచ్చగొడుతూ పోయారు. ఐతే కేవలం ఈ హార్రర్ ఎమోషన్ తో  టెన్షన్ ని ఇంటర్వెల్ కి చేరేస్తే అది డొల్లగా వుండొచ్చు. అందుకని కథలోనే, పాత్రలోనే  వున్న లవ్ ఎమోషన్ ని కూడా సమాంతరంగా ఇంటర్వెల్ కి  పతాకస్థాయికి చేర్చి సజీవం చేశారు విశ్రాంతి దృశ్యాన్ని. ఎబ్బీతో ఐరనీ  తో ప్రారంభమైన  ఈ మిడిల్ వన్ విభాగం,  రే తో బలీయమైన లవ్ ఎమోషన్ తో ముగిసింది. ఎబ్బీ ఇంకా జీవితం హాయిగానే వుందనే భ్రమల్లో వుంటే, ఇక జీవితం లేదన్న వాస్తవంలో రే వున్నాడు. పాత్రలతో ఈ కాంట్రాస్ట్ – ఈ ద్వంద్వాలు కూడా ఇంటర్వెల్ దృశ్యాన్ని నగిషీ చెక్కాయి.

***

       స్క్రిప్టులో రాయలేదు గానీ, ఈ ఇంటర్వెల్ సీను ఓపనింగ్ లో,  మార్టీ బతికే వుండడంతో రే కారు దూకి  పారిపోయే ముందు, రోడ్డు పక్క  ఎరుపురంగు డామినేటింగ్ గా మూడు హోర్డింగ్స్ వుంటాయి.. ఇది ఈ సీనులో కల్పించిన నిగూఢార్ధం. మూడు ఎరుపులు అంటే మూడు రాబోయే ప్రమాదాలు. ఇలాటి  ఒక హోర్డింగ్ పక్క నుంచే  వురుకుతాడు. ఆ మూడు ప్రమాదాలు – వాస్తవాలు తెలుసుకోకుండా ఇప్పుడు తను పాల్పడే చర్యలద్వారా- 1. సమాధిలోంచి మార్టీ రివాల్వర్ని గురి పెట్టడం, 2. మార్టీని సజీవ సమాధి చేస్తూ తను హంతకుడవడం, 3. విస్సర్ తప్పించుకోవడం. ఈ మూడు ప్రమాదాల్ని కొని తెచ్చుకుంటున్నానని అతను తెలుసుకోవడం లేదు. మొదటి ప్రమాదాన్ని అదృష్టం కొద్దీ తప్పించుకున్నాడు : ఎబ్బీ రివాల్వర్ని శవం జేబులోపెట్టి పాతి పెట్టేద్దామనుకుంటే, శవం లేచి అదే రివాల్వర్ గురి పెట్టింది. 16వ సీన్లో విస్సర్ ఆ రివాల్వర్ని తస్కరించి చూసినప్పుడు,  అందులో మూడు గుళ్ళున్నాయి. ఒక గుండుతో మార్టీని చంపి వెళ్ళిపోయాడు. ఇంకో గుండు రే కాలికి తగిలి పేలింది. అంటే మిగిలిన మూడో గుండు రివాల్వర్ లోనే వుండాలి. సమాధి లోంచి మార్టీ పేల్చాలని మూడు సార్లు ట్రిగ్గర్ లాగినా పేలలేదు. సిలిండర్ లో అది ఇంకో ఛాంబర్ లో  వుండుండాలి. షోలే  గబ్బర్ సింగ్ – అబ్  తేరా క్యాహోగా కాలియా-  లాంటి సిట్యుయేషన్ అన్నమాట. అలా బతికిపోయాడు రే!

***

వి

       విస్సర్ మార్టీని చంపే  19 వ సీనులో, మార్టీ సేఫ్ ముందు కూర్చుని డబ్బు తీస్తున్నప్పుడు ఒక నిగూఢార్ధాన్ని గుర్తించాం. హై యాంగిల్లో మార్టీ వెనకాల టాప్ లో, రెడ్ కలర్ లైటు కాంతి పర్చుకుని వుండడం, దాంట్లో నల్లటి గడుల్లాగా నీడలు వుండడం, అలా ఆ రెడ్ కలర్ అతడి చావు రక్తపాతంతో వుంటుందని సూచించడం, నల్లటి గడులు అతడి పరలోక ప్రయాణం అంత సాఫీగా వుండదనీ, కష్టాలతో కూడుకుని వుంటుందనీ చెప్పడం.
 

        ఇదంతా ఇంటర్వెల్ సీన్లో రూపం ధరిస్తుంది. విస్సర్ చేతిలో మార్టీ పూర్తిగా చచ్చిపోతే బావుండేది. కానీ బతికి రోడ్డు మీద ప్రాకడం, షావెల్ ఎత్తి రే చంపాలనుకోవడం, అలా కాదని కారుతో ఢీకొట్టి చంపాలనుకోవడం, అలా కూడా కాదని గొయ్యి తీసి అందులో పడెయ్యడం...చావడానికి అతడికిన్ని చావులు. సేఫ్ దగ్గర చూపించిణ  ఎరుపు నలుపు గడులు ఈ జీవన్మరణ పోరాటానికి సింబాలిజం అయితే, ఇప్పడు సమాధి దగ్గర వ్యవసాయ భూమి కూడా అదే గడులు తీసి వున్న దృశ్యంగా  ఎదురవుతుంది (ఫోటో చూడండి). ఈ మొత్తం ఇంటర్వెల్ సీను లో ఒక్క డైలాగు కూడా వుండదు- చిట్ట చివర సమాధిలోంచి మార్టీ అరుపులు తప్ప.  డైలాగులు వుంటే సీను చెడిపోయేది. 

          టైం అండ్ టెన్షన్ గ్రాఫ్ లో టెన్షన్ క్రమం పైనంతా చూసుకుంటూ వచ్చాం. టైం స్పాన్ చూస్తే,  ఈ మిడిల్ వన్ విభాగం 30 నిమిషాలతో వుంది. పది సీన్లున్నాయి. ఈ పది సీన్లతో   30 నిమిషాల్లో టెన్షన్ గ్రాఫ్ పది మెట్లు ఎక్కింది. సగటున మూడు నిమిషాలకో మెట్టు. అంటే ఎంత పకడ్బందీగా కథనం వుందో అర్ధమవుతోంది.

***

    టెక్నికల్ గా షాట్స్ తో ఈ దృశ్యం లయాత్మకంగా వుండడాన్ని కూడా గమనించ వచ్చు. మొత్తం ఈ ఇంటర్వెల్ సీను 48 షాట్స్ తో వుంటే, ఇందులో ఓపెనింగ్ లో మూడు ఎస్టాబ్లిష్ మెంట్ షాట్స్ తీసేస్తే, ఆతర్వాత ఒక లయగా వరసగా రే పాయింటాఫ్  వ్యూ షాట్స్, రే మీదికి ఫోకస్ షాట్స్ పది వరకూ మార్చి మార్చి పడతాయి.

          మార్టీ ని ఎంటర్ చేస్తూ ఎస్టాబ్లిష్ మెంట్ షాట్స్ వేశాక, ఒక వరసలో రే క్లోజప్ షాట్స్,  పాదాల మీద ఫోకస్ షాట్స్ మార్చి మార్చి పడతాయి. 

          మళ్ళీ సమాధి దగ్గర ఎస్టాబ్లిష్ మెంట్ షాట్స్ తీసేస్తే, హైషాట్స్ – లో షాట్స్- క్లోజప్స్ మార్చి మార్చి పడతాయి. 

          ఈ లయాత్మక షాట్స్ కంపోజిషన్ ని సన్నివేశం లోని ఆయా ఉద్విగ్న క్షణాలు డిమాండ్ చేశాయి. ఒకటి గుర్తుంచుకుంటే, ఇలా ట్రాడిషనల్ షాట్స్ తీసిన సినిమాలే కలకాలం నిలబడతాయి. జూములు, రివాల్వింగులు, ఏరియళ్ళు వేసి, ఎడిటింగులో  స్వైపులు, స్ప్లిట్లు, రాంపులు వేసి చూపిస్తే టెక్నాలజీ అదిరిందని అన్పించ వచ్చు- అందులో జీవం వుండదు. డ్రామా పండదు. ఎక్కువకాలం నిలబడదు.                     

***

       మిడిల్ వన్ బిజినెస్ ఏమిటి?  ఏర్పాటైన గోల్ కోసం ప్రధాన పాత్ర పోరాటం  చేయడం, పోరాటంలో వ్యతిరేక శక్తులతో తలపడడం, యాక్షన్ రియాక్షన్ చర్యలకి తెర తీయడం, అంతకంతకూ వెళ్లి మిడిల్ వన్ ఎండ్ లో,  అంటే ఇంటర్వెల్లో అగాథంలో పడ్డం. 

          ప్రధాన పాత్ర విస్సర్ ప్లాట్ పాయింట్ వన్ దగ్గర ఏర్పాటైన  గోల్ కే ట్విస్ట్ ఇచ్చి గొప్ప గేమ్ ప్రారంభించాడు. మార్టీని చంపి ఎబ్బీ మీదికి తోసేసి వెళ్ళిపోయాడు. ఇది అప్పర్ హేండ్. వెళ్తూ లైటర్ ని మర్చిపోయాడు. ఇది లోయర్ హేండ్. రే శవాన్ని మాయం చేయాలనుకున్నాడు. ఇది విస్సర్ అప్పర్ హేండ్. శవం లేచి కూర్చుంది.  ఇది విస్సర్ లోయర్ హేండ్. లేచిన వాణ్ణి రే సమాధి చేశాడు. ఇది మళ్ళీ విస్సర్ అప్పర్ హేండ్ ముగింపులో.  కానీ  అతను హత్యా స్థలంలో మర్చిపోయిన లైటర్ కి సంజాయిషీ చెప్పుకోవాల్సి వుంటుంది. ఇది ముగిపు కొచ్చేసరికి అతడి బ్యాడ్ కండిషన్. ఇలా అతడి క్యారక్టర్ ఆర్క్ అప్ అండ్ డౌన్స్ తో బాగా ఎస్టాబ్లిష్ అయింది. 

          ఇలాటి పకడ్బందీ కథనంతోనే మన ఇన్వాల్వ్ మెంటు పెరిగి -  అబ్బా,  ఇలా కాకుండా ఇలా జరిగుంటే బావుండదన్న భావోద్వేగాలకి లోనవుతాం. అప్పుడు సదరు బాధిత పాత్ర పక్షం వహిస్తాం. మార్టీ బతికున్నాడని తెలిశాక,  రే గనుక ఒక్క క్షణం భిన్నంగా ఆలోచించి వుంటే,  అతను హంతకుడయ్యే పరిస్థితి ఏర్పడేది కాదు. ఎబ్బీయే  షూట్ చేసి వుంటే ఆమె తన రివాల్వర్ని  అక్కడే పడేసి ఎందుకుపోతుంది?  ఈ ప్రశ్న వేసుకుని వుంటే, ఎవరు షూట్ చేశారో మార్టీ నోటి నుంచే చెప్పించి వుండేవాడు. అప్పుడు మార్టీని హాస్పిటల్లో పడేసి, విస్సర్ ని పోలీసులకి పట్టించే వాడు. ఒక్క క్షణం – ఒక్క క్షణం అతనిలా ఆలోచించలేదు...
          దీంతో మిడిల్ వన్ విభాగం ముగిసింది.

(సశేషం)
-సికిందర్ 
ఒరిజినల్ సీన్ కాపీ కోసం ఇక్కడ క్లిక్ చేయండి